☆SILVER ZUNGBUN☆ - 20 By Dingdi Pachuau

☆SILVER ZUNGBUN☆ - 20 By Dingdi Pachuau



Tih tùr a vàn theih ém avàng chuan lehkhabu chhiar tùr ka dap ta a, Âtei chuan a lo nei nual a, rei lo te chhûngin a lehkhabuho chu ka chhiar zo ta mai. Tih tùr awm hek lo, ka hna chu chhiar char char a ni mai. Dàwra kal lah ka puin a phal si lo, ka kut an phelh hunah chauh kal a phal ang. Ka'n tilui ngial a, a phal lo bur a ni tawp.



'Half girlfriend' Chetan Bhagat ziak chu ka chhiar a, ngaihnawm ka tih rualin ka ngaihtuahna a kal thui ta viau. College kal ve min tichâk ta tlat, zirna tàwpsan hi ka duh dàn a ni ngai bîk lo a nih kha. Mite pawh harsa takin bul an țan a, a tàwpah hlimna an hmu fo țhìn, kei pawh hian zirna hi engah nge ka chhunzawm leh theih loh ang? Dàwr nghah ringawt mai hi ka eizawnna tùr a ni thei lo vang. Tunah kum 21 ka ni ve țêp tawh a, college kal rual lek ka la ni tho alawm.



Mahse, documents kha, pakhat mah ka keng lo. Inah a la awm vek tak, ka rilru a down leh rawih rawih, ka la thei si lo ang. Engtin nge khâng kha ka neih lêt theih ang le? Ka room-ah ka dah vek a, kha ka room kha, hmuh leh ka duh tawh hauh lo.



Chutiang ka ngaihtuah atalâng chuan ka lehkhabu chhiar chu ka ngaihven ta miah lo, zirna chhunzawm chu ka duh. Documents hi tibova insawiin MBSE office, Aizawlah ka va lam mai dâwn em ni? Ve leh ringawt tak, ka va mâwl! Mizoramah ka zir hlei nem, ka zirna hmunah lâk a ngai ang chu maw le!



Ka muthilh theih loh avàng chuan mut hmunah chuan ka meng reng a, a hnuah chuan thovin tui bottle ruak chu ka keng chhuak a, light a lo la êng vâ mai, tu nge la meng hriat tumin ka phei dân dân a.



Ka pu chu TV room chhuatah chuan lo țhu duaiin a hmaah chuan lehkha pawimawh chi hrang hrang ni àwm tak hi a lo darh chuai a. Ka hmuh tirh chuan makti zet hian ka en deuh reng a, zàn a rei ve tawh tho bawk si a, a pawimawh viau a nih dâwn hi.



Thâwm dìm taka filter awmna lama ka lêt chu," I mu thei nange?" a rawn ti thûm dût. He pa hi, min lo hmu ru reng em ni? Min rawn thlêk hauh si lo, mak ka ti lehpek khawp mai.



"Thil ka ngaihtuah a," ka ti ta ringawt a.



"Thil țûl lo ngaihtuah hi a țha lo asin."



"Nia..."



Rawn thovin a ban chu pharin a zi mar a, chutah ka lam pana rawn pheiin," Eng thil nge ni a?" a rawn ti a.



Hrilh kher ngai pawhin ka hre lo.



"A, ka lehkhabu chhiar maw le."



Ngun zet hian min rawn en a, dâwt ka hrilh hlei nem, thu dik a ni ve tho.



"Thil dangte?"



Filter lam chu panin," Ka documents kha nei thei ila tihte ka ngaihtuah mai mai," ka ti niah niah a, ka hnung chiahah a rawn kal ve tih ka hre miah lo.



"Eng atân maw?" Ka bul chêtah chuan a rawn ti thûm leh dût a.



"Thil țûl lo mai mai maw le-"



"Sawi mai la?"



Hm...ka ngaihtuahna lehzel pawh hi  hriat vek a duh nia maw le.



"Zirna ka chhunzawm thei ang a..."



A ngawih tâk vung vungah chuan makti ru deuh hian ka en a, ani chuan a mit a lo nuai nauh nauh a.



"Engtizia nge?"



"Ka hre lo, thil a lût a niang?"



"Ka lo en dâwn em niang?"



Ka en a, engmah ka hmu lo. A mita thil lût ka en kual vêl chu a kut pahnih chuan ka kâwngah min châwi ta thut, ka țê deuh țhat.



"Bengchheng!" a ti hluk a.



"Min thlah teh!"



Min thlah ve mai a, ka bottle chu lain filter tui chu a dawh a, a chhin hnuah chuan min pe a.



"Eng nge i tih a?" tiin ka zâwt ve ta thung.



"Lehkha pawimawh ka ching fel."



