☆GOLD DIGGER☆ - I By Dingdi Pachuau

☆GOLD DIGGER☆ - 1 By Dingdi Pachuau




"Kum 25 i tlin hma chu pasal nei suh."



"Hna i neih hnuah chauh pasal nei rawh aw."



"Naupang lutuka pasal neih chu a țha lo."



"Nulât hi a nuam rih a, pasal nei thuai duh suh."



"Pasal tùr chu an tam, hmanhmawh miah suh."



"Hausa deuh leh rethei deuh chu pasal atân nei miah suh, buaina a tam mai mai."



"Pasal i neih hmain i duh leh tih i châk zawng zawng tizo vek ang che."



"I hriat chian fak loh chu nei miah suh."



Chhûng leh khat, țhiante min zilhna a ni. Ka nuih an tiza țhìn a, a hun lai kha chuan ka nuih liampui mai mai. Tûn hnuah erawh ka ngaihtuah chian poh leh a dik ka ti ta vawng vawng, an thil sawiho kha dik lo a lo awm lo. Belhchian dâwl, thu dik leh min duhsakna thu vek a ni, ka zàwm lo mai pawh a.



*******



"Bàbî, engtikah chuan nge kan zin dawn?"



"I exam zawh velehah le. Ni 15-ah in zo dâwn a ni lo'm ni?"



"Aw, zo thuai thuai ila ka va ti tawh tak!"



Melh ralh pah chuan," Tihțhat loh phah nân i hman vaih!" ka ti a, ani lah chuan phûr zet hian," Ka tițha dâwn alawm, first high-ah a nih loh pawhin distinction-ah chuan ka pass dâwn chiang," a lo ti vat a.



Ka nau Nubawihi nèn hian kawng engkimah chhim leh hmar ang hlauh kan niin ka hria, hmêlah tih loh chuan. Lehkha thiam thei tak a nih laiin kei chu pass ve țâwk țâwk țhìn ka ni. A chêrin a piante hi a nalh reuh a, kei chu ka chêr lo. A sam hi  buang deuh ther niin a kir kàwi deuh a, a zuah sei angreng viau bawk; kei ve thung chu ka sam a dum a, ka koki chen vêl chiah niin a ngil seng sawng viau thung.



High school ka kal lai phei chuan ka chhah țha ve țhìn khawp. Ka nau anga ria deuh hlek nih ka châk vàng hian exer lain zîngah ka tlân țhìn, ka thil ei ka titlêm a, thil thlum lam phei chu ka ei ngai lo tluk a ni; mahse, chuti chung pawh chuan ka chêr ngai chuang lo. Tûn hnuah hi chuan ka nihna hi ka pawm thiam ta zâwk  a, ka taksa a ni a, ka hmangaih thiam hle tùr a ni tih ka inhrilh ta fo zâwk.



Tûn thlengin zîng leh tlaiah, ka hman hunah exer la țhìn mah ila, ka rihna a tla hniam hran lo va, ka chèr phah hran lo bawk. Rilru tihrisêltu leh taksa tihrisêltu atân ka tlân ta zâwk țhìn, ka nihna hi ka pawm thiam leh ka tân a țha a, thau ka ni chuang lo bawk a, ka duhzâwng thawmhnaw ka ha thei a, buaina ka nei tawh lo.



Nubawihi chiah hi tunah chuan neih ka nei tawh a, ani hi ka chhûngkaw neihchhun a ni. A duh tihhlawhtlinsak loh hi ka hlau a, tihlawhtling thei tùrin hlawh ka nei ve tawh bawk. Cl - xii a zir mek a, English Lecturer nih a tum ber țhìn.



"Ticket ka cut lâwk duh ang em?"



"Aw, chuti lo chu ni 16-ah kan chhuak hman lo palh ang."



Buaithlâk thei a nia. Vawi khat mah Lunglei a la hmu lo va, a zin vawi khatna tùr a nih vàngin a phûr ém ém ringawt mai a ni. Hun remchâng a neih hi bawhpelhtîr ka tum bîk lo, a pass a nih chuan Bangalore lamah college kaltîr ka tum si a, a châk tak tihsak hi ka duh a ni.



A u duh tak kha ka ni ve miau a.



Bank-ah Asst. Manager ka ni a, ni tin ka chhuah avàng hian Nubawihi hi ka ngaihtuah țhìn hle a; mahse, tunah tak hi chuan exam an zo dâwn tawh a, a tițha thawkhat tih ka hre bawk a, ka rilru pawh a hahdam thei ta deuh. Kum 18 a tling dâwn tawh a, a pumrua lian uaihin min chen ve tawh mah se la, ka tân chuan 'ka naute' a la ni tho tho.



*******



Kan vànneihna a kal tluang dâwn a ni ang, ka thawhpuite zînga mi Lalàni u chu Lungleiah kal a ngai ve thut mai a, Bolero-in amah chauhin a kal dâwn a, chutah chuan kan chuang ve thei ta a. Ticket kha ka cut duh ta lo va, a chhan chu Lalàni'n min hrilh a, a hnên ațangin ka hria a ni, kalpui/chuanpui tùr a duh hle zâwk si a. Ani pawh a lâwm, keini pawh kan lâwm.



A tìrah chuan a țawng duh lutuk lo va, a fel viau tho chuan ka hria. A hnu deuhah chuan Nubawihi'n ho tê tê a sawipui a, dârkâr khat kan tlàn hnu lamah phei chuan a tuina lam a sawi chhuak fuh a, PUBG, Mobile Legends, COC, tih vêl an sawi, an țawng dùn bawrh bawrh mai. Kei chuan games-ah chuan Word search leh Candy crush bâk ka hre ve si lo va, ka ngawi ta hlauh thung.



Ka puteate ina kan lût hrâwk chu, mak an lo tih hmel khawp mai. Nia, kan hrilh lâwk lo va, a àwm reng. Ka putea ka ti tak nain ka nu hian unau pianpui a nei lo; mahse, unau anga a en a nih vàngin 'pute' tiin kan ko mai.



Nubawihi nèn khumah kan mu dùn a, a muhìl hma hle mai. Khua a lum ve deuh tawh bawk nèn, vawiin lama motor a chuannaah khân a chàu a nih ka ring. Tui taka a muhìl thaw ri sâk sâk chu ka en vang vang a, miin inang min ti țhìn pawh hi a àwm ka ti. Kan hmêl hi chu a inang chiang alawm, a biang dinglama a khuavàng dum kalh chu a inhmeh ka ti țhìn, kei ve thung chu ka veilam khabe sîr deuh takah a awm thung. Kan hmêl chiah a inang, kan duhzâwng leh tuizâwng a inang hek lo.



Lehkhabu chhiar leh thil ziah hi nuam ka ti a, thawnthu ka chhiar a, ka ziak țhìn bawk. Ani chuan TV en leh games khelh a peih hle thung a, Lalàni u nèn pawh khân games chungchâng hlîr a ni an sawi ni. TV hi ka en peih țhak lo va, ka en ve hlauh a nih chuan ei siam lam chauh ka en țhìn.



Tûkțhuan ei khamah muangchângin chhuak tùrin kan insiam a, puteate hi Venglaia awm an ni hlauh a, a zia. Bazâra kal hmasak a duh avàngin bazârah chuan ka kalpui a, nuam ka tih fahran loh nèn, ani chuan nuam a ti kher mai.



"Nuam ka ti, nuam ka tihzâwng tak a ni," a ti reng mai a. Nula pui tawh e ti lo chuan thla a la deuh sek reng bawk, ka hau duh lo. Nuam a ti ve a ni mai a, a kal vawi khatna a ni bawk nèn, a duh dàn dánin awm teh se.



Lungleia kal hi ka duh miah lo, Aizawl, Champhai, Sèrchhîp, Lawngtlai leh Saiha lam ka sawi hmuh viau nain Lunglei hi a la hmuh loh miau avàngin a châk tlat a ni. Saiha leh Lawngtlai chu hlâ a ti a, Champhai leh Aizawl erawh a kal ngun tawh a, a duh lo. Lunglei kal a châk miau avàngin ka hnial duh ta bîk lo a ni, thil pawi thleng lo tùrah ngai ang.



"I ril a țâm tawh em?"



"Um, țâm țan," țhen sak chung hian a ti a, bazâr chhûnga cosmetics an zawrh lam chu a pan phei leh nghal zat a. Perfume a en leh tawh dâwn a ni ang, perfume hi a ngaina ve a, a kal pèl thei thlâwt lo.



Perfume rimtui zet pakhat hi min hnimtîr a, rimtui ka ti khawp mai.



"Ah, Mary Kay perfume a nih hi!! Ka zawng nasa thei lutuk. Bàbî, lei ang aw, a vâng tawh teh a nia."



Mi zînga inhnial hi ka peih miah lo va, dik tak chuan a duh hi chu a to țhìn ka ti; mahse, a rimtuiin a rim a tlo țhìn a, a àwm viau tho.



Sawisêl lo chuan pawisa chu ka pe ve mai a, kei chuan ka ngaina ve ém ém lo, chu ai chuan sahbawn rimtui tak leh lotion rimtui tak hi ka ngaina zâwk.



Murray-ah ka chawlhpui a, a ril a țâm ve tawh bawk a niang, ei tùr a order nual. Kei chu a la țâm lěm lo va,  chawlhpui loh ka duh loh vàng chauhin ka lam ve mai mai a ni.  Ei tùr kan nghah chhûng chuan phone ka la chhuak a, whatsapp message ka en kual a, thawhpuite min duhsaknate chu ka chhiar a, ka nui var var a.



"A va thlum àwm ve a?!"



"Thawhpuite hian min duhsak hlawm  liam liam a, chhiar a nuam ém a."



"Nuam over deuh a awm a niang?"



"Awm over nâng."



A nui hak hak a," Ka awih lo over," a ti leh a. Kei pawh chuan nui chung hian," Awih over rawh," ka ti a, kan inen a, kan nui dùn hak hak a.



Ei tùr chah a rawn thleng a, Nubawihi chuan a lo ban vat a, rilțâm tawh tih hriat zet hian a ei nghal vat a.



"I lo țàmchhàwl lo chauh a ni maw?!"



A thil ei vàng chuan min chhâng thei lawk lo lehnghal a, chu chuan ka nuih a tiza lutuk a, ka nuih char char a.



"I helh ang e, tlêm tě tě khân ei la, muangchângin aw. Tu mahin an eisak dâwn lo che," nui chung hian ka ti leh a.



"Eng nge, a țâm ve tawh a ni mai a."



"Bàbî...?!!"



Ka nui tàwp hmak mai.



Thil ţha lo tak a ni.



Hawi chhuak lo mah ila, tu âw nge tih ka hre chiang lutuk tlat. Ka thin a phu nghal dawt dawt a, a rûk těa ka kuta ka âwm chu dawmin ka maimichhîng vang vang phawt a, chutah, min kotu lam chu ka en ve ta chauh a.



"Hey, Kenny, i dam maw?"



A mitmeng ațang chuan min hmu chu mak a ti tih ka hre thei mai. Nia, mak a ti ang, kan inhmuhna a rei ve tawh ém a ni. A chhîpsam buk lam leh sei lam deuh chu a hnawk deuh niaih a, a mit hnuaia val deuh raih ațang chuan hun hlimawm tak a hmang bîk hran lo a nih ka ring, a hmuihmul leh khabe hmul pawh a țo deuh sar tawh.



"I ni tak tak!!"



Mak a tihzia thup a tum miah lo. Kei lahin biak zawm dàn tùr leh sawi tùr ka hre tawh lo, dik tak chuan min hmu hi ka duh lo thlâwt. Tlànchhiatsan nghal daih ka duh hial asin.



Mahse, Nubawihi ka bulah a awm, thil a ei mêk. Tlànchhiatsan chu a tihchi hauh loh, ka in-control a ngai.



Țawng lo chuan a țhiante ni ngei tùr lam chu ka en phei a, ei tùr an ei zo tawh a nih hmel, chhuah an lo tum tawh hlawm a.



"I dang ta hle mai!"



Hm, dang ve bawk ang chu. Kum hnih chuang kan inhmu tawh lo tlat a, kan inhmuh țhin lai chuan tleirâwl mai alawm ka la nih le!



"Dang vak em ni?"



"I sam kha." Ka sam chu a rawn kâwk zoh a, kei pawhin ka sam chu ka han khawih ve zoh a; mahse, ka kut chu ka la thla rang lutuk. A sawi avàng maia han khawih chu leh, ka duh lo lutuk.



"Kum tinin kan dang telh telh alawm, a ngai reng put hi a ninawm ve a."



Ka sam puthmang hi ka tidanglam ve rěng a ni. A hma chuan a seiin ka thlah ngai lo va, ka chhîpah ka bâwk mai țhìn. Tunah erawh ka titâwi ta viau a, chalsam ka nei bawk.



Ka lang young min ti a ni ngei ngei ang.



"I bo thut a."



Kha maw, a rawn sawi dâwn. Hei hi a ni ka duh miah loh chu.



"Sawi lo teh, sawi chhuah ka duh lo a nia."



"Hre lo angin ka awm dâwn em ni?"



"I țhiante'n an nghah che saw." Kal thuai thuai se ka va ti tak! Rilțàm loh naklaiin, tunah phei chuan thil ei châkna pakhat mah ka nei tawh lo.



A țhiante bulah chuan pheiin a va bia a, kei pawh ka thil ei tùr lamah chuan ka rilru ka pe leh ta a, Nubawihi pawh ka melh duh lo, makti takin min en reng dâwn tih ka hre reng.



"Bàbî, tu nge a?"



Ka thaw huai a, mipa ka biak ngai lohzia hre chiangtu a ni a, mak a tiin a hre châk dâwn nasa a ni.



"Țhian hlui-"



"Hi, Kenny ka nia, Bàbî nèn hian ințhian kan nia, ka lo țhu ve thei ang em?"



Ințhian 'țhìn' kan ni zâwk.



Makti deuh hian ka en chho a, ani erawh chuan Nubawihi chauh a en thung a.



Nubawihi chuan min rawn melh zawk a, Kenny chu en chho leh zatin a nuih sak a.



"Lo țhu rawh, Bàbî nau Nubawihi ka nia."



He mite pahnih hi ka hre thiam lo ve. Nubawihi hian he pa biak ka duh lohzia leh kan bula awm tùra ka duh lohzia hi hre ngat se chuan...



"In inang ka ti rěng a ni."



"Bàbî țhian hluite hi ka la hre ve miah lo va, ka hmu thei che chu ka lâwm khawp mai."



An inchibai tak deuh deuh. Ka duh lo kher mai. Nubawihi hi ka nunhlui leh ka hun hman dàn ka hrilh ngai lo, he pa ațang hian a hriat vek loh hrâm ka beisei.



A țhiante'n an chhuahsan tawh a, a va biak khân ' Min lo kalsan rih rawh u' a ti a ni ngei ang chu, engtiziaa lo țhu ve nge maw a nih le?



"Engvànga lo țhu nge i nih?"



Ka țawng chhuak chu a mawi lo viau tih ka hre tho nain pawi pawh ka ti lo, țawngkam mawi tak sawi kher a țûl pawhin ka hre lo.



"Thil sawi fiah a țûl-"



"Sawi fiah a țùlna ka hre lo ve!"



Sawi zawm tawh lo chuan a ngawi ta daih a, min en rùn bawk.



"Kenny, min kalsan teh, min hmu miah lo angah ngai bawk la."



"Hmu reng chung che hian hmu lo angah ka ngai ang che maw? Engtizia nge? Hlauh i nei em ni?"



Hlauh maw? Nei nâng. Ni lo, nei chiang e. Mipa kamtam tak leh țawng duh tak a ni lo tih hre mah ila, min hmu tih hi a sawi chhuah vaih chuan.



"Duhtâwk rawh!"



"Bàbî, ințhian kan nih kha, engtizia nge hetia i awm tâk tlat a?"



Chhan a awm a ni mai. Chhan awm lo se ka be duh lo dâwn em ni?



Kan țawng ring hran lo nain kan ti mai mai lo dùn khawp mai, mi dang chàwl ve pawh an awm nual a; mahse, min rawn ngaihven bîk lo va, a zia khawp e.



"Ka lo va chhuak rih dâwn em niang?" Nuam lo tih hmel zet hian Nubawihi chu a ding hluai a.



"Pawi ka ti khawp mai, i u hi ka be duh lawk a."



"Kei pawh ka lo chhuak ve nghal ang e."



"Bàbî, inbe fel r'u, pâwnah ka lo nghâk ang che."



"Ei zo phawt la?"



"Ka ril a țâm tawh lo va."



Ka inthiam lo kher mai, keimah vàng vek a ni. Ni lo, he pa vàng hi a ni zâwk. Min melh zak zak chunga a chhuak chu ka en reng a, ka khawngaih rilru deuh, nakinah ka hrilh fiah mai ang.



"Engtizia nge ka biak che chu i duh loh ém ém a? Țhian kan nih kha, i hre tawh lo em ni?"



Ka chhâng lo, en pawh ka en hek lo.



"Eng thil nge thleng tal min hrilh la?"



"Awmzia a awm lo," rei tak kan ngawih hnu chuan ka ti sap a.



"I sawi chhuah tal loh chuan hriat a har dâwn ém a ni. Eng thil nge thleng?"



"I țhianpa i zâwt lo em ni?"



"Engmah a hre lo, i hrilh lo a ni lo'm ni?"



Nia, eng mah ka hrilh lo, hun a nei thlâwt lo a nih kha. Ka call lahin min chhâng thei lo va, a hnu lamah erawh ka phone a bo vàngin ka thei ta lo va.



"Min dem hle ang maw?"



"Thil awmzia i hrilh ka ring asin." Min dem tihna, sawi dawt lo mah se min dem tih ka hre tho.



"Ka call a chhâng thei lo a nih kha."



"A hnu lamah tal pawh biak i tum em?"



"Ka phone a bo daih a."



Ngun zeta min en avàngin kei chuan ka en țha duh vak lo, nuam lo ka tiru ve reng; mahse, ka tilang lo ang.



"Kan buaizia i hre thiam pha lo tawp ang chu."



Buai viauna tùr a awm hlei nem, ka chhuahsan a ni mai a, ka peih tawh lo tihna a ni mai.



"A fel duak zâwk ang chu!"



"Bàbî, i lo danglam tawh tak zet a ni."



"Tleirăwl măwl tak kha ka ni tawh lo." Tunah chuan ka thinlungah hian khâkna a tam tawh lutuk a, min ei chhe zo tawh ni maiin ka hria.



"Tleirăwl măwl i ni ngai lo hrim hrim."



Za lo zet hian ka nui a, a zat lohzia chu a hre ve chiang khawp ang chu.



Kan ngawih vang vang hnuah chuan," Eng nge Lungleiah hian i tih rěng rěng a?" a ti ta daih a.



"Nubawihi ka rawn zinpui. I duhtâwk tawh em? Chuan, min hmu tih hi i țhianpa i hrilh loh hrâm  ka beisei."



"I chhuahsan chhan hriat fiah phû i ti ve lo em ni?" Min en rùn reng a, a tidik ka titho bawk si a, ka en lêt ve duh lo.



"Hre duh ni se, kum hnih chhûng khân a hre daih tawh ang chu!"



"I hrilh loh miau chuan-"



"Kenny, duhtâwk teh ang, hre duh tak tak ni se hun a ngah lutuk."



"I țhian ka nih hi."



"A țhian i ni ve tho."



A thaw hawk a, a ngawi ta rùn mai.



Ka va sual ve tak! Kenny-a hi chu ka chungah a fel tehlul nèn, hrilh fiah hi chu a phû ve tho chuan ka hria; mahse, hrilh fiah mah ila awmzia a awm tawh chuang lo.



"Ka chhuahsan a, ka țhen tihna a ni mai."



"I chhuahsan chhan chu?"



He pa dìlchhûtzia hi chu aw...



"Ka awm peih tawh lo tihna."



Kan ngawi dùn ta vang vang. Ngawi rùn chuan ngun zet hian min en reng a; mahse, min hmu chiah ang em aw tih ka ngaihtuah, a rilruah thil dang a ngaihtuah daihin ka ring.



"Be tal la?" a rawn ti ta sup a.



"Eng nge ka sawi ang?"



"Kei min hrilh duh lo mah la, ani tal chu hrilh fiah la?"



"A buai thei ém mai," zàwi tĕ hian ka ti sap a.



"Chu pawh ni se, a nupui i ni a-"



"Nupui hlui zâwk maw le," ka lo ti vat a.



"I chhuahsan avàng khân in ințhen tawh tihna a la ni lo."



"A ni tawh ber alawm."



"A, be phawt la, sawi fel teh u."



*******



Zànah mut hmunah chuan ka phone chu ka khàl nauh nauh a, Kenny-a thil sawi kha ka ngaihtuah lêt a, a tidik khawp. Hmaichhanah ka hrilh duh lo a nih pawhin phone talin ka hrilh a ngai a ni.



Nubawihi muhìl thaw sâk sâk  chu ka en a, thil awmzia min zâwt lo mah se, a hre châk dâwn tih ka hria. Nakinah ka la hrilh vek ang, ani bâk hi hrilh tùr ka nei tawh hlei nĕm.



Mutna ațanga tho chhuakin tukverh chu ka hawng dè dé a, veranda-ah chuan dingin a number chu ka hmet chhuak ta nge nge a.



A ring e. Aw, ka va ngaihtuah tlêm tak! Tunah zàn dâr 10:45 a ni tawh! A mu tawh maithei asin, a nih loh pawhin a buai maithei a... A va màwl theih tehlul ém! Mâwl leh lutuk mai.



"Hello?"



A mu tawh a ni ngei ang, a mut chhuak aw ka hre leh ta chu ka dik lo leh deuh țan mai dâwn.



"Zualbawih???"



Min koh dàn bîkin min ko leh tawh. Min hriat chat dànah Kenny-a hian a hrilh a ni chiang mai!



"Zualbawih, i ni tiraw?!! Min chhâng teh." A mut chhuak aw kha hriat tùr a awm leh tawh lo. Mawi ka tih leh ka thlâkhlelh deuh aw kha a ni leh tawh.



