☆RUATSANGA - IV By Dingdi Pachuau

RUATSANGA - 30  By Dingdi Pachuau

(In chhiar thei lo țhin tih ka hriat hian hrehawm ka ti, țanpui ngaohna che u ka hre si lo. Uc, opera leh chrome atangin try try ru aw, chuan link 2 ka dah tawh ang, in chhiar theih ka duh si a...ka tlai leh viau, min hrethiam teh u)

"I hre duh tak tak maw?"

"Aw"  ka ti tak nain ka hlâuthawng ru tho.

Khum atanga chhukin, a briefcase ațangin  envelope lianpui a rawn la chhuak a, min pe nghal a.

A ngaihna hre lo zet hian ka en reng a, ani chuan,"Hawng la" a ti boh a.

Muangchângin ka hawng a, a chhungah chuan thlalák lian deuh a lo awm a, ka hmu chiah chu ka phu nasa khawp mai.

Ka nu thlalak a lo ni!!!!

"Engtin nge i neih theih? In inhmu em ni? Nge thla i laksak zawk? In inhmu tiraw?"

Zawhna hlìr mai ka rilruah a khat țùn.

"Aw, ka zawng chhuak a"

Mak ka ti, engtin nge a lo zawn chhuah le? A hmel a hmu țhinin a hre țhin pawh a ni âwm si lova, a mak ka ti lutuk.

"Engtin?"

"Kei chuan zawngchhuak lo ve, mi ka zawntìr a"

Ka lâwm nge láwm lo pawh ka hre lo, min chhuahsantu kha a ni ngei mai a, mahse nu pakhat bâk ka nei lo. Min chhuahsan lai khan ka la naupang ve viau nain a hmél theihnghilh tur em chuan ka naupang chhe tawh lo.

"A mak e!"

"Pasal a nei lova, bazarah chawhmeh a zuar țhin a"

Ka nu chu ka khawngaih reuh e a, min chhuahsan lai khan a la upa lutuk bìk lova, pasal hmu zo lo tur em chuan a hmelchhe lo bawk.

"A nih tak chu, ka hmuh lohna a rei tawh em a, mak ka ti a ni"

"I nu chanchin i hre thut hi i lawm em?"

"Ka hre lo"  Thudik tak a ni. Ka lâwm chiah em ka hre lo va, ka láwm loh pawh ka hre chuang lo.

"Hmuh i duh em?"

"Hmuh chu ka châk, min chhuahsan hnua a chanchin zawng zawng kha ka hre châk a"

"Zin turin chah ila?"

"A hma mah mah lo maw?"

"I duh hun hunah a ni mai"

Ka nu thlalak chu ka en leh vang vang a, a hmel chu a chhe lo alawm, pasal a nei lo chu mak ka ti, hrehawm deuhin a awm ang em le? Kan hmél a inang viau ka ti a, hmaichhan ngeia  hmuh leh  pawh chu a châkawm dawn dawn alawm.

"A dam țha ang tiraw?"

"Aw, a dam țha e. I chanchin min zâwt asin"

"Min la hria ang em le?"

"I thlalak ka hmuh a"

"Ka hmel a hmuh chuan engtin nge a awm?"

"A mittui a tla a, ka hmuh erawh a hlau viau"

A ni maw?!! Ka thlalâk a hmuh thut chuan a barakhaih ve ngawt ang chu. A rei ve tawh si a, ka țhang dang ve tawh bawk si a, mak min ti ngawt ang chu.

"Min hua em?"

"Ngatinge ka huat ngawt ang che le? Ka nu i zawnchhuah vangin maw?!!"

"Aw"

"Ka awih thei lo lek lek zawk"

"Eng chu...?"

"Ka nu i zawngchhuak tih hi mawle, a rei tawh em a"

"Nangmah a huat vâng che leh a nin vang che a ni lova, i pa awmdan a tuar peih tawh loh vang a nih thute  a sawi a"

"A dik alawm"

"Nih leh, i pa chuan kut a thlâk ve țhin che em?"

Rsa chu ka en zawk a, hmun dang ka en leh nghal daih.

"A, a châng chuan...a thu ka zâwm lo ve țhin bawk a, chuvang alawm"

Min rawn kuah a, ka hnungah a chùl hauh hauh bawk a.

"I hlâu âwm țhin mang e"

"Aw, hlâu țhin, zu a in nasa a, lungawilohna a neih apiangin ka chungah a țuan țhin a"

Titi zelin ka mutpui ta daih a, a men rei lutuk chuan a taksa a la chak viau si lova, a damloh phah palh ang, dam thuaia chak thuai turin ka duh si a.

Zìngah pawh ka kâitho duh lo, a theih chen chen mu rawh se,a taksain a țhat chak phah deuh mahna.

Bai ka siam a, ka uluk khawp mai. Rsa leh ka puin tui an ti țhin a, chaw an ei tam phah țhin, ei țeuh țeuh turin ka duh si a, tui taka ka siam chuan chaw pawh an ei tam phah ang chu.

Chhùn lamah chuan Ãmpuii leh Faktei'n ka pu an awmpui theih tho avangin keiin Rsa ka buaipui a, fâi taka inbual a duh a, keiman ka bual dawn a ni.

Nimin khan a hman tur shampoo thar leh shower gel ka dah thar a, a rim pawh a tui. Damdawi inah duh ang taka fâiin a inbual thei si lova, inbualfâi  ser sawr a thlahlel hle tawh a ni.

A sama shampoo ka hnawih phawn lai chuan," A va rimtui ve! A thar a ni maw?"a ti sup a.

"Aw, thlâk zauh zauh hi a țha ve a"

"A rimtui ka ti hle mai"

"A țhat chu" Ka nui sak a, a duh ka ring reng a ni.

Ka bualfai zawh chuan a thawmhnaw hâk tur ka dah chu ka hâktìr a, ka hâktìr lai chuan ," I intleuh ve dawn em?"a ti a.

"A la hma em mai"

"I huh nual tawh tho kha, ti ve nghal mai rawh"

"Nih leh, ka'n ti mai ang e, bâl min ti a nih kha"

"Ti lo, a remchâng em a"

Ka intleuh ve zawk, ka bâl lém lo bawk a, ka rei lo khawp mai.

"I va rei lo ve, i fái meuh ang maw?"

Min fiamna chu ka haider hmiah.

"Ka fâi sa a, ka intleuh mai mai alawm"

"Hawh, lo mu ve rawh"

"Lunch ei phawt ila?"

"Ka chhuk peih lo e"

"Ka rawn kenchhoh ang che aw"

"Nula an awm reng kha, rawn kengchho tur chu"

"Laksak che ka duh alawm"

"Kei chuan ka bula awm turin ka duh thung che a"

"Ka rei miah lovang, midang lâktir lova lâksak che ka duh sia, lo nghâk hram hram rawh aw" ka nuihtlawn ringawt, a naupang chhia leh tlat.

"Minit khat chiah hmang ang che"

Ka nui hak hak a, mahse a thu awihin hmanhmawh takin ka che tho,kei pawhin a bula awm chu ka duh ve tho alawm le.

Tray-in eitur ka châwi chho a, apple nen. Apple hi a ngaina em a, engtiklai pawhin fridge-ah hian a awm reng a ni.

Kawngkaah a lo ding a, tray chu min lo laksak a tum nain ka phal lova, dawhkanah chuan ka hùng nghal daih a.

"Kan room-ah mini fridge hùn tur lei a ngai a ni,thei ei tur duh pawhin in hnuaia chhuk thlak a ngai tawh lo ang a"

"Țha viau ang chu"

Dawhkan chu châwiin khum bulah chuan ka hùng a, ani pawh khumah chuan a rawn țhu nghal a.

Ka rin aiin a ei tam daih, hetiang a nih chuan a chak thuaiin ka ring. Apple chu ka zaisak nual bawk, a duh si a, ei țeuh mahse pawi ka ti lo.

Kan ei zawh hnu chuan khumah chuan kan țhu dar dar a, min kuah chial a, min ngâi tih ka hriat hian ka lawm a, kei pawhin ka thlahlel em em a ni.

"Ka bula i awm reng chung pawh hian ka ngai tho chein ka hria"

"Over lo la"

"Ka ti tak tak"

"Nih leh, Aizawl i pheia i thlen hnu velahte khan min rawn phone miah loh kha" ka zawt ve reng reng châk .

"Ka buai em a ni"

"Nia tiraw?"

"Chuan, ka thin a rim ve deuh bawk a"

"Ka chungah maw?!!!"

"Ni deuh tho, keima chungah pawh"

"A chhan min hrilh la"

Zawimuanga rawn thovin khumah chuan min hmachhawn zawngin a rawn țhu a, chiang zetin min en bawk a.

"Eng nge ni ta?"

"Thil ka zawt ang che a, thudik takin min chhang rawh aw"

"Aw le"

"Ka ring che ania"

"Kei pawhin le"

A ngawi leh vang vang phawt a,eng tak ni ang maw? Min tihlauthawng, phawklék lek lek mai.

"D, kan fanu... kan fa kha a thi tak tak em?"

Makti deuhin ka en reng ringawt, a accident-na khan amahah nghawng țha lo a neih loh ka ring asin, mahse eng nge min zawhna hi ni ta? Min ringhlel tihna em ni? Nge a rilru hi a chiang chiah lo? Fa a duhna lutukah hian kan fa kha a thih a ring lo tihna em ni?

A mit taka en lét kar pahin," Aw, hrehawm ka ti lutuk" ka ti sap a.

A ngawih reng avang chuan sawi zawm lehin,"Ka hring chhuak tur kha ka har  ve em a, ka taksa a lo chak lo nen, nikhaw hre lovin ka awm zui ta daih bawk sia, ka harh chhuak har nen, ka țap hial asin" ka ti leh a.

"Chu chu thudik tak a ni em?"

"Aw, thudik tak a ni, dâwt a tel miah lo"

"Kan naute chu i hmu miah lo maw?"

"Aw, ka harhchhuah meuh chuan an lo phùm daih tawh a"

"Ka ring che"

Tunah pawh hian ka ngaihtuah chhuah châng chuan hrehawm ka la ti, naute ka dam zo lova, nu nih tling lovah ka inngai, keima thiam loh liau liau a ni.

"Ka thiam loh liau liau a ni"

Duat takin min rawn kuah ta a, tuna min kuah ang hian naute ka chãn tih ka hriat hlim khan min kuah ta se, ka rilru hrehawmna leh mahni ka inthiamlohnate kha a zia deuh tur.

"I thiam loh a awm lo, ka thiam loh a ni daih zawk"

Kan inkuah vang vang a, ka rilruah ka hun hman dan zawng zawng kha a rawn thar leh uar uar a, ka thaw hawk hawk a.

"Nih leh, kan naute kha a la dam ti ta ila?"

"Ni lo, a dam tawh lo, min hrilh chiang hle alawm, fa i duh tih ka hria e, mahse fa kan duhna avangin kan ko lét thei tawh chuang lo"

"Ka fanu thlalak i en duh em?"

Ka thin a rawn phu nghal dup dup mai, a fanu, midang nena an fa, ka fa ni tel ve lo chu.

A phone rawn lek kângin hmeichhe naupang kum 5 mi vel awm, a hmaa ka hmuh zawk tawh lha a rawn tilang ta. Nuam ka ti miah lo, amah nena kan fanu chu ni se chuan...

"Min chhùn i ti em?"

A hmeltha takzet. Rsa nen chuan an inang lutuk ringawt, a sam leh a hnâr, a mitmeng zawng zawngte chu. A pa siar ,a pa siar a ni mai, a duhawm thlãwt.

"A va duhawm tehlul em!!"

Phone chu a la sawn ta daih, en reng ka châk asin le, kan naute kha thi lo se, an inrual hmel si a, a hmelțha ve ngawt ang.

"A la dam asin"

"Tu chu?"

"Kan pahniha kan fa kha"

Tunah chuan a chiang ta. Doctor khan a accident khan a lu lamah pawi engmah a khawih lo ni khan a sawi si a, a tidik lo tawp. Ka biak vat a ngai a ni.

"Muhìl daih rawh aw, i châu ang, mut tam i mamawh"

"Ni lo, thudik tak sawichhuah a hun"

"Nakinah kan la sawi zawk dawn nia"

"Tunah le, D. Ka thluak lam a buaiah ngai suh, ka țha vek. Kan pahniha kan fa kha a la dam a, tuna ka phone-a i en zawh chiah kha amah chu a ni"

Mak ka tih lutuk avangin engmah ka sawi thei lo, Rsa chu ka en reng ringawt a, a thusawi ka awihna lam aiin ka awihlohna a bùk a la rit deuh zawk.

"Eng nge a awmzia?"

"Min hrilhtu chuan 'i pawisa mamawh vangin i hralh' niin a sawi"

Râpthlãk ka tih lutuk avangin ka hmui ka hup ringawt, chutiang thil chu tu tehlulin nge ti thei ang? Mahni rila rah ngei pawisa mamawh avanga hralh chu...ni lo, thil ni thei a ni lo.

"Thil theih a ni lo"

"D, engmah kei pawhin a awmzia ka hre lo, chu chu ka hriatdan chu a ni mai"

"Ka hralh ang maw? Ka fa ka hralh ang maw??Ni lul love, a theih loh, a theih loh hulhual"

Min kuah hle hle a, kei ve thung erawh chu ka rilru a buai nuai nuai a, Rsa thilsawi chuan min shock takzet a ni.

"Engtin nge ka hralh theih ang? Ka fa chu dam se ka duh, duat taka enkawl ka duh asin,mi nunrawng ber pawhin an ti duh dawn em ni?"

Keimahin ka inbia a ni mai. Rsa chu a ngawi reng a, min kuahin ka hnung chu a chùl hliau hliau reng a, ka rilru buai nuai nuai pawh tlém tlêmin a zia hret hretin ka hria.

"Kan fanu chu ka hmu duh"

"Kei pawh"

"Khawiah nge a awm?"

"Aizawlah"

"Hmu turin kal ang"

"Tunah maw?"

"Aw"

"Thil ti vut vut lo la"

"Mahse, hmuh ka chãk asin, mawh, ka fanu chu ka hmu duh a ni"

"Inngaihtuah fím phawt la"

Engmah dang ka ngaihtuah thei lo. Engtin nge a lo la dam theih? Thi ang khan min hrilh si a, min bum tihna a lo ni reng si.

"A thi ni khan an sawi si a"

"Min bum tihna a ni maw?"

"Engtin nge an theih zawk le?"

Ka phun sap sap reng a, Rsa chuan min hrethiam a ni ang, min kuah nghet sauh sauh a.

"Ka fanu chu ka hmu châk takzet"

"Ka hria asin, kei pawhin ka hmu châk"

"I hriatna a rei tawh tiraw?"

"Rei lutuk bìk nang, ka țhianpa CJay min hrilh ania"

"A hriatchhuah dan chu?"

"Nakinah aw, muangchangin le"

"Engtikah nge hmu turin kan kal ang?"

"Hma thei ang berin"

Ka chunga hetiang ti duhtu tur,dawtsawitute kha an hmél ka han mitthla lét a,ka mitthla thiam vak  tawh lo, ka taksa chak loh lai a lo ni bawk nen, khatiang kha a thleng ang tihngaihna ka hre bawk lova, a awm ve tho mai.

"Kan fanu chuan min ngei ang em le?"

"Min duh lovang tih ka hlau" ka ngaihtuahna chu ka sawichhuak nghal zung zung mai. A taka hmuh ka châk em a ni, Rsa nena kan fa ngei mai, thi anga  min hrilh tawh, ka hralh anga an sawi chu ka hmu châk a ni.

"Ka hralh niin i ring em?"

"Ka ring che ka tih kha"

"Mahse tlém té chuan min ringhlelon ka ring"

"Ka hriat tirh chuan ka haw lek lek che, mahse i tih theih ka ring lo, tunah phei chuan a chiang lehzual"


RUATSANGA - 31 By Dingdi Pachuau

(Sat leh Sun zanah khan ka dah tlái hle tih ka hria. Mitthi ina ka kal vang ania, haw hnuah ka type char char a, ka sawi tawh anga rawn update hram ka duh vangin. Tunlai té hian signal lah chu duhthusámin a chhe lehnghal a, ka buai khawp mai. In chhiar theih ngei tawh ka beisei. Nimin zan atang khan ka online thei miah lo,in comment pawh ka la chhiar lo, signal awmna ka'n zawng ang e, haha)

A mak ka ti lo thei lo. Ka fa kha a la dam a, miin an enkawl a, ka hralh ni angin an sawi. A rapthlâk ka ti, nu nunrawng leh hmangaihna nei miah lo niin min chhuah.

"Tunge ka hralh anga sawi reng reng le?"

"Ka hre lo le, tuna Aizawl ka phei khan hman deuh ila chuan ka tlawh ang ka tia, mahse an zin thut a,ka hmu ta lova, i nu kha tlawh ka duh bawk si a"

"Thlalak kha ka lo en leh teh ang"

Kan pahnih chuan kan en dun a. Dik tak chuan kei chu min chhùn lo ka ti, Rsa hlìr a ni a chhun ni. Ka hmangaih hle dawn tih ka hria, ka hmu chák takzet.

"A chhùn takzet che a ni"

"Nia, a taka hmuh ka châk"

"Engtikah nge hmu turin kan kal theih ang? I damțha lo sia, kan hmu har ãwm"

"Fela hruaiin kan kal thei tho a"

"Mahse i damțhat phawt loh chuan"

"Ka țha viau tawh asin"

Kan fanu chanchin lo chu sawi tur ka hre lo. Ka duhdan chuan  tuna kal nghal rum rum hi ka duh, mahse Rsa hi ka ngaihtuah a ngai bawk si, ka pu ngaihtuah a ngai bawk a. Mahse ani chu enkawltu an lo awm thei mai a, Rsa ber hi, zin tura a taksa a fit țhat a ngai hmasa ber.

"Ka pute'n an hriat hunah mak an ti âwm e"

"Nia, zaninah hrilh ila ka tia, mahse hrilh dan erawh thiam a ngai viau chuan ka ring"

"A enkawltute chuan an duat viau ang chu maw?"

"Duat ang, pa erawh a nei lo. A enkawltunu nen chauh an ni"

"A mak ka ti tawp thei lo, ka hrinchhuah lai kha chu ka hre ve ngei mai a, nikhaw hre lova ka awm, ka harh leh khan fa ka hrin chhuah chu a thi tih min hrilh a, a hmel min hmuhtir miah lo pawh kha mak ka ti ta love"

"Chutianga titute chu an hmel i la hre thei ang em?"

"Hre thei tawh kher lovang, a chhan chu khatih lai khan ka châuin ka chiang lo riai reng mai a, chìk nacháng ka lo hre mang bawk si lo nen"

"A bul ber chu keimah vâng vek a ni tiraw?"

"Ni lo, keimah vang a ni. Thil hriatchian ka tum lova, ka rilrua ka ngaihtuah ang ang kha ka kalpui tawp mai a,thil awmdan ka hriatchian loh vang a ni"

"Kan hmuh hunah ngaihdam dil mawlh mawlh tur kan ni"

"Nia"

Thil awmdan dik tak hriatchhuah hi kan tihtur hmasa ber a ni bawk.

"Thil awmdan hriatchhuah hmasak hi a țha lo ang maw?"

"Ka chhuitìr mék"

"A ni maw?!!! Ka hriat loh hian thil hi i lo ti zung zung a, kei lah hi engahmah ka lâktlâk der bawk si lova"

"Ka bula i awm hian engkimah min pui a ni, thil dang chu ka kutah dah vek rawh"

Ka kuah vang vang a, min ring tih ka hriat hian ka láwm a ni.  Nupa inkára inrintawnna a awm loh chuan nupa nun hi a buai țhin a, eng emaw hlekah buaina a lo chhuak mai țhin, pakhat tlâwm zawka a țan loh phei chuan ințhenna hial a thleng thei fo.

"Ngawi teh, thil ka ngaihtuah chhuak phut mai"

Ani lah chuan min en kar pahin," Eng nge ni ta?"a lo ti vat a.

"Mak tih deuh ka nei a. Damdawi ina ka awm khan ka awm rei hle a, mahse ka bill kha ka pek a ni miah lo. Midangin min lo peksak a, a petu ka zawh lahin 'i nutei' an ti tlat lehnghal a, nutei ka nei si lo nen, tu emaw min khawngaihtu a nih ka ring ta ringawt a"

"A va mak tak ve!"

"Chu hmeichhia chuan thil eng emaw tak chu a ti a ni ngei ang, ka naute ka chân a, damdawi in bill erawh péksak ka ni thung a, khatih lai khan engmah rinhlelhna tur leh rinhlelh nachâng ka lo hre miah lo kha a mak hle a ni"

"Mahse, khatiang kha an ti ang tih rin ngaihna pawh i hre tawp nâng"

"Nia, a dik chiah. A mak e"

"Ngawi tak rawh, thil tisualtu chu an man chhuak khawp ang"

Zanriah ei turin Lily ka phone a,ani hi chu ever-ready a ni tawp mai. 'Thu mak, lâwmawm si' ka pu hrilh a nih laiin lo hre ve se ka duh vang a ni.

Zan riah kan ei khawm chu kan ri nak nak a, Ãmpuii  pawh a țawng leh barh barh mai. A u hi a ngaina a, a ngaisang viau bawk, zanriah kìlnaah pawh a u bula țhut a chuh that mai a, ka pu leh Rsa chuan an laitat a, ka rilru a hlim viau  tawh a, mahse 'kim lo' a lo awm ta tlat a, chu 'kim lo' tlat chu a kim hun ka nghakhlel ta hle a ni.

