☆SILVER ZUNGBUN☆ - 24 By Dingdi Pachuau

☆SILVER ZUNGBUN☆ - 24 By Dingdi Pachuau




"In tlawh i duh em?"



Motor-in kan tlân chhuak a, kan vêng lamah kan tlân mêk, kan in pawh hla deuh mah se ka hmu thei tawh.



"Aih..."



Kan in, ka nu nèn nuamti taka kan awmna mah ni se, kha ina luh leh kha thih hrehin ka hreh tawh. Ka room-a Rin-misuala min pâwngsual hnu ațang khân ka room kha nuam tihna ka nei tawh lo, luh pawh ka hreh țhìn a nih kha. Tunah pawh hian luh ka duh chuang lo, thil țha lo hlîr mitthlaah a lo lang leh zut zut dâwn si a.



"I in a ni tawh alawm, a neitu dik tak."



Ka melh ngai melh ràn pah chuan," Ka lût duh lo, ka duh dàn takah phei chuan a chhûng zawng zawng tihdanglama ka room hlui phei kha chu țhiah vek ka duh," zàwi tê hian ka ti sap a.


"A nih, i thawmhnawte?"


Nun thara bul ka țan tawh avàngin ka thawmhnaw zawng zawng kha chu a ha thei tùr, mamawhte pêk ka duh. Hmuha hâk nawn leh pawh ka duh tawh lo.



"Home lamah emaw a mamawhte hnênah emaw pék ka duh ang."



Kan in kawtah chuan a ding a, car dârthlalang ațang chuan ka thlîr chho a, building zahpuiawm tak chu a ni lo alawm. A hmun a lailiin a remchâng a, ka pahrawnin a lo awt viau pawh kha a àwm ka ti reng.



"Kan in hi ka hua!"



Inher meuhin min rawn en. Nia, mak a ti ang, kei pawhin mak ka inti ve tho.



"He in a duh vànga ka pahrawnin a thil tihte kha ka ngaihtuah lêt lo thei lo, thlèmna a nih hi," ka ti sap a.



Inah chuan kan lût ta lo.



Kan zin chho tih a țhiante khân an lo hria a, an lo inbe sa vek a ni ngei ang, tlai lama zanriah kîlho an rawt a, kei pawhin hun remchâng a nih vàngin ka hnial lo.



Kimate inah kan ei khâwm. A nu nèn chauha awm an ni a, a remchâng khawp mai.



Rova'n a bialnu a rawn hruai a, ka pute nèn pawh an lo inhre sa tawh a, an inhmuh chuan an infiam nghal  bawrh bawrh a.



Kei pawh chu min rawn fiam ve tho, an hriat sa ang tho ka ni. Kima erawh chu a bialnu zin hlàn a lo nia, a lo tel ve thei lo.



Chaw ka ei lai chuan Rova chuan," Zanin chu Kima chil tipût mai ang aw, ani zawng a rawn tel ve thei si lo va," fiamthu hian a ti a.



"Pût lo ve a. Rawn tel thei lo mah se, chhûngril lamah a tel reng tho alawm," nui chung hian a lo ti a.



Rova bialnu Rovi chuan," A lo haw hunah a thin a rim ngawt ang, Kima chungah a țuan ve tawh mai ang chu," a lo ti ve a.



"A thin a rim phal teuh lo, a tel ve thei lo erawh min rawn khawngaih a, a lo haw hunah kan ei dùn thung dâwn alawm."



Ka pu chuan dawhkàn hnuaiah a ke chuan min rawn tawk zauh a, ka nuih sak a, chutah," Kan rawn zin chho leh thuai mai ang, chutih hunah chuan kan kim thei tawh ang chu," a lo ti thûm dût a.



"Nia, kim thei tawh ang. Kima, lungngai duh vak suh, tihian kan ințâwm ang tho a nih hi, kan kuahin kan intitâtu bîk chuang lo," Rova chuan a lo ti leh a.



Chaw kan ei chhûng chuan kan ke lam chu a intawk reng a, țhiante erawh chuan min hmu thei lo. Min intitâtu veah ka ngai, hetiang hian a awm ngai miah si lo va, min thlahlel thar ta riau a nih àwm hi.



Chaw ei kham lamah erawh mipaho chu an țhu khâwm deuh a, hmeichhe pahnihin hmun kan tifel a, Kima nu erawh a inthiarfihlîm daih, chaw pawh  kha a ei lo.



Rovi chu a titi barh barh reng a, kei chuan ka lo ngaithla thung.



Hmun kan tihfel hnuah chuan Kima chuan grapewine, a farnute siam ve chu in tùrin a rawn chhawp a.



"In teh u, a tui a nia, a ruih theih loh aw."



A tui hmel khawp mai, kan indaih chiahin noah a rawn thlî a, in chhin ka châk rualin nuam lo tihna ka nei tlat.



An in nghal hlawm a, kei erawh chuan ka en deuh reng ringawt. In ta ila, grapewine a nih bawk si chuan ka awm a nuam lo ang, ka rilruin ka inthiam lo rûn ang.



"I duh meuh nange?" Ka en vat a, ani chuan a lo in tawh, a hmui pawh a sen deuh.



"Ih...ka inthiam lo deuh a," ka ti sep a.



A kutzungchala a bek dawmin," A taste kha hre tùrin tem chhin phawt teh, a tui reuh asin, a ruih theih loh," a lo ti a.



Tlêm chu ka in chhin a, a tui lo hran lo; mahse, ka ngainat tùr chi a ni lo tih ka hre nghal.



"Eng nge a an?"



"Tui ve reng." In nawn ka tum tawh chuang lo. Ka bul chéta a țhut avàngin țhian dangte hmuh loh laiin ka no chu ka pe daih, ani chuan nui suk chung hian a lo tlâk nghal.



"I hmui sîrah a kai," tiin ka hrilh sap a.



A lei chuan a'n liak a, a la fai loh avàng chuan ka rawmawl chuan ka hrûksak zauh a.



"Thanks."



Ka nuih sak ringawt.



Titi lai chuan tu phone emaw ni a rawn ri țang țang a, Rovi a tho vat. A bag ațanga phawrhin," Hm, ka va luck thei tak!" tiin a phone chu a en a, a hmet tàwp leh nghál.



"In pa i bulah a awm reng a, tu nge maw ni se i tih rêng rêng ni? " Kima chuan a lo ti a.



"Tlangvâl dang dang pawh ka hûng nual alawm, pakhata innghah bur chu a dik bîk lo va."



Kima chuan Rova melh ralh pah hian," Hria maw?" nui chung hian a ti zauh a.



"Ka hre chiang alawm, company call bâk a ni lo."



Kan nui ta dar dar.



"Ani hi chu company hian an duhsak a, mi zîngah a luck lo bîk ang tih an hlauhpui thei ém a ni," a ti zui a.



"E, lipstick hi, Novi, en ve teh, ka chah thleng thar a, a mawi hlawm lutuk," tiin a bag ațang chuan polythene lian vak lo hi a rawn khai chhuak a.



Min rawn pe a, lipstick hi ka ngaina fahran lo va, ka inhnawih khât viau bawk asin.



Ka en ve tho. A mawi hmel hlawm, matte  vek a la ni zui a, Felite'n an duh ngawt ang chu.



"I inhnawih ngai loh kha."



Nia, ani pawhin a lo hre ve khawp mai. En hi a nuam ve hranpa a, a hmuhnawm ka ti a ni.



"A hmuhnawm ve hrim hrim alawm."



Rovi chuan," Inhnawih ve zauh zauh tùr asin, lipstick han inhnawih hi chuan kan lan dàn hi kan chei bîk a, mahni inrintâwkna pawh min pe alawm," tiin ka bulah chuan a lo țhu hnai a.



Sen nalh deuh reuh mai hi ka kutah ka tât chhin a, a mawi hmel reuh khawp mai.



"I hmuiah tât chhin zâwk rawh, khatiang kha chuan hriat thiam a har," a lo ti leh a.



Ka bag  ațangin dârthlalang ka phawrh a, ka inhnawih chhin a.



"I inhmeh tawp, i ngo sia, i vun nèn a colour kha a inchawih lutuk."



Mipaho chu an rawn hawi ve a, Kima chuan," Kan nu tân ka lo ensak ve dâwn em maw ni le?" a ti a.



"Kha, lo en ve rawh, a lâwm ngawt ang."



"Hm, hralh loh i hlauh vàng, i fak thiam si."



Nui var var chung hian," A mak thei. Ka fak loh chu, a nih leh la tawp suh," a ti a, a titau der a.



"Kha chu, i la dâwn em ni?"



"Ka hre lo, ka inhmeh ve tho em?" tiin a lam chu ka hawi a, ka hmui hnawih chu ka entîr pah a.



"I inhmeh khawp kha. Rovi, eng zât man nge ni a? "tiin a zâwt nghal zat a.



"A to lo, 200-in la rawh se."



"To lo a? 100 aiin a to daih chu," Kima chuan a lo ti hmanhmawh a.



"I ninawm!"



Mipaho chu an nui tut tut hlawm a, ka pu chuan," Kha chu i inhmeh riau kha, la la," a ti a, a wallet a phawrh nghal a.



"Ka nei ve alawm," ka lo ti sap a.



"Ka'n leisak ve ang che, ka vawi khat leisakna tùr che a nih hi, i inhmeh bawk si a," tiin min en vang vang a.



Haw kawngah chuan min melh leh zauh zauh țhìn a, a țawng hran bawk si lo va, awm a tinuam lo lek lek.



"Engati nge?"



"Eng chu?"



"Min en min en kha."



"Lipstick kha, i inhmeh ka ti."



"Ka lâwm e, min leisak bawk sia," tiin a tukkhum sam kâwng deuh mal chu ka chùlsak a. A sam tawi deuh, khawng deuh ang hi khawih nuam ka ti tlat alawm.



"A dang pawh ka leisak leh ang che, i duh phawt chuan."



"A, ka lei ve thei tawh alawm, ka thawk chhuak ve a. Min leisak vàng hian ka lâwm hle a ni."



Kan thlen chuan a lo tlai ve ruih tawh. Ka intleuh zawk, vawiinah kan lêng kual nasa si a.



"Ka bulah i lo mu leh ang em?"



"Aih, ka hlau tawh lo va."



"Hlau leh la ka ti."



Rum zeta melhin a bân bulah chuan ka chùm chawrh a," I va sual tak! Ka chungah i duh chhe e!" ka ti nang nang a.



"I hlauh khân ka bulah i mut theih phah a."



"Ka hlau tawh dâwn rih lo."



A nui hawk. "Ka tihțhaih dâwn che," a tih chuan ka lo nui a," I hlauhawm ngawt ang chu!" ka lo ti a.



Ani tihțhaih chu ka hlau lo sa. Bâkah, min tihțhaih dâwn lo tih ka hria.



Ka hàm ta bài bái. Ka mut a chhuak deuh tawh  rêng a ni, dâr 10 a pèl ve tawh hrim hrim bawk.



"Mu tawh ang?"



"Ka bulah i mu dáwn maw?"



"Aih..."



"Zaninah ka la fâwp miah lo che."



A ni dâwn tak. Kei pawhin a fawh ka thlahlel a, nuam ka ti, ka ngai ve tho.



