☆GOLD DIGGER☆ - III By Dingdi Pachuau

☆GOLD DIGGER☆ - 21 By Dingdi Pachuau




Ka hlauthâwng lo, ka hlau bawk lo. Ka lo meng kar, a sawi ang deuhin a fawhna chuan ka taksaah awmzia a nei rĕng em, hna a thawk em tih chu ka lo ngaichang ràn mai.



Muangchâng leh dìm zet hian min fâwp a, lo chhàn lêt ka tum hran lo, ka lo dawh tawp. 'Chance pêk' a sawi khân infawh lam hi a kâwk ang tih ngaihna ka hre miah lo va, ka fawh lêt ve a phût pawhin ka ring hek lo.



Ka bâna a chelhna chu sawn chhovin ka khabeah a rawn vuan ta. A hmui lum ham ham chuan ka hmui hnuai lam chu a fâwp phawt a, chutah ka hmui ka chîp tlat chu rawn nawr kauin a lei zei zet chu ka ka chhûngah  chuan  a rawn luhtîr nghal a.



A tìrah khân dam tak leh muangchângin min fâwp kha a ni a, tunah erawh a duh khawp lo ta deuh a niang, min fâwp ta tàwn táwn a. Chutia a duhthawh tâkah chuan ka thluak a buai țan, men pawh ka meng tawh lo.



Hetiang reng chuan ka fâwp lêt ve khawp ang. Ka insûm thei miah lo ang.



A kut lehlamin ka tukhum sam chu na lo tĕ hian a țhâm sak a, chu chuan min tiphûr zual. A sàn avàngin ka dâk chho vah a, bang ka nghêng tawh, ka thluak  a buai a, ka lu a hai chiai chiai tawh avàngin ka ding nghet zo tawh lo va, bang nghen mai loh chuan ding nghet tawh hek lo le.



A kut lehlamin ka kâwngah min kuahin a lamah min pawt hnai salh bawk a, ka ding kãng ãwk mai. Ka meng zawk a, ani pawh chuan min fâwp pah tho chuan mengin a nui suk a, min thlah chuang lo.



Kan taksa a insi thlap tawh. Ka luin bang a la dek a, ka taksa dang erawhin a taksa ka nghèng vek tawh.



Ka fawh lêt ve lohna chuan a tibuai miah lo a niang, a hma aia duhthawh zâwk mah tùr hian min fàwp leh a, a lei chu a hma aia thûkin a rawn luhtîr bawk a. Ka thluak a buai hneh lutuk, hetiang tak hian tu mahin min la fâwp ngai miah lo.



Kawngka a rawn ri dat dat a niang, min thlah chiang hle mai. Eng emaw sawi hian a phun sup a, hre thiam lo zet hian ka en chho há reng a, min fawh mood-ah khân ka la chêng asin, ka meng phî ngawt ang.



A kal sawn chiah tihah kawngka a rawn ri, ka harh chhuak ta chiah. Ka sam tuaiin ka hmai leh hmui ka tuai bawk a, ka thin a phu nasa kher mai.



"Lo lût...rawh." Ka aw zet chuh, a va lài ve, a khùr nasa viau bawk, Kenny-a chuan a hriat loh hrâm ka beisei. Ka zak, ka lài bawk si chuan filter-a tui chu ka in ringawt.



Sangzela a rawn lût, a rawn nui leh sâng tawh.



"Zanin chu ka rawn tlai deuh a, rawn lèn hrâm ka duh sia, a la tlai vak lo tiraw?" a rawn ti lût a.



A rûkin thâwk ka la hak phawt a, chutah, nuih lui sak pahin," Tlai lo ve, i buai deuh a nih ka ring a," ka ti ve sap, Kenny-a erawh ka en ngam lo.



"Inlêng ka nei a."



A lo lèn leh tâkah chuan thingpui ka chhuang a, Kenny-a nèn chuan ka siamsak a, ka va pêk chuan," Ka lâwm e," a lo ti sup a.



Sangzela chuan," Kenny-a chu, engtikah nge haw i tum deuh a?" tiin a zâwt a.



"Ka dam chuan naktûkah a niang."



"I hna chu i zo tawh em ni?"



"Aw, zo tawh e."



A hna hi ka zâwt lo va, min hrilh miah lo bawk.



"Lunglei hi vawi 2 chu ka kal ve tawh a, nuam ka ti reuh riau asin. A khaw awm dàn kha ka lung tilêng chi a ni tlat, ka pa kha Lunglei khua hi a ni bawk a," Sangzela chuan a ti bawrh bawrh a.



"A nuam ve tho mai."



"Kenny-a hi chu Aizawl mi a ni ve tho alawm," ka lo ti a.



"A ni maw?  Khawi vêngah nge in awm?" tiin a zâwt a, an titi dùn ve ngial a.



Thingpui in zawh hnu rei vak lovah chuan Kenny-a chu chhuanlam siamin a tho ta a, bathroom-ah lûtin a intifai a, room-ah a lût nghal.



"Story kha ka ngaihtuah kual a, i zawh hunah min chhiartîr leh rawh aw."



"I chhiar duh phawt chuan le."



"Chuan, a buin kan siam ang a, kan zuar dâwn nia. Kan hralh thei ngawt ang, Book of the year a ni bawk ang a, i lâr ngawt ang."



A nui duh miah si lo va, ka ngei reuh tawp. Ka thu ziak a ho si a, Book of the year a sawi lang ve ziah pawh hi min ti-el a niang ka ti, a awihawm lo lutuk ringawt.



"Ka làr hunah chuan taxi-ah hlîr ka chuang ang!"



"Min be ve țhìn tho la aw? Induh lutuk lo la."



"Ka melh peih lo ang che."



Kan insûm thei tawh lo, kan nui dùn hawk hawk a.



A lêng rei lutuk lo, min rawn kan deuh zawk a ni mai.



A haw hnu chuan kei pawh ka mu ve nghal mai. A la tlai chhe lo va, zan danga ka mut hun ang tho a ni.



Mut hmuna ka țawngțai lai chuan message tone a lo ri leh kheuh.  Kenny-a, Nunsanga, Nubawihi leh Sangzela, tu emaw ber a niang.



Ka țawngtai zawh chuan ka phone chu ka en vat a, Sasangi a lo ni.



*Induhnu, k lo zin thut don*



Țha lutuk, rawn zin ve rawh se; mahse, ka ring ngam ang em? Min tihder a ni maithei asin.



*A va nuam dâwn! Engtikah?*



A thil type kim lo thei lutuk erawh hi chu ka sawisêl țhìn, a țhente phei chu ka chhiar thiam lo, awmzia ka hre lo țhìn.



*Nktk tûkleh h*



*Type kim rawh* ka va ti leh hrâm, hawrawp type kim lo hi ka hua, a thatchhiatthlâk ka ti.



*Haha, sual viau suhh*



*Engin nge i lo zin ang? Scooty? Car? Bike?"



*Car a niang, ni a sa thei ém mai*



A zia hlauh chu, inngaihtuah a na  lo deuh alawm.



*Lo zin thuai thuai rawh, ka hmu châk tawh che, hrilh  tùr che ka nei nual tawh bawk*



Message dang a lo thleng, Kenny-a ve thung.



*Muhìl thuai rawh, naktûkah zîng kâra haw ka tum si*



Zîng kârah maw? Chaw a ei leh phawt ang chu ka lo ti asin.



*Chawhmeh țhing min hmehpui leh rih ang chu maw le*



Sasangi message a rawn thleng leh.



*Bialpa tùr țha deuh min zawnpui la*



Ani pawh hi, nuihzatthlâk lutuk. Bialpa hi inzawnpui chi a ni em? A upa ve tâwk tawh a, zawnpui a ngaihna ka hre lo.



*An tam, zawnpui ngai lovin i hmu dâwn chiang*



A hmel ka mitthla a, ka nuih a zã. Nula chhe vak lo leh awmthei,  hlawh nei zui bawkin bialpa neih loh tlat mai chuh, zei loh vàng nge duh loh vàng? A hnuhnung zâwk hi ka ring zaw mah, a la duh tâwk lo a niang.



*Ka fawhna che kha?*



Hei kher hi chu chhàn ka duh lo asin. A sawi 'raw' teh tlawng bawk si, bâkah ka awm dàn, lo dawnsawn dàn kha sawi chhuah ngam chi pawh a ni lo.



Ka țhianpa, ka kawmngeih ém émin min fâwp a ni a, ka taksaa a thawh dàn erawh țhian țha ang chu a ni lo. Hmeichhiain a mipa duh tak fâwp a lo dawngsawng ang chiah hi a ni mai, tisa tak pawhin nuam ka ti, mipain hmeichhia a fawh dàn tùr dik taka min fâwp ang chiah niin ka hria.



*Eng nge ka lo hawn ang che?*



*Min hrilh teh?*



Sasangi chu ka reply a, *Thil tui tâwk aw* ka ti a, min lo hawn tùr chu rin dàn ka nei sa mai.  Kenny-a erawh reply ka tum hran lo, reply kher pawh a ngai lo e.



Zîngah Kenny-a thawh hmain ka tho a, ani pawh a rawn tho har lo.



"Story i ziak țhin em ni?" a rawn ti a, plastic chair-ah chuan rawn țhuin dawhkàn chu a rawn kîl ve a.



"Ziak țhìn lo." Ka lo en zawk ringawt, ka zah thar ta deuh tlat a nih chu.



"Nizànah pawh in sawi reng kha."



Kan thu sawi a lo ngaithlain a lo hre vek a ni maw.



"Pakhat ka ziak ve chhin a."



"I ziak zo dâwn tawh em?"



"Dâwn lo deuh, dâwn ve țêp. A tàwp dàn tùr ka la ngaihtuah chhuak thiam lo va."



"Ka chhiar ve châk ngawt mai, min chhiartîr ve la?"



"Aih, ka zawh hunah le."



A chek hluk a," Min chhiartîr phal ve lo ang maw? A nih, nizàna kan thil tih kha kan chhunzawm leh mai dâwn em niang?" tiin a rawn ding leh nghal vut a.



"Ni lo!" ka lo ti țhat a, ka țhutna chair chu ka nam sawn nghal a, min rawn khawih tùr chu ka duh lo, zîng kâr a ni lehnghal, ka hnial thei dâwn tawh si lo.



"Min chhiartîr ve dâwn em?"



"Aw," tiin ka room-ah ka tlân lût nghal, a nui huk ri chu ka hria, ka va ngei tak!



Laptop chu la chhuakin ka pe a, a bih ngar ngar a.



"Kha le, chhiar ri rawh le," tiin ka hmaah chuan a rawn hûng ta thung a.



"Eirawng bàwl ka ngai, chhiar ve mai teh," ka ti thung a, ka tho leh tùr chu ka bânah chelhin," Chawhmeh țhing rin tùr i ngah kha," a lo ti sup thung a.



Ka hnial ngam leh lo. Nizàn ațang khân ka dik lo zo vek tawh, heti teh thuta ka dik lo ta lutuk hi hrehawm ka ti, melh pawh ka melh țha ngam tawh lo a nia.



"Le, han chhiar ri rawh le."



Ka chhiar ta a, nuam chu ka ti hran hauh lo. Detective leh cowboy thawnthute lo ziak ta zâwk ni ila chuan nuam lo ka ti vak lo tùr. Love story, M&B lam pâwl deuh a ni bawk sia, bâkah, ka lo tawn tawh tam tak ka ziak tel bawk sia, nuam lo ve deuh chu a ni.



A lo ngaithla nge ngaithla lo pawh ka hre lo. Min en reng tih erawh ka hria, ka hmui che vêl lam mawlh chu a en a, a ngaithla nge min fawh lam a lo ngaihtuah zâwk pawh ka hre lo.



Chapter 2 ka chhiar hnu chuan," A tâwk tawh, i ngaithla chuang lo," ka ti a, chhiar chhunzawm duh lo chuan ka tàwp ta daih a.



"I hria em ni?"



"Hria, ka chhiar kha i ngaihtuah hauh lo tih ka hria."



"A changtunu thil tawn kha tak tak a ni em?"



"Eng nge a tawn?" tiin ngun zeta enin ka zâwt ve zaih, a lo ngaihthlâk tak tak leh tak tak loh fiahna țha tak tùr a ni.



"A bialpa leh a țhiannu in-gus gus  lai a hmuh kha."



He pa tak hi chuh! A lo ngaithla ngei chu a lo nih hi.



"Thawnthu a nih hi, phuahchawp vek!"



"A changtunu Angaihtei kha nangmah hi i nih ka ring deuh bawk a."



Fîmkhur a ngai, he pa bulah hi chuan ka fîmkhur viau a ngai. Min hre chhuak vek tawh hial ang ka ti, thurûk pawh ka nei tawh mang nâng.



"I rin dàn dánin ngai rawh," ka ti ta ringawt a.



" A tak a ang khawp mai , Angaihtei chan kha i chanah ka lo dah a.  Chuan, i thu ziak a dikin thu thar, tûnlai ţawng i chher chhuak bawk, gus gus, jish tih vêl, a awmzia sawi lo mah la, a rin thiam theih nghal mai, a țha ka ti khawp mai, i fan no.1 ka ni nghal bawk," a ti duah a.



Min fak ve maw?! Ka awih thei lo hial zâwk.



"I ti tak tak lo ang," ka la ti hrâm.



"I story ziah chu a ngaihnawm khawp dâwn e. Chhiar theiha i dah chhuah hnuah phei chuan  lehkhabu ziaktu lâr tak i ni mai ang," a ti leh a.



Chaw ei khama haw ve mai tùra sàwm pawh ka duh; mahse, ka dik lo vêl vek tawh. A bula ka awmin ka țang deuh țùng a, ka thinphu hi a su deuh dup dup a, melh lah ka melh țha ngam tawh lo. Ka țhianpa fel tak kha a la ni reng tho sia; mahse, keimah zâwk hi ka dik lo zo tawh.



"Insiam ka ngai tawh chuang lo va, ka kal tawh mai ang."



"Aw le," ka ti ringawt.



Room-ah lûtin a rawn inkhâi chhuak mai dâwn emaw ka ti a, min rawn ko dût.



"Bàbî, lo lût lawk teh. Ka kawr pakhat ka hmu lo a nia."



Ka lût vat a, a lo inzawng ve nasa a niang.



"Nimin piaha ka hâk kha a nia, kawnga hâk hàw atân ka ti a."



Ka zawnpui a, room lo hmun dang a dahna tùr àwm ka zawng a, a vâng khawp mai.



"A pawi lo mai."



"I bag-ah hian i khung tel a ni lo maw? Han check teh," ka ti a, zawnna tùr ka hre tawh lo.



A'n hawng leh a, ka lo enpui ve reng a. A lo awm tak tak a!



"Haihawtliana tak hi chuh!"



"Mipa hi chu, in ni ve châwk alawm. Haihawt tak mi sual tak an awm ngai lo a nia," nui chung hian ka lo ti a.



"Min hnèm thiam hle mai!"



*******



Kenny-a haw zànah chuan Bawihbawihi chuan țap țuau chung bawkin min rawn phone leh a.



"U Zualte, hrehawm ka va ti tak ém!" a rawn ti leh a.



Kenny-a nèn an chungchâng leh bawk a ni ngei ang.



"Eng nge?  Kenny-a chungcgâng a ni em?"



"Aw, a awm dàn hi ka hre thiam lo tak zet a ni. A zin a, a zinna tùr min hrilh hek lo, țha takin kan ni dùn reng emaw ka ti a, zanin khân a rawn lêng a, ințhen a rawn rawt leh ringawt a," a ti a, a insût hlap hlap a.



Ka rilru a tibuai tak tak a ni. Chhàn dàn tùr pawh ka hre tawh lo.



"Ken-a hi ka chân hlauh a nih chuan...ka phal lo, ka hmangaih ém asin, ka hmangaih tak tak a ni."



A thil sawi chu ka ngaithla tawp, sawi ve tùr ka hre lo va, hnem dàn tùr ka hre hek lo, a bulpui ber ka ni miau si.



Ka mut dâwnah Nunsanga'n min rawn call ve leh thung.



"Kenny-a nèn hian in lo inngaizâwng reng a ni maw? In lo va tenawm ve! Kan inneih lai vêl daih ațang tawh khân em ni? Vawi eng zât nge in lo mut dun tawh? Mawh, sawi rawh," a rawn ti tuarh a.



Lalpa leh!! Hetiang chu ni lul lo ve.




*THIL RĔNG RĔNG KAWNG KHAT CHAUHIN THLÎR NGAI LO LA, KAWNG KHAT CHAUHA I THLÌR CHUAN KAWNG DIK I HMU THIAM LO ANG*



☆GOLD DIGGER☆ - 22 By Dingdi Pachuau




Engtin nge a hriat? A lo kal ve em ni? Ni lo, a ni thei lo.



Ni lo ve, kan inngaizawng hlei nem, min fâwp ringawt a nih kha. Min lo hmu ang maw? Nge mi dangin min lo hmu? Tu nge hrilh ang? Ka rilru a buai ta mup mup mai.



Tun boruak ringawtah pawh hetiang hi ka tawng chho a ni a, induhin inngaizâwng ni phei ila...engtin tak awm ang maw?



Theihnghilh ka duh, engkim theihnghilh ka duh. Buai leh hi ka peih tawh lo, ka inham buai peih tawh lo.



Keimah avàngin Bawihbawihi'n a tuar nasa ber ang, Kenny-a ka ngaizawng a nih hlauh chuan. Kan ințhian țhatna a bo ang, Sangzela rilru a na ang a, rilru na tùr an tam ang. Kei lahin nuam ka ti dâwn lo tawp chiang sa, Sangzela lo lêng pawh hi Lalàni'n min biak țhat duh loh phah tawh lehnghal. A hma anga hlim sârh khân min be thei tawh lo a ni.



He khawvêl ata hi tlàn bo theih ni se ka ti, rilru a nuam ve deuh țan tawh dâwn a, hetiang hriat leh dâwn reng mai chuh, ka peih tawh hlawl lo.



Engkim mai hi ka thiam loh vek a ni. Ka ngaihtuah cheuh cheuh hian a bul tumtu ber ka ni zel bawk si, kei hi awm lo ila buaina hi a kiangin ka ring.



*******



Sasangi rawn zin zet chuan ka rilru hlim lohna zawng zawng min rawn hnawh bosak vek. Abdul-a dàwra mi ngei mai Jelebi tui tâwk kha min lo lei leh a, ka rin dàn a ni sa hrim hrim. 'Thil tui tâwk' ka tih hi chuan lei tùr a hre țhìn si lo va, Abdul-a Jelebi a lei ziah.



Dik takin Abdul-a dàwr nghèng chiah hian mizopain Jelebi dàwr a nei ve tho va; mahse, a tui dàn a inan loh bâkah a intam hleih tlat. A man inang rau rauah Abdul-a dàwra mi lei a manhla bâkah a tui bîk ziah. Mizo dàwrah chuan kan chàwl duh zâwk țhìn nain a tuina leh a hlâwk zâwkna dàwr chu kan pan leh nge nge țhìn.



Ei tùr siamna tùr hmanrua leh ei siam tùr a rawn lei sa țeuh a, chu tak chuan ka nuih a tiza a, ka nuihpui vak vak.



"In inah chuan i lal tawh lo viau a ni maw?"



"Hm, hun ka neih loh vàng a nia, bâkah tam deuha siam chu a tui duh lo. Mama nupuite zawng, Nunsanga nu leh nau ang a ni lo, a fel lutuk. Min zah thiam thei a nia," ner nâng nâng chung hian a ti a.



"Ka âwih..."



"Âwih rawh, min han zah lo na se-"



"E khai! I u Mama nupui ka ni ang tih ka hlau," ka lo ti vat a, ka rilru tak tak pawh a ni.



"Hm, ka sual hlei nem. Mama nupui pawh a sual lo, țhat leh țhat a inlàwm chuan sual a har, a theih loh alawm. I va mo vena chhûngte nèn kha chuan min khaikhin miah suh. Anni ve  kha zawng, i țha hle chung pawhin an lung i dum thlâwt loh kha," a ti leh a.



A dik chiah. Mo sual nih ka duh miah lo, tum pawh ka tum; mahse, an tân chuan ka ni tho si.



"Kha lam kha chu theihnghilh ang, ka awm chhûng chuan ei tùr tui tâwk tâwkin ka châwm ang che a, nangin bialpa min zawn thung ang," thutak zet hian ti mah se, a thil sawi tàwp lam chuan ka nuih a tiza lutuk a, ka nui lo thei lo.



"A țha e, a țha e. Ka hmuhsak che a nih pawhin sawisêl âwih loh."



"Chhe deuh chu ka duh bîk lo a nia."



Nui chung hian,"Chhe deuh ka duhpui che i ring em ni? Mahse, i phû tâwk hria la," ka ti a.



Chu zet chu, a haw lutuk ringawt.



"Chhia min va ti àwm ve! Hm, ka rilru a nâ," tiin ka room-ah a lût ta daih a, ka nuih zui vak vak a.



Nunsanga thinrimin min rawn ànkhum țhin avàng leh min rawn call chhên avàngin ka phone ka off ziah. A pawimawh ber Sasangi a lo thleng tawh a, Nubawihi pawh a lo thleng thuai ang, kan pathuma kan awm chuan a tâwk. Mi dang an lo tel ve chuan buaina a tam mai mai.



Sasangi lo thlen zàna Sangzela a lo lên chuan Sasangi chuan min mitmei nasa khawp mai a, thil awmzia hriat a châk zek zek tawh tih ka hria. Ka hre lo der lui tlat a, min ngei leh ngawt ang chu.



Aizawl mi an ni bawk a, an inhriat chuan an titi nghal bawrh bawrh. Sasangi hi chu a țawng duh a, a fel viau bawk a ni. Kei pawh an bulah ngawi rengin ka lo țhu ve a, an titi ka ngaithla a.



"I châm rei ang tiraw?"



Min melh zoh pahin," Ka hre rih lo, țhiani hian min ngaithei vak pawhin ka ring lo," a ti deuh kher a, ka va ngei reuh tak.



"Engah ngawt maw?"



"Kha, a zawhna min zawh dàn ațang ringawt pawh khân hnawk min ti tih ka hre thei nghal," a ti leh a.



"Daw peih ziap zuap."



"Kha leh pawh..."



Kan inngamzia hi Sangzela hian a hre thiam lo a nih teh chuan, a zahthlâk duh ngawt ang.



"Zualtei hi chu a fel alawm, a ning lo ang che tih ka hria, i hnawk rĕng rĕng lo. I awm loh hun a tam daih zâwk alawm."



Awmze nei zet hian Sasangi chuan min melh leh a, hm, sawi fel tùr a va tam dâwn tak! Sangzela chungchang hi ka hrilh mang lo va, a thin a rim  nasa ngawt ang chu!



Ka tidik chiah.



Sangzela haw hnu chuan a țawng duh ta mang lo. Ngawi rengin mu thei tùrin a inbuatsaih a, ka be bîk lo, a thinrim rei dâwn chuang lo tih ka hre ru khiau.



Ka khumah ka hmuh theih loh tùr lam hawiin a lo mu ngât a, ka nuih a tiza khawp; mahse, ka nuih miah lo. A thinrimthlâk ka ti ve tho va, ka inthiam lutuk bîk lo.



A bula mut ve pah chuan," Engmah chanchin kan nei lo, a lo lêng țhìn a, ka haw fahran bîk lo, chu zawng chu a ni mai," ka ti a, min la chhâng chuang lo.



"Chuan, Kenny-a'n chance pêk min dîl a."



A rawn inher nghal vat.



