☆RUATSANGA☆ - V By Dingdi Pachuau

RUATSANGA - 40 By Dingdi Pachuau

Ka hlauthawng lutuk chu ka au țha thei tawh lo. Ka țap pùr mai a, bathroom-ah ka luh vat a ngai a ni. Ngatinge tumahin ka thâwm an hriat miah loh le aw?

Ka theihtâwpa ringin ka áu leh a, bân tha chak takin min rawn kuah tâkah chuan ka thla a muang ta deuh a, insùt deuh hlap hlapin a bânah chuan ka chelhsak vat a.

"Harh teh, D. Mang țha lo i mang ami?"

Ka harhchian hnu pawh chuan ka la țap tho. A tak tak emaw ka ti tlat a, ka țap tâwp thei lo.

"Eng nge i mumangah i hmuh?"

"Ka naute ka lo chhiat a"

"A nih chu,țap tawh suh"

Min kuah hlu hlu a, țah tâwp mai chu ka ui deuh tlat, țah lah chu a nuam ropui si a.

"Bâng teh, ka hâu emaw an ti ang che"

"A tak a ni ang tih ka hlau alawm"

"Naupang chhia ang mai"

"Naupang chhia ka ni lo"

"...ang mai ka ti reng alawm"

Hetia inhnial deuh hi nuam ka ti lehpek tlat. Tlâi lam ațang khan  ka be țawng zo tawh lo va, chuvang chuan hetia min han țawngpui ve reng reng pawh hi a nuam ka ti ve hranpa reng reng.

"Ka naute hi chhiat ta ang ila, engtin nge ka awm ang?"

"I chhiat dawn hleinem"

"..ta ang ila ka ti reng alawm"

Kan indraw chiah e.

"I chhiat ka phal dawn reng reng lo"

A nuam veng veng ka ti. Ka pasal hian min kuaha min hnem hian a thlamuanthlak bik a, a him bìk hliah hliahin ka hre bawk.

Zing ka harh chuan a lo awm tawh miah lo, Gym lamah an awm leh tawh a ni ang. Nizan lama ka mumang ngaihtuahin ka mu leh deuh vang vang a, a la thinrim reng ang em le? Nge a reh tawh ang?

Ka tho tur chu ka phùr lem lo hle mai. Ka mumang țha lo zet chu ka ngaihtuah a, Rsa thinrim ka ngaihtuah leh a, engtin nge ka tihrehsak tâk ang le?

Kei reng reng pawh hi Rsa hian a thìk tih hrereng chung hian Mama hi ka la kawm ve reng a, a awm loh laiin ka la hmu tak deuh deuh a, keima thiam loh vek a ni. Lily khan min lo sawm kher kher a, min rawn sawm lo se chuan... mahse keima thiam loh a ni tho tho ka ti lo thei lo, ka dulte kha lo khawihtir miah lo tur hi ka ni a..

Chaw kan ei lai chuan Rsa chu a țawng miah lo, min en leh run run țhin a, mahse min be miah lo. Ani hi a la titau reng  a nih dawn hi.

Sunday a ni a, kan chhungkuain kan inkhâwm vek a, midang lakah chuan Rsa chu a thinrim miah lo, a be reng reng hlawm a, mahse kei erawh chu min biak kân zel.

Inkhâwm banah kan haw dial a, mahse Bawihtei chuan lén kual a châk tlat a, mahse kei chu ka peih ve lo va, inah min drop hnuah an tlânchhuak leh daih.

Kan awmpuite pawh an inkhawm a, sunday hi chu an free ve avangin keimah chauhin inah ka awm a, a reh ruih mai a, ka lo léng ve daih lo chu ka inchhír lek lek ta mai.

Vanneihthlak deuhin Lily a rawn lèng hlauh mai. A rawn phùl lùt hlut a.

"Khawnge an awm vek a?"

"An léng chhuak hlawm a nih kha, kei chu ka peih ve lo va"

"Awi, i léng ve daih ang tih ka hláu ania"

"Engah maw?"

"Ka rawn hawihil lutuk ang asin"

"Min rawn phone hmasak mai tur alawm"

"Ka phone ka tichhia"

"Engtin?! Nimin lamah kha chuan a la țhain ka hre sia?"

"Aw, tuiah baptisma a chang a"

"A va zia lo ve...i khua a har rawih dawn a nih chu"

"Nia, chu chu alawm, nimin khan ka chanchin hrilh che ka tum a"

"Eng lam? In renew leh tihna?"

Lu thing nar nar pah hian," Teuh lo mai, school-a ka thawhpuipa lam zawk ania"a lo ti a.

"Ni maw?!! Wow!!! A va phùrawm ve!"

"Lo phùr thak viau teh suh"

"Nge, ka țhiannu i nia, lo phùr viau chu a âwm reng alawm. A hming?"

"Vra ania"

"A hmelchhe áwm?"

"Leh ringawt a che. A fel alawm"

"Ka va hmu ve chák!"

"Zanah a lo lèngin ka ring. I hmuh chák chuan lo lèng ve la"

"Rápthlak e a"

"Eng nge? I hmu chák tawk lo a nih chu"

"I duh ve reng reng em?"

"Duh dawnin ka hria, a fel em a, ka phù lo zawk alawm"

"Mi țha leh fel hi alawm hlù le, tunlaiah chuan. Ruihtheih thil ti lo phawt se"

"Um, Vra chu a fel lutuk. Mei a zu lo va, kuhva hi, a rah hi a ei zauh a, a ni mai. Chuan, kohhran țhalaiah a inhmang bawk"

"A inhman viau chuan a țha dawn em ni?"

"A inhmang over lo. A duty tibuai turin engmah a insiam ngai lo, zirtirtu hna hi a duty hmasa berah a ngai a, a inpe em em bawk, tlái pawh a tlái ngai lo"

Bu nghat chungin," A țhat chu, chutiang mi chu tunlaiah chuan an váng viau asin. A nih leh, a rilru lamte? Țhiannute bialpa, biak pawh ngam miah loh tur hi a lo ni ang e?"ka ti a.

Ani chu a lo nui var var a.

"Teuh lo lutuk, a fel hi a ni tawp, ka phú lo zawk ka tih tawh kha. A fel dan a over chuang si lo va, chuvangin pasal atan pawh a tlâk viauin ka ring"

"Mahse, hmangaih hmasak phawt a ngai ang chu"

"A dik chiah, amah hi chuan min hmuh vawikhatna ațangin min hmangaih nghal a ni awm e. Mahse, bialpa ka neih avang khan min hrilh ngam lo niáwm tak a ni"

"A nih, nangin?"

"Ka duh dawnin ka hria ka tih tawh kha"

"Chutiang ringawt"

"Bialpa ka țhenna a la rei loh em hi"

"Nia, i hmanhmawh viau ang tih ka lo hlau deuh a"

Kan titi bawrh bawrh lai chuan hrechhuak thutin," Thingpui ka'n lum ang e, ka lo theihnghilh daih. Kei pawhin ka la in miah lo"ka ti a.

"Hrechhuak har ka ti reng che a ni"

Melh ram ramin," Sawi ve mai tur che alawm, ka pum a rit tawh lehnghal a, min âwl tur i ni asin"ka ti hlar a.

"A khaih, in in a nih hi, in inah lehzel ka chèt chuan a dik nang"

Thingpui kan in lái chuan," E, Fb kha i khawih tak tiraw? Vra chu ka hmuhtir ang che"a ti a, ka phone ațang chuan Fb-ah lùtin Vra pro- name a sawi chu ka search a, ka hmu ta nghal mai a.

"A chhiat hran loh hi. Mahse a hmel hi vái a va ang ve?"

"Nia, kei pawhin vái thlah an nih leh nih loh ka zawt alawm"

"A lian roh ngawt ang ka ti?"

"Aw, lian e. 5'10 vel a nia"

Pahnih chauh awm e ti lo chuan kan bengchheng dun phian mai.

"Ti leh ta daih ila, nimin khan Rsa kha a lungawi lo em?"

"Engvang chuan maw?"

"I hriat reng kha"

Ka hre lo der tlat a.

"Ka hrethiam reng alawm le. Mama pawhin nuam lo a ti teh asin"

"A va pawi ve"

"Chuan, in pa chu?"

"Lungawi lo ve deuh ang"

"In inhâu em?"

"Háu nang, Mama chu țhian ang chauhin alawm ka en le"

"Mahse, chu i rilru tak chu Rsa'n a hrethiam kher nang"

"Dik ve tho mai"

"Ka thiam loh a ni mah zawk tiraw?"

"Eng aiah maw?"

"Leng turin ka rawn sawm che a, inah Mama a awm tih ka hresa reng a, mahse Rsa kha a rawn kal ka ring miah lo va"

"Kei pawh. Mahse engmah buaina tur a awm chuang hleinem le. Mama chu țhian ang bâkin ka en chuang lo va"

"Rsa chu ka hrilhfiah ang aw?"

"A ngai lo. A ho lutuk"

"Mahse nuam lo tihna ka nei tlat, in lo inháu phei chuan.."

"Kan inháu lo ka tih tawh kha"

Chutia kan titi lai chuan ka chhungte chu an rawn thleng a, an rawn ri nghál barh barh a.

"U Lily, i lo lèng a ni maw?"

"Ánu Lily, eng nge min lo hawn?"

Kan rìk tak chel chul avangin engmah kan sawi chhunzawm thei ta lo va.

Rsa pawhin Lily chu a rawn be ve nghal a, kei erawh chu min la be duh miah lo, nizanah duat deuhin min kuah tih pawh kha ka ringhlel lek lek tawh a ni.

"Lily, chaw ei ve nghal la?"

"Inkhawm zan a ni sia, tun tlái chu ka ei rih lo phawt ang e"

Rsa chuan,"Kan ei hma mai dawn alawm" a lo ti ve a.

"Inléng ţha deuh ka nei dawn a, inpuahchah ka duh a"

"I over mai mai e a"

"Pasal i neih tawh bìk vang mai a"

Fiamthu nen bawk, Lily bulah hi chuan thutak hi a har țhin a ni.

Zanriah eikhamah chuan TV room-ah kan awm ţhap a, Bawihtei movie en duh ber mai 'Moana' kan en a. Bawihtei chuan Moana zái laite chuan a lo záipui ve a, kan nui dar dar reng a.

Ka hnungzáng a kham em avang leh ka ke a nat deuh avangin kan thil en kan en zawh hma chuan room lamah ka chhohsan ta daih a.

Ka ke chu hmet tur pawhin ka dulin min do rùn tawh avangin a harsa hle a. Ka cháwn chu a vùng deuh bawkin ka hria, ka hnungzang lah chu a kham țhùm mai bawk a. Ka theihtàwkin ka ke hmeh tum chuan ka ban ve țâwk țâwk a.

"I thei lo a nih kha, min tihtìr ve mai ta che"

Rsa lo luh lai reng ka hre lo.

Harsa ti deuh chuan ka ding chhuak a, ka kùn avang chuan ka hnung pawh chu a kham lehzualin ka hria.

"Khum tlângah khán țhu rawh"

Thaw dap dap chuan ka țhu a, ka bulah chuan țhun hniamin ka ke chu a châwi káng deuh a, a kut lian hlái darh chuan a hmet kual ta nawk nawk a, ka nuam huai huaiin ka hria.

A khing hnih chuan hnehsawh zet hian a malis a, ka ke a malis zawhah ka hnung chu min nemsak leh a, nuam ka ti lutuk a, ka muhil țèp a ni.

"I muhìl ringawt ang e"

"A nuam lutuk a, ka muhil țép tak tak"

"A nat chuan emaw hmehsak i duh chuan min hrilh tawh ang che"

Inthlahrung angreng deuh hian," I thin a rim sia, ka tír ngam lo che alawm"ka ti sap a.

"Ka ring che ka tih kha"

"Chuti, ngatinge min biak duh loh?"

"Keimah ka inhrem a nih kha"

Ka hrethiam miah lo. Mahni inhrem ti si, min be duh si lo.

"Engvangin nge i inhrem a?"

"'Ka ring che' ti chung reng hian midang ka thìk tlat a"

"Mama hi țhian ang bâkin ka en miah lo"

"Sawi rih lo teh ang"

"Ni lo, sawi zawk ang. I thík pawh a ngai miah lo, țhian ang chiahin ka en a ni. Chuan, nang chu ka pasal duh tak, ka hmangaih em em i ni a, midang nen khaikhin chi rual i ni lo"

"Chuvang chuan, thík duh tawh miah suh. Nang ka hmangaih em em laiin engtin nge midang ka duh theih ang? Ka pasal i ni bawk a, midang ka melh daihte chuan uire ka ni dawn asin"

Ka hnung chu dím te tea hmetin ka nghawngah chuan a rawn fâwp zoh a.

"Ka ring che"

Ka nghawnga fawh duhtawk mai lo chuan ka bengkawmahte chuan a rawn fawp leh a, ka lo mùr chuai chuai mai.

"Kan áwl rei tawh sia, zanin chu?"

A dik reng, ka nawmsam loh țhin avang leh ka puar ve tawh èm avang hian nupa nun kan chèn khát. Ka pasal hi mipa hrisel țha tak a ni, a duh ang pèk hi ka tihtur chu a ni reng a ni.

Zan tam kan âwl tawh avangin a duhthawh hle a, mahse min dìm thiam em em tho. Ka chèt ve a ngái miah lo, a châng chuan ka khawngaih țhin, a duh ang taka nawmna ka pe thei lo hi.

"Naute tán a hlauhawm lo ang maw?"

"Teh nang, a him dan ka hria alawm"

"Engtin?"

"Mithiam ka ráwn"

"Raipuar laia nupa nun hmandan turah maw?"

"Aw"

A va zahthlak tak. Chutiang chu ka duh miah lo kei chu.

"A zahthlák i ti lo em ni?"

"Zahthlakna a awm reng reng lo. Naute himna kha a pawimawh bawk si a, chuan nupa hlimna a pawimawh bawk a"

A tidik phian bawk si.

"Mahse, a zahthlak ka ti"

"Zahthlak lo. Naute i pái chhung lo tuar tlawk  tlawk hi a hrehawm zawk"

Thu a khuh lo lutuk hi a cháng chuan a nuam lo ka ti lek lek țhin.


RUATSANGA - 41 By Dingdi Pachuau

"Naupai lai tana țha deuh ka hre thar bawk a"

"Eng thil maw?"

"Coconut chhunga a tui hi. I in țeuh chuan naute a lo pianin a fái duh an ti a"

"Tak tak maw? Nang hi kei aiin naupai chungcháng pawh hi i hre daih ang a?"

Nui sukin," Phír neih dan tur pawh ka hria" a lo ti zohva.

"A, i thil hriat hi a țha lo tawp mai. Next-ah apply hi i tum reu reu ang ka ti"

"Pawi vak ami? Țha ka lo ti khawp asin"

"Pakhat pái pawh a nawm loh tehreng nen"

"Fa neih țeuh ka duh asin"

"Engzat?!"

"I pâi theih chhùng"

Rápthlak hian a.

"Min khawngaih lo em ni? Ka chèr em hi?"