Zanriah eikhamah chuan sitting room lamah kan țhu khâwm leh dial a, midang an awm lém lo bawk a, Rsa chuan thil awmzia chu a dam thei ang berin leh thinţhâwng lo thei ang berin a sawichhuak ta a.

Lily leh ka pu chuan makti deuhin, ngawi rengin  an lo ngaithla doh doh a, Ãmpuii thung chu a khék rai rai a, a hmel atang chuan a hlim hle tih a hriat mai a.

"Ka u, engtikah nge lam tura in kal dawn? A, ka hmu châk tawh lutuk, a hmél țha dawn si"a lo ti vat vat a.

Ka pu a ngawih reng avang chuan ka lo hláutháwng hman țhelh a, mahse a hnuk a ulh deuh lo niin.
"Ka tunu chu a rang thei ang bera hmuh ka duh a ni" ban deuh taka a tih chuan ka lo thaw huai a.

"Chuti, naktukah kan kal mai dawn em ni ang?"

"Aw, Fela inhruaitir mai ula, muangchangin in tlân ang a, i châu lo deuh ang, nge helicopter-in in phei mai ang? Ka tunu, mi kuta a awm reng chu ka ngaihtuah a ni. E, taka, a thlalak chu min han hmuhtir teh u"

Rsa phone ami chu an inenchhâwk dan dan a.

"Aaaa, ka u nen an inang lutuk. A hmelțha si, cute bawk si, ka duat dawn lutuk"

"Dìtei a an ve tho hi, a vun rawng lamah leh a hmuiah"

"A ang kawp ve ve zawk a nih hi. E, hei, a hnârah chuan keimah min chhùn daih a nih hi"ka puin a tih chuan kan nui dar dar a.

Thu chiang deuh zâwkin kei pawhin ka sawi leh a, ka sawi chhùng zawng chuan Rsa chuan ka kutah min lo vuan char char a,ka sawi zawh chuan ka kut chu a chùl hliau hliau a.

"Eng pawh ni se, ka tunu lâklèt chu kan tihtur hmasa ber a ni, thil dang chu nakin lamah pawh a tih theih tho " ka pu chuan a ti charh charh a.

"Rsa hi dam țha deuh tawh se chuan..." ka la sawi lai mekin  Rsa chuan," Honey, ka țha tawh asin, ka zin thei tawh em em ang" a lo ti vat a.

"Tur hmanhmawh che u chu ka duh miah lo nain thil awmdan dik tak hriat tawh chuan hmanhmawh hi a țha"

"A enkawltu pawh hian a tlânbopui mai lovang tih a hriat miah loh ania"

Chu chu ka hlauh ber a ni. A nu leh pa dik takte hian kan hrechhuak tawh tih lo hre ta se, a nih loh leh la hre lo pawh ni se, kan lak phal lo ta se, engtin nge ni ang?

Mahse, lák chu a phal lo thei lo tawp ang. Ka thiltih dik lo a awm miah lo,min bum a, kei lah che theiin ka awm bawk si lo nen, a buai kual nuai a ni ber.

Lily chuan,"Kal thuai chu thil ţha ber a ni ka ti. Ka hmu châk tawh, in rualin ka kal ve duh ania" a lo ti ve a.

Ãmpuii pawh chuan,"Ka kal ve châk tho a, mahse ka pu ka lo enkawl ang, in lo haw hunah ka pawm hmasa ber thung ang" a lo ti ve a,naupang chhia viau țhin mahse a thilsawi chuan min tiláwm hle mai.

Kal ran kan duh chuan helicopter chuan kan kal thei lo chiang, naktukah U Felate nen phei ila, muangchangin. Chu chu kan hmuh hmasak ber theih dan tur chu a ni.

Lily pawh a léng ve ta reng a, riak turin ka ti viau nain naktukah kal ve a tum si a,insiam a duh a chhuanlam a, kei pawhin ka tilui duh bìk ta lo va.

Ka pu a țhâwng viau lo chu ka lâwm viau a ni. A taksain a tawrh phah ang tih kha ka hlau ania, mahse a pangngai reng a, a phùr hle a ni tih ka hriat phei chuan Aizawla kal thuai thuai a va hruai mai rilruah a awm hial a, mahse thil tih rum rum chi a ni lèm lo va, ngun taka ngaihtuah hnua tih chi chauh a ni zawk.

Rsa chuan U Fela chu a phone a, a  biak hlân chuan Lily chuan,"Kei pawh haw thuai ila, insiam ka duh. Ka helhhawlh ni berin ka hria, a taka ka hmu châk lutuk hi" a ti sar sar a.

Kei deuh hian asin hmu châk. Thla kua hrehawm reng rengin ka pumah ka pái a, a piang thla chiah a, a thi tiin min hrilh a, a hmél takngial pawh ka hmu lo. Tunah kum ruk deuh thaw a lo ni ta a,a thlalak kan hmu a ni ringawt a. A takah a duhawm dan tur leh a hmelthat dan tur suangtuah phei chuan ka hmu châk lutuk ringawt, ka duat dawn si, kei aiin a pain a duat mahin ka ring. A chhan chu fanu neih a duh em kha. Chutah, ka pu lahin a tunu neihchhun a nih dawn avangin a duat em em dawn bawk si.

Zanah pawh kan muhìl țha thei lo chu a ni. Kan han mu rèn ráwn a, kan rilrua a khah liam miau avangin kan sawichhuak leh țhin a, mahse ka indem miah lo, midang pawh ni se, an ni ve tho ang.

Zìng takah kan tho a, mu mang lo mah ila, ka châu lo, ka phùr em em zawk. Rsa erawh ka ngaihtuah viau mai, a dam kawr si a, mahse ani pawh a phùr hle tih ka hre tho.

Kan insiam a, engtia rei nge kan  awm dawn tih kan hriat loh avangin kan inkeng nual mai. Nidang zawng aiin chaw kan ei hma a, kan helhhawlh vang a ni chék bawk ang, kan ei tlém viau hlawm, mahse kan hmél erawh a hlim hle hlawm si.

Tlawng lam kawng siam ţhat anih vangin Dawn ațangin kan kal a, kawng chu a țha lém lo khawp mai a, a té viau bawk. Motor lian an tlân ve tho bawk si a, tlân chak theih pawh a ni lo.

Rsa chuan hmelhriat a lo ngah khawp mai a, Haulawngah chuan a thiannu Muanteite inah kan châwl a, Thenzâwlah Mamite kan tlawh leh zawk bawk a, kan kal tur thu Rsa'n a lo hrilh lâwk sa avangin an lo awm ve ve a, fel ka ti dun khawp mai, Rsate nen chuan an inkâwm nasa bawk a ni ang, an infiam bawrh bawrh mai a. Mahse châwl rei hman kan ni lova, haw leh lama tlawh leh ngei intiam chungin kan tlanchhuak leh ta a.

Kan tlanchhuah hnu chuan Lily chuan Rsa chu a fiam zauh zauh a, kan nui dar dar mai.

Kan tlán chak lém loh avangin kan thleng har a, Aizawl kan luh meuh chuan khua a thim deuh der mai. Thlenna tur hotel biak sa a nih tawh avangin kan lut nghal a, Rsa țhianpa CJay khan an ina innghat turin Rsa a rawn be tak nain pali lai kan ni sia, kan duh lo a ni.

Kan inbualfai a chawte puar deuha kan ei hnu chuan zan dar 9 a lo hnái thuak mai. Rsa chu ka ngaihtuah viau nain rin ai chuan a châu lova, mahse mu hma se ka duh, kan hun tawn chhoh zel dan tur kan hre lawk bawk si lo va, a tam thei ang ber hahdam se ka duh a ni.

A chauh thu a sawi miah lo, mahse  kan mut hnu rei vak lova a muthilh nghal mai avangin a châu tih ka hria, nizan lamah mut kan hmu lo bawk a, a damkawr châu bawk nen, ka khawngaih roh lutuk.

Khumah chuan ka mu meng kar thung. Tunah ka hmangaih ber nena kan fa, ka fanu nen khaw khatah kan awm ta, naktukah kan hmu tawh mai awm si a,ka hmuh hunah engtin nge ka awm ang? Ka țap chhuak phawng ang nge, ka pawm vawng vawng ang? Mahse min la hre dawn miah si lo, chubâkah naupang fing tak a nih chuan a nu leh pa kan ni tih hrilh ta ila, zawhna a ngah dawn lutuk.

Zìng ka harh chuan a la hma hle a, Rsa pawh a la muttui hmel kher mai, a thaw sak sak a. Ka en reng a, hetiang pasal hmelțha leh fel, min duh em emtu ka nei hi vannei ka inti a, mi rethei nih mai bâkah fahrah ka ni bawk nen, ka vanneihzia ka ngaihtuah lo thei lo. Rsa hian min hmangaih thu a la sawi miah lo, a châng chuan min duh ringawt niin ka hre țhin, mahse keimahin ka hmangaih em a, min hmangaih thu sawi kher lo mahse, min ngaihsak em em reng a, thu-a sawichhuah kher hi hmangaih tihna pawh a ni kher hleinem ka ti leh țhin. Hei bâk bâka min hmangaihna lantir dan a awm chuangin ka hre lo.

Ka en reng lai chuan a rawn che talh talh a, a rawn meng ser ser a.

"Hi, Morning, i harhna a rei tawh em?" A aw chu a va sexy tehreng em!!! A tho hlim aw mah nise, a sexy takzet.

"Morning, la rei love. I mut tui hmel lutuk a"

"Mu tui lutuk, mumang pawh ka nei lo"

"A țhat hlauh chu, la mu rih la, kei chu ka'n tho ang e"

"Tho bìk lovang"

Tih leh min kuah beh a rual nghal a. "Nizan lamah ka mu tam bawk a, ka harh ta khawp mai. Exer la ila"a ti zui sup a.

"I la damkawr lutuk, exer chu la rih love, i hah lutuk palh ang"

"Min puih phawt chuan ka hah miah lovang"

A sawi awmzia chu a kuta ka awmbawr a rawn khawih chiah chuan ka hrethiam ve chiah, exer pangngai emaw a sawi ka ti a, ka lo man thiam lo lutuk chu ka nuih a za zawk.

Nupa nun kan chen zawh hnu chuan bathroom-ah kan  lut a, kan intihfai hnuah a la hma deuh bawk nen, Rsa chuan CJay chu a bia a, kei pawhin Lily ka zawng a.

A lo tho daih tawh niin, a inbual zo tawh a, a sam a lo tihul mék a. Min hmuh veleh chuan,"I hmel ațang khan thil ka hria" a lo ti ringawt a.

Hrethiam lo zet hian,"Eng maw?"ka ti hù a, ka át hmel ngawt ang.

"Hmangaihna in chén zo deuh chiah tih a lang"

Ka sen țawn țawn ang chu, ka hmelah chuan a lang viau em ni ang?

"A hriat viau elo?"

"Ahhh, ka tidik e" A áu chùl a.

He nu mai mai chuh, min chhimbudâwi kual phawt a, min inpuantìr vek mai, tihchi loh lutuk.

"I chhe mai e a"

Intithei zet hian min nuih sùng a, tihngaihna ka hre si lova, ka lei sei fèin ka chhuah khum ringawt a.

"A zei leh zei loh i la sawi miah lo"

"A zei loh i ring reng reng emaw ni le?"

"Ring nang, a style hrang hrangte  ka hre châk bawk"

"Zawt mai la?"

"Chi nang, nél viau mah ila, hetiang lam kher hi chu..."

"Min zawt tawh bík suh"

"Nangte chu ka záwt ngam che a"

"Nge ani pawh i zawh ngam loh? Nupa chu pumkhat kan nia, kei min zawh ngamte chuan..."

"Awwww, nupa pumkhat in nihte chuan ka zawh che chuan amah zâwt ang tho ka nia, min chháng mai la?"

"Ka ning, zawt zawt a che"

"I nin chuan min hrilh ve mai la"

"Honey, eng chu maw? Hrilh ve mai la?" Rsa rawn lut chu kan lo en dun chiang khawp mai. Lily chu ka va melh leh nghal a,ani pawh chuan min lo en ve chiah.

"A, thil eng emaw min zawt a"

"Hrilh mai la, thil pawi viau a nih lohte chuan"

"A, thil pawi ania, a hriat ve chi miah loh"

Lily chu lo inrawlh vein," Nia, thu ho mai mai mawle, a ho lutuk, nidangah a ni mai" tiin a nui sùng a, min zawt zui zel lo chu ka lawm khawp mai.

Rsa chuan," Vawiinah dar 11-ah CJay chuan kan fanu enkawltute in min kawhhmuh dawn a, min kalpui dawn a ni"a ti charh charh a.

Ka thin a rawn phu leh nghal ta dup dup mai. Ka fanu chu ka va hmu teuh tawh em, darkar tlém tè chauhin min dang ta. Ka hmu châk tawh takzet, a țawng dan tur leh a cheziate ka hmuin ka hre châk tawh lutuk.

Hun chu a kalmuang ruihin ka hria. Chaw eikham dar 10 velah kan chhuak a, CJay pawh bike-in a lo kal a, mahse  kan car-ah a rawn chuang ve daih.

Kan fanu enkawltute awmna chu  rin aiin kan thleng hma a, mahse  an in chu gate-in a inhung khap mai a, gate lah chu a lo inkalh tlat bawk si, eng nge a awmzia ni le?!!

"Khawnge an awm le? An zin leh te hi a ni lo maw?" Rsa țawng  chuan min tihlauthawng zual, hmuh châk em emin kan kal a, kan hmuh loh turin an zin bo daih te hi a ni mai lo maw?

"Nimin lamah kha chuan an la awm chiang mai a, kan kal dawn tih lah an hre âwm tawp si lova" CJay chuan a ti sar sar a.

Ka rilru a tâwt țan,kan fanu enkawltu hian rinhlelhna rilru a lo nei tawh pawh a ni maithei asin, chuvang chuan a chhuahpui leh ta daih a ni ngei ngei ang, chutiang a lo nih hlauh chuan kan fanu hi kan hmuh lohin a bo pil leh hmiah thei dawn a ni.



RUATSANGA - 32  By Dingdi Pachuau

(Ka tlai leh deuh ta. Min lo nghâk hram hramtute in va zahawm tak em!!!  Mahse a hmâwr kan bâwk țep tawh thova, pawi vak lo turah ngai ang, net lah hi keimah ang mai, a chhe viau zel mai. Haha.. chhiar tui u le)

Ka ngaihtuahna ang hi chu thleng lul suh se. Hmuh lohna minit tlém téin a dang tawh chauh a ni a, a lo chenna hmuh hrim hrim chu a nuam ka ti tho nain lo awm phei se chu...

Gate chhung chu ka thlir a, naupang tan chuan a him ka ti. A enkawltunu hian amah chauhin a khalh fâl thin a ni bawk ang a,naupang tana lawm tur, pipu, thutthleng té, plastic atanga siam toys hrang hrang veranda-ah chuan a awm teuh a, a inhùng fel fai viau bawk. Hetiang a nih chuan a enkawltunu hi a che felin a chengvawng hle tih a hriat mai a, a enkawl țha viauin ka ring bawk.

CJay chuan," Nghah pahin an țhenawmte inah lêng lawk ang u hmiang, an chanchin kan zawt pah ang a" a ti a, ka rilru chuan hnial ka duh lutuk, ka fanu chénna hi enchian ka châk, mahse a tihchi si loh.

CJay bialnu te inah kan lùt ta ringawt a. A nu nen an lo awm a, a lo fel phian lehnghal a, a tawng duh bawrh bawrh viau bawk. Lily nen an titi dan chu a inang ka ti, a hming chu Becky a ni a, a lian lém lo va, a ngo fai var reuh sia, a hmêlțha reuh ka ti khawp mai.

CJay chuan,"Beck, in țhenawm hnâi lawka  hmeichhe naupang leh a nu chauh awm kha an zin leh tawh em ni?"tiin a zawt a.

"Zin lovang, an rawn haw deuh chauh zawk alawm"

"A ni maw? I hrechiang maw?"

"Aw, a fanu kha a damsam meuh lova, entir turin an chhuak a nih ka ring"

Ka fanu chu a damlo maw?!!! Ka va khawngaih tehlul em!!! A enkawltunu chuan a duat ang em? A dam țhatlai chuan duat mahse a  damloh chuan a lo chiau hiar ve ang a, a vìn hrep hrep ang em? A ei châk zawngte leisakin zánah a muthilh hma chu a mutpui țhin ang em? Nge, room hranah a riahtir țhin ang? Nu tân chuan ngaihtuah leh hlauhthâwn a va tam tehlul em!

Rsa chuan ka kut a rawn chelh vat a, ka ngaihtuahna chu a rawn hrethiam ve a ni ngei ang.

"Eng ém a thleng lovang, ngaihtuah lutuk suh" a ti ve tak nain ani pawh chuan a ngaihtuah lutuk dawn tih ka hrereng, mahse min hném a, ka lawm hle a ni.

Thingpui kan in a,mahse kei chu ka helhhawlhin ka rilru a châwl thei lo. Ka rilruah ka fanu mawlh chu a awm a, an rawn haw dawn tawh ang em? Nge damdawi In lamah chuan an lo admit zawk ang?

Tlâi lam dar 3 vélah chuan Becky chuan kawngpui lam a kuta káwk pah chuan,"Saw, an lo haw e, naute chu a țha a nih ka ring" a ti hliai a.

Kawngpui lam chu kan en țhap mai. Lalpa leh, ka fanu chu a tak ngeiin ka hmu ta!! Kan hmuhna a hla deuh hlek nangin an lang chiang viau a, mahse ka hmuh tum ang a va ni lo em! Ani ang kumah chuan hmeichhe naupang chum deuh târh hmuh ka tum asin, thlalakah khan a chér hmel loh nen, ka va hmu chér si em!!

"A hmelțha reuh lutuk"

"A va chèr reuh ve!"

Lily chuan a rawn tichhuak sap a, nia, ani pawhin chum deuh hleka hmuh a tum a ni ngei ang, a damlo viau tihna em ni zawk le?

"Nia, tun țum an rawn zin haw hi a chér riau ka ti a, a hma chuan saw tiang lutuk saw a ni bìk lo. A hmel saw a țha reuh ania, khawilam mipa hmélțha tak tawng fuh ni maw ka ti țhin, a nu saw a hmél țha lutuk bìk si lova" Becky chuan a lo ti a.

CJay chuan," Nghâk deuh hlek ila, chuan kan léng lùt dawn nia" a ti thung a. Nia,an ruahmanna hi a țha vek mai, mahse a nghahhlelhawm ka ti lutuk, nghah leh hlek pawh chu ka huphurh dèr tawh.

Rei lo te hnuah chuan  kan vái chuan kan kal ta a, luh chu ka huphurh em em rualin  ka fanu ka hmuh chian châkna chuan min tur nasa a ni.

CJay chu a lo hmelhriat sa tawh a nih vangin a lo chiau au vat a, keini erawh chu țit hmel deuhin min melh hlawm a , ka mit latu ber erawh chu țhutthlenga mu hmeichhe naupang chu a ni.

"Eng nge in duh a? Ka hre hlawm mang si lo che u a?"

"Ka pi, min hriat tawh reng kha"

"Aw, nang chu ka hria che. Mahse midangte hi?"

"Ka țhiante an nia. Ka pi, khawngaihin naute hriat loh hian ka be thei che ang em?"

Hlauhthâwn hmel fè hian," Eng nge ni ta? Aw, sawi rawh. A beng ri hriatna a chak vak lova,a hre thei chuang lovang" a lo ti a.

Rsa kut chu ka hmer vak a, ka mittui a tling puau mai. Ka naute hi ka va khawngaih tehlul em!!! A damloh mai bâkah a beng lam a chiang lo bawk a, a va lainatawm tak!!!

"Chuti, ka pi, ka sawi nghal ang aw. Hei hi Ruatsanga, ka țhianpa, tuna i naute enkawl mêk pa hi ania, chuan a bula mi hi naute nu dik tak Dítei a nih hi"

"A ni thei lovang"

Rsa chu lo inrawlh vatin," Ka pi, ka țhianpa khan thudik a ni a sawi ni. Hei leh chen kan fanu i lo enkawl hi kan lâwm em em a ni, tunah hian a damlo niin kan lo hria a" a ti sup sup a.

'Ka pi' tia kan koh chuan,"Ni lo, anite chuan naute hi a duh lova, a hralh daih tawh alawm, pawisa pawh tam tak ka pe tawh a ni" a ti thung a.

"Ka pi, kei hian ka fanu hi ka hralh reng reng lo asin, damdawi Inah khan nikhaw hre lova ka awm a, ka harh hnuah naute kha a thi tiin min hrilh a nih kha, min hrilhtute zinga mi kha i ni chiang mai, i hmél hi ka la hria che a ni"

"Min hresual a nih dawn chu, hei hi chu ka naute ngei a ni"

CJay chu lo țawng lehin,"Ka pi, nangmah ngeiin Ruatsanga fanu a ni tih i sawi kha. Min hrilh kha i hre tawh lo em ni?"a lo ti a.

"Chutiang ka sawi lo hrim hrim, keima fa ngei a ni, a birth certificate pawh ka nei thlap"

Ka pi hi rin aiin a khirh dawn tlat. Awlsam takin kan fanu hi kan la thei dawn lo niin a lang.

