☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...
☆SILVER ZUNGBUN☆ - 18 By Dingdi Pachuau
Rilru fîm tak ka pu hlei thei lo. Novi mangan tùrzia mawlh leh țanpuitu a nei lo tùr mawlh chuan min tinâ, puitu tùr a hmu dâwn mawlh si lo. A luhlul vàng leh ât huai vàngah ka puh thei lo ang, a chhan chu keini chhûng tel meuhin an vau tawh tlat. Kan nat ve duh lovin amah a inbarh lût ta rêng a ni a, chu mawlh chuan ka thinlung a tihnat bâkah ka thin an tirim, hmeichhe âwm nêm zâwk vau chîng hi ka ngaisang lo sa hrim hrim bawk.
A hlau ngei ngei ang, a chhan chu tlàn bosan duh khawpin a chungah nuam an tàwl a, tu hmeichhiain nge hrehawm ti lo tehlul ang? A rilru beidawng tawh hian tlàn bosan a peih tawh lo a niang, bâkah, engtiang fakauvin nge keini chhûng hmang hian an vau ang tih ka hre châk ngawih ngawih. A chunga thil thleng hi ka farnu Âtei chunga thleng ni ta se...ka thaw chhuak hawk.
Țhu hlei thei lo chuan ka ding a, ka vei tawn chhên. Ka inthiam thei thlâwt lo, ka chunga rinna nghat vek ngam lo khawpin kei hian ka siam a ni. Min ring ve țan dêk dêk a, kei lahin chu chu remchângah lain ka lo zuan ve chat a, a pahrawnte pahnih ang ni ve maiin ka inhre hial.
"Âpa..?"
Princess-i lo tlân lût chuan ka chàwnah a rawn vuan vat. Ka fanu hmel ka hmuh chuan ka thil ngaihtuah chu dah bovin ka lo ban vat a.
"Ka lal fanu duat hi, i lo dam țha em?" tiin a biangah chuan ka fawhsak zauh a.
"Âpa, i lo haw tawh bawk a, Au Novi inah khân kal leh ang aw," a ti ta daih.
"Min ngai lo em ni a?"
"Ngai e, Au Novi pawh ka ngai tho."
Kha hmeichhe luhlul leh țawng tam lo zet khan ngaitu a lo nei ve tho a nih hi. Naupang chhawnchhaih thiam tak chu a ni lo chiang, naupang ngaihnat chi a ni pawhin ka lo hre lo asin le; mahse, Princess-i hian a lo ngaina phian a nih àwm hi.
"Au Novi chu a zin rih a, a lo haw hunah lêng zâwk ila?" tiin ka thlêm ta ringawt.
"A zin maw? Âpa, a zinnaah chuan zin ve ila?"
"Tunah hian maw, tih tùr țûl lutuk ka nei a, zin ka ngai ve tho bawk a, Au Novi chu ka rawn hruai haw zâwk ang chu?"
"Âpa, naupang kal vena chi a ni lo mi?" Ka fanu han finzia hi chu aw.
Tûkțhuan ei lai chuan kan ngawi reng hlawm a, kan rilrua thil awm erawh a inang vekin ka ring. Princess-i erawh a țawng leh zauh zauh a, a nî pawh hi ka pain a lo hrilh tawh tih a hriat, a ngawi vang vang reng tlat.
"Engtin nge hma lâk i tum?"
Ka ngawi vang vang phawt a, chutah," Ka hre thiam rih lo, vawiin chu ka chhuak phawt ang a, chanchin ka thlithlai ang," ka ti ringawt.
Chaw ei khamah chuan ka chhuak a, chaw ei hmaa ka inbual tawh avàngin ka harh sawt a, rilru pawh a fìm deuh phahin ka hria.
Dàwrah ka pêng chhin a, a lo awm dâwn lo tih hre mah ila pèn ka châk rêng rêng. A țhiante pahnih kha an lo awm a, pakhat chuan customer a buaipui avàngin pakhat zâwk chuan min lo chiauau a.
"Ka pu, eng nge i duh?"
"Ka lo pêng lawk mai mai. Novi a lo la kal nange?" tiin a thuphungin ka zâwt mai mai a.
"Aw, a zin daih a."
"Engtin maw?!!!" Mak ka ti tak tak!
"Nizàn dâr 7 vêl khân a message ka hmu a, a zin thut a ni ber. A țhiante motor remchâng zet a hmu ni awm tak a ni," a ti a.
"A nih tak chu. Ka lo hre miah lo va."
"Pi Âtei a hrilh chuan ka ring. Eng vànga zin thut nge a nih ka zawh chuan min rawn reply tawh lo va," a ti leh barh barh a.
Nizàn dâr 6:30 khân a ina a haw loh thu hrilhin min rawn phone a nih kha. Dâr 7 vêla a țhiannuin message a dawn chuan a phone chu an hmansak tihna a nih chu, Novi khawsak dàn, a țhiante leh a bula khawsa hnaite chu min lo hre vek a nih chiah hi.
'Ngawi tak rawh u, min hrian chian lohzia hi in hre mawlh ang' ka ti rilru mawlh mawlh a.
Dàwr ațanga ka chhuah hnu chuan ka țhiante hmun hrang hranga mite chu ka han phone kual a, chanchin an hre mial em tih ka zâwt a, an lo hre bîk lo; mahse, Champhai lama ka hriat chian tak leh ka mi rin tak Țana chuan ka rinhlelhte pahnih chu Champhaia an awm reng thu min hrilh thung. Chuti a nih chuan, an pahnih tel lovin an mi chhawrte an chê tihna a ni. Champhaiah pawh an la thleng chho lo thei a, Lungleiah pawh hian an la awm reng thei a nih chu.
Ni khat a liam a, chanchin thar hriat tùr a awm lo. Ka rilru leh ka thluak erawh a chàwl lo va, kei pawh ka chàwl hek lo. Hrehawm taka Novi a awm tùr ka ngaihtuahin ka rilru hi a tâwt tlat a, ka chàwl thei lo.
Rema erawh chuan chanchin min rawn hrilh zauh zauh a, ka thil chhui a hnêna ka hlan tâk lamah chuan hma an sâwn hret hret a, a țha viau e, phîn darh vek rawh se.
