☆PIALRÀLAH TAL☆ - 1 By Dingdi Pachuau

☆PIALRÀLAH TAL☆ - 1 By Dingdi Pachuau



Yesss...Naktûkah ka haw ve thei dâwn e. Vànneihthlâk deuhin ka cousin Lalnuna, office dàwrin a rawn zin phei a, naktûkah amah chauhin a haw phei dáwn a, kan khaw lamah a kual dâwn lehnghal, tihchi lutuk! Ka chhûngte ka phone nghál vat bawk a.


Zànah phûr zetin ka insiam a, sumo-a chêp zeta chuan phei ka inrin laiin car-ah, pahnih chauhin kan chuang dâwn a nia, a nuam dâwn. Lalnuna phei hi chu an unauah pawh ka pawh ber a, a țawng duhin titipui a nuam a, a hrehawm lo ang.


Ka insiam zawh chuan mu thei tùrin ka insiam a, mut hmunah chuan ka phone chu khawihin ka online ve rih a. Kan khaw  Țhalai Whatsapp group chu ka tih dàn ngai têin ka en leh hmasa ber, nuam ka ti ve tlat.


Mahse, an hming an dah duh dàn a maksak thei hlawm lutuk a, hriat pawh ka hre vek hlawm lo. An dp hmuh theih lohvin an dah hlawm bawk nèn, ka hriat chu an tlêm pharh.


Thu țha tak tak an post chu chhiarin ka'n like zuai zuai a, news ka chhiar leh par par bawk. Mut dâwn tak takah erawh chuan mut tui nân tiin youtube lama pasalțha thawnthu an chhiar ka ngaithla ve thung a.


Kan khuaah hian ka awm tam vak lo va, hetia hna chhe tê ka han thawh tâk hnuah phei hi chuan haw khât tawh tak ka ni, Krismas erawh ka hmang haw ve ziah thung. Chuvàngin, haw hun remchàn lai hian (school building siam țhat lai denchhenin) haw keuh ang, Krismas-ah daih asin ka haw leh tawh dâwn ni.


A tûkah chuan Lalnuna chuan hostel-ah min rawn lam a, ka lo inpeih diam tawh. Mi dang awm vete chuan min thlah a, thil ka hawnsak tùr min hrilh liam liam bawk a.


Kan tlân chak angreng a, kan tluang viau bawk. Zawi tê têin zai kan  ngaithla a, kan titi pah bawk. Thênzâwlah kan chàwl a, kan chawlh laiin Neihi'n min rawn call a.


"I lo haw phei dâwn tih min hrilh miah lo va," tiin min rawn chhuahchhàl nghâl a.


"Nia, ka nu chiah ka hrilh a."


"Thil ka chah che i hlau a ni chiang." Ni lo, chutiang a ni thlâwt lo, ka tum thut alawm. Lalnuna'n min sâwm lo se chuan a lo phei tih pawh ka hre tawp lo vang, Aizawlah ka la awm ngei bawk ang chu.


"Hlau nâng. Lalnuna a lo haw phei remchâng sia, lo haw nân a rem lutuk a," ka ti a.


"A nih chuan, eng emaw tak Thenzawla mi min lo hawn tal rawh," a ti leh hrâm.


Kan khuaa ka cousin neihchhun a ni a, ka lakah hian a pangchang ve țhìn. Kan inkàwmngeih phian a, kan inrual chiah lo nain kei aiin a lian a, a hmel pawh a chhe lo.


Hawnsak tùr ka hre lo kher mai. Ei tùr hawn ringawt ta ila, a lung a awi lo leh emaw kha a niang a... Ka ngaihtuah fê hnuah chuan handbag, mizo puan hmanga an siam chu ka va lei ta ringawt, a duh lo phal dâwn lo. Ka leisak a nih phawt chuan thil ho têah pawh hian a lâwm thiam hle a, thil leisak pawh a nuam țhìn rêng a ni.


A rawn call leh.


"Aw, ka lo lei che, duh loh awih loh," ka ti nghâl tâwng a, a duh lo phal dâwn lo tih chu ka hre sa tho.