"Ka mitah chuan i țha ber"

Ka awih chiah tawh lo, râipuar phei chuan kan pian nalh lohzia ka hrechiang ve em mai.

"Ka awih lo"

"Ka ti tak tak, a hma ai khan ka thlahlel zual sauh che, ka nupui sexy chhe lo bawk si hi"

"Teh duah a"

Hetia min fak hian nuam ka ti veng veng, min hmu sexy emaw sexy lo emaw ka tána a awm hrim hrim hi ka láwm a ni tawp, chutah ka fate pa a la ni zui bawk si.

"Ka fapa chu ka duat ang chu aw...a hming pawh Junior a ni ang"

"Mipa ni turin kan ring vek a, lo ni leh lo ta thut se?"

"Ka mumangah pawh ka hmu tawh, mipa alawm. Mipa a ni hrim hrim ang"

*********************

Tunah chuan ka neih a hnâi ve ta takzet. Damdawi ina lut thei mai turin ka inring reng tawh a ni.

Bawihtei lah chuan naute lo chhuah hun tur chu a nghákhlel khawp mai a, min zawt sek reng a. Puak hlàn a nghâkhlel tawh lutuk a, puak hmasak ber a hauh a ni.

Ka lèn chhuah theih tawh loh avangin Lily pawh a rawn lèng ngun a, Vra pawh a rawn hruai ta ngei e.

Hmaihmaah chuan Vra pawh a chhe hran lo, a ngo hran lova, mahse a fãi viau mai. A tawngkam chhuak a fel hle a, a nui duh hle bawk.

Damdawi in ka luh ațanga ni hnihna, zán dar 8-ah fapa duhawm tak ka nei ta a, fel takin ka nei thei a ni. Mahse ka neih fel hnu rei lo teah ka mit selh selh a, ka khawhmuh a táwi ta tual tual mai.

Ka harh leh meuh chuan ka kut vuanin Rsa chu ka khum bulah a lo țhu reng mai a, ka harh tih min lo hmuh veleh chuan nui sukin," Hi, i lo harh tawh maw? Ka ngaihtuah lutuk che a" a ti sup a.

"Ka țha e, Naute kha?"

"Junior maw? A țha lutuk, a hmélțha teh ania, nichin khán a țap a"

"Ka hmu thei ang em?"

Nurse-in a rawn pawm a, min rawn hlan chuan ka mumang emaw ka ti lek lek mai.

A hmui chu a sen tar a, a sam chu a dum țha khawp mai, a pa sam a chhun lehpek. A kut te tak tè chu hmuhnawm ka ti, a tin lah chu a sei reuh si.

"Hi, Junior?"

A mit chu a țahna vang a ni ngei ang, a bui deuh tlat. A u Bawihtei nen an inang viau, mahse Junior hi chuan min ang deuh zawkin ka hria.

Ka fapa ngei mai ka han pawm thei chu ka láwm hle a, hmuhnawm ka ti bawk. Ka hmangaih nghal ngawih ngawihin ka hria.

"A va han cute tak em!"

"Junior chuan kei ai chuan a chhùn zawk che tiraw?"

"Chhún zawkin ka hria, mahse a sam leh hmui hi chu nangmah ang chiah"

Ka pawm lai chu thla min laksak a, chuan, kan pathumin kan la bawk.

Naute ka nei zawh khan nikhaw hre lovin ka lo awm a lo ni. Thisen unit 2 min pe a, Rsa khan min kalsan miah lo, doctor-te remti lo chung min awmpui tlat a, tihngaihna tak pawh an hre lo.

Damdawi inah Lily-te thiandun leh Mama'n min rawn kan. Âmpuii leh Bawihtei an lo kal bawk. Bawihtei chuan pawm a ngèn leh tlat pek a, mahse Ãmpuii'n a thlèm thei hrám.

Damdawi in ka chhuahsan ni zânah ka puin Junior kan chhungkuaa lawm luhna a nei a, chawhlui a buatsaih a, kan bengchheng viau a, kan kim viau bawk.

Rsa felzia ka hre thar deuh deuh. Ka la chèt theih loh em avangin zánah naute a ngaihven hle a, Âmpuii pawh awm tho mahse ani chuan Bawihtei a ngaihven a ngai a, naute zun thlâk ilo-ah pawh ka che mang lo, a harhvâng hle a ni.

Kan vannei viau, Junior chuan mut a duh hle mai a,zanah pawh a zung, țe deuh hlek tih loh chu a țap lo tluk a ni.

Rsa hian a'n duh mai mai khawp a, a bulah hian a tawlh reng mai a ni. Bawihtei a duat em em a, nau a nei ta hi a thìk mai ang tih a hlâu deuh nge, a hma aiin Bawihtei bulah pawh a awm tam a ni.

Khawvawh lai a nih avangin a zun hi thlâk reng a ngai a, Rsa a che nasa. Âmpuii pawh a exam zo țép tawh a, a zawh hnu lamah chuan a zia deuh tawh ang chu. Kei pawh tunah chuan ka zia viau tawh a, tlèm tlém chuan ka che ve leh thei tawh a, Rsa erawh chuan ka chét a remti bau lo.

X-mas lai vel chuan pâwnah ka chhuak lo reng reng. Inchhung hi ka khawvel a ni takmeuh. Inkhawm tur takngial pawhin ka chhuak thei lo, khua a lo vâwt bawk nen, naupuan kan zâr dul reng mai.

Zanriah eikhamah Âmpuii chu room lamah a tlánchho nghal a, kei pawh rilru hmanhmawh deuh siin chaw chu ka ei sawk sawk a, mahse min rawn koh loh avang chuan tlèm chuan ka ngaih a ngam deuh a.

"Puar deuh khan ei teh, a harh chuang hleinem"

"A harh a hlauhawm em a"

"Âmpuii a awm tho alawm le"

Room-a ka han chhoh chuan a lo pawm a, a lo âwi darh darh a.

"A harhna a rei tawh em? Min lo ko mai lo a nih kha mawle"

"A, a țap chuang lo va, chubâkah pawm hi a nuam ve reng reng a, a hmêlțha si"

"A lian chak i ti ve em?"

"Tehreng mai. Naute neih ve pawh a châkawm mai dawn" fiamthu hian a ti a, a nui pah sâng a.

"Ti ve thuai ula?"

"U D-i hi, tunge min dem ve ringawt a? Ka nuih a za"

"Ka hrereng ania aw, mi fel tak a ni asin"

"Tu chu?"

"Headmaster kha"

"A, a zahthlak. Min duh teuh lo em mai"

"Teuh lo. I fel a, i hmelțha a, a duh lohna tur che a awm lo"

"Keiman ka star ringawt alawm, a 'man' ka tia, U Lily ka hrilh a"zak sen țan țan chung hian a ti sap sap a.

Junior mutna siamțhat pah chuan," Hmeichhia a ngaihven lo em a, mahse a duh ang che tih ka ring tlat" ka ti ve tlat a.

"Min duh pawhin ka ring lo, chutah ka la training zui?"

"Khatiang zawng kha Mama'n a ngaihven ve lo"

Junior chu laksakin ka muttir a, a tâl deuh nain a muhil zui leh nghal mai a.

"A upa ve tawh em,U Mama hi?"

"I u nen hian an inrual velin ka ring"

"A la upat loh chu, a tâwk vel chiah ka ti"

Kumhlui thlah zanah Mama a rawn lang nawlh mai.

"Lo leng rawh, teh nawlh che chuan"

"Nia, Junior hmuh a châkawm leh tawh a"

Kan chhungkua kan kim țhap a, mahse a lâi bìk miah lo.

Ka pu chuan," I lo kal khât lutuk a, ka hai țêp che alawm. Lo țhu rawh, I chhungte an dam țha maw?"a lo ti ve sawk sawk a.

"Aw, kan dam țha e. Ka pu, nang pawh i ţha zel tiraw?"Long chair âwl awmah chuan a țhu a.

"Aw, țha zel e. Mâte, coffee tui tâwk han lumsak rawh, khua a vawh em hi"

Âmpuii chu a tho vat a,a chezia lâi deuh tak chu ka hmuh hmaih lo, a chèt buai loh hram ka beisei.

Junior chu a pain a pawm a, a awi deuh pah a, Bawihtei a bulah a țhu a, mahse a pa phone-ah Moana a en leh a, a nau pawh a ngaihven lo.

"Junior chu en la, a danglam chak teh ania"

Rsa bulah chuan a rawn kal ve mai a, mahse tâwi deuhin," Zán a ni sia, a pawi lovang em ni?"min vèngthawng deuh chung chuan a ti
a.

"Pawi lo turah ngai ang, en rawh"

Âmpuii chuan kan indaih turin coffee chu a rawn siam a, Mama a rawn pe chu a lái lehpek hle.

"Ka láwm e, a tui hmel kher mai"

Sen deuh ap ap hian,"A tui lutuk kher lo maithei, a tak deuh hlek a"a ti sap a.

Mama chuan nui sang pah hian,"Coffee chu a tak a tui alawm" tiin a han dùt hlak a, chuah," Um, tui lutuk tlat, i siam tui hle mai" tiin a fak bawk a.

"Ka lawm e"

Titi pangngai kan sawi a, Âmpuii erawh a ngáwi leh rán tawh. Rsa pawh a țawng tam lo hle a, ka pu nen kan pathumin kan țawng a ni ber.

"Nang pawh Mama, nupui lam hi ngaihven tawh la, i inchâwmzo hle tawh si a?"ka pu chuan a ti hlawl mai a.

"Ka hmu zo lo a nih hi"

"I ngaihven loh vang a ni zawk, hmeichhia chu an tam lutuk. Nupui fanau cháwm thei i ni tawh a, upat tak tak hmaa nupui neih hi a țha ania"

"A dik alawm, ka pu. Nih leh, Âmpuii hi eng nge a an ang?" Nui chung hian a ti a, Mama bula awm a nawm em emna chhan chu a nui duh a, a thinchhe lo bawk si.

Âmpuii chu a sen awp awp mai.

"À, Mâte-i hi chu a la naupang deuh em mai. Chutah, a la training lehnghal a"

"Ka lo nghâk mai ang" Nui chung bawk hian a ti a, a titi dan vel ațang hian Âmpuii hi a lo tháwichhin tawh a nih ka ring deuh ringawt.

"Sawifel nghal mai ang u"

Kan nui dar dar a, Âmpuii erawh chu a lái em em reng mai.

"Zanina ár kanpui atan  pawh ka rawn hual ringawt asin"

"À țhat hlauh chu. Ani pawh a khua a har ve tho alawm, hetah kang mai ula"

Nui chung vék hian," Ka fiamthu a nih kha. Ár kang rual pawh ka nih tawh loh hi"a ti leh a, amah chu a insawisa pah a, kan nui dar dar reng mai.

********************

After 6 months,

"Ânu, bye bye"

"Bye bye,Bawihte. Fel deuha awm tur aw, țhiante hâu miah loh tur"

"Aw le, ânu"

Ka fanu, school uniform ha, hlim taka a chevel hmuh chu a nuam kher mai. A inhmeh kher bawk si a.

"Âpa thu awih bawk la aw"

"Aw le, ka lo haw hunah Junior ka pua ang aw"

"Aw le"

In chung lam ațangin Rsa a rawn tlánthla thauh thauh a, ka hnunga Junior ka puak lai chu fawpin ka hmui a rawn nùl thuak a.

"Bye, vawiin chu ka rawn haw hma ang"

"Aw le, bye, ni hman nuam le"

Bawihtei chu a pawm nawlh a, pawna an chhuak chu ka zui chhuak ve nghal a, car-a an luh hma chuan kan in-bye bye leh rih a.

"U D, ka u nen hian nupa inhmeh tak in ni tiraw? In induhtawn bawk si a,a nawm hmel ka ti"

Ka hnungah Âmpuii a lo ding reng niin.

"E khai, Mama nen in inhmeh daih zawk. In inhmeh ka ti ania"

"Tak tak maw?"

"Tehreng mai"

"Ka u hian a la hre lo tiraw?"

"Ka hre miah lo, kei chuan ka la hrilh miah lo"

"Ka u hian U Mama hi min duhpui pawhin ka ring lo, a ngei hmel țhin hi ka ti a"

"Duh lohna tur a awm hleinem. In induhtawnna a hlu zawk"

"Ka lama i țan avangin ka lâwm e aw"

"I u chu ka hrilh dawn em ni ang?"

"Ngai lo mai rawh se, a la hre ve mai ang chu a"

"Ngaihțha deuhin awm rawh aw, I u chuan a duhpui hrim hrim ang che, ka pu lahin fel a ti nasa mai si"

A nui hak hak a.

"Ka pu hi maw, a tlangval laiin a zei reuh ngawt ang ka ring"

"Zei reuh ang, a titi dan atang hian a hriat theih mai tiraw?"

Rsa chu a rawn haw hma viau mai. Bawihtei a rawn lam haw pah a, an school chanchin sawiin a phùl hlut a.

"I va rawn haw hma ve?"

"Ka rawn haw hma dawn ka tih kha"

"Nia, ka hre tho a"

"Ka chhungkua hi khawiahmah hian ka kalsan rei thei lo che u chu a nih tawh ber hi"

Junior-a mu chu a kutah chelhi a chalah a fawp leh a, duhtawk lo chuan a biangahte a fawp leh a.

"Ka fapa kha i tiharh ang e"

"Ka fapa a ni ve tho, kan fapa tih tur alawm"

"Ka fa a ni deuh bikin ka hria"

"Engvang bikin maw? A siamnaah ka phusa nasa zawk daih sia?"

"Ka pái ania"

Nui sukin," Nih leh, ka tel lovin a piang thei em?"a ti zaih a.

"Maithei"

Ka fiamthu tih a hriatin min rawn pan a, ka kalsawn tur chu ka kawngah min rawn man chat a.


RUATSANGA - 42 By Dingdi Pachuau

Ka rák țhat a.

Ka hmui rawn hupin ka bengbul sétah chuan,"Hettt, Junior i tiharh ang e"a ti sup a, ka beng chu a rawn tháwk khum lum ham ham a.

"Min thlah la?"

"Engvangin maw?"

"Bathroom-ah luh ka duh a"

"Kei pawh "

"Nih leh, lut hmasa la?"

"Lut rual zawk ila?"

"Junior lo harh palh se?"

"A muttui em hi"

"Chi loh, lut phawt la, chuan ka lùt  ve ang"

"Ka thu awih mai la"

Kan lut dun ta nge nge a. Hmai phih tum mai ka ni, mahse hmai phiha ka kun lai chuan hnung lam ațangin min rawn pawmbet chawt a, shower awmna lamah min hruai pheiin a on ta nghal a.

"No, no..., ka huh thei lo. Naute harh palh se, ka samte hi..?"

"A rei dawn lo"

Ka hmai phuan avangin ka meng thei lova, tui rawn phuh sung sung chuan a rawn tlenfái deuh hnuah chuan ka meng thei ta a.

