☆SILVER ZUNGBUN☆ - 23 By Dingdi Pachuau

☆SILVER ZUNGBUN☆ - 23 By Dingdi Pachuau



"Lo kal leh lo zâwk mai rawh, a hlauhawmin ka ring lo." Keimah vàngin eng emaw a tâwk ang tih ka hlau, ka inthiam thei lo ang.



"Duhtâwk teh, nangmah mai hian khawiah mah kaltîr che ka tum tawh lo."



"A hlauhawmin i ring em?" tiin ka zâwt a, ka hlauhna ka thup hrám hrâm zâwk a ni reng sia, kei chuan a hlauhawm ka ring a ni.



"Min ring em?"



Ka ring, ka ring lutuk; mahse, 'thut' awm ve thei tho a ni, kan hma huna thil thleng tùr kan hre si lo.



"Aw."



"Ka kutah engkim dah rawh, kan pahnihin kan hmu ang, a țha em? Hlau miah suh ang che," tiin a kut pahnih chuan ka biang tawn tawnah vuanin kan inen vang vang a.



"My Queen Bee hi a nat ka phal tawh hauh lo," ti supin a rawn kûn hniam nghal zat a.



A tûkah chuan huphurh deuh si, tihlan loh hrâm hrâm tum siin dàwrah chuan ka kal a, ka puin min thlah a, ka huphurh vàngin ka ngaihtuah lo thei lo va, ka ngawi vang vang reng a.



"I ngaihtuah nasa lutuk, i bulah ka awm dáwn alawm. Kan bulah, in inhmuh chhûng zawnga lo enthla rengtu tùr an awm bawk ang. Chuvàngin, huphurh suh, aw?"



Ka kut a rawn chelh chuan ka lo nuih sak. A bula ka awmin ka thla a muang țhìn a, ka taksa pêng, ka kut emaw ka hnung emaw a dehin ka bulah a awm a ni tih min hriat thartîr a, nuam ka ti veng veng țhìn.



"Ka ring che alawm."



"A țha. Tuman an tina dâwn tawh lo che."



Chhùn chawlh hun hma zawng ka pu chu khawiah nge a awm ka hre lo. Chawlh a hun dâwnah tak a rawn lang nawlh a, Mary leh Feli hnênah chuan a hmain ka lo hrilhlâwk tawh a, a lo lan pawh chuan engmah min zâwt lo.



Ka pu nèn chuan kan lo nghâk a, ka hlauhthàwn ém avànga ka puin a țhiante ni àwm tak, kan țhutna piah lawk lawka awmte chu a mitmeiin a be țhìn tih hmu lo phei ila chuan ka hlauthâwng leh zual ang. Ka tân ka hlau a ni lo va, ka pu hian keimah vàngin buaina eng emaw a tâwk ang tih ka hlau ber.



A lo thleng ta, min rawn pan nghal chat lo se chuan ka lo hre miah lo ang. Lukhum kun deuh tak hian a khum a, hmel tihlan hlau deuh, inthup tum deuh a ang.



"Min hmuh duh vàngin ka lâwm e," a ti phawt a, chutah, a lukhum chu phawkin," Min hre chhuak thei tawh em?" a ti ta a.



Ka en vang vang a, khawiah emaw chuan ka hmu tawh a ni. Ka hre chhuak mai lo, ka lu ka thing nar nar a.



"Hre mai lo tlat!"



"Sunday tlaiah kan lènho tawh kha."



A va mak àwm ve! Ka lêng khât sia, LMate nèna kan lèn bâk kha, ka la léng lo asin. Ka pu ka thlêk zawk a, min en lo nain 'Sunday tlaia lènho' a sawi chuan a lung a tiawi lo ngawtin ka ring.



"Min hre sual a niang?"



"Mary țhianpa kha ka nia."



Ka en leh vang vang hnuah ka hre chhuak ve ta. A hming Biaka a ni tih ka lo hre hauh lo!



"Ka hria che."



Nui lui sak hian," Ka hmuh duhna chhan tak che chu, ngaihdam dìl che ka duh a ni. Ru botute zîngah khân ka tel ve a, min hre kher lo maithei, hmai ka tuam zel avàngin. Khatiang kha ka tum rêng vàng a ni miah lo va, nangmah hi i ni ang tih ngaihna ka hre miah lo bawk," a ti ta a.