Mi sual pahnihin Champhai an chhuahsan si loh chuan Novi hi Champhai lamah an hruai chho ngei ngei ang, chu chu ka rin dàn a ni. Eng nge man an duh ém ém chhan hi ni ang le? An hming chhiat an hlauh vànga man tùr ni se, Police-ah FIR a theh lût si lo va, an chunga phuba lâk nân thâ a thawh hek lo. Chuti a nih chuan, eng emaw vàng takin Novi hi an duh a niang, phuba lâk nân nge an tisa châkna tihpuitlin nân? Heti tak maia hmeichhe pakhat an buaipui hian chhan a nei tùr a ni.
Țana chu ka phone a, Novi pahrawn Pu Lawmsiama leh Rina chanchin ka zâwt chiang leh zual a. Ani pawh chuan a hriat ang angte chu min hrilh a.
Novi nu kha Lawmsiama nèn an inneih khân Novite inah hian Lawmsiama hian a va awm fin tawp a, Novite in hi a hmun a țhain a nuam hle, an building pawh a țha. A chung lam an luah a, a hnuai lam erawh office leh dàwr atân luah a ni. In hmun hi Novi nu hming emaw Novi hmingin emaw a awm ang a, chu chu a thih tâk si-ah chuan Lawmsiama hian a hminga dah a tum nia a rin thu min hrilh a, kei pawh chuan thil ni thei tak tùr niin ka hre ta.
Champhai lama duty ka dahte chu ka be âwl lo va, chanchin tharlâm hre lova ka awm reng lai chuan zînglam dâr 3-ah pakhatin min rawn phone ta hlauh.
"Ka pu, tunah khãn motor pakhat rinhlelhawm deuh, chak zeta tlân ka hmu a, a number erawh ka chhinchhiah e, gatekeeper pawhin lo tidingin a lo check miah lo."
Police ve ve an ni a, an tlang parh thei ang chu.
"Lo ûm zui nghal teh aw, a number i hriat chuan Champhai lam lo bia la, lo en zui bawk rawh se."
Tunah chuan ka chan a țha ve țan tawh ang, mi sual lam hi chan țha angin lang mah se, tàwp nî an nei ve tho a nia.
Chanchin min rawn hrilh zêl a, motor chu Champhaia lût lova khua pawh awm lohna ramhnuai lam pana a tlàn zél thu min rawn hrilh chuan mak ka ti kher mai. Novi mantute ngei an ni tih an chiang tawh bawk, a chhan chu amah pawh an phur tlat, motor ațanga an hruai chhuak pawh an hmu. Ka rin aiin an hlauhthâwng lo, police tirh an nih vàng a nih ka ring deuh ringawt. Khawiah tak kalpui dâwn ni maw? Mi sual fing tak emaw tih pawh hian chêt sual kheuhna leh fîmkhur sèn lohna an nei châwk.
Lunglei chhuahsan tumin ka insiam a, ka kal ve vat a ngai. Chuti lo chu an lo tirethei hman lutuk palh ang, ka mamawh tùr zawng zawng ka la khâwm vek a, Aizawl leh Lunglei lama ka țhuihruaite hnênah chuan thil awmzia ka hrilh thuak nain min zui tùr erawh chuan ka duh lo, chhangchhiat lutuk chuan thil pawi zâwk a thleng thei tlat.
Champhai lût lo chuan kawng min hrilhna lamah chuan ka tlân zel a, ka tlân chak bawk a, ka țhiante min lo nghahna chu ka thleng thuai. Chulai hmun chu chawlhhmun angreng ve deuh a nia, ka țhiante pahnih chu waiting shed-ah lo țhuin ka va fin ve nghal.
Thil awm dàn min hrilh nghal par par a, tuna kan awmna ațanga km 3 vêlah hian Building biru zet a awm a, belhchian lêm loh phei chuan building a awm tih a hriat miah loh a ni àwm e. Chulai hmun chu mimal ram niin a lùn lo viau a; mahse, lùn lo viau angin lang mah se tlawhtu an awm reng nia. Chu tak chu chu building makna chu a ni. Thil mak la awm leh cheu chu Lawmsiama'n a tlawh peih viau a, khaw chhak lam sumdâwng ni àwm takte pawh an kal fo. Eng nge an tih tumahin an hre lo va, an chhui ngai hek lo. Chu chu ka țhiante sawi dàn a ni.
Chu thu ka hre zet chu, ka nui ru var var mai.
Tuna kan chawlhna ațang hian kawng pêng hnih a awm a, building awmna pêng hi chu mimal ram a nih vàngin tlawhpawh tam a ni lo, gate lianpui a awm bawk a, kawng pawh a țha lo viau. Kawng pakhat ve thung erawh chu khaw dang kalna a la nih vàngin motor pawh a tlân âwl lo, kawng țha pângngai tak a ni.
Rem kan ruat a, Lawmsiama tlawh leh hun tùr chu chàn kan tum a ni. Motor tlân lût chu a awm ngei tih an hria a; mahse, tu nge chuang tih an hre lo thung.
Enthlâk ka duh, a hmunhma hrim hrim pawh chu hmuh ka châk. Chu Building leh ram neitu chu ka țhiante sawi dàn chuan mi hausa pawh a ni lo; mahse, ka ringhlel khawp mai thung.
Ka phone a rawn ri a.
"Novi pahrawn kha inah a awm lo va, office-ah pawh a awm lo," tiin min rawn hrilh a.
He pa hi he kawngah hian kalin tunah pawh hian he buildingah hian a awm ve a ni mai lo maw?
Ka țhiante nèn kan pathum chuan building thlithlai tur chuan kal kan titlu a; mahse, kan lìrthei hi khawiah nge kan dah tâk ang le?
Țhianpa pakhat zâwk Rova chuan rem a ruat a, aniin ka car chu a khalh haw ang a, keini țhian dùnin building leh a chhehvêl kan thlithlai ang. Kan mamawh huna kan hman theih mai tùrin bike erawh chu Waiting shed-ah a dah mai ang.
"An hmuh chuan rinhlelhawmin an hmu ang em?" Kima'n a lo ti ve thung a.
"Hei, en la, huan zau pui pui a awm țeuh hi, heta fehah hian min ngai ngei ang, bike țha tak a ni bawk si lo," tiin bike chu a bêng thak thak a, a nui pah sâng a.
"Phone kan nei a, kan in-contact reng thei bawk, mamawh kan inhrilh zêl ang chu," tiin a ding a," Hun a kal duak duak si a, mahni tlatna mual lam pan tawh ang u," a ti leh a, car chahbi chu ka pe a, ani'n bike chahbi min pe a, a tlân chhuak deuh nghal mai.