"Maw!!! Kenny-a maw?!! Wow!! Khawvel thil mak 7 zînga tel ve a mawi a ni."


"Ém ém a."



"Ka ti tak tak. A mak ém asin, ngaihtuah ve la. A țhianpa nupui hlui i nia, a țhiannu i ni bawk. Chuan, bialnu kha a nei a ni lawm ni?" a ti leh zung zung a.



"Um, buaina ka ni ringawt!"



"Eng vàngin maw?!" A hriatthiam loh hmel lutuk ringawt.



"A buai kual vêl vek!"



Thil thleng chu ka hrilh dan dan a, chipchiar zetin. Ka sawi rei dâwn ém avàngin Nunsanga min rawn call țhin erawh ka sawi lang lo, Kenny-a nèn min rinhlelh thu pawh chu ka hrilh duh rih lo.



"A nih tak chu, a buai nuai mai a nih chu; mahse, a bul ber i ni lo aw. Tu pawhin duhzâwng kan nei vek a, kan duhzâwngte'n mi dang an duh avàngin an duhate bûrbun vek tùr a ni chuang lo, kan tâ tùr an ni lo tihna a ni mai," a ti sar sar a.



"I bulah hi chuan rilru a nuam huai huai zêl zawng a nih hi, a hahdamthlâk țhìn."



"Țhian țha neih man alawm."



*******



Keiin hna ka thawh hlànin inah a lo awm a, ei tùr a lo siam țhìn. Lalàni nèn kan inzui leh tawh vak si lo va, ka mal leh ta rak rak khawp mai.



Sangzela lo lêng țhìn lo hnar ngawt thu a awm lo va, lo biak chhiat thu a awm hek lo. Lalàni pawh hi a ti àwm lo ka ti deuh țhìn a; mahse, a rilru a nia, ka va control thei hek lo.



Nubawihi a rawn thleng a, a nuam lehpek khawp mai. A lo țhang sawt lehnghal a, kei aiin a sâng ta lek lek mai.



Kawr min rawn hawn ve ngei a, a mawi reuh phian lehnghal. Sasangi chu pakhat ka pe ve a, a lâwm thiam khawp mai, hmeh pawh a inhmeh viau e.



"U, Kenny-a'n min rawn phone a, i chanchin min zâwt a, a phone tlang thei lo che ni àwm tak a ni," chaw kan ei lai chuan a ti a.



"Um, ka off a, chu vàng a nih chu."



"Ka hmu châk asin, lo zin tùrin ka hrilh a."



Sasangi chuan awmze nei fé hian min rawn en a, engmah ka sawi lo. Nubawihi hi chuan hre ve lul suh se, ka chanchin țha lo lam a hre tam tawh lutuk a, hriattîr ka duh tawh lo.



"Nubawih, khu lamah chuan mizo in tam em?" Sasangi chuan a ti ta hlauh mai a, ka lâwm reuh tak tak.



"Tam lo ve, ka țhiannu ka rawn hawpui nèn bâk kan awm lo. Northeast mi erawh kan awm nual."



"A nih, bialpa i zu nei em?" a beng bula va kûn deuh hian a va ti sar sar a.



"Nei nâng, an hmelchhe hlawm si."



Kan nui ta vak vak a.



*******



Sasangi chu kâr khat chuang a châm.  Sangzela chaw eiah kan sâwm a, chaw kan eiho a, Nubawihi pawhin Sangzela chu a kàwmngeih lehpek khawp mai. Ani hi chu a țawng duh a, tu tân pawh nèl loh theih pawh a ni lo.



"PUBG kha i la khèl țhìn em?" Chaw kan ei lai chuan Nubawihi chu ka zâwt a.



"Hun ka nei tawh lo, khelh ka châk thei tawp maw le; mahse, ka zia tawh."



"E, a țha lo lutuk asin, tunah pawh state hrang 4 laiin an banned tawh hi. Rilru a ei chhe nasa lutuk a, an duh lo a ni. Âtchilhtu an pung tulh tulh mai si a, a khèl țhìn pawh mi â ang mai an nih hi," Sasangi chuan a lo ti vat a.



"A nuam ve ém a ni; mahse, hun ka nei tawh lo lutuk a, khelh châkna nasa tak pawh kha tunah chuan a bo duak tawh," Nubawihi chuan a lo ti a.



"A țhat hlauh chu, khelh châkna rilru kha paih bo daih rawh aw, i zirlaiah i rilru pe la," ka lo ti ve a.



Sangzela chuan," Barbie chei danglam vêl mai mai ang chi games kha khèl mai mai rawh, a him ber," a lo ti a, ka nuih a za lutuk.



"Home design leh word-cookies kha a țha, ka khèl ve țhìn," Sasangi chuan a lo ti a.



"Games ka khèl hman tawh lo hrim hrim, college ka chhuah hnuah chauh ka khèl tawh ang," Nubawihi chuan a lo ti a.



Sasangi nèn kan mu a, Nubawihi erawh a lo thlen tirh zàn tih loh chu a room-ah a riak ta char char.



"Kenny-a'n a rawn phone leh tawh che em?"



"Phone lo, ka off țhìn a."



"Engah maw i off țhin a?"



"Nunsanga'n min rawn call țhìn a, ka ning maw le. Kenny-a nèn kan inngaizawngah a ngai a."



"Engah nge a rawn call ve ringawt? In innei leh pawh a ni lo va, i free tawh a, i duh duh i ngaizawng thei a ni, a lo inrawlhna tùr a awm miah lo," a ti hmarh hmarh a.



"A nu dâwt sawi vàngin kan ințhen a, a hre chhuakin ngaihdam min dîl a, ka ngaihdam hnuah min rawn ringhlel ta ém ém ringawt. Chumi avàng chuan Kenny-a phone pawh hi ka chhâng ngai lo."



"I phone chu, off tawh suh. Vìn lêt hrep tawh ang che, a lo inrawlhna tùr a awm lo rĕng rĕng, a zak lo e," a ti leh hmarh hmarh a.



"A nih, Kenny-a hi i duh ve deuh rĕng rĕng em? Nge Sangzela zâwk?" tiin min zâwt a.



"Ka haw lo ve ve, dik tak chuan Kenny-a hi chu ka țhian a nih vàng nge a chunga ka rilru put dàn hi a dang vak lo; mahse, min duh tih ka hriat chian hnu leh min fawh ațang khân ka zah thar ta tlat a."



"I lo duh ru ve tho pawh a ni maithei asin."



Ka ngaihtuah vang vang a.



"Min fawh vàng khân ka haw miah lo. Hmeichhia ka nihzia min hriat chhuahtîr leh zâwkin ka hria, ka duh leh duh loh erawh ka la hre lo. Sangzela pawh hi ka haw lo, a fel bawk sia, ka hre thiam lo. Bialnu a nei lo tih ka hria a, rilruin vènthàwn a nei lo. Kenny-a erawh hi chu, buaina a tam," ka ti ta ringawt a.



"Mahse, tluang purh lova inngaihzàwnna hi a nghetin a thûk  duh phian asin, harsatna tam tak an paltlang dun chuan an induhna pawh a nasa bîk țhìn," a ti leh sap sap a.



"A dik alawm; mahse, tunah hi chuan ngaihtuah rih loh ka duh, ka la inpeih chhuak lo."



"A nih, Nunsanga chuan a rawn hnaih leh deuh che em ni?"



"Lêt tùr chuan min ti dawt lo nain min duh tih ka hria, Kenny-a nèn an inhmu thiam chiah lo lehnghal bawk, a chhan phei chu ka hre lo, min hrilh duh tlat lo va."



"Kenny-a'n a duh che tih a hriat vàng pawh hi a ni mahna!"



"Ka hre lo le."



*******



Inrinni zîng a ni a, hna thawh loh ni a nih vàngin ka tho hma peih vak lo va, Nubawihi erawh a tho tawh thung. Mu pahin ka meng kar a, ka chunga thil thleng chu ka ngaihtuah kual a.



Ka phone a rawn rì a, ka'n en chuan Nunsanga a lo ni lehpek a. Sasangi thil sawi kha hre reng chung chuan ka chhâng ta  a.



"Eng nge ni?"



"Ka phone call i chhâng țha duh lo hle mai. Nge in pain chhâng lo tùrin a ti che?"



"Nunsang, hetiang lam ringawt sawi tùr hian min rawn be tawh lo teh, ka ning a nia. I nupui ka ni tawh lo va, ka chungah thuneihna i nei tawh lo tih inhre bawk la," ka ti ve ta a.



"Wow, i va huaisen tawh ve! A țha e, sawi chhuah nge nge a ngai dâwn a nih hmel e."



"Eng chu?"



"Kenny-a nèn kan inhmuh thiam lohna chhan kha i hre duh em?"



Ka hre châk lutuk.



"Eng nge ni?"



"Nangmah vàng a nih kha. Kan inkârah i awm tlat a ni, ka nupui i nih lai khân a lo ît ve tlat che a..."



"Dâwt sawi suh!" A dâwt sawi hi ka awih thei lo ang.



"Ka daw lo, zâwt ta che. Kan insual phah nghe nghe asin, nang nèna kan ințhen chhan pawh kha a ruahmanna vek a nih kha."



Ka tho zawt mai, hei kher chuh, a ni thei lo ang. A ni thei lo, Kenny-a'n uire anga min chhuah a tum ang maw, a theih loh, a theih loh bur!



"Zâwt ta che, kan insual phah. Min tham lo khawp mai, a chêt dàn zawng zawng hi ka sawi dâwn em ni? Tuna a nula kawp mêkte hi? Sawi tùr a tam lutuk! Kan ințhian țhìn tih hi chu theihnghilh duh ila chuan ka sawisa nasa khawp ang."



Kenny-a chu leh! A va mak dâwn ve! Tak tak a ni ang em?




*MI ȚHATNA LAI I SAWI DUH LO A NIH PAWHIN AN CHHIATNA LAI SAWI KHER SUH*



☆GOLD DIGGER☆ - 23 By Dingdi Pachuau



Nilêngin Nunsanga thil sawi chu ka rilruah a awm a, ka lo ngaihtuah vung vung zêl. Ka àwl kâr hlekin ka ngaihtuah zêl, mak ka ti ém a ni.



Kenny-a chu a inhmeh thlâwt lo. A ti tak tak lo ang, Nunsanga khân a puh chhe mai mai a ni ngei ang, a hmain min duh ang pawhin a awm ngai loh kha. Min duh ni se, Nunsanga min hmuh hma leh hriat hma ațangin min hre tawh a, a sawi daih tawh ang chu.



Mahse, thil ni thei lo a ni tlat lo. Nunsanga nèn kan ințhen hnuah chauh a ni min duh thu a sawi ni. A hma pawhin min lo duh ru tho maithei asin, mahni hma sial takin hmingchhe taka Nunsanga ka chhuahsan theih nân a lo ruahman pawh a ni thei tho. He khawvêlah hian thil ni thei lo leh thleng thei lo pawh a awm tawh loh hi maw, mak tàwpkhãwk pawh a thlen chàmchî hi.



Hm, ka rilru a buai. A buai tak zet.



Kenny-a ka țhian țha ber hian khatiang thil tenawm lutuk kha min duh vàngin, Nunsanga nèn kan ințhen theihna tùrin a ruahman chiah ang maw? A rapthlâk ka ti a, mak ka ti thar tlat.



Mahse, Nunsanga pawhin dâwt a sawi thei tho, a nu dâwt sawi a ni kha a ti bawk sia? Ngaihdam pawh min dìl kha; mahse, a hriat chian hmel viau si.



Kenny-a ka hriat țantirh ațangin ka ngaihtuah chho a, ka tâna țha lo tùr thil a ti ngai lo a nih kha. A nih leh, kha thil kha a ruahmanna lo ni ta se, min va la hnaih ngam sî ve, inkiltawihna leh inthiam lohna pawh neih ve àwm tak. Bâkah, Nunsanga tak pawh hi a chanchin a țha lo zâwng pawhin a sawi ngai lo a nih kha, a tân a huam nasat theihzia kha.



Mi dang min biakna hre lo lêkin ka lo ngaihtuah. Ina ka haw chuan ka chàu ngawih ngawihin ka hria, Nubawihi'n eirawng a lo bâwl a, min lo biain in tùr ka duh leh duh loh min zâwt a, ka duh loh thu ka hrilh a, room-ah ka lût daih.



Nunsanga nèn kan inbiakna kha ka ngaihtuah lêt leh a.



"A bialnu pawh hi a thil tih thup nân a neih mai mai a nih hi, a duh tak tak teuh lo, mutpui atân bâk a duh lo."



"Hetiang thil tenawm i chunga  ti duhtu hi i lo pawm duh ka ring thei lo a ni, chutianga lo pawm  mai mai mi i ni tlat lo, ka hre chiang tâwk che a ni."



"In ina kan lo indinchilh ràn min rawn hmuh pawh khân ka chhuahchhàl a nih kha, a thil tih tenawm lutuk ka hre chhuak ta si a, engmah a sawi ngam miah loh kha."



"A nih, engati nge chûngte chu a hmain min hrilh daih tawh loh?"



"Phone ai chuan hmaichhana hmuh che a engkim hrilh che ka tum a, ka hrilh hma chein rin loh deuhin a rawn lang ve leh ta bawk sia, nang lahin hãw tùr khân min ti bawk si a."



"Min hrilhna hun i ngah lutuk!"



"I âwih ka ring lo va, bâkah, ințhian kan lo ni țhìn bawk nèn, a chanchin țha lo lam sawi hi ka duh tehchiam lo va."



Ka ngaihtuah a, Nunsanga thil sawi chu a dik thlup mai si a, eng nge thu dik chu ni ta ang?



Zanriah kan kîl laiin," U, vawiin lam i chàu deuh a ni maw? tiin min zâwt a.



"Aw, chàu deuh a ni mai ang chu, ngaihtuah tùr a tam lutuk a."



Nui chung hian," Zaninah Sangzela a lo lêng ang a, i chàu  a reh vek mai ang," tiin min fiam ve ngei a.



"'Sangzela' i ti ve lawl lawl ringawt a, 'u' ve la, kan inrual reng ang chu," ka lo ti thung a.



"A, i koh dàn ang zêl lo hi chuan ka ko thiam thlâwt lo, ani pawhin a haw bîk lo ang chu, a fel ém hi. Bâkah, ka mâkpa pawh a la ni maithei a," a ti a nui hak hak a.



"Khatiang lam kha chu sawi rih lo teh ang, pasal neih hi ka châk tawh lo teh a nia. I bula awm ka duh daih zâwk!" ka ti ta daih a.



"Mahse, kan awm dùn reng thei dâwn lo asin, mahnia i lo awm kerh kerh te hi ka khawngaih che a, mipa țha deuh Kenny-a te, Sangzela te ang hi pasalah nei la ka ti, ka ngaihtuah vak lo thei che ang a, a țha dâwn asin," thu tak zet hian a ti leh a.



"Nunsanga pawh-"



"Aih, ani chu ka duhpui tawh lo che, i hmangaih viau a nih pawhin ani hi chu nei tawh lul suh, i hlim leh tak tak chuang lo ang," a ti ta tlat a.



"Thil eng pawh lo thleng se la, eng lak ațang pawha hum theitu tùr che Kenny-ate ang hi a țha ka ti, Sangzela pawh a țha; mahse, Kenny-a ai chuan a pâwn lam lan dàn hi a derdêp deuh zâwk a, hlauhawm lo thleng se a chhan thei lo ang che tih ka lo hlau a, a chêr roh sia."



Ka nui ta hawk hawk.



"Kenny-a chu ka țhian a ni alawm-"



Ka la sawi lai mêk chuan," Ka hria alawm, amah hi nei rawh ka tihna pawh a ni chuang lo, 'amah ang hi' ka ti mai a nia; mahse, an vâng ngawtin ka ring," a ti leh a.



Ani tàwnah hi chuan Kenny-a hian hmun a chang sâng ber a nih dâwn hi. Nunsanga thil min hrilh kha hrilh ve ta ila, engtin nge a ngaih ang le? Mak a ti ve ngawt ang, a ring thei lo zâwk hialin ka ring.



Sasangi ngaih dàn ka hriat duh avàngin ka text a, Nunsanga thil min hrilh chu ka hrilh ve a. Min rawn call nghal vat.



"Oh mu God! Ka ring thei lo!  Dâwt a ni ngei ngei ang, Nunsanga hi ka rin a ang lo zo tawh a, thu dik a nih pawh ka ring zo tawh lo. Engtin nge nang i rin dàn?"



Ka thaw ham ham phawt a," Rin dàn tùr ka hre thiam lo, ka ngaihtuahna a buai nuai a ni mai," ka ti ringawt a.



"A mak ngawt ang chu! Mihring hi kan lo mak thei khawp a, thil ni thei lo pawh hi a awm tak tak tawh si lo; mahse, Kenny-a chu i ring chhe nghal ngawt lo ang chu tiraw? Thu dik tak hriat chian hma chu thu tàwp siam ngawt suh aw," a rawn ti a.



"Um, ka hria alawm. Thu tàwp siam han tih kha, thil kal tawh a nia, siam țhat leh tawh rual loh niin a pawi tùr a pawi zo tawh. Tu tih pawh chu lo ni se, han hriat thar leh hian rilru a tina thar leh a, theihnghilh daih ka duh asin," ka ti sap sap a.



"Nia, a țha ber. Chuan, thu dik hriat chian hma hi chuan miin an sawi hi awih ringawt loh tùr. Nunsanga pawh i hriat tawh tho kha, a thu sawi chu ring bur bîk suh ang che, nang pawh a rin duh miah loh che kha," a ti țâlh a.



"Um, ka lo hre reng ang. Ka rilru a tibuai ém a, tunah chuan ka rilru buai nuai nuai pawh a zia leh deuh ta e, i awm lo ang tih hi chu ka hlau ngawt mai," ka ti a.



Message a lo thleng, Bawihbawihi message a ni.



*U Zualte, ka thil hriat hi a dik em? Ka ring thei lo, ka ring chhe phal miah lo che*



Sasangi nèn kan inbiak lai vêl daiha min lo thawn tawh a ni. Eng thil nge niang? Ani pawh hian Nunsanga thil hriat ang khân a lo hre ve em ni? A bialpa leh kei inngaizâwng anga a hriat ve hlauh chuan...



*Eng thil nge ni ta?* tiin ka chhâng lêt a.



Min rawn chhâng ve vat bawk.



*Ken-a nèn hian țhian țha tak in ni tiraw? Chu bâk a awm lo tiraw?*



*Aw*



*Ka rin dàn chiah a ni, min hrilhtu hian inngaizâwng, inkawp ru reng angin a sawi che u a, ka rilru a nuam huai e*



Tuin nge chutiang chu lo sawi rĕng rĕng ni? A râpthlâk hle mai, kan inngaizâwng lo va, kan inkawp ru reng hek lo.



*Tuin nge hrilh che a? A hrilh leh che a nih pawhin lo âwih miah suh*



*Aw le, ka âwih vak lo hrim hrim a, nangte chu engkim ka hrilhna ber i ni alawm, kan chanchin zawng zawng pawh i hre vek a*



Um, ani hnên ațang hi chuan ka hre ve zauh zauh. Kenny-a erawh hi chuan ka zâwt a nih loh chuan a sawi ngai lo, ani hian a lo kawp mai mai a nih pawh ka ring deuh ta.



*Nia, tluang takin hlim dùn zêl rawh u, țha takin i enkawl chho dâwn nia*



Bawihbawihi hian a duh hle si a, a pelhesan lo tawp ang. Kenny-a hian a țhen hlauh a nih chuan a rilru a na ngawt ang, hei vàng hian a lo mutpui thei pawh a ni maithei asin.



Eng pawh ni se, Kenny-a hi ka ring chhe ringawt lo ang, ka chunga a țhatna zawng zawngte ngaihtuahin hetiang thil tenawm ti duh tùr hi a ni lo. A lo ti a,  thu dik a nih erawh chuan, ka thin a rim thar leh ngawt ang chu. Thil dik lo chu thup theih a ni hlei nem, lan chian hun a la awm ém ém ang.



Theihnghilh tum zâwk teh ang.



*******



"U, naktûkah Kenny-a a lo zin dâwn asin, ka awm chhûngin lo zin ve hrâm tùrin ka sawm a, a pawi lo tiraw?"



"Pawi lo ve, a țha alawm," chu ka ti taknain  ka duh vak lo; mahse, Nubawihi hriattîr erawh ka tum lo thung.



"A awm rei dâwn chuang lo va, zan hnih khat bâk a riak lo ang," a ti leh a.



Kenny-a hi  chance ka pe thei lo ang. Bialnu țha tak a nei a, a duh ém ém. Ka lam ka hawitîr chuan a rilru a na dâwn lutuk, chu vàngin, min beisei ngam loh nân Sangzela hi ka chhàn mai a țhain ka hria. Mi inkâr tichhetu nih ka duh lo, ka tuar hnu tawh a ni a, kei chuan ka thlentîr ve duh lo. Kenny-a hnar theihna tùr a nih chuan eng hmanrua pawh ka leklam mai a ngai a ni.



Sangzela rawn lèn hnuah Kenny-a chu a rawn thleng a, ka lo ngaihven tehchiam lo, a mawi tâwk chiahin ka lo làwm a, Nubawihi chanpualah ka dah mai.



Sangzela chuan a lo be ve luam a, min en duh viau tih ka hre tho va, ka en duh lo lui tlat, Nunsanga thil sawi kha ka hre chhuak leh zawk a, khatiang thil tenawm kha a tih loh hrâm ka beisei.



"I story ziah kha, i ziah chhunzawm leh tawh em?"



"Tlêm tĕ chauh, ka ngaihtuahnaah a awm thei lo va."



Nui deuh chung hian min en a," A changtupa kha nih ka châk ngawt mai," a ti sà sá a.



"I ni reng alawm."



"Thlâk daih la?"



Kenny-a a lo hawi reng avàngin nuam chu ka ti chiah lo, Nubawihi nèn dawhkàn an kîl a, Nubawihi a țawng barh barh a, eng emaw chângin Kenny-a chu a țawng thûm leh dût dût țhìn.



"Zanin hi eng emaw ngaihtuah nei hmel i pu, ka hriat ve chi a ni em?"



Chiang zet hian a tarmit phèn ațang chuan min lo en kar niin, kei lah ka ngaihtuahna ka lo hmang leh nasa tawh niin, a va zahthlâk țhìn tak!



Ka nuih sak a," Engmah chutiang a awm lo," ka ti sap a.



"A țhat chu. Rilru hahna deuhte hi i lo nei ang tih ka hlau a, puih theih che ka duh dâwn si a," a ti dap dap a.



"Aw, a va lawmawm ve! A hahdamthlãk țhìn mang e."



*******



"Ka chunga i awm dàn hi ka hre thiam lo, engati nge i awm dàn i thlâk thut a?"



Min hmachhawnin a ding rùn a, a hmelah hlim hmel leh fiamthu hmel a lang lo, a insehruh nasa hle a ni.



"Engtin mah ka awm lo."



"Dâwt chu min hrilh miah suh, ka hriat chian ve tawh viau che hi maw."



A dik ang, min hre chiang viau tawh. Chance pêk ka duh lo va, min duh lo tùrin ka duh bawk. Buaina hmachhawn ka peih lo, keimah vànga mi tawrh ka duh hek lo.



"Ka țhian i ni a, țhian ang bâkin ka en lo che."



En lo mah ila, hrehawm a ti ang, min duh thu kha a sawi tawh miau si a, țhian ang bâka ka en loh thu ka sawi chhuah hian a chapona a khawih chêt ka ring.



