☆GOLD DIGGER☆ - II By Dingdi Pachuau

☆GOLD DIGGER☆ - 11 By Dingdi Pachuau




"Dâwt vek a ni, dâwt vek. Nunsang, ka bum lo che, min ring rawh."



Ka țap lo ang, dâwt a ni. Dâwt vànga țah chu ka duh lo, ka intihchak a ngai.



"Thil awmzia dik takin sawi rawh."



Ka nu chu a lo inrawlh lo tlat mai, a kal sawn ta daih nghe nghe. Thil nih dàn dik tak chu ka sawi zar zar a, ka duhthawhna lutukah ka thaw a chham lo chauh a ni.



"Chutiang chu thil thleng dàn chu a ni a, engtin nge kha pa khân ka chungah khatiang thil kha tih a tum theih ka hre miah lo, i țhian leh hmel hriat sa a nih vàng chauha be ve mai țhìn ka ni zâwk asin."



A ngawi ràn a, ka thil sawi chu a ngaihtuah nasa a niang, a chal chuar leh nâng țhìn a.



"Rin che ka duh, ka duh tak zet a ni."



"Min ring rawh, dâwt ka hrilh lo che."



Ka phone a rawn rì a, Nunsânga bul hnaiha a awm vàngin ban pawh ka tum lo.



"Chhâng rawh, loudspeaker on la?"



Thana'n a rawn call nia, a va zak lo tak!!! Chhàn pawh ka duh lo asin; mahse, Nunsanga'n chhâng tùrin min ti si. Thu dik a rawn sawi maithei asin, ka zâwt chhuak thei ngei ang.



"Eng thil nge i tih hi i hria em? Engtin nge ka number i neih theih?"



"Ka ngaihtuah lutuk che a, engtikah nge in ațang khân i rawn chhuah theih dâwn? Ka lo nghahna tùr che chu kan sawi fel vek tawh kha, ka lo  nghâk reng ang che."



Mak ka ti lutuk chu ka meng kâwk mai. Dâwt a va sawi thiamin àwm ang deuhin a va sawi thiam tak.



"Engtin nge ka chungah hetiang thil hi i tih theih? A râpthlâk tak zet a ni, Pathian pawh i zah nange?" ka ti tàwn táwn a, ka insûm thei lo.



"Lo chhuak thuai mai teh, i bulah i chhûngte an awm a ni maw? Ka hre thiam e, Khawzawlah pawh ka rawn lèn tho kha, khatah khân min haw miah si lo. I nuin min rawn phâwk vàng kha em ni i hel deuh? I rawn chhuah hunah-"



"I zak miah nange? Dâwt muhlûm sawi tùrin em ni i rawn phone? Thu dik sawi rawh," ka ti tuarh a.



A rawn nui kur kur a, ka bulah chuan awm na se chuan ka insûm thei hauh lo ang, dâwt sawi peih lutuk!



"Kan awm dun lai khân nuam i tih tehlul nèn, tuna i aw nèn chuan a dang hle mai. Um, kei pawh ka thinrim khawp, i nuin min rawn hmu hman kher kha a pawi ka ti, min ringhlel dùn ta ngei si a, chuvàngin, kha in ațang khân lo chhuak thuai mai la, a fel vek mai ang."



Ka thinrim lutuk avàngin ka chhâng thei tawh lo, ka aw pawh a chhuak thei lo ang, ka insehruh țeuh a, ka kut ka hum ngawt ngawt ringawt.



"Ka lo nghâk ang che, i tân pawh khata awm reng kha a nuam tawh dâwn chuang lo. Naute kan nei ang a, i duh phawt chuan in khuaah kan awm dâwn nia. I ruak loh thu kha i sawi tawh kha tiraw? Kan naute tùr chu mipa ni ngei se-"



"Sawi tawh suh, a va râpthlâk tehlul ém! Dâwt ni lo, thu dik sawi ta che," ka ti zàwi raih a. Dâwt thu ka hriat chuan min tichau ngawih ngawih.



"Ka lo nghâk che, a hmun chu i hriat kha." Phone chu a dah nghal a.



Hm, ka chan a chhe tak zet. A thil sawi lo ngaithlatu tân chuan dâwt a sawi tih a hriat miah si lo va, Nunsanga'n ka thu sawi a ring tawh kherin ka ring lo.



"I rai em?"



Nunsanga chu ka en chho vat a, a lo meng dur nasa mai. Hm, Thana thu sawi kha a lo ring a nih chiah hi, ka hlauh ang ngeiin.



"Rai lo. Nunsang, a thil sawi zawng zawng kha dâwt vek a ni, i ring lo tiraw? Ka sawi hi awih hrâm rawh," ka ti a, ka thu sawi hi ring se ka ti.



"Ka awih theihna tùrin evidence țha tak ka duh."



"I nupui ka nia, ka thil sawi i ring ngam lo em ni? Mipa dang ka melh i hre tawh ngai em? Nunsang, ka thu sawi i rin loh chuan tu thu sawi nge i rin chuan ang le?" ka ti sap sap a, min ring tùrin ka duh, min ring tùrin ka ngèn ngawih ngawih.



"Min ring rawh, Nunsang. Dâwt ka hrilh lo che, kawng dangah chuan ka fel lo a ni thei; mahse, hetiang lamah kher hi chuan ka fihlîm a ni," ka ti koh koh a.



Min chhâng lo, ngawi rengin min en a, a hnuah chuan ngawi reng thoin room ațang chuan a chhuak ta daih a.



Ka ă muih mai. Ka ngaihtuahna a buai nuai nuai a, fîm taka thil ngaihtuah ka duh; mahse, tunah chuan ka ngaihtuahna a fîm thei lo, a buai nuai a ni mai.



Ka țhut ngaiin ka țhu reng a, ka che sawn lo, room pawh ka chhuahsan hek lo. Khawiah nge Nunsanga kha a kal a, eng nge a tih pawh ka hre lo. Chaw ei tùrin min rawn ko lo va, min rawn ko pawh ni se ei châkna pakhat mah ka nei lo.



Bathroom-ah ka lût a, ka inphih fai ve a, ka mit chu a lang bui deuh  hlek a, a sen rûm bawk.



Ka ngaihtuah kual a, Thana hian ngaihzâwng melhin min melh ngaiin ka hre lo, ka lo chîk ngai loh vàng nge ni ka hre lo; mahse, mi â ka ni bîk lo va, min hĕltu leh min melh deuhtu chu hriat ve àwm tak, chutiang chuan min en ngai hauh si lo; mahse, vawiinah kha chuan mi hurherh ber angin a awm si a nih kha.



Ka nuin min ringhlel kha ka thiam lo hran lo, a tân chuan a awihawm ngawt ang, bâkah room-a ka awm hlàn, chahbi ka zawn hlàn khân Thana'n kawngka kha a lo kalh pawh a ni thei a, kha kha chu ka hre hauh lo, min rawn hmuh dàn kha chu ka nu tân chuan rinhlelh loh rual kan ni mawlh lo.



Ka phone-a a number lo in-save tlat mai kha a mak ka ti thlâwt. Ka phone hi mi dangin min khawihpui lo khawp, ka duh vak bawk lo. Ka lock ngai lo, a chhan chu kan hma hun kan hre lo va, țawng thu chhe lovah, thil chhe ber kan tâwk thei, lìrthei kan hmang nasa si a. Ka chunga thil țha lo a lo thlen palhin password kha miin an hre dâwn si lo va ka tih vàngin ka lock lo.



Nunsanga mawlh mai, min rin duh viau mah se, a thil hriat ațang hian ka rinhlelhawm dâwn lutuk. Min rin loh chuan ka chan tùr chu, a va râpthlâk dâwn ém!! Pasal țhen mai ka ni dâwn lo, uirè vànga a pasalin a hnawh chhuah ka ni dâwn.



Ka muhìl lo, khumah chuan ka țhu reng a. Nunsanga thăwm pawh ka hre lo, khawiah tak awm ang maw? A rilru a na dâwn asin, a na viau ang. Min ring se, dâwt a nihzia hi hria se ka va ti tak! Chumi lantîr chu theih teh hlauh se aw...



Ka tlaivâr chiang hle mai. Ka ke a kham lutuk a, khum ațanga ka tho chhuak tùr chu ka ke kham leh mu nasa lutuk avàngin chhuatah ka tlu thla țhuai. Chhuat phah hmul chhah deuh tak khum bula kan phahin min chhan mai mai, chuti ni lo se chuan ka insawh na ngei ang.



Nunsanga a rawn haw lo nge room dangah a riak le? Ka bulah pawh a awm duh lo tihna a ni a, tunah chuan beiseina ka nei chau lehzual ta. Ka mit kham úrh chu ka khap sak sak a, Nunsanga mutna side  chu ka thlîr phei a.


Zan hmasate kha chuan tui taka muin hmangaihna kan chèn dùn a, kan inthlah phal lo va, inkuah rialin kan muhìl a nih kha. Dârkâr rei lo tê chhûng hian thil a va danglam chak ém! Tunah chuan ka bula awm chu sawi loh, min hmu thei miah lova awm a duh ta zâwk si.



Room-a awm reng theih ni lo le, room ațang chuan ka chhuak a, Zovi a lo tho tawh a, ka nu pawh a tho tawh, Nunsanga erawh ka hmu lo, inah a awm lo a ni ang.



Zovi eirawng bàwlpui ka tum a, chokaa ka lût chu ka nu, room ațanga lo chhuak chuan min rawn hmu a.



"Zuali, ka room-ah lo kal lawk teh."



Phûr fahran lo chuan ka pan chhat chhat a, eng tak sawi ang maw? Min àn khum hrep loh hrâm ka beisei.



Ka ding zum zât a, thil tisual ang maiin. Hei hi chu ka mizia a ni ve hranpa rĕng rĕng. A chhan chu kan inkâr kha țha viau tawh mah se, nimin thil thleng vàng khán a dik lo leh vek tawh.



"Engtin nge i awm dâwn?"



Engtin nge ka awm ang? Khawzawla ka chhoh ni a ni leh tawh a, ka chho ang; mahse, thil awmzia hi fel phawt se.



"Nunsanga ka bia ang a, ka sawi fiah leh ang," ka ti sap a.



"A hnênah dâwt sawiin i insawi fiah ang maw? A awihin i ring em? Zak teh, Zuali. Khati khawpa chianga ka phâwk hnuah che, insawi fiah i la tum maw? Ka rei! Eng ang mi-ah nge min ngaih a? Hetiang mi tenawm hi chènpui atân leh ka fapa nupui atân ka duh cheu i la ring em? Ni lo ve, ngaihtuah chiang ta che," a ti ta érh a.



"Ka nu, dâwt ka sawi lo, min rawn hmuh dànah kha chuan rinhlelhawm tak chuan min hmu thei ngei ang; mahse, ka fihlîm a ni," ka ti ve țàng țáng a.



"Ka fapa pawh a lo haw duh loh hi i hria em? Tu nge uirenu bulah chuan rawn lêt duh ang?  A rilru i tihnatzia hi, i hre thiam duh pawhin ka ring lo. Ka fapa hi he in ațanga a chhuah hi ka phal rĕng rĕng lo, nangmah kha chhuak ang che," a ti ta hlawih hlawih a.



He in ațanga chhuah maw? Ka pasal nu thu zàwmin ka chhuak ringawt thei lo ang, Nunsanga'n a sawi a nih loh phawt chuan.



"Ka thei lo, Nunsanga'n min ring lova chhuak tùra min ti a nih chauh loh chuan ka chhuak lo ang," ka ti ve tlat a.



Min melh dàn chu min huat hmel ngawih ngawih, ni lo, min ten hmel zâwk.



"A lo haw dâwn lo, i chhuah thuai a țha zâwk ang, miin an hriat darh hmain.  Miin ka fapa an sawi dàn tùr ngaihtuah teh, 'A pasal awm loh hlànin a tlangvãlpa a lo tawmpui țhìn, an nupa room-ah' tiin. Ka va zak dâwn tak ém!! Chuvàngin, miin an hriat pun tak tak hmain chhuak ang che," a ti leh a.



Ngaithla duh tawh lovin ka chhuak a, kan room-ah ka lût a, ka thin a va rim tak ém! Dâwta puhin ka awm a, ka thu dik sawi chu dâwt emaw an ti tlat zâwk. Engtin nge ka insawi fiah theih tâk ang le?



Bathroom ațangin Nunsanga chu a lo chhuak a, ka hmu thut chu ka hlim kher mai. Nizàna a lo haw loh vàng maia lo thinrim khum ka duh lo.



"Nizànah khawiah nge i kal daih a?"



Min chhâng lovin a thawmhnaw dahna chu a hawng a, kamis la chhuakin a ha nghal mawlh mawlh a.



"Nunsang, min ring hrâm rawh."



"I dik thlap tih proof-na min hmuhtîr rawh."



A nupui hi min ring hlawl lo tihna. Mi dang thil sawi kha a àwm bîk ém a ni.



"Min rin loh chuan tihngaihna ka hre lo, dâwt ka hrilh lo che. Chu tal chu ring teh, chhuahsan che hi ka duh lo," ka ti lawm lawm a.



A ngawi leh rih ta. Ka chhuahsan hi a duh bîk lo a niang, kei pawhin ka duh lo. Ka pasal a nia, ka hmangaih alawm.



Ka pan hnai a, ani erawh chuan min hmu lo, min hnungchhawnin a ding tlat atin a ni.



A kâwnga ka va kuah chuan," Min dek suh,"a lo ti țhat a, ka phu zawk, ka bân ka la lêt rang lutuk.



"Min dek miah suh, dâwt i sawi lo a ni tih i finfiah hma chu min dek suh ang che."



Ka rilru a na kher mai. Ka pasal, ka innghahna awmchhun berin min ring zo lo, mi dangin min ring lo pawh ni se ani hi chuan min rin ka ring asin.



"Min ring zo hlawl lo maw?"



"I finfiah hunah chauh."



"Min rin ka ring asin!" Ka rilru a na tak zet a ni, ka mittui  a tlâk loh nân ka insûm hrâm hrâm.



"Ka rin angin i awm si lo a ni."



A chhuah hnuah room-ah chuan ka la awm reng. Ka nu a rawn lût a, thaw hawkin," I pasal i phû hlawl lo ka tih țhin kha a awmzia i hre tawh em? Phû hek lo che maw le, class hniam lutuk hi chu an chesual châwk a ni," a ti hmarh hmarh a.



Ka insûm thei tawh bîk lo.



"Ka nu, chhûngkaw sum dinhmun ațanga mi i teh chhûng chuan tumah i teh tling ngai lo ang, Linda-i pawh mo atân nei la, i teh tling chuang lo ang. Kan inhmangaiha kan induh tawnna hi a hlu a, chu chuan pumkhatah min siam mai a ni."



Rum zeta min melhin," Min chhâng ngam elo? Lalpa leh! I va huaisen ve! I tlangvâlpa chuan huaisenna a lo pè che a ni maw? Pasal uiresan duh mihring hi mo atân ka duh lo, chhuak ang che, chhuak ngei ngei ang che," a ti ta tuar tuar a.



"Ka uiresan lo!"



"Ngawi hmak rawh! Min chhâng ngam a, min va zah lo ve! Zahna rĕng rĕng i lo nei lo a nih hi. Pasalte ina nupa room-a mahni tlangvâlpa tawmpui ngam kha i ni miau a, i huaisàr tak zet. I nuin hetiang fanu hi a nei tih inhre ta se, ni lo, i nu i chhùn pawh a lo ni thei tho-"



"A tâwk. Sawi tawh suh!!" ka ti vîn tuarh. Ka nu thi tawh a sawi chhe tel tùr hi ka duh lo, ka phal lo, a sawi chhiat tùr pawh a ni hek lo.



"Ka nu i vìn ngam elo?"



Engtik laiin nge Nunsanga chu a lo luh ka hre miah lo, a kal tawhin ka hre si a.



Min melh khui pah chuan," I dik lohnaah ka nu i vìn ngam maw?" a ti leh tuarh a, rilru na zetin ka ngawi tawp. Ka rilru na lutuk chu a puak keh ang tih a hlauhawm zâwk.



A nu chuan," A dik lohnaah ka zilh ve e ka tia, ka fapa nupui chu a dik loh chuan zilhhàu ve thei tùrah ka inngai a nia," a lo ti khùr dat dat a, a lemchanna der lutuk chuan ka luak a tichhuak.



"Lemchang der suh, ka luak i tichhuak." Tunah hi chuan ka chhia leh țha hriatna thiang ka hmang thei tawh lo. Eng pawh thleng rawh se, ka insûm tawh dâwn lo.



"Zuali..."



"Eng nge? A lemchan thu sawi kha ka ngaithla peih lo-"



A ri țhuai a, ka hmai a na nghal zawk mai. Min bêng a ni, Nunsanga'n min bêng!!



"Țawng fîmkhur rawh, i pasal nu i sawi dàn kha a mawi lo a nia..."



A țawng chu ka ngaithla tawh lo, ka pasal hian min bêng a ni. Ka pa leh nu khân min la bêng miah lo, tunah ka pasal ka innghahna ber chuan ka hmaiah min bêng a ni.



Muangchângin ka tho a, ka biang na vawng vawng chu ka hre deuh; mahse, tunah chuan ka biang nâ aiin ka thinlung a na zâwk. Chemtêa vih tlum thawiha herh nawk nawk ang mai a ni.



"...chhuak ang che."



Ka hre dik lo em aw ka ti, Nunsanga, ka pasal ngei pawhin chhuak tùrin min ti ta, sawi theih ka nei ta lo, ka beiseina a bo ta.



Tunah chuan he inah hian awmna chhan tùr ka nei lo. Ka pasal leh a nu ngeiin chhuak tùrin min ti a, min ring lo va, ka chhuak tùr a ni.



"Ka chhuak ang, sawi nawn a ngai lo. Nunsang, inchhîr ngai suh, dâwt a ni tih i hriat hunah chuan, chutih hunah pawh chuan inchhîr suh ang che."



"Ka nu, i mo atân hian engtik lai mahin ka tling ngai lo ang, mihring hlutna an sum dinhmun ațanga i teh chhûng chuan."



Ka thawmhnaw tlêm ka siam a, hetah chuan ka nei tam vak lo hrim hrim. Airbag lian vak loah ka khung leng mai, vawiin ka chhoh ni a ni hrim hrim a, a zia viau e.



Airbag khaiin, ka thawmhnaw hâk lai ang ang nèn ka chhuak. Ka hawi lêt lo, kumkhua atân he in leh he khawpui hi chhuahsan vang vang ka tum. Ka nunhlui zawng zawng chu he in, ka kalsan mêkah hian tàwp se, mumang lamah pawh hmuh chhunzawm ka duh hek lo ang.




*I THINRIM LAIIN THU TÀWP SIAM NGAI SUH*



☆GOLD DIGGER☆ - 12 By Dingdi Pachuau




Ka kal mawp mawp, tu nge ka pan ang tih lam ka ngaihtuah lo. Ka pasal, ka duh leh ka hmangaih ngawih ngawihin min bêng a, chhuak tùra min han ti mai chuan ka rilru a tina ngawih ngawih, chu pawh dâwt vàng liau liau.



Ka ril a țâm lo va, dàwra chawlh pawh ka tum hek lo. Haw chhoh ka duh a ni tawp, haw chhoh vang vang ka duh.  He khawpuiah hian kal leh tawh loh ka duh, hmu tawh miah lovin leh  a chhin pawha ngaihtuah loh ka duh.



Motor horn ri a ri tuar a,  a brake a chîk țhawt bawk. Patling âng rî ka hre chawpchilh nghal, âng rî hi ka kham, ka hnê lutuk.



"Kawng en ta che! Sut hlum i duh deuh zâwk em ni?"



Râpthlâk ti zet hian ka melh hrâ a, chhan pawh chhâng lovin footpath-ah ka pakaisan nghal a, ka thiam loh pawh a ni maithei; mahse, a râpthlâk ka ti tho.



Ka kal mawp mawp a, chutah, ka hawi kual a, HATIM pêng ka lo thleng reng tawh! Ka va kal chak ém ém! Khawnge kal ka tum le? Puteate in a ni ngei ang.



Ka phone lâwk si lo va, mak min lo ti àwm mang e. E, putea hi inthlah chhohtîr ila a țha viau ang. Bike a neih kha maw.



Chaw an lo ei mêk a, za lo zet hian ka nui lût a, mak min lo tih hmel khawp mai. Chaw chu ei ve nghal tùrin min ti a, thil awmzia min zâwt miah lo chu mak ka ti deuh.