"I pheikhawk kha..ni lo, tih huh chi a ni lo"

"Pheikhawk mai mai"

"I jacket pawh, eng rilru nge....." a hmui chuan ka țawng leh tur hmui chu a rawn chhilh ta hmak mai.

Ka ngâwi ta hmak.

Min fàwh lai cháwl datin," Țawng awih loh" a ti sup a, mi ngawihtír dan hi chu a thiam teh mai ania.

Țawng a awih tawh bawk si lo va,ngawi rengin duhthawh deuh chung chuan kan infáwp mial mial a.

Thawmhnaw kan phelh țan a, ka kawrchung ber hak lai chu ka phelh a, ani pawhin a jacket leh a pheikhawk, suede dum, dak thlarh  mai chu a tlawhphelh bawk a, a pheikhawk chu ka ui lutuk tlat, a leina pawh a la rei lo.

Kan inkeih leh mawlh mawlh a.

Eng nge ni ta? Ka thâwm hriat chu?!!!

Kan inen hnáiin kan inen chiang kher mai.

Junior țap thâwm a ni.

"Ni lo, ni lo, ka thawmhnaw a huh vek si"

Ka phìlì buai teh e, ka thawmhnaw chu hlih vek a ngai bawk si,ka taksaa a beh thlar avangin hlih lah chu a har phian, rum deuhin Rsa chu ka melh a.

"Nangmah váng"

"Ka va tiharh hleinem"

"A harh palh ang ka tih reng kha?"

Țawng lovin bathrobe min pe vat a, ban vatin ka intuam a, hmanhmawh deuhin ka chhuak nghal bawk a.

Thawmhnaw pawh ha hman lo chuan ka pawm a, a hmaite chu a țahna avangin a lo sen vek tawh.

"Engatinge a?"

Room pawnah chuan ka pu a lo ding niin. Tlema tlemah ka che chhe lo chauh a nih awm hi.

"Ka inbualsan alawm le"

"A țap ri kha ka hria a, ka rin âiin a țap rei a"

"E, a lo zung a nih hi"

Ka thlak thuai thuai a, ka pu pawh chu a awm rei hran lo, min chhuksan leh mai a. Rsa chu lo chhuak teh se, a châk lo dawn lutuk.

Nui sùngin a lo chhuak a, kei chu ka nui duh miah lo.

"I tùm khan i lang sexy zual"

He pa hi chu a ngaihna a awm thláwt lo, sexy thlìr hian a thlìr vek ni maiin ka hria. Hahthlâk hian a.

"Sexy ti reng mai"

"Naute hnute i péklái phei khan..."

"Inha thuai thuai la, lo pawm teh, ka inthlak ve loh chuan"

*******************

Rsa sawmna angin ka nu a rawn zin phei a, kan inah a thleng nghal. Junior chu a duh hleuh hleuh hle mai a, Bawihtei lahin a ngaina, a tihzia tak tak a ni. Ka buaina tam takah min chhawkin chét tur a hre bawk sia, a nuam tawp.

Âmpuii pawh an exam a hnái leh tawh a, lehkha a zir ngawrh leh deuh. Mama'n a rawn biak lai hi ka hmu fuh ta zauh zauh, ka láwmpui hle. Rsa hian a hre ve ang em le?. A fing sia, a hriat tawh ka ring leh deuh si.

Zanah TV room-ah ka nu leh kan nulate chuan 'Endless love' seriel an en thap a, Bawihtei erawh a mu fel der tawh, chhùn lamah a infiam hah deuh a ni maithei. Kei chu room lamah naute ka mutpui a, Junior hi chu a fel ve reuh a, mut a duh a, min tibuai lutuk lo. Rsa erawh a office-ah a inkhung  a, Âmpuii'n lehkha a zir thung.

Ka tho leh a, kan thawmhnawho chu wardrobe-ah ka dahlut a, kan nulate hian an sufai a, an thlep a, room-ah an dah chauh țhin. Chu chu keiin wardrobe-ah ka dahlut ta țhin.

Rsa wardrobe lian zet chu ka hawng a, a thawmhnaw chu fel taka ka kháisak hnu chuan khár leh mai ka tum a, mahse thil pakhat hmuh ka nei ta tlat.

Theiriat tlanga kan thlalak bul chiahah khan thlalak dang a lo tár leh tawh niin. Hei chu ka la hmu ngai miah lo, engtik laiin nge a lo hmeh hman le?

Junior hnute ka pe lai a ni. Chu pawh damdawi inah, ka mitte chu a lang bui deuh a, Junior pawh a la tè khawp mai, a pian ațangin a rei miah lovang. Vawiin lama a tár thar a ni ngei ang, a chhan chu nimin lamah ka la hmu tlat lo.

Ka nu pawh a awm rei ta. Rsa'n haw a phal tlat lova, kan ina awm ve mai turin a sawm hial nia. Ka pasal nungchang hi mak ka ti  țhin, ka chhungte min ngaihtuahpui em em mai a, ka pa pawh a tlawh zauh zauh. A hrisèl lo deuh hlek tawh a, zu a in țhin khan a taksaah hna a thawk a, hna pawh a thawk tak tak thei tawh lo.

Âmpuii exam zawh ni chuan tlai lam dar 2 velah a rawn haw a, a chhang țha deuh a ni ang, a hlim khawp mai.

"I chháng țha a ni ang maw? I hlim em mai"

"Aw, țha a ni mai" A hawi kual a, midang a hmuh tâk lohah chuan," U D, thil dìl che ka duh a?"a ti leh a.

"Aw, eng nge ni ta?"

"U Mama'n dinner a show dawn a,a țhian pakhat nen. Chu chu ka u hi ka dìl hreh sia, chuan, ka zah ve pah bawk sia"

"A ni maw? A va nuam dawn ve.."

Lái deuh hian a nui sak phawt a," Kan chhuah dun vawikhatna tur a nia, ka phùr rualin ka huphurh bawk a"a ti sap sap a.

"Huphurh lo ve, nuam deuhin i hmang dawn nia. I u chu ka lo hrilh ang e"

"Ka lawm viau ang. Chuan, U D, eng nge ka hák ang?"

A phùr ve sia, hlim deuhin hmang se ka duh, Mama hi ka duhpui em em, ani aia țha tur hi chu an tam vak kherin ka ring lo.

Tlaiah Rsa rawn haw hmain a chhuak a, a han inchei phei chu a hleitling sia, a nalh zuai zuai khawp mai, ka thlir zui vawng vawng alawm.

Tlaia Rsa lo haw chu a châu a nih ka ring. Kan hmuh lai chuan hlim hmel deuh puin a țawng tho a, mahse ka pasal ania, ka hre ve tho,buaina an tâwk deuh a nih ka ring.

Zanriah kìl lai chuan Rsa chuan,"Ãmpuii hi khawnge a?"a ti a.

Ka theihnghilh chiang lutuk tlat.

"Chaw an eikhawm dawn a nih awm kha, min dìl a, ka phal ta mai. Ka hrilh theihnghilh daih che"

"Vawiin lam a tițha em?"

A nau hi a páwnlamah ngaihsak angin lang lo mahse chhungril lamah a ngaihtuah tih ka hriat hian ka lawm hle a ni.

"Tițha e. A rawn hlim haw viau kha maw"

Ka pu chuan," A, a zir peih em mai, a tițha viau ang" chhuang deuh hian a lo ti ve bawk a.

Chaw eikhamah chuan rei lo tè Bawihtei leh Junior chu a pawm a, a office lamah a lut nghal a,a buai hle tak tak a nih dawn hi.

Eng buaina tak ni ang maw? Sumdawnna lam hi pakhat té mah ka hriatpui ve lo va, min hrilh loh chuan zawh ngáiah dah lo phawt ang.

Office-ah a awmrei hle a, a châu si a, ka ngaihtuah riau asin le. Coffee sa ver vawr hi in se, a chháwk deuh mahna.

Kawngkhar bulah chuan ka ding deuh phawt a, kawngkhar chu a inkhár phui chiah loh avangin a țawng bul bul chu ka hre thei, phone-ah tuemaw a bia a ni.

A țawng chu ka hre țha thei lo, a thùm bul bul tlat, chutah a vìn ták țhawtah chuan ka phu zawk a, ka coffee no kenlai chuan ka kutah inleihin ka thlauh keh chuai a, a sat em avang chuan ka râk țhawt bawk a.

Room ațang chuan a rawn chhuak thuai a, in hnuai lam ațangin ka nuin," Eng nge ni ta?"a rawn ti chùl bawk a.

Ka tha khùr chu tihreh tumin ka kut chu ka hum nghet sauh sauh a. Ka kut coffee sáin min buakna lam chu a sa hum hum mai.

"Engtizia nge? I intina em?"

A hmel chu a lang rum hle mai a, mahse in-control a tum hle tih a hriat.

"Coffee rawn pék che ka tum a, ka thlauh palh ta a ni"

Ka kut chu a rawn vuan a, ka kut chu a sen tawn mai, coffee ka leihna chin chu a hriat khawp mai a, a durh khawp ang le.

"I inleih palh a ni maw? Lokal teh" tiin min kái nghal dawr dawr a,kan room-ah lutin bathroom kan lùt tlang nghal a, tap on-in tui chuan ka kut chu a tlenfaitìr a, chumi hnuah chuan toothpaste lain ka kutah chuan a hnawih ta luai mai a, a sa hum hum chu tlémin a zia deuh.

"A pawi ka ti hle mai"

"Damdawi inah kal nghal ang"

"Hei, damdawi i hnawih tawh reng alawm"

"First Aid mai a nih kha"

In hnuaiah min chhukthlákpui a, ka nute chuan min lo ngaihven vat a, Rsa erawh chuan car a la chhuak thung a,a chèt vut vut avangin ka hnial ngam lo. Ka nu chuan Junior leh Bawihtei a lo ngaihven thei tho turah ngai ang.

Damdawi in ațanga kan lét leh chuan dar 9 a ni tawh, rin aiin Ámpuii hi a rawn haw har tlat, ka phone mai dawn emaw ni le? Rsa lah hi a mood a fuh lo rih ropui mai si a, Mama nen an chhuak tih ka hrilh lo mah mah.

In kan thlen hnu chuan Rsa chu a țhu hle hle thei tawh miah lo. Pawn lam a thlir sek tih ka hmu, Âmpuii hi ka duh aiin a lo haw har tlat. Rsa pawh hian sawi lang lo mahse a ngaih a țha tawh lo tih ka hria.

Rei vak lo hnuah chuan motor a rawn tlân lùt èng ta vá vá e. Ka thaw huai mai, Rsa pawh pawnah a chhuak ta vat a.

Ngaihven lo ang deuhin ka awm nain ka en reng tho. Car ațang chuan Mama leh Âmpuii an rawn chhuak ta zan zan mai. Rsa chuan engtin tak lo dawngsawng ang maw?

A in-control thei ang chu maw. Ka chhuah ve chuan a thinrim leh palh ang tih ka hlau bawk si, Mama hi thìk lo inti viau mahse ka bialpa hlui a nihnaah a thík 'rilru' leh tlat zel bawk si.

Âmpuii lo lut chu a hmel a dik lo. Lo niak ka tum zuau a,A room lamah a lut nghal ta daih  a, ka ngaih a tițha lo kher mai, a kal dawna a phùr tehlul nen.

Pawn lamah chuan Rsa leh Mama chu an indin hnaih khawp mai. Eng tak sawi ang maw?

Rei lo te hnuah a rawn lut a, Mama pawh a tlânchhuak ve nghal a,an inkárah buaina a awm loh hram ka beisei.

Âmpuii room-ah chuan kal ka tum a, thil thleng zawhchian ka duh, a hmél khan ka ngaih a tițha lo a ni. Mahse chhung lam âțangin a kalh tlat, ka ko a, min chháng tho.

"Ka lo lùt lawk thei ang em?"

"U D, naktukah inbe zawk mai ang, zanin chu tumah ka hmu duh lo, min hrethiam rawh aw"

A aw ațang chuan a țap a ni chiang mai. Rsa khan engtin emaw tak a ti a ni ngei ang, a mood fuh lo lai kher a nang chu ka khawngaih kher mai.

"Aw le, tui deuhin mu rawh"

Room-ah chuan ka chho a, Rsa pawh tukverhah a dâk a, ka luh pawh chuan a lo hawi miah lo.

"I țha em?"

A che lo, a din ngai rengin a ding.

"Âmpuii bulah khan thil sawi i nei em?"

Muangchángin a rawn inher a, min melh rùn mai, a țawng miah lo. Mit khap lo lékin min en a.

"Thil dik lo a awm tiraw?"

"Engtin nge i lo zéppui theih zawk a?"

A vìn miah lo, mahse a thinrim tih a hriat, a țawng a sehchilh nak mai.

"Eng chu?"

"Âmpuii leh i bialpa hlui chungcháng"

Ka thin a rim ve phat mai.

Ka bialpa hlui a ni ngei mai, thudik a ni. Mahse pasal ka nei tawh a, Mama hi  kum tam tak liam tawha ka bialpa hlui a ni. Hun kal tawh sawichhuah chhèn hian țangkaina a nei tam lo viau asin, thil țha lam a nih ngawt loh chuan.

Ka chungah hian a thinrim khát viau, a thinrim pawhin a ngáwi reng mai țhin. Mahse zanin hian a dang tlat, a sumdawnna lam ațangin cháu deuhin a lo haw a, phone-ah thinrim deuhin mi a biak tak kha.

Buaina a neih avangin a rilru a hah a ni. Ka thinrimna hi ka tihlan ve chuan thil țha a paw chhuak miah lovang, dawhtu zawk kan awm a ngai, hei hi chu nupa nun a ni réng a ni. Pakhat a thinrim chuan pakhat záwkin a thinrim tihrehna tur a zawng ang chu, inrem taka an awm leh theih nan.

"An rawn haw dun avangin an inngaizawng tihna a ni kher dawn em ni?"

Junior khumah a mu tawh a, muhil mahse thinrima inbia bulah awm turin ka duh lo. A tèt tè ațanga thinrim inháu ri hriattir ka duh miah lo.

"Ani khan ka nau hi a rawn ngaizawng thei lovang, phuba lák tumna a nih hi"

"I ngaihtuah lutuk a nih kha, nula a ni ve tawh alawm"

"Zan tlâi takah an pahnih chauhin an rawn haw ania"

A dik reng mai, mahse an awmsual ang tihna a ni kher chuang lo. Nula tán zan reia haw chu a máwi lèm lo viau, mahse Âmpuii hi ka la puhchhe phal chuang lo.

"A, a la tlái vak hleinem, țhiante nena awmho chuan hun hi a kal chak duh ania, zantin a chhuak țhin pawh a ni lova"

"Hmeichhe tán a mawi lo hrim hrim"

"A dik alawm, a tidik ka ti bìk miah lo, amah ber ber khan ania hrehawm ti dawn ni"

A dam thei ang ber zelin ka chháng a, a nau hi a ngaihtuah a ni ve mai a, hriatthiam a ngai a ni.

"Ka hau a"

Chuvang a lo nih chiah chu, Âmpuii kha a lo țah ni. A u hian a la háu ngai si lova, hrehawm a ti khawp ang chu, ka khawngaih ru kher mai. Rsa mood off lai kher kher leh  a chhuah ve chhuna a haw tlái hun innang chu a fuh lo ve em a ni.

