☆PIALRÀLAH TAL☆ - 2 By Dingdi Pachuau

☆PIALRÀLAH TAL☆ - 2 By Dingdi Pachuau


Chhùn thingpui in hunah angah chuan hna thawkte chu ka ko va, Pa Lala chuan min lo chhàwn a.


"Kan lo chho thei țêp, kan laklawh deuh hlek a."


Mala nèn chuan kan chhuk ve a, ka pa pawh a lo awm reng tawh niin. A chhuk lai ka hre miah lo, a tlang thla nghâl tih hriat reng.


An lung rem chu ka en a, ka hre thiam ve țan ta deuh e. A àwm ang ve tawh lutuk bawk.


Thingpui in hunah tak tak chuan Mala pawh a haw ve ta. Nuam lo a ti ve deuh pawh a ni maithei, bâkah, tih tùr nei angin a insawi, eng tak thawk ang maw? Hna a thawk tak tak pawhin ka ring lo, hna thawh tùr a nei thlâwt lo.


Thingpui in chawlh lai chuan ka pa leh Pa Lala chuan thawh chhoh zel dàn tùr chu an sawi a, Pa Lala fapa Mama leh Sangkima chu an ngawi reng thung. Pa Lala leh ka pa hi hnam khat an nia, kan inen chhûng deuh.


Mamate pahnih chu ka melh dùn zoh zoh, biak dàn tùr pawh ka hre chiah lo nain thingpui chu thlit belhin," In țeuh r'u, in thawk hah si a," ka ti a, Mama chuan," A tâwk tawh, ka puar lutuk," tiin no chu a la sawn ta nghal a. Sangkima pawh chuan a lo duh tawh lo.


"Ka hmu ngai miah lo che, kan khuaah hian i rawn zin tihna em ni?" tiin ka zâwt ta nge nge a.


Ani chuan min melh zauh pah chuan," Zin lo ve-" a la sawi mêk lai chuan Mama chuan," An lo awmna a rei tawh alawm," a lo ti vat a.


Mama chu ka en hâ a, Sangkima chu en leh nghalin," Kan khuaah hian in lo awm maw? Ka va hre ngai si lo che, ka hmuh àwm che ka la hre hauh lo mai," ka ti leh a.


"Kum khat zên zâwn chu a ni tawh."


"A lo nih tak chu, a bengvàr loh theih hle mai. Khawi laiah nge in awm a?" tiin ka zâwt zél a.


"Thlànmual vêng lamah khian."


"Pu Siama in hnuai an luah alawm, i lo haw chhunah pawh hian i chhuak khât lutuk a, i bo vek tawh hialin a nia ka rin ni," nui chung hian Mama chuan a lo ti leh a.


"Nia tiraw? Khawiah nge nangni in awm ve kha?" tiin ka'n tuihnih hlak a.


Tlai bànah chuan ka pa chuan an hlawh tùr a pe nghâl ve ve a, an kal hnuah chuan," Pa, engati nge an lo thawk tawh dâwn  nange? A laklawh tehlul nèn," tiin ka zâwt nghal a.


"An lo mamawh thut thei a."


"Awihawm loh e."


"Ngati maw? I pa Lalate kha chuan lo mamawh lo tehrêng pawh ni se, Tlangvâla kha chuan a mamawh ngeiin ka ring, inhlawh reng reng țhìn a nia," a ti duah a.


"Ka lo hre ngai miah lo nia!"


"A awm vak ngai lo, hmun dangah inhlawhin a chhuak țhìn alawm, a taimâk hmel khawpin ka hria," a ti leh a.


"Hna a thawh loh chuan tuin nge pawisa thawk chhuak ang? Keini pawh hei i pa nèn kan thawk chhuak a, nuamsa takin lehkha i zir theih phah a, pawisate pawh i lo hlawh chhuak ve thei tawh a," ka nu chuan a lo ti a.


"Nia, ka vànnei tak tak. Nu leh pa fel tak, hlawh nei ve ve ka nei che u a."


Ka pa chuan," Um, kan fel sia, chaw ei kha i siam tawh mai dâwn em niang? Zànah lèn lawk ka duh àwm si a," a ti a.


Ka nu nèn an léng a, Neihi a lo léng a, vawiina Mala lo lèn thu ka hrilh chuan a meng phâwk chiam a, maktih hmel zet hian a hmui chu a'n hup vêl a.


"A va fuh dâwn tak!"


"Over suh, a lo kal mai mai alawm."


"Nuam i ti àwm mang e!"