Tlêm chu ka ei ve. A mawiah chauh a ni ka ei ni. Ka ril a țâm lo va, chaw ei châkna ka nei hek lo.



Putea chu ka bulah a rawn țhu ta chat.



"Eng nge thleng?"



Puitling leh upa zâwk nge nge chuan thil awmzia chu an lo man rang,  bâkah, ka thlen tirhah pawh min zâwt duh lo a nia, muangchângin hun thâwl zâwkah min zâwt ta chauh.



Thil thleng chu ka hrilh a, a zawng zawng ka hrilh kĕlh lo. A pawimawh chin chauh ka hrilh.



Ka sawi zawh chuan a ngawi vang vang a, eng nge a ngaihtuahnaah awm ve ang le? Min ringhlel ve tho ang em? Ka hlauthawng ta deuh thut.



"Pute, dâwt ka sawi lo, mipat hmeichhiatna leh inngaihzàwnna kawngah kher hi chuan hmingchhiat ka duh loh bâkah ka nu leh pa leh chhûngte tihmingchhetu nih hi ka tum ngai lo, ka ngaihtuah ngai lo bawk," ka ti leh a.



"Ka ring che alawm. A nuin chutia room-a in awm a rawn hmuh dun che u chuan a ngaih dàn tùr chu ka hre thiam, a ngaih dàn kha ka ngaih dàn ve tho tùr a ni. Chuvàng chuan, i dem ngawt thei lo ang. I pasal pawh chu, a thinrim laiin thu tlûkna siam tùr a ni lo asin le aw. Nupa, hmingchhe tak leh inhaw tak chunga ințhen hi a țha lo asin," a ti vang vang a.



"Mahse, pute, engtin nge ka tih chuan ang? Chhuak tùrin min ti bawk sia, min ring lo bawk si nèn,  ka thu sawi tal ring ni se chuan..."



Piteii a lo inrawlh ta vat.



"A dik chiah, i dinhmun chu ka hriatthiampui khawp mai che, kei pawh ni ila i tih ang chiah hi ka tih tùr tho a ni. Thana i tih chu, mak ka ti hle mai. Chutianga a che ngam leh a puh chhe duh che chu, mipa nih a tling lo hle mai," a lo ti ve a.



Putea chuan," Ni danga in ina a lo lèn pawhin ngaizâwng ang che pawhin a awm ngai si lo maw?" a ti leh a.



Kei chuan," Awm ngai lo, Nunsanga țhian a nih vàng chauha hmel hriat ka ni a, be ve hrâm hrâm ka ni bawk," ka lo ti thuai a.



"A zia lo tak tak a ni, chu pa number chu a hmain i nei lo tih i hre chiang bawk tiraw?"



"Aw, ka save lo tih ka hre chiang. Ka phone ka lock ngai lo va,tu emawin, amah pawh chu a ni maithei bawk, ka hriat loh laiin a lo save a ni ngei ang. Nimin khân scooty chahbi ka zawng buai lutuk a, ka phone kha ka kalsan ngei bawk," ka ti a.



A bu nghat nghat a," Hm, ruahmanna fel tak a nei sa a ni ngei ang," a ti sap a, ka hre thiam lo nasa.



"Eng vàngin maw?"



"A, suangtuahna mai mai maw le. Vawiin chuan chhoh i tum lo ang tiraw?" a ti ta daih a.



"Chhoh chu ka duh. Pute, min dah chho lawk la? Vawiina ka chhoh loh chuan naktûk ka off leh dâwn tihna a nia," ka ti a, ka inthlahrung viau nain chhoh thuai thuai ka duh.



*******



Ka vawi hnih thlàwina a ni ta. Ka ngaihtuah cheuh cheuh hian mak ka inti,  kum la naupang tĕ siin vawi hnih lai ka pasal ka chhuahsan ta. A zahthlâk chu ka ti ve tho, tihngaihna awm miau hek lo.



Inah Nunsanga thawmhnaw a awm ve nual a, hmun khatah ka dah khâwm vek. A duh chuan lo la se, kei chuan ka thawn thla lo ang.



Vawi khat pawh min rawn phone chhin lo, mak chu ka ti ve reng. Khati khawpa min ring thei lo kha, mak ka ti tàwp thei lo. A hmain lo lêrhsan tawh ni ila chu, ka hre thiam. A nupui ka ni a, min rinna chhe tĕ pawh a nei lo kha nâ ka ti.



Kenny-a'n min rawn call thung; mahse, kan nupa inkâr pakhat mah a sawi lang lo, a hre ngei àwm si a, a hre lo der a niang. Ani pawh hi Nunsanga țhian a ni a, ka țhian a nih hma khân țhian an lo ni tawh. Chuvàngin, ka be țha duh vak lo. Ani pawh hian min ring lo tho ang, min ring lotute hi chu kei pawhin ka ngaina bîk lo.



Nubawihi chu ka hrilh duh rih lo, min ngaihtuah ka hlau a, a zirlaiah a rilru a pe țha thei lo ang tih ka hlau, a u hi ka nêp bîk si a.



Bank ațanga ka haw chuan ka chau zual sauhin ka hria. In ka thleng chu chêt pawh ka peih lo, țhutthlèngah ka bawk thlawp, zîng ațangin ka nuam zân lo tawh a, ka duty țhulh erawh ka tum bau lo.



Ka mut vang vang hnuah chuan ka tho va, thil eng emaw ei ila ka zia deuh maithei. Rilțàm hian awm a nuam lo ve thei tho asin.



Ka mitko na vung vung chu vûrin ka dep a, tlêmin a zia. Ka tinawn leh a, a hnu deuhah phei chuan a na tawh mang lo, zàn ka mu thei lo lutuk leh laptop ka khawih nasat vàng a ni ngei ang.



Kan ințhen hnu hian hun âwl hnawh khah nân ka story ziah kha ka chhunzawm char char, a țha ka ti tak tak a ni. Ka rilru hrehawmnate kha ka ngaihtuah ngut ngut hman lo va, ka rilru natnate chu story-ah ka puang chhuak ta zâwk a, ka thâwl deuh huai hial a ni.



Zanriah ei khamah laptop bawk chu ka buaipui a, Nunsanga kha chu awm se, nghèng ar ar chungin ka type leh emaw kha a niang a, aniin news a en leh emaw a niang a...



Kawngka a rawn ri a, inlêng ka nei ngai lo asin le, Nunsanga ka chhuahsan hnu phei hi chuan mi kawm hi ka peih lo zual asin le.



"Lo lût rawh." Ka laptop chu ka dah sawn ta nghal a.



Kenny-a rawn lût ka hmuh chuan a rûkin ka kut ka hûm ruh a, he pa pawh hi ka kàwm peih chuang lo, Nunsanga țhianpa a nih hi.



"Eng nge i lo tih dâwn?" A laka polite viau hi ka ba chuang lo.



"Dâwt a ni em?"



Nghal tâwng mai a.



"I țhianpain a hrilh lo che em ni?"



Ka chhàn dàn chu a ngei ngawt ang chu; mahse, a hmelah engmah a tilang lo.



Ka țhutna opposite chiah țhutthlèngah chuan rawn țhuin," I sawi ka hre duh a ni," a ti hmuk a.



"Min ring chuang lo ang. I țhianpa pawhin min ring lo va, a nu pawhin min ring hek lo. Min ring lotu bulah engmah ka sawi duh tawh lo," ka ti hmak hmak a. A țhianpain min rawn dâwptîr a tum a niang, ka rilru hi a dik lo zo vek tawh.



"I țha em?"



Ka țha lo tih a hre àwm chiang si a, ka va ngei tak. Ka hrilh hauh lo ang.



"Țha."



A nui suk. Nuihzâ ka sawi àwm ka hre lo, ka nuih a za lo hle asin.



"Thil ka hre chhuak zawk mai."



"I țhianpa chuan dâwt ka sawi tih a hrilh ngei ang che, i awih ngei pawh ka ring?"



"A sawi ringawt awih ni ila ka zâwt dâwn che em ni?" a ti ta khauh a.



"Min dâwp i tum em ni?" ka ti ve thung a.



"Dâwp maw? Mi sual i ni em ni?"



"A pasal leh a nu buma an nupa room-a tlangvâl tawmpuitu ka nih hi," ka ti sap a, ka thil sawi chuan ka rilru a tina thar leh a.



"I inhmeh lo a nia."



"Ka ni miau alawm!" Nunsanga leh a nu ngaih dàn chuan.



"A nih, Thana kha i duh em?"



Rum zet hian ka melh a, ka huatzia hi hria se chuan min zâwt hauh lo ang.



"Nei rawh!"



A nui hawk a, ka thil sawi nuihzatthlâkzia chu thinrim hle lo ila chuan ka hre chiang ngawt ang.



"Chiang takin thil thleng chu min han hrilh teh."



"Ka sawi peih lo."



"Thu dik ka hriat i duh lo a ni maw? I țhian ka ni emaw ka ti a."



"Min ring dâwn em ni?"



Dik tak chuan Nunsanga kaihhnawih lam hian ka thu sawi an awih hi ka ring tawh lo, min rin ka duh ém ém laia min ring thei tlat lo khân min tina ém asin.



"Side A leh B hriat ka duh a ni. Chuta țang chuan thu dik a lo lang mai dâwn alawm."



Ka thu sawi tùr hi a ring ang em? Ka pasal zâwk pawhin a ring lo si a, ani pawh hian min rin bîkna chhan tùr ka hre lo.



"Tûn bâk hi sawi ka duh tawh dâwn lo a nia," ka ti hmasa tĕ tĕ a, ka thil tawn chu ka sawi leh thuak thuak, a pawimawh lai chauh ani ka sawi.



"Kenny, han sawi teh, mipa dang mitmei ka hmuh i hre tawh em?"



Ngun zet hian min en leh kur tawh, ka mitmeng ațangin thu dik hriat a tum a niang.



"Hre lo."



"I țhianpa chuan min ringhlel tlat sî a ni. Min ring thei lo, nupa kâra inrin lohna a awm tawh chuan nupa nun chu hremhmun tènau a ni tawh," ka ti a.



"A nih leh, Țhianpa chan hi i chan ni ve ta se, engtin nge i tih ang?"



"Mi dang thu sawi zawng aiin ka nupui thu sawi ka awih ang. Dâwt min hrilh țhìn ni se chuan a dang mahna!"



Kan ngawi ta vang vang, kan rilrua kan ngaihtuah erawh a inang viau ang, kan ngaihtuah dàn erawh a dangin ka ring.



"Hetia in awm hran hnu hian Thana'n a rawn phone leh tawh che em?"



"A reh hmak, kei pawhin ka phone lo, hmuh leh pawh ka duh tawh lo."



A chek hluk a," Thu dik hriat chhuah i châk nange?" a ti ta nghut a.



"Dâwt a sawi a, engtin vak nge thu dik kan hriat chhuah ang? Kan dâwp dâwn em ni? Hmuh pawh ka duh tawh lo ka tih kha."



Ani thung chuan," Dâwt a sawi chhan tak kha maw le, hriat i châk nange?" a ti leh a.



"Châk lo, engkim a tàwp tawh!"



Thingpui ka la lumsak hauh lo tih ka hre chhuak chiah.



Thingpui ka pêk lai chuan," Eng nge i lo tih rĕng rĕng?" ka ti hnuhnawh a.



"Ka lo zin."



"Eng ti tùrin?" Ka dîlchhût mah mah.



"Hei, ka bia che."



"Bawihbawihi a dam țha em? In la tluang dùn zêl maw?"



"Um."



Han thinrim viau țhìnin han tihtauh khum deuh țhìn mah ila, min biain ka thinrimna hi a haider thiam tlat țhìn a, a tàwpah hi chuan țha takin ka titi leh nge nge zêl.



"Engtikah nge i haw leh dâwn?"



"Naktûkah."



"Daw suh."



"Nangmah ang chiahin dâwt ka sawi lo," a ti a, a nui duh miah lo lehnghal a.



"Thana number kha ka duh riau mai," kan ngawih vang vang hnu chuan a rawn ti dût a.



"Eng atân maw?"



"Ka duh."



Ka phone chu ka pe mai a, phone chu lain number chu a hmet chhuak a.



"Ina a rawn kal ni khân rawn phone lâwk ang chein an sawiin ka hria, a dik em?"



"Phone lo, a number ka nei tih pawh ka inhre lo a nia, min rawn phone lâwk lo chiang," ka ti a.



"A number chu engtin nge i neih si?"



"Ka hre bîk lo, a lo awm ve tawp. Khami ni khân a number ka nei tih ka hre ve chauh, mak ka ti hle rĕng a ni," ka ti leh a, mak ka ti ém asin.



"I nuin a rawn phâwk che u tiraw?"



"Aw."



"Țhianpa khân chhuak tùrin a ti tak tak che maw?" A thil min zawh inkahpah lutuk chu a mak ka ti.



"Aw, a nuin ka chungchângah ka nu chungchâng a telh a, ka thin a rim a, ka chhâng lêt kha a thin a rim a, min ben hnuah chhuak tùrin min hrilh." Ka biang chu ka chûl zauh a, min ben natzia  kha ka la feel thei.



"Eng maw?!! A bêng che maw?!!"




*NGAIDAM THEITU NIH HI MI PUITLING ZIA A NI*



☆GOLD DIGGER☆ - 13 By Dingdi Pachuau




Kenny-a haw hnu chuan hun kal tawh ngaihtuah tawh miah loh ka duh tehlul nèn, ka ngaihtuah lo thei leh ta lo. Kha pa khân engtin nge ka phone-ah khân a number kha a lo save theih ni? A lo lêng țhìn pawh a ni lo va, scooty chahbi zawnga room-a ka luh hlàn khân a ni ngei ang, a chhan chu phone kha drawer chungah khân ka dah tlat a ni.



A nih, eng atân nge ka phone-ah khân a number kha a lo save kher? Khami ni khân engtin nge inah ka awm tih a hriat? Kei pawh chhuah tum tho ka nih kha, scooty chahbi ka hmuh loh vànga chhuak ta lo mai ka ni, thil țha lo a thleng zui nghal bawk a...



Ni lo, ka ngaihtuah duh tawh lo, a pawi zo vek tawh. Theihnghilh hmak zâwk ang, rilru a na thar mai mai a ni. Theihnghilhin hma lam pan ila, nun thar nèn hmalam ka pan a ngai.



*******



Fùr a zo va, favàng khaw thiang nuam tak a lo her chhuak ve leh ta e. He hun a lo thlen hi chuan ka lung a lêng thar ziah, a boruak hrim hrim hian ka lung a tilêng, ngaih bîk ka nei ngai lo thung.



Lalàni'n ka chanchin a hre ta tlat, ka hrilh ngai miah si lo va, mak ka ti khawp; mahse, sunday-ah Nunsanga nèn kan inkhâwm ve țhìn tho a, min hmu ve ziah bawk. Mi fing deuh leh chhui peih deuh tân chuan hriat loh theih pawh a ni chuang lo, chuta țang chuan a lo ngaihruat ve a, ka pasal ni lovin ka bialpa emaw a ti zâwk.



Pawi ka ti ém ém chuang lo, thup leh zêp thu a awm lo. Mi dang hrilh tùr ka nei chuang lo va, min zâwt ta na na na chu, ka hrilh mai.



Thil awmzia a tlângpuiin ka hrilh a, ka hrilh kĕlh lĕm lo.  Ngun takin a lo ngaithla a, ka sawi zawh chuan," In inhmeh ka lo ti thei lutuk a," a ti sap a.



"Inhmeh nazawng hi inkawp hlenna pawh a lo ni lo a nih dâwn hi," nui sak chungin ka ti thung a.



"En teh, kei pawh ngaihzâwng neih ka duh lohna țhin chu maw, kan han ni ve ang a, kan duh viau hnuah  mi dang min kawpsan emaw min rinawm lohsan emaw hi ka hlau a, pasal neih hlauh phei chu, ka ngaihtuah ngam lo. Ka laklawh zo vek," a ti sap sap a, hetiang lam hawi hian kan la titi ngai lo va, a mak ka ti zâwk.



"An rinawm lo vek bîk hlei nem, Nunsanga pawh a rinawm lo hlei nem; mahse, inkawp tùr kan ni lo a niang,  Pathian min ruatsak a ni lo a nih ka ring," ka ti a.



"A buaithlâk a nih hi, Pathian min ruatsak lah hi lo hriat chat dàn awm se, mi dang zawng zawng lo hian lo man nghet chat ila tiraw?"



Kan nui kar kar, a bula awm a lo nuam reuh a nih hi. A sawi dàn ațang hian ngaihzâwng a la nei ngai lo a ni ngei ang a, kei aiin a upa zâwk sia, a zei lo ve àwm mang e.



Kan titi hnu ațang hian min rawn pawh ta riau a, hun dangah pawh kan titi ta ziah. A țawng duh a, upa zâwk mah se kei aiin a hniam a; mahse, a inchei nalh thei phian. A thawmhnaw duhzâwng leh ka thawmhnaw duhzâwng chu a inang lo kher asin.



Inrinni a ni a, chawhmeh bazàr a ngaih loh vàngin zîng kârah ka insu a, chaw ei khamah ka peih chuan story ziah chhunzawm ka tum ang. Lehkhabu chhiar tùr pawh ka duh khawp mai, ka neihho hi chu ka chhiar zing tawh lutuk a, ka hre hlûi tawh.



"Zuali???"



Lalàni aw a ni chiang.



Room ațang chuan chhuakin," Lalàn, Eng nge ni ta? A va pawimawh àwm ve, lo țhu rawh," ka ti a, ni dangah a lo kal ngai zen zen lo va, mak ka ti deuh.



"Vawiinah eng nge i tih dâwn?"



"Eng vak nge niang? Kan chawlh ve theih nî a nia, ka awm mai mai ang chu," nui chung hian ka ti a, ani pawh a nui ve tho a.



"Inah i awm tlawk tlawk zêl tihna em ni?"



"Lehkhabute ka chhiar ve bawk a."



"Vawiin chu chhuak ila?"



"Khawiah maw?"



"Aw...kan lêng ang chu."



Ka peih fahran lo, lèn chhuah lam hi ka taimâkna hian a tlin lutuk lo; mahse, ka sawi chhuak chuang lo.



"I chhuak harh ve ang chu, ni tin hna thawkin i chhuak a, hna thawh loh ni chuan kan inpenparh ve ang chu maw le," nui chung hian a ti a.



"Khawi lamah nge chhuah i rilrûk deuh a?" ka ti ve thung a.



"Lèn harh ve hrim hrim a ni mai, bazârahte kalin thawmhnawte pawh kan en ang a. Ina awm chawt chuan tar hma a awl dâwn ém mai," a ti leh a.



Ka chhàn hma chuan," Bâkah, in pa ngaihtuah reng lovin mi dangte pawh kan melh ang chu," nui chung hian mit siai sak chungin a ti leh sar sar a.



"Melh pawh ka peih tawh hlei nem," nui chung hian ka lo ti thung a.



Chhuah chu pawi ka ti vak lo. Ka chhuak khât e, hmalam pan tùr ka nih kha.



"Lehkhabu dàwrah min kalpui la aw?"



"Teh rêng mai, vawiin chu ka'n hruai harh kâwk teh ang che!"



Nilêng mai chuan ka zui kual ta. Kalna tùr a hre khawp mai a, ka rin aiin nuam ka ti daih. Ka chhuah khâtzia leh kan khua lo danglam chakzia chu ka hre thar ve chiah.



"Thlaleh ni 5 khian ka cousin-in nupui a nei dâwn a, kawr țhuitîr ka duh a, min enpui leh lawk rawh aw," a ti a.



"Aw le, eng rawng lam nge ni ang?"



"A buang lam deuh a nia, ka sawi thiam chiah lo, dàwr kan thlen hunah ka hmuh ang che."



In ka thlen chuan ka chàu hnawk mai; mahse, nuam ka ti tho, chhuah ve zeuh zeuh hi a lo țha a nih dâwn hi. Ka chhuah ngai loh lutuk vàngin kan khuaah pawh ka mikhual lek lek dâwn alawm le!



Chhùn lama ka chhuahna lamah khân ka chau deuh a ni maithei, ka mut a chhuak hma lutuk. Kan kal kual ve nasa bawk a ni, km thui tâwk tak kan kal hial ang chu.



Ka whatsapp message a rawn ri a.