"A ni maw? Awi, ka hmuchâk tawh lutuk!" a rawn ti chûl phawt a, chutah, zàwi deuh zâwk hian," E, ka rawn call leh che chhan tak chu maw, i first crush țhìn kha, a awm lai tak a nia, i rawn hmu thei dâwn a," a rawn ti sar sar a.


"I thaw ve...?!!"


"Thaw ve e, i hre mai dâwn alawm."


A ni tak tak maw?!!! Mala rawn haw lai tak a ni ve maw!! A va nuam dâwn tak! Ka phûr thar thut; mahse, a rei lo kher mai, bialnu a neih kha, ka hnual leh rawih rawih.


"A rawn chhohna a rei tawh em?"


"Kâr khat chu a awm tawh, a chhuk leh țêp tawhin ka hria, a nau sawi ka hriat."


A ni ngei ang, kan khuaah te zawng a awm rei peih ngût lo ang, a bialnu a awm ve si lo.


"Lungngai lutuk lo la, tûn țum chu chêt kan la dâwn nia."


Ka nui sak. He nu hi, a ti tak tak reuh ang tih ka hlau. Hmeichhiain mipa bêm hmasakte zawng, ka chek mil zâwng a ni lo. Bâkah, bialnu nei lai lehnghal, tihchi loh bur a ni tawp.


"Zâm teh, kan inah min lo hmuak ang che," ka ti ta daih a.


"Loh theih nâng, thil min lo hawn bawk sia," tiin a rawn nui awr awr a.


Ka nui var var, a lo nghâkhlel leh tawh teh ang chu.


Haulawng ațangin kan pêng a, kawng chu a lo chhe ve țan ta; mahse, mahni chènna leh chhûngte awmna pan ka nih miau avàngin kawng chhia pawh chu ka hmu țha sur vek mai. Rûlngân pa ang zar maiin a nia ka hmuh ni!


"Thingpui inin lo chàwl ve la?"


"Thlen a hmaa insàwmte chu a."


"Thlen hmaa insàwm hi a țha zâwk alawm. Bâkah, eng emaw hawn tùr pawh a awm maithei asin," ka ti a.


Zotui leh Chêngpui kan pèl phei a, kawng a zîm a, a chhukchho ta deuh hlek bawk. Kawng sîrah lìrthei lo ding ãwn tlãn ka hmuh chuan ka nui var var, kan khuaa mite hi an taima a, an lo/ huanah an feh leh tawh tih țawngka khera min hrilh ka ngai lo. Bike leh scooty-te hi an hmang ţangkai thei teh a nia, sum tam tak an phur chhuak țhìn.


Kan in pêngah kan tlân chho kual a, a la hma phian. Ka pa sikul kai erawh a lo bâng tawh a, kan thlen lai chuan inah an lo awm țhap.


Neihi chu a lo phûr khawp mai. Ka thawmhnaw dahna bag chu khai chhuakin," Hei, Boss lo haw chu ka lo hmuak chiang che a nia," tiin a nui ar ar a.


"Thil ka leisak vàng che a nih kha aw," ka ti lêt hlak a.


Lalnuna chu thingpui in tùrin ka nu leh pa chuan an sawm tlat a, lâwmthu hrilh pahin nimbu hawn tùr ka nuin a siamsak bawk a.


"Nu Mâmpui, mahnia rawn tlàn haw rek rek ai chuan titipui tùr an awm hian a khawharthlâk loh alawm. Bâkah, hei nimbu ka hàwn țeuh dâwn lehnghal a, ka lâwm lutuk,  ka nu pawh a lo lâwm ngawt ang chu," tiin ka nu chu làwmthu a hrilh lêt ve ta zâwk a.


"A, kan neih ve zâwng a nia, eitu tùr pawh kan awm loh hi," ka nu chuan a lo ti a.


Lalnuna kal hnuah chuan Neihi chuan," Thuai, ka hmu châk tawh a nia," a lo ti vat a.


"I sawi har ka ti rêng a ni."


Handbag ka hawnsak chu a duh thiam khawp mai. A to ve angreng a, a mawi ve phian rêng asin.


Zanriah kîl laiin ka pa chuan," E, taka, zaninah YMA-in hall-ah cheraw kân an zir dâwn asin, kal ve ang che, hnam làm thiam hi a pawimawh a nia," a ti a.


