☆PIALRÀLAH TAL☆ - 3 - 13 By Dingdi Pachuau

☆PIALRÀLAH TAL☆ - 3 By Dingdi Pachuau



Ka lâm min en chu nuam ka ti. Tunah phei chuan ka bahlah ta bîk lo, ka uar thiam ve deuh tawh a, ka inringtâwk ve tawh bawk. Ka tisual tawh lo, ka hah deuh e tih mai loh chu.


Step hnih chiah kan bâk tawh. Zàn dâr 9:30 a rîk chuan kan bâng ta a, a dang chu zan danga zir lehah an ti, kan thiam chak khawp mai.


Mala chuan min thlah haw ngei nia, kan in a hnai a, kan thleng hma. Ka chhûngte an lo la meng a, lêng rih tùrin ka sâwm ve ngial a; mahse, zàn rei lamte a nih tawh vàngin a lo lêng tawh lo.


Ka rilru a nuam deuh veng veng ringawt nia. Min duh thu min hrilh pawh a ni si lo va, rilru nawmna deuh tùr pawh a awm lo rêng rêng; mahse, a nuam ru tho si.


A thuhrimah bialnu a nei tih ka hre reng si a, hope ka nei tho si hi a fuh zân lovin ka hria. Single chu ni se ka hre thiam, kan vênga mi zawng zawngin a bialnu pawh kan hre vek ang chu tih laia lo beisei ve tlat mai hi a fuh lo.


Tùkțhuan ei laiin ka nuin," Bawihi, Mala hian bialnu a nei tih i hria tiraw?" min ti ta chat mai.


"Aw, hria e."


"Mi sawi tùra i awm loh hrâm ka beisei."


Ka pa chuan," Aw, nula tlangvál an nia, an inkàwm ve a ni mai a," a lo ti a, ka nu chuan," A dik alawm; mahse, ani kher hi chu mâkpa atân ka duh chu a ni miah lo a nia. Biak chhiat tùr ka ti lo; mahse, kawm dàn tâwk thiam tùr aw," a ti leh charh charh a.


"Nu, bialnu a nei reng alawm le!"


Ani lah chuan," Chuvàng tak chuan mi sawi sep i kai ang tih ka hlau alawm," a lo ti leh a, ka ngawi ta.


Ka nu duh loh zâwng bialpa neih hi a hlauhawm a nia, ka ute erawh chu sawrkar hnathawk niin pakhatin  hnathawh nei a nei bawk a, an hnu chhui ve tùrin min duh. Ka nu leh pate hian min hmangaih a, thil țha ber nei tùrin min duh, chutiangin pasal țha tak neia hlim taka awmtîr min duh tih ka hria, an tih tùr, an rilru tùr pawh a ni rêng, an fanu ka ni miau a.


Mahse, duhzâwng ka nei ve bawk ang chu. Hmangaihnaah phei chuan duhthlan theih a ni àwm si lo va, ka hmalam hun tùr hi ka la hre rêng rêng lo. Tu tak tawng ve ang maw? Ka chhûngte duhzâwng a ni ang em? Ka nu duhthusàm hi hmu ve ang i maw?


Mala hi a țhat lohna ka hre hran lo. Hna a nei a, a la nghet kher lo a ni maithei e. A fel a, a luck a, an awmthei bawk. Mi awmthei chu tuin nge mâkpa atân duh lo ang? Bâkah, a la hmelțha zui. Lehkha thiam a ni a, sawisèlna tùr ka hre lo. Ka nuin a duh lohna chhan tùr àwm ka hre thiam lo. Ka bialpa pawh a ni lo va, ani fel ta chuan min be vein a rawn lêng ve a ni mai, thil dang a awm lo.


Ka star-na a rei tawh ém avàng hian bànsan a har ka ti. Ka hmuh apiangin ka rilruah a thar ziah, bialnu a nei tih ka hre reng chung pawhin ka la 'beisei' deuh tho chu a nih hi.


Nilaithawhțan zànah cheraw kân zirnaah chuan ka kal leh a, Inrinniah phei ka tum tawh vàngin ka la thiam loh step chu thiam ve hman ngei ka duh. Mala pawh a tìr tê ațangin a rawn kal ve tlat.


"Zei leh dâwn mang e!"


"Naa, va sual tak!"


"I zei ber ka ti tak tak! Zanin chu video-in ka lo capture tawh ang. Lunglèn chânga en atân."


He pa hi, a va tizahthlâk tak! Min duh ve deuh hlek loh chuan min biak tak tak peih ka ring lo, tlêm tê chuan 'eng emaw' chu a awm ve chiang a ni.


Dârkâr 1 vêl kan làm hnuah kan chàwl a, a lum lutuk chu pâwnah kan awm rih a. Mala pawhin min rawn zui ve zat, ka bulah a rawn ding ve a.


"Naktûkah ka kal tawh dâwn a, khawngaihin, i number ka nei thei ang em?"


Țhalai group-ah pawh kan awm tlâng reng sia, en ve mai àwm, keiin ka check peih tehlul nèn. A  number mai ni lo, a dp a thlâk leh thlâk loh chenin ka hre vek țhìn a nia.


"I duh phawt chuan le!"


A phone min pêk avàng chuan ka lo la a, ka number chu ka type a, ka pe lêt nghal a.


"Engtin nge i hming save nge i duh?"


Nui chung hian," Ka hmingin," ka lo ti var a, ani chuan," Lâm-zei-chhe-lo-te-i tiin ka save teh ang," a lo ti thung a, fiamthu mah ni se ka hmai a sa pup pup mai.


Kan làm leh hnuah chuan a awm leh tawh lo, a haw tawh a niang, ka hnual deuh rawih. A tàwp thleng awmin min thlah leh ka ring deuh a nia, ka beisei sâng mah mah. Ka inhau ru mawlh mawlh mai.


Ka number kha min dîl ve sia, min rawn call emaw min rawn text emaw ka ring rilru deuh ringawt a; mahse, a reh vung vung. A kal ta ngeiin ka ring a, ka rilru a nguai, a awm loh chuan kan khua pawh a nuam lo rawk hialin ka hria.


Kan in hnuaiah lung an rawn rem leh a, naktûk maia ka phei tawh dâwn vàngin ka insiam pah deuh a, hnathawkho ka vil pah bawk.


Chhùnah Siama, kan thawhpui ka phone a, ani chuan," E, rawn call che ka tum lai tak. Kârleh chu i la châm thei, partition wall leh chhuat siam țhat a ni leh dâwn a," a rawn ti nghâl vat a.


"A ni maw?!! A va tihchi ve!!"


"I lâwmin ka ring rêng a ni. Mi dang pawh ka'n hrilh ve hlawm ang e, a la tlai chuang lo nain ka hriat lai hian ka phone loh chuan ka theihnghilh palh ang," a ti a.


"Aw le, ka lâwm lutuk e."


Chhùn thingpui in lai chuan Mama chuan min fiam zuk zuk a, tihngaihna ka hre lo lutuk a, ka lei ka chhuah khum vak ringawt.


"Naktûk chu dìlah lo kal ve la, lunglèn a zia deuh thei ang chu!" a ti a.


"Ka kal ve châk tak tak! Sangha i man dâwn tihna maw?" ka lo ti vat a.


"Aw, huan hnim kah pahin. Lo kal ve tak tak la?"


"Mi dang kal tùr an awm ve em?"


"Hei țhianpa hi a ni mai, thlâmah chhùna ei tùr chaw kan chhùm ang a, a nuam duh asin," a ti leh a.


Ka hria, chaw ei pawh a tui duh. Hmân deuhah kan la têt deuh laiin vawi khat kan kal tawh a, kha bâk kha ka kal leh ta lo vang vang.


"Nute ka lo dîl ve phawt ang aw, ka châk lutuk!"


An lo phal ve mai; mahse, ka nu chuan fîmkhur tùrin min chah a, mi zînga awm dàn mawi, hmeichhe awm dàn tùr min hrilh leh nghâl zat bawk.


Ka phûr khawp mai. Ka phûr lutuk a, Mala a awm lo tih pawh ka lo hrechang tawh lo. Message a rawn thleng a, number ka save loh ni mah se, tu nge a nih chu ka hre hnehsawh lutuk.


*Zanin chu, khua a har hle mai, ka ngai riau che* a rawn ti a nih chu!


Ka phûr lutuk chu ka khùr deuh dar dar hialin ka hria. A message chu ka chhâng thei lawk lo, ka phûr lutuk a ni.


*Induh thiam hle mai* a rawn ti leh a.


*I thleng tluang maw?* tiin ka chhâng daih a.


*Tluang e, nang engtikah nge i lo phei dâwn?*


*Kârleh lamah*


*Naktûka i rawn phei ka ring a nia*


*Nia, ka tum dàn chu a nia;mahse, an la hman chhuak lo va*


Thil ho tê tê kan sawi. Ka rin aiin min text rei peih daih, a tàwpna siamtu nih ka thiam lo. Min rawn text hmasatu a ni bawk si a, tàwpna siamtu zâwk nih chu a polite loh thlâk ka ti deuh tlat.


Inrinni ni chhuak chu a țha khawp mai. June thla a ni dâwn tawh a, ruah a sûr thut thei tho. Bâkah, weather forecast-ah ruah sûr theihna chance kha a tam tlat. Tûm kum chu  ruahtui a tam dâwn a niang, zànah rawn thlen thut a chîng tlat.


Ka helhhawlh avàngin tûkțhuan ka ei tlêm lutuk. Chhùna chhum tùr buhfai ka keng ve a, artui nèn. Min rawn sâwm a, Chite lui lamah chuan kan liam thla ta a, kalkawng chu chhuk vek a nih vàngin kan kal chak thei viau. Titi pawh kan titi rei vak hman lo, kan thleng thuai mai.


Thlâmah kan indah fel a, Thlâm chu ka têt deuh laia mi kha a ni tawh lo, a lo thar tawh. Nawm pawh a nuam, thlî erawh a vâng.


"Chaw i chhùm thiam ang em?" tiin Mama chuan min zâwt a.


Bêl lian vak lo pathum a awm a, dekchi pahnih nèn. Bêla chhum a ngaih hmel si a, ka la chhûm ngai miah lo.


"Ka la chhûm ngai miah lo," tiin bêl chu ka en a.


"Chuti, țhianpa, i lo bàwlpui mai dâwn em niang? Keiin hlo ka lo kâp ang a, sangha ei tùr erawh kan man dáwn u nia, a țha mai em?" tiin Sangkima chu a en zauh a.


"Um, a pawi lo. I hah hunah ka chhâwk ang che."


Mama kal hnuah chuan mei a tinung a, tui a chhuang nghal. Tih ve mai tùr ka hriat loh vàng chuan a che vêl chu ka lo en reng ringawt.


"Eng nge ka lo tih ve dâwn?" tiin ka zâwt a.


"Lo țhu mai mai rawh, mipa ka awm alawm," a lo ti thung.


"A, a tihchi loh."


Chêtpui ka tum chuan a phal tlat lo. A che zung zung, fel thlap tho si chu makti zetin ka en ru deuh reng a.


"Mama nèn hian in inkàwm ngeih àwm hle mai," tiin titi ka țan a.


"Aw, kàwm ngeih khawp mai."


"In in a inhnaih pawh a ni si lo."


"Țhian tùr hi chu, mak ve deuh a nia."


Ka rin aiin a țawng ve duh, nui hmel erawh a pu khât a nih àwm hi. A chanchin ka hre lo lutuk a, titipui viau tùr pawhin zawhna zawh reng a ngai dâwn sia, ka inthlahrung.


"Kan khua hi nuam i ti ve tawh em? Mahse, i awm khàt chuan nuam i ti vakin ka ring lo," ka ti a.


"Nuam e, a nuam lutuk."


"In hmunte in dîl tawh em?"


"Aw."


"In lo pèm hmain khawiah nge in awm țhin?" tiin zak duh lo chuan ka zâwt zêl a.


"Kan awm kual dûm; mahse, ka pa boral hnuah erawh Lawngtlaiah kan awm ta reng a."


"Oh, a ni maw? A zia lo hle mai," ka ti phawt a, chutah, sawi zawmin," I nuhoin in awm tihna a ni a, unau eng zât nge in nih?" ka ti leh a.



"Pahnih chauh kan nia, ka nau mipa nèn kan ni mai."


Mei chu chhawm țhain a chawhmeh chhuan chu a chawk rak rak a, puih ngaihna hre hek lo, zawhna ka zâwt char char a ni mai.


"I nu chu a khua a har țhìn ngawt ang a?"


Rawn inherin min rawn en zawk a, chutah, ngun zet hian ka ke lam chu a en ta, a țhutna piaha chem chu ban vatin," Che miah suh aw," a ti sap a, a sawi awmzia ka hriat hma chuan min rawn hnaih dâwrhin a sât ta chawrh chawrh a, thil thleng chu a rang lutuk a, hlauh tùr nge, eng nge pawh ka hre hman lo.


Chema a thil sah ka hmu chiah chu, ka tho zawk mai! Rûl hring lam deuh, ka bân puam tiat țhelh tùr hi a lu-ah a lo sât bung hmawk niin, a mei lam chu a la che țual țual bawk si, ka râp lutuk.


"Eng...engtin nge..." ka thâ a khùr dawt dawt, ka khurh avang chuan ka sawi hlei thei lo. Lo hmu lâwk phei ila ka hlauh dàn tùrzia chu ka ngaihtuah a, ka khùr lo thei lo.


"Ka hmu hman chiah chiah a ni, a vanneihthlâk e."


"Ka ...làwm e." Ka tiril mai ni lo, ka taksa chu a la khùr, ka thaw hawk hawk.


A bân ka vawnsak vang chuan ka khùr chu a hre ngei ngei ang, a bân lum vang vang chu ka kut hit thlur chuan a hre rang khawp mai.


"Hlau duh suh, hei a thi daih tawh a nia."


Ka awm a nuam thei tawh lo, ka ți hrû mai. Mama rawn lût chuan a rawn hmu ve chiah a, ani pawh a phu deuh zawkin ka hria.


"E khai!! Inlêng duhawm lo in lo nei elo? Thlam bul vêl hi hlo tùr ka kâp nasa țhìn asin le, engtin nge a lo luh ngam zâwk ni?" a ti bal bal a. Chutah," A chuk hman lo che u maw?" a ti leh a.


"Aw, vànneihthlâk takin Mapuii a chuk hman lo hlauh a," Sangkima chuan a lo ti vat a.


Ka hming a lo hria a nih hi, chu pawh min koh duatna hming ngeiin. Mi tam zawk chuan ka hming phel 'Tluangi' tiin min ko tlângpui asin.


"A zia hlauh chu, tlêma tlêmah kan inpaw haw lo chauh a ni maw?"


Thlâm hnuai DDT ni àwm tak chu thlâm bul vêlah chuan a phul kual ta chiam a, kei erawh ka awm a nuam thei lo, ka ți vek tawh. Țhut pawh nuam ka ti lo.


"A dang a awm tawh lo ang, ka'n paih ang e."


Mahnia awm ka ngam lo, pâwnah ka awm ve daih. Mama chuan damdawi chu a phul kual zawh chuan," Țhianpa lo lêt hunah chawhmeh tùr sangha chu kan man dâwn nia," a ti a.


Sangha kan man tâk hnu chuan ka hlauhna pawh a lo reh ve tawh a, nuam ka ti leh ta viau.  Dîl pâwn ațang chuan ka lo au vak vak a, sangha rawn lang zut zut chu hmuhnawm ka ti, ka man ngam chuang miah lo.


Sangha chu an chhùm a, keiin hmarcha ka lo râwt a. Sangkima chuan min chhuh vat, harsa taka ka ràwt ve phawlh chu awlsam tê hian chip deuhin a râwt leh ta mai.


Chaw ei pawh amah vekin a siam, chawhmeh ka lo suahpui ve a, nichin lawkah rûlin min chuk țêp tih ka theihnghilh leh vek tawh, Mama fiamthu thawhah chuan ka nui leh var var tawh.


"Vawiin chu i lung a léng hman miah lo tiraw?"


Chaw țhial țalh țalh pah chuan," Ka lung a lêng ngawt ngawt lo aw," ka ti thung a.


"A nih loh chuan ani ve thung chu a lunglêng ngawt ang!"


"Ei mai mai teh."


Sangkima erawh a ngawi reng a, a lo inrawlh lo ve khawp mai. Hmui chîp hmânin chaw chu a țhial a, a hawi chhuak mang lo.



*MI ROPUI CHU A THILTIHIN A NIHNA A LAN CHHUAHTÎR ȚHÌN*




Chapter - 4



Chaw ei khamah chuan mipa pahnihin hlo tûr an kâp a, keiin thei ka lo lo thung. Theihai leh Theitê a tam a, ka lo tam hran chuang lo, kan pathum chhûng ei khawp tùr chauh ka lo.


Hlo tùr an kah zawh chuan dîl lamah kan kal leh ta a, dîl chu hmun hnih lai an nei a, pakhat chu a la thar deuh, sangha pawh an dah thar deuh chauh.


Pakhatah erawh sangha sen hmuh tùr a awm nual. An lian tawh viau bawk, chu chu kan man dâwn a nih hmel.


Bucket-a an man sa an dah chu ka lo khawih ve chhin a, hlauh loh ka duh vàng a nia. A inperh auh a, dîlah chuan a lût leh daih.


Inthiam lo zet hian," Mama, sangha pakhat ka ti chhuak daih a nia," ka ti a, an rawn hawi dùn ve ve a.


"Engtin maw?"


"Ih, ka khawih ve chhin châk a, a inperh chhuak daih..."


Min nuih ringawt. Tihngaihna a hre vak bîk lo a niang," A, hei kan man leh thei alawm; mahse, lo hûm nghet tawh la," nui chung hian a ti a.


"Aih, ka khawih duh tawh lo."


Sangkima chuan," I lo khawngaih deuh a ni maw?" a rawn ti a, a nui suk suk a.


He pa hi, a nuih hian a hmel a dang daih nia. A lang nèlawm tawp, a biang dinglama biangsum lang kawlh lah chu a inhmeh hrep mai ka ti.


"Aw..aih, ni lo, ka khawngaih vàng a ni lo," ka ti nawk nawk a.


A la nui tho. Nuihzâ tih hriat taka min en chuan engtin emaw tak ka awm nia. Ka sawi thiam chiah lo, nuam chiai chiai ang hian ka awm!


"Lo chhuah zêl rawh, kan lo man zêl ang," a la ti deuh deuh.


"Ka chhuah lui miah lo tak tak!"


Mama chuan," Man a sâwt lo duh ngawt ang!" fiamthu bawk hian a lo ti ve a.


"In ninawm!"


"Nia, keini chu High school Head fapa kan ni ve tlat lo va!"


A va mak tak! Hetiang khawp hian a lo chimawm thiam tih ka lo hre ngai lo.


"Kei pawh ka ni bîk lo."


Haw kawng chu a chhoh deuh avàng chuan a rûk têin ka huphurh. Thil rit tak ah hàwn tùr kan nei hran lo va, a zia viau mai. Ka ah tùr pawh Mama leh Sangkima chuan min ahsak daih a, engmah keng lovin ka kal.


Mama a kal hmasa ber a, ani zawng a infit a, a kal chak khawp mai. Ka ûm ve nasa a, ka hah lutuk.


"Țhianpa, i kal chak lutuk, ka hah a nia, chàwl lawk ang u."


Ka va lâwm tak! Ka hah lutuk a, a din nghal avàngin kei pawh ka ding ve nghal vat. Ka thaw hawk hawk a, ka zia sawt sawt mai. Sangkima chuan a ipte ah ațang chuan tui bottle phawrhin min rawn pe vat a,nui sak hian làwmthu ka sawi sap. A hmelah chuan hah hmel a pu pawhin ka hre lo,  a thâwk dàn pawh a ngai reng mai.


"Tluangi, i hah viau em? Ka lo kal chak deuh a ni maw?" Mama chuan a ti a.


"Hah e, kaah thaw pawh a leng hlei nem." tiin tui chu ka in ta nghal a.


"Kal hmasa ve tawh la?"


"Aih, ka kal muang si."


Muang têin a kal ve ta. Kei pawh ka hah ta lo, Mama titi pawh ka zàwm ve thei ta. Hnunglamah Sangkima pawhin a châng zeuhin kan titi chu min rawn zàwm ve a.


Kan in lamah an rawn kual a, kawtah ka pa a lo țhu a.


"Eu, in lo thleng thei maw? Bawihtei chu a rawn kal thlen theih pawh ka lo ring hlei nem. Darling, Bawihteite an lo thleng, thingpui kha lo siam la?" tiin ka nu chu a ko nghal zat a.


Mama chuan," Kan sangha man sa a lo chhuah zêl a, kan rei phah vek alawm," a lo ti a.


"Pakhat chauh a nih kha aw!"


"I chhuah tak tak elo? Bawihtei țhìn hi chu aw, i zu tibuai vek ang ka ti," ka pa chuan a ti leh a.


Kan sangha tùr leh thei chu min pe a, ka pa chuan bucket a zu la chhuak a, ka sangha hawn chu a phawrh a, ka nu pawhin tray-in thingpui leh a hmeh tùr a rawn chawi chhuak a.


"In hah viau lo maw?" tiin thingpui chu a rawn sem a, sangha a hmuh chuan," Eu, a va lian ve! Bawihtei chuan a man ngam ve ngût pawhin ka ring lo ve," a ti leh a.


"Man sa chhuah a thiam râp."


Mama chu melh râm pah chuan," Ka chhuah lo, a nâl lutuk a, ka man nghet thei lo a nih kha," ka lo ti vat a. Ka nu leh pa chu an lo nui țhâ a.


"I man ngam ve maw?"


"Man sa bucket-a mi ka khawih mai mai a. E, pa, en teh, rûl lian deuhin min chuk țêp a, Sangkima hian a lo hmu hman a, ka hlauhzia mai chuh!" ka ti hlap hlap a.


"A ni maw?!! A va hlauhawm ve!!" Ka nu chuan a lo ti vat a, ka pa erawh chuan Sangkima chu làwmthu a hrilh nghal vat a.


Ani chuan nuam lo tih hmel zet hian," A, ka hmu fuh ém a ni. Che lo tùra ka hrilh khân thu a awih ém a, amah a inchhanhim zâwk alawm," a lo ti daih a.


"Che lo tùra min hrilh leh sah i rual nghâl a nih kha, chuti ni lo se min chuk hman hrim hrim ang," ka lo ti leh a.


Thingpui an in zawh hnuah chuan an haw ve ta a, kei pawh ka inbual ve nghal. Zànah inkhâwm ka duh dâwn si  a, ka hman lo palh ang.


Sangha chu kan chhùm a, ka pain tui a ti khawp mai. Kei erawh chuan sangha ka ei ngai lo hrim hrim, man erawh nuam ka ti lutuk thung.


Kan inkhâwm a, inkhâwm bànah hla kan zir leh dâwn vàngin ka nute chuan min hawsan. Mahnia haw ka hlau chuang lo, zanin chu Neihi a nuamsam lo va, a inkhâwm peih lo. Ani a awm loh hi chuan ka mal lehzual tlat.


Kan zài tak tak hmain pâwnah kan țhu khâwm a, Mama leh pek chuan," Vawiin chu dîlah nula pakhat kan hruai a, kan sangha man sa a khawngaih avàngin a lo chhuah zêl a nih chu, buaithlâk lutuk!" a ti chhuak leh a.


Kei chu ka lo ngawi kar a, ka lo nui ve mai mai. Ka lo țawng ve hlauh chuan min fiamin min sawisa leh nasa pek ang tih ka hlau.


Mi dang chu an lo nui dar dar a, min hre teuh lo. Kei pawh chuan mi dang a sawina angah ngaiin ka lo nui ve, hetiang hunah hi chuan tih dàn thiam ve a ngai tlat.