"Bàbî-"



"Bawihbawihi a lo lang țêp ang, a bulah hetiang sawi lan hi ka duh lo a nia, engmah i tihlan loh hrâm ka beisei bawk," ka ti a, ka in-control nasa hle a ni.



Lungleiah hna vàngin ka zin leh lawk a, ka vah kualnaah Kenny-a hian min lo hmu a, tunah hian a inah chaw kan ei khâwm dâwn mêk a ni.



"Eng vàng nge tih ka hre thei ang em?"



"Ka țhian i ni tlat alawm, a bâk a awm lo."



Bawihbawihi'n thâwm a rawn neih tâkah chuan a kal sawn ta a, kei pawhin ka tih tùr chawhmeh chan sa sil tùr chuan tui dahna lam ka pan ta nghal a.



Chaw ei lai chuan Kenny-a chuan Bawihbawihi chu a ngaihsak thiam khawp mai, kan inhmuh khâwmna kha a rei deuh tawh a, tunah chuan ngaihsak pawh a lo thiam viau tawh mai. A thiam chu a rinawm sa hrim hrim alawm, Kenny-a hi chuan a țhiante leh a bul hnaia mite a ngaihsak thiam theih ém kha.



"U Nunsanga kha tel ve hlauh se aw..." a sawi sual tih a hre chhuak leh nghal vat a ni ang, a hmui a hup vat a, nuam lo tih hmel zet hian min en a," Ka tihpalh lutuk," a ti sap a.



"Ho lutuk, engah mah ka ngai hlei nem."



"Kan ei khâwm leh hunah chuan pali kan nih ve ngei tawh ka beisei," a ti leh a.



"Kei pawh le."



Chaw ei khamah veranda-ah chuan ka chhuak mai mai a, Sangzela'n min rawn call a, rei vak lo chu kan inbe bawk. Pâwna awm reng chu fuh vak lova hriain muangchâng hian ka lût a, ka thil hmuh avàng chuan ka ding chat a, ka inthiam lo nghal rum rum mai.



Bawihbawihi chuan Kenny-a  nghâwngah lo kuahin a lo fâwp ni ngei tùr a ni, Bawihbawihi chu min hnungchhawn zâwnga țhu a nih vàngin min hmu thei lo hrim hrim, thâwm nei lo bawk chuan tawlh chhuah ka tum a, Kenny-a zâwk chuan min rawn hmu ta.



Inthiam lo zet chuan ka ding a, ka hmel chu a mak ngawtin ka ring. A chhan chu chutia an awm dùn chu hmuh ka inring lo ve ém a ni, a live ngatin mi infâwp ka la hmu tlat lo va!



Min rawn hmuh veleh chuan uar zet hian Bawihbawihi chu a fâwp a, min en pah reng chuan a tukhum samah chuan a țhâm leh salh a, a hmaa min fawh dàn ang chiah khân.



Chêt sawn ka duh, ka che sawn thei rĕng rĕng lo, ka ke leh chhuat chu a inchàr bet ta emaw tih tùr a ni.



A kâwngah a kuah tho a, uar zet tho hian a la fâwp reng tho. Chumi pah chuan a mit chuan hmun dang a en eih lo, min en char char, 'țhian' ang chiaha ka en thu ka sawi kha phuba lâk a tum a ni ang.



Ka kawchhûngah hian chê a awm! Eng thil nge niang le?



*HNÂWLA PHATSANTU CHE CHU VAWI HNIH AIA TAM RING MIAH SUH*


☆GOLD DIGGER☆ - 24 By Dingdi Pachuau


Kenny-a chuan min hmuh miau avàngin a tàwpsan mai dâwn emaw ka ti a, a tàwp duh chuang miah lo. Ka hmuh avàng chuan a uar ta sauh zâwk hial emaw ni ka ti.



Uar zet hian a fâwp leh tàwn táwn a, a mit erawhin kei chauh min en thung. A thil tihin keimahah nghawng a neih leh neih loh hriat a tum a niang.



Min runluih nâna tilui nge a nih ang a min ti-el zâwk ni ang?  Min duh ti ve si, hetianga a awm tlat hi a mak ka ti zâwk.



A hnu deuhah chuan an inthlah ta, kei pawh chu aw thian kharhin,  inthiam lo ru deuh chungin, lût ve chiah ang maiin ka țawng nghâl a.



"Zanin chu a nuam ka ti viau nain ka haw tawh mai dâwn emaw ni ka ti deuh, naktûka haw leh nghal mai ka tum bawk sia."



Bawihbawihi intuai deuh sawk sawk chu ka en duh lo lui tlat a, Kenny-a pawh ka en chuang lo.



"A la...hma alawm le, kan inhmu khât si."



"Insiam tùr ka la nei a, bâkah lehkha ziah fel tùr ka la nei alawm le, a nawm tehlul nèn, ka hawsan tawh mai ang che u aw."



"Kan lo thlah ang che. Honey, nang chu la haw suh aw."



Bawihbawihi hlim hmel chu hmuh a nuam khawp mai. Hmangaihnaa tlûk luh laia ka hmel ang tho kha a nih ka ring, ani pawhin hmangaihna zùnzâmin a phuar vêl a, ka hre thiam tak zet a ni.



Ka duh lo chung chu min thlah lui a, car-a kan chuan lai chuan," Lo zin leh thuai rawh aw, chaw kan ei khâwm leh ang a, lènna tùr hmun nuam deuh pawh ka hual lâwk a nia. Hman deuh takin rawn kal tawh la," Bawihbawihi chuan a ti sar sar a.



Nui deuh chung hian," Teh rêng mai, ka lo kal leh hma chu lo la kal bîk suh u aw," ka ti a.



"Aw le; mahse, a hma thei ang berin lo kal tum la, bâkah, tu emaw rawn hruai tel tawh la."



"Tu maw?"



"Tu emaw maw le. Nunhlui theihnghilh rak khawpa nuamin hun kan hmang tawh dâwn nia."



Nia, ka mal bîk. Nunsanga nèn kan inneih lai kha chuan inkawp ve vein kan awm a, khâng hun kha tunah chuan nunhlui mai an ni tawh, mitthla leh suangtuahna lo chuan kan chêng thei tawh lo.



"A thuhrimah, rawn hruai ve tawh la?"



"Lo kal leh hunah aw."



Kenny-a chu a ngawi reng, zanin chu ngawi a dawh a nih àwm hi.



Puteate in chu kan thleng har lo. Ka chhuk pah chuan," Lo lêng ve lawk ula?" ka ti mawihnai ve a, an lo luh duh pawh ka ring chuang lo.



"Ken, lêng ve rih ila?"



"Tihfel tùr a la neih kha, min kàwm hman dâwn chuang lo. Kan tibuai mai mai zâwk ang," Kenny-a chuan a lo ti sup a.



"E, kan tibuai zâwk ang che, i lo zin leh hunah zâwk a ni mai."



An tlân liam chu ka thlîr zui a, eng emaw hlu tak hloh nei ang mai ka ni. Eng nge a awmzia? Kenny-a hi ka duh ve deuh em ni? Ni lo, teuh lo mai! Ka țhian a ni, ka țhian țha tak. Chu bâk a awm lo.



Ka insiam vek tawh a, tihfel tùr pawh ka nei lo. Dâwt ka sawi ve mai mai, a chhan chu an pahniha hun hman dun kha an la kham loh hmel ém a, hun pêk ka duh vàng a ni.



Thla êng hnuaiah chuan tukverh ka hawng a, ka muthilh theih loh avàngin thla êng chu ka thlîr a, a lang chiang ém ém mai lehnghal.



Zanin chu ka mal tak zet a ni. Ka khua a har ru vang vang a, ka nu boral ațanga mal ka intih leh ber țum a ni hial ang, a chhan hriat si loh hian ka awm a nuam lo nghiai ringawt!



Ka phone ka'n en a, dâr 10 chauh. A la hma ve deuh bawk a nih hi, ina ka mut hun a la ni lo, puteate nupa an mut tawh vàngin in chu a reh raih thung.



Phone chu ka tuai let ka tuai let a, hla ngaihthlâk ka peih si lo, games khelh lah ka tui si lo, mut tihchhuahna tùr zawn a ngai a ni.



Message hlui ka hai chhuak a, ka chhiar chuan ka lung a tilêng zual. Ka en thla dan dan a, Sangzela message pawh ka la reply lo a nih hi. Ka type a, ka send ve ta nghal a.



Fb-ah ka lût a, ka luh lohna a lo rei ve ta hle mai.  Ka like thla nghauh nghauh a, like dàn chu ka lo la thiam ve reng a nih hi.



Group hrang hrang ka check a, Thu ngaihnawm huangah lûtin chhiar tùr chi hrang hrang lo awm țeuh chu ka en thla zêl a, mut tihchhuah nân chhiar ka duh a ni.



Sangzela message a lo thleng.



*Lo haw thuai thuai teh, a reh lutuk a*



Ka nui sak a. Nia, lènna tùr a hre lo ngei ang.



*Min ngai tawh a ni maw?* Ka fiam  ve châk  hrim hrim a.



Message a rawn thleng lehnghal, engtin tak rawn chhâng ang maw?



*Over e, ka ngai over che*



Ka type ve leh mawlh mawlh a.



*Chuti, min lo hmuak la?*



Ka send leh ta nghal a; mahse, eng nge  a awmzia ni le? Hei, Sangzela message kha a la awm reng, tuna ka reply kha tu nge? Sangzela ka reply a nih kha.



Whatsapp-ah ka lût a, message ka check chu, Kenny-a ka lo reply niin! A message min rawn send nèn a inchhâng lo lutuk chu a nuihzatthlâk tawp.



Ka delete leh ta nghâl vat; a hmu hman tawh tho chuan ka ring.



Sangzela chu ka reply țha leh.



Kenny-a message a lo thleng, ka message kha a lo chhiar hman chiang.



*Ka lo hmuah che chu i duh chiah ang  maw? Ka message tùr a ni chiah lo a nih hmel.*



A tihchi loh tawp, ka fîmkhur loh vàng vek.



*Nia, ka tihpalh a nih kha.*



*Hmuak chiang ang, ka hmu châk tawh che alawm.*



Ka nui sak a, kei pawhin ka hmu châk ve tawh. A bula awm a nuam a, țang țùng reng lovin inthlahdah takin ka awm thei a, invèn țêt a ngai lo va, a nuam ka ti.



*Haw pawh chu i nghãkhlel tawh àwm hle mai.*



Nghâkhlel ve bawk ang chu, helai chu ka mikhualna hmun a ni tlat.



*Mikhualna hmun ațanga mahni in awmna pana haw chu thil nghahhlelhawm ber a ni alawm.*



Sangzela'n min rawn call tâk avàngin message ka reply hman ta lo.



"Naktûk zàn chu ka inah rawng ka lo bâwl ang a, kan ei dùn mai dâwn em ni ang?" a rawn ti a.



"Eirawng i bâwl thiam maw?"



"Ngahnge ka thiam loh ang? Mahni ei tùr pawh siam thiam lo chu pasal atân pawh i duh dâwn rĕng rĕng em ni?" a rawn ti leh sap sap.



Nunsanga ka hre chhuak. Ani kha chuan a thiam lo a nih kha, pasal atân chuan ka neih ngei si kha, kan innei rei lo ta ém zâwk a.



"Ka ei châk tawh e a!" A ei siam pawh ei a châkawm ve hranpa rĕng rĕng. Mipa eirawng bâwl thiam hi ka ngaisang asin, pasal atân pawh thiam lo ai chuan ka duh fé...tawh.



A nui hawk hawk a.



"Ka thiam viau chu ka ti lo; mahse, ka ei siam chu tui an ti ve țhìn."



"Dam chuan naktûk zànah kan hria ang chu!"



"Kan hria ang... Chuan, chawhmehah duhzâwng deuhte i nei em?"



Ka nui var var a," I siam apiang kha a ni mai, ka sawisêl lo ang," ka ti a.



"Lo thleng thuai la a nih mai chu."



Ina hawa eirawng bàwl chawp leh chu peihawm loh tak chu a ni. Chuvàngin, ka hnial duh lo, bâkah, a ei siam ei a châkawm ve hranpa hrim hrim bawk.



Kan inbiak zawh meuh chuan a lo tlai ve ta duai mai. Mut pawh a chhuak ve țan ta, message ka en leh thuak thuak a, Kenny-a message pawh 2 a lo awm khar e.



*I muhìl thei lo lehpek a ni maw?* tih leh *Hla ka lo saksak dâwn che em niang?* tih hi a lo ni a.



'Hla saksak'. Helai thu hian min tinui lo thei lo. He pa hi a zai ngai àwm lo ém mai, hla pakhat pawh a sa chhuak theiin ka ring lo. Chuti chung chuan hla min saksak a tum ang maw? A inhuamna a ropui ve hrim hrim e.



*Mu mai teh, zan rei tawh lama i zai ngaihthlâk zawng, a lunglènthlâk àwm lo ém mai, lunglèn a hnawt țiau vek mai ang.*



Ka mut hnuah message chu a lo thleng leh a; mahse, ka en tawh lo.



Ka chhuah hma dârkâr khat vêl zet la awm tùr vêlah Kenny-a chu a rawn lang leh hlawl mai, min rawn thlah dâwn em ni le? Ka awih chiah lo deuh bawk si.



"Eng nge i lo tih dâwn?" ka lo ti vat a.



"I haw dâwn a ni lo'm ni? Ka rawn thlah dâwn che, ka lo hmuak thei dâwn si lo che a..."



A thil sawi dàn kher kher chuh! Va ngeiawm tak! Ka thawn sual vàng vek.



"I phone kha off kher a ngai em ni a?"



Hre thiam lo zet hian ka en a, ka phone ka off lo hrim hrim. Nizànah pawh ka hman reng kha; mahse, tukin lamah ka la check miah lo, a battery a lo ral leh tawh a niang e.



Ka en chuan a lo thi tawh tak tak! Ka phone hi a țha tawh lo tih chu ka hria; mahse, hetiang hian a battery a lo chhe hle tawh tih ka lo hre miah lo. Hm, data ka on tlaivàr vàng a ni chiang. Phone țawih tawh lamah hi chuan... a thar a ngai ve tawh tak zet.



"A thi hmak!" tiin ka phone chu ka lek chhuak a.



Pitei chu room ațangin a rawn chhuak a, Kebny-a a hmuh chuan," Kenny, inhmuh a va khât ve le! I dam țha em?" a lo ti chùl a, ani chuan," Aw, țha e, in vêng lamah hian ka lo kal khât deuh a, a inhmuh loh theih khawp mai," a ti ve luam a.



Pitei chuan thingpui lum a tum chuan a lo duh lo va, ka chuanna tùr motor chhuah a hun dâwn tawh avàngin ka hmanhmawh deuh bawk a, ka bag chu pâwnah la chhuakin rickshaw ruak lo tlãn ka melh pah a.



"Ka thlah thei reng che sia!"



"I buai theih ém kha. Rickshaw ka la mai dâwn alawm, a hla hran lo bawk a," ka ti ve tlat a.



"I țhian ka ni ta lo em ni?"



Ka melh zawk a. Ka țhian a ni, ka țhian a ni reng ang. Ka chungah eng thil pawh lo ti mah se, kei chuan ka țhian a nihna hi ka theihnghilh ngai lo ang.



"Ni chiang e."



"Chuti, khawi i bag kha."



Ka pe ta nge nge. A lungawi loh ka hlau ve tho bawk sia, bâkah, a car-a chuan chu a pawi viau nâng, ka chuang rei dâwn chuang lo.



Ka chuanna tùr motor lo dinna hmun kan thlen chuan driver chu a lo phusa nasa mai a, a phone chu en sekin mangan hmêl zet hian a lo vei thuak thuak tawh a, motor-ah lah mi dang an lo chuang khat vek!



Min lo hmuh veleh chuan,"Zualte, phone che ka tum nasa tawh lutuk! I lo thleng hlauh chu a va tihzia ém! Hei, ka ni fanu Hnahthiala mi a boral thut mai a, kal loh theih a ni si lo va, vawiinah chuan kan chhoh theih loh hmel, a pawi ka ti," a lo ti sawk sawk a, pawi a tih hmel viau rualin  min hmuh avàng erawh chuan thawveng huai hmel a pu thung.



Chuti, vawiin chuan ka haw thei lo tihna a ni dâwn a ni maw. A zia lo hle mai.



"A va zia lo ve tiraw? Pawiti suh, keima lamah chuan."



"Phone che ka tum nasa lutuk a, switch-off a ti tlat zêl a."



"A zia lo leh zêl, ka phone a thi hmak a." Zia lo ka tih rualin a zahthlâk ka ti bawk.



"Kal rawh u, kei chu min ngaihtuah miah suh, motor remchâng dang pawh a lo awm mial thei asin," tiin ka hnèm ve a.



"A zia lo khawp mai; mahse, tihtheih kan nei si lo va."



Motor-a an tlàn liam hnu chuan Kenny-a bulah chuan," Min kalsan tawh la," ka ti a.



"Engtin nge awm i tum?"



"Motor ka châng chhin ang."



"A vâng ngawt ang!"



Ka hria, a awmin ka ring lo. Driver Siama ka hnemna mai mai a nih kha, hrehawm a tih lutuk ka hlauh vàng a nia.



"Nia..."



"Vawiina haw ngei ngei i duh si a maw?"



"Aw." Hna ațanga chawlh zen hi ka duh lo a ni.



"Lût rawh."



Motor dang min zawnpui dâwn a niang, fel hi chu a fel ve koh koh a nia.



Kan ding ta miah lo nia!



"Khawiahnge kan kal dâwn?" makti deuh hian ka zâwt a.



"Haw i duh a ni lo'm ni?"



"Min thlah dâwn maw!! Ni lo, Kenny, hna țûl dang i nei ngei ang. Ding rawh."



Min ngaihsak lo zet hian," Hla i ngaithla duh em? Nizànah lah ka zai i ngaithla duh mang si lo," a ti sup a.



"Kenny-"



"Hla chu?"



"Aw, i play apiang kha."



A nui ta suk. Nia, hnehna a chan hi chuan nuam a ti țhìn.



Zai a play hma chuan," A nuam ka ti lo a nia, naktûka haw pawh a pawi ka ti lo, lêt leh mai ang," ka ti a.



Ka ti tak tak. Ka tân hian a țha tak zet a ni. Ka tân a țha tih vànga ei hek leh chhawr viau emaw hi ka duh dàn a ni lo, puih ka ngaihnaah min pui hnem tawh lutuk tlat.



"Chu hla chu ngaithla chiang teh, a mawi chiang a nia."



Eng hla nge pawh ka hre ngai lo, zai hi ka ngaithla tam ve viau tawh a, hei chu ka hriat ngai a ni lo tlat.



"Tu zâi nge a? Ka-"



"Shh.." tiin ka țawng chu min rawn khap a, ka tàwp chiang kher mai.



A mawi ve phian a nih hi. Hla hi chu a thlûk hi mawi phawt mai se, hla mawi leh mawi lo ka tehna a ni ve a, a hla thu țha viau mah se, a thlûk a mawi loh chuan mawi ka ti thei lo.



Zai chu a zawh hnuah chuan," Kan tlân tawh a, lêt lam kha chu sawi tawh suh, haw i duh a ni lo'm ni?" a ti ta khauh a.



"Duh a; mahse-"



"A tâwk a nih chu, sawi buai tum lo teh."



Ka ngawi ta kar. Ka sawi chhuak leh a nih chuan a thinrim mai ang, lãwm hle tùr ka nih zâwk hi; mahse...



Ani pawh a țawng chuang lo, zai chu kan ngaithla a, pâwn lam chu hawiin ni sa val val hnuaia thlifîm rawn thaw leh heuh heuh țhìn chu ka inchhèmtîr a.



"A lo hmuak dâwn che em?"



Ka phu deuh zawk mai.



"Hmuak ang."



"A nuam duh ngawt ang!"



Teh ngawt chuan.




*HARSATNA LEH HREHAWMNA HIAN CHHELNA MIN ZIRTÎRIN KAWNG ENGKIM ATÂN MIN LO TUAIHRIAM ȚHÌN A LO NI*




(Zanin chu ka lo dah ve thei ta. Lo nghâk hrâm hrâmte, in va zahawmin in va fel tehlul ém! Phunnawi lovin min lo nghâk țàng țáng a, in mi duhsaknate ka hmu bawk, ka lâwm vek e.



Update thei reng tawh tùrah inngai ang, Pathian zâra dam chuan. Leh, Net-in zah a ngaih chuan.


Story ka ziahna pawh kum khat a lo tling ve ta, Pathian min vènna a ropui a, nangni nèn kan inhmêl hriatna pawh kum khat zet a lo tling ve ta hi ka lâwm ngawih ngawih, in zârah tak meuh a ni tih ka hria e, KA LÂWM E, LOVE YOU ALL)




☆GOLD DIGGER☆ - 25 By Dingdi Pachuau



E taka, ka phone hi charge ngei ngei a ngai, Sangzela ka phone a ngai dâwn asin.



"Powerbank min lo hawh teh, ka phone hi tihnun ngei ngei a ngai."



"A rawn phone dâwn che a?"



"Phone ve bawk ang chu, ka thlen hun a hre duh dâwn asin."



"Kan la thleng har dâwn ém mai," min tihsan ta daih a.



Chu pawh ni se, tihnun ka duh ve alawm le. Ani kher lo pawhin thil pawimawhah min rawn phone duh thei a.



"Min hawhtîr mai la?"



"Ka keng lo."



A tìrah khân sawi ve nghal mai àwm, sawi duah kher a ngai dâwn lo va.



"A nih, i phone ka lo hmang hawh tal ang?"



Min rawn melh zawk a," I bialpa phone nân chuan ka phal lo," a ti leh hmuk a.



"I va sual tak!"



"Nia, min hre chiang telh telh mai ang."



Ka thin a rim chuang miah lo nain ka titau der a, pâwn lam ka hawi hmak a, ka țawng duh ta lo va.



Ani pawh a țawng leh ta bîk lo.



Dârkâr khat dâwn inbe lova kan tlàn hnu chuan," Phone charge-na tùr i nei mial tak tak em?" tiin ka zâwt leh ta nge nge a, ka en pah bawk a.



Kawng sîr remchâng laiah a car chu a dintîr ta phawt a, inher meuha min rawn enin," Luhlulnu, ka keng lo ka tih tawh kha. A pawimawh viau a nih chuan ka phone hi hmang mai rawh," a ti a, a kekawr ipte ațang chuan a phone chu rawn phawrhin ka hmai bulah chuan a rawn lek lang nghal a.



Ka nuih sak a, a nui ve duh miah lo.



"Luhlul reuh lutuk!"



"Ka lâwm e."



Sangzela number chu ka hmet a, ka call ta nghal a. A pawimawh chauh ka sawi, ka bulah a awm ve reng sia, kan thusawi a lo hre ve vek tùr chu ka duh lo a ni.



Ka biak zawha a phone ka pêk lêt hnu chuan car chu a start a, tlân chhuak lehin," I hre hle mai, ka number i hre ve em?" tiin min zâwt ta nghâl a.



Ka hre hauh lo! Sangzela number hi chu hriat a awl ém a ni. Ka number ka hria a, Nubawihi number pawh ka hre chuang lo. Phone number hi thil chhinchhiah har ka tih pâwl tak a ni ve hrim hrim.



"Sangzela number chu hriat a awl alawm, vawi khat hriat chuan a theihnghilh theih loh miau a, nang pawhin i hre thei nghal ang chu," tiin a number chu ka sawi ta nghâl a.