"I dam em?" Sawi țan dan tùr ka hre hlawl lo a ni.



"Lalpa leh! Zualbawih, i ni tak tak! Khawiah nge i awm? Engati nge min rawn call ngai loh? I țha em?"



Chhàn nghâl vek theih pawh a ni lo.



"Aw, ka țha e."



"Tunah khawiah nge i awm?"



"Lungleiah."



"Engati nge i rawn haw loh?"



'Haw' țawngkam a hman dànah ka țhen angah a la ngai lo tihna a ni chiang. Kenny-a pawhin a sawi chiah kha.



"Ka chhuahsan tawh che a-"



"Naktûkah ka hmu thei che ang em? Khawngaihin, naktûkah inhmu ang?"



Hei hi a ni ka duh loh chu.




*I FATE MIZIA LEH NUNGCHANG KHA NANG AIIN MI DANGIN AN LO HRE ZÂWK FO*



(In lo dam maw, mi felho? Zan tin dah thei tùrah inngai ila, ' ka lo dah ziah ang' chu ka ti bur thei lo, a chhan chu hma lam hun ka hre lâwk bîk tlat lo; mahse, Pathian zâra ka dam phawt chuan, net a țhat bawk chuan dah lo ka lo tum ang, chhiar tui vek u, comments lamah inhmuh tum ang u aw)


☆GOLD DIGGER☆ - 2  By Dingdi Pachuau



*******



"Zanin chu exam zawh zàn a ni bawk a, kan kal ve ang chu tiraw? Chuan, kan inah i riak nghal daih ang a."



"Hm, ka châk reng; mahse, warden dìl ka va peih lo tak!"



"Mahse, exam kan zo tawh tho alawm le, ka dìlpui ang che, duh leh zanriah pawh kan inah i ei nghal dâwn nia."



College ka kal chhûng zawnga ka țhian kawm ber  Sasangi thu hnial hi chu a har țhìn. Țhian dang pawh ka nei tho nain ani hi chu ka kàwmngeih bîk a, kan inngaina zual bîk. An inah pawh hian vawi 10 chuang chu ka riak tawh, u mipa pakhat chauh a nei a, ani lah chu Delhi lamah a awm daih bawk si. A nu leh pate pawhin min ngaina ve hle chuan ka hria, kei pawhin ka ngaina.



Hostel kan thlen chuan visiting room-ah min lo nghâk a, kei chu ka room-ah kal nghalin ka inthlâk a, warden hnênah ka kal leh phawt a. Chumi hnuah chuan nakin zàna ka hâk tùr thawmhnaw ka bag-a dahin ka chhuak leh ta nghal a.



Sasangite inah chuan chaw chu ka ei ta ngei a. Zanriah ei khamah muangchângin kan insiam a, Sasangi cousin mipain min rawn sâwm a, birthday party an buatsaihna hmun lamah chuan kan tlăn ta vang vang a.



Ramhlun N ațangin Mission vengthlang kan pan vang vang a nia, kan tlăn thui ve khawp mai. Tuna birthday lawmnaa kan kalna tùr hi Sasangi first cousin niin, anni chhûngho kual hi an rual riau a ni àwm e.



Kan thlen chuan an lo tam tawh khawp mai. An chhûng leh khat an rual a, țhian an lo sâwm ve nual bawk si a, ka rin ai daihin kan tam.



Hmel hriat ka nei lo khawp mai, ka hmuh pawh ka inring hran lo. Hostel ațang chuan hmel hriat neih tam a har viau asin, Aizawl khaw chhûng mi hlauh phei chu.



Sasangi cousin, birthday girl Nunuite hian compound an lo nei zau khawp mai a, tuna a birthday an lawmna hi an in chung zâwlah niin an kawt pawh an chhi ĕng tuar a, in chung zâwl ațang chuan an in chu a zau tih a hriat ngawih ngawih.



Ka inchei dàn chu a zahpuiawm bîk lo ve. Mi zînga awm chuan, mi mit la tùr bîka awm hi ka duh hauh lo. Zahpuiawm leh mi en hniama awm lo tùr hian ka infuih nasa țhìn. Thawh chhuah chu la nei lo mah ila, 'nakinah ka la nei ngei ang' tiin ka infuih nasa țhìn a ni.



Hunserh an hman zawh hnua nu leh pa lam an inthiarfihlìm hnu chuan music an play a, an lâm a. Kei chu làm hi ka tih ngai loh avàngin țhu chungin an lâm chu ka lo en mai mai a, a hnu deuhah phei chuan in chung ațangin ka chhuk a, kawt pangpâr chi hrang hrang leh thing buk hniam tĕ tĕ lo dinna lamah chuan ka kal ta daih a.



Mi dang dang pawh ka hmu, Sasangi erawh làm nuam a tih vàngin a làm laiin ka chhuksan kha a ni a, min zawngin ka ring hran lo.



"Bàbî???"



En lo mah ila, tu nge tih ka hria. Ka chhûngte ni lo leh ani tih loh chuan hetiang hian min ko ngai lo.


Kenny-a.


A va mak! Helaiah ka hmu ve nawlh a.



Inhera enin," Hey, i lo kal ve elo?!! I lâm ve nange?" nui chung hian ka ti a, ka țhutna ațang chuan ka tho chhuak duh lĕm lo va.



Kenny-a hi kan hostel neitu Madam Châmi tupa a ni a, kan hostel-ah pawh a lo kal fo. Kan inhriat țantirhna pawh tui rawn hàw laiin tuizêm lian a chhia a, pipe nèn. Chhùn lai a ni a, mi dang an mu țhup nèn, kan cook ka ko vak a, Madam-te ina Kenny-a lo lèn lai tak a lo ni a. Ka au thâwm hriain a rawn kal vat a, pipe chu rawn siam țhain tuizêm pawh chu a theih ang angin a siam nghâl a. A tûkah siam tak tak hna chu a rawn thawk leh ta bawk a ni. Madam tupa tih ka hriatna a la rei miah lo, kan cook Nu Zâiite chhûng emaw ka ti zâwk.



"Ka rawn zawng che a?"



A aw thûm, hniam chhek chhawk  hi pà ka ti țhìn. Mipa dik tak aw niin ka hre ve tlat.



"A ni maw? Engati maw?"



"Ka țhianpain a be duh che a."


Tu a țhianpa maw?! Mipa hmel hriat hi ka nei tam lo teh a nia, ka ngaihven lĕm lo bawk. Vawi khat ka tawn sual tawh hnu ațang kha chuan ka inrawlh lo ta khawp asin.



In chhûng ațang chuan tlangvâl pathum an rawn chhuak a, an zînga sâng ber chu a hawi kual deuh vat vat a, a chhiat loh hmel kher mai.



Kan awmna lam chu a rawn melh phei a, kei pawhin ka lo en chiang ve kher mai, tlangvâl chhe lo tak a ni. A hleitling a, a lang zahawm bawk.



Mi dang bulah chuan eng emaw hi a sawi a, kan lam pan chuan a rawn kal phei ta nghal a.



Kan bul a lo thlen chuan Kenny-a chuan," Țhianpa Nunsanga( Lâna) a nih hi. Lân, Hmangaihzuali (Zuali) a nih hi," tiin min inhmel hriattîr a.



A chhe lo sia, ka lo lài lek lek ringawt. Kenny-a nèn chuan an inchen khawp mai; mahse, Kenny-a chu a sam a sei deuh zâwk vàng nge, a lang chĕr zâwkin ka hria.



"Ka hmu che chu ka lâwm hle mai."



A aw chu, a mawi tawp. A thûm ém ém hran lo va; mahse, mawi ka tih chi, a timawi lui ve deuh pawh a ni maithei.



"Tikhân, lo țhu lawk r'u aw, in chung lamah ka han chho lawk ang e," tiin Kenny-a chu a kal ta nghal daih a.



Kenny-a kal hnu chuan kan ngawi dùn vang vang a, biak dàn tùr ka hre lo. Tùn lawka ka hmel hriat thar ve chauh a ni bawk si, chubâkah, a chhe lo ropui bawk nèn.



"'Zualbawih' tiin ka ko thei ang che tiraw?"


A nuih suk chuan a chhe lo lutuk. A hlaah pawh khân a chhe lo hle a, hmaichhanah phei chuan a chhe lo leh zual.



Ka țhiante hian min koh nawmnah nân 'Zualbawihi zai thiam ve lo' min ti țhìn a, ka hre chhuak zawk mai.



Nui sakin," I duh chuan le," ka ti ringawt a.



"I hmel a țha ka ti tak zet."



Ka sen nasa dâwn lutuk. Hmaichhanah fakna ka dawng tam  lo va, tlangvâl chhe lo tak lak ațang phei chuan. Ka hlim lutuk a, ka zak bawk si nèn, ka bîng chum chumin ka hria.



"Ka lâwm e."



"Ka zawn țhin chu ka hmu ta!"



*******



Nubawihi  chu putea nupui nèn an chhuah dun hlauh avàngin tunah hian Nunsanga hmu tùrin keimah chauhin Classic restaurant-ah ka țhu mêk. Mi dang chàwl vete'n kan țawng an hriat chian theih lohna lai tùr bera ka hriatah ka țhu ve thăn a, a rawn thleng țêp tawh ang chu maw.



A rawn thleng thuai.



Hmân ai khân ka hmu sâng ta deuh zâwkin ka hria, ka hmuh khàt vàng pawh a ni maithei. T-shirt nghâwng nei pâwl duk a hâk chu a inhmeh viau a, a sam erawh a hma ai chuan a tikâwng deuh hlek a nih hi, a mehna a la rei lo a ni maithei. A mit hnuai val kalh chuan a tilang upa deuh hlekin a hriat, chàu hmel a pu bawk.



Min hmu chu mit lâk sawn nachâng pawh a hre tawh lo. Awih lo hmel a pu deuh a, kei pawhin ka lo en lêt ve ngar mai. A chhiat loh dàn a la ngai reng a, he pa hi ka duh leh ka hmangaih ém ém kha a la ni reng bawk. Ka duh leh hmangaihzia ka hriat chhuah leh uar uar laiin ka chhuahsan chhan kha ka hre chhuak pah nghal bawk a.



"Zualbawih?!!"



"Nunsang."



"Ka hmuh leh che hi ka ring ngam tawh lo asin!"



Ka thin chu a phu dawt dawt maiin ka hria, tuna ka awm dàn hi a hriat ve loh hrâm ka beisei.



"Kenny-a'n a hrilh che tiraw?"



Maktih hmel zet hian," Kenny-a'n a hmu che maw? Engati nge min hrilh miah loh? Chu pa mai mai chuh!" a ti sup a, a chal a chuar nâng a, a thaw pah hawk a.



"Ka duh lo a ni mai. Bâkah, kan inhmu fuh palh hlauh a ni, hmuh ka duh rĕng rĕng lo."



"Kenny-a i hrilhin i hmu a, kei min hrilh ve lo maw?" tiin a insehruh zui nghal a.



"Min hmuh thu hrilh lo tùr chein ka hrilh a ni."



Awih loh hmèl zet hian min en rùn mai a," Eng vàngin maw, Zualbawih? I pasal ka nih hi, chu chu i hre lo em ni?" a ti a.



"Ka hria alawm; mahse, ka chhuahsan tawh che a."



Ei tùr kan order phawt. A ngawi rùn mai a, ka thil sawi chuan a tithinrim hle pawh a ni maithei a ni.



"Engtin nge i tih theih zâwk? I bo thut a, ka zawn nasatzia che i hria em? Khawiah nge i awm bo vang vang?" a ngawih reng hnu chuan a rawn ti a.



Dawhkàn chunga ka kut chu a rawn vuan a, nghet zeta hmerin," Min kal bosan tawh lul suh, zànah ka muhìl țha thei lo va, nangmah ngaihtuah reng chungin hun ka hmang țhìn asin," a ti sup sup a.



Dâwt min hrilh ka ring miah lo, min ngaiin min thlahlel ve khawp țhìn a nih kha. Kei pawhin ka ngai a, hrehawm ti tak chungin ka kalsan a nih kha.



Mahse, ka tuar thei tawh thlâwt lo a nih kha, thil țha lo tak a lo thleng zui bawk nèn.



"Min hrilh fiah ve tal chu ka phût a ni. Ba ve tlatin i inhre lo em ni?"



Ei tùr chah a rawn thlen avàngin ka kut chu ka la sawn a, chhàn pawh ka chhâng ta rih lo.



Ka ril chu a țâm lĕm lo nain sawi tùr hriat loh chhuanlamah a țha ém a, ka ei lui hrăm a.



"Lo haw leh phawt rawh."



"Ni lo, a theih loh!"



"Engati maw? Min lo ning hle tawh a ni maw?" rilru nat hmel zet hian a ti a.



Ni lo, amah chu ning lo ve.



"Ka ning che ka tih loh chu."



"Chuti si?"



"Ka lo lêt duh tawh lo."



"A chhan ka zâwt che a..."



Nuam lo ti zet hian ka hawi kual a, sawi chhuah hi ka hreh tak zet asin.



"Saw inah sâwn ka lo lêt duh tawh lo."



'I awm khât si' ka tih chuan a eizawnna ber a hnaah a kal a, ka sawisèlsak dâwn tihna a ni a, chu chu ka duh si lo.



"Kan in chu nuam i ti lo em ni? Eng vàng nge? I hlau  em ni?"



Thil a hre thiam lo lutuk chu hrehawm ka ti zâwk.



"Ni lo, i hre thiam lo a ni."



"Sawi fiah rĕng ta che."



"Kan inkawp  rem thei tak tak lo ang."



A chhûngte lak ațanga lâk hran ka duh lo. An fapa, a nu leh pa leh chhûngte chăwmtu tùr a ni a, ka sawi chhuak duh teuh lo.



"Eng nge i lakah hian ka nih? I pasal ka ni lo em ni? Thil zêp nei lo la?"



Chu pawh ni se, a chhûngte lak ațanga lâk hran ka duh lo.



"Ka chhuah dâwn lai khân ka rawn call che a, ka call i chhâng thei lo va," rilru na deuh chuan ka ti ve ta a.



"Nia, ina ka hawa i lo awm loh khân ka phone ka en a, min rawn call a ni tih ka hre ve ta chauh a."



"I buai thei ém a ni."



"I tân vek a ni ka buai ni."



"Mahse, ka tân hun i neih ve țhin chu ka duh tho asin."



"Chu vàng chuan em ni min chhuahsan?"



"Ni lo..."



Ka kut chu a rawn chelh leh a, zàmna avànga ka kut vawt thlar chu a kut lum ham ham chuan a rawn tilum ham ham mai.



"Zualbawih, sawi tawp rawh."



"Ințhen hi a țha zãwk."



"Kei chuan ka duh lo."



"I duh lohna ringawt khân thil a siam țha thei lo, inah i awm tlêm a, ka ngai țhìn che a..."



"I tân vek ka thawk ka tih chu."



"Thawk vak lovin ka bula awm tam ve tùrin ka duh che, kan pahnihin hun kan nei khât lutuk."



Ngun deuha min enin," Ka hna chawlhsan tùrin min duh tihna em ni?" a ti ta sup a.



"Ni lo, chutiangin ka sawi lo."



"Chiang deuhin sawi ta che." Ka pehhêl rei a ti a niang, a dawhtheihna a pan hmel ta riau.



"Nubawihi ka kalsan thei tawh lo, kei bâk neih a nei si lo va."



"I nu chungah eng thil nge thleng a?"


"A awm tawh lo," ka ti sap a.



"Oh! A ni maw, ka tihpalh lutuk!"



Ka kut chu a chûl hliau hliau a, a mitmengah chuan min khawngaihna chiang takin a lang thei a.



"Thil thleng kan dan theih loh a ni a, kan chungah a thleng ve a ni mai. Nubawihi hi ka neihchhun leh a innghahna ka ni tawh a, ka kalsan thei tawh lo a ni."



"A pawi ka ti tak zet zet a ni."



"Thil thlêng kan dan theih loh ka tih tawh kha."



"Nubawihi chu kan enkawl thei reng alawm."



"Ni lo ve, ka enkawl tùr a nia, ka enkawl ve thei tawh bawk."



"I lo haw ang tiraw?"



"Nunsang, ka rilru tibuai suh, lo haw thei dinhmunah ka din tawh loh hi."



"I nau chu kan enkawl thei ang ka tih chu."



"Ka duh lo!"



Makti zet hian min en a, ka duh aiin ka țawng ring hret a ni.



"Min ring lo hle mai."



"Hlim lo tùra rawn lêt leh ka duh tawh lo."



Ka sawi chhuak ta hrăwk e.




*DÂWT SAWI HMANG CHUAN THU DIK PAWH SAWI SE, MIIN AN RING TAWH NGAI LO*


☆GOLD DIGGER☆ - 3 By Dingdi Pachuau




Ngun zet hian min en a," Kan awm dun chhûng khân i hlim ve miah lo maw?!" a ti ta nghut a.



"Ka hlim lo, ka hlim hlawl lo. Pasal nei angah pawh ka inngai lo."



"Ka hlim teh lul nèn! Nang ka neih che khân engkim neiah ka lo inngai asin. Chutiang rilru pu ve tùrah chuan ka lo ngai che a."



"A tìrah chuan hlim e, a hnu lamah erawh..." ka sawi zawm duh bîk lo, kan inkâr buaina hi chhûngkaw nghawr dat thil a nih vàngin sawi chhuaktu nih ka duh bîk lo; mahse, ka hlim mawlh si lo a ni, khatiang nun neih leh kha ka peih tawh lo.



Min en rùn reng a, inmelha bo theih chu ni se ka bona a rei tawh ngawt ang chu.



A phone a rawn ri a, phun sup chung chuan a phawrh chhuak a, a hmet neuh neuh a, a ak bo leh ta mai a.



"I buaizia ka hria, eng thil mah kan sawi chhuakin ka ring lo bawk, haw tawh mai rawh," ka ti ta ringawt a.



A buai thei asin, doctor thiam tak a ni a, ni tin inentîr tum an awm hmur reng thìn tih ka hria. Hei vàng tak hian in lamah hun a hmang tlêm ém ém a, a hna sawisèlsak ka duh loh vàng hian ka tuar hrâm hrâm țhìn rĕng. Ka bula hun hmang tam a, a bula hun hman tam pawh duh mah ila a theih loh, in lama thil thleng hi eng mah a hre ngai lo rĕng a ni.



"Kan inkâr hi a țhat ka la ring fan a ni."



"Khawvêla mi zawng zawng hian an  duh leh hmangaihte hi an nei vek kher lo a nia. Tunah phei chuan nau min rinchhan tlattu, enkawl tùr ka nei tawh a, a hma ang ngawt khân thil a awlsam lo bawk."



"Kan enkawl mai dâwn alawm."



Ni lul lo ve, buaina thlen tamtu ni tùrin ka nau hi ka phal thei ngai lo ang.



Za lo zet hian ka nui a,"Ka pasal chàwm tùra ka nau, ka pasalte ina hruai luh ka duh thei ngai hek lo ang."



"Zualbawih, i hre thiam lo a nih kha. Rawn hruai lût tùrin ka ti lo che, chàwm erawh ka inhuam a ni," a lo ti thung a.



"Ni lo ve, ka chăwm ve thei alawm, a u ka dam chhûng chuan a duh leh a  mamawh chu  ka tihsak ang."



Kan inbiakna chuan rah țha a chhuah lovin ka hria, keima lam ațang phei chuan hnialna hlîr a ni; ani erawh chu a țawng tam vak lo nain awm dun leh theih dàn tùr mawlh a ngaihtuah niin ka hria.



A phone bawk chu a rawn ri leh ta. Hm, ka hre thiam, a  hna ațangin ka ko pêng rei ta mah mah a ni, kan sawi fel chuang lo ang, a duh dàn ka hnial zel bawk si.



A hnathawhna lam a nih ka ring. Kan inhmuh dun lai pawhin a phone a silent duh loh dànah, a pawimawh a niang. Nia, a hna hi a pawimawh ém a, mi nunna a kutah a awm tih theih hial  a ni si a.



"Clinic ațangin a nia."



"Kal tawh rawh, phone a awm alawm, inhmuh kher pawh a ngai tawh lo, hun a hek mai mai. Damlo tam takin an mamawh che a, an lo nghâk țhap àwm si che a."



"Hmun hla tak tak ațangin an rawn kal ve țâwk țawk thìn  si a, an khawngaihthlâk thei ém a ni," a nghâwng tuai nauh nauh chung chuan a ti a.



"A dik alawm; mahse, thawh chintâwk hria la, i inenkawl uluk a ngai ve tho a nia."



A hna hi a hahthlâk viau ang. Zîngah a chhuak a, zànah a rawn haw a, a châng phei chuan zàn dâr 9 pelh hnuah in a rawn thleng chauh țhìn. Hei vàng hian ka sawisêl ngam lo hrim hrim, kei inah ka lo awm a. Nupui țha tak nih ka tum ve tho, hna nei lo ni mah ila ka pasal, min châwmtu tùrin hna țha leh zahawm tak a nei a, min châwm hneh lutuk tih ka hria; mahse, ka ngaih ang ngawtin thil a kal bîk lo.



"Zai ngai an awm a, pakhat bp sâng a nia, a bp a sàn avàngin kan zai thei lo va. Pakhat ve thung chu a hniam leh lutuk a, kan zai ngam lo va."



"A nih tak chu, tunah an zai thei tawh tihna em ni?"



"Aw, bp hniam zâwk kha a normal tawh a, zai thuai a ngai a. Chuan, kan inhmu leh ang tiraw? Engtikah nge kan inhmuh leh theih ang?"



A clinic-ah mi zai ngai a nei a, kei a nupui 'hlui' lah min kalsan a hreh bawk si, ka thil sawi fiahin a lung a la thlu si lo, a rilru chu a buai ve khawpin ka ring.



"Ka hre rih lo le, phone a awm alawm. Hmaichhana inhmuh kher a ngai chuang lo, i buai si."



A buai ém avàng hian a ni kan inkâr hi a fel theih loh. Tlang tak leh pawh taka sawipui ka tum țhìn, hun a nei thei thlâwt si lo a ni. A hnaah hlîr a rilru a pe a, kei lahin ka tân hun nei ve tùrin leh titipui ka duh a, chutiang ti tùr chuan ina a lo haw thin khân a chau lutuk tawh țhìn a ni.