Sangkima pawh a nui suk suk. A chungah hian ka lâwm thar leh, zanriah ei laiin ka nuin rûl chungchâng kha min zâwt chîk leh a,  ka hlau thar leh.


"I chau viau lo maw??"


En vatin," Chau lo ve, ka infit ve tawh alawm," nui chung hian ka lo ti a.


"E, taka,  naktûk tlaiah Mama nèn chaw eiah ka nuin a sâwm che u a, thla hualna ni pahin. In lo ei ang chu tiraw?" tiin ka sâwm pah nghal zat a.


"A zahthlâk e a. Țhianpa erawhin lo ei se, kei chu a ngai miah lo. Ka lo ei tluk zetin ka lâwm ang."


"Inah ka lo sâwm țha dâwn che nia, Mama phei chu ka la hrilh lo, zîng lam hi chu buai a na duh sia, tlai lam hi a remchâng zâwk ka ti a," ka ti leh barh barh a, a thil sawi chu ka ngaithla duh hauh lo.


Zànah ka pain ka nu broiler vulh thau zet chu a lo talh a, vawksa rêp kan nei bawk a, sangha nèn, a tâwk thei mai ang.


Inkhâwmnaah Mama ka hmu a, ka hrilh nghâl. Ani chuan a lo hnial lêm lo, min fiam zuk zui.


"In pa awm loh veleh min sâwm a."


Ka chhâng peih lo, ka chhiahkhum vak ringawt.


Inkhâwm bàna ina thingpui ina ka chawlh hnuah Neihi kan tùrin ka chhuak a, ei tùr leh in tùr ka kensak.


A lo mu a, a hritlâng âwmna a lo ni. A mit a bui vek, min hmuh erawh chuan a lo intiharh ve a, ka lêng rei phian. A bula awm hi chuan a kalsan lawk theih țhìn loh.


Pa Lalate ina lût zawkin Sangkima sâwm tùrin ka kal, Mama inkalpuitîr ka tum a nia, a lo awm pek lo.


Pu Siamate in hnuaiah chuan ka kal a, kawngka a lo inkhàr avàngin ka kik dat dat a.


"Lo lût rawh u."


Sangkima nu a ni ngei ang. Kawngkhàr chu pawt hawngin ka lût a, ka vawi khat luhna. Ka tum loh deuhin in chhûng chu ka hmu nuam reuh nia!


"Lo lêng rawh, eng nge ni ta? Lo țhu rawh," tiin nu pakhat, chêr lam leh vun dâng del hian ding chung hian țhutna chu min kawhhmuh nghal a.


"Ka pi, Sangkima a awm em le?" tiin ka hnaih ber plastic chair-ah chuan ka țhu ve nghâl a.


"Aw, awm e, a inbual a nih kha. A zo țêp ang. Ka va hmu ngai lo che ve, nula? I hmel lah chu a țha puak lehnghal a."


Min fakna avang chuan ka sen awp awp ang chu; mahse, a rûkin min  tilâwm veng veng.

"Nia, ka lo haw khât deuh hlek a. Field bula Pu Roliana i hria em aw? Chu mi fanu, Lalremtluangi chu ka nia," ka ti nghâl bawrh bawrh a.


"Aw, a ni maw? A hming chu hre chiang e. Kan awmna hi a rei ve tawh viau nain ka hrisèl loh vàng hian ka chhuak ngai lo va, hming hi chu ka hre ve țhûm a nia," a lo ti ve a.


"A nih tak chu, a zia lo hle mai-" ka tih lai mêk chuan bathroom ni ngei tùr kawngkhàr chu rawn inhawngin Sangkima chu kekawrbùl haa towel a nghâwnga bâtin a rawn chhuak, a dul thêp deuh zaih, sek deuh hlek bawk si chu ka hmuh hmaih lo chiang kher mai.


"Hei, Bawiha, i țhiannu a lo lêng a."


A rawn hawi a, min hmuh chuan a mitko sàn ãk hian," Mapuii teh tlat chu, i lo lèn teh tlat a!" a ti a, a nu lamah chuan hawiin," Nu, Mapuii a nih hi, an in hnuaiah lung remin ka thawk ka tih kha," a ti leh a, a nu a biak dàn chuan ngaih a la tawp, a hmangaihin a ngaina hle ang tih a hriat theih nghâlin ka hria.


"E, a ni maw? Pu Head-a fanu maw i nih? Khawi maw, ka lo chibai ang che. Kan khaw nula hmelțha ber an ti che a, a lo dik ngei a nih dâwn hi," tiin min rawn pan a, sawi tùr ka hre lo, min tidang chiang lutuk. Zak sen awp awpin ka nui ringawt.


Min chibai zawh chuan," Thingpui in rawh aw, i lo lèn vawi khatna a ni bawk sia," a ti siam siam a, a che vêl chu a derthâwng reuh khawp a, a hrisêl vak lo tih chu a hriat theih mai.


"A, a ngai lo asin," ka ti ve ngial a; mahse, a tilui tho.


"In inah in lo chhawr duh a, a làwmawm ka ti tak tak a ni. Keiin hna ka thawhpui thei si lo va, a nau lah a la chhawr tlâk bawk si loh a," a ti leh barh barh a, thingpui chu min rawn pe a.


Sawipui tùr ka hre hauh lo; mahse, room ațanga Sangkima a lo chhuah chuan ka thaw huai.


A T-shirt dum hâk leh a kekawrbùl uk hâk chu a inhmeh kher mai. Hetiang tak hian T-shirt dum hi a lo inhmeh theih ang tih pawh ka lo hre ngai miah lo, a hâk tùra siam ni àwm tak a ni!


"Eng maw i lo tih dâwn?" tiin dawhkàn bula chair-ah chuan a rawn țhu ve a.


"Chaw eiah ka sàwm che kha, ka rawn sâwm nawn leh che. Mama pawh a lo kal dâwn, lo kal loh awih loh," ka lo ti vat a.


A nui leh suk. A lang hmelțha leh sawt, bâkah, a nuih hian a nèlawm,  nui reng se a țha ang.


"A làwmawm viau a; mahse, a zahthlâk deuh alawm. In la thutak-"


"Inkhâwm zàn a nia, ei hma a pawi vak lo ang. Mama kan lam thla nghal dâwn nia," a thu sawi ngaithla duh lo chuan ka ti ve thung a.


A nu chuan," Bawiha, chaw eiah a rawn sâwm che elo? Engtizia nge?" a lo ti a. Ani chuan nui chunga a nu chu enin," Nu, ka ei chhuah i phal em?" a ti a, makti zet hian ka en tawn zak zak a.


"An sàwm che chuan a țha alawm, hnial chu thil mawi lo tak a ni," s lo ti a, ka lo 'amen' khawp mai.


"Ka pi, niminah rûlin min chuk țêp tihin a hmu a, min chuk hmain a that ta a. Ka thla hual nân leh lawmthu sawi nân tiin âr ka pain a talh a, Mama nèn chaw eiah ka rawn sâwm a," ka ti a.


"A nih tak chu, chuti a nih chuan Bawiha, ei ngei rawh, làwmthu sawina an hnar ngai lo a nia," a lo ti leh a.


Chaw ei khama haw leh a tum avàngin a thawmhnaw hâk chu a thlâk lo va, kekawr erawh a thlâk thung.


Mama kan sâwm thla a, inah a lo awm ve tawh. Min lo hmuh chuan," Eu, in lêng dùn elo? Tu emawin a hmu ang che u tih a hlauhawm hle mai," a lo ti leh pek a.


"Insiam rawh le, chuti lo chu inkhâwm kan tlai ang."


Tui takin zanriah chu kan kîlho a, ka ei tam hle mai. Mama chu a țawng bawrh bawrh a, kei ka lo țawng ve bawk. Sangkima erawh kan bia a nih loh chuan a țawng mang lo, nuam a ti lo a ni ngei ang.


"Sangkim, ei țeuh rawh aw, i puar lo ang e."


"Ka ei țeuh alawm."


Ka pa chuan," Ei țeuh tùr, hmeichhe ei ang maia tep chep chep lovin ei tàwn táwn tùr. Ei zawh vek tùr aw," a lo ti ve a.


Ka puar ngei mai.


"Mama, naktûkah in lo thawk leh thei ang tiraw? Sangkima pawh, kan lo ring leh ang che u aw?" Ka pa chuan a ti a.


"Um, ka pa pawh a inrin viau kha. Pa Ro, in in hi a zau tho sia, mi dang luah atân em ni in tih deuh?" tiin Mama chuan a zâwt a.


"Ni lo ve, fate lo zin châng a awm ve a, bâkah, mikhual neih châng a tam a,  khutia in hnuai ruak huau reng ringawt khu chu a fuh lo. Hei, Bawihtei pasal neih huna an luah atân te pawh a niang chu."


Mama chuan," A tum hnai deuh tawh elo?!" a lo ti vat a.


"Tum lo, fiamthu thliar thiam ve ta che, Lalmam," ka lo ti vat a.


An nui vek a, kei pawh ka nui ve tho.


"A neih thuai loh chuan a senior mai dâwn."


"Teuh lo, senior hmain ka nei dâwn alawm."


Chutiang mai mai chu kan sawi a, ka hlimpui phian. Senior ka la ni lo chiang, kum 24 chauh ka la ni! Aizawlah phei chuan senior tih țawngkam hi ka sawi ri ngai hlei nem.


Pasal neih hi ka la ngaihtuah chhin lo, chutianga ngaihtuah tùr pawh ka hre hrk lo. Mala ka star ém ém a; mahse, pasal tùr angin ka la ngaihtuah chuang lo, pasal tùr atân chuan ka hmangaih leh min hmangaihtu a ngai ang chu. Nupa ni tùr leh chhûngkaw dinpui tùr chuan fîmkhur a ngai dâwn asin, uluk taka zawn a ngai ang.



*I CHUNGA MI RILRU PUT DÀN DIK LEH DIK LO AI CHUAN MI CHUNGA I RILRU  PUT DÀN DIK KHA A PAWIMAWH ZÂWK*

☆PIALRÀLAH TAL☆- 5 By Dingdi Pachuau


Zàn mutnaah Mala'n min rawn bia. Teh tlat chuan! Phone call phei hi chu ka beisei phâk lo hrim hrim, bialnu a neih bâkah min ngaihtuah ve hi ka ring phâk lo. Min tihlim viau, eng vak phei chu kan sawi lo; mahse, star deuhte'n min han biak hi chuan zàn mut hi a har țhìn a, ka helhhawlh tlat zél.


Tûn țum ka haw zet chu ram ka chhuak ve nasa khawp mai. Zànah chakai kan chhit thùl, ka nu chuan a phal lo țhìn viau nain ka pain min phalsak zêl a. Ka chhuah khâtzia leh hun ka neih lohzia a hre chiang ve a, ka duh chu ti hmiah hmiah tùrin min hrilh. Ka nu ngaih dàn erawh a ni lo viau tih ka hria; mahse, ka hriatah erawh min sawisêl miah lo.


Chakai, chèngkawl  leh chawhmeh dang dang ka hawn rêng rêngah ka pa chu a lâwm thiam thei khawp mai a, "Bawihtei hawn ngei mai Chakai/ Chèngkawl/ chawhmeh kan han ei ta a nia, a làwmawm ém mai," a ti ve ziah a, a nuam thei tawp.


Ka têt laiin convent-ah ka awm char char a, țhian ka kàwm tam lovin kan vênga ka haw ve pawhin ram lamah phei chuan ka chhuak ngai lo. Tih tùr ka nei tlat lo va, ka pa lah hian ka hah a hlau țhìn a, hun remchâng ka neih ve pawhin," I hah ang a, i dam lo palh ang," a ti tlat zêl. Tûn hnuah erawh min khap ta lo, puitling ka lo ni ve tawh bawk a, kei chauh ka lo awm tawh bawk nèn, min duat ngawih ngawih a ni ber. Ka duh ang anga ka awm a phal ti ila a dik ang, chuvàng erawh chuan sual ka tum chuang lo.


Hetiang tak hian hringnun hi a lo hlimawm thei ang tih ka ngaihtuah ngai lo. Ramah kan kal a, ka hah thei viau. Zànah chau hnêpin tui zetin ka mu a, zîngah a chângin ka nuin min rawn kai tho bawk a. Zàn mutnaah hah zawng zawng a lo dam hman a, tha tharin ka tho leh a. Chhùnah ka hah avànga ka thlan tla bawrh bawrh chuan min tihlim, a chhan chu thlan tla lovin ka awm rei tawh a, hrisêl ta riauin ka inhriat phah bawk.


"I infit sâwt e!"


Hlim taka nui var varin," Tak tak maw?" tiin Mama chu ka melh a, vawiin chu an huan hla vak loah kan kal. Ka phei dâwn tawh sia, thei ka țhiante hawn tùr kan lo, Mamate chhûng chuan an hralh ngai chuang lo va, țhenrual țhate an pe mai mai țhìn.


"I lo haw leh hunah phei chuan Mt. Everest lâwn thei tùrin i infit tawh ang."


Chu kher kher chu a. Thil awihawm deuh te hi sawi ve se.


"Tu emaw pawhin infit a ti tawh ngawt ang che!"


Theite pum khat chuan a hnungah ka vawm ak a, a lo hawi nghal vat.


"Lalmam, engtin nge miin min sawi? Mala nèn ni angin min sawi țhìn tihna em ni?" tiin zak ru deuh hlek chung chuan ka zâwt, ka hre duh. Ka nuin min zilh kha, kan inzui lai min hmuh ka ring si lo va, bâkah, kan 'ni' lo bawk si a.


"Sawi chuang lo nain a țhen chuan a rûk têin' An inhmeh; mahse, Tluangi ka ui' an ti che," a ti a, ka rin loh lam daih a nih vàng chuan makti deuh hian ka en reng ringawt.


"A țhenin' Bialnu dang a nei reng sia, engtin nge Tluangi hian a duh le?' an ti bawk a; mahse, engah mah ngai suh, in nih loh phawt ahnu, thingtlâng a nih hi," a ti leh a.


"Mi chungchânga ngaihtuahna sèn vak vak hi kan peih e tiraw?" Kei pawh hian ka peih ve tho, Mala chungchâng pawh ka ngaihtuah chiam chiam ve țhin tho kha.


"An la buai tâwk lo a nih hi, Mizote hi chu kan hman lutuk a, mi chanchin sawi nân hun hi kan ngah a nia.  Mi chanchin kan la sawi sep sep chhûng hi chuan kan la intodelh lo tihna," nui chung hian a lo ti a.


"A nih, in nu ve thung hi? Engtikah nge tih huk kan neih dâwn?" tiin ka nuih a.


"A, kan ti dâwn lo. Kan ințhen tawh alawm."


"A ni maw?!!! In la ni reng emaw ka ti asin," ka ti a.


"Hm, àwm ve tho, i awm khât ve ém a ni."


"In induh tawn ve riau khân ka hre bawk sia?" ka ti țâlh a.


"Induh tawn deuh pawhin a ințhen theih tho alawm."


"I tidik."


A scooty a keng bawk a, kan hmanhmawh viau lo. Ka kal leh khât tawh àwm sia, ka ui lâwk.


"Ka awm loh hlànin tu tak lo hruai ve ang che maw?" ka ti sap a.


"Tu vak nge hruai se min tih? Țhianpa Sangkima bâk," a lo ti nghut thung a.


"In inkàwm ngeih reuh e."


"A fel ém a ni. A buai ve thei e tih mai loh chu sawisèlna tùr ka hre lo, bâkah, an hausa bîk lo va, ka kawm tùr dik tak a ni," a ti leh a.


"Engtiziaa lo pêm ve ringawt nge an nih le?" tiin ka zâwt zui zêl a.


"A nu hian thingtlâng boruak hîp se a duh a, khawpui boruak ri hut hut hian a tihrisêl lo niin a hria a ni."


"Eng nge a natna?"


"Doctor-te pawhin an hre bîk lo."


A lo nih chu, a zia lo kher mai. Thingtlánga an rawn pêm tlat mai hi mak ka ti a, tunah chuan mak ka ti ta lo. Khawpui boruak hi, ni e, a ninawm a, mi hrisêl lo leh hmun reh raih mai ngaina tân chuan a hnèawm ngawih ngawih ka ti.


Zànah Neihi a lo lêng a, a hritlâng chu a la dam chuang lo nain ina awm a ning tawh a, bâkah, Aizawlah ka phei leh tawh dâwn bawk sia, chuvàngin, lo lêng tùrin ka ti a, min rawn thlah a nih deuh ber chu.


"Bawihte, hetia Aizawla va awm reng ringawt mai hi a ho riau ka ti. Hna nghet chu ni se ka hre thiam. B.Ed hi ti pah law law tal la, a nih loh pawhin Lungleiah a tih theih ve tho va, lo phei daih la?" Ka pa chuan a ti a.


Ka nu pawh chuan," Nia, teaching lam hi i tui a nih tho chuan training daih la, nakinah pawh i mamawh tùr tho a ni sia, NET exam tùrin i inbuatsaih a nih ngawt loh chuan B.Ed chu ti ngei rawh," a lo ti ve a.


"Um, ka phei rih phawt ang a, ka lo ngaihtuah țha ang e."


"Hei, June a ni tawh mai a, tih dâwn chuan a hun teu teu viau asin," ka pa chuan a lo ti leh a.


"Mahse, Pa, engmah hrilh lâwk pawh awm lova bànsan ringawt chu, a dik lo. Ka phei ang a, tûn kum chu ka'n ti leh rih phawt ang a, kum thar lamah tha thar leh rilru tharin ti zâwk ila?"


"A, i thu thu le, i nu nèn kan bul hnaiah awm ve tawh la ka tih vàng a nia, pasal min neihsan khut phei chuan kan awmho khât tawh dâwn ém a ka ti maw le," a lo ti a.


"Mala'n a rawn call ngai che em?" tiin ka room-a kan awm hnu chuan Neihi chuan min zâwt a.


"Vawi hnih chu min rawn call tawh."


"Eng nge a sawi?"


"Dîlchhût reuh bawk siah! Eng vak kan sawi lo, min ngaih thu tih vêl mai mai," ka lo ti a.


"A ngaih thu a hrilh che maw?!!! Hei en la," tiin a phone chu min entîr leh a. Mala leh a bialnu thlalâk chu ka hmu leh ta, nimin lama an lâk ni àwm tak a ni, Goa lamah daih lehnghal, an zin dùn a ni maithei.


"A ngai che hian ka ring lo a ni."


Neihi tak hi chu aw, IG lama mi stalk hi a va peih tak! Mahse, hei a țhat phian hi, a zùnah uai mah ila, ka rilru ka pêk tak tak min hlauhpui a ni ve mai a, tihian rilru pawh ka siam ve sauh sauh thei mai ang.


"Ka star ringawt alawm, ka ngaihzàwn tak tak hlau duh suh," ka ti ve ngial a.


"Aih, a ngeiawm ka ti alawm. Bialnu nei rengin a'n tikual vêl che a, ka rilru a lo nâ alawm," a ti barh barh a.


"Amah ka hmuh loh hi chuan ka hre chhuak reng bîk lo a nia, ka hmu khât lehnghal a, min duh tak tak dâwn lo tih ka hre ve tho a nia." A rûk tak chuan ka rilru a nâ, min han biak vêl dàn hi hmeichhe dang, nula dang a biak dàn ang chu a ni lo deuh a ni, tlêm chuan min duh ve deuh; mahse, a bialnu a duh daih zâwk.


"Nia, ngaihtuah loh hi a țha ber. Ti leh ta daih ila, YMA Day chu awm ve hman la țha tùr, a nuam thei asin. Volleyball kan bêng țhìn a, bâkah intihhlim nân hun hman a ni țhìn a," a ti a.


"Ka thiam ve teuh lo mai!"


"Kan thiam bîk chuang lo; mahse, a nuam ve alawm. Hlim taka nuih bâwk bâwkna hun a nia, thiam lo tam tak kan awm avàngin nuih a za duh a," a ti leh a.


"A châkawm khawp mai."


"Tak tak chuan, group lamah khân video leh thlalâk an rawn post leh chuai chuai mai ang, i hmuh tùrin ka lo click țeuh dâwn nia," a ti a.


"Nia, lo ti țeuh rawh, hmuh a nuam alawm."


Zîng dâr 6:30 vêlah sumo-ah ka țhu vàng tawh a, ka pain min thlah. Sumo dâr 10 chhuakah Aizawlah ka phei ang.  Ka hmelhriat motor-ah a ni dâwn a, ka huphurh vak lo.


Sangkima pawh Lunglei a kal ve dâwn a nih hi. A rawn țhu lût ve a, ka lo be vat.


"Lunglei i kal dâwn elo? Hetah hian lo țhu ve rawh."


Min hmuh chuan mak a tih hmel deuh hlek. Min en deuh reng hnuah chuan," Aw," a ti sup a, ka bula seat âwlah chuan a rawn țhu chho ve nghâl a.


"I phei tawh dâwn maw?"


"Aw, school an siam țha zo tawh a."


"A nih tak chu."


Kawng a sawt țha bawk a, kan insawh phei nasa mai. Seat a full vek a, a zia deuh, a sawt viau lo zâwk. 'Kuhva pawh ei ila țhial a ngai lo ang' an tih ang êm kha chu ni lo mah se, a sawt ve tho.


"Eng nge i tih dâwn ber?"


"Ka nu damdawi tùr lei a ngai a."


Lunglei kan thlen chuan a la hma viau. Chaw ei ka peih loh avàng chuan restaurant-a chawlh ka duh a, Sangkima chu ka sâwm ve bawk a, ani pawh chuan a lo aw ve mai a.


Ei tùr kan nghah lai chuan," Dâr 10-ah em ni in chhuah dâwn?" tiin min zâwt a.


"Aw."


"I huphurh em?"


"Huphurh hran lo ve, driver ka hmelhriat sa a nia, a zia," tiin ka chhâng a, a țawng ve duah chu mak ka ti zâwk.


Ei tùr a rawn thleng a, inbe tawh lo chuan kan ei nghâl a, min en zauh zauh tih chu ka mitsîrin ka hmu thei. Kan ințhut hnaih bawk sia, ka lai lek lek. A chhan chu thil ei laia mi dang nèna inhnaih taka inhmachhawn ràn hi nuam ka ti ngai lo.


Kan ei zawh chuan țhu muang lovin kan tho nghâl a, kan ei man pêk ka tum chuan a lo phal miah lo nia! Amah chuan a pe ta vek a, a tihchi loh lutuk ringawt. Ka sàwm a ni bawk sia, a hek ta duai nèn, ka inthiam lo hial.


"A zahthlâk e, ka sàwm i ni bawk si."


"Mipa ka nih hi. Thlah i ngai em?" a ti daih a.


"Ngai lo ve, thawmhnaw ka nei hran lo bawk a, ka lo nghâk mai dâwn a ni," ka ti a.


Ka purse ațangin Rs 500 pahnih ka phawrh chhuak a, a kutah hmeh belin," I nu vitamin ei tùr lei nân lo hmang rawh, min hnial miah suh," ka ti a, ka hùmtîr tlat a.


"A ngai lo, leina ka nei alawm."


"I nei tih ka hria. Khawngaihin, la hrâm rawh. A nih loh pawhin, i nu ei tùr lei nân hmang rawh," ka ti ve tlat a.


A bânah chelhsakin ka hnawn lui tlat a, kawnga kal vete pawh chuan kan boruak hre ve hek lo, min en duh hlawm khawpin ka hria.


"Mapui, hetiang hi ti suh-"


"I nu tân a nih kha, nangma tân ka ti miah lo aw, chuvàngin i la lo thei ringawt lo."


A la hrâm. Rs 500 note hnih a ni tih a hriat  phei  chuan pakhat chu min pe lêt nghal vat.