Ka pan hnaih chuan min lo pawm kâng lawp, ka kut tuam khawng a ni tawh lo bawk a, min dìm tehchiam tawh lo.



Kan infâwp nghal vang vang a, tu nge duhthawh zâwk pawh a hriat loh. A lakah ka zak țêt tawh bîk lo va, ka duhna leh min duhna hian ka zahna a hnawt bo ni berin ka hria.



"I thlum veng vengin ka hria."



"Nang deuh."



"Ka la duhtâwk mai lo ania," tiin min fâwp chhunzawm leh nghal zat a, kei pawhin uar theihtàwpin ka lo chhâng lêt.



Chhuat ka rap tawh a, a kut zei zetin ka hnungzâng a chùl riak riak avàngi  ka thaw deuh hak, ka tháwk pawh a dik lo țan.



Min la fâwp duhtâwk miah lo. Kan indût ngar ngar a, a kut pawh a hlei țan; mahse, ka hau chuang lo, nuam ka ti ve miau sia.



Ka hma lam a rawn chùl phei tâkah chuan a kut chu ka lo man chat. Ka thâwk a dik lo țan tawh a, ka insùm theih laiin ka tihtàwp vat a ngai.



"Ka mamawh che a ni."



Um, kei pawhin ka mamawh a niang, hetiang hian ka la awm ngai tawp lo. Kan awm dàn chu a inan viau ka ring.



Min fawh kârlakah ka hminga min koin a phun sup sup a, a kut pawh ka thlah leh tawh, kei pawhin a chùl vel kha nuam ka ti tlat si a ni.



"Ka bulah..riak la?"



Ka châk lutuk, a nuam tih pawh ka hria; mahse, nupa kan ni lo, inngaizawng, induhtawn chauh kan ni.



"Ka thei...lo."



"Ka khawih lo ang che." Tunah chuan chiang zetin kan inen tawh, a mitmeng nung zet țhìn kha a thim deuh tawh a, châkna nasa tak ka hmu bawk.



"Lân..."



"Min koh dàn hi ka duh."



Ka kut chu la kângin a fâwp zauh a," A nih, zanin chu ka bula i riah dâwn loh chuan i bulah ka lo riak ang aw?" a ti theuh a.



Ka awih thei lo zâwk.



"Phakar roh!"



"Eng nge? Phal mai la?"



Ka hnial țùng bík ta lo. Kan chesual dâwn tihna a ni lo va, ka bula mut a châk ve a ni mai a.



"Naktûkah eng nge kan tih ang?" min kuah bet hneh tak zet.



"Eng nge tih i duh?" Zawhna bawk.



"I tih dàn dán. Boss i ni alawm."



"Mu nilêng mai ila?"



Ka chek hlak a," Chimawm suh!" ka ti sap a.



"Engtikah nge kan haw ang?"



"I tih hunah."



A biang hmul rawn țo tùr chu ka khawihsak niap niap a, mipa naupang ang maia awm châng a nei ve țhìn tho tih ka hria; mahse  nuam ka ti.



"Kan haw hunah i bula ka mut i phal tawh àwm si lo va, Champhaia awm reng mai hi ka duh."



"Tihchi nâng, Champhaiah chuan hna thawh tùr, pawisa thawh chhuahna ka nei tlat lo, ka haw loh chuan ei tùr pawh ka thawk chhuak thei nâng," ka ti duah a.



"Nula hausa i ni alawm."



Ka nui hak hak a. Nula hausa. Nula hausa tak chu ka ni thei ngai lo ang; mahse, pawi ka ti lo, ka bula ka pu a awm chhûng chuan...



"Nula hausa ni lo mah ila min duh tho chuan-"



"Neih nei miah lo mah la, ka duh tho che."



A nuam asin, tunah pawh engmah ka nei lo, neih ka neih loh lai ațanga min duhtu kha a ni miau.



"Ka làwm e, kei pawhin ka duh che."



Engmah sawi tawh lo chuan kan infâwp vang vang a.



"Muthilh tum tawh rawh le."



Min kuah nghet sauh sauh a, boruak a lum lo chu kan vànnei, inhnaih tak leh insi chétin kan awm theih phah.



A  awm nghèng ràn chuan ka maimichhîng a, ka thla a va muang si ém!



"Mangțha aw."



"Muttui sûk sûk, my Queen Bee."



Min rawn fâwp leh zawk. Ka muthilh a rawn chhuak selh selh a, ka pu âwm nghèng chuan thlamuang zet leh rilru ngaihtuahna pawh sêng thei tawh lo chuan ka mumang ramah ka chêng titih nghal mai.



Ka țhangharh chuan a bawp sei zet chuan min lo kherh bet chial a, a bân pakhat chu ka lo kham bawk a, lehlamin ka kâwngah a lo kuah bawk, ka tlàn bo hlau ni àwm takin.



A thaw ri sâk sâk  a, a mut a tui hle a nih hi. A hmuiah ka fâwp zauh a, ka tâna mipa fel leh ka engkima engkim hi, ka phû lo tak zet a ni, ka nunna leh ka chanvo dik tak min pe lêtin zalènna min hmuh lêtsak si a.



A biang chûl zohin," Ka hmangaih che," ka ti sap. Ka aw chu a hre thei kher lo maithei, a zàwi lutuk a.



Nia, he pa hi ka hmangaih a ni.




*CHANGKÀNNA HI THIL NEIHAH TEH LOVIN RILRU PUT HMANGA TEH ZÂWK TÙR A NI*







☆SILVER ZUNGBUN☆ - 25 By Dingdi Pachuau



Rihdîl kal a rawt nain dàwr lam ka ngaihtuah avàngin leh ka duh ang ringawta awm thei ka nih lohzia hriain ui tak chungin ka hnial ta kha a ni a, hun remchâng neih veleha kal tùr tiin kan kal ta lo.



Haw kawngah chuan ka pahrawn an man chhuah dàn, a chet sual dàn leh a thil lo tih țhin zawng zawng hai lan a nih dàn chu min hrilh sup sup a, ngun zetin ka lo ngaithla a, ka lo hriat ngai miah loh ka hre țeuh mai.



Rin-misuala chanchin pawh a sawi chhuak zauh. Ani erawh man chhuah la ni lo mah se, chhui reng a nih thu a sawi a, chutia a sawi kâr lakah chuan," A nih, eng hna nge i thawh chiah hi?" tiin ka lo pawt chat vat a.



A ngawi ta vang vang a, min chhâng dâwn lo emaw ka tih hnuah chuan," Thil ka chhui țhìn," a ti ta sup a.



Eng emaw tak a thawh țhin chu ka ring rêng a ni, a fing dâwn si a, a inhmeh dâwn lutuk. Thil ngaihtuaha a han maimichhîng vang vang tùr leh a han ngaihtuah mûk tùr vél chu ka mitthla chhin a, ka nui sak.



A inhmeh dâwn lutuk a ni.



"Ka inhmeh lo i ti a ni tiraw?"



Ka en vat a, min lo en rùn a; mahse, kawng lam a en leh nghal vat.



"Aih, i fing bawk sia, i inhmeh dâwn lutuk, ka mitthla chhin che a."



A nui hawk. A nui tam lo va, a nui ri hriat hi nuam ka ti țhìn.



"Ka bànsan tawh nain i case ka han hriat khân ka khawih leh duh ta a, ka bànsan chung pawh hian țhiante puih an ngaihnaah chuan ka pui tho."



"Nang kher ka lo tawng fuh che hi chu ka vànnei ngawt mai, zalèn takin ka awm theih phah si a, vàntirhkoh pà leh aw thûm zet, ka engkima engkim tùr hi a lo awm reng a ni tih ka lo ngaihtuah pha ngai hauh lo," ka ti a.



A nui leh hawk hawk mai.



"Vàntirhkoh hàng chi!"



"I nui ri hriat hi a nuam ka ti bawk. Nèlawm loh tak angin awm mah la, i thinlung chhûngril hi a țha tih ka hria a, engtin nge i bialnu hluite hian an țhen theih che tih ka ngaihtuah a ni," ka ti leh a.



Ka ti fiam hauh lo. Hetiang mipa țha, mi ngaihtuah ém ém mai leh fing tak, țawng tam bawk si lo, lêrh bawk si lo hi ka tawng leh tawhin ka ring lo, kei chuan țhen ka duh ngai lo ang.



"Bialnu hlui ka țhen lohin nang ka tawng thei nâng che."



"Nia, a dik leh bawk si. Ka hmuh hunah làwmthu ka hrilh mawlh mawlh ang."



Kan nui ve ve.



*******



Tunah chuan Princess-i pawh school a kal ve tawh. A țan niah chuan Âtei'n a hruai a, mi dang a hriat ngai loh a hmuh chuan nuam a ti lo va, Âtei bulah a awm tlat; mahse, an lo ngaihven thiam riau a, bâkah, an țan hmain ka pu nèn kan kalpui tawh bawk a, nuam a tih theih nân. A țan nia a suakbàk bâk chu harsatna a awm lo ve.



Kan chanchin pawh ka puin a hrilh tawh a, hrilh lo mah se an hriat vek tawh tho ka ring. Min ngei phah lo va, min biak tam phah chuang lo; mahse, Âtei hian min fiam zauh a chîng a, ka zak thei viau. Ka pu a awm chuan a lo khap vat ziah, min lo chhan thei tawp.



LMa pawhin a pa chu a buaipui zak zak reng a, school lam pawh a chàwl tawp. A changin U Melo-i'n a buaipui a, cancer niin a stage a lo sâng ve deuh tawh a, an buaipui lo thei lo.



Dàwrah ka puin min thlah țhin avàng leh min rawn hruai ziah avàngin țhiante lah chuan min dem ta ziah a, ka nui mai mai. Thu dik tak an sawi si a, phat pawh ka tum chuang lo.



Biaka pawh a rawn lang ve zauh zauh. Kan chungchang, ka chunga thil thleng kha mi dangin an hre lo va, sawi chhuah ka duh hek lo. Mary pawhin a hriat dànin a hre tawp a, Biaka a hrilh pawh ka ring chuang lo. Tihian  theihnghilh chho bel bek ila, nun tharin nung vek ila ka duh.



Biaka phei chuan farnu en takin min en tain ka hria. A chungah engmah ka tih loh vàng chuan min ngaina ém ém tawh a, Mary lah chuti bawk. Ngaihdamna thinlung hian mahni mai bâkah, mi nun pawh hi a lo tihlimin nun țha lo lai a lo siam țha thei a ni tih ka hriat thiam phah.



Feli pawh a bialpa naupang zet nèn an la ni tluang zêl. Feli hi a pangchang thiam thei hi ka ti khawp a, a rûk chuan ka nuih a lo za țhìn. An induh thiam reuh khawp a, an hmuhnawm ka ti țhìn.



IGNOU-ah BA chu ka zawm ve ta a, zàn lamah lehkha zir tùr ka nei ve ta. A textbook chu ka'n keu chhin a, ka zir peih loh deuh chi a lo ni! Rei vak lo hnuah Assignment a rawn thleng a, ka han en a, ka ner nasa.



Ka rin aiin a lo tam reuh lutuk a, ziah lam hi ka thil peihzawng tak a nih loh vàngin ka huphurh tawp.



Zàna Assignment ti tùra ka inbuatsaih lai chuan kawngka a rawn kik a, Princess-i a rawn lût a.