"Ka melh țha ngam lutuk lo a, bâkah, bialnu a neih kha. Nuam lo tih viau ka thei lo alawm. Bâkah, a dang pawh a nei thovin ka ring e a," ka ti a.


"Lêrh ve bawk sia tiraw?"


"A luck ém a ni."


A phone chu a hmet nuap nuap a," En teh, a bialnu hi, a inla chhe lo mai mai," tiin IG lama nichin deuh lawka a pic upload  chu min hmuhtîr a.


"A'n tag ngei bawk a," a ti leh zat a.


IG lam hi ka khawih ve vak lo va, ka peih ve lêm lo bawk. Whatsapp leh Fb hi ka duhtâwk viau, Whatsapp hi nuam ka ti ber.


"Mala comment chhiar ang," tiin a la lêt leh a, a chhiar ri ngei bawk a.


"I star Mala chuan 'Beautiful lady, mysm' a ti a nih hi, emoji pawh a tlar țhût mai. I rilru a nâ em?" tiin min rawn en a.


"A ho e."


"Nia tiraw? Ho lutuk!!"


"A nuam duh ngawt ang chu!"


Neihi chuan min rawn țhut hnaih sauh a," Kan bêm ve chhin dâwn em niang? I star rei ve tawh sia?" thutak zet hian a ti a, min en kar bawk a.


"Tihchi nâng!"


"A duh àwm che e..."


"Bialnu nei lai ngaihzàwn ka duh teuh lo. Bâkah, a bialnu a chhe lo bawk si, ka zak sa e a. Hmeichhia zâwkin bêm hmasak phei chu, ka thi thei hial ang," thutak zet hian ka lo ti ve a.


"Ho e."


"Ho lo."


Mut hmunah chuan ka ngaihtuahna ka kàwm a, mi fate vànneihzia ka ngaihtuah a. An duhzâwng tak bialnu bialpa an nei a, mi hriatah pawh an zak chuang lo. Social media lama tihlan pawh an zak chuang lo a nia, kei hi nei ve ta ila, ka zak ang em? Nichîna Mala bialnuin a thlalâk Mala a tag angte khân ka bialpa ka tag ve ngam ang em? Caption lah kha...ka ngam pekin ka ring lo.


Bialpa chu ka nei ve tawh, pahnih ka nei tawh; mahse, ka țhen ve ve tawh bawk. Tleiràwl lai tak tak khân a ni a, hmelțha ka tih kha ka duh deuh mai chu a nih kha maw. Tunah hian ka la ni reng ang em le?


Sunday-ah ka inkhâwm a, min lo be ve nak nak hlawm. Tlai lamah ka lêng chhuak ve a, dàwr kal pahin in sa tharte ka en kual a, an lo rel eih uaih tawh hlawm a. Kan khua pawh in leh lo lamah hma kan sâwn zêl e, kan zahpuiawm lo tawh lutuk ringawt. Assam type fel fai tak tak leh concrete building a ni ve tawh hlawm a, in chhe tak a vâng tawh.


Dàwr chhûnga ka awm lai chuan Mala a rawn lût ve hlawl.


"Nula chhe lo deuh awmna ka va hre thei tak! I kal tih ka hmu miah lo," a rawn ti nghâl ringawt a.


Ka nui ringawt.


"Min nuihzat a ni maw? Ka tifiam lo tak tak."


Dàwr ațanga ka chhuak chu min zui chhuak ve nghal zat a," I haw nghal dâwn lo tiraw? Lêng kual mai mai ila? Min lènpui duh ang em?" a ti sap a.


A aw chhuak chuan min hneh khawp mai. Min sâwm lo pawh ni se ka kalpui duh tho ang chu, vah kual ve ka duh miau a.


"Khawiah maw kan lèn ang?"


"Park-ah."


Khawi lai park nge a sawi le? Park kan neih àwm ka hre hauh lo.


"YMA Park-ah, a nuam reuh lutuk. I la kal lo tih ka hre mai."


E, ka hria; mahse, ka la kal lo chiang, thlanmual bulah a awm tih chauh ka hria.


"Kal nâng, kan haw chhun Krismas-ah lah lêng hmanin kan khawsa bawk si lo va."


"Um, chuti, hun țha tak a nih chu, kan khua hi ka'n fanpui tak tak teh ang che," nui chung hian a ti a.


A châng hi chuan min duh ve deuh hian ka hre țhìn, kan inhmu tam lo va, kan inhmuh ve chhunah pawh hian min biak hrâm loh leh min nuih sak sak țhìn, min ngei ang hmelin a awm ngai lo.