"A tam lutuk. Pakhat hi i la lêt lo a nih chuan a pahnih hian ka pe kîr ang che," a ti ve ta tlat a.


"I tân a ni lo ka tih kha."


"Pakhat pawh hi ka nu vàng liau liau chauhin ka la ang, pakhat hi la rawh."


Ka la lêt hrâm.  Motor min nghahpui a, 'a ngai lo' tia ka hnial pawhin a awm lui tlat tho.


"Damdawi lei bâk tih tùr ka nei lo," a ti tlat, ka hnial viau a; mahse, a rûk chuan ka lâwm hle. Mahnia nghah reng hi ka ning țhìn.


"Damdawi chu, driver i thawn mai lo a nih kha," ka ti a.


"Mi thil thawn a zahthlâk alawm."


"A dik ve tho; mahse, damdawite chu, a dang daih alawm, a pawimawh a," ka la ti fan a.


A nui suk, a biangsum chu a lang chiang leh pek kher mai.


"Pawimawh kan tih hi a inang kher lo a nia, kan tâna pawimawh deuh kha mi tân thil ho a lo ni a, pawimawh an tih deuh kha kan tân holam tak a lo ni thei tho bawk."


"Ni lo, damdawi chu thih leh dam inkâr a nia,a pawimawh lutuk," ka ti leh a.


"Ni e, a pawimawh."


Dâr 10 a ri țêp tihah chuan ka chuanna tùr Puia motor chu a rawn thlang ta nghal a, amahin a khalh nghe nghe a.


"Min lo nghâk rei tawh em?"


"Rei tawh mai!" ka ti phawt a, a inthiam lo hmel ka hmuh chuan," Ka ti fiam. Rei vak lo, i rawn hma deuh zâwk a nih hi," ka ti a.


Sumo-a ka țhut luh hnu chuan Sangkima chu ka en a, a dinna ngaiah a lo la ding ngar. Ka kàwm ngeih ve țan chauh a, ka kalsan leh rih dâwn si, ka ngai roh ngawt ang.


"A nih aw, kan kal ang e."


"Aw le, tluang takin i thleng dâwn nia."


Kan tlàn chuan ka kut chu ka vai zauh a, ani pawh chuan min rawn enin a kut chu a tiche ve zauh. Kan hlat ta tial tial, a dinnah a la ding reng, a rawn hawi reng. Ka hmu thei ta lo.


"I bialpa a ni maw?"


"Ka țhianpa a nih kha."


"Țhianpa!! Huh, inzêp kher lo la?" nui chung hian a ti a.


"Ka single tluang zêl e," ka tih phei chuan a nui hawk hawk.


"Nula hmelțha deuh pawh hi an lo single ve thei tho a ni maw?"


"A lo nih hi."


Mi dang chuan nghahna hmunah min lo nghâk țhap. An rawn luh fel hnuah chuan kan tlân chhuak ta, Lunglei chhuahsanin kan tlân ta vang vang mai.


Ka pa ka call a, kan thlen chin ka hrilh. Ani chuan kan thlen hunah min rawn call ang tih sawiin kan inbe tàwp har lo. Message a lo awm reng a nih hi.


*Ka ngai hle mai che*


Mala message chu ka chhiar a, ka awih lo lutuk a, ka nui tawp. Nimin lawkah hlim taka a bialnu nèn an nui lai ka hmuh ngei kha, min ngai lo tih ka hre ve tawh e.



*I ZIA CHU HAN THUP TUM VIAU ȚHÌN MAH LA,I THIL TIHIN A PUAN LEH THO ANG CHE*

☆PIALRÀLAH TAL☆ - 6 By Dingdi Pachuau



Khua a lum lutuk a, ka chuang fuh lo tawp. Ka rùi a, menin ka lu a hai a, ka maimichhìnin Sangkima'n che miah lova ding renga min thlîr liam lai kha ka hmu ziah. Kha pa kha ka khawngaih tlat a nih chu, ka muthilh theih bawk si loh vàng chuan ka ngaihtuah chhunzawm a.


Pa a nei lo va, a nu leh a nau nèn kan khuaah an rawn pêm tawp mai a ni. A hma pawhin mi hausa tak chu an ni bîk lo ngei ang, a inchei dàn leh an inchhûng bungrua zawng zawng ațangin a hriat mai, bâkah a nu a hrisêl lo va, enkawl a ngai, a nau lah sikul kal rual lek a la ni bawk. A koah engkim a innghat a, amah chauh a inngaihtuah thei hek lo. Chuvàng chiaha kan khuaa rawn pêm pawh an ni chiah, a nu tâna țha tùr a ngaihtuah vàng chauhin.


Kawng laka an chawlh pawhin ka chhuk ve peih lo. Motor chhûngah chuan ka țhu tlat a, ka muhìl der tawp.


Hostel thleng min thlah theih loh avàngin two-wheeler taxi ka hmang a, bungrua ka nei hran lo bawk a, a zia reuh tawp.


Ka thleng tih hriain țhiante an rawn kal hlawm a, ka thil hawnsakte chu ka pe hlawm a, an lâwm thiam khawp. Ka awm dàn ațangin ka rui tih an hre ve tho a, ka room-ah an awm rei lo. Kei pawh meng rei lovin ka intleuh zawk a, ka mu nghâl daih.


Ka ni tin hna chu ka țan leh ta. Ka pate thil sawi kha ka ngaihtuah reuh reuh a, ka awm dàn hi a ho ka ti ve ta riau pek. Ka pawisa thawh chhuah hi a tlêm tham e, ka mamawh ka inphuhrûk thei țâwk a ni mai si a, kum a tam tak tak hmain B.Ed chu tih ngei a ngai a ni. Hetia hna nghet nei lova ka awm reng chuan a fuh dâwn tlat lo.


Mala'n min rawn text zauh zauh; mahse, a chunga rilru put dàn tâwk thiam ka tum tawh. Ka chhâng lêt tho; mahse, amah beisei ang zâwngin ka chhâng ngai lo. Mi inkâr tichhetu nih ka duh lo, an inkâr ka tihchhiat chu ka ring hran lo nain ka fîmkhur a ngai.


YMA Day-ah sikul chawlh a ni a, chhuak peih lovin ka room-ah ka awm reng a. Chhùnah Neihi'n min rawn call a, field-ah a awm a ni chiang, au dur dur rî ka hre tlat. Day an làwm a nih chiah hi.


"Field-ah i awm chiang."


"Awm chiang e, volleyball kan bêng zo chiah a, mipain an bêng dâwn mêk. Tunah tak chuan hmeichhe naupang an intlànsiak mêk a," a rawn ti zârh zârh a.


"An hmuhnawm reuh ngawt ang!"


"Aw, hei, an nuihzatthlâk tawp. A tlân muang pahnihte lah chu an hmanhmawh lo khawp mai, an chàwl leh rih vél." Mi dang lo nui tlâwrh tlâwrh rî chu ka hria, hmuh ve ka châk tawp.


"Ka lo video-call ang che, ka hmu ve châk."


A fiah lutuk lo nãngin ka hmu ve thei. Keimah chuan ka nui leh hak hak țhìn a, mi dangin min lo hmuin lo hria se, mak min ti maithei a ni.


"Mipain volleyball an bêng tawh dâwn. U Mama pawh a fit hmel khawp mai," tiin a nui var var a.


"Hm, fit àwm lo, mei a heh ém mai."


"U Sangkima pawh a tel ve dâwn a nih hi, a bêng ngai àwm si lo va, a nuihzatthlâk ngawt ang chu."


Rei fé chu kan inbia. Refreshment buatsaihtu zînga a tel vàngin ka inbe rei hman ta lo zâwk a, thlalâk lo up țeuh tùrin ka chah a.


Țhalai group lamah YMA Day hmanna thlalâk chu an rawn up țak țak a, ka lo en zêl. Lalmama lehpek chu, an nu bulah a awm hrut hrut. 'Kan ințhen tawh' kha a ti ve sia, amah pui hian a hnaih leh dûk dûk a niang, nakinah ka text khawp ang.


Thlalâk pakhat chuan ka mit a la ta zar mai. Sangkima kokia a bân nghata Irene-i nui lai thlalâk a ni. Sangkima erawh sîr lam a hawi, camera a rawn en lo.


Irene-i kan vêng nulaah chuan a chhe lo ber ka ti țhìn. Mi awmthei tak chhûngkuaa seilian ni lo mah se, incheinate hi a nei nalh thei a, tuna a inthuamna  pawh hi a inhmeh khawp mai. A vun a ngo over lo nain a tâwk reuh a, mipa tam tak mit a la țhìn rêng.


Ka en ngun poh leh ka awm a nuam lo tlat, rilru nawm lohna ka nei tlat nia. Ka hre thiam chiah lo, thlalâk dang pawh en zawm ta lo chuan chu thlalâk chu ka en nawn leh țhìn. Chu thlalâk chuan ka thinlung a tihnîm tlat, engtizia nge ni le?


Zànah Mama chu ka text ta a, thlalâk chu thawnin * Dâwt min hrilh chiang hle mai* tih hi ka thawn tel a. Phone a khawih lai a lo ni ve a ni ang, min rawn call nghâl.


Nui chunga chhângin," I lo hnaih leh dûk dúk em ni zâwk, Dawhehpa?" ka ti nghâl vat a.


"Ka bulah a rawn țhu a nih kha."


"Ka awih thlâwt lo, i va țhut hnaih zâwk tih hriat reng. Ințhen tawh hnuah hmeichhiain mipa mitmei hmu lovin kan va hnaih dûk dûk ngai lo," ka ti ve tlat a.


"Hmeichhia in inang vek kher lo aw."


"A dik. Inang chuang nâng-"


"Țhianpa leh Irene-i pawh an țhut tlàn tho kha, kha pawh tu hnaih hmasak nge? Hmeichhia hi in duhnaah chuan in huaisen, zah pawh in hre lo."


"Zah ka hria aw."


A rawn nui hawk hawk a," Hmeichhia pawh, mipa pawh kan inang vek lo. Ka țhen tawh lakah intihbuai leh ka tum tawh lo tih lo hre teh, min chhaih tawh miah suh," a rawn ti leh a.


"Vawiin chu in țhian dùnin nuam in ti berin ka ring," a ngei deuh tùr chuan ka ti salh a.


"Awm ve la, a nuam zual ang. Volleyball i thiam dâwn si, i'n hlap vêl tùr ka hmu châk!"


Ka thiam lo dâwn lutuk tih a hria a, min sawi el vêl tih ka hria.


"Ka hlap per palh ang che tih ka hlauh vàng alawm ka awm ve loh."


"A nih chiah chu."


*******


Ka thawhna school neitu, kan principal ni bawk Remlala hi tlangvâl fel tak a ni a, kan inhriat țanna chu college-ah a ni. College hi Mizoramah ka kal a, PUC-ah niin Remlala hi engti tùrin nge a rawn kal ka hre lo, Principal office awmna min zâwt a, mi dang pawh an awm ve tho sia, kei kher min rawn zâwt kha mak ka ti. Kan college student a ni lo tih ka hre nghâl mai a, Principal office thleng chu ka hruai. Nui sâng hian làwmthu min hrilh a, office-ah chuan min luhsan ta a.


A rawn chhuah leh pawhin min rawn be leh tho. Mi dang chuan min lo ngaihven lêm lo va, class ka neih loh lai a nih vàngin ka hman rih viau. Chu tak chu remchângah ani chuan lain a kal duhna hmun hrang hrangah chuan ka hruai kual ta a, kan hmingte kan inhrilh a, a țawngkam chhuak leh a chezia a fel fai a, a inthuamna pawh a zahawm tâwk viau. Țûl thuta min biak theih nân ka number min dîl a, ka pe ve mai bawk a, tûn hnuah hian ka chhawr țangkai ta a nih hi.


A hnua min hrilh dànin khami ni khân pawnfèn ka fèn vàngin min rawn be chat a lo ni. Pawnfèn hi ka ngaina a, kekawr ka ha khât viau. Ani lah chuan hmeichhia chu hmeichhia anga an inthuam hian an mawi ber a lo ti ţhìn a lo ni a, ka pawnfèn ațangin kan inhre chho țan a nih chu.


Min rawn be ta zauh zauh a, a fel ka tih ém avàng leh a chhiat lêm loh vàngin kei pawhin ka be chhe lo. Kan inkàwm ngeih chho zêl a, mi awmthei tak fapa mal a ni tih ka hre chho a, mi dang sawi ka hriat a nia, ani erawh chu ka bulah chuan hausa angin a awm ngai lo. Hostel-a ka awm laia ka dam loh ilo nikhuain min rawn tlawh zat zat a, țhiante, hostel-a ka awmpuite chuan an lo star thei nasa, a fel ém a ni. Fel viau mah se, a bula awm a hahthlâk miah lo nia. Mi fel dik tak a ni ka ti lo thei lo.


College ka chhuah chiah hian a school-a thawk ve tùrin min sâwm nghâl, school a nei tih pawh ka lo hre miah lo! Inhlawh mai mai chu pawi ka lo ti hran lo va, hei kum hnih pumhlûm chu ka lo thawk ve ta a nih hi. A hnuaia thawh a nuam a, ka thawhpuite pawhin a fel an ti vek. Staff-te min ngaihsak thiam ém ém a, students lah chuti bawk. Mi harsa deuh, lehkha zir duh si hi kan school-ah hian an awm nual a ni, an zir man hi a lâksak ngai mang lo. Hei vàng hi a niang, students kan ngah thei lutuk, zirtîrtu pawh kan hah, hlawh pawh kan hmu țha.


"College i kal laia hostel i awmna thoah khân em ni i la awm?"


A office bathlàrah thingpui kan in. Ruah a sùr vàngin ruah bàn hun ka nghâk, mi dang chu ke nei vek an nih vàngin an haw tawh. Staff dangte hmuh lai leh hriat lai hian kan inhre țhain kan inkàwm țhìn tih ka sawi ngai lo, a bulah pawh ka awm ngai lo.


"Aw, a awlsam mai alawm, i school ka lo hnaih phian bawk a, a tihzia hle a ni," ka ti a.


"A țhat chu. Ti ta daih ila, in khua i haw chu, i chhûngte an lo dam țha maw? Ka lo zin ve châk reuh khawp mai," ruah sûr cherh cherh thâwm avàng chuan a aw thûm deuh hlek chu hriat a har phian.


"Aw, dam țha e. Lo zin rawh; mahse, thingtlâng ngang a nia, fùrah hian a hrehawm țhìn a, țhâl laiin a ro leh viau bawk sia," nui chung hian ka ti a.


"Hun remchâng hi ka nei lo lutuk alawm le."


"Insiam a ngai ve alawm, i buai reng ang. Lo zin pawp la, i lo zin a ni mai."


Min rawn en vang vang a, mitko sàn âk hian keiin ka lo en thung a.


"Ranngo zawn ka duh pah ang, an tam ang tiraw?"


Ka nuih a za lutuk. Kan inkawm hnua hmeichhe chungchâng, nupui chungchâng a sawi ka hriat vawi khatna.


"Tam lutuk! Taima deuh deuh leh fel deuh deuh an tam mai."


"Nangmah anga hmelțha leh felte?"


"Hei, i tizahthlâk a nia!" melh rum lui chung hian ka ti a, chutah," I lo zin ang a, i hre mai ang," ka ti leh a.


"Hun âwl ka lo melh chhin ang e, school enkawl chuan hun neih hi a harsa ve ém a ni, tih tùr a tam lutuk a."


Ruah chu a sùr tlâwrh tlâwrh reng avàng chuan a bolero-in min thlah a, ka hnial ve nain nihliap nèna huh hnawng chupa haw chu ka peih lutuk bîk lo, min thlah a tum hrim hrim tho nèn, ka hnial chiam duh lo.


Zànah Mala'n min rawn call a, chhùn lama Neihi'n min rawn text-naah Mala leh a bialnu an ințhen nia a hriat thu min hrilh avàng chuan chhàn nuam ka ti vak lo, ka phûr lo tak zet.


"Tluang, ka bialnu nèn kan ințhen a," a rawn ti tâwng mai!


Chhàn dàn tùr ka hriat loh vàngin ka ngawi reng a, a hnu deuhah mawi lo deuha ka hriat vàngin," A va zia lo ve!" ka ti ta ringawt.


"Ka khawvêl hi a buai nuai mai."


A țawng dàn ațang chuan a rui a nih hmel, a rilru nâ leh hrehawmin zû a in vak a niang.


"Zu i in a ni maw?"


"Aw, zanin atân chauh ruih ka duh a."


"Hnem dàn che ka va thiam lo ve!"


"Hetia i aw hriat hi a nuam, nang chu i fel si a."


Ka nui hak. Zu rui lo ta se, hetiang hian min bia ang em? Be kher lo ang, tuna a thil sawite kha a sawi lo bawk ang, a bialnu țhen hian a rilru a tibuai tak tak a nih dâwn hi. Chuti a nih chuan a bialnu țhen tâk chu a duh viau a ni ngei ang.


"Ih maw, ka be châk țhìn che a... mahse, bialnu ka nei bawk sia... bialnu nei renga nula dang biak chu a țha ka ti miah lo... mahse, ka hlim miah lo, eng mah hre lova ruih chhum hmawk ka duh a ni.  Ih, Melissa, ka bulah awm reng rawh aw, zanin chauh, i tel lo chuan eng mah ka ni lo... min kalsan suh...Melissa...ka phal lo...kal...suh..."


A țawng a tàwp ta daih si a, he pa hi a muhìl daih em ni? Ka hmet tàwp a, ka call a, a ring ral țhak. Ka call leh chhin, min chhâng chuang lo. A muhìl a ni ngei ngei ang, a rilru a na ve hle a nih hmel, a bialnu hmingin min ko ta vêl a ni a, a khawngaihthlâk roh ka ti. Pâwn lamah a muthilh ringawt loh hrâm ka beisei.


School ka kal dâwnah ka call leh chhin, a chanchin hriat chian ka duh.


"Hello?"


"I țha em?"


"Ka lu a na lutuk!" A aw ațang chuan a tho ve chiah a nih duh hmel.


A harh țha thei tih ka hria a, a țha e. Pâwn lêr vêlah a tlu mai mai lo a ni ngei mai, a phone pawh a la chhâng thei tlat, a ngaihtuahawm lo ve.


Hun a ral chak a, ruah sûr bur bur hun a reh a, favàng ni a lo her chhuak a, Ka birthday a lo hnai ta. Eng thil nge ka dawn ang aw? Nikum lamah ka nu leh pa hnên ațangin gold țhi leh zungbun ka dawng tawh a, tún kum chu bengbeh a nih ka ring ru deuh ringawt.


Ka birthday chuan staff-te chhùn ei tùr ka treat a, naupang thil ka sem bawk. An lâwm thiam hle a, min lawmpui thu min hrilhin ka birthday pualin birthday hla min saksak lehnghal a, ka rin loh deuh a nih vàngin mak ka ti a, ka hlim lutuk chu ka mittui a tling pam mai.


Remlala chuan gift min pe a, min pêk pah chuan," In i thlen hunah chauh hawng ang che," nui chung hian a ti a.


"Eng thil nge ni? Ka va hre châk tak!"


"In i thlen hunah chauh."


Hostel ka thlen chuan kan hostel neitu pi ber chuan min lo ko ding a," Hei, i thil tùr a lo thleng a," tiin.


Parcel lian vak lo hi a lo ni a, nui sâng chunga làwmthu hrilhin ka room lam chu ka pan vat a. Inthlâk lovin ka hawng vat, kawrfual leh pheikhawk flat hi a lo ni a, card a lo awm bawk. Ka pa hawrawp ka hmuh chuan ka nui sak, ka pa leh ka nute hi chuan ka pianni hi an theihnghilh lo chiang teh e.


Duhsakna thu țha leh thlum tak chu chhiarin kawrfual chu ka ha chhin a, ka inhmeh ve khawpin ka hria. Pheikhawk pawh chu school kalpui theih tùr a ni a, a zia khawp mai.


Ka pa chu phone-in làwmthu ka hrilh a, rei lutuk lo kan inbiak hnuah Remlala gift min pêk chu ka hawng ve leh.


Silver bengbeh, stone sen duk lian vak lo inphûm hi a lo ni a, a tlâwm chhe lo ang tih ka hre mai. Lehkha te reuh têah hian het hian a lo inziak a.


*He khawvêla hmeichhe hmelțha leh fel ber chuan he bengbeh hi a inhmeh dâwn tih ka hria, naktûkah he bengbeh hi a bengah hmuh ngei ka inbeisei bawk*


Ka bengah chuan ka'n beh chhin a, tlereuh ngaina vak lovin inbel lêm lo mah ila ka làwm viau tho. Hmuhnawm ka ti ve hrim hrim, ka nei ve nual rêng.


Mama'n min rawn wish ve ngei.


*Hetah awm la chuan gift ka pe ngei awm che sia*


Ka awih lo lutuk!


*I thaw ve a nih chu*


*Nang pawh i thaw ve tho*


'I thaw ve' tih a ngei theihzia ka hriat vànga tilui ka ni.


*Min wish ve hrim hrim a, ka lâwm e* ka ti a.


Min rawn chhâng leh vat.


*Țhianpa nèn i birthday làwmin an inah hei thingpui kan in a, ani pawhin a wish ve tho che aw. I birthday pual liau liauin thingpui kan in tak tak*


Sangkima maw? A bulah a awm ve ngei ang chu. An inah a lêng a nih chiah chu.


*Dâwt i sawi*


Min rawn call ta nghal vat a," Dâwt ka sawi lo tih ka rawn chian a nih hi. Hei, țhianpa pawh hi han be chhin la?" tiin, dâwt sawi tih chu a la na ve khawp mai.


"Mapui, tlai deuh hlek tawh mah se, happy birthday," Sangkima aw ngei mai chuan a rawn ti ta, a aw ka hre thut chu, ka mûr chuai chuaiin ka hria!


"Ka lâwm e, a la tlai lo a nia," ka ti a.


"I țha em?"


"Aw, țha e, ka lâwm e."


Kan ngawi vang vang a, a hnu deuhah," I nu a țha zêl em?" ka ti ta ringawt, sawi tùr a bo vek!




*HMANGAIHNA HIAN THINLUNG A TIKEH SAWM A, CHU THINLUNG KEH SAWM CHU HMANGAIHNA VÊKA TUAM DAM A NGAI LEH ȚHÌN*




☆PIALRÀLAH TAL☆ - 7 By Dingdi Pachuau




"Aw, dam țha e. I vitamin leisak kha hei, a ngeih dâwn khawp mai, chaw pawh a heh tawh lutuk."


Fiamthu a rawn thawh ve ngei, amah ka mitthla chhin a, a hmel nèn a inhmeh lo ka ti; mahse, a lawmawm thung.


"A țha, lo ei char char rawh se, ka lo haw hunah thau mûm kânga hmuh ka duh a nia," ka ti ve a.


A rawn nui hak a," A ngeih leh lutuk ang a, kan châwm zo leh si lo ang tih pawh hlauhawm tak a ni," a rawn ti leh a.


Rei kan inbe lo, kan inbiak tàwp lamah chuan làwmthu sawi sap pahin birthday wish min hlàn leh. Ka rilru a hlim veng veng, mi dang thil min pêk vàng khán ka hlim a, hetia Sangkima'n duhsakna min han hlàn leh hi ka hlim lehzual, a chhan ka hre bîk lo.


A tûkah Remlala bengbeh min pêk chu ka beh chhuak a, min hmuh veleh  ka beng a en vat, a hmuh chuan a nui sak a.


"Bengbeh thar i nei elo?"


Mi dangin an hriat phâk ka ring lo. Kei pawhin nuih sakin," Ka lâwm lutuk a nia, ka inhmeh bawk si," ka ti a, a nui ta hawk hawk.


"Inhmeh lutuk ringawt; mahse, ka fak hun che nghâk ve phawt la?" a ti a, a nuih a za hle tih a aw chhuak ațang chuan a hriat theih.


