☆SILVER ZUNGBUN☆ - 16 By Dingdi Pachuau

☆SILVER ZUNGBUN☆ - 16 By Dingdi Pachuau



Jan ni 9-ah chiah ka insawn chhuak leh ta. Misualate ka hlauh ém vàng ni lovin ka chhûngte neihchhunin an tuar ve ka duh loh vàng a ni. Anni hi chu, ka hlau over tawh bîk lo vang, ka rilru a fîm ve tawh tlat. Tunah erawh an thu ka awih phawt ang; mahse, a hnu lamah erawh chuan...



Bungrua a la awm sa vek vàngin ka thawmhnaw chauh ken luh a ngai a, a harsa lo. Ka puin min thlah a, Princess-i kan hruai ve bawk. Ani lah chuan nuam a ti khawp mai a, in luah hrang tih awmzia a la hre thiam vak lo va, an inah ka haw leh tùrah a ngai tho.



Dàwrah kan lêt leh a, Felite pahnih pawh an lo buai zak zak khawp mai. Dàwra kan lût pawh min lo chiauau hman lo, kei pawh ka buai ve nghâl. An pafa chhuah lai pawh ka hre lo.



Chhùn chawlh laiin Mary chuan," Senior-ate pafa lah chu kan lo chiauau  hman loh bâkah melh pawh kan lo melh hman lo a nia, vawiin zet chu kan buai a ni," a ti ham ham a.



"Nia, ka mitsìr thei țâwk țâwk chauh a nia, ka va hah tak ém! An pafa lo kal khân min  tihahdam lo tlat, ka hmuh țhat hman loh vàng a ni," Feli pawh chuan a lo ti ve a.



"In lo buai lutuk kha ka inthiam lo tawp, ka in luaha kan kal hmasak vàng kha a nia, keima thiam loh vek," ka lo ti a, ka inthiam lo tak tak.



"A ho lutuk! Buai deuh châng a awm ang chu, in chu i luah leh tawh dâwn em ni?" Feli chuan a ti a.



"Aw."



"Țhat hlauh chu, chaw ei khâwm nân."



"Nia."



"Kan ei khâwm hunah Mary hian pawisa tum vek se a țha ang, ani nula hausa, Bill Gates-a aia hausa tawh a ni bawk a, a tân chuan eng tham a ni nâng," Mary melh ralh chuan Feli chuan a ti leh sak a.



"$ 5000 ka khâwl tawh, ka rilruin."



Nui chung hian," I pite chu tihtîr tak tak la?" ka lo ti a, ani chuan," Nia, an hman lo ve thei lutuk a; mahse, lovah an zo tawh a, an ti hman ve tawh ang chu. Feli, tih dàn min hrilh rawh aw, ka thawnna tùr address zawng zawng pawh min hrilh a ngai ang," a ti a.



"Tehréng; mahse, tlêm min sihchhuah ve ang a?"



"Lungngai mah ta che, ka tluan phawt chuan sihchhuah lutuk ang."



Tlaiah keimahin ka haw hnang hnang a, nimin tlai nèn chuan a dang ta zak mai. Niminah kha chuan car-ah ka chuang asin, ka puin min rawn hruai a.



In ka thlen veleh ka kalh leh nghal vat. Ka hlauh ém ém vàng ni lovin ka fîmkhur, ho têah chêtsual ka tum lo.



Eirawng ka bâwl peih lo kher mai, ka țhu vang vang phawt a, peih lo zet chuan ka tho ve leh ta țâwk.



Kawngka a rawn ri thut chu ka phu nasa kher mai, ka dekchi ken ka thlauh bawl.



Ka chhàn lawk loh avang chuan kawngka chu rawn ri lehin," Novi, kawngka lo hawng teh," ka puin a tih ri ka hriat chuan ka thaw huai.



Ka dekchi thlauh ka chhar phawt a, kawngka chu ka va hawnsak. Polythene hian eng emaw ni hi a khai a, tûn ang hunah eng nge maw a lo tih dâwn ni?



"Lo lût rawh." Ka aw khùr miah lo ka làwmzia mai chuh!



"I haw-na a rei tawh em?"



"Rei lo."



A lo nia!



"A va làwmawm ve! I rawn buai phah ta hrep a nih hi," tiin polythene chhûnga a thil rawn ken chu ka en a.