"I sawi miah lo maw?"

"Sawi lo, chutiang thu phuahchawp tu bulah mah ka sawi lo hrim hrim ang"

Ka fanu, țhutthlenga mu diai chu ka en a, a hmel chu a dâng delin ka hria, a ngo viau a, mahse tisenin a kâp lo tlat. Ka pi hian a fanu ang hialin a lo enkawl a nih chuan a duat ngei ngei ang, a chér lutuk erawh ka khawngaih.

"Ka pi, i chanchin hi ka chhuitir nual tawh asin, dawmdawi Inah pawh chuan i thawk țhin ngei mai. Mahse i bâng ta thut a, eng nge a chhan le? Chuan fa i nei thei lo bawk. Fa nei thei miah lovin fanu i han nei ta ringawt mai a, mipa tel miah lovin, a mak leh zual. Chutah, dáwt i la sawi zui bawk"

Rsa hmél chang rât, meng fìm râm mai chu en tawp chuan thinrim pawh a ang lo, mahse amahah chuan thinrimna thùk tak a inphùm ru tih ka hre khiau, ka chénpui rei ve tawh a, ka hre ve tawh a ni.

"Ka fanu liau liau a ni"

"Ka pi, police station-ah leh court-ah kal chu i duh lo vang tiraw? Dâwt i sawi pawh hi Jail-a tânna tham a ni asin, chuan nausen  i ru bo lehzel bawk a, i case hi a rit khawp ang"

Min rawn enin," Dawt i sawi a nih kha, pawisa i mamawh vanga i hralh  kha i hre tawh nange?" a ti a.

"Ka pi, ka hresual lo asin, dâwtin min puh lul suh, ka naute i lo enkawl hi ka lâwm em em. Mahse thi anga min hrilh kher kha chu dâwt hlang hlak a ni"

"Ka pi, dâwt sawi tawh lo mai teh"

A inngaihtuah ve nasa a ni ang, a ngâwi rân a. Mahse kan dangchép hneh em a ni, chutah," Dâwt ka sawi tih finfiahna pakhatmah in nei lo" a ti ta khauh mai a.

A dik ang, evidence kan nei lo maithei. Court chuan evidence kan neih loh chuan thiam min chantìr lo thei, ani hian a fanu ngei a ni tih a finfiah theih hlauh chuan....

CJay chuan,"Ka pi, chutiangin ti suh, naute hi Ruatsanga fa a ni tih i sawi kha i la hria em? Ka record vek asin, i ngaithla duh em ni?"tiin a phone chu a'n phawrh a, voice record chu kan váia hriat theih turin a tiring a, kan ngaithla țhap a.

"Evidence dang i la duh em? Damdawi Ina i thawh laia i thil tihsual tawhte leh naute i rùkbo  lâite, leh Damdawi In i chhuahsan lai zawng zawngte cctv record ka nei vek asin"

Makti takin Rsa chu ka en a, engmah min lo hrilh duh miah lo a lo ni. A lo chhuichhuah nasat  tawh  tehlul nen, ka pasal hi ka ngaisang thar leh sawt mai.

"Ka pi, țha te tea kan sawi lai hian thudik tak sawi mai teh. Kan fanu ţha takin i lo enkawl a, kan lâwm viau asin. Thil a harsa záwngin kalpui lo ang"

Kei pawhin Rsa rilru ang chu ka pu, a chhan chu a thiltih ngeiawm viau mahse kan fanu chu duat takin a lo enkawl ve tho, chubákah Damdawi In bill zawng zawng min péksak bawk a, chuvang chuan țha deuhin inrem thei ila ka ti.

"Thudik ka sawi chuan min khing dawn lo tihna em ni?"

"Aw, mahse thudik tluantling kan duh ang"

Kei chuan ka ngaithla tawh lo. Ka fanu mutna ka pan a, a meng miah lo. A pang chu ka dehsak a, a lo lum ham ham a.

Ka va khawngaih tak em!!!Duat taka kuah vawng vawng ka duh, ka hriat loh hlanin ka mittui a lo hnâi leh tawh, a far kauh a.

Ka mittui chuan a hmai a far avangin a rawn che talh talh a, a rawn meng siar siar a, a awmdan chu a pa siar, a pa siar a ni. An mitmeng a inang si, a dum bìk lo, a uk kharh mai. Mahse a khawsik chuan a mit chu a tisen deuh rám a.

Ka nuih lui deuh sak a. Ani erawh chuan chiang zetin min melh kiau reuh a, a pa chu a chhùn chiang a ni, a hmuiah erawh chuan kan inang.

"I țap ami?"

A aw chhuak,thâm deuh chhàlh mai chu ka fanu aw ka hriat hmasakna ber a nih vangin mawi ka ti lutuk, hei aia mawi hi a awm thei dawn em ni?

"Țap love, ka mitah thil a awm a, chuvang alawm"

"Naupang chauh an țap țhin. Kei pawh ka țap țhin, mahse ânu-in 'i țah chuan âpa-in engmah a lo hawn lovang che' a ti a, ka țap duh tawh lo" a ti leh sap sap .

Ka fanu hi a va fing tehreng em!!!Ka rin ai daihin a fing a, ka pi khan a bengri hriatna a țha lo ni khân a sawi si a, mahse hmui phun en chat nachâng a hre ve tlat, fing reuh lutuk.

"I va fel em em!"

"Ka fel tak tak maw?"

"Aw, i fel lutuk"

"Mahse, ânu-in,'I fel loh chuan âpa a lo haw duh lovang' a ti a"

Kawm a nuam ka ti lutuk, a khua chu sik mahse ka pi khan damdawi a pe ngeiin ka ring a, a chhâwk ve maiin ka ring. Titipui zel ka duh, a țawng ri hriat chu nuam ka ti em asin.

"Âpa chu khawiah nge a awm a?"

"Ânu-in 'A zin' a ti a, lo haw thuai thuai se, ka ngái tawh a"

"Âpa chu i hmu tawh em?"

"Min hmu duh lo"

"Ngati maw?!!"

"Ka țap țhin sia, ka sual a ti a"

"Chutiang chuan tuin nge sawi a?"

"Ânu-in"

Ni lo, ka pi hian duh aiin țawngkam a lo thlahdah tlat, naupang bulah chuan ţawng fimkhur a ngai asin, țawng zir chho reng an nih avangin. Mahse ka fanu hi chu a thluak a țha ka va ti tehreng em! Ka piin thil a lo hrilh zawng zawng chu a lo hrereng vek a lo nih âwm hi.

"A nih leh, tunah khan i eng nge na le?"

"Helai hi" tiin a hrawk chu a khawih a, ani té hi a tonsil lam a dik lo a ni ngei ang.

"Chuan, vawiinah damdawi Inah in kal tiraw?"

"Aw"

"Um, a dam thuai mai ang. Țawng tawh rih lo la, i țawng chuan i hrawk kha a nat belh palh ang, ka pawm i duh em?"

A zak deuh a nih ka ring, a kuttin  chu a seh neuh neuh a, kei erawh chuan ka kut chu ka pawm theihna turin ka phar chhuak a.

A tâwi deuh hrat hrat a, ka pi lam chu a melh leh phawt a,anni lah chuan mùk takin thil an lo la sawi a, chu chu a hmuh chuan ka malah chuan rawn țhuin a kut chuan ka nghawngah a rawn kuah ve chat a.

A taksa lum ham ham,chér deuh reuh si chu ka kuah vawng vawng, ka thlah phal tawh lo, ka fanu hi a pian atanga kum nga hnuah ka pawm thei chauh a ni si.

Ka pawm hnu rei lo teah chuan a muhil a ni chiang, min kuahna  ban thã chu a zawi ta riai riai a, nia, muhil rawh se, a hrawk a nain a damlo bawk si a, a theih anga tam a muthilh chuan ná hre lovin a awm thei dawn a ni.

Kei erawh chu ka harh kar, ka fanu ka pawm lai hian ka muhil duh lo, ka pawmna hmasa berah hian engkim, a taksa awmdan, a lungphu ri dat dat leh a thaw ri sâk sâkte chu hriatchian vek ka duh, ka tan chuan rimawi ber a ni miau si a.

"Zaninah in hawpui nghal dawn em ni?"

Ka bulah an rawn ding țhap tawh, ka fanu hlir ka lo ngaihtuah vangin thildang ka lo ngaihtuah lo a lo ni.

"Kan duhthusam a ni"

Rsa thil sawi chu a hnial ngam ka ring lo, a chhan chu Rsa hian a chanchin a lo chhuitir hneh em a, çhuvangin a tan chuan han hnial zel kha a tihchi loh a ni.

"Ka ngai ngawt ang, kum khati chen ka lo enkawl ve tawh si a"

Ka pi sawi chu a dik ang. A rilru tur chu ka hrethiam ruak mai.

"Ka pi, kan lawm em em a ni. I lo enkawl țhain i duat hle tih ka hria a, mahse kan enkawl ve châk tawh si a, kan hawpui nghal mai ang"

"A thawmhnaw lamte?"

"A ngai lo mai, naupang dang mamawh tak tak an awm zawk ang" Rsa chuan a lo ti vat a, kei pawhin ka remtih zawng tak a ni.

"Ka lo pawm ve ang"

"A harh palh ang, a hrawk ná a ti si a, a harh chuan ná a ti leh palh ang"

"A nih, ka lo fawp tal aw"

A lu-ah chuan a fawhsak zauh a, haw tur chuan kan ding chu a ni nghal mai.

Ka pi chuan gate thleng min thlah a, an inbiakna ka ngaihthlak ve loh avangin engmah ka hre lova, hriat kher pawh ka duh lo, tunah chuan ka fanu ka pawm tawh a, ka lâwm a kim viau tawh a ni.

"I fanu i hmu zet chu min hrechang tawh reng reng hleinem"Lily chuan a ti a, min fiam hi a peih ve a, a sawi chu dik lo pawh ka ti lo.

"Nia, dik ve reng. Ka hlim em a ni"

"A âwm alawm, kei pawh ka hlim teh ania, ka lawmpui bawk che u a, Lunglei thlen tawh ka châk ania"

Motor-a kan luh hnu chuan Rsa chuan," Kan fanu hi entir țhat leh ka duh tlat mai, CJay, nang Aizawlah i awm bawk a, naupang doctor țha deuh i hre turah ka ngai ringawt ania" a ti a, a fanu chu a ngaihtuah tih a chiang khawp e.

"Hre miah lo, mahse ka cousin ka'n zawt ang e"



RUATSANGA - 33  By Dingdi Pachuau

(Edit hman loh, vawm luh tawp. Chhiar dan lo thiam mai ru)

A cousin nen an inbiak hnuah chuan CJay chuan U Fela chu tlânna tur a hrilh a, keiin Bawihtei ka pawm reng a,a chângin a biangah ka fâwp leh thùl, ka rilru chu a hlim a ni. Ka bula țhu Rsa lah chuan a kut chu a hùmsak reng a, Lily lahin a sam a lo chùl chhén bawk a, kan ngaihtuah tlang țheuh a ni, kan inbe hlawm chuang miah lo nain kan rilru ngaihtuahna a inhlat lo hlawm viauin ka ring.

Kan entirnaah chuan a tihharh loh theih ta lova, a rawn harh pawh chuan ka nuih var var a, a chhan chu a hmel hmuh ngai loh hlir kan ni si a, a țap mai ang tih ka hlau. Mahse, a fel reuh lutuk, a pang a lum tho nain a țap lo va, doctor lah hlau hmel puin a en hek lo.

A tonsil a lo vùng niin, damdawi ei tur chi thum  a chawh a, tuiluma a hrawk chiah turin min hrilh bawk a, puitling țhah 4 lai maiin hmeichhe naupang kan entir chu a ni a, kan zahawm ngawtin ka ring.

Motor-a kan chuan lai chuan," Ânu hnenah kan haw tawh dawn em?"a ti reuh a, midang 'ânu' tiin ka fanu hian a ko rih tlat  mai si a, chu chuan ka rilru a tina thar leh vawng vawng a.

"Bawihte, ânu kha ânu tak tak a ni lova"

Rsa chu ka mitmeiin ka khap nghal vat nain ani thung chuan," Bawihte, dâwt sawi a țha lo tiraw?"a tih chuan a lo bu nghat reuh a, ka lâwm reuh tak tak.

"Ih maw, tuna pawmtu che kha ânu tak tak ania, chuan keimah hi âpa ka ni bawk a"

Min thlêk hâ a , chutah," Ânuin 'Âpa chu a zin' a ti bawk sia"a ti leh sep a.

"Aw, ka zin a, ka lo lét leh tawh alawm"

"Min duh tawh ami?"

A zawhna chuan ka mittui a kâichhuak leh ta. Ani ang naupang fing lutuk mai hi ka fanu chu a ni si a, a pain duh lo anga a ngai tlat hi tihreh vat ka duh, a pa hian a duatin a duh ngawih ngawih dawn tih ka hre si a.

"Bawihte, âpa chuan a duh lutuk che a, kei pawhin ka duh che, kan zavai hian kan duh vek che a ni"

"Bawihte, kan vai hian ka duhin kan hmangaih vek che alawm"

"Âpa i ni tak tak tiraw?"

A bianga dawmsak pahin," Ni e, âpa ka ni e. Ka fanu i ni a, âpi khan a lo enkawl char char che a, tunah chuan kan enkawl tawh dawn che a ni"a ti sup sup a, chutah a chalah chuan a fawhsak vang vang a.

"Âpi chu tunge?"

"Nangmah enkawltu che 'Ânu' i tih kha. Chuan, tunah chuan ânu leh âpa hian kan duat tawh che ang a,kan inah kan hawpui tawh dawn che a ni, kan in chu i hmu châk tawh em?"

"Aw"

"Kan inah chuan âpu leh ânî an awm a, an hmu châk tawh teh che asin. Nakinah kan phone dawn nia aw"

"Âpa, phone i nei ve ami?"

"Nei e, i en duh em? Kha, keng la"

A phone chu a kentìr a,ani lah chuan intithei deuh hian min hmuh a, nui san san chungin,"Âpa phone hi a máwi asin. Ânu, nang phone i nei ve em?"a ti zawm zat a.

'Ânu' tiin min ko ve ta. Ka va lâwm tehreng em!!!

"Bawihte, ka va hlim tehreng em!! Min han ko leh teh"

"Ânu, i țap leh alaw?"

"Țap love, Bawihte. Ka hlim lutuk a, ka țap miah lo. Ka mitah hian bawlhhlawh a lo lut leh țhin a"

Ka mittui tling kuau chu ka hru hul sawk sawk a, Lily chuan,"Bawihte, ka phone i en ve duh em? Kei pawhin ka nei asin" a lo ti ve vat a. Kei zawng, ka țahbelh em a, ka mittui lah hi a lo tla ve ziah mai, mahse ka hlim em a, ka zak hran lo.

"In nei vek alaw?"

A zawhna avang chuan kan nui deuh vekin ka hria. Kan hlim tlâng a, kan rilru min hriatthiampui hlawm bawk a, Bawihtei kan hmuh lehna hian min inpawhtìr lehzualin ka hria.

"Nang pawh i puitlin hunah ka leisak ve ngei ngei ang che"

A pa thusawi vang chuan a nui leh sen sen a, a pa phone chu a chùl hoh hoh a.

"Âpa, Moana kha a en ve theih em?"

"Theih e, i en duh ami?"

"Aw, chuan âpa, min pawm pah  la"

A châk zawng tak a ni ang chu.  Ka pawm reng a, a pa pawm a duh ve a ni ang.

"Tehreng, ka pawm châk lutuk che. Ãnu hian  ka pawm che a phal ang em aw?"

"Ânu, i phal em?"

"Aw le, âpa pawm nge nuam ang a ânu pawm? Min hrilh dawn nia aw"

Rsa chu ka pawmtìr a, dik tak chuan a damțha lo va, phone entìr chu ka duh lutuk lo. Mahse kan inhre țanțìr chauh sia, a duh hnialsak ka duh rih lo a ni. A pa hian a duh a sawi apiang chu a tihsak zel dawn tih ka hre bawk a, a hriat laia hnial phei chu ka duh lo hrim hrim.

Hotel kan thlen chuan  a pa malchungah chuan phone enin a lo muhil leh tawh, dam țha se chuan han bazarpui a a thawmhnaw turte en ka duh tehlul nen, mahse hun kan la nei dawn chauh alawm.

Chaw ei dawnah a rawn harh a, a pang pawh a dãi ta. Rsa chuan," Hi, naute, i ril a țâm tawh em?"a lo ti vat a.

"Ãpa, tui"

Tui bottle ami chu no-ah thli chhuakin Rsa chu ka pe a, ani chuan duat takin a tulh a, a in zawh chuan," Ânu, mumangah ka hmu che a" a ti sap a.

"A ni maw?!!! Engtin nge min hmuh a? Âpa i hmu ve em?"ka lo ti vat a, ka fanu hian a mumangah min hmu tawh ania, ka va intithei tehreng em!

"Aih, ânu chauh ka hmu"

Ka nui hak hak a, awmze nei fe hian Rsa chu ka'n melh a, ani pawh chuan a lo hrethiam nasa.

"Âpa min hmu lo maw? In pahniha in awmnaah ka lo kal ve reng kha, barbie kengin"

"Aih, âpa. I lo kal tak tak maw?"

"Kal e, ânu hian  min hmuh ka ring"

"Bawihte, âpa chu a lo kal ngei a, barbie a rawn keng bawk a,barbie pék ka tum lai chein i harh daih a nih ka ring"

"A ni maw? A va pawi, barbie chu ka duh asin"

"Naute, kan lei dawn nia aw, tam deuh kan lei ang"

Hlim deuha nui san san chungin" Yess.... Âpa, pawisa tam tâwk i nei ami?"a ti a, a hlim hmel chu hmuh a va nuam tak em!

"Nei e, i duh duh kan lei ang"

"Âpa, barbie kawr pawh lei bawk ang aw"

"Aw le, lal fanu. Ãnu kan hruai ve duh ang em?"

Min rawn en pahin," Ãnu, lo kal ve la, âpain barbie tam tâwk min lei dawn asin, i duh ve ang em barbie chu?"a ti sarh sarh a.

"Duh tehreng mai, min pék phal ve chuan"

"Aw, ka pe ve ang che"

Tihian chhungkua kan titi tlang chu a ni mai sia, kan naute lah hi a țawng duh reuh bawk sia,a fel bawk si nen, khawvel hi a pâr vul chiai ni berin ka hria.

Chaw kan kilhonaah chuan kan inkárah a țhu a, a chaw ei tur chu a pa chuan a siamsak vek. Rsa hi ka rin ang a ni tho nain Bawihtei hi hetiang tak hian a duh takzet ang tih ka ring pha lo. A âwm nghenga a muthilh pawh khan khuma mut a phal miah lova, a pawm char char mai a ni.

An chaw ei dan lah chu a inang hle lehnghal a. A la naupan tehlul nen, a chaw ei chu a fel lutuk  tlat.  A enkawltunu khan a zirtir țha hle a nih dawn hi.

Chaw erawh a ei tam lo hle mai, a hrawk kha a la na deuh pawh a ni maithei, thil tuirìl lam, a taksa tâna țha tur ngaihtuah  ngai a ni.

Chaw eikhamah chuan  damdawi ka pe a, bathroom-ah luhpuiin a ha chu ka tihfaisak a, kei pawhin ka nawt nghal a.

"Ânu, hei hi kan in a ni em?"

"Ni lo ve, Bawihte. Hei hi chu hotel ania"

"Ânu, hotel chu eng nge a?"

Naupang chu an dílchhùt țhin. Dawhthei taka kan chhân a kan enkawl chhoh an ngái reng a ni.

Bathroom atanga kan chhuah chuan Rsa chuan TV a lo en a, Bawihtei chuan," Âpa, Moana kha en leh ang"a ti zat a, a pa chu a pan nghal a.

"Aw le,lal fanu. Ka pawm leh ang che aw"

A pa mal chungah chuan a țhu nghal chat a, Rsa chuan phone chu phawrhin a entìr leh ta a.

"Damdawi i ei tawh em, Naute?"

"Aw,ãnuin min pe a"

"Ka lal fanu hi a va fel tak em! Damdawi i ei chuan i hrawk na kha a dam thuai thuai ang a, ring tâwk tâwkin i áu thei mai ang"

An pafa awmdun chhùng chuan ka intleuh zawk a, tunah chuan Bawihtei kan bulah a awm tawh si a, hun remchãng ka melh ve reng a ngai dawn tawh si a.

"Âpa, ânìte chu in phone dawn lo em ni?"

"Ni dawn tak, chaw ei kham kha chuan ka be ngei mai a. Naute, âpu leh âni chu kan be dawn ami ni ang?"

Phone chu a pa chu a pe nghal mai a. Video call-in Âmpuiite chu a bia a.

Hmuh ve ka duh avangin an bulah ka va awm ve a, ka pu room-ah an awm chiang mai.

"Ka pu, hei Naute-i a nih hi, a be duh che u a"

Ka pu hmèl chu chisng takin ka hmu a, a hmel chu a hlim hle mai a, hetianga ka pu hlim hmel hi ka hmu âwm ka la hre lo.

An inbiak chhung chuan Bawihtei chu a pu chhân dan tur ka lo hrilh  zel a, mahse a châng chuan ka hrilh lo.