"Eng nge? Ka inhmeh alawm, a mawi bawk si."


"Chuvàng alawm ka pêk che, tlereuh hi maw inbel tùra siam a nia, dah țhat daih loh tùr."


Mi dang awm laia inhre țha taka inbiak hi ka duh lo tih a hre ve tho a, mi dang awm chuan min be vak ngai lo rêng. A fel a, a rilru a puitling a, pasal țha tak tùr a nih ka ring, a nupui chu a vànnei khawp ang.


Mala pawh a bialnu nèn an ințhen zàna min biak bâk kha min rawn call ta rih lo, a reh ta vang vang. Tu thiam loh zâwk nge tih ka hre lo va, Mala chu ka khawngaih reuh viau, ka khawngaih phâk ni lo mah se. Mahse, mipa a nia, mipa hi chu khawiah pawh hian an tlei thei zêl a, hmeichhia angin an la na ve tak tak ngai chuang hlei nem. A hmu leh thuai mai ang, a ngaihtuahawm loh.


Mutnaah ka ngaihtuah kual a, ka bialpa neih ve tawhte khân min tihlim țhìn viau, duh pawh ka duh ve țhìn. A hmasa ber nèn khân ințhenna em êm awm lovin kan inthlah tawp a, a chhan chu hmun danga lehkha zira a awm vàng a ni, a number-ah a call theih tâk lohah chuan biak ngaihna ka hre lo va, kan tàwp tawp.


A pahnihna erawh kha chuan hmeichhe dang nèn min lo kawp a, ka hriat chhuah tirh chuan ka rilru a na ve lutuk. A pha nasa a; mahse, restaurant-a an pahniha ka hmuh dun leh tâkah chuan insawi fihlìm ngaihna a hre tawh lo, kan inkâr chu a tàwp fel hmak. Chuta țang chuan ka single ta reng mai a nih hi.


Mala hi chu ka star-na a rei ve tawh a, chuti maiin ka star lo nghâl hmak thei ringawt lo. Ka hmuh hian a thar leh a, ka theihnghilh thei bîk lo a ni. Bialnu a nei țhìn tih ka hria a, ka star-na a reh phah chuang lo. Khatia min han bia pawh kha a lo țha viau zâwk a ni maithei, tunah chuan ka rilruah pawh ka vei viau tawh bîk loh hi maw.


Tlai khat ka haw chu Neihi'n min rawn call a, ka room-ah lûtin ka thawmhnaw phelh buai peih rih lovin khumah ka țhu a, thatchhe zet hian," Aw, han sawi teh le," ka ti a, ka maimichhîng vang vang a.


"Kan vêng news tharlâm ber kha i hria em?"


"Hre nâng, min hrilh lohte chuan khawi ațangin nge hria se min tih le?" ka ti ve thung a.


"Ni dâwn tak. Ih, U Irene-i a rai an tia."


Va ho thei tak! Mi chanchin hi a buaipui ve peih si a aw! A tuina a ni tlat. A, a àwm ve tho, a la naupang ve leh chhâwng deuh bawk a ni. Thingtlângah chuan insawi sep sep hi kan peih a, thil ni chiah lo, rin thilthua sawi pawh hi a tàwpah thil ni tak takah a lo chang hman zêl!


"Tu fa nge a?" Chu ka han tihsak ve a.


"Ka hre lo. Ih, U Sangkima a nih ka ring deuh."


Ka khawng awtin ka hria. An lo induh tak tak em ni? Irene-i chauhin a ngaizawng emaw ka lo ti a, ka lo ring sual dèr a ni ngei ang.


"Tu nge ràitu an sawi lo nain ka rin dàn ka hrilh che a nih chu. Hla kan zir zànah pawh an inzui ka hmu tlat a, an nih ka lo ring miah lo va."


Kan inbiak zawh hnu chuan ka thâ a zawi zo vekin ka hria. Ka bialpa pawh a ni tawp si lo va, engah nge ka lo zawi ve viau? A duh duh bialnu chu a nei thei alawm, kan inkawm ve deuh avàng ringawtin a chungah rilru 'eng emaw' deuh ka lo pu ringawt em ni?


Ka mumangah ka lo hmu zui. Irene-i nèn chuan an lo inzui a, Mama hnênah," An inngaizâwng tiraw?" tiin ka  zâwt a.


Ani lah chuan," Țhianpa hian a star-na a rei ve tawh alawm, an rawn pèm țan tirh ațang tawhin a duh tawh a nia," tiin min chhâng a.


A hnu deuhah chuan Aizawl ka phei tùr chuan sumo ka lo châng a, amah chauha lo kalin min rawn nuih suk a, a biangsum chu a khuar kalh bawk a.


"Mapui, lo haw thuai thuai rawh, thil hrilh tùr che ka nei a nia," a ti a.


"Tunah min hrilh la?"


"I lo lêt leh hunah le," a ti tlat a.


"Khawnge Irene-i kha?" tiin ka zâwt a. Ani chuan," Pasal a nei tawh, nang pawhin nei ve tawh rawh," a ti a.


Ka chhàn hma chuan sumo a rawn thleng ta, a rawn ri dut dut a, a bengchhen ém avàng chuan ka harh chhuak ta. Khua a lo vár tawh a, ka room parda zàrah chuan phêngphehlep lian deuh hian a thla a lo zâp phar phar reng a lo ni.


Nilêngin ka mumang chu ka ngaihtuah a, Sangkima chu ka ngai thar ta riau mai. Hmuh ka châk leh tawh, ka mumanga ka hmuh vàng a ni ngei ang. Ka star thar ru deuh tlat.


Mama ka text  mai mai, Sangkima chanchin hriat ka châk viau a; mahse, ka zâwt ngam lo.


*In nu chu?* tiin ka text a.


*Eng nge kan nu chu?* tiin min rawn chhâng.


*In inzui leh tawh em?*


*Zui mai mai lo, kan ințhen tawh ka tih kha*


*Renew leh theih tho a?*


*Nahiiii... mipa ka nih hi*


Sangkima chanchin ka hre châk si, zawh dawt ka hreh deuh bawk nèn.*Dîl in kal ngai em?* tiin ka text ta ringawt.


*Aw, niminah țhianpa nèn kan kal a, kan man țeuh asin, i lo haw hunah kan kal leh ang chu?*


*Ka châk lutuk, Sangkima chu a dam țha maw? Ri rêt rêt a awm em?*


Min rawn call leh zat.


"Eng nge ri rêt rêt awm tùr a awm em ni? Ka va hre ve lo ve?" a rawn ti a.


"Ka hre nâng, i hre zâwk ang chu."


"Ka hre lo, țhianpa pawhin engmah a sawi lo. Ani chanchinah ri rêt rêt tùr a awm a nih chuan hre hmasa ber tùr ka nih ka ring, a awm lo," a rawn ti a.


"Irene-i nèn-"


"Aha, mi demna i lo hre ve a ni maw?" tiin a rawn nui kur kur a.


"Mo lawm tùr a awm hnai ang chu ka lo tia?"


"Teuh lo, Țhiana hi nupui nei thei dinhmuna ding niin i hmu em ni? Ka bulah nang leh a nu tih loh, hmeichhe chanchin a sawi ngai lo. Ka chanchin engkim ka hrilh a, ani pawhin min hrilh tùr a neih chuan min hrilh ve tùrah ka ngai," a rawn ti duah a. Ka țawng leh hma chuan," I lo dem ve tih hi hria se, a nuih a za ngawt ang chu," a ti leh a.


"Lo hrilh miah suh."


" E, taka i number a duh thu hi a sawi tak asin, eng nge in inkârah awm zâwk? A nu vitamin lah i leisak bawk a," a rawn ti leh a.


"Dàwrah ei man min pêksak alawm, ka inthiam loh naklaia. Ka sàwm a ni bawk sia, zia lo ka ti lutuk," ka ti sap sap a.


"A lo nih chu. I number chu ka lo pe dáwn nia aw, lo inbe ck lutuk lo ula," a ti a, a nui huah huah a.


"Ka lo be lêrh vek ang."


*******


Ka number chu a lo pe ngei a niang, kâr khat vêl a ral hnuah min rawn text ve ta.


*Mapui, Sangkima ka nia, i buai em?* tiin.


*Buai lo ve, eng nge ni ta?* tiin ka chhâng vat. Class ka neih loh lai tak a nia, a zia khawp mai.


Min rawn call nghal. Staff dangte hriat theih lohna tùr lamah ka kal sawn ta nghal a.


"Hello?"


"Mapui, ka inthlahrung viau nain nang lo chu chah tùr ka hre mai si lo va, ka nu damdawi pakhat hi Lungleiah  a awm tlat lo va. Khawngaih takin, chu chu Aizawlah khân min lo ensak dâwn em niang ka ti a, i hman ang em?" a rawn ti dap dap a.


"E, inthlahrung mah ta che, ka lo en dâwn nia, ka tih ve theih zâwng a ni alawm, a hming min lo hrilh la tiraw?" ka ti a.


"Ka lâwm ngawt ang, a nghei tawh dâwn si a."


Damdawi hming a sawi chu ka chhinchhiah ta vat a, Lungleia ka thawnna tùr address ka zâwt nghal bawk a. A inthlahrung tih ka hria, a inthlahrung ngei ang; mahse, a nu vàngin a inthlahrung zo tawh lo tih chiang takin ka hre tlat.


"Tlai bànah damdawi dàwrah ka lo en nghâl dâwn nia, ka theih anga hmain ka rawn thawn dawn che nia, ka rawn thawn hunah ka rawn call ang che," ka ti a.


"A va lawmawm dâwn lehzel ve! I buai phah hrep dâwn a nih chu," a ti phawt a, chutah," I account number min hrilh la, pawisa chu ka lo transfer ang a," a ti leh a.


"A hmanhmawhthlâk loh, ka lo zawng phawt ang e," ka ti a.


Tlai bànah damdawi dàwrah chuan ka zawng haw pah a, a vâng phian nia. Damdawi dàwr chu ka lût thlàwn zing khawp, ka beidawng lek lek.


A tàwpah ka hmu hrâm, ka rin aia a lo tlàwm avàng chuan  bûr hnih ka lei ta nghe nghe. A chhan chu a ei zawh dâwnah tûn ang chiah hian Lungleiah lei tùr lo awm lo ta se, Aizawla mi tho chah leh a ngai dâwn a ni, buaina a tam mai mai. A expiry date ka en a, hun a la tam tho bawk a, a la thi hman dâwn teuh lo.


Sumo driver ka hmel hriat awmchhun Puia ka call, ani lo hriat ka neih loh bâkah an number pawh ka nei hek lo. Ka harsatna chu ka hrilh a, thil thawn ka duh thu ka hrilh chuan eng nge a nih min zâwt a, damdawi a ni tih ka hrilh chuan kan hostel awmna lamah a motor check-tîr lawk pahin a rawn tlàn tùr thu chu min hrilh a, ka thaw huai. Tunah chuan ka harsatna ber sut kianin a awm dâwn ta, thawn tùrah ber ka lo buai ru a.


Zànah chuan Sangkima chu ka text a, naktûkah damdawi chu Lungleiah a lam theih ang tih ka hrilh a, min chhâng miah lo.


Ka nghâk deuh vang vang a, min rawn chhàn har ém avàng chuan ka call ta a.


"Hello?" Hei chu Sangkima aw a ni lo, tu nge le?


"Sangkima a awm em le? Mapuii ka nia," ka ti a.


"U Laskama chuan hla a zir daih a." Laskama maw?!!! Chu chu Sangkima hming maw ni a? A koh dàn chu a va mak ve! U Laskama a tih dànah a nau mipa kha a ni ngei ang.


"I u lo hrilh la, naktûkah damdawi kha a lam theih ang aw, sumo-ah ka rawn thawn phei a," ka ti a.


"Aw le."


Mama sawi dàn hmang kha chuan Irene-i nèn chuan an nih duh loh hmel deuh a; mahse, Neihi khân a hmu dùn ngei si, tunah hian Irene-i chu a rai tak tak em le? Rai ta se, a chhuak ngam dâwn em ni? Nge hlate hi a lo zir ve leh zâwk niang? Tûnlaiah an rai duh tawh lo a nia, engtiziaa rai duh tlat nge a nih le? A rilru hi a lo dik phian hi a ni zâwk mai lo'ng maw? Mualpho ta sa sa, mahni rila rah fa chu pawm tluan a duh zâwk a nih chuan thil tisual rau rauah chuan, a huaisen ka ti ngawt ang.


Zàn dâr 9:30 vêlah Sangkima chuan min rawn text, an hla zir bâng in a thleng deuh chiah a ni ngei ang, a la hma tlat.


*I la meng em?*


*Um* tiin ka chhâng.


A rawn call leh ta nghal, anni țhian dùn hi inanna tam tak an nei a nih chiah hi.


"Hello, Laskam?"


"Hei..." a tàwp chawt, ka koh dan kha mak a ti chiang mai! Ka hre chhuak tawh a, ka ko zêl tawh ang.


"Damdawi kha naktûkah a lam theih ang aw."


"Nichin khân engtin maw min koh kha?"


"Laskam."


" Engtin nge i hriat a?"


"Ka hre tawp," tiin ka nui a.


"Ka nau bâkin khatiang khân min ko ngai lo asin le," tiin a chek tlak a.


"A awlsam khawp mai. I hming pum hi eng nge ni rêng rêng a?"


"Lawmsangkima."


"A mawi tehlul nèn, i thup tlat a."


A nui hawk a," Ka thup pawh a ni lo, mi min koh dàn ang kha ka pu a ni ve mai a, ka thup ni lovin min zâwt lo hrim hrim alawm," a ti a.


"In hla zir chu in thiam tawh bawk em?" tiin zawhna dang ka zâwt ta daih a.


"Thiam lo, kan zir țan chauh a."


"A nih chu, awm ve ila chuan kan thiam hma dâwn asin le, hla thar a ni maw?"


"Aw, urlâwk zàna rem tùr."


"A va țha ve; mahse, kei chuan ka zir ve hman dâwn ta lo a nih chu," ka tih chuan ani chuan," Nia, i awm lo va, kan zai pawh a mawi lo sawtin ka hria," a rawn ti a.


"A loh theih loh. A aw țha ber leh mawi ber ka awm lo tlat a," tiin ka nui kar kar a.


"Nia, a nih, engtikah nge i lo haw phei ang?"


"Dec 16-ah."


"I account number chu min pe la?"


"Ka lo haw hunah zâwk le! Ka hmanhmawh lo."




*HMANGAIHNA HI KAN THUNUNA KAN UP BEH THEIH THIL A NI LO VA, AMAHIN A LO PIANG VE MAI A NI*

☆PIALRÀLAH  TAL☆ - 8 By Dingdi Pachuau



Inrinni a ni a, Remlala'n an inah chaw eiin min sâwm a. Chaw ei hma chuan an bathlàr nuam zetah chuan khua thlîrin kan țhu a.


"I room ațang chuan khaw thlìr a nawm dâwn hi."


"Um, nuam ve reng; mahse, ka thlîr hman lo alawm, ka mut theih ve meuh chuan khumah ka let tawp a ni mai," a lo ti a.


"I chau hle țhìn a ni maw?"


"Tehrêng mai. School bâkah hian tih tùr țûl a tam lutuk, fapa mal ka nih hi hria la. Ka kovah engkim a awm vek, ka pa leh ka nu hi àwl ka duh ve tawh bawk si a," a ti leh a.


"A nih tak chu, buai rêng rêngin hun i hmang dâwn a nih chu. A țha lo asin, hun insiam ve teh, dam chhûng hi chu buainain hun kan hmang dâwn, hun thâwl i insiam ve a ngai aw. Nupui tùr i hmu zo lo palh mai ang," nui chung hian ka ti a.


"Chu pawh awl zate; mahse, nang i awm chhûng chuan tu mah ka ngai lo," nui sâng chuan hian a ti a, min melh ràn a.


"Chuti, hmu zo lo ve ve chu kan inremsiam mai dâwn em ni ang?" Nui hak hak chung chuan ka ti a.


"Mahse, nang ang bialpa chu ka nei rei thei hauh lo ang, i buai thei si. Bialpa buai reng mai neih chu, neih loh nèn a inang reng dâwn asin," ka ti leh a, kan nui dùn hawk hawk a.


"E, taka, tûn kum bâk hi ka thawk tawh kher lo maithei aw, a chhan chu ka pate'n B.Ed lam ti tùrin min ti sia, Lunglei lamah ka awm ve duh hmel," ka ti a.


"Aw, hetah Aizawlah pawh a tih theih tho alawm, chhùn lamah i hman loh pawhin warden-ah i țang pah ang a..."


Ka nui a," Min thlêm lo teh, min thlèm chuan ka duh leh mai dâwn si a," ka ti phawt a, chutah," Tak tak chuan, ka pain an bula awm tam ve deuh tùrin min duh tawh a. Pasal ka neihsan leh daih dâwn si a, an bulah ka awm tlêm dâwn lutuk a," ka ti a.


"Neih i tum hnai tihna em ni?"


"Teuh nâng, B.Ed chu ka ti phawt ang a, ka chhuah hnuah hna ka la zawng leh ang chu, pasalte chàwmhlàwm tùra an ina va lawi ringawt chu inthlahrun a na duh àwm ém mai," ka ti leh a.


"Chuti, a tlêm berah pawh kum hnih chuang ka nghah i la ngai dâwn tihna a ni maw?"


Ka chhàn hma chuan an awmpuinu chuan min rawn ko ta a, chaw ei peih a nih tawh thu a rawn sawi chuan eng dang sawi tawh lovin kan lût ta nghál a.


Fapa țha tak chu a ni e. An awmthei bawk a, duat pawh an induat thiam e. A nu leh pa chu an upa ve tawh a, Remlala hi an unau zînga naupang ber a ni a, a u hmeichhiate'n pasal an nei zo tawh bawk a, engkim chu a kut a ni tawh tak tak. A lo buai viau reng mai pawh hi a lo thiamawm viau e.


A nu leh pate chuan an fapa bialnuah min ngai a ni ngei mai.


"Kan inah nula a rawn hruai vawi khatna a nia, kan hmu thei che hi kan lâwm tak tak a ni. Bâkah, hei chaw kan eiho thei bawk a, a làwmawm khawp mai," a pa chuan a ti a.


"Nia, Bawiha hi zawng, tlangvâl dang hi a ang lo va, a buai thei bawk sia, a châng chuan ka khawngaihin la upa lo deuh hlek ila ka ti țhìn. A kovah engkim kan nghat lo thei si lo va, a buai ém ém reng mai a nih hi," a nu chuan a ti dap dap a.


Remlala chuan," Nu, khatiang kha chu sawi rih lo teh u, chaw a vawi khat lo eina a ni ve a, a lo ei duh tawh nâng, a ning palh ang," a lo ti vat a.


"A ho ém mai a."


"Aw le, kan sawi tawh lo ang; mahse, lo lêngin chaw lo la ei fo rawh aw, kan tute hian min rawn tlawh khât bawk sia, an awmna a hlat bâkah an buai ve bawk nèn, khua a har thei lutuk a," a pa chuan a ti leh koh koh a.


"Ka hman phawt chuan le, in in nei țhain a nuam bawk si a, ka rawn lêng zut mai ang," ka ti ve a.


"I haw phei hmain lo ei leh la?"


"Chaw ka heh sia, min sâwm nawn duh pawh ka lo ring tawh hlei nem," ka tih chuan an nupa chuan an lo nui dùn a.


"I ei tùr buhfai bag khat kan lo lei lâwk ang."


Titipui an nuam reuh khawp mai. An țawng duh a, kei lah ka țawng duh ve tho bawk si a, fiamthu nèn kan nuiho bâwk bâwk a.


Motor chhûnga kan țhut lai chuan Remlala chuan," Chaw i lo ei chu ka nu leh pa tân chuan vitamin țha tak i ni ringawt mai, i tihlim viau a nih kha," a ti a, min thlah haw mêk a ni.


"Titipui an nawmzia kha, ka țawng tam i lo ti ngawtin ka ring," ka tih chuan a nui sak a.


"A ngaihnawm ka lo ti. Ka nu leh pate hlim taka titipui thâwm chu ka tân chuan rimawi mawi berte zînga mi a ni alawm. An hlimzia kha, i chungah hian ka lâwm tak tak a ni. I haw phei hma chuan vawi khat tal chu i lo ei leh ngei ang tiraw?"


Ka ngawi vang vang phawt a, chutah, en ralhin," Ka'n inla-value ve phawt a nih kha," ka ti phawt a,"Nia, ei leh chu ka lo tum dâwn nia, farewell dinner pawh a ni maithei sia tiraw?" ka ti a.



A ngawih vung vung hnuah," Chutiang sawi suh, Lungleiah pawh awm mah la, min la rawn tlawh tho ang chu, min theihnghilh nghâl mai i tum chu a ni lo tiraw?" a ti sap a.


"Ni nâng, kan inbe pawh reng tho ang. Bâkah, Aizawl ka rawn kal pawhin nangni bâk rawn thlenna tùr ka nei dâwn lo. Bâkah, B.Ed ka tih phei chuan ka rawn tibuai reng dâwn che asin," ka lo ti vat a.


"E, puih theihna che ka neih phawt chuan le."


Ka mutnaah chuan Remlalate chhûng felzia chu ka ngaihtuah a, mi awmthei tak ni mah se, an induh lo viau tih ka hre bawk. Remlala pawh a fel ka ti thlâwt, an fapa ni àwm ngawih ngawih a ni. Mo erawh an mamawh ka ti, tû awmpui nei se, an khawhar a zia ngei ang.


Aizawl han kalsan chu a huphurhawm ka ti ve reng, ka lo tâl tam ve tawh a. Kan khua ai mahin ka awm tam zâwk hial ang chu. Chuvàngin, a ngaihawm ve vung vung viau ang.


Ka thawh tàwpna tawh tùr a nih vàngin zirnaah țhahnem ka ngai a, staff dangte pawhin bàn ka tum tih chu an lo hria a, bâng lo tùr chuan min ti ve tliar tliar hlawm. Anni pawh hi an ngaihawm ngawt ang, a țhen hi chu B.Ed nei tawh an nia, anni zawng an vànnei bîk, hna nghet an hmuh thuai ka beisei.


Dec ni 15 thleng school kan kal a, ka thawhna school ka kalsan tùr chu lung a tilêng ve vawng vawng nia. Kha leh chen kha thawhpuite leh school naupang hrang hrangte nèn hun kan lo hmangho tawh a, ka kal ngai tawh lo tùr leh an hmel ka hmu ngai tawh lo tùr chuan lung a tilêng.


Zànah ka insiam lâwk vek a, ka thawmhnaw hawn tùr chu a tam tham ve viau. Puia motor-ah ka haw leh thei dâwn a, a zia zâwk. Ani hi chu ka ngam ve a, a fel bawk a, seat a la awm phawt chuan mi dang motor-ah ka chuang peih lo.


Zànah ka nute ka phone a, Lungleiah ka tlang dâwn nge Haulawngah min lo hmuak ang tih ka zâwt a. Ani chuan," Bawihi, Haulawngah chhuk mai ta che, kan vêng sumo an tâwt thei sia, Haulawngah i pain a lo hmuak mai che ang a?" a ti a.


"A zia viau ang chu; mahse, ka pa chuan a huam dâwn em ni? A khawngaihthlâk reuh e a, Mama rawn tîr mai ula?" ka ti a.


"E, i pa ka lo zâwt ang e, tu emaw zâwk zâwk chu an rawn kal ngei ang," a ti leh a.


Ka haw tùr chu ka phûr ve tho. Sangkima ka hmu leh thei tawh dâwn a, ka awm rei thei tawh bawk ang.


Mala'n min rawn text hlawl mai!