"Chuti, engah nge police-ah i report loh?" Ka pu chuan a lo ti hmuk a.



"Nia, ka hlau a ni, bâkah, ka tih loh chuan Mary chungah țuan an tum a. Ani, engmah hre ve lo chuan a tuar ringawt thei lo ang."



"Tu nge vautu che chu?"



"Ka hre lo, police form ha a ni nghe nghe. Police-ah report ta ila, min hre chhuak rang dâwn lutuk, bâkah, Mary'n a tuar nghal dâwn si a, chu chu ka ngai ngam lo a ni."



"Engtin nge a vau theih che a?" ka lo ti a.



Za lo zet hian a nui a," Ka tihsual vàng liau liau a nia, țhianho kan in-race țhìn a. Chutah chuan, leader ka ni bawk, police lamin min hre ngai miah lo; mahse, zan khat chu ka race-puipa chuan finrâwl a lo chhuah a ni chêk ang, ka chak dáwn lo emaw tih hnuah ka chak leh ta sia, ka inrin loh lai takin min khawih rawn ta a."



"Ka țhiante rawn kal ve meuh chuan min khawih nasa hman viau nain tumah huphurh ka nei bîk lo, kan inhnek thî nuai tawh. A hlau leh si chuan police lam a lo phone a ni chêk ang chu, an rawn kal ta a, ka tlânchhe thei hrâm. Ka race-puipa patea chu police a lo nia, ani chuan ka hming a hrilh a niang, min rawn zawng a."



"Mahse, ka nu hriattîr ka duh lo; mahse, min hre ngei dâwn si a, ka nu rilru tihnat chu khawvêla ka thil duh loh ber a ni, pa nei tawh lo ka nih miau avàngin. Chu police-pa chuan  ka duh ngai loh tùr leh ka inchhìrna tùr deal min siampui ta a. Ka duh lo a nih chuan Mary tihnat leh ka nu thu dik hrilhah min vau. A dik lo tih hre mah ila, ka nu rilru tihnat ka hlauh lutuk vàng leh ka tihsual liau liau vàngin chu thil chu i chungah ka ti ta a ni."



"Kan inremna siam ațangin ka inhnûkdâwk thei lo va, a tìrah ka thil tih tùr chu ka hre bawk hek lo. Nangmah i ni tih ka hriatna chu nangmah hmu tùra i awmnaa ka lo luh khân a ni chauh bawk. Ka inthiam thei lo va, ka awm pawh a nuam thei lo; mahse, kha thil kha ti tùrin ka lo intiam ve tawh si. I ngaihdamna dîl ngam pawh ka ni lo tih ka hria, i duh phawt chuan engtin pawh min ti rawh, ka tihsual man chu tlâk fel ka duh tawh a ni," a ti dap dap a, en pawh min en țha ngam lo, a kun deuh chhal a.



A thil sawi zawng zawng chu hmaih nei hauh lovin ka lo ngaithla kar a, rilru put dàn tùr hre thiam rih lo mah ila he pa hian a thil tihsual hriain a inchhîr tih ka hria. Engtin tehlul nge kei hian a thil tih man chu ka pêk tehlul ang?



"Police deal siampuitu che chu i la hria em?" ka pu chuan a lo ti a.



"Ka hmuh chuan ka hria ang, a hming erawh ka lo hre miah lo, ka hmu tawh ngai lo bawk."



"I number hi Mary ka dîl a, i lo la dam țha a nih tih ka hriat țantirha ka làwmzia mai chu, i thih loh kha ka ring réng réng lo. Ngaihdam ka dìl ngei che a ngai tih ka hre ta a, eng thil pawh ka chungah ti mah la, lâwm taka tuar mai tùr ka ni tih ka hre tawh a ni."



Ka mittui a parawl kuang mai. A thil sawi dàn chu țawngkam thiam vang a ni lo va, thinlung tak takin a sawi tih ka hria a, ka thinlung a dek lo thei lo.



"Theihnghilh vek rawh, engtin mah ka ti dâwn lo che."



Țawng pawh ka țawng tam thei lo, ka lung a chhia ang tih ka hlau a ni. Dik tak chuan hetiang hi ka la tawng ngai si lo va, ka thinlung a khawih ém asin.