"Phawrh la, tihlum pawh a ngai tawh lo ang."



Tiffin lian zetah chuan chawhmeh chi  nga vêl zet leh chaw tam fê hi a lo awm a, a la sa țha khawp mai lehnghal a.



"Han buatsaih la, ei ang, ka ril a țâm tawh a nia."



E, hetah chaw ei ve nghâl a tum maw?!! A rawn ken tam viau chhan pawh hi a ni chiang mai.



Ngawi rengin chaw chu kan ei a, ka ei tam phian mai. Chawhmeh a tui si a, ka puar mah mah.



Kan chaw eina ka sil fai lai chuan," Motor-ah khian chawhmeh tam vak lo ka la dah a, naktûk zîng siam chu a daih daihin ka ring," a ti leh sup a.



Ka pu hian sawi lang miah lo mah se, min ngaihtuah tak zet a ni tih a hriat theih viau. Sawi lang duh miah lo mah se, a chezia leh thil tihah a tilang tho bawk si.



"Ka lâwm e, ka pu."



Min rawn hnaih nghal dâwrh mai. Min tiphu zawk alawm.



"Min 'pu' tawh lo tùr khân ka hrilh tawh chein ka hria."



Nia, ka lo theihnghilh leh tawh, thlâk hi har ka ti alawm, bâkah, kei aiin a upa hle bawk si.



"Aw...le...Lân."



Ka sil zawh chuan motor-a chawhmeh chu kan han la a, tiffin ka sil fai chu keng chho pahin motor-ah chuan ka dah nghâl bawk a.



"Thil thleng a awm chuan min hrilh ziah ang che."



"Aw le."



Min en vang vangin," Awlsam zeta i 'aw' zung zung hian ka ringhlel che," a ti ta nghut a.



Ka nui sak ringawt a. Nia, a thu ka awih dáwn lo tlat si a, chhàn pawh la tum lo, dâwt ka hrilh leh dâwn si a.



"Mahnia awm hian i hlau lo ang maw?" a ti leh a.



"Hlau lo ang," ka ti a.



"Nih, message kha an la rawn thawn țhìn che em?"



Chu zawhna zet chu, chhàn ka duh loh ber a ni.



Vànneihthlâk deuhin ka phone a rawn ri ta hlauh. Ka'n en a, LMa a lo ni a.



"Hello?"



"In i luah hrang tawh tih min hrilh hauh lo," a rawn ti nghal a.



"Kan la inhmu hlei nem."



"Phone tal pawhin?"



"Hei ka hrilh che," tiin ka nui a.



"A nih tak chu, rawn lèn nghal ka duh tehlul nèn, ka hman lo tlat mai a. In thar luah lawm nân ka rawn lèn hunah eng nge ka rawn ken ang?" tiin min zâwt a.



"Engmah a ngai lo."



"Ngai, ka duh duh a ni mai, ka rawn call zawk che, a nih leh aw, bye," tiin a phone chu a hmet tàwp ta nghal a., a buai hmel khawp mai.



"Tu nge a?"



"LMa maw le."



"Inbual rawh, ka lo awm ang," a ti leh ringawt a.



Khua a vawh avàngin tuilum lo chuan ka inbual ngam hlei nem. Intleuh zawk chu ka duh khawp mai.



"Tui ka'n chhuang lawk ang e."



"Chuti, thingpui sen hâng ka hlawh hman dâwn chu."



No khat lek chu a so rang khawp mai. Ka thlit thuai a, ka va pêk chuan a phone a lo en ngur ngur a.



"Dawhkàna hi ka dah aw."



"Kal rih lo teh." Lài zetin ka ding a, a hnuah a bul hnai lo deuh zâwk țhutnaah chuan ka țhu a.



"Hmeichhia rin harsa ka tih ém ém chhan hi i hria em?" a ti ta daih a.



"Hre lo." Ka hre deuh nain sawi lan kher ka duh lo.



"Min hringtunu hian kan têt laiin mipa dang a ûm a, zah hre rual ka nih tawh avàng leh ka pa ka khawngaih avàngin hrehawm ka ti tak zet țhìn. School-a kan aia ute'n min chhaih țhìn kha hrehawm ka ti ber, țhian pawh ka kawm tam loh phah."