*Krismas hmangin i haw dâwn em?* Ve teh tlat chuan.


*Dâwn e* tiin ka chhâng.


*Kârlehah haw ila?*


Krismas hmun dangah a hmang peih tawh bîk lo a ni maw? A bialnu a țhen tawh si a, hman nawmpui tùr a vàn rih a ni ngei ang.


*Naktûkah ka haw dâwn*


*A va fair lo tak!*


Hringnun hi chu a fair lo rêng asin. Chantâwka lungawi tak leh hlim taka hmangtu tân hian a lo fair chawp mai mai a lo ni.


******


Ka pain min lo hmuah ka rin tehlul nèn, Mama'n min lo nghâk zâwk. Ka pa chuan a zuam ngang lo a niang, a upa ve tawh a, a àwm viau tho ve.


Haw kawngah chuan ka titi barh barh reng a, Mama bulah hian cool takin ka awm thei lo. Ka țawng duh hi a chhuak ziah, ani lah hian min hnial deuh zâwnga thil lo sawi hi a hrât a, a tih dàn hi ka hre fuh ve tawh a, fiamthu hian kan inhnial bap bap țhìn.


"Thawmhnaw i rawn inhàwn vek tihna a ni maw? I kal leh dâwn tawh lo em ni?"


"Aw, ka chàwl rih lawk ang."


"Yes..."


"Eng nge i lo yes ve chiam a?" nui chung hian ka ti a.


"Mawng i titam ve tawh dâwn a," a lo ti daih.


Ngei zet hian ka melh râm a, ani lah chu a lo nui hawk hawk thung a.


Chêngpui kan pelh hnuah chuan," Kha, kan vêng ram chin kan thleng, khalh ve tawh rawh," tiin a ding ta nghâl a.


"Hmeichhe khalhah i chuang duh maw?!" Nui chung hian ka ti leh a.


"Hmeichhe khalh leh mipa khalh a tlàn dàn a inang reng alawm, i khalh khàt tawh ém kha."


Ka khalh ta poh. Ka lo la theihnghilh bîk lo, khua a țha a, kawng diak a awm loh lai a ni bawk a, hetiangahte zawng ka huam ve ém!


"Ah, țhianpa chuh! Phur ve teh aw."


Motor ka khalh ve chuan hmun dang ka hawi ngai lo, kawng chauh ka en țhìn. Sangkima pawh chu ka lo hmu miah lo va, kawng chhak deuh takah a lo awm rêng bawk atin ni.


"I haw hman tawh em? Lo kal la?" tiin Mama chuan a ko a.


Min rawn hmuh chuan mak a tih hmel kher mai. A hmel lah chu a mang niau mai a, a hmuhnawm phian.


"Ka lâwm viau nain ka bàl ém mai," a lo ti a.


Motor ațanga chhuakin," Eng nge i tih a? Kha kha eng nge ni?" tiin a bula buara chanve vêl puar awm chu ka kâwk zoh a.


"Meihawl a nia."


Motor hnunga ka bungraw dah chu sîksawi kualin a buara dah theihna tùr chu a awm ve mai.


"Lo dah la?"


A inthlahrung a, min hnial deuh; mahse, ka nghâk lui tho. Mama chuan chawipui a tum a; mahse, zo takin a rawn khai thla a, Mama chuan a lo dah luhpui a.


Kan tlàn hnu chuan Mama chuan," I rawh ve àwm ka hre si lo va?" tiin a zâwt a, ani chuan," Pu Mawia'n la ve tùrin min tia, ka hnial phal lo a ni. Ka nuin ai atân a duh țhin si a," a lo ti a.


"Mahse, meihawl chhèm chu a hrisêl lo asin," ka lo ti a.


"A dil alawm; mahse, tihngaihna a awm rih lo a ni. Heater duh viau mah ila, in chungte meter kan hmanpui tlat sia, an chawi tam dâwn lutuk a," a lo ti a.


"A nih tak chu, a buaithlâk hle si a nih chu."


Motor khalh laiin hmun dang en thiam lo mah ila, mak deuh mai chu, ka hnung chiaha țhu Sangkima hmel chu dârthlalang ațangin ka melh zoh zoh! Ani pawhin min lo en lai tak a lo ni thei hle lehnghal!


"Vawiin hi ni 16 a ni tak!"


"Ni i hai elo?"


"Hai lo ve."


"Irene-i nèn an chêt tlat hun tùr a chhût a nih kha," tiin Mama chuan a lo fiam zuk a.


"A ni maw?!!!" ka lo ti vat a.


"Min fiam lo teh," Sangkima chuan a lo ti sup thung a.


Mama chu ka lama rawn thle pheiin," An nu a rai an tia, amah a puh dâwn emaw tih laiin naute chu a bo leh daih a! Fapa hmelțha tak hmuh kan lo tum tehlul nèn!" a ti sar sar a.


"Duhtâwk teh!"


"Zui chu in inzui ve deuh kha aw."


Thil awm chu a awm ve deuh chiang mai. Neihi sawi kha a lo dik a nih àwm hi, ka rilru a na ve ringawt. Engmah kan inkârah a awm lo va, țhian mai kan ni tih chu ka hria; mahse, ka hmuh châk ém kha... ka hriat ve loh thil a awm chiang a ni, ka hriat lêm loh hian an lo inzui thûk viau maithei si a, ka tân 'chance' a awm lo ang...


Ka țawng tam theih nèn, ka ngawi ve ta deuh tlat. Mama erawh a țawng deuh reng a, a thil sawi erawh ka lo ngaihven miah lo!


Kan in kan thlen chuan ka pain kawtah min lo hmuak a, Mama leh Sangkima chu thingpui in tùrin a lo sâwm nghâl var a; mahse, Sangkima chuan a lo hnial a.


Tui lumin ka inbual a, ka harh sawng sawng mai. Neihi a lo lêng a, sweater dum mawi zet ka hawnsak a, ka pa kamis hawnin ka nu chu shâwl ka hawnsak bawk. An lâwm thiam viau a, nuam ka ti țhìn.


"U Mala chu a bialnu nèn an ințhen tawh sia, hrehawm chu a ti ve ngawt ang. Chuan, 'chance' i nei tawh tihna," nui kar kar chung hian a ti a.


"Sawi lo teh ang."


"I duh theih em kha aw!"


"Nia..."


"Mi dang i nei tawh tihna em ni? Tu nge ? Mawh, ka hre châk a nia!"


Ka airbag dah țhat pah chuan," Ka nei lo hrim hrim," ka lo ti a, Sangkima chungah 'eng emaw' rilru ka pu tih hria se, mak a ti dâwn lutuk!


"Ka awih chiah lo, heti chen i single thei hi ka awih zozai tawh lo."


"Ka luck lohzia hi hre ta che!" ka ti a.


Nui var var chung hian," Fanu rangkachak i nih hi, engtin nge tlangvâlho hi an mit a del ém ém zâwk le! An vànneih dâwn tehlul nèn, an mâwl tak zet a ni," a ti bawrh bawrh a.


"Țawng zawi deuh teh, tlangvâlhoin an lo hre reu reu ang e," nui chung hian ka lo ti a.


"U Mala lo haw hunah ka'n fuihpawrh teh ang."


"A țûl lo khawp ang."


A nui ta uar uar a, melh ralhin," Nui vak vak suh, ka nuin a lo khap mai ang che," ka ti vat a, ani pawh a insûm ta vat.


"A châng chuan chhimthlipui hi a hrâng ve țhìn tho elo?" zàwi deuh hlek hian a rawn ti sar sar a, a nui pah súng a.


"Nuih vak vak phal loh!"


"Kan hlim ve tihna a ni mai a, a ho tak tak! Ninawm, 'thil mawi lo' 'a zahawm lo' tih mai mai, kan nun chhûngril hi a pawimawh zâwk," a ti leh barh barh a.


Mama a rawn tek lût ve nawlh a.


"Eng nge min lo hawn ve?" a rawn ti lût nghâl ringawt a.


"Eng nge i duh?"


"Min lo hawn apiang."


"I lo kal har ém mai a, pêk che pawh ka phûr lo," ka lo ti thung a.


"Țhianpate washing machine thar ka làwm ve lawk a," a tih chuan Neihi chuan," An va thei reuh!" a lo ti pek a.


"Hna a thawk nasa alawm, nei tùrin thawk tlat hek," Mama chuan a lo ti vat a.


"Ka rin aiin pawisa an nei reuh," a la ti țâlh a.


"Nei tùrin a thawkrim tlat a ni. A nu hi a insu tak tak thei si lo va, machine an neih chuan a ti thei ve ang a, an buaina țhenkhat a lo kiang thei ang tih a hre ve tho. A nu sawi a nia, a nu thil sawi hi chu tih a tum țàng țáng ziah."


"An va lawmpuiawm ve!" ka lo ti thung a. A chhan chu a nau sikul a kal a, ani hna thawkin a chhuak daih zél bawk si a. In lamah a nuin tlêm tlêmin thawmhnaw bàl a lo sûk ve theih chuan a zia dâwn ém asin.


"Nia, hmuhsit vàng ni miah lovin an tân chuan a țha lutuk ringawt! Thawh chhuah a harsa si a."




*THAWHRIMNA PHÈNA MALSÀWMNA DAWNGTUTE HI AN VANNEIH VÀNG A NI NGAWT BÎK LO, HAH TAKIN A SÛR A SA HNUAIA AN THAWH ȚÀNG ȚÁNG THIN VÀNG A NI*

☆PIALRÀLAH TAL☆ - 9 By Dingdi Pachuau



Mama leh Sangkima tân mawza ka hawnsak ve ve a, Sangkima pêk erawh ka rilru dik loh vàngin ka inthlahrung ta tlat. A chungah rilru 'eng emaw' ka pu tih a hria ang tih ka hlau ta tlat a, ka pe ngam lo. An ina washing machine thar ka en pawhin ka pe lo, ka keng ve reng tho.


"Krismas thing phurh nia i awm ve lo chu i chân nasa hle a ni."


Ka piah lawkah Irene-i leh a best Afaki chu an titi barh barh a, Irene-i chu a țawng ring deuh zâwk a, an thu sawi chu ngaihthlák rûk châk viau mah ila thil mawi lo a ni tih ka hriat avàngin ka kal sawn deuh; mahse, a theih tak tak loh.


"...min chhâwk a, ka thing phurh tùr pawh min siamsak thlap. A lan dàn ang hi a ni miah lo, mi a care thiam tawp."


Irene-i hi a rai ti khân an sawi sia, a rai miah si lo va! Tu chanchin nge an sawi le?


Afaki chuan," I duh thei tak tak maw?!" awih loh hmel tak hian a lo ti a.


"Amah hi ka duh chi tak a ni ka tih tawh kha. Hausa lo mah se, a fel alawm."


"I duh rei tak tak pawhin ka ring lo, a class a hniam ém mai," Afaki chuan a lo ti leh a.


Afaki hi chu inla-class ve deuh chi a nia, a pa hi middle-ah a thawk ve tho. Pune-ah college a zu kal ve tawh a, chuvàng pawh chu a ni mahna!


"Tluangi, helamah lo phei lawk mai."


Biak in tual kan chei a, kan group cheini a nih vàngin kan thawk a, Irene-ite nèn hian group khat kan ni. Thil cheimawi lam hi ka tlaw viau mai a, ka thiam zâwng, an mamawh supplier nih hi ka tlin thung.


An mamawh tùr ka sem kual leh hnuah ka awmna ngaiah bawk ka va lêt leh a, an pahnih bawk chuan an lo la titi!


"...try char char ang, min haw bîk lo tih ka hre ve tho."


"Induh ve deuh zâwk teh, mipa hian anmahni zar rengtu hi an hmu hniam duh a nia," Afaki chuan a ti leh a.


"Ka duh miau sia, bâkah, hla zir zawhah pawh min thlah ve fo a nia. Min haw bîk lo ka tih kha, mipa mi care thiam tak hi ka ngaisang alawm," pakhati chuan a ti leh a.


An mi sawi hi Sangkima ni lo hrâm se ka ti, Irene-i phei chu a chhe lo si, a lo zei pah bawk nèn. Mipa tam tak chu a zùnah an uai ngei ang, Sangkima a lo kherh lunglèn ve phei chuan...


"A fel lo chu ka ti lo; mahse, a, kei chu ka peih lo, kan rethei duh àwm ém mai."


"Sangkima hi chu rethei mah se ka duh tho."


Ka chemte ken chuan ka inti-ât lehnghâl. Ka phu zawk mai, rang zetin ka hup phui nghâl nain thî a lo hnâm tiam țiam tho.


Lunghnûr zetin ka haw hnang hnang a, vawiin tlai zet chu ka hlim lo thlâwt. Chhùn ni sa tawrh chu thuhran, ka thil hriat chuan min tichau zual, ka lute chu a na ngut ngut hialin ka hria.


"I va chau àwm ve, Bawihte?"


"Ni a sa êm alawm, Pa."


"Lukhum i khum nange? Khum ziah tawh rawh, ni sa hi direct-in tawrh miah loh tùr," a lo ti charh charh a.


Nia, lukhum ka theihnghilh daih a.


Zànah ka inkhâwm lo. Ka lu a nâ a, ka thu hriat vàng khân ka chau bawk. Ka pa chuan damdawi min rawn pe a, ka nu pawh a lo awm ve reng a, ni sa ka tawrh sualah ka lo puh tlat a.


"Krismas a hnai tawh si a, fîmkhur a ngai a nia. Tunah chuan damdawi i ei tawh bawk a, a reh vat mai ang," ka pa chuan a ti a.


Ka inthiam lo viau. Ka tibuai ve ve si a, Sangkima vàng chu ka ti ngam chiah lo va; mahse, tel vena chin a nei ka ti tho. A fanu hi tlangvâl pakhat vàngin ka nâ a ni tih hria se chuan, ka nu hi a hlim lo kher ang chu.


Zànah chuan ka ni sa tawrh vàng a ni pakhat ang, ka muhìl hma lutuk. Zîngah chuah ka lu pawh a zia deuh ta, ka harh veleh chuan phone chu ka'n en a, dâr 7 a lo ri tawh!


Thawh ka tum a, message lo awm vâ chuan ka mit a la leh ta rih, mu chung chuan ka'n check a.


Mama, Sangkima leh Mala message a lo awm!!


Sangkima message chuan ka mit a la ber a, ka chhiar hmasa ber bawk.


*Tukinah i zia deuh tawh em?* tih tê a lo ni. Engtin nge a lo hriat ni?! Nizànah an lo kal em ni le?


Mama: *I lo dam lo a ni maw? Kan rawn kan che a, lo dam vat teh, a nuam lo a nia*


Mala : *Ka lo haw hunah chuan min kàwm ve tho rawh aw*


A va inang hlawm teh nuai ve!


Ka pa chuan min hmuh veleh," Morning, Bawihte, i zia deuh tawh em?" a lo ti a.


"Morning, Pa," ka ti phawt a," Ka zia tawh e, tlêm tê chauhin a na tawh," ka ti a.


"Vawiin chu inah awm vang vang ang che. Ni sa vàng chiah a nih kha, i dam thuai a ngai," a ti leh a.


Ka nu chuan thingpui min lo thlit a, ka lo sawi lo a ni. Thingpui hi ka in tawh vak lo, tui lum ka in țhìn, a țha ka ti zâwk.


"I thisen kan lâktîr ve rêng rêng dâwn em niang?" a ti a.


"A ngai lo ang, a reh dâwn alawm," ka lo ti thuai a.


Chaw ei kham lamah chuan ka lu nâ pawh chu a kiang ta deuh, a la rit deuh lûk nain a na tawh lo va, a zia tho tho.


Mama a rawn kal zawk a, min hmuh veleh," I zia deuh em? Message chhàn i tum bawk si lo," a rawn ti nghâl thawr thawr a.


"Aw, zia e, ka țha."


"Nizànah kan rawn kal a, i lo muhìl tawh a, ka rawn țawngțai che a."


Ka lo ner nâwng a, ka âwih lo lutuk ringawt.


"Hnatlâng kal hma ka lo pêng lawk a nih hi, vawiinah kan group kan hnatlàn hun a nia."


"Țha deuhin va hnatlâng ang che."


"Țhianpa a lo lêng maithei aw."


"Kan ka ngai hlei nem, ni sâ ka tuar sual mai mai alawm," ka lo ti. A lo lêng ang tih ka hlau, ka awm dàn ațang hian min hre chhuak ang tih ka hlau tak zet tawh, ka inthup thiam lo thei si. Hmeichhia zâwkin mipa va mitmei hmasak hi ka duh loh zâwng a ni si a, a bulah ka lai hú àwm si a, min man rang lutuk ang.


"Lo be bawrh bawrh la aw, lo lèn a hreh ve tho a nia. A inthlahrung viau nain rawn kal a duh a."


Pawisa kha min pêk a duh tawh a ni ngei ang, a hmanhmawhthlâk loh asin le. A buai àwm tehlul nèn, zànah pawh a lo kal theih tho si.


A rawn kal ta ngei. Balhla a rawn khai a, inthlahrun hmel zet hian min nuih a.


"Lo léng rawh, engmah i thawk nange?" ka lo ti a, ka nu leh pa chu room-ah an awm a.


Veranda-a ka țhut avàng chuan ka bula țhut ve pah chuan," I zia deuh tawh a ni maw?" a ti thung a, balhhla chu ka bulah chuan a rawn dah bawk a.


"Aw, zia tawh e. In chhûngah lût ila?"


In chhûng chu a vâwt deuh var a, ka inthuam lum êm zâwk a, a zia deuh hlek.


"Pawisa kha rawn pêk che ka duh bawk a..."


"I hmanhmawh a nih kha-"


"A zahthlâk tawh zâwk. Bûr hnih lai a ni lehnghal a, a làwmawm tak tak a ni," tiin a kekawr pocket ațang chuan pawisa a rawn phawrh a, min pe nghâl a.


"Nang chu lo awm hlauh lo la chuan, ka buai ngawt ang, ka lâwm tak tak a ni," a ti leh a.


"A țha a nih chu, khaw khat kan nia, țûlahte chuan intirh bawrh bawrh tùr alawm," ka lo ti ve a, ka melh țha vak ngam lo, amah en lo tùr zâwng deuh chuan ka awm char char.


"Ni sa i tuar ngai àwm si lo va, nimin lamah i tuar vak sia, kha vàng kha a ni ngei ang."


Ka pa nèn an sawi dàn a inang.


"Nia, lukhum ka theihnghilh a."


Thingpui ka thlitsak a, ka pêk chuan làwmthu a lo sawi sap a, ka kut tuam a hmuh chuan," I kut i tina elo?" a ti vat a.


"Engmah a ni lo, ka tipem palh mai mai."


Kan ngawih deuh hnuah chuan,"Ka rawn tibuai chein ka hria," a ti leh daih a.


"Engati maw?"


"Mut mai mai i duh zâwk ang ka ti hnuhnawh."


"Duh lo ve, nizànah ka mu țeuh tawh alawm," ka lo ti a.


A ngawi ta vang vang a, biak dàn tùr ka ngaihtuah rauh rauh a. Ka biak zêl zâwk a ngai si, nuam lo a ti ang tih ka hlau, biak dàn tùr lah a vâng si.


"Engtik nge in-"


"Damdawi i ei-"


Kan țawng rual ve ve a, kan tàwp rual chiah bawk. Kan inen a, kan nui ve ve ringawt.


"Lady first."


"Engtik nge in group in thawh ve dâwn?" Biak in chei chungchâng ka zâwt.


"Naktuk lamah."


"In group-in in tih zawh chuan a tâwk thei tawh mai ang a?"


"Ka hre lo le, in chei mawi sa kan rawn chei mawi lo leh vek ang tih chu a hlauhawm khawp mai," nui chung hian a ti a.


Room ațangin ka pa a rawn chhuak a, Sangkima a hmuh chuan," I lo lêng a ni maw? I nu a țha zêl em?" a ti nghâl var a.


"Aw, țha e, a țha ve lutuk tawh."


"A làwmawm nasa a nih chu. Bawihi i lo kan em ni?"


"Aw... hei a lo zia tawh viau hi."


"Nimin ni sâ maw le, direct-in a lo tuar pek a. Nizànah ka puak a ngèn lo chauh maw le," tiin a nui a.


Ka pa țhìn hi chu aw...


"Pa, thingpui i duh ve em?"


"Duh rih lo mai, dàwrah ka zu kal lawk ang e. Sangkim, lo lêng reng rawh aw."


A kal hnu chuan," I ngèn tak tak lo maw?" a ti a, a nui miah lo nia.


"A awihawm loh e a!"


A nui ta suk a.


"Ka têt lai chuan ka dam loh hian ka pain min paw fo asin," a ti a.


"Ka têt lai chuan kei pawh min paw ve tho; mahse, tûnah te chuan..." ka ti a, ka sawi zo duh lo va.


"Têt lai kha a lo nuam ber maiin ka hria."


"Kei chu tûnah pawh hian nuam ka ti tho." A rilru tùr ka lo ngaihtuah miah lo, a têt lai leh a tûn dinhmun chu a inthlau hle àwm si a; mahse, ka sawi zo vek tawh.


"A ni thei lutuk ang. Tunah hi chuan ngaihtuah tùr a tam tawh lutuk a," a ti a.


"Ngaihtuah vak vak a țha lo."


Kan ngawi leh vang vang a, a hnu deuhah chuan," Krismas hi a lo hnai leh tawh kher mai, hun kal chakzia hi. Kan upa leh sawt dâwn a nih hi," ka ti a.


A lo nui a," Dam țhat hi chuan hun hi a kal duak duak țhìnin a hriat alawm. Han dam ţhat loh chiah hian hun chu a kal muang," a lo ti a.


A lêng rei ve phian. Chhùn thingpui in hnuah erawh a haw ve ta, ka lakah eng rilru mah a pu ve lo va, țhian ang bákin min en lo. Kei pawh hian a laka ka rilru put hmang hi ka tih 'boral' a ngai, țhian inkârah hetiang hi a awm tùr a ni lo.


Urlâwk zànah țhalaiin Biak ina inkhâwm zawhah intihhlimna kan nei a, nula tlangvâl interek hrang awm lovin kan kim viauin ka hria. Hlim takin hun kan hmang a, kei pawh zai leh lâm tùrin koh chhuah zîngah ka tel ve ngei, hniala duh loh theih a ni ngai lo. Tu pawhin kan tih tùr chu kan ti vek, tih tùr harsa tak tak tuksak kan ni ngai lo bawk a, inzirna țha tak a ni.


Mama pawh a bialnu hlui nèn ngei mai an ko chhuak a, an zai dùn. Kan lo nui nasa lutuk a, ka lo uar fâl pek. Mala pawh 'rap' tùrin koh chhuah a ni, ani zawng a ngaihtuahawm lo chiang. Zanin a rawn tel ve tlat hi a mak ka ti, kohhran thil tihah hian a lo lang khât viau a, a lo haw lai a nih pawhin. A bialnu a țhen pawh hi țhatna lai a lo awm a nih hi ka tih phah, Biak inahte hial a rawn kal phah a.


Sangkimate group an rawn che ve leh. Țhing lutuk tak maiin an rawn inchei a, Mama chu lead guitarist niin Sangkima a zâi thung. A zâi thiam phian mai, a lo zâi thiam tih ka lo hre miah lo!


A vawi khat zàina chu a ni lo tawp ang le! Kohhran zaipawlah chuan a tel ve reng tho nain solo ang chuan a aw ka la hre lo, a zâi thiam ka ti tawp.


An zài zawhah kut kan bêng dur dur a, video-a ka lo record lo kha ka inchhîr a, mâwl ka inti khawp mai. Mi dang chuan phone an lo lek fur niin, Irene-i pawh ka hmu.