Âmpuii pawh a rawn phùr khawp mai, a rawn khék chùl a, Bawihtei chu a be barh barh a, ani pawh chuan fel tak takin a chhâng ve zèl a, chhân dan tur kz hrilh tawh miah ko,  a thiam ang anga a chhãng ri hriat chuan nuih pawh a zá a, ka lo nui sáng reng a.

An inbiak tawp dawnah chuan," Ãnî, barbie i duh ve em? Âpain tam tawk min lei dawn a"a ti siam siam a.

Ãmpuii chuan," A ni maw? Aw, barbie kawr sen ha ka duh ang aw. Min lo hawn chuan ka lâwm viau ang" a ti a, a nui var var reng a.

"Aw le"

"Naute, i room tur pawh nuam tâwkin ka lo siamsak che ania, lo haw thuai thuai ru aw"

Âmpuii chuan a lo siamsak tak tak em ni ang? Kei lah hi ngaihtuahna ka hmang thui lo thei. A room tur tih vel ngaihtuah chhuah nachang ka hre miah lo tih ka hrechhuak chiah.

"Âpa, Bawihtei room tur chu i siamtìr em ni?"

"Aw, ka la hrilh lo che a ni maw? Saron room kha țha riau dawnin ka hria a"

"Nia, mahse zanah amah chauha muttir chu?"

"Muttir lo ve, kan bulah a mu ang, a hminga a room tur chauh a ni rih ang"

"A țhat chu, i damdawi i ei tawh em?"

"Ei lo deuh"

"Ka lo pe ang che"

TV ka en peih mang si lova, khumah chuan ka țhu mu mai mai a .

Rei pawh ka la țhut hma chuan," D, a muhil leh tawh ania, ka rawn mut dawn" Rsa chuan a ti a, kei pawhin kan puan sin tur chu hlìm thlain Bawihtei mutna turin ka lo siamrem a.

"A lâiah hian aw?"

"Aw, zanah kan kuah duh ve ve âwm sia"

Ka ti tak tak. Ka kuah ngei ang, ka muhil țha thei pawhin ka ring lo, ka awmdan hi mumangte pawh a ang lek lek ka ti. Ka hlim a, ka fanu thi tawh nia ka ngaih ngei kha ka fanu dik tak niin  ka kuah theihin a rawn awm ta thut si a, mumang a ni ang a, a tak tak a ni lo ang tih ka hlau.

Khuma inbengkâng pah chuan Bawihtei muhil thaw sek sek chu ka en reng a,a hmel hi chu a țha reuh a ni. A pa a chhùn dan em em te lah hi, a pa tan chuan a lawmawm lehzual ngawt ang. Fanu a duh a, ka hrinsak a, a fanu lah chuan a chhùn em em bawk si. Duh leh duat loh theih lohin a fel bawk si, hmêlțha bawk si.

"I mit kha a tla ang e"

"A hmelțha reuh em alawm, a chhùn tak tak che a ni"

"Ka hmélťha viau tihna?"

"Tehreng"

Vawikhat fawh hlak ka hlawh.

"I intleuh ve dawn em?"

"Ngai pawh ka lo ti mang hleinem"

"Intleuh zawk la, chutilo chu i mutui thei lo ang, vawiin lamah i thlan a tla awm sia"

"Nia, tak tak chuan, tleuh dawn e. Zanin chu mu hma deuh ila tiraw?"

"Um, mahse ka muhil thei ngùt pawhin ka ring lo"

"Ngati maw?"

"Bawihtei kan bulah a mu ta mai sia, ka muhil ang a, ka harh lehin mumang mai a lo ni ang tih ka hlau"

"O, honey,i kuah thei reng tawh dawn alawm. Tui taka muthilhho zan tur a ni zawk"

"Nia, mahse muthilh hlanin a bo daih ang tih ka hlau alawm"

"Ka nupui sexy zet hi a lo sweet tel tho a lo nih hi"

Sexy min tih hian nuam ka ti, nui sang chungin hlim takin ka en a" Ka pasal chhe lo zet hian țawngkam a lo thiam tel tho a lo nih hi" ka ti lét a, nui suk chungin bathroom-ah chuan a lut ta nghal a.

Ka muhil har khawp mai. Bawihtei chu ka en leh țhin a, a han inlet kual velte chu hmuhnawm ka ti a, a bân te reuhte chu ka chùlsak pah bawk a, a tisa ném nen mai chu ka khawngaih a, khawih nuam ka ti viau lawi a.

A bân chuan ka kâwngah min rawn kuah ta thlap reuh a, ka che lo chiang ta khawp mai. A harh dawn emaw ka ti a, mahse a muhil reng tho bawk sia, a mumangah min hmu leh ang a, min kuah a ni ang.

Kei pawh chuan duat takin ka kuah lét a, ka rilru hi a nuam veng veng mai.  Heti chuan tui takin ka muhil thei tawh ang chu.

Ka harh leh meuh chuan ni a lo lang uar tawh.Ka inbengkâng a, n pafa chuan an lo mu tawh miah lo, bathroom lama nui ar ar thawm ka hriat avang chuan ka nui sak a, thaw huai chungin ka  mu țha leh a.

Bathroom ațanga an rawn chhuah chuan," Ânu,good morning, i mutui em?"a ti reuh a, ka phu zawk mai.

Rsa ka melh a, ani chuan a dár a lo chhin ák a, kan fanu hian min tiphu zawk zawk dawn chauh niin ka hria ka ti.



RUATSANGA - 34  By Dingdi Pachuau

"Morning, Bawihte. In va tho hma ve"

"Âpain kaihthawh che a phal lova"

"Âpa nen chuan ha in nâwtfai tawh em?"

"Aw... Ânu, barbie chu lei tawh ila?"

A pa a lo inrawlh ta vat a.

"Naute, nakinah chaw kan ei phawt ang a, chaw ei khamahoo barbie lei turin kan chhuak dawn nia aw, tunah chuan a la hma a"

Kei pawh chu ka tho ve ta nghal a, Bawihtei a hrawk țhuahtìr ka duh bawk sia, tui lum chu ka on nghal bawk a.

Chaw ei laiin Lily chuan,"Naute, vawiinah eng maw in lei dawn a?"tiin a zawt a.

Ani chuan phúr deuh hian," Ãpain barbie min lei dawn a, ânu leh âni ka pe ve ang" a lo ti nghal vat a.

"Min pe ve phal ang em?"

"Aw, pakhat ka pe ve ang che"

Kan nui dar dar a, ka fanu té hi a thilphal ania, nui paha a țawng siam siamte chu a inhmeh reuh ka ti, ka duh ngawih ngawih em mai.

Chaw ei khamah chuan damdawi ka pe a, tui lumin ka bual zawk a, nuam a la ti em em zui, a nui iar iar reng a, kei pawh ka nui reng mai.

A thawmhnaw kan lei phawt a, MC-ah. Nuam a ti hle a, a pa nen lehlam lehlamah kan kâi a,a hnu deuhah chuan a pa chuan a pawm ta daih a, a hah lutuk chuan a damlo leh palh ang.

Barbie chu a duh thlantìrin kan leisak nual bawk a, Lily nen chuan pakhat ve ve min pe a, thilte hi a hre rei reuh ania, ka fanu duat hi.

A beng ri hriatna țha lo chu Rsa chuan ennawntìr leh ngei a duh avangin tlai lamah Specialist kan pan leh a, hmelhriat neih hi chu a lo manhla khawp mai. Specialist Dr. Sawmtea chu Rsa sikul kalpui țhin niin dawr changtlung tak a nei nghe nghe a, a felin naupang chhawnchhaih dan pawh a thiam khawp mai. Amah lah chu a hmelchhe loin a fai var mai a, doctor ni awm tak a ni reng a ni.

A bengdár chu zai a ngai dawn a nih chu. A la naupang si, ka khawngaih em mai,zaitír loh mai ka duh, kan țawng a hre thei thova, ring deuh taka biak a ngai chuang si lova.

Mahse, nakina a tâna țha tur zawk a ni a, a thih phah dawn tihna pawh a ni chuang lova. Mahse a la naupang lutuk a, a hrisel lo bawk nen, ka khawngaih em a ni.

Zai hun tur an sawifel nghal vek a, a damțhat deuh hun nghah rih țha an ti a, thla khat hnua zai an titlu ta a ni.

Hmunpui lam nge nge a nih avangin ka pu, Rsa leh Bawihtei ei tur damdawi țha tak tak lei ka duh a, Dr. Sawmtea chu ka zawt a, ani chuan a thiante, medicine lam thiam a han râwn ve a, a dáwr ațang chuan damdawi kan lei haw nual mai.

Ka thawhna țhin school kha tlawhpui ve reng reng ka duh a, ka  han sawi chuan an vai mai chuan an lo phúr a, U Fela chu a awmna ka hrilh a, chu lam pan chuan kan tlân ta nghal a.

Principal-in min lo hmuh chuan a lo nui var var a, ka thawk leh thei dawn tawh emaw a lo ti nghe nghe a ni awm e, a hnua a sawi danin. Inhmelhriattirna ka neih hnuah chuan lunch tur a order nghal a.

Rsa nen chuan an titi dun thei nghal mai. Mipaho an titi laiin Lily leh Bawihtei nen chuan school chu kan fang a, zirlai naupang an lo tam leh phian mai a, Bawihtei chuan hmuhnawm tih hmel deuhin a thlir doh doh mai a.

"Bawihte, sikulah hian i lut ve châk em?"

"Aw, ânu, an kawr hâk angte saw ka duh ve"

"Um, kan țhui ve ang aw, i inhmeh dawn lutuk"

Hlim takin a zuang auh auh a, ka fanu hlim hmel hmuh hi nuam ka ti, ka hmu kham thei ngai lovang.

Hotel-a kan lét leh hnuah chuan a nu Lily leh a pa chu barbie nena inkhualtelem-puiah a sawm ta mauh mai. Ka nuih a za lutuk, a pain a chhân dan tur ka hre châk takzet.

Lily chuan phùr fé hian," Um, barbie min pék hi ka hmang ve ang aw" a lo ti vat a.

"Âpa, ka barbie hi hmang ve rawh aw"

Rsa chu ka en reng a, a hnial ang nge hnial lovang ? A hnial chu ka ring chiah lo.

"Ka lal fanu, i chhiahhlawh ka ni e, barbie chu nangman hmang la, keiin ka lo véng ang che u, misual an lo kal thut thei a, chumi laka in him theih nan guard-ah ka lo țang ang aw"

A hnial ka ring lo kha ka tidik.

"Aw le....Ânu, nang pawh  barbie i neih ve kha, lo tel ve rawh"

"Engah nge ka țan ve ang ?"

"Nang chu lalnu i ni dawn nia, kei chu ka barbie hi Moana a nia"

Puitling pathum  chu naupang bulah chuan kan tawlh ve ta hrut hrut chu ania, he khawvel inher kual dan hi a mak ngawt mai. Rsa hlauh phei chu mipa, pâ ve tak a ni a, a fanu bulah chuan chhiahhlawh niin a chângin sakawrah a chang a, a châng leh guard a ni bawk a, mahse kan ti tak tak vek, Bawihtei lah chuan nuam a'n ti khawp mai a, a pa chu sakawrah a țang zing khawp mai.

Zanah chuan mutnaah chuan a titi barh barh a, a pa chuan thil a zawt zauh zauh bawk a.

A hnu deuh lawkah a hâm ta bâi bâi a, a pa chuan,"Ka lal fanu chu a mut a chhuak tawh a ni maw? Thawnthu a ngâithla duh ang em aw?"a ti a, ani chuan rang fè hian," Aw, âpa,ka ngâithla duh" a lo ti chùl a, a bek chùlsak hauh hauh pah chuan  Rsa chuan Fahrah rethei chanchin chu a hrilh ta sap sap a.

A sawi  tâwp hma chuan a muhìl ta mai reng a, a muhìl tih a hmuh chuan a tâwp ta daih a.

"Ka lo ngaithla ve reng ania, i sawi thiam lutuk, a tawp thleng sawi law law la"

"Ni dangah le"

"Mawh, âpa, sawi chhunzawm rawh"

Ka biangah a rawn piai hlak a.

"Muhìl tawh ang"

"Aw, tui deuhin i muhìl dawn nia, vawiin lamah kan vâk nasa si a, i la damțha lo tih hi ka lo theihnghilh leh țhin a, i châu viau ang"

"Muttui nan min fáwp phawt la?"

A thu chu ka záwm ve mai a,ka mu chu  tho-in a mutna lamah chuan ka kal a, nia, Bawihtei hian kan rilru a la péng nasa lutuk tawh a, ka pasal fawh pawh ka lo mangnghilh țép a lo ni.

Lungchim takin ka fâwp vang vang a, ani pawh chuan duhthawh takin min lo chháng lèt a.

A tuk chaw ei khamah Lunglei lam panin kan chhuak ta a,Bawihtei chuan a la hmuh ngai loh avangin a front seat-ah, a pa malchungah a țhu a, an pafa chuan an ințawngchhâwk a ni ber. Rsa hi mi țawng duh tak leh țawng tam a ni miah lo, mahse a fanu bulah hi chuan a mizia zawng zawng a dang vek.

Lily leh U Fela chuan Bawihtei chu an be ve țhin bawk a, Lily phei chuan a'n on thiam khawp a, a záitìr ál ál loh leh thawnthu a sawitìr thùl. Kan hlimpui khawp mai a, ka phone camera pawh a rim malh malh khawp mai.

A hnu deuhah chuan a pa âwm nghèng chuan a muhìl leh bâm mai a, a lang cute lutuk a, a duhawm bawk si nen, motor dintìr meuhin thla ka lâksak nghe nghe a.

Lily chuan," A muthilh chhung tal chu ka lo pawm ve dawn em ni?"a ti fiamthu a, Rsa chuan," A harh hunah le, i pawm chuan a harh palh ang" a ti  tlat thung a, Lily nen chuan kan inmelh ralh a.

"Ka dìl chhin mai mai che a nih kha, i phal ka ring lo sa hrim hrim a"

"A harh hunah i pawm tak tak dawn nia"

"Ka ti mai mai ka tih chu, i mi chhânna ka hriat chák vang mai mai ania"

"Ka la pawm kham lova"

Kan nui ta dar dar a, Lily chuan," A tâwpah chuan i inpuang ta tho tho alawm, a tìrah khan sawi nghal mai tur ania"nui sùng chung hian a ti zuah zuah a.

Kan tlân chak lèm lova, kawng a țha lutuk lo bawk nen, Bawihtei a muhìl hlauh chu a zia phian, hrehawm a ti lutuk palh ang.

Thenzawla chawl lovin Ramlaituiah Mapuiite inah kan cháwl a, ka hmuh tum loh deuhin ka hmu lehnghal a, nu lian lam deuh, dam duam mai a lo ni a, fel pawh a fel teh e.

Bawihtei pawh a harh tawh a, Mapuii chuan thiam takin a chhaih a, an inko bawrh bawrh thei nghal mai.

Mapuii chuan an huana theihái chu Bawihtei chu a lawhpui a, ani lah chu a lawm em em khawp mai a, mi thilphal ngang a ni bawk a, min rawn sem leh diat diat mai.

Haulawngah pawh kan cháwl ta lo, ruah a sur a, kan tlânna tur kawng a diak leh dawn si a, zawimuanga tlânin thim tak tak hmaa Lunglei thlen kan duh avangin kan châwl khawmuang ta lo.

Kawng tluanin Bawihtei  chu a pain a pawm a, Lily chuan a pawm ta lo. A vui bìk lém lo, a hrethiam ve tho.

Lunglei kan thlen meuh chuan dar 4 a ri tawh a,Sethlun kan thlenin  ka pute an pafain an phone a, ruah pawh a hân tawh a, ni a lang leh sur tawh a, a la mawi em em zui.

Kawtah ka pu, Nu Sangi leh Ãmpuii chu an lo ding a, motor ațanga Rsate pafa chhuak chu Ãmpuii chuan lo âu chùlin," Yes, Bawihtei a lo thleng, ka u, ka lo pawm nghal" tiin a lo laksak nghal a.

Ka pu bulah chuan a pawm phei nghal a, ani pawh chuan mittui parawl kuangin a lo kuah a, a biangah a fâwp bawk a.

"Kan naute chu a va hmélțha em em ve!!!Naute, âpu ka nia, chuan hei hi âni a nih hi, chuan hei hi âpi aw"

Rsa chuan," Naute, âpu, âpi leh ãni kha chibai la" a lo ti a.

"Âpu, chibai"

"Âpi, chibai"

"Âni, chibai"

"Kan naute hmêlțha fel em em dan chuh, nang pawh chibai aw" Nu Sangi chuan nui chungin a lo ti lét a, kei erawh chuan chhuang takin Bawihtei chu ka lo thlir reng a.

"Zanin chu kan inah chaw ei vek tur aw, Fela"

"Aw le, ka pu"

In chhungah kan luh hnu chuan ka pu chuan," Khawi maw, Nautei chu ka'n pawm ve reng reng teh ang, e khai, i va rit tawh ve a...kan hmu châk tawh lutuk che a" a ti barh barh a.

"Âpu, hei hi kan in ami?"

"Aw, ni e. Nakinah i room-ah kan kal dawn nia, teddy bear te, nautelem tam tawk a awm asin"

"Âpu, tak tak maw?"

"Aw, âni hian i room tur chu a tifai a, i mutna tur pawh khum nuam tâwk a awm ania"

Kan thawmhnaw chu kan room lamah ka dah chho a, Lily pawh chuan min lo pui a, Bawihtei bungrua erawh chu a room tur lamah kan nula pakhat zawkin a keng chho a.

Zanriah kan kilho chu kan hlim dar dar hle. Bawihtei chu a pu leh a pain an laitat a, Lily'n a on lehpek a, chaw ei lai laiin a zái leh ta âl ál mai.

"I va zaithiam em em ve a, min zirtir ve rawh aw, Bawihte"

"Âpa pawhin a thiam, Ânì"

"Tak tak maw?"

"Âpa, zái ve la"

"Chaw ka hmuam a, ka zâi thei lo alawm, Naute"

"Chaw hmuamin kei chu ka zaithiam asin"

"A ni maw? Kei chu ka thiam ve miah lova"

Ka pu lah chuan a lawm em em khawp mai a, chaw ei châwl meuhin, nui chungin  a thlir reng mai a,  Bawihtei hian kan in chhungah hlimna dik tak a rawn thlen chiang a ni.

Chaw eikhamah chuan damdawi ka pék zawhah sitting room-ah kan țhu khawm leh a, Bawihtei chu kan bial laih a ni ber.

"Bawihte, ka barbie tur chu min lo hawn ta em?"

"Aw"

"A ni maw? Ka va hmu châk tawh"

"Ânu, ânì barbie kha"

Barbie kawrsen ha ngei mai chu ka bag atangin ka phawrh a, Bawihtei chuan a ni chu a pe ta vat a.

"A hming i hria em?"

"Hre miah lo, tunge a nih a?"

"Taffiti"

Hming lah chu a hre thei phian mai lehnghal a, lehkha pawh a thiam theiin ka ring.

U Fela chuan Lily chu a thlah phawt a, car chu a hawnpui ta mai. A tân rickshaw buaipui leh kual vel kha a buaithlak si a, a hnial viau nain Rsa'n a tilui ve tlat.

Ka taksa chu cháu ve mahse ka rilru erawh a hlim a ni. Him takin in kan thleng a, kan fanu tel ngeiin. Nun tak tak tem ve ta niin ka inhria a, tuna ka hlimna hi eng sum mahin a lei thei ngai lovang.

Mut dawn tak takah ka intleuh zawk a, ka harh sawng sawng mai. Bawihtei leh a pa erawh chu khumah thawnthu an lo inhrilh leh tawh a, Mauruangi thawnthu a lo ni ve tawh thung a.

"Mauruangi chu ka khawngaih e, ápa"

"Nia, a nuhrawn khan a duat lo lutuk a"

"Kei chu min duat tiraw?"

"Tehreng mai, nang chu ka fanu duatlai alawm i nih"

"Ânu pawh?"

"Ânu pawh ka duat a, âpu pawh ,ânì pawh, âpi pawh"

"Âte Lily pawh?"

"Aw, ani pawh ka duat tho"

"Mauruangi pawh?"

"Aw, ani pawh ka duat tho"

"Âpa chu i fel e"

"Ka va lâwm em!!! Ka fanu duatlaiin fel min ti ania, ka va hlim tak em aw"

"Kei pawh"

"A nih, kei ka fel ve em?"ka lo inrawlh ve a.

"Aw, âpa chu a fel a, ânu pawh. Âte Lily pawh, ânu Mapuii pawh, ânì pawh, âpu pawh"

Thil a hre rei thei tak tak a ni. Mapuii pawh a lo la hria nia.

"Theihai lawhpui tu che kha tunge kha?"

"Ânu Mapuii"

"Nih leh, tunge sikul kal châk kha? Sikul naupang kawr hàk ang nei ve duh kha?"

"Keimah"

"Um, kan lei ve ang, i mawi dawn e"

"Âpa pawh lei ve la"

"Sikul naupang a ni ve ang a maw?"

"Aw"

"Um, kan lei ve ang, in inhmeh âwm mang e"

"Ânu, nang pawh aw"

Min telh ve leh ta, mi hi chu a duhsak ve thiam ania, ka fanu hi ka chhuang a ni, rei lo te tak tak chauh la awmdun ni mah ila, a nungchang duhawm lutuk hian min hìp nghet hle tawh a ni.

