☆SILVER ZUNGBUN☆ - 22 By Dingdi Pachuau

☆SILVER ZUNGBUN☆ - 22 By Dingdi Pachuau




Mary chu a lo ni ngei e.



Ka pu hnêna a inpuan dàn: A tìrah chuan a hmel hriat ngai pawh ni lo hian ka phone number a lo dîl a, hmel țha min tih vàng niin a sawi. A hnuah ka chanchin hriat nân pawisa tam vak lo tawktarh ni chiah si lo, thlêm nâna hmang hian eng eng emaw a zâwt țhìn a, kei erawh engmah min hrilh lo tùrin a lo ti țhìn. Mary hnên ațangin ka chanchin, ka awmna leh chinchâng zawng zawng a hre ta vek. Awlsam tê leh hlauhawm ni bawk si lova pawisa neih chu tu nge duh lo awm ang?



Min manin min ru bo ang tih a hre bîk lo. Hria se a hrilh lo ang, a hnuah min rûk bo hnuah chu pa chuan Mary chu phone lehin amah(Mary) chu rûk bo ka nih avànga mawhphurtu berah a puh ta a, Mary chuan rûk bo ka ni tih a hre chiah, hrehawm a tih vàngin leh a hlauh em avàngin a zêp char char a; mahse, a inthiam theih thlâwt loh vàngin a inpuang ta tih a sawi.



Thu dik a nih ka ring, ka thiam lo miah lo. Ka chunga thil thleng tawh kha a hre ve kêlh si lo va, a àwm ka ti lutuk.



"Sawi zawh loh ka la nei."



"Eng?" Ka hre châk lutuk ringawt.



Min hmachhawnin a rawn ding a, dawhkàn chu a kut pahniha rawn nemin a rawn kûn hniam deuh a.



"Eng vàngin nge kum thar tìr tê khân in dan i tih chûk chûk?"



Chhàn ngaihna hre lo chuan ka melh chho ràn ringawt a, a zawhna min zawh teh thut chuan min tihrilhhai tlat.



"Ka awm rei tawh alawm."



"Thu dik tak ka hre duh."



Ka hmui chu ka liak huh te te a, min en reng avàng chuan nuam lo ka ti tak zet.



"Ih...Princess-i hmangin min vau a ni."



Mit khap hauh lo hian min en a, eng rilru nge a put chiah ang? Dawhkàn chu a hmer ngawt ngawt a, a mitmeng chu hmuh nuam ka ti hauh lo. A thaw a rawn sak a, a thaw hawk hawk a, a thinrim awm dàn chu bawngpa chal thinrim hi ka tehkhin, a tak takah hmu lo mah ila, TV vêlah ka lo hmu ve fo tawh tlat.



"Engtin..." A lu a thing nawk a, thinrim awka sehchilh zet hian," A va ngam zâwk ve! Ka hmuh hunah chuan a châk lo-"



A bânah chuan ka lo vuan vat a," Tunah chuan engkim a țha tawh alawm, Princess-i hi an tina ang tih ka hlau tak zet a, an tina emaw an ru bo emaw a lo nih chuan engtikah mah ka inthiam thei dâwn si lo a," ka ti sap a.



Min en ngur reng avàng chuan a thinrim beng daih nán ka nuih sak a, a bân chùlsak hliau hliau pah chuan," Engmah pawi an khawih hman lo, a hun takah min rawn chhan kha," ka ti leh a.



"Rawn hmu hman lo chein rawn chhan hman lo ta che ila?"



Nuih leh sakin," Min rawn chhan hman dâwn tih ka hria alawm," ka ti leh a, a kut, dawhkàn a hmer tlatna chu chûlin ka lâk kànsak a, ka hmer vang vang a.



A kut lian zet lakah chuan ka kut chu a tê reuh hle mai; mahse, tuna kan kut lan dàn hi a mawi ka ti, kan inhmeh tâwk ka ti a, a nih dàn tùr dik tak niin ka hre tlat bawk.



"Ka chân thei che asin," țawng chhuah harsa tih hmel zet hian a ti sup a.



A thil sawiin min tihhlimzia a hre lo chu a țha zâwk hial ang! Ka thinphu chu ka hlim avàng chuan a phu rangin a rawn sawt chhuak daih ang tih a hlauhthàwnawm hial zâwk, ka phûr lutuk ringawt.