Action song, recitation leh solo kan ngaithla a, an lo inbuatsaih nasa hlawm hle mai. An tițha hlawm ka ti hle mai, hun an nei tam lutuk àwm hlawm si lo va, an inpêkna a sâng a, tluk loh rim an nam ka ti.


Nupui pasal zawn hun an buatsaih a, hmeichhe koh chhuah zîngah ka tel leh. Irene-i leh Neihi pawh. Ka hming min pêk chu Esther-i a ni, mipa kan pasal tùrte chu kan hmuh theih loh lam hawiin an ding tlat a, an hnungah lehkhain an hming an târ thung.


An hming chu chhiarin ka en dan dan a, ka pasal Ahasuer-a hming inziak ka lam hawia ka kawih her chuan Mala a lo ni!


Kut an lo béng hluah hluah a, ka zak kher mai. Star viau tawh lo mah ila ka star țhin kha a ni si a, nuam lo ka ti, ka nui ringawt.


Mahse, ka nui rei vak lo, Irene-i leh Sangkima ding dùn ka hmuh chuan ka nui reh riai riai, an inhmeh ka ti viau a, ka thinlung erawh a tâwt viau thung.


A pair tê tê chuan kan ding zél a, mipui lam pawh ka hawi ngam lo, hrehawm ka ti tlat a nih chu. Ka rilru chu ka awm dàn ațangin an rawn hria ang tih ka hlau, ka țang țùng mai.


Thlate kan lâk hnuah kan țhutnaah kan lêt chauh. Zàn khawvawt hnuaiah chuan lum ka ti pup pup mai, Neihi lah chuan min kheuh zeuh zeuh reng.


Hun kan hman tàwp lamah chuan kan zavaia dingin hla kan sa a, țawngțainain hun kan ti tàwp.


Mala chuan," Thlah i ngai em?"a ti a, ka chhàn dâwn lai tak chuan Mama'n," Tluang, min lo nghâk lawk aw, kan hman țêp," a rawn ti a.


"Mama'n min thlah dâwn a," ka ti ta ringawt.


"A țha e, zanin kha a nuam khawp mai tiraw?"


"Nia..."


Mama leh Sangkima an rawn lan takah chuan kan titi zui lo, kan inmangțha hnuah chuan kan ințhen ta nghâl.


"Zanin chu a nuam reuh phian," Mama chuan a ti a.


"Nia," Sangkima chuan a lo ti a.


"In group kha in zai thiam tawp," ka lo ti ve thung a.


"Nuam ti deuh chu kan awm chiang a ni," Mama chuan a ti leh a.


"Nangmah! In nu hlui nèn in han zai dùn ngei ah!"


"Lal Ahasuer-a a nih chu."


Mala nèn min lo dem ve ngei. A 'purana' tawh ém mai a.


"Tu emawte pawhin nuam an ti, a ngawi hmak mai a nia," ka ti a, ka nui lui hak hak a, chhûng ril lamah erawh ka nui lo chiang.


"Loh theih loh, zànah pawh a thlah țhìn."


"A ho ém mai a."


"Hriat ve loh thil ka nei tihna a ni maw?" ka ti a.


"Engmah a awm lo."


"Pân loah tho a fu lo an ti em ni kha?" Mama chuan nui hak hak chung hian a lo ti a.


"Nia, a fu lo chu an tih țhin kha."


Kan in kan thlen chuan," Lo pêng rih ula," ka ti ve ngial a, Mama chuan," Tui in lawk teh ang," a ti a, min rawn zui lût ta nghâl a.


Zàn a tlai tawh a, tui in zawhah an chhuak leh ta nghâl mai a, veranda thleng ka thlah.


"Mang țha u."


"Mang țha."


Sangkima chuan min en duh khawp mai a, a țawng ve mang si lo va, min mangțha hek lo, mak ka tiru hle a.


Ka mut hnuah message a rawn thleng ta keuh mai.


*Zanin kha chu Lalnu Esther-i i nih duh hmel tak tak ka ti*


Sangkima message a nia.


*Nang pawh Joseph-a i nih ve tho kha* tiin ka chhâng, Irene-i erawh nula thianghlim Mari tih kha chu a inhmeh lo deuh chu ka ti.


*Lal Ahasuer-a nih ka lo châk a*


Chu message zet chu, ka thin a tiphu dup dup mai!



*HRINGNUNAH HARSATNA A LO THLEN HIAN ENG EMAW MIN ZIRTÎR A TUM TIHNA, CHÎK TAKIN LO BELHCHIAN TÙR A NI*



☆PIALRÀLAH TAL☆ - 10 By Dingdi Pachuau



Ka rilru ang tho hi a pu ve tihna em ni?!!! A ni thei ang em? Lalpa leh! Han ni tehrêng se...


*Vawi khat dam ve mana Lal nih kha a châkawm alawm*


Lal nih a lo châk vàng a nih chu, min duh ve vàng a ni miah lo!


*A ni asin, lal nih chu nuam ve tak a ni, a takah kan ni thei mang si lo va* tiin ka reply a, ka rilru a hnual rawih.


*Chu tak chu alawm ka châk*


Chhàn lêt dàn tùr ka ngaihtuah vang vang a, min tiphâwklêk ta sa sa, text reng ila ni mai alawm.


*Nula thianghlim bula din kha a nih kha nawm hmel le, in chhe lo dùn bawk e* ka ti ve ta a. Min chhàn dàn tùr ka hre châk lutuk!


*Nula thianghlim bula din ai chuan Lalnu Esther-i bula din kha ka châk zâwk*


Kha, a rawn ti leh ta. Ngaihbel theih lek lek si, rin ngam theih miah si loh hian min reply zêl a, ka hre thiam lo. Ka thluak a tibuai ting tang a, rilru a tiphâwklêk tlat alawm.


*Lo ding rawh* ka ti ve leh.


*Tak tak?*


Mala min dem zâwng leh thîk zâwng angin engmah a sawi duh hauh lo nia, tlêm tê tal pawhin thîk ve deuh se, ka hlim ve ni tùr.


*Mari i hlauh hle kha* ka ti ta ringawt. Țhian kan ni tho bawk sia, thil a ngaihruat theih tùra va text ka hlau bawk si, he pa hian min tibuai...


*Krismas chibai le*


E! Dâr 12 a lo pèl chiah tawh a nih hi. Kan va in-text rei deuh ve, rei lo tê emaw ka ti asin.


*Nangni pawh Krismas chibai u*


Mi dang ka țhiante pawh Krismas chibai ka sem kual a, ka text vek. Zaninah an lo hmu lo a nih pawhin naktûkah an hmu dâwn tho a.


*I mut a chhuak tawh a ni maw? Kha, i hàm bài bái alawm*


Min hmu tak tak emaw ka ti hial! Ka hàm tak tak bawk sia, ka hawi kual ruk ruk tak tak.


*Min enthla a ni lo maw?*


*Rilru mitthla suangtuahnain* a rawn ti duah.


*I zai thiam a nih mai chu*  A duh lo ngawt ang chu.


*I hmel țha a nih mai chu*  Ka tih dàn chiahin a rawn ti. Hmelțha min ti tak tak se aw...


*Type tùr i hre tawh lo a nih kha, mu mai teh* ka ti a.


*Min ning tawh a ni maw?*


*Hahaha, chimawm lo mai teh*


Kan in-text tàwp meuh chuan dâr 1 a ri mai dâwn. Rilru hlim deuh si, kalkim chiah lo deuh si chuan ka mu ta a.


Zîngah thawh ka hai bîk lo. Krismas ni a ni bawk a, vawiin chu hlim takin hmang teh ang, nizàn lamah pawh ka hlim viau kha. Ka hlimna ho si zia kha.


Ka thiam tâwka nalhin ka hmai ka hnawih a, ka thawmhnaw hâk tùr milin ka inhnawih bawk. Dârthlalangah ka inthlêk nasa khawp mai a, nalh taka lan ka duh a ni.


Ka duhthusàm thlapa inchei ka ni bawk a, ka inringtâwk a, nuam pawh ka ti. Chawhmain kan inkhâwm rei ve deuh, zaipâwl leh solo ngaihthlâk tùr leh action song lam thlìr tùr a awm a; mahse, hun kan hman dàn a light a, a zia viau.


Tu pawh mai chu kan nalh maiin ka hria. Naupang ațanga putar pitar thlengin kawr thar kan nei sup a, kan hlim bawk a, hmuh pawh kan nuam.


Inkhâwm bànah thingpui tui tak leh zochhangban chhum tui tâwk kan ei a, lo buaipuitu zîngah chuan Mama leh Sangkima an lo tel ve lehpek.


"In va tițha ve!"


Sangkima nèn chuan kan mit a intawng sar mai. Engtin emaw tak ka awm, ka hnunga ding Neihi'n min rawn nèk avàngin ka harh chhuak zawk.


"Tihpalh, hei, min rawn nêk kher lo ula," Neihi chuan a hnunga mite a hau mawlh mawlh nghâl a. Kei pawh ka zak ka sen deuh awp awpin ka ring, Neihi khân min rawn nêk lo ta se, ka ding rei ang em? Awi, a zahthlâk dâwn lutuk.


Ka bula ei tùr kenga an rawn țhut ve pawh chuan Sangkima chu ka lo melh ngam lo va, nichina ka awm dàn vàng khân ka zah, min hre chhuak ngei tawh dâwn chiang lutuk.


"I chhe lo tak zet a ni."


Sangkima sawi chu ni se chuan, ka lai ang a, ka sen leh țûn ang chu; mahse, Mama zâwk a sawitu a nia, ani sawiah hi chuan ka zak bîk lo.


"Ka lâwm  e."


"Ka farnu anga ka en chu ni lo la chuan..."


"He pa ngeiawm theih dàn hi, a rilru hi a tenawm pha tlat," ka tih chuan a nuih a za lutuk, Sangkima pawh a nui ve tho.


"Kan vêng nulaah chuan i lo chhe lo ber a nih hi, nang tluk tùr che-"


"Ninawm!!! Ka ngaithla peih lo," ka lo ti vat a, a hnungah ka chùm dat a.


"Fakna ngaihthlâk chu a nuam alawm le, ka fak ve che a ni mai a," a ti nang nang a.


"Ka lâwm e, duhtâwk tawh ang che," tiin ka melh rum a.


"A, i mit hnawihte kha a va mawi-"


"Ka ning, he pa bulah hian ka awm peih lo," tiin ka tho a, Sangkima sîrah chuan ka țhu ta daih a. Mama chu a nui hak hak a, min fiam nasa țhìn a, mi zîngah chuan min tizak fo.


A hnu deuhah Sangkima chuan," Chhang chu tui i ti em?" tiin min zâwt a, ka lam hawi deuhin a rawn inher pah bawk a.


"Tehrêng mai."


"A ban tui ka ti khawp mai," a lo ti ve a. Ka mitsîr chuan ka hmu thei tho nain ka en chiang vak ngam lo, min en reng tih chu ka hria.


"I make-up chu i inhmeh khawp mai."


Ka nui  a," Ka làwm e," ka ti sap a.


"Ka ti tak tak, chuan i thawmhnaw pawh."


"Ka lâwm leh bawk e."


Ka lam a rawn hawi reng avàngin ka en ngam bawk si lo, awm dàn thiam a har ka ti. Ka lai hû mai, hrehawm ru deuh tak si, nuam titak bawk si hian ka awm.


"Chawhnu lamah zàikhâwm kan ti dâwn em?" Mama chuan a rawn ti ta a.


"In tih dàn apiang a ni mai."


"Haw hmain kan click ve chuai chuai phawt ang chu?" Mama chuan a ti leh a, pawi lo khawp mai, ka rilrua awm ka sawi chhuah ngam loh a nia.


Mi pawh an lo tlêm deuh tawh a, ka phone chuan kan click ve zawk zawk a, mi dang hmuh lai chuan nuam ka ti vak lo.


Biak in tualah kan hmet bawk a, a mawi reuh phian lehnghal. An pahnih pawh chuan an camera chuan an hmet ve bawk a, mi dang pawhin an lo hmet ve mawlh mawlh tho.


Irene-i lehpek chuan," Sangkim, min lâkpui ve," a rawn ti lar lar, a lo châng ru reng a niang, zak lo ka ti lutuk ringawt.


"Va luck bîk tak!" Mama chuan mi dang hriat loh chuan a lo ti sap a.


Kei erawh chuan engmah ka sawi lo, ka en zawk ringawt a. Engah mah ngai lo ni àwm tak hian ka hawi sawn lehnghál vat, ka rilru chhûngrilah erawh thîkna a rawn piang rang lutuk.


Mama'n a hmehsak a, Irene-i chuan hnaih zetah hian a en chho deuh hâ a, eng emaw hi a sawi sep a, an nui ve ve.


Afaki chuan," Mawi dâwn lutuk! A fuh ngawt ang, ka en châk tawh," a lo ti vawr vawr a, ka va ngei tak! Ka en châk hlawl lo.


Ina min thlah haw an tum chuan ka duh lo va, keimahin ka haw rak rak. Zaikhâwmnaa kal pawh chu ka peih lo zo vek, ka phùrna a reh chiang lutuk.


Mama min rawn sâwmin inah a rawn lût a, ka lo inpeih tawh a, a langah chuan phùr hmel takin ka awm. Pâwna chhuah pah chuan," Khawnge Sangkima-" ka țawng tàwp chiang lutuk,  pâwnah chuan Sangkima leh Irene-i chu an lo awm reng mai a, makti deuh tak hian ka en dùn hau ringawt!


"Irene-i kan rawn sâwm a, amahin zaikhâwmnaa kal ve a lo tum a, kan khawngaih a," Mama chuan nui chung hian a lo ti a, a rawn țawng chhuah  avàng chuan ka harh chhuak chauh.


"Le, kal ang u," ka ti a, ka nui pah sâng a.


Kawngah chuan Mama chu a țawng char char a, kei pawh ka țawng tho. Ka awm dàn ka thup theih dan țha ber chu țawng hi a ni, chuti lo chuan min man chhuak hma dâwn lutuk.


An lo la țan lo deuh hlek a, kan lût ve nghâl. Ka rin aiin ka zài a tui a, ka zai nasa. Ka bula mite vàng a ni tih ka hre reng, ka tilui ve bawk a ni.


Tlaiah ka nuin eirawng a bâwl dâwn tho a, in lam chu ka ngaihtuah lo. Kan zai tui ve bawk a, bàn rak thleng kan awm. Naktûk lam chu fatuah ka tel ve dâwn si a, ka zai ve hman tawh dâwn lo.


Kan bàn hnuah chuan kan lêng kual ve rih a, kan khuaa ka awm pawh hian ka lêng kual ngai lo lutuk a, kumin chu lêng kual hrep teh ang ka ti a ni.


Țawng duh ta chu, chutia kan lènna lamah chuan min lo betute chu ka titipui luam zêl a, Mama chuan," Hmui-pangpari," min lo ti sup sup reng a; mahse, min lo biak tlat chuan ka chhàn ve loh te chuan thil mawi a ni lo.


Malate in kan pelh dâwn chuan pitar pakhat hian min lo hmu ve a, ka hriat ngai pawh ka hre lo. Min lo koh avàng chuan kan ding leh rih a.


"Mami, i va hmel țha phuk phuk ve! Tu nge i pa?"


Ah, titipui nuam chi bawk.


"Ka lâwm e, ka pi. Ka pa chu Roliana a nia," ka ti a, ka nui pah sâng a.


"Roliana, middle sikul head kha maw? Fanu a lo la nei tih ka hre miah hlei nem, i hmel țha hle mai. Ka nulât lai min tihre chhuak vawng vawng mai ka ti," a ti chiar chiar a.


"Ka pi chu, i nulât laiin i hmelțha hle dâwn tih ka hre mai," ka ti țan a, ani lah chuan nui har har chung hian," Țha vak lo ve, ka tluk pha lo ang che," a lo ti a.


Mala in ațangin a rawn chhuak a, min rawn hmuh chuan maktih hmel deuh hian," Tluangi, eng nge i lo tih a?" a ti phawt a, pitar hnênah chuan," Ka pi, a vâwt i ti lo em ni? Pâwnah i lo awm daih a?" a ti a.


"Hei, nula hmel țha tak ka lo hmu a, Roliana fanu a lo nia."


Mamate chu an lo ding ve țhap bawk sia, min lo nghâk ve bawk si nèn, ka ding ta a.


"Ka pi, kan la inkàwm leh dâwn nia aw. A tlai tawh sia, kan kal phawt ang e," ka ti a.


"I hmêl țhat ang bawkin i fel dâwn a nih hi."


"Ka lâwm e, ka pi. A nih leh, chaw ei tui phawt aw."


Kan kal leh hnu chuan Mama chuan," I hmui pàr nasatzia kha!" a lo ti a. Kei chuan," Min biak chuan be lovin ka kalsan ringawt thei hlei nem," ka ti  leh a.


"Hmel țha a tih vàng mai che a..."


"Hriat a nuam alawm le!"


"Ka fak ve che pawhin min nin tlat kha, i chhe lo-"


"Ngawi mai teh, lêrh lutuk ziah suh," ka lo ti vat a, Irene-i leh Sangkima chu an lo nui țhâ a.


"A nih, i hmel chhia ti ila i duh em?"


"Rilru tak taka sawi a pawimawh."


"Ka rilru tak takin, i hmel...chhia."


A hnungah ka chùm ak ak a, an nui zo vek.


Zànah Sangkima a lo inkhâwm lo tlat. Inkhâwm chhûng chuan ka ngaihtuah a, Irene-i ka hmu bawk si, an awm dun vàng chu a ni lo phawt, eng vàng nge ni ang? Ka inkhâwm ve chu a hming chauh a ni, ka ngaihtuahna chu hmun dangah a awm daih.


Inkhâwm bàn chuan Mama pawh a lo inkhâwm lo tih ka hriat chuan ka call ta vat.


"Engati nge in lo inkhâwm loh a?" ka ti nghâl táwng a.


"Țhianpa Sangkima nu a zia lo deuh a," a rawn tih chuan ka thin a phu nghâl dup dup mai!


"Eng...engtin nge a awm?" Hlauthâwng zet hian ka ti a.


"A țha tawh, a thâwk a buai deuh a, a asthma a chhuak leh deuh a."


"Tunah...a țha tawh maw? Ka lo kal ve nghâl e."


Ka hlauthâwng lutuk! Hmanhmawh zetin ka kal sawk sawk a, an in ka thlen chhoh phei chuan ka thaw hlawp hlawp thei hial.


Inah chuan Pa Lalate nupa leh Pu Siamate nupa, Mama leh Sangkima nau an lo awm a, room lamah a nu awmpuiin Sangkima a awm a niang, nge a lo muhìl tawh zâwk? A lo awm ve lo va.


"A zia tawh maw? A muhìl thei tihna em ni?" tiin Mama chu ka zâwt a.


"Aw, nichin deuh, i rawn phone hma deuh tawh khân a muhìl tawh a."


Sangkima chu room ațang chuan a rawn chhuak a, min rawn hmuh chuan nui suk chung hian," In bâng tawh elo? I va fel ve, i rawn kal a," a ti a.


"A mu țha thei tawh maw?"


"Aw, a țha tawh e."


Sangkima nau chuan thingpui min rawn pe reuh a, 'ka duh lo' tih hman pawh a ni lo.


Ka bul țhutna âwlah chuan a rawn țhu ve a, a sam kâwih niaih  avàng chuan khawngaih zet hian ka en a, a rilru ngaihtuahna a vâk thui ngawt ang le! Tukin lam leh tlaiahte kha chuan hetiang hian a awm loh kha, tun hun têah hian a lang bawrchhawr riaua ka hriat chu le!


"Engtik ațangin nge a buai deuh a?"


"Chaw ei kham hnu lawkah khân a nia."


"A nih tak chu, khua a dur àwm ka hre si lo va," ka ti a.


"Ka nu hi chu khaw dur leh dur loh lam pawh a ni lo, a chhuak thut țhìn a," a lo ti sap a.


Thingpui chu ka in hlak hlak a, a mut theih tawh avàng chuan Pu Siam nupui chu thovin," Ka'n chho lawk ang e, naupang an rawn haw ve tawh ang," a ti a.


Pa Lala nupui Nu Puii pawh chuan," Nia, a mut theih chuan a zia tawh alawm, kei pawh ka zu haw ang e," a ti a, Sangkima pawh chu dingin kawngka bul thleng hah thlahin a mangțha nghâl a.


"Ka chhûngte pawh ka hrilh miah lo, ka hmanhmawh lutuk a," ka ti a.


Mama chuan," A zia tawh a, i haw thei thuai ang. I zaikhâwm dâwn em?" a ti a.


"Dâwn lo, hei ka lo lêng ve alawm le."



Pa Lala leh Pu Siama pawh chu eng emaw sawiin an titi sap sap a, Sangkima nau pawh chu rei țhu lovin room lamah chuan a lût ta daih a.


"Thingpui kha in leh ang u hmiang? Kurtai a awm a," tiin Sangkima chu a tho a, ka lo tho ve vat a.


"Ka lo lum ang, hmeichhia ka awm hi."


A harsa lo bawk a, a sen hângin ka siam a, Sangkima'n kurtai a lo chhawp bawk a.


"Lêng ve reng rawh aw."


"Riahpui in ngai ang em?"


Mama chu a lo nui hak a, melh ralh pahin," Eng nge i nuih?" ka ti vat a, ani lah chuan," Nuihzatthlâk maw le," a lo ti thung, a la nui țhú.


"Ngai lo ve, a làwmawm e," Sangkima chuan a lo ti a.


"I riah ve zawngin nangmah kha a nia buaipuiawm zâwk dâwn ni!" Mama chuan a lo ti leh a.


"I ninawm ve chiang. Ka hnâr ngai lo va, chilthlì ka thlauh ngai bawk lo," ka tih phei chuan Mama nuihza lutuk chu nui ring ngam si lo hian a sen awp awp, a insûm lutuk a.


"Eng nge? Ka thil sawi chu a nuihzatthlâkna?"


"I lawmawm reuh e!"


"I ninawm!"


Sangkima chuan," I rawn kal laiin i hlau lo em ni?" tiin min zâwt a.


"Hlau lo ve, phone light ka nei a. Bâkah, ka hlauthâwng lutuk a, hlauh tùr lam kha ka ngaihtuah miah lo."


 "A țhat tawh hi, hlauthâwng miah suh, i lo hlauhthàwn vàng chuan pawi ka ti hle mai."


"Ka hmu si lo che u a, thil țha lo a thleng a niang ka ti a."


Ka kuta  a rawn vawn chuan ka phu deuh zawk, ka en nghâl vat.


"Thil țha lo a thleng dâwn miah lo a nia, ngaihțha takin awm rawh aw."


Hnem ngai tùr zâwkin min hnèm a nia. A mitah chuan ka en kar a, he pa hi ka hmangaih chiang a ni!



*HMANGAIHNAIN HAUSA LEH RETHEI A THLIAR LO*

☆PIALRÀLAH TAL☆ - 11 By Dingdi Pachuau



Ka lêng ve ta reng. Mama chuan a riahpui dâwn. A nu chu a muhìl ta chiah chiah reng si a, dâr 9:30 a lo rîk tâkah chuan haw tumin ka ding ve ta a.


"Ka haw tawh ang e, a mu țha thei tho bawk a. Eng emaw a thlen chuan min lo hrilh ve ula?"


"Aw le, i fel lutuk e."


Mama chuan," Țhianpa, han thlah rawh, amah chauha a haw chuan ramhuaiin a lo man daih palh ang," a lo ti a.


"Thlah ka ngai lo, ka hlau lo." A tlai ve deuh tawh a, a rûk tak chuan ka hlau.


"Kal rawh, ka thlah ang che, thlah i phû ngawih ngawih si a," a lo ti a, ka lâwm kher mai.


"Ka lâwm e."


Khuang chu hla vak lovah chuan a la ri dap dap a, an la bâng lo chiang.