Kan inah, kan room-ah chhungkaw kimin kan khumah ngei kan han mu dal mai a, ka rilru hlim dan hi teh ngaihna pawh ka hre lo, hetiang hlimna hi ka lo suangtuah ve țhin ngei mai, mahse tuna ka rilru hlimna hi chu tawn ngeia hriatfiah chi niin ka hria.

Kan motor chuang kan cháu tlang bawk a ni ang, kan muhil hma hlawm viau mai.

Zingah  chuan ka hmaia min khawih neuh neuhtu an awm avangin ka harh a,ka han men chuan Bawihtei a lo ni a a hma viau tawh lo.

"Morning, Bawihte"

"Morning, ânu. Kan tho dawn em?"

"Aw, mahse âpa kha tiharh lo ila"

"A la muhil a"

"Nia, kan pahnihin tho mai ang aw"

"Aw"

Bathroom-ah kan inphihfai hnuah in hnuaiah kan chhuk a, ka pu leh Âmpuii leh kan nulate chu an lo tho daih tawh lo niin.

"Morning, Naute"

"Morning, âpu"

"Morning, ânì"

A va han fel tak em!!! Ka hrilh a ni miah lo, a pain a zirtir pawh a ni maithei. Hotel-a an pahniha bathroom-a an awm laikhan an lo inzirtir a ni ngei ang.




RUATSANGA - 35  By Dingdi Pachuau

Ka fanu hi ka chhuang tak tak a ni.

Ka pu chuan," Kan naute felzia em em hi aw!! Lo kal teh le, ka lo pawm teh ang che" a lo ti vat a, ani pawh chuan a pan ve nghal vat a.

Ãmpuii pawh chuan," Kei pawh ka'n lo piai ve teh ang, a nih loh pawhin ka lo chuks lawk teh ang" a lo ti ve a, an ri chùl mai.

Nui var varin choka lamah chuan ka lùt a, kan awmpuite chu an lo che nasa leh hle tawh a, an lo peih țép tawh a lo ni a. Choka chhung pawh a lo rimtui vang vang hle a.

"A va tui dawn ve aw"

"Nia, ka pi.  Tui turin theihtawp ka chhuah a" pakhat zawk chuan a lo ti a, an hmel hi a inan deuh avang hian ka hre hrang țhin lova, an hming pawh hi ka koh pawlh fo mai.

"Ril a tițâm raih raih alawm"

Hlim hmel deuhin a nui ve a. Ka ti tak tak, ka ril a țâm raih raih reng a ni.

Chaw kan ei dawn chuan Bawihtei chuan țawngțai a chuh leh ta tlat mai. A enkawltu 'ka pi' khan a lo enkawl țha hle a nih takzet hi.

A țawngțai zawh chuan kut kan béng dar dar a. Chaw ei dawn e ti lo chuan kan han fâwp ang nawk nawk a.

Chhun nisat țhat laiin ka bualfai a, bathtub-ah ka țhuttìr a, nuam a ti ngang mai a, hlân chhuah pawh a duh lo țép a ni.

Ka pu room-ah toys keng thlain Faktei leh Âmpuiite nen kan inkhualtelempui leh a, thingpui kan in zing khawp mai. Min sem deuh reng mai a, nuih a za duh khawp mai, ka pu réngin a hlimpui a, ka pu, khuma a mu châwl chu a han mutpui zing khawp mai a, rei phei chu a peih lo, damlo angin a sâwngbawl a, damdawi a pe peih khawp mai.

Tlaiah Rsa pawh a lo haw hma viau, kalchhuah ka la phal lo viau nain hna a ngah tawh a, a hnuaia mite a ring viau nain amah ber thawh tùr a inchhékkhawl nasa tawh a, a loh theih loh a ni.

A landan pawh a chauh hmel viau nain Bawihtei bula a awm chuan a hah hmel chu a reh vekin ka hria.

"Âpa a lo haw"

Tlân chungin a pan a, ani chuan a lo pawmkáng lawp a, an inkuah vang vang a.

"Ka lalfanu hi ka ngai tawh ania aw"

"Âpa, i kal leh hunah min hruai ve tawh la"

"Aw le, tehreng mai"

"Yesss"

"A nuam áwm bìk e, min hruai ve ula"

"Âpa, ânu hruai ve ang aw"

"A duh lovang"

Âmpuii'n tualah, pangpar pár vul chiainaah chuan a kalpui a, thla an la dun bawk a. Bawihtei chu in-pose dan hrang hrang a hrilh a, tukverh atangin ka thlir a, ka nui ka nui ringawt a, rin âiin a zei phian a.

"Mi â ang mai, mahniin i nui vur vur a"

"Bawihteite ka en a"

"An inkâwm tâwk hmel viau ka ti asin"

"Ãmpuii hian chhaih dan a thiam lutuk,  titura a tih ang angin a awm zel nia"

"Um, a țha. Nautei hi a khua a har ang tih ka hlau deuh a,naupang hi chu chhawnchhaihhi an ngai em a"

"I cháu riauin ka hria"

"Recharge ka ngâi tawh a ni ang"

"Engtin?"

"Lo kal la"

Khumah chuan a țhu a, inhera ka en chuan min lo en ve reng a.

"Min kuah la"

Mitko sán âk chuan ka pan phei a, a nghawngah chuan ka va kuah a, ani pawh chuan min lo kuah lét a.

"Nautei vang hian kan pahnih hian hun kan nei khát ta hle mai"

"Chuti em ni?"

"Ni e, zanah lah kuah ka chang ve tawh bawk si lo va"

"Hei, ka kuah che"

"Nia, ka ngâi alawm, i sam rimtui chem chem te hi hníma kuah chung chea muthilh leh ka châk tawh a ni"

"A ni maw?"

"Aw"

"Muhìl la"

"Darkar chanve vel aw"

Ka pasal hi a châu ve a nih hi. La damkawr deuhin Aizawlah kan phei a, kawng a țhat loh avangin motor chuan a hahthlak bawk si, a châu viau ang, keini damțha  lai pawhin hrehawm kan ti ania.

Khumah chuan ka mutpui leh ta nge nge a. Keimahin ka kuah lova, amah hnungchhawnin ka mu a, hnunglam atangin min rawn kuah a, ka samah chuan a hmai a phum vang vang bawk a.

"Vawiinah i pa ka hmu a"

Ka kawrah chuan a kut a rawn zen lut ruk ruk a, a thusawi ka ngaithla duh rih lo, muhil phawt rawh se.

"Shhh, muhil phawt rawh, nakinah min hrilh dawn nia"

Ka awm a rawn khawih a, mahse ka lo hnial lém lo, muthilh dawna khawih hi a tih ve dân pangngai kha ania, a lo hek lem lo bawk nen, ka dah zalén mai.

Rei lo teah a muhìl ta mai, a châu tak tak a nih dawn hi. Ka khawngaih roh, damțha tak chu ni se, a châu miah lovang.

A thusawi chu ka ngaihtuah a, vawiinah ka pa a hmu. Khawiah nge a hmuh le? Nupui a neih pawh ka la hmuhpui miah lova, khawi laiah nge an awm pawh ka hre miah lo. A dam țha em ang chu maw, a hrisel viau țhin kha a ni a, zu kha a la in reng ang em? Tuna a nupui nen chuan fa an nei leh ang em? A lo nei a nih chuan ka nau leh ka fanu chu an inrual khat vel dawn tihna a ni a, a nuihzatthlak ngawt ang.

Kei pawh ka lo muhil ve tho lo niin. Ka mumangah ka pa ka lo hmu a, a lo  chèr em em zui, mahse min lo be duh miah lo. Ka ko a, a hre lo nge, a kal liam tur chu ka ko chiam a, ka țang lutuk ko paha ka bán vai kual chuan min tiharh a, chiang lo deuhin ka harh  lehnghal a.

Ka harhchian hnuah chuan ka mumang mai a ni tih ka hre ta nghal a, khua erawh a lo tlâi tawh hle a, Rsa pawh a lo la muhil a, phone-a dar zat ka en chuan darkar chanve chu a lo pél tawh a.

Zanriah ei a hun dawn, Rsa chu ka kaitho lo mai dawn em ni ang? Mahse ka kaihthawh loh chuan a chaw ei hun a sawn vek dawn tihna a ni a, damdawi ei a ngai bawk si a, kaihthawh ngei a ngai.

A lam hawia inletin ka en vang vang phawt a, chutah a hmuiah chuan ka fawhsak zohva. A harh miah lo.

Rei deuh hlek ka fâwp leh a, chuti chung pawhin a la harh lo, a thâwk dan ngai rengin a la thaw sák sâk tho.

"Rs, tho ang, chaw ei a hun ania"

Ka țawng ring em em hran lo,a la harh chuang lo.

A hmuiah bawk chuan ka fâwp leh a, fâwp pah chuan a hmuiah chuan ka seh tel deuh zeuh a,ani pawh chu a rawn harh chiang ta khawp mai. Kan inmelh ta rân mai a.

"Inkaihthawh nan thil țha tak a ni"

"I mutui lutuk a"

"Ka la kham lo"

"Chaw ei a hun tawh, mut a hun tawh lo ania"

"Vawikhat leh chiah"

Thawh hmain kan inchuks leh vawng vawng a.

"Zaninah...."

"Eng ?"

"Nautei chhang tur"

"Hmanhmawh rih lo ila,Bawihtei hi kan la duat rih dawn lo'm ni?"

"Kan hma hun tur kan hre lo, i pãi nghal dawn tihna a ni chuang lo va, pâi nghal la chu ka duhthusam ania"

Ka nui ringawt a, nia, tùn hnâité hian ka ngaihsak tâwk lovin  nupa nun pawh kan hmang khât, a dam țha lo chho bawk nèn, a âwm ve tho.

In hnuai lama kan chhuk thlâklai chuan Bawihtei chu a ni nen, a pu nen an lo la inkhualtelem a, pu ber pawh chhuatah a lo tawlh hrut hrut mai.

"Naute, chaw ei tawh ang u hmiang"

"Âpa,lo tel ve rawh"

"Naute, chaw ei a hun tawh a, chaw ei tawh zawk ang u"

"Aw le, âni bulah ka țhu ang"

A ni Âmpuii chuan engtin tak lo on ve ang maw? A bula țhut a chuh leh ta chat mai a, an lo inbâwlkual leh nasa a ni ngei ang.

Chaw ei laia naupang té si, țawng barh barh reng hi mawi ka tih loh avangin Bawihtei pawh hi hrilh ngei a ngai. Tunah pawh a pu a be leh barh barh tawh.

"Bawihte, chaw ei laiin maw, naupang fel chu țawng miah loh tur aw, nang pawh naupang fel i ni sia, i țawng miah lo ang tiraw?"

"Ânu, mahse ka țawng sia?"

"I hriat loh vang mai mai ania. Tun ațang chuan naupang fel nih chuan midangin an bia che a nih loh chuan țawng tawh loh tur aw"

"Aw le, ânu"

A fel thlap thlap ania, ka naute hi.

A țawng leh zoh thin a, inthiam lo hmel deuhin min rawn en țhin. Mahse kei chuan ka lo nuih lo va, ka hmuiah ka kut dahin țawng miah lovin ka be zel, hetia ka tih hian  a hrethiam chho ve zel ang a, a la sim ngei ang tih ka ring tlat.

Chaw eikhamah damdawi ei tur ka pe vek hlawm a, Bawihtei chu a ni Âmpuii nen barbie hmangin an inkhualtelem leh a, ka pu room lamah. Keini nupa leh kan nula 2 te chuan TV kan en a, an programme duhzawng kan enpui a, Rsa phei chuan a en mang lo, a phone-ah games a khél daih.

Bawihteite chu ka va thlìthlâi leh zawk zawk a, mahse min ngaihtuah lo khawp mai. Barbie kawr chu ka țhuisak e an ti a, an hlim khawp mai a, min ngaihsak lem loh avang chuan ka awm rei duh lova.

Fridge hawngin apple ei tur ka la chhuak a, kan zavaia ei turin ka siam a, TV room-ah chuan ka keng phei nghal a.

Rsa chuan a lo ban nghal vat a, nui sukin games chu a khelh chhunzawm leh nghal char char a.

Bawihteite pawhin an duh ka rin avangin ka va pe ve a, ka pu chuan a lo ei a, Bawihtei phei chuan a lo ngaihsak lo phian, barbie hlìr mai a lo la buaipui.

Ka chhuah dawn chuan," Ânu, âni bulah ka mu ve dawn aw"tiin min dìl a.

"Bawihte, i mu thei dawn em ni? Ka ngai âwm che e"

"Ânu, aw...ka mu ve ang aw, zìngah âpa nen in bulah ka lo mu leh ang"

"Aw le, âni chu i dil tawh em?"

"Aw, a phal a"

"Aw le, zanah lunglèn awih loh aw"

"Aw le"

"Men rei lutuk loh tur aw, Bawihte, i la dam chian loh em kha"

"Aw le, ânu"

TV room-a ka kal leh chuan Rsa chu a lo awm tawh lo va, room lamah a chho a ni ang, kan nulate chuan an lo la en reng a.

Kei pawh room-ah chuan ka chho ta nghal a. Khumah țhu mu deuhin TV chu a lo thlìr a. News a lo thlir a.

"Bawihtei chu a nî bulah a mu dawn a nih âwm chu"

"Ngati maw?"

"Ka hre bìk lo, tunah pawh an la inkhualtelem a"

"A mu thei dawn ami le?"

"Mu thei ang, mahse ngaihven deuh chu a ngai maithei a ni"

"Ka zu hmu lawk aw"

"Kei pawh ka lo chhuk leh mai teh ang"

Kan chhuk leh a, kan pahniha min lo hmuh chuan "Âpa, in lo tel ve dawn ami?"a lo ti vat a.

"Naute, âni bulah i mu dawn maw?"

"Aw"

"I mu thei tak tak dawn ami, Bawihte?"

"Aw, âpu bulah hian kan mu ve dawn a"

"Zanin chauh aw, chuti lo chu ka muhil thei lovang"

"Aw le, âpa"

"Nih leh, Naute, mangtha muttui aw"

Kun hniamin a chalah chuan a fawp vang vang a, ani pawh chuan a lo kuah let ve a.

"Mangtha aw, Bawihte"

"Nang pawh le, Ânu"

Ka kuah hnuah chuan kan chhuahsan ta a. Room-ah kan chho a, Bawihtei toothbrush leh mut kawr chu ka kengthla leh a, ka zu kuah leh phawt a, ka chho leh ta a.

Ani pawh chu mu thei mai turin a lo inbuatsaih tawh a, kei pawh bathroom-ah ka lut ve nghal a.

Khumah chuan kei pawhin games ka khel ve a, word cookies a ni a, ka bei ngawrh khawp mai.

Min rawn kuah a, ka games khelh chu min rawn enpui ve a. Ka thiam loh laite leh ka harsat laite chu min hrilh a.

A hnu deuhah chuan "Mu tawh ang, dah tawh teh" a ti ta thláwt a.

"I mut a chhuak tawh elo?"

"Chhuak nang, tlâiah ka mut kha"

"Chuti si?"

"Exer lâk a ngai"

"Haha, tak tak?"

Min bawhbeh pah chuan," Tak tak e, Nautei chhang tur siama exer lâk a ngai alawm" a ti a, ka țawng tur chu a hmuiin min rawn chhilh ta a.

Ka chhâng lét rang khawp mai. A duh ka hria a, pék ngei ka tum. Nupa kan ni a, kan inkarah hian thil tih thiang lo a awm tawh lo va, han zah leh han insùmna tur pawh a awm tawh lova, ka pasal  tan chuan khum laizawlah kher hi chuan nawhchizuar ang maia khawsak pawh ka hnial miah hleinem.

Kan thawmhnaw hâkte pawh chuan awmzia a nei lo, pawimawhna leh țangkaina an nei ta lo khawp mai, an hnawksak zawk.

Damlai pár chèna khuma hun kan hman hnuah chuan cháu deuhin a awmah chuan ka bei tlân a. Ani pawh chuan ka chala fáwp zohin,"I mut a chhuak tawh em?"a ti sup a.

"Chhuak chiah lo, ka cháu"

A nui hak phawt a, chutah"I pa chungchang chu sawi ila"a ti ta a.

"Eng nge ni ta?"

"A dam țha lova"

Ka mumang ka hrechhuak nghal zawk mai, mang nung a ni chiang.

"A eng nge na a?"

"A pum lam a ni awm e, a inentir dawn chiah a"

"A damțhat ka ring asin le"

"I hman hunah tlawh ve ila"

"An awmna ka hre lo"

"Ka hria alawm, Nautei kan hruai tel ang a, a lo lâwm viau ang"

(Buai chung chungin ka ziak ve a, net ka nei ta miah lo mai a, hrehawm ka ti viau a ni. Mahse la fuh vang reng a ni si lova, net ka neih velehah ka lo post nghal e aw, min hrethiam hram ru)




RUATSANGA - 36 By Dingdi Pachuau

Zanah ka zun chhuakin min tiharh a, toilet-a ka kal hnuah in hnuai lamah thâwm dîm deuhin ka chhuk thla a, ka pu room chu dîm téa hawngin ka bih de de a.

Âmpuii khum leh ka pu khum chu an lo dawhzawm niin, ka pén lut a, dìm light an chhit ațang chuan Bawihtei chu a lâiah a mu tih ka hmu thei a. A thil sin lah a lo tlawh hlím deuh vek niin, a muttui hmel khawp lehnghal a.

Midang dek lovin Bawihtei chu puan ka sin ţhattîr a, ka thlir leh vang vang hnuah ka pu room chu dìm thei ang berin ka chhuahsan leh ta a.

In chunga ka chhoh chuan Rsa pawh a lo harh ve niin.

"Ka tiharh che elo?"

Meng suar suar pah chuan," Ni lo vang, ka harh ve tawp zawk a ni ang" a lo ti a, a mi chhánna chuan ka nuih a tiza angreng.

"Bawihtei ka zu en lawk a, ka pu leh Âmpuii inkârah a lo mu a"

"Lo mu teh, a vâwt ania"

Ka va awih lo tak.

"Tak tak?"

"I mut loh chuan khum a ruak"

Ka inthawlh ve leh nghal tho a, min lo kuah vat a.

"Vãwt i ti tak tak em?"

"Aw"

"Sin tur ka lâkbelh dawn em ni ang?"

"A ngai lo, i awm alawm"

Taksa a indeh hian lumna inpe tawnin a insiam rang bìk a, chuvang chuan kei pawh chuan ka kuah lét ve chial a.

"Um,i va rimtui tak"

"Ka lawm e"

"I rim ka hriat loh hi chuan ka lung a lèng deuh tlat zel tawh"

"Tak tak?"

"Aw"

"Kei pawh"

"Eng?"

"Ka bula i awm loh chuan ka kim lo tlat tawh"

"Ka tih i thìk"

"Teuh lo"

"Nautei kan kawl hnu ațang phei hi chuan ...min hrechang tawh lo"

"I fanu kher chu thìk lo la?"

"Mahse..?"

"Ummm, ka ngaihsak tâwk lo che tih ka hria. Mahse, nang chu ka pasal alawm i nih"

"Nang pawh ka nupui i ni"

"Nupa kan ni"

"Nia"

Ka nuih a za lutuk, a hnungah chuan ka beng thep thep a.

"Mipa naupang thìkthu chhe deuh i ang"

"Mipa naupang ber kher"

"Nih leh, pasal thìkthu chhe deuh"

"I kawr hi?"

"Tinge a?"

"A hnawk"

Sawisel tur zawng hrim hrim a ang ka ti.

"Chuti, ka hlìp nghal" Ka hlìp sawk sawk a, a fanu ka ngaihsak avangin a thìk a, sawichhuah dan vak a hre si lo, sawisel tur zawn lamah a ramțang ni berin ka hria.

"Ka pasal ka ngaihsakzia ka'n lantir ang e"

Mipa hi chu a langah hian pâ viauin rorum viau ţhin mahse a rúk chuan ngaihsak leh duat hi nuam an tiin an thlahlel ve ngawih ngawih tho. Hmeichhia angin tilang ve țhin lo mahse mihring pangngai an ni ve tho a, pâ lo dawn riaua an hriat avangin an phùt lang ngam lo țhin ni berin ka hria.

Nupa kan nih miau avangin hmeichhia zawk ni mah ila chét lâk hmasak ka zak lém lo.

Ka pasal hi ka hmangaih a,ani aia hmangaih hi ka nei lo. Rethei leh mi ina awm mai mai pawh duh takin nupuiah min nei mai a, ka dinhmun ațangin min teh miah lo. Anni ang, mi hausa leh duh duh nei thei hian kei min han nei ve duh mauh mai ania, chutah min ngaihsakin min la duat em em zui. Kei anga mi vannei hi chu kan tam lo khawp ang. Fanu fel leh hmeltha lutuk mai kan nei tawh bawk si a, ka duhthusâm ramah ka chéng ni berin ka inhria. Hmangaih thu min la hrilh lo erawh hi chu ka hrechhuak leh țhin, min han hrilh phei se chuan...

Mi sihhnip ber angin a bulah chuan ka che vél a, mak a ti viau maithei. Mahse, ani, ka pasal bulah lo tu bulah nge  hetiangin ka awm tehlul ang le? Tu bulah mah hetiang hian ka awm dawn dér lo.