Ding chhuak deuhin a biangah chuan ka fawhsak zauh a," I duh rêng vàng a nih loh chuan min chân hauh lo ang," ka ti sap a.



Meng sawr sawrin min melh chhuk rùn a, chutah, a mit chuan a melhna sawnin ka hmui lam a en ta thung.



Chutia ka hmui a rawn en tâkah chuan ka lai ta deuh tlat, ka hmui hnuai lam chu ka seh ta zoh a.



"Ka tâ..."



A thu sawi awmzia ka hriat meuh chuan duhthawh lutukin min rawn fâwp tawh. A mi fawhna ril lutuk chuan ka thluak a fan a, ka hai chiai chiai.



"Ka tâ i ni."


Teh tâwng mai a. Rin-misuala khân he thu hi a sawi khân ka huain ka ngei hle a, ka ten bawk a nih kha; mahse, aniin a sawi hian ka haw miah lo, ka ten lo bawk, min tihlim zâwk a nih hi.



"Sexy reuh lutuk mai!"



A thil sawi eng pawh mai hian min tihlimin min tiphûr a nih awm hi. Ni tak takah pawh ka inngai thei hial mai dâwnin ka hria.



A kut pahnih chuan hneh zet hian ka khabeah la dawmin," My Queen Bee," ti supin ka hmuiah fâwp lehin hnuai lam chu a'n seh zoh a, chu a thil tih zet chuan min timûr chiai chiai thei hial mai.



"Chân tùr ang chea suangtuah che hi ka duh lo, ka thei bawk lo ang."



"Min chân suh."



Kan infâwp a, kan țawng a, kan infâwp leh a, tunah chuan kan induhtawn tak zet tih kan inhre ve ve tawh a, kei ka rilru a lo zalèn ve ta bawk nèn, nuam ka ti hliah hliah. Hei  bâka khawvêl nuam tih ngaihna ka hre tawh chuang lo hial ang.



"Engati nge Queen Bee tia min koh a?"



"I kawr hâk kha."



Ni dâwn tak. T-shirt lian zet, a vâng zâwnga a eng leh a duma țial ka ha alawm, ka ang tak tak ang.



"Chhuak tawh la?" Chhûngte dang mitmei vèn a ngai, ka room-ah a awm rei tawh lutuk.



"Eng nge i hlauh?"



"An hriat chuan mak an ti dâwn asin, ka tân a zahthlâk dâwn e."



"Naktûkah ka hrilh ang, rin dàn pawh an lo nei sa daih tawh ang."



"Ni lo," ka lo ti vat a, a kut hmer vang vang pah chuan," Hrilh rih suh aw, khawngaihin?" tiin ka ngèn. A la hma mah mah ka ti. A, an hriat chuan ka zak dâwn, bâkah, an lo remti lo maithei a. An ina awm ve mai, chènna in pawh nei lo, chhûngte pawh nei lo. Chutah, pâwngsuala rûk bo tawh hnu lehnghal, a ngaihzâwng leh a duh ni tùrin tlinna rêng ka nei lo, a tân min lo duh lo mah se ka dem thei lo tawp ang.



"I lubûr chhûnga i thluak te reuh teah khân eng nge i lo ngaihtuah leh hman?"



Inthing harhin," I hrilh rih lo ang tiraw?" ka ti a, hrilh rih lo se ka ti, ka hlimna hi tihchhiat ka duh rih lo.



Min en vang vang hnuah chuan," Hrilh chu engati nge i duh loh a? I hlau em ni?" a ti ta chiah a.



"Aih."



"Min zahpui tihna maw?!"



"Ni lo..." tiin a kut chu ka chelh țàng țáng a, ka hrilh loh chuan a hre thiam lo leh ang.



"A nih, ka hrilh dâwn rih loh chuan... zànah ka rawn riak ve țhìn ang."



Rápthlâk ti zet hian ka hmui ka hup a, ka hlautháwngin ka meng phâwk hle bawk. A thil sawi hi a râpthlâk tak zet tih a hria ang em? Ani tân chuan eng vak a ni lo maithei a; mahse, ka tân chuan, a tihchi loh tawp.



"Ahhh...a tihchi loh...i duh chuan hrilh mai rawh," ka ti ta ringawt.



A hrilh ta bîk lo a niang, kan boruak a pângngai ém mai. Pu ber leh Âtei pawhin min treat dàn a la pángngai a, eng emaw danglam deuh àwm a awm pawhin ka hre lo. Zànah pawh rawn riah a tum hran chuang lo, rawn riah pawh tum mah se ka remti chuang lo ang.