"Men rei hi a țha lêm lo asin." Ka nu min hrilh țhin a nia, zànah mu hma tùr leh zînga tho hma tùrin min zilh țhìn.



"Ka tihțhan a nia, ngaiah ka neih tawh."



"Kha, i mit hnuai pawh a val kuau tawh kha," ka ti ve a, a ni lah tak a, a meng rei țhang bawk a, zîng a tho hma tho bawk si. Mut a hmu tam lo tih a hriat, a lang bawrchhawr viau bawk.



"Ka zo țêp tawh."



"A zia hlauh chu. I mu tlêm lutuk a, i taksa tân a țha lo, khatiang chuan i rilru pawh a fîm thei lo ang."



"Tunah tak phei hi chuan fìm lohna chhan țha lutuk ka nei."



Ka melh chho vat a, ani chuan nui chung hian ka mal lam chu a lo melh thla nghal a.



E khai! Ka mutkawr nèn alawm ka chhuah tak le! Ka maltê chen chauha fual niin a hnuaiah kekawrte chauh ka la ha zui.



"Min en suh!"



"Hmuhnawm ka tih naklaia!"



Ka kut na lo lamin bottle ka keng si a, ka kawr chu ka pawt fual thei lo, ani lah chuan min melh rùn reng bawk si.



"Mangțha," ti sapin hmanhmawh zet hian ka room lam chu ka pan ta dawr dáwr a, a nui huk ri ka hre zui.



Tûkțhuan kîl laiin ka pu chuan," Tûn weekend chu Champhai lamah kan zin dâwn em niang?" zawh bîk pawh nei lo chuan a ti a.



"Yesss..."



"Han kal tak rawh u, inah ka lo awm ang," Pu ber chuan a lo ti a.



Kei chu ka lo ngawi reng thung. Champhai chu hmuh ka châk ve reng rualin ka châk lo, nunhlui hriat chhuah tùr a tam dâwn lutuk. Ka hmuh lohna a rei ta a, kal ka châkna leh châk lohna a inchen.



"Novi, in khua a ni sia, i kal ve ngei ang tiraw?" Âtei chuan a ti a.



"Ka hre lo," tiin dik takin ka chhâng.



"Ani ber a kal loh te chuan, keini chu mikhual mai kan ni dâwn asin," ka pu chuan a lo ti thung a.



"Ka pa inah awm se, mi dang chu kal vek ang u," Âtei chuan a ti leh a.



"Ani chauh kalsan chu a tihchi loh ang," ka lo ti vat a.



Pu ber chuan," E, ngaihtuah ka ngai lo lutuk ringawt. Eirawng bàwl ni se ka thiam vek a, ka dam țhain ka la chak bawk. In han kal vek dâwn nia," a lo ti dap dap a.



"Âpa, a la vawt viau ang em?"



"Um, kawrlum chhah deuh deuh hâk a la ngai ang."



Kal ve tùr ang chuan ka indah chhin a, ka huphurhna a tam zâwk ta. Kan țhenawm, ka hmelhriatte leh vêngte ka han hmu ang a, ka chanchin min han zâwt ang a, thil an han sawi sep sep ang a, ka pahrawn chungchâng pawh min zâwt maithei asin.



Ni lo, thil țûl lo ka ngaihtuah tùr a ni lo. Hun kal tawh chu hun kal tawh a ni a, tûn hun zêl hi a pawimawh ber.



Chhùnah Âtei chuan facial ti țhinte kha a ko leh a, hmai lam an tih hnuah  sam lam an khawih ve ta thung.



Âtei chuan," I sam rawng hi thlâktîr ang aw," a ti sauh sauh a. Ka puan ahnu lamah ka sam rawng ka la thlâk loh avàngin thlãk ve chhin chu ka châk, ka inhmeh zâwng tak pawh a lo ni maithei asin.



"I ngo tho sia, a eng lek lek hi i inhmeh viau ang," tiin colour chu min thlansak a, kei chuan duh rawng pawh ka nei chuang lo, thlâk ka châk ve viau ringawt.



"I inhmeh dâwn chiang, chumin hmain i sam hi tlêm kan paih duh ang em?"



Ka duh dàn ka sawi lo, an tih ang ang chuan ka awm tawp, mawi an hre zâwk ang chu.



Ka mithmul min pawhsak bawk, a na lutuk ringawt. Ka mithmul ka pawhtîr vawi khatna a ni bawk a, ka mittui a tla nasa khawp, pawhna hnu pawh a sen țul mai.



Dârthlalanga ka inen chuan mak ka inti lutuk. Ka inhmeh ka tih rualin milem siamchawp ang ka inti. Chuan, ka sam colour ațang chuan ka lêrh hmel ka ti tlat bawk, a mawi ka ti viau tho nain.



Princess-i chuan mawi min ti khawp mai a, 'i mawi e' min ti deuh reng mai. Âtei erawh a hman țhin colour thoin a ti leh thung a, a langsàr lo va, a lang dang lo bawk.