"Ka lâwm e, ka lâwm tak zet. Nang i lo ni kha hrehawm ka ti a, tunah chuan nang kha i lo ni lo ang tih ka hlau ta, hetiang hian ngaihdam dìlna hun țha ka nei thei ang tih hi ka ring pha miah lo. Ka thinlung tak takin làwmthu ka sawi e."



A chhuah hnu chuan ka mittui chu ka hru zauh a,  ka bula țhu lah chuan min lo hmu chiang nasa.



"He khawvéla chêng ve vàntirhkoh chhe lo zet i nih hi!"



Ka nui hak. A bâna chum taih pahin," Min tilai dâwn," ka ti sap a, ka mit chu ka tuai nauh nauh a.



"A ni alawm. I hnên ațang hian zir tùr ka hre țeuh tawh, mak ka ti che a ni. Hmeichhia ka ngaih dàn țhin pawh i thlâk danglam hret hret tawh a nia," a ti leh a.



"Ka thlâk danglam vek dâwn che!"



"A ropui!"


Tunah chuan hlauhthàwnna ka nei ta lo. Huphurh leh hlauthàwnna thinlung kha, tunah chuan hlimna leh thinlunga làwm veng vengnain a thlâk ta hlawk mai.



"Senior-a hian a ngaihven che ka ti e," Feli chuan a ti a.



Ka pu a chhuak tawh a, dàwrah ka awm leh tawh a ni.



"An inah ka awm tlat a."



"A melh dàn che hi 'riau' a awm ka ti, a duh che a ni lo maw? A ni chiang."



He nu hi a hlauhawm dâwn tlat, thil a hre thei si, min man chhuak vat mai ang.



"Awihawm loh ém mai a!"



Mary chuan," Nula tlangvâl an nia, a theih tho alawm," a lo ti ve a.



Ka rilru a hlim, nuam ka ti tlat. Biaka kha ngaidam lo ta ila, tûn ang hian ka rilru a hlim tho ang em le?



Zanriah ei laiin Âtei chuan ka zirna chhunzawm dàn tùr chu  a sawi chhuak leh a.



"Inthlahrung miah suh, ka duh dàn takah chuan regular-in class kal la, mite zîngah awm tam ve deuh la ka ti," a ti barh barh a.



"Dàwr nghah pah theih hi a țha ka tia, regular lovin tih dàn a awm ang em? An strict viau phei chuan, mahni inchâwma zir tùr tân chuan a buaithlâk mah mah lo ang maw?" ka ti a.



"IGNOU-ah ti mai rawh," ka pu chuan a lo ti zauh a.



"Chu chu eng nge?"



"Admission i ti ang a, i admission fee hman chu i hmu lêt leh thei vek bawk ang. Class attend a ngai lo va, assignment i chhâng ang a, i submit ang. Chuan, exam huna exam tawp a ni mai," Âtei chuan a ti a.



"A ni maw? A va țha ve! Ka tihchi tak tùr niin ka hria."



"Nia, a țha ber," ka pu chuan a lo ti leh a.



"Regular pawhin i duh phawt chuan i thei alawm, dàwr kha chu sawi a ngai lo, i chàwl rih thei tho a," Âtei chuan a lo ti thung a.



"Nia  college life pawh chu han tem ve chhin pawh a châkawm khawp mai."



"Nuam ve deuh mai a nia, zirlai an chhe lo thei si."



"Nia, an hmuhnawm thei ka ti, an nun a zalèn thei si."



Ka keah min rawn tlawh a, rang zet hian ka en vat. Ani pawh chuan min lo en reng a, chutah," IGNOU a țha ber," a ti leh sup a.



Pu ber chuan," I pu hian IGNOU chu țha a tihpui ber che a nih àwm hi, office-ah hmelhriat a nei țha deuh a niang," nui chung hian a lo ti a.



"E, ka lo theihnghilh țêp, nei chiang e maw le, nula senior hausa tâwk kha," Âtei chuan a ti leh a, a nui var var a.



Room-a a rawn lüt chu ka lo en reng a, nula senior hausa a hmelhriat țhat vàng maia IGNOU min duhpui chu ka ngei deuh tlat, bâkah, ka duh duhnaah ka zir ve bawk ang chu.



"Eng nge i lo ngaihtuah?"