March thla a lo thlen chuan khua a lum țan ve leh ta. In dan ka sawi ri dêk dêk a, ka pu chuan a lo phal lo nghal bur, ka lo sawi chhuak ta kha ka inchhîr lek lek dâwn alawm le.



Ka kut pawh kan phelh thei țêp, ka ning tawh tak zet. Hna ka thawh theih loh phah chu thuhran, țhiante pawh hmuh an châkawm. Phone ka la lei lo va, chhuah remchàn hunah ka ti ve deuh a, chuvangin, țhiante pawh ka la be thei lo.



Dàwr ka la kal loh vangin ka țhiante chu ka hmuh lohna a rei tawh a, min hmuh hunah chuan mak an ti ve ngawt ang chu. Min rawn text emaw call emaw an rawn tum ve țhìn ngeiin ka ring a, min man khan khawiah nge an thehthangbo ka hre lo a ni.



"Naktûkah ka chhuahnaah min kalpui ve la?"



Ka kal châk lutuk; mahse, dàwr pawh kal lova chhuah leh dáw dâw  chu ka inthlahrung.



"Eng nge i tih dâwn?"



"Bank kan dàwr ang chu, kan rei lo ang."



Kan chhuak dùn ta. Nuam ka ti, ka phûr tawp. State bank, bazâr vêngah kan kal phawt a, pawisa tam tâwk a deposit tih ka hmu, khawilam pawisa tak ni ang maw?



Kan chhuah hnua car-a kan țhut lai chuan," Vawiin chu parlour-ah kal ila?" ka ti a, min rawn melh ralh a," Eng nge tih i duh deuh a?" tiin car chu a tinung ta nghal a.



Kei chuan kalna tùr ber ka hre ve lo, ani chu an awmna hmun a ni bawk a, a hre khawp mai. Tuna min hruaina phei hi chu chanmari-ah daih a ni.



Parlour neitu nèn chuan an inhre țha ngiang mai. Min lo làwm țha khawp a, mi chhawrte pawh an fek hmel. A dàwr chhûng lah  chu a faiin a nuam khawp mai.



"Le, i sam leh i khabe hmulte kha, khua a lum tâkah chuan meh fai a hun i ti ve tawh lo maw?"



Pa bawrchhawr zet kha tunah chuan mipa fai leh chhe lo takah a chhuak leh ta mai alawm, dárkár rei lo te chhûngin khawvela mipa hmelțha berah an chhuah ta mai.



"I inhmeh lutuk!"



A inhmeh tak zet, heti khawp hian a lo hmelțha tih pawh ka lo theihnghilh lek lek tawh alawm.



"Ka lâwm e."



Parlour ațanga kan chhuah hnu chuan," I ril a țâm tawh em?" tiin min zâwt a.



"Nang?"



"Zawhna hi zawhna vék hian min chhâng ziah lo teh."



Ka nui a," I ril a țàm loh chuan ţâm bîk lo ka tihna a nih kha," ka ti a, ani pawh chu a nui ve suk.



Chàwl lo chuan kan tlân kual a, dàwr ka nghah țhin kan tlàn pelh lai chuan ka melh țâwk țâwk. Ka țhiante chu ka hmuh châk rualin ka nghâk lo rei tawh a, ka chanchin min lo zâwt ngei ang a, chu hun chu ka huphurh a ni.



"I lung a lêng deuh a ni maw?"



"Léng lo ve; mahse, țhiante hmuh hun a huphurhawm ka tia," ka ti a.



"Huphurh mah ta che."



"Sawi ringawt chu a harsa lo e."



Ka kut an phelh nî chuan Princess-i leh a pain min hruai a, Princess-i chuan nuam a ti lehpek khawp mai. Doctor chu a be reng mai a, ani lah chuan a lo chhawnchhaih peih bawk si a, an țawng kan ngaithla reng mai a ni.



A zia khawp mai. Tuam a ngai tawh lo va, fîmkhur thilthuah la dim deuh erawh a ngai ang.



Phone kan lei nghal bawk. Keimah ngeiin pawisa pawh ka pe vek, phal lo viau mah se, ka theih chinah chuan mahni ngeia lei ve ka duh, pawisa ka khâwl ve tawh alawm le.



Dàwr ka kal leh țan ni-ah  chuan Feli chuan chanchin min lo zâwt chùl a.