"Ka kân ve ang maw?" ka ti a, ka nui vak vak a.


"Vak vak a che. Chaw ei laiin nuih vak  vak loh tùr, chìn dàn mawi lo a nih kha. Bâkah, engah nge i kân loh bîk ang? Thiam tum tùr alawm," ka nu chuan a lo ti a.


"Ni lo, ka thiam dâwn lo lutuk, ka hlau e a."


"Thiam sa an awm bîk lo, hmun dang ațangin  thiam pahnih khat an lo kal a, chu chuan a zirtîr dâwn che u alawm. Mi dang pawhin an zir dâwn a, i rawn phei hun hi a fuh khawp mai," ka pa chuan a lo ti leh a.


"Inbual ka duh phawt asin le."


"Aw...i hman lutuk ang, i intleuh zawk ang a. Cheraw i kân phei chuan i thlan a tla leh tho dâwn asin, țha takin thiam ngei tùrin i zir dâwn nia," ka pa chuan a ti leh a.


Chaw ei kham veleh ka intleuh zawk a, vawiin lamah thlan a tla lêm lo nain intleuh hi a nuam hrim hrim.


Neihi'n min rawn sâwm a. Hall hi kan in bul field kiang maiah a awm vàngin mi dang awm tawh leh tawh loh chu a hriat theih vek a, dâr 7 vêlah chuan êng pawh a awm țan.


Khua a țha a, kan han thlen chhoh meuh chuan an lo awm ve nual tawh. Min zirtîrtu tùr mikhual 3 pawh ka hmu nghâl. Mipain cheraw kân min zirtîr dâwn maw?!! Ka nuih a za lutuk.


Ka rualpuiteho chuan," I lo haw elo? I dam țha em?" tiin min lo be sap sap a, hei tak hi nuam ka ti țhìn. Ngaihsak leh ngaihven nihna hmun hi hmun nuam a ni zêl. Tu'n 'ka ui ka âr' min tih lohna hmun hi chu a nuam tak tak thei lo ve. Ngaihsak nih hi nuam ka ti ve ropui si a.


Kan khua hi in 100 kan tling lo hret; mahse, a nuam tâwk ém ém. Mi tin kan inhre chiang a, anganwadi ațangin high school thleng a awm ve a, in hi tam lo mah ila mi chêng kan tam ve a, a nuam a ni tawp.


In leh a vêl leh khawlai a fai a, mikhual lo kalte pawhin nuam an ti ve viau țhìn. Kei pawhin ka chhuang ve țhìn a, khaw fai nih hi a hmai uanthlâk ve tlat.


YMA President-in min uap a, hnam làm thiam pawimawhzia chu sawiin tuna min zirtîrtu tùrte pawh hmun dang ațanga sum sênga an chah luh thu a sawi a. Chuti a nih chuan, ka thiam ve ngei a ngai dâwn a nih chu, nula dang pawh an tam a, thiam sa an ni dâwn lo bawk a, a zahthlâk loh deuh ang.


Mau tel lovin kan han zir phawt a, kân hrim hrim chu a lo har lo ve. Ka thiam ve nghal mai, Neihi pawh chuan a zir ve tho, ani pawhin a thiam nghal.


Thingtlâng lam àwllèn lai a la ni rih, hnuhpui thlawh an zo tawh hlawm a, chuvàngin țhalai kan tam, rama riak an awm lo tlat a.


Kântluang a nih vàngin a lo har vak lo; mahse, ka zei lo ve chiang. Ka kawr hák a lian bawk sia, a lêng duai duai mai.


"I va zei tak aw!!!"


Kan țhenawm tlangvâl Taia chu ka melh vak. Ka zei lo ve ém bawk a, ka haw chuang lo, bâkah, zir loh phah nân hman ka tum teuh lo. Kan President thu sawi khân min hneh tlat, ka thiam ngei ang.


"Ka la zei dâwn chauh."


Kan chàwl rih, ka hah lutuk ringawt. Ka infit lo tak zet, thaw kaah a leng lo dâwn alawm. Chawlh chhûng chuan  hmeichhe dangte nèn chuan kan inbe luam hlawm a.