Thlanmual bul chu a lo ni ngei. Nula tlangvâl dang pawh an lo lêng ve ngei, a sawi ang ngeiin a lo nuam reuh. Țhutna mau hmanga siamah chuan kan țhu chàwl vang vang a.


Ka bulah a țhu rùn si a, a mi uap a nâ ka ti. Ka lam hawi zâwngin a rawn țhu bawk sia, hawi ngaihna a vâng, a rûkin ka lài lutuk.


"A nuam reuh hle mai!!"zahzélah la ti ta ringawt.


"A hmun hi a rem phian a, khu laia Thlado kûng pàr hunah phei chuan a mawi ngawt ang," a lo ti ve a.


Naupang an rawn kal bawk a, an ri chèl chûl a, boruak an rawn tizângkhâi deuh.


"Aizawlah i awm rei tawh sia. Helama lo phei hi i tum rih lo em ni? Nge, nuam tih chhan riau i nei zâwk?"


"Ka inhlawh duh rih miau si a, hna nghet neih bawk si loh chuan kan hmuh ang chhun ka thawh mai loh chuan. Ka awm rei ve ta a, nuam ka ti ve tawh lutuk, țhenrual kan lo nei ve tawh bawk a," ka ti duah a.


"Țhenrual lo deuh te pawh...?"


Zak rilru tak chuan ka nui ringawt a, mi dang lêng vete chuan min en duh riaua hriatna ka nei pek. Ka star tih hi an hria ang tih ka hlau, ka awm dànte hi ka thup thiam lo ropui si.


"A teuh lo e!"


"Ka awih chiah lo deuh."


Chutiang lam a sawi vàng chuan nuam lo ka ti zual. Bialnu a nei tih ka hre ve kur bawk sia, min duh ang deuh hian awm lo tal se ka ti, min biak dàn hi tlêm chuan 'hope' a awm ve deuh ka ti lo thei lo.


"Engtikah nge i kal leh dâwn?" ka ti ta daih a.


"Ka kal țêp."


"Helamah hna i zawn ve tawh ka ring deuh a nia."


A ngawi vang vang a, chutah, min rawn enin," Aizawlah ka rawn zawng ve mai dâwn em niang?" a ti ta a.


"I zawn a ngai lo ang, i tling sa vek ang."


A nui sak. Mala hi chu lehkha a thiam thei a, Delhi-ah lehkha zirin a awm deuh char char a, hna hrâm a thawk ngai lo. Hmun hrang hrangah hna thawkin a awm kual a, IT lam a tui a, thiam pawh a thiam.


"I ngaih ang chuan ngaih theih ve ka châk mang e."


Neihite an rawn lang ve. Min rawn hmuh chuan an rawn ehem tliar tliar a, he nu tak hi chu aw, a châk lo ang.


"I zak a ni maw?"


'Zak lo' ti ringawt mah ila ka biang sen awp awp chuan a tichiang vek dâwn si a, ka chhâng lo law law.


"I zahzum dàn reuh chu ka duh chi tak," a la ti zui. Ka sen nasa sauh ang chu. Ka rilru chhûng rilah erawh chuan ' Bialnu a nei' tiin ka inhrilh mawlh mawlh, a mi fakna 'ho' mai mai vangin a lakah beiseina ka nei thei lo ang.


"Kan haw tawh dâwn em niang?" Min hmu an awm nual tawh sia, nuam ka ti lo. Bâkah, beiseina beidawnthlâk ka lo nei palh ang tih ka hlau.


Kan haw lamah chuan Mama, Pu Siamate in hnuai ațanga rawn chhuak chiah ka hmu. Sangkima'n a rawn zui chhuak bawk, an lo inkàwm țhìn a nih dâwn hi.


"Kha, in lêng elo? I bo ém lo maw?" tiin min lo fiam zat a.


"Bo țêp."


"Vêngtu i neih țhat hmel em kha," tiin a nui țhâ a, Mala pawh chu a nui ve sak tho.


"Nia."


Zànah chuan kan inkhâwm leh vek. Kan khuaah hi chuan ka inkhâwm zat zat, Aizawlah chuan ka peih lo thei lutuk a, sunday zîngah bâk ka inkhâwm ngai lo.


Nula inkhâwm kan țha viau, tlangvâl lam erawh an țhutna a khât pharh mai. Kan bàn chuan chiang takin tlangvâl senior 4 inkhâwm chu ka hmu, la tleirâwl deuh phei chuan zàn inkhâwm hi an tum lo ve hrim hrim a niang.