A ni lah tak a, a number hnuhnung lam pathum hi 2 vek a nia,  chumi hma pathum lah chu 1 vek a ni bawk a, hriat a awl ém asin.



"Ka hre miah lo, ka theihnghilh nghâl."



A duh hunah hi chuan ngeiawm thiam ve deuh mai a nia. A fel viau a, a chimawm thiam viau bawk.



"A nih, ka number i hre bîk em ni?"



"Min zâwt duh lo mai teh!"



"I hriat loh vàng a nih kha," tifuh inti zet hian ka ti a, ka nui țhâ a.



"Ka hriat chuan eng nge i ngam ang?"



"A naupanchhiatthlâk e a!" ka lo ti hlak a.



A phone a rawn rîk tâkah chuan min chhàn a tum pawh chu a țhulh ta rih a, call chu a chhâng ta zâwk a. A biak dàn ațang chuan Bawihbawihi a ni tih ka hria, nuam lo ka ti sawt.



An inbe rei bîk lo, bâkah motor khalh chungin a be bawk sia, a be rei thei vak lo ang.



"Bawihbawihi a ni maw?"



Min chhàn loh avàng chuan," I tum lohnaah i chhuak ta daih sia, ka lâwm viau-"



"Ho mai mai! Tlak duah-"



"Min sawi zawhtîr ve țhìn teh!" ka lo ti țhat a.



A nui ta vur vur mai. He pa hi, a ã deuh hi a ni lo maw? Mak thei vur vur e.



"Min vìn lêt țhat țhat ngam hi ka làwm reuh. Aw le, sawi zo law law ta che le," a ti ta a.



"Min thlah hi ka lâwm, ka inthlahrung viau nain. Hnial che ila, i luhlul ém avàngin ka hneh thei dâwn chuang lo che a, ka chunga i țhatna hi engtikah mah ka theihnghilh ngai tawh lo ang. Ka țhian i ni hi ka lâwm tak meuh meuh a, nupui țha tak nei tùrin ka duhsak ém ém bawk che."



Ka ngawih tâk hnu chuan," I sawi zo tawh em ni?" a lo ti sup a.



"Zo tawh, hmeichhe  țha tak Bawihbawihi ang hi nupuiah nei la, thlah miah suh ang che," ka ti leh a.



Kawng lam en ngar chung chuan," Ani chu nupuia nei tùrin min duh maw?" a ti leh sup a.



"Duh e, a fel alawm. A duh chein a zah thiam che a, nang pawhin i duh thiam hle tih ka hria, nupa inhmeh tak tùr in ni."



Kan titi chhunzawm ta lo.



Fel viau mah se, a chimawm a chhuah hi chuan a tawrhhlelhawm țhìn. Kan véng kan thleng chu, kan in thlen hmain Sangzela in kan tlàn pèl hmasa zâwk dâwn a, chuvàngin Sangzela in zâwna ding  tùrin ka hrilh lâwk diam a; mahse, din chu khawilam, a khalh chak sauh a, kan in kawtah kan ding bu laih a.



"A in bula ding tùr khân ka hruai haw lo che."



Ka bag chu la chhuakin kan veranda-ah chuan a dah a, kei pawhin ka zui chhuak ve nghâl a.



"Inenkawl țha ang che, thil pawi eng emaw a thleng palh a nih chuan min hrilh hmasak ka phût bawk," a ti nghut a, car lam chu a pan leh ta nghâl a.



Hrilhhai zet hian ka en reng ringawt!



Car-ah a lût a, tinungin a tlân chhuak leh nghal daih. A ngaihna hre lo zet hian ka thlîr liam vang vang, Khawiah tak kal dâwn ni maw?



Ka phone a nun a ka call theih meuh chuan a lo tlãn thui tawh khawp mai. A tlân haw leh char char niin, a va buaithlâk țhìn tak! Ka lu a tihai.



*******



Sangzela nèn pawh kan inzui ve tak tak ta. A mawi lo pawhin ka hre tawh bîk lo, Nunsanga nèn kan ințhenna pawh kum hnih a ni dâwn tawh a, a àwm ve tawh rengin ka hria.



Min duh a, min hmangaih tih min hrilh bawk. Engkimah kan inmil a, a aw zaidam leh a nui hmel hmuh hi a ninawm loh a, a bula awm ka ning lo.



Nubawihi pawh ka hrilh tawh a, ani pawhin min pawmpui thlap. A duh dàn takah chuan Kenny-a min duhpui a; mahse, ani chu, bialnu nei lai a nih bâkah ka țhian țha ber kha a ni tlat a ni.



Thawhpuite pawhin min hre tawh a, min fiam leh zuk țhìn. Lalàni pawhin min be tawh a, a hnuah phei chuan ngaihdamte min dîl hial. A awm dàn zahthlâk a tih thu a sawi sep sep chuan nuam lo ka ti lek lek.



Sasangi'n a hriat țantirh ve thung chuan min be țha duh lo va. A chhan chu bialpa ka neih chuan ka kawm țhat theih tawh loh a rin vàng a nia. Ka hrilh fiah hrep hnuah a pawm ve ta chauh, min lawmpui thu min hrilh ve thei ta țâwk.



Nunsanga pawhin min rawn phone khât ta viau. Ka ngaihven lo viau nain a bialnu hlui Linda-i nèn khân an inzui ngawrh ve ta viau tih ka hre ru a, a țha viau mai. Ni e, nupui nei leh rawh se, fate nei se, a nu pawhin mo atân pawh a duh ber a nih kha maw.



Sangzela hi chu ka belhchian cheuh cheuh hian a fel ka ti hluah hluah. In a luah a, kei pawh mahni chauha awm ka ni. Mawi lo tùr leh mi mit tikham zâwngin a awm ngai miah lo. Pasal țhen tawh mah ni ila, ani chuan nupui a la neih ngai loh avàngin a nupui nèn chuan Dàn Thianghlim ngeia inneih a duh thu a sawi fo. Ka zak deuh fo zâwk; mahse, thil țha lo ti tùrin ka thlêm ngai bîk lo va, bâkah, hetiang lam hawi hian awm dun kan tum lo hrim hrim bawk.



Kenny-a pawh a lo zin khât ta; mahse, kan in-phone reng tho. Sangzela nèn kan ni nghet tawh tih a hria a, min duh thu a sawi tawh ngai lo. Hetiang lam hawi hi a sawi chhuak tawh mgai lo, kan in-phone pawhin a hna chungchâng, ka hna chungchâng leh Nubawihi chanchin bâk kan sawi ngai lo.



Dec 12-ah nupui a nei dâwn tih min rawn hrilh chuan min țhâwng kher mai. Mak ka ti deuh thut a, an ti deuh thut mai chu mak tih loh rual pawh niin ka hre lo, Bawihibawihi hi a lo ruak lo em ni chu aw ka ti rilru deuh hlek a, ka ring phal chiah si lo. Ka lawmpui rualin ka țhian țha tak ka chân dâwn ta niin ka hria a, ka ui deuh ringawt nia. Bawihbawihi chu a vànnei dâwn hle mai, Kenny-a tân  nupui țha tak a nih ngei ka beisei.



"Ka làwmpui hle mai che."



"Ka hria alawm."



Nia, nei tùr khân ka duh thu ka hrilh ve fo kha maw. Inneih an tum thut chhan erawh ka hre châk tho, Kenny-a'n inneih lam a la hawi vak lova ka hriat tehlul nèn.



"In tum thut chhan hi, a chhan ka hre thei ang em?" tiin ka zâwt ta nge nge a.



"Chhan a awm lo."



"Bawihbawihi hi, a rai te hi a ni mai lo maw?" Ka țhian a nia, ka zâwt zak duh bîk lo.



"Mut dun lohin a rai theih em ni?" a rawn ti lêt khauh a.



"Nia, ka ring phal chiah lo va. Aizawl lamah nge Lunglei lamah niang?"



"Lungleiah, Bawihbawihi pi a tar tawh lutuk a, zin thei a ni tawh lo va."



Chuvàngin, Lunglei lamah an invuan dâwn tihna a ni maw? A țha alawm, Nunsangate nèn kan inhmu khâwm leh ral ral ang a, a zia viau ang chu.



"In pa nèn in rawn kal thei ang chu tiraw?"



Sangzela a hman ve thei maiin ka ring. Bâkah, Nunsanga hmuh laia single reng anga lan ai chuan Sangzela kalpui chu ka duh daih zâwk. Min hmangaihtu, ka sum lam en ve miah lotu leh dinhmun sang leh hniam thliar ve miah lotu, mi țha leh fel bialpa ka nei tih hi hmu ve mawlh rawh se.



"Thei ang, ka țhian țha ber ropuinî hi hmuh loh ka duh miah lo ang. Sasangi sâwm ve la?" ka ti leh tâwng ringawt a.



"Um, ka hrilh ang, nangmah ka rawn hrilh hmasa ber che a."



"Ka lâwm e. Eng nge tihsak theih che ka neih ang le?"



"Engmah. Lo kal ngei la a tha a ni mai."



Sangzela ka hrilh chuan nui var var chung hian," Iau, ka rin aiin a va duh hma ve! Um, kan kal ngei dâwn nia, i țhian țha ber a ni bawk si a," a lo ti a.



"Ka lawmpui tak tak a ni. Nupui țha tak neiin fate nei se tih hi ka duh țhìn a, tunah chuan chu chu a lo thleng thei dâwn ta si a."



Min rawn kuahin," Keini pawh hi nghâk rei lutuk lo ang aw, nghah rei viau hi a țùlna a awm miah lo a nia. Nubawihi awm theih remchàn veleh ti ila tiraw?" a ti sar sar a.



"Kan inzui tak takna a la rei lo e, miin mak an ti ngawt ang," ka lo ti thung a.



"Kan inzui tak tak hma hian kan inhre rei tawh tho alawm, chhuanlam a tling miah lo a nia," a lo ti leh thung a.



"Nubawihi hi engtikah nge a rawn chhuah chhoh theih ang le?" a ti leh a.



"April vêl a niang."



"A țhat chu. Hun a la tam a, min hnial thei miah lovin ka bei dâwn a ni."



Meng phar ãk hian," Engtin?" ka lo ti vat a.



"I hriat ve chi loh!"



Ka nui hak a," Haha, min hrilh loh chuan...a ni mai," ka lo ti thung a.



"Ka nupui ni thuai la ka ti a ni." A thutak leh thut a.



"Min duh tak tak ang maw? Kei chu i hriat angin pasal țhen tawh ka ni a, ka țhen dàn lah-" ka sawi zawh hma chuan ka hmui chu a rawn hup ta chat a.



"Sawi tawh suh, ka hriat hnu vek a ni. Hriat nawn leh hi ka duh tawh lo, kei chuan ka ring che a, ka ring chhe ngai lo che. Ka hmangaih che tih i hria alawm, kha thu kha sawi chhuak tawh miah suh aw," a ti sar sar a.



Kan inen vang vang a, a kut a lâk sawn loh avàngin ka lu ka bu nghat ringawt a. A kut chu la sawnin muangchângin a rawn kûn hniam a, dîm têin min rawn fâwp ta vang vang a, kei pawhin ka lo chhâng lêt ve vat a.



"Ka nupui ni thuai ang che aw," kan inthlah hnu chuan a ti hap a.



"Aw le, ka hnial lo ang che."



Min pawm thovin min kuah vawng vawng a.



"Min tihhlimzia hi i hria em? Khawvela mipa hlim ber ka ni hial ang," a ti sar sar a, a hlim tih a aw ațang chuan ka hre thei mai.



A hlim hian nuam ka ti a, min tihhlim a tum fo țhìn. Ani pawh hian ka hlimin nuam a ti a, kawng engkimah kan inmilin kan induhsak tawn ém ém a, nupa hlim tak kan nih theih ka ring.



Min duh a, min hmangaih a, nupui atân min duh. Kei pawhin ka duh a, ka hmangaih chiah em tih erawh ka hre lo thung. Nunsanga kha ka hmangaih ém a, khatia mualpho leh hrehawm taka ka chhuah hnu kha chuan mipa dang hi ka hmangaih leh theih pawh ka ring lo hial a ni a, Sangzela hi Pathianin min pêk a nih ka ring hial a ni. Kan nih dàn a inang a, sum dinhmun leh fahrah ka nihna a en hek lo, ka nihna ang angin min pawm a, hei hi ka tân chuan a hlu ém a ni.



Dec 12 chu Thawhțanni a nih vàngin Inrinni-ah Sangzela nèn chuan Lungleiah kan chhuk a, thlenna tùr a hriat loh avàngin Puteate inah kan thleng dùn mai. Sasangi pawh Aizawl ațangin a rawn phei a, ani erawh chuan chhûngte a nei țha a, a chhûngte inah a thleng thung, kan inhlat angreng.



Putea leh Sangzela chu an inkàwmngeih nghal chat mai. Pawi ka ti lo nasa, inkàwmngeih se, innêl ém ém se ka ti.



Sunday tlaiah Kenny-a'n chaw ei tùrin min rawn lam vang vang a, Sangzela nèn chuan kan chhuak a, boruak a vawh ve țan deuh tawh avàngin kawrlum hâk a ngai ve tawh hial.



"Kan tam viau ang em?"



"Tam ve bawk ang chu!"



Sangzela chu ka en a, min lo nuih sak pah chuan ka kut chu a hûm lum vang vang a. Ka huphurh deuh tih a hria a ni maithei, ani deuh hian asin nuam lo ti dâwn ni, hmel hriat a nei dâwn si lo.



"I huphurh em?" tiin ka zâwt sap a.



"Huphurh lo ve, ka bulah i awm miau a."



Ka nuih sen sen a.




*RIN ÉM ÉMTE'N MIN PHATSAN HNUAH RINAWMNA HLUTZIA LEH PAWIMAWHZIA KAN CHHAR CHHUAK FO THÌN*



☆GOLD DIGGER☆ - 26 By Dingdi Pachuau



"Huphurhna chhan tùr a awm miah lo a nia," Kenny-a chuan a lo ti sup a, kan țawng a lo ngaithla reng a ni chiang.



Kan thlen chuan an lo awm țeuh tawh. A in luah bul hnai deuhah, in hnuaiah niin, hall zau deuh mai a lo ni a, a nuam phian mai.



Chaw ei khâwmnaah ringawt pawh a insêng nasa ngawt ang chu, mi kan tam si.



Hmel hriat an tam lo viau mai. Sasangi ka hmu a, min hmuh veleh min rawn pan vat a, kan inkuah vang vang.



"Lo kal r'u, helamah," tiin Kenny-a chuan min rawn ko a, kan zui ve nghal a.



Dawhkàn kan kîl a, ei tùr tui hnai zet zet an lo chhawp dul tawh a, chûngho ka hmuh chuan ka ril a țâm raih raihin ka hria.



Sasangi, Sangzela, Kenny, kei leh Bawihbawihi chuan kan kîl tlâng a, chaw ei lai chuan Sasangi chuan Bawihbawihi leh Kenny-a chu a fiam țhìn a, Bawihbawihi chu a nui leh sak sak țhìn a, Kenny-a erawh a nui țha duh vak lo.



"Mo neitu tùr ber hian a huphurh deuh emaw ni le, a nui țha duh lo riau," Sasangi chuan a ti leh sak a.



"Huphurhawm ve alawm."



"Ka rin aiin in tihma a; mahse, in tlâk hma deuh dâwn tihna a ni mai a, a fel zâwk daih alawm," ka lo ti ve thung a.



Sasangi chuan," Kenny-a'n malpui pahnih chauha mut a ning ve tawh a niang, thlasik a ințan tawh sia," nui chung hian a ti leh a.



"Ei țeuh teh!"



Kan nui țhâ a, Sasangi'n a fiam deuh vak tawh hi chuan Kenny-a hi a dang ve fo asin.



"Naktûk zànah chuan tute emaw chuan nuam an ti dâwn bîk sia... tute emaw chuan an awt ngawt ang."



He nu han àn peihzia hi chu aw!



"In lo inhmehbel ringawt hlawm ang e, ka sawi chhan miah lo che u a nia."



"I va ninawm ziap zuap tak!" ka lo ti hlak a.



"Pasal neih i châk leh tawh vàng a nih chu, i lo tem ve zauh tawh bawk sia..."



Hm, a ngaihna a awm thlâwt lo.



"U Zualte, nangni engtikah nge in tih huk ve ang?" tiin Bawihbawihi chuan min zâwt ve thung a.



Sangzela chu ka en ralh a, nui sâng hian min lo en lêt a.



"An tihhar vak bîk ka ring lo. Tu emaw hian a nghah rei duh vak ka ring lo."



Sasangi chu ka melh hrãwk a, Kenny-a ka en ve  chuan chiang zet hian min lo en reng tawh thung a, a chaw ei pawh a chàwl hial.



"Kan tih hunah nang chu hrem i niang, i ka i âng peih lutuk a," tiin Sasangi chu ka melh leh nghal vat a.



"Hm, kei zawng dinpuitu tùr che ka ni tlat."



Kan titi atalâng chuan kan ei rei zêk mai, ka puar mah mah bawk. Zànah kan inkhâwm dâwn chuang lo va, tlêm chuan a zia deuh ka ti.



"Inthiarna hi khawiah nge a awm le?"



Bawihbawihi chuan min hrilh a, Sangzela chuan," Kalpui i ngai em?" tiin min zâwt a. A ngaih loh thu ka hrilh hnu chuan ka tho va, Bawihbawihi min hrilhna lamah chuan ka kal ta nghal a.



Rei pawh ka va zawng lo, awm an lo awm nual, darthlalang lian zet hmaah chuan ka ding phawt a, mi dang pawhin kut rawn silin an insiam țha ve nak nak hlawm a, toilet sîr ber  ruakah  chuan ka lût ve nghal a.



Ka chhuah chuan pahnih khat bâk an lo awm tawh lo. Ka kut chu silin ka hmui hnawih ka siam țha a, ka sam ka huih țhat lai chuan," Wow, a changtunu ka hmu fuh ta!" tih ri ka hre ta nghal a.



En lo mah ila, a aw ațang chuan tu nge tih ka hre tho. Darthlalang ațanga a thla ka en hma chuan thâwk ka la ru vang vang phawt a, chutah, inherin ka hmachhawn ta a.



"Eng nge i lo tih? Hmeichhe luhna a nih hi," ka ti hmak a.



"Chuvàngin ka rawn kal rĕng a ni, ka hmu tlat che a."



A aw ațang chuan ruih nei a ang, a mak ka ti khawp mai. Kan inneih lai khân zu a in ngai ka hre miah lo,  mit sen râm mai ațang chuan a rui a nih ka ring thlap.



Mi dang pahnih awm ve pawh kha an lo kal sawn tawh avàngin kan pahnih chauh kan ni tawh a nih hmel, ka hlau hran lo.



"Zualbawih-"



"Khatiang khân min ko tawh suh, kal sawn teh."



Ka kal pèl tùr chu ka bânah min man chat a, ka tãl nghal laih bawk. Hetianga a chêt hi ka ring miah lo asin, a rui lehnghal si a, nuam lo ka ti hle mai.



"Zualbawih, ka ngai țhìn che asin, i tel lo chuan engmah-"



"Chutiang sawi suh! Kan ințhen fel hmak tawh a, Linda-i i neih tawh hi, țha takin awm rawh," ka ti a, ka bân a manna chu phelh ka tum a, a man nghet phian.



"Min thlah teh, a na a nia, miin min hmu reu reu ang e!"



"Min hmu mah se, pawi ka ti hauh lo. Ka nupui hlui hi neih lêt leh ka duh a ni mai, lo sawi tùr leh lo inrawlhna tùr an nei miah lo," a ti nghut nghut a, hnai zeta min rawn thâwk khum chuan zu rim ka hre thei ta.



"Min thlah rawh, ka kal duh a nia." Zaidam taka ka biak  loh chuan buaina a thleng palh ang tih ka hlau.



"Ka nupui i ni a-"



"Ka ni tawh lo, i nupui ka ni tawh hauh lo!"



"Lo lêt leh rawh, Zualbawih."



"Ni lo ve, a theih tawh loh, engkim a tàwp vek tawh. Nun tharin ka nung tawh a ni."



"Tu mipa mahin an hnaih che hi ka phal lo, Kenny-a pawh ni se, tu pawh ni raw sek sek, ka kaltîr dâwn lo che," a ti țêng chhuai mai a.



Ka bânah chuan nghet leh zuala chelhin a lamah min pawt a, kei ka lo țang ve bawk a, kan inpawt nasa mai.



"Min thlah rawh, Nunsang. Hetianga i chêt duh hi ka lo ring ngai lo, i nun a va hniam ve! Zu i rui lehnghal."



"Nangmah vàng a nih hi!"



A va zak lo tak! Keimah vàngin zu a in maw? In tùrin ka ti em ni? Min țhen tùrin ka ti pek em ni? Teuh lo, chhia zawng zawngah min mawhpuh suh se.



"Min thlah rawh!" Ka aw ka dìm peih tawh bîk lo, ka vìn țhawt.



"Kenny-a, i  țhianpa, i bialpa ni bawk chuan nupui a neihsan dâwn che maw? Chance i zawn vàng a ni lo maw hetah hian i kal-"



A hmaia ka benna avàng chuan a sawi zo thei lo, a hmai ka benna pawh a vâr pap thei, a na ve viau ang chu, ka kut pawh a thîp țhak mai.



"Khatiang khân sawi leh tawh ngai suh!" thinrimna avànga țawng khùr dar dar hian ka ti sap a.



A hmai chu a tuai puat a, hneh zeta min rawn man lehin," Kut min thlâk ngam a ni maw? Mi hurnu, i hurherh vàng a nih kha. Pasalte pawh kham khawp zo lo, mi tenawm!" tiin a mit sen rûm chuan thinrim zet hian min melh kul mai a, ka hmaiah chuan na zet hian min bêng țhuai a, ka lêng lawpin ka hria.



Ka lu chu cement bangah chuan ka tauh a, a na lutuk ringawt. Thawh pawh ka tho thei lo, ka bîng mum mum a, ka lu a hai chhawk bawk a, ka mittui a rawn tla nghal zawih zawih.



"I tlangvalpa chuan eng nge ka pêk loh pêk che a neih? Sawi rawh."



Ka samah chuan rawn țhâmin min bêng leh sawk a, ka lu a hai a, min ben avànga ka biang na chu thuhran, a thil sawi râpthlâk tak tak chuan min tidam lo takngial dâwnin ka hria, ka khùr hlawk hlawk. Tlân sawn tùr pawhin tha rĕng ka nei lo.



"Mi hur i nih hi, mi hur, pasal awm loh lai chuha tlangvâl awmpui chîng!"



Min bêng leh dâwn tih ka hria. A hmêl țha tak țhìn, țihbaiawm ta ém ém leh a mit sen rûm mai chu ka hlau tak zet tawh, chêt sawn ka tum chu ka samah bawk a kêk leh. Ka țê tuar a, he ramhuai lak ata hi tlân bo ka va duh tak!



"He khawvêla nung ve tlâk pawh i ni lo, uire hmang chu dam rei tlâk an ni lo, ka'n that law law ang che!"



Min bêng leh tùr chiah chu," Eng thil phiangsen nge i tih?" tih ri ka hria a, min bêng tùr ka hlauh lutuk vànga ka maimichhîng tawh chu ka meng zawk a, Kenny-a ka hmu nghal.



"Kenny..." Kenny-a ka hmu ka lâwm lutuk chu ka țap lo thei lo. Chhuata min namthlu pahin," Mi hurnu hi ka that dâwn!" Nunsanga chuan a ti țêng chhuai a.