Kan inkâr hi ka sawi chhuak a nih ngat chuan a rilru ka tina ngei ang, chu chuan a hna lam thlengin effect a neih ka hlau a ni. A hna thawh hi a ropuiin a zahawm si a, a pawimawh ém ém bawk si. Chuta kârah kei a nupui, engmah thawh pawh nei lo kha ka lo indah pawimawh lutuk deuh pawh a ni maithei; mahse, hlim kha ka duh si a ni. Tu nge hlim duh lo awm ang le?



Tlaia in ka thlen chuan Nubawihite chu an lo awm daih tawh a, Nunsanga nèn kan inhmuh hnu khân kein ka kal kual a, a hnuah Rickshaw lain Nunsangate vêng lamah ka tlàntîr a, ka kual vel mai mai. Ina hma deuh taka haw kha ka peih lo a ni.



Nubawihi chuan," Kenny-a kha kan hmu a," min hmuh veleh chuan a lo ti var a, a nui var var bawk a.



A kianga chair-a țhut ve pah chuan," A ni maw? In in thlenna a rei tawh em?" ka ti ve zat a.



"Rei ve deuh tawh tho. En teh, Bàbî, Kenny-a kha a fel ka ti tawp. Pitei nèna dàwr kan luhnaah a lo awm ve a, min lo hre chat maw le."



"Um, a fel alawm."



"Khatiang kha alawm pasalah chuan neih zâwk tùr le, a fel si a, in ințhen miah lo tùr a nia," ka beng bul tĕah chuan a rawn ti sar sar a.



Ka nui hak ringawt. A ti àwm ang lo lutuk a, Kenny-ate zawngin hmeichhe en pawhin min en tawp nâng, a thuhrimah, an hausa lutuk. Hausa deuh chu pasal atân pawh ka duh tawh rĕng rĕng lo, mahni zàwlpui a țha ber, buaina a awm lo ber ang.



Eirawng kan bâwl a, Pitei pawh a țawng bawrh bawrh mai. Pasal ka neih lai khân Lungleiah an la awm lo va, pasal ka nei tih chu an hre ve tho, ka chhuahsan tih erawh an hre kher lo maithei. Min zâwt lo va, ka hrilh bîk bawk hek lo.



Zanriah kîl laiin Putea chuan," Bàbî, pasal kha i neiin ka hria a, in ințhen tawh tihna a ni maw? Sawi nuam lo a nih ka ring tho nain ka zâwt duh che a," a ti ta nge nge a.



"Aw, ka chhuahsan a ni mah."



"Engtizia nge ni? Doctor a ni tiraw?"



"Aw, ni e. A, Pathian ruat kan ni lo a niang." Sawi kual duah ka duh lo, hrehawm tuar thei lo, pasal hnathawh hre thiam duh lo anga min ngaih loh ka duh.



"A nih tak chu. Ințhen mai mai hi chu a țha lo asin; mahse, hetiang a nih si chuan mi dang țha tak i la tawng mai ang tiraw? Pathian kutah engkim nghat ila, a țha vek mai."



Pitei chuan," Tu doctor ber hi nge ?" a lo ti vat a.



"Dr. Nunsanga, lung lam doctor hi maw le," nuam lo ti zet hian ka ti sap a.



"Aw, a ni maw? A thiamzia leh a inpêk zawhzia hi an sawi fo asin. Han innei rem leh hlauh ula aw..."



Ka nui sak ringawt. Nia, ka nun dàn min hriatpui lote chuan inrem leh tùrin min duh viau ang, khatiang nun kha ka hmachhawn peih tawh hlawl lo.



Zànah Putea'n TV a en a, Nubawihi'n a enpui a. Kei erawh chuan  Pitei vaihlo  ka zialpui a, ka zial thiam lo hle a, ka thiam lo lutuk chu min zirtîr pah a ni ber.



"I putea hian vaihlo zial hi a duh hleuh hleuh teh a nia. Cigarette hi a ngaina lo hlauh a, a zia zâwk. Ka chhûngte thingtlâng lama mite ka chah thei a, hrisĕl lo viau mah se, hêng laia an zawrh ai chuan zia ka la ti deuh zâwk a," a ti sarh sarh a.



"Nia tiraw? Eng eng emaw hi an pawlh țhìn an tia, a rù duh bîk an tiin ka hria, a rù hi a tui deuh bîk a niang," nui chung hian ka ti a. Ka vaihlo zial chu ka pawt phelh a, ka zial țha leh a.



"En teh, Pite, i zial ang khân a intiat pât ve thei miah lo, hei, a rawn păwng țek țek bîk a nia," tiin ka zial țhat leh chu ka hmuh a.



A nui kar kar a," Thiam loh chuan a ni duh alawm, ka zial țantirha ka tih dan chiah a nih kha. Zial zial la, a dik mai ang," a ti a.



Mutnaah Kenny-a'n min rawn call teh tlat a!



"Vawiinah Țhiana nèn in inhmu a," a rawn ti nghal tâwng a.



"Aw, min hmuh thu i hrilh a ni maw?" tiin ka chhuahchhàl thung a.



"Ka hrilh lo. Chuan, eng nge chanchin?"



"Eng vak nge ni ang?"



"I hrilh fiah ta em?"



"I țhianpa hi mi buai a nih hi i hre reng alawm."



A ngawi ta dat a; mahse, a rei lo khawp mai.



"I hrilh em?"



"Hrilh nual; mahse, ka hrilh vek lo."



"Zêp nei lovin min hrilh la?"



"A ril ém mai."



A thaw hawk ri chu ka hria. Mi hrilh hriat vak hi ka duh lo, ka nau pawh ka la hrilh lo a nia, Nunsanga pawh ka hrilh hreh a, ka la pehhêl hrâm hrâm a nih hi.



"Um, i rilrua a thawh hunah min la  hrilh dáwn nia."



Ka nui sak a, he pa hi chu a sawi hi a dik thei a nia. Chimawm taka awm thiam viau mah se, mi a nawr lui ngai lo va, a țhianpa tân hi chuan a țang ve thei teh a nia.



Vawiinah kan inhmu a, min rawn text emaw min rawn call emaw ka rin tehlul nèn, min rawn call pek lo. Min text hek lo, ka number a nei reng tawh sia, dik tak chuan min ngaihsak thlâwt lo a ni. Chau viau pawh ni se ka phût ru ve tho asin le.



"Bàbî, engati nge i pasal kha i rawn chhuahsan daih a?"



Hm, ka zêp thei tawh lo ang, ka hrilh a hun ve tawh a ni.



"Nubawih, college ka chhuak hlim hlawta pasal nei kha ka ni a, hna ka nei lo va, ka pasalte kha an hausa a, keini ang mi rethei chuan kan phû lo ém a ni."



Ka lam hawia rawn inherin," U, an hmusit țhìn che em ni?" a rawn ti ta chat mai, ka nau hi chu kei ai chuan a fing chiang.



"Nunsanga chuan hmusit lo ve; mahse, ani chu inah a awm hman lo va, zànah hian a rawn haw hman țâwk a ni si a. A nu leh a farnuin min hmuhsit țhìn pawh hi a hre ve lo. Hna ka nei bawk si lo va, hrehawm ka ti ngawih ngawih țhìn asin."



Kan ngawi vang vang a, a hnu deuhah chuan," U Nunsanga chu i hrilh lo em ni? Hrilh tùr alawm," a ti leh ringawt a.



"Hrilh chu ka tum ve țhìn; mahse, hun a awm thei lo. A buai ém ém reng a, a lo hawin a chau thei bawk si a, thil làwmawm lo lam lo hrilh kha ka huphurh ém a ni. Tuar hrâm hrâm kha ka tum ve a; mahse, ka nu accident thu min rawn hrilh khân ka tumna kha a bo ta vek a ni."



Min rawn kuah a, tunah tak hi chuan ka nau hi ka u ni àwm tak a ni zâwk.



"A nih tak chu. Bàbî, i tawrh chu ka hre thiam ve deuh uar mai. Kei lahin i thil tawn leh i rilru hre miah lovin mangangin  ka rawn phone bawk si che a, i rilru buai dan tùr ka hre thiam ta uar uar mai," tiin ka hnung chu a bêng thep thep a.



"I pasal rawn kal ve miah lo leh a hnêna i haw ta miah lo kha mak ka lo ti țhìn a, tunah ka hre thiam ve ta chiah e. U, ka dem miah lo che, nu pawh khân hre ve mah se, a dem miah lo ang che," a ti leh sap sap a.



"Tu bulah mah ka la sawi lo va, nang erawh chu ka nau i ni a, hrilh hriat che hi ka ba bawk a ni. Dik tak chuan, Nunsanga hi ka hmangaih a, ka pasal a ni bawk a, chhuahsan kha ka duh bîk lo; mahse, a harsa ve ém a ni. Ka nuin a hre hman lo kha ka lâwm viau a ni, a rilru a na dâwn si a."



"U Nunsanga  chu hrilh la chuan, a dang ngei ngei ang tiraw?"



"Nubawih, a buai thei lutuk a ni. A hna sawisèlsak ka duh lo va, a rilru tihnualtu nih ka duh lo a ni."



Nubawihi muthilh hnu pawh chuan ka muhìl ve thei lo va, ka meng kar reng mai. Hun kal tawh ka ngaihtuah lêt a, ka suangtuahnaah chuan ka chêng vang vang a.



*******



Birthday party ka kal zànah khân Nunsanga'n ka number min dîl a, a tûk ațangin min rawn text nghal. Morning wish min rawn send phawt a, nuam duh tak a ni.



Sasangite inah tûkțhuan ka ei a, thlèng ka sil laiin Kenny-a leh Nunsanga an rawn lang hlawl mai. Kei lah ka lo lài sa ém ém ringawt, a nuam si, a hrehawm bawk si.



Kenny-a chu ka hriat sa a nih vàngin  ka zah hran lo. Sasangi a fel a, a lo be bawrh bawrh. Nizàn lamah an inhmu ve tawh tho bawk a, a zia khawp mai.



Kan vêngah haw deuh nghâl mai ka tum avàngin vawiin lamah ticket la cut ang chu ka ti a, hostel-a ka thawmhnaw chu taxi lain ka han phur mai ang chu ka ti a, chu chu Sasangi chuan a lo sawi lar lar a.



An bula ka țhut chuan Nunsanga chuan," Chu, naktûk lamah haw nghâl i tum elo?" a lo ti vat a.



"Tum deuh mai, tih tùr ka nei tawh si lo va," tiin ka chhâng ringawt a.



"Haw rih suh, naktûk chauh tal chu awm rih la?"



"Nia, tlangvâl khân han sâwm teh u."



Sasangi nu leh pa an chhuak a, kan free ta khawp mai. Sasangi leh Nunsanga chu an țawng bawrh bawrh reng a, Kenny-a erawh mi țawng tam lo tih takah, a ngawi deuh reng.



Ticket chu ka cut ta lo. Naktûkah lèn an rawt a, Nunsanga pawh Lunglei lama haw phei tùr a ni a, inthlahna hun hmanho an rawt bawk. Ka châk ve tho sia, ka hnial duh ta bîk lo va, ka nu erawh thil nih dàn chu ka hrilh a.



Niléngin an awm ve ta reng. Nunsanga chuan min en leh reng țhin avàngin nuamti viau mah ila, ka lài leh tlat zel. Țawngkamin sawi rih lo mah se min duh tih ka hria, a mitmengin dâwt a sawi lo tawp ang.



Kenny-a sawi dàn hmangin Nunsanga chu doctor rawn zir chhuak hlawt a ni tih ka hria a, ka ngaisang hle a ni. Chutiangin min han thlahlel ve tlat mai chu nuam ka ti nasa mai, a chhe lo bawk si, khawvêl hi a pâr vul chûkin ka hre mai.



In chunga kan awm laiin min duh thu chu min hrilh ta ngei. A rang thut thut si a, ka ringhlel deuh lek lek mai; mahse, ka ring duh tho bawk si. Ka tân a țha lutuk a, ka ringhlel mai mai zâwk a niang.



*******



"U, engtikah nge kan haw ang?"



"I duh hun hunah, i ning tawh em ni?"



"Ning lo ve; nangmah zâwk hian nuam i tih loh hmel ém a."



Ka nuih sak a," Nuam ti e; mahse, haw hma pawh pawi ka ti miah lo a nia, motor remchâng awm leh se tiraw?" ka ti a.



"Kenny-a kha kan sâwm mai dâwn em niang? Motor țha deuh a nei alawm."



"Hah, a tihchi loh ngawt ang. Ka țhian ni tho mah se, Nunsanga țhianpa a ni ve tho a."



"Mahse, a fel e."



"Mi hausa tupa a nih kha, hnaih viau loh a țha," ka ti tak nain Kenny-a hi chu a pi leh pute pawh an fel a, a nu pawh a fel ngei ka ring.



"Lunglei mi ve tho a ni em?"



"Ni lo, Aizawlah ka hmu țhìn, college ka kal laia kan hostel neitute tupa a nia, Aizawl mi ni tùrah ka ngai."



"Engati nge Lungleiah a awm si?"



Ka hre miah lo.



"Ka hre mang miah lo nia. Hnathawh a nei a niang."



Chhùn thingpui in hma deuh hlekin Nunsanga'n min rawn text ve teh mial!



*Ka clinic-ah lo lêng ula?*



Teh hlawl chuan. Vawi hnih  chu kan inneih hnu khân ka kal ve, a nu khân ka chhuah ve țhin kha a phal tlat lo va, in lamah min chhawr a duh vàngin  ka kal dâwn apiangin chhuanlam a siam ziah țhìn.



*Kan hnawk ang* ka ti deuh tlat.



*Lunch laiin kan inbiain kan inhmu  thei dâwn asin*



Mi buai a nia, a buai thei si a, ka hmuh tam poh leh ka rilru a tinêm ang tih ka hlau zâwk e a.



*Tak tak chuan, kan hman lo va, hei Puteate kan pui a* tiin ka reply ve zaih a.



*A nih tak chu, hmuh che ka châk tehlul nèn*



Kei pawhin ka châk ve tho asin. Kan inkâr hi buai viau mah se, ka duh leh ka hmangaih ka pasal kha a ni miau a.



Nubawihi chu chhuahpuiah ka sâwm a, ka text-naah kha chuan chhuanlam siam  mah ila a clinic-a va țhàwn a châkawm ka ti tlat. Rickshaw-in a clinic awmna lam pan chuan kan tlân ta vang vang a.



A clinic opposite chiaha restaurant changkâng ve deuhah chuan kan lût rih a, chhùn chawlh a hun tawh vàngin Nubawihi chu ka chawlhpui rih a ni.



Ka țhutna ațang chuan a clinic a lan chian ém aváng chuan ka thlîr reng a, mi 20 chuang inentîr tum an lo la țhu a, engtikah tak lunch ei tùrin rawn chhuak thei tak ang maw?



Ka thlìr reng lai chuan nula lian lam deuh, sam sen deuh thar mai, chhiat loh hmel zet hi doctor coat vâr hain a rawn chhuak a, a sîr zâwnga hmu ka nih vang chuan tu nge tih ka hre thei lawk lo, a chhe lo ngawt ang chu.




Chutah, a hma zâwngin ka hmuh theih tùra a rawn inher chiah chuan ka fork ken lai ka thlauh chiang kher mai, ka khawng vekin ka hria!!!



*THINLUNG NATNA HLIAH BOTÎR TÙRIN MIHRING DAM CHHÛNG HI A REI LO LUTUK. CHUVÀNGIN, I THINLUNG NATNA SAWI CHHUAK HREH SUH*



☆GOLD DIGGER☆ - 4 By Dingdi Pachuau



Nubawihi chuan," Bàbî?!!" a ti vat a, kei chuan lu thing nawk nawk chung hian," Ni lo, Lalpa, nihtîr lul suh!" ka ti sap sap thung a.



"Eng thil nge ni?!!"



"Nubawih, ei thuai thuai zâwk teh!"



Makti zet hian min en a, kei erawh chuan ka hmêlah ka thil ngaihtuah tihlan loh hrâm hrâm ka tum thung a.



A ei zawh chuan ka chhuahpui dàwr dáwr. Thil tisual ang hrimin, hawi pawh ka hawi chhuak lo. He ka thil ngaihtuah hi thu dik a nih loh hrâm ka beisei, a nih teh hlauh chuan...



Nunsanga chu surprise ka tum tehlul nèn, keimah zâwk surprise-in ka awm a nih hi. Makti ém ém tùr ka ni em ni le? Lo ring daih tawh tùr ka ni zâwk asin le.



"U, eng thil nge?" Rickshaw-a kan chuan hnu chuan a ti a.



"Hmuh ka duh loh ka hmu a ni."



"Ramhuai maw?" A nui sâng a.



Nui ve var var hian,"Aw, ramhuai ke pahnih nei a nia," tiin ka chhâng a.



In kan thlen chuan a la tlai lo khawp mai, motor remchâng awm se, haw daih ka va châk tak! Țhiante nén hlim taka nuih leh băwk băwk ka châk tawh, engkim theihnghilh ka duh.



"Ka'n inbual ang e aw, ka inbual zawh chuan eirawng bàwl a hun mai ang," ka ti a, Nubawihi chuan a phone-ah games a lo khèl thung a.



Inbual pahin zâi ka ngaithla a, ka lo zàwm ve rât rât a, he hla hi chu ka duh chiang a nia.



#I was made for loving you

Even though we may be hopeless hearts just passing through

Every bone screaming I don't know what we should do

All I know is Darling I was made for loving you



Please don't go

I've been waiting so long

You don't even know me at all

I was made for loving you...



Bathroom ațanga ka chhuah chuan sitting room-ah chuan Kenny-a leh Nubawihi chu an lo țhu a, games an lo khèl leh tawh a ni maithei. Thawmhnaw ka inhâk sa vek tawh avàng chuan ka lâwm kher mai.



"I lo kal elo? Engtin nge kan awmna i hriat a?"



"Sava tĕ tak tĕin min hrilh a."



Ka awih lo lutuk chuan ka  hmui chu ka tihpawrh khum a, a nui suk duh chauh.



Room-ah lûta lotion ka inhnawih zawh hnu chuan ka lu chu hrûkpuan chuan ka tuam a, ka chhuak leh ta a.



Current thukah chuan tui ka chhuang a, Kenny-a in tùr thingpui gas-ah ka chhuang nghâl bawk a.



"U, i inbual zo tawh bawk a, ka'n inbual ve tawh ang e."



A luh hnu chuan Kenny-a chu thingpui ka siam a, Alu kan tùrin ka buatsaih nghal a.



"I țhian nih ka tlin loh ém avàngin min ngaidam rawh."



Ka bulah dining chair-ah a țhu a, keiin Alu ka buatsaih thung. Ka en vat a, ngun zet hian min lo en a.



"Eng nge a awmzia? Țhian fel tak i ni alawm."



"I nu chunga thil thleng kha ka lo hre lo va, a pawi ka ti tak zet a ni."



"I hriat tlat loh te chuan. Bâkah, tu mah ka hrilh lo a ni, ka phone a bo bawk nèn, inthiam lo mah ta che." Tuin nge hrilh le? E, Nunsanga a ni lo thei nâng, nimin khân ka hrilh tak kha maw le.



"Thil thleng min hrilh duh em?"



He pa hi chu aw... hrilh duh loh theih pawh a ni țhìn lo, a dîlchhût thei si.



"Ih, motor-in a sû a, a hliam kha a nat ém avàngin an khawih sawn ngam lawk lo va, damdawi in an panpuina kawngah a thi ta a..."



Ngun deuha min en tlat avàngin ka en țha duh vak lo va, ka inthiam lo pah ve deuh bawk nèn.



"Chu chu i nauin Lungleia i awm laiin a rawn hrilh che a, Țhiana pawh i hrilh ve lo em ni?"



"Ka hamhaih zo vek. Ka call ve bawk a, min chhâng thei si lo va. Ka insiam chûk chûk a, thlen hma theihna ber tùr scooty khân ka tlăn chhuak ta ringawt alawm."



"Kei tal min rawn call la.."



"Ka hamhaih vek ka tih kha. Nangte chu Aizâwlah i awm daih lo em ni?"



"Aw, awm tho e; mahse, buaina i tawhte chuan, Țhiana ai ka lo awh mai dâwn alawm."



A țhianpa tân hi chuan thih pawh a huamin ka ring!



"I țhianpa hian a clinic-ah tu nge a chhawr i hria em?" tiin chhuahchhàl titih deuh hian ka zâwt a.



"Doctor thiam tak a ni ve tho a, an thawk dùn mai alawm." A la țan ve hle mai, ka rilru a a hre lo hle a ni.



"A bialnu hlui a nih hi, bialnu hlui mai pawh ni lo..sawi lo mai ang, engtin nge thawhpui atân pawh a sàwm ngam le?" ka ti tàn tán a.



"Bialnu hlui mai mai alawm, a nupui i ni tawh a, hmeichhe dang chu eng atân mah a ti lo," tiin a țhianpa chu a la țan ve țàng țáng a.



"A lo nih tak chu!"



"I inhmeh lo a nia."



"Inhmeh. Ka rilrua thil țha lo lam ngaihtuah hi ka inhmeh!"



Nubawihi a rawn chhuak a, kei pawhin kanbêl chhuang sâin têl ka leih nghâl a.



Nubawihi room-a a luh hnu chuan," Lâna chuan hmeichhe dang a melh ngai tawh lo tak tak, nupui a nei tawh che a, a mamawh tawh hlei nem. Bâkah, Linda-i a thawhpui hian an lùn a, doctor thiam tak ve ve chu mi pawhin an duh bîk alawm," a ti duah a.



"A țha, thawk dùn rawh se, engah mah ka ngai lo."



"I rilru i tilang vek alawm le, i thîk chiang."



"Tu mah ka thîk lo, ka nun ata hi kal bo vek rawh u, ka mamawh lo che u!"