*Thlalehah ka lo zin dâwn* tih tĕ mai hi a lo ni a, Kenny-a message dik tak a ni, a type thui peih lo.



Hàm bài bái  chung chuan ka reply ve a.



*A nih chu* A haw teh ang chu.



A rawn call nghal zat, ka mut a chhuak tawh asin le.



"Ka mut a chhuak a nia, a țûl viau a nih loh chuan dah teh," ka ti a, ka hàm leh bài bái a.



"E..," tih leh tihtàwp chu a rual a, min tihrilhhai zâwk alawm le, a fel ém ém rualin a chimawm thei tho.



Mumang nei map lova tuiin ka muhìl. Mi sualin min rawk tumin ka inah pawh lo lût mah se ka harh thei pawhin ka ring lo hial.



Ka inkhâwm a, Lalàni nèn pawh kan inhmu. Muangchângin kan titi a, biak in tualah kan ding rih.



Ka hawi kualna lamah chuan Nunsanga ang deuh ka hmu tlat!! Ni lo, a ni lo ang. Ka thin a rawn phu nghal dawt dawt mai, ka hawi sawn nghal vat.  Ka âwm ka dawm nghal chat a, eng nge a lo tih ang? Min rawn thlîthlăi em ni le? Min ngaihtuah ru tho tihna em ni le?



Ni lo, teuh lo mai. A duh loh, a in chhuahsan tùra a hrilh hi min rawn ngaihven ang maw? Teuh lo lutuk. Mâwl ka inti lutuk a, ka inhau ru mawlh mawlh a.



Ka hmuhna lam chu ka thlîr nawn ngam lawk lo va, ka en leh meuh chuan ka hmu tawh lo. Ka mitvài pawh a ni maithei, bâkah, mi dang ka hmuhsual pawh a ni thei tho.



Ka lungphû a normal hnu chuan Lalàni nèn chuan muangchángin kan haw a, kalkawngah pawh chuan Nunsanga hmuh ka inring deuh tlat nia; mahse, ka hmu lo.



Tlaia eirawng bâwl rak rak pah chuan Nunsanga chu ka ngaihtuah leh a, ka ngai deuh tlat a nih chu. Ka duh lo tak zet a ni, vawiina ka hmuhsual (?) vàng vek. Ni dangah chuan ka ngaihtuah chhuah pawhin ka ngai hran lo, vawiin zet chu ka dik tlat lo.



Tunahte hian eng nge a tih ve ang le? Min ngaihtuah chhuak ve țhìn ang em le? Min ngaihtuah chhuak ve țhìn tho ang, a chhan chu a nupui ka ni ve tawh miau a, țum hnih lai. Min la ringhlel reng ang em? Nge thu dik tak hriat chhuah tumin a bei zâwk?



A sârhu lai ang khân thinrimin ka rilru na tawh lo mah se, a nu kha chu ngaihdam harsa ka ti ang. Min sawisêlin min puhchhe rawh se, ka ngaidam thei ang; mahse, ka nu a sawi tel erawh kha chu ka thinlung ațang hian ka paih bo thei tawh lo ang.



*******



"Engtik khân nge i lo thlen a? Eng nge i lo tih dâwn?"



Thingpui ka siamsak a, ka va pêk chuan làwmthu a lo sawi sup a.



"Ka lo zin maw le, nichîn deuh tawh khân kan lo thleng tawh," a ti a, thingpui chu a dût hlak a.



"Chuan, engtikah nge i haw leh ang?"



"Thawhlehni-ah."



"A ni maw? I va châm rei roh dâwn ve, hetah chaw ei ve rawh aw," ka ti a, chaw eia ka sàwm ngei chu a ngai ang.



"Bawihbawihi nèn kan rawn kal a."



Ka en vat a, min tihder emaw ka ti; mahse, a lo nui miah lo nia.



"A ni tak tak maw?  Chuti, in pahnihin a ni mai alawm. Eng nge in lo tih? In rawn inrù chu a ni ém lo maw?" nui chung hian ka ti a.



"Inneihna hmang tùrin kan rawn kal."



Hm, a va màwl theih tak! An rawn inru lul lo ang, Kenny-a tân hmeichhia chu rûk buai a ngai tawp nâng.



"I chhûngte maw?"



"A cousin."



 Bawihbawihi cousin. A rawn kalpui tihna. Um, an inlaichìnna a țha tawh hle mai.



"I rawn kalpui vang vang a?"



"Um."



"Hei, nang hi, inneih hma ațangin i thaibawih deuh sa ringawt mai ka ti," ka ti a, ka nui kar kar a.



"I lo kal ve dâwn em?"



"Khawiah?" ka ti háw a.



"Inneihnaah."



"Ka hriat mi an ni ve nâng, bâkah, min hre bík lo tawp ang."



"I hre chawp mai ang chu!"



Tunah tak hi chuan inneihna tih vêl hi chu engah mah ka ngai lo, ka tel châk hek lo. Ropui takin an buatsaih leh ang a, inneih hnu rei vak lovah hlim lohna chi hrang hrang a lo thleng ang. A hlim reng theih loh, chumi hunah tak chuan inneih chhan hre lo khân mahni thinrimna hmu lianin awlsam tĕin, buai tak leh sum tam tak sênga inneihna ropui kha engmah lovah an chantîr leh mai ang.



"Țhianpa lo kal kha i lo hmu em?"



Makti takin ka en a, Nunsanga ka hmuh kha, a lo  ni tak tak a nih chu. Ka lo hmuhsual bîk lo ve.



"Eng nge a lo tih a?"



"A ngai che a niang."



Ngeiawm zet hian ka melh a, ka hmui ka tipawrh bawk. Min ngaih vàngin a lo kal ang maw? Teuh lo, uiresantu hi a ngai lul lo ang e.



"Sunday tlaiah chaw chu lo ei ang che u."



*******



Lalàni cousin mipa khân Bawihbawihi cousin nupuiah a nei dâwn a lo ni. Thawhțanni hian an innei dâwn, Lalàni'n a sawi khân a sawi chiang bîk lo va, kei lahin ka zâwt chiang hek lo. Hetiang nikhua hi Kenny-a hian nuam a ti ngai lovin, a kal khât ve khawp a, a lo kal ve ka ring pha lo bawk.  Bawihbawihi'n a rawn hruai chhuak thei tlat hi mak ka ti, hmasâwnna ropui tak a ni.



Tlaia chaw an rawn ei chuan Bawihbawihi chuan,"In in nei nuam reuh tawp, a laili viau nain a fâl tho bawk si a; mahse, zàna mahni chauha riah chu a hlauhawm ka ti," a ti barh barh a.



"Eng nge hlauhawm awm?" ka lo ti vat a.



"Ramhuai leh mi sual."



Ka nui hawk hawk. Nia, a hlauhawm ve reng asin, ka la tawng lo va, ka la hlau lo mai mai a ni maithei.



"Nuthlawi tân engmah a hlauhawm loh."


Rum zet hian ka melh a, buhtlei chuan ka tin ûr bawk a.



"Ka lo sâwm tel ve che hi ka inchhîr hle mai!"



"Dah thla mai teh, chaw khawrhna a nih kha."



Muangchâng hian ka dah thla ruai ruai a, lungawi lo zet hian," Nuthlawi hmusit rêng rêng suh," ka ti nang nang a.



"Ni e," Bawihbawihi chuan Kenny-a melh zoh pah chuan a ti sep a.



"Hmuhsit thil a ni lo. Nuthlawi chuan thil tam tak an paltlang tawh a. Mi ina va chèn dàn te, mi hmaisa tàwng leh pasal chhûngte sawisèl, ànkhum leh diriamna hrang hrang an lo tâwk tawh țhìn a, chutiang lo tâwk tawh tân chuan engmah hlauh tùr a awm tawh lo ka ti mai alawm," a ti duah a.



Ka melh ràn a, min en duh țhak lo. Kenny-a hian Nunsanga nuin min sawisèl țhinna leh min diriamna, hmuhsitna zawng zawngte kha a lo hre ve em ni? Ka hrilh hauh si lo, tuin nge hrilh ang le?



"Chawhmeh hi a tui hlawm hle mai."



Subject a rawn thlâk ta daih mai. He pa hian engtin nge a hriat le? Mak ka ti, a rawn lèn laiin ka nu, ni leh lo, ka nu a ni tawh lo, Nunsanga nu khân min sawisèl àwm ka hre si lo, mak ka ti rilru khawp mai.



*******



"I scooty chahbi, i zawn vak vak kha drawer-ah khân a awm lo chiang tiraw?"


"Awm lo chiang, ka hai kual nasa lutuk. A awm lo chiang tih Pathian hming chhâl meuh pawhin ka sawi ngam."


A thaw huai a, a bu nghat bawk a.



"Eng nge? Ka nuin a lo..." ka riat kual ta mai mai. 'Ka nu' tiin ka lo sawi leh țhìn, ka ko ngun lutuk tawh a, chuvàng vek chu a ni.



"A nih, Thana'n a rawn be leh tawh che em?"



"Aih."



Min rawn be teh se, a châk lo ang.



"A nih, Țhianpa nèna in ințhen hian lâwm deuh tùr an awmin i hria em?" a ti leh a.



Teh rêng mai. Ka nu leh Nunpuii...leh Linda-i.



"Aw, awm ang."



"Ka zo țêp tawhin ka hria."



Eng nge a sawi hi? A lo chhui ru reng em ni? Eng thil nge a hmuh chhuah? Ka nu thil lo ruahman vek em ni? A ni ngei ngei ang, a fapa tân min duh thlâwt loh kha.



Ka hre châk ta zek zek mai.




*DÂWT HIAN AMAHA DING TÙRIN KE A NEI LO VA, DÂWT DANG BAWK A NGAI LEH ȚHÌN*



☆GOLD DIGGER☆ - 14 By Dingdi Pachuau




"Min hrilh la?"



"Ka zawh fel hunah."



Ka hriat châk viau rualin ka hre châk leh ta lo. A zawh fel huna ka thu hriat tùr chu ka hre huphurh, ka rin hi a dik ka ring bawk.



Nunsanga'n Thana lakah ka uiresan lo tih a hriat hunah chuan aw...inchhîr lo tùrin ka hrilh lâwk tawh tak. A inchhîr lo ang, a inchhîr tùr a ni lo. Inchhîr pawh ni se, awmzia a awm tawh lo, a pawi tùr a pawi vek tawh.



"Ka ina chaw kan ei khâwm țuma game kan khelh khân 'Dawihzep' ka tih che kha i la hria em?"



Hria. 'Dawihzep, thil zêp thei leh harsatna tlànsan chîng' tiin min sawi a nih kha.



"Eng nge ka dawihzepna?"



Min en vang vang hnuah," Ngaihtuah ve tawh mai rawh," a ti nghut ringawt. Min hrilh țhat ve hle hle mai àwm,  a har àwm loh nèn.



"Naktûkah tiraw in haw ang?"



"Aw."



"A nih leh, engtikah nge Aizawlah i haw phei ang?"



"Kâr tàwpah hian a niang."



Hun âwl neiha zin phei ve a châkawm ka ti. Sasangi pawh ka hmuh lohna a rei ta, a number lah ka nei tawh bawk si lo, pasal pawh a lo nei tawh maithei a ni, hmuh ka châk. Min la ngaihtuah chhuak ve țhìn ang em le? Nunsanga ka nei tùr min lawmpuiziate kha...



*******



"Sasang, Nunsanga nèn kan innei dâwn!"



Phone-ah pawh ka hrilh duh lo va, ka va tlawh leh ngat a ni. Kan inkuah chûk chûk a, țê hlut chungin lawmpuina thu min hrilh mawlh mawlh a.



"Awii, a làwmawm e. Pasal țha tak i nei dâwn bîk a, a làwmawm ka ti tak tak a ni. Hetiang taka min duhtu tùr pasal hi hmu ve ila ka ti e!" a ti vang vang a.



"I la hmu hrim hrim ang, en teh, ka vannei e tiraw? Min hmangaihtu leh hmelțha leh fel pasalah ka nei dâwn a nia," ka ti ve a.



A ni lah tak a, ka vànnei ve ém asin. College ka chhuak chiah a, mi hausa fanu leh hlawh nei pawh ka ni lo va, vànnei an tih zînga mi chu ka ni chiang alawm.



"A zei ngawt lo maw?"



"Eng kawngah?"



A hmui tipawrhin min ner khum a," Hre thiam lo der vel a! Intithei ve asin. In-jish hi chu in ti ngun riauin ka ring a, a zei bawkin ka ring a?" a ti ta a.



"Hey, kan ti ngun viau lo aw!"



"Ka awih lo chiang. In inneih zànah in-gus gus erawh a zei leh zei loh chu i hria ang, ka la rawn zâwt ang che," nui kar kar chung chuan a ti leh a.



"I sawi 'raw' thei lutuk!"



Chek hlak chung hian," Raw loh chu. Khuh mawi tâwkin ka sawi ve kha  maw," a ti nang nang a. Kan inen a, kan nui hawk hawk a.



"Ih, in in-gus gus tawh em, ka hriat lohin?"



"Teuh lo lutuk!"



A nui awr awr a, fiamthu mah ni se, a zahthlâk e. In-jish hi chu a zahthlâk vak lo, in-gus gus kher hi chu, a puanhnuai thil si a, sawi pawh hi a nuam ka ti lo.



*******



General manager thar kan nei. Hmeichheho chu an phûr khawp mai, kei chu phûr zîngah ka tel ve lo. Hmel thar a ni emaw, a ngai a ni emaw engah vak ka ngai lo, ka pângngai reng.



A la upa vak lo ang, chêr dîn dên niin tarmit a vuah a, a fai vang mai. A hmel ațang ringawt pawh chuan lehkha a thiam thei viau ang tih a hriat, lehkha thiam hi ka ngaisâng țhìn.



Tlaia Lalàni nèn kan haw dun chuan," A chhe lo reuh tiraw? Mahse, a la naupan hmèl reuh e," a ti sar sar a.



"Um, la naupan hmel khawp mai."



"Hna thawh pawh a phùrawm ve ta sawt alawm."



Ka nuih a. A ni lah tak a, a hmaa kan General manager kha a upa tawh a, a upat bâkah thau, hmelțha lo ve deuh hi a ni a, a sawi dik tho ka ti.



"Mahse, bialnu a nei țha ngawt ang chu!"



Lalàni beidawng hmel ka  hmuh chuan ka nuih a za khawp mai a, nuih chî erawh a niin ka hre lo.



"Nei lo ang," tiin ka lo hnèm a.



"Nei ang, a zei vak loh hmel sia, nula chhe lo tak takin zak lo tak takin an bêm ang a, a lo hnial thiam dâwn teuh lo," a ti leh sap sap a.



Tlangvâl zei lo, hna țha tak thawk bawk si hi chu nula zei leh zak lo theite pual deuh niin ka hre ve tho. An zei loh avàngin nula zeite'n an bêm a, tlangvâl zei lo chuan an lo hnial thiam hek lo.



"Kan bêm dâwn em niang?"



A àwm ang lo lutuk a, kan nui dùn char char. Ani pawh hi mipa va bêm hmasa chi a ni bîk lo, lo nghâk ve tawp chi a ni.



*******



Krismas dâwnah Aizawlah Lalàni nèn kan phei a, Nubawihi a rawn haw theih dâwn loh avàngin ka va bazâr ve zawk ang chu ka ti a, bâkah, Sasangi tlawh chhuah ka duh hrim hrim bawk.



Sasangite ina innghah ka va tum ve ringawt,  thlenna tùr dang ka nei lo tlat a ni. Hostel-a va thlen ringawt thu a awm si lo, va be hmasa lova va țhàwn thut ka duh ve pah bawk. Pasal neia a la chhuah loh hrâm ka beisei tak zet.



Ka phone chu ka khawih neuh neuh. Sasangi number kha la nei ila chuan aw...



"Khawiah nge i thlen ang? Thlenna tùr i hual lâwk em?" a rawn ti sà sá a.



"Nei ve deuh a; mahse, pasal a lo nei bo tawh ang tih ka hlau khawp mai."



"Chuti, ka bulah lo thleng ve daih la. Hostel an nei a, hostel naupang an haw vek àwm si a, a nuam dâwn asin, kan inzui thei bawk ang a..."



A zia ngawt ang, a chhan chu ka sawi ang deuh khân  Sasangi kha pasal neia a lo chhuah tawh chuan, ka hawihai viau ang.



"A pawi pawh ka ti lo, a țha ka ti."



Whatsapp message tone  a rawn ri a, ka en vat a, Nunsanga message a ni!!!



Ka en duh lawk lo, eng nge a rawn sawi ang? Thil awmzia a hre tawh em ni? A number hi ka lo la delete lo a nih hi, delete daih tawh tùr ka ni asin le.



*Ka thawmhnaw kha inah khân a la awm tiraw?*



Hm, ka reply àwm hlei lo, a dah a nia, a hria ang chu. A duh leh rawn la se, khawih pawh ka khawih ngai lo.



Message dang a rawn thleng leh zat; mahse, a hnên ațangin a ni lo, Kenny-a hnên ațangin a ni.



*Naktûkah Aizawlah ka phei dâwn* tih tê mai hi.



*Ka phei ve mêk* tiin ka reply a.



*I phakar*



Ka nuih a tiza lutuk. Phakar tih țawngkam kher hi zawng, ka inhmeh hlawl lo, ka phakar lo ém mai. 'Dawihzep' tih kha ka inhmeh fé zawk.



*Nang aiin ka thleng hma dâwn*



*Ho e*



Lalàni min thlenpuina chu a inthlahrunawm lo tawp. Hetiang hi ka duh daih zâwk, mi ina inthlahrung deuha awm ai chuan a țha ka ti. Ei leh in chu a man kan chawi ve mai a, riah man erawh kan chawi dâwn lo, puan sin tùr tam deuh min rawn pe. Hostel naupang mahni khuaa haw lo tùr 3 an lo awm a, a zia hlauh.



Lalàni nèn chuan khum inhnaih tĕa dahin kan mu a, hostel naupang 3 awm vete pawh chu ka room piahah an mu. Kan mutna hi chu room atân tumahin an luah lo.



Mut hmunah chuan hostel neitute nèn an inchhùn dànte chu min hrilh a,  mi hausa ni mah se, an chapo lohzia leh  khawpui mi hlun leh mi hausa tak an nih thute chu a sawi barh barh a.



A tûk zîngah kan inbual fai ser sawr a, khua a vâwt tawh a, tui lumin kan inbual. Geyser lian deuh an nei a, a tihzia tak tak.



Chaw ei khamah chuan kan chhuak deuh nghal mai. Hostel ațang chuan Sasangite in a hla lutuk lo va, min kalpui phawt tùrin ka ti a, kan kal dùn.



Krismas a hnai tawh bawk a, khawpui chhûng, khawilai mai pawh chu a lùnin a tâwt ni maiin ka hria. A àwm ve tho, thingtlâng hmun tin ațangin kan pan khâwm a, lùn lo thei a ni tlat lo.



Sasangite in kan thlen chuan an in pawh an lo sak belh tawh chiang tih ka hmu thei, a u khân nupui a nei ve tawh ang a, chêp an inti tawh a niang.



Doorbell ka hmeh dâwn lai chuan kawngka chu a rawn inhawng a, nula pakhat ka la hriat ngai loh hi a rawn chhuak a.



Nuih sak hian," Hello, Sasangi a awm em aw?" tiin ka be nghal a, tu nge a nih phei chu ka hre law, an inlêng pawh a lo ni maithei a ni.



"Aw, awm e, lo kal r'u."



Bawlhhlawh bâwmah bawlhhlawh a paih hnu chuan in chhûngah chuan kan zui lût ve nghal a, in chhûng pawh an lo tidanglam nasa tawh hle mai.



"U Sasang, hei inlêng i nei a nia," tiin a au lang lang a.



Sasangi a rawn lang vat. Ka lo en țha duh lo phawt a, Lalàni a hriat zâwng a ni si lo va, mak a ti ngawt ang.



"Eng nge ni ta? Min lo hre thiam ula, ka va hre teuh-"



Ka hawi chhuak ta vat a, a thil sawi chu sawi pawh a sawi zawm thei lo, makti zet hian a meng bial kawl kawl a.



"Hey, i lo dam țhìn maw?"



"Mi sualnu, i va sual tak!!"



"Ka phone a bo daih alawm."



"Chu pawh ni se, awiii, a mak e! I chanchin ka hriat châk theihzia hi! Pasal neih chu i lo ngeih cher cher hle mai, induh ropui si!" a ti hmak hmak a.