Gate chu hawn rual loh a nih vàngin Kima nèn chuan thing hmun ațangin harsa lutuk lovin kan lût a, a hmun chu a rualrem fahran lo kher mai. Chubâkah, luh mai mai theih lohna tùrin gate lo chinah pal atân forget-me-not kûng an phun zui bawk a, keini pawhin kual fêin thing hmun rem lo zet lamah kan luh phah rêng a ni. Hetia kan luh theih chhan pawh hi Kima lo luh rûk tawhna a nih vàng leh a lo chhinchhiah țhat vàng a ni zâwk.
Chu ram chu a awih ve hrim hrim, kawng pawh chu a țantìr lamah zâwl awm duai mah se, a chhengchhe telh telh. Kawngah pawh kal lovin kawng hrûlah hmuh theih loh tùrah zel kan kal a, thâwm pawh kan dìm viau.
Thâwm kan dim avàng leh kan fîmkhur avàngin building chu kan pawh har viau. Dârkâr khat ém chu hmang tling lovin, building hmuh theihnaah chuan kan ding ta vang vang a, kawtah motor pawh a ding.
Chu in, biru tak maia an han sa tlat mai chuan ka ngaihtuahna a tikal thui viau. Eng atân nge an sak ang? Sual rim a nam rum rum thei hialin ka hria, a remchâng ém asin.
"He in hi ka hmuhna leh a awm a ni tih ka hriatna a la rei lutuk lo, Duha min hrilh a nia. Hmeichhia an man kha chhui lovin ûm zui lo phei ila chuan ka la hmu tawp lo ang," Kima chuan a ti sap sap a.
"Duha chu tu nge?"
"Kan țhenawma mi a nia, mi pângngai pha chiah lo deuh niin ka hre nghe nghe. Hlawhfain vawi hnih a kal tawh a, hnim a sâm fai ni àwm a ni. Kan ina a lo lèn țumin a sawi chhuak a, ka awihsak vak lo nain motor ka um zui avàng khân ka hre chiang ta chauh," a ti leh a.
"A nih, in chhûngah chuan awm an tam àwm em?"
"Ka hre lo le, an tam vak lo a nih hmel ka ti ringawt. Mi chhawr an tam viau chuan buaina a tam duh mai mai àwm sia ka tia, bâkah, lût chhuak ka hmu tam lo tlat a," a ti leh a.
Chu in chu a lian lo a nih hmel, kan hmuh theih chin chu lian hek lo i. Kawtah chuan motor a din dànah kal an awm ngei niin a lang.
Ka hawi kual lai chuan thil chê ka hmu tlat, chu chu in piah deuha biru deuh taka mihring ding chu a ni. A duty a ni ngei ang, tuna kan awmna hi tlemin a hmun a sâng deuh a, min hmu thei kher lo ang.
Kima chu kawhhmuh nghalin, heti khawpa an fîmkhura vêngtu hial an dah chuan eng emaw tak chu a awm a nih ka ring nghal mai. Chutih lai chuan motor ri a rawn awm a, kawng chhe zetah chuan a rawn tlán phei bawp bawp mai. Hla angreng viau mah se police motor ngei a ni tih ka hre thei.
Kan thlîr dùn reng a, in kawt a thlen chuan ding dawtin a chhûng ațang chuan hmamhmawh zet hian mipa pali an rawn chhuak a, motor ațang chuan parcel ni àwm tak hi an hlângthla a, inah chuan an zàwn lût ta nghal a.
Eng thil tak ni ang maw? Novi ei tùr thil a ni mai lo ang maw? Hrèn rei an tum viau a ni thei ang em?
Rin aiin an rei phian mai. Kima nèn chuan awmhmun kan siam fel a, kan thlîr vang vang reng ringawt. Tih theih kan nei rih lo, tawngpàwng luhkhung ringawt lovin luhkhung dàn tùr fel tak rèl a ngai.
Khua a tlai lam dâwn ta. Ni pawh a tla ruai dâwn, hetia awm reng chu a dik dâwn lo. Kima hi hawtîr rih ang, ka thil chhui hi kei chuan ka kìrsan dâwn lo, heta țang hian ka hnaih hret hret ang, he in hi belhchian ka duh tlat, luh dàn awlsam tak zawn a ngai.
Kima kal hnu chuan ka rucksack ațang chuan ka mamawh tùr ka phawrh a, tui chu ka in khawlh khawlh phawt a, awmhmun rem taka siamin in chu ka thlîr leh ta vang vang a.
A thim thet thet tihah chuan in ațang chuan nichina mi pali ka hmuhte kha an rawn chhuak ta țhâm țhâm. Parcel dang, a rawng pawh dang daih, a hma aia lian deuh an rawn zâwn chhuak a, motor-ah an dah leh thlap. Ka phone chu ka hmet neuh neuh a, Rova ka text, motor chu lo en zui tùrin.
Khua a thim chiang ta tihah chuan ei tùr ka ken chu ka ei mawlh mawlh a, tui ka in leh pawp a, in hnaih tum chuan ka inbuatsaih ta nghal a.
Fîmkhur takin ka hnaih a, ka thãwm pawh ka dìm viau. Tunah chuan ka hnaih ta viau mai, kawngkapui awmna pawh chiang takin ka hmu thei ta, kawt leh a vêl pawh ka hmu chiang ta khawp.
Mi tumah ka hmu lo, duty pa lah kha in ațang chuan a hla angreng a, ka duhtâwkin in chu ka hnaih thei ang.
Ka pên țan chiah tihah chuan țawng ri ka hriat avàngin ka biru leh vat. Țawng ri chu a lo hnai zêl a, pahnih inbia an ni.
"....lo tlat, doctor chah la,...damdawi lo keng tel tùrin hrilh ang che, syringe pawh aw, ka hlawhtlin hma chu titàwp thei ka ni lo," pakhat chuan a ti a, ka bihthla dêk dêk a, light êng ațang chuan Lawmsiama a ni tih ka hre thei.
Pakhat chuan," A hlauhawm lo ang maw-" a ti dêk dêk a, Lawmsiama chuan vîn zet hian," Thu awih mai rawh," a ti tuarh a, chu pa chu a țawng leh ta miah lo.
Tunah dâr 6: 45pm a ni a, doctor a chah chuan dâr 8-9 vêlah lo thleng ta se, rin aiin a tlai dâwn lutuk loh chu. Thil pawi a thlen hmain fîmkhur taka ka luh a ngai ang.