Alu chu ka kang a, ka chawk sawk sawk mai. Ka chêt dàn chu a naupang chhia tih ka hre reng; mahse, ka lo up rei ve tawh ém asin, Nunsanga nu leh farnu bulah khân ți dêk leh inthlahrung rĕng rĕngin ka awm a, ngawi rengin rilru na takin ka lo awm rei tawh, ka peih tawh lo.



"Alu kha i chawk pèr vek ang e!"



Amah chawp chawp hian ka chawk pèr vek dâwn zâwk em ni le. Ka hawlh sawk sawk mai ang.



*******



Kan țhianho chuan kan vêng ka haw hma nî chuan kan lêng a, Kenny-a'n car a khalh a, Sasangi a hmaah a chuang a, Nunsanga nèn a hnungah kan chuang thung.



Nilêngin kan inzui a, Nunsanga chuan ka kut a chelh reng a, țûl tak lovah chuan a thlah hauh lo. Kan bula mi an awm pawhin min thlah chuang lo va, a zak ve hek lo. Hmun hrang hrangah kan kal a, picnic spot, park an ti, kan kal kual nasa kher asin.



Zanriah chu hotel-ah kan ei a, a hnuah Kenny-ate hotel a ni tih ka hre ve chauh. A nuam tawp, an thil siam a tui si, ka puar lutuk.



Zanriah ei khamah hotel chung zâwlah chhovin pangpâr chi hrang hrang an khàwi chu kan en a, Sasangi leh Kenny-a chu ei tùr lei tùrin an chhuk leh rih a, kan pahnih tân chuan golden chance a ni ringawt.



Kan inhriatna a la rei lo; mahse, a tu ve ve pawh chu kan inzah țêt tawh lo va, min duh thu leh țha min tih thu a sawi pawhin ka lài țût tawh lo. Kan inkuah a, kan infâwp a, hei chu inngaizawngte tih țhin a ni.



"In khuaa ka rawn lang ve hrăwk a nih pawhin mak min lo ti vak suh ang che."



Ka nui a," Lo kal i tum ve tih min hrilh miah suh," ka lo ti thung a.



"Nang hmu lova awm chu ka thei rei hauh lo ang."



"I haw phei ve dâwn tho kha."



"Nia, in ka tlawh lawk ang, ka tlawh loh chuan chhûngte ngaih dàn a ni lo palh ang."



Kan in awmna, vêng hming min zâwt chîk nasa. Ka nuih a tiza zâwk, a lo kal peih àwm tawp si lo va; mahse, țha takin chiang takin ka hrilh vek tho.



Awm dùn rei mah ila, kan inning chuang lo, kan inthlahlel telh telhin ka hre zâwk. Dâr 9:30-ah kan haw a, in thleng min thlah leh thlap.



Hostel-a ka bungrua chu zîngah kan han la a, chaw ei khamah sumo chu kan lo châng. Driver nèn kan inbia a, ka hmel hriat a nih vàngin ka lo chánna tùr ka hrilh vek a, Sasangi leh Nunsanga'n min chànpui a, ka kal hma zawng ka kutah min chelhsak tlat. He pa min thlâkhlelh dàn ém ém hi chu, a mak ka ti. Bialnu a nei ngai lo nge ni ang a, min duh ve viau zâwk?



Sumo-a kan tlân ta vung vung mai chu, ka khua a harin ka lung a lêng khawp mai. Mipa, ni khat vêl chauh ka hriat laka ka rilru ka pe viau mai hi mak ka inti, ka lung a lèn khàt nèn.



Nunsanga pawh Kenny-a nèn Lungleiah an phei a, min rawn call sek; mahse, ka ning miah lo. Ka bula țhute lakah ka inthlahrung zâwk, a hnu lamah chuan voice message a rawn ti leh, ear-phone ka vuah a, ka ngaithla char char mai.



Ka lunglèn belhchhah tùrin Nubawihi lah a lo zin bo daih a, khua a har zual. Kan vêngah ni thum chauh ka la awm tihah zan khat chu Kenny-a nèn bawk an rawn lang hlawl mai! Ka inkhâwm loh zàn a ni hlauh a, ka hmu thut chu mak ka ti kher asin.



Heta țang hian ka ngaih ang tho hian min ngai vein min thlahlel tak tak a nih ka ring ta a, ka ngaih pawh a țha sawt.



Ka nu pawhin a ngaina ve hle a, fel pawh a ti. Doctor zir chhuak a ni tih a hriat phei chuan a ngaisang zual a, natna hrang hrang a neihte chu hrilhin a damdawi tùr a zâwt a, ka nuih an tiza zâwk.



Kan inhriat ațanga thla 3 hnuah palai rawn tîrin thla 1 hnuah kan innei. Kan induhtawn ém avàng leh kan inthlâkhlelh ém  avàngin rei nghah kan duh lo va, innei thuai kan ni rĕng a ni. Mi min sawi dàn ka hre țeuh, engah mah ka ngai duh lo, a țangkai lo e.



"A râi lâwk a niang."



"Doctor a nia, a tân chuan a țha e."



"Gold digger dik tak a ni!"



"A phû lo e, an ințhen thuaiin ka ring."


"An dinhmun a inthlau e."



Ka ngawi reng tawp. Ka ngawih avàngin an mi sawina hre lo ka ni bîk lo; chhâng lêt tùrin ka thâ leh zung leh hun hlû ka khawh ral phal lo va, chu aia pawimawh tih tùr ka ngah lutuk a ni.



Doctor a zir laiin a pa a boral a, kan inneih hnu lawkah clinic hawngin chhûngkaw châwmtu a ni chho nghâl a. Mi rethei an ni lo bawk a, an chhûngkua hi làr pawh an lo lâr riau a nih hi.



A tìrah chuan kan hlim khawp mai. Thla hnih hnu vêl ațangin a nu zia a rawn lang țan a, a farnu pasal nei tawh a rawn lang zut bawk. Inah Nunsanga a awm tam lo bawk nèn, chhiahhlawh dik tak ka ni.



Min en hniamin min hmusit ka ti mai. A tìr lamah chuan ka hre thiam lawk lo va, bâkah, an hausa a, an awm dàn ve rĕng ni tùrah ka ngai a; mahse, an țhiante, mi dang lo lêngte laka min sawi rûk ka hriat ațangin  ka rilru ka dang ta daih.



Ka nu chuan tih tùr min hrilh reng a, hei hi chu ka tih tùr rěnga ka ngaih sa avàngin ka ngai haw lo, ka tih tùr dik tak a ni; mahse, a țhiante bula min biak dàn leh min nuih dàn chu nuih dàn țha a ni lo tih ka hria, duh 'nuih' ni lovin 'nuihzat' ka ni tlat a ni.



Kan inneih ațangin ni 100-na chiah a ni. Chhùnah Nunsanga farnu Nunpuii a lo lêng a, a fa kum 5 mi a rawn hruai leh bawk. A fapa Romeo hi ka làwm hle a, a hmel a țha reuh a; mahse, a harh mah mah a ni.



Ka nu nèn chuan an țhu dùn a, an thil lei thar an sawi dùn a, kei erawh hmun tifaiin chhuat ka nâwt a. Romeo chuan min nèl tawh avàngin ka bulah a lo kal ve zêl a, ka chhaih pah a, a nui ar ar a.



Ka en loh lai takin Romeo chu a lo tlu palh a, a țap ta vak vak mai. Room chhûnga kan awm lai tak a ni bawk sia, nuam lo ka ti kher mai.



Ka nu leh Nunpuii chu an rawn tlân lût nghal a, a hmui a sawh a, a ka chhûng chu a thî deuh bawk nèn, ka hlauthâwng lutuk ringawt.



Nunpuii chuan Romeo chu pawmin," Engtizia nge?" a ti nghâl a, ka hlauthâwng lutuk aw chu a khùr vek. "Ka en loh lai takin a lo tlu palh a," ka ti khùr dar dar a.



Ka nu chuan," En ve ta che, keini pawhin in tifel pahin nau kan awm țhìn alawm, tûnlai mi hi chu in mak tawh lutuk a," a ti nghal ringawt a.



Romeo lah chu a țap uar bawk sia, hrehawm ka ti tak zet. A insawh nat lutuk loh hrâm ka beisei.



"Naupang pakhat pawh i vêng hneh lo a nia, hetiang chuan nu nih pawh i tlin nâng." A tidik ka tih rualin naupang chu an intipalh ve fo alawm.



Ka nu nèn chuan an chhuak a, ka rilru a tâwt țún mai. A insawh na viau ang em le? A ha hmai lam kha a sawh chiang mai a, a thlawn ang em? Rilru hrehawm deuh chuan in chu ka tihfel chhunzawm leh ta a.



Ka nu chu a lo haw har lo. A lung a awi lo tih a hmel ațangin a lang chiang hle a, nuam lo ka tihzia chu, pui tak a ni.



"Ka nu, Romeo chu a na viau em?"



"Nâ e, a ha hmai a bung a, pahnih a nghîng bawk," a ti hmuk a, melh pawh min melh peih lo a niang, a hawi sawn deuh hmak a.



"A pawi ka ti tak zet a ni."



"Pawi khawp mai," a ti leh hmuk a.



Zàna Nunsanga lo haw, pangpâr min lo hawnsak pawh chuan min tihlim zo lo. Ka rilru chu a hrehawm ngawih ngawih, min ngainat loh tawh sa  nèn, min ngaina lo zual sauh ngei ang.



Hlim hmel hmuh a khât ta khawp mai, eng emaw hlekah min sawisêl a, mi awm lai chuan min sawisêl dawt lo nain meinei zet hian min țawng khum a, ka inhre thiam vek si a, ka zak cham cham țhìn.



Hmeichhe che zei tak ka ni lo va, mi sawisèl tum ràna ka bula a awm phei chuan ka che khawr zual a, thil ka tisual rem rum ta fo. Chu chu ani chuan remchângah lain min sawisêl a, țawngkam mawi lo leh râpthlâk ka tih deuh a hmang ta fo mai.



Vawi khat choka ka tih fel laiin thlèng a lei thar chu a phawrh a, chhuatah tui ka lo tifar palh nge ni, a tawlh deuh a, thlèng a ken lai chu a thlauh keh ta chuai a.



Ka va pan vat a, thinrim zeta min en khui hian," I chêt țawp vàng a nih kha. Ka tlu sual na lo chauh alawm, fîmkhur ta che," min ti ta tàwn táwn a.



"Ka tihpalh, ka nu. A na viau em?" inthlahrung zet hian ka ti a.



"Mi hausa ina chêt dàn thiam rawh."



A nâ asin, rilru lama natna insiamsak hi thil țha lo tàwp a ni. Ka rilru a nat ém avàng chuan ka ngawi ta reng a, ani erawh a âng hmuar hmuar reng a.



"Mi hnuaihnung lutuk mo atân ka duh loh chhan kha hei vàng hi a nia, mahni zàwlpui neih hi a țha ber. Chêt dàn inang lo lutuk zawng..."



Thlèng keh chu ka chhar khâwm a, ka kut a khurh nasat avàngin a keh lehlam tlâng hriam chuan ka kut a ât lehnghal a.



A keh chu a hmun hnihah a nih vàngin a la chàr țhat theih ka ring a, paih ringawt chuan min àn khum chiam ang tih ka hlau bawk si a.



"Ka nu, ka dah țha dâwn em? A chàr țhat theih ang em?" ka ti dêk dêk a.



"Paih vek rawh. Nge i hàwn duh em ni? Nia, chàr la, i hàwn thei ang."



Chutiang rilru ka put vànga zâwt ka ni hauh lo asin.



"A to asin, in hmu pha lo tawp ang. Chàr la, in inah hàwn rawh."



Heti khawpa inhmuhsitna hi ka la tawng ngai lo, chu pawh ka nu, ka pasala nu hnên ațangin. Na tak a ni. A tawngtu tak tak tân lo chuan a natzia leh zahthlâkzia hi a hriat loh zâwk ngei ang.



*******



Sunday a ni a, Lunglei ațanga kan hàw-na pawh kâr khat zet a ni ta. Nunsanga nèn kan inhmu leh ta lo va, a buaizia ka hria. Phone pawhin min be hman mang lo a nia, ka chènpui lai pawhin zànah kan inbe hman ve deuh chauh a nih kha. Ka hre thiam, a harsa a ni.



Chhùnah țhiante inah ka pêng haw a, chhùn thingpui in zawhah kan in lamah  muangchângin kan inzui chhuak leh a, Nubawihi pawh a țhiante nèn an lo awm a, college kalna tùr an lo sawi nasa mai a.



Ina kan lût chu mi panga lai kan ni sia, an lo zak ve a niang, an lo țhu khâwm sap sap a, țhutna min lo kian hlawm a.



Ka inthlâk a, ka chhuah leh chuan Nubawihite chu choka lamah an lo insawn diak tawh a, puitling deuh hlek tawh kâra awm chu nuam lo an ti ve a niang.



Kawtah bike a rawn rî a, kan in hi a ualau fahran loh avàngin kan thawhpui tu ber emaw a nih ka ring ringawt a.



Kawngka a rawn rì a, lût tùra ka hrilh hnua Nunsanga hmel ka hmuh chuan mak ka ti kher mai! Kan inneih hnua a rawn kal lehna hmasa ber a ni.



* KA NGAWIH RENG AVÀNG HIAN MIN SAWINA LEH RÈLNA KHA KA HRE LO A NI LO, KHATIANG CHHÂNG LÊT TÙR KHÂN KA HUN KA UI A NI ZÂWK*




☆GOLD DIGGER☆ - 5 By Dingdi Pachuau



*******


"Zuali, ka chhuak dâwn a, ka room tukverh khi lo khâr  ang che."



"Aw le, ka nu."



A chhuah hnu chuan ka thaw huai. Dik tak chuan ina a awm loh hian nuam ka ti zâwk, ka che khawr lo va, ka che sâwt zâwk bawk. Min hau se, min zilh se ka duh, ka tisual a nih phawt chuan; mahse, ka thiltih apiang a sawisêl erawh hrehawm ka ti, taksa natna chu a tuar theih mai, rilru natna erawh a ril bîk.



Ka nu lo haw hma ngei chuan a room tukverh chu ka khâr a, ka theih ang angin ka tifel bawk. Min fak ka ring chuang lo; mahse, ka nu a ni a, ina awm ka nih vàngin ina room zawng zawng tihfel chu ka hna a ni.



A lo haw ta ngei a, min be lovin a room-ah a lût chho nghal a. Chokaa ka awm lai chuan a rawn lût leh a.



"Engtin nge i tih theih?!! I tilui a ni maw? Engtin nge i tih dâwn?"



Phone-ah mi a bia emaw ka ti a, ka lo ngaihven vak lo. Ka awmna bul dawhkàn a rawn ben rîk țhuai tâkah chuan ka phu zawk mai!



"Ka thil sawi i bengkhawn lo ngam elo? I nu, i pasal nu ka nih hi, mo ve mai mai hian engah mah min ngai lo maw?! Min runluih ngam hi a mak ka ti. Ka room tukverh dârthlalang khi engtin nge i tih dâwn?"



"Engtin nge a awm, ka nu?" Ka hre miah lo tak tak.



"I tikeh lui a nih ka ring."



Dârthlalang a keh maw? Ka khàr lai kha chuan a keh miah lo. Engtin nge a keh theih le? Kei lo mi dang in awm an awm bawk si lo, mak ka ti.



"A keh tih ka hre miah lo, ka nu. Engtin nge a keh le?"



"Dâwt sawi kher mah ta che."



"Dâwt ka sawi lo, ka nu."



"'Ka nu, ka nu' min ti duam duam suh."



Ka ngawi ta dâk mai. Inthlahrung leh țih dêkin ka ko ve hrâm hrâm a ni a, ka inkiltawih zual sauh. Ka rilru a na bawk si a, ka kun lap.



"Ka tirh țhin che avàng hian min runluih tawh ngai suh, thil pawi zâwk a thleng ang e."



Ka runluih lo asin.



"I phû loh lutuk pasalah i nei a, awm dàn i thiam lo a nih hi."



*******



Nunsanga  ka hmuh veleh chuan," Eng nge i lo tih dâwn?" ka lo ti thuai a, ani chuan min hmuh a duh thu chu a sawi mai a, thil inzawh vak theih a ni rih lo. Ka țhiante chu  ka hmel hriattîr a, ka pasal hlui a ni tih erawh ka sawi tel lo, a țùlna ka hre hek lo. An titi bawrh bawrh a, Nunsanga pawh a intimikhual vak bîk lo.



Eirawng bàwl a lo hun chuan țhiante chu an haw ta sap sap a, veranda thleng ka thlah hlawm a. Zàna inkhâwm leh țheuh tum chuan kan inthlah ta rih a. Nubawihi pawh a țhiante nèn chuan kan in bul theihai buk hnuaiah chuan an țhu dar dar hlawm a.



"Eng nge i lo tih tak tak dâwn?" kan pahniha kan awm hnu chuan ka ti țha leh a.



"Hmuh che ka duh ka tih kha, bâkah, i nu hnênah ngaihdam ka dîl duh a."



"Eng vàngin maw?"



"Ka tihhrehawm tawhna zawng zawngah che ngaihdam ka dîl duh maw le. I nu khân a ngaihtuah hle sî che a."



"Min tihrehawm ka ti em ni?"



"I hlim loh thu i sawi kha."



Um, ka sawi chiang, hlim hek lo i. Khatiang nun kha chu tu tawrh atân mah ka duh lo, a hrehawm ve ém asin.



"Khawiah nge i innghah?" ka ti leh daih a.



"Ka nupui i awm a, khawiah nge innghat se min tih?"



Min tidang dêr. Sawi thui lo teh ang.



"Engtikah nge haw i tum leh ang?"



"I awm dàn azir a niang chu."



"A lum sia, inbual rawh aw," tiin inbualna siamsak tùr chuan ka tho a, ani chuan," Eirawng i bâwl dâwn a ni lo'm ni? Ka lo inbuaipui mai ang," a ti ve tak na a, ka siamsak tho.



A inbual rei lo khawp mai, bathroom ațanga a rawn chhuah chuan," Ka bàl lo va, ka intleuh zawk mai mai a nia," a rawn ti chhuak a, a rawn chhuak hma lutuk chu a inthiam lo ve deuh a ni maithei a ni.



Eirawng chu min bàwlpui a, chawhmeh min chanpui a, min vilpui bawk. Chawhmeh siam a thiam ve hrim hrim em tih ka zawh chuan a thiam lo tih a sawi. Hostel-ah a awm char char a, chawhmeh vawi khat mah a la siam lo tih a sawi pawh chuan ka awih khawp. Fapa mal a nia, an duat dâwn ém asin.



Zanriah kan kîl lai chuan,"Naktûkah em ni ka nu thlànah chuan kan kal ang?" ka ti a.



"Ni thei se."



Nubawihi chuan," Bàbî, kei pawh ka kal ve duh e," a lo ti a, Nunsanga chuan," Kan kal vek dâwn nia, pangpâr kan lei bawk ang a," a ti a.



Ka inkhâwmsan ta lo. A rawn kal ve vang vang si a, inkhâwm tùr chuan min ti tho a; mahse, nuam ka ti lo. Nubawihi a inkhâwm thung a, Biak in kan hlat vak lo va, a zia deuh.



"Min chhuahsan chhan dik tak min hrilh tawh la?" kan pahnih chauha kan awm hnu chuan a ti ta a.



Hrilh ka hreh, hrilh ka duh bawk. Zêp nei map lovin hrilh ta ila, a rilru a nâ ang em? Nâ ang, hrehawm a ti ve dâwn ém asin.



"I hnathawh hi sawisèl ka duh miah lo; mahse, ka tân, kan pahnih tân hun i nei lo lutuk a. Nupa nih chuan hun hman dunte, khawi ilo kal dunte hi a țha ve a, thil pawimawhah keimahin ka kal a, pasal nei ang pawhin ka inhre thei lo a ni," la zêp țhen tho chuan ka ti a.



A ngawi vang vang a, nuam lo ti ru tak chuan ka en zauh zauh a, a hmel put dàn ațang chuan a ngaihtuahna ka hre thei lo.



"I hna hi a ropuiin a zahawm a, mite nunna hial pawh i kutah a awm a ni; mahse, nupui nei i nih chuan i nupui chu i ngaihsak ve tho a ngai a, rilru na thei, lungngaia hlim lo thei mihring ka ni. Ka phût sâng a ni maithei, ka ngaih dàn chuan nupa chu an inngaihsaktawn tùrah ka ngai."



A la ngawi ta fo, a ngaih dàn sawi chhuak ve tal se ka ti.



"E, chuan, scooty kha ka hàwn daih si a, neih daih ka tum miah lo. Ka lei chhâwng mai ang ka tia."



"I tâ a nih kha, i tân ka leisak che."



"Ka hre tho a; mahse-"



"I pasal ka nih hi, pumkhat kan ni a," rilru nat hmel zet hian min en a, chutah," Kei chuan ka țhen lo che, ka țhen ngai lo ang che. Tlin lohna tam tak ka nei ang, i tân pawh hun ka lo inpe tam tâwk lo a ni ngei  ang; mahse, hlim lo taka i awm hi ka duh bîk lo asin."



"Zualbawih, ka ngaihsak tâwk lohnaah che min ngaidam rawh, ka hna ka lo dah pawimawh leh lutuk a ni. A thleng tawh miah lo ang," a ti sup sup a.



Thleng tawh miah lo tùr chuan a bulah, a nupui nia a ina ka chèn leh a ngai dâwn a, chu chu ka huphurh lutuk tawh, ngaihtuah miah loh ka duh asin. A nu leh a farnu kha hrawn ka duh tawh lo, mo sual tak ka ni tihna em ni le?



"Zualbawih, min hmangaih a nih chuan lo lêt leh tawh la, kei chuan țhen che ka duh ngai lo ang tih ka hria; mahse, ka tilui thei lo che a, tihluih che pawh ka tum hek lo."



"Mahse, lo haw tawh hrâm la ka ti, i tel lo chuan kan in hi 'in' a tling zo hlawl lo. A reh ruai a, a țhing țhup maiin ka hria."