A nuamti rùm hawk hawk thawm ka hriat chuan ka ngaih a țha takzet. Ka pasal hian ka hmangaih a, ka ngaihsakin hlimna vawrtawp siamsak ka duh tih hi a hre lovang tih ka hlau asin.

Duat takin min kuah a, min fawh vawng vawngna chuan a lung a awi takzet tih min hriattir a, kei pawh ka lawm, ka pasal tilungàwiin a hlimna tâwp ka siamsak si a.

Zingah chuan kan la thawh hmain Bawihtei chu a rawn chho tak tak a,  kawngka a rawn kik karh karh a.

Ruak veka mu kan nih avangin kawr ha turin ka tho vat a, Rsa pawh chu a boxer chu ka pe vat bawk a.

Ka inhâk fel hnuah chauh kawngka chu ka va hawng a. Ani pawh a tho hlim chauh a nih ka ring, a samte chu a la kâwi niaih a.

Chhunah Rsa chu a rawn haw a, a rawn haw hmain min rawn phone a, a lo thlen chuan chhuak mai thei turin kan lo inpeih vek tawh a, Bawihtei lah chu a phùr khawp mai a, a hlim chu a tlânkual reng mai a.

Âmpuii a lo kal tel ve bawk a, Lunglei khawpui kan fang a ni ringawt mai. Restaurant, a hmaa kan chawlhna bawkah khan min chawlhpui leh a, kan ril a țâm hlawm bawk nen, an siam tui bawk a, kan ei țeuh mai.

Bawihtei chuan nuam a ti khawp mai. Motor atanga chhuk a ngén deuh reng mai a, kein kan kal thùl, bazarah kan kal a, Bawihtei chuan thil a ngen ka ring ania, a ngén hauh lo nia.

Mahse a pa chuan a ni nena inanga an bun tur slipper a leisak ve ve a, an pheikhawk bun lai hlìpin an bun dùn a, Ãmpuii chuan  a phone phawrhin an han selfie dun lehpek a, Bawihtei chuan nuam a ti hle mai.

Bazara ațanga kan haw tur, car-a kan luh dawn chuan Mama ang deuh ka hmu tlatin  ka hria. En chiang tur chuan kan piah dâwra  luh a ngai si a, midang lah car-ah an lut tawh si.

A ni ngei ngei ang, a lu a kâwng ta deuh e tih a ni mai, a hmel pianhmang kha ka haiin ka ring lo. Lungleiah hian a awm ve ta reng tihna em ni ang?

"Eng nge i ngaihtuah le?"

Mama ka lo ngaihtuah char char tih ka hriat chuan ka inthiam lo hnuhnawh hle a, nui lui sakin," Engmah ni love, ka ngaihtuahna ka lo kâwm nasa deuh a ni ang" ka ti vat a.

In kan thlen chuan a slipper neih thar chu Bawihtei chuan a pu chu a hmuh vat a, a pu lah chuan a lo fakpui hlut a.

"A va han mawi em em ve!! I inhmeh bawk si, Nùhlupi'n a la ang che tih a hlauhawm a nih kha"

"Ânì pawhin a nei ve,âpain min lei ve ve a"

"A ni maw? In va mawi dun dawn ve, ka bun ve i phal ang em?"

"Âpu chu i ke a lian sia, i bun tâwk lo ang. Âpa a dang leitir ila"

"Min dilsak la?"

"Aw"

Room lamah ka chhohsan a, Rsa erawh chu a office-ah a lut nghal thung a.

Bathroom-ah ka lut nghal a, ka taksa a ban deuh hlek a, intleuh zawk ka duh.

Ka intleuh lai chuan Mama ka ngaihtuah chhuak a. E, Lily'n a hria ang, zawt chhin ila a țha ang. Ka ngaihzawng țhin ni mahse a lakah feelings ka la nei pawh a ni chuang lova, zawh mai maite chu a sualna ka hre hran lo.

Ka hman veleh Lily chu ka text a, Mama chanchin a hriat leh hriat loh chu ka zawt a.

A lo hre bìk miah lo. A chhan chu Aizawl lama B.Ed a training hnu khan Aizawl lamah a khawsa chhunzawm daih a. Keiin ka phatsan ta bawk nen, Lunglei lama rawn lét leh kha a duh tawh lo a ni. Mahse vawiina ka hmuh kha chu a ni chiang alawm.

Zanah chuan min rawn text a, a u hnenah a lo zawtchiang a, Mama chu a lo phei ngei a nih chu.

Nupui a la nei lo tih ka hriat chuan mak ka ti kher mai, ka phatsan hnu khan hmeichhia reng reng lakah a inkharkhip tlat a, high school-ah Headmaster-in a lo awm tawh zui, chu pawh Lungleiah ngei mai hian.

Nupui neih loh ringawt chu mipa tan chuan a fuh lo asin le, mahse a la naupang tho alawm, kum 30 bawr vel a ni ang a, nakinah chuan a la nei ve mai ang chu maw.

Hun a kal duak duakin ka hria.Ka pa pawh kan kan tawh, a lo chèr tawh hle a, zu erawh a lo nghei tawh. Ka lawmpui viau, an in té reuh te ka hmuh chuan ka khawngaih viau. A nupui leh a nupui fa bìk mipa nen an lo awmho a, Rsa chuan pawisate chu a pe ve a, a pum lam pawh a lo dam viau tawh a, hna hrâm erawh a la thawk rih lo, an nu chuan chawhmeh a zuar kual țhin a, vhu chu an inghahna a ni rih. Ka pa chuan Bawihtei chu a lâwm viau mai, ani pawhin naupang fel tih takah a nél nghal mai. Kan hawsan dawn chuan pawn thlenga min thlahin Bawihtei chu leng leh turin a sáwm ve hial.

Âmpuii pawh a haw a lo hun dawn ta. A haw peih lo lutuk chu ka nuih a za zawk, Rsa lah chuan chelh rih a tum loh hmel bawk si a, ka khawngaih reuh lutuk ringawt.

Zanah Bawihtei leh a pu nen an mu leh a, A haw hnái tawh avangin Bawihtei riahpui chu min dìl a ni.

Mut hmunah chuan Rsa bulah chuan sawipuiin Âmpuii chu hetah Lungleiah Diet emaw pawh training ve mai se tiin ka sawi a.

"A chhungte'n an remti lovang"

'Ka pate' a ti duh miah lo. A pa chunga a rilru hi a la ngai reng tihna.

"Sawi ta ila, an phal mai lovang maw? I pa dìl ta ila?"

"Ka be dawn lo"

"Âmpuii hi ka khawngaih alawm"

"Ka khawngaih ve tho"

Nui chung hian a sam chu ka tuaisak a.

"Naupang luhlul tak hi chu aw"

"Min biakpawh hmasak hma chu ka be dawn lo"

"Kei chu i thu awihin ka pa pawh ka kan tawh ania"

"Kan inang miah lo"

"Dik leh bawk si"

Ka pu ka bia a, ka pa (Rsa pa) chu Âmpuii tana sawisak turin. Ka pu leh Rsa pa hi an in-contact reng tho va, Âmpuii a awm loh chuan Bawihtei khawhar tur hi ka khawngaih a, Âmpuii pawh ka khawngaih bawk.

Rsa chu engmah ka hrilh lo. Mahse ka pu lamah ka țuan thung, an pafa inkâr hi țha se ka duh, a chhan chu  chhungkua a nei lo lutuk, tunah Âmpuii a lo lang ta a,ani hi chuan a rawn pawh em em. Rsa pawhin a ngaina ve reng, mahse hnaih viau a duh lo, a chhan chu a pa nena inhnimhnaih a duh lo.

Ka pu chuan a lo be ngei a, a pa chuan a phal lutuk lo nain ka puin a tilui ve tlat. Ka pu thu chu a hnial ngam bìk lo, Âmpuii hi college kal lai a ni a, a peih lo chung a pain a tilui, ani erawh chuan eng emaw training a duh a, DIET-ah training daih se, a țha viau ang.

Zanriah ei laiin ka puin Âmpuii chu thu lawmawm chu a hrilh a, kan au nasa mai. Bawihtei nen chuan an inpawm a, Rsa erawh a nui suk duh chauh.

Mahse,a rang thei ang bera a haw rih a ngai tho. Documents pawimawh han lâk a ngai a, ka pu erawh chuan lo hnialin,"I pate chuan an rawn thawn thei reng alawm. Ngawi tak rawh, ka'n hrilh ang e, driver fel leh rintlâk, hmelhriat nghet deuh tak thawn tur rawn ngaihtuah rawh se" a ti tlat a, kei pawhin ka pawm viau mai.

Tlai khat chu Lily te in lamah kan nufa leh Âmpuii nen kan léng a, Rsa a lo haw tlái deuh dawn avangin kan hmanhmawh vak lova.  Lily'n ei tur a siam hnuhnawh bawk nen, ei lo chuan haw a phal lova. Chutah, a laptop-ah Moana, Bawihtei tan a hmehchhuahsak bawk a, a hlim kher mai.

Doorbell a rawn ri  a, Lily'n ei tur a siam avangin keiin ka lo chháwn a, kawngkaa Mama nen kan inhmachhawn tákah chuan țawng lovin kan inen reng ringawt a, tum loh deuha inhmu ve ve kan nih hmel bawk a, makti deuh hmelin kan inmelh tlawk tlawk a.

Choka atanga Lily'n," Tunge ni? Dìte, lo kâwm rih mai rawh aw"a rawn tih tâk lang langah chuan ka inngaihtuah harh ta chauh a.

Nui chungin," Lo lut rawh, i dam maw? Inhmuhna a rei ta hle mai" ka ti a, hlim takin ka bia a.

A mit lasawn chuang lo chuan a nui lui sak a. A mitmengah erawh chuan a nuih a za lo tih ka hre thei a, hrehawm ka ti ru țùng mai.

"Sam-a a awm ka ring a"

Ka zawhna a chhán loh dan atang chuan ka zawhna kha a hre miah lo tih ka hria. A ngaihtuahna a vak kual nasa hle tih ka ring mai ni lovin ka hre nghal a.

"A awm lova, Lily chiah a awm. I dam țha maw?"

"Aw, dam țha e. Nang pawh i dam țha a ni ang, i thau ta deuh tlat mai"

"Nia, ka thau ve tawh alawm. Fanu ka nei asin, i la hmu miah lo tiraw?"

"Hmu tawh e"

"Khawiah maw?!!!" Mak ka ti kher mai.

"Bazarah khan"

Min lo hmu reng a nih chu.

"A duhawm asin"

"Nia, a hmeltha khawp mai, ka lawmpui khawp mai che"

"Ka lawm e"

Kan ngawi leh rán a, chutah, sitting room-a Bawihtei, laptop-a film en chuan min rawn ko ta a.

"Ânu, ka zun a chhuak"

"Aw, Bawihte, lo kal la"

A rawn kal chu Mama a hmuh chuan a táwi deuh hrat a.

"Bawihte, lo kal teh le, hei hi a pa Mama ania, ânu țhianpa a nih hi, chibai la"

"Chibai le, âpa Mam"

"Chibai le, Bawihte. I fel hle mai, i hmelțha si"

"Ânì ka chhùn a"

Leh ringawt hian. A nì nen an lo inchhun reng em ni? Tu hrilh nge ni ang? A nì a ni maithei, anni hi an inhnìmhnái a.

"Ânì chu a hmelțha viau a ni maw?"

"Aw, a hmelțha. Âpa pawh,ânu pawh"

A chhânna avang chuan kan nui chhuak ve ve a. Bawihtei chu kâiin bathroom awmna lamah ka hruai lut ta nghal a.

Kan chhuah chuan Mama pawh a lo țhu fel diam tawh a, Bawihtei nen chuan min lo thlék ngun hle a, min tilâi țép.

"I fanu chuan a chhùn hle mai che"

"Chuti mi? A pa a chhùn zawk ka lo ti asin"

"A chhùn che ka ti tho"

"E, Mama , i lo kal elo? I va reh ve, min tlawh duh lo lutuk a, i  awm ta lo emaw ka ti alawm" Lily chuan a eisiam, tray-a rawn châwi chungin a rawn ti hlut a. A hnungah chuan Âmpuii chuan fian leh bowl te kengin a rawn zui bawk a.



RUATSANGA - 37  By  Dingdi Pachuau

(Current neih loh vangin ka rawn update thei lo. Zanin chu hei ka rawn tithei ta hrâm e)

Mama chuan,"Rawn surprise che u ka tum a" a ti a, Lily chuan a bowl ken chu side table-a dah pah chuan," Hna nghet i thawh hnu hian i rawn lang duh lo riau, i induh e" a ti leh barh barh a. Kei erawh ka lo ngawi reng thung a, Âmpuii lah chu lâi deuh hian dingin bowl te leh fian chu a la keng reng a.

Lily chuan bowl te chu laksakin," Leng ve reng rawh aw, i lokal khát si. Dìtei pawh i hmuh khát em hi"a ti leh a, bowl liana eitur a siam chu bowl te-ah chuan a suak dan dan a, Âmpuii chuan a lo pui ve bawk a.

"Nia, hei nu nih pawh a ngeih khawp mai ka ti"

"A chhe lo sawt tiraw?"

"Nia"

"In ho em mai, ei mai mai teh u" nuam ka ti fahran lo.

Pasta a lo siam niin, a siam tui reuh kher mai.

"A tui hle mai"

"Ânu, hei hi eng nge ni?"

"Bawihte, Pasta a nih hi, a tui i ti em?"

"Aw,tui lutuk"

"Ânu Lily chuan a siam tui thiam tiraw?"

"Aw, ânu, i siam thiam ve em?"

Nui chungin," Bawihte, ka thiam ve maithei, ânu Lily siam ang ém chuan ka thiam tui kher lo maithei bawk a" ka ti a, Lily chuan," Bawihte, i nu i siamtir ve ngei ngei dawn nia, a har lo lutuk"a lo ti a.

"A siamdan min hrilh ve ang a"

"Mama, ei teuh rawh aw. I lo léng khát si"

"I u a awm ka ring deuh asin le"

"YMA OB an inhmukhawm ni ta in ka hria"

"Eu, va changsang sâwt ve a"

"I sual em mai a"

Tui ti takin Pasta chu ka ei a, Bawihtei pawhin a ei ve tân tân a, Âmpuii ka va en phei a, muangchangin a bowl ami chu a ei ve hlek hlek a, hawi erawh a hawi chhuak miah lo.

Lily chu a țawng barh barh reng a, Mama pawh a țawng zoh zoh. Nuam ka ti tehchiam lova, Mama'n min en châng phei chuan nuam ka ti lo lehzual.

Kan haw har lo. Mama'n a car-a chuang ve tura min sâwm phei chuan hnial ka hreh viau nain Rsa bulah ka inthiam thei dawn lova, chuvangin ka hnial ta hrâm a, hrehawm erawh ka ti. Mama rilru na hmel ka hmuh phei chuan hrehawm ka ti ngawih ngawih.

In kan thlen chuan Rsa pawh a lo thleng tawh a, a thlenna erawh a la rei lo. Room-ah a thawmhnaw a lo thlâk vel mek a, ka han hmuh chuan," Khawnge in lén a? Ka lo hawihâi țêp a ni" a lo ti vat a.

"Lily-te inah mawle"

"A reh lutuk a"

"Nia, duh aiin kan rei ta deuh a. I châu em?"

"Châu lo ve, ka bulah i awm tawh alawm"

Lawmthu sawi nan a hmuiah ka chuks zoh va. Ani duhkhawp lo chuan min chelhbet a, na fé hian ka hmui chu min seh-fawhsak ngâwng ngâwng a.

"A thî ang a"

"Ka tidam thiam"

"Ti ve ziah" ka hmui darthlalanga en pah chuan ka ti a, thî phei chu a thî lo va, mahse a thî țépin ka ring.

Hlim taka hun ka hman vang nge maw ni, hun hi a kal chak riauin ka hria. Âmpuii kan hnenah awmin DIET-a training a tum a, karleh lawkah an written test an nei ang. Bawihtei pawh a beng zai a hun tawh avangin a pa nen Aizawl lamah kan phei a, Hotel-ah kan thleng leh a, mahse Rsa thianten chaw eiah min sawm neuh neuh reng avangin hotel chu riah nan kan hmang a ni deuh mai.

Aizawlah hian kan awm rei angreng a, Âmpuii, ina a awm tho avangin in lam chu kan ngaihtuah lutuk lo. Rsa chuan a rùkin rem a lo ruat a, ka hriat miah lohin.  Bawihteite nen restaurant-a kan chawlh laiin, thutak deuh hian," Surprise-na tur che ka nei ania" a ti a.

En hâ pah hian," Ni maw? Ka va hre châk tawh, ei tur a ni em?"ka lo ti hmanhmawh a, ei tur bâk ka rilruah a awm lo reng reng, ka ril a țâm tawh lutuk a.

"Ni lo, ka rawn la ang" tih pahin a țhutna ațanga thoin a chhuak ta daih a.

Eng tak chu ni ang maw? Ani hi scooty min leisak nge ni ang a, car zawk ni ang? Ka khalh thiam lo ve ve bawk sia, a va țangkai tampui awm lo ve aw.

Nge ni a, kan chhungkuaa hãk tur thawmhnaw inang vek a lo lei zawk ni ang? Hmm, a cute dawn lutuk, idea țha tak a ni. Bawihtei nena kan thawmhnaw hâk ang a han ha ve tur ka han mitthla chuan  ka nui sak a.

Bawihtei'n "Âpa?"a tihchhuah hliaiah chuan nui deuh sângin ka hawichhuak a, mahse ka rin loh lutuk ka hmuh tâkah chuan ka nui hmél chu a reh riai riai a.

"Surprise"

Ka nu leh Rsa ding dun chu ka en reng a. Ka nu nen chuan kan inmelh ta rân mai.

A lo upa hmel ve ta, a vun ngo chu al chul lo hle a, mahse a samte chu a lo tâwi tàin amah pawh a lo thâu ve deuhin ka hria. A mitmenga min hmangaihna nasa tak lang chhuak chu ka chhiar thei nghal. Lo lang upa deuh tawh mahse ka nu ngei kha a ni tih ka hre thei nghal mai a.

"Ka nu?"

"Bawihte?"

Kan țawng rual chiah a, ka ding  a, ka nu chu ka kuah lo thei lo. Huatna ka lo neih ve deuhte pawh kha ka nu hmel ka hmuh chuan vawmbo ang duak an ni.

Kei zawng ka țahbelh bawk nen, ka mittui a rawn luang lehnghal mai a, ka nu ka hmu ka lâwm bawk si, lungchhe bawk si chu ka insùm thei lo a ni.

"Ânu, min pawm ve"

Bawihtei awri ka hriat tâkah chuan ka nu chu ka thlah a, ka mittui hru hulin Bawihtei chu ka pawm a.

"Ânu, i țap ami?"

Nui lui sakin," Țap lo ve, Bawihte. Ka mitah bawlhhlawh a lùt a" ka ti leh zaih a. Ka nu chu kawhhmuhin," Chuan, hei hi âpi a nih hi. Chibai rawh le" ka ti a.

"Chibai le, ãpi"

"Chibai le, naute. I hmelțha hle mai, i fel si"

"Ãni ka chhùn a, ãpa pawh, ânu pawh"

Kan nui ta vek, Kan boruak chu Bawihtei chuan a rawn tizangkhai viau mai. A hnu lamah phei chuan kan titi laiin a lo zái leh kawkalh bawk a, kan hlimpui phian.

Ka nu chuan a inluaha chaw ei turin min sâwm a, Rsa chu ka han râwn a, ani pawh chuan țha a lo ti khawp mai.

Chawhmeh leiin kan bazar a, ka nu chuan a ngaih loh thu a sawi nain kan tilui ve tlat a.

Ka nu in luahna chu Laipuitlangah niin, a in chu té fel deuh hi a lo ni a, a zâu lo va, mahnia awm tân chuan a tâwk khawp mai.

Rsa chuan ei rawng ka bâwl min pui a, ka nuin Bawihtei a lo awmpui a, an inbe bawrh bawrh mai.

"Ka lawm tak tak a ni"

"Engah chuan maw?"

"Ka nu min hmuhtír hi mawle"

"A nuam ka ti"

"Eng chu?"

"I hlim hmel hmuh hi"

"Nangmah vang chauh. Lawmthu sawi ngaihna pawh ka hre lo"

"Ka hria alawm, nakin zânah le"

Zanriah kan kíl chu kan tlêm nain kan hlim khawp mai. Bawihtei'n țawngțaina hun a hmang leh thlap mai a,puitling zawkte hian kan tluk lo țhin ania.

Thlã kan la âwl lo va, Bawihtei lah a in-pose nasa thei khawp. A ni Âmpuii tihpui dan țhin ania, ka sawisel ngai lo, ka lâwm em em zawk.

Zan dár 8 velah hotel-ah kan lét chauh, Bawihtei pawh a muhil tawh. Naktukah lamah Lungleia phei tawh mai kan tum sia, tlâi deuh taka haw ringawt chi pawh a ni lo.

Mut hmunah chuan," Lawmthu i sawina tur kha ka la hrereng ania" a ti sup a.

"Bawihtei a harh palh ang"

"Tihdan ka thiam"

A lo thiam tak tak!!!

Ka pasal hi chuan thiam loh pawh a lo nei lo a nih hi, ka lungawina famkim hi chu a ni takzet a ni.