Chu pa chuan phone-in mi a bia a, pawnah chuan a ding rih a, a fîmkhur lêm lo va, a țawng ring khawp. Fîmkhur a ngaihna tùr a hre hran lo a niang, him tâwkah a inngai a ni ngei ngei ang.
Lawmsiama erawh a lût tawh a niang, a awm tawh lo. Chu pa hmanhmawh loh dàn em em chu, pâwna la awm a tum rih a niang, phone chu a khawih mual mual reng a.
Ka bihrûkna ațang chuan fîmkhur taka chhuakin chu pa hmuh loh tùr chuan kawngka lamah ka tawlh phei a, light chu a èn dàn a fuh viau avàngin ka tân kawngka va pawh chu a harsa lo, ka vànneih asiamin a lo inhawng sa zui.
In chhûng ka luh tak tak hma chuan ka enkual phawt. Camera-te hi a lo dah ru palh ang tih thilthuah ka fîmkhur a; mahse, ka hmu lo. Ka luhna hmasa ber chu room ruak a ni a, cupboard hrawl zet pahnih hi a awm a, tumah an awm lo va, thil dang pawh a awm chuang lo. Light pawh dah a ni chiangkuang lo, room dang light a ring.
Kawngkhàr pahnih a lo awm leh a, pakhat chu a inhawn deuh avàngin choka a nih ka ring, pakhat erawh chu a inkhâr thung.
Lawmsiama kha khawi room-ah nge a kal ang le? Choka chu ka bihthla dêk dêk a, ka hmu lo, a awm lo tihna.
Kawngkhàr pakhat chu fîmkhur zeta hnaihin ka hawng dâwn a, thâwm ka hriat avàngin bang thlâwp zaihin cupboard phênah ka ding.
Lawmsiama chu a kuta thil eng emaw keng hian a rawn chhuak luau a, a hawi kual lo nasa. A thil ken chu hlim hmel zeta enin a nui vur vur, eng tak ni ang maw?
Chokaah a lût a, kei chu a lo chhuahna room-ah ka lût ve thauh thung. Tumah an awm lo chu la vànneihna a ni leh, ka hawi kual a, dawhkàn leh chair a lo awm nual a, room kil lamah chuan parcel a lo awm nual bawk. Nichîna motor-a rawn kalte phurh, an zàwn luh kha a ni ngeiin ka ring.
Dawhkàna thil lo awm chuan ka mit a la nghal viau. Saphu kâwr a lo awm țeuh a, parcel chhûngah chuan eng thil dang nge awm ang le?
Țawng rî ka hriat tâk avàngin bangah parcel phènah ka bet leh rih. Lawmsiama leh phone-a doctor betu kha an rawn lût a, dawhkàn bula chair-ah chuan rawn țhuin Lawmsiama chu a nui deuh huah huah reng a.
"Tuna ka thil tih hi ka hlawhtlin chuan nang chu ka duhsak viau ang che, i țangkai bawk a," a ti huah huah a.
"Mahse, a sign duh lo a ni lo'm ni?" Phone hmangtu chuan a ti a.
"A duh dâwn alawm, duh lo thei lovin ka siam dâwn alawm. I hre mai ang, ka nau. I u hi mi hausa tawntaw ka ni dâwn," a ti leh a, nuamti zet hian a nui leh huah huah a.
Eng emaw sign-tîr chu an tum ngei a nih hi, kan rin dàn kha a dik hmel khawp mai. Unau pawh ni raw sek sek, an thil tih man an hmu ve ve ang.
Chu room-a an awm reng avàng chuan ka chhuak thei tawh bîk lo, ka ding ta reng mai, ke a kham ve lek lek mai.
"Chu, a lo thleng e," a nau zâwk chuan a tih tâkah chuan ka harh kâwk mai. An chhuak ve ve a, kei pawh ka awmna ațang chuan ka chhuah emaw ka chêt sawn emaw a ngai, Novi awmna ka la hre tlat lo.
Room dang luhna ka hmuh loh avàngin ka luh hmasakna ber room-ah khân ka lêt leh a, cupboard phênah bawk ka ding leh. A chhan chu ka chhuah chuan kan intâwkin min hmu thei tlat.
Second rei lo têah room-ah chuan an rawn lût leh a, Lawmsiama leh doctor ni ngei tùr chauh an rawn lût, a nau kha chu pâwnah a awm leh tawh a niang.
Choka kawngkhàr ni lo, room pakhat zâwk kawngkhàr bul chiaha bang mai mai emaw ka tih kha Lawmsiama chuan a hawng ta mai. Kawngkhàr thuhrûk dik tak a ni.
"I lo inngaihtuah harh tawh em-" kawng a khàr tâk avàngin a țawng ka hre chhunzawm ta lo. Kha room-ah khân Novi a awm chiang, a thukru țha hle mai; mahse, kha doctor a koh chhan khân ka ngaihtuahna a rawn luah leh ta zâwk.
Pâwnah fîmkhur takin ka chhuak a, phone hmangtu pawh kha min hnungchhawn záwnga țhuin games a lo khèl ni ngei tùr a ni, a lo ri țak țak mai, mkn hmu teuh lo.
Minute sàwm vêl hnuah an rawn chhuak a, an țawng ka ngaithla kar.
"... ang a, min mamawh tawh kherin ka ring lo," doctor chuan a ti a, ka bihthla dâk dâk a, a hmel chiang taka hriat ka duh.
Lawmsiama ngei chuan," Chuti, motor-ah min lo nghâk mai la, minute tam a ngai nâng," a ti a.
"Damdawi kha a thawh chhûng a rei lutuk lo maithei a, i hmanhmawh deuh dâwn nia, a dang chu a la awm tho nain hman nawn ngai lo tùrin hlawhtlin tum ang che," pakhat chuan a ti leh a.
"A thawk țan tawh ang em?"
Chu pa chuan a phone chu phawrha enin," Minute 10 nghâk la, a bâk a ngai lo ang," a ti a.
Eng damdawi nge an sawi? Novi an chiu em ni? Eng atân nge an chiu ang? Zawhna hlîr mai a ni.