A ngaih dàn chu ka hre thiam ruai ruai. Ina a lo hàwnin ka nuin a lo ngaihsak vak si lo ang a, TV-ah seriel Mizo țawnga lehlin a en daih ang. TV-a a duhzâwng a en tawh chuan biak buai ngam a ni lo, thei ei tùr ka va pêk pawhin ka dah tawp zêl.



Ka haw leh dâwn a nih chuan a hmaa kan inah kha chuan ka lût peih tawh lo thlâwt. Ka sawi chhuak a nih chuan in dan ka rawtah a ngai a ngai àwm si a, a nu lak ațanga tihrang chan ka chang dâwn bawk, chu chu ka duh lo. Mi min ngaih dàn tùr pawh a dik lo, kei pawhin ka duh bîk lo.



"Nunsang, thil hi a hma ang khân a tluang purh tawh lo a ni. Kârah thil tam tak a thleng tawh a, Nubawihi hian kei bâk min nei tawh lo va, ka kalsan thei lo ang," chhuanlam ka siam theih ber tùr, thu dik ni bawk chu ka sawi chhuak ta a.



"Zualbawih, chûngte chu chhuanlam a tling hlei nem. Kan enkawl thei dâwn alawm, ka nupui nau chu engtin nge ka thlahthlam theih tehlul ang? Nang bâk a nei tawh lo che tih ka hria, ka thlahthlam lo ang."



Ka chhuanlam ber chu chhuanlam a tling leh ta lo. A va buaithlâk țhìn tak! Mahse, tunah chuan hnathawh  ka nei ve tawh a, a nu pawhin min en hniam thei tawh bîk lo ang. A hma ang ngawt kha a ni tawh bîkin ka ring, lo lût leh ta pawh ni ila. Chuan, ka pasal vàngin ka hna hi bànsan ka duh dâwn lo, eng pawh ka chungah thleng thei a ni. Tûnlaiah hna a vâng tawh si, a chhe ber ka chungah lo thleng ta se...



"A hma anga hlim loh kha ka duh tawh lo!" ka ti ve deuh tlat a.



"Zualbawih, min ring em? Min ring rawh, ka insiam țha ang. Tûn chûk chûkah chuan rawn haw nghâl rawh ka ti pawh a ni lo. Inngaihtuah la; mahse, rei lutuk lo aw. Min ring hrâm rawh," a ti leh zêl a.



Nubawihi râwn ila a țha ang, ani hi ka neihchhun a ni tawh a, a thu ka hnial lo ang.



"Nia, ka lo inngaihtuah ang. Thil mai mai a ni lo va, ngaihtuah tùr tam tak a lo awm tawh nèn, thu tlûkna siam vat a harsa tawh ang. Chuan, ka hna hi bànsan ka duh lo bawk ang."



"Ka lo haw leh ta ngai a nih pawhin min ngaihsak vànga i hna ngaihthah tùrin ka duh lo ang che. I hna chu i hna a nia, i duh a, i hmangaih bawk, ka sawisêl lo; mahse, inah rawn haw hma vein, hunte hmang dùn tamin titi țhìn ila ka duh ang," ka ti deuh duah a.



"Thil harsa a ni nâng!" a lo ti vat a.



Nubawihi inkhâwm bâng a lo lût a, room-ah a lût tlang nghal daih. Kan bula lo țhut ve chu nuam a ti lo chiang sa. Nunsanga hi a la ngaina ve vak lo, Nunsanga lah hian a be chhawnchhaih thiam bawk si lo.



Nunsanga chu ka nu room țhìnah ka muttîr a, eng thil mah a sawi lang lo nain ka bula riah chu a tum rûk ngei ka ring deuh ringawt a, kei lahin ka bula muttîr ka tum dèr lo. Nubawihi nèn kan mu dùn thung ang, chuti lo zawng zanlaiah a lo kal rêu rêu palh ang.



Ka chhuahsan dâwn chuan," Ka ngai tawh che asin le!"a ti zauh a. A sawi awmzia ka hre reng mai; mahse, ka haider lui tlat.



"A hrehawm lutuk loh hrâm ka beisei."



"A nuam lo ang!"



"Tuar rawh."



"Ka chantâwk a ni rih miau si a."



Mut hmunah Nubawihi nèn chuan kan titi sap sap a, ani hi chuan hrehawm ka tihzia kha a hria a, ka thu tlûknaah a dah dâwn tih a hria. Ka duhna a dah lal ber ang.



Ka rin ang chiahin min chhâng.




*DIKNA HI HLIAH KHUH HLEN THEIH A NI LO, A TÀWPAH LO LANG CHHUAKIN A DING CHANG ZÊL*



(Zanin chu cheraw zir nèn, naute awih ngai nèn, a tawi hle, ka lo dah har bawk. Ka va buai tak ém! Lo dah loh ai tak tak a ni e! Min hau mai r'u)




☆GOLD DIGGER☆ - 6 By Dingdi Pachuau



*******



Nunsânga'n a țûla ka hman tùrin Scooty min leisak a, college ka kal lai khân Sasangi ta kha ka khalhsak ve fo a, ka thiam lutuk tlat.



Mahse, chhuahna tùr ka nei lĕm lo. Inneihna leh thihnaah ka kal a, eng emaw țûl lei tùrin ka chhuak zauh bawk. Lêng tùr chuan ka chhuak ngai lo, Nunsanga tlawh ve tùr pawhin ka nuin hun min siamsak ngai lo, kan inneih hnu deuh lawka vawi khat kan kal dùn bâk ka tlawh lo hrim hrim.



Zirtàwpni chhùn vawi khat chu tih tùr ka inhmakhua ve vek a, Nunsanga hmathawhna tlawh ka tum ve a, ka insiam vek tawh, Scooty chahbi ka hmu zo ta tlat lo.



Ka zawng nasa lutuk a, kan room phei chu en loh lai pawh ka nei lo. Ka dahna țhin drawer-ah(dining room sîrah a awm) ka hmu si lo va, ka buai tak zet.



Ka nu hnênah chuan huphurh rilru tak hian," Ka nu, scooty chahbi i lo hmu mial em?" ka ti dêk dêk a, bak zet hian," Eng atân nge hmu se min tih?" a lo ti hmuk a.



"Helai drawer-ah hian ka dah reng sia."



"I dah lo tawp a nih chu."



"Hmun dangah ka dah ngai si lo va, a mak ka ti ém mai."



"Thil tibo chuan dâwt an sawi duh châwk asin. Khawiah nge chhuah i tum rĕng rĕng a?" chîk zeta min en pah hian a ti leh a.



"Nunsanga'n a clinic-a kal tùrin min sâwm a, ka tlawh lohna a rei tawh sia ka ti a."



"Chhuah châk reng mai, hmeichhia phei chu ina awm tam tùr asin. Mahni ina awm tawh loh ngat phei chuan chhuah chhuah tùr a ni ngai lo," a ti ta êrh a.



A thil sawi hi a dik tih ka hria; mahse, chhuah châk reng anga min sawi erawh a tidik bîk lo. Chhuah ka châk reng lo va, vawiin pawh Nunsanga'n min sâwm lo se chuan chhuah ka tum miah lo ang.



"A thuhrimah, pasalte hnathawhnaa kal te chu, zah pawh i zak lo'm ni? A nupui hna nei lo tia miin an sawi tùr ka duh hlei nem. I pasal i chawimawi theihna tùr ber chu lêng lova ina i awm tam hi a ni."



Scooty chahbi ka hmu lo bawk nèn, min lecture ta hrep mai. Ka nu hi chuan min haw ve hranpa rĕng rĕng, a fapa duatin kei min nei hi a duh thei thlâwt lo a ni ber. A fapa chunga tilang ngam si lo hian ka chungah a țuan a ni ber mai.



Nunsanga'n min rawn phone avàngin rickshaw  ka la a, ka kal tho. Ka haw huna ka nuin min àn khum leh tùr chu ka ngaihtuah a, ka huphurh angreng.



Rin ang ngeiin tlaia ka haw chuan biak pawh ka hlawh lo, inthlâkin eirawng ka bâwl char char a, ka be bîk lo.



Scooty chahbi chu ka zawng leh chhin a, drawer-ah chuan a lo awm leh tawh!!  A mak ka ti lutuk, ka zawng nasa a, a awm miah lo tih ka hre chiang. Tunah a lo awm leh tawh tlat, drawer hawn chiahin hmuh loh theih lohin a lo awm!



"Chahbi chu a lo awm reng a nih hi." Ka lo țawng chhuak tih pawh ka lo hre lo.



"I zawng chiang lo tih hriat reng! Nêp lutuk mah ta che."



Kha maw, a țan leh dâwn.



*******



Thawhpuite ka phone lâwk a, vawiin chauh min lo hmui tùrin ka ngèn. Ka nu thlàn lam pan chuan kan inkhalh chhuak ta a. Nubawihi Scooty-in ka phur a, pangpâr bâwr nalh fahran a keng bawk a. Nunsanga'n a bike a khalhin kan hnungah zêl a rawn tlãn a, kan tlăn chak lĕm lo.



Kan tlawh ngun avàngin a fai hle a, mite angin lung phun nalh fahran lo mah se, a fai tal a, hmuh a nuam.



Pangpâr chu dah pahin," Nu, i lo țha maw? I khua a lo har hman em? Tûnlai tĕ hi kan lo tlawh khât deuh che a, min lo ngaidam dâwn nia," ka ti sap sap a.



Nubawihi chuan," Nu, chibai. Hei, Bàbî thianpa pawh a lo kal a nia. E, ni lo, i mâkpa zâwk maw le, lo làwm la?" a ti ve a, ka nuih a tiza țêp maw le.



A hnu deuhah Nunsanga chu hun thâwl deuh zâwk pein kan kal sawn deuh a, a țawng erawh ka hre pha tho. Ka hre châk miau a, ka beng ka chhi kar a ni.



"Ka pi, a hmasa berin i ngaihdamna ka dîl e. Ngaihdam dîl ngam tùr pawh ka ni lo nain i fanu hian min kalsan ka phal lo a ni. A tel lo chuan hrehawm ka ti a, ka nun a kim thei lo a ni."



"I accident tih min hrilh pawh a tum ve reng, ka buai avàngin a call ka chhâng thei lo va. Mangang leh rilru hah ém émin a awm ang tih rin ngaihna pawh ka lo hre lo a ni, ka ngaihsak tâwk lohnaah min ngaidam dâwn nia. Kei lah rawn ngaihven tùra ka rawn kalna lamah ka chesual ve  hlauh bawk si a, chu chu ka insawi thiamna lam ni lovin min lo hriatsak ve hrâm tùrin ka duh che a."



A ni maw?!!! Ka hmui ka hup a, makti zetin Nunsanga lam chu ka en reng. A accident maw? Ka va hre lo tak, ka lo àn khumin ka lo  be țha duh lo vêl a!!! A lo tuar ve tho a nih chu. Rilru mai ni lo, taksa thlengin a lo tuar ve tho.



"I mâkpa hian mâkpa nih ka tlin lo tak zet tih ka hria, zah pawh ka zak; mahse, tûn hnuah chuan khatiang kha ka ni tawh lo ang, i fate hi lo  ngaihtuah tawh miah suh aw. Ka awm chhûng chuan ngaihtuah an ngai lo ang, i mâkpa hi min ring hrâm la, chance min pe leh rawh."



Ngawi rengin Scooty chu ka khalh a, in kan thlen pawhin ka țawng lo. Ka ngaihtuahna a buai nuai nuai a, thil thlengah Nunsanga hi ka puh a, keimah chauh rilru nâ emaw ka lo inti a, ani pawhin rilru bâkah taksa natna hial keimah vàngin a lo tuar reng si.



Zanriah ei khamah Nubawihi țhiante pahnih an lo lêng a, choka lamah an țhu leh dial. Nunsânga nèn chuan sitting room-ah kan țhu a, ka rilru zawhna tam tak avànga tâwt țûn chu tihthàwl ka duh.



"I accident maw? Engati nge ka hriat ve loh?" Ka zawh dàn ki ațang chuan min hrilh ve loh avangin thiam loh ka chantîr lek lek ni hialin a lang thei ang.



"Nia; mahse, i thil tawrh lakah chuan engmah a ni lo. Ka harh chhuah hnuah pawh phone che chu ka tum nasa; mahse, ka call tlang thei lo che a."



"Chu pawh ni se, Kenny-a tal pawhin min hrilh tùr a ni asin le," ngaihtuah chiang lo zet chuan ka ti leh țâlh a.



"I phone a bo kha."



Ni dâwn tak. Min hrilh an tum ve ngei ang, màwlthlâk lutuk.



"I na viau em?"khawngaih takin ka en ràn a.



"I tawrh aiin a na lo ka tih chu. Aizawla ka dam deuh hnuah hmunpui lamah min refer a, ka zu awm rei phian lehnghal a," a ti sup sup a.



"A pawi ka ti."



"Kei pawh, ka ngaihven tâwk lohnaah che pawi ka ti, i pasal nih ka tling lo tak zet a ni," tiin  ka kut chu a rawn vuan dà dá a, nghet zetin ka lo chelhsak a, a kut lum ham ham chuan min tilum nghal atin ka hria.



"Ka ngaihzia che chu sawi ngaihna pawh ka hre lo zâwk!"



"Min rawn pan thei reng a."



"Ka hria e, ka ngam lo a ni. I chhuah chhan ka hre si lo va, ka nu hian a lo tiduhdah viau che em ni aw te ka ti a, ka ring chiah bawk si lo. Keimah vàng a nih ka ring leh ta a, ka ngaihsak tâwk lo che sia," a ti sar sar a.



Um, a nu chu a ring ngam lo tawp ang, a nuin a duat a, a ring chhe phal lo sa. Tu nge mahni hringtunu ring chhe phal ang le?



"I lo hăw ang tiraw?" ngun zetin min en a, a mitmeng ațang chuan hăw tùrin min duh ngawih ngawih tih a hriat theih mai.



"Ka rilru i tibuai."



"Lo hăw rawh aw, ka fel tawh viau ang. Ka ngaihsak viau tawh ang che a, i tân hun ka insiam tam tawh bawk ang," a ti leh sar sar a.



"Ngaihtuah țhat ka la duh ti ta ila min ngei ang em?" Ka thinlung chhûng ngaihtuahna hi hre thiam thei se ka ti tak zet.



"Ka tilui thei lo che ka tih kha, Zualbawih. Ngaihtuah rawh; mahse, rei tak min nghahtîr lo hrâm la, khawngaihin? Ka ngai tawh che, ka nupui hi ka ngai tawh tak zet che a ni."



Nia, min ngai ve tho chuan ka ring. Kei pawhin ka ngai asin, zan tin a âwm nghèng chialin ka mu a, min kuah a, min duh thu min hrilh ziah țhìn. Min duh thu hi chu ka ringhlel ngai lo ang.



"Kei pawh ka ngai ve tho che."



Kan inmelh dùn ràn a, ka kutphah chu a kutzungpuia tuai hauh hauh pah chuan," Chance min pe leh hrâm rawh aw, i tân pasal țha tak nih ka tum tawh ngei ngei  ang," a ti leh a, ka ringhlel rĕng rĕng lo, ka ring hmiah.



"I chunga ka țhat tâwk lohnaah min ngaidam hrâm la, i lo haw ang a, ka tihsual zawng zawng kha ka siam țha vek ang."



Ngaihthlâk a nuam asin, min hmangaih tih ka hre ve tho si a, heti khawpa min ngen nasat erawh ka ring pha lo thung. A lakah hian inchhuan theihna tùr pakhat mah ka nei lo, dinhmun lamah hlauh phei chuan; mahse, kei chuan dinhmun lam hi ka lo care vak ngai lo, kan inhmangaih tawn a nih phawt chuan.



Zànah a mutna lama a kal tùr chu a tàwi hrat hrat a, min en leh reng țhìn.



"Eng nge?"



"Lo lût ve lawk teh," a ti zàwi sup a.



Hm, hei vàng hi a lo nih chiah hi, ka zui ve mai bawk a.



Room-a kan luh chiah chuan hnung lam ațangin min rawn kuah nghal a.  Mak ka ti angreng, makti mah ila engmah ka sawi chhuak lo, ngawi rengin ka dawh tawp. Ani pawh chu a ngawi ve reng.



Rei fê kan ngawih hnu chuan,"Hetia ka kuahna che hi a va rei tawh tak, i taksa lum ham ham leh i vun mâm zet te hi zan tin ka mangphan ziah," a ti sap sap a.



Min kuah ang ang chuan ka awm ve tawp. Kei pawh hian a kuah hi ka thlahlel a, a bula awm hi ka ning hek lo, ka hmangaih miau a.



"Zanin chu ka bulah mu ve tawh la?"



Ka châk rualin Nubawihi a awm ve reng, a tihchi loh. Tunah pawh hian min lo nghâk reng tawh ang chu, kan ina a awm chhûng chuan a bulah ka mu thei lo ang.



"Ni lo ve, Nubawihi a awm tih hria la."



"Nupa mut dun chu eng nge a sualna?"



A bânah chuan ka sik zauh a," Hey, nupa kan nih leh tawh rih loh kha aw," ka ti hlak a, a rûm nghut a.



"Ka ngaih dàn che a danglam phah lo. Ka nupui i ni reng a, i pasal ka ni reng bawk," a ti nghut a.



Ka nui hak a," Ka rawn haw hma chu nupa kan ni thei rih lo ang, i tuar a ngai rih mai ang chu. I thei ang tiraw?" ka ti a.



"Thei lo țêp tawh ang, min hrem rei tum lo la?"



"I awm țhat phawt chuan rei vak lo maithei."



"Ka awm țhat ém hi maw..."



Mu tùra Nubawihi bula ka va luh chuan mitko sàn ăk hian min lo en a.



"Eng nge ni khatianga min en kher?" Night cream chu ka ban nghal a.



"Zanin chu a bulah i mu dâwn ta emaw ni ka lo ti a," a ti sar sar a.



"Engah ngawt maw? Teuh lo, ka mu dâwn lo, ka pasal a ni tawh lo miau a," ka ti ve thung a.



"Mahse, i haw leh tho ang tiraw?"



"I duh phawt chuan; mahse, ka thlahthlam dâwn lo che, engtikah mah."



"Ka duh dàn chu i hriat tawh kha. Hlim taka i awm ka duh a."



Ka mut ve hnuah chuan," Ka lêt leh a nih pawhin ka enkawl dâwn che tih hria la, ka hna hi bànsan ka tum lo bawk, inthlahrunna tùr a awm miah lo. I duhnaah college i kal ang a, pawisa ka rawn thawn ziah ang che," ka ti ve dap dap a.



"Innei țha leh ula tih chu ka duh ber a nia, hlim bawk la ka duh bawk. Kei chuan i duh dàn ang ang kha ka pawmpui chein țha ka ti vek ang," a ti ve a.



Ka ngaihtuah kual nasa a, thil țha ber tùr pawh ka hre thiam lo. Ka lêt leh a nih chuan Nunsanga pawh pasal țha tak nih a tum tawh a, hun kan hmang dùn tam tawh chuan a nu min sawisèlna mai maite chu mênah ka thlâk thei mai ang chu, ka pasal ka kianga a awm tlat chuan.



Ka muhìl țêp tihah whatsapp message a rawn ri a, ka lo mute theihnghilh daih a nih hi.



*In sawi fel thei dâwn tiraw?*



Hm, Kenny-a țhìn hi chu aw. A țhianpa hi a ngaihtuah thei si a, kei min zâwt lovin a țhianpa zawh mai tùr a nia.



*I țhianpa zâwt ta che*



*Ka peih lo, ani chuan engmah a hre dâwn si lo va, engkim i thu tlûkna tùr a ni sia*



*I lo kal tel ve ka ring a nia?*



*I lo zui haw dâwn em?*



*Dâwn lo*



*Luhlul chhuah tlat lo la? Hman lo chung chungin a rawn pan ve tak țâwk țâwk che a*



*A duhtu bân a sei miau sia*



*Lo zui haw mai rawh, mo thar lawm leh a châkawm tawh a nia*



*I sual mai mai e a*



*Lo haw rawh aw, a khawngaihthlâk ve tho a nia, ngaidam la, lo haw ang che*



*Maithei...*



*Luhlul chhuah suh ang che, rawn kal kher ka peih lo a nia*



Kenny-a hi chu Nunsanga anga dawhthei tak a ni ve lo. A sawi kual ve duah thiam lo va, a sawi tawp a, a sawi nawn chhên hek lo.



*I țhianpa tân hi chuan si-âr lâk pawh i huam chiang*



*I tidik*



An inkawp nghet teh tak e, a nuam duh ngawt ang chu.



*I ȚHIAN ȚHATE PAWH KHÂN ȚHIAN ȚHA AN LO NEI VE THO A NIA, MI BULA THIL I SAWIIN SAWI DÀN CHIN TÂWK HRIA ANG CHE*




☆GOLD DIGGER☆ - 7 By Dingdi Pachuau




Kenny-a nèn kan intext zawh chuan muthilh mai ka tum a, message dang a lo thleng ve leh ta, ka va luck tak!



*Naktûkah min zui haw tawh mai la*



Ka nui sak a, ka type ve nghal.



*Ni lo ve, Nubawihi engtin nge a lo awm ang?*



*Ani pawh lo chhuk ve se*



*Tihchi nâng, college țan ve phawt teh se*



*A va la rei dâwn ve!!!!*



*Rei lo, thla hnih khat bâk a ni lo ang*


*Lalpa leh! Min hrem i tum vàng a ni tiraw?*



*Ni lo ve, thil nih dàn ka sawi a nih kha*



*Hun hi forward theih se tiraw?*



*Haha, a țha viau ang*



Zîng ka tho hma viau. A chhan vawiin chu ka hnaah ka kal a ngai tawh, bâkah Nunsanga titipui ka la duh bawk.



Nunsanga rawn thawh hma chuan paper ka la a, ka haw leh dâwn a nih chuan ka thil duh ka ziah chhuah a ngai. Chu chu ka hawntîr ang a, lo chhiar chiang rawh se.


#1. Ka hna ka bànsan thei lo ang.

#2. Nubawihi ka thlahthlam thei lo ang.

#3. Hun inpe tam dùn ang.

#4. Inngaihsak zual ang.

#5. Kâr tàwpah chhuak dùn țhin ang.