"Hrehawm a ti ngawt ang"

"Kei pawhin ka ti ve tho"

Hei tak hi ka pasal ka duhna em em chu a ni, a thil tihsual hi a pawmin a inchhìr a, sawichhuah a hreh miah lo.

Ka kut na lo lam chuan ka kuah a,a hnunga chùl hoh hoh pahin," I rilru tihah duh suh, a fel vek mai ang" ka ti sap a.

"Ka beisei"



RUATSANGA - 43 By Dingdi Pachuau

Tukțhuan kan ei lai chuan Âmpuii chu a ngawi reng a, a mit pawh chu a bui deuh lâk. Mahse Bawihtei bulah chuan hlim hmèl takin a nui a, a chhaih tho. Rsa pawh a ngawi deuh rán reng a, nizan lam boruak chu kan sawichhuak miah lo.

Kan nulate'n hna an thawk a, kei pawhin Junior ka bualfai a, ka nuin a paw mu nghal. Ka nu lo awm ațangin Junior hi chu ka paw khát viau tawh. Mahse ka nu hi ka khawngaih a, a phal lo chung hi ka paw lui zawk țhin.

Âmpuii biak ka duh tlat avangin hun remcháng ka melh a, room-a a awm lai chuhin a kawngkhar ka kik nghal a.

A lehkhabu a lo remțha malh malh a, ani pawh hian ka hmuh duh chhan chu a haiin ka ring lo.

"Nizan chanchin chu min hrilh tawh la?"

"Ka u-in min háu"

"Nia, a sawi a. Ka zawh tak zawk che chu Mama nena in hun hman dan ania, a nuam bawk em?"

"A nuam ka ti, a felin a polite si. Ka u hian a tluk miah lovang"

Ka nui sak a, hmangaihtu thinlung atang hian engkim hi a fiah țhin rèng a ni.

"A țhat chu, nuam ti deuhin hun i hmang ang tih ka lo ring reng a"

"Ka huphurh deuh kha ania, mahse U Mama felzia chu maw, min ngaihtuah tawp. A țhianpa lo kal ve tura a sawi pawh kha a lo ni tak tak lova, nuam lo ka tih a hlauh vang lek a lo nia"

"Chuan, in pahnih chauhin maw?"

"Aw... chuan,a puitling viau nain ka u anga inla thutak run hi a ni miah lo. Ka kawm rual táwk ang chiahin a awm thiam asin"

A va mak dawn ve. Kan inngaihzawn lai kha chuan a puitlingin kei pawh Âmpuii rual vel chiah hi ka ni ang a,mi puitling tak chèt chauhin a che țhin a nih kha.

"Naupang enin nge min ena nula enin tih ka zawt a"

Âmpuii țhin hi aw. Ka nuih a za angreng, mahse ka nuih duh miah lova.

"Engtin nge a chhán che a?"

"Hmeichhia angin min en thu a sawi. U D, chu chu nula angin min en tihna tiraw?"

"A nih ngei dawn chu"

A nui var var a,Mama chanchin han sawipui zet chuan a hlim lo hmel kha a paihbo chiang tawh khawp mai.

"Kei pawhin tlangval angin ka en a, upa ka tih miah loh thu ka hrilh bawk, a pawi lo tiraw?"

"Chuan, engtin nge a tih?"

"A nui a,'I va cute tak' min ti. Cute tih hi chu a țha lo hran lo nain hmélțha min ti zawk se chuan ka lawm daih zawk ang"

Ka nui lo thei lo. A nungchang innocent lutuk hi a ngainat loh theih loh, Mama pawhin hei hi a hmuh hmaih dawn lo chiang, tunlai nula, a langa inla innocent satliahho a ei loh theihzia kha. Mahse Âmpuii hi chu a bula awm rei pauh leh a chhungril nun a hriat telh telh si, hei hian Mama chu a zunah uaitir mawlh teh se.

"A sawilang lo mai mai a nih chu, i hmelțha a, sawilan ngai  a ti lo a niang"

"An inah min hruai bawk"

"A ni maw?!!!" Mak ka ti tak tak.

"Aw, a nuam lutuk.  A nu leh a pa an lo awm a, ka zak a. Mahse an fel tawp, a pa chuan 'i va hmélțha ve' min tia, U Mama sawi ni zawk se ka ti lutuk a"

Ka nuih var var a, a rilru tur ang chu ka ngaihtuah a, Rsa ka vei ang mai khan Mama hi a vei ve a nih ka ring.

"A room min hmuhtir a"

Mak ka ti lehzual. Vawikhat a lènchhuahpuinaah an inah a hruai a, a nu leh pate a hmuhtir thlap bawk. Mama hian a la thutak viau tihna em ni ang?

"Chuan, kan infáwp a"sen ap ap chung hian a ti leh sap a, zép lah hi a nei si lova aw..

"Thildang thleng a la awm em?"

"Kan infáwp ringawt, engmah dang kan ti lo. A țha lo tih ka hre ve tho alawm"

Ka zak záwk. Kei ve chu a u nen hian inneih hmain, inngaihzawnna lutuk pawh awm lovin nupa chauhin an chen tur kan chèn si a, ka ngaihtuah chhuak nghal lo thei lo.

"A țhat chu. Ka rin aiin i lo haw har a"

"A nu leh pate khan haw an phal rih tlat lo va, an inbul vela an chhungte an rawn léng ve bawk sia"

"I u kha a mood a fuh loh ni tak a ni bawk si a, a huat vang che a ni miah lo ania,hriatthiam tum hram ang che aw"

"U Mama hnenah 'Ka u-in min háu ang, ka haw har chuan' ka tia,ka rawn haw thei hrám alawm, nuam lo ka ti a, ka uin min hau pawh kha a dik ka ti. Mahse, U Mama bulah kher min hau a, a hriat laiin. Ka zak lutuk ringawt"

Nia, a zak viau ang.  An vawikhat chhuah dunna a nia, chutah, a uin a lo haw veleh Mama hriat laiin  a la háu zui. Chi loh lutuk ringawt.

"Ka u hian a haw deuh hrim hrimin ka hria"

Ka bialpa hlui a ni tih a la hre lo a ni chiang mai. Mahse, hrilh ka tum lo, hunin rawn hril mai rawh se.

"I ngaihbel mai mai a nih chu, huatna chhan tur a awm hleinem"

        *******************

Rsa chuan engmah a sawi miah lo, a office-ah a inkhung chawt reng a, ka pu pawh engmah a hrilh lo a nih hmel. Ka pu hi thu țha lo, thu thințháwng lam hrilh chi a ni lo reng a, chuvangin a hrilh duh lo a ni ang.

Káng ka haw vak lo a nih dawn hi, ka kut dam chak dan ațangin, damdawi ka hnawih chu ka ngeih viau bawk.

Ruah a sùr tlawrh tlawrh a, Bawihtei sikul kal a rawn hawnna a rei tawh a, Âmpuii leh Rsa an la rawn haw lo. Ámpuii chu ruah hian a dang a ni ngei ang.

Ka phone a, a lo dik chiah. Ruahin a dan avangin an institution bathlarah a la ding niin. Midang kea kalte pawh an la awm ve tho thu a sawi nghal bawk a.

"Rickshaw ka lo tir phei dawn em ni ang?"

"A ngai lo ang, a sùr báng ve țep tawh ang chu a..midang pawh an la awm ve tho alawm"

Ruah chuan bán zái a rèl lo khawp mai, a baw tlawrh tlawrh mai a, motor khalh pawh a tibuaithlak phian ang ka ti.

Âmpuii a rawn thleng hlawl mai.

"I lo thleng maw? Kha, i huh vak loh kha tiraw? Inthlak thuai thuai rawh, i damlo palh ang"

"Ka u a lo haw tawh em?"

"Ani pawh hian a sùr tlèm deuh hun a nghak a"

"U Mama'n min rawn lam a"

"Ni maw?!! A va fel ve!"

"A fel ka tih tawh kha"

"Kawtah a rawn tlánlùt lo em ni?"

"Aw, ka u lo haw tawh leh tawh loh ka hre si lo va"

A fing ve tlat.

"A thinrim tawh kher náng"

"A mood off lai a ni leh thut thei sia"

"U Mama chuan eitur min rawn leisak bawk a. Țhiante pawh chuang ve turin a sáwm asin"

"An rawn chuang ve em?"

"Aw, an lái hlawm lutuk"

"A changtunu ber chu a hmaah i rawn chuang ta a?"

"Aih, a hnungah kan chuang vek"

Mipa rilru țha lo deuhin an ngaizawng ang tih a hlauhawm. Ani a rilru a thianghlim si a, an tihchhiat vek hnuah an kalsan leh si ang a, mahse Mama hi chuan chutiang rilru chu a put loh ka beisei, hmana a rilru kha a la thlák loh hram ka beisei.

Zanah mutnaah chuan min rawn hnaih sat sat a, ka lo muhil sek a nih ka ring.

"I muhîl ami?"

"Ka lo chhîng sek hman a nih áwm hi"

Min rawn kuahin a ke sei thlurh chuan min rawn khan nghal a. A intleuh zawh chiah avangin a taksa chu a vawt thlur mai.

"A váwt ania"

"Ka kuah lum ang che"

"Min kuah vâwt zawk"

Min thlah chuang lo, min kuah nghet tak sauh sauh a.

"Engatinge thil awmdan hi min zawh duh miah loh a?"

"Min hrilh loh chuan ka hriat a ngai lo ah ka ngai mai"

Ka ngháwng a rawn nawr chák chák a. He pa hi min tiharh leh zo vek dawn, ka mut a chhuah tehlul nen.

"Sumdawnna lamah buaina kan nei a, mahse tunah chuan kan tifel tawh tluk a ni"

"A harsa viau ang tiraw?"

"Rin aiin a lo khirh a"

"Mahse in tifel tawh tluk a nih tawh chu"

"Nia,hnathawk pakhatin pawisa a lo tichingpen deuh a, chhui a har khawp mai"

"A nih tak chu, chu pa chu engtin nge in tih dawn?"

"Ka hre rih lo, an chhungkuain harsatna an tâwk a"

"A va zia lo lehzel ve le"

"Ka khawngaih bawk si, a thil tihsual hi a țha lo bawk si"

"Ngun taka i ngaihtuaha țha i tih dan ber khan thutlúkna i siam dawn nia"

Ka ngháwng fáwp zohin,"Ka nupui hi a sexy ringawt lo va, a lo fing tel a nih hi"a ti sup a.

"Infak nan chuan zan a rei tawh ania"

"Nih, tuna tih ka tum mèk tih nan hian?"

"Ka mut a chhuak tawh ania"

A kut chu ka nightie chhungah a rawn zen lùt zál zál a, ka múr chiai chiai mai.

"I muthilh ka phal bìk rih lo"

Ka muthilh chhuak chu a reh chiang ta kher mai. Rsa hian muthilhchhuak tihreh dan chu a lo hriat khawp hi, zanin chu a buaina a kiang dawn hnái ta bawk a, a che vèl pawh a phùr sarh sarhin hah thei lo ang maiin ni a chèt ni.

"Junior kha a harh lo maw?"

Harh lo a nih dawn hi. Tháwm kan dim loh tehlul nen, a tihzia phian.

"A mak tiraw? Zan dangah a harh hma țhin nen"

"A hrethiam ve tawh a niang"

A hmel ka en chuan a lo nui sùng a, a fiamthu tih ka hre chiah.

"Âpa buaina tawh a táwp dawn tawh sia,a lawm nan hrethiam rih mai ang' a ti a ni ang"

"Min chhùn dawn a ni ang?"

"Ni lo, a chhùn che a nih chuan ka rilru a hah țhin lutuk ang, chhùn lo hrám che rawh se"

"Ka lèrh viau lo"

"Mahse i nghal.."

Nghet zetin min kuahbet leh nghal vat a. Ka nui kar kar a,chu chuan a tiphùr leh sauh a ni ang, a ke pahnih chuan min kherhbet leh bawk a.

"Min thlah teh, ka thaw thei lo"

"Zanin chu ka chanpual liau liau i ni"min kuah nghet vak ta lo ve.

"Zan dangah pawh ka ni tho alawm"

"Ni lo, Junior i ngaihsak zawk țhin kha"

"I fapa i thîk elo?!!"

"Thîk lo, mahse zanin chu.."tiin ka áwmbáwr chu a khál nauh nauh a.

"I thîk tè sáwt e"

"Ka thîk lo ka tih kha"

"Hmmmmm...."

"A hmaa ka tá ni țhin, a pumbilh ta vek hi chu ka thîk țép"

"Pa ber hi zanin chu a naute ber a nih áwm hi"

"Ka pangchan ve theihna i ni miau a"

Inherin, kan inen ta rán a, tawlh hnáiin a hmuiah ka fawhsak a.

"Ka duat ber che alawm"

"Bawihtei pawh, Junior pawh"

Ka nui lo thei lo. Bawihtei ang mai a ni.

"Ka pu pawh, ka nu pawh, Ampuii pawh"

"Âmpuii hian min hua em?"

"Ngahnge a huat ang che? A u i ni alawm"

"Ka háu sia?"

"Inzilhháu chángte chu a awm ve ang chu"

Ka hmuiah a rawn fáwp ve thung a.

"Mu tawh rawh le"

"A chhuak tawh rih lo"

"Tihdan ka hria"

Tihdan chu a lo hre leh tak tak mai. Rilru hlim taka, cháu hnèpa nupa nun chen chuan a chauhthlak a, mut a chhuak ngawih ngawih mai.

"Muttui sùk sùk aw"

A aw chu ka hre ruai ruai chauh a ni tawh, ka aw pawh a chhuak thei tawh lo, ka mumang nen a inzawm nuai tawh mai.

Zanah pawh ka harh lo nia, Junior diaper pawh amah vekin a lo thlak a nih ka ring, ka va mutui tehreng em..a zahthlak zawk lek lek.

Zingah erawh chuan Rsa ka thawhkhalh ve khiah mai. Ka kaitho duh lo, rilru hah reng rengin, buaina chinfel tumin zánah hun a hmang țhin a, tukin chu a duh chen chen mu teh se, a rilru a hahdam deuh tawh a,mut pawh a mu tui tawh ngei ang.

Junior erawh ka thawhpui nghal daih, kei aiin a harh hma zawk a, in hnuai lamah walker-ah chuantìr ang.

Midang chu an lo tho vek tawh a, Bawihtei chuan Junior chu a nawr a, a chhaih pah bawk a, an nui khèk rawi rawi mai.

Ka pu chuan," Engati tehtlat nge  Rsa hi?"a lo ti vat a.

"A, a duh chen chen mu teh se, a cháu a ni ang"

"A damțha tiraw?"

"Aw, a thla a muang deuh tawh a ni ang"

"Buaina a nei em ni?"

"Nei tawh lo e, a chingfel tawh a"

"Ngatinge min hrilh loh le aw...?"