(Nizanah ka net signal a boral, lu na bûra zan rei men thlen awmzia a awm thei lo)
*HARSATNA KUMKHAW DAIH A AWM NGAI LO VE*
Rilru fîm tak ka pu hlei thei lo. Novi mangan tùrzia mawlh leh țanpuitu a nei lo tùr mawlh chuan min tinâ, puitu tùr a hmu dâwn mawlh si lo. A luhlul vàng leh ât huai vàngah ka puh thei lo ang, a chhan chu keini chhûng tel meuhin an vau tawh tlat. Kan nat ve duh lovin amah a inbarh lût ta rêng a ni a, chu mawlh chuan ka thinlung a tihnat bâkah ka thin an tirim, hmeichhe âwm nêm zâwk vau chîng hi ka ngaisang lo sa hrim hrim bawk.
A hlau ngei ngei ang, a chhan chu tlàn bosan duh khawpin a chungah nuam an tàwl a, tu hmeichhiain nge hrehawm ti lo tehlul ang? A rilru beidawng tawh hian tlàn bosan a peih tawh lo a niang, bâkah, engtiang fakauvin nge keini chhûng hmang hian an vau ang tih ka hre châk ngawih ngawih. A chunga thil thleng hi ka farnu Âtei chunga thleng ni ta se...ka thaw chhuak hawk.
Țhu hlei thei lo chuan ka ding a, ka vei tawn chhên. Ka inthiam thei thlâwt lo, ka chunga rinna nghat vek ngam lo khawpin kei hian ka siam a ni. Min ring ve țan dêk dêk a, kei lahin chu chu remchângah lain ka lo zuan ve chat a, a pahrawnte pahnih ang ni ve maiin ka inhre hial.
"Âpa..?"
Princess-i lo tlân lût chuan ka chàwnah a rawn vuan vat. Ka fanu hmel ka hmuh chuan ka thil ngaihtuah chu dah bovin ka lo ban vat a.
"Ka lal fanu duat hi, i lo dam țha em?" tiin a biangah chuan ka fawhsak zauh a.
"Âpa, i lo haw tawh bawk a, Au Novi inah khân kal leh ang aw," a ti ta daih.
"Min ngai lo em ni a?"
"Ngai e, Au Novi pawh ka ngai tho."
Kha hmeichhe luhlul leh țawng tam lo zet khan ngaitu a lo nei ve tho a nih hi. Naupang chhawnchhaih thiam tak chu a ni lo chiang, naupang ngaihnat chi a ni pawhin ka lo hre lo asin le; mahse, Princess-i hian a lo ngaina phian a nih àwm hi.
"Au Novi chu a zin rih a, a lo haw hunah lêng zâwk ila?" tiin ka thlêm ta ringawt.
"A zin maw? Âpa, a zinnaah chuan zin ve ila?"
"Tunah hian maw, tih tùr țûl lutuk ka nei a, zin ka ngai ve tho bawk a, Au Novi chu ka rawn hruai haw zâwk ang chu?"
"Âpa, naupang kal vena chi a ni lo mi?" Ka fanu han finzia hi chu aw.
Tûkțhuan ei lai chuan kan ngawi reng hlawm a, kan rilrua thil awm erawh a inang vekin ka ring. Princess-i erawh a țawng leh zauh zauh a, a nî pawh hi ka pain a lo hrilh tawh tih a hriat, a ngawi vang vang reng tlat.
"Engtin nge hma lâk i tum?"
Ka ngawi vang vang phawt a, chutah," Ka hre thiam rih lo, vawiin chu ka chhuak phawt ang a, chanchin ka thlithlai ang," ka ti ringawt.
Chaw ei khamah chuan ka chhuak a, chaw ei hmaa ka inbual tawh avàngin ka harh sawt a, rilru pawh a fìm deuh phahin ka hria.
Dàwrah ka pêng chhin a, a lo awm dâwn lo tih hre mah ila pèn ka châk rêng rêng. A țhiante pahnih kha an lo awm a, pakhat chuan customer a buaipui avàngin pakhat zâwk chuan min lo chiauau a.
"Ka pu, eng nge i duh?"
"Ka lo pêng lawk mai mai. Novi a lo la kal nange?" tiin a thuphungin ka zâwt mai mai a.
"Aw, a zin daih a."
"Engtin maw?!!!" Mak ka ti tak tak!
"Nizàn dâr 7 vêl khân a message ka hmu a, a zin thut a ni ber. A țhiante motor remchâng zet a hmu ni awm tak a ni," a ti a.
"A nih tak chu. Ka lo hre miah lo va."
"Pi Âtei a hrilh chuan ka ring. Eng vànga zin thut nge a nih ka zawh chuan min rawn reply tawh lo va," a ti leh barh barh a.
Nizàn dâr 6:30 khân a ina a haw loh thu hrilhin min rawn phone a nih kha. Dâr 7 vêla a țhiannuin message a dawn chuan a phone chu an hmansak tihna a nih chu, Novi khawsak dàn, a țhiante leh a bula khawsa hnaite chu min lo hre vek a nih chiah hi.
'Ngawi tak rawh u, min hrian chian lohzia hi in hre mawlh ang' ka ti rilru mawlh mawlh a.
Dàwr ațanga ka chhuah hnu chuan ka țhiante hmun hrang hranga mite chu ka han phone kual a, chanchin an hre mial em tih ka zâwt a, an lo hre bîk lo; mahse, Champhai lama ka hriat chian tak leh ka mi rin tak Țana chuan ka rinhlelhte pahnih chu Champhaia an awm reng thu min hrilh thung. Chuti a nih chuan, an pahnih tel lovin an mi chhawrte an chê tihna a ni. Champhaiah pawh an la thleng chho lo thei a, Lungleiah pawh hian an la awm reng thei a nih chu.
Ni khat a liam a, chanchin thar hriat tùr a awm lo. Ka rilru leh ka thluak erawh a chàwl lo va, kei pawh ka chàwl hek lo. Hrehawm taka Novi a awm tùr ka ngaihtuahin ka rilru hi a tâwt tlat a, ka chàwl thei lo.
Rema erawh chuan chanchin min rawn hrilh zauh zauh a, ka thil chhui a hnêna ka hlan tâk lamah chuan hma an sâwn hret hret a, a țha viau e, phîn darh vek rawh se.
Mi sual pahnihin Champhai an chhuahsan si loh chuan Novi hi Champhai lamah an hruai chho ngei ngei ang, chu chu ka rin dàn a ni. Eng nge man an duh ém ém chhan hi ni ang le? An hming chhiat an hlauh vànga man tùr ni se, Police-ah FIR a theh lût si lo va, an chunga phuba lâk nân thâ a thawh hek lo. Chuti a nih chuan, eng emaw vàng takin Novi hi an duh a niang, phuba lâk nân nge an tisa châkna tihpuitlin nân? Heti tak maia hmeichhe pakhat an buaipui hian chhan a nei tùr a ni.