"Duhtâwk rawh!"



A aw ațang  chuan  a thinrim  hle tih ka hre nghal.



"Hmeichhia kutthlâk duh hial khawpa  huaisen i lo ni maw!?! Mipa ka awm hi, kei hi min that rawh, mi tenawmpa. Mipa i ni emaw ka lo ti țhìn asin."



"I nula chu i lo chhan hle mai maw? Thi ve ve tlâk in nih hi, ka'n that law law ang che u."



Nunsanga a ni tawh mawlh lo, ramhuai dik tak a ni tawh!



A khabea hnek sawk pahin,"Ka nula a ni lo tih hre chiang bertu i niang chu! I thil tih tenawm zet kha sawi chhuah ka duh lo, Nunsang, ka rin phâk bâkin i che duh a nia, i lo mak hle mai!" thinrim aw sehchilh zet hian a ti a, a țawng a ring miah lo.



Min rawn hnaih nghal a, ka hmai chu dìm tĕa dawmin ka sam chu a huih kiang a, a thinrim avànga a hmel lo danglam nghal chu ka hmu chiang hle mai.



"A thil tih man chu a hmu khawp ang!" tiin min kuah ding a, bang nghènga min dintîrin Nunsanga lam chu a hawi leh ta nghal vat a.



"Min hnek rawh!" a ti ta tuarh a.



Nunsanga lo ding fel thân tawh chuan a rawn hnek pawp mai a, a thle sawk, ka lo îp zawk mai.



"Chawh rawh! A nuam bawk em?" tiin Nunsanga chuan a nuih zui a.



Kenny-a chuan rang zet hian, na lua a awm lo ang e tih tùr hian a rawn hnek lêt ve ta thung a, Nunsanga chu chhuat lâwngah a thal chiang hle mai.



"Mipa nia i inngai a nih chuan tho la, min rawn hnek leh rawh."



A rawn thawh chuan a rawn hnek leh a, a hnek rual deuhthaw chuan Kenny-a chuan a hnârah a hnek ve nghal chawrh a, thisen a baw nghal chuaih mai.



Ka hlauh ém avàngin ka țê tuar tuar a, ka lu a hai a, ka mit a thim ta riai riai a, a thim ta vek mai.



Hla deuh taka ka hminga min ko mawlh mawlhtu an awm avàngin chawn ka tum a, ka aw a chhuak thei miah lo. Min ko mawlh mawlhtu chuan eng atân nge min ko niang le?



Ka muhìl chu ka harh hlawl a, ka han meng ser ser a, a va êng tak! Ka mit chu ka chhîng leh rih a, ceiling vâr vo mai chu ka va hmu ngai lo em ém! Kan in ceiling kha chu a vàr loh kha, khawiah nge ka mut le?



Ka lu chu ka chêt  deuh a, khum chu ka tichê a ni maithei, mipa sam bawrchhawr zet ka hmu.  Ka bulah mi dang mu ve an awm a lo nih hi.



Mipa sam bawrchhawr zet chu a rawn hnai zêl a, ka hmuh fiah theihna tùrin ka khap sak sak a, ka mit chu men a va hrehawm tak!



"I harh tawh maw? I tui a hãl em?"



Kenny-a aw niin ka hre sia, a hmel hi a ni bawk si lo. A hmai duk chur, a hmui vûng kawl luah leh mitko vûng phui lûk ka hmuh chuan he pa hi insualnaah a tel tih ka hre nghal mai.



"Tu nge i nih?" Ka ţawng zawnga ka hmui chêt har zet avàng chuan ka ner sak mai.



A hmui kawh luah chu hup deuhin," Tui chu i in duh em?" a ti leh a.



"Aw, tlêmin."



Ka kaah chuan straw a rawn vuah lût phawt a, bottle-a tui, a chanve vél awm chu herh hawngin min rawn hnaih a.



"Engati nge hetia ka awm? In pângngaiin ka in thei lo em ni?"



"Ka tih ang hian in mai rawh."



Bottle chhûngah straw chu dah lûtin," Hîp rawh le," a ti nghut a.



A va intithu tak! Tu nge maw a nih le? Doctor chu a ni si lo.



Tui ka in hnu chuan bottle chu a la sawn a, ka bân pahnih chu ka'n chêt vêl chhin a, chêt a har miah lo.



"Ka awmna hi khawilai nge?"



"Damdawi in."



"Engati nge ka awm?"



"A țûl."



"Tu nge i nih?"



"Min hriat loh leh a țha a nih chu!"



A va ngeiawm ve a! Tu pawh ni se, mi ngeiawm tak chu a nih dâwn hi.



"Haw ka va duh tak!"



"I haw thei țêp ang."



Room-ah chuan mi an lo lût. Ka maimichhîng vang vang a, ka men leh chuan Sasangi ka hmu! Mi dang hi chu ka hre miah lo.



"Sasang...?"



Ani chu a rawn nui hak a, a mittui erawh a tling pam mai.



"I lo harh tawh a, ka va lâwm tak! Min tihthlaphànzia i hria em?"



Ka tithlaphãng maw?! Engti kawngin maw? Ka va hre thiam lo. Ka thi țêp tihna em ni?



"Ka damlo em ni? Nge ka thi țêp? Na ka neih àwm ka hre si lo. Kenny-a aw ka hria a, amah ka hmu si lo."



Sasangi chuan a bula țhu chu a melh ralh a, tu nge maw ni le? A bialpa a ni maithei, um, a ni chiang.



"I bialpa a ni maw?" ka ti sar sar a.



"Sangzela a nih hi, i hre nange?!!"



"I bialpa maw? Min hrilh lo thei hle mai."



Ka lu a na ngut ngut mai, a rawn hai chuai chuai bawk.



"Sasang, ka lu a hai, ka'n mu lawk ang e."





*HMANGAIHNA HLUTZIA LEH ROPUIZIA HRE CHIANG TÙRIN, HMANGAIHNA AVÀNGA KAN KEH SAWM A NGAI ȚHÌN*



☆GOLD DIGGER☆ - 27 By Dingdi Pachuau




Ka harh leh meuh chuan ka taksa a lo na ngang mai, ka mut ngaiin ka lo mu rei lutuk tawh a ni maithei, ka bân phei chu ka chêt țha thei lo.



Ka ril a țâm tak zet. Nizànah chaw ka ei lo em ni le? Tûnlai tak chu chaw nghei ka hrât lo viau asin le.



Ka tho dâwn a, hei chu ka room a ni lo tawp mai. Khawnge ka awm le? Ka hawi kual a, ka bo tulh tulh mai.



E, nimin lamah Kenny-a ang deuh khân ka awmna ka zawh khân damdawi inah tiin min chhàn kha maw le. Ka awm chhan erawh min hrilh hauh lo.



Ka tho chhuak a, nâ engmah ka nei lo, tlêmin ka lu a hai deuh, hei chu ka mut vàng a nih chiah hi.



Kawngkaah Sasangi a rawn lût a, min hmuh veleh chuan a meng phar ãwk a.



"I lo tho tawh a ni maw? Nâ i nei lo em ni?" tiin min zâwt nghal a.



"Nei lo, engati nge ka neih ringawt ang? Sasang, eng nge thleng a?"



Min nuih a, chutih lai chuan Kenny-a a lo lût ve bawk a, a hmai duk deuh char leh vûng deuh chu ka hmuh chuan," Nangpa hi, mi nèn in insual a ni lo maw? I va duk cher chur ve!" tiin ka lo nuih a.



"Mipa nih manah vawi khat insual ve chu a àwm ve reng alawm!"



"I inhmeh lo a nia! E, chuan, nimina room-a awm ve reng kha i ni em?  I aw hriat loh chuan nangmah i ni tih hriat i har tawp a, i ni lo emaw ka ti hial a," ka ti a.



"Min hre lo der emaw ka ti!"



Sasangi chuan nui har har pah hian," Insual a thiam viau lo a nih dâwn hi, a duk nasa ém mai," a lo ti ve a, khuma țhut pahin," Eng vàngin nge in insual a? Tu nèn nge?" ka lo ti a.



"I hriat reng kha!"



"Ka hria maw? Teuh lo, mi nèn in insual ka la hmuh ngai loh bâkah insual tùrin ka la ngaihtuah chhin miah lo che," ka lo ti a.



Ka ti tak tak. Engtiziaa insual nge a nih le? An insual nasa viau a ni ngei mai, a hmel ațang hian.



"Na i nei tawh lo tak tak maw?"



"Nei lo, ka damlo em ni? Hei, ka dam var alawm. Chhuah ka duh."



"Aw le, doctor kan sawipui dâwn nia."



Putea leh pitei pawh an rawn kal, nâ engmah ka nei si lo va, damdawi ina ka awm reng hi a țûl miah lo.



*******



Damdawi ina ka awm chhan kha ka hre chhuak thei miah lo. Ka ngaihtuah ngut ngut chuan ka lu a rawn na țhìn a, Kenny-a ka zawh lahin ngaihtuah lo tùrin min ti ziah.



Nubawihi tlawhin min zinpui a, damdawi in lian zetah min kalpui bawk. Ka dam țha hle sia, ka hnial lahin 'Damdawi in țha awmnaah kan kal khàt êm hi, in-check-tîr a țha alawm' a ti tlat a, min ngaihtuah theih ém avàngin ka hnial duh bîk lo; mahse, dam țha ta na na na chu, kan haw leh thuai mai.



Ka hna ka duh aiin ka kalsan rei ta deuh tlat, kan zin vàng vek. Ni dangah min zinpui ngai si lo va, mak ka ti ve deuh lek lek. Kenny-a ka zawh lahin ' Ka la zinpui dâwn chauh che' a la ti zui. Nuam ti viau mah ila, ka hna kalsan rei hi ka duh lo asin.



Bank-a kan GM Sangzela lah hian min ngaihzàwn hmel thei lutuk a, ka ngei deuh ringawt. Min ngaihtuah ém ém ve tho, a hnuaia thawk ka nih vàng a niang,  Sasangi bialpa a ni emaw ka ti kha a ni a; mahse, an lo ni miah lo.



Kenny-a chuan min rawn tlawh âwl lo va, min ngaihven ém ém reng hi a nuam ka ti. Heti khawp hian min lo ngaihtuah tih ka lo hre ngai miah lo, țhian țha tak chu a lo ni. Sasangi, Nubawihi leh ka puteate lahin min rawn phone âwl lo bawk a, min ngaihtuah  hlawm sia, nuam ka ti hle.



"En teh, Kenny, kan GM hi maw min duh hmel thei hi ka tia, chhia ka ti hran lo nain min en dàn hi a châng chuan ka ngei lek lek țhìn. Ka sual tiraw?" tiin news a thlìr lai chuan ka hrilh malh malh a.



"Sual lo."



"Ni lo, ka sawi dàn i hre thiam lo a nih kha. Mi va ngei ringawt chu a sualthlâk e, min ngei ve mang si lo va," ka ti leh a.



"Hmeichhia chuan mi hi in ngei ringawt țhìn alawm, in zia hi a ni ve pakhat a."



Kenny-a thu lâk dàn hi a hahdamthlâk ka ti tawp. Nia, kei pawhin mi ka va ngei hi țha ka ti pawh a ni chuang lo, ka ngei ve a ni deuh tawp mai, ka ngei lo thei bawk si lo.



"Min ngei ve loh chuan a nuam vak chuang lo," ka ti leh sap a.



"Chuti, ngei lo la."



"Min ngaihtuah hmel bawk sia, min en vung vung zêl a, ka duh lo alawm."



Mitko sàn zoh pah hian," Kei pawhin ka ngaihtuah țhìn che a, a rûkin min lo ngei ve țhìn viau a lo ni maw?" a ti nghut a.



"A, nangte chu a dang daih alawm, nuam ka tih mahnâklaia. E, taka, i bialnu Bawihbawihi nèn khân eng nge in chanchin ni ta zêl?" tiin ka zâwt ta khauh a.



TV a thlîr vang vang hnuah chuan," Kan ințhen tawh," a ti ta sup a, a sawi chu ka hre pha chang chang. Chu pawh, a chhànna ka ngaihchàn kar vàngin ka hre thei chauh.



"Awi, a pawi e, a fel tehlul nèn! In inneih hial ka lo ring asin le!"



Pawi ka tihpui tak tak.



"Pawi lo, nang ka ngaihven theih phah che a."



Ka nui sak a," Ka lâwm e; mahse, bialnu țha tak i neih ka duhsak tehlul che nèn! Pawi ka ti tho," ka ti leh malh malh a.



"A ho  ém mai, sawi tawh lo ang.  I story kha ziak leh tawh la?"



"A mood-ah ka chêng rih lo."



*******



Chhùn lamah hna ka thawk a, ka rilru ka hman nasat deuh chuan ka chau haw viau țhìn a, zànah ka buai ziah. Ka mu țha thei lo, mangchhiain min tihbuai loh leh ka lu a na ngut ngut a, ka mu țha ngai lo.



Sangzela chuan ni tin min be ziah a, ka țhat leh țhat lohte, ka lu a nat leh nat loh te min zâwt țhìn. Hna pawh a tlêm thei ang bera thawk tùrin min ti țhìn a; mahse, ka duh bîk lo, ka hna a nia, țha taka thawh ka duh.



Ka hnung lam ațanga min en leh vang vang țhìn ka hmuh hian a rûk deuh hian ka hlau deuh țhìn. A fel ém ém a, hlau tùr chu ka ni lo alawm; mahse, rilru hrehawm hmel deuh taka min be țhìn leh a hmel, a rûk taka hlim lo tihlan hreh si, hlim hmel pu lui hrâm hrâm hmel ka hmuh châng chuan eng emaw tak a chungah thleng a awm a nih ka ring țhìn.



Zan khat chu chhùn lama tih tùr ka ngah deuh vàng leh , bank rawn dàwrtu an tam angreng bawk avàngin ka chau viau mai a, ka lo period chau bawk nèn, chaw pawh ka ei peih chiah lo va, tlaia ka mu chu mut tlang nghal mai ka tum a.



Mumang hrehawm zet ka lo nei a, ina in tifela ka awm laiin Nunsanga hi rui zet hian a lo lût a, a ruih dàn lah chu țhing deuh chi, țawng vak vak ang chi hi a lo ni lehnghal a.



"Hmangaihzual, rawn haw nghal rawh, chuti lo chu kan ințhen chhan kha mi zawng zawng hriatah ka sawi ang," a lo ti vak vak a.



"Au vak vak suh, zu i rui a ni maw? I va țhing ve!" ka lo ti thung a.



"I rawn haw duh loh pawhin ka hnûk haw tho ang che," tih leh ka bâna min rawn pawh a rual a.



"Min thlah rawh!" tiin ka tâl chiam a.



"A thu kha awih la, rawn haw rawh. Mi min sawi dàn a zahthlâk lutuk, i rawn haw loh chuan khàmah ka namthla ang che." Nunsanga nu lo luh lai chu ka hre miah lo.



Min chelh bet tlat a, ka lo tâl vak vak a, ka bula khàm sâng zet chu ka lo hmu ve tho bawk sia, ka hlau bawk si chu ka lo khùr zawih zawih a.



"Ben harh phawt i ngai a nih kha!" tih leh ka hmaia ben chu a rual a, ka phu zawk a, ka harh ta nghal a.



Ka thaw chhuak hlawp hlawp, ka mumang mah ni se, ka thlan a lo tla nasa lutuk! Ka mut dàn pawh a lo sàwi nasa niin. Ka meng kâwk kâwk phawt a, ka thaw vak vak bawk.



Ka awm dàn a pângngai hnuah ka phone chu tiêngin dâr zât ka en, dâr 11:15 chauh a la ni, khua a va la vâr har dâwn ve!



Ka muthilh duh tawh rih loh avàngin peih lo zetin ka tho a, ka thawh chhuah veleh chuan ka  pum a rawn ri ta  ruk ruk mai, chaw ka ei lo tak alawm.



Ei tùr dapa ka inthun puar hnu chuan puar peng pawng chuan ka room chu ka pan leh ta a; mahse, ka muhìl ngam rih lo. Phone khawihin message ka check, ka online ve leh hnuhnawh a nih ber chu.



Ka phone ve lah hi, a chhe ve tawh bawk si a, battery lah hi a low zung zung tawh.



*Va online tlai ve?*



Kenny-a a ni.



*Mang chhiain min tibuai a, ka muhìl peih tawh rih lo va,* tiin ka reply a.



*Vawiin lam i thawk nasa deuh a ni maw?*



Engtin nge a hriat theih le?! Lungleiah a awm leh tawh lo te hi a ni mai lo maw? Min lo hmu ru reng a niang ka ti.



* Aw, min rawn dàwr an tam ve ém a.*



*A nih chu, thawk nasa lutuk mah ta che. *



*GM pawhin a hahthlâk deuh chu thawk lo tùrin min ti ziah a; mahse, ka duh bîk lo, kan dam țhat chuan thawk tùr kan ni miau a.*



*I mumangah chuan eng nge i hmuh a?*



Kan thil sawi chu a dang leh ta daih mai.



*Nunsanga leh a nu*



A chek leh hluk leh ang chu.



"I mumangah chuan min hmuh lo tum tawh rawh, mang țha i mang a ni mai.*



Mut hmunah ka nui kar kar.



*******



Chawlh laiin Aizawlah Sasangi tlawhin ka zin phei zawk a, mahni chauha ina awm chu ka ning deuh, chhuah harh pah a ni mai.



A chhûngte chuan min lo làwm thiam khawp mai, rei ka awm theih dâwn loh vàng erawh chuan pawi an tih thu an sawi sap sap a.



A u Mama chuan nupui neiin fa pawh an lo nei tawh a. A nupui chu a țawng duh reuh barh barh viau, fel pawh a fel.



Chaw kan ei laiin," Engtin nge i pasal hlui kha an tih tâk? A tâng ta nge in ngaidam zâwk?" tiin min zâwt a.



Makti zet hian ka en a, ka hre thiam lo lutuk!



Sasangi chuan rang zet hian a lo khap vat a, thil dang a sawi chhunzawm daih bawk a. U Mama nupui inthiam lo hmel chu ka khawngaih reuh, a thil min zawh lah kha ka bangbo tawp, a ngaihna ka hre dêr lo.



Mutnaah Sasangi hnênah chuan chaw ei lai chungchâng chu ka zâwt leh a, ani chuan," Engmah a ni lo, thil a hre sual a nih kha. Kan thawhpui pakhat, i hming ang tho pu ve chunga thil thleng nèn a hriat pawlh a nih kha," a lo ti thuai a, thil dang a sawi chhunzawm leh daih a.



Mahse, ka ngaihtuah deuh chet chet tho. Eng emaw dik lo awm tlatin ka hria! Ka hre chiang chiah thei bawk si lo.



Kenny-a'n min thlah haw leh a, ani hi chu ka tân chuan vàntirhkoh ang mai a ni, kawng engkimah a țha hi a ni tawp. Nubawihi lahin a rawn fak nasa thei tawp bawk a, hetiang mi țha chu engtin nge a bialnu khân a țhen theih zâwk le?



"Kenny, ka ngaihtuahna hi a tâwi turhin ka hria. Eng emaw thil thleng hi a awm mial em? Nunsanga chungah emaw keima chungah emaw?" tiin ka zâwt ta khawl a.



"Awm ve bawk ang chu!"



"Eng nge thleng?" ka lo ti vat a.



"E, in ințhen a, in innei leh tawh lo maw le!" a lo ti awlsam êt a.



"Chûngte chu ka hre ve bawk."



Motor ka chuang thui bawk a, ka taksa a chau khawp mai. Kenny-a'n rawng a bâwl vek a, kei chu ka intleuh te te a, chumi hnuah ka pui ve chauh.



Mang chhia bawkin min tibuai leh ta. Tûn țum chu Nunsanga'n min thah a lo tum a, ka lo tlânchhe nasa lutuk a, ka hah lutuk tawh avàngin ka tlân thei tawh lo chu min rawn nangchîng a, min rawn rêk nawk mai.



Ka au dâwn a, ka aw a chhuak thei si lo. Ka hah lutuk leh hlau bawk si chu ka thaw bawrh bawrh a, ka ke ka leng vak vak bawk.



"Kenny...Kenny...Ken..nn..nyyy..?"



Ka thi țêp tihah chuan Kenny-a hmel a rawn lang ta! Ka lâwm lutuk a, ka mittui a tla hial. Nunsanga chu a rawn hnek a, min rawn pawm, nghet zetin ka kuah lêt.



"I țha a nia, eng thil mah a thleng lo, Bàbî."



Ka thaw hawk hawk phawt a, ka thinphu rang lutuk leh ka awm dàn dik lo lutuk a reh deuh hnu chuan," Kenny, ka hlau ém mai, min kalsan suh aw," ka ti ta sap a, ka aw chu a thâm chhàl mai.



"Aw le, thlamuang deuhin awm rawh, ka kalsan dâwn lo che, ka kalsan ngai lo ang che."



A taksa lum ham ham nghèng chuan hahdam leh thlamuang takin ka mu siai siai a, Kenny-a'n min chhan tawh chuan Nunsanga pawh kha lo kal leh mah se, ka hlau tawh lo ang.



Zîng hma taka ka țhangharh chuan khua a lo la vâr chiangkuang lo va, ka meng uau nain ka mit ka chhîng leh vat. A la hma lutuk, thawh a la hun lo.



Ka bân kham lutuk erawh ka tihchêt a ngai. Ka tiche tùr chu taksa dang, lum ham ham nghèng rialin ka lo mu a ni tih ka hre chiah! Tu nge ni ang? Eng vànga ka bula lo mu nge a nih? Nunsanga em ni?! Ni lo, a ni thei lo!



Tàl sawn ka tum lai tak chuan," Mu mai mai teh, ka mut a la chhuak a nia," nghet zeta min rawn kuah pah chuan mut chhuak aw zet hian a rawn ti thâm țuak a.



Kenny-a. Kenny-a maw?! Engati nge ka khumah kan mut dun le?



"Engati nge-"



"Ka la mu duh, thawh hunah le," tiin a hmai chu ka nghâwng, ka sam kârah rawn nawrin a phûm ta daih a, a hnar, hmuiin ka taksa a rawn nawr chuan  ka lo mûr chiai chiai mai!



Eng thil nge thleng chiah le?



Zînga ka harh ve meuh chuan ka bulah a lo awm leh tawh lo, dâr zât ka en vat a, dâr 7 a ni.



E he! Ka thawh vat a ngai, a tlai tawh lutuk.


Nizànah ka bulah a mu chiang a, engtin nge a lo mut ve ngawt le? Kawngka kha ka kalh ngei bawk sia...



Ka thawh chhuah chuan nimin lama kan lei pârbâwr kha a lo chan mêk a, min lo hmuh veleh chuan," Morning, i rawn tho hma hle mai," a lo ti sup a.



"Dâr 7 a rîk tawh hi, a hma tawh lo. Engtin nge nizànah ka room-ah i rawn luh theih?" tiin ka zâwt nghal a.



Min en vang vang phawt a, min chhâng dâwn ta lo emaw ka tih hnuah chuan," Va inphih fai phawt teh," a ti daih a.



"I va sual tak! Min chhâng mai la?"



"Kha, i chilthli luanna te kha tifai phawt rawh."



Ka hmui ka hup vat. A nui suk ka hmuh chuan min fiam tih ka hria, a va ngeiawm tak!



"Chilthli ka nei lo bawk," tih leh bathroom-a luh ka rual nghal a, a nui hawk ri chu ka hre thei.