#6. Harsatna inhrilh țhin ang.

#7. Ka thil duh min tihhlawhtlinsak rawh.


Ziah tùr dang ka ngaihtuah leh a, 'chhûngte aiin indah lal tawn ang' tih ka duh viau a; mahse, tunah pawh Nubawihi ka chhuanlam a ni sia, ka duh leh ta lo va.


A rawn thawh chuan," Eng nge i lo tih a?" a rawn ti vat a, kei chuan rang zeta ka thil ziah chu hupin," Thil țha deuh mai maw le," ka ti ringawt a, " Thingpui i duh em?" ka ti nghal a.



"Nangmah zâwk le!"



Ka hmui ka tihpawrh khum a, nui suk chung chuan bathroom-ah a lut ta a.



*******



Nubawihi chu a pass țha a, Christ College, Bangalore-ah a lût thei dâwn e. Hostel-ah a awm ang a, a fee chàwi pawh a tam vak dâwn lo ve. Kum 1-ah Rs 48,000 âwrh a ni, chaw erawh Canteen-ah emaw a ei a ngai dâwn. College bul hnai vêlah hostel pângngai țha deuh hlek a awm ka rin nèn, duh aiin hostel awmna a hla hlawm. Hmeichhia a ni si a, ka ngaihtuah deuh hlek.



Vànneihthlâk takin a țhian kawmngeih tak Rini a kal ve dâwn a, ka ngaihtuah lo deuh sawt. Rini u hi Bangalore-ah a pasal nèn an awm ve tho a, anni'n engkim an lo buaipui a, a làwmawm tak zet.



College țan tùra a chhuk hnu chuan ka khua a har reuh khawp mai. Keimah tĕ chuan ka che rak rak a, khua chu har duh tak a ni.



Nunsanga'n min rawn be reng a, Nubawihi a chhuk tawh tih a hre tawh bawk a, Innrinniah Kenny-a nèn rawn kal an tum. Leh chûk chûk hian. Ka thil ziah kha a chhiar ngei a, a hnuaiah ' Ka tihlawhtling vek ang' tih hawrawppui hian a ziak a, chu chu whatsapp-ah min rawn thawn.



Inrinniah tlaiah an rawn thleng, car-in an rawn kal a. Chawhmeh kawng laka mi an rawn lei nual a, fridge a khat vek.



"Rawn lei chiam a ngai hlei nem le."



"Phunchiar țan hle mai."



Lei sei fêin ka chhuah khum a, chawhmeh chu fridge-ah ka dah lût pah a.



"Thingpui in r'u aw, nge in bâwnghnute rawn lei hi in in duh zâwk em?"



Kenny-a chuan," Bâwnghnute chu a țha ang, a thawk chak zâwk ang chu," a lo ti zauh a, a sawi awmzia ka hre lawk lo va, ka hriat hnuah chuan ka chùm awk awk a.



"Min chùm hlum ang e, mo thar lawm ka la duh a nia."



"Chimawm over!"



Bâwnghnute chu ka chhuansak ta zâwk a, 'ngai lo' chu an ti tak nain ka chhuang lui tho.



"Zanin tlai chu Kenny-a'n chawhmeh siam se, kei ka lo ãwl ang."



"I zawngchhang palh ang!"



"Hmmmm, vêl a che! Aw le, ka àwl ang che u; mahse, naktûk zîng chu min àwl ang," ka ti ve tlat a.



"Țhiana, i thiam ém kha, Zualbawihi hi lo pui la, ka intleuh zawk ang e. Ka intleuh zawhah i intleuh ve ang a," Nunsanga chuan a ti a.



"Ârsa kha ka lo siam ang e."



Ârsa siamnaa telh tùr zawng zawng an lo lei tel vek bawk a, a'n buaipui tak tak chu, a rim a tui kher asin. Makti tak hian ka en ka en ringawt, Nunsanga'n a thiam si lo va, ani pawh hian a thiam ka ring lo ve ringawt a!



"A tui ngawt ang!"



"Tui ang."



Nunsanga lo chhuah hnuah pawh a hmin hma chu a vil tlat a, a hmin hnuah chauh a inbual. Chawhmeh dang Nunsanga chuan min siampui thung a, siam dàn ka hrilh pah a.



Zanriah kan ei a, Kenny-a ârsa siam chu a tui tak zet. Ka duh aiin ka puar lehnghal, ka ei tam kher mai.



"Ka puar khawp mai!"



"Țhiana, i siam tui e."



"Intirh tawh awih loh!"



Zanriah ei khamah chuan Nunsanga chuan," Nula kan rîm dâwn em niang?" tiin Kenny-a chu a melh zauh a.



"Inkhâwm ka duh asin le!"



Ka nui hawk. Kenny-a'n Inrinni zàn inkhâwm a duh! Fiamthu hi a va thiam lo tak.



"Fiamthu pawhin sawi suh!"



"Ka inkhâwm khât lutuk a, inkhâwm ka duh ve a ni mai," a lo ti thung a, Nunsanga pawh a lo nui ve vur vur.



"I duh leh, inkhâwm la?"



"In tel ve loh chuan..."



Kan nui ta vek.



"Zanin chu keimah chauha mut ka duh bîk lo a nia!"



Sen țâwn țâwnin Nunsanga chu ka en a, ani erawhin a mitko a lo sàn ăk ringawt. He mi chimawmpa tak hi chu, mi tihzah dàn hi a hria a nia, chimawm lutuk!



"Kan mu hrang vek ang," ka ti a.



"Mu tlâng vek zâwk ang u," Kenny-a chuan a lo ti leh a.



"Teuh lo, keimahin ka mu dâwn, in duh leh in pahnihin mu rawh u," ka ti a, ka tho ta daih a, an nui dùn hawk hawk a.



Thil ka ngaihtuah nasa. Zui hăw ta ila, hna ka nei a, ani'n a nei bawk. Kâr tàwpah bâk kan inhmu thei dáwn lo, kàr tawn reng kan ngai dâwn, a nu leh a farnu pawh ka hmu ngai mang dâwn lo tihna.



Ka duh daih zâwk; mahse, nupa ni ve si, chèn dun tlèm lutuk chu a fuh thei si lo ang, a tu zâwk zâwk tân pawh a țha dâwn lo. Ka rilru a buai, engtin nge a ngaih ve ang?



Chokaa thingpui ka siam lai chuan Kenny-a'n," Ka tei chhuak lawk ang e, ka rei lo ang," a tih ri chu ka hria a, ka awmna ațang chuan," Thingpui ka siam asin," ka ti chûl a.



"Min siam kêp suh."



"Khawiah nge i kal dâwn?"



"Nula ka rîm dâwn."



A chhuak zui nghal a, thingpui chu Nunsanga pêk pahin," Khawiah nge kal a tum a?" ka ti a, ani lah chuan," Hmel hriat a nei alawm," a lo ti mai a.



Kan ngawih deuh vang vang hnu chuan Nunsanga chuan,"Kan awm dan tùr hi ngaihtuah a ngai, kâr khat chawlh lâk i huam em?" a ti ta a.



"Huam lohna tùr pawh a awm lo, ka lo buai rûkna tak a nia."



"Nia, i chawlh theih chuan a zia ngawt ang. I duhna zahsak che ka duh si a, Khawzâwl leh Lunglei kan kàr tawn deuh chhên dâwn a nih hi. A chângin helamah, a chângin Lunglei lamah, a nuam phianin ka ring."



"Nia, ka lâwm khawp mai. Keimah vàngin i hna i duh leh nuam i tih tak i kalsan i kalsan ta si a, a zia lo ka ti."



A nui suk a," I pawimawh ber si alawm le! Chuan, zanin chu engtin maw kan mut dâwn a?" a ti ta daih a.



Ka nui deuh sak a," Ka hre bîk lo, room hran vekah mu ila ka ti deuh a," ka tih chuan a lo rûm nghut a.



"A thil sawi kha engah mah ngai mah ta che, ka nupui i ni alawm."



"A, a nuam lo e, mu hrang vek zâwk ang u."



Rei vak lo hnuah Kenny-a chu a rawn lêt a, ngawi reng chuan games a khèl mulh mulh reng a.



Kei pawh Nubawihi text tumin phone ka la a, ka type mêk lai chuan message a rawn thleng a.



Nunsanga message a ni.



*I mutna room kawngkhàr kalh suh ang che*



He pa tak hi chu aw, ka melh phei nghal a, min lo en reng tawh zâwk a lo ni a.



*Ninhlei suh ang che*



A chhiar chuan a nui suk a, a type ve mual mual a.



*Dâwn nâng*



Nubawihi chu ka text a, Kenny-a leh Nunsanga lo kal thu chu ka hrilh a, kan thil tum chu ka hrilh nghal bawk a.



Mut dâwnah room chu kan insem ta vek a, Kenny-a khân sawi chhuak lo mah se, Nunsanga nèna mut dun chu ka tum lo, Kenny-a  awm ve lai chuan.



Ka muhìl țêp tawh tihah a rawn lût tak tak, kei lahin ka kalh lo tak tak bawk a.



Ka bulah chuan a rawn inthawlh ve sat sat a, nghet zetin min kuah nghal a, boxer nèn chauh a lo ni nghe nghe a, a hma kha chuan tàwnzau a ha tel țhìn.



"Ka mut a chhuak a nia," ka ti ser ser a.



"Um, muhìl rawh, i bula mut hi ka duh mai a nia," tiin ka bengkâwm chu a fâwp zoh a.



"Mut tui aw."



"Um, mut tui le."


A kut chuan ka kawr hma lam a rawn zen zàl zál a, ka nuih chu a tiza viau, a àwm ve tho, min nghâk rei ve tawh a.



"Naupang chhia lutuk!"



"Muhìl rawh, 'mut tui' ka tih tawh kha."



Mahse, a chezia chuan min tiharh telh telh si, ka mut chhuak pawh hnawh bo diak ang mai a ni.



"Ninhlei suh ka tih kha, i țhianpa a awm ve reng lehnghal."



"Engmah a hre tawh lo, a muthilhna a rei tawh. A mu tui lutuk tawh."



A ni maithei, a rehna chin a rei tawh ém mai.


*******



Zînga ka harh chuan Nunsanga a lo tho daih tawh. Dâr zât ka en vat a, dâr 6 a lo pèl tawh a nih hi, a thawhna a rei tawh ang em aw. Kenny-a pawh a tho tawh a ni maw, țawng ri ka hre tlat.



Ka tho chhuak a, ka dam vial chhovin dârthlalangah ka inen thuai a, ka hmui a vûng deuh, ka nghâwngah hmun hnihah a duk bawk. Lalpa leh! Kenny-a'n a hmuh hlauh chuan, tihchi loh lutuk ringawt, Nunsanga vàng vek! Ka sam chu vial chho lovin ka thlah ta tawp, min hriat chhuah loh hrâm ka beisei.



Eirawng an lo bâwl dùn tak tak. Min àwl chu an tum ve a ni ngei ang, Nunsanga'n eirawng bàwl a thiam lo chiang a, chuti a nih chuan Kenny-a bàwl tihna.



"Morning, nizàn i mu țha thei lo em ni?"



Nunsanga ka en vat a, a lo nui var var a. He pa hian nizànah kan riak dùn tih a hria a ni ém lo maw.



"Thawh ka va hai chiang ém!"



"Tukin chu àwl che a ngai sia, kan tho hma alawm," Nunsanga chuan a lo ti vat a.



"In va fel ve!"



"Nuam ti viau suh!"



Ka melh rum a," Chimawm leh lutuk!" tiin bathroom-ah ka luhsan ta nghal a.


*******


Nunsangate in ka lût leh chu, mo thar chan ka chang leh deuh a. A nu hlim der hmel hmuh chu a nuam fahran lo; mahse, min tinawmnah thei bîk tawh lo ang, bâkah, inah ka awm tam tawh dâwn tlat lo, min hmusit tùrin hun ka ngah tawh lo.



Awmpui thar an lo nei ngei tawh a, a la tleirâwl zek zawk viau. Nula pângngai chu an awm thei lo tawp ang, Nunsanga nu hnuaiah an thawk rei peih tawp nâng.



Kâr khat chhûng chu chawlh angreng ve deuh kan nei, ani pawhin min kalsan lo, a mei ang ka ni. A kalnaah min hruai zél a, hna a thawk a nih pawhin min hruai a, a lêng chhuak a nih pawhin ka tel zêl. A clinic-a kan kalin Linda-i kan hmu dùn a, mak min lo ti tawp.



Zànah hlim takin nupa nun kan chèn a, a accident avànga a âwma ser awm chu duat takin ka chùlsak ziah. Keimah avànga a nunna a chàn teuhzia ka hre thar a, ka duat hluah hluah tawh. Ani lahin ka kalsan leh a hlau a, kan induat tawn a ni ber.



Sunday zànah Kenny-a'n chaw a rawn ei a, naktûkah Khawzâwla chhoh ka ngaih tawh avàngin Nunsanga chuan inthlahna deuh reuh a siam a, chawhlui kan kîlho a ni.



A nu chuan," Nupa awm dun loh chu a țha lo asin, kârah boruak eng eng emaw a thleng țhìn," a ti suap suap a, a tidik lo ka ti miah lo; mahse, ka hna hi chàn ka duh teuh lo.



"Kâr tàwpah kan awm dùn leh thei dâwn tho alawm, Nu."



"Nupuiin hna neih ve kher hi țha pawh ka ti lo."



Kenny-a chuan," A thawk rei peih tawp nâng, naute a pai hma chu han thawhtîr lâwp lâwp ula," a lo ti ve a.



Nunsanga pawh chuan," Nia, inah lah hna thawktu tùr hei kan nei tawh a, a hna hi bànsantîr ka tum lo, a duh chen chen thawk rawh se, hna thawh neih hi chu a țha a nia," tiin ka thlavàng chu a lo hauh ve a.



"Hmeichhe hna nei chu an indahsâng duh asin," a lo ti leh țâlh a.



"Linda-i pawhin a neih tho hi, thiamna avànga hna neih chu a țha khawp alawm le, hna neih loh hlauvin lehkha pawh kan zir sup sup alawm le!" Kenny-a chuan nui chung hian a lo ti leh a.



"Doctor nih chu a ropui ém asin."



Ka nu lakah hi chuan eng hna pawh thawk ila, a fapa nupui atân hian min pawm thei ngaiin ka ring lo. Min pawm lo mah se, a fapa nupui ka ni tho. Min tiduhdah thei tawh hek lo, a hmuhsit theihin a bulah ka awm tam tawh dâwn hek lo.



"Hna chu, a thawktu azir a ni, rinawm leh taima taka a thawh phawt chuan a hluin a ropui vek mai," Nunsanga chuan a lo ti a.



Dik chiah.






*ENG HNA PAWH THAWK LA, TAIMA TAK LEH RINAWM TAKA I THAWH PHAWT CHUAN  A ZAHAWM A NI*




☆GOLD DIGGER☆ - 8 By Dingdi Pachuau



Mutnaah chuan Nunsanga chuan," Ka nu thil sawi kha chu mênah thlâk daih rawh aw," a ti sup a.



Ka ngawi vang vang phawt a, chutah, muangchâng hian," Engah mah ka ngai hlei nem, kan hlimna tihchhiattîr hi ka phal teuh lo. A hmuh phâk lova ka awm tùr a ngai ngam lovah ka ngai mai," ka ti thĕn a.



"Țha reuh lutuk!"



"Ka nu hi chuan  Linda-i hi nei la chu a ti maw le!" A rilru ka hre ve châk hrim hrim a, ka sawi chhuak rĕng.



"A favourite girl kha a ni ve hranpa rĕng rĕng a; mahse, thîk duh chuang suh. Ka tân chuan a ni ve chuang lo a nia, ka engkima engkim chu ka bulah hian a awm reng a ni."



A hmuia fawh zauh a hlawh.



"I engkima engkim ka nih chuan ka tân chuan boruak i ni, ka nunna i ni ka tihna a nih chu. Nun thar min pe leh si a."



Ka hnung ruak kâng chûl hoh hoh pah chuan," Ka mamawh engkim neitu i ni a, i tel lo chuan ka awm thei tawh lo ang. Ka nu a lungawi emaw lungawi lo emaw ka nei tho che, a duhzâwng ni lovin ka duhzâwng nei tùr ka ni alawm," a ti leh sup sup a.



Kei pawh a khabe hnuaiah ka dâk chho a, a âwm chûl riak riak pah chuan," Hlim hi chuan ni khat hi a rei lo va, ni khat mai ni lo, kâr khat pawh hi a lo rei lo tho a nih hi, naktûk chu ka huphurh ru ta riau mai," ka ti sà sá a.



"Huphurhawm tak a ni, kâr khat chhûng hmu lo chein, tawh pawh tawk thei lo chein ka awm dâwn a nia."



"Ka ni ve tho; mahse, hetia awm hran hian kan inngaihna a zualin kan inthlâkhlelhna a zual sauh ka ring, i ring ve tho em?"



"I lo hàw zàn apiangin làwi țhat zàn kan hmang thei zêl ang chu!"



A nui tih ka hria, ka zak chuang lo. Ka pasal a nia, kan hmang ziah ang a, a ni mai alawm.



"Ka awm loh hlànin ka tân lo rinawm reng ang che, hmeichhe dang i lo melh vaih..."



A taksa chunga min pawh kàn lawp pahin," Aw le, ka lalnu. Khawnge, chêt i'n la tak tak teh ang, kan fate'n mi fate an ûm pha dâwn tlat lo," a ti a, ka nui hak a, ani erawh chuan min rawn fâwp nghal chat a.



Kâr khat chhûng kan inthlah lo tluk a ni bawk a, kan vênga ka chhoh chuan ka lung a lêngin ka ngai vawng vawng mai. Ka chhoh zànah rei fê kan inbia a, zîngah min rawn kai tho bawk. Nuam deuh asin, nupa pawh kan inkâr siam țha tùr hian lo tauh ve deuh pawh a lo pawi lo a nih hi ka tih phah. Chhuak lo ta ila tùn ang boruak hi ka tawng phain ka ring lo, hna ka nei lo bawk ang.



Zànah leh zîngah kan inbe ziah. Eng chena rei nge kan inngaihsakna leh kan induhna hian a daih ang ka hre lo; mahse, kan inkâra  inhìptawnna hian chuai lam pan ahnêkin a zual zêl zâwk chu a nih hi.



Ka thawhpuite hian pasal ka nei tih an hre miah lo, hrilh ka tum hran lo. Țhian țha ka nei lo va, bâkah, hmeichhia kan tam a, hmeichhia chu thil sawi  kan peih si a, kei aia lo thawk senior tawh an ni lehnghal a, ka hrilh duh lo.



Kâr tàwpah a rawn chho ta thung. Ani chuan car a rawn khalh thei mai a, a zia. Bâkah, mi thuhnuaiah a kûn ve lo va, kâr tàwpah rawn chho ziah se la a țha ang. Kei ka chhuk ve chuan Thawhțanni ka off a ngai zêl dâwn si, sawi chhin ang.



Eirawng bâwl dùnin kan titi a, kan nui dùn hak hak reng a. Pitar damlo a hnêna rawn inentîr chanchin a sawi a, kan nui char char a.



Eirawng bàwl zawhah kan inbual dùn a, kan boruak a fuh tawp. Nuam tak a ni ringawt, hei bâk bâka vàn ram tla fual, ka nu boral hnua ka hlim ber țum a ni ngei ang.



Zànah  news a en a, ka enpui ve zawk. A hnuah erawh laptop ka la chhuak a, ka thil ziah chu chhunzawm ka tum a.



"Eng thil nge i tih dâwn a?"



"News i en chhûngin thil ka lo type mai mai ang ka ti a."



"Eng thil maw?"



"I hriat ve chi loh!"



"Story maw?"



"Aw."



"Kan chanchin hi ziak la?"



"Tuna mi hi ka ziah zawh hunah le."



"Ka chhiar ve châk, i phal ang em?"



"Ka zawh hunah aw."



"I tih tlat chuan."



A bulah a taksa nghèng chial chuan ka țhu a, news a ngaihthlâk duh avangin music pawh ka play ngam lo. Music play pahin ka type țhìn a; mahse, ka ngaithla ngai chuang miah lo.


Dârkâr chanve zet chu ka type a, ani pawh chu ka nghen ang ang chuan a awm ve mai. A TV en ka thlìr ve zawk chuan inkhèl a lo en tawh, hmuhnawm ka ti ve ngai lo.


"Tute nge inkhèl khi?"


"Arsenal leh Chelsea, a hmuhnawm lutuk."


"Um, hmuhnawm ti tak khân en rawh."


Ka type leh char char a, ka mit a nat lutuk avàngin ka dah ta rih.


"I duhtâwk tawh em ni?"


"Um, ka mit a kham lutuk a."


"Chuti, kan mu tawh dâwn em ni?"


Dâr zât chu ka en a, a hun ve tawh tho. Ka rin ai chuan a lo tlai tawh a.



"Um."



Mutnaah chuan," Tih dàn țha deuh ka hria asin," ka ti a.



"Eng chu?"



"Ih maw, kâr tàwpah hian nangmah rawn chho țhìn la, kei chu hotu nei ka ni sia. Thawhțanni chawlh kan neih hunah kei ka lo chhuk ve thung ang a, țha i ti em? Nang chu boss i nia, tu thuhnuaiah mah i awm ve lo va."



"Fing reuh lutuk!"



"Ka ti tak tak, Thawhțanni hi ka tân off zêl a ngai lo ang a. Bâkah, nang chu car i khalh thiam lehnghal a, a zia bîk e, a remchâng bîk," ka ti leh a.



"Pawi lo, a zia viau tak ang chu; mahse, zir ve la a țha ang, i thiam a țha, hun i neih hunah."



"I va fel tak! Ka pasal duh tak hi a fel tak zet a ni."



Duat zetin ka kuah a, ka duat hi a phû a ni. A nupui ka ni a, ka pasal a ni bawk. Zin kawng thui tak a rawn tlân a, min hmu tùr leh hun min hmanpui tùrin a rawn kal vang vang a ni a, ka duat hi a ngai ém asin.