"Mapui-"


"I nu chu-"


Kan inen a, thla êng deuh ruai hnuaiah chuan chiang takin kan inhmu thei lo nain kan inhmu thei tho.


"Sawi hmasa rawh," nui chungin ka ti a.


"Lal Ahasuer-a kha nih ka châk, lal a nih vàng ni lovin," a ti ta!


A tàwi deuh hrat avàngin kei pawh chu ka ding ve deuh tho, a thil sawi vàng erawh chuan ka thinphu chu a hma aiin a rawn phu rang dup dup mai.


"Kan retheih vàng hian ka duhna che hi hrilh loh che ka tum miah lo."


Min duh...maw?!!


"Inchhìr hun neih ka duh lo va, ka sawi loh vànga pawi tih hun neih lah ka duh hek lo. Mapui, ka duh che."


Mak tihna leh phûrna inchawh pawlh vàng chuan ka thinlung chu a zâng hawkin ka hria. Ka hlim vawng vawng, min duh thu a sawi hi ka ring pha lo asin.


"Min duh tak tak...maw?!!"


"Aw, ka duh che. Ka thup zêl chuan ka tlâi ang tih ka hlau, ka tlâi lo tiraw?"a ti leh a.


"Ka ring thei lo!"


Ka bânah chelhin a lam hawiin min kuai her a, ngun zeta min enin," Mapui, ka tlâi lo tiraw?" a ti leh sup a.


"Aw..." a hmui chu ka en ngar a.


Chutah, hre chhuak thutin," Irene-i nèn hian in induh emaw ka ti?" tiin a mitah chuan ka en chho ta a. Irene-i kha ka thîk ém asin, a chhe lo bawk si.


"Nang lo chu duh ka nei lo."


"Han sawi leh teh."


"Mapui, ka duh che, nang lo chu duh ka nei lo," tiin min rawn hnaih sauh a.


"Kei pawhin...ka duh che," ka ti ve ta sap a, ka sawi ang. Chuti lo chu, nula dang a melh ang tih ka hlau, min lo duh ve tho hi ka lâwm.


"Ka fâwp dâwn che...aw?" tiin a rawn kûn hnai deuh a, kei chuan ka hnial hauh lo ang. Hnial ahnêkin kan induh tawnna hi lantîr thuai ka duh zâwk.


Kawng lakah kan ding reng bawk si a, miin min hmu ang tih ka hlau leh hnuhnawh. Kan awm dàn lah chu mi sawi nuam tih zâwng tak a ni dâwn lehnghâl.


"Miin min hmu ang?"


Kan ințhen thei țâwk. Min en vang vangin," Hawh, in thleng ka thlah tak tak tawh ang che," a ti a, kan phun dùn sap sap a ni bawk a, miin min lo hmu pawh ni se, kan țawng chu an hre teuh lo ang.


Kan in thlen hma deuhin kan han tàwi leh rih a, kan induh tih inhrilh thar kan ni bawk a, a àwm ve reng mai, ka inthiam lo bîk lo.


"A tlai tawh sia, Mama a lo ngaihțha lo ang tih ka hlau."


"Ngaihtuah suh, chu zawng ai chuan thlah che har ka ti a ni," a ti sup a.


"Kei pawh."


"Mut dâwnah ka lo text ang che aw, min lo reply peih ang em?"


"Tehréng mai."


"A nih, lût ila?"


Inah chuan kan lût a, ka pa a lo la meng a, ka nu a lo la zaikhâwm daih.


"Bawihi, i nu nèn in lo haw tlàn ka ring a. E, Sangkim, i lo thlah a ni maw?" ka pa chuan a lo ti a.


"Pa, ka zaikhâwm ve lo va. Sangkima nu hi a thawhah a chhuak a, ka kal ve daih alawm," ka lo ti vat a.


"A ni maw?!!! A va zia lo ve aw, tunah a țha tawh em?"


"Aw, a țha tawh e. A muhìl tawh a," Sangkima chuan a lo ti a.


"A nih tak chu, a țha chho zêl tùrah ngai ila, a lo buai leh thut a nih chuan min lo hrilh hreh lo ula aw?" a ti ve ngial a.


"Tehrêng mai, ka lâwm e."


A haw ve nghâl. Kawng lakah kan rei angreng si a, Mama'n a lo zawh chîk viau loh hrâm ka beisei.


Mu tùra ka inpeih chuan dâr 10 a la ri lo, hmanhmawh ve tak chu ka ni.


Ka phone chu lain vawiin lama kan thlalâk chu ka en kual a, min lo duh ve reng vàng chu a ni thei maithei, min lo hnaih thei khawp mai. Kan selfie-na tih lohah chuan keimah min en lai tak a lo ni ziah a nih hi.


Message tone a rawn ri koh.


*I mu tawh maw, Honey?*


'Honey'. Ka va duh tak ém! Ka bialpate khân hetiang hian vawi khat tê mah min la ko lo a nia, nuam ka ti veng veng.


*Ka mu chiah. I nu chu a la muhìl zêl em?*


*Aw, a țhat zêl beisei ang*


*Mama a lo dîlchhût em?* Ka hre châk alawm, mi zîngah min fiam khut roh ang tih ka hlau bawk.


*A hre daih tawh*


A hre tawh maw? A hmain an lo sawi dùn tawh tihna em ni le? Chuti, engmah min va hrilh lo thei ve!


*Chuvàng alawm nangmah thlah tùr che a min tih* a rawn ti leh a.


*A inla zei vêl tawp* tiin ka reply a.


*A nui chur chur reng a*


*Ka message hi a lo chhiar ve elo?!* A lo chhiar hlauh chuan a chî loh ngawt ang.


*A teuh lo mai, tuma chhiar ve ka phal lo hrim hrim*


Ka nui sak. A mitmeng dum raih mai khân a'n chhiar ang a, a nuih zauh chânga biangsum lang kalh chung ngei khân. A hmui zei zet a'n chêt pah zeuh zeuh bawk ang, ka mitthlain ka hmu thiam vek.


*I mut a chhuak tawh a ni maw?*


*Chhuak lo ve, ka ngaihtuah che a*


*Wow!...hriat a va châkawm ve!*


Ka nui leh sak.


*Kan thlalâkho kha ka en kual a*


*Min lo send ve phal em?*


A vaiin ka send vek a, amah chauha a țhu lai a rûka  ka hmehsak erawh ka thawn tel lo, hei hi chu ka phal rih lo.


*Kan thlalâkah pawh hian ka lo en ziah che a nih hi, ka rilru chu a lo hriat theih hle mai ka ti*


*En ringawt te chu, Mama pawhin min en ve tho kha* ka ti thung a.


Thil ho mai mai kan sawi reng a, a tàwpah amah zâwk chuan *Naktûkah i buai dâwn si a, i tho thei lo palh ang, kan duh tâwk dâwn em ni?* a rawn ti a.


*Min duh thu sawi leh phawt la?* ka ti ve deuh tlat a.


A rawn voice ta thung. A hriat theih chè ché, a aw ka hre leh hrim hrim a, a nuam. Beng bul sêta ngaihthlâk phei chuan a aw chu a sexy ngawih ngawih ka ti, a aw leh thil sawi vàng chuan tui takin ka mu thei dâwn a ni.


Zînga ka harh chuan  message a lo awm vàng tawh, chhiarin ka nui sak. Zîng nuam tak chu a va ni ém! Phûr zetin ka tho nghâl vat, vawk talhnaah chuan țangkai tehchiam dâwn lo mah ila thingpui lumah min duh leh ang, thingpui hâng an lam leh nasa dâwn si a.


Fatu kan tam a, hmeichhia pawh kan indaih viau. Thingpui ka sem kual zak zak reng, thingpui hâng an heh hlawm dàn ém ém hi a mak ka ti! A tui loh tehlul nèn, ka inpeih miah lo.


Chaw eiin kan haw a, inah chuan ka intleuh thuak thuak. Ka haw hman tawh dâwn si lo va, bàl taka awm chu a mawi lo, fatu kan ni bawk si a, ei siamtu nih leh balh a inhmeh lo.


Dâr 3:30 chiahah ruai ei tùr chu kan buatsaih. Chêtpuite an fel a, tih tùr ka hriat phah a, ka vir ve zak zak mai. Kan inpeih meuh chuan dâr 4 a ri ruai tawh a ni mai.


Naupang lamin an rawn dawh sap sap a, puitlingin an rawn dawh chuan chaw pawh a hek ta deuh. Kan chhùm tam hrim hrim a, dam lo leh lo kal thei lo an vâng. Sangkima nu erawh chaw leh sa pêk ngei a ngai ang, hei hi kum tina kan tih dàn țhin a ni. Dam lo, ruai rawn țheh thei lo chu chaw leh sa kan pe țhìn.


Sangkima ka lo thlêk ru viau a; mahse, ka hmu lo. Mama ka hmu a, chaw a rawn dawh lai chuan," Tluang, Țhianpa leh a nu kha an rawn țheh ve dáwn lo a nia," a rawn ti a.


Chu chu fatu leader ka hrilh ta vat a, ani chuan chaw leh sa chu dekchi pahnihah suakin," Tluangpui, nang nulaah han pe ta mai che, i keng thei ang em?" a ti ta hlauh a.


"Thei ang, chherchhuan ila?"


A sa hran tawh lo bawk a, ken a harsa lo ve. Bân thâ erawh a kham duh reuh phian a, vawi hnih ka chàwl.


Sangkima'n kawngka min lo hawn a, min hmuh chuan a mitko a lo sàn ãk a.


"Chaw leh sa ka lo pe dâwn che u a," ka ti sap a.


"I va nula ve!"tiin ka dekchi ken pahnih chu min lâksak ta vat a.


"A ngai lo asin le!" a ti leh a.


"Kum tina kan tih dàn alawm, i nu chu a tho peih nange?" ka ti sar sar a.


"Nichîn khân a rawn tho a, a mu leh ta rih a nih kha. Chhùnah khân i pa a lo lêng deuh reng a."


"A ni maw?"


"Aw, ei tùr a rawn keng bawk a."


Ka pa hi chu, ka chhuang thei ngawt mai. Ka nu erawh chu a zaikhawm tih ka hre chiang a, a kal ve lo chu pawi pawh ka ti hran chuang lo.


Chaw leh sa chu bêl dangah a ruak a, sil a tum chuan," Ka lo sil ang," ka lo ti vat a, ka chhuh ta nghâl bawk a.


"Ka sil thei reng alawm."


"Ni lo ve, lo țhu rawh."


"Ka lo en zâwk ang che."


An tui khawihna bulah chuan a lo ding ve reng a, ka sil lai chuan hnung lam ațangin ka kâwngah min rawn kuah a.


"Ka la sil zo lo a nia," ka ti sap a.


"Hetia kuah che hi ka duh a."


Ka sawisél lo, nuam ka ti ve tho. Ka thil sil erawh ka chhunzawm tho thung.


"Heti hian awm reng theih se!"


"Min ning vat ang."


"Teuh lo mai!"


Ka sil zawh pawh chuan min thlah a tum chuang lo, tunah erawh chuan kan inhma chhawn tawh thung.


"Chaw chu ei la?"


"I awm chuan kuah che ka duh zâwk a."


"Chuti, ka kal tawh ang chu? I ril a țâm tawh viau ang," nui sêih chung hian ka ti sap a.


"I kal ka phal lo alawm."


Kan inen ràn a, kan tih tùr chu ka hria. Ka hnial dâwn lo, ka châk hle zâwk a ni.


"Ka kal tawh tak tak ang?" Ka lu chu a hai chiai maiin ka hria, a zùnah ka uai hneh lutuk a, ka chiang lo riai tawh!


"Aw le, kal la?"


Kan inthlah chuang bawk si lo va, kal chu har tak a ni.


In chung lama thâwm a rawn awm tâkah chuan ka kal a hun tawh tih ka hria, kal 'tak tak' a hun tawh.


Harsa taka a bân chu dah sawnsakin," Ka kal tawh ang, tak takin. An rawn haw țan tawh si," ka ti sap a.


Ani pawh chuan," Phal lo viau mah ila i kal poh a ni ang chu, zaninah lo lêng leh la?" a ti ve sup a.


"Nia, ka lo tum dâwn nia aw."


Kawngka bulah kan ding leh rih a, kan inning lo a ni e.


Kawngka kan hawng chiah a, Sangkima nau chu step-ah a rawn chhuk ve chiah. Tlêm a tlêmah, min rawn phâwk lo chauh!


"Zanin chu aw, ka lo ngaichâng reng ang che aw."


"Aw le; mahse, ka hma thei lo ang. Inbual ka duh dâwn si a."


"I lo kal hrim hrim kha a țha a ni mai."


Biak in bul ka thlen leh meuh chuan chaw an lo ei zo duak tawh, ka tlai chhe chuang lo ve.


Kan haw darh theih chuan dâr 6 a pèl tawh a, inah hmanhmawh zetin ka haw a, tui lum a lo awm vàngin ka inbual sawk sawk.


Ka pa hnênah chuan," Pa, zanin chu Sangkimate inah ka lêng leh dâwn a nia, ka lo haw har lo ang," ka ti a, ka nu chu room lamah a la awm.


"Aw le, țhiante inngaihsak tawn hi a țha alawm."


Ka nu lo chhuah hmain kan in ațang chuan ka chhuak, kalkawngah lip gloss ka inhnawih pah, ka hmanhmawh deuh vàngin ka inhnawih hman lo a ni.





*HMANGAIHNA DIK TAK CHU SUMIN A LEI THEI LO*








Ka han thlen chhoh chuan Mama a lo țhu kur a, Sangkima erawh room-ah a nu nèn an țawng bal bal thung a.


"Eng nge i lo tih dâwn?" tiin min lo nuih țhu a.


"Ka lo lêng ve dâwn."


"I intithû sâwt riau mai!"


"Ngawi mai teh!"


A nui țhû tho. Mi zîngah min fiam lo va, ka lâwm viau. Keimahniho chauhah hi chuan min fiamin chimawm mah se a pawi ka ti hran lo.


Sangkima a rawn chhuak a, ka lo en vat. Min rawn hmuh chuan a nui suk a, Mama pek chuan," Ka awm ve reng hi," a lo ti hmuk a.


"I va fel ve!"


"Ka hmu châk leh tawh che a," Mama en zauh chung chuan ka lo ti sap a.


"Kei pawh ka lo ngai hman tawh che."


"Ka awm ve reng hi, tenawm dùn lutuk mai. In ni țan ve dêk dêk a, min awhthîk in tum nghâl a ni maw? Ngawi tak rawh u, in hre ve khawp ang," Mama chuan a lo ti ngul ngul a.


Nui sâng chung hian," In nu hlui kha, ti leh mai rawh, i la hope viau kha," ka lo ti sap a.


"Ka lâwm e!"


Sangkima chu lo inrawlh vatin," Chawnpui vêng lamah tuai thar deuh a melh țan alawm, kan rîmthlu hrim hrim ang," a lo ti a.


"Wow!! Tleirâwl lam maw? Tleirâwl râl an ti palh ang che tih a va hlauhawm ve!" ka lo ti vat a.


"Nang ang nula senior ka duh tawh teuh lo!"


Kan nui ta vek.


A chhuah dâwnah chuan zàwi deuh sap hian," Bengchheng siam zâwngin inhmangaih lo ula aw, i nu a la men ve tho kha, in lo bengchheng mah mah ang e," a ti sar sar a.


"Kal mai teh!"


"Nangmah vàng chiahin ka țhian ve ber pawh ka kawm theih loh phah hi aw, lâwm hle rawh," a ti leh nang nang a.


"Ka lâwm e."


A chhuah hnuah chuan," Ka tiduhdah i ti em?" tiin ka zâwt a.


"In inhre chiang ka lo ti zâwk. Lènna tùr a nei țha a, ka ngaihtuah lo ve."


"I nu a la meng reng àwm sia, kan thu sawi zawng zawng kha a hriat vek chuan, a zahthlák dâwn e," ka ti sep sep a.


"Kan chanchin ka hrilh tawh a."


"Chuan, min duh lo em?" Ka hre châk lutuk. Kei chu ka nêp sia, ni sa ka tawrh ve hlek pawhin zàn lamah ka dam lo titih mai sia, a fapa bialnu atân hian min duh lo ang tih ka hlau.


"Ka rilru a nat a hlau a."


Ngun zeta enin," Eng vàngin maw?! Kei hian ka tihnat che a hlau maw? Engtin?" ka ti. Ka hre thiam lo.


"Țhu phawt teh ang," tiin long chair-ah chuan insi chêtin kan țhu a, min chhànna ka hre châk tawh.


"Ka duh tak tak loh che a hlau em ni a?"


Min en vang vang a, a bu ta nghat a," Chutiang deuh chu," a ti sup a.


"Aih... ni lo, ka duh tak tak che. Min ringhlel suh aw, zànah pawh nangmah chauh ka ngaihtuah char char zêl che a, mipa dang chu ka ngaihtuah ngai miah lo-"


"Mapui?"


"Min koh dàn te hi ka duh thlâwt. Nangmah ka duh bawk che a, min en dàn te, min biak paha i nui hmel te leh i awm dàn engkim hi ka duh vek. Nang chuan min ringhlel ve lo ang tiraw? Kei pawhin ka ringhlel miah lo che a, ka nih dàn ang ang hian min duh ve-"


Min rawn fawh avàngin ka sawi zawm thei lo, ka țawng tam a ti a ni ang, ka nervous chuan ka țawng țeuh ziah. A nuin a fapa ka duh tak tak lo nia a hriatna hian min ti-nervous tlat a ni.


"Ka ringhlel lo che. Ka nu ngaih dànah chuan nang chu fanu fel, hmel țha leh neinung, duh duh nei thei i ni a-"


"Duh duh ka nei thei miah lo aw, a dik lo," ka lo ti hmanhmawh a.


"Min sawi zawhtîr phawt la?"


Inthiam lo deuh chuan ka hmui ka hup ta vat a. Ani chuan muangchânga ka hmui hupna kut chu la sawnin a hûm vang vang a, chutah, ngun zeta min en lehin," Nu leh pa hlawh nei, kut hnathawh pawh ngai lo leh ti ngai lo i ni a, ka phû lo che tih a sawi a. Ka nu sawi chu a dik vek tih ka hria; mahse, kan retheihna hian ka duhna che hi a hliah khuh thei lo. Ka hliah khuhtîr thei lo, a chhan chu ka duh ém che a ni," a ti dap dap a.


"Kei pawhin ka duh lutuk che; mahse, i nuin min duh lo chu hrehawm-"


"A duh lo che tih ka sawi miah lo. Kan rethei a, in hausa a, kan inkâr hi min ngaihtuahpui a ni zâwk," a ti leh a.


Kan ngawi dùn rih a, ka kut chu a khàl neuh neuh reng a.


"Kei chuan chutiang chu ngaihtuah ka duh lo, ngaihtuah duh ni ila ka duh thu che hi ka hrilh miah lo ang che. Kan hmaa thil lo thleng tùr ka ngaihtuah duh lo, tûn hun zêl chiah hi a pawimawh ber a ni," a ti sap sap a.


"A dik chiah, kan hlim ve țan dâwn chauh a, thil lo thleng thei ngaihtuah mai mai nân hun a uiawm lutuk!"


Kan țawng tawh lo. Ni e, thil lo thleng tùr ngaihtuah nân hun chu ka ui. Eng pawh lo thleng ang hmiang, Sangkima nèn kan nih loh lai pawhin kan hmaah thil hrang hrang chu a rawn thleng reng tho, ngaihtuah loh pawhin a lo thleng tho. Chuvàngin, a lo thleng tùr chu a lo thleng ang a, kan hmachhawn zêl mai ang chu.


Khua a vawt a, a âwm lum thar thar chu ka hnungin ka nghèng chial a. Kan kut a insuih zawm chial bawk, he hun hi hlu ka ti, ka hlim veng veng bawk si.


"Ka duh hmasa zâwk chein ka hria," ka ti sap a.


"Min hriat hmain ka hmu tawh che," a lo ti sup thung. Ka bek chu a rawn thâwk khum lum ham ham a, nuam ka ti, ka maimichhîng vang vang a, feel veng veng ka duh.


"Chutih lai chuan he khawvêlah hian ka awm ve tih pawh i la hre miah lo. Nula chhe lo tak, ka mit la zaktu ka hmuh vawi khatna a ni bawk."


A thil sawi chuan min tihlim, ka nui sak a.


"Chu nula chu ka bialnu a ni ang tih ka ring pha bîk miah lo, mikhual nula emaw ka ti nghe nghe che a."


"I duh phawt chuan i nula duhzâwng tak chu i neih theih zêl ka ring," ka lo ti sap a.


"Eng aiah maw?"


"Hmeichhe duh chi i ni tlat a."


A nui nghawr dat. Ka kut chu la kângin a fâwp zoh a," I duh chi ka ni ve em?" a ti sup a.


"Hmeichhia ka ni ve tho lo em ni?"


"Nang chu angel alawm i nih."


Min fakna avàng chuan a biangah chuan ka fawhsak a," Angel chhe chi ,thlà nei lo, luck lo zet, thiam nei lo bawk," ka lo ti sep a.


"He khawvêla ka duh ber i ni."


Zàwi tê têin kan țawng sep sep a, a chângin kan ngawi leh a, kan induh tawnzia kan lantîr bawk. Tu dang kan ngai lo va, he khawvêlah hian mi dang an awm ve tih pawh kan ngaihtuah hek lo.


Step-ah rawn tlân thla rî a ri thlak thlak a, kan inthlah chiang kher mai. Kawngka rawn inhawngin a nau chu a rawn tlân lût nghâl a, min rawn hmu fuh leh teuh hle mai.


"In bâng tawh em ni, Tea?"


"Aih, ka mut a chhuak tawh a."


"E, i ha nâwt la, insil fai la, mu rawh aw."


Tea bathroom-a a luh hnu chuan mitko sàn ãk hian inthiam lo deuh hian Sangkima chu enin," A tlai tawh a niang?" ka ti a, ani chuan," Tlai lo, thingpui pawh kan la in hlei nem," a lo ti thung a.


"Min phâwk teuh thei si!" ka ti sar sar a.


"Duhawm lutuk!" tiin ka biangah chuan a piai zoh a.


Tea mut hnuah chuan thingpui chu inin Mama chungchâng chu ka zâwt a, min hrilh țha duh miah lo.


"Amah zâwt la?"


"Min hrilh ve mai la?" ka titàu der ta ngât a, a lam pawh ka hawi duh lo.


"I hmel lan dàn kha a sexy tawp a nia!"


"..xy lo, hmuh pawh min hmuh loh kha."


"Lo hawi la?"


"Ka duh lo."


A ngawih deuh vang vang avàng  chuan ka ngaih a țha chiah lo deuh a, ka tihtauhna kha a ho angreng bawk si nèn, min duh lo leh ta thut se, kei hi hrehawm ti zâwk tùr ka ni dâwn asin.


"Laskam, ka lo hawi leh sî," tih pahin muangchângin a lam hawi chuan ka inher ta a.


"I hmel hmu thei lova awm hi thil hrehawm tak a ni tih tûn second tlêm te chhûng khân ka hre chiang hle mai," a lo ti a.


Inthiam lo deuh hian ka melh chho a,"Ka titàu der mai mai a nih kha," ka ti sap a.


"Ka hria alawm."


"I hria maw?!! Chu vàng chu em ni min thlèm loh?"


"Thil ka hriat thar phah zêl a ni. I hmel hmu lova hrehawm tùrzia ka hriat phah a, ka bulah awm reng siin ka lam i lo hawi duh loha a hrehawm tùrzia ka hre chhuak bawk."


A nghâwngah ka kuah chawt a, ka inthiam lo ngawih ngawih. Ka tider tih hre tho mah se ka inthiam lo tho, Mama chuan a duh hunah an chanchin chu min hrilh thei reng tho sia, min hrilh lo pawh ni se ka zâwt thei tho bawk.