"E, Au No, lehkha i zir ve a ni maw? Kei pawh Ànîin min zirtîr a, ka thiam vek tawh," a ti sar sar a, ka bulah chuan a rawn țhu hnai ve a.



"A ni maw?  I thiam tawh chu han sawi chhin teh," ka lo ti vat a, ka lehkhabu keu chu ka dah sawn bawk a.



A B C chu a indawt dànin a'n sawi zat zat a, one two three chu ten thleng a sawi bawk a, good morning sir/ miss/ madam tih leh thank you tih nèn. Ka nuih a tiza reuh lutuk, a intithiam viau reuh bawk sia, a sawi zawh chuan kut ka lo bensak a.



"I va thiam tawh ve a!! I thiam lutuk ringawt. Naktûk tlaiah làwmman atân eng nge kan lei ang?"



"Ih...Ànîin Pencil colour min lei dâwn a, i lem ka siam ang a, mawi deuhin kan colour dâwn nia," a ti leh reuh a.



"Awii, a mawi  ngawt ang, ka hmu chák tawh."



"Eng nge in lo tih dun a?" Ka room-ah chuan rawn lûtin kan bulah chuan a rawn ding a.



"Princess-i hian A B C a thiam tawh lutuk a, min lo hrilh a," ka lo ti vat a.



"Ka fanu hmelțha leh duat kha a ni miau a," tiin rawn kûn hniamin a biangah chuan a rawn chuks zauh a," Ànîin a zawng che a, i mut a hun tawh a nia," a ti leh a.



Princess-i chu tho vatin," Au No, bye aw. Âpa, nang pawh bye le," tiin a pa biangah chuan a chuks ve zauh a, room ațang chuan thu awih zet chuan a chhuak ta nghal a.



"Thu hi chu a awih ve ngawt mai!"



"Thu awih lo ka duh lohzia a hre thiam alawm," a lo ti nghut a, chutah," Lehkha i zir țan tawh dâwn maw?" ka dawhkàn sîr deuha lehkhabu a hmuh chuan a ti leh a.



"Assignment kha..."



"Hun pawh kan nei dùn thei dâwn lo tihna a ni maw?"



"IGNOU a țha i tia, assignment min tihpui thei tihna. Chuan, kan awm dùn thei chauh ang," ka ti ve tlat. A tam dâwn sia, ka chhâng rei dâwn lutuk asin.



"Phakar reuh hle mai!"



Ka nuih mai mai, min tihpui pawh ka phût chuang lo. Ka fiam ve pah a, mahni chauha awma chhàn ai chuan a lo awm hian a nuam dâwn hrim hrim.



Assignment paper chu a en chhin a, a chhiar ni hmiang ka ti mai. Keiin textbook ve deuh chu ka lo keu a.



"A answer chu ka lo zawnpui ang che, ziah erawh nangma ziah vek a ngai ang."



Yes, he pa tak hi chu, ka va duh chiang tak! Answer awm sa ziah chhuah char charte chu ka huphurh lutuk bîk lo ve.



A phone-ah chuan a zawng zung zung a, keiin a bu ka lo keu bawk a, ka bul chêtah chuan a țhu bawk a.



"Zirlai bialnu neih chu, a tihchi dâwn loh tawp mai."



Ner khum nâng pah chuan," I sual," ka ti hlak a.



"Sual ila chuan, ka zawnpui nâng che maw le!"



"Khatia tih kher."



"Engtin maw?"



"I hre reng."



A nui hawk a," I hua maw?" a ti sup a, ka lam a rawn hawi nghal bawk a.



"Hua."



"Han nui teh le."



"Aih."



"I nuih loh chuan..."



"Eng nge? Ka nui chuang lo ang."



Min țhut hlat deuhin," Ka seh ang che," a ti a.



"Ka hlau lo."



"Tak tak?"



Sîr lam ka hawi ta daih a, ka titau laklawh. Ka lungawi mai rih lo ang.



"Inchhìr awih loh!" ti supin ka mal chu a rawn hmer ta thut a, ka phu zawk, ka țê țhat bawk.



Min thlah duh hauh lo, zâ ka tih mai bâkah a hmer nghet mah mah.



"Min thlah teh, a na a nia," ka ti ta chùl a.



"Inchhìr awih loh ka tih kha."



"'Ka seh ang che' i ti a nih kha, min hmer tùr thu i sawi miah lo."



"En teh, hei-" ka hawi phei chiah chu min rawn fâwp nghal. Min tihder ve chiang khawp mai.



Ka chhâng lêt duh lawk lo va, ka hmui ka chîp tlat bawk; mahse, ka hmui hnuai lam a rawn seh tâkah chuan ka áng zawk, a hnu lamah erawh ka țang rei thei teuh lo.



"I han insùm a i han țan vél chiah hian ka phûr sauh țhìn," min fawh kârlakah chuan a ti sup a.



"Min tiduhdah ém a nih kha."



"Ka tiduhdah phal lo che, i hria alawm."



A mal chungah min pawm a, keiin a nghâwngah ka kuah thung. A tukkhum sam kâwng mal chu ka tuai neuh neuh a, assignment ziah lam chu a lang mawlh lo. Ani pawhin ka kâwngah min kuah a, ka hnung chu a  lâwngin a chûl zai zai a.



"I assignment chu ziak ta che." A aw ațang chuan a nui pah tih ka hria.



"Assignment ziah ai chuan hetia awm hi a nuam zâwk ka ti." Ka zêp peih lo, a nuam zâwk miau a.



"Nuam lam hi ûm ringawt tùr a ni lo," ti sup chuan ka bengkáwm chu a rawn nûl zai zai a.



"Nih, min thlah la?"



"Ka phal lo."



Kan inthlah chuang lo, kuah hi a nuam ka tia, duat tak maia min kuah hian duattu ka nei tih ka hre chiang țhìn a, thla a timuang ngawih ngawih.



"I assignment chu?"



Nui chung hian," Hetia kuah che hi ka assignment ni zâwk se ka ti," ka ti a.



"Țha reuh!"



"Full mark ka score hial ang!"



Assignment chu ka ti lo nasa. A bu keu bâk kha ka khawih chhunzawm tawh lo rêng rêng, rei tak chu kan meng ve tho va, assignment tih nân hun ka nei lo!


******



"Champhaia i in chu engtin maw i tih dáwn?"



Tûkțhuan kîl laiin pu berin min zâwt a, chhàn ngaihna ka hre miah lo. Ka pu chu ka en ringawt a, ani pawh chuan ka chhànna a lo nghâk ve tho niin.



"Ka...hre lo."



"Khitia luahtu awm lova dah ringawt chu a fuh lo, engtin emaw i tih a ngai a ni," a ti leh a.



"Ka pu hian a tih dàn a hria ang," ka ti ta ringawt.



Pu ber chuan nui chung hian," A hmingin ko ve tawh teh, a har deuh maithei nain hetia i ko hi a fuh tlat lo," a lo ti leh a.



Âtei chuan," Inneih hunah pawh 'ka pu' i tih hlauh chuan..." a lo ti ve a. Ka zak ru kher mai, zak lo ang tak chuan ka nui nain a lum ka ti up up mai.



"Duhtâwk teh u, a tum ve nasa," ka pu chuan a lo ti hmuk a.



"Lo țan thei," Âtei chuan a lo ti leh zauh a.



Kalkawnga kan tlàn lai chuan," I hminga koh che hi ka tum ve țhìn viau; mahse, nuam lo ka ti tlat, ka inthlahrung," ka ti a.



"Ngaihtuah rùn lovin min ko pawp rawh."



"Ka hriat țantirh ațangin ka bialpa chu ni la chuan a har miah lo ang maw le."



"A har viau leh 'Pa-a' min ti la?"



A malah chuan ka va chùm chawrh a, ani lah a lo nui hawk duh chauh.



"Zahthlâk lutuk! Sawi ri tawh miah suh," tiin ka biang sa hat hat chu ka dawm vang vang a.



"Zakzum thei lutuk mai!"



Ka beng chu ka hup vang vang bawk, a sen nasa bawkin ka ring.



"Ti ta daih ila, in chungchâng kha, i duh dàn sawi la?"



"A chhûng lam khi chhut chhiat vek ka duh, a thar vekin duang ta ila, a harsa ang em?" inngaihtuah lâwk miah lo hian ka ti a.



"Harsa lo ve, pawisa lah i ngah a. Mi dangin an luah theih hunah phei chuan thla tin pawisa i la lût țeuh dâwn asin."



"Kei chuan ka buaipui thiam si lo va, nangman buaipui rawh aw? Bâkah, i chanve hi chu i chan tùr liau liau niin ka hre nghe nghe, awm lo la chuan neih ka nei dâwn si lo," ka ti a.



"Kei chuan ka mamawh ka nei tawh alawm. I thil neih chu ka chhuh hauh lo ang che. Buaipui erawh ka buaipui vek ang. E, taka, i nu thlàn tùr  ka buaipui dâwn a, ziah dàn tùr i duh angin lo draft la, an peih thuai theih nân," a ti leh duah a.



He pa thil ngaihtuah kim dàn ém ém hi chu, ka ngaihtuah rûk ve reng, ka la sawi chhuah hauh loh a ni a, a lo ngaihtuah chhuak hi, a mak ka ti.



He pa hi chu ka va hmangaih tlâwrh tlâwrh tak!



"Kei aiin i hre daih zâwk ang, a hming leh a pian ni leh thih ni erawh ka rawn text ang che."



Kawnga kan tlàn lai chuan ka phone chu ka khawih mual mual a, ka nu hming, pianni leh thih ni ka type zawh chuan a number-ah chuan ka thawn ta nghal a.



Vawiin chu kan buai leh ta deuh. Kan inhralh țhat deuh hi chuan kan buai ve laih laih thei a nia; mahse, a nuam, a hmaiuanthlâk deuh.



Chhùn chawlh laia Âtei leh tlangvâl lian lam deuh an rawn inzui luh chuan makti deuh hian kan lo melh vekin ka hria. Mipa chanchin a sawi ngai lo va, a zui hlauh phei chu ka la hmu ngai hauh lo.



"Hei hi ka thawmhnaw dàwr chu a nia, in chung lamah khian restaurant a awm bawk a," tiin Âtei chuan a hrilh barh barh a.



"A neitunu ang maia hmuh nuam a nih hi."



A aw chhuak chu a inthuamna ang bawkin a mawi. A inthuam dàn chu a tùnlai viau, țhalai duh chi tak a ni, a aw pawhin mi a hîp khawp ang.



Âtei chu a sen awp awp mai. Ngei hmel a pu lo, nuamti tho zak hmel deuh lam a pu, a mitmeng a hlim tlat bawk.



"Chuan, hei ka nauteho an nia, Novi, Feli leh Mary, an fel teh a nia."



"Hi, girls, in lo buai em?"



Hm, he pa zet hi, a mitmeng hi ka ngaihtheih loh tùr chi. A rûkin a lêrh ngawt ang, a mitmeng rêng hi, a flirt zaih zaih alawm.



Ka suangtuahna ka lo kalpui nasa leh ta, ka inthing harh thuai.



"Buai lo ve, ei tùrte in duh em?" tiin nui sâng hian ka lo chhâng lêt a.



"Duh lo mai. Novi, in chung lamah kan han chho ang e aw, Danny hi hmuhpui zuai zuai ka duh sia," Âtei chuan a lo ti vat a.