"I va zin rei ve! Engati nge i phone theih miah lo a? Chanchinte pawh min lo hrilh ve tùr a nia, nuam i ti char char hle a ni," tiin a lo vui nghal char char a.



"Nia, ka phone an ru bo daih a."



Mary  erawh chu a hmel ațang pawhin a inthiam lo hle a ni tih ka hre thei nghal, ka khawngaih ru khawp mai.



"In lo dam țha a, a làwmawm. Kei pawh ka dam țha lutuk ringawt. Ka phone chu bo lo se chuan ka rawn call zut ang che u; mahse, hei dam takin kan inhmu khâwm tawh a, a làwmawm alawm. Hun hmasa berah chaw kan ei khâwm leh dáwn u nia," ka ti ve a.



"Nia, ti ngei ngei ang u; mahse, LMa a zin ve daih a."



"A nih chu, a lo haw hunah a ni mai alawm. Khawiah nge a zin a?"



"Ka va hre chiang tawh lo e.. A pa entîrin a hruai a, a buai ve khawp mai. Ani pawh a thin chu a rim ve khawp ang, biak theih i ni mang si lo va," Feli chuan a ti leh a.



Mary chuan inthlahrung fe hian," Engkim hi ka thiam loh a ni vek maiin ka hria," a lo ti sap a, a hmel ațang pawhin a inthiam lo tih a hriat ngawih ngawih.



A kutah ka vawnsak a," Kan hma hun hi tumahin kan hmu lâwk bîk lo va, thil thleng tůr kan hre lâwk thei lo a ni. Dam takin kan inhmu khâwm a, LMa pawh, a pa chu eng ém a ti lo ang a, țha taka an lo haw turah ngai ang," ka ti a.



"Mary, over viau lo țhìn teh. En teh, Novi, i awm loh ațang khân a nguai bûr reng mai a, a chhan pawh ka hre lo. A bialpa nèn an ințhen ni chuan ka hre si lo," Feli chuan a lo ti leh bawrh bawrh a.



"Ka rawn thleng tawh bawk a, nguai bûr ka phal tawh lo ang," nui chung hian ka ti a, awmze nei deuh hian Mary chu ka melh a, keimah avànga a inthiam lo reng tùr hi ka duh lo.



Phone ka lei ve tawh avàngin LMa number chu ka la a, zànah ka bia a, a lo thinrim der ve ngial nain ka phone ka tih bo thu ka hrilh chuan a nêm ve leh deuh. Anni pawh kâr khat hnuah an rawn haw chho thei tawh dáwn a ni.



"Vawiin chu eng nge i an? I chau em?"



"Chau lo ve. Nang? I kalna a hla bawk sia?"



Kan inhmuhna hmasa ber, a huan leiletah khân a kal a ni. Ka kal ve châk a; mahse, a phal lo, khua a lum si a, bâkah, ka kut ka tihnat belh ang tih a hlau bawk.



"Ka hmu che a, titau viau tho mah la, ka hah a dam sawng sawng tho."



Zanriah ei hun hma hretah a rawn thleng a, kal ve min phal loh avàng chuan tlêmin ka titau ve deuh a, ka lo ngaihsak duh vak lo.



Mahse, zanriah kíl laiin ka keah min rawn tlawh zauh a, ka phu zawk zui. Hlautháwng zet hian ka melh phei a, ani lah chuan min lo en miah lo, a thil ei lai chauh a ngaihtuah emaw tih tùr a ni, a lo ei mial mial tho.



Ka kham hnu chiahah rawn khamin ka kut sil lai chuan," I tihtauh pawh hian i lo chhe lo ém ém tho a lo nih hi," a rawn ti sup a, ka nuih a zat em avàng chuan ka nui hak a, hetiang țawngkam a phuh chhuak hi a inhmeh ka ti hlawl lo.



"Khawi maw, lo hnai teh, ka lo kuah phawt teh ang che."



Thu awih tak chuan ka pan hnai ve mai a, a ângchhûng a awm tluka himawm leh nuam a awm hlei nem le.



Kan inkuah vawng vawng hnuah chuan," Karleh chu Champhaiah kal leh ila?" a ti a, khumah chuan kan țhu dùn a.



"Eng tiin maw?"



"Thil pawimawh lutukah maw le."



"Pawimawhna ka nei ve àwm lo e?"



"I pawimawh ber zâwk, i tel lo chuan a buai vek zâwk ang."