"Ih, en nghâl miah suh aw, Mala a lo kal ve a nia," Neihi chuan ka beng bulah chuan a rawn ti sap a.


Ka awm dàn a dik lo nghal vekin ka hria. Ka hawi chhuak châk a, ka ngam meuh si lo. Eng angin nge a inchei tih leh a hmel hrim hrim pawh ka hmu châk, min lo en ve ang em le?


Làm kan chhunzawm leh tâk hnuah chauh ka en, min lo en ve chiah lehnghal a, a mitko a lo sàn ãk mai. Chhe lo lutuk, ka tui ral dâwnin ka hria, ka chhûng rilah hian phùrna nasa tak hian min rawn tur awt awt mai.


Dik tak chuan ani pawh hian ka star tih chu a hre daih tawh ngei ang, a chhan chu a bulah hian ka awm dan a dik lo vek zêl tlat a ni. Min en hian ka lài chhe vek zêl a, ani ang hetiang lama expert lutuk chuan min hre thiam dâwn lutuk.


Ka thiam tawh tehlul nèn, Mala a awm ve tih ka hriat ațang chuan ka lâm buai leh ta tlat. Bâkah, ka rilruin ka ngaihtuah hlei thei ta tlat lo bawk, kan President chuan," Ngaihtuah deuhin aw, in thiam tawh lutuk a nia," tiin min rawn fuih sauh sauh hlawm a, kei erawh ka lâktlâk ta hauh lo mai.


Ka chàwl rih ta tawp. Mi dang lâm chu ka lo en a, Neihi pawh a uar hnâp hnâp e, kei chuan ka uar thiam rih lo.


"Engtikin nge i lo haw a?"


A aw chu leh! A nalh ngai rengin a lo la nalh nia, bâkah, amah pawh hian tuna a țawng dàn hi a ti lui deuh țhìn niin ka hria. A mawi tih hi a hre ve tho a niang, tûn Krismas kaltaa min biak khân eng nge a sawi kha? " Aizawl chu i ngeih char char hle mai," min ti a nih kha. Khata min biak kha, tunah  min be zawm leh chiah.


"Vawiin khân."


Sawi chhunzawm tùr ka hre tawh lo. Ka lai leh hû tawh, en pawh ka en ngam leh tawh lo.


"Chuan, engtikah nge i kal leh ang?"


"Ka hre rih lo le. Kârleh lamah a ni maithei."


"Ummmm, zàn lènna tùr ka nei ta e."


A ti ve mai mai. Bialnu a nei a, Krismas hmasa pawhin a rawn hruai tawh ngei kha, chhe lo bawn tawp ang chi kha a ni a, a la țhen miah lo ang.


Mut hmunah chuan Mala chu ka ngaihtuah  char char. Kum 12 ka nih ațangin ka star țan tawh kha a ni miau mai a, a pa hi High School head a nih vàngin an khawsa thei a, a pa chhûngte leh a nu chhûngte hi khawsa thei tak tak vek an ni. Amah a lo chhe lo nèn, ngaizâwngtu a nei thei hle a, hei hian a tilêrh zo vekin ka hre țhìn. Hmelțha na na na hi chu an lo luck a, lêrh vak lo pawh hi an luck miau chuan an lêrh phah duh ka ti ve tlat.


Fapa mal niin a u hmeichhe pahnihin khaw dangah pasal an nei ve ve tawh a, kan vêngah hian ani pawh hi a awm tam lo khawp mai. A pi leh pute hnênah, Lungleiah a awm tlângpui. Thingtlânga awm hi hrehawm a tih deuh ka ring țhìn, a pa pension hunah chuan Lunglei emaw Aizawl lamah emaw an awm daih ang, a pa hi Lunglei chhuak a ni si a.