"A, ka pu, i tupa hi a fing alawm, ngaihtuah reng reng suh. Patling a ni ve tawh a, a hmaa harsatna awm chu a chingfel tur alawm, a puitling zual sauh mai ang"

"A dik reng mai. Ka lo ngaihtuah leh lutuk țhin a, patling deuha han en thut hi ka thei lo leh țhin alawm le"

Chaw ei dawnah kan room-ah káitho turin ka chho. Khumah chuan a lo țhu tawh a, a la tho chhuak lo a nih hmel.

"E khai a, kan naute chu chaw ei a hun tawh asin, ka rawn kaitho dawn che a"

A ban rawn pharin,"Min káitho la" a ti sup a.

"Pangchang thei bawk sia maw"

Thawmhnaw engmah a inbel loh avang chuan a boxer ka pe phawt a.

"Min hâktir law law la"

"I hák chhungin ka lo maimichhìng ang"

"I hmuh hnu vek, ka zak hleinem"

"Ka zak alawm"

Nui suk chungin boxer chu a ha a, a kutah chelhin ka kaitho a.

"Tukin chu ka cháu"

"A țha lo viau asin"

"Thahrui ka mamawh"

"Over lo teh"

"Min fáwp phawt"

Ka fawh hnu chuan a ding khawng ta vat a.

"Recharge hi ka ngái țhin reng asin, vawiinah pawh ka chauh deuh chuan 'recharge' ka rawn ti anga, rawn kal vat ang che"

"Hmanhmawh mai teh, nangmah chauh kan nghak che"

A intihfai chhung ka nghak a, a rawn chhuah chuan zawi zetin min rawn kuah a.

"Recharge"

"Chimawm viau teh suh"

"Recharge"

Ka fáwp leh ta nge nge.



RUATSANGA - 44 By Dingdi Pachuau

Ka kut pawh a dam chiang ta, a ser erawh a awm lo thei lo. Mahse a dum lutuk lova, a zia deuh.

Junior pawh a bawkvák kual nasa tawh mai a, hrisel lohna a neih lem loh avangin a chak a, a chum tho bawk si a, ka fapa mah ni se a lawmawm ka tiin hmelțha ka ti lo thei lo.

A pa pawh a hrechiang ve tawh a, a lo haw hi a lo pan vat țhin, a pa tán pawh a ngainat loh theih lohva, Bawihtei a lo tel ve phei chuan an bengchheng thei khawp mai,mahse ka tán chuan rimawi, máwi tak ang a ni.

Sum chingpen avanga buaina kha an tifel thei ta a, a tibuaitu ber kha Rsa'n a bán miah lo nia. An chhungkaw boruakin a zir loh lai a nih avangin leh chhungkaw cháwmtu ber, eibèl ber a nih vangin, a chhawr chhunzawm a, pawisa a tihchingpen pawh rulhtir loh a tum viau nain chu pa chuan a lawmthu sawi nan a rùl leh vek ang tih a tiam a, Rsa pawhin a aw ve ta mai.

Ka nu pawh a haw phei tawh. Rsa'n a phal lo khawp mai a, mahse a bungruate pawh tihfel a ngai a, chumai bâkah fanu pasalte chhùng awmfin ringawt a duh bìk lo a ni.

"Enkawltu a nei lova, amah ringawta awmtìr hi chu a fuh lo"

"A, hrethiam teh. Amahin a lo awmrei ve tawh a, chubákah a lo zin leh ngai dawn tawh lo tihna pawh a ni hleinem"

"Kan bula awm hi hrehawm a ti a nih ka ring"

"Ti náng. Nuam a ti lutuk"

Ka nu awm lo chu kei tak hian ka buai phah. Fate hi chu kan nulate kuta dah ka duh lo, keimah ngeiin buaipui chhoh vek ka duh a ni. A zia riauna chu zìng kára ka buai laiin pa berin an pahnihin a lo awmpui țhin a, Âmpuii erawh lehkha zir se ka duh țhin avangin tihbuai ka duh lo thung. Ka pu pawhin a chángin Rsa chu a lo pui ve a, mahse ka pu hi chu a derdèp ve tawh a,naupang pawma han chhaih kual zawr zawr chi pawh a ni tawh lo.

Rsa hi titi bawrh bawrh chi a nih loh avangin Âmpuii pawh hi a be tam lém lo khawp mai. Âmpuii erawh hi chu a țawng duh a, a ri barh barh reng thung. Máma nen an inzui hi a fuh bawk a ni ang, a hlim hmel sarh reng a, tihtur reng reng phùr takin a ti țhin.

Máma chungchang hi kan sawichhuak khát hle. Âmpuii erawh hi chuan min hrilh leh sar sar țhin a, a u hriat hi chu a hlau thei khawp.

Lily pawh Vra nen chuan an tluang viau a,Vra phei chuan inneih tawh mai a duh niâwm tak a ni. Mahse Lily chuan a hnial rih thung, an inngaihzawnna a la rei loh mai bákah mi ngaihah pawh a máwi lo a ti tlat a.

Thawhlehni a ni a, vawiin chu vanneihthlak deuhin Âmpuiite pawh an châwl a, training eng emaw zirtirtuten an nei dawn a ni.

September 25 a ni a, Rsa birthday a nih avangin surprise ka duh a, Âmpuii pawh a lo phùr khawp mai. Chhun lamah Tepuia-ah cake ka order chu kan lam phawt a, gift tur kan enkual leh nghal bawk a. Restaurant-a kan chawlh laiin Máma a rawn kal ve nawlh mai a, Âmpuii nen an lo intext a ni ngei ang.

"U Mama hi chawlh a duh ve tho sia, ka sáwm a"

"A țha alawm. Ka kalsawn rih dawn em ni ang?"nui chungin ka ti na a, ka ti tak pah tho.

"A ngai lo, thil ei turin alawm ka lo kal..chuan, ka naute hi ka hmu chák bawk a"

"Induat lutuk rih lo ula, ka awm ve reng hi"

Kan nui tak nain an kut invuan chu ka hmu ru reng. An inthlahlein an induhtawn tak tak a nih dawn hi. Âmpuii hi chu ka hrethiam mai a, Máma hi a mak ka ti deuh hlek. Puitling viau si, tuna a awmdanah hi chuan tleirawl ngaihzawng nei hlim inthlahlel an sawi ang chiahin a awm tlat. Ka lâwmpui em em a,inngaizawng mai mai lovin nghet se, innei daih se ka duh.

Kan eiman zawng zawng chu Máma'n a pe vek a, zia lo chu ka ti angreng. In thlenga min thlah pawh a huam viau a, mahse chawhnu țan a hun leh tawh dawn a, noon break a zawh țèp tawh avangin ka hnial a.

Zanah chuan Tv room-ah kan țhu țhâp a, Rsa chuan Junior a pawm a, an inchhaih nui leh hak hak țhin a, Bawihtei pawh tel vein, an pafaho inchhaih chu nui sáng hian ka en reng a.

Âmpuii chuan min kheuh zohin," Engtikah nge cake kha kan zaitir dawn?"a ti sar sar a.

"An inchhaih hlim rih lutuk a, nakinah ni mai rawh se"

A hnuah chuan"Hlim viauin nuamti viau mah ula,Junior kha ka lo paw mu tawh dawn em ni ang?"ka ti ta ringawt a.

"A pawi miah lo, mahse a mut a la chhuah loh hmel riau"

"Puak chuan a dan a dang mai ang"

"A nih leh le. Naute, ka puak ve i duh em?"

Phùr zet hian," Aw, duh. Yes, âpain min paw dawn" tiin a zuang tar tar a.

"A puakna tur chu inchungah a awm daih a, i han la mai dawn em niang?"

"Um, a awmna tak min hrilh la"

"Drawer-ah khan a awm ang, a páwl kha aw"

A chhoh hlan chuan Ámpuii a che nghal vat a, light kan off vek a, Bawihtei chuan a hrethiam lo khawp mai a, a thim avang chuan min kuah tak chawih chawih a.

Mak a ti teh asin aw!!!. Kan surprise ve chiang khawp mai, Bawihtei pawh a phùr ber berah a țang a, a au chèl chùl mai.

"Ânu, ka birthday láwm ve ang u, âpa cake ang kha ka duh ve aw, kan lawm ve hunah"

"Tehreng mai, kan lâwm chiang ngawt ang. Engtikah nge lawm i duh?"

"Naktukah"

"Aw le,âpa cake order tìr nghal ang aw"

Hlim takin hun kan hmang, Rsa pawhin a rin loh lutuk anih vang a nih ka ring,a nui ve vur vur reng mai.

Mut dawnah chuan nightie thar ka lei nen bathroom-ah ka lùt a, ka intleuh zawk a, nightie ka lei thar chu a sexy reuh a, ka hák pawh chuan ka inpawt ka inpawt mai. Mahse zanina hák atan ka lei a ni a, ka pasal hi birthday present hlimawm pèk ka duh miau si a.

"D, gift min pék tur chu ka hmu châk tawh ania"

"Aw, ka lo chhuak dawn"

Ka hmui chu lipstick sen hlar ka hnawih a, make up ka hman khát avangin ka confi tehchiam lo náin zanin na na na chu ka pasal hi ka tiphu zawk duh. Darthlalangah a tawp nan ka inthlek leh phawt a, zawimuangin room-ah chuan ka pèn lut ta a.

Ka chhuak chu min lo en nghal chat reng a, mak a tih viau ka rin tehlul nen, a hmelah chuan makti hmel pawh a pu lo, a mit erawh a la sawn miah lo thung.

A sexy thei ang bera ka hriat chuan ka'n meng vel a, mahse kei pawhin amah chauh chu ka en ve ngar ngar tho.

Zawimuangin khuma a țhu mu chu ka pan phei a, zanin chu vanram tlafual an tih ţhin ngei kha chentìr ka tum tlat.

Keimahin chèt ka la hmasa zel a, ka duh dan angin ka che zèl. Zan dangah chuan amahin min tiphùr a, zanin chu keimah zawkin țan ka la ta thung.

Zawi zetin a chungah chuan ka bawk thlar mai a, țawng pawh ka tawng peih lo, thahrui ka nei tawh lo ni berin ka hria.

"Zanin zet chuh....birthday thilpèk ka hriatah a la hlu ber maiin ka hria"ka hnárah chuan a fawp zoh a, ka che peih lo.

"Sexy deuh pawh hi an lo cháu ve thei tho a nih áwm hi"

Ka nui sak a, ka mut chu a rawn chhuak selh selhin ka hria.

"Um, tihian muhil mai rawh aw, ka nupui sexy zet hi a cháu takzet a nih hi, muttui suk suk aw"ka chalah a fáwp vang vang a, ka che peih tawh thláwt lo, chakna ka hmang zo vek.

Tlai khat chu Rsa chu a lo haw har phian mai. Hna pawimawh leh laklawh thil a awm chuan min rawn hrilh thlap țhin si a, ka ngaih a țha lo angreng, biak ka tum a, a tlang thei miah lo.

Ka ngaih a țhat loh deuh avangin U Fela ka phone ringawt a, ani chuan nichin deuhah a chhuah tawh thu min hrilh a, ngaihțha lo turin min hrilh ringawt a.

A rawn thleng har phian. Chaw ei turin kan lo nghak țhap a, ka pu phei chu a thin a rim lek lek mai, a ngaihtuah tih ka hrereng.

A rawn thlen chuan a car chu amahin a rawn khalh miah lo tih ka hmu a, tin, a kutbawr dinglam a tuam tih ka hmu nghal bawk a.

A rawn luh veleh chuan," Ka ngaih a țha lo deuh a, ka phone tlang thei miah lo bawk che nen. Engtizia nge ni ta?"tiin a kut chu ka thlék zauh pah a.

"Nia, ka phone ka tichhe daih alawm"

"Âpa, i kut a na ami?"

"Ka tina palh alawm, Bawihte. Tunah chuan ka tuam a, a dam vat mai ang"

Ka pu chuan," A lo nih mai mai chu. Kan ngaihtuah che alawm, fimkhur tur asin, naupangchhia ang maia fìmkhur lo a chèt loh tur. Um, chaw ei siam tawh r'u le" a ti vat a.

Chaw ei chu a harsat viau, engtin nge maw chutianga na a a tih theih le? A veilam a hmang thiam deuh hlauh chu a tihzia.

"Engtin tak maw i tihnat a?"

"Ka tipalh ka tih chu"

"A na viau em?"

"Ka tuar thei e"

Na viau mahse hetiang báka min chhán hi ka ring lo hrim hrim.

"A țhat hlauh chu. Tuarpui i ngái ang tih ka hlâu a"

A țhen suk ringawt.

Tláia Âmpuii lo haw chu a țawng tam lo hle mai. Ni dangah lèm, a țawng bawrh bawrh zel si a, eng emaw thil thleng a awm chiang, an class-ah em ni ang? Nge Máma nen an inkárah zawk?

"Buaina a awm em ni?"

"Ka thin a rim lutuk"

"Awhaw... engvangin nge ni a?"

"Ka u hi ka ngei em mai"

Engtizia nge ni ngai?!!!!

"Máma hmuh laiin a hau leh che em ni?!!"

"Aih"a ti phawt a, chutah,tháwk la hap pah hian," U Máma a hnek alawm"a ti zuai raih a.

E heu!!! Ka thu hriat hi eng nge ni ta ngai???!!!!

"Eng maw?!!!! Engtikah ??? A va mak dawn ve!!!"

Thil mak tak chu a ni.

"Tlái deuha kut nâa a lo haw tláiah khán"

"Engtin maw? Engtin nge i hriat a?"

"Vawiinah U Máma ka kan alawm, a khabeah a hneksak a, sikul pawh a kal thei lo"

"Engvang nge ni ta ang le?!!"

Thinrim deuh hian," Ka u chu a lo haw veleh ka záwt ang, U Máma hi chu a haw hrim hrim alawm"a ti leh tân tãn a.

"Keiman ka lo zawt dawn záwk em ni ang?"

"Nia, kei ai chuan a hrilh duh zawk ang che. A zahthlak ka ti tak tak a ni"

"Ka u hi chuan kei pawh hi min ngaina lo, U Máma a ngei chuan kei pawh min ngei ngei ngei ang. A nungchang lah hi a nélawm loh ropui si, engtin nge pasalah i neih duh zawk le?"

A thinrim rih em avang chuan engvak ka sawipui lo, fiamthu pawhin ka chhaih duh lo.

"A zahthlak e"

Dik chiah. A zahthlak alawm, patling inhnekte chu, khawiah nge maw an lo intihbuai a,eng thu-ah tak ni ang maw?

Phone pawh kha, an insualna lamah an tichhia a ni hrim hrim ang. Ani hian engmah min hrilh miah lo mai a, a thiam loh a ni ngei ngei ang.

Rsa lo haw chu ka han thlìthlái ru deuh a, mahse a hmèlah engmah hmuh tur a awm lo. Junior erawh a duh angin a pawm țha thei lo va, a ninhlei ve tawh si a, a kut na chu khawihsak a tum zel avangin a pawm rei hlei thei lo. Bawihtei lah chuan a kut chungchang chu a lo zawt ve sek bawk a. Âmpuii erawh room lamah a inkhungbo daih a, a u hi a hmu duh rih lo niin ka ngai. Zanriah ei lai erawh chuan a țawng tho a, mahse a u chu a be lo reng reng, en pawh a en lo.