A tûkah kan inkhâwm ve a, Nunsanga pawhin a lo hreh bîk lo. Inkhâwm bànah kan haw nghal vat a, mi zînga awm kha nuam ka ti teh chiam lo.



Nubawihi ka phone a, Nunsanga nèn pawh an inbia. Mamawh a neih leh neih lohte chu a zâwt a, inthlahrung lo tùrin a hrilh pah bawk a. Ka lo nui var var a, ka va chhuang tak!



Phone chu min rawn pe lehin," A be leh duh che a," a ti sup a, kan inbe leh ta a.



"Bàbî, i hlim tih hriat chu a nuam hle mai. Hlim deuhin awm r'u aw, ngaihsak țha la, i duat thiam chuan a duat ve dâwn che asin."



Ka nauvi tak hi chu aw...!!



"Ka lo hre reng ang e, țha tak khân lehkha zir la aw, mipa kha chu melh duh miah suh."



A rawn nui ar ar a," Vai hlîr alawm kan hmuh le, Mizo tlangvâl lo chu melh ka tum hlei nem," a rawn tifiamthu ve a, kan nui dùn hak hak a.



*******



June thla a lo thleng a, ni 5 Thawhțanni chu holiday a nih vàngin ka chhuk ve a, ina lût lovin a clinic ka pan a, a haw rualin ka haw ve chauh.



Ka nuin ka hmel a hmuha a hmel danglam deuh hlek chu ka hmu nghal a; mahse, a rei lĕm lo. Min lo be hran lo va, kei erawh chuan ka be hrâm, ka pasal nu a ni miau a.



A tûk inkhâwm bànah Nunsanga farnute chhûng an rawn lêng a, mi dang pawh an rawn lêng ve. Nundanga hmel hriatte an ni a, kan inhruai leh tawh tih hriaa rawn lêngte an ni.



An hming ka chhinchhiah thei lo, pakhat erawh ka hre thei, a chhan chu a hming chu ka pa hming nèn a inan vàng a ni; a  hmel erawh ka ngei chi tak a ni; mahse, ka tilang lo.



An lêng rei lutuk hlawm lo, an haw hnu deuhah  Kenny-a a rawn lang ve leh. A rawn lang har ka ti rĕng a ni.



"Zanin chu chaw ei ve rawh aw, kan inhmu khât tawh sia."



"Chawhmeh min siamtîr i tum leh palh ang."



Nunsanga chu a lo nui hawk a, ka melh zauh a," Hei, chaw a lo ei dâwn sia, eirawng bàwl a tum leh tlat tawh," ka ti a.



"Ka ei dâwn a nih pawhin ka bâwl peih lo."



"Kenny, lo ei rawh, Bawihite pawh an rawn ei dâwn alawm."



Zanriah kan ei chu kan nâwi ta nak mai. Romeo chu a harh a chhuak a, chaw pawh a ei țha duh lo, a tlân kual reng mai.



"Bawihte, awm țha rawh, tlân kual lovin chaw ei teh," a pa chuan a ti duai a.



"Tlân mai mai teh se, nichina thil a ei vàng khân a ei peih lo a nih kha," Nunpuii chuan a lo ti thung a.



"Naupang chu chaw lo, thil dang, puar leh fànna ni lĕm lo leh an tâna țha lo chu pêk mai mai loh tùr asin," Nunsanga chuan a ti a.



"A duh miau sia."



"Duh tih mai mai, an tâna țha lo chu pêk miah loh tùr, a pum a țha lo palh ang."



"A ei ngai lo khawp alawm le, a pîte, a puteate inah a rawn kal a, a ei châk a ei lohte chuan khawiah nge ei se i tih? Naupan lai chuan nepnawi an ei nasa țhìn alawm," ka nu chuan a lo ti vat a, a tupa chu a țan ve teh a nia.



"A dik alawm, duat tih avànga an ngen apiang pêk ringawt pawh hi a țha ber lo."



"Bawihtea hi zawng, ka duat ém! A duh apiang ka pêk loh te'n. Ka tu hmuh chhun a nih hi."



Kei chu ka țawng ve lo hrim hrim. Ka tân lo sawi ve tùr pawh a awm lo, ka sawi a nih chuan an lo la kawi leh emaw a niang a, ka tân chuan ngawih hi a him.



"I va ngawichawi ve?"



Nuih sak pahin," Nia," ka ti ringawt.



Zanriah ei khamah chuan kan nula awmpuiin thlèng min sengpui a, thlèng sil ka tum chu min dang a, hmun ka phiat ta ringawt. Chu pawh chu a phal lo khawp a; mahse, ka tilui tho.



"Zovi, thlèng i sil zawhah khân thei ei tùr kha rawn chhawp la aw, Bawihtea ei tùr i lo siam nghal dâwn nia," ka nu chuan a ti a, a kal sawn leh ta nghal a.



Ka nu kal hnu chuan," Zovi, eng thei ber hi nge siam tùr niang?" tiin ka zâwt a.



"Lo ti suh, ka sil zo țêp."



Ka zâwt lui tho. Thlèng a la sil laklawh si a, keiin engmah ka ti tawh si lo nèn, an bula va țhut ai chuan hetia awm hi nuam ka ti zâwk.



Ei tùr ka va dah lai chuan Nunpuii leh ka nu chuan min lo sawi a ni maithei, an țawng tàwp chat a. Mi dang ka hmu miah lo, pâwnah an țhu a ni maithei.



"Ka nu, hei, thei chu aw," tiin an hma dawhkànah chuan ka chhawp a.



"Tu siam nge?"



"Keimah."



"Siam tùrin ka ti lo chein ka hria."



"Zovi a la hman si lo va."



"Inlâk fel kual vêl a ngai hlei nem." Hei chu Nunpuii sawi a ni thung.



"In ei duh loh chuan ka la leh mai ang."



Ka nu chuan," A ei tlâk ang chu maw?" a lo ti a, ka va ngei tak! A hma zawng pawhin ka siamsak char char țhìn si a.



"Mi dang pawh pâwnah an awm kha, lo siamsak leh nghal mai rawh."



Chokaah ka lût leh nghal. An bula ka awm chuan ka thinrim a chhuak palh ang, tunah chuan ka hlau tawh dâwn  bîk si lo.




*DÂWT I SAWI KHÂN I HLUTNA I HLOH NGHÂL TIH HRIA ANG CHE*




☆GOLD DIGGER☆ - 9 By Dingdi Pachuau



Mipaho ei tùr keng chuan pâwnah chuan ka chhuak a, țhu khâwmin an lo ti ti a. Romeo chu a pa chuan a lo pawm bei tlân a, a lo  tlàn kawi leh zawr zawr ka ring a nia.



"Hei, thei tui tâwk ka siam a nia. Romeo, i duh ve em? Ei rawh aw."



A rawn hawi chhuak nghal a, a pa chuan," A va tui dâwn ém! Bawihte, ei țeuh rawh aw," tiin a zâwt a.



Nunsanga chuan," Ei ang u, digestion atân a țha ngai," tiin a lo ban nghal a.


An ei zawha in chhûnga an luh rual chauhin ka lût ve. Ka peih lo, ka nute bula ka awm ve chuan min be dâwn lo va, vànneihthlâk (?) taka min lo be palh hlauh a nih pawhin min sawisèlna bâk a ni leh dâwn si lo va.



Nunpuii chuan," Kan haw tawh mai dâwn em niang? A mut a chhuak țêp tawhin ka ring," kan luh veleh chuan a lo ti a.



A pasal chuan," Nia, haw hma pawh a pawi lo, naktûk zin ka ngai si a," a lo ti a.



"Khawi lamah nge i zin leh dâwn a?"



"Saiha lamah a niang."



An chhûngkuaa an haw hnu pawhin Kenny-a chu a la awm a, ka nu pawh chu rei țhu lovin a room lam a pan ta bawk a.



"Țhiana, nimin piaha clinic-a i rawn kalpui kha em ni in nu chu?" tiin Nunsanga chuan Kenny-a chu a zâwt a.



"Ka țhiannu a nih kha."



"Țhiannu piah lam a ni deuhin ka ring, a melh dàn che kha ka hmu reng alawm le!"



"Min duh a." Leh ringawt mai a.



"A fel hmel ém kha, a chhe lo bawk."



"Ka va hmu ve châk tak!" ka lo ti ve vat a.



"Chhe lo tak a ni."



"A la tluk lo che!"



"Engtikah nge ka hmuh ve theih ang le?"



Nunsanga chuan," I hmuh châk chuan kumin Chapchàr kût miss kha, a thlalâk en mai rawh," a lo ti a.



"Lunglei maw?"



"Um."



"A chhe lo dâwn tih ka hre sa, a va làwmawm tak! Ka lawmpui lutuk che," tiin nui var varin Kenny-a chu ka en a.



"Ka bialnu a la ni lo."



"Ni thuai rawh se."



Nunsanga chuan," Engtik ațangin nge in inzui țan? Tûn hnai deuh tak chu a niang maw?" tiin a zâwt țan a.



"Kan inzui lo, i clinic-a ka rawn kalpui kha ka vawi khat kalpuina."



"Zêp kher lo la, țhian țhate chu inhrilh vek mai tùr."



Min rawn melh phei a, eng emaw tak hi a mitmengah chuan a lang deuh zawrin ka hria; mahse, a reh leh vat.



"A hre hmasa ber tùr in ni alawm, kan la inzui lo."



"Nei ve tawh la, amahin a duh tho che chuan?"



"Ka la inngaihtuah mêk."



Ka beng bulah Nunsanga chuan," A luck lutuk a buai a nih hi," a rawn ti zauh a.



"Mi dang pawh an la awm elo?!!!"



"Kha kha chu sawi chhuah ka duh lo."



Nui var var chung hian," I va luck bîk tak! Nang hi, nula hian an rawn rîm zut chein ka ring ta, a rûk hian i nghal fê roh ang ka ti," ka ti a, anni pahnih pawh chu an lo nui ve tho a.



"In pa khân a hre chiang ang chu!"



Rei vak lo hnuah chuan a haw ta a, keini pawh rei meng tawh lo chuan kan mu ve ta thuai a.



"Kenny-a hian eng hna nge a thawh chiah le?" Nunsanga lam hawi sat sat pah chuan ka zâwt a.



"Dàwr bungrua a supply a, school a enkawl a, workshop a enkawl bawk. Thil thiam a ngah a, a hna pakhat ringawt pawh hi thawk se, eizawnna tham a tling tho," a ti dap dap a.



"A nih tak chu, eng emaw tak chu a thawh ka ring rĕng a. Engtia inhria nge in nih?"



"A rei viau tawh mai. Lehkha ka zir laiin ka pa nèn Aizawlah kan phei a, kawng lakah kan motor a chhia a, a thi tawp a ni mai. Khâwl thil lam hi ka pa ka chhùn a, ka hre lo khawp. Chutia a ngaihna hre lo taka kan awm lai chuan  Kenny-a hi a pu nèn Lawngtlai lama an kal tùr an rawn tlân a, kan car chhiatna kawng chu a laklawh ém avàngin thil awmzia min rawn zâwt a, chutih lai chuan a la naupang ve viau tho, kum 17 vêl a ni hialin ka ring."



"Kan car chhiat dàn chu a rawn en vêl a, a pu lah chuan a han ring ém ém khawp a, 'A siamsak thei ang che u' a ti mai a, ka ring lo lutuk ringawt; mahse, minute 10 vêlah a siam țha mai a, mak ka ti lutuk. Chuta țang chuan kan inhre chho ta a," a ti leh dap dap a.



"In inhre rei tawh hle mai. Hostel ka awmna țhin neitute tupa a ni tih ka hre tlawng a, chiang takin ka hre lo va," kuah chăih chăih pah chuan ka ti a.



"Nupui hi nei ve tawh se ka ti a; mahse, a ngaihtuah lo khawp a, tihngaihna ka hre dêr lo. Duh hi a nei lo a nih ka ring."



"Gay a lo ni ru reng mai ang ah!"



Ka nui a, ani pawh a nui ve suk.



"Hmânah chuan ngaihzâwng chu a nei ve tawh a ni àwm e; mahse, a vànduai a..."



"Eng thil nge thleng? A bialnu chu a thî tihna em ni?" ka lo ti vat a.



"Um, min hrilh dàn a nia, chuta țang chuan hmeichhia hi a buaipui ngai ta lo va, tuna mi hi duh ve tak tak se ka ti hle a ni," a ti sup sup a.



"A nih tak chu, a bialnu thi ta chu a duh hle a nih dâwn chu. Pathianin a duh tak leh hmangaih tak a la tawntîr leh ngei ang chu maw."



"Ka duhsak hle a ni."



Zîngah hma deuh takah ka harh a, Nunsanga erawh a la thaw sâk sâk mai. Vawiinah kan vêngah ka chho leh dâwn chu a ni si a, ka va peih lo tak! Ka peih lo tak zet; mahse, ka sawi chhuak tùr a ni lo, hetianga hun hman hi ka sawi chhuah kha a ni a, ka inchhìr thu ka sawi tùr a ni lo. Ani chuan rilru zau tak puin leh ka hlimna tùr a duh vànga remti a nih kha, keima duhna avàng liau liauin.



Tho lo chuan Nunsanga âwm chu ka nghèng țha sauh sauh a, ka lêt hnua ka hlimzia ka chhût nauh nauh a, ka lêt hi ka lo tidik chiah a ni. Ka hlim a,Nubawihi a hlim a, ani a hlim bawk.



Nunsanga pawh chu a rawn che țalh țalh a, a bân sei zet chuan duat zeta min rawn kuahin ka chhîpah a fâwp zoh a, che lo chuan a mu leh ta vang vang a, a muhìl leh nghal a nih ka ring.



Ka lo muhìl leh chiang, ka hmuia hmui lum thar tharin min rawn fawh chuan ka harh leh chiah, ka khap sak sak a, khua a lo êng iar tawh.



"Morning, thawh tak tak hmain exer la zawk ila?"



Pawi miah lo.



"Morning, i harhna a rei tawh em?"



"Rei lo, minute 5 chhûng erawh i muhìl hmel ka lo thlîr tawh che!"



Exer chu phûr leh thatho takin thlan tla hnâpin kan la dùn a, kan ințhen leh dâwn tawh si a, a àwm ve tho. Bathroom-ah kan lût dùn leh bawk a, kan inkalsan lo.



Scooty-in ka tlân leh ta vang vang mai. A hahthlâk reuh nain  duh hun hunah ka chàwl thei a, service motor-a chuan ai chuan ka duh zâwk tho tho. Khua a țha a, a zia. Khua chu țha lo se tihngaihna a awm țhak nâng.



Kan in riang tê chu ka han thleng ve leh mai a, a reh raih mai. Ka thlen hnu rei vak loah chuan laptop ka la chhuak a, story ka type. Eirawng bàwl pawh ka peih lo, thil dang ei tùr ka dap mai ang.



*******



Ka lêtna pawh thla 5 lai a lo ni ve ta. Lungleia kan inah chuan ka chhuk thla khât a, sawisèlna tel lova hun hman chu nuam ka ti tak zet. Nunsanga lahin min ngaihtuah bawk a, ka hlim tak zet.



Kenny-ate pawh an inzui ve tawh a ni àwm e. Kenny-a hnên ațang chuan ka hre ve lĕm lo nain Nunsanga a hrilh a, ani'n min hrilh. Ka lawmpui khawp mai, thlalâkah chuan ka hmu ve tawh a, an inhmeh ka ti.



Zan khat chu Nunsanga rawn chhoh laiin  hmâna Sunday zàna Nunpuii lo lèn zàna Nunsanga hmel hriatte lo lêng zînga a hming ka hriat chhun, ka pa hming ang chiah pu vetu kha a lo lêng ve nawlh a, mak ka ti tawp, ka lo hre tawh lo nghe nghe a.



Mahse, Nunsanga'n a lo hre vat a, kan in a hria chu mak ka ti khawp mai.  Kan titi a, Champhai lamah chhûngte tlawhin a zin chho dâwn a ni àwm e.


A hmel ka ngei tehlul nèn, a țawngkam a felin a bula awm a nuam phian. 'Thana' tiin Nunsanga'n a koh vàngin ka ko ve tawp, ka inthiam lo ru deuh.



Nunsanga chhuk hnuah, Champhai ațanga a rawn haw thla chu a lo pêng leh a, Nunsanga a lo awm tawh si lo va, a lêng rei vak lo.



Ni tin ka hun hman dàn chu a ngai pât reng mai. A châng chuan ka ning deuh lek lek a, bànsan daih ka châk. Kâr tàwpah inhmu țhìn mah ila, kan awm dàn hi chu țha ka ti chiah lo. Ka ngai a, ani pawhin  min ngai ve tho va, hetianga thil ka ti hi ka tihsual loh hrâm ka beisei.



Vànneihthlâk takin, ka ti dâwn nge, MSU lamin kârleh Thawhțanni ațangin tiamchin awm lovin Strike an nei dâwn. Kan vêng chhûng mai bâkah Champhai lam kawng zawng zawng an block ang a, khualzin an dang vek dâwn. A chhan chu kan khaw panna kawngpui chhe lutuk siam țhat a ni har lutuk leh sawrkârin an ngaihthah lutuk chu a ni deuh ber. Ka tân chuan hun țha tak a ni, ka pasal bulah Lungleiah ka awm rei thei dâwn a.



Tûn țum ka chhuk hi chu boruak a lo dang zak mai. Ka nuin min lo be hmasa tlat nia, min haw hmel pawh a lo pu tawh lo, mak ka ti tawp. Nunsanga hian a lo zilh deuh emaw ni aw ka ti hial; mahse, a bulah engmah ka hrilh miah si lo va.



Nuam ka ti lutuk ringawt. A piangthar thut mai chu eng nge a chhan ni ang aw ka ti deuh a; mahse, mihringte chu mi sual pawh a inhmuh chhuah chuan a țha thut thei a, mi țha bera ngaih pawh a sual thei tho.



Nunpuii thleng thlengin a ni, min melh rawlh rawlh tawh miah lo. Hlim takin a țawng bawrh bawrh a, ka nu nèn pawh an nui dùn awr awr, ni dangah chuan an nui ngai lo, ka awm ve chuan.



Sunday zànah Kenny-a in luahah chaw kan ei khâwm a, Kenny-a bialnu Bawihbawihi nèn eirawng kan bâwl a, mipa pahnih an lo inkàwm thung.



Bawihbawihi chu a hmelțhat ang bawkin a nungchang a țhat ka ring. A nun a nêmin a zaidam hle a, a nui duh viau bawk. A nuih dàn lah chu mipa duh chi tak niin ka ring, Kenny-a hian a tifuh dâwn khawp e.



Zanriah kîl lai chuan," Engtikah nge dâr ri mawi hi kan hriat theih ang aw?" ka ti zauh a, Bawihbawihi chu a sen ap ap a, a nui sĕih tho.



"Naute nei phawt rawh u."



Meng phar ãk hian Kenny-a chu ka melh a, Nunsanga en leh nghalin," Kan nghah rei vak dâwn loh chu tiraw?" ka ti a, ani lah chuan," Kan naute chuan in fa chu a ngam hle dâwn a nih chu," a lo ti ve a.



"I pai tawh maw?!!"



"La pai ang chu."



Kan nui ta dar dar a.



Chaw ei kham țhut muan lai chuan," Game khèl ang u," ka ti a.



"Eng game maw?"



"Sawi loh awih loh, dâwt sawi awih loh a ni ang. Game kan khelh tùr hi țhatna leh țhat lohna 3 ve ve sawi tùr a ni bawk ang. A țan hmasa ber tùr kei ka ni ang. Ka ti hmasa ber ang a, in hre thiam mai ang. Chuan, kan thil sawi rĕng rĕng hi complain awih loh a ni bawk ang."



Min en țhap a.



"Tu chungchâng nge ka sawi tùr kan en ang," tiin sèr ka la a, dawhkànah chuan ka tuai vir mawp mawp a, a hnûn lamin a kawhna zâwn chu kan en a, Bawihbawihi a kâwk vá a.



"Um, Bawihbawihi țhatna 3 phawt: A hmel a țha, a felin a nui duh, a bula awm a nuam."



"Chuan, a țhat lohna?" Kenny-a chuan a lo ti hmanhmawh a.



"Ka sawi dâwn, lo hmanhmawh viau suh. A țhat lohna chu: A zakzum deuh, a țhianpa a zah mah mah, a induhtâwk thiam lo. Kha zawng kha, Bawihbawihi hi ka la hre chiang lutuk lo va, ka thil sawi kha kan inkawm leh kan titi ațanga ka hriat ve mai a nih kha, a dik kher lo maithei," ka ti a.



Nunsanga'n a tuai ve leh a, sèr hnûn lam chuan Kenny-a a kâwk ta vah mai.



"A, hei hi chu Bawihbawihi chan tùr asin le, ka leh mai dâwn."



"A, a fair lo, sawi mai teh," Bawihbawihi chuan a lo ti vat a, kei pawhin ka lo hnial vat a.



"Um, a nih chuan, a țhatna: Thiam a ngah, țhian rinawm tak a ni, a innghahna tlâk khawp. A țhat lohna ve thung: Dawhtheihna a nei tlêm, hmel hriat loh tân a nèlawm lo, a thinchhia."


Kenny-a chu kan en țhap a, a meng kual rulh rulh a, complain a châk ngawtin ka ring.



"Ka hun ni ve tawh rawh se."



Sèr chu a la a, a tuai vir a, min kâwk ta vá mai.



A țhu țha phawt a, a ngawi vang vang phawt a, keini pathum lah chuan kan lo ngaichăng țhap a.



"Țhatna: A luhlul, hmangaihna a ngah, nupui țha tak a ni. A țhat lohna: A dawihzep, thil a zêp thei lutuk, harsatna tlànsan a chîng."



"Eng-"



A kut rawn pharin," Complain awih loh!" a lo ti sup a, ka va ngei tak! Eng thil nge a hriat a, heti taka min chhuah chhiat ni?



"Bawihbawihi  hun ve thung."



Kan tikual leh vek a, a hnuah erawh fiamthu-ah lain kan nui vak vak a, dik lo baksakin kan insawisa hlawm a, zàn hun kan hmang nuam e.