Lunglei lam pana kan chhuah chuan zing dar 9 a ni a, chak taka kan tlân dawn loh avanga chhuak hma kan ni. Kawng lakah thlai tharlam leh thei awm chu kan lei pah zel a, Bawihtei pawh a rúi lo. Ka pawm a, a pain car tape-ah Moana soundtrack  a play a, kan zâipui nasa mai.

Haulawng kan thlen dawnah erawh ruah a rawn sur a, boruak chu a tidái viau. Mahse kan tlânna tur kawng ka ngaihtuahin ka huphurh viau thung.

Haulawng leh Dawn inkár tlân chu ka huphurh, kawng a té si, a țha bawk si lo. Motor lian tawh ka huphurh bawk, thinthì diaiin ka chuang thei lo.

Dawn kan thlen chuan ka thaw a veng ta deuh a, Bawihtei pawh a muhil bâm mai. Zobawk kan thlenin Âmpuii ka phone a, kan thlen chin chu ka hrilh pah a, Bawihtei a be châk viau nain a muhil si a, ka kâitho duh ta lo mai.

In kan thlen chuan Bawihtei pawh a harh leh tawh. A nî nena an inhmu chu an țé leh rawi rawi a, an hlim hmel hmuh chu nuam ka ti.

Zîngah ka tho nuam fahran lo, ka khua a sik deuhin ka hria. Rsate pafa chu an tho tawh a, ka chauh deuh an rin avangin min kâitho duh lo a nih ka ring.

Bathroom-a ka intihfâi hnu chuan in hnuaiah muangchângin ka chhuk a, midang chu an lo tho vek tawh.

"Ânu, morning"

Gym room ațangin an rawn chhuak a nih hmel. Bawihtei chuan min rawn pan vat a, Rsa erawh chuan bottle a keng a, a bek velah chuan thlan a luang zaih a, a thlan a lo titla nasa tawh a nih hi.

"Morning, Bawihte. Exer i la ve elo?"

"Aw, âpa nen. A hnungah min chuantír a"

"A ni maw? A nuam em? Ka chuang ve châk asin"

"A nuam lutuk, âpain kaihthawh che a phal lo va"

"Nidangah chuan min kâitho ve ang a, âpa hnungah kan chuang dun ang a tiraw?"

"Ânu, note ka duh"

"Eng note maw, Bawihte?"

"Note, puak tur leh Ka infiampui tur"

"Naute maw?"

"Aw.  Ânu, nei tawh la?"

Rsa ka va melh a, ani erawh chuan min rawn melh duh miah lo. A fanu hi a lo fuihpawrh chiang mai.

"Bawihte, naute kan neihte chuan ka duat thei lovang che, ka bulah pawh i mu thei tawh nâng"

"Ãpain min duat mai ang, chuan note chu ka duat viau ang"

"Aw le,ih maw, Pathian hnenah i țawngțai ang a, i dil dawn nia aw"

"'Note min pe rawh' ka ti dawn ami?"

"Aw, 'Lalpa, naute hmelțha deuh min pe rawh' ti la"

"Aw, âpa ang ka duh"

"Mipa maw?"

"Aw"

"I țawngțainaah i dil dawn nia aw"

"Aw le"

Choka lamah muangchângin ka lùt a, a lo hmui ram ram mai. Ka thawk a ti -ipik tlat. A rim chuan  ka pumchhung a fan a, ka kawchhung chu a inlet but but mai. Ka chil a rawn haw zawih zawih a, choka bul toilet-ah ka tlan lut rawk a, ka uak tuar tuar mai. Engmah phei chu ka luak chhuak lem hlei lo va.

Kan nula pakhat zawk chuan ngaihțha lo fe hian min rawn zui lut niin.

"Ka pi, i damțha lo ami?"

"Dam țha e, ka luak a rawn chhuak thut a"

"Thil eisual i nei a ni lo maw?"

"Engmah ka la ei lo. Ka khua hi a sik deuh chuan ka hria"

Hnár hupin ka chhuak a, thil kan hmui rim huam chu hìp leh ka duh tawh lo.

Room-a ka chhoh chuan bathroom-ah thâwm ka hria a, Rsa a intleuh zawk a nih dawn hi.

Ka pang ka dek a, a lum deuh chuan ka hria. Damdawi ka hmawm ang a, ka zia mai ang chu. Mahse mut leh deuh vang vang ka duh.

Damdawi ka hmuh mai loh avangin mu Rsa lo chhuah ka nghak a, rei lo te chauh ka nghak. A lo chhuakin min hmuh chuan," Tinge i damlo ami? Nge i țap zawk? I țha em?"a rawn ti vat a.

"Ka țha, tlém téin ka khua a sik deuhin ka hria"

"Damdawi i ei em?"

"La ei lo, a lo awm tawh lo va"

"Lo mu rih rawh aw, ka lo lâk ang che, i motor chuang i châu a ni ang"

Thawmhnaw a inbel sawk sawk a, in hnuai lamah a tlânthla a, kei pawh chu muangchângin khumah chuan ka mu leh daih a.

Rsa a rawn chhoh meuh chuan ka lo muhìl leh țêp tawh zawk. Ka khawsik ser ser chuan min tizawi a, ka châu nghulh bawk.

"D, i râi a ni thei ang em?"

Mit khap sak sakin ka en chho a, a hmela beiseina lo lang chu ka hmuhin kei pawh râi ila ka ti.

"Ka hre lo"

Ka period hnuhnun ber ka ngaihtuah lét a, ka chhùtin period ka hun tawh, tun thla ka la period lo. Chuti a nih chuan ka râi leh a ni thei mai lo maw? Tukina ka awmdan ațangte khan.

"D, i râi tiraw?"

"Ka la chiang bìk lo, test kit chu kawl ila chuan..."

Ka chala rawn fâwp zohin," Ka'n lei ang e aw" tiin a tlânchhuak leh ta nghal a.

Râi tak tak ila ka ti kher mai. Rsa'n fa dang a duh tawh mai bâkah Bawihtei pawhin tukinah naute min dìl kha ania, dik se ka ti.

A rawn lét rang khawp mai. Pregnancy test kit a rawn lei pakhat chu lain  bathroom-ah ka lut a, ani pawh chu lo luh ve a tum viau a, mahse ka phal loh avangin kawngka bulah a ding a.

Rei a rial thei lo.

"A lang tawh em?"a rawn ti chhén a, ka en lawk ngam lo. A beiseina ka tichhia ang tih ka hlau a, mahse a sena  pahnih inrîn ka hmuh chuan ka thaw huai a.

"D, i va rei tawh"

Naupang chhe thil nghakhlel nen an inang chiah. A va lâwm dawn em!

Kawngka chu hawngin kit chu ka pe a, ngun deuhin a en a, chutah," I râi tihna tiraw?"beisei deuh hian a ti a.

"Aw"

Min rawn pawm kâng lawp mai. Min virpui leh ta, ka lu a tihai lutuk.

"Ka va lawm tak em!!! Fa kan nei leh dawn ta"

Min dinpui hnuah pawh ka meng ngam hleinem. Ka lu a hai lutuk a, min pawm ang ang chuan ka awm tawp.

"D, ka tihpalh, ka hlim lutuk a"

Khumah duat zetin min mut a, puan min sintír a, ka bulah rawn inthawlhin," Vawiin chu ka chhuak peih lo, naute thar tur lawm nan châwl teh ang"a ti sup sup a.

"Mahse kan la chiang lo e"

"I nawm deuh hlek hunah chian turin kan chhuak dawn nia, mu hahdam phawt la"

"Bawihtei khawnge?"

"A ní nen an awm, a ngaihtuahawm loh, rilru hahdam deuhin mu phawt mai teh"

Dîm deuhin min rawn kuah a, kei pawh chuan ka lo hnaih ve sat sat a, ka pasal bulah hi chuan ka thla hi a muangin ka hahdam siai siai țhin.




RUATSANGA - 38 By Dingdi Pachuau

(Current vang bawk. Net signal chu thuhran,  ka zak zozai tawh e. Mahse, ka duh thu a ni bík si lo, hrehawm ka ti khawp mai. Min lo hrethiam hram hram mai teh u. Min hâu ula, mahse min ngei lo hrâm ru aw.. regular taka update zat zat ka tum tehlul nen)

Ka râi tih chu a chiang ta ngei e. Kan chhungkua chu kan hlim takzet a ni.  Ruai tenau hi kan țheh deuh reng mai, mahse engmah ka ei țha thei lo. Ka râi avang hian Rsa leh Bawihtei an hlim zual a, naute hming tur an lo inphuahsiak țan a, an phùr lutuk ka hmuh chuan ka hlim veng veng.

Thei ka râwp lutuk . Mahse a tam hun lai a ni hlauh a,a zia viau. Ka  ei țân țân reng mai a ni. Taksa tana chaw țha erawh ka ei thei lo lutuk thung,  ka luak a chhuak tlat zel a. Mahse Rsa ngei tlat ang chi kha chu ka nei tawh lo, a țantir lamah chuan a  hlauthawng khawp mai a. Mahse ka ngei lo tih a hriat hnuah chuan  duat zet zetin min kuah hlù hlù a, ka duhzawng leh ei châk zawng apiang a rawn lei haw ziah bawk.

Âmpuii pawh DIET-a a tlin avangin  class an țan dawn tawh a, Bawihtei a khua a har sawt dawn a ni. A nî hian chhawnchhaih a thiamin a fak thiam a, a nî naute dik tak  a ni ringawt mai. Zan lamah ni se a mutpui deuh ziah a, ka râi tih kan hriat chian hnu phei hi chuan kan bulah a mu tawh lo tluk a ni. Mahse a pa hian a ngâi țhin a, a muthilh hnuah Âmpuii room ațangin kan room-ah a pawm chho țhin.

A beng lam pawh a zia tawh hle, dim erawh a la ngai viau. A pa hian duat chikimin a duat a,mahse Bawihtei hi chu a fel ve tlat. A pangchang lovin naupang chumchiap la ni mahse thil a ngén ngai miah lo. A pain thil a leisak chuan a lâwm em em a,a zuang tar tar țhin. Tunah chuan a chèr lutuk kha a zia ta deuh hlek, damdawi ka pék kha a ngeih chho viau a, a lawmawm ka ti tak tak a ni.

Âmpuii class kal țan niah chuan a ngén lek lek a, ka thlêm thei hrâm. A fel em zawk a, a nuar miah lo.

Ka awm a nawm loh deuh avangin peih lo chung chungin ka infiampui hram hram a, ka puin ka awmdan chu a lo hrethiam rang khawp mai. Bawihtei chu in bul vela lénvahpuiah a sawm ta hlauh a, ani lah chu a lo phùr khawp mai a, hlim tak chuan min bye bye a.

Nu Sangi hi a rawn kal regu vak tawh lova, Faktei pawh a ni tho. Nu Sangi chu kan buai deuh ni-ah a rawn lang a, Faktei erawh chu ka pu a zia tawh em avanga lo kal vak tawh lo a ni zawk. Kar khatah vawi 2/1 bak a lo kal tawh lo.

Kan nula 2 an awm tho avangin inchung lamah mu turin ka chho a, Bawihtei room lamah ka kal a, hmana ka khum kha a awm tawh lo va, Bawihtei mutna tâwk lek khum a awm  avangin ka mu thei lo va, mat lo awm chu phahin chhuatah chuan ka mu ta diai a.

Ka lo mu rei hle a nih ka ring, kutin ka hmai a rawn chùl zai zaiah chuan ka harh hlawl mai a, ka meng thei lawk lo lehnghal a, ka mumang nen a la inzawm vekin ka hria.

"D, harh teh?"

Ka meng siar siar a, Rsa mangang hmel ka hmu hmasa ber a, peih lo deuh hian ka mit ka chhìng leh a.

"D, muhìl tawh rih lo teh, ngatinge helaiah hian i mut?"

Ka mut a la chhuak asin le.

"Ka mut a chhuak lutuk"

"Room-ah ka pawm phei ang che aw, i muhil leh dawn nia"

Min pawm kâng tih ka hria, mahse ka meng hlei thei lo, ka mitvun a chhah lutuk tlat.

Khumah min nghat a,țawng ri ang deuh ka hre riai riai a, mahse meng turin tha ka nei lo, ka mut a chhuak lutuk.

Ka harh leh meuh chuan tlai a lo ni tawh! Ka pang ka khawih a, a dái diai. Ka han inlet a, ka bulah chuan Rsa a lo mu ve niin. Ngun zetin min lo en a.

"Hi"

"Ka va mu rei em!"

"A pawi lo"

"Bawihtei engtin nge a awm?"

"A nî nen an awm"

"Ka lo mutsan daih alawm le"

"Ngaihtuah suh, nangmah hi ngaihtuah i ngai"

"Ka awm a nuam lo mai mai alawm"

"I chèr tlat, thil i ei țha bawk si lo"

Nia, ka chér deuh tih ka hria. Mahse rái tântirhte chuan a haw deuh phei chu an tla dâwk ve reng alawm.

"Thil ei châk i nei em? I ril a țam em?

"Pasta, hmana ka damloha min siam ang kha ka ei châk"

"Ka'n siam nghal ang e, lo mu reng rawh"

A thawh  dawn chuan  a rawn kun hniam a, ka hmuiah chuan a rawn fáwp phawt a, a tho ve ta chauh a.

"Ka rei lovang"

Rei lo teah chuan bowl lian deuh hian a rawn  châwi chho a, Bawihtei'n a rawn zui chho bawk a.

Ka ei tui kher mai, ka ei tam viau bawk. Bawihtei pawh chuan a lo ei ve zoh zoh bawk a, ani pawh chuan tui a ti viau mai.

"Ka va ei tam em! Ka ei châk ang chiahin ka ei alawm. Ka lawm e"

"Welcome. Nang, Naute, a tui i ti ve em?"

"Aw, tui lutuk"

"Ka hman hunah ka siam leh dawn nia"

"Âpa, tam tâwk aw"

A hman châng apiangin Pasta chu a siam ta ziah. Kei lahin hné tih ka nei lo, tui ti lutukin ka ei thei zel, thei thur lam tih lohah chuan Pasta chu ka ei thei ber, ei pawh ka ei nasa.

Lily pawh a hman chângin a rawn léng zoh zoh. Kei chu ka lén ve hman chiah loh avang leh Rsa'n indîm tura min tih avangin ka chhuak khât hle a, Bawihtei chu a nîin a hman chângin dâwrah a chhuahpui loh leh exer a lâkpui a, ka tel lovin a tlei viau. Kei ka nuamsam lo leh țhin a, a zia viau.

Inrinni a ni a, Âmpuii leh Bawihtei chu dáwrah an kal a, in hnuaiah TV room-ah ka pu nen kan țhu mai mai a, Rsa chu dáwr lamah a kal lawk thung.

Lily leh Mama an rawn lang hlawl mai. Ka rin loh lutuk anih avangin ka lo en hau ringawt a.

"Kan lo léng dawn" Lily'n a tih tâkah chuan ka harhchhuak chiah a, nui sângin," Lo léng r'u, in va fel ve" ka ti ta thuai a.

"Bawihtei a awm em?"

"Awm lo, a nî nen an chhuak lawk a"

Common room-ah kan țhu a, ka pu chu TV room ațangin a rawn chhuak a, Mama'n a hmuh chuan," Ka pu, chibai. I lo dam țha em?"a lo ti vat a.

Ka pu chuan a en vang vang a, a hrechhuak lawk lo a ni maithei.

"Ka pu, ka țhianpa țhin Mama kha. Hmanah pawh a lo lén țhin kha"

"E, a ni maw? A lo rei ta deuh a, ka lo theihnghilh lek lek che alawm. Ka dam țha e, i dam zawk maw? I fel hle mai"

Ka pu nen chuan an titi dun nghal bawrh bawrh a, Mama hi chu fiamthu a duh a, a țawng duh bawk a, nél loh theih pawh a ni lo reng a ni.

Bawihtei leh a nî pawh nui ar arin an rawn in-ùm lut a. Lily chuan a lo chiau au vat a, an ri leh chél chùl mai.

Mama chuan," Kan naute khan tunge a chhun kha?"tiin a fiam a, ani chuan bahlah hauh lo hian," Ãní ka chhûn. Âpa pawh, ânu pawh" a ti zarh zarh a, kan nui ham ham a, Âmpuii erawh chu a lo lâi em em ringawt.

"A nî hi chu a ngaisang teh mai ania, DIET-a a training-naah pawh a hruai tel lo chauh a ni"

"DIET-ah i training maw?"

"Aw"

Âmpuii lái lutuk chu ka khawngaih zawk. Mama hi a star chiang mai.

"Ka țhianpa a thawk asin, ka lo sawi ang, a fel teh ania"

"A tihzia viau ang chu. Hriatthiam loh laite han zawh ilo velah pawh, Âmpuii hi zawng a zakzum a, țhian pawh a nei har ngawt ang"

"E khai, chutiang tur a ni ngai lo. Mi puitling chin nih chuan țhiante hi siam zung zung tur a ni ngâi, mi thar lùt ve tho an nia, zah duh bîk miah loh tur"

Âmpuii chuan Mama chu a en ngam miah lo nia, a hmel chu a sen țawn țawn bawk sia, ka khawngaih lutuk. Rsa ka star țantirh laite min tihrechhuak rum rum mai.

Kawngkaah Rsa a rawn pèn lut thauh thauh a,Bawihtei chuan lo hmu vatin," Âpa?"tih leh a lam pana tlân a rual nghal a a, ani pawh chuan a lo pawmkâng vat a.

"Ãpa Mama a lo leng a"

Rsa chuan Mama a rawn hmu ta chiah mai. Mama pawhin a lo en lai tak a ni ve tho a, an inmelh rân mai a.

"Chibai, tunlai i hna i tluang em?" Mama hi chu a polite ngawt mai, a rilru puitling tak leh nélawm tak kha a la chhawm nung zel chu a nih hi.

"Tluang e, ka lawm e" A tâwi tek tawk viau mai. Hmun dang ka en lo, Rsa hlir mai chu ka en, a rilru ka hre châk.

"Thingpui kan la in miah lo nia, Âmpui, va chhuang teh le" Ka pu chuan a rawn ti ta hlauh mai a, Âmpuii lah phùr zetin a kal ta nghal vat a.

"Âpa, eng nge min lo hawn?"

"Tui deuh"

Ka țhutna bulah chuan Bawihtei pawmin a rawn țhu a, min si chétin a rawn tawlh nghal zat bawk a, a chetdan chuan ka nuih a tiza deuh, Mama laka min hauhzia leh a nupui ka nihzia a tihlan ve dan a nih hi.

"Vawiin chu i zia viau a ni maw?"

A thilsawi chuan kawh pahnih a nei thei ngei mai, mahse ka haider lui tlat a.

"Ka țha reng alawm"

Lily chuan," Tun țum chu mipa i neih ka ring tlat" a lo ti a, Rsa rilru leh Mama rilru tur a lo ngaihtuah ve ang em aw ka ti, mahse kei aiin a fing zâwk a, a hrethiam viauin ka ring.

"Nia, mipa ni se"

Ka pu thung chuan," A enga pawh ni se a țha vek alawm, țha tak hian piang phawt mai se"a lo ti a.

"Nia, thu kan nei lo em mai a"

Âmpuii chuan thingpui a rawn châwi phei a, a rawn sem dan dan a, ngun takin ka lo en a, Mama bula a laihzia ka hmuhchian leh hnu chuan Âmpuii hian Mama hi a stàr takzet tih ka nemnghet ta.

Mahse, engtin nge ni ang? Rsa hian a farnu hian ka bialpa hlui hi a star tih hrechhuak ta se, engtin nge a tih ang? Tunah pawh hian a awmdan ațang hian a la thîk tih a lang reng si a.

Titi dang an vawrh hnuah pawh ka thil ngaihtuah lai chu ka chhunzawm zel a. Mama chu a upa ve tawhin nupui nei rual a ni tawh, Âmpuii erawh tleirawl chauh a la ni, kum 18 chu a tling vel chiah chiah maithei. Nulat rilru la pu lo lutuk a ni si a, mahse tuna a awmdan hi chu ngaihtuah a ngai. A u hian a hriat hlauh chuan...

Mahse, star mai mai te chu eng nge pawi tehchiam? Rilru kan in-control-sak thei hleinem, a duh duh a star thei alawm, an inngaizawng tih ni mang hlei lo.

Mama hian eng rilru tak pu ve ang maw? Star lét ve hlauh se, hmmm, a duh âwm lo em mai, naupang a tih dawn mai bâkah ka pasal nau a nia, a duh lo tawp ang.

Âmpuii awmdan chu ka lo chìk lo thei lo. Bawihtei nena infiama lâm dun chiam țhin kha hmuh tur awm lovin a ngâwi reng a, a sam a tuai a tuai ringawt mai.

Mama chu a țawng bawrh bawrh mai a, kan inkârah eng emaw a awm țhin tih hriat theih loh khawpin a chezia leh awmdan hrim hrim chu a control hneh. Țhian inkâwmngeih deuh titi ang maiin a titi bawrh bawrh. Rsa ve thung  chu a țawng tam lo hle a, ka kut chu a vuan deuh reng, a nupui ka nihzia leh a ta chauh ka nihzia hmuhtìr a tum a ni ber ang chu. Hetianga a tih hi a ngai miah lo asin, kei hian ani aia hmangaih leh duh ka nei lo tih hi chiang lehzualin hria ni se chuan. A dinhmun hi a derthâwng ngai lovang, amahin min phatsante a nih ngawt loh chuan.