Țana chu ka phone a, Novi pahrawn Pu Lawmsiama leh Rina chanchin ka zâwt chiang leh zual a. Ani pawh chuan a hriat ang angte chu min hrilh a.
Novi nu kha Lawmsiama nèn an inneih khân Novite inah hian Lawmsiama hian a va awm fin tawp a, Novite in hi a hmun a țhain a nuam hle, an building pawh a țha. A chung lam an luah a, a hnuai lam erawh office leh dàwr atân luah a ni. In hmun hi Novi nu hming emaw Novi hmingin emaw a awm ang a, chu chu a thih tâk si-ah chuan Lawmsiama hian a hminga dah a tum nia a rin thu min hrilh a, kei pawh chuan thil ni thei tak tùr niin ka hre ta.
Champhai lama duty ka dahte chu ka be âwl lo va, chanchin tharlâm hre lova ka awm reng lai chuan zînglam dâr 3-ah pakhatin min rawn phone ta hlauh.
"Ka pu, tunah khãn motor pakhat rinhlelhawm deuh, chak zeta tlân ka hmu a, a number erawh ka chhinchhiah e, gatekeeper pawhin lo tidingin a lo check miah lo."
Police ve ve an ni a, an tlang parh thei ang chu.
"Lo ûm zui nghal teh aw, a number i hriat chuan Champhai lam lo bia la, lo en zui bawk rawh se."
Tunah chuan ka chan a țha ve țan tawh ang, mi sual lam hi chan țha angin lang mah se, tàwp nî an nei ve tho a nia.
Chanchin min rawn hrilh zêl a, motor chu Champhaia lût lova khua pawh awm lohna ramhnuai lam pana a tlàn zél thu min rawn hrilh chuan mak ka ti kher mai. Novi mantute ngei an ni tih an chiang tawh bawk, a chhan chu amah pawh an phur tlat, motor ațanga an hruai chhuak pawh an hmu. Ka rin aiin an hlauhthâwng lo, police tirh an nih vàng a nih ka ring deuh ringawt. Khawiah tak kalpui dâwn ni maw? Mi sual fing tak emaw tih pawh hian chêt sual kheuhna leh fîmkhur sèn lohna an nei châwk.
Lunglei chhuahsan tumin ka insiam a, ka kal ve vat a ngai. Chuti lo chu an lo tirethei hman lutuk palh ang, ka mamawh tùr zawng zawng ka la khâwm vek a, Aizawl leh Lunglei lama ka țhuihruaite hnênah chuan thil awmzia ka hrilh thuak nain min zui tùr erawh chuan ka duh lo, chhangchhiat lutuk chuan thil pawi zâwk a thleng thei tlat.
Champhai lût lo chuan kawng min hrilhna lamah chuan ka tlân zel a, ka tlân chak bawk a, ka țhiante min lo nghahna chu ka thleng thuai. Chulai hmun chu chawlhhmun angreng ve deuh a nia, ka țhiante pahnih chu waiting shed-ah lo țhuin ka va fin ve nghal.
Thil awm dàn min hrilh nghal par par a, tuna kan awmna ațanga km 3 vêlah hian Building biru zet a awm a, belhchian lêm loh phei chuan building a awm tih a hriat miah loh a ni àwm e. Chulai hmun chu mimal ram niin a lùn lo viau a; mahse, lùn lo viau angin lang mah se tlawhtu an awm reng nia. Chu tak chu chu building makna chu a ni. Thil mak la awm leh cheu chu Lawmsiama'n a tlawh peih viau a, khaw chhak lam sumdâwng ni àwm takte pawh an kal fo. Eng nge an tih tumahin an hre lo va, an chhui ngai hek lo. Chu chu ka țhiante sawi dàn a ni.
Chu thu ka hre zet chu, ka nui ru var var mai.
Tuna kan chawlhna ațang hian kawng pêng hnih a awm a, building awmna pêng hi chu mimal ram a nih vàngin tlawhpawh tam a ni lo, gate lianpui a awm bawk a, kawng pawh a țha lo viau. Kawng pakhat ve thung erawh chu khaw dang kalna a la nih vàngin motor pawh a tlân âwl lo, kawng țha pângngai tak a ni.
Rem kan ruat a, Lawmsiama tlawh leh hun tùr chu chàn kan tum a ni. Motor tlân lût chu a awm ngei tih an hria a; mahse, tu nge chuang tih an hre lo thung.
Enthlâk ka duh, a hmunhma hrim hrim pawh chu hmuh ka châk. Chu Building leh ram neitu chu ka țhiante sawi dàn chuan mi hausa pawh a ni lo; mahse, ka ringhlel khawp mai thung.
Ka phone a rawn ri a.
"Novi pahrawn kha inah a awm lo va, office-ah pawh a awm lo," tiin min rawn hrilh a.
He pa hi he kawngah hian kalin tunah pawh hian he buildingah hian a awm ve a ni mai lo maw?
Ka țhiante nèn kan pathum chuan building thlithlai tur chuan kal kan titlu a; mahse, kan lìrthei hi khawiah nge kan dah tâk ang le?
Țhianpa pakhat zâwk Rova chuan rem a ruat a, aniin ka car chu a khalh haw ang a, keini țhian dùnin building leh a chhehvêl kan thlithlai ang. Kan mamawh huna kan hman theih mai tùrin bike erawh chu Waiting shed-ah a dah mai ang.
"An hmuh chuan rinhlelhawmin an hmu ang em?" Kima'n a lo ti ve thung a.
"Hei, en la, huan zau pui pui a awm țeuh hi, heta fehah hian min ngai ngei ang, bike țha tak a ni bawk si lo," tiin bike chu a bêng thak thak a, a nui pah sâng a.
"Phone kan nei a, kan in-contact reng thei bawk, mamawh kan inhrilh zêl ang chu," tiin a ding a," Hun a kal duak duak si a, mahni tlatna mual lam pan tawh ang u," a ti leh a, car chahbi chu ka pe a, ani'n bike chahbi min pe a, a tlân chhuak deuh nghal mai.