An kal hnu chuan Feli chuan," A bialpa a ni ve ngei a niang, an inhmeh reuh khawp mai," a ti leh nghal zat a, thil hi a lo man chak thei a nia, kei pawhin ka lo ring ve tho a, ka rinna min rawn rinpui ve chiah.



"A changkàn hmel tawp," Mary chuan a lo ti ve bawk a.



"Ani ang bialpa chin chu  loh theih nâng," Feli chuan a lo ti leh a.



"Lunglei lam mi chu a nih loh hmel," Feli chuan a ti leh a.



Chutiang mai mai chu sawiin rinthu chu nuamti takin an sawi a, kei erawh chuan engmah ka sawi ve peih lo. Mi chanchin sawi neuh neuh hi ka ning țhìn a, ka peih tawh lo, ka sim ve viau tawh.



"Hetiang hian ti ta mai ila, a țha ang em?" tiin ka pu chuan ka nu thlànlunga ziah dàn tùr chu min hmuh a.



Ka'n en a," Tha lutuk! Chuan, hetah hian a thlalâk ziahtîr tùr a ni ang tiraw?" tiin ka kâwk a.



"Um, a thlalâk i nei àwm si lo va, inah kha chuan a awm ang tiraw?"



"Aw, awm țeuh e."



"A țhat chu."



Zanriah kan kîl lai chuan Princess-i chu a titi lar lar reng a, an school chanchin a sawi deuh ber. A nî chuan a'n khap deuh nain pu ber chuan a lo mitmei a.



"Lalfanu, in miss-te zíngah tu nge fel ber i tih?" Pu ber chuan a lo ti a.



"Miss Mâmi a fel a, Miss Rosy-i pawh a fel bawk."



A chhànna chuan nuih a tiza tawp.



"A nih, sir-te?"



"Sir Hlua a fel, min zaitìr țhìn a."



"Eng hla nge i sak țhìn?"



"Twinkle, twinkle kha."



Zànah vawiina Âtei'n dàwra a rawn kalpui kha a rawn léng ta chat mai. An inkârah hian eng emaw chu a awm chiang mai, room lamah ka kal daih, lo țhut ve chi pawh a ni nâng.



*KAN RILRU PUTHMANG HI KAN PÂWNLAM THUAM MAWINA RINGAWT HIAN A TUAM CHANGKÂNG THEI LO*





☆SILVER ZUNGBUN☆ - 26 By Dingdi Pachuau



Assignment chu tih ka'n tum ve ngial a, ka rilruah a lût thlâwt lo; mahse, ka tih ve a ngai, ka pu puihna tel kher lo pawhin ka ti tùr a ni. Exam hunah min pui thei tawh dâwn lo, ka thiam a ngai.



Zawhna pakhat ringawt chhànna pawh ziah chhûng a rei hle mai. Ka pu khân ziak sei tùrin min ti bawk si a, dârkâr 1 deuhthaw ka ziak alawm le! A chhànna zawn chawp nèn chuan hun a hek duh hle mai, ka dàr pawh a kham țhûm, ka kut phei chu kham tak a ni.



"I la mu nange? A tlai tawh asin."



Ka inziak tui laklawh a, dâr zât ka lo en miah lo.



"Dâr eng zât nge ni tawh a?"



"Dâr 12 a ri țêp."



E khai! A va tlai tawh ve! Ka thil ziah chu dahin ka hawi chhuak ve ta chauh.



A thawmhnaw hâk chu a thar a ni ngei ngei ang, a ha ka la hmu ngai miah lo. A inhmeh lutuk. Nike kawr, collar nei niin a sen duk a nia, a collar chu a dum thung. Ka en thla zêl a, a jeans dum, mal phuar lek lek a hâk nèn chuan a inhmeh zual, a ti langsàr ngawih ngawih.



"Min en zo tawh em?"



"I va inchei! Khawiah nge i lèn a?"



Kan țawng rual ve ve.



Nui suk hian," Tlangval ka ni alawm, ka lêng ve ang chu," a lo ti sup a.



"E, a lo nih tak chu."



"Men rei a țha lo asin."



"Nang pawh i lêng rei tho."



"A țûl alawm."



"Kei pawh."



Ka en duh lo tlat. A intinalh ém a, a lènna nula in a nih ngei ka ring, ka ring dik ngei ang. Aw, a dik chiah, a cologne hman rim pawh chu, ka hre cham cham, a lêng chiang lutuk.



"I thin a rim a ni maw?"



"Aih."



"I lungawi loh chuan sawi la?"



"A awi."



Min en rùn ang chu, a inchei nalh tih vànga han lungawi loh chiah pawh chu a dik chiah lo; mahse, nula ina min lènsan daih kher hi chu...



"I hmel kha, i tichhe zo vek dáwn. I thinrim loh a i lung a awi bawk chuan han nui la?"



"Ka nui duh lo."



"Nâ i nei em ni?"



"Aw." Ka rilru a na deuh.



"Lo kal teh, i țhu rei tawh lutuk a nih kha. Khatia țhut ngut ngut tùr kha a ni lo, bâkah, i kut i lo hmang rim lutuk a niang."



Amah zâwk chuan min rawn panin ka kut chu a la a, dîm tê tê hian a nuai nak nak a, ka kut dinglam zâwk hi a kham lam chu a ni reng sia; mahse, ka sawi lang lo.



Veilam a nuai hnuah dinglam chu a nuai leh a, a nuam ka ti tawp. Chumi hnuah insiam remin ka dàr a rawn nuai leh a, chutah phei chuan nuam ka ti lutuk a, ka maimichhîng dar dar.



"I muthlu a ni maw?"



Ka meng vat. Ka dàr bâkah ka nghâwng a rawn hmet a, a nuam ém asin.



"Aih."



"A nih chuan, i thinrim chhan chu?"



He pa tak hi chu, hriat loh neih hi a duh thlâwt lo, min zawh chhuah a tum leh tâk hi.



"Khawi nula inah nge i lèn?"



A nui ta hawk. Ka nuih a za ve miah lo, nalh taka a inthuam chhan hian ka nuih a tiza lo.



"I hlim hle a ni maw?"



A lam hawiin min kuai her a, ka en duh lo lui viau nain amah en thei tùra ka khabea a dawm chhoh tâkah chuan ka en lo thei lo.



"I bula ka awm chuan hlim e," a ti phawt a, chutah, sawi zawm lehin," Zanin chu Champhaia i in chhûng tihdanglam dàn tùrah ka țhianpa architect ka râwn chhin a, a rawn chhoh remchàn lai a nia, rin aiin hun a lo duh reuh a," a ti leh a.



"Nula inah i lêng lo tak tak maw?"



"Lêng lo."



"I  lêng emaw ka tia, i inchei bawk sia."



Nui suk chung hian," Țawp deuhin țhiante inah lêng se min ti em ni?" a ti leh a.



"Aih, nula inah i lêng a niang ka ti a."



Rawn kûn hniam sauhin," Ka bula i awm chhûng chuan nula dang ka melh i ring thei a maw?" a ti sup a. A țawng ring lo hle nàngin a thil sawi chuan min va tihlim leh si ém!



"Ka tân i țha ém a, ka phû lo-"



Ka sawi zawh hmain ka hmui chu a rawn khâr hmiah. Tu mah kan țawng ta lo, thuin hmun a chang lo va, kan inkâra induhtawnna chu cheziain kan lantîr zâwk.

*******

Âtei țhianpa chu tuna Education Minister ni mêk fapa a lo nia; mahse, Mizoramah a awm ngai lo. An inhriat țan dàn pawh a mak tawp, Âtei phone number leh Danny-a thianpa phone number hi a lo inang lutuk a lo ni a. Âtei phone number tàwp ber hi 9 a ni a, Danny-a țhianpa chu 5 a ni. Țawngkaa inhrilh an nih vàngin  Danny-a chuan a țhianpa number tàwp chu 9-in a lo chhinchhiah a, Âtei number chu a țhianpa number angin a lo save ta a ni.



A rawn biak țantirh pawhin a țhianpa number-ah a ngai tho, a bialnuin fiamthuin a lo chhànsakah a ngai hmiah. A rawn be lui zel, Âtei chuan a â deuh emaw a ti hial, a chhâng țha peih lo țhìn; mahse, an inbiak zêl tâk hnuah chuan inngainatna chin leh inngaihna chin an lo nei ta a, induh chho țanin Mizoramah hial a rawn haw chho ve ta a ni. Hei hi Âtei min hrilh dàn a nia, ka awih hmiah, an inhriat țan dàn tê hi a cute ka ti.



Zínga eirawng bâwl pah chuan min hrilh sap sap a," Nizàn pawh khân lo léng lo tùrin ka ti na a; mahse, heta a lo chhoh chhan kha ka ni ve miau bawk sia, ka tilui thei ta bík lo a ni, a chhuk leh thuai dâwn sia," a ti a.



"A nih chu, in inhriat țan dàn tê kha a țha reuh tawp, thawnthu te pawh a ang dâwn dâwnin ka hria," ka lo ti a.



A nui hak hak a,"Nia, tiraw? Ih, a pa nihna ka hriat țantirh chuan țhen nghal ka duh a; mahse, a harsa ve lutuk. Ani lahin min țhen a tum lo ve bur bawk si a, kei lahin ka lo duh lutuk hman tawh bawk si. A pa nihna hian amahah engmah awmze nei lo angin a sawi a, a nih pawh ka ring. A chhe lo i ti ve tho em?" a ti sar sar a.



"Um, a changkâng bawk," ka lo ti a.



"Company-ah a thawk a, a hna chiah chu ka hre lo. Hmun hrang hrangah a thawk kual țhìn a, Mizorama lo chhohna hun pawh a nei ngai lo. Mizo ngaihzâwng phei chu a sawi dàn chuan a nei ngai lo; mahse, kei aiin a naupang a," ner nâng hian a ti leh a.



"A naupan hmel pawh ka lo ti vak hlei nem."



"Kum 5 zetin maw le, a aia naupang a ngaihzàwn ngai loh thu min hrilh a. Min duh thu min hrilh țantirh phei chuan ka zak tawp maw le, a tih tak tak ka ring pha miah lo va."



"Engah maw a duh tak tak loh ang che?" ka lo ti vat a.



"A aia ka upat bâkah hna thawh ka nei si lo va, ka insit lutuk. Ani chu maw, a lo lâr reuh lutuk a, IG lamah hian followers nuai tam tak a nei a, hnam dang zîngah pawh a lo tla na reuh riau a ni àwm e."



A ni thei ang, amah kha a chhe lo va, a changkâng a, a tûnlai bawk.



Mahse, ka pu ka duh fé zâwk.



Ka pu hi chu social media hian a tibuaiin ka ring hlawl lo. IG phei phei, a khawih lo tawp ang. TV a en ve pawhin news leh sports bâk a thlîr ve ngai lo. Mi chuan boring an ti thei ngawt ang; mahse, ka tân chuan ' mr. perfect' a ni tawp.



"A țha alawm, in induhtawn chuan a țha a ni mai, chu chu a hlu ber ka ti," ka lo ti a.



Tih tak takah chuan ka pu nèn hian a nia kan kum chu inthlau ni. Kum 35 chu a pèl tawh ngeiin ka ring a, kei kum 21 ka ni dâwn  chauh bawk; mahse, 'kum chu number mai mai' tih hi ka thu vawn a ni mai.