"A lo buai theih ém a ni."



"In rawn bazâr dâwn em ni? I țhiannu hi tu nge tihte min hrilh ve tal la?"



Introduction ka pe leh rih. Kal vat a phal lo va, chaw ei kham deuh chiah e ti lo chuan ei tùr min rawn chhawp. Kan titi a, Lalàni pawh a tlângnêl nghal mai, chaw ei tùrin min sâwm nghal zat, ka hnial lo nasa.



"Pasal i lo la nei lo hi ka lâwm é, lo neih daih tawh la chuan kan hrilh a hai dâwn sia," ka tih chuan," Ka nei peih teuh lo; mahnia awm hi a nuam ber, kan zalèn bîk," a lo ti a.



Rei angreng deuh kan awm a, ani pawh chu chhuak ve tùrin kan sâwm ve a, a insiam ve nghal mai.



"Zanin tlai chu chaw ei r'u aw, in riak nghal bawk ang a, kan nula kha ka hrilh nghal dâwn a nia," a tih chuan kei chuan," A tihchi dâwn em ni? Hostel-ah khân ei tùr min lo siam kêp hlauh chuan-" ka tih lai chuan Lalàni chuan," Kan phone dâwn nia," a lo ti sam êt a.



Kan chhuak chu kan kal sâwt lo khawp mai. Hmel hriat kan hmu a, kan be leh lâwp lâwp a, inhmuh lohna a lo rei ve tawh si a, a àwm ve tho.



Pasal ka neih hnu khân Aizawl hi vawi hnih chiah ka phei, Sasangi bulah phei chuan ka sawi lang ngam lo hrim hrim, min hau nasa dâwn si.



Bazâr han kal leh chu a lunglènthlâk ka ti, college kal a hun hlimawm tak tak kan hmanna hmun kha a ni a, han kal leh chiah chuan thinlungah a thar leh vawng vawng mai.



'Aizawl kal manah' tiin Sasangi chuan restaurant-ah min luhpui. Kan țhut hnu rei vak lovah chuan ka phone a rawn rì a, Kenny-a a ni lehpek. A rawn chhuak dâwn tawh a niang, Sasangi nèn kan inhmu tawh tih hi hria se, mak a ti ve ngawt ang.



"Hello? Boss?"



"Hm...nuam ti lutuk lo la."



"I lo chhuak tawh dâwn em ni?" ka ti a, a țawng ka hriat chian theih deuhna tùrin ka beng lehlam ka hup a.



"Nizàn dâr 11:30 vêl khân ka thleng tawh."



He pa tak hi chu aw...!!!



"Va bei chak leh si ve!! Lo chhuak ve la, hei Sasangite nèn kan chhuak a, inhmu khâwm ang u," ka ti a. Sasangite chuan mitko sàn ãk hian min rawn en a, ka nuih sak a.



"Țhianpa ka rawn hruai hlei nem."



Nunsanga a rawn sawi chhuak ta. Ni e, kan pali khân kan inzui nasa ve ém asin, inzui rei lo mah ila. Kan pali kha chuan kan inkàwm nasa ve ém a ni.



"I rawn hruai a ngai lo!"



"Kan kim lo dâwn asin."



"Pawi dêr lo."


A nui hawk hawk a," Naktûk lamah kan chhuak tlâng zâwk dâwn nia," a ti a.



"Vawiin chu kan hlêp duai dâwn che a nih hi," ka ti ve thung a.



"Eng nge?"



"Tlangvãl chhe lo melh tùr leh min melhtu an tam lutuk,  nuam tak a ni," ka ti a, Sasangite pahnih chu za deuh hian an lo nui kar kar a.



"A țhat chu!"



☆GOLD DIGGER☆ - 15 By Dingdi Pachuau




Nilêng chuan kan inzui kual ta a, Lalàni nèn kan thil en duhzâwng a inang lo thei sia, a nuihzatthlâk zâwk. Kan duhzâwng inang lo mah se, kan inenpui zêl a, chuvàng tak chuan kan kal sâwt thei lo.



Tlaiah chuan Sasangite inah kan tlang nghal. Lalàni chuan a duhzâwng kawr a lei tawh a, kei ve chuan shampoo chiah ka la lei.



Coffee kan in zawh hnuah Lalàni chuan," Kawnga secondhand kekawr an zawrh kha ka zuk en leh lawk teh ang," a ti a.



Sasangi chuan," Zu en rawh, a țha asin, kei pawhin pahnih ka la nghe nghe," a lo ti a, kei chuan ka mamawh hran tawh lo, ka hâk khawp ka nei ve tawh chuan ka hria.



Lalàni kal hnu chuan," In chanchin zawng zawng ka hre duh a nia," a ti țan a.



"Zànahte tal ti ila?"



"Ni lo, min hrilh thuai mai teh."



Ka hrilh ta vek a, Nunsanga nèn kan buaina zawng zawng, a nu leh farnu min țawng khum dàn zawng zawngte chu a bo a bâng awm lovin ka hrilh ta vek a.



Ka sawi zawh hnu chuan," Kan inneih dâwna ka hlimzia leh vànnei ka intihzia kha, tunah chuan khâng hun kha theihnghilh vek ka duh tawh zâwk. Ka hriatrengna ata hi bo vek se ka duh, mumang țha lo lutuk ang ni se, harh ruala bo vek ang hian ni thei se ka ti tak zet a ni," ka ti sap sap a.



"Ka va khawngaih tak che! Nunsanga chu ka rin a va ang lo, a duatin a duh hle che khân ka hre si a." A mitmeng ațang chuan min khawngaih ngawih ngawih tih ka hmu thei a.



"Um, min duh a, kei pawhin ka duh. A thil hriat sual hi dâwt a ni tih a hriat hunah chuan hrehawm a ti ve tho chuan ka ring, a chhan chu dâwt hlang hlak a ni si a."



Ka kut vuan chung chuan," I phone a bo kher chu a pawi a ni tiraw? Țha tak leh tluang taka inneiah ka ngai char char che u a," a ti a, ka kut chu a chûl a.



"Nia, ka thil tawn hi tuma bulah ka sawi chhuak duh vak lo, Lalàni hi ka hrilh nual tawh a, ka puteate nupa leh Nubawihi leh Kenny-a an ni leh mai. A nu leh a farnu min țawng khum dàn phei chu nangmah chauh ka hrilh che, Nubawihi thukhuh deuh takin ka hrilh a, a rilru a nat lutuk ka hlauh vàngin a zawng zawng pawh ka hrilh ngam lo," ka ti a.



"I tawrh chu a râpthlâk ka ti tak zet. I rilru a hrehawm dâwn tehlul nèn! Han inhrîkthlâknate i duh ve àwm si a, rilru hrehawm rêng rêngin i awm țhìn tihna a ni sia." A mittuite chu a parawl kiang reuh a, min khawngaihin min hmangaih vàng a ni tih ka hria.



"Um; mahse, tunah chuan hun liam tawh a ni a, theihnghilh vek ka duh ka tih tawh kha. Hun liam tawh avàng hian nat leh ka duh tawh lo, nun thar, Nunsanga tel ve lohna din ka tum chho mêk a ni," ka ti sap sap a, Nunsanga hi hriatreng ka duh lo, a chhan chu rilru natna a rawn thar leh țhìn.



"Mahse, i theihnghilh thei dâwn lo a ni. I ngaihtuah chhuah chângin i rilru a rawn na thar leh ang a-"



"Um, ka hria alawm. Ka hre chhuak țhìn ngei ang; mahse, chu chu inzir chhoh nân leh huaisen nân, chakna atân hman țangkai ka tum ang," ka ti a.



"Țha lutuk!! Chutiang tùr chu a ni, fa in la nei lo va, nangmah leh Nubawihi chauh ngaihtuah tawh ang che. Pasal i neih leh duh pawhin Mama's boy ang chi hi chu nei tawh miah suh," a ti ve sauh sauh a.



"'Gold digger-i'. Hei hi ka sâp hming a nia, Nunsanga nu min phuahsak, ka lo inhmeh ém mai tiraw?" nui lui sak chung chuan ka ti a.



Ani chuan,"Amah zâwk chu alawm Gold digger dik tak chu. Mo atân pawh mi hausa kher a duh a, hmangaihna aia sum thlangtu a nia, gold digger  dik tak a ni," a ti a.



Lalàni rawn thlen hnuah erawh kan titi kan thlâk a, Sasangite awmpui nula chu eirawng kan bàwlpui a, fiamthu thawh pahin Sasangi chuan min sawisa a, kan nui vak vak a.



Sasangi nu leh pa lo haw chuan min hmuh chuan mak an ti kher mai. Kan inchibai lâwp lâwp a, anni hi ka țhiannu nu leh pa niin kei pawhin nu leh pa ang maiin ka ngai ve tho. Ka nu boral hnu phei hi chuan kan unau kan mal ngawih ngawih tawh a, an pahniha ka han hmu leh chu ka nu leh pa kha ka hre chhuak zawk.



"Naute hmuh ka lo inring tawh asin!"



"Pa, a chî a hût a," rang fahran hian Sasangi chuan a lo ti vat a, makti zet hian Sasangi chu ka va en phei a, a lo nui țhá a. Lalàni pawh a lo nui chhuak țhawt bawk a.



"Daw peih siah!"



"A nih reng kha."



Zanriah kan kîl laiiin ka pa (Sasangi pa) chuan," Hei, Sasangi u Mama'n nakum February thlaah nupui a nei dâwn a, in rawn kal ngei ngei dâwn nia. In pawh kan tihzàu belh ve a, an nu tùr a rai tawh avàng erawh chuan dàn thianghlim chu an tlin tawh lo va," a ti suap suap a.



"A nih tak chu, khawiah nge amah hi a awm rĕng rĕng a?" ka lo ti a.



"Delhi-ah. Tûn kâr tàwp hian a rawn thleng chho thei tùrah kan ngai."



Ka nu chuan," Lo phei ve ngei ngei r'u aw. Pasal zawnna chance a ni leh mai a," nui hak hak chung hian a lo ti ve a.



Sasangi lehpek chuan," Nu, khatin lo ti suh, a ti duh tak tak mai ang," a lo ti vat a, kei ve thung chuan," Kei chuan pasal ka mamawh tawh lo, ka nei tawh a, ka duhtâwk viau mai. Nangmah khân i mamawh, i zawng pah dâwn nia," ka lo ti a, kan nui dar dar a.



Zànah Kenny-a a rawn lang hlawl mai. Kan awmna ka hrilh si lo va, a rawn lang hlawl mai chu mak ka ti khawp.



"Engtin nge hetah kan awm tih i hriat?" ka lo ti var a.



"Ka hre lo, ka lo kal tawp."



"Ka awih thlâwt lo!"



Sasangi'n a rawn hmuh chuan," E, Kenny, inhmuh a va khât ve!! I dam țha maw?" a ti vat a, an inchibai bawk a.



"Aw, dam e. Pasal i la nei nange?"



"Pasal ka nei peih lo."



"A hmu zo ve lo va," ka lo ti vat a, rum zet hian min lo melh a, ka lo nuih țhú thung.



"Hmu zo ber pawhin i neih leh tawh loh kha!"



Tunah hi chuan Nunsanga a awm ve lo, a aiah Lalàni a awm ve ta thung. Kan palia kan awm khâwm lai ka ngaihtuahin suangtuahnain ka chhui lêt a, lung hlui a lêng ram ram mai.



"I ngaihtuah ril lutuk!" tiin Sasangi chuan a kut chu ka mit bulah a rawn vai a.


 Nui sak hian," Hun kal tawh ka hre chhuak zawk-" ka tàwp ta daih, ka hmui ka hup vat, Nunsanga ka ngaihtuah tih ka va sawi chhuak teuh ém!



"A àwm, i hriatthiamawm lutuk e."



Kenny-a chuan," A lunglènthlâk alawm," a lo ti ve boh a.



Sasangi kan bulah a mu ve a, a laiah ka mu. Chhuatah kan mu a, a nuam reuh tawp. Khum pawh a awm reng a, kan mu peih lo a ni.



"Kenny-a in tih kha ka hmu tawh tlatin ka hria," Lalàni chuan a ti sap a.



"Hmu tawh ang, i cousin nupui neihnaah khân a lo kal," tiin ka lo chhâng vat a.



A ngawi vang vang a, chutah,"E, ka hre chhuak, a lo nih chiah chu, a bialnu pawh chhe lo deuh kha tiraw?" a ti leh a.



"Um."



"Kenny-a'n bialnu a nei maw?" Sasangi chuan a lo ti ve vat a.



"Aw, chapchàr kût miss ngat maw le!"



"A awm lai khân in sawi chhuak lo a nih chu, ka fiam châk asin le," a ti nang nang a.



"An inhmeh ka ti lutuk a, inneih ni pawh khân mi khân kan en duh hlawm asin. A bialnu khân a duh hmel ka ti," Lalàni chuan a ti leh a.



"Kenny-a pawhin a duh ve tho alawm. Innei se ka ti, ka lawmpui ngawt ang, Bawihbawihi a fel si a."



Sasangi chuan," Eng hna nge a thawh chiah le Kenny-a hian? Mi rethei tak chu an ni lo chiang a," a lo ti a.



"Eng eng emaw a thawk kual țhûmin ka hria, Nunsanga khân min hrilh tak a, ka hre leh tawh lo," ka ti a.



"Nêp ve bawk siah!"



"Pasal neih tawh hi chuan thil engkim hriat dûm hi a lo har tawh a nih hi!" ka ti lêt sak a.



"I țhen leh tawh kha."



"Ninawm!"



Lalàni chu za zet hian a lo nui char char  thung a.



*******



Ni thum bazàr chhuah nân kan hmang a, eng vak ka lei chuang lo. Sunday pheikhawk nalh ve deuh ka lei a, Sasangi leh Lalàni erawh chuan an lei nual.



MC kawta kan din laiin General manager ka hmu lehnghal, hmuh loh der ka tum lai takin min rawn hmu ve chiah, biak loh theih loh, kan inhnaihchilh lutuk.



"Sir, i bazâr ve elo?"



"Zuali, in lei nalh em?"



Kan tawng rual ve ve. Ka țhiante pahnih an rawh hawi rual țhawt a, Lalàni chu a lài nghal ringawt nia.



Rei kan inbe lo, X-mas hlim taka hmang tùra duhsakna thu inhlànin kan inkalsan ta a.



"Chhe lo reuh ve!"



"I lêrh!"



Lalàni sen deuh țâwn țâwn en pah chuan," I lo lai chhe ringawt a, biak ve tùr alawm," ka ti hlak a.



"A zahthlâk!" a lo ti sap a.



Kenny-a'n 'Lo lêng ve hrim hrim teh u' a tih vàngin kan bazàr tàwp niah kan kal, an in awmna min hrilh a. Kan zawng nasa, a hnuah erawh min rawn hruai ta.



Car chhûngah chuan Sasangi chuan," Heti daih tawh tùr alawm, kan zawng hrep," a ti bài bái a.



"Nia, ka thiam loh a ni."



"Ho mai mai, a nuam viau ang!"



An in chu hmuh hmaih theih a lo ni lo. Building lian zet a lo ni a, a vâr vo mai a, pâwn lam ațanga en ringawt pawhin a zau dâwn tih a hriat.



Kan lût chu, rin ang ngeiin a lo zau nuam. A ropuiin architect thiam tak an ruai tih a hriat ngawih ngawih.



"A va nuam ém!"



"A va zau nuam tak!"



"Vaiho film channa in lian deuh hi a nih duh hmel!"



Kan țhian thum chu kan ngawi thei lo vek. Kan ka hau a, kan țawng chhuak tih pawh kan hre hlawmin ka ring lo.



"A làwmawm e. In chhâwl a hãl em? Ei tùr, in tùr in duh ang tiraw? Thu r'u, ka'n lâktîr ang e."



A kal ta nghal a, keini pathum lah chu kan hawi kual a, nuam kan ti viau a niang.



"Kenny-ate hi ka ngaih ang an lo ni miah lo!"



"An lo hausa tiraw?"



"A lo chapo lo hle mai."



An awmpui ni ngei tùr chuan tray-in in tùr a rawn chawi a, Kenny-a pawhin a hnungah rawn zuiin ei tùr a rawn keng bawk a, ka lo pui vat a.



"A va tui dâwn ve!"



"In vawi khat lo lènna a ni sia, 'cial' deuh lo chu ka duh hlei nem."



A ni tak tak a! An in hi ka la tlawh miah lo, Nunsangate nèna lèn kan tum ve apiang khân rokhawlhna a awm ziah a, kan țhulh zêl a nih kha.



Nuamti taka kan țhut dar dar lai chuan," Khawnge i chhûngte?" ka ti a, mi dang, an awmpui tih loh hmu hek lo i.



"Ka naute nupa room-ah an awm a, ka nute chu ka farnute tlawhin an chhuak, an lo haw țêp ang."



"Unau 3 in lo ni a ni maw?" Sasangi chuan a ti a.



"4 zâwk."



"Ka rin aiin in tam daih, a nuam ngawt ang," Sasangi vêk chuan a ti leh a.



A nui suk ringawt.



Kan eia kan in zawh hnuah chuan Kenny-a chuan," Naktûk tlai chu chaw ei khâwm ang u," a ti a.



"Khawiah? I chhûngte an awm chuan a zahthlâk àwm," ka lo ti hmanhmawh a.



"Ni lo, Durtlâng lamah zâwk a nia ka tih."



"Surprise che u ka tum a..." a ti leh sup a.



Kenny-a chu kan en ta țhap a.



"Hmun pakhat, remchâng deuh ka hria a, in tlawh ve pah dâwn tihna a ni mai. Engkim ka tum vek ang.



Sasangi chuan," Mi dang lo kal tùr an awm ve dâwn em?" a lo ti a, Kenny-a'n a chhàn dâwn lai tak chuan a phone a rawn ri dar dar a.



"Min lo hre thiam lawk," tiin kan awmna ațang chuan a kal sawn ta nghal a.



Sasangi chuan," A bialnu kha a ni ngei ngei ang," a ti sap a, kei chuan," A lo lêt hunah kan lo zâwt dâwn em niang?" ka ti ve a. Lalàni chuan," A rawn phone zing lo khawp alàwm le!" a lo ti thung a, kan thil sawi avàng chuan kan nui țhú  hlawm a.



A lo lêt har lo.



"Naktûkah chuan pakhatin min rawn belh ve ang."



Hm, Bawihbawihi bâk a ni lo ang.





*A CHÂNG CHUAN HMANGAIHNAA I TLÛKNA KHÂN, LO MAN CHAT TÙR CHEIN A LO LA INRING HMAN LO ȚHÌN*



☆GOLD DIGGER☆ - 16 By Dingdi Pachuau



Sasangi chuan," Keimahni pawhin kan lo hruai ve thei ang em?" a ti a.



"In duh a thu le."



Sasangi chuan min rawn melh pahin," Nuthlawi tharlâm kan awm bawk sia, zawnpui pah a ni mai a," a ti deuh kher a, ngei zet hian ka melh ráwm a.



"Zawnpui ka ngai lo, i hmuh zawh loh vàng mai a."



"'Hmu zo lo' tih chu a dik chiah lo, 'nei peih rih lo' tiin a dik zâwk ang," a lo ti leh zuap zuap a.



"I chhuanlam siam a theuneu ém mai."



Kan haw tùr chu min thlah vek, Sasangi kan thlah hmasa ber a, a hnuah keini pahnih chu Lalàni chhûngte inah chuan min thlah leh thlap.



"Naktûk chu dâr eng zâtah nge kan chhuah ang?"



"Zànah kan inbe țha dâwn u nia."



Zànah chuan hostel naupang châmbângte nèn chuan kan in-bonus a, hei hi hostel ka awm laia ka thiam ve tho a ni.



Lalàni chuan," I va mak reuh, ka thiam ve miah lo," a ti a, kei chuan," Hostel naupang nih chuan a thiam loh theih loh, mi dangin min zirtîr ve tho alawm. Ka thiam țantirh chuan nuam ka ti lutuk a, zàn dâr 2 thlengin kan ti țhìn, warden lo round tùr enthla tùr hi kan dah țhìn a, a lo kal veleh mahni room țheuhah kan tlân darh nghal vat zel," ka ti a, mi dang chu an lo nui kar kar a.



Ho viau mah se, intihhlim nân a nuam ve hranpa rĕng rĕng. Sualna a ni pawhin ka hre lo, lehkha zir aia kan dah pawimawh erawh chuan a fuh lo, lehkha zir tùra hostel awm kha kan ni miau a.