Âtei'n a sawi nual tawh avàngin ka hre deuh.



"Ka bialnu hmasa berin mipa dang nèn min kawp a, a hnua mi thung chu mipa dang nèn an mu dùn lai ka hmu a ni. Chu vàngin, ka tân chuan hmeichhia hi rin in har tak zet."



A lo nih teh hrep chu a.



"Hmeichhia kan inang vek lo, mipa pawh in inang vek lo ang thovin. Fel tak in awm a, sual tak an awm bawk. A sualate vàngin a țhate kan hmu sual fo," ka lo ti thung a.



"I tidik fuk fuk hle mai."



"Thil dik chu ka hre ve țhìn tho alawm," ka ti a.



Thingpui chu a dût hlak a," I tui chhuan pawh chu a sa tawh ang, inbual la, ka haw ang," a ti a.



Rei ka inbual lo. Ka inbual chhûng chuan eng nge a lo tih pawh ka hre lo, phone a lo khawih a nih duh hmel.



"Naktûk chawhnuah ka zin leh a ngai dâwn tlat mai." Min hrilh ni chiah pawhin ka hre lo, a sawi ve mai mai niin a lang.



"Khawiah maw?" A chhûngte bulah khân a zinna tùr pawh a hrilh ngai loh kha, min hrilh bîkin ka ring chuang lo.



"Ramrî-ah." Min hrilh thui lo khawp mai.



"I thang rei ang em?"



"Chin hriat loh."



 A phone chu en vung vungin,"I hlau lo tak tak ang maw?" a ti leh daih a.



"Hlau lo ang, mangchhia pawh ka mang ngai tawh hlei nem."



"Ka hrilh che kha, eng thil pawh thleng se min lo hrilh vat ang che, khawiah pawh awm mah ila, ka rawn kal nghal ang."



"Aw le, ka lo hre reng ang."



A ding ta a, haw a tum tawh a niang.



"Ka chhûngte leh kei tih loh, tumah ring suh ang che. I bul hnaia i țhiante pawh, tu pawh rawn hnimhnaitu che apiang tiamin, lo ring suh ang che," a ti leh a.



Min chah ngun ta malh malh hle mai.



"I phone i bulah dah reng ang che."



"Aw le, ka pu."



Min rawn manbeh chuan ka thu sawi sual ka hre chhuak chiah; mahse, a tlai tawh lutuk.



Rang zet hian ka hnial hman hmain min rawn fâwp chawt. Min fâwp nghal bawrh bawrh a, kei pawhin lo dan chu ka tum chuang lo, dan ngaihna pawh a awm lo va, fawh lêt erawh ka tum hran lo.



Min fawh dàn chu thlâkin dam takin, râwp zetin min fâwp ta thung, ka chhàn lêt a phût a ni. Hei chuan ka thluak a tibuai ta chiang khawp mai. Rilru pângngai min puttîr thei lo, ka inhriatchhuah meuh chuan kei pawhin ka lo fâwp lêt tàwn táwn tawh.



Mipa ka la fâwp tam lo hrim hrim a, hmul ngah tak, khabe hmul leh biang  hmul nei phei chu ka la fâwp miah lo va, a nawm pawh ka ring ngai lo; mahse, a lo dik lo tawp tih ka hre chiang ta ngang mai. A zei mai bâkah min fawh dàn a thiam, min hruai dàn pawh a thiam, ka hnar thei thlâwt lo.



Kan inthlah meuh chuan ka thaw a chham țêp, ka thaw hawk hawk. Ani pawh a ni ve tho, kan thaw a ring dùn khawp.



Ka zah avàng chuan ka hmai a sa pup pup mai, amah pawh ka en ngam lo. Ka pu kha ka fâwp lêt ve ta a nia, ka thinphu a rang mah mah. Ka marphute lah chu an phu zawih zawih ni maiin ka hria.



"Tunah tak khân i thinphu kha, ka tân a phu a ni."



A dik ang, kan infawhna vàng vek. Hetiang hian ka awm ngai lo asin, Misuala, mi sual a nih hmaa kan inkawp ve lai pawh khân kan infâwp ve fo; mahse, tûn ang hian ka awm ngai lo.



"Ka thu sawi kha theihnghilh suh ang che. Engkim hi i tân vek a ni."