Tlaia in kan haw chuan Princess-i leh a pu an lo awm a, pu ber chuan eirawng a lo bâwl nasa mai a, kei pawhin ka pui nghal, a lo bâwl zo țêp tawh tho. Âtei hmel ka hmu lo leh pu berin rawng a lo bâwl hmuh chuan a awm lo a nih ka ring nghal.



"Ka pa, khawiah nge Âtei?"



"Zanriah a ei chhuak ta a nih kha."



"Engtin a?!! Tu nèn maw?"



"A țhianpa kha a hna thawhnaah a chhuk leh tawh dâwn sia, min dîl a, ka phalsak ta a nih kha," a pa chuan a lo ti a.



Engmah sawi tawh lo chuan a room-ah a lût ta daih. Ni dangah Atei chu a chhuak ngai bîk lo va, a pawimawh ve viau ni maiah ka ngai.



Zanriah kîl lai pawhin ka pu chu a ngawi ngul reng mai. Princess-i erawh a țawng leh lar lar tawh a, keiin a nî ai ka awh ve thung. Eng eng emaw min zâwt zauh zauh a, ka pu a ngawih ngul reng avàng erawh chuan nuam lo ka ti ru khawp.



Hmun ka tihfel hnuah Princess-i chu awmpui ka tum ve nain a pa chuan a room-ah a luhpui daih a, kei ai chuan a pain a duat thiam a, a ngaihven thiam zâwk tih ka hre bawk.



Assignment chu tui lo zet hian ka ziak leh a, ka ziak sual ka ziak sual lehnghal. Ka rilru a hlim loh nèn, ka thin a rim țûn mai.



Eng nge ka thin a rim ve țûn ringawt? Ka pu a țawng țhat loh vàngin maw? Nge ka room-a a rawn kal loh vàngin? Princess-i a ngaihven a ngai alawm, a nî a awm loh hi.



A țawng țhat duh loh chhan kha keimah vàng em ni? Âtei chhuah vàng kha a ni zâwk lo maw? A farnu a nia, a chhuah avàngin thinrim chhan tùr a awm dâwn em ni? Lêng mai mai a ni bîk lo va, mi ang pângngai niin bialpa a nei a ni ve mai a, han thinrim viau leh han lungawi loh viauna tùr a awm lêm em ni?



Zanin zet chu ka meng thei thlâwt lo, ka assignment ziah lah ka rilruah a lût lo si, ka pu lah ka room-ah a rawn kal àwm si lo. Ka mut a chhuak selh selh a, ka mutthlûk lai pawh ka hre miah lo.



Ka țhangharh chuan dâr 12 a lo ni tawh. Ka room kawngkhàr ka lo khàr phui țhat loh avàng leh light ka la off loh avàng chuan peih lo zet chuan ka tho a, ka room kawngkhàr ka khâr țha tùr chuan thinrim taka țawng ri ka hre ta tlat!



Ka han ngaihthla chiang a, ka pu tawng rî a ni! Engati nge? Tu nge a țawng khum ni ang?



Ka han ngaihthla chiang leh a, fiah vak lovin a țawng rî ka hre thei ta. Âtei a hau a ni chiang.



Ngaihthlâk reng ka duh loh avàng chuan ka khâr nghet a, ngaihtuahnaa ka pu țawng ri chu hre zêlin ka zeldin chho a, tui zetin ka muhìl leh ta mai.



Zîngah ka tho hma ber emaw ka ti a, pu ber a lo tho tawh. Tuilum chhuanga ka buai lai chuan ka pu a rawn tho ve leh a, a meng rei a niang, a mit a sen deuh rûm mai.



"Morning, nizànah i mu țha nange?" tiin  ka lo be vat a.



"Morning," a ti sup a, a bâk chu a sawi lo. A thin a la rim reng a ni ang.



Tûkțhuan kan kîl lai pawhin a țawng lo, Âtei pawh Princess-i'n a bia a nih loh chuan a țawng bîk lo. Nuamti lo zet hian ka melh tawn chhén a, an lungawi lo ve ve a niang.



Kalkawngah pawh chuan a ngawi ngul reng mai a, a thinrim rei mah mahin ka hria.



"A nuam lo e, i țawng duh lo lutuk a," ka ti ta nge nge a.



"Engah mah ngai duh suh."



An unau inkâr a ni sia, sawi chhuah ka  duh bík lo  amahin a sawi chhuak a nih ngawt loh chu.



"Ka chungah i lungawi lo em?" tiin ka źâwt leh.



"Engmah ngaihtuah a ngai lo, ngaihțha tak khân awm rawh."



Ka țawng chhunzawm duh ta bîk lo. A rilru hmun dangah a chêng a, lo biak buai ve chhén, a inthlahrunawm ngawih ngawih. Bâkah, ka chungah a thin a rim lo va, lo inrawlhtùr la ni chiah pawhin ka hre lo.



Zàn thlengin chutiang chuan an la awm zêl. Âtei zanriah ei chhuah ve vàng kha a ni ngei ang, a va buaithlâk țhìn tak.



*I DIK LOHNAA ZILH NGAMTU CHE KHA HAW SUH*






☆SILVER ZUNGBUN☆ - 27 By Dingdi Pachuau



Âtei hmêl leh cheziaah chuan a hlim lo tih a hriat kher mai. Ka pu lah chuti bawk, Princess-i bulah chuan hlim hmel tak puin be ve ve mah se, an rilru chhûngrilah an hlim lo tih chu puitling chuan kan hre tho.



Ka bulah erawh Âtei chuan a thup hrâm hrâm tih ka hria, min biak dàn ngai thovin min bia a, pu ber pawh a zia a ngai; mahse, ka pu ber hian a thup ve lo, a ngawi hmuk reng mai.



An ina awm niha an chhûngkaw mi dik tak nih loh chuan nuam lo duh tak a ni. Lo inrawlh ve chi a ni si lo, bâkah, an inhauna chhan dik tak pawh ka hre chiang hlei nem.



Vawiin chu LMa a rawn lêng ve leh ta. Ka hmu khât tawh a, ka ngai ve riau asin. Ka pu a ngawi hmuk reng mai si a, Âtei lahin chanchin min hrilh mang si lo nèn, titipui tùr ka mamawh. Rilru hlim lo tak, inthlahrung dêk leh mitmei vêng renga awm hi a hahthlâk lutuk.



"I pa chu eng nge a an?"



Thaw huai pah chuan," Vawiin chu a tlangvâl khawp mai, buhhàwp pawh a ei ve țeuh," a lo ti a.



"A va làwmawm ve! A tlangvâl a nih ka ring deuh rêng a, i lo kal thei sia," Mary chuan a lo ti a.



"Rawn kan ve hrim hrim ula? Sunday lamah hun âwl in neih chuan? Sawi loh chuan rawn kan in tum mang si lo," tiin a vui ve nuah nuah a.



Kan țhian thum chuan kan inen a, kan hmelah inthiam lohna a lang vek, a loh theih loh.



"Nia, a țha khawp mai. Tûn sunday lo awm tùr hian kan hman hlawm ang chu maw?" ka lo ti vat a. Ka pute chu ka hrilh ve mai ang, ka pu pawhin a phal lo tùrah pawh ka ngai hran lo. LMa pa dam lohna hi a rei ve deuh tawh a, kan la léng miah lo, a zahthlâk.



"Hman ang, inkhâwm bàn lamah kan ti dâwn u nia."



Haw kawngah ka pu bulah chuan ka sawi a, min chhâng lo chuan a ngawi vung vung ringawt.



In kan thlena motor ațanga kan chhuah dâwnah erawh chuan,"I kal dâwn nia; mahse, ka hruai ang che," a ti nghut.



U Melo-ite inah a  kal duh tawh miah lo emaw ka ti!



Zanriah kîl lai chuan a thuphungin ka sawi chhuak ve leh a, Âtei pawhin a kan daih tawh ka ring tho nain. Pu ber pawh chuan a lo bengkhawn viau.



"A lo nih tak chu, a zia lo hle mai. Naktûkah va kan ve tùr a nih chu, hna ka thawk ngai hlei nem, ka beng a va vâr lo tehlul ém!" a lo ti charh charh a.



"Nia, keini pawh kan la kan miah lo va, a zahthlák zâwk."



Âtei chuan," Vawi khat chu ka kan ve tawh a; mahse, tûn hnai hian ka kal leh tawh miah lo, ka țhiannu ve ber pa a nia, ka nêp khawp mai," a lo ti sap a.



"Sunday-ah kan lêng dâwn u nia."



Pu ber leh Âtei chu an inmelh, ka hmu reng. Anni pawhin mak an ti lo thei lo. Hmân deuh lawka U Melo-i rawn zin phei laia an ina pu berin thlah tùra a tih khân rickshaw hmang mai tùrin a ti a nih kha, tunah lêm, sunday-a an lèn tùr thu a sawi leh si, an tân pawh mak deuh tùr chu a ni.



Zànah Assignment ka ti leh a, ka pu lo luh lai pawhin ka ziah ka țhulh lo.



"I kut a kham leh tawh em?"



"Kham lo ve, ka la ziak tam lo va," ka lo ti a.



"Energy drinks lam i duh em?"



Nuih sak pahin," A ngai lo ve, ka lâwm e," ka ti a.



Ka țhutna bulah chuan ngawi rengin a lo țhu a, kei pawhin ka ziak char char. A hnu deuhah erawh a ngawih reng avàngin nuam ka ti ta chiah lo va, ka thil ziah chu dahin,"I thin a rim tawh lo tiraw?" ka ti a.



"I chungah chuan rim lo."



"Chuan, U Melo-ite ina kal pawh i duh ta a?"



"Kha kha..." a ti sup a, a ngawih deuh reng hnuah," Nangmaha kaltîr che ka duh loh vàng a nih kha," a ti leh a.



"Ka țhiante nèn alawm kan kal dâwn."



Lu thing zauh pah chuan," Ka tel lova kha pa te inah khân ka lèntîr che ring suh," a ti a, min en rùn a.



"Min ring lo tihna maw?"



"Amah kha ka ring lo."



Zàn dâr 11-ah ka indah fel chauh. Ka bulah țhuin ngawi rengin answer min lo zawnsak a, keiin ka lo ziak char char. Paper min lo rìnsak thlap bawk a, a rûk tê hian nuam ka ti veng veng.



Vànduaithlâk ka ti dâwn nge, Inrinniah ka pu chu a zin chhuak leh thut dâwn. Sawi lo mah se, a hna lam a nih ka ring, a kalna tùr pawh a sawi hek lo, a tih dàn ngai têin a zin chhuak  dâwn tih chauh a sawi.



Inrinni zîngah a chhuak, car keng lovin a bullet bike a keng. Thlah a duh loh vàngin ka thlah lo, eng vànga ka thlah duh lo nge a nih ka hre lo.



Zànah Princess-i pawh a rawn call miah lo, a buai viau a niang; mahse, chhùn lamah a rawn call pawh a ni maithei a. Kei chu min rawn call lo, ka vui hran lo, a buai a nih ka ring.



Sunday chawhnuah chuan kan lêng ta ngei a, Âtei leh Princess-i erawh an tel ve ta lo, kan țhianzaho zînga tel chu an duh bîk lo a niang. Pu ber chu a hma nia a lèn tawh a vàngin hmun dangah a lêng daih bawk.