*******



Vawiin chiah hun kan nei ta. Naktûkah kan haw leh tawh dâwn, hostel hlui pawh kal leh chhin mai mai ka châk; mahse, hun a awm tawh lo.



Chawhma chhûng chu kan chhuak lo, chawhnuah Kenny-a'n min rawn lam a, Sasangi kan sâwm bawk a, thil pawimawh tùr ei tùr chu a lo lei vek tawh. Durtlâng lam pan chuan kan tlân ta vang vang a, Bawngkàwn kan thlen lai chuan Lalàni chuan college a kal laia an in luah țhin chu min kawhhmuh a.



Kan titi lai chuan Sasangi chuan," Naktûkah in haw tawh dâwn sia, a reh leh ruih dâwn a nih hi. Min rawn chingphùl sia, a reh tlawk tlawk dâwn a ni," hmalam ațang chuan a rawn ti a.



"Rawn zin ve la?" Lalàni chuan a lo ti ve a.



"Ka châk asin; mahse, kan buai chho chauh dâwn si a, inneih hnu lamah chauh ka hman ang, chu pawh school naupang exam zawhah chauh," a ti nang nang a.



"Pasal i nei dâwn maw?" Kenny-a chuan a lo ti sup a, kan nui ta vek.



"Hmu zo lovin engtin nge pasal a neih ang le?"



"Ka neih hunah i hre mai ang, ka hmu zo ve chiang ém! Ka la peih loh vàng mai mai. Kenny, ka u Mamate a nia  innei tùr chu," tiin Kenny-a chu a chhâng nghal zat a.



Durtlang kawng chho kan han tlân chu ka lung a lêng deuh ringawt nia. Thli a thaw vei har har a, pâwn lam ka hawi a, Nunsangate nèn khân kan lo tlân tawh țhìn azeng pawh a ni lo; mahse, ka lung a lêng ringawt.



Ni a sa val a, thlang lam thing hring dup lam chu thlîrin ka ngaihtuahnaah Nunsanga hlîr a awm. Ka maimichhîng a, kan awm dun lai, kan induh theihzia kha ka ngaihtuah lêt vang vang a.



Ka ngaihtuahnaah ka lo chêng tui deuh a niang, Lalàni'n min rawn kheuh zoh tâkah chuan ka harh chhuak ve chiah.



"I mumang ram kha rawn thlawh chhuahsan vat teh!"



Ka en vat a, Sasangi chuan," Nimina General manager kha a ngaihtuah a nih chiah kha," a lo ti vat a, a nui țhaw lehnghal a.



"Teuh lo!"



"A nih kha, a chhiat vak loh kha."



"I ngaihtuahna a nih chu."



A chek hlak a," I ngaihtuahna a nih hi kan sawi ni," a ti hlak a.



"Chu, hmel thar a hnai a ni maw?" Kenny-a chuan darthlalang ațanga mi en zoh pah chuan a lo ti a, kawng a en leh nghal vat a.



"Awm deuh."



"Awm lo."



"Nimin lama an inhmuh pawhin a lài chhe lutuk, a sen awp awp alawm," Sasangi chuan a lo ti leh zat zat. A va daw peih tak aw!!!



Ka thaw hawk, chhàn pawh ka chhâng peih tawh lo.



"Thu dik sawi hi chuan sawi tùr a vâng țhìn a nia."



Ka nui hawk ringawt, a chimawm ve thei sia, a duhnaah hi chuan a țawng thei sia, ka chhâng peih lo.



Car chu a ding ta dat. Sasangi titi avàng chuan ka lo hawi chhuak lo va, kan lo thleng reng tawh niin.



Gate lian leh sâng angreng deuh bulah kan ding a, Kenny-a chu chhuakin gate chu a va hawng a, a rawn lût leh a, tualah chuan kan tlân lût ta a.



Building thar zet mai, chhâwng hnih kawtah kan ding a, sak thar a nih loh vêk pawhin rawng hnawih thar a ni chiang. A sak dàn chu a mawi reuh khawp, tual a zau țhain phùl a lo țo hring dap bawk a, ka sawi thiam chiah lo, mit a làin a nuam a ni tawp mai.



"Ka in a nih hi, welcome vek u."



A in. Tlangvâl, mahnia in nei hrang pha chin, chu pawh in țha zet leh nuam zet. Engtin nge a tih theih zâwk ni?



"E khai!!!!" ka ti chhuak hluai ringawt.



"In i va nei țha ve!!"



Kawngkapui chu a hawng a, in chhûngah chuan kan lût ta dial.



"Wow!!!!"



"E heu!!!"



Mak ka ti a ni!! In chhûng chu a chei dàn a simple viau nain a changkâng ru hle si. Engkim chu a dik thlap, helai hi chuti deuh se tih tùr pawh ka hre lo, ka hawi kual zung zung a, a dik thlap vek mai.



"Țhu r'u, coffee tui tâwk ka lo siam ang che u."



Coffee hi chu tui a ti ve ngawt mai. Thlasik a ni tawh bawk a, kei pawhin in hi pawi ka ti lo, a cial deuh hlek phei chu in reng mai ka châk.



"Coffee i siam chhûngin in hi kan lo fang thei ang em?" ka ti a.



"Um."



Mi dang pawh chuan min rawn zui nghal vat a, room hrang hrang chu ka kal kual a, bathroom thlengin ka hawng. A dik thlap vek mai, Kenny-a hi thil duh uluk chi leh lêrh tak a lo nih dâwn hi.



In chungah ka chho a, room 3 lai a lo la awm cheu!



Mikhual room nge ni ang ka hre thiam lo. Bungrua a awm bawk si lo, ka zâwt chhin ang.



Step zau hek hawka ka chhuk thlâk lai chuan coffee rim, rimtui zet ka hre vang vang, ka hîp lût hawk hawk a.



"A va tui dâwn ém!!"



Sasangi leh Lalàni chu an lo țhu tawh. Coffee chu an lo in mêk a, an bulah chuan țhuin dawhkàna coffee no, khu là lá chu ka ban nghal a.



"Eng nge in chu i hmuh dàn?"



Coffee chu ka dût hlak phawt. A va tui vawng vawng ve.



"A va tui chiang ve! Um, a țha khawp, engkim a dik thlap, in chung room pakhat erawh khi chu ka hre thiam lo, eng room tùr nge?" ka ti nghal a.



"Play room tùr. Nupui neia fate ka neih ve hunah chuan-"



Ka kut ka bêng a," Chu hun chu ka va nghâkhlel tawh tak! Beiseinain ka lo thlîr reng tawh a nia," ka ti vat a.



Sasangi chuan," Nula vànnei tùr chu-" a lo ti var a.



"Bawihbawihi hi vànnei lul rawh se. In inneih hunah chuan ka intithu ngawt ang," ka lo ti leh a.



"Khalam kha chu duhtâwk ang. Sa ka siam ang a, nangniin salad leh a kaihhnawih in lo buaipui ve thung ang. Siamsa lâk ringawt ai chuan han siam buai ve hi a tui zâwk ka tia, in huphurh lo tùrah ka ngai," a ti a.



Lalàni chuan," Bai siam kha chu ka thiam ve zawng a nia," a lo ti ve a.



"Țha lutuk, Sasangi nèn salad kan lo buaipui thei ang," ka lo ti vat a.



Coffee in zawh hnu chuan kan tih tùr lamah kan buai ta sang sang a, mahni chanpual chu kan hre ve khawp mai, tumah kan intibuai lo.



Kan tih zawh tawh lamah chuan Kenny-a chu a lo lût a, "Ka chhuak lawk dâwn a, ka thil chhuan saw minute 10 hnuah lo off mai r'u aw," a rawn ti a.



"Aw."



A chhuah hnu chuan Sasangi chuan," Khawnge a chhuah dâwn le?" a ti sar sar a.



"Hre lo le, a pawimawh viau a niang."



"E, mi pakhat a lo tel ve tùr thu a sawi kha, a bialnu kha a ni mai lo ang maw?"



"Ka hre lo le, a ni maithei."



A bu nghat nghat a," A pawi lo, hmuh ve pawh a châkawm alawm. A changtupain a changtunu a rawn hruai lût dâwn, an in thar tùrah. Va romantic tak!" a ti vang vang a.



"Thil romantic hre hle si, romantic lo viau bawk si!"



"Ngawi teh, thil ka lo zâwt lawk che. In-jish laiin eng nge ngaihtuah tùr? Men tùr nge maimichhìn tùr?"



A va ngeiawm thei tak!



"Mawh?"



"I hriat duh chuan bialpa nei la, tichhin ve mai rawh u."



A nui duh miah lo.



"Nang chu experience i nei tawh a, induh viau lovin min hrilh ve mai teh," a ti leh a.



"Ka ning e, zak ve deuh teh!"



"Ka hre ve châk a ni mai alawm le, bialpa neih hmaa lo hriat kĕlh ka duh alawm aw.  Nunsanga nèn khân in in-jish hmasak ber țumin i zak ve tho em? In-gus gus phei chu-"



A chalah ka chemte ken fawng lam chuan ka tuk kerh a.



"Ka ning! Sawi tawh suh, chutiang sawi zuah zuah chi a ni ngai em ni?"



A chal chu a dawm vat a," Ka zâwt leh tho ang che, mi dang zawng zawng awm ve lai ngeiin a nia ka zawh dâwn che ni," a ti lui țâlh a. Chutah, thil hre chhuak thut niàwm tak hian," E he! Kenny-a thil min chah kha," tiin a ding leh thut a, gas off tùr chuan a tlân ta nghal a.



Kenny-a pawh a rawn thleng har lo, Sasangi rin ang ngeiin Bawihbawihi a lo hruai tak tak!



Kan inhmuh chuan," E, nangmahni elo? Ken-a hian hrilh duh miah lo va, ka thla a muang ta huai mai," a rawn ti nghal sat sat a.



Ken-a. Ka vawi khat hriatna.



Ka nuih sak a," Ani pawhin a sawi lang duh miah lo che a, mi pawimawh tak i nih chu ka lo ring sa reng a," ka lo ti ve a, mi dangte nèn chuan an inchibai liam liam a.



Kan țhianzaho thil siam ngei mai han ei chu a nuam danglam bîk. Sasangi  chimawm a chhuak lehpek a, chaw kan ei lai chuan a hmaa thil min zawh bawk kha a rawn sawi chhuak leh tak tak a!



"Nakinah nangmah chauh ka hrilh ang che, duhtâwk rawh."



"Kan hre ve châk a ni mai."



Khawn fawk hi ka châk a nia. Hmeichhe hlang chu ni ila a zia deuh mahna.



Sasangite nèn Bawihbawihi chu an inbe nghal bawrh bawrh thei, Lalàni pawh chuan a cousin-te inneihna kha sawi chhuakin inchhûngkhat an nih thute an sawi dùn ta luam a.



Ka phone a rawn rì a, Nubawihi a nih vàngin bathlàrah chhuakin ka bia a. Aizawla ka bazar thu chu ka hrilh ve luam a, ani pawh chuan a țhiannu nèn zàn bazâra chhuah an tum thu chu min hrilh a.



"Fîmkhur ula aw, hmeichhia in nih kha."



"Aw le, boss."



Kan nui hawk hawk a. Nui mah ila, ka ngai reuh mai mai.



"A va hlimawm àwm ve?"



En lo chuan," Nubawihi a nia," ka ti a, pâwn lam chu ka thlîr vang vang a.



"Thil awmzia hriat chhuah kha i la duh reng em?"



Ka hre thiam lo lek lek a, ka en há a. Chutah, ka hre thiam leh chiah.



"Thil kal tawh a nia, thil nih tùr a ni zo tawh bawk a, theihnghilh daih ka duh tawh," ka ti ta sap a.



A ngawi deuh vang vang a," A țha e, nia, hriat chuan rilru a tina thar mai mai ang," a ti ve sup a.



"I hre tawh em ni?"



Min en vang vang a, kei pawhin ka en ve reng.



"Theihnghilh zâwk ang!"





*BE YOURSELF WHEREVER YOU ARE*





☆GOLD DIGGER☆ - 17 By Dingdi Pachuau




"I hre chhuak tawh tak tak maw?" ka ti leh ngat a.



"Awmzia a awm lo, theihnghilh daih rawh!"



"Ka rin kha a dik tiraw?" Ka hre châk ve leh tho bawk si.



Min chhâng lo chuan a khap sak ringawt.



"Kha maw, a dik chiah. I țhianpa nu a nia, sawi i duh lo ang tih ka hria a ni. Ka la na tawh hlei nem, ka rin dàn sa a ni tho a,  engah mah ka ngai lo."



Ka nu ruahmanna maw lo ni a?! A dik ang, ani lo chuan khatiang thil tenawm kha an ti duh lo ang, a tìrah khân rinhlelh ngaihna pawh ka hre lo kha a ni a.



"I țhianpa chuan a hre vek tawh ang tiraw?"



Min chhâng lo chuan min la en char char, a mitmeng ațangin a ngaihtuahna ka hre thei si lo.



"A nu dâwt sawi chuan a rilru a tina ve khawp ang le! Rinhlelh ngaihna a hre bîk dâwn dèr si lo va," ka ti sep sep a.



"A pawi ka ti, i rilru a na thar leh si a?"



"Aih... ka tina dâwn tawh lo. Dâwt vànga nat ka duh tawh lo, ka tum tawh lo hrim hrim," ka lo ti charh a.



"A țha lutuk," a lo ti sup a.



Kan ngawih deuh vang vang hnu chuan a aw chu a thian a, chumi hnuah chuan," A har ang tih chu ka ring; mahse, i tâna țha ber chu theihnghilh hmak hi a ni," a ti leh a.



Nunsanga nge theihnghilh tùra min tih kha thil thleng kha? Ka hre thiam chiah lo.



"Hetah in lo awm reng a ni maw?" Bawihbawihi a rawn lang ve leh hlawl mai.



Lo nuih sakin," Lo kal rawh, kal sawn ka lo tum chiah a," ka ti sap a, ka pên sawn ta nghal a. Bawihbawihi'n," Ken, room chu min fanpui tawh la..." a tih chu ka hre vuai hman a.



Lalàni leh Sasangi chu an lo la titi tui khawp mai, ka va fin lai pawhin an lo la țawng lar lar. An bulah țhuin an titi ngaithla ve àwm tak chuan ka awm a; mahse, Kenny-a thil sawi hlîr mai chu ka ngaihtuah.



Nunsanga ngaihtuahna ka hre châk. Khatiang thil sual titu kha a nu a ni tih a hriat chhuah lai taka a rilru puthmang a nia ka tih. An nufa inkâr chu engtin nge a awm ang? A nghîng ve deuh dat ang em? Mahse, thisena inzawmna nei, nufa dik tak an ni a, a tìrah thinrim deuh viau pawh ni se, a hnu deuhah chuan a rim rei thei lo ang.



Chutiang lam hlîr mai ka ngaihtuah avàng chuan ka țawng ve lo. Min biakna pawh ka lo hre lo hial, Sasangi'n min rawn sâwi deuh nak a, ka lo melh hû ringawt.



"Thil rĕng rĕng ngaihtuah ngut ngut zêl suh, mi ă ang mai, biak chhàn nachâng pawh hre lo," a ti hlak hlak a.



"In thil sawi ka lo ngaithla alawm."



"Daw lo teh; mahse, kan hre thiam ang che, a hunlâi a ni ve a," tiin ka koki chu a bêng thap thap a.



Kenny-ate pahnih pawh an rawn lang har lo. Sasangi'n a lo fiam dùn leh hlak a, Bawihbawihi chu a zak deuh a, a àwm ve tho.



Kan țhu khâwm chu thla lâk an rawt a, Sasangi lehpek chuan," Tlangvâl vànnei tih  caption-a hman pawh a châkawm alawm," a ti leh a, an nui țhá hlawm a.



Thla kan lâk hnu chuan haw mai an rawt a, naktûk lamah kan haw tawh dâwn si a, mut hma pawh a pawi lo viau.



Kawng tluanin ka țawng lo. An titi barh barh a, kei chu a hnung sîrah țhuin ka ngaihtuahna ka kàwm a, ka lo kàwm tui deuh a niang, kan tlàn chhûng ka hre rei lo riau.



Mut hmunah kan țawng vak lo. Lalàni  a chau ve deuh a ni maithei, nge mut tam a duh zâwk, a muhìl hma phian lehnghal a, kei erawh ka meng kar thung. Muthilh thuai ka duh asin le, Kenny-a thil min hrilh vàng vek.



 Engati nge ka ngaihtuah reng duh mai mai le? Ka rinsa tho kha a ni a, ngaihtuah hi an phû lo asin. Ka kalsan hnu an ni, ka ngaihtuahnaah an chêng tawh tùr a ni lo. Engmah inzawmna kan nei tawh hek lo, eng atân nge ka la ngaihtuah cheu ni?



Ka muthilh theih loh avàngin ka mu meng reng a, mut tichhuak thei tùr thil dang ngaihtuah ka duh a ni. Ka phone-ah games ka nei lo, laptop tal kha lo keng ila țha tùr, ka story ziah kha ka chhunzawm char char mai tùr a nia.



Ka story kal zel dàn tùr chu maimichhîngin ka ngaihtuah ta a, rei pawh ka ngaihtuah lo, ka mumangin a rawn chhunzawm ta nghal a.



Rin loh deuhin Kenny-a min rawn thlah tùrin a rawn lang leh hrâwk mai.



"I va fel ve!" ka lo ti vat a.



"I țhian ka ni alawm."



Sumo lo thlen hma chu kan inkàwmho leh a, rei kan nghâk lo. Sumo a lo thlen chuan kan pahnih seat chiah a lo ruak tawh a, kan inhlâng ve vat vat a, a hmaah chuan kan țhu lût ve ta nghal a.



"A nih aw, min rawn thlah a, kan lâwm e," ka ti ve ngial a.



"I thlen hun àwmah ka rawn be dâwn che nia."



"Aw le," tiin ka bu nghat a, kan tlãn chhuak ta a, kan in-bye bye lap lap a.



Motor chu ka rùi ta tlat, hrehawm ka ti rilru khawp mai. Nizàn lam ka mut țhat loh vàng a ni ngei ang, kan chawlhnaah ka luak nghek a, tlêm chuan ka zia. Rui viau e ti lo chuan ka muhìl țha thei bawk si lo va, a nuam lo tak zet.



In ka thlen pawhin ka che peih lo, thutthlèngah ka mu thlar mai, motor ruih hi thil nuam tak a ni miah lo, rui ve ngai lote vànneihzia ka hre uar uar mai.



Ka lo muhìl a ni chiang, ka phone riin min tiharh a, ka va peih lo tak! Thil pawimawh a nih loh teh chuan aw...



"Hello?" Ka aw zet chuh!



"I aw chuh, i țha em?"



"Eng nge ni ta?" Ka meng peih chuang lo, ka țawng peih țâwk țâwk a ni.



"I thlen tawh ka ring a."



Aw, thleng tawh e. Ka thlen hun àwm vélah min rawn call a tum tak, min va call tlai si ve.



"Thleng daih tawh."



"Nizànah i mu țha lo sia, ka rin ang ngeiin tunah pawh i awm leh tawh."



Ninawm, thil intihre  lutuk.



"Ka chau!"



"Mu leh rawh, i țhat deuh hunah ka rawn be leh ang che."



Ka mu leh vang vang, ka pum a ri kal ruih ruih mai. Thawh ka va peih lo tak ém! Nubawihi ka ngai, awm se chuan peih lo chung chunga ka thawh a ngai lo tùr.



Ka hmai ka phih chuan tlêmin ka zia deuh chuan ka hria. Ei theih tùr ka melh a, ei châk ka nei chuang lo si lo.



Tui ka lum a, tui sa ver vawrin inbual ila ka zia deuh mahna. Ei tùr tlêm ka ei, ei loh tawp aiin a țha hrim hrim.



Khua a vawh tawh avàngin khumah ka mu kãk a, ka ke hmâwr a vawt thlar mai. Nunsanga ka hre chhuak leh ta, ka ke a vawh chuan ka hre chhuak ziah. A ke lum ham ham deh nawm theihzia kha. Ani chuan pangti lum a ngah a, a ke hmawr pawh a vawt ve ngai lo a nih kha.



Tunah hi chuan ka mal tawh tak zet a ni. Mal tùr rêng hian ka lo piang a nih dâwn hi.