Tlaia ka pu lo haw chuan min en vung vung a, eng dang sawi lo chuan," Mi dang emaw ka ti dâwn che alawm le," a ti sup ringawt. 'I va inhmeh ve', ' I mawi lutuk' emaw ' New hair!' emaw a tih ve ka ring a nia, mawi min ti lo a nih ka ring.



Champhai kal tùr chuan zànah kan insiam a, khawiah nge kan thlen ang tih pawh ka hre lo. Kan inah khân ka kal ang em? Documents lâkna hun remchâng lutuk a ni dâwn; mahse, ka room kha ka lût ngam tawh si lo ang.



Ka pahrawn kha engtin nge a awm ang? Vawikhat mah min lâk chhuah hnu khân ka pu hnênah hian a chanchin ka zâwt lo va, ani pawhin min hrilh hek lo. Țûl a ti lo a niang, a duh hunah chuan chanchin engkim min hrilh vek ka ring, kei chuan min rawn lâk chhuah dàn kha mumal leh chiangkuang takin ka hre tlat lo, ka ngaihtuah lêt thiam lo.



Zîngah tûkțhuan hma deuhah kan ei a, kan intih fel meuh chuan dâr 8:30 a lo ni thuai. Âtei'n Princess-i a hmaah a țhutpui a, keimahin a hnungah ka țhu, ka thâwl khawp mai.



A tlàn chhuah dâwn chuan car chhûng dârthlalang chu a'n siam țha a, ka lo en lai tak a ni a, kan inmelh sak mai.



Kawnga kan tlàn lai pawh chuan min rawn en leh zawk zawk, kei lahin ka lo en ve thei em em bawk sia. Âtei leh Princess-i hriat miah loh chuan kan mit a intawng ngun khawp mai, a rûk tê chuan nuam ka ti veng veng.



Champhai chu kan thleng tlai lutuk. Chhûngte an neih leh neih loh ka hre lo va, an nei a nih pawhin tihbuai a duh lo a niang, Tourist Lodge-ah kan thleng. A pawi lo, a zia daih zâwk.



Hmeichhe pathumin double room kan ințâwm a, cabin lo awm thliah thliah chu a nawm hmel ka ti phian mai. Champhai khua ni mah ila, hêng lai daih daihah hian ka la kal ngai bîk lo, hmun dangah lehkha ka zir daih zêl bawk sia.



"Documents la chuan in inah kan kal ang tiraw?"



Ka pu melh vang vang pah chuan," Ka kal duh lo," ka ti sap. Thil engkim ka hre chhuak leh dâwn, ka duh lo, theihnghilh vek ka tum mêk tawh a, ka hmu leh a nih chuan a bo a bâng awm lovin ka hre chhuak leh vek dâwn tih ka hria a ni. Ka pahrawn a lo awm hlauh phei chuan...



"I thu thu le."



Ka pu chu amahin a chhuak. Keini hmeichheho chuan car chu hmangin, Âtei'n a khalh a, kan lêng kual. Âtei min hruainaah kan tlân zêl mai, hmuh lohna pawh a lo rei tawh alawm le, kan vêng lamah kan tlân lo hlauh a, a tihzia e. Princess-i chuan a thil duh a hmu nasa mai a, a nî chuan pahnih khat chu a'n leisak ve a, a hlim au thâwm chu ngaihthlâk a nuam khawp mai.



Chawhnu dâr 2 a pelh hnu chuan, "Naktûk lamah kan chhuak ang a, kan chhûngteho kan tlawh ve dâwn u nia, tunah chuan a tlai deuh tawh tlat," Âtei chuan a ti a, hnehsawh zet hian car steering chu a tuai vir map map a.



Chhûngte an lo nei reng a nih chu.



A tûk chu sunday a nih vàngin chawhma chhûng Lodge-ah kan awm a, chawhnu lamah erawh ka pu chuan lèn a rawt a.



"Ka țhiante'n an hmu châk che a."



"Țhian i nei ve elo?!" Ka ti der miah lo, țhian a kawm ngai loh hmel ém asin.



"Nei ve e, ka tâna mi pawimawh tak tak an ni alawm," a lo ti mai a.



Âtei leh Princess-i chu an chhûngte inah a drop tê tê a, kan pahnih chuan kan tlân leh par par a.



"I țhiante chuan engtin nge min hriat a?" tiin ka zâwt a.



"A changtunu hriat loh thu a awm hlei nem."



Ka ngawi ta hlauh. Țhian a lo nei reng hi mak ka ti, chubâkah, chhûngte an lo nei bawk a, keimah min lo hriat chian hle phei chuan a nuam lo duh ngawt ang chu.