A beksam kâwng deuh mal tawh zûtsak pahin," Kan pahnihin em ni?" ka ti a, meng sawr sawr chung hian," Min hlau chu a ni lo tiraw?" a ti a, a nuih deuh avàngin a fiamthu tih ka hria.



"Hlau lo râp che," uar zet hian ka ti a.



A nuih a za ngang a niang, a nui ve nasa tawp.



"I țawngkam hman chuh!"



Eng nge a dik lohna? Ka hlauh lohzia ka sawina, ka uarna țawngkam a ni ve mai a, nuih viau tùr a awmin ka hre lo.



Ka phone a rawn ri ta dar dar a, ka'n en a, number ringawt. Nuam ti lo rilru deuhin ka'n chhâng a.



"Hallo?"



"Novi a ni em aw?" A aw chu, ka hriat hnu a ang.



Ka hlauhthàwn deuh avàng chuan loudspeaker ka on a,  a lo hriat ve theih ka duh a ni.



"Aw, ni e, eng nge ni ta?"



"Biaka ka nia, eng emaw thilah ka hmu thei che ang em le?" a rawn ti a.



"Eng thilah maw?" tiin hlauthâwng deuh hlek hian ka pu kut chu ka vuan a.



"Phone-a sawi chi pawh a ni lo, khawngaihin, hun thâwl min pe thei ang em?"



Ka pu chu mitmeiin ka râwn vat a, amah inkâwkin hmui phun hian," Keimah nèn," a lo ti sup a.



"Ka hmuh hunah che chuan mi dang ka rawn hruai ve thei ang em?" Ka pu chuan a lu a lo bu nghut a.



Chu pa chu a phun deuh hluk a," Aw, thei ang. Khawngaihin, i rilru thlâk lo hrâm rawh aw," a rawn ti leh a.



"Engtin nge min hriat a?" Ka dîlchhût leh deuh.



"Hriat loh theih pawh i ni lo, nang pawhin min hria alawm. Chhùnah in dàwr chung restaurant-ah khân ka rawn kal ang, i dàwr nghahpuite kha chu i rawn hruai loh hrâm ka beisei," a rawn ti leh a.



Makti zet hian ka pu chu ka en ringawt. Biaka. Ka hriat ngai ka hre lo, min hai a niang; mahse, ani lah chuan min hre hle si, dàwr awmna nèn lam a hre bawk si a.



"Min hai a ni ngei ngei ang? Ka hre ngai miah si lo va?" Ka ti tak nain a aw kha chu ka hre tawhin ka hria. A aw ang aw nei kha an tam vak lo ang, a thâm chhél mai a.



"I theihnghilh tawh zâwk a ni lo maw?"



"A aw kha chu ka hriat hnu a ang deuh chu ka tia," tiin hriat chhuah ka'n tum a, ka ngaihtuah chhuak hlei thei tlat lo. Khawi hmunah nge ka hriat ang, engtikah nge  niang tih chu ka ngaihtuah lêt vang vang a.



Ka hre chhuak thut. Ka pu kut chu ka hmer ngawt ngawt a, ka thin a rawn phu nghal dawt dawt bawk.



"Engtizia nge-"



"Ka hria," ka ti sep a, ka aw chu a ri chhuak chang chang chauh.



Min ru botute zînga  pakhat kha a ni, a aw hre tawh tlatin ka inhriat nghe nghe kha. An hmai an tuam tlat vàngin a hmel ka hre thei lo va, min ru botute zîngah tel mah se, ka chungah a sual loh ém kha



"Min ru botute zînga mi kha a ni," ka ti chhuak ta sep a.



Chiang zeta min enin ka kut chu min hùmsak a, fâwp zauhin," I bulah ka awm dâwn alawm, hlau miah suh, ka țhiante pawh ka lo hrilhlâwk ve ang e," a ti charh a, ka hlauhna tihreh tumin ka hnung chu a chûl pah bawk a.



'Ka țhiante'. Eng hna hi nge maw a thawh chiah le? Ka bula a awm chuan engmah ka hlau lo ang; mahse, min rawn betupa hian kutthlâk min tum ta se, emaw, min vau tum leh ta se? Min chhan tumin amah zâwk hian hliam tuar ta se...




*LUNGAWINA CHU LAN CHHUAHTÎR FO LA, LUNGAWI LOHNA ERAWH THUP A NGAIH CHIN A AWM VE ȚHÌN*