*******



Krismas azawnga Krismas nuam lo ber chu a va ni ém! Keimah chauha ka hman vawi khatna a ni bawk a, ka khua a har ngawih ngawih. Nubawihi nèn kan in-phone reng a(Nunsanga nèn kan ințhen tawh tih ka hrilh tawh, Aizawl ațanga ka haw hnu zan hnihnaah )  Ka lung a lêng tih a hre ve a niang, ka call ngai lo hian min rawn call zut zawk. Ani hi chu a tlei ve thei mai zêl a, kan inang lo lutuk ringawt.



Pasal ka nei ve zuk tawh bawk sia, ka awm dàn a lài kual vêl vek. Nubawihi a awm kha chuan kan pahnihin kan inzui mai a, tunah a awm tawh si lo va, ka ngaih ém ém chhan pawh a ni.



Engtin tin maw Krismas leh Kumthar chu ka hmang liam ve mai. Hna thawh thuai thuai ka nghâkhlel lutuk ringawt, mahni chauha awm zawng, a lo nuam lo chiang ém mai.



Hna kan thawh țanni chuan sawi tùr kan ngah ve hlawm a niang, kan innuih var var hlawm a. GM pawh a nèlawm khawp mai, Aizawla kan inhmuh vàng khân nge ni ka hre lo, min rawn hre ta riau mai!



'Sir' ti hlîrin kan ko va, a hming tak erawh chu Sangzêla a ni. A hming hi a inhmeh reuh ka tia, a sâng chĕr dén mai a, a fai vang bawk sia, naute cute deuh a ang ka ti țhìn, a chhan chu a hmai a sîn reuh bawk a.



Zan khat thlêng ka sil lai chuan  ka phone a rawn ri ral ral a. Tûn ang hunah hian tumahin min phone ngai lo, Kenny-a chuan țûl bîk tĕah lo chuan mut dâwn lamah chauh min lo call țhìn a, Nubawihi lah chuti bawk. Lalani, Sasangi, khawi emaw zâwk zâwk a niang. E, chuan, Putea pawh.



Ka kut ka hru hul sawk sawk a, ka phone chu ka la a, ka en a, number ringawt! Chhàn ka huphurh țhìn.



"Hello?"



"U Zualte?" a rawn țap deuh pàr mai! Bawihbawihi aw a ang.



"Bawihbawih?!!"



"Aw, U Zualte, min pui teh, Ken-a rilru put dàn hi ka hre thiam lo..." a inhnît hlap hlap a, mak ka ti tawp!!



A inhnìt reh deuh hnu chuan," Eng nge thil awmzia?" tiin ka zâwt a.



Thâwk a la huai a, a țah a la chhuak hle tih hriat zet hian," Kan inkâr tihtàwp a tum a ni. Engtin nge ka tih ang? Khawngaihin, khawngaih takin,  min pui hrâm teh, Ken-a hi ka duhin ka hmangaih tak zet a ni, nang pawhin i hriat tho kha," a ti zàwi raih a.



Engtin maw? Kenny-a'n Bawihbawihi țhen a tum maw? Eng vàng nge? An inkâr chu a țhat hle tawh kha.



"Inhau thinrimna in nei em ni?"



"Nei lo, keima lamah chuan chutiang a awm lo. U Zualte, min pui ang tiraw? Nang chu a țhian i nia, i thu sawi apiang chu a awih ziah tih ka hria. Kan inkâr hi tihtàwp ka duh lo a ni." A sawi tàwp lam phei chu a hriat theih chang chang a.



Ka khawngaih reuh.



Mahse, engtin nge ka tih chuan ang le? Kenny-a rilru ka thlâksak thei dâwn em ni? A chunga thuneitu ka ni lo va, thu pe theitu pawh ka ni si lo.



Mahse, Bawihbawihi hian min ringin ka țanpuina a rawn ngèn ve lawm lawm a ni si, beidawngin ka chhâng thei lo ang.



Biaksak ka tiam thei alawm.



"Ka lo be ve chhin dâwn em niang?"



"Aw le, ka lâwm lutuk aw. Nangmah lo chu tumah hrilh leh biak tùr ka nei si lo va, nangmahah ka innghat tawp mai a ni." A aw chhuaka beiseina leh hlimna chu ka hre thei, biak chhin ka tum thu ringawt pawhin beiseina a siamsak chu a ni si a maw.



Ka biaksak ngei ang.



Thlèng ka sil zo leh tĕ tĕ a, huphurh rilru deuh tho si, Bawihbawihi min ngenna tihhlawhtlin duhna rilru pu chung chuan ka call ta a.



A vawi khat ring-naah a lo chhâng nghal zat.



"I tho â em ni?"



"Khati'n i boss chhâng suh."



A nui huk mai. An chanchin hre sa angin em ni ka zawh ang le? Hre sa anga ka zawh nghal chuan min be duh lo ta se, engtin nge ka tih ang? Ni lo, chutiang chuan ka ti thei lo ang, chuti lo chu min ringhlel mai ang a, Bawihbawihi ka puan vek dâwn asin.



"I dam em?" ka ti phawt a, ani lah chuan," Min call hmasa ngai si lo va, eng nge thil awmzia?" a ti leh daih a.



Min ringhlel lo hrâm teh se.



"Ka hman lutuk vàng maw le," ka ti ta ringawt.



"Hman lutuk ziah la a țhat dâwn chu."



Sawi tùr ka vàn.



"Lunglei lamah i phei leh tawh em?" tiin ka zâwt leh ta ringawt, ka pehhêl kual rih.



"Niminah Lunglei ațangin ka phei chiah zâwk."



"In boruak a țha zêl maw?"



"I kal leh châk deuh em ni?" Ka thil zawh chu a hre lo der thiam hle mai.



"Châk țêp. Kan zin dâwn em niang?" tiin ka nui a.



"Theihnghilh rawh."



Leh ta hmuk hmuk mai a.



"Ka ti mai mai a nih kha. Ka kal leh châkin i ring em ni?"



"Ring deuh."



"I ring dik lo a nih chu. Tunah tak khân eng nge i tih a?"



"Nuthlawi ka bia!"



Ngeiawm leh ta. Chimawm zeta mi biak leh zauh hi a hrât a, a hriat chian lêm loh bulah chuan a țawng tam lovin chimawm pawh a chhuah ngai lo.



"Nuthlawitîr tùr i hmuh ve loh vàng mai a-"



"Ka duh ve loh vàng a ni zâwk. Hmuh loh vàng chu ti miah suh, ti ngai hauh suh."



Ka thil sawi chu a la na ve ngàng ngàng hle mai maw.



"Dam dam, hâu s'u."



"Nuthlawia siam tùrin nupui neih ka duh lo a ni mai."



Ka nui hak hak a," I la na ve bawk sia,  i thu sawi chu ka awih mai ang e. Lo zin la?" ka ti ta daih a.



"I tho â lo tak tak maw?!"



"Teivet! Â lo, i hria maw? Mahse, i lo kal hmain thil pakhat ngen duh che ka nei a," ka ti ve ta zaih a.



"Eng nge chu chu?"



"Min tiam phawt la?"



"Ka tiam tùr che chu sawi ta che."



"I tihlawhtling ang tih min tiam phawt la?" ka ti ve țàng țáng.



A ngawi vung vung phawt a, ka thin a lo phu dèp dép mai.



"Ka tiam che."



"'Ka tihlawhtling ngei ang tih ka tiam a che' ti la?" ka ti leh.



A thaw hawk a, a dawhtheihna a pan deuh țan tawh a nih hmel.



"Aw, chutiang chuan. Ka tihlawhtling ang tih ka tiam a che. Sawi rawh."



"Bawihbawihi hi țhen suh."



A reh ta vung vung.



"Min tiam tawh a nia aw, i bawhchhe  thei lo ang," ka ti a.



"Engtin nge... a rawn call che em ni? Țhen lo tùra ngèn tùr chein a rawn ti che maw?"



A aw chhuak ațang chuan a lungawi loh hmel kher mai.



Mahse, ka hlau thei lo ang. Ka sawi chhuak ta sa sa, a hre tawh tho. Ka sawi vek mai ang.



"Kenny, ka țhian i ni a, i țhian ka ni bawk. Mi fel tak a ni a, ka duhpui ém ém che a- "



"Engmah i hre lo!"



"Ka hria, in inkâr tihtàwp i tum tih ka hria, a rilru a nâ a, a rawn țap asin. Nula fel leh zaidam tak a nia, a zakzum hle bawk; mahse, a duh ém che avàngin a zak zo tawh lo a ni. Ka khawngaih asin, a thil tawn ang chiah hi tawng ve lo mah ila, a rilru tùr ka hriatthiampui ruak tho," ka ti mawlh mawlh a, ka țawng laklawh laiin min rawn tibuai ang tih ka hlau lutuk a, ka sawi zawh meuh chuan ka thaw a chham lek lek.



"I sawi zo tawh em?"



"Aw... min tiam tawh kha aw, tihlawhtling ngei ang che," ka la ti fan a.



"A nih, ka hlim i duh em?" tiin min rawn zâwt ta khauh mai.



Rilru nuam lo angreng deuh hian,"Aw..." ka ti fân raih.



"Mi dang, ani aia duh ka nei a ni."




*MI ȚHATNA LAI I HRE LO A NIH PAWHIN AN CHHIATNA LAI SAWI KHER SUH, HLÂWKNA A AWM LO*



☆GOLD DIGGER☆ - 18 By Dingdi Pachuau




"Chu, i rinawm lohsan elo?!! Kenny, ka rin ang i lo ni miah lo!!"



Mak ka ti lutuk ringawt.



"Duh zâwk ka nei-"



"Engati nge hetia i awm? Hetianga ti leh mai mai tùr si chuan a tìrah khân lo nihpui miah loh tùr che alawm le. Ka rilru a natpui hle mai, mipa hi ka hre thiam lo a che u, in lo mak a nih hi."



Nunhlui liam tawh hnu ka rilruah a rawn thar a, ka inâng thinrim pah bawk nèn, ka țawng ta hrep mai. Bawihbawihi ka khawngaih a, a duh tak mipa a tawn ve hnuah a mipa zâwkin mi dang duh zâwk a neih vàngin hnâwl a ni dâwn ta tihna a ni a. Mihring nunphung, khawvêl her dàn chu a ni teh meuh mai; mahse, a nâ asin, a tuartu tân hian a na ngawih ngawih.



Ka sawi zawh rual chiah khân ka phone kha ka off ta kha a ni a, ani pawhin min rawn call hran chuang lo. Rawn call pawh ni se ka chhâng kher lo ang, ka lo ànkhum hrep dâwn si a.



Mut hmunah erawh a rawn call ta  tho.



"I thin a rim zo tawh em?"



"I tiam tawh kha, i bawhchhe thei lo ang. Mipa ka rin berin i thutiam tawh i bawhchhia a nih chuan ka ring tawh ngai lo ang che," ka ti nghal chat a.



"Chu bawk chu..." a ti hluk a.



"Khawngaihin, ka ngèn che a ni, i fel ém kha."



"Fak derna hlauhawm!"



A sawi dàn chuan ka nuih a tiza lutuk a, ka nui lo thei lo.



"Ka fak der lo che aw, nang ang țhian fel leh rintlâk ka nei che hi ka lâwm tak zet asin," ka ti a.



"Ka lâwm e."



"I lâwm bawk sia, lo zin la?" ka ti zaih a. Lo zin se ka ti, a ngaihawm ve a.



"Ka lo zin nghal dâwn!"



Ka nuih hawk hawk a, awlsam tĕa mi chhàn hi a chîng a, a châng phei chuan ka thin a rim lek lek țhìn.



"I lo zin chuan coffee tui tâwk kha min siam leh thei ang a... A, ka in leh châk tawh lutuk," ka ti a, ka in leh châk tak tak!



"Siam dàn ka hrilh ang che."



"Aih, i siam ngei kha a tui," ka ti tlat a.



*******



Sangzela a lo lêng dâwn.



Hrehawm ka ti zâwk. Lalàni'n a star si a, min biakte hian nuam lo ka ti țhìn, min duh angin awmin hre lo mah ila, min haw lo tih ka hre thung.



Mahnia in luah ve tho a nih vàngin a khua a har te pawh a ni ve mahna, lo lèn a tum thu min hrilh pawhin ka hnial lo. Hnial  chi pawh niin ka hre lo.



A lo lêng ta ngei e.



Suede kekawr dum dak thlarh a hâk chu a inhmeh kher mai, a tilang sâng zualin ka hria. A jacket hnuaiah half neck sen duk a ha a, a tarmit vuah kâr ațang chuan min enin a nui sak a.



"Ka rawn lèn tak tak i ring lo a ni maw?" a ti thâwp sat a.



Nui chung hian," Ring e, hei i lo lèn ngei hi," ka ti ve a, ka kawrlum fual hnek hnawk hâk chuan ka intuam țha sauh sauh a.



"Lo țhu rawh, thingpui ka'n chhuang ang e aw, khua a vâwt bâwk sia," tiin ka tho ta nghal a.



"Haw hma se min ti a ni maw?"



Ka ding chat a, ka hawi lêt chuan a lo nui sâng a.



"Nih leh, nakin deuhah aw," tiin a țhutna opposite-ah chuan țhuthmun ka rem leh ta a.



Hnathawhnaa ka boss a ni sia, mi dang ka biak bawrh bawrh anga biak chu harsa ka ti deuh. Felin țawng duh viauin intizahawm lo viau mah se, ka zah ru ve tho.



Kan in chhûng chu hawi kualin kan chhûngkaw chanchin min zâwt a, ka hrilh ve mai; mahse, pasal neia țhen leh tawh ka nih erawh ka hrilh hran lo. A țûl pawh ka ti kher lo, a hriat hunah hre ve mai rawh se.



A țawng duh phian a, a zaidamin a nui duh khawp mai. Lehkha a zir chhoh dàn min hrilh a, an chhûngkaw chanchin leh an harsat theih țhinziate chu min hrilh ve mial mial a.



A sawi zawh chuan," Hlawhtling ngei tùr i nih chu, i tuar a chhel bâkah i tum a ruh bawk si. Hetiang mi hi an ngaihsànawm asin, hlawhtlin in phû ngawih ngawih a ni," tiin ka fak a, fak a phû bawk a ni.



A nui hak hak a.



"A va làwmawm leh sî ve! I hnên ațanga fakna dawn phei chu a lawmawm zual. Nang pawh hei, mi hlawhtling tak i nih hi, i hna i thiam bawk si," tiin min fak ve hlak a.



Ka zak deuh hlek. Kei chu nu neiin, inhlawhfa lovin lehkha ka zir a, ka zir sâng hran lo. Ani erawh nu leh pa kâr ni lovah, a zirna tùr pawh inhlawhfa chawpa thawkin a bei a ni a, a tum ém a ni. Hlawhtling tùr a ni, a hlawhtling ta rĕng bawk a.



"Ka lâwm e, chuan, thingpui ka lum tawh ang e."



Thingpui tui takin ka siamsak a, kei pawh ka inthlit ve tho, amah chauha ka siam chuan nuam a ti lo ang tih ka hlau.



A vawi khat lo lènna a nih vàngin rei tak a lêng lo, a haw dâwn chuan fiamthu hian," Lo lèn ziah tùr a nih hi, ti ila min lo ning viau thei tho a," nui chung hian a ti a.



"Haha, ning lo ve, i duh phawt chuan lo lêng ziah rawh," ka ti ve a.



"Ka zawngchhang ngeiin ka ring!"



A pawi ka ti tehchiam chuang lo. A chhe lo va, a bula awm a nuam a, a hahdamthlâk. Tlangvâl a nia, a lo lêng thiang miau alawm.



Nubawihi'n a rawn call. Ringtone a lo inthlâk vàng a nih hi, ka ning tak tak. A duh hun hunah hian a lo inthlâk ziah, a țâwng ve deuh tawh a ni.



"Tlangvâl inlêng i nei a ni maw? Ka call pawh i chhâng duh lo vêl a."



"Ni nâng, room-ah ka lût a, hei ka hmu ve chiah. Ringtone a lo inthlák leh tawh a," ka ti a.



"Tlangvâl inlêng i nei a nih ka ring a, a nih loh pawhin in pa hlui a lo kal a niang ka ti rilru deuh hlek a," a ti leh zat zat a.



"Teuh nâng; mahse, zanin chu kan GM a lo lêng a-"



"Eng nge GM chu?" a lo ti vat a.



"General manager maw le. Tlangvâl chhe lo deuh leh fel deuh a nia."



"Iau! A va fuh dâwn tak! Ka mâkpa tùr chu GM maw? A țha lutuk e," phûr zet hian a rawn ti leh lar lar a, min tinui nasa mai.



"A lo lêng mai mai alawm."



"Khatiang khân bul a țan dâwn alawm, ka hmu ve châk hle mai. Doctor ai chuan GM mâkpa neih chu ka duh daih zâwk!"



Nubawihi tak hi chu aw...



Sasangi message a rawn thleng ve nawlh mai.



*Pasal ka nei dâwn...*



Ka nuih nasa lutuk ringawt. Ani bialpa nei ngai lo hian khawilam pasal nge a neih tehlul ang? A u Mama'n nupui a neih dâwn laia pasal neih be dâwn thu a awm lo.



*Ka lawmpui che* tiin ka reply a.



*...kum 5 hnuah* tih a rawn thawn leh a. Min tihder a tum ve viau nain min tihder hran chuang miah lo, tûn ațanga kum 5 hnuah chuan a nei tak tak maithei asin.



*Kan tum dâwn nia*



Mut hmunah ka nui vur vur.



Tukin khân Bawihbawihi'n min rawn phone a, làwmthu min rawn hrilh. Kenny-a chuan a țhen thu a sawi lo a ni àwm e. Mite hlimna siamsak hi a țha asin, rilru hi a hlim veng veng; mahse, tlêm tĕ chuan nuam lo ka ti deuh. A chhan chu Kenny-a'n Bawihbawihi aia duh zâwk a nei a, kei lahin Bawihbawihi țhen lo tùrin ka lo ti ve bawk si. Kenny-a chan chu ka chanah ka dah chhin a, nuam ka ti chiah lo deuh.



Nunsanga ka hre chhuak leh zawk. Ka theihnghilh hmin țhak thei lo, khati chen ka pasal a lo ni tawh a, ka duh leh ka hmangaih a ni. Ka duh rĕng vànga țhen ka ni hek lo, ka hmangaihna leh duhna kha chuti maiin ka paih bo nghal thei bîk lo a ni. Ka tum ve lutuk, ngaihtuah pawh ka ngaihtuah vak tawh lo rĕng, theihnghilh țhak erawh ka thei lo.



A châng chuan min rawn phone hi ka ring ru fo. A nu dâwt sawi kha Keny-a pawhin a hre chhuak tawh a nih chuan ani pawhin a hre tawh ngei àwm sia, inchhîra ngaihdam min rawn dìl ka ring deuh thut thut țhìn; mahse, hrehawm a ti lutuk ang a, a inthlahrung pawh a ni thei tho. Ngaihdam min rawn dîl ta se, min dîl ngawrh viau ta se, engtin nge ka lo tih ang le?



*******



Sasangi u Mama nupui neih ni chuan kan intinalh ve khawp mai. Kenny-a pawh a lo tel ve, ani pawh a chhe lo kher asin. Kan inneih khân Nunsanga a dinpui a, khâng hunlai ai khân tunah hian a hmel a puitlingin a lian leh tawh zâwk a, nula tam zâwkin an thlîr deuh reng țhìn pawh chu ka hre thiam.



"Nulaho hian an en duh lutuk che," a beng bulah chuan ka ti sà sá a.



A mit a khap sak a, a khap zâwnga a mit hmul sei deuh tak, er seng sawng chu a inhmeh; a thinchhiat hmèl nain a thinchhia hi ka la tawng fuh lo a niang, a thinchhia tih ka hre hauh lo.



"Mipa ka ni tlat alawm."



"Ni e, hmeichhia i ni miah lo."



A tûkah haw deuh nghal mai ka tum. Kenny-a rualin ka chho ang a, ani erawh chu Lunglei panin a chhuak leh nghalin ka ring.



Kenny-a car-ah chuan ka țhu thân a, ani erawh chuan kawng laka ei mai mai tùr thil eng eng emaw leiin dàwrah a lût leh rih.



Ka thil hmuh chuan min va țhâwng chiang ém!!