Room-ah Junior ka mut a,ani pawh zanin chu mut hma a tum a ni ang, bathroom-ah rei lo te a lùt a, khumah a rawn láwn ta mai.

"Zanin chu mut i va tum hma ve?!"

"Ka mut a chhuak alawm"

"I kut kha engtin maw i tihnat?"

"Ka tipalh"

"Tak tak a ni em?"

"Aw"

"Nih leh, thil thleng eng emaw min hrilh loh i nei mial em?"

"Maithei"

A sawi țhat loh danah hian eng emaw chu a awm chiang a ni. Chuan, țha takin min hrilh dawn lo tih ka hre bawk, midangin an hre maithei a ni. Ani hi chuan ka tâna tangkaina awm lèm lo hi chu min hrilh vak ngai lo, tunah Máma nen, buaina an nei a nih phei chuan min hrilh lo tawp ang.

Âmpuii chu thil awmdan chu ka záwt leh a, ani pawh chuan a hrechiang bìk lo. Máma'n engmah a sawi duh bawk si lo, a hriatchhuah theihna chhan pawh kana a zu kal khan a nuin a lo hrilh luam a, mahse a hnektu chu a u, Rsa hi a ni tih a lo hre miah lo.

Chutiang a nih chuan tunge hre ta ang le? U Fela'n a hre mai lo ang maw? Ani pawh hian a sawi duh kher ang em?

Hriatchian a ngai a ni.

Mahni pasal thiltih midang zawh daih pawh chu fuh zán lovin ka hre bawk si. Mahse, amah ber ka zawtchhuak thei bawk si lo. U Fela zawhchhin chu a pawi lo ber ang, anite chu midang aiin ka nèl a, ka hriatchian ber pawh a ni.

Hun remchang hmasa berah ka zawt ta a. A tìr chuan ani pawh chuan a hriatchian bìk loh thu a sawi phawt a, mahse zawh dan ka thiam ve tlat, chhimbudawi a ngai.

"Khami ni khan Office-ah Mama a rawn kal tiraw?" Ka zawt risk.

"Aw, kal e"

"Eng nge a lo tih a?"

"Ka hre miah lo"

"Rsa nen an inhmu lo em ni?"

"E, hmu turin a lo kal tak e"

A fuh dawn e.

"An inhmuh hnuah eng nge thil thleng a awm em?"

"Pu khan Máma kha a hnek a"

"Engvangin nge a hnek a?"

"Ka hre chiah lo, an sawi kha ka hre tlat lova, chutah hna kan thawk țheuh bawk sia"

"A nih tak chu. A zia lo tak tak a ni"

"A hnekna lamah khan a phone kha a titla keh vek a, mahse Máma khan a hnek lèt ve miah lo, chubákah  kan tlánkhawm thuai a"

Va zahthlak tak. Engvang ber nge ni ang?

"Chuti, ka lo phone lai che khan 'nichin deuh khan a chhuak tawh' i ti bawk sia?"

"Nia, damdawi inah an kal ve ve a"

Thil awmdan chu hriatthiam a har takzet. Rsa'n a hnek te te a, damdawi inah an kal dun leh bawk sia, eng thil nge ni ngai le?

An pahnih lah chuan an sawichhuak duh lo ve ve bawk si. Pakhatin a kut a tina a, pakhat lah sikul a kal loh phah bawk.

Huizzz, ka thluak a buai zo.

(Nizanah net signal ka nei thei lo, min hrethiam hram teh u)




RUATSANGA - 45 By Dingdi Pachuau

(Edit loh, chhiar dan lo thiam mai ru)

Engtin nge ka tih ang aw? Pawi lo, zanah, a remchán veleh ka zawt leh tho ang.

Zanriah eikhamah chuan Junior chu a pawm leh a, Bawihtei a awm ve bawk a,Âmpuii nen chaw kan la kìl a.

"Ka u chu i zawtchhuak thei ta em?"

Lu thing nar nar pahin,"Thei nang, a sawi duh miah lo"ka ti sar sar a.

"U Máma lahin a sawi duh bawk si lo va, naktukah ka záwt leh chhin ang"

"I kan leh dawn tihna maw?"

"Um, min hrilh hma chu ka kan char char ang a, amah kar nan ka hmang zaih dawn alawm"

Kei aiin tihdan a hre tlat mai.

"A țha viau ang. I u luhlul zet hi chu ka zawtchhuak thei ngùtin ka ring lo, Máma erawh hi chu a luhlul lo deuh a, i hrechhuak thei maiin ka ring"

Zan mutnaah hian dinglam sìrah a mut țhin avangin a kut na chu tawhpalh a hlauhawm lo va, tawk palh chhin ila, a chhan dik tak min hrilh tura zawh ka chák asin le. Mahse han zawh deuh chhén pawh ringhlel chan ka chang deuh ka ti bawk sia, a thinrim ang tih ka hlau tho bawk si.

Junior ka mutpui a, ka zái pah rat rat a. Rsa erawh office-ah a lut leh daih tawh a, a hna țùl thawk leh turin. Ka tibuai ngai lo, a hna chungchang phei hi chu hriat ka nei lovin min hrilh loh chuan engmah ka zawt ngai lo.

Dìm tèin kawngkhar a rawn hawng a, ka lo en duh miah lova, Junior a la men deuh kar avangin ka zái chhunzawm zel a, ka hla phuah ngei mai hmang chuan zawhna ka zawt a.

"Engvangin nge a kut a tihnat?
  Zawt ila,min chhang ang em?
 Lèng dang a chhái váng em ni?
 Nge Țhadáng a cho sual em ni zawk?"

Junior hnung chu ka bèng thap thap pah a, a nui huk chu ka hria. Ka táwp duh lo, ka sa char char a.

"Țhadáng chu ka cho sual lo aw"

"Țhadáng cho sual lo a ti maw?
 A țha vál lèng zawngte'n,
  A thlunglu an tihai  em ni zawk?"

Sa pah chuan ka nui ru char char a, mahse ka nui ri chhuak duh teuh lo.

"Hla phuah i va'n thiam"

Ka chháng duh lo, ka hlasak ngai chu ka sa leh a. Junior mutna lamah chuan rawn kal hnáiin a biangah a rawn chuk zoh a.

"Ânu hi mipa buaina kan hrilh ve duh ang em?"tiin a be pah a.

"Min hrilh ve tho la, inhrilh loh chu a inrinlohthlak e"

"I hre chák e mai a..."

"Ka hre chák alawm, mi fìmkhur lo tak i ni lo va, i kut tina khawpa i chetsual ka ring lo bawk a"

"Mi ka hnek ti ta ila?"

"Engvangin?"ka lo ti vat a.

"Mi kan hnek hian engvang nge ni țhin a i rin?"

"I thinrim vang"

"Dik chiah"

"Țha deuhin min hrilh ve mai la"

"Ka kut nat chhan chu mi ka hnek, ka thin a tihrim avangin. Țha em?"

"I thin a tihrim chhan chu?"

"Ka duh loh zawng a sawi avangin"

Hm, a sawi țha duh lo si, ka záwt peih tawh lo, ka duh anga chipchiar takin min hrilh dawn lo.

"A țha lo em mai a.."

"Thil țha inzirtir tur chuan tharum hmante a ngai țhin a"

"Awi, rapthlak, ka hláu e a.. Junior, nang chu ti ve hauh suh aw"

A nui leh huk huk ringawt a.

A tuk tlaia Âmpuii lo haw chu a thin a rim lehpek khawp mai.

"Ka hrechhuak tawh a"

Ka rindan chiah a ni, Máma hi chu Rsa anga luhlul a ni ve lo, a rilru a nèm deuh.

"Engvang ber nge lo ni a?"

"U Máma'n ka u bulah min date a lo dìl a, chu chu ka u chuan a lo remti lo a ni awm e"

"A hnek tákna chhan chu?"

"Chu lai tak chu a sawi  ţha duh lo. Mahse, engtikahmah ka u vánga min țhen a tum loh thu a sawi a, a taksain tuar dawn pawh ni se"

"En teh, chuti a nih chuan Rsa'n a hnek chhan chu ka rindan chuan, kalsan tur chein a ti anga, chu chu aniin a lo hnial a ni ang"

"Chu pawh ni se, kutthlak kher te chu a..mipa inti ve ve, kei ni ta ila, kutthlak zawka țan chu ka duh miah lo vang"

"A tirah chuan a sawi duh miah lo va, mahse class kal lovin ka kan ziah dawn tih ka sawi hnuah chauh tlèm tè kha min hrilh a, chuan țha taka class kal turin min hrilh leh ringawt"

"Nia, class i kal loh chuan amah a inthiam thei dawn lova, i tihchhiat phei chuan hrehawm a ti dawn lutuk"

"Ka u hi alawm, a ti ang lo lutuk a"

A u chungah hian a lung a áwi thei  thláwt lo ve.

"U Máma a duh theih lohna chhan hi ka zawt tawp tawh dawn"

"A duh lo a ni bìk lo ang, nangmah hi training lai i la ni bawk sia, i zirlaiah i bahlah phah ang tih a hláu a niang"

"Kei pawhin bahlah chu ka hlau ve tho. U Máma min duh lehzual theihna tur hian țha deuha tihzel pawh ka tum ve alawm. U Máma hi fel lo chu ni se, lo duh lo se ka hrethiam. U Lily, nang leh ka pu pawhin fel in tih kha ania, ngatinge ka u hian a duh ve theih tlat loh?"

"Zanah ka zawt dawn"

Zanah  office-ah Rsa awm laiin Âmpuii chuan a kalchilh tak tak. Ani pawh hi a u ang tho, luhlul ve pangngai reng.

Junior a muthilh tawh avangin Bawihtei nen kan room-ah kan awm a, khumah chuan Junior bulah kan mu ve mai mai a.

"Ânu, Junior-a hi engtikah nge sikul a kal theih ve ang?"

"Ihhh,class 2 i nih hunah a kal ve thei tawh ang"

"Chu chu engtikah nge?"

"Tunah kg 1 i ni a, kg 2 i ni leh ang, chuan, class 1 i ni leh ang. Chumi hnuah chuan" ka kutzungtang hmangin ka hrilh pah a.

"Chu chu a ni har ang em?"

"Dam chuan a lo thleng vat mai ang. Junior a kal thei ang a, nangmah anga a țawng theihte a la ngai a, chuan, zun a cheh loh hun nghah a la ngai bawk a"

"Ânu, kan sikulah pawh zuncheh an awm asin"

"A ni maw?!"

"Aw, Miss-in a kekawr a sùksak a"

"Nih leh, nang i cheh ve em?"

"Aih, zanah pawh ka cheh ngai miah lo"

"Um, nang chu ka fanu hmelțha leh fel kha i ni tlat a"

"Âni pawh a hmèlțha tiraw?"

"Aw, âni pawh, âpa pawh, Junior pawh"

Ka hmái chùl pahin," Ãnu pawh"a ti leh a.

A sam chùl pahin," Zanin chu kan bulah riak ve la"tiin ka sáwm a.

"Âni a lung a lèng ang"

Ka sáwm hlawhchham. A ní hian a duatin a mutpuina a rei tawh a, chuvangin a áwm ve tho.

An unau chu an rei riau mai.

Bawihtei a muthilh tawh avang chuan A nì room-ah chuan ka pawm thla a, a mutna turah ka mut fel diam a. A muhil hmel, țha sir ser deuh chu ka thlìr deuh reng a.

Âmpuii a rawn lùt a, ka awm chu a beisei lo a ni ang, a insùt deuh hlap hlap a.

Eng thil nge thleng hi???!!!

Min hmuh veleh chuan a inhup vat a, ka hmuh theih lohna tur lam a hawi nghal a.

"Eng nge thil awmzia le?"

A țah chu a chhuak hle a, mahse a insùm nasa hle.

"Ka u hian min hmangaih lo, ápa leh ânu pawh a hua"

Chhe hiau!! Hei thleng thleng chu an sawi kâi ka ring pha lo asin!!

"Âmpui, i hresual  a nih chu, a hmangaih che"

Lu thing chung hian a inhnìt leh hlap hlap a. Thil thleng hi hi a țha lo dawn tlat, rin aiin chhungkua a nghawng thui dawn tlat a ni.

"I u chuan chutiang thu a sawi thei lovang"

"Sawi lo mahse ka hria alawm"

"Titi i duh em?"

"Aih, chho tawh rawh, U Mâma ka be thei alawm"

"I rilru  tihrehawm duh miah suh aw, engkim a dik chho vek mai ang, buaina hi chu a awm ve nak nak țhin ania"

Rilru nuam zán lo chuan room lamah chuan ka chhohsan ta a. Rsa pawh khumah a lo țhu ngur tawh, thawmhnaw erawh a la ha vek.

"Ka hriat turte a awm em?"

"Âmpuii ka tițap"

"Nia, a room-ah ka awm deuh reng a"

"Thil sawi a nei em?"

"I hmangaih loh thu a sawi, a nu leh pa i huat thu nen"

"Arggghhhhh"

"A bulah engtin nge chutiang chu i sawi theih?"

"Ka sawi lo"

"A la naupanchhiat em hi, a rilru a thianghlim si a, ka khawngaih lutuk a"

A ding vut a. Chutah, room-ah chuan veikualin," Engtin nge chutianga a ngaih tlat le?"a ti bul bul a.

"Engmah i sawi lo maw?"

"Sawi lo"

"A lo awm achin vawihnih a țahna a ni tawh ania, a rilru tihnatsak tawh lo la, aww?"

"Engatinge ani pawhin ka thu awih a tum mai loh?"

"Máma ngaizawng lo turin i hrilh em ni?"

"Hrilh e, ka duh lo alawm"

"Ngatinge i duhpui theih miah loh a?"

"Ka duh lo a ni mai"

"A rilru i thununsak thei hleinem"

"Min hau char char dawn ami?"

"Hrehawm a ti em a, ka khawngaih alawm"

"A u-in ka duh loh chuan ngaizawng lo ve mai se"

"Hriatthiam tum ve zawk la?"

"Midang an tam laia ani ber kher.."

"Mihringte chu duhzawng tè nei vek kan ni alawm"

"An inupat hleih lutuk reng reng"

Hmm, zanin chu mu phawt teh ang, engmah kan sawifel dawn chuang lo.

"Mu tawh ang hmiang"

"I ti har ka ti tawh lutuk a"

Zingah chuan Ámpuii chuan chaw a ei lo,lunat chhuanlam a siam tlat, a u a hmuh duh loh vang tih ka hria. An inkár hi engtin nge ka siam țhat ták ang?

Class pawh a kal duh lo, hei hi ka duh loh leh ka hlauh a ni. A luhlul ve bawk si a, a titáu pawh a ni chuang lo, a țahna avang khan a lu chu a lo na tak tak pawh a ni thei tho.

"Class i kal loh thu hi Máma'n a hria em?"