Gate chu hawn rual loh a nih vàngin Kima nèn chuan thing hmun ațangin harsa lutuk lovin kan lût a, a hmun chu a rualrem fahran lo kher mai. Chubâkah, luh mai mai theih lohna tùrin gate lo chinah pal atân forget-me-not kûng an phun zui bawk a, keini pawhin kual fêin thing hmun rem lo zet lamah kan luh phah rêng a ni. Hetia kan luh theih chhan pawh hi Kima lo luh rûk tawhna a nih vàng leh a lo chhinchhiah țhat vàng a ni zâwk.
Chu ram chu a awih ve hrim hrim, kawng pawh chu a țantìr lamah zâwl awm duai mah se, a chhengchhe telh telh. Kawngah pawh kal lovin kawng hrûlah hmuh theih loh tùrah zel kan kal a, thâwm pawh kan dìm viau.
Thâwm kan dim avàng leh kan fîmkhur avàngin building chu kan pawh har viau. Dârkâr khat ém chu hmang tling lovin, building hmuh theihnaah chuan kan ding ta vang vang a, kawtah motor pawh a ding.
Chu in, biru tak maia an han sa tlat mai chuan ka ngaihtuahna a tikal thui viau. Eng atân nge an sak ang? Sual rim a nam rum rum thei hialin ka hria, a remchâng ém asin.
"He in hi ka hmuhna leh a awm a ni tih ka hriatna a la rei lutuk lo, Duha min hrilh a nia. Hmeichhia an man kha chhui lovin ûm zui lo phei ila chuan ka la hmu tawp lo ang," Kima chuan a ti sap sap a.
"Duha chu tu nge?"
"Kan țhenawma mi a nia, mi pângngai pha chiah lo deuh niin ka hre nghe nghe. Hlawhfain vawi hnih a kal tawh a, hnim a sâm fai ni àwm a ni. Kan ina a lo lèn țumin a sawi chhuak a, ka awihsak vak lo nain motor ka um zui avàng khân ka hre chiang ta chauh," a ti leh a.
"A nih, in chhûngah chuan awm an tam àwm em?"
"Ka hre lo le, an tam vak lo a nih hmel ka ti ringawt. Mi chhawr an tam viau chuan buaina a tam duh mai mai àwm sia ka tia, bâkah, lût chhuak ka hmu tam lo tlat a," a ti leh a.
Chu in chu a lian lo a nih hmel, kan hmuh theih chin chu lian hek lo i. Kawtah chuan motor a din dànah kal an awm ngei niin a lang.
Ka hawi kual lai chuan thil chê ka hmu tlat, chu chu in piah deuha biru deuh taka mihring ding chu a ni. A duty a ni ngei ang, tuna kan awmna hi tlemin a hmun a sâng deuh a, min hmu thei kher lo ang.
Kima chu kawhhmuh nghalin, heti khawpa an fîmkhura vêngtu hial an dah chuan eng emaw tak chu a awm a nih ka ring nghal mai. Chutih lai chuan motor ri a rawn awm a, kawng chhe zetah chuan a rawn tlán phei bawp bawp mai. Hla angreng viau mah se police motor ngei a ni tih ka hre thei.
Kan thlîr dùn reng a, in kawt a thlen chuan ding dawtin a chhûng ațang chuan hmamhmawh zet hian mipa pali an rawn chhuak a, motor ațang chuan parcel ni àwm tak hi an hlângthla a, inah chuan an zàwn lût ta nghal a.
Eng thil tak ni ang maw? Novi ei tùr thil a ni mai lo ang maw? Hrèn rei an tum viau a ni thei ang em?
Rin aiin an rei phian mai. Kima nèn chuan awmhmun kan siam fel a, kan thlîr vang vang reng ringawt. Tih theih kan nei rih lo, tawngpàwng luhkhung ringawt lovin luhkhung dàn tùr fel tak rèl a ngai.
Khua a tlai lam dâwn ta. Ni pawh a tla ruai dâwn, hetia awm reng chu a dik dâwn lo. Kima hi hawtîr rih ang, ka thil chhui hi kei chuan ka kìrsan dâwn lo, heta țang hian ka hnaih hret hret ang, he in hi belhchian ka duh tlat, luh dàn awlsam tak zawn a ngai.
Kima kal hnu chuan ka rucksack ațang chuan ka mamawh tùr ka phawrh a, tui chu ka in khawlh khawlh phawt a, awmhmun rem taka siamin in chu ka thlîr leh ta vang vang a.
A thim thet thet tihah chuan in ațang chuan nichina mi pali ka hmuhte kha an rawn chhuak ta țhâm țhâm. Parcel dang, a rawng pawh dang daih, a hma aia lian deuh an rawn zâwn chhuak a, motor-ah an dah leh thlap. Ka phone chu ka hmet neuh neuh a, Rova ka text, motor chu lo en zui tùrin.
Khua a thim chiang ta tihah chuan ei tùr ka ken chu ka ei mawlh mawlh a, tui ka in leh pawp a, in hnaih tum chuan ka inbuatsaih ta nghal a.
Fîmkhur takin ka hnaih a, ka thãwm pawh ka dìm viau. Tunah chuan ka hnaih ta viau mai, kawngkapui awmna pawh chiang takin ka hmu thei ta, kawt leh a vêl pawh ka hmu chiang ta khawp.
Mi tumah ka hmu lo, duty pa lah kha in ațang chuan a hla angreng a, ka duhtâwkin in chu ka hnaih thei ang.
Ka pên țan chiah tihah chuan țawng ri ka hriat avàngin ka biru leh vat. Țawng ri chu a lo hnai zêl a, pahnih inbia an ni.
"....lo tlat, doctor chah la,...damdawi lo keng tel tùrin hrilh ang che, syringe pawh aw, ka hlawhtlin hma chu titàwp thei ka ni lo," pakhat chuan a ti a, ka bihthla dêk dêk a, light êng ațang chuan Lawmsiama a ni tih ka hre thei.
Pakhat chuan," A hlauhawm lo ang maw-" a ti dêk dêk a, Lawmsiama chuan vîn zet hian," Thu awih mai rawh," a ti tuarh a, chu pa chu a țawng leh ta miah lo.
Tunah dâr 6: 45pm a ni a, doctor a chah chuan dâr 8-9 vêlah lo thleng ta se, rin aiin a tlai dâwn lutuk loh chu. Thil pawi a thlen hmain fîmkhur taka ka luh a ngai ang.