Chiang taka ka hmuh theihna laiah chuan Nunsanga leh Linda-ite chu an rawn kal phei a, an kutah an invuan tlat. Nunsanga chu a la ngai reng mai, hmana ka duh leh ka hmangaih țhin reng hmel kha a la pu. Ka en reng lai chuan Linda-i chuan eng emaw hi a sawi a, Nunsanga chuan duh hmel zeta en chhukin a lo nuih a, ka thinlung chhûng a na nghal vawng vawng.



Ka pasal a ni tawh lo, kan ințhen tawh. A duh duhin a awm thei a, tu hmeichhia pawh a kawp thei tawh alawm. Engati nge ka thinlung a nat ve ringawt? Na tùr a ni tawh hlei nem.



Mahse...a na sî a nih hi.



Ka hua, ka thin a rim. Engtin nge a tih theih? Kan ințhenna, ni lo, ka chhuahsanna kha a lo rei viau tawh em ni? Min theihnghilh hmin țhak tawh tihna a ni maw? Kei lahin a nu dâwt sawi, a hriat chhuah huna a inchhìr tùrzia leh hrehawm a tih tùrziate kha ka lo suangtuah a ni si a; mahse, tuna ka thil hmuh nèn hian a va inpèrsan sî ém!!



Min hmu ve thei lo mah se, min hmuh ka va hlau kher ém! Ka țhu pil deuh a, ka en zui zel, dàwrah an lût dùn, Kenny-a luhna dàwrah ngei chuan. An inhmu ngei ang, ka thin a phu dawt dawt mai.



Ka thâwkte chu a sak vek maiin ka hria. Engati nge hetia ka awm le? Ka pasal a ni tawh lo, ka pasal hlui a ni, ka pasal hlui. Kan innei tawh lo.



Khati chen kha ka lo tuar ve țang țang tawh, ngaihtuah loh pawh ka tum. Tuna ka hmuh thut dàn hian min țhâwng ém a ni, hetiang hian hmuh ka inbeisei lo asin.



"Bàbî..?" tiin min rawn sâwi nak a, ka harh chhuak zawk. Kenny-a lam chu ka hawi nghal, ka mittui a tla tih pawh ka lo hre miah lo.



"Kenny...?" ka ti zàwi raih.



"Engmah i hmu lo, Bàbî. Engmah i hmu lo a nia," sehchilh zet hian a ti sup a, a hmai chu a tuai puat bawk a.



"Nunsanga...engtin nge... a tih theih? Ni lo, ka hre thiam lo...ka hmu sual...lo...," ka ti nawk nawk a, ka ngaihtuahna a bil muih mai.



"Biak i duh em?"



"Aih." Ka chhâng rang lutuk ringawt.



"An hna lamah thil pawimawh tih tùr an nei a niang."


A țhianpa chu a la thup mawi țàng țáng zel chu a nih hi.



Heti khawp hian kan ințhen hnuah pawh min la tina thei a ni si a... kan ințhen ațang khân Linda-i nèn hian an inkawp chho leh tihna em ni le? Kum khat ém pawh a la ni lo asin, kei pawhin mipa dang ka la melh bîk lo a, duh ila chuan ka hmu ve tho ang; mahse...



Kawng kan tlàn chhûng chuan ka țawng mang lo, Nunsangate pahnih mawlh chu ka ngaihtuah. Ka ngaihtuah nasa lutuk a, Kenny-a min biakna pawh ka lo hre lo fo.



"An inkawp leh tih i hria em?" tiin ka zâwt ta khauh a.



"Aw."



Ka va tlâwm vawng vawng tak! Ka zak hle bawk. Hetianga engmah hrilh ve loh ka ni hi a nâ ka ti, ka chantâwk a lo nih dâwn hi.



"Min hrilh ve lo va," dem awka zet hian ka ti leh sap a.



"A țùlna ka hre lo a ni."



Sîr lam ka hawi ta daih. Kan ințhen, ni lo, ka chhuahsan  khân ka rilru a nâ; mahse, dâwt a nih vàngin ka tuar dam hrâm hrâm. Nunsanga'n thu dik a hriat chhuah ka ring ve fan, a hre chhuak ta rĕng a; mahse, a bialnu hlui a kawp chho ta daih. Chu chu Kenny-a hian a hria, min hrilh hauh lo.



Phatsan ka ni. 'Țhian țha' ti reng chung hian kei chu  'hrilh țûl lo' ka ni.



"In ințhian tih ka lo theihnghilh țêp a," rilru na zet hian ka ti sap a.



"Kan ni țhìn."



Ka țawng chhunzawm ta lo.



Kan thlen pawhin ngawi rengin ka chhuk a, ani pawh a țawng bîk lo. 'Ngawi dawh' hun kan hmang a ni ber mai.



In chhûnga kan luh pawhin ka be chuang lo, ani pawh  hian ka rilru a tina.



A thei ta ngang lo a niang," Hetiang hian awm suh," a ti ta sup a.



"Engtin nge engmah min hrilh loh theih? Ka țhian chu i ni si a maw?!" ka ti țhat a.



Muang zet hian," I rilru tihnat belh ka duh lo a ni, i tuar tam tâwk tawh a, belhchhah ka duh tawh lo," a ti leh ta sup a.



"Chu pawh ni se- "



"I țhian ka ni a, thil țha leh țha lo, hrilh tùr che leh hrilh loh tùr che-"



"Ni lo, țhian țhate chu thuchhia  leh țha an inhrilh țhìn, kei chu chutiang ka ni lo. Mi rethei leh hnathawh pawh nei lo, dâwta puh theih mai mai..." ka rilru a na thar leh a, ka mittui a rawn hnai a.



"Sawi tawh suh."



"Nu leh pa pawh nei tawh lo, pasal chàwmhlàwm, sum vàng chauha pasal nei-"



"Sawi tawh suh!"



Min rawn kuah ta chawt, a la nghet ém ém zui. Ka lo tâl thuai a; mahse, min thlah lo chiang, ka tâl ve chu engah mah a ngai lo.



A hnungah chuan ka theih ang angin ka chùm a, ka thinrim lungchhe pah bawk nèn, ka inhnît hlap hlap a.



Ani erawh chuan min thlah a tum eih lo, nghet zet chuan min kuah a, a hnu deuhah phei chuan ka hnung chu min hnem tum ni àwm tak hian a chûl pah a.



Mak tak maiin nuam ka ti ru tlat pek! Thla a muang siai siaiin ka hria. Min thlah tùra duh viau tho siin min thlah ang tih chu ka hlau viau tho bawk. Ka rilru chu mak ka ti, innghahna ka neih loh lutuk vàng a ni ngei ang, min hnèmtu hi ka mamawh rĕng asin.



"I rilru natna thlentu nih hi ka duh ngai lo ang, engtikah mah. Chu chu hre reng ang che."



Ka chhâng lo, ka lo ngaithla tawp. Min hnèmtu leh min ngaihsak ém émtu ka neihchhun a ni a, han ànkhumin han ti bawrh bawrh mah ila, ani hi chu a ngai reng.



"A chhan chu ka duh che a ni, Bàbî. Ka hmeichhe duh chu nangmah hi i ni."




*I NUI PEIH NGANG LO A NIH PAWHIN I BULA MITE HLIMNA DÂL SUH*



☆GOLD DIGGER☆ - 19 By Dingdi Pachuau




Eng thu nge a sawi tâk hi!!!! A sawi sual ka hre sual a ni ngei ang.



Min duh a!!  A ni lo, a ni thei lo, a țhianpa ngawih ngawih nupui ka nih hi.



Nupui hlui zâwk maw le.



"Bàbî, ka duh che."



A sawi nawn leh ta. Ka hre sual miah lo, a sawi tak tak.



Ka tál chhuak ta phat a, ani pawhin min chelh lui ta bîk lo. Kan inen ràn a, mak ka ti a ni, a mak ka ti thlâwt.



"I...i thei...lo..."



"Eng vàngin nge ka duh theih loh ang che?"



"Thil engkim vàngin."



A kal chhuak chu ka en reng ringawt. Koh lêt pawh ka tum lo, a car tinunga vung zeta a tlân chhuak ri chu ka ngaithla reng a, ka che sawn eih lo.



A thin a rim em ni? Kei ve thung hi, ka thin a rim em? A rim àwm ka hre lo; mahse, mak ka ti lutuk.



Kenny-a'n min duh. Ka nui chhuak hawk a, ka hlim vàng leh ka nuihzat vàng chu a ni hauh lo.



Bialnu a nei a, a țhianpa nupui hlui ka ni a, ka țhianpa a ni bawk. A bialnu pawh ka ngenna avànga la nihpui a ni a, a bialnu pawhin min ring ém ém. A țhianpa lah a kawmngeih ém ém, a tân chuan engkim pawh tih huam a ni. Engtin nge min duh theih?



Engtin nge ka tih ang?



A hmasa berah chuan ka țhianpa a ni a, ka ngaizawng thei lo ang, hetiang zâwng hian ka la en chhin lo rĕng rĕng. A pahnihnaah chuan, bialnu nei lai a ni. A bialnu lahin u ang hiala min ena min ringtu a ni, Kenny-a ka kàwmngeih tih a hriat avànga a harsatna pawh min hrilh ngamtu a ni a, a chungah thil țha lo ka ti thei lo ang, a bialpa ka neihsak ang maw? Teuh lo mai, ka lu ka thing nawk nawk.



Thil dang ka ngaihtuah thei lo, story ziah ka tum ve hle a, ka rilruin story rĕng rĕng a ngaihtuah thei lo, Kenny-a thil sawi mawlh mai chu ka hre nawn awn awn reng mai, ka duh lo tak zet a ni.



Ka ngaihtuah cheuh cheuh a, Nunsangate pahnih ka hmuh vànga kha thil kha sawi a ni ngei ngei ang, min hnem nân. A ni chiang, lâk thutak viau chi a ni lo. Ka țhianpa a ni alawm, a țhiannu ka ni bawk, ani pawhin nula angin min en lo tawp ang.



Ka rilru a thâwl ta huai mai.



Ka mut hma chuan ka phone chu ka khawih nauh nauh a, tunah hian kawngah a la tlân mék ang chu, ka phone dâwn em niang? A lo muthlu ang tih pawh a hlauhawm alawm, ka tibuai ém lo ang chu maw?



"Min ànkhum dâwn em ni?" a rawn ti sup a.



"Engah ngawt maw? I lo muthlu ang tih ka hlau a, ka rawn phone che," ka ti a.



"Ka muthlu ngai lo."



"A țhat chu, chak deuhin tlân lo la, tluang deuhin i thleng dâwn nia," ka ti a, a tlàn muan phei chu ka ring hauh lo.



"Min riahtîr ve mai ka ring a nia!" a ti nung nung a.



"Riah ve mai tùr alawm, 'riak rawh' tih kher a ngai hlei nem," ka ti thung a.



"Ka inthlahrung alawm..."



A, chu kher chu ka awih thlâwt lo ve.



"Chuan, ka  thil sawi kha ka tifiam lo a nia."



*******



Sangzela a rawn léng leh ta. Mi hausa chhûngkua ațanga seilian a ni bîk lo va, kan titi a rual thei phian mai. Mi rethei leh harsa dinhmun a hre thiamin mi hriatthiamna a ngah hle a, mi khawngaihna pawh a ngah, ngainat loh theih pawh a ni lo.



Sawi dawt lo mah se, min duh tih ka hria. A lo lêng țhìn tih hi Lalàni bulah ka la sawi hauh lo, ka hrilh hreh. A chhan chu a star ve bawk sia, nuam ka ti lo.



Zan khat chu  a rawn lêng hma ve viau mai a, thlèng ka sil zo deuh chauh a ni. A lo lêng hi ka ning hran miah lo, a over lo va, a nui sâng thei reng bawk a, a bula awm hi a nuam hliah hliah.



"Ka lo lêng tluk tluk sia, i ning em?"




Hnathawhna lamah ka boss a ni a, kan inbe vak hman lo. Kan innuih suk țhìn a, chu zawng chu. Zàna lo lêng țhìn hmel pawh a pu lo va, mi dang rinhlelh tùr pawhin a lang ngai lo.



"I ning tawh zâwk a ni maw?"



"Ning nâng, zan tin hi rawn lèn tùr emaw ka ti ringawt tawh maw le!"



Thingpui ina kan titi lai chuan ka phone a rawn ri a, tu tak ni ang maw ti rilru chuan ka phone chu ka'n en a, Nunsanga a lo ni!!



A number hi engati nge ka lo la delete loh le?



Ka chhâng duh ang em aw? Eng vànga min rawn call nge  nih le? Ka en vang vang a, chhâng rih lo phawt ang, a pawimawh loh chuan min rawn call leh mai ang chu. Chhàn ka châk lêm lo bawk nèn, ka hmet tàwp a.



"Company hian min rawn call ziah!"



Ani chuan," Company pawh hian chhe lo deuh hi an hria a niang, kei chu an call ka dawng ngai miah lo," nui chung hian a lo ti a, kei pawh ka nui ve tho.



Kawngka a rawn ri koh koh a, makti rilru deuh hian," Lo lût rawh u," ka ti a, Nunsanga helmet kengin a rawn lût ta, ka meng phâwk nasa ngawt ang chu! Bike-in a rawn kal maw? A ri ka va hre lo ve! Eng nge a rawn tih dâwn?



"Eng nge i lo tih dâwn?" Sangzela a awm ve tih ka hre chhuak thut a, ka inthiam lo leh deuh. Ka țawngka chhuak kha a bùlin a nèlawm loh si a, mak a ti ngawt ang chu.



"Ka ngai tawh che a..." Sangzela chu a en duh miah lo, min en ngar ngar.



A va zak lo chiang tak! A nupui hlui, a duh loha a țhen tawh ka ni, bâkah, ani pawhin a bialnu hlui lam a hawi leh tawh kha, zak lo ve tak chu a ni.



"Lo țhu rawh, thingpui ka lo siam ang."



Ka rilru a va nuam lo tak ém! Sangzela a awm bawk si, he pa hi ka duh loh dànin a che duh mai ang tih ka hlau. Che lo hrâm teh se.



Thingpui ka va pêk lai chuan Sangzela chu a lo en thung tawh, Sangzela pawhin a lo en ve reng tho.



"Hei aw."



"Engati nge ka call kha i chhàn duh loh a?" Min en chuang miah lo.



Hm, a va buaithlâk tak! Sangzela hian min ringhlel chiang sa, pasal ka nei  tawh tih a hre miah lo va, nuthlawi ka ni tih pawh a hre lo ang. He pa vàng hian a hre chhuak ngei ngei ang, mak min ti dâwn lutuk.



"Zualte, ka lo va haw hma mai ang, lehkha en fel tùr ka la nei bawk a," tiin a ding ta daih a, nuam lo ti zet hian," A la hma alawm le," ka ti sap a, chhuanlam a siam a ni tih chu ka hre ru tho.



"Tlai ka inkhèl ka chau deuh bawk a, mut hma ka duh a."



A chhuah fel hnuah chuan rum zeta Nunsanga melh pah chuan," Thingpui kha in thuai thuai la, chhuak leh nghal ang che," ka ti a, polite viau a țùlna ka hre lo.



"Zualbawih, engkim kha ka thiam loh vek a ni, ngaihdam dîl ngam tùr pawh ka ni lo tih ka hria; mahse, ka ngai tawh che a ni."



A va zak lo tak!! Zahna hi a pianpui ve miah lo em ni?



"I nu ruahmanna zawng zawng kha maw i thiam loh ni a? A tlai tawh, engkim a tàwp vek tawh. Inchhîr lo tùra ka hrilh vek tawh che kha i hria em?"



A hmel a țhat dàn ngai renga a la țhat avàngin hmun dang ka en tlat, ka thinrimna zawng zawng kha lo lêt leh vek se ka ti, rilru natna zawng zawng nèn khân. Ka hmu leh thut a ni a, ka rilru a tihnat lutuk vàng kha a niang, a hmaa a chunga ka rilru put dàn, thlâkhlelhna leh duhna ang chi kha ka nei hran tawh miah lo nia.



"Ka inchhìr miau si a."



Ka be peih tawh lo, ka ngawi reng tawh ang. Ka biak loh na na na chuan a awm rei peih lo ang, kei tehlul hian ka chhuahtîr thei lul lo ang, biak loh hi a țha ber ang.



Ka ngawi ta reng. Ani erawh chuan min en reng tih ka hria, ka en duh lo lui tlat, ka chunga a thil tih kha ka ngaihtuah lui tlat a.



"Nichina mi kha tu nge a?"



Ka chhâng chuang lo.



Ka chhàn loh avàng chuan,"I chhuah hnu ațang khân ka khawvel hi a dik lo vêl vek. Ka nu thil sawi ka lo awih kha ka inchhîr tak zet a, ngaihdam dîl tùr chein hmuh che ka hreh a, ka bêng bawk si che nèn, hrehawm ka ti tak tak a ni," a ti leh a.



Ka awih hlawl lo, a thil sawi hi ka awih a nih chuan...ka mak ngawt ang. A țawngkam thiamah hian ka tawlhthlu thei lo ang.




"Haw tawh rawh."



"Zualbawih, ka rawn tlân vang vang a nia, haw leh nghal tùr chuan min ti lo teh. I hmel hmuh ka châk a, bâkah, min duhin min hmangaih ve țhìn a nih kha, ka chungah nunrâwng lul suh," a ti leh a.



"Haw rawh, ka mu duh tawh a nia."



"Ka hawsan dâwn lo che, min ngaihdam hma chu."



"Min zah lo hle mai," ka ti sap a.



"Ka chân dâwn che asin!"



"Mahni hma i sial hle mai. Min chân daih tawh, in ațanga chhuak tùra min tih ațang khân min chân tawh a ni, min ring thei lotu pasal kha engtik lai mahin ka mamawh ngai lo," ka ti ve ta phiar phiar a.



"Ka thiam loh vek ka tih tawh kha!"



"Ni e, i thiam loh vek!"



He pa hian ngaihdam min rawn dîlin inchhîr takin awm mah se, a hnênah hian ka lêt tawh lo ang, ka thei lo. Ka chhuah khân kumkhua atân ka chhuak tawh.



"Kenny-a a lo kal ngai em?"



A hriat kher a ngai lo. A țhianpa a nia, ka țhian a ni ve tho. A duh leh a lo kal ang a, ani hrilhhriat hi a țùlna ka hre lo ve.



Pâwna riahtîr ém chu a nunràwnthlâk ka ti a, ka room-ah ka riahtîr hrâm. Kei chu Nubawihi room-ah ka mu thung.



Nunsanga awm dàn hi a mak ka ti. A bialnu hlui nèn khân an invuan a, inkawp leh tawh niàwm tak khân an awm a, tunah lah hei kan inah a rawn kal leh tawh bawk sia, hriat thiam a har ka ti.



A nu dawt sawi chu a hre chhuak ta rĕng a, a inthiam lo ve ta chiah. Hrehawm ka lo tuar tamzia kha hre teh se, dâwt ka sawi lo chung pawh kha dâwt sawi tlata min hriatna, min rin lohna avànga inthiam lohna a neih hian a nun hi vaw lêt ve teh se.



Mu pah chuan ka inngaihtuah kual a, a inchhîra ngaihdam min dîl a nih chuan ngaidam mai ila, ka ngaihdam avàngin ka lêt leh dâwn tihna pawh a ni chuang lo va, miin ngaihdam min dîl ve țâwk țâwk a nih chuan ngaidam thei lotu nih chu thil țha a ni miah lo.



Zîngah kei aiin a lo tho hmasa zâwk. Ka thawh ve chuan," Morning," lo ti vatin," Rawng ka bâwl thiam lo tih chu i hriat kha, tui so erawh a awm," a lo ti var a, țawngkaa chhâng lêm lo chuan ka bu nghat ringawt.



"Chuan, vawiin chu ka awm leh rih ang, min ngaihdam hma chu haw ka tum si lo va."



Hm, ka ngaihdam thuai a ngai a nih chu, heta awm ve reng tùr hian ka duh lo, inzawmna pakhat mah kan nei tawh si lo va.



Ka intihfai zawh chuan bathroom ațang chuan ka chhuak a, ani erawh in chhûngah a lo awm leh tawh lo, a bike a en fel pawh a ni maithei.



Chaw kan ei kham hnuah ka insiam mawlh mawlh a, ani chuan," Thlah i ngai em? I thawhna hmun thlengin ka lo thlah dâwn che em niang?" a ti a.



"Aih, a ngai lo," rang zet hian ka lo ti thuai a.



"I inthlahrung a ni lo maw?"