"Hria e, vawiin chu ka cháwl dawn tih ka hrilh a"

"A țha ka ti lo asin"

"U Máma pawhin kal turin min ti a, mahse ka kal peih lo"

"Máma hmu turin i chhuak daen em?"

"Aih, ka u nen an intihbuai dan kha min hrilh tawh bawk sia, ka kan ngam tawh lo alawm"

"Nia, kan duty hi kan ngaihpawimawh hmasak ber tur ania"

"Mahse vawiin chu ka peih thlawt lo, class kal mood-ah ka awm lo"

"Nia, vawiin chu i kal lo ta sa sa, rilru hahdam nan hmang la, mahse hetiang vang mai chuan class kal țhulh tawh awih loh aw. Țha taka i awm loh chuan Máma lakah mark i score sàng thei nang"

"U D, U Máma hian min duh tak tak i ring ve em?"

Ingngaihtuah nan hun ka hmang rei lo kher mai.

"Ring tehreng mai"

"Ka u chuan ' a duh tak tak lovang che' a ti tlat a"

"I u hian a ngei vang che leh hmangaih loh vang che a ni lo tih hrereng rawh aw, a ngaihtuah em em reng che tih hria la"

"U Máma min hrilh dan țhin chiah. Mahse kei chuan min hmangaih ni se hetiangin ka chungah a ti lovang ka ti tlat a, kan hmangaihte chu an rilru kan tina ngai si lova"

Chawhnu lamah chuan Máma'n min rawn phone ve thung a, ka number te a lo nei reng reng a, Ámpuii a zawt a ni ngei ang.

"Âmpuii i number ka zawt a, i buai em?"

""Buai lo ve, eng nge i an tawh?"

"Ka țha, class pawh vawiin ațangin ka kal leh tawh a"

"A zia lo takzet a ni"

"Mipa nih chuan hetiang tawn châng hi a awm lo thei lo alawm"

"A zahthlak bawk si"

"Zahthlak lo ve, in pa kha ka huat phah miah lo ania"

"Engati nge a chhan tak hi in sawi duh miah loh ve ve a?"

"A, a țùl ber lo ve. Ka rawn phone chhan che chu Âmpuii kha class kha a kal lo niin ka hria, kal tur chuan ka ti reng a. Ani hi a u chungah a lo thinrim lutuk ang tih ka hlau a"

"Nia, a, a la naupangchhia ve rih a, a u lakah hian a pangchang ve a, ka hrilhfiah ve nasa alawm"

"Nia, nizanah khan min rawn phone khan a lungchhe  lutuk a, engmah pawh ka sawipui thei lo. A rilru na kha hrehawm ka tihpui a,tihtheih lah chu ka nei bawk si lo"

"Um, a u hian a ngaihtuah lutuk tih hi a hrethiam rih tlat lova"

"Nia, keima dik loh tak pawh a ni, a training chhung hi chu lo nghák hram hram tur ka ni a"

"Ni lo ve, hlim taka hun in hmang hmuh hi nuam ka lo ti asin, nangmah i puitling a, ka ngaihtuah loh phah a ni. Rsa pawhin a hrethiam chho zel mai ang chu"

"Nia, kei pawh ka beisei. Puitlin hi a lo har a nih hi, puitling viau emaw intih pawh hian zir tur hlir kan hmaah a lo awm zel a"

"Hringnun chu zir tur hlir alawm a nih, zir zawh a awm thei lo zawng a nih hi"

Máma chuan a lo duh ve tak tak a nih hi. Kan inbiak tawp dawn lamah pawh chuan lo ngaihvena lo țha taka class kaltìr turin min chah  hrám a. Mama rilru hi chu a chhe lo reng asin, Rsa'n a duh lo tlat hi ka hrethiam lo. Ka bialpa hlui a nih vang nge ni ang? Nge a duh loh zawng tak a ni ve hrim hrim?

"Vawiinah Ámpuii class a kal lo ami?"

"Aw, a lu a na deuh a nih ka ring"

Zangthal zawnga muin ceiling chu a en vang vang a. "A dik lo tawp mai" a ti sup a.

"Nizan lamah a țap a, a lu chu a na tak tak alawm"

"Lo țan zel lo la"

"In inkár țha lo hi ka duh lo"

"A u ka nia, ka thu chu a zawm ve mai tur a ni"

"Inbengdai teh, chutin control tlat i tum chuan a rilru a hel ang asin"

"Ka duh ang chu zawm ve mai se"

"Ngatinge Mâma hi i duhpui loh tlat a? Hei hi in inkár dik lohna bulpui ber a ni tlat"

"Phuba lák a duh vang mai mai a nih hi"

"Engvangin nge phuba la duh tlat anga i ngaih theih?"

"A ni aiin kei min thlang miau alawm"

"Chu chu keima rilru ania, ka duh ka thlang thei alawm. A reng rengin chutiang rilru Máma'n a pu lo tawp ang, a rilru a sual hleinem"

"I țan hle mai"

Ni lo, duh aiin kan sawi thùk dawn tlat.



RUATSANGA -46 By Dingdi Pachuau

(Chhiartute chungah ka lawm em em e)

Ka ngawi ta deuh reng, ka țawngchhuak leh a nih chuan a thin a rim ang tih ka hlau ve tho.

"Nang nena  kha pa chanchin sawi kha ka duh lo"

"Ka tihpalh"

A thinrim lai chuan ngawih a țha ber, Mama vanga inháu phei chu ka duh miah lo, ani pawhin a duh bik lo ang.

Rei fe hnuah chuan"Thinrim lo la?"ka ti dek dek a.

"Ka thin a rim tho"

"Ani aia ka thlan zawk i nih kha"

"Ka hria alawm"

"Chuti a nih chuan...?"

"I țan thei si a,ka thìk lo ka tih pawhin ka thìk tho"

"A țul lo asin"

"A chanchin  sawi tawh lovang"

"A țha alawm"

       *****************

Âmpuii hlim hmel hmuh a khát ta viau mai. A u bulah phei chuan a țawng khát hle a, Bawihteite unau erawh a la chhaih peih hle. A la naupang a, ka hrethiam viau. Chutah, a uin Máma duhpui lovin kut a la thlâk zui a, han thinrim deuh bár  bár mahse ani ang kumah chuan ka hriatthiampui.

Ampuii chu ka zilh mawlh mawlh țhin, ka thiam ang angin. A u chuan a hmangaih lo a ni lo va, a nu leh pate pawh a haw hran chuang lo tiin. Mahse kei pawhin dáwt tlèm chu ka sawi tel tih ka inhria. A chhan chu Rsa hian a pa hi a pa angin a en lo tih ka hria a, a chanchin reng reng pawh a sawi țha duh ngai lo. 'Pa ka nei lo' a ti tlat țhin reng a ni, hei hi chu kei pawhin thlâk danglam ka duh, hun kal tawh chu hun kal tawh a ni a, liamtìr mai tur a ni. Hun lo la kal tur hi hlim tak leh a țha thei ang bera hman tur a ni zawk.

Junior Birthday a hnai tawh viau a, Rsa chuan lawmsak ngei a tum. A fapa a ni a, kum khat a tlinna tur a ni bawk a, a áwm ve tho.

Chaw kan ei laiin ka puin,"Ámpui, i țha maw?"a tih chuan melh chuang lo hian,"Aw" a ti ringawt a, ka pu pawh hian a boruak hi a hrethiam ve tawh a nih chiah hi.

"Na i nei lo maw?"

"Nei lo"

"I hlim loh hmel tlat a, tunlai chu?"

"Aw, hlim lo" Thu zép hi chu a nei fahran lo.

"Nakinah ka room-ah lo kal rawh aw"

Rsa ka melh vat a, engah vak a ngaih loh hmel khawp mai. Kei  chuan engmah ka sawi ngai tawh  lova, ka pasal thinrim ai chuan sawi loh mai hi a him a, ani a hlim loh chuan kei pawh ka hlim thei bìk si lo va.

Tlaiah chuan ka pu chuan," Dìte, Máma kha tlangvak fel tak a ni tiraw?"tiin min zawt ta chiah a, Âmpuii chuan thil engkim a hrilh leh vek tawh tih ka hre nghal mai a.

"Aw, fel tehreng mai"

"Ámpuii nen hian an induhtawn niin ka lo hria a?"

"A dik ang"

"Ámpuii chuan a hmangaih niin a sawi a"

"Ka hre lo le, ka pu. Amahin a sawi ber chuan a dik ang ka ring"

"I duhpui ve reng reng em?"

"Máma aia țha hi chu an tam vak lovang"

"Chuti, nangmah khan engatinge i neih loh a?"

Mak ka ti a, chhan nachang pawh hre lovin ka en reng ringawt.

"Ka tih awmzia chu tlangval fel tak a nih si chuan....?"

"Ka pu, Rsa hi ka hmangaih alawm. Máma hi chu ka lo hmangaih miah lo tih ka hrechhuak a"

"A nih tak chu. Ka fanu i ni hi ka láwm hle asin, Bawiha hi chuan hmangaiha enkawltu a mamawh a, nang a lo tawng che hi chu a vannei tak tak a ni"

"Ka lawm e, ka pu. Mahse kei deuh hi ania lawm ni,a tán hian ka tling lo hle si a"

"Inhmangaihtawnna hi a hlu reng asin, induhna hi chuan a daih rei lo va, inrintawnnate, inngaihsaktawnnate leh inhmangaihna hian min phuar nghet a, tlinlohna lai inhaidersaktawnte hi a pawimawh a ni"

Ka pu thusawi chu dik ka ti, mihringte chu tlinlohna nei vek kan ni a, kan tlinlohna inlâkváwngsakte hi a țha lèm lo. Tlinna lai inhmuhsaka infaktawn hian phùrna min pe a,min siam danglam țhin a ni.

Zanriah ei khamah ka puin Rsa chu a room-ah a ko lut a, thil dang vak an sawi ka ring lo.

Âmpuii chuan,"Ka pu chuan ka u chu a hau dawn a ni ang" a ti sar sar a.

"Engah maw?"

"U Máma a duh lo va"

"A duhtìr thei ringawt dawn em ni?"

"Ka hre bìk lo, mahse ka hmuh zin ve phah thei a"

"Engti zawngin?"

"U Máma lo lèn ve a chák a, chhùnah kan inhmu thei ngai si lova, hmu tura chhuah dawnin class țhulh a phal si lova"

"Mahse U Máma chu a inthlahrung tawp, mahse kan inhmu chák ve tho bawk si a"

"Lo lènte chu thil sual a ni hleinem"

"Nia,mahse, ka u hi alawm..."

"Tihtheih vak a nei chuang hleinem, tlangval chu nula inah a lèng thei alawm"

"Ni lo, U D, i hrethiam lo a nih kha. A nuam miah lo, ka uin a duh lo tih hrereng chunga lèng tura sawm chu"

"Inchhunga inhmuh chu a him daih zawk lawm ni? Chhungte hmuh phak loha hmun danga inhmuh ai chuan?"

"Nia, ih maw, U Máma chuan training zawhah inneih a duh a"

"A ni maw?!!! I duh ve em?"

"Duh ve tho, U Máma bula awmte chu ka duh alawm. Mahse min tihder a nih ka ring a"

"Nupui pasal inneihte chu intihderna chi a ni hleinem"

"Kum 20 ka tling ve tawh ang a, ka naupang lutuk bìk lovang tiraw?"

"Um, mahse i chhungte?"

"Âpain a phal kher lovang, a khirh ve a"

"Mahse i duh miau si chuan..?"

"Kan inru mai ang"

Hei zet chuh...Máma remruatna a ni thei lovang.

       ******************

Junior Birthday-ah chuan Lily leh Vra, Nu Sangite chhung, Faktei, U Felate chhung leh Máma an rawn kal. Mâma ka hmu chu mak ka ti tawp, ka sáwm miah lo, ka puin a sáwm em ni ang? Ka hlauthawng ru viau a, mahse ka hlauhthawn angin thil a thleng hran lo.

Mahse, an awm rei hran lo. Âmpuii a exam țan tawh a, lehkha zir a ngai. Mahse Mâma rawn kal tel ve avang chuan lehkha zir lam chu a rilruah a lan hmel loh.

Lily-te kan thlah laiin Máma chu inchhungah ka pu nen an titi a, an bulah Âmpuii a awm ve bawk a, la haw a tum rih lo a nih hmel viau.

Kei chuan chhuanlam siamin naupang kan room-ah ka hruaichho a, khumah an unau chuan an inchhaih awr awr a.

"Ânu, Junior hian min ko thiam tawh mawle"hlim takin a ti sar sar a.

"Tak tak maw? Junior, â u chu han ko teh, ka hre ve chak ania"

A hlim râkin 'á u' ti ang deuha a rák chu ani chuan 'â u ' ti angah a lo ngái niin.

"Ánu, i hria em? 'Á u' min tih kha?"phùr zetin a ti lehghal var a.

"Aw, hria e, Junior, i va țawng thei tawh ve, â u pawh i ko thiam tawh ania"

"Sikul kal thei tawh se ka ti e"

"I lehkhabute kha a ngén ve tlat mai ang a?"

"Ka pe mai ang, âpain min leisak leh mai dawn alawm"

"Junior, á u-in a duatzia che chu i hria em?"

"Nau ka neihchhun a ni sia. Ânu, naute dang i neih leh hunah chuan hmeichhia nei tawh rawh aw, chuan barbie nen ka infiampui țhin ang a, a nuam viau ang"

"Junior nen pawh barbie chu a infiampui theih reng lawm ni?"

"Ani chu mipa ania, a duh lovang"

Bawihtei finzia hi chu a mak ka ti.

"Zanin chu kan bulah riak ve tawh tak tak la?"

"Aw le, ápa nen in inkárah ka mu ang aw"

"Tehreng mai. Âpa chuan nuam a ti âwm mang e"

"Thawnthu ka inhrilhtìr ang"

Kan chhùngkuain khum záupuiah chuan kan mu țhám a, Bawihtei chu a muhil har, a pa nen kan inkárah a mu a, a khát tâwkin 'a lum nuam e' a ti leh țhin, thlasik a nih tawh avángin khua a váwt leh hle tawh a, nuam a ti pawh chu a áwm viau.

A pa chuan thawnthu chu a hrilh ta ngei a, a thawnthu sawi chu ka lo ngaithla ve kar. Amah, kei leh Máma chanchin chu thawnthu sawiin a sawi, ani chu lalfapa, kei lalfanu angin min chhuah, a rùkin ka nuih a lo za khawp mai.

"Âpa, lalfapa chuan nu leh pa a nei lo maw?"

"Nei náng, a pi leh a puin an enkawl a"

"A nu leh pate chu khawiah nge an awm a?"

"Lalfapa chu an tlânbosan ve ve a ni"

"Ka va khawngaih em em!"

"Nang chu i fel em alawm, ka naute duat, fel leh hmélțha kha i ni tlat a"

"Ápa, nang pawh pa-ah chuan i hméltha ber, chuan min duat bawk si"

"Nih leh, ánu ve thung?"