"Ka tihpalh."


Min thlah leh thlap, haw tlai loh ka tum ve tehlul nèn, kawng lakah kan teihawi lehpek a! Ka nu a lo la haw lo hlauh, tihzia lutuk.


Zàn dangah erawh kan zaikhâwm ve ta a, mi hmuhah chuan inngaizâwng angin kan awm lo, Mamate nèn kan inkawm tlat avàngin min ringhlel pawhin ka ring hran lo.


A nu pawh a țha chho, zaikhâwmsan theih a nih tawh vàngin a zia tawh ka ti mai. Mi hmuha mawi zawn ve tho a ngaih vàngin an inah ka kal zut hran lo, kan inah lah Mama tel lo chuan a lo kal bîk lo, chu pawh zaikhâwm tùra min rawn sâwm loh leh min thlah haw lam a ni mai.


Dec ni 31 tlai a ni a, zànah țhalaiin intihhlimna hun kan hmang dâwn a, zanlai dâr 12-ah Biak inah kan inkhâwm bawk ang. Ka phûr a, kum dangah kha chuan zanlai inkhâwmah ka tel ngai lo, zanin erawh ka tel ngei ang.


Ka phone a rawn rì a, ka'n en a, Remlala! He pa hi, ka lo hre chang tawh miah lo nia!


"Hi, eng nge ni ta?"


"Ka lo kal, in in awmna ka hre lo a nia," a rawn ti ta mai!


"Khawi lai nge i lo thlen tawh?"


"Chêngpui lama signboard intâr ka rawn thleng chiah, hei in pawh ka rawn hmu țan tawh e," a rawn ti leh a.


"Eng nge i lo tih dâwn?" Awi, ka mâwl lutuk!!! A lo zin ve dâwn tihna, min rawn tlawh ve dâwn tihna. Mâwli leh, mâwl leh lutuk; mahse, ka sawi zo vek tawh.


"Ka lo zin dâwn maw le, ka hman ve hun tak a nia."


Ka thu sawi kha engah mah a ngaih loh hrâm ka beisei. Țawng chhuah  hmaa lo ngaihtuah hmasa tùr ka ni asin le, ka țawng duh leh lutuk hi a pawi a ni. Ka fîmkhur tawh ang.


A lo tlàn dàn tùr chu ka hrilh zêl a, min rawn phone ațanga minute hnih a ral meuh chuan kan kawtah a rawn ding dat tawh.


"E, motor thar i nei leh tawh a ni maw?" A Scorpio dum tle zar mai, thar leh fai zet chu ka en a.


"Aw, ka rawn khalh chhuak ve chhin a. Min hmuhpui hmasa bertu i ni, eng nge ang i tih?" a ti dam thlup a.


"Mawi lutuk!! Chuan ve chhin pawh a châkawm."


"Chuang ila?"


"Aih, ni lo, khawi i bag chu," tiin ka lâksak a, a bânah kaiin," Lo lût phawt rawh," ka ti a, in chhûng ka luh veleh," Pa, hei ka țhianpa, ka school thawhna neitu ni bawk Remlala a nih hi. Remlal, ka pa a nih hi," ka ti nghâl zung zung a.


Mi fel nge nge, ka pa nèn chuan an titi dùn nghâl bawrh bawrh thei. Ka nu pawh room ațangin a rawn chhuak a, an inchibai a, Remlala rawn thleng zet chu kan chhûngkua kan tlèm nèn, kan ri chùl tho.


"Thingpui in rawh aw?"


"Ka lâwm e; mahse, kawngah ka rawn inhnawh puar a, ka la puar lutuk," a lo ti a.


Ka pa chuan," Inbual la, i inbual zawh lamah chaw kan ei dâwn nia," a lo ti a.


"Hei, chaw kan chhum kêp miah lo che a nia aw," fiamthu hian ka ti a.


"Ka ei lo mai ang, a nih loh pawhin tlêm tê chauh ka ei mai ang."


Ka nuih var var a," Chaw chu mi  pahnih khat ei hi kan chhum kêp ziah. I ei țeuh dâwn nia, i inbual phawt dâwn em niang? Tuilum pawh a awm țeuh," ka ti a.


A intleuh zawk a, chumi hnuah chuan chaw ei ka siam ta nghâl a. Inkhâwm zàn a ni bawk sia, ka rilru a tibuai deuh hlek.


Chaw ei lai chuan,"Zaninah inkhâwm ve la?" tiin ka sâwm a.


"A châkawm khawp ang, ka lo inring sa tho bawk a."


"Tak tak?!! I va fel tak!" ka ti hluai phawt a, chutah," Thingtlânga hun kan hman dàn i rawn hre nghâl thei dâwn a, i nihlawh viau a nia," ka ti leh barh barh a.


"Nia, ka hre châk alawm."


A inkhâwm ve duh chu ka lâwm tawp. Zanlai inkhâwmnaah erawh a kal peih ka ring chiah lo, a rawn tlân thui bawk sia, a chàu ang.


Ka room piah chiaha milhual room-ah chuan a thawmhnaw chu ka dahsak a, mutnate chu ka check nghâl a.


Inkhâwm tùr chuan kan insiam a, ka insiam zo ka room ațanga ka chhuah chuan a lo inpeih at tawh.


"I va chhe lo ve! Kan vêng nulaho chu an mit a tla ang tih a hlauhawm  zâwk dâwn a nih hi," nui chung hian ka ti a.


"Nang pawh i chhe lo khawp mai. Angel hawlhthlâk i ni hial lo maw?"


Nui bâwk bâwk chung chuan inkhâwm tùr chuan in chu kan chhuahsan a, ka inkam sâng hran lo va, ka kal chak thei viau e.


"I rawn kal thei hi a mak ka ti e! I chhûngte an dam em? Ka lo zâwt miah lo che a," ka ti leh hnuhnawh a.


"Aw, dam e. An hmu leh châk khawp mai che a, an sawi zing khawp che asin," a lo ti a.


"Kei pawh ka hmu châk, titipui kha an nuam e. Ka lo zin phei thuai ang, bâkah, min puih pawh ka la ngaih dâwn kha," ka ti a.


"I tân te chuan... vàna arsi pawh kan la mai ta lâwng."


Ka nuih hak hak a. Remlala bulah hi chuan rilru a hlim țhìn, mi fel dik tak a ni bawk a, hetiang țhian ka lo tawng hi ka vànnei thlâwt a ni.





*HMANGAIHNA CHUAN ENGKIM A BEISEI A, ENGKIM A RING A, ENGKIM A TUAR CHHUAK ȚHÌN*









Biak in tual kan thlen chuan dâr a ri țan chiah a, kal pawh an lo awm nual tawh. Țhiante nghah pahin mau ațang siam țhutnaah chuan kan țhu rih a, Remlala chu a hawi kual vêl a.


"A nawm hmel reuh hi."


"Hmel reuh lovin a nuam, nuam deuh asin."


Light-in min chhun phâk a, fiah vak lo chuan kan inhmu thei. Min rawn en a, ka nui tih a hmuh chuan a nui ve a.


"I țan ve thei ngawt mai," a ti a.


"A nuam si alawm, nang pawhin i tih ve tho kha," ka lo ti a.


"I awmna a nih vàng chauh pawh a ni maithei asin," a tih chuan rum zeta melhin," I va sual tak! Mikhual chuan nuam an ti ziah, i ti ve hrim hrim ang," ka lo ti tlat thung a.


"I va kal hma ve!"


Mama lam hawi vatin," In lo thleng har thung. Ka lo zawng reng tawh che u asin," tiin Mama hnunga Sangkima ding chu ka en nghâl a. Ka lo hmu miah lo, Remlala nèn kan lo inhnial vàng vek.


"Kan rawn pawh ngam lo che u a."


"Hmmm, va ho tak! E, Mama, Sangkim, hei hi Remlala, ka țhianpa Aizawla mi a nih hi. Nichin tlai khân a lo thleng phei ve chiah a, inchibai r'u," ka ti a, Sangkima chuan ngaih loh lamah a ngaih loh hrâm ka beisei.


An inchibai hnuahchuan kan lût ta thuai. Hmeichhia chu a hma lamah kan țhut țhin avàngin Remlala chu Mamate bula țhu tùrin ka kalsan, nuam lo a ti lo ang chu, mi puitling a ni tawh alawm.


Kan rei lutuk lo ve. Thu sawitu chuan tawi fel takin kum hluia kan thil tih țhin, thil țha lote sima kum tharah chuan kum thar a nihna anga nun thara kan nun a pawimawh thu a sawi a, a țha khawp mai. Kei pawh chuan ka thil tih țhin țha lêm lo chu ka hre chhuak rauh rauh, sim ngei chu ka tih tùr a ni e.


Bànah chuan pâwnah kan țhu khâwm leh rih a, ka veilamah Sangkima țhuin ka dinglamah Remlala a țhu thung a, nulaho chuan ka bula țhu Remlala chu an hmu duh tawp. A khawsazia leh a inchei dàn hrim hrim chu a changkâng a, bâkah, thingtlang mi a ni lo tih a hriat hliah hliah bawk a, a lo hmel chhe lo bawk nèn, en relh relh chu a àwm viau.


Neihi leh a țhiante pawh an bãng chuang lo, eng emaw sawiin an nui leh hak țhìn a, awmze nei fê hian an rawn melh ralh zêl bawk.


Remlala chu," Zanlaiah inkhâwm kan nei dâwn a, i meng ve peih ang tiraw? I peih loh pawhin a haw theih tho a nia," ka ti a.


"Nang i inkhâwm ang tiraw?"


"Aw, vawi khat mah ka la tel lo va, ka châk lutuk ringawt."


"Kan tlaivâr lo ang tiraw?"


"Dâwn nâng, inkhâwm zawha haw a ni mai," ka lo ti leh a.


Mama chuan," Kan inkhâwm vek ang chu, a rei ngai lo a nia," a lo ti ve a. Remlala chuan," A châkawm ve alawm, ka tel vawi khatna tùr ve tho a nia, a chhinchhiah tlâk ngawt ang," a lo ti a.


Sangkima chu enin," I ngawichawi riauin ka hria, țawng ve bawrh bawrh la," ka ti sap a. Ani chuan," In țawng ka lo ngaithla alawm," a lo ti a, mi hmuh loh tùrin ka bân veilam chu phar chhuakin hnung lam ațang chuan a kâwngah ka kuah a, Mama bân ka va tawk fuh lehnghâl a.


Min rawn melh rulh a, ka lo nuih sak thung.


"Zaninah Țhianpa hi a solo dâwn asin."


"A ni maw?!! Awi, nuam leh dâwn mang e, ka lo thidang tawh hrim hrim ang," ka lo ti vat a.


"A che nasa viau ang, ruahțham loh hla a rawn sa dâwn bawk."


Sangkima chuan," Țhianpa hi a lo lãm dâwn thung a," a lo ti ve a.


Hall-ah kan lût khâwm a, duh duhnaa a țhut theih avàngin kan țhian pali chuan kan țhu a, rawn luh belh zêlin Irene-ite țhian dùn chu Sangkima bul țhutna âwlah an rawn țhu that, Mama lo kal sawn lawk vàng vek.


A rawn luh leh chuan a țhutna a ãwl tawh si lo va, kan opposite lamah chuan nula zîngah a țhu kûk mai, ka nuih sûng a.


Kan kim ta viau, Mala hi a awm pek lo nge, a lo tel ve leh peih lo niang, ka hmu miah lo. Kohhran lam a ngaihsak lo lutuk hi chu a zia lo deuh ka ti, kan vêngah a awm leh tawh lo zâwk em ni le?


Solo, group zai, fiamthua action song ti nghawng nghawngte leh recitation phuahchawp hlang hlakte chuan min tinui nasa. Nui nasa viau e ti lo chuan Irene-i ka mitsìr pah reng, Sangkima a rawn bekbàwr leh zauh chu ka hmu thei êm êm lehnghâl.


Sangkima chu a zâi dâwn ta. A inbuatsaih chhûngin hun vawngtu chuan thu tlêm a sawi a, a inpeih ta maw tihah chuan Sangkima chu a ko chhuak ta a.


Ka nui nasa lutuk ringawt. Hmanlai tlangvâl incheiin a inchei a, a chhe zawr hi a ni tawp. Kan au nasa lutuk a, a țawng pawh kan hre thei mang lo.


A zâi ta. Fiamthuin Love song phuahchawp, intuha lo zet zet chu a sak zawm kual a, kut kan bêng hluah hluah. Chutah, Mama a rawn lâm ta bawk, pumna ûrhin ka nui. Tumah a intih-mi tak theih loh, kan ding a, kan lampui suau suau mai. Remlala pawh kut a lo bêng ve nasa.


Phuahchawp group zai hun a ni a, hun vawngtu chuan a duh duh a rawn ko chhuak ta nghauh nghauh mai. Min rawn ko ve ta, stage-a ka va din ve chuan panga lai kan ni tawh.


Irene-i, kei, Nutei, Sâwmi leh Mercy kan ni, keyboard min tumsak tùrin  keyboard tum thiam miah lo Rova a ko chhuak tel bawk a, engtin tak zai ang maw? Kan hla sak tùr lah chu hlabu keu phawk a dinglam châng khat tih deuh tawp a ni!


Ka thiam zâwng a ni hauh lo, mi dang pawh chuan an lo thiam bîk lo; mahse, thiam lo mah ila, sak ngei ngei a ngai, a thlûk phuahchawp mai tùr. Fiamthu a nia, duh duh dànin a sak theih.


Ka fin phakar ka chhuah a, A hla thu hmasa ber 'Lalpa' tih zawh chiahah chuan ka hmui ka hup a, ka kun ta ngâwih mai, ka țûl der ta.


Mi dang pawh chuan ka thil tih chu hre thiamin an rawn ti ve ta deuh vek, Irene-i chauh chu a zai ta ngal ngal a, Rova keyboard tum nèn inmil lo baksak chuan châng khat chu a sa zo ve țhak.


Ka nui nasa lutuk a, ka pum a nâ a, ka chau vek thei. Ka mittui a tla phung mai bawk nèn, taksa lo lum nèn, a hrehawm lutuk.


Țhutnaa ka lêt chuan Remlala chuan," Phakar reuh lutuk!" a lo ti vat a, Sangkima chuan min lo en rengin," I țûl thiam hle mai," a lo ti thung.


Special item an ti thùl, Remlala pawh a bâng thei bîk lo, ârpa khuan dàna a'n khuan ve tâk kha. Lehkha thiam a ni a, ka ngaihtuah lo. Zakzum tak a ni lo va, a thil tih apiangah a inring tâwk bawk a, a ngaihtuahawm thlâwt loh.


Nuam kan ti tlâng hlawm a niang, mut chhuak hmel pu pawh ka hmu lo. Kan harh kar hlawmin ka hria, phone camera chu kan lek chhuak ve nasa, nakina en lêt leh atân kan duh hlawm a ni ang e.


Zanlai inkhâwm hmain kan bâng a, pâwn boruak chu a lo vawt var mai. Ei tùr buatsaihtute chuan ei tùr chu min lo sem dan dan a, ka ril pawh a țâm lo, ka chàu nghulh mai.


"I mut a chhuak em?" tiin Remlala chu ka zâwt a, ani chuan," Chhuak lo, nghate rèp ang kar ka la ni," a lo ti a.



Ka tui a hâl avàng chuan Sangkima chuan min kalpui a, cooler bul kan thlen dâwn chuan," Zanin i zai kha, ka lo țang nasa lutuk a, i zai thiam khawp mai," ka ti sap a.


"I țül zei ka ti zâwk."


Mi dang an lo awm ve avàng chuan kan inbe ta rih lo, tui chu min dawhsak a, làwmthu sawi sapin ka in ta khawlh khawlh a.


"Tui hâlin i lo chalchâng lo chauh a nih kha."


"Hmmmm, sual lo mai teh."


Tui chu ka dawhsak a, ka pe ve a. A in lai chuan remchângah lain," Ih, Irene-i khân a rawn bekbàwr zing mah mah chein ka hria, hmuh nuam ka ti miah lo," ka ti sap a.


"I thîk elo?"


"Thîk loh theih pawh a ni hlei nem. Hmuh loh der ka tum ve ngar ngar a, ka hmu zêl bawk sia."


"I va duhawm reuh tak!"


"Ka thîk tùrin a rawn ti lui ve hrim hrimin ka hria, ka nam sawn sawk châk a nia," ka ti leh a.


"Heyyy, i inhmeh lo a nia. Bâkah, ka duh chu i hriat tawh kha. I tân chauh ka awm alawm," a ti sup a.


"Ka hre tho a; mahse, ka thîk tho. I bul chêtah, i taksa si kherin a rawn țhu a, ka duh lo alawm," ka ti leh nang nang a.


"A rawn țhu tawh miah lo ang."


"Tak tak?"


"Tak tak."


Kan lêt leh hnu rei vak loah chuan Biak inah lût lehin kan inkhâwm a, țawngtaihona neiin kan zâi bawk a, thuchah țha tak kan ngaithla bawk.


Mamate chuan min thlah haw ta lo. Remlala ka kalpui tho a, thlah min tum nain ka lo hnial tlat a, bâkah, zàn a rei tawh si a, a vâwt bawk nèn, mu lum thuai se ka duh a ni.


Remlala chuan," A nuam reuh khawp mai, ka tlângnêl nghâl sárh lehnghãl a," a ti a.


"I khuang mawi khawp mai," ka lo ti a, ka nui hak hak a.


"Bâwng leh kèl kha ka pawt fuh ang tih ka hlau zâwk, ka thiam lo dâwn si a," a lo ti thung a.


In kan thlen hnuah chuan rei pawh kan inkàwm lo, room kan pan nghâl ve ve, a tlai tawh si a.


Sangkima erawh ka va text leh hrâm, a lungawi lo ang tih ka hlau ém asin. Bâkah, min rawn text loh chuan ka mut a tui lo palh ang.


*Muhìl rawh le, a tlãi tawh si* a rawn ti a.


*I text hmu lova muthilh ka duh lo alawm* tiin ka reply ve thung a.


*Ka hmangaih che, Lalremtluang*


Ka thin a phu nghâl zawt zawtin ka hria! Ka mit chu ka nuai a, ka insik vak bawk; mahse, ka phone-a thu inziak ka hmuh chu a ngai reng! Ka âwih thei lo hial a ni! Ka ngaihtuahna a nih ka ring deuh hial a, Sangkima ka duh lutuk vàng hian ka suangtiahna mitthlain ka duhthusàm chu ka hmu mai mai a niang ka ti a; mahse, a tak ngei a ni si.


Ka hlim lutuk avàng chuan ka thinphu chu a su dulh dulh maiin ka hria, min tiphâwklêk zo vek a, mut pawh ka muhìl thei lo. Ka hlim bawk si, min tizauthau vek. Au vak mai ka duh hial, làm zawr zawr pawh ka châk.


Dârkâr hnih vêl chiah chiah ka muhìlin ka hria,  ka harh veleh ka tho nghâl a. Ni a lo chhuak uarh tawh niin, Remlala chu a lo tho daih tawh. Ka pa nèn common room-ah an lo titi a, ka nu pawh eirawng bâwl pah chuan a lo țawng ve zauh zauh.


"I lo tho thei maw?" tiin tui lum min lo thlitsak nghâl a.


"Aw, ka muhìl thei lawk lo va. Nu, kum thar chibai le."


Chutiang chiah chuan ka pa leh Remlala chu ka va chibai bawk a, ka pa chuan," I tho thei dâwn tawh lo emaw ka ti mai asin, vawiin nilêngin mut i tum dâwn ta a nih hi ka lo ti a," nui chung hian a lo ti a.


"Teuh lo, nizànah ka muthilh theih lawk loh vàng alawm."


Kum thar nî a ni bawk a, thil thar vekin ka inthuam. Rilru a hlim bawk a, ka khi sâng reng mai.


Nizàn khân Sangkima kha ka reply miah lo va, vawiinah hun remchâng kan neih chuan a țawngka ngei hriat ka duh. A text khân min tihlim lutuk a, a takah phei chuan engtin tak hlim ang i maw?


Ka inchei uluk viau. Sangkima hian a lang lamah pawh min duh se, chhûngril lamah pawh min duh se tih ka duh. Hmeichhe dang a melh loh nân a mit la taka inchei ka duh a ni ve mai. Mahni hma ka sial viau tih chu ka hria; mahse, a pawina ka hre lo.


"Hawh, thla la ang, ka nute thawn ka duh."


Kan han click a, duhthu a sâm mawh kher mai. Sangkima nèn selfie mawlh ka rilruah a awm a, ani nèna selfie hmasak ber ka duh asin le.


Biak in kawtah kan inhmu țhâm țhâm hlawm a, kan inchibai lâwp lâwp. Sangkima nèn phei chuan kan kut chu kan inthlah hlei thei lo, kan mit ni se a in-lock tlat emaw tih tùr a ni, Mama'n min rawn nghawk deuh lo phei se chuan kan mualpho dèr maithei a ni. Ni dang zawng aiin ka hmu țhain ka duh zual, min hmangaih thu a sawi vàng kha a ni ngei ang.


Hmun danga lehkha zir leh hna thawk pawh kan haw kim viau, inbe kim vek lo mah ila kan innuih var var hlawm. Phone kan hmang țangkai hlawm khawp mai, thla kan la chuai chuai hlawm mai, Sangkima nèn pawh kan selfie ngei kha. Duhthu sâm lo hle mah se, a țha reng tho mai. Hun thâwl neih dun ka châk, mitmei vèn ngaih lohna hmunah ngei mai.


Inkhâwm zawhah inah hawin kan inthlâk a, zâikhâwm tùrin kan chhuak lehnghâl. Kum thar nî a ni bawk a, țha takin hmang phawt teh ang.


Ruai kan țheh, chaw kan dawh lai chuan Remlala chuan video-in a lo capture char char a, ka hnung lawkah a ding bawk sia, ka lang chiang teh ang chu.


Chaw kan ei zo chu kan pahnihin hun thâwl kan nei ta chiah e. Sangkima nèn chuan an inah kan chho zawk a, a nu ei tùr kan dah pah a. Ani pawh a lo zia tawh khawp mai,  a lo țhu chhuak ve niin. Kan inbe  luam a; mahse, rei lo tê chauh a ni, room lamah a lût leh ta daih.


"Vawiin nilêngin hun fâl ka melh."


"Ve tho maw?" a lo ti a.


"Niang chu."


"Kum thar chibai 'cial' deuh taka bûk che pawh ka duh nèn, hun kan nei ngang si lo va."


"Tunah pawh a la tlai chuang hlei nem, Kum thar zàn a la ni tho a," ka lo ti a.


"A nih," tiin min rawn hnaih ta sawt a, a nuin  kan țawng chu a hriat ka hlauh avàng chuan kei chu ka phun sep sep ringawt. Kan induh tih hre tawh mah se, nuam ka ti lo. Kan țawng zawng zawng a lo hriat te chuan, a tihchi loh tawp ang. Chuvàng chuan ka phun sep sep a, ka tih dàn chu ani pawhin a hre thiam ve mai.


"Ka hmangaih che."


"Sawi nawn leh teh, nilêngin kha thu i sawi hun kha ka nghâk a nia, i sawi lai aw ka hre châk a," ka ti a.


"Ka hrilh nawn fo ang che, a chhan chu ka hmangaih si che a."


"Kei pawhin ka hmangaih che."


Kan inkuah a, kan nui a, kan inhmangaihna chu cheziain kan lantîr bawk a, thil pawi erawh kan ti miah lo!




*HMANGAIHNA HIAN AMAH NGAWT CHUAN AWMZIA A NEI LO, MI PAHNIH INKÂRAH A AWM A NIH LOH CHUAN RILRU NATNA MAI A NI*