Ka pa hi Middle school head a ni ve thung a, ka nu hi Primary school-ah a thawk ve thung. Ka pa hi Ralvawng khaw chhuak a ni a, ka nu erawh Sèrkàwn lam a ni thung. Kan vênga ka nu rawn thawk hi ka pa hian a lo bitum nghal chat a, Pathian ruat an ni ngei a niang, rei pawh rial lovin an innei ta rêng a. U mipa leh hmeichhia ka nei a, ka u mipa chuan nupui neiin, a hna thawhna Bûnghmunah a nupui fanaute nèn an awm. Ka u hmeichhia pawhin pasal a nei tawh a, ani ve thung hi chu a pasal hi hmun hrang hranga sawn kual țhin a nih vàngin awm hmun nghet an nei lo, tunah erawh Sialsûkah an awm.


Zîngah ka nuin min rawn kai tho. Nizàna ka cheraw kân hah ve nèn, ka lo harh thei rêng rêng hlei nem le!


"Delh hlum sa ei i tum a ni maw?" tiin ka pain min lo fiam a.


"Ka harh thei miah lo nia."


"A niang chu, nizànah i lâm nasa a. I thiam ngawtin ka ring."


"Paaaa..."


"Bawihi chu a zei tih ka hre sa alawm," ka nuin a lo tih ve phei chuan sawi tùr ka hre lo va, ka nui vak vak ringawt.


"Het..."


Inthiam lo deuhin ka hmui ka hup a, ka nui tàwp riai riai. Ka nu hi a strict țhìn, 'nula nih chuan nuih vak vak a mawi lo' tia min hrilh țhin kha ka lo theihnghilh leh hman tawh a. Kan chhûngkuaah chuan a pawi chuang lo va; mahse, kan chhûngkuaa ka tih țhin chuan mi zîngah ka lo theihnghilh thei tiin nuih vak vak hi khap a ni.


Chaw ei lai chuan ka pain," Vawiinah in hnuaiah hna an thawk dâwn a, i lo vil mai loh chuan, i peih ang tiraw?" a ti a.


"Eng nge tih tùr? Tute maw rawn thawk dâwn a?" ka lo ti hâ a.


"Ban thlang lam hual khuan lung rem ka duh a, chumi ti tùr chuan hlawhfa 3 an rawn kal ang. Thingpuite i lo pe ang a, chhùnah lo chuan ka rawn chhuk hman dâwn si lo," a ti leh a.


"Tute nge lo thawk dâwn?"


"Lung mistiri maw le," ka nu chuan a lo ti a.


"I pa Lalate pafa leh Sangkima an ni ang," ka pa chuan a ti leh a.


Hm, lo thawk rawh se, thingpui tui tâwkin ka lo siam ang a a ni mai alawm. Ka enpui thiam ve dâwn chuang lo, ka țhutpui peih hlei nem.


Ka pate chhuah hmain in hnuai lung rem tùrte chu an rawn thleng a, Pa Lalate pafa hi kan khuaah chuan an thiam ber a, an indaih lo țhìn viau bawk a nih kha. Sangkima erawh ka hriat ngai a ni tlat lo, ka hmuh ngai àwm pawh ka hre lo ka ti.


Thingpui hâng ka lo pe hlawm phawt a, in chhûnga lo luh pawh an duh lo. Veranda-ah chuan țhuin an in a, an in zawh veleh in hnuai lamah chuan an chhuk thla nghal.


In ka tih fel hnuah ka zu chhuk ve a, enpui ngaihna erawh ka hre lo khawp, ka zuk ding ve deuh reng a, an tih țan dàn tùr pawh chu ka hre thiam chuang lo.


Mala a rawn lût. He pa hi, engmah a thawk lo a ni maw? A rawn kal chu ka phûr viau nain ka lai chhe leh dâwn khawp e.


"Nula rìm tùr ka rawn zawng a."


Nui chung hian," An vâng viau lo maw?" ka lo ti ve a, ani chuan," Hei,  ka hmu ta chat alawm, zawn zawn hnuah chuan a tàwp a tàwpah chuan ka hmu ve ta e," nui sak chung hian a ti a.


Ka rin aiin ka lai chhe lo ve. Țawng duh mi hi ka ni ve hrim hrim a, ani pawh țawng duh lo tak a ni bîk lo va, sawi tùr chu a awm ve zêl e.



*HMANGAIH TAKTE CHAUH LO CHUAN THINLUNG AN TINA NGAI LO, I THINLUNG HLIAMTU NGEI CHU I HMANGAIH CHU A NI*