"IGNOU chu eng nge  a țhat bîkna?"



"I hriat tawh kha."



"Hmelhriat nula senior hausa i neih vàng mai maw?" ka ti ta sak a, a rûk têin ka thîk. Eng anga thûkin nge an lo inhriat tawh ang?



"An ti ve mai mai a nih kha."



"Mai mai lo."


A nui hawk a, ka va melh rum vak. Kei chu ka hausa lo va, an ina awm mai mai, thawh chhuah pawh nei țha lo, la upa lo tê ka ni a, a tân chuan eng tham mah ka ni lo alawm.



"Min melh rum ve dàn kha."



"Eng nge?"



"A no." He pa chimawmzia hi.



"Eng nge IGNOU chu a țhatna? Eng nge regular-a class ka kal chu a țhat lohna tùr?" tiin ka zâwt leh a.



A ngawi vang vang phawt a, chutah, a hnar tuai zohin," Regular-a class i kal chuan tlangvalte'n an lo melh dâwn che a, ka tâ i ni tih kha i hmelah a lang kuau thei dâwn si lo va, chu chu ka duh lo," a ti phawt a," IGNOU chu class kal a ngai lo va, ka duh hunah ka hmu thei reng dâwn che. Mahni hma ka sial tih chu ka hria; mahse, ka dinna ngaiah ka ding tho," a ti leh a.



Chutiang chu maw a lo ngaihtuah a? Nula senior hausa-i vàng a ni lo tak tak maw?



"Nula senior hausa vàng a ni lo tak tak maw?" ka ti leh ngat a.



"An ti ve mai mai ka tih kha, i hmuh hunah chuan i nuih a za viau ang."



"Eng nge ka nuih a zatna chhan tùr?"



"Hmuh phawt loh chuan a hriat loh."



*******



Champhaiah chuan kan pahnih chauhin kan kal. Âtei leh Princess-i chu an hman tawh lo, Âtei'n dàwr lamah tih fel tùr a ngah tawh a, Princess-i lah chuan a nî bula awm a lo thlang zâwk bawk nèn, kan free ta khawp mai.



Mitmei vèn tùr awm ta lo chu, motor-ah pawh insi rialin kan țhu. A chângin ka kut chuan a beksam kâwng deuh mal chu ka tuai ka tuai, hetiang hi khawih nuam ka ti tlat, a châng leh a beng ka tuai chiam a, ani lahin nuam a lo ti ve tho bawk si.



"Khawiah nge kan thlen ang?"



"I duh duhnaah."



"Cabin-ah aw."



Car tâpe chu a play pah a, a chângin zai chu kan lo zàwm a, ka thiam ve chhunah phei chuan ka lo pàwr thei tawp. Ni hlima kan tlàn lai phei chuan ka zai ring thei viau, ka hlim ém a ni.



"Hlaah hian eng hla nge i ngaihthlâk peih ber?" tiin ka zâwt a.



"Ka ngaithla thei vek mai."



"I va fel, kei chu rap, rock leh heavy metal lam chi ka ngaithla peih lo, an zai ka hriat pawh hian ka lo buai tlat, an bengchheng thei si," ka ti a.



"A ni thei viau ang; mahse, mawi tak tak a awm ve tho a nia, ka ngaihthla kual düm mai."



Ka hlim avàng leh ka bula a awm avàngin kan tlân rei lo viauin ka hria. Cabin-ah kan thleng tak tak! Ka pu hi chu a fel ka ti ve thlâwt.



"A va nuam reuh tak! Ka kal leh pawh hi ka ring tawh miah lo a nia. Ka lâwm e aw," tiin làwmthu ka hrilh hnuhnawh a.



"Lungngai mah ta che, Lunglei nèn kan kàrtawn chhén a la ngai dâwn a nia."



"Engati maw?"



"I la hre mai ang."



Ka chau deuh a niang, ka muhìl hma kher mai. Ka harh chuan a lo thim vek tawh a, pâwn lam êng deuh riai tih loh chu êng a awm lo.



Eng emaw ri leh deuh hraih țhìn hian min tiharh a lo nia. Ka khap fak fak a, ka harh chian hnuah pawh ka hre leh. Eng tak ni ang maw?