Zanah room-a kan awm tawh hnuah chuan," Vawiin khan Lily-te kha an lo kal dawn i hre sa em?"tiin min zawt a.

"Teh nang, ka hmu thut a, mak ka tihzia mai chu"

A awih kher lo maithei, mahse thudik a ni miau si a.

Zanin chu a zia a dang deuh, a țawng mang lo. Ka biak chuan țha deuhin min chhâng tho, mahse, mahse tih tur a awm tlat.

"Lily-te kha ka sáwm an ni miah lo ania aw"

"Ka hria alawm"

"I awmdan hi a dang deuh tlat"

"Dang lo"

"A dang chiang lutuk , ka hre thei che"

"I ngaihbel a nih chu"

Buaithlak, Mama lo la thîk tlat mai chu.

"Mama kha i la thîk em ni?

"Thîk lo" rang fahran hian a lo ti a.

"I chiang chiah maw?"

"Sawi tawh lo teh ang"

Ka lam hawiin a rawn inlet a, záwi sup hian," Muhil tawh ang"a ti nghut a.

A va naupanchhiatthlak tak em! Thil ho lutuk leh țùl lo lutukah a buai mai mai a ni.

"Ka pasal i ni alawm" tiin a kawngah ka kuah a, ani bâka thlakhlelh reng reng hi ka nei mawlh si lova.

"Ka nupui i ni a, ka ta chauh i ni"

"Dik chiah"

"Midang tu tân mah ka phal lo che"

"Kei pawh"

"Mipa dang reng reng kan inkârah an inrawlh ka duh lo"

Mama thîk lo ni khan a insawi ve sia, thîk nih chu eng angah nge a ngaih reng reng ni?

"Ka ring che"

Kei chu min ring, mahse Mama chu a la thîk tho.

Tunah chuan ka pum puar pawh a lang chiang ve ta. Bawihtei hian a lâwm em em mai a, ka bula a awm hi chuan a chûl reng mai, a pa lahin motor-a ka chuan a phal miah lova, 'i chhiat ang, kawng a sawt si' a ti mauh mai. Engkimah min âwl a ni mai, Pasta min siam tlut tlut a, a chhan chu thil dang ei thei lo hek i.

Mipa a nih ka ring nghet bur. Bawihtei ka pãi lai khan hrisél lo viau mah ila, tuna ka pâi nen hian a inang lo.

Tlai khat chu pawna Bawihtei nen kan awm laiin car a rawn tlân lut a, car ațanga Mama leh Âmpuii lo chhuak ka hmuh chuan mak ka ti kher mai, engtia lo inphur dun nge an nih ang?

"Engti tiha rawn thlah nge i nih a? I va tilawmawm ve!"

"An institution-ah ka kal lawk a, an lo bãng remchang em a, a duh lo chung ka rawn phur haw" Âmpuii en pah chuan nui chungin a ti a, Âmpuii pawh sen țan chungin lâi deuhin a lo nui ve a, Bawihtei chu a chhaih nghal daih a.

"A nih tak chu, lo lùt ve rih la"

"Ni lo ve, ka haw zawk ang e,Rsa lo haw hmain.  A nih leh phawt u"

Kher kher chuan. Ani pawh hian Rsa'n a thîk tih chu a hrechiang khawp mai.

"A nih leh phawt le"

Âmpuii'n a thlîr zui vang vang chu ka hmu ru reng a, anni pahnih hi induhtawn hlauh mai se... Mahse Mama hian a duh kherin ka ring lo, Rsa nau a nih mai bakah ka pasal nau a ni bawk sia, a bialnu ţhin pasal nau chu a duh èm dawn em ni? Chutah Rsa'n a la thîk zui bawk nen, Âmpuii lamah hi chuan harsatna awm dawn lo ta pawh ni se, Rsa hian Mama hi a farnu tân a duh kher lo ang. Mama hian Rsa chunga phuba lâk nan Âmpuii hi hmang ta se... ni lo, chutiang rilru a pu teuh lovang, Mama hi chu a rilru a sual teuh lo.

Mahse Âmpuii hi a chhe lo em asin, a la nau deuh e tih mai lohah chuan. A hleitling si,a mitmeng hi a zahawm kul lehnghal a, a ngo bawk si. A neitu tur chu mi vannei tak a ni ang, Mama hian nei duh hlauh se, a chhan chu nupui nei lo va a awm hi keimahah inthiam lohna deuh a awm tlat a. Hmeichhia a rinna ka tihchhiatsak ni hian ka hre deuh tlat bawk a, chu chu Âmpuii hian tihrehsak thei se ka ti a ni.




RUATSANGA - 39  By Dingdi Pachuau

(Current chu  a țha ta, signal ka nei lo leh thung. Signal awmnaah ka chho zawk, rawn dah hram ka duh sia)

"Ânu, sikulah ka kal ve châk tawh e"

"Aw le, âpa hnenah kan sawi dawn nia aw, mahse sikul i kal daih chuan ka ngai âwm che, ka khua a har dawn e"

"Ka lo haw leh zel dawn alawm"

Naupang fing reuh tak hi chu aw. Kei chu min chhùn lo chiang teh tak e.

Zanah Rsa ka sawipui a, ani chuan," A laklawh rih tlat a, nakum session tharah ti mai ila tiraw?"a ti thung a.

"Nia, mahse hrilhfiah thiam deuh chu a ngai ang"

"Ka hrilhfiah dawn nia"

Zanah kan bulah a mu ngai tawh lo tluk a ni, a nî bulah muin a nî hian hla chi hrang hrang, țawngțai dan tur leh thawnthute a hrilh țhin a, zíngah erawh a pa bulah a awm ngei ngei thung. A pa hian exer a lâkpui țhin a, exer la pah hian eng engemaw a sawipui țhin bawk a, a duat em avang hian ngainat pawh a ngainain a duh hle a ni.

Lily pawhin a hman chângin min rawn tlawh țhin a, Bawihtei tán eng emaw tal a rawn kensak ziah. Tùnlai té hian a bialpa nen khan an inbauh deuh a, khua hmun ni bawk si lo hian a tibuaithlak ve bawk a ni. A bialpa lah hi țawng tam lo mi niin inla pâ ve tak chi a ni bawk sia, hmeichhe lamah chuan lérh em em ni si lo hian hmeichhe lam hian an zar ve nasa a, buaina pawh an nei zoh zoh réng a. Mahse Lily hian a duh ve êm a, tin, a bialpa pawh hian midang han kawpsan zawk țhin angin lang mahse Lily hnenah bawk a rawn lét leh tho țhin.

"Tunlai chu zu a in nasa deuh a ni ang, rùi deuh deuh hian min rawn phone țhin a"

"A va zia lo ve aw, rilru hahna deuhte a nei a ni lo maw?"

"Neihna chhan tur keima lamah chuan a nei lo"

"A hna lamahte?"

"Tluang viau turah ka ngai, engmah a sawi si lova"

"A nih, hmeichhe lamahte? Ka ringhlel tihna a ni chuang lo ania"

"Ka ning, hmeichhe dang laka rinhlelh reng hi"

"Nia, tiraw? A awmdan hi hriatthiam a har ve deuh chu a ni"

"Țhen daih ka duh"

"In buai reng tho sia, chutah, rinhlelhawmin a awm reng si nen, i theih phawt chuan le"

"Mahse ka ngâi viau ang"

"I pawimawh ber, i thutlúkna apiang a țha"

A theih phawt chuan țhen daih se ka ti, zu a in reng bawk sia, chubâkah hmeichhe dangah hian an buai ziah bawk, an buai apiangin a bialpa lah hian zu a in nasa sauh zel.

"Ka țhen a nih chuan bialpa ka nei peih tawh miah lovang"

"Ni lo ve, țha deuh i nei mai ang. Mama ang hi chuan awm lul lo ve"

"Mama maw? Ka hualsak khiau tawh alawm"

"Tu chu?" Ka hre châk viau mai.

"Âmpuii hi, hmêlțha a tih thu a sawi zoh tawh alawm"

"Mama'n maw sawi?"

"Aw, ka suihrem dawn. I phal em?"

"Keia phal leh phal loh a ni nâng. An induh phawt te chuan"

Tifuh inti deuh hian," Ãmpuii lamah hi chuan a harsain ka ring lo ve ringawt a, a chhan chu Mama bulah hian a lâi thei sia, a duh ve deuh niin ka ngai a" a ti sarh sarh a.

"Mahse, Rsa hi?"

"No problem, tih tak takah chuan Mama lak ațangin a chhuh che a, Mama hian a dawhthei hi ka ti ania"

"Khati zawng kha chuan sawi lo la, Rsa thiam loh a ni hleinem, kei pawhin ka lo duh miau a, Mama âia ka duh zawk vang a ni mai"

"Ani pawhin a duh chuan Rsa thinrim mai maite chu a tuar ve ang chu"

Nia, Âmpuii a lo duh ve phawt te chuan tuar ve mai ang chu. Thil kal dan tur erawh hriatthiam a har, Mama hian duh tak tak se ka ti.

Zanriah kìl laiin Âmpuii chuan an hun hman dan a sawi siam siam a, ka va en a, Mama ka hrechhuak leh a, chhun lama Lily nena kan  titi kha ka ngaihtuahchhuak leh a, thil țha tak a ni.

Bawihtei pawh a pain a sawifelpui thei a ni ngei ang, a sawi leh ta miah lo.

Ka dul pawh a puar lian ve ta. Bawihtei ka pâi lai aiin ka inzo lo a, ka chèr deuh bawk. A hun dik thlapah, doctor-ah ka kal thlap thlap a, Rsa leh Bawihtei chu a phúr ber ber an ni țhin. Naute lungphu rì te an ngaithla țhin a, nuam an ti thei hle.

Naute a rawn chét phei chuan an țé chél chúl țhin. Mipa a nih kan ring deuh vek a, a hming tur pawh an phuah lâwk thlap tawh.

Lily-te pawh an ințhen ta nge nge e. Ka khawngaih ve reuh khawp mai, Fb-ah unfriend-in whatsapp-ah a block hmak a, chutia tih kher chu ngai ka ti lêm lo nain amahin," Hetia ka tih hi ka tân a țha. Chuti lo chu a dp leh last seen ka check leh ang a, ka rilru-ah a thar leh mai ang" a ti tlat a, a tidik ve reng mai. Midang țha deuh nei turin ka duhsak hle mai, ani chuan single rih a duh thung.

Mama chu ka hmu leh ta rih lo. Mahse rinhlelh ka nei, Âmpuii hian a phone a lâwm thar riau mai.

Lily'n min rawn phone a.

"I lo léng hman lawk em?"

Inrinni a nih avangin engmah tihtur a awm lém lo. Rsate pafa leh Âmpuii chu an chhuak lawk a, kei leh ka puin in kan nghâk a.

"Eng nge ni ta?"

"I lo thlen hunah le"

"Min hrilh mai la?"

"Ka lo hruai phawt ang che"

Rsa hriat loha kal chu ka duh loh avangin ka phone a, a țawng chhuakah chuan a phal vak lo tih ka hria. Mahse ngen tak téin ka ngén a, ban deuh chata 'aw' a pawh tâk avang chuan ka insiam ta chauh a.

Ka puar ve tawh avangin kawr lian thawl deuh tak ka ha a, chétpui nuam tur. A lo thlen chuan ka lo inpeih at tawh a, car-in a lo kal teh tlat!!

"I khalh thiam ve elo?!"

"Thiam ve sawih sawih e"

"E khai, ka chuang ngam dawn em ni?"

"Lo chuang phawt la"

Zawimuangin a khalh a, car a khalh ngaiin ka hre si lo. Rin ai chuan a khalh thiam si.

"In car a ni lo tiraw?"

"Accident i duh loh chuan min be buai suh"

"I tirapthlak. Chhuk ka duh"

"Ngawi reng rawh"

Ka țhiannu hi... țawng pawh ka țawng ngam tawh lo, thinphu dap dapin ka chuang a, tlân rei ka va ti tehlul em! Zotlâng chu a hnaih tehlul nen, darkar chuang kan tlân niin ka hria.

An kawt kan thleng chu ka thaw huai mai, ka theih anga rangin ka chhuk a. Hnung lam ațangin min nuih tak khiah khiah a.

"I hlau viau elo?"

Chhan pawh ka chhâng peih lo. In chhungah ka luhsan nghal a, a chhungte an lo awm lo hlauh, awm se chuan ka âng nasa ngawt ang.

"I hlau tak tak maw?"

Melh kawr pah hian,"Hlau ang chu, ka țang ţung reng asin, infiam pawh hi chintâwk neih a țha" ka ti hmuk hmuk a. A ni tak tak, thinthîin ka chuang lova, ka lungphu pawh a la dik thei lovin ka hria.

"Ka tihder che a nih khi, driving license pawh ka nei daih tawh alawm"

"I sual a nih chu"

Za takin a nui awr awr a, vawmchawrh ka châk ania. Ka nuih a za miah lo.

"Eng nge ka nui ve duh ania"

Mama, choka lam ațanga lo chhuak ka hmuh chuan mak ka ti țêp. Mahse ka tilang lo.

"Hei, Ďîtei hi ka tihțhaih a"

"Sawi tawh suh, ka thin a la rim ania"

Mama pawh chu a nui ve sak sak a, kei chu ka nui ve lo, ka hlauhthâwnna zawng zawng leh nuihzatthlakna hi a inbùktawk ka thei lo.

"Engvanga min ko nge i nih sawi vat rawh, ka haw duh ania"

La nui kar kar chungin," Ho lutuk, haw rih lovang, ka nuih a za em alawm, khatia túm hmuka i ding leh i rãipuar bawk si kha i inhmeh lutuk" a ti a, min kâwk a, a nui leh khiah khiah a.

"I chhe ziah zuah em mai" tih leh ka bula long chair-ah chuan ka țhu nghal a.

"Thil eng eng emaw ho deuh sawiho mai mai ang u"

"Ho mai mai sawi turin ka rawn kal lo aw"

Mama rawn inrawlhin," Nia, duhtawk tawh teh, kei pawh ka haw tawh ang e, tihtur țúl ka nei ve tho ania" a ti a.

"Thingpui hâng tui táwk in leh phawt ang u"

Choka lamah a kal ta nghal a.

"Engtikah nge naute chu i neih dawn?"

"A rei vak tawh lo, Nov thla chawhnu lamah a nih loh chuan Dec chawhma lamah a ni ang"

"Mipa a nih duh hmel ka ti"

"Kei pawh ka ring a"

"Ka fate chuan i fate chu an ngam dawn lo hle mai tiraw?"

"Nia, i tih ve vat vat a ngai tawh a ni"

Za vak lo hian a nui a, a rilru put dan tur awm ang chu ka hre theiin ka hria, nuam lo tihna ka nei nghal zat a.

"I hnathawhna chu a nuam em? Zirlaite in ngah bawk ang maw?" Kan subject tihdanglam nan thudang daih ka zawt.

"Aw, ka châk ber țhin ania, nuam ka ti. Zirlai pawh an țhahnem ve angreng, hotu ber nih erawh chu a lo buai theih khawp mai"

"Ka lawmpui hle che a ni, mahni nuam tihzawng tak thawh theih tluka hlu a awm lo ania"

Lily thingpui rawn ken chu tui ti takin kan in a,fiamthu ho lam mai mai sawiin Lily chu a nui uar uar a, keini pahnih pawh chuan lo nuihpuiin a chângin kan hriat angte kan lo sawi ve a, Lily bula awm hi chuan thaw a vengin thin pawh a rim rei thei țhin lo.

Thingpui no a sil hlân chuan Mama chuan," Ka haw tawh ang e, Lily bula awm chuan duh aia rei țhut a ngai ziah a" a ti a.

"Nia, tiraw? Mahse a sil zawh nghak la, a lo phei țep ang chu"

Ka pum chu a rawn che dat dat a, ka khawih nghal a, Rsa chu awm se chuan ka ko ang a, a rawn khawih leh nghal awm sia, nui suk sukin ka dul chu a fâwp leh zoh zoh ang a...

"I pum a na em ni? I ţha em?"

"Aw, țha e. Naute a rawn che a"

"A ni maw?!!! Ka va hre ve châk"

"Rawn khawih chhin la"

Min rawn hnaih nghal ruak mai. Ka pum ka dawmna lai chu ka khawihtír a, a la che dat dat reng a.

Nui sáng hian," Ah, a mak reuh kher mai, hetiang hian em ni an lo chét țhin a? A lawmawm e" a ti sar sar a.

Chutih lai chuan kawngka a rawn ri a, choka ațang chuan Lily chuan ring deuh hian,"Lo lùt rawh" a rawn ti val val a.

Kawng a rawn inhawng a, Rsa a rawn lang hlawl mai.

Mama nen inhnaih zeta kan țhu dun chu min rawn melh ta chat. A hmel inthlak danglam chu hmuh țhelh chi a ni lo, mi pangngai tan chuan. Mama pawhin a hre ngei ang, ani phei chu a fing si.

Mama nen chuan engtin awm lo mah ila, min hmuh dun dan chu a dik chiah lo tih ka hria. Ani, Mama lo thîk tawh sa tân phei chuan min ring chhe thei ngawt ang chu.

Lily rawn phei chuan," Ah, Rsa ni rengin. Lo lut rawh, in nu awm loh hlek hi chuan aw.." a rawn ti bawrh bawrh a.

"Ka ngâi alawm"

"Tenawm viau suh, naupang chhia ang mai"

Lily chuan a fiam bawrh bawrh a, tlém chuan boruak chu a tizia deuh. Mahse, ka awm a nuam miah lo. Rsa chu a thin a rim ngei ang tih ka hria, a kut a kekawr iptea a zen luh reng dan ațangin. A thinrim reng reng chuan a kut hi hmuh theihin a dah ngai lo, a kuangkuah bo loh leh a kekawr ipte-ah emaw a zen lut daih ngei ngei.

"Thingpui in rawh aw"

"Ka in lo zawk mai ang, D hi khawiah emaw hruai ka duh a"

Khawiah nge min hruai ang? Engmah min hrilh lo mai ni lovin vawiin chu a châwl a, engmah tih a tum miah lovang tih ka hria a ni.

"Nia, Lily, kan haw zawk mai ang aw"

"In hmanhmawh e, thil ka hrilh tur che pawh ka la hrilh hman lo che a"

"Hun dangah ni mai zawk rawh se aw"

Ka tho chhuak tur chu min rawn chelh vat a, hrehawm ka va ti tak em! Ka hrilhfiah vat loh chuan a thinrim reng ang chu.

Lily chuan pawn thleng min thlah a.

"Ka rawn phone mai ang che aw, nih loh pawhin naktukah ka hman chuan rawn lên phei ka tum ang"

"Aw le, i tihdan dan le"

Motor a khalh chhung chuan min be miah lo. Rsa nen kan inanna em em chu kan thinrim reng rengin kan țawng ngai lo, kan ngâwi reng țhin.

Mahse tunah hi chuan keimah  hi thinrim zawk ka ni lo va,chuvangin a thinrimna hi ka thawidam a ngai.

"Ka rin aiin in lo haw hma a"

Lungtum biak ang chauh.

"Thinrimna tur engmah a awm lo ania aw, a léng ve tih pawh ka hre miah lo"

A danglam eih lo, motor chu fímkhur  takin a khalh reng a. Biak awmzia a awm rih lo, chuvangin ngâwi zawk mai ang, inah ka hrilhfiah ang a, a hrethiam ém ang chu maw, ka pasal a ni a, a nupui ka nih miau avangin min rin a ngai a, nupa inkâra inrintawnna a awm loh chuan hmabâk chu ințhen a ni mai. Ka pasal hi ka ring a, rinhlelhna tur awm miau hek lo le. Kei hi rinhlelh tur hian ka awm réng em ni? Mama hi a la thîk tih ka hria, mahse ka ngaizawng tawh bík lo va, inhmuh fuh chãngte a awm lo thei bìk lo va, hei erawh hi chu hrethiam hram se ka ti. Kei chuan țhian ang chiahin ka en tawh a, thîkna chhan tur a awm tawh lo tih hi.

Inah pawh chuan a țawng lo khawp mai. Âmpuii leh Bawihtei erawh chuan min lo ko chúl a, an cake lei, tui hmél zet chu chhuang zet hian min lo kawhhmuh a, Rsa erawh room lamah a chho daih.

Zanriah ei hma chu a office-ah a awm a, zanriah ei khamah lah car-in a chhuak a, rei phei chu a chhuak lo. A lo haw lah chu office-ah a awm daih bawk si, titina hun a awm lo hrim hrim. A hnena insawifiahna hun min pe duh lo ni berin ka hria.

Zanah ka meng rei viau, ka bulah a rawn mu dawn lo a ni ang. Office-ah lùtin ka va zâwt mai dawn em ni ang? Mahse a buai hle pawh a ni thei a. Nakinah a lo mu dawn pawh a ni thei asin.

Ka pum a na riai riai mai, 'nidangah a na ngai si lo va' tiin ngaihțha lo angreng deuhin khum ațang chuan ka tho a, pên thum vél chauh ka la pén ang tihah chuan ka mal a rawn lum thla ta puat mai a, ka han en a, thisen hlír a ni!!!

Ni lo, naute ka neih hun a la ni lo, ka naute hi ka chhiat thei lo vang!!!

"Ni lo, ni lo, ka chhiat thei lul lo,min pui ru"tiin ka âu vak vak a, ka aw lah chu a chhuak țha thei miah lo lehnghal a.