Teuh lo mai, mi dangin an lo hmu ve ang tih hlauh naklaiin.



"Vawiinah haw ang che."



"Min ngaidam tawh em ni?"



Ka ngawi vang vang a, ka tirh bo theih dàn tùr ber chu ngaihdam hi ni maiin ka hria. Ngaihdam hma leh haw hma, a țha riau.



"Aw."



"I rilru tak takin min ngaidam lo?"



"Ngaidam, haw ang che."



"Vawiin chu ka awm rih dâwn hrim hrim, i bula awm ka la thlahlel rih."



Mak deuh chu, a bula awm nuam ka ti tawh miah lo. A hma kha chuan ka pasal a ni a, a bula awm pawh ka thlahlelin ka ngai țhìn, tunah chuan ka bul ațang hian kal thuai thuai se, kan khua hi chhuahsan thuai se tih rilru ka pu ta daih! Ka duhna leh hmangaihna kha a bo ta daih em ni?



In ațangin rilru na deuhin ka chhuak a, beiseina ka nei hlei thei tawh lo. Chu achhapah, a bialnu hlui nèn ka hmu dùn leh a, ka thinlung a tina leh a nih kha. Na leh chuang tùr ka awm tawh lo a ni maithei, min tihnat ém vàngin ka duhna leh hmangaihna pawh kha an thlâwk bo zo tawh a niang.



Ka chhuah hmain a chhuak a, khawiah nge a lèn kual dâwn ka hre lo. Ka zâwt hek lo, a duh duhnaah a lêng thei alawm.



Tlaia ka haw chuan a bike pawh a lo la awm lo, a thuhrimah, chahbi ka pe lo hrim hrim. Ka chhuah hmaa chhuak a nia, chahbi pêkna chhan tùr a awm lêm lo bawk. A haw daih pawh a ni thei tho; mahse, haw kha chu a la tum rih lo a nih kha.



Eirawng ka bàwl ka tum laiin bike a rawn ri ta, Nunsanga a nih chiah chu. Ka ngaidam tawh a, haw tawh mai àwm.



Thingpui ka chhuang a, chhang ka lei haw miah lo tih ka hre chhuak. A pawi lo, dàwr awmna a hla chuang lo.



Dàwr nghâktunuin min lo biak avàngin minute 2 vêl chauh thang tum kha minute 7 vêl lai ka thang phah, ka rei lutuk lo ang chu maw.



Kawtah car a awm, tu nge lo lêng le?



In chhûnga ka luha ka thil hmuh chuan makti zetin min din khawngtîr chiang kher mai!



Eng thil nge thleng hi?!!




* I CHÀN TAWHNA HMUNAH KHÂN HLIMNA ZAWNG NGAI SUH*



☆GOLD DIGGER☆ - 20 By Dingdi Pachuau




"Eng thil nge thleng?!!!"



An lo indinchilh ngar mai. Ka hmuh dàn chuan insual tùr indinchilh an ang. An intithinrim em ni? Țhian an nih kha; mahse, eng emaw tak chu a thleng chiang a ni. An inchenin an intiat si a, an inmelh ràn mai chu eng emawti chuan an hmuhnawm dùn phian!



Nunsanga chuan min melh zawk a, Kenny-a melh leh nghalin eng emaw hi a sawi sup a, a kal sawn ta nghal bawk a. Kenny-a ve thung chu a insehruh kher mai, en pawh min en duh lo.



"Eng thil nge thleng ka tih chu?"



"Eng mah a thleng lo."



Kenny-a chu a la ngawi ngar mai. He pa hi chu a luhlul roh ngawt mai, luhlul ka ti tak nain, 'ngêng' an tih lam hi a pâwl thei zâwk maithei.



"Kenny, eng nge i lo tih dâwn?"



"Ka rawn zin."



"Nichin khân eng nge in lo tih a?"



"Eng mah."



"Insual in tum, a ni em? Thingpui hi in ula, haw ang che u. Kan in chhûnga inhau hi ka duh miah lo a nia. A thuhrimah, țhian in nih kha," ka ti a, thingpui chu ka siam nghal sawk sawk a.



Engtin nge a thlen theih? Ințhian țha lutuk an nih kha, eng thu-ah nge an inhnial ang le? A mak viau a ni.



"Eng mah a thleng lo ka tih chu."



"A thlen loh leh a țha a nih chu."



Thingpui an in zawh hnu pawh chuan haw an tum lo a niang, an chechãng lo ve ve.



Ka en tawn chhên. An țawng lo va, an inmelh hek lo, eng nge thil thleng ni a, eng nge  an inhmuh thiam lohna chu ni ang le? Eng pawh chu lo ni se, an inkâr a nia, ka lo buai ve chiamna tùr a ni lo ve.



*******



Kâr khat a ral meuh chuan Nunsanga pawhin min rawn phone zut tawh! Ngaihdam min dîl ziah a, a hnêna lét tùrin min ngèn ziah bawk. Linda-i nèna an chanchin ka zawh apiang lahin a sawi duh lo, 'țhian' an nih thuin min chhâng țhìn. An țhian dùn inkâr thil ka zawh lahin min hrilh duh hek lo, 'Eng thil mah a thleng lo' a ti tlat zel. Pakhat lahin chutiang bawk chuan min chhâng, 'Kan inhmu thiam lo lo' a ti ziah bawk. Hm, a dik a ni ang, ka zâwt tawh lo ang.



Nubawihi a rawn haw chho thei țêp. An exam an zo țêp tawh a, kârleh Nilainiah a rawn chho ang, min hrilh tirh chuan ka lâwm lutuk a, ka khêk vêl. Ka naute hi ka ngai tawh a, ka hmu leh chák tawh  a ni.



*Naktûkah ka rawn zin chho lawk dâwn, i phal em?*



Kenny-a message a ni, deuh thlap thlap chuan.



*Eng nge i lo tih dâwn?* tiin ka reply a.



*Hna pawimawh vàng a nia*



A țha alawm, hna pawimawh a neihte chuan min rawn dìl deuh thlap pawh a ngai lo, heta rawn thlen a tum deuh emaw ni le.



*A țha alawm*



Story ka type leh chiah tihah chuan message a rawn thleng leh a.



*Eng nge pawimawh lo lei chhoh tùr i nei em? Chawhmeh ilo te pawh?*



Ka nui sak a.



*A ngai lo ve*



 Zanin chu ka va free tak!  Ka free zànah hi chuan story ka type thei a, a zia viau. Ka complete ve hnai lek lek tawh a, zan tin deuhthaw type thei phei ila chuan ka zo daih tawh ang.



Zanin chu Sangzela a lo lêng hman lo, hna lamah a buai ve deuh a ni. Min rawn hrilh thlap, ka chanchin engkim, pasal ka nei tawh tih leh kan ințhen leh tawh tih a hre vek tawh a, lo lèn a țhulh phah chuang lo. Țhulh ahnékin min duh thu min hrilh sauh sauh. Kei pawhin ka haw hran lo va, ngaihzawng neih ka la inpeih loh avàng chauha chhâng lo ni maiin ka inhria.



Dik tak chuan ka pasal neih khân, kan inngaihzàwn chhûng kha a rei lo va; mahse, ka duhna khân min ti â vek a, naupang tĕin ka nei ta kha a ni a, ani pawhin min duh lutuk. Pasal neih dâwna dàwn tùr lam kha ka lo dâwn ve thiam lo va, chuvànga hetia awm hi ni tain ka inhria. Pasal ka lo nei ve leh ta hlauh a nih ngai chuan mahni chauha awm leh min hmangaihtu, chhûngte hrawn buai ngai lo ka zawng tawh ang. Mahni hmasial chu ka ni ngei mai; mahse, ka tawn ang kha tawng leh tùr chuan pasal neih ka hlau tawh, zawn fîmkhur viau ka duh tawh bawk.



Chutiang chiah chu Sangzela hi a ni. Nu leh pa a nei tawh lo va, mi rethei harsa tak ațanga hlawhtling chho a ni ve a, a nungchang hi ka duh chi tak a ni bawk. Ka hmangaih em tih phei chu ka hre lo; a pawimawh ber pawhin ka hre tawh lo. Min duha min nei duh a nih phawt chuan ka hnial lo ang, tunah erawh ka la inpeih lo.



Tuna ka story kalphung hi ka nun dàn nèn a inang deuh viau a; mahse, a changtunu hi ka tihuaisen deuh hlek. Ka tih ngam miah loh tùr ka tihtîr țhìn a, ani pawh a pasal nèna ințhen bawk a ni. Tragedy-a tàwp ka tum avàngin ka uluk viau, ngaihtuah nasat a ngai bawk.



*I mu tawh em?*



Sangzela a ni.



*Mu lo ve, story ka type a*



*Wow! Eng story? Pasalțha maw?*



*Ni lo ve, nula-tlangvâl story*



*Chhiar a va châkawm ve! Ka chhiar i phal ve ang em?*



*Phal maithei*



*Haha, ka chhiar châk tak tak. Ka lo lèn hunah min chhiartîr ve rawh aw*



*Ka lo ngaihtuah ang*



A chhiar a nih chuan ka zak ngawt ang. A chhan chu ka nun dàn nèn a inang viau si a, min hmehbel nghal thei mai dàwn si a.



A tûk tlaiah Kenny-a chu a lo thleng, eirawng ka bàwl laiin. Kawng laka mi ni ngei tùr chawhmeh leh kurtai a rawn lei a, dîl sangha a rawn lei bawk, a tui ngawt ang chu.



"Lo lei a ngai hlei nem, inthlahrung der viau suh," ka lo ti chûl a.



"Inthlahrun vàng pawh a ni chiah lo, i ei châk ka ring a."



Châk chiangkuang!



Hetah innghah a tum a ni chiang ang, a thawmhnaw  bag nèn a lo lût tlat. Zawh ka hreh ve deuh hlek, pawi lo mai teh se, a awm rei tawp nâng.



Sangha chu amahin a siam nghal, chawhmeh siam hi a thiam roh sia, a inhmeh lo ka ti țhìn. A tui leh ngawt ang chu.



"Engtia rei nge awm i tum ang?"



"Ni hnih thum bâk a ni lo ang."



E khai! A va rei angreng dâwn ve! 



Ei kan rèl zawh chuan intleuh tùrin ka ti a, ani erawh chuan mut dâwnah a duh zâwk thu a sawi sup a.



Chaw ei khamah chuan a chhuak zawk a, a chhuah hlàn chuan Sangzela a lo lût a, a rawn nui lût leh sâng tawh.



"Ka hma viau lo maw?"



"Hma ve deuh tho, i lêng rei thei deuh dâwn tihna," ka lo ti a.



Ka bulah chuan a rawn țhu a, a inbual zo deuh chiah a nih duh hmel, fai rim a nam vang vang.



"Mikhual i nei elo?"



"Um, Lunglei lam ațangin ka țhianpa a lo zin a. Engtin nge i hriat theih a?" tiin nui deuh chung hian ka zâwt a, a chhan chu Kenny-a bag kha room chhûngah ka dah daih sia.



"Kawtah car a awm a..."



Ni dâwn tak. Ka va ngaihtuah tlêm ve! Mahse, chhuah nân a hmang emaw ka ti, kein a kal a ni maw, khawnge maw a kal le?



"A hna lam vàngin a rawn zin lawk a, in inkàwmngeih ngawtin ka ring, ka țhianpa ve ber a nia."



Rei vak lo hnuah chuan Kenny-a chu a rawn haw a, Sangzela nèn chuan ka inhmelhriattîr a, rei lo tĕ chu kan bulah a țhu ve zawk a, a hnuah chuan inbual tùrin a tho ta daih a.



A inbual hlàn chuan Sangzela chuan," Story chu chhiar tawh ila?" nui chung hian a ti a.



"Ka phal chiah lo maithei a ni."



"Ka chhiar châk alawm, proof reading pawh ka ti thei ang chu. A țhat viau phei chuan i publish ang a, Book of the year pawh a ni lo ang tih a sawi theih miah loh," thutak zet hian a ti a.



"Haha, sawi râpthlâk  chiam suh, a zahthlâk a nia. I chhiar a nih pawhin sawisêl rawh aw, sawisèl lai tùr zawng ang che."



Laptop chu ka la chhuak a, ka chhiartîr ta nghal a.



"Chhiar vek suh aw, a tlângpui chauh chhiar thuak thuak phawt rawh," ka lo ti a.



"Uluk deuhin tlêm tĕ ka'n chhiar zâwk ang e."



A chhiar lai chuan a bulah ka lo țhu ve a, uluk zet hian a thlêk a, kei lah chuan rilru nuam vak lo hian ka lo nghâk reng thung a, a sawisèl dàn tùr ka lo ngaihtuah a ni.



Kenny-a pawh bathroom ațangin a rawn chhuak ve tawh; mahse, room lamah a inkhung ta deuh tlat, lo țhut ve kur kha nuam lo a ti a niang, tlangvâl inlêng ka nei ve si a.



"A ngaihnawm dâwn hi. I vawi khat ziahna a ni em?"



"Aw, a hriat viau a ni maw?"



"Ni lo ve, vawi khat ziahnaah si chuan a țha ka ti thlâwt, a phùrawm khawp e. A tàwp dâwn tawh em?"



"Aw, tàwp țêp. Bung 6/7 vêl bâk a ngai tawh lo ang."



A tarmit vuah kâr ațanga min en vang vang pah chuan," I chanchin a ni tiraw?" a ti sap a.



"Ni chiah lo; mahse, inanna lai chu a awm țeuh."



"A tàwp i ziah dàn tùr ka hre châk khawp a; mahse, ka zâwt lo ang che. Talent i nei țha ka ti hle a ni, ka chhuang lutuk che, hemi i ziah zawhah pawh hian a dang ziak zel rawh aw," tia min fakin  min fuih pah sauh sauh a.



A haw har vak lo.



A haw hnu chuan kei pawh mu thei tùr chuan ka intifai a, chutih lai chuan Kenny-a a rawn chhuak leh, a mu tawh emaw ka ti.



"I bialpa a ni maw?"



"Ni chiah lo."



"In General manager kha a ni tiraw?"



"Aw."




A ngawi vung vung a, chutah," Ani pawh chance i pêk theih chuan engati nge kei hian chânce ka neih ve loh ang?" a ti ta nghut a.



"Kenny-"



"Țhian angin ka en che; mahse, ka duh tho che. Chance neih ve ka duh a ni."



Ka rin loh daih thil a rawn sawi avàngin sawi tùr ka vàn, a tifiam mai mai emaw ka tih kha a lo ti tak tak a nih dâwn hi. 



"Kenny, hetiang lam hawi tùr hian ka la thlîr chhin miah lo che, ka țhianpa țha ber i ni a, kan ințhian țhatna hi tihchhiat ka duh miah lo a nia," ka ti ta ringawt a, en pawh ka en ngam lo.



"A chhe dâwn lo, a nghet sauh ang."



"Hetiang zawnga min en hi ka ring ngai lo-"



"Tun ațang chuan ring tawh rawh."



"Kenny, awm ngaihna min tihre lo a nia, i fiamthu a ni tiraw?" tiin ka nuih a.



"Ka fiamthu lo."



Leh mauh mai a.



Kenny-a'n min duh, chance pêk ve a phût. Ka țhian țha ber a ni asin, Sasangi tih lohah chuan. Awm dàn min tithiam lo vek, ka lài hú mai.



"Mu tawh ang-"



"Bàbî, ka bialnu ni rawh."



Ințhian kan nia, kan inngaizawng thei lo ang. Bialnu a nei a, kei pawhin pasal ka țhenna a la rei vak lo, ngaihzâwng neih leh pawh ka la inpeih hek lo.



"Engtin nge i bialnu ka nih theih ang? Bâkah-"



"Kan tum dáwn alawm. Chance min pe la, chance min pe phawt la, engkim ka kutah i dah thei ang," a ti leh charh a.



"Kenny, ka rilru tibuai suh."



Min rawn hnaihin," Bàbî, i rilru tihbuai ka duh hauh lo; mahse, chance min pe rawh, khawngaihin," a ti sup a, min rawn hnaih viau mah se, min rawn dek hauh lo.



"Kan thei chuang lo ang, ka țhian i ni a, i chunga ka rilru put dàn-"



"Ka tum dâwn alawm, chance min pe phawt la?"



Ka maimichhîng ringawt, he pa hian ka rilru a va tibuai tehlul ém! Ka țhian țha ber hi chàn ka duh lo asin.



"Ka țhian țha ber hi chàn che ka duh lo."



"Min chân dâwn lo-"



"Bialnu i nei a, kei pawhin bialpa ka nei a ni." Dâwt ka hrilh ta ringawt, chuti lo chu a bialnu nèn an inkâr a chhiat phah dâwn asin, chu chu ka duh hauh lo.



"I bialpa a nih chiah loh thu i sawi kha."



Leh khauh mai a.



Min en reng tih ka hre bawk sia, nuam lo ka ti tak zet. Dâwt ka sawi tih a hria ang tih pawh ka hlau bawk.



"Min duh thu a sawi a, ka la chhâng lo rih mai a ni." Hnar dàn tùr ka va hre duh tak!



"Kei pawhin ka duh thu ka hrilh che a, min la chhâng lo va, kha pa nèn khân kan inang chiah. I bialpa kan la ni lo ve ve tihna."



Mut hmunah chuan ka meng kar mai. Kenny-a thil sawi chuan ka rilru a tibuai tak zet, chhàn dàn tùr pawh ka hre tawh thlâwt lo. Nunsanga țhianpa a ni a, ka țhianpa a ni bawk. Engtin nge ka pasal hlui țhianpa hi ka bialpa a nih theih ang?



Ka bialpa lo ni dâwn ta se... ka bialpa ni tùrin ka ngaihtuahna ka la sêng chhin hauh lo, chutiang rilru chu a chungah hian ka la pu chhin hek lo. Bialpa ang pawhin ka en thei dâwn em ni?



Ka lu ka thing nawk nawk. Ka chungah a țha ém ém, ka mamawh laiin a lo lang țhìn, țhian rintlâk chu a ni chiang alawm. Bialpa, pasal rin tlâk leh innghahna tlâk a ni ngei bawk ang; mahse, 'mahse' hi a awm tlat a ni.



Message tone a rawn ri a.



*Muhìl rawh, ngaihtuah ngut ngut a ngai lo*



He pa hi, min lo enthla reng te hi a ni lo maw?



*******



Kenny-a awm chhûng pawhin Sangzela chuan a lo lèn a țhulh lo. Kenny-a erawh kan bulah a țhu ngai lo, room-a a awm loh leh pâwnah a chhuak daih a, khawiah nge a kal ka hre lo.



Naktûkah a haw tawh dâwn. A awm chhûng hian eng nge a rawn tih ka hre chuang miah lo, ni tin a chhuak ve ziah a, tlaiah in ka thlen hnu deuh chiahah a rawn haw ve chiah zel.



Zanin chu Sangzela a rawn lang lo tlat. Buaina a neih àwm a sawi miah si lo va, eng vàng tak ni ang maw ka ti rilru vang vang.



"I tân ninawm mai ka nih loh hrâm ka beisei."



A țawngka chhuak a nih duh loh hmel lutuk a, ka nui hawk.



"Over lo teh!"



"Ka zawhna che kha min han chhâng teh, chance kha min pe dâwn em?"



A thutak bawk sia, nuih ringawtna chi pawh a ni lo.



"Kenny, bialpa angin ka en thei chein ka ring lo-"



"Tum chhin ila?"



"Tum chhin la," amah pawh en duh lo chuan ka ti a.



"A țha alawm."



Ka bâna a rawn vawn tâkah chuan makti zet leh phâwk zet hian ka lo en a, ani lah chuan hnai zetah hian min rawn en chhuk a.



"Kenny, hetiang hi tih tum suh-"



"Eng thil nge tih ka tum a?"



A rawn kûn hniam zêl a, kei pawh ka awm hniam zêl.



"Min fawh i tum-"



"Tum chiang e."



Chet sawn ngaihna a awm tawh lo, bangin min dang tawh. Tum chhin tùrin ka ti alawm le, a tum chhin a ni ve mai.



"Hlauthâwng mah ta che, hlau lo la, lo dawh tawp rawh. Ka fawhna che hian nangmahah awmzia a neih loh chuan ka kal vang vang ang."



Min rawn fâwp ta.




*I FAMKIM LOHNA TINRÊNG HRE VEK CHUNGA PAWMTU CHE KHA NANGMAH HMANGAIHTU DIK TAK A NI*