Ka hriat dàn chuan rî chu a lo hnai zél. A hnu deuhah phei chuan kan cabin pâwn lam bang hrûlah a ni tawh, a ri leh hraih țhìn, rûl tleng thâwm a ni maithei asin. Rûl a nih chuan, kan awmna a thim vek si, ka hmu thei dâwn miah lo, chubâkah, rûl pawh a lo ni lo maithei bawk.



Hlauhnain min țham er er, ka inngaihtuah hlau chawp zél tih ka inhre hauh lo. Chu thil ri chu kan awmna pâwn lamah chuan a ri ta reng mai, rawn luh a tum a ni chiang lutuk.



Tháwm dìm deuh tak chuan ka tho a, muangchàn erawh ka thei lo, hlauhnain min man tlat tawh a, ka thawte a sa mai dâwnin ka hria.



Phone pawh ka tiêng ngam lo, Ka pu mutna lamah ka tlân ta vat. A khum bul ka thlen chuan a khum tlângah ka intauh lehnghal, hlauh tawh bawk nèn, a tihchi loh kher mai.



A lo harhvâng ngang a ni, a lo harh tawh niin. Khumah a lo țhu tawh nghe nghe.



"Eng thil nge-"



Ka kuah chawt. Ka khùr dar dar chu a hre chiang ngawt ang.



"Thil ri a awm, pâwnlam bang hrûlah, rawn luh a tum niin ka hria," ka ti sar sar a.



Min kuah lêt nghal a, ka hlauhna a reh deuh nghal suai suaiin ka hria. Pâwnlam banga ri leh hraih hraih țhìn chu ka ngaihthlâktîr ve a, ani pawh chuan a hre chiang ta khawp.



"Rûl nge mi sual ni ang?"



"Ka'n fiah ang e."



"Aih..." ka lo ti vat a, ka pawm bet tlat a.



"Ka fiah phawt loh chuan i hlau reng mai dâwn asin."



"Thil țha lo a ni maithei asin."



"Hahdam rawh, eng thil țha lo mah a ni lo ang."



Rannung thlâwk thei lian ve zet mai hi a lo ni a, a awmna ațang chuan a lo vâk sawn thei tawh lo hi a lo nia, ka hriat chian tâkah chuan ka nuihte lam a zâ, ka hlau ho ka ti lutuk.



"I la hlau em?"



"A ho e tiraw?"



"Ho lo ve, mut tawh hnua harh leh hian thil ri hriat chian loh chuan kan hre makin kan hre hlauhawm țhìn alawm, kan suangtuah zui țhìn bawk nèn," a lo ti thung.



Chumi zàn chuan a bulah ka mu. Min kuah chial a, nuam ka ti thlâwt, min duat si. Min duattu ka nei khât a, ka thlahlel èm asin. Ka pu hi ka pangchan ve ngamna a ni bawk, min duattute lakah hian kan lo pangchang țhìn a lo nih dâwn hi.



"Heng hi han en teh le."



Lehkhaho hi dawhkànah chuan a rawn dah a, eng tak ni ang maw tiin ka han keu chhin a, ka chhiar a, makti zet hian ka pu chu ka en chho a.



"Heng hi... ka hmingin maw?!!"



"Aw, i tâ vek a ni."



Mak ka ti a ni, ka lo hre ngai miah lo. In nei lo leh pawisa pawh nei lo angah ka indah tawh, ka zalèn theihna tùr a nih chuan hêngho chàn pawh hi pawi ka ti ther tê lo a nih kha; mahse, tunah ka kutah, a mak a ni.



"I nu khân i hmingin a dah vek, i pahrawn khân a hminga dah a tum vàngin a ru bo che a, a fing viau a ni; mahse, a chesual ta a..."



Ka țhutna ațanga thovin ka kuah thlawp a," Ka lâwm e, ka lâwm tak zet a ni," ka ti mawlh mawlh a.



Ka hnung chûl hliau hliau pahin a âwmah chuan min beitîr tlân a," Tunah chuan nula hmelțha hausa em ém i ni tawh," a ti sup a.



Ka nui sak. Ka chunga thil thleng hi a mak ka ti lo thei lo, mumang te pawh a ang dâwnin ka hria.



*TIHDANGLAM THEIH LOH THU DIK HI DÂWT HMANGIN HÊK NGAI SUH, I HÊK HNEH THEI NGAI LO ANG*