A tàwp nân min fâwp leh vang vang; mahse, ka chhâng lêt ve dâwn chiah tihah a tàwp ta daih.



"Muttui le."



Hre thiam lo zet hian ka en ringawt. A chhuak a, kawngka pawh a rawn khâr nghal thlap, engati nge ka fawh lët kha a duh lo em ni le? Mak ka ti tawp. He pa hian min duh ni khân a dawi sia; mahse, ka fawh lêt kha a duh miah si lo.



Mut hmunah rizaiin ka inkhuh hlûn a, nichin lawka thil thleng kha ka ngaihtuah lêt lo thei lo. Ka chhàn lêt ve dâwna a tàwp ta daih kha, ka zak ngawih ngawih, rizai chu nghet zeta țhâmin ka seh nghek nghek ringawt. Awmzia erawh a awm tam lo khawp.



Kan infawh avàng khân min ta neih deuha min rawn phone ve ka ring a nia, a teuh lo. A reh vawng vawng, a zin bo chiang hle a ni, vawi khat tê pawh min rawn call lo, message takngial pawh ka dawng lo. Ka fawh lêt vena khân amahah engmahin hna a thawk ve lo a nih hi, kei lahin ni tin zan tin ka ngaihtuah lo thei lo ta chu a nih hi.



A zin ațanga ni thum a liam hnuah message ka dawng leh a.



*I ti țha hle mai, i lo inring tawh dâwn nia. Ka ta chu ka nei lêt leh tawh dâwn a ni*



Zahna tlachham lutuk. Tu tâ mah ka ni lo, a tâ pawh ka ni hek lo, ka ni ngai hek lo ang. Mahni pawh inlan ngam hlei lo, message-a invau reng mai, ka kham lutuk tawh.



A dang a lo thleng leh.



*Tumah hrilh suh ang che, i hriat kha, thil pawi thleng thei tùr chu. Princess-i kha a fel hmel reuh kha le, titipui pawh a nuam e*



Ka rei! He pa hian thil engkim a lo hriain Princess-i hial pawh a lo titipui tawh a nia! A inrawlh thûk ta mah mah a ni. Ka mawhphurhna a sâng ta hle mai, Princess-i an khawih hlauh chuan...ni lo, eng thil mah a chungah a thleng lo ang. Thil pawi tak a thlen hma hian an thu ka zawm a ngai, thil pawi a thlen hnua mi sual man hi awmzia a awm lo, a pawi tùr a pawi zo tawh țhìn.



Eng pawh ka chungah thleng thei a nih vàngin ka rohlu neihchhun, ka nu silver zungbun min pêk kha, ka dah țhatna ațanga la chhuakin ka en vang vang a, hei chauh hi ka nu min rochun ka neih tawh a ni, ka bo a nih pawhin he thil hi chu a bo ve thei lo ang. Mi tân hlu lo mah se, ka tân chuan a hlu tak zet.



Lehkha them têah eng emaw hi ka ziak a, zungbun chuan dah hnanin ka chhìn ta thlap a, a bo tùr a ni lo.



Dàwr ațanga ka haw chu a vawt ka tih avàngin ka khùr bauh bauh a, blanket-a inkhuh lûk ka va châk tawh tak!



Ka in luahna pêng ka thleng tùr chu ka hnung lam ațang hian bân tha chak zetin ka hmui a rawn hup thut a, ka țê țhat nain a hup hneh lutuk a, tumahin an hre hman lo ang.



An hmel ka hmu thei lo, an hmai an tuam tlat. Pahnihin min chelh betin pakhatin ka ke lamah a vuan a, kan thlang lawkah motor a lo ding niin, min zâwn thla dàwr dáwr a, mi pahnih mai pawh an nih loh avàngin tâl nasa viau mah ila min pawm bet hneh lutuk. Chutah, motor ațangin pakhat a lo chhuak a, ka hnarah rawmawl hnawm deuh hian min rawn hup a, rei lo teah ka hriatna a mang chhuih a, engmah ka hre ta lo.




*A THIM ZÂWNGA THIL THLÌR HIAN BEISEINA MIN HLOHTÎR, A ÊNG ZÂWNGA THLÌR HRÂM HRÂM TUM TÙR, HARSA DEUH PAWH NI SE*



Group join duh tân



https://www.facebook.com/groups/389869478234571/