Chaw kan ei lai chuan," Engtin maw i lo luh?" ka ti leh a, ani chuan," Bangah ka lâwn liam," a ti ta mai!



Phâwk zetin ka en a, ani lah chuan a dàr sàn ãk pah chuan," Chu lo kawng dang ka hre lo alawm, i room kalhna tihchhiat aiin a awlsam zâwk a, hun a duh rei lo zâwk bawk," a ti leh a.



"Engati nge i lo luh?"



"Min ko a nih kha."



E, mang țha lo ka mang leh tak. Kenny-a ka ko vak a nih kha.



"Vawiinah i haw dâwn em?"



"Dâwn lo."



Ka hlim rilru sawt. Zànah mang țha lo kha ka mang leh thut thei sia, ani a awm chuan ka thla a muang siai siai a nih kha.





*HARSATNA I TÂWK A NIH PAWHIN INHNEHTÎR NGAI SUH*



☆GOLD DIGGER☆ - 28 By Dingdi Pachuau




A ni tèlin Kenny-a bula awm chu ka thlahlel telh telh. A chhan chu zànah mang chhe pui pui ka man chàngin min kuahin min sâwi harh a, min thlamuan țhìn, chu chu ka thlahlel ngawih ngawih. Chuan, ka him bîk riauin ka hre bawk.



A bulah pawh ka sawi chhuak a, a nui suk ringawt. Nia, a nuih a za viau ang chu, ani tân chuan ka mang chhe pui pui kha engmah ni ve tlat hek lo le.



Krismas leh kum thar ka hman chhoh dàn pawh ka hre mumal lo, ka ho tlat. Eng emaw kim lo leh dik lohna neih tlatin ka inhria a; mahse, chu chu ka hre chhuak thei si lo. Hre chhuak lo mah ila, eng emaw tak kim lo chu a awm a ni.



Tlai khat chu Sangzela'n min zui haw a, ka duh vak lo nain hnial țùng  mawiin ka hre si lo. Nuam lo ti angreng tak chuan inah chuan ka luhpui a.



Thingpui ka siamsak ka va pêk chuan, "Zualte, i story ziah kha i ziak zo tawh em?" tiin min lo zâwt a.



Ka story ziah kha a hre ve maw?! Kenny-a khân a hria a, mi dang ka hrilh àwm ka va hre lo ve le!



"Zo lo deuh, engtin nge i hriat ve a?" tiin ka zâwt há a.



"Engmah i hre chhuak thei tawh lo tak tak a ni tiraw? Keimah ngei pawh hi?"



"Kan inhre țhìn em ni?"



Min en vang vang hnuah thingpui chu a dût hlak a," A pawi lo, nakinah i la hre vek mai ang, ka lo hmanhmawh mah mah a ni," a ti sup a.



Eng nge thil thleng a awm em ni? Kan inhre țhìn maw? Kan inkàwm thìn tihna maw? Engati nge ka hriat miah si loh? Ka chungah hian thil thleng a awm tihna em ni? A ni chiang.



"Ka chungah thil țha lo thleng a awm em?" tiin ka zâwt hrãm a.



"Thleng lo ve, ka ti mai mai. Ngaihtuah miah suh."



A haw hnu ațang chuan ka ngaihtuahna a buai țan. Thil thleng chu a awm a ni, keimahah hian dik lo a awm a niang, mi dang chuan min hria a, an dik tihna. Keima lamah hian dik lo chu a awm a nih hi. Eng nge ni ang? Ka hriatna hi ka hloh tihna em ni? Ni lo, ni lul lo, a râpthlâk dâwn lutuk.



Kenny-a ka phone a.



"Eng thil nge ka chungah hian thleng?" ka ti tâwng a.



"Eng nge thil awmzia? Engtin nge i awm? Thil țha lo thleng a awm em ni?" a rawn ti dût a.



"Thil thleng a awm tiraw? Kei hian ka hriatna ka hloh em ni? Eng vàngin nge ka hriatna chu ka hloh? Mahse, ka hre vek bawk si che u a?"



"Thil thleng chu a awm alawm."



Ka hre châk zek zek.



"Phone-ah ni lovin ka lo kal hunah, hmaichhanah ngei ka hrilh vek ang che."



"Aw le, engtikah nge i lo kal ang?"



"Kârleh Nilainiah."



"A va la rei ve!" Ka thaw hap a.



A nui huk a," Min ngai tawh viau mah la, i lo tawrh țàng țáng a ngai ang," a ti hul hak .



"Ka ngai teuh lo che!" uar zet hian ka ti tàn tán a.



Ka ngai tho a, a thil min hrilh tùr ka hre châk zaw mah; mahse, ka han ngaihtuah chiang a, ka hriat châk ém ém rualin thil țha lo tak vàng a ni àwm sia, hriat ka huphurh leh tho bawk.



"Kei chuan ka ngai leh hle tawh che asin."



Aha, a va zak lo tak! Mahse, ka hlim rilru viau thung. Ka awm dàn hi, Kenny-a hi ka duh rilru tihna em ni? Țhian kan nih hi.



"Țhian kan nih hi."



"Ni lo tih ka sawi em ni? Ka ngaih thu che ka sawi mai alawm."



A tidik chiah. Țhian chu kan inngai țhìn alawm.



"Mahse, i bula awm ka thlâkhlelh dàn hi chu țhian bula awm thlâkhlelh ang a ni miah lo."



Ka sen awp awpin ka ring. He pa hi, min duh tihna a ni thei ang em? Min duh ang maw? Ka rilru a hlim deuh veng veng mai.



"Lo zin thuai mai teh," ka ti ta ringawt.



Kenny-a rawn zin hma Thawhlehniah Aizawlah kan phei ta daih. Lalàni leh Sangzela nèn kan nia, hna vànga kal kan ni. Kenny-a pawh ka hrilh tho a, ka haw hunah a lo zin mai dâwn a nih chu.



Thlenna tùr nei sa vek kan ni a, kei chuan Sasangite in ka pan leh nghal vang vang. Ka phone lâwk avàngin ka thleng dâwn tih a lo hre sa a, ka mutna tùr pawh a lo ruahman sa vek ngei ang.



A ute nupa an lo zin bo lai a nih vangin an lo tlêm ve deuh a, ka va thleng chu kan bengchheng chùl mai. A nu leh pate hi nu leh pa anga ka neihte an ni ve tho va, min lo ngai der ve a, a nuam ka ti țhìn.



Kan mut hmunah chuan Kenny-a thil ka zawh bawk chu ka zâwt leh a.



A ngawi vang vang phawt a, chutah, muangchâng hian," I hriatna tlêm i hloh hlek a," a ti ban charh a.



Ka rin dàn sa deuh reuh a nih vàngin min țhâwng lutuk lo; mahse, nuam lo ka ti tho.



"Mahse, ka hre vek tho che u sia?"



Ka lam hawia rawn inherin," Tûn hnai deuh hleka thil thleng i hre chhuak thei rih lo a ni; mahse, lungngai miah suh, i hre leh vek mai ang," tiin min hnèm sep sep a.



A ni maw? Thil pawi a thleng ang em? Ka țhiante ka theihnghilh lo va, ka lâwm tho. Chuan, eng vànga hriatna hloh nge ka nih ang le?



"Engtin nge hriatna chu ka hloh le?"



"Khalam kha chu a pawimawh ber lo, i hriatna hloh țhen chu i nei lêt thuai ang ka tih tawh kha."



"Nia; mahse, a râpawm e."



"Eng vàng chuan maw? I nei lêt thuai dâwn ka tih kha. Nang phei chu hei i dam țhain i hrisèl a, min hre vek bawk si," a ti leh sap sap a.



Nia, ka vànnei. Hriatna 'tlêm' ka hloh  a ni ringawt a, ka dam țha a, ka hrisêl bawk. Ka hriatna 'tlêm' hloh pawh chu ka neih lêt leh ngei ka beisei, ka beisei tak zet.



"Thil pawi thleng a awm em?"



"Awm-"



"Ka tih awmzia chu accident ka tawh vàng a nih ngei ka ring a, mi dang chungah thihnate a thleng em ka tihna a nia."



"Thleng lo, ngaihtuah lo teh, a sâwt lo a nia," a lo ti thung.



Nia, ngaihtuah chuan ka lu a na ngut ngut ziah.



Ni hnih kan awm, a tûkah kan haw dâwn.



Tlaiah Sasangi nèn kan chhuak a, hun thâwl kan nei thei chu kan hlim khawp a, inah pawh kan awm peih lo va, kan chhuak rĕng.



Hlim takin kan nui dùn bãwk bãwk a, ka hriatna ka hloh tih pawh ka ngaihtuah chhuak lo rêng rêng nia.



Sasangite in kan thleng țêp tawh tihah chuan an in bul building lian zet ațang chuan Nunsanga nu leh a fanu Nunpuii chu an rawn chhuak a, makti zet hian ka en há a, ka hmuh sual emaw ka ti hial!



Min tâwk zâwnga rawn kal an nih vàngin kan inhmu lo thei lo. A nuin rawn hmuh chuan rum zet hian min rawn en a.



"Ka fapa kha jail ațangin la chhuak ang che, engkim hi i tihdik loh vek a ni," a rawn ti nghal tuarh a.



Jail maw?! Eng jail nge a sawi hi? Nunsanga jail-ah a awm em ni?!



Sasangi chuan," Ka pi, i- " a țawng lai mêk chuan Nunsanga nu vêk chuan," Lo sawi ve suh, kan inkâr thu a nih hi," tiin a lo dang chat hmiah a, chutah min rawn melh lehin," Ka fapa chu min pe lêt leh rawh, engti kawng zawng pawhin min pe lêt tùr a ni," a ti leh a.



Ka va hre thiam lo tak ém!



"Ka nu, ka hre thiam-"



"Min 'nu' duh suh, i nu ka ni lo. Engtiklai mahin i nu ka ni ngai lo, ka ni bawk hek lo ang. Ka fapa hi min pe lêt ngei ang che," a ti leh tuarh a.



Kan bula mi lo kal vete chuan min en hrek hrek a, zahthlâk ka ti kher mai. Kalsan dâwnin hei aia nasa zâwk hian a țê ang tih ka hlau bawk si, ka inthlahrung kher mai.



"Nunsanga nèn chuan kan ințhen daih tawh a, eng thil tehlul nge a chungah ka tih a? Jail-ah ka khung em ni?" tiin a ngaihna hre lo zet hian ka zâwt a.



Nunpuii chuan," Hre lo der vêl suh," ngeiawm zet hian a lo ti a, a hmui ner kual vêl dan ațang chuan min ei lo tak zet tih a hriat mai.



"Eng thil nge thleng ka hre lo tak tak a ni, engtin nge Nunsanga chu Jail-ah a awm theih?" tiin ka zâwt leh a.



"Nangmah vàngin a lût a ni, i dah luh a ni lo'm ni?"



Ka va awih lo tak! Engtin nge kei hian ka dah luh theih ang?



Ni leh lo, ka hriatna 'tlém' ka hloh tak kha, thil thleng a awm a ni chiang.



"Eng vàngin nge Jail-ah chuan a awm a?"



A nu lah chuan," Hmangaihzual, i va chaltlai reuh ve maw le!  Nangmah vàngin Kenny-a nèn an insual phah a,  nang lahin dâwta hêkin Jail-ah i thawn bawk, i hre lo der tlat hi a mak ka ti, i lo mak hle a ni," a ti leh bawth bawrh a.



Ka hre lo tak tak, eng vàngin nge Kenny-a nèn chuan an insual le? Dâwta hêkin Jail-ah ka thawn bawk, ka thu hriat hian min țhâwng hle a ni.



Sasangi'n,"A pawi ka ti khawp mai, ka pi. Zualtei hian eng thil-" a tih lai mêk chuan," Lo inrawlh suh ka tih che kha, kan inkâr a nih hi," a lo ti leh hmiah a.



"Ni e, lo ti tawh suh," ka lo ti ve vat. A chhan chu engkim hriat ka duh, thil thleng ka hriat loh zawng zawng hriat ka duh.



"Kenny-ate inneih dâwn zànah ka fapa chu toilet-ah i lo thlêm leh a, chu chu Kenny-a'n a lo hmu che u a, nang lah chuan ka fapain khawih tum angah che i lo chhuah daih a, chu vànga Jail-a tâng  a ni."



Ka rilru a buai ta nuai nuai mai. Hei hi thil thleng tak tak a ni thei ang em? Engmah ka bulah an sawi duh si lo va, ka lo ti tak tak em ni? Lo ti ni ta ila, ka hriatna hi eng vàng ber chuan nge ka hloh tâk si?



"Chu chu ka hriatna hloh nèn hian inkungkaihna a nei em?"



"I tider a nih kha, i hre vek," Nunpuii chuan a lo ti leh a.



Mi lo kal zeuh zeuh an awm vàng chuan ka zak tak zet tawh; mahse, thil chu hriat chian ka duh bawk si.



Nunsanga nu lam chu panin a bâna chelhin," Ka nu, a pawi ka ti, engmah ka hre chhuak thei-" ka tih lai mêk chuan," Dawthei lutuk mah ta che!" tih leh min phih sawk chu a rual nghal a, ka lo inring lo lutuk bawk si a, ka tlu nghal țhuai, kawngpui chârah ka lu ka zu tauh dawt mai.



Sasangi a țê tuarh a, min rawn buaipui nghal. Kei erawh chu ka rilru a na bawk nèn, ka zak bawk si a, ka tha a khùr zawih zawih, ka mittui erawh a tla hauh lo.



"Ka fapa min pêk lêt hma chu hrehawm i tuar ve khawp ang, ka fapa tuar lêt i tuar ang," a la ti bawrh bawrh.



"Hei, i bek hi a thi a nia, min pui teh u, ka țhiannu hian hliam a tuar a nia," tikn Sasangi chu a au chùl a.



Ka mit selh selhin ka hria, ka meng fiah dâwn a, ka thei ta hauh lo mai. Ka bân chu ka phar a, Sasangi kut ni ngei tùr hian min lo vuan a.



"Zualte, Zualte, i harh em? I harh țha em? Meng teh, mawh, han meng  teh. Min pui r'u"



Țawng ri chu hla takah ka hre vawn vawn a, a thangkhâwk niai niaiin ka hria, ka thil hriat hnuhnun ber chu Sasangi'n ka hminga min ko lawm lawm chu a ni, chhâng tùrin ka intiharh thei tawh lo. 'Ka țha' tih hrilh tùr tal pawhin ka zawi vek, tha reng ka nei ta lo.



Ka harh chuan khumah ka lo mu leh tawh, khawi laiah nge ka lo mut lehpek ni? Mut hi ka va duh thar ta ém ém!



Ka mit ka khap fak fak a, khua a èn avàngin chhùn tihna a ni ngei ang. Chhùnah ka mu ngai si lo va, a va mak ve.



Ka hawi kual a, ka room a ni lo chiang. Tu room nge? Ka hre ngai hauh lo mai.



"E, i lo harh tawh elo?"



Sasangi aw a ni.



"E, i lo zin elo?!"



Min nuih sakin," I lo zin zâwk alawm, i harh țha tawh maw?" tiin min zâwt leh a.



"Engati nge ka mut?"



"Thil thleng kha han ngaihtuah lêt tum teh le."



Ka maimichhîng vang vang a, ka ngaihtuahna ka sâwrbing ta a. Ka hriat hnuhnung ber chu Nunsanga nuin min phin sawk kha, chuan kawngpuiah ka tlu, ka lu ka tauh.



Nunsanga. Kenny-a. Kenny-a'n nupui a nei dâwn a, Sangzela nèn kan kal dùn, zanriah ei tùrin min rawn hruai. Toilet-a ka kal laiin Nunsanga a lo kal ve, engkim chu ka mitthlaah nimin ang maiin a tahtawlin a rawn inlâr ta zut zut mai.



Nunsanga min tih dàn zawng zawng chu ka ngaihtuah lêt leh chuan ka taksa chhûngril a rawn khùr a, ka inkhawngaih vàngin ka mittui a rawn hnâm țiam țiam tih ka hre miah lo.



"Na i nei em ni?"



Ka taksa natna ka hre lo, ka thinlung chhûngril hi chemtea vih sawk sawk ang maiin a nâ zâwk.




*I NUN HLUT ZÂWNG TEHNA KHA I KUM TAM LAMAH A NI LO, I THIL TIHAH A NI ZÂWK*



☆GOLD DIGGER☆ - 29 By Dingdi Pachuau



"I lu a na leh deuh em ni?"



Ka lu ka thing ta ringawt. Ka lu na lo miau hek, ka chunga thil thleng chu ka ngaihtuah lo thei lo.



Room-a Sangzela leh Doctor rawn inzui lût ka hmuh chuan mak ka ti kher mai. Aizawlah kan awm a, haw kha kan tum a ni si a, Nunsanga nu leh nau kan hmuh kha tlai lam niin a tûka Khawzawla haw tum mai kan ni tawh. Tunah Sangzela ka la hmu, engtia rei nge ka mut? Kan haw tum nî kha a ni em? Ka ngaihtuahna a buai mup mup leh tawh.



"I lo harh tawh maw?"



A aw chhuak fel dàn leh zaidam dàn chuh, Doctor ni àwm rêng a ni. A nui sâng bawk si a, damlo tân pawh dam sawng sawngna tham a tling hial ang chu.



"Aw, Doctor, engtia rei nge ka mut?"



Sangzela chuan nui sâng hian," Dârkâr  rei lo tê chauh," a lo ti vat a. Doctor chuan ka bp leh ka marphûte chu a'n check a, nui sâng hian," I țha vek e, nangmahah dik lo a awm lo tiraw?" tiin min zâwt a.



"Aw, ka țha e. Engtikah nge ka chhuah theih ang?" tiin ka zâwt nghal. Ka chhuah vat vat a ngai, thil tam tak hriat chhuah vat vat tùr ka nei tlat, a pawimawh lutuk.



"I chhuak thuai ang, i țha tawh reng a, i awm reng miah lo ang."



Kawngkhàr a rawn ri a, Kenny-a pawr zetin a rawn pên lût nawlh mai.



Kan lo en țhap nain keimah chauh chu min rawn en nghal ngur a, ka mutna kiangah chuan rawn kal hnaiin," Engtin nge i awm? I țha em?" a rawn ti dût a.



He pa hi, nupui nei tùr kha a ni a, a nei ta em? Inneih dâwn zàna thil thleng khân buaina a thlen em? A hmaa Bawihbawihi chanchin ka zawh khân engtin nge min chhàn kha?



"I țha em?" a rawn ti nawn leh sup a. Ka harh chhuak chiah, ka lo chhâng miah lo niin, a ngaihțhat lohthlâk ngawt ang.



"Ka țha, engtin mah ka awm lo."



"Mahse, hei i lu hi?"



"A na lo."



Ka lu chu ka tauhna kha a thî ve miau a, an tuam lo thei lo sia, a nat hmal ngawt ang.



"Doctor, a țha chiang chiah em? A lu a tauhnate hian pawi a khawih em? A dam thuai ang tiraw?" tiin doctor chu a zâwt a, a thil zawh dàn chu naupang chhia ka lo ti khawp mai a; nuih chi erawh a ni hauh lo, min ngaihtuah avànga zâwt a ni ve bawk si a.



"A țha e, engmah a khawih pawi lo ang, nakinah kan check chiang ang a, a chhuak thei thuai ang."



Sasangi leh Kenny-a chuan doctor chhuak chu an zui ve nghal a, Sangzela erawh a la awm thung.



"I lu chu a na lo tak tak maw?"



"Aw, na lo."



Dik tak chuan ka hriatna tlêm hloh kha, ka nei lêt leh ta tih an hre miah lo. Sangzela bula awm hi ka inthlahrung rilru ta riau mai, ka bialpa a lo ni reng sia, ka lo hre miah si lo. Chubâkah, ka lo ngei rilru deuh a nih nghe nghe kha, nuam lo ka ti rilru ngawih ngawih.



"Keimah vàngin in haw thei ta si lo va, a pawi ka ti hle mai," ka ti sap a.



"Inthiam lo mah ta che, i thiam loh a ni miah lo a nia. I chhuah theih veleh kan haw mai dâwn alawm," dam zet hian a lo ti a.



"Khawnge Lalani hi?"



"I rawn harh hma deuh chiah khân a chhuak ta a nih kha, nizànah a awmpui ve reng che a."



A ni maw? Zànah keimah vàngin an tlaivâr tihna maw? A va inthlahrunthlâk tak.



"A va zia lo țhìn ve aw! In hah hle dâwn chu, ka lâwm hle mai."



"Hah lo ve, zan khat mai mai men te zawng, engmah a ni hlei nem."



Tunah hian dâr 9 a ri tawh a, chhùn emaw ka tih kha zîng lam chauh a lo la ni zâwk.



"Doctor-in uluk taka a check hnuah che chuan kan haw thei mai ang, a chhan chu i țhat var ka ring tlat a ni," a ti leh seuh seuh a.



"Nia, kei pawhin ka ring."




Sasangi leh Kenny-a chu an rawn inzui lût leh thuai a, polythene dum hian eng emaw ni an rawn khai lût pah bawk a.



Sasangi chuan," In ril a țâm tawh em? Hei, ei tùr tui deuh kan rawn lei a nia, ei țeuh ang u," a ti lar lar a.



Kei pawh ka tho a, ka mut rei deuh vàngin ka lu chu a hai deuh lek lekin ka hria.



*******



Doctor-in uluk zeta min en chuan dik lohna ka nei lo tih a sawi a, ka thaw huai. Nia, ka dik vek tawh, ka hriatna pawh ka nei lêt vek tawh alawm le.



Sasangi'n haw nghal vut a phal loh vàngin kan châm leh rih, doctor pawh khân a remti chiah lo deuh bawk a, mi dangte lahin an lo 'amen' tliar tliar bawk si.



Zànah pawh Kenny-a leh Sangzela chu Sasangite inah chuan an rawn kal leh tho. Kan titi laih laih nain ka men rei an phal lo va, an haw thuai.



Mut hmunah erawh Sasangi zawh tùr ka ngah lutuk tlat.



"Sasang, thil thleng engkim min hrilh teh," ka ti tâwng a.



"Eng thil thleng maw? Nunsanga nu tih dàn che kha maw?"



"Ni lo ve, kha kha chu ka hre duh tawh lo. Kenny-a nupui neih dâwn zàna thil thleng kha, khami hnulam ka hriat tâk loh zawng zawng kha min hrilh tùrin ka duh che a ni."



Makti zet hian a mu tawh chu a rawn tho hluai a,"I hriatna hloh a lo lêt leh tawh em ni? I hre chhuak tawh maw?" phâwk zet hian a ti hú a, min en kal bawk a.



"Aw, ka hre chhuak tawh."



"Engati nge i sawi-"



"Mi dang hrilh hriat kha ka duh rih lo alawm, thil engkim zawh phawt che ka duh a," ka ti a, ka hre châk zek zek tawh.



"Ka va lâwm tak!" hlim hmel taka nui chung hian a ti phawt a, chutah, rawn thutak ta thutin," Doctor pawh khân khatia i hriatna i hloh țhen kha rei vak lo hnuah i neih lêt leh mai theih thu a sawi tak asin. Tûn hnai kum hnih khat chhûnga thil thleng i theihnghilh a ni deuh mai a;mahse, hriatna i hloh chhûng khân thil țha lo tak a thleng tlat a ni," a ti sap sap a.



Eng thil țha lo nge thleng  le?!!



A ngawi vang vang phawt a, ka lo nghâkhlel lutuk chuan chatuan tluk zeta rei a ngawi ta niin ka lo hria.