LMa pa chu a lo chêr ve roh khawp mai. A pumpui cancer chuan a kawchhûngah hna a lo thawk nasa  tawh a ni ngei ang, thil a ei țha thei si lo va, a àwm reng.



Mi dang lêng pawh an lo awm ve ngei a, min lo làwm thiam khawp mai. A nu leh LMa  leh a pa chauh an lo khawsa tawh a, a u hmeichhe pahnih U Melo-i ute chuan pasal an nei chhuak ve ve tawh a, U Melo-i lah Aizawlah a awm daih si, a nu hi a buai ngawt ang.



Kan awm chhûng chuan keini țhian thum chu kan che zak zak mai, lo lêng an awm ve neuh neuh reng si a, a nu kan khawngaih ve a ni.



"Zanriah ei vek r'u aw, kan nufa tê chauh chuan chaw ei a har thei si a."



A nuin min sàwm ve ngawih ngawih avàng chuan hnial a har kan ti tlâng a niang, ei kan titlu ta ringawt. Kan chhûngte kan phone sap sap hnuah eirawng bâwl tùr chuan kan inbuatsaih nghal a.



Rawng kan bàwl chhûngin LMa nu chuan a pa chu a lo awmpui a, pitar pahnih leh pa upa lam deuh pakhat hi an la lêng ve bawk a. In tùrte kan va pe a, làwmthute an lo sawi liam liam a.



Ka rin ai daihin kan chaw ei chu ka puar. Feli leh Mary'n chawhmeh siam an thiam ém a ni, LMa nu chu hlim hmel takin a titi siam siam a, a rilru chhûngril erawh a hah hle ang tih ka ring. A chhan chu a pasal, khumah a mu reng si a, a la țawng peih viau nain thil a ei țha thei si lo va, a taksaah chu chuan nghawng a nei mêk a nih hi.



Zànah pawh kan inkhâwm dâwn loh avàngin kan léng leh reng mai. LMa pa bulah kan țhu khâwm a, amah tihlim thei tùrin fiamthu kan thawh a, ani pawh a lo nui ve suk suk mai.



Dâr 9-ah hawin LMa'n bolero-in min thlah kual a, anni pahnih chu vêng hnai lam an nih vàngin keimah min thlah hmasa ber.



An lo meng tawh lo va, thâwm dìm takin ka room-ah ka lût. A tlai tawh avàngin assignment pawh ka ti peih ta lo law law, ka intleuh zawk a, LMa pa ngaihtuah rauh rauh chung chuan ka mu ta thên a.



Ka muhìl țêp tihah ka phone a rawn rì a, tu tak ni ang maw tiin meng suar suar chung chuan ka'n en a, LMa a lo ni a.



"Hello?"



"I aw chuh! I mu tawh elo?"



"Um, ka muhìl țêp, eng nge ni ta?"



"Vawiin in lo lêng kha ka lâwm ém a, bâkah, ka be khât tawh si che a, hetia nula hmelțha tak han biak leh che pawh hi ka châk a."



He pa tak hi chu!



Thil ho mai mai sawiin kan inbe rei phian, ka mut chhuak pawh a tàwp vek.



Kan inbiak zawh hnu deuh chiahah chuan ka puin min rawn call ve nghal, zanin chu a va mak ve! Ka va luck tak.



"Hello?"



"Tu nge i biak a?" A aw chuh, ani hi a mut a chhuak tawh chiang mai.



"Țhiante'n min rawn call a," ka ti ve zaih.



"In va inbe rei ve!" A mut chhuak aw muang cherh chawrhleh zàwi sup chu a sexy ru riau mai! A lungawi lo leh a thîk țawngkam chhuakte chuan min tilungawi lo miah lo, mi dang a'n thîk kual chu nuam ka ti.



Chuan, min betu hi han hre phei se chu, a lung a awi lo leh nasa ngawt ang chu.



"Nia, ho mai mai kan sawi a, i tluang zêl maw?"



"In inhmu thei reng hlawm a, zàn rei tak taka inbiak kher a ngai em ni?"



"Min rawn biak miau chuan lo biak duh loh a tihchi loh alawm."



A ngawi vung vung a, chutah," Ka ngai che a," a ti ta sup.



"Kei pawhin ka ngai che."



"Chuti, min lo biak pawh i tum chuang si lo?"



"I buai a niang ka ti a."



Eng emaw a ti pah a niang, a ri leh deuh țhak țhak țhìn a, a ngawi leh vung vung țhìn bawk. Dawhthei takin a off hma chu ka ngaithlain a chânga a rawn țawng leh zauh zauh bâk chu, kei phei chu ka țawng mang lo.



A tûk zînga eirawng kan bàwl laiin Âtei chuan ka pu a chunga a lungawi loh dàn chungcháng chu min hrilh sap sap a.



Zanriah eia Danny-a nèn an chhuak kha Danny-a chuan haw a phal lawk lo va, a duh aia rei daih an lêng chhuak. Hmun hrang hrangah a kalpui a, Theiriat tlángah te hial an han kal bawk. Zàn a haw tlai si a, ina a rawn thlah chuan ka pu chu TV room-ah a lo la meng niin.



A haw har avàng chuan a lo hau ta ngei, a rin dàn chiah pawh a ni tho, thiam a inti lo; mahse, zan khat chauh a ni ve tho va, a hriat thiampui a lo ring ve deuh viau nain ka pu ang, mi rinna tlachham tak chuan a lo hre thiam duh lo.



"A lo nih teh hrep chu a."



Âtei chuan," Dik tak chuan Princess-i vàng hian ngaihzâwng pawh ka nei ngai lo va, lo nei fo țhìn ni ila chuan ka ngai haw hran lo ang. Princess-i ka enkawlpui vek a, a țha thei ang berin ka enkawl ve bawk. Ka chan hi  ngaihtuah thiam phâk ve tùr chu a ni asin," a ti leh a.



Sawi tùr pawh ka hre lo.



"Bâkah, Danny-a kha a ring lo tih a sawi a, kha tak kha ka haw ém a ni. Mi rinna a tlachham leh lutuk a."



A ni maw?!! Ka pu nèn kan rilru a inang deuh a nih chu. Kei pawhin Danny kha ka ngaihtheih chi a ni miah lo, a lêrhin ka ring tlat a nih kha.



"A vawi khat hmuhnaa rin loh nghal ringawt, a hre chiang tawp si lo va. Lâna hi chu a ti mah mah țhìn, ka rilru tùr min dàwnpui miah lo va."



Princess-i a rawn kal tâkah chuan a sawi zawm thei ta lo. An zirlai a rawn phùlpui hlut a, keiin ka lo chhàwn vat.



"In sikul a nuam bawk sia, lo lût ve ila a țha ang?"



A nui ar ar a," Au No, naupang chauh alawm lût țhìn, nang chu puitling i ni tawh a," a ti lar lar a.



"Luh ve ka châk alawm."



"Ih, kan miss Mami ka lo dìlsak ang che aw, a fel lutuk, a phal ngei ngei ang."



Dàwrah tleirâwl rual khat hi an rawn lût a, pahnih chuan phone an khawih melh melh reng a, pakhat erawh chuan kawr khai dul chu a en kual a.



"Min enpui ve ula?"



"I duhzâwng kan hre lo, en mai mai teh."



Mary'n kawr en bertu tleirâwl chu a buaipui a, phone kheuh neuh neuh rengte chu ka melh zauh zauh thung.



"Awii, chhiat lohzia hi!! IG  kha check teh," tleirawl pakhat zâwk chuan a țhiannu phone khawih ve tho chu a hrilh zauh a.



"Tu chu?"



"A mak thei, ka sawi fo kha. Danny_da_wizard kha, en nghal teh."



An chezia leh an titi chuan ka nuih an tiza reuh, kum 16/17 chho vêl ka nih lai min tihre chhuak. Kei pawhin Justin Bieber ka buaipui nasa thei a nih kha, ka duh theihzia kha. A status update leh a tweet ka check nasat theihzia kha, ka'n comment a, ka'n retweet leh nghal țhìn bawk a, nuam ka tih țhinzia ka ngaihtuah chhuah chuan ka lung a tilêng deuh ringawt nia.



"...a chhe lo ve ém alawm, luck pawh a luck an ti, hnam dang zîngah pawh hmeichheho chuan an duh thei lutuk," pakhat zâwk chuan a ti leh zârh zârh a.



"I va hre thei!"



"Ka u țhianpa hi Mumbai-ah a awm ve tho a, Mizo țheuh țheuh chu an inkàwm ve alawm, chuta țanga ka hriat chu a nia. A thlalâk pawh pakhat chu ka kawl, a chhe lo khat tlat a ni mai."



Ka pu ka hre chhuak a, ka nui sak. Eng tak tunah hian ti ve ang maw? Aizawlah a awm ang em? Nge Champhaiah? A awmna chin hi min hrilh  duh mang si lo va, hmun hlauhawmah erawh a awm loh ngei ka beisei.



An thu sawi pakhat erawh chuan ka beng a verh ta zar mai.



"Tûn hnai deuha Lungleia a rawn kal khân ka nuteite hotel-ah a thleng asin, a chhe lo bawk a, nula pawh a hmài lo khawp. A lèn chhuahpui tâk ber erawh nula senior a nih chu maw le, zànah pawh an rawn lêt tlai lutuk a ni àwm e."



An mi sawipa kha Danny_da_wizard an ti a, Âtei țhianpa Danny-a kha a ni thei mai lo'ng maw? Tûn hnaiah a rawn kal ngei mai a.



A, lo ngaihtuah vak a ngai lo ve. Danny-a chu mi chi hrang hrang an awm ve ang chu, hming inang a tam ém hi maw.



An chhuah hnu chuan Feli chuan," Tûnlai tleirâwlho tak hi chu aw..." a ti vang vang a.



"Engtizia...?"



"Zahna hi an nei tawh thlâwt lo, tu bulah pawh hian an țha tihzawng leh duhzawng hi an sawi hmiah hmiah zêl," a ti barh barh a.



"Nang pawhin i sawi ve tho kha," Mary chuan rang zet hian a lo ti a, a nui pah sâng a.



"A, sawi tho e; mahse, mi dang hriat tùrin ka sawi hlei nem, kan pathum bâkin kan hre lo, țhian bulah chuan kan sawi ang chu."



"A, hre thiam teh, an la naupang ve leh chhâwng ém a nih kha, an țha tihzawngte kan lo hriat phah a," nui chung hian ka lo ti ve a.



"An over hlawm hrim hrim."



Tlaiah chuan Âtei'n min rawn phone a, min lo lam hman dáwn lo tih a rawn sawi, a hmanhmawh hmel riaua ka hriat chu le!



In ka thlen chuan Âtei chu zin chhuak mai thei tùrin a lo insiam peih at mai!



"Novi, ka zin chhuak lawk dâwn a, Princess-i hi i lo awmpui mai a ngai dâwn a nih hi."



"Engtizia nge?"



Princess-i hriat loh tùr chuan ka beng bulah," A pain accident a tâwk thut a," a ti sap a.



Ka khawng awtin ka hria!



Awih lo tak, awih deuh bawk si, makti, hlauthâwng leh hrilhhai tak hian ka en a, a fiamthu a nih ka ring; mahse, hetiang hi fiamthuna chi ni pawhin ka hre lo, a hmelah fiamthu hmel a lang miah lo rêng bawk.