"Ka țhiante bulah chuan zah a ngai miah lo, min puitute an nia, i awmna chin pawh kha an puihna zâra hre thei chauh ka ni."



A țhiante chu tam ve deuh tak kan hmu dâwn emaw tih lai chuan pahnih chauh kan hmu. An nèlawm hmel phian lehnghal a, an zîngah ka pu a upat hmel ber, anni pahnih chu an inzuah buk ve loh vàng a niang.



Car ațanga kan chhuah chuan nui sâng hian min rawn chibai ve ve a, an hming an sawi ve ve. A hmasa zâwk, sâng, hàng lam deuh chu Rova a nia, a hnuhnung zâwk, chér  dên dâwn leh ngo deuh chu Kima a ni ve thung.



"I țha chho zêl maw?" tiin Rova chuan min zâwt a.



"Aw, țha chho zêl e, ka lâwm lutuk e," nui sak chung hian ka ti a. Veranda-ah chuan kan lût chho nghal a.



"Eng nge kan ei ang?"



"Khua a lum lo bawk a, coffee in ila?" ka pu chuan a lo ti vat a. Kei pawh ka in châk, min tilum ham ham mai dawn asin.



An pahnih chuan an fel khawp mai. An țawng duh a, ka rin ai daihin an nèlawm, min be bawrh bawrh mai.



"Chawhlui kîlho ang u," Kima chuan a ti ta daih a.



"A tihchi ngawt tak ang!" Rova chuan a lo ti ve a.



"Hun dangah ti zâwk ang u, hun a tight ém mai. Hun thâwl leh nuam zâwk kan la nei ngei tùrah ngai ila," ka pu chuan a lo ti thung a.



"Thlànah kan kal lawk hman ang em?" inthlahrung zet hian ka ti a. Ka inthlahrung; mahse, hei bâka chance țha hi ka hmu tawh kher lo maithei si a.



Âteite pahnih lam haw tùrin kan tlân chhuak tawh a ni a, chutia ka zawh tâkah chuan," Tehrêng mai," tiin a car khalh chu herin, thlànmual lam kawngah a tlân ta nghal a.



Ka nu thlàn chu a lo hnim bîk miah lo. An lo chei ve tho bawk, a lo țhing țhup bîk lo. Pangpâr ka keng lo pawh chu inthiam lo viau mah ila a zia viau e.



"Khawngaihin, hun min pe lawk thei ang em? Ka nu hi keimah chauha biak ka duh a," ka ti leh a.



Hun kan neih rei loh avàngin ka nu thlànah pawh kan awm rei lo, ka tlawh thei hrim hrim chu ka lâwm, kum 1 hnuah chauh ka hmu thei si a.



Zànah ka pu chu a chhuak leh a, naktüka kan haw leh tawh mai dâwn avàngin a àwm ka tihpui, chhûngte pawh a tlawh ve duh dâwn asin. Keimah vàngin a tlawh ve hman si lo. Thlàn kal ka dìl vàng khân Âtei leh Princess-i chu an chhûngte'n Lodge thleng an thlah phah ringawt.



Champhai kan chhuahsan leh ta. Kawng a țha lutuk lo va, chak deuhin tlàn a harsa, kawng chhe deuh kan tlan lai chuan ka pu phone a rawn rì a, loudspeaker a on vàngin a rawn phone-tu thu sawi chu kan hre thei vek.



"Boss, hei mi pakhatin inpuan a duh a, i bul ngeia inpuan a duh si a, i lo kal  hman ang em?"



"Eng chungchângah maw?"



"Nula pakhat rûk bo chungchângah maw le."



Ka lo phu zawk. Nula an ru bo maw? Keimah anga harsatna tâwk tho a ni ve ang em le?



Loudspeaker chu off-in phone chu a la kâng ta zâwk a, a rawn betu țawng pawh ka hre thei ta lo. Kan hriat ve kher kha țûl a ti lo a niang, ka hre châk asin, min tihlauthâwng thar leh bawk.



"Nula an rûk bo hming chu ka hre thei ang em?  A sawi em?"



Hlauthawng leh makti zet hian ka pu chu ka en nghal hrá a, Âtei lah chuti bawk.  Ka pu erawh chuan a lo ngaihtuah ngun hmel khawp mai.



"Lunglei panin kan lo tlân mêk e, kan lo thlen veleh ka lo kal nghal ang."



(Inpuan duh hi tu nge ni a i rin? I chhànna chu TOSODiP-a post-ah khân comment mai tùr. A ring dik, vannei berin Rs 300 aw, han ring chur chur teh u, zanin dâr 10 thleng hun hawng ang, chuti lo chu next chapter-ah hian a hming a lo lang tawh dâwn si a...)




*MI ROPUI TAK TAKTE PAWH HIAN TLÛK CHÂNG LEH CHAUH CHÂNG AN NEI VE THO*