Chutah," Nunsanga'n toilet-a khawih hnu che khân Kenny-a nèn an insual hrep a, nang lah kha nikhaw hre lovin i lo awm reng a. Kan hriat ve meuh chuan an lo inkhawih thî nasa tawh mai a, Nunsanga rui kha a tlâwm duh mai bîk si lo va, kan pawt țhen thei hrâm. Kenny-a thinrim ve bawk si khân, i chunga a rilru put dàn a inpuang chiang kher asin."



"A tawi zâwngin, Nunsanga chu jail-ah dah a ni ta a, tu pawhin an thiam lo vek ti ila dâwt a ni kher lo vang. Kei pawhin ka țhian țha ber khawihtu a nih vàng leh hmeichhe kutthlâk hreh lo a nih vàng chuan ka haw tak zet a, ka haw ngawih ngawih a ni mai; mahse, nimin lama a nu thu sawi ka hriat ațang khân a chunga ka rilru put dàn chu a dang leh ta daih a ni," a ti dap dap a.



"A nu chuan eng thil nge a sawi a?" ka lo ti hmanhmawh a.



"Nunsanga hi a fapa tak tak a lo ni lo va."



Maw?!!! A fapa a nih loh chu tu fa nge ni ta ang? E khai! A va mak dâwn ve! Nunsanga chuan a hre ve ang em le?



"A nau fapa a lo nia. A nau chuan a ráwlthar chhuah zet zawt laiin nupui a nei a; mahse, an fuh lo khawp a, an innei rei lo. Nunsanga nu tak tak chuan Nunsanga thla a tlin hmain Nunsanga hi enkawl peih lovin a pa hnênah a dah a, a pa lah rui reng a nih vàngin tuna Nunsanga nu hian a enkawl chho ta a."



Ka thil hriat chu mak ka ti kher mai, a nu fapa ngawih ngawih ni khân ka hria asin!



"Nunsanga pawh hian a nu tak a ni lo tih a hriatna chu nang nèn in inneih hma deuh lawk ațang chiah khân a ni. Chuan, a pa tak tak chu zu a ruih buaina lamah mi nèn an insual a, a thi a ni àwm e, a nu erawh tûn thlengin a hre lo, a thi tawh a niang."



Chutiang teh hrep chu maw a chunga thil thleng lo ni a? A va makin a  va hrehawm dâwn ém!



"A nu leh pa chutiang an nih vàng chuan duat  chikimin a duat a, Linda-i kha a duh ém țhin vàngin nei tùrin a duh țhìn. Chuvàngin, nang pawh kha mo atân a pawm thei lo che; mahse, Linda-i nu khân Nunsanga chanchin, lo chawr chhuah dàn zawng zawng a lo hre vek si a, a fanu pasal atân a duh thei hauh lo. Nunsanga an ina a lèn țumin a lo zilh deuh hlak a ni àwm e, Nunsanga tân a zahthlâk dàn tùrzia leh a hrehawm dàn tùrzia chu, ngaihtuah mai rawh. Chu chu Nunsanga'n a nu leh pa tak tak chanchin a hriatna hmasa ber a ni."



"Mipa tân a nat dàn tùr leh zahthlâk dàn tùr chu, a hawisan ta hmak rĕng a. Nang a lo tawng che a, in innei ta rĕng a. Khatih lai pawh khân Nunsanga nu khân Nunsanga'n a lo pian chhuah dàn dik tak a hre tawh tih rĕng a hre lo. A fapa nupui atân chuan a duh theih ngang loh che avàng leh Linda-i a duhthlûk ngang avàng chuan remruatna tenawm tak hmangin a ințhentîr ta rêng che u a ni. In ințhen ațangin Nunsanga rilru chu a buai țan ta a, buai ti ila hlim lo a ni ber ang chu, zu in a chîng chho ta a."



Mak ka ti lutuk a, thâwk pawh thaw ti ngam lo chuan ka lo ngaithla dèp dép a.



"Zàn a rei tawh e, i tân mut a țha, mu tawh rih zâwk ang," a rawn ti ta thut a.



"Ka muhìl thei chuang lo ang, min hrilh zo law law la."



A sawi zawm ta leh a.



"Linda-i chu a kawp ve rèn ráwn tho; mahse, rilru a pe tak tak thei tawh chuang lo. Nang lah uire anga chhuak i ni bawk si, chubâkah, Kenny-a nèn a ringhlel bawk si che u a, a rilru chhûngril chu a rûm ve nasa ngawt țhìnin ka ring."



"A thil tawn zawng zawng chu Jail-a a nuin a va tlawh țumin lo àn khum nân a lo hmang a, Jail ațanga chhuah pawh a duh lo. Dik tak chuan tunah hian a rilru a buai deuh hlek tawh a, a țawng ngai mang lo, biak chauhin a țawng. A nu sawi vek a nih chu, ka khawngaih letling tawh zâwk asin. Jail ațanga hruai chhuaha enkawl deuh hlek a duh a; mahse, Nunsanga chuan a lo hmu duh tawh lo, hre lo ang hmakin a awm tawh. Bâkah, a jail tànpuite pawhin an kàwm vak lo, amahin a phun bul bul țhìn, tih thinrim phei chu hlauhawm tak a ni ringawt."



Thil kal dàn hi a va mak thei tehlul ém!



"A nu chu i chunga a rilru put dànah a inhmu chhuak a, a țap vawng vawng hial. A fapa tâna țha ber chu nangmah i ni tih a hre chhuak tawh a; mahse, engkim a pawi zo tawh a nih hi tiraw? Nunsanga erawh a khawngaihthlák ka ti roh, a chhan chu thisen nge nge chu tui ai chuan a lo chhah zâwk si a, a thlahtute ațangin a fuh lo deuh nèn, Nunsanga nu siam țhat nân a khawdur ngai hi chu a chhah deuh mah mah a ni."



Chutiang chu doctor fel tak ni țhìn hun hman dàn chu maw lo ni ta? Hmalam hun hi kan va hre lo chiang tak ém!



"Thil thleng dang leh chu naktûkah tawh aw, zîng kârah ka hrilh ang che, tuna i hriat pawh kha chauhpui tham a ni tawh si a."



Ka tilui lo. Nia, tuna ka thil hriat tâkte pawh hi a lutuk mah mah tawh ka ti, a râpthlâk ka ti, rilru a tihrehawm.



Ka ngaihtuah kual nasat vàngin ka muhìl har, rei lo tê, ka muhil țan ve chauh emaw ka tih chhûngin khua a lo vâr leh thuai, dârkâr khat vêl zet chu ka lo mu ve.



Pâwn veranda-ah kan țhu dùn a, a thawh khatna nizàn lamah min hrilh tawh a, tûn țum chu a thawh hnihna.



"Kenny-a inpuanna kan hriat ve vek avàngin Bawihbawihi chuan inneihna kha a paam ta lo va, bâkah Kenny-a kha hmuh tlâk leh nupui nei tlâk pawh a ni bîk chiah lo. Mipui hmaa ding tùr pawhin damdawi inah, nangmah vil rengin a awm daih a, a nupui neih tùr ni tih pawh a hre tawh lo a niang. Bawihbawihi kha a khawngaihthlâk reuh asin, Kenny-a chuan inneihnî kha postpone mai a duh thu a sawi a, Bawihbawihi erawh chuan țhulh kha a thu tlûkna a ni ta zâwk a ni."



'Kan ințhen' a tih kha hei hi a lo ni chiah a nih hi, inneih an tum tih pawh ka hre chhuak zo tawh lo a nih kha. A va pawi tak! Engkim hi ka tipawi zo ta vek a nih hi. Kenny-ate inneihna tùr ka thulhtîr a, Nunsanga lah Jail-ah ka dah bawk. Kei hi vanduaina kengtu ka nih chiah hi,Sangzela lah ka tawrhtîr bawk.



"A pawi e tiraw? Keimah vàng vek a ni si a."



"A ni lo, a ni miah lo. Hmalam hun kan hre lo va, hun khân eng thil nge a rawn her chhuahpui tùr hi kan hre hauh lo, i thiam lohna pakhat mah a awm lo bawk," a lo ti vat thung a.



"Mi nun ka tichhe nasa ém mai."



"Tu nun mah i tichhe lo. Pathianin kan tâna ruat a nei hrang vek a, kan duha kan hmangaih ém avàng khân kan tâ tùr tihna a ni vek kher lo. Nang pawh Nunsanga tâ tùr i ni lo a ni mai, chutiang chiahin Bawihbawihi pawh Kenny-a tâ tùr a ni lo, mihring hian tum viau țhìn mah ila kan tâna ruat ni lo hi chu a thlawn hlawl zêl a nia," a ti leh dap dap a.



Tunah zet chuan Kenny-a, Sangzela leh Bawihbawihi hmuh ka hreh ta ngawih ngawih. Keimah vànga thil thleng hi a namai lo tak zet si a, Pathianin min hrem loh hrâm ka beisei.



Haw kawng tluanin ka ngawi rauh rauh a, titi châkna pakhat mah ka nei lo. Ka men ve reng chuan titi a ngai dâwn si a, ka maimichhîng a, muhìl ang chiahin ka awm hmiah.



Lalàni erawh a titi barh barh a, Sangzela pawh a țawng zauh zauh. Ka whatsapp message pawh ka check peih lo, eng thil tih mah ka tui lo ve.



Kan in kawtah min drop a, làwmthu ka sawi sap a, lêng lût tùr pawhin ka sâwm peih lo. Mut vang vang ka châk.



Rei pawh ka mut hmain Kenny-a'n min rawn call, Kenny-a ka nin ber țum a la nih ka ring hial.



"Eng nge?" ka ti bak hluk a.



"I țha em?"



"Țha lo ila ka chhâng dâwn che em ni?" Eng nge ka thinrima ka bak ém émna chhan hi ka hre lo.



"Ka hre lo le!"



An inneihna tùr a kaltlangpui lo chu ka hua a nih ka ring deuh ringawt.



"Engvàngin nge in inneihna tùr kha i kaltlangpui loh?"



"I hriatna i nei lêt tawh a ni maw?"



Hm, ka hriatna ka hloh tih a hria a, min chhàithlûk a lo tum a ni maw? Sangzela nèn kan inzui tih a hre reng sia.



"Ka hre vek!"



"'Ka hmangaih hluah hluah che' tih thlengin maw?"



Ka dang hlauh, makti zetin ka en ngai ka en reng ringawt!




*THU DIK LAMAH I ȚANG KHER LO A NI THEI, THU DIK DODÃL ZÂWNG ERAWH CHUAN  ȚAWNGKAM NEIH A ȚHA LO*



☆GOLD DIGGER☆ - 30 By Dingdi Pachuau




Chhàn ngaihna ka hre lo.



Kenny-a'n min hmangaih tih ka hriat vawi khatna! Min duh tih kha chu a sawi tawh ngei mai a, min hmangaih thu erawh a la sawi hauh lo.



"Ka hmangaih che a, i chunga thil țha lo a thlen hi ka duh lo bur a ni mai."



"Sawi tawh suh!"



"Ka sawi ang, ka sawi zêl tawh dâwn. Ka sawi loh avànga khâng kum tam tak ka lost tawh ang kha, tunah chuan lost hi ka tum tawh lo."



Ka phone chu ka titàwp ta daih rih. Tunah hi chuan engmah ngaihtuah lova awm rih ka duh, ka hriat loh thil tam takin vawilehkhatah min dêng ta rup mai si a, a rit ém a, ka zo rih lo.



Nubawihi call leh Sasangi call erawh ka chhâng hrãm. Ka duh dàn takah phei chuan zin bo vang vang ka châk, engkim theihnghilha hun hman ka châk ber.



Ka hriatna tlém hloh ka nei lêt leh hi Doctor khân vànnei min ti viau a, min lawmpui viau bawk a nih kha. Kei chuan nei lêt miah lovin tuna ka thil hriatte hi hre chhuak thei lo ila ka duh ta mah mai. A chhan chu keimah vànga mi tawrhna leh chànna hi a nasa ka ti lutuk. Bawihbawihi ka zah ngawih ngawih tawh dâwn si a, hmuh pawh ka hmu ngam kher tawh nâng. Chutah, Nunsanga leh a chhûngte... Hm, ngaihtuah loh ka duh tak zet.



Ka inthiam lohna avàng chuan mi zînga hun hman pawh ka inthlahrung sawt a, ka hnathawhnaa kal erawh ka tih ngei ngei tùr a nih vàngin ka kal hrâm hrâm. Min rawn dàwrtute hlim hmel taka lo chhawn pawh harsa ka ti tak zet tawh, nuih der hi ka hnê.



Sangzela pawh min bia a nih loh chuan ka be khât. A lakah ka inkiltawih, ka inthiam lo zo vek tawh a, chubâkah, ngaihzâwng tùr anga en leh tùr angin ka insuangtuah thiam lo, ka dik lo tlat. Hmuh ka hreh phah zo vek,  Nunsanga chunga thil thleng chu inthiam lo viau mah ila tih theih ka nei lo a ni maithei; mahse, Kenny-a leh Bawihbawihi hi...



Kawng lehlamah chuan hetia hna ka thawk mawlh mawlh hi 'thil tam tak' ka ngaihtuah țhin lak ațanga rilru lâkpènna hmanraw țha tak a ni. Ina ka awm chuan ka thil ngaihtuah ngai bawk kha  ka ngaihtuah ziah a, hna ka thawk pawh hi a zia phian mai.



Ina ka awm chuan hna thawh tùr ka hriat loh țhin vàngin ka rilru lâkpèn nân story ka ziah zawm leh a, a țha lutuk ringawt. Ka rilru ka sâwrbing hrâm hrâm a, tunah chuan ka zo thàwthâng a ni ta.



Tlai khat ka haw chu veranda-ah chuan Kenny-a ka hmu thut mai, hre thiam lo zeta en húin ka ding chat, min lo nghâk a nih hmel. Dik tak chuan Kenny-a hmuh leh țhin pawh hi nuam ka ti hlei nem, mipa a nia, mipa taka a thil tih tawh chu a kaltlangpui ka ring asin. A chungah hian thinrim der ta ila, awmzia a awm ang em?



"I lo thleng tawh maw?"



Min zawh kher a ngai hlei nem, hei min hmu tawh reng a, ka thleng tawh tih a hre reng alawm.



In chhûnga ka lût chu min zui lût ve nghal a, ka room-ah lût tlangin ka inthlâk vek phawt a, ka chhuak leh chauh.



A thil ken ka lo en miah lo va, paper bag-ah chhang tui tâwk tâwk a lo keng reng niin.



"Chhang ka lo lei che a."



"A va làwmawm ve!"



"Thingpui tui tâwkin ka'n lum ang che aw, i hna thawk i chau àwm si a," tiin choka lam a pan ta nghal a, nuam lo ka ti lehling viau. Eng thil nge rawn tih a tum ni le? Tunah hi chuan hmuh tam loh, biak tam loh ka duh asin, Bawihbawihi laka tlêm tĕa ka inthiam ve deuh theih nân.



"Bàbî?"



Thingpui no hnih rawn siamin pakhat chu min pe a, kei chuan ka thil ngaihtuah atalângin ka lo hmu pek lo va.



"Thil țûl lo ngaihtuah chiam suh."



"Sawi fiah tùr tam tak i nei a ni," ka ti ta ringawt a.



Ani lah chuan," Aw, engkim min zâwt thei ang; mahse, thingpui kha in phawt rawh, chhang nèn khân," a lo ti duh lek a.



Țawng tawh lo chuan ka ei mial mial a, a tui leh tui loh pawh ka hre lo. Chhùnah ka chàwl ve ngai ta lo va, ka ril a lo țâm riau a nih dâwn hi.



Thingpui ka in erawh chuan a lo sa ngang mai, ka phu zawk. Ka lei a kàng nghalin ka hria.



"Fîmkhur ta che, a so hlim a nih kha." A tho vat a, filter tui a va la a, min rawn pe.



A sat lutuk  vàng chuan ka mittui a tling kawl kawl mai.



"Engmah ngaihtuah lovin in tawh rawh."



Chhang chu a lo tui kher mai,  ngaihtuah mang hlei lo khân ka lo ei pawp pawp a, ka ui hnuhnawh, a tui hle si a.



"A tui hle mai."



A hnu deuhah chuan a ei ve miah lo tih ka hre chhuak a, chhang chu a lama nawr pheiin," Ei ta che, a tui ém hi," ka ti a.



"I thil ei kha a hmuhnawm."



Ka țhial tàwp chat. Nia, ka ei bawrh bawrh  sia, mak min ti viau ang chu.



"Ka ril a țâm a niang."



"Ei zo vek rawh, i  tân alawm ka rawn lei."



Eirawng a bâwl leh vek, hei hi he pa ka ngaihsànna chhan pakhat a ni. Inti-mipa tâka eirawng bàwl hmeichhe hnaa ngai tlat a ni lo va, thiam lah a zak hek lo. Mipa ve tak a nih tehlul nèn, ei siam kei aiin a la thiam daih zui.



"Story kha i ziak zo tawh em?"



"Aw, zo a ni mai."



"A țhat hlauh chu, mi chhiar theih ngei tùrin kan tlângzarh ang."



Zanriah ei khamah engkim min tihfelpui leh thlap. Hmeichhe hna a  sawi lo va, ka phal lo viau nain ka hnialna a pawm dâwn chuang lo nèn, ka tihtîr mai.



"I thil min zawh duh min zâwt thei tawh ang."



Ka opposite chiah țhutthlèngah a țhu a, kan inhnaihchilh hran lo bawk a, ka en ràn pah thei ang.



"Inneih in țhulh chhan kha keimah vàng a ni tiraw?"



Min en vang vang hnuah chauh," Ni lo," a ti sup a, chutah," Engtin nge nang vàng a nih theih ang?" a ti leh a.



"Mipa, a thutiam tawha ding ngam i niin ka hria a."



"Nangmah vànga ka țhulh niin i ngai em ni? Bawihbawihi țhulh a nih kha, ka hmelhmai a pângngai loh avàngin țhulh  a ti phawt a, kei erawh chuan a duh chuan kan sawn mai theih thu ka hrilh a, bâkah, inneih țhulh kha ka tum lo; mahse, inneihnîah a lo lan loh tùr thu leh min neih theih loh tùr thu min hrilh a nih kha."



"A țhulh chhan tak chu alawm ka sawi, keimah vàng a ni tiraw?" ka ti leh a.



A khabe tuai nauh nauhin," Ni lo, ka hmangaih lo tih a hre sa reng a ni zâwk. Damchhûnga pasal, amah hmangaih miah loh tùr neih chu a duh ta lo thut a niang," a ti leh a.



"A nih, eng vàngin nge neih i tum si?"



"Bialpa dang i nei atin a nih kha."



A va ho mai mai tak! Inneihna hi chuti maia awlsam leh holama lâk chi a ni lo asin.



"Aizawla hostel-a i awm lai ațang tawh khân ka duh țan tawh che a; mahse, ka lo hmangaih tel reng che a ni tih erawh ka hre miah lo, in ințhen hnuah chiah ka hmangaih che a ni tih chu ka hre ve chauh."



Ka sen ap ap maithei a ni, nuthlawi nih hnuah pawh a lo la zah theih viau tho a nih àwm hi.



"Bawihbawihi rilru nat dàn tùrzia i ngaihtuah ngai em?" ka ti ta daih a.



"Na ve tho ang; mahse, a tâ tùr ka ni lo tih a hre chiang tawh viau ang, nakinah hmangaihtu tak tak a tawn hunah phei chuan min thlah zalèn hi a lâwm viau ang tih ka hria a ni," a lo ti thung a.



Kan rilru a va inang lo tak ém!



"Nunsanga chanchin kha i hre vek tawh em? A lo seilen chhoh dànte kha?"



"Sasangi'n min hrilh nual a, chuti ni lo se chuan police-a FIR thehluh mai ka duh ang. Amaherawhchu, miin inchhìr tâka ngaihdam an dîl a nih erawh chuan ngaihdam mai tùr, ngaihdam ngai vek kan ni si a," a ti leh sup sup a.



Ni e, a dik chiah.



"A khawngaihthlâk i ti ve em?"



"Aw, khawngaih e, a rilru khawhar tùrzia leh mal a intih tùrzia ka ngaihtuah a, țhian ka tlin lohzia ka hre chhuak bawk."



"Mahse, i hre lo miau a, keini pawhin kan hre lo a nia."



Ka rilruah erawh inthiam lohna thûk tak a awm tho.



*******


Tih tùr ka va ngah tak ém!  Nunsanga nu min rawn țahawh vàngin Nunsanga jail-a zu tlawh ve hrim hrim chu țha ka ti a, a hun kal tawh ka hriat hnu ațang phei hi chuan ka chungah khatiang khân awm mah se, hmuh leh hrim hrim ka duh. A chunga thil thleng tam tak hi chu keimah vàngah ka ngai lo thei lo. Chuan, Sangzela pawh kan inkâr sawi felpui a ngai.



Sangzela hi titipui ka ngai tak zet. Heti ringawt chuan a fuh thei lo, hriatna ka la hloh emaw a la ti char char àwm si a. Bâkah, amahah hian feelings ka nei miah lo, phùrna leh amah thlâkhlelhna tak tak kha kan inkawp lai pawh khân ka nei ngai lo, min hmangaihin a fel a, pasal atân ani tluka țha an awm dâwn lo nia ka hriat vànga ngaizawng kha ka ni bawk a, tunah phei chuan hmuh ka hreh ngawih ngawih tawh a nih hi.



Dik tak chuan, a hma pawhin ka hmangaih em tih pawh ka hriat miah loh kha, pasal atân chuan min hmangaih ém émtu hi hmeichhe tân chuan an hlu ém si a. Min hmangaihtu a ni si a, bâkah, Kenny-a hnarna țha tak kha a ni bawk a; mahse, eng thil nge thleng zozai ta hi?



Ka rilru ka siam vat a ngai, ka pasal hlui țhianpa lakah hian thinrim der viau mah ila, rilru ka pe tam tial tial chu a ni ta si a. Engtin kan awm pawh a ni lo, min hmangaih a ni tih lantîr a hreh lo va, kawng engkimah min pui a,  mipa dang tam tak anga min hmangaih thu sawi kûr dup lovin a thil tihah a lantîr mai. Bâkah, hetia inneih an țhulh tâkah chuan min kalsan duh tawh pawhin ka ring lo, kawng lehlama chhût chuan a khawngaihthlâk ve tho, keimah vànga hetia awm hi a ni si a.



Zan khat chu Sangzela a rawn lêng leh ta, nuam lo ti rilru zet hian ka lo chhàwn a.



"Zualte, ka chîk ka chîk țhin che  a, i hriatna hloh kha i nei lêt leh deuh tawh niin ka hria, a dik em?" tiin min zâwt ta khauh mai.



Dâwt hrilh ka duh hauh lo, mi țha tak a ni si a.



"Aw."



Thingpui chu tlêm a in hlak a, min en ràn chung chuan," Chuan, thil thleng zawng zawng kha i hre tawh bawk a? I awm dàn hi hrehawm ka lo ti a, i inthiam lo a ni tiraw? Inthiam lo miah suh aw, inthiam lohna chhan tùr i nei miah lo a nia," a ti leh sap sap a.



Hetia a tih poh leh ka inthiam lo zual, nuam lo ka tizual.



"Hrehawm ka ti, nuam lo ka ti a, i lakah ka inthlahrung-"



"Inthlahrunna chhan tùr a awm lo rĕng rĕng, tihian țhian angin kan inen thei reng, tuna min en dàn hi ka duh lo, min hmuh i hreh riau țhìnin ka hria a," a ti leh dap dap a.