"Eng..a na viau em?"



"Engmah chiangin kan la hre bîk lo va, Greenwood-ah an awm mêk tih chiah  kan hria," vei nei rùn, hmanhmawh hmel tak hian a ti leh zung zung a.



Min ti â vek mai!



(Current kan neih loh vàng a nia, ka phone a thi hlauh bawk si a, chuvàngin ka rawn update  thei lo a ni e, current a chhiat chuan ka buai nghal a ni mai e)



*THINRIM LAI HI MAHNI RAU RAUAH KAN ÂT BER LAI A NI*





☆SILVER ZUNGBUN☆ - 28 By Dingdi Pachuau



Pu ber leh Princess-i nèn chuan kan awm ta ràn mai. Ka rilru a bîng mup mup a, ka taksa chu hetah inah awm mah se, Âtei'n ka puin accident a tawh thu a sawi rual khân ka pu bulah Greenwood-ah a awm daih tawh.



Pu ber erawh a zia a ngai pât. Rilru helhkam nei angin a awm ve lo, Princess-i pawh a biaka a chhaih dàn ngai rengin a chhaih tho. A fapa hi a ngaihtuah lo bîk chuan ka ring si lo, engtin nge rilru thlamuang tak hian a awm theih bîk le?



Zanriah ei khamah TV room-ah kan țhu ţhâm a, Princess-i pawh lehkha ka zirpui lo, engmah ka rilruah a lût thei dâwn chuang lo va, a bula phîlî deuha ka khawsak chuan a buai vek palh ang.



Ka mal chungah a bawk a, a titi siam siam a,  a lu ka chùlsak hliau hliau. Tunah hian a pa chu natna tuarin damdawi in khumah a let reng àwm si a, ani lah hian engmah a hre dèr si lo, lungmuang tak leh hlim takin a la titi chu a ni si, a pa pawhin a rawn ngaihven ngawt ang chu. Nge ngauhven thei tùr pawhin nikhua a hre lo zâwk ni ang?



Ka rilru tâwt lutuk leh chanchin chiangkuanga engmah hre bawk si lo chu ka thaw hawk hawk a, ka mittui a rawn far zâwih bawk.



"Au No, i țap alaw?"



Chhàn pawh ka chhâng thei lo, ka ngam lo a ni zâwk mah.



Pu ber chuan," E khai, Novi, i mit a mìm a ni maw? Kha, va phih fai teh, noah tui suak la, tuiah i meng dâwn nia," a rawn ti vat.



Ka tho thuai a, ani pawhin ka ding chu ka hnungah min hnem tum tih hriat tak hian a rawn chûl a, ka țap chhuak țêp a ni.



Ka room-ah lûtin bathroom-ah ka va țap chiam, chiangkuang lova chanchin hriat ve bawk si chu a hrehawm ém a ni.



Ka inphih fai hnu chuan ka va chhuak leh a, Princess-i chu a pu chuan a lo chûl muhìl tawh niin, a zahthlâk ka ti lehling ta. Ka insûm thei lo lutuk chu  nêp ka inti hnuhnawh.



"Nautei chu ka lo pawm dâwn em ni?"



"Ka khumah sawn zâwk rawh, nang chuan i la mutpui ngai si lo va, i mutpui thiam lo palh ang," a lo ti a.



Pu ber khumah chuan ka sawn phei ta a, mutpui kha ka hreh miah lo nain pu ber thu sawi ang deuh khân a țhangharh hunah amah zâwk a buai ang tih ka hlau deuh a ni.



Room ațanga ka chhuah chuan pu ber chuan," Lo kal teh," a lo ti a, ka mitmeng leh a chezia ațang chuan engkim a man thiam vek si a, ka va pan phei chuan min lo kuah a.



"Ngaihtuah vak vak a ngai lo a nia, ka fapa hi ka hre chiang alawm. A luhlul a, ho têah a tlâwm mai mai lo ang. A la chak țha a, eng thil țha lo mah a chungah a thleng miah lo ang," tiin min hnèm ve malh malh a.



Min hnèm ve mai mai a ni. Ani pawh hian a rûk tak chuan a hlauthâwng ve thoin ka ring, nunna hi chu  a derthâwng si a.



Hnuk ulh țeuh hian," Chiangkuang lo deuha a chanchin hriat hi hrehawm ka ti a ni, a lo serious viau phei chuan..." ka ti a, ka mittui a lo hnai leh tawh.



"A serious lo tùrah ngai ang, dam țha deuhin a lo haw phei mai ang."



Pu ber âwm nghèng chuan ka mittui a tla zawih zawih a, min hnem tum viau mah se ani pawh hian chanchin a hre chiang bîk lo va, a serious viau leh viau loh a hre bîk lo. Chu chuan ka ngaih a tițha lo zual a ni.



Ka mu lo a ni. Khumah chuan ka țhu a, a chângin room-ah chuan ka vei ka vei a, ka beidawng lutuk chu a chângin ka țawngțai. Chham tùr pawh ka hre tam chuang lo, ka pu chu dam chhuak ngei tùrin ka dîl a ni ber. Ka phone ka hûm rauh rauh a, call tùr pawh ka hre chuang lo. A hmaa ka pu number ka call chhin khân 'switched off' a ti si a, beidawn a tizual ka ti a, ka call nawn duh tawh lo.



Zîngah eirawng ka bâwl a, chaw ei khamah Princess-i school kal tùr ka buaipui a, school-ah ka thlah thlap. Pu ber chuan dàwr nghâk lo tùrin min ti na a; mahse, Princess-i school bàn hun tùr ka hriat avàngin dàwrah ka kal tho.



Ka țhiante pawh chuan ni danga dàwr ka kal dàn nèn a inan loh ém avàng chuan thil awmzia min lo zâwt a, Âtei zin thu ka hrilh ringawt. Eng vànga zin nge tih ka hrilh lo, min zâwt dîlchhût lo hlauh bawk.



Chanchin chu hriat ka châk si, ka hre ngam chiah bawk si lo, Âtei chu call ka tum deuh thut thut țhìn a; mahse, ka țhulh ngun khawp mai. Min rawn call loh dànah a serious hle a nih ka ring a, ka rilru a hah ngawih ngawih.



A bike-in a accident a ni ngei ang a, chuti a nih chuan motor angin a taksa himdam deuh tùra phèn deuhtu tùr a nei dâwn lo, a na a ni chiang mai, Âtei pawhin min rawn hrilh duh miah loh hi.



Pu berin Princess-i a awmpui a, keiin eirawng ka bâwl. Ka phone a rawn rì a, Âtei a ni tih ka hriat chuan room-ah ka tlân lût ta nghal a.



"Aw, Âte, eng nge chanchin? A na viau em? A bike a sawh chhe nasa em?" ka ti nghal zung zung a.



A rawn thaw hak a," Nichin lawk khân a taksaa silai mu lût chu an phawrh thei ta e," a rawn ti sap a.



Ka bo ta map mai!!



Silai mu. A accident a ni lo'm ni? Engtin nge silai mu a taksaah a luh daih theih?!! Miin an kâp a, chuan a accident tihna em ni záwk?



"A thisen chhuak pawh an titàwp tawh a, a ngaihtuahawm tawh loh. Enkawlna țha tak hnuaiah a awm tawh a, lo ngaihtuah miah suh aw. Nautei'n a tibuai che em?"



Ka inngaihtuah  harh hrâm hrâm a, ka rilruah zawhna tam tak a awm nuai nuai, ka lu thing nawk nawkin," Aw,..aih, buai lo ve," ka ti nawk nawk a.



"Novi, ka u chu lo ngaihtuah suh aw, doctor  thiam takin a enkawl a nia. Lo thlaphâng lo la, lo inngaihtuah rilru hah miah suh," a rawn ti lawm lawm a.



Mahse, engtin nge ka ngaihtuah loh theih tehlul ang? Engtin nge miin an kah theih? Silai mu a taksaah a lût a nih chuan an kâp tihna a ni a, tu tih nge? An intibuai em ni? Nge ka pahrawn leh Rin-misuala thil tih leh bawk zâwk?



"Chuan, Novi, he thil thleng hi tumah hrilh suh aw, thurûk tàwp a nia, ka u ţhiante leh kan chhûngkua bâkin kan hre lo aw."



A va mak leh zel ve! Rilru hah nâklaiin, tumah a la hrilh theih loh zui, rilru a ipik, ngaihtuahna a zîng.



Mahse, ngaihtuah tùr a va tam si ém!



Eirawng ka bâwl mêk a ni tih ka hre chhuak thut a, ka room ațanga ka va chhuah chuan pu ber chuan ka chawhmeh chhuan chu a lo chawk rak rak a.



"Ka lo theihnghilh daih a..."



Min nuih sakin," Ka hria alawm, chanchin a țha lam a ni em?" a lo ti zauh a.



Nui lui ve sakin," Aw, Âtei chuan a ngaihtuahawm lo chu a ti a; mahse, ka pu, engtin nge...a mak ka ti, tuin nge kâp a? Bike accident pângngai emaw ka lo ti a," ka ti a.



Princess-i melh zauh pah chuan," Nakinah ka hrilh ang che," a ti ta sap a.



Princess-i ka mal chungah a muhìl a, pu ber chuan chanchin a hriat ang ang chu min hrilh ta a



"Hetiang hna thawk tùr hian ka duh ngai lo. Thil țha lo ti ru chhui an nih miau avàngin an nunna hi a derthâwngin  a hlauhawm tih ka hria; mahse, a tuina ber a ni miau si a, sawisèl theih pawh a ni lo. Min chhùn a, a luhlul tih ka hre miau si a."



"Nu enkawl chhoh loh a nih miau avàngin thinlung sak tak leh luhlul zet a nei tlat a, a duh loh zawngah hi chuan a tihluih theih thlâwt loh. Chutiang a nih vàng chuan ka en liam ta mai mai a; mahse, ka hlauhthàwnpui lo a ni miah lo. Tih theih ka neihchhun chu fîmkhur tùra hrilh leh țawngțaipui chauh hi a ni."



"Tuna a thil chhui hi chiang takin ka hre lo va, pawisa lem hmanga sumdàwnna lam niin ka hria. Kan rama mi awmthei leh lawk tak takte pawh hi an tel nualin ka ring, hei vàng tak hian ka hlauhthàwnpui a; mahse, a nunna ém hi chu Pathianin min lâksak ka ring ngai lo."



"Thurûk tàwp a nih vàngin keini pawh hian engmah kan hre ngai lo. A țûl a tih hunah a chhuak tawp a, a chhuahna tùr lah a sawi ngai hek lo, kan zâwt ngai lo, zâwt pawh ni ila a sawi dâwn chuang lo. A nunna hlauhthàwnawma a awm chauhin hrilh kan ni ang."



"Mahse, tunah chuan nikhaw hre lovin awm mah se, a hlauhawm ber a taksaa silai mu an la chhuak tawh a, vànneihthlâk takin a sahuat lai a fuh lo hlauh bawk a, a țha chhuak vat mai ang. Lungngai lo la, damdawi țha ber ber hmangin an enkawl bawk a, rei lo têah a rawn haw thuai mai ang," a ti dap dap a.