Kan haw kawngah chuan Nunsanga chuan," Thil zêp i nei em ni? Ka hriat ve loh Kenny-a'n hriat a nei em?" a ti ta sup a.



"Ka hre lo, mak ka ti tawp maw le. I hriat loh thil hrilh ka nei miah lo,ka chiang a ni."



"A nih tak chu, zêp i lo nei em ni aw ka ti a."



"Ka nei miah lo, ka pasal i nia, ka hrilh loh che ani ka hrilh bîkna tùr a awm hlei nem."




*SAWISÈLNA RÎ AIIN FAKNA RÎIN LÀWMNA A SIAM, I CHÈNPUITE FAK ȚHÌN RAWH, CHUTIANGIN I BULA AWM ȚHÌNTE PAWH*



☆GOLD DIGGER☆ - 10 By Dingdi Pachuau



Lungleia ka awm chhûng chuan ka nu chuan vawi khat mah min sawisêl ta lo. Chhùn lamah Zovi thil ka tihpui hnuah clinic lamah ka kal a, scooty chahbi pawh a lo thukru tawh bîk lo.



Ka hman veleh Puteate ka va tlawh ve zawk a, mak min lo ti khawp mai. Ka pasal hnênah ka haw leh tawh tih ka hrilh chuan Pitei chuan," Țha lutuk tlat, inneih leh hi a țha. Țha deuhin awm rawh u, mipa chu duat hi an ngai a, pâwn lamah chak tak angin lang mah se, chhûng lamah hian nona an nei ve tho.  Duat leh ngaihsak hi an duh ve lutuk a nia, sawi lang kher lo mah se," a lo ti siam siam a.



Putea chuan," Hman remchàn hunah in nupa chuan chaw pawh in la rawn ei dâwn nia," a lo ti ve a.



"Um; mahse, hun remchâng hi a nei lo lutuk a, a buaithlâk khawp mai. Ka lo hrilh ang a, ka lo chhuk leh hunah kan lo tum ang, kan inbia ang a."



Clinic-ah ka pêng haw leh a, Linda-i'n min lo hmuh chuan min lo nuih sâng a, Nunsanga erawh room dangah awmin damlo a en mêk a.



"I awm lai a nih vàng a nih hi Boss pawh a nuih sûng reng ni."



Ni dangah min fiam ngai si lo va, min lo be vak ngai lo bawk. Min haw lo va, min ngaina chuang bawk lo. Chutiang tho chu ka hmuh dàn a ni a, kan inbe vak lo ve ve.



"Maithei a ni."



"Engtikah nge i chhoh leh ang?"



"Naktûk lamah a niang."



"Naktûk ațang chuan a hlauhawm leh țan dâwn a ni maw?"



Nunsanga hi a thin a chhe lo va, a hlauhawm ngaiin ka ring lo. Min vìn ngai lo va, ka hriatah țawngkam vîn a la hmang miah lo.



"Lo hre thiam hrâm mai rawh u."



Linda-i ka en cheuh cheuh hian khawi lai tak hi nge Nunsanga hian a duh loh ang aw tiin ka ngaihtuah ziah. A hmelțha, a smart, a polite, doctor a ni bawk. Tu tlangvâl tak vànnei ang maw ka ti, hetia a bialpa hlui bula a thawk duh mai hi  mak ka ti, beisei leh tùrin nupui nei a ni tawh si.



Haw kawngah chuan," Linda-i hi a chhe lo hle si a, engtin nge in ințhen theih le? Ka nu lahin a duh hle si a," ka ti phawng a.



Min rawn en zawk a, kawng lam en leh nghalin," A nu vàng a nia," a ti sup a.



"Min hrilh chiang la, chuan, ka bialpa hlui chanchin ka hrilh ve ang che."



A nui huk mai.



"Mawh? Hun kal tawh tho alawm."



A thaw huai phawt a,"A nuin mâkpa atân min duh lo va," a ti ta sup a.




Makti zet hian ka lo meng kâwk a, engtin nge a nih theih? Doctor a nia, a nu chu a va meng sâng àwm ve aw.



" Nangmah chauh ka hrilh che."




"Eng ang fakauva mâkpa țha nge a duh a? Chief Minister em ni? Nge US president? Nge UK prime minister?"



A nuih a za khawp a, a nui hawk hawk mai.



"Ka ti tak tak. A chàn nasatzia hi hte teh hlauh se aw...Mahse, a pawi lo, keiin ka lo tawng thung che a."



In kan thlen dâwn chuan," Engineer tlangvâl a duhpui zâwk a," a ti leh zauh a.



"A inchhîr tawh ngawtin ka ring, kei lahin hnâwla a paih kha rangkachak țha mi a ni tih ka lo hre reng mai sia, ka lo chhar chat mai a," ka ti a, kan  nui dun char char a.



"Zànah i bialpa hlui chanchin chu min hrilh ang che, i bâ."



"Min khawngaih ngawt ang!"



"Lungchhiatthlâk lam elo?!!"



"I hre dâwn alawm."



Chaw ei kan siam lai chuan Zovi chuan," U Zualbawih, naktûkah maw i kal leh tawh dâwn? I ngaihawm leh dâwn mang e," a ti a.



"Um, nangni tak a nia ngaihawm leh dâwn ni, ka rawn ngaihtuah leh vawng vawng dâwn che u asin."



A nui hak hak a.



"Nia, helam chu i rawn ngai țhìn ve tho chuan ka ring, helama mi pawhin a ngai leh vawng vawng khawp ang che," a ti a, a nui pah ar ar a.



"Min ngai ve ngai em ni le?"



"Ih maw, a țawng țha duh lo țhìn a," rawn kûn hniam deuhin ka beng bulah chuan a rawn ti sar sar a.



"Eng nge in lo sawi?" Kan bul deuh maiah chuan Nunsanga chu a lo ding tawh  a, ka lo hmu miah lo.



"Kan lo rêl che."



"A na lo e."



Zanriah ei khamah chuan Nubawihi ka bia a, Nunsanga chuan news a thlîr thung.



"Bàbî, i chhûngte an țha maw? An la fel reng em?"



Ka nu leh Nunpuiite an fel tawh lutuk tih ka hrilh tak kha maw le, a la hre ve reng a nih hi.



"Um, a nuam tawh lutuk. Kan țha e, nang i țha em?"



"Aw, Bàbî, ka țha e. Țhian Tripuri ka nei thar a, ka vànnei lutuk. Lehkha thiam deuh a nia, a fel bawk si."



"A nih tak chu, i va vànnei tak ve aw...mahse, fîmkhur hle tho rawh aw."



"Aw le."



Room-a ka thawmhnaw ka siam fel laiin Nunsanga a rawn lût a, ka thil tih lai chu ka tih chhunzawm reng a.



"Min kalsan leh tùr chu i phûr riauin ka hria."



Makti zet hian ka inher vat a, meng phâwk  zet hian," Teuh lo, ka peih lohzia hi; mahse, chhoh loh ringawt chi a ni si lo," ka ti a.



"Kan chho dùn dâwn em niang?"



"Tak tak?!!!! Naa, i ti tak tak lo," a tifiam hmêl ka hmuh chuan ka phùr thutna leh làwmna chu a zuai leh vat a.



"Kâr tàwpah kan inhmuh leh dâwn tho kha."



"Hmmm, i sual e, ka thin i tiphu hman alawm le."



Khuma a mu duai mai chu panin a mut dàn ang chiah chuan a bulah chuan ka mu thla ve a.



"Le, min hrilh tawh la?"



"Ka țhiannu nèna an in-gus gus lai ka phâwk a."



"Eng maw?!"



"Ka bialpa neih hmasak ber a ni a, cl - xii ka zir laiin a ni nghe nghe. Ka țhian țha ve ber nèn a ni bawk sia, ka zak lutuk a." Ka mitthlaah chuan khâng hun lai kha ka hmu leh chuai chuai mai.



"A va mak ve!!"



"Ka țhiannu nèn chuan kan inthlah nghal mai bâkah ka bialpa pawh chu ka țhen nghal hmak, a tlàwmthlâk ka ti lutuk. Tu bulah mah ka sawi chhuak bîk lo," ka ti ve sap sap a.



"I țawngkam hman kha eng nge kha?"



"Eng kha?"



"Eng thil nge an tih kha?"



"Gus gus maw?"



"Aw, kha tak kha. Eng thil i sawina nge?"



"A, i hre reng, thil pawi tak a ni mai!"



A nui suk a," I thu hman kha ka la hre ngai lo va, a țha reuh ka ti phian mai. I chunga thil thleng erawh pawi ka tiin a thinrimthlâk khawp ang," a ti sup sup a.



"A zahthlâkin a tlàwmthlâk ngawih ngawih!"



Min rawn kuahin," Kan in-gus gus ve tawh mai dâwn em niang?" nui chung hian a ti a, kei pawh ka nui a.



"Mut hma a pawi lo, naktûkah ka kalsan dâwn si che a."



*******



Ka rai har ka ti, dik lohna ka nei em ni aw ka ti hial. Rai hi ka châk hran lo; mahse, ka pasal fa chu ka pai duh, kan rîla rah fa neih ka châk, kan inkâr țha tak hi a tihțhat belh sawt dâwn asin. Ka nu pawhin a fapa fa (tu) chu a duat ve ngei dâwn si a.



September thlaah ka chhuk thei leh. Ka nu a fel tawh bawk a, nuam ka ti. Ina awm pawh ka hreh tawh lo, Zovi bazâra a chhuah pawhin inah ka lo awm ve mai.



Thawhțanni a ni a, ka nu leh Zovi an chhuak a, ka nu chu Nunpuiite inah a kal lawk dâwn. Zovi erawh bazâr pahin a lêng ve rih, a chhûngte a tlawh pah ang, a lo haw har ve deuh ang chu.



Eirawng bâwl tùr ka ni. A la hma a, clinic lamah ka kal lawk dâwn em ni aw ka ti rilru a, ka insiam a, hrilh hmasa lova surprise ka tum deuh hlek.



Thana a rawn lang ve leh nawlh mai. Mak ka ti deuh a, ani pawh chuan maktih hmel deuh hian," I la chho nange? Zovi a awm ka ring deuh a nia," a ti ve a.



"Aw, naktûkah ka chho ang chu ka tia, Zovi chu a chhuak rih a, lo țhu rawh," tiin ka lo be ve sawk sawk a, Nunsanga hmel hriat a nih vàngin ka ngaihben a ngai.



"Ka awm rei lo ang, chhuah i tum em ni a?" tiin a țhu a.



"Tum  rilru deuh, clinic lamah ka kal ang chu ka ti a, eirawng bàwl hmain."



"Chhuak tlâng ila."



"Um," tiin chahbi dahna drawer chu ka hawng a, scooty chahbi chu a lo awm leh tawh lo. Ka lo dah sawn leh tawh em ni? Nge ka dahna ka hre lo?



Ka hai kual nasa lutuk, ka hmu lo.



"Ka dah reng sia, a va mak tak!"



"Eng maw? Eng nge ni a?" Ka țawng chu a hriat phâk pawh ka lo ring hlei nem le.



"Scooty chahbi maw le, drawer-ah hian ka dahin ka hre sia."



Ka zawng kual a, ka dap kual leh nasa.  Min zawnpui ve a, keiin room lam ka zawn laiin aniin room chhûng lo lam a zawng ve thung a.



Ka nu room leh Zovi room pawh ka en thuak thuak, a awm ka ring lo nain. Buhpâwl zînga hriau bo zawn ang vêl a ni, a vâng lutuk.



"Room ka'n zawng țha leh chhin ang e."



Kan nupa room-ah chuan lût lehin ka zawng kual leh a, mak ka ti kher mai. Ka nuin a la ti dâwn ila ka ring bawk si lo, Nunsanga bag-ah ka lo dah palh em ni aw ka ti zâwk hial; mahse, chu pawh chu ka ring lo.



"I la hmu chuang nange?"



Ka phu chiang lutuk ringawt!



Thana chu kan room-ah chuan a lo lût reng tawh niin, ka lo hre miah lo. Chahbi hlîr ka rilrua a awm vàng a ni. A lo lût ve ringawt chu mak ka ti, lût tùrin ka sâwm si lo va. Ni lo, ka sâwm ngai lo ang, kan nupa room-ah hlauh phei chuan.



"Aw, ka kal lo mai ang," tiin chak zetin kawngkhàr lam chu ka pan phei a, ka bânah min lo man chat mai!



"Zuali, i chhe lo ka ti tak zet a ni."



A va mak ngai ém!! He pa hi Nunsanga țhianpa a ni thei lo ang, mak ka ti lutuk chuan chêt nachâng pawh min tihre lo.



Ka bân chûl pah chuan," I chhûngte an awm chuang lo va..." a hmaiah ka bêng țhuai mai.



"I zak nange?" Ka aw chu thinrim nasa lutuk vangin a chhuak țha hlei thei lo.



Nghet zeta min chelh betin," Zak nâng, ka duhnaah hian ka zak ngai lo, nula hmelțha bulah phei chuan," a ka ti deuh deuh a.



"Nula ka ni lo!" Ka tâl nasa mai a, min chelh ngheh ém avàngin ka bân chu a na kher mai. Ka au vak dâwn em niang?  Au pawh ni ila, tumahin an hre dâwn si lo, kan in a phui lutuk. Chhuah ka tum vàngin tukver pawh ka khâr vek tawh.



"Tâl suh, tihnat che ka tum lo, nuam taka siam che ka tum zâwk a ni."



A mitmeng hur hmel zet chu ka hmu chawpchilh a, ka thin a rim a, ka hlau rilru deuh bawk. Hetiang hi ka tawn ka ring ngai lo.



"Țawng tawh suh! Min thlah rawh, min thlah la, chhuak nghal rawh. Min tih dàn hi Nunsanga'n a hriat hunah chuan-"



Min pawt hnai thut a, min fâwp nghal. Ka rin loh thil a ni a, ka lo thle sawn hman hrâm. Ka ten lutuk leh ka hlau lutuk chu țè pawh ka țê lo, ka harh chhuah hnuah ka tâl vak a, ka tâl chhuak chuang lo.



"Kan pahnih chauhin kan awm hi, tâl tâl duh suh, i duh ve tho tih ka hre chiang alawm."



Min pawm bet lehin ka kawr chu a pawt  vak a, a ri țhat mai. Chutah, khumah min theh tlu țhuai a, ka tâl sawn hmain min rawn bawh bet nghal a.



"Tenawmpa-"



"I pasal leh chhûngte awm loh lai hian nuam kan chèn thei alawm, nang pawhin i duh reng kha, i mitmei hmu lovin hetiang hi ka ti ngam hlei nem-"



"Mi tenawm pahnih, eng thil nge in tih a?!!!!"



Ka nu min hmuh dàn tùr pawh chu ka ngaihruat thiam lo. Ka zak bawk si, ka nu lo haw ka lâwm bawk si chu ka țap lo chauh.



"Ka nu-"



Thana chuan," Ka pi, i monu nèn kan inkârah rawn inrawlh suh, kan induh a, inah tumah an awm loh thu min hrilh a ni," a ti ta daih a, khum ațang chuan a tho ta nghal a. Makti zet hian ka en chho a, dâwt a sawi thiam lutuk avàng chuan țawng ngaihna pawh ka hre lo hial.



"Zuali..?" Thu dik a ni tiraw? Engtin nge hetiang-"



Tho vatin," Ka nu, ni lo, dâwt a sawi a nih kha," ka ti vat a.



"Ka pi, ka bialnu kha engtin mah ti suh, i lo haw hun a fuh lo ém mai."



A va zak lo tak! Dâwt a sawi thiam bawk si, hre ve miah lo tân a thu sawi hi a awihawm ngawt ang.



"Nang kha, ka fapa nupui i lo mutpui ngam maw? Nang pawh Zuali, hre rawh, engtin nge i tlangvâlpa chu in nupa room-ah i tawmpui ngam a?! A râpthlâk ka va ti tak! Chhuak rawh, chhuak ngei ngei ang che," thinrim aw chang bàng hian a ti hmawk hmawk a.



"Ni lo, ka nu, ka sawi fiah vek ang, i thil hmuh ang kha a ni lo. Ka nu, ka ti tak tak, kha pa khân min sual a tum a ni," ka lo ti sawk sawk a, tunah tak hian ka dinhmun derthàwnzia ka hre chiang chiah.



"Ka mitin ka hmu a, ka bengin ka hria. In tenawm hle mai, a va zahthlâk tak! Khaw êng pawh kan hmu ngam tawh dâwn em ni? Aw, ka fapa, ka va khawngaih tehlul che ém!" a ti tlawk tlawk a.



"Ka nu, a ni lo-"



"'Ka nu' tiin min  ko tawh hlek suh, ka ten che, ka ten hluah hluah che!" a ti tuar tuar a. Ka rilru hrehawm leh nâ lutuk chu ka mittui a tla zawih zawih mai.



"Kha pa kha Nunsanga țhianpa a nih váng chauhin-"



Ka samah a rawn kêk lawp mai a," Sawi tawh suh, tenawm lutuk! Ka fapa rilru tùr ngaihtuah rawh, engtin nge hetiang hi a chungah i tih theih? Mawh, sawi rawh," a ti tuar tuar a, chutah, min thlah thut a," Ka ten, ka ten lutuk. He ina awm tùr hian ka duh lo che," a ti leh țhat țhat a.



He thil hi ka rin loh dàn daihin a kal dâwn tlat. Ka hawi kual a, kha pa kha a lo awm tawh hauh lo.



"In pa ka phone dâwn a nia. Tuna chhuah nge i duh a, a lo thlen huna chhuah? A ngaidam dâwn lo che tih ka hria a nia."



Ngaih dàn mumal ka nei lo, ka ngaihtuahna a chawmawlh a, ka thil sawi ve tùr a ngaithla duh bawk si lo. Nunsanga chuan a lo ngaithla duh maithei asin, ani chauh innghahna ka nei ta. Ka nu hi ka thiam lo miah lo, min rawn hmuh dànah kha chuan min puhna hi a dik dâwn lutuk tlat.



"Ka lo nghâk ang."



Lo nghah hi a dik lohna eng nge awm ang? Ka pasal chuan ka thil sawi a ngaithla duh ngei ang. Min ring ngei ang.



Nunsanga chu a lo thleng thuai, a hmel a phelh deuh phung mai. Ka nu hian a hrilh thawi a ni chiang, engtiang takin nge a sawi ang le?



Kei chu khumah ka țhu a, Nunsanga leh ka nu an ding thung.



"Eng nge thil awmzia?"



Ka tawng hma chuan ka nu chuan," A râpthlâk lutuk, sawi pawh a zahthlâk. Ka haw laiin tlangvâl pakhat nèn in nupa khumah hian an lo awm a, kawngkapui pawh chhûng lamah a lo inkalh thlap; mahse, chahbi ka neih avàngin ka hawng thei a, in room lama thâwm ka hriat avàngin ka lût a, khawvêla ka thil hmuh duh loh ber thil tenawm tak chu ka hmu a ni," a lo ti vat vat a.



Ka hawi chhuah loh avàngin  Nunsanga hmel awm dàn ka hre thei lo.



"Zualbawih, thu dik a ni em?"



Ka hawi chhuak ve chiah. Nunsanga hmel ațang chuan a rilru put dàn tùr àwm chu a hriat miah lo, a hmel a lang chang viau ringawt.



"Thu dik a ni lo, ka nu sawi dàn kha chu a hmuh dàn mai a nia. Kha pa kha ka ngaizawng lo va, ka ngaizawng lo mai ni lovin i hmel hriat a nih vàng chauha be ve mai ka ni. Pasal nei lai ka nih hi, ka nei che a, mi dang ka mamawh lo."



Ka nu chu a lo chek hlak a, ka thil sawi chu a awih lo tih ka hria.



"Room-a scooty chahbi ka zawn laiin a lo lût ve ringawt a, khatiang rilru kha a pu ang tih ngaihna ka hre miah lo-"



Ka nu chuan," A sawi dàn chuan a bialnu chu i nih kha, khita in khuaa i awm laiin, nangmah chauha i awm lai pawhin a lo lêng a ni lo'm ni?" a ti ta fak fak mai.



Engtin nge a hriat theih le? Makti zetin ka en a.



"Kha, ka sawi dik kha maw, thup theih a ni lo. I pasal leh i pasal chhûngte chu min lo bum hneh hle mai tiraw? Ka rin i lo ang lo khawp mai, i lo zak lo tak zet  a ni," a ti leh hlawih hlawih a.



"Kha pa kha ka ngaizâwng lo, dâwt vek a nih kha a sawi kha."



Nunsanga chu a ngawi reng, min melh rùn a, min ring nge ring lo pawh ka hre thei lo.



"Kan awm loh vek lai leh nangmah chauha i awm lai engtin nge a hriat chat le? I hrilh ni khân a sawi si kha."



"Ka hre lo, hrilhna chhan tùr ka nei lo va, a phone number pawh ka nei hek lo."



Nunsanga chuan," Khawi, i phone en ila a hriat theih ang chu," a lo ti hmuk a, ka phone chu khum bulah ka dah lo va, sitting room dawhkàn chungah ka dah, scooty chahbi ka zawn buai avàngin.



Phone chu lain ka pe a, ani chuan a en zar zar a, a hmu dâwn si lo va, min ring ngam dâwn tih ka hria a ni.



"Hei hi?"



Ka hmai bulah chuan a rawn tilang chiang a, makti zetin ka khap sak sak mai. Thana numer ka lo nei! Chuan, chhùnah khân ka lo call bawk!!!



"Thil theih a ni lo!"



"Dâwt sawi tawh lo mai teh, a number chu i nei reng si a, zêp i tum khanglâng a."



"Ka nei tih ka hre miah lo, ka call bawk hek lo."



"ZUALI...!!"



Ka phu dâwrh mai, a awka vîn ka hre ngai lo asin.



"Engtin nge i tih theih?!!"



A awka chhuak ațang chuan a rilru a nâ tih ka hre thei, hrehawm ka va ti tak ém!




*I NUN LEH MI DANG NUN KHAIKHIN NGAI SUH, NI LEH THLA PAWH HI KHAIKHIN AN NI NGAI LO, AN HUN DIK TAKAH AN ÊNG MAI A NI*