Thawhțan zànah kohhran țhalaiin hla kan zir a, thiam ve hrim hrim ka duh vàng chauhin ka zir. Zir pawh kan tam ve deuh, ram riak an awm loh lai a nih vàng a ni maithei.


Kan hruaitu chuan," Kan thiam hma theih nân a hran țheuhin kan part kan zir phawt ang, a hnuah kan sa tlâng chhin dâwn nia," a ti a. Kei chu contralto-ah ka awm, ka aw hi a chak lo lutuk a, ka pi ka chhùn a, a dik lo vek. Aw țha tak neih a zai thiam tak nih ka châk thei tawp.


Keini part chuan kan thiam thuai. Tenor chuan an thiam har deuh hlek a, kan part țheuh chu kan sa tluk tluk mai. A hnuah kan zavaia kan sak chuan a inpawlh mawi ve riau, Bass lam lah an rawn ti thûm thiam khawp mai.


Haw kawngah êng kan neih loh vàngin  Mama leh Sangkima'n min thlah. Mala chuan hla a zir ve miah lo, a tel ve thei tak tak dâwn si lo ang a, a peih lo a ni ngei ang.


"In lo thawk leh dâwn em?" tiin Mama chu ka zâwt a.


"Ka hman rih lo, Dîlah kal ka ngai. Ka pa leh hei țhianpa hi an rawn thawk leh ang, tiraw țhianpa?" tiin Sangkima chu a'n zâwt a.



"Aw, thawk ang."


"Mama awm loh hlànin ei tùr tui tâwk ka siam ang che u, a rawn tel lo inchhìr ram ram tùr khawpa tuiin aw niang naktûk chu," ka ti a.


"I siam tui loh vaih, țhianpa hi ka lo zâwt chhin ang."


"A tui dâwn, i ei châk viau chuan lo thawk la?"


"Ei châk lo ve!"


Neihi chuan,"U Mamate chuan  tlai lamah sangha tui tâwk an hmeh thung dâwn alawm," a lo ti ve a.


A tûkah chuan Pa Lala leh Sangkima chauh an lo thawk tak tak a, Mama chu dîlah a kal. Ka thiam ang tâwkin ka lo be lûmlâm ve a, Sangkima hi chu a țawng tam tehchiam lo hrim hrim a nih dâwn hi. Ka biak pawhin a rùl tâwk ang deuh chauh bâkin min chhâng mang lo, a mizia ve a niang.


An lung remna bulah chuan ka lo awm ve a, an helper-ah ka lo țang pah. Pa Lala chuan min tîr mai a, thil lâk harsa lo tê têah chuan; mahse, Sangkima erawh chuan min tîr miah lo, nuam lo a ti ve a niang.


"Hla in ngaithla duh em?"


Bluetooth player chu ka chhawp hnai sauh sauh a, ring vak lovin ka play-sak. A chângin ka lo zàwm ve a, a chângin ka țawng leh rih bawk a, an khua chu a har vak lo ang.


Zànah cheraw kan zir leh. Mikhual min zirtîrtute kha chu an haw daih tawh a, thiam hman vek an lo awm a, min zirtîr leh nâw nâw a.


Mala a awm lo bawk a, ka lâm nasa, ka thiam chak bawk. A awm kha chuan ka khawr tlat a, ka bahlah tlat zêl.


"I va thiam tawh ve!"


Sangkima chu ka nuih sak. A lo tel ve reng tih ka hre miah lo, a khâwngtu zîngah a lo țhu ve reng niin.


"Ka lâwm e."


"In thiam chak lutuk, zan tin zir thei phei ila chuan in thiam ngawt ang," kan hruaitu chuan a ti a. Mi a fuih nasa țhìn a, mi a sawisêl ngai lo. Sawisèl nghál ngawt ngai thei lo mi ka ni bawk sia, ka mil chî tak a ni.


Kan chawlh laiin Mala chu a rawn kal leh. He pa lah hi, rawn kal tlai thei lutuk mai. Khâwn hi zir ve tùr a nia, a thiami bîk àwm tawp si lo.


"Lám nasa em?" tiin min rawn zâwt nghal a.


"Nasa e, i khâwng ve dâwn em?" ka lo ti var a.


"Dâwn nâng, hetiang lam hi chu ka chikat țhak."


"Zir la, i thiam hrim hrim ang."


"I lâm en ka duh zâwk."



*MIHRINGTE'N KAN PÊK CHHUAH HMANGAIHNA HIAN TÀWP CHIN A NEI ȚHÌN*