"Ka pu, ka pahrawnte thil tih a ni thei ang em?" tiin ka zâwt ve thung a.



"Ni lo ang, ani chu Jail-ah a awm daih tawh a, bâkah, a ti ngam tawh kher lo ang," a lo ti a.



"Keimah vàng hian a tuar ang tih ka hlau a-"



"Ni lo ve, nangmah vàng a ni lo. I lo inmawhpuh ngawt ang e, hei hi chu thil dang daih a nih hi," a lo ti leh a.



Mut hmunah ka mu meng kar. He thu hi tumah ka hrilh thei si lo, ka rilru tâwt leh hrehawm lutukte hi hrilh tùr nei ila hrilh ila ka thâwl deuh hawk ngei ang; mahse, thurûk a la ni tlat.



Tho chhuak thutin lehkhabu leh pen ka la a, ka rilrua thil awm zawng zawng chu ka ziak chhuak ta zung zung a, phêk thum lai ka ziah hnu chuan ka zia ta deuh hawkin ka hria. Hei hi a lo țhat nasat hi. Ka ziak leh zung zung a, ka kut pawh a kham lo, phêk sarih ka ziah hnuah ka duhtâwk chauh.



Ka zia sawt sawt e.



Chutiang chuan ina ka awm a ka rilru a tâwt zual lai chuan ka ziak ta ziah. Lehkha phêk kha ka rilru hahna ka puan chhuahna, dawhthei taka min lo nghâk ngar ngartu a ni tih ka hre zual a, sawisêl leh phun miah lovin ka inhrîkthlâkna chu a lo pawm hmiah hmiah mai a ni.



Ni hnih hnuah Âtei chuan min rawn phone leh chauh. A phone châng hian minute tin mai rilru phâwklêk leh ipik deuh hian ka awm ziah a, phone call lo kal apiang chu Âtei a nih ka ring țhìn, chanchin țha lo lam hi a rawn sawi ang tih ka hlau ziah, ka thaw dèp dép reng mai, ka awm dàn hi hrehawm tak a ni.



"Nichin lawk khân a lo harh a."



Ka lâwm lutuk chu ka au chhuak vak lo chauh, ka thinphu a su dup dup mai.



"Na a sawi em?" Ka aw chu a khùr dat dat. Ka lâwm si, hlauthâwng pah bawk si aw zet chuh.



"Sawi lo ve, a țha tih a rawn sawi a, hlauthâwng lo tùrin min chah a."



"Mahse, a theih ngawt loh," ka lo ti vat thung.



A nui hak a," A țha vat mai ang, ani hi chu a luhlul ve a, nâ hian a ngam vak lo a nia; mahse, a khawsik hi a la sâng deuh a," a rawn ti a.



"A nih tak chu, a khawsik chu rehtîr thuai a ngai a nih chu."



"Nia, doctor-in a hlauhthàwnawm loh thu a sawi a, hetiangah hi chuan khawsik a awm châwk thu a sawi bawk a," a rawn ti leh a.



"I hah tawh ngawt lo maw?" Rawn haw se, keimah phei ve zâwk ta ila.



"Hah lo ve, Melo-i a lo kal ve bawk a, min menpui reng a, a zia lutuk. Tunah phei chuan a rawn harh tawh bawk a, a ngaihtuahawm tawh loh hi," a rawn ti leh.



Melo-i chuan a lo tlawh bîk a nih chu.



Thîkna thinlung a rawn tho vat. Tumah hrilh loh tùr a ni bawk sia; mahse, Melo-i chuan a lo hre bîk si. Mi pawimawh tak chu a lo la nih reng dâwn hi, ka tê rawih rawihin ka hria.



"Oh, Novi, Melo-i hian min hmuh fuh vàng a nia, zêp theih pawh a ni lo; mahse, accident pângngaiah a ngai char char, thil thleng hi ka hrilh miah lo," a rawn ti leh sar sar a.



"I khua a har lo sawt dâwn a nih chu," ka ti ve ngial a, ka thinlung  chhûngrilah erawh thîkna meipui a alh hluah hluah.



"Nia, a zia reuh lutuk. Ei tùr engkim min buaipui vek a, zànah pawh min men chhâwk thei a, chàu miah lovin ka awm theih phah."



Pu ber chu ka pu chanchin ka hrilh ve hnuah chuan lunghnûr zetin ka inbual a, sahbawn inhnawihin ka innâwt sawk sawk a, nawhlungin ka ke ka intlâk lehnghal a, ka țap lo chauh.



U Melo-i chuan a dam loh laiin a awmpui thei bîk sia, ka thîk tak zet. Kei lah chu inah, amah ngaihtuah ém émin rilru pângngai pawh pu thei lovin ka awm a, a bulah awm a nikhua a hriat loh lai pawhin awmpui duh viau mah ila ka thei si lo. A harh chhuah laite chuan a bula awm ve ka châk a, nâ a nei em tih pawh ka zâwt duh asin. A kut vuana menpui pawh ka duh, ka hmangaihzia lantîra ka hmangaih thu pawh hrilh ka duh.



Mahse, engtin nge ka hrilh ang? Ka phone thei lo va, pu ber leh Princess-i ka kalsan thei hek lo. U Melo-i chuan a duat thei dâwn bîk si, a dam loh chhûng zawng a enkawl thei dâwn.



A thuhrimah, U Melo-i pawh hi a pa dam lovin hetah Lungleiah a awm reng sia, rawn haw phei ve àwm tak a ni sia, engtizia nge Aizawlah a awm reng le? A hnathawhna hmun a ni tih chu ka hre tho; mahse  chawlh pawh rawn lâk ve àwm tak, a ti mak mah mah a ni, a pa a ngaihtuah lo mah mah alawm.



Zîng khat chu Princess-i chuan," Au No, Âpa leh Ànî hi an lo haw har tawh e, engtikah nge an lo haw ang?" tiin min zâwt kheuh a.



Nuih sak pah chuan," An lo haw țêp tawh ang, Âpa kha a dam țha lo deuh a," ka ti. Hetia ka hrilh hi pawi viau tùrah ka ngai lêm lo, thu dik a ni tho a, a pawi chin ka hrilh chuang hlei nem.



"Âpa chu ka va khawngaih tak! Ka ngai tawh asin le," a ti vang vang a.



"A dam thuai mai ang, Ànîin a awmpui a, karlehah chuan an lo haw thei tawh maithei a ni," tiin ka hnèm ve a.



"Au No, kârleh chu engtik nge?"



"Ih...ni a chhuak ang a, a tla leh ang a, chutiang hlîr vawi nga a nih hnuah chuan Âpate chu an lo haw mai ang," tiin a hriat thiam ve theih dàn tùr awlsam bera ka hriat chuan ka hrilh a.



"Chu chu lo thleng thuai thuai tawh se ka ti lutuk!"



"Kei pawh ka ti alawm. A nih, Âpa lo haw hunah chuan eng thu nge i lo hrilh hmasak ber ang?" tiin ka zâwt a, ka chawhmeh kan chu ka chawk pah a.



"Ih, ka ngaih thu ka hrilh ang a, chuan a dam loh vàng chuan ka hau bawk ang," a ti reuh a.



Ka nui hak mai.



"Âpa chu i hau ang maw? I hau phal  tak tak ang maw?"



"Na deuh lovin ka hau ang, chuti lo chu a dam lo bawk sia, ka khawngaih tho a."



A tûk lamah Âtei chuan min rawn be leh a, ei tùr pawh a ei hlek hlek thu leh a khawsik pawh a sàn vak tawh loh thu min rawn hrilh a, ka rilru a hlim viau nain kim lo leh dikhlel a la awm tlat. U Melo-i mawlh chu, ani chuan a hmu reng thei bîk si, ka hmu ve châk. A bialnu zâwk ka nia; mahse, kan thei lotu ka ni zâwk tlat si.



"Âte, ka pu chu ka be thei ang em? Ka be rei miah lo ang." Ka ngènngawl ve tlat, U Melo-i a awm ve țhìn sia, ka dinhmun a tiderthâwng.



"Tunah chuan a muhìl leh tawh a, a lo harh veleh ka lo call che ang a, ka lo biaktîr ang che aw?"



"Aw le."



Tunah hian Princess-i school bâng ka nghâk mék a ni. Mi dang pawh an fate nghâk an awm ve nual; mahse, ka be hlawm lo, ka biak thâ a tho lo.



Rickshaw-in kan haw a, a vawiin hun hman dàn chu a sawi siam siam a, kei pawh chuan zawhna siamin ka lo țawng ve zauh zauh a.



In kan thlena ei tùr ka pêk laiin Âtei chuan a rawn phone a, video call ngat maw le, an phalsak a ni ngei ang.



Ka pu chu khum puan vâr zetah a lo mu bâm a, a taksa lam erawh a hmuh theih loh. A lu chu a chêt sawn thei tih a hmuh theih a, Princess-i hmuh ve theih  tùr chuan phone chu ka keng a.



"Hi, Lalfanu, ka duat, i dam  țha em? Au Novi i lo duat maw?" a aw chu a ring hran lo, a la țawng ring thei lo a ni ngei ang.



"Âpa, i dam lo tih Au Novi'n min hrilh a, i dam dâwn tawh em?"



"Aw, dam țêp tawh e. Eng nge i ei a?"



"Au Novi'n ei tùr min siam a, a tui teh mai a nia. I lo haw hunah i ei ve duh ang em?" a ti lar lar a.



"Duh tehrêng mai. Au Novi thu i lo awih em? Âpu thu pawh lo awih la aw?"



An țawng chu ka lo ngaihthla a, a hmel lang bui lek lek chu hmuh nuam ka ti hauh lo, nâ a tuar a ni tih ka hre reng si a, chhâwk țhen ve thei hlauh ila aw. Tunah te hian a bulah awmin a kutte vawnsak ila, ka hmangaih thu ka hrilh ang a...



"Novi..??"



"Aw?" Ka ngaihtuahna ram ațangin ka harh chhuak hlawl.



"Min lo ngaihtuah viau suh aw, ka țha a nia," a rawn ti ve ta thung a.



"Engtin nge ka ngaihtuah loh theih ang che? Tunah pawh in bulah awm ve ka duh a..." ka sawi zawm thei lo, ka lung a chhe thut a, ka țap mai ang tih ka hlau.



"Ka țha tawh a, hei ka rawn biak theih tawh che hi. Nautei ngaihtuah i ngai bawk si a, i lo hah lutuk ang e."



Ka ngawi reng a, ka hmel pawh ka tilang chiang duh lo. Țah khum ka duh bîk lo va, ka insùm theih nân ka ngawi reng a nih hi.



"Novi, khatiang khân awm suh, dam vat tùrin min duh em?"



"Aw..."



"Chuti, i hmel kha chiang takin tilang teh, ka hmu duh che alawm."



"Aih."



"Min ngai lo a ni maw?"



"I sual!"



Zànah Assignment ka ti hlek a, rei tak meng lovin ka mu thuai. Ka mu tam lo bawk a, ka chau ve raih mai. Ka mut hnu rei vak loah chuan ka muhìl ta bawrh bawrh, ka rilru a hahdam ta deuh a niang.




*HLIM I DUH CHUAN I INSIAM CHAWP THEI, AMAHIN A LO THLENG TAWP LO, HLIMNA NEI TÙR CHUAN THIL ȚHA TI RAWH LE*