Chu pa chuan phone-in mi a bia a, pawnah chuan a ding rih a, a fîmkhur lêm lo va, a țawng ring khawp. Fîmkhur a ngaihna tùr a hre hran lo a niang, him tâwkah a inngai a ni ngei ngei ang.
Lawmsiama erawh a lût tawh a niang, a awm tawh lo. Chu pa hmanhmawh loh dàn em em chu, pâwna la awm a tum rih a niang, phone chu a khawih mual mual reng a.
Ka bihrûkna ațang chuan fîmkhur taka chhuakin chu pa hmuh loh tùr chuan kawngka lamah ka tawlh phei a, light chu a èn dàn a fuh viau avàngin ka tân kawngka va pawh chu a harsa lo, ka vànneih asiamin a lo inhawng sa zui.
In chhûng ka luh tak tak hma chuan ka enkual phawt. Camera-te hi a lo dah ru palh ang tih thilthuah ka fîmkhur a; mahse, ka hmu lo. Ka luhna hmasa ber chu room ruak a ni a, cupboard hrawl zet pahnih hi a awm a, tumah an awm lo va, thil dang pawh a awm chuang lo. Light pawh dah a ni chiangkuang lo, room dang light a ring.
Kawngkhàr pahnih a lo awm leh a, pakhat chu a inhawn deuh avàngin choka a nih ka ring, pakhat erawh chu a inkhâr thung.
Lawmsiama kha khawi room-ah nge a kal ang le? Choka chu ka bihthla dêk dêk a, ka hmu lo, a awm lo tihna.
Kawngkhàr pakhat chu fîmkhur zeta hnaihin ka hawng dâwn a, thâwm ka hriat avàngin bang thlâwp zaihin cupboard phênah ka ding.
Lawmsiama chu a kuta thil eng emaw keng hian a rawn chhuak luau a, a hawi kual lo nasa. A thil ken chu hlim hmel zeta enin a nui vur vur, eng tak ni ang maw?
Chokaah a lût a, kei chu a lo chhuahna room-ah ka lût ve thauh thung. Tumah an awm lo chu la vànneihna a ni leh, ka hawi kual a, dawhkàn leh chair a lo awm nual a, room kil lamah chuan parcel a lo awm nual bawk. Nichîna motor-a rawn kalte phurh, an zàwn luh kha a ni ngeiin ka ring.
Dawhkàna thil lo awm chuan ka mit a la nghal viau. Saphu kâwr a lo awm țeuh a, parcel chhûngah chuan eng thil dang nge awm ang le?
Țawng rî ka hriat tâk avàngin bangah parcel phènah ka bet leh rih. Lawmsiama leh phone-a doctor betu kha an rawn lût a, dawhkàn bula chair-ah chuan rawn țhuin Lawmsiama chu a nui deuh huah huah reng a.
"Tuna ka thil tih hi ka hlawhtlin chuan nang chu ka duhsak viau ang che, i țangkai bawk a," a ti huah huah a.
"Mahse, a sign duh lo a ni lo'm ni?" Phone hmangtu chuan a ti a.
"A duh dâwn alawm, duh lo thei lovin ka siam dâwn alawm. I hre mai ang, ka nau. I u hi mi hausa tawntaw ka ni dâwn," a ti leh a, nuamti zet hian a nui leh huah huah a.
Eng emaw sign-tîr chu an tum ngei a nih hi, kan rin dàn kha a dik hmel khawp mai. Unau pawh ni raw sek sek, an thil tih man an hmu ve ve ang.
Chu room-a an awm reng avàng chuan ka chhuak thei tawh bîk lo, ka ding ta reng mai, ke a kham ve lek lek mai.
"Chu, a lo thleng e," a nau zâwk chuan a tih tâkah chuan ka harh kâwk mai. An chhuak ve ve a, kei pawh ka awmna ațang chuan ka chhuah emaw ka chêt sawn emaw a ngai, Novi awmna ka la hre tlat lo.
Room dang luhna ka hmuh loh avàngin ka luh hmasakna ber room-ah khân ka lêt leh a, cupboard phênah bawk ka ding leh. A chhan chu ka chhuah chuan kan intâwkin min hmu thei tlat.
Second rei lo têah room-ah chuan an rawn lût leh a, Lawmsiama leh doctor ni ngei tùr chauh an rawn lût, a nau kha chu pâwnah a awm leh tawh a niang.
Choka kawngkhàr ni lo, room pakhat zâwk kawngkhàr bul chiaha bang mai mai emaw ka tih kha Lawmsiama chuan a hawng ta mai. Kawngkhàr thuhrûk dik tak a ni.
"I lo inngaihtuah harh tawh em-" kawng a khàr tâk avàngin a țawng ka hre chhunzawm ta lo. Kha room-ah khân Novi a awm chiang, a thukru țha hle mai; mahse, kha doctor a koh chhan khân ka ngaihtuahna a rawn luah leh ta zâwk.
Pâwnah fîmkhur takin ka chhuak a, phone hmangtu pawh kha min hnungchhawn záwnga țhuin games a lo khèl ni ngei tùr a ni, a lo ri țak țak mai, mkn hmu teuh lo.
Minute sàwm vêl hnuah an rawn chhuak a, an țawng ka ngaithla kar.
"... ang a, min mamawh tawh kherin ka ring lo," doctor chuan a ti a, ka bihthla dâk dâk a, a hmel chiang taka hriat ka duh.
Lawmsiama ngei chuan," Chuti, motor-ah min lo nghâk mai la, minute tam a ngai nâng," a ti a.
"Damdawi kha a thawh chhûng a rei lutuk lo maithei a, i hmanhmawh deuh dâwn nia, a dang chu a la awm tho nain hman nawn ngai lo tùrin hlawhtlin tum ang che," pakhat chuan a ti leh a.
"A thawk țan tawh ang em?"
Chu pa chuan a phone chu phawrha enin," Minute 10 nghâk la, a bâk a ngai lo ang," a ti a.
Eng damdawi nge an sawi? Novi an chiu em ni? Eng atân nge an chiu ang? Zawhna hlîr mai a ni.
(Nizanah ka net signal a boral, lu na bûra zan rei men thlen awmzia a awm thei lo)
*HARSATNA KUMKHAW DAIH A AWM NGAI LO VE*
Ngaihnawm ltk
ReplyDeleteAwii..han type leh vat vat teh..mawng hawlh ang vel ka ni..vat vat.
ReplyDelete