"A pawi ka ti-"



Ka sawi zo hman leh lo, min rawn țawng khalh leh daih.



"Pawi tihna chhan tùr a awm lo, dik tak chuan kan pahnih inkâr hi a tluang mah mah em aw ka ti thìn bawk. Kenny-a en dàn che hi ka hai ngai lo, sawi lo mah se, a duh hle che tih ka hria. Chuan, kawng engkimah ka hmaah a lo awm hman ziah bawk, i tân a inpe zo tak zet a, pasal țha tak a ni ngei ang," a ti ta duah a.



Sangzela hian thil a lo chîk àwm țhìn hle mai, hetiang thleng thleng hian a lo hria a, kei lahin hetiang ka lo hre hran miah si lo, min duh tih chu min hrilh tho nain a sawi kher loh chuan ka hre dêr si lo.



"I tân hian mi țha ka duhsak che, a chhan chu ka hmangaih vàng che a ni. Kenny-a hian a hmangaih che a, in inhrepawh sa ém ém bawk nèn, tibeidawng lo tùrin ka duh tak zet che a ni."



"Inthiam lohna rilru pu lo la, min hmu hreh hek suh. Mihring hian hmangaih kan nei a, kan hmangaih tak takte hi kan ta tùr an lo ni vek kher lo a nia. Kan hmangaihte hi an hlimna tùr hian kan thlah zalèn hi a lo ngai țhìn a, chuvàngin, kei pawh hian ka hmangaih che avàng hian ka thlah zalèn dâwn che a ni."



"Chuan, țhian țha tak angin inen ila, i chunga hna thawk angin min en lo la ka duh bawk. Țhian țha tak angin awm ila, inzahtawnna leh inkiltawihna neih ka duh lo thung ang."



A haw hnuah chuan Sangzela mize puitlinzia leh felzia chu ka ngaihtuah nauh nauh a, ani ang hi khawvelah an tam hauh lo ang. Ka zah sawt a, ka rilru a thâwl hawk bawk.



A tûk ațang chuan ka rilru a nuam deuh hawk tawh a, Sangzela hmuh leh biak pawh ka hreh lo ta sawt. Kan inkâr boruak chu a zângkhai sawt a, nui chungin leh rilru tak takin ka be thei ta, he pa hi chu mi special tak a ni ka ti lo thei lo. A bialnu, amah hmangaih tak zettu tawng se, nupui țha tak nei se ka duhsak ngawih ngawih. Hetiang hi chu kei chuan ka phû lo tak zet zâwk, Pathianin nupui țha tak a pe ngei ang.



Tlai khat hna ațanga ka bâng chu in ka lût deuh chiah tihah chuan kawtah motor a rawn ri dat a,Kenny-a a lo kal leh tawh a nih ka ring deuh ringawt a.



Kawngka a rawn ri dat dat a.



"Lo lût mai mai rawh, nangmah i nih kha."



Nubawihi, nui kar kar chunga a rawn luh chuan min va barakhaih tak! Makti zet hian ka lo en hû ringawt. Chutah, harh chhuak thutin ka pan hnai a, ka pawm vawng vawng a.



"Engtin nge, i lo thleng thut a, engin nge i lo haw? Min hrilh mang si lo, ka ngaihzia che hi," ka ti nawk nawk a.



"Ka mâkpa hualin min rawn thlah a."



Mâkpa hual? Tu mâkpa hual maw?



Kawngkaah chuan Kenny-a, Trolley nèn a rawn lût ta, ka meng kâwk.



"In inlàwm zo tawh em? Hei, a rit teh a nia, min lo pui teh."



A tifiam tih ka hriat vàngin ka ûksàk duh lo va, Nubawihi nèn kan inthlah hnuah chauh ani chu ka ngaihven.



"Thawmhnaw dang a la awm em?"



"Awm lo, ril a țâm a nia, ka chàu," tiin țhutthlèngah chuan a bawk zuar a, a sei bawk si a, țhutthlèngsei pawh a lang tâwi sawtin ka hria.



"Thingpui i duh maw?"



"Aw."



"Lo țhu r'u, ka'n chhuang ang e."



Thawmhnaw min lo hawnsakte chu min hmuh a, a mawi hlawm reuh sia, ka duh hlawm tawp, ka inhmeh leh ka duh chi a ni vek.



"Eirawng bâwltu a lo thleng tawh a, zanin tlai chu ka awl thei!"



"Cook ka ni kher lo!"



"I ni ka ti lo, kei aiin i thiam zâwk a, ti leh mai la."



"Man a ngai tawh!"



Nubawihi chuan nui var var chung hian," In buai rei, keima'n ka bâwl ang," a lo ti ta hlauh a.



"Ka lo pui ang che," ka lo ti vat a.



"Kei pawh."



Hm, ka tih a thîk.





*MIHRING FAMKIM I NIH BÎK LOHZIA INHRIAIN MI DANGTE TLIN LOHNA LAI SAWI VÀWNG VIAU ȚHÌN SUH, TLIN LOHNA LAI I NEI VE THO A NIA*



☆GOLD DIGGER☆ - 31 By Dingdi Pachuau



Kan vai chuan rawng chu kan bâwl leh vek a, maian hnah tharlâm zet an rawn lei haw chu kan bai a, thlai hnah hring ngaina ta chu ka ei leh țeuh mai.



"U, i țha chiangkuang tawh tak tak maw? Engmah min rawn hrilh ve mang si lo va," Nubawihi chuan a ti lar lar a.



"Aw, ka țha vek tawh e. Rawn hrilh che ka duh loh chhan chu min ngaihtuah ang a, i thil tihah i tihțhat theih loh ka hlau alawm le."



Kenny-a chuan," I u sawi chu a dik chiah. Hei, tunah chuan a țha tawh a, nang dam takin i rawn lêt tawh bawk a," a lo ti ve a.



"Nia, tunah chuan ka awmpui tak tak thei tawh dâwn che a."



"Het, zirna sâng zâwk beih tùr i la nei, i u chu ka lo enkawl thei a nia," Kenny-a vêk chuan a lo ti leh a, ka melh phei vat a, ani lah chuan a chaw ei chiah a lo ngaihsak a.



Nubawihi ka en ve leh a, ani chu a lo  nui var var a," Ka hre sa reng alawm, ka'n tikual vêl mai mai a nih kha," a lo ti sâwng a, ka ngei reuh lutuk.



Zanriah eikhama hmun kan tihfel vek hnu chuan," U, ka chhuak lawk dâwn a nia, ka lo haw har lo ang," a ti a.



"Khawnge i kal dâwn? Zàna hmeichhia mahni chauh lehnghala chhuah chu a țha lo asin," ka lo ti thung a.



"Ka rei lo ang, ka țhiani ka va hmu lawk ang e, minute 10 vel bâk ka thang lo tak tak ang."



Kenny-a nèn chauh kan awm hnu chuan," Min hlauh loh hrâm ka beisei," a ti teh mauh a.



"Hlauhna chhan tùr che ka nei em?"



"Aw, nei e."



He pa hi ka hlauhna chhan tùr eng nge ni? Min sual a tum em ni? Ni lo, a tum hauh lo ang.



"Min pâwngsual i tum ém lo ang chu maw?"



A nui hawk hawk mai. Makti zet hian ka en a, a nui ațang ringawt chuan a tum leh tum loh pawh a hriat theih loh.



"Eng nge thil thleng thei lo a ni em ni?"



"Mi pâwngsual tùr ém chuan nula ka hmu zo ve tho asin."



Chu chu chiang sa; mahse, mi va  pâwngsual nazawng hian nula an hmuh zawh loh vàng a ni vek bîk lo tih ka hre ve tho.



"A țhat hlauh chu!"



"Mahse, engmah ka tih loh chu ring suh!"



Hlâuthâwng zet hian ka en phei thuai a, nui suk hian min rawn hnaih sauh a.



"Min rawn hnaih chuan ka au vak a ni mai."



"Ka fâwp ringawt ang che, hetia ka bialnu i nih tâk hnu hian ka la fâwp miah lo che tih ka hre chhuak a," min en ràn pah chuan a ti sup a.



Engtiklai ațang khân nge a bialnu ka lo nih le?



"Tûn hun, zanin ațang chiah hian tuma sawi buai theih tawh lohin ka bialnu i ni tawh!"



"Leh ringawt-"



Ka hmui a rawn hup chat, ka phu zawk hial. Ka melh chho há a, ani pawh chuan hnài zeta min melh chhuk pah chuan," Shhh, sawi buai theih loh!" a ti sup a, ka țawng zawm tâk lohah chuan a kut chu la sawnin ka mit ațangin ka hmuiah a en thla ta nghâl a.



Kan inhnaihchilh lutuk avàng chuan ka zãm ta tlat, chhûngril lamah ka khùr deuh dar dar, pâwn lama a lan chhuah loh nân ka țang ru nasa hle.



"Inthlahdul rawh."



Ka thei lo alawm le!



 A fawh nawmzia kha ka hre chhuak leh uai uai a, khatianga min fâwp leh a nih chuan țang tùr ka awm dâwn lo chiang, min fâwp ang em? A tum deuh tlatin ka hria, ka lo hnial tùr a ni ang, chuti lo chu, easy takah min ngai mai ang; mahse, min fawh chu ka beisei ru deuh tho bawk si.



A kut lian zeta ka tukkhuma dawmin," He i lu te reuh tê chhûnga i thluak bûr te tak tê chhûngah hian eng thil nge i lo ngaihtuah leh tâk? Min en rawh," intithunei zet hian a ti nghut a.



Ka thluak a tê vak bîkin ka va ring lo tak! A thluak nèn a intiat rengin ka ring.



"Lo ngaihtuah leh hman ka ti,  kei ni lo thil dang i ngaihtuah leh hmain," tiin a rawn kûn hniam ta zat a.



A rûka ka lo nghah a ni deuh tho bawk nain lo hnial ve deuh ka duh avàng chuan chhâng lêt lo chuan ka awm ngaiin ka lo awm ngar ngar a; mahse, chu chuan chona a siamsak a ni ngei ang, style dang daihin ka chhàn lêt loh theih loh tùrin min fâwp ta.



Ka chhâng lêt rang ta khawp mai. Kan inkeih ta mawlh mawlh a, thil dang rĕng ka ngaihtuah thei ta lo.



"Ka lak ata hi tu hnênah mah i kal sawn thei tawh lo," min fawh kârlakah chuan a ti sup a. A kut pakhat chu ka kawr chhûngah a rawn zen lût a, ka hnungzâng chu a chûl kual ruai a.



"Ka hmangaih che, ka hmeichhe hmangaih awmchhun i ni."



Hriat a nuam asin, nuam tak a ni. Min hmangaihtu hi an hlu a, kan duh lêt ve phei chuan hlu tak an ni leh zual.



"Ka hlimna awmchhun i ni, ka nghâk ngar ngar tawh che a..."



A kutin min chùl kual reng avang chuan ka awm dàn a dik thei tawh lo, min tiphûr lutuk tawh tlat, ka zêp lo. Sangzela nèn kan infawh leh kan awm dun ve pawhin hetiang hian ka awm ngai lo, chhûngril taka phùrna leh nuam tih veng veng kha ka nei ngai lo alawm.



Kawngka a rawn ri karh karh, kan inthlah chiang kher mai. Ka awm dàn zahpuiawm tak tihtàwpna țha tak a ni nain ka thin a phu nasa dawt dawt lutuk a, ka âwm ka dawm vang vang ringawt, ka lài chhe viau bawk.



Nubawihi nui țhâin a rawn lût.



"Ka rawn tibuai che u em?" a tih chuan Kenny-a chuan," I va lêng rei lo ve!" a lo ti sup a.



"Minute 5-in ka rawn tlai tawh zâwk aw."



"Minute 10-a lo tlai tùr alawm!"



Ani lah chuan," Bàbî ka hlau ve tho alawm," a lo ti leh a, kan pahnih chauh kan lo inngaihtuah avàngin Nubawihi pawh kan lo theihnghilh zâwk  a lo ni.



"A țha e, i intleuh dâwn chuan intleuh la, bathroom ka hmang ve duh dâwna nia," ka lo ti ve ta a.



Nubawihi bathroom luh veleh chuan," Ka la duhtâwk miah lo a nia," a ti sup a, ka sen țâwn țâwn ang chu.



Thil dang ka sawipui a ngaiin ka hria.



"Nunsanga nuin min rawn phone a, Nunsanga chu tlawh ve țha ka ti a," ka ti ta ringawt a.



"A țha alawm."



"Min kalpui duh ang em?"



Min en vang vang hnuah," I pasal hlui, ka tel lova i hmuh chu ring duh suh, kut a lo thlâk leh che chuan..." a ti nghut a.



"Thlâk ringawt lo ang, kha pawh kha a ruih buai vàng a nih kha."



A chek hluk a," I la țan tho tihna a ni em?" hriatthiam har zet hian a ti ta daih a.



He pa hian a thîk tihna a ni thei ang em? Ni lul lo mai, engah nge a thîk daih ang?



"Țan tihna pawh a ni lo, thil awm dàn a ni alawm, rui lo hai lo ni se chuan khatiang khân a che lo ang. A chhia leh țha hriatna a hman theih tawh loh vàng a nih kha-"



"Engtikah nge kan inneih ang?"



A thil sawi avàng chuan ka țawng tàwp chiang kher mai. Kan inen ta ràn a.



"Eng thil nge i sawi?!" A thil sawi kha ka hre sual zâwk em ni?



"I hriat reng kha!"



"I ti tak tak hauh lo ang!"



"Ka fiamthu lo."



Zaninah a bialnu min nihtîr a, inneih thu a sawi nghal a nia, a hmanhmawh deuh chu a ni.



Nubawihi a rawn chhuah tâk avàngin kan sawi zawm ta lo.



*******



Sazaikàwn Jail-a Nunsanga kan zu hmu chu mak ka ti kher mai. Hetiang tak hian mihring hi pâwnlam lan dànah pawh a lo danglam theih ang tih ka lo hre pha lo.



Nunsanga chu a lo chěr kuam mai a, a bawrchhawr tak zet. A sam chu a sei deuh hnuang a, mi sual tak tak a nih duh hmel tawp.



Hotute hnên ațanga kan hriat dàn kha a lo dik a nih chiah hi. Țhian a kàwm lo va, hna a thawh loh chuan mut a hna a ni mai. Mi a be ngai lo va, miin an biak chuan a chhâng ve țâwk. Amaha a awm chânga a phun bul bul țhin avàngin a â tawh a nih an ring. A nu leh a chhûngte dang leh Linda-i'n an tlawh pawhin a lo hmu duh ngai lo.



Kenny-a chuan a tel lova ka hmuh a phal loh tlat avàngin kan pahnih chuan kan lo nghâk ràn a, min rawn hmuh chuan a ding ta chat a.



"A pawi ka ti!" a rawn ti lauh mai.



Kenny-a nèn chuan hre thiam lo zet hian kan inen a, Nunsanga lam chu kan en leh nghal zat.



" Zualbawih, i chunga ka thil tih kha pawi ka ti," a rawn ti nawn leh a.



He pa hi a â miah lo!



Kan thlêmthlu thei lo. A chhuak thei tawh reng a, ina haw a duh tawh lo, mi sual nia a inhriat tlat avàngin 'mi sual in chu jail a ni' tih a changchawi a, bâkah,  haw-na tùr 'in' a nei lo tih a sawi bawk. Ka ngaihtuahna a tikal thui lutuk ringawt, ka khawngaih a, ka lainat bawk. A rilru hi ka hriatthiampui phãk lo, hrehawm a ti dâwn ém asin.



Kan inhmuh tàwpnaa a thu sawi chu ka ngaihtuah rauh rauh.



"Kei chuan nu leh pa, min duh miah lotu ka nei a, ka nun zawng zawng kha a lem vek a ni. Ka tân chuan mi zînga hun hman ve pawh hi a inthlahrunawm ngawih ngawih tawh a, he khawvêl ata hi bo hmiah ka duh țhìn; mahse, ka nunna hi ka ta a ni si lo."



Kenny-a hnênah chuan," Doctor ve si, khati khawpa a han bawrchhawr thei kha a mak ka ti, a chĕr bawk si," ka ti ta ringawt a.



Ani pawh chuan," A mak khawp mai; mahse, a hrisêl tho alawm le. A rilru vàngin chaw a ei țha thei lo a nih kha, mipa a nia, țha takin a lo lêt ang tih ka ring tlat a ni," a lo ti a.



Nia, țha takin, rilru huaisen tak nèn lo chhuak duh se ka ti tak tak, nun thar bul țan tùrin.



Puteate bula innghah ka duh tehlul nèn, a phal tlat lo va. A in luahah kan lût kha a ni a, room hranah kan mu thlap, fair ve tak chu kan ni.



Tunah chuan kei pawhin Kenny-a hi ka duhna ka tilang ve tawh a, inrem deuh si hian kan inhnial leh bap bap țhìn a. Ani lah chuan," Hmeichhia min hnial ngamtu leh min chhâng lêt ve zêl ngam hi ka duh chî a nia," a la ti zui. Nunsanga'n ' a thinchhia' a tih kha, ka bulah hian thinchhia angin a la awm miah lo thung, a thup pawh a ni maithei.



"I thinchhia tiraw?"



"Aw."



"Mahse, i thinchhia tih ka va hre ve ngai lo ve!"



"I hre ve ngai lo ang."



Puteate pawh hun âwl kan neih veleh kan tlawh, Pitei chauh a lo awm a, rei vak lo hnuah Putea a lo haw, Kenny-a nèn an titi dùn daih lehnghal.



"An sawi khùnkhàn hmel hle mai, eng thu tak sawi ang maw?"



"Nunsanga jail-a kan zuk tlawh chungchâng kha a niang," ka lo ti a.



"Hriat chian a va châkawm ve!"



Pitei chu ka hrilh ve zung zung a, thingpui pawh chu ka in hman meuh lo, ka in ve meuh chuan a lo dai vek tawh.



A in luaha kan lêt hnuah chuan," Kârlehah khian palai ka tîr dâwn a nia," a tih chuan min tiphu chiang khawp mai.



"Engati?"



"Ka nupui ni tawh tùrin ka duh che tihna a nih chu, nghah rei vak a țùlna ka hre tawh lo."



"Mahse-"



"Min hnial i tum tihna a ni em?"



Ka hre lo. Pasal han neih leh ringawt pawh chu thil țha ber a ni ang em? Mi min lo ngaih dàn tùrte pawh, ngaihtuah tùr a va tam tak!



"Min hnial chuan ka rawn luhkhung che a ni mai. Min hnial nge luhkhung?"



A va naupang chhia tak! Min luhkhung ngam tak tak teuh lo, ka hmingchhiatna tùr thil a ti duh àwm lo e.



"Ka nuih i tiza e a."



"A va țha ve! Ka tîr ang a, a hma thei ang bera inneih ka duh bawk ang."



"Ka hna ka bànsan dâwn lo a nia," ka ti ve thung a. A ni chiah alawm, hmeichhia chu kan dinhmun a derthâwng a, hna kan neih hi a ngai bîk zual. Bâkah, Kenny-a hian hna nghet a neih loh tawp hi, a zin kual reng ang a...ka hna hi ka chân dâwn lo a ni tawp mai.



A nui huk a," I duh dàn le! Hrereng ang che," a ti sup a.



*******



Kan inneihna chu a hautak lo thei ang berin kan buatsaih. Kei phei chu pasal ka neih vawi khatna a ni tawh lo bawk sia, a zahthlâk ka tih vàngin ka huphurh. Kenny-a duh dàn erawh ka hnial chuang lo. Bawihbawihi pawh a rawn tel ve, hlim nui sângin min chibai a, chutiang bawkin Sangzela pawh. Mi fel tak chu an ni e, ka nuna ka theihnghilh tawh loh tùr mi pahnih chu an ni.



Honeymoon hmangin kâr khat  chhûng Bali-ah hun kan hmang. Nuam tak a ni, pawisa chu a lo nei tehmeuh e. Honeymoon hman a sawi laiin ka ûksàk vak lo va, hetiang hmun nuam leh lârah hian kan kal ka ring pha miah lo.



Kan haw dâwn zànah chuan," Thil ka hre chhuak zawk, Gold Digger dik tak chu ka lo ni," ka ti chhuak phawng a.



"Kei pawh ka ni ve tho," duat zeta min kuah pah chuan a ti sup a.



"Tunah chuan Gold Digger dik tak ka ni leh zual alawm. Nunsanga nuin 'Gold Digger' pawh min ti leh mah se, ka haw tawh miah lo ang," ka ti leh a.



"Gold Digger nupa kan nih tâk chu. Nang ka neih vàng che hian Gold Digger dik tak ka ni ve tho."



Ka làwm ém avàngin a hmuiah ka fawhsak zauh a.



"Kha tê chauh kha maw?"



"Ni nâng," tiin a nghâwnga ka bân pahniha kuahin ka fâwp leh vawng vawng a.



Min pawm nawlh a, kan khum lam chu min pan pui leh nghâlin," Zanin chu i muhìl hman dâwn miah lo a nia," a ti sup a.



Pawi chai lo.



THLA 2 HNUAH CHUAN


"Kenny, ka hna hi ka bànsan mai dâwn!"



Phone-ah chuan a rawn nui hawk hawk a," Bànsan i duh loh kha," a rawn ti thûm dãt a.



Nia, kha kha chu ka lo sawi ve mai pawh a, tunah chuan ka hre chiang ta viau. Nupa chu awm dùn tùr kan ni, min tihluih duh loh avàngin ka hna hi min thawh zawmtîr mai mai. School țha tak, changtlung tak neitu a lo ni reng a, chubâkah, motor workshop lian zet a nei bawk a, ka hna ve hi zawng, a lo tê neu neu e.



Aizawl nèn min kàrtawn sek hi ka duh lo, ka khawngaih. Bâkah, ka ngai, ka hmuh loh hlek chuan hrehawm ka ti ém ém tawh, a bul hnaia awm reng ka duh, a nupui ka nihna ang takin.



Ka hna ka chawlhsan zànah chuan inthlahna chawhlui kan kîlho a, thawhpuiteho nèn a hlim thei ang berin hun kan hmang, ka ngai reuh hlawm ngawt ang, an fel hlawm sia. Naktûk ațang chuan kan inhmu khât pharh tawh hlawm dâwn si a



"I story kha i ziak zo tawh tiraw?"



"Aw, belh hlek duh erawh ka nei a."



"I belh hlek dâwn chuan 'Gus gus' leh 'in-jish' kha uar hle ang che. Chuan, i story hming tùr eng nge niang?" tiin min zâwt leh a.



"Ka hre miah lo, i hre zâwk mial lo maw? I chhiar vek tawh tho sia?"



Bu nghat pah chuan," GOLD DIGGER," a ti ta sup a.



E, a țha ngawt ang chu, ka thawnthu nèn hian a inhmeh dâwn lutuk tlat.



"GOLD DIGGER," tiin ka phun sap a, hlim taka Kenny-a nuih sen sen pah chuan," Kan mu tawh dâwn em niang, ka pasal duh tak?" ka ti ta hnâp a.




******* F I N *******



(Phuailuai takin a lo tàwp leh ta. He story zet hi chu ka tluanpui lo hle tih ka hria; mahse, chhiartu fel tak takte in chungah ka lâwm tak zet zet, phunnawi lovin min lo nghâk țàng țáng țhin a, ka lâwm tak meuh.



Chuan, group ka siam ve a, min lo join-sak ve hrâm r'u aw, in fel em kha, in tel lo chuan engmah ka ni si lo)