"Ani pawh nu zawng zawngah a hmelțha ber, chuan a sexy bawk"

"Sexy maw?!!!"ka lo ti vat a, mak ka ti em bawk a ni, ani ang rualin 'sexy' tih țawngkam a hria chu.

"Aw, âpain 'sexy' a tih țhin che hi"

E khai, naupang hian engkim hi an lo hria in an lo hriat hmaih lo tawp a nih hi, țawngkam fìmkhur a ngai viau reng a ni.

"Sexy chu hméltha leh fel tihna ania"

"Chuti, âpa, kei pawh ka sexy ve em?"

"Tehreng mai, i sexy lutuk, ânu nen in sexy tawp ania"

Mâma chu a lèng rei phian a ni ang, a motor ri ka la hre miah lo.

Bawihtei muthilh hnuah ka tho leh a, bathroom ațanga ka chhuah hnuah tukverhah ka dâk a, Mâma motor ka la hmu nia!!!

'An ám ve deuh a nih dawn hi'ka tih rilruk laiin Rsa mitmei erawh ka vènpui ru viau thung.

Pawnah chuan ka hmu dun, an inkuah rial a, a haw tawh dawn a ni ang. Chutah, an infáwp ta chiah, Rsa'n a hmu ang tih ka hlau lutuk a, parda chu zárin khum chu ka pan nghal a.

Motor engine a ri ta ham ham mai.

"Tlangval luck lo lén chen zet a lèng a ni maw?"

A chanchin sawipui ka duh loh avangin ka ngawi reng a, ka sawipui chuan a thinrimna ka siam leh ang tih ka hlau. 'Țan' min ti leh emaw kha a ni ang a..

"Âmpuii hi i duhpui reng reng ami?"

Um, tunah chuan thiam ka chang, amahin a rawn sawichhuak a, sawipui loh theih lohin min zawt miau.

"Amahin a duh phawt chuan"

"Ka remtihpui theih loh chhan i hria em?"

"I sawi loh chuan hriat a har e"

"I hriat reng kha"

"Thìk kha maw?"

"Kha chu hmanrua pakhat ve mai a ni"

"Eng nge ni ta ang?"

"A pain engtiangin nge a ngaih a i rin?"

"I pa maw?"

"Ni lo, A PA mawle"

'Ka pa' a ti duh țhak nang, a luhlul ve hi ka tia.

"A fanu berin a duh miaute chuan.."

"Chutiang ringawt a ni lo"

"Engvangin maw?"

"Luhlul min ti tiraw? A nè pawh ka ek lo, a phal loh chuan a phal lo a ni mai"

"An inru mai ang a?"

"Khaih, chutiang sawi suh, a fanu hi a duh loh zawnga a awm chuan engtiangin nge a chungah a chèt duh ang i hre pha lo ang"

Mak ka ti kher mai. Chuti a nih chuan, Rsa hian thurùk, min la hrilh kim loh a la nei chiang ang, hetiang khawpa a pa a hrechiang a nih chuan. Ka hre chák leh sawt. Âmpuii a lo duhpui loh chhan pawh kha a pa a lo vèntháwnpui vang maw lo ni a?!! Máma a huat vang ngawr ngawr leh a thìk vángah lei ngei pawhin ka ngai ania, mak ka ti lo thei lo. Ámpuii hmakhua a lo ngaihtuah vang zawk a lo ni!!!

"A rila rah ngei, a fanuin a duhzawng a tawng a ni ve mai a, phal loh viau ringawt te chu a"

A nui huk, mahse a za lo hle tih ka hre thung.

"A rila rah, a fapa pawh kalsan duh a nih hi"

A tidik leh bawk si.

"Mahse Mâma chu misual a ni lova, mi rethei deuh lah a ni hek lo. Duh lohna ringawt tur a awm lo e"

"I rilru ang hi mi hian pu vek se chuan, khawvel hi a nuam ngawt ang"

"Mahse, Máma an hmu ang a, a nungchang leh awmdan, felzia leh an fanu a hmangaihzia an hmuhte chuan an ngaihdan a dang vek thei ang chu"

"Ka remtihpui lohna chhan chu i hre ta a, min la dem fo em?"



RUATSANGA - 47  By Dingdi Pachuau

Ka pasal hian engkim hi a lo hmuthiam vek a nih hi. Âmpuii leh Mama inkawp pawh hi chhan awm vekin pawhțhen a lo tum a, chu pawh a nau hmakhua tur a lo ngaih vang a ni. A va hmangaih si em!!!

"Ka hmangaih che"

"Ka hria e, mahse hriat nawn fo ka duh ang"

"Engtiklai pawhin le"

Rsa muthilh hnuah pawh chuan ka la meng ta reng a, thil ka ngaihtuah kual nasa em a ni. Rsa pa hi pa luhlul tak leh khirh tak a nih si chuan, Máma pawh hi a duh lo thei khawp tho mai. Chutah, Âmpuii a la upa lo va, a training zawhah pawh Champhai lamah a hruaichho daih thei a, chubákah hmun dangah pawh a awmtìr thei tho. Pasal neih chu an la phal kherin ka ring lo.

Máma erawh chu nupui neih hun a ni ve tawh a, bialnu a neih ngai loh avangin Âmpuii hi chu a duh bur ka ring a, bialnu mai ni lovin nupui atan hial pawh a duh a nih chuan a țang na ve khawp ang. Nupui a nei duha Âmpuii a nei duh a nih phawt chuan kei chuan ka duhpui em em mai a, innei se ka ti hle zawk. Âmpuii hian Mama aia fel leh țha zawk hi chu a hmu țeuh kherin ka ring lo, Máma hi chu a fel a, a innghahna tlâk bawk si, kohhranah leh khawtlángah a inhmang tho bawk si, hna nghet nei a la ni zui. Hmelțha leh sport thei tak a la ni zui a, hei bak bak hi chu an awm thei dawn em ni?

Zìngah min thawhsan vek. Nizan ka muthilh har avangin thawh ka hai, ka zuk thawh ve meuh chuan an lo tho vek tawh. Junior chu a u nen an lo awmdun a,a u teddy bear-te nen an lo inkáwmho a, ka puin a lo țhutpui bawk a,  an lo rák nasa mai.  Zing thawh ațanga fate hlim au ri hriat tluka nuam hi a awm thei dawn em ni le? Ka duhtak, ka pasal leh ka hmangaih ber nena ka fate an la ni zui.

X-mas a lo hnái ve ta hle mai. Khua pawh a váwt ve ta var mai, kawrlum lian pui pui kan ha chhuak leh ta.

Inrinni a ni a, ka puin family picnic a rawt tlat mai. Engmah sawi láwk a nei si lo, rem kan ruat chawp chuk chuk a, Rsa nen kan pahnih chauha  hmana kan lennaah khan kan picnic dawn.

Ka kal leh chák chiang alawm. Ka puin Âmpuii hnenah khan a lo tiam tawh hrim hrim a, tunah a damțhat lai leh chhungkaw hman remchán lai hian a rawt ta a ni.

Thil pawimawh tur chu Scorpio hnungah kan dahlut vek a, Ka pu chu a duh lo chung a hmaah kan țhuttir a, keiin Junior pawmin  Âmpuii'n Bawihtei a pawm a, tlán pahin Rsa'n Bawihtei hla duh ber a play a, Bawihtei chuan a lo záwm ve nasa, Junior pawh a hlim, a u zai a hmuh chuan a kutte a lo beng a,ka malchungah a lám ve tak láwp láwp a.

A hmun kan thlen chuan a lo danglam tawhzia ka hmu nghal. Tunah chuan pangpar awmze nei deuh leh kalhmang fel tak neiin a lo intlar dal a, a pár vul nasa bawk.

In tè pakhat, design mawi taka  sakah chuan kan lùt phawt a, a nuam reuh ania aw, a awmna a thawveng reuhin a chhung chei a mawi a, mamawh tur thil a lo awm sa deuh vek lehnghal, zia reuh lutuk. Eitur kan kente chu kan dah a, Junior pawh ka kut atangin a tál thla nghal a.

Ka pu chuan," Ka'n teikual mai mai rih ang e, ka hmuh lohna a rei tawh a, fan ka chák deuh tlat" a ti a, Bawihtei chuan rang fè hian," Ãpu, min hruai ve.." a lo ti vat a. An putu chuan an chhuak ta nghal a.

"Camera kha i keng tiraw?"tiin Rsa chu ka zawt a.

Ani chuan,"Keng chiang e, click i duh ami?"a ti sup a.

"Nakinah chuan duh ang chu. Tunah chuan mat hi phulah phah ila, țhu ang u, nilum ái pah a ni mai a"

Thing buk bul deuhah kan phah a, a duh tán nilum a ai theih tho a, ni sa duh lo tán ni hlim chinah a țhut theih tho bawk si a, a hmun a nuamin a thengthaw bawk si a, mut der der a chákawm.

"A nuam e..."

"Nuam deuh asin, mut der der a chákawm tiraw?"

"Mu la, Junior hi ka lo en ang"

"A, ka mut a chhuak ka ti hleinem, mut mai mai a châkawm ka ti mai ania"

"Mu rawh, mu rawh. Junior hi chu ka lo veng thei alawm"

Rsa chuan Scorpio ațanga lo chhuah pah chuan," Click tur ka'n zawng ang e"tiin a camera lei thar chu a rawn keng chhuak bawk a.

"Helam hi ti hmasa ber phawt la"

Thlalak hi chu a nuam ve hranpa reng reng. Hetiang hmun nuam leh mawiah hlauh phei chuan, click țeuh ila a ni mai.

Rsa kalsawn hnuah chuan Âmpuii hnenah chuan," Máma i lo sáwm ve lo a ni tiraw?"ka ti a.

"Rapthlak e, ka uin min melh rum lutuk ang"

"Haha, engah vak i ngaih loh kha"

"Ka u a thinrim chuan nuam ka ti bìk teuh lo, ngei viau țhin mah ila"

"Ti leh ta daih ila,Kumin X-mas haw chhoh i tum em?"

"Tum deuh a, U Mama'n a phal lo va"

"Eu, thu a va nei sáwt ve???"

Nui sak pahin," A intithù tawp. 'Háw lovang, hun tháwl kan neih ve hun ber tur' a ti tlat a, a tidik ka ti ve tho bawk sia"

"I chhungte'n haw turin an chah hrim hrim che em?"

"Chah hran lo. Mahse, Ânu erawh chuan háw tur chuan min duh tih ka hrereng, U Máma thin tihrim ka hlau ve tho a, chubákah kei pawhin a bula X-mas hmante chu ka châk ve tho bawk"

"Um, nia, háw lo la ka ti kei pawhin. Khua a har dawn e, Bawihtei lahin a ngai dawn bawk si che a"

"Kei pawhin Bawihtei hi chu ka ngai dawn chiang alawm, zana ka bula a mut loh pawhin ka ngái țan der tawh asin"

"I fanu ni áwm zawk tak a ni tiraw?"

"U Máma pawhin a ti țhin"

Ni lum hnuaiah chuan ka mu dar dar a, a nuam lutuk tlat. Khua a thiangin motor bengchheng hriat tur a awm bawk si lo, a boruak hi a nuam hliah hliah mai.

"Nizàn khan ka rin àiin a lèng rei a?"

"Nia, 'haw tawh rawh' ka ti ka tih pawhin  'ka lo lèng khát em mai' a ti tlat a, a háw duh miau bawk si lo a. Ka u-in a hria em? Engtin nge min tih?"

"Hre mahse engtin vak nge a tih ang? Lo duh lo ta tehreng pawh ni se, hnar haw ringawt chi a ni bawk si lova" nui chungin ka ti a.

"Ka nuih nasa thei lutuk. Kan awmdun tawh phawt chuan min deh kher hi a duh țhin a, 'Dek lo chea ka awm a nih chuan ka mumang mai i ni ang tih ka hlau' a ti tlat zel nia, a naupangchhia thei ania aw"

"Nizan pawh khan kan țhutdun chhung khan ka kutah a chelh char char, ka u-in min hmu ang tih ka hlau a,ani lah chuan 'I u ka hlau lo, ka chungah eng thil pawh ti se, ka thlah dawn lo che' a ti bur mai a, a nungchang luhlul riau hi ka láwm reuh tawp, belhchian telh telh hian ka duh telh telhin ka hria"

"Ve bawk che chuan aw, nang aia tè zawk leh naupang zawk angin alawm i sawi le"

"A upa ve tawh tho nain a naupang chhia thei e, ih, a pangchang thei tawp bawk. Zan mut dawnah hian min rawn phone ziah a, 'ka lo phone ve tawh ang che' ka tih pawhin ' i pawisa a hek ang' a ti tlat zel nia. Mahse zìnga wish hmasak erawh a duh ziah, 'min wish chuan nilèngin ka awm a nuam țhin' a ti. Tak tak a ni kher lo maithei a, mahse tlèm chuan a nih ka ring deuh"

"A ni tak tak thei alawm"

"A ni maw?!!A tak a nih chuan a țhat hlauh chu. Ka duh em avang hian țha deuh leh hlim taka nitin hun hmang turin ka duh alawm, naktuk ațang chuan ka uar lehzual sauh ang mawle"

Rál khat deuh ațang chuan"Ânuuuuu..."tiin Bawihtei chu a rawn áu vawng vawng mai.

Junior chuan a lo chháwn vat a, Bawihtei chuan a pu rawn tlánsanin kan lam pan chuan a rawn tlan phei tar tar a.

"Tlán chak lutuk suh, i tlu palh ang"

Kan bul chu rei lo teah a rawn thleng ta mai. A thaw ham ham a, a biang a tái tèk a, a duhawmin a hmèlțha takzet.

"Ânu, sava kan hmu asin"

"A ni maw? Ka va hmu ve châk. An tam em?"

"Aih, pahnih an nia, an hrám a, âpu hnenah 'man ang' ka tia"

"Chuan, in rawn man ta em?"

"Aih, ápuin a phal lo va. 'Savate, rannungte man mai mai loh tur' a ti"

"A tidik chiah. Savate pawh chhungkua angin an awm ve tho a, an chhungkaw zinga mi kan man daih chuan an lung a lèng ang a, an chhungte ngaiin an thi mai ang"

"Mahse, in țha deuh Apain a siamsak mai dawn alawm"

"Thingzarah leh thing kawrawnga chèng tura Pathian siam an nia, in țha deuh kha nuam an ti ve lo alawm"

"Lo hawi ru le"

Rsa lam chu kan hawi țhap mai, a hmet mawlh mawlh a, ka pu pawha rawn thleng chawpchilh ve ta nghal mai a.

Rsa chuan Bawihtei chu pangpar bulah chuan hruaiin thla a láksak nasa a, 'Ánì-in inpose dan tur a hrilh ang che khan ding la' tiin. Ani lah chu rang fahran hian a insiamrem nghal zung zung a, kan thutna hmun ațang chuan kan lo nuih kan lo nuih a. Junior pawh an lam panin a kal ve chhut chhut a, Bawihtei chuan lo kái vatin an pahnih chuan thla an la dun a.

Zanah chuan an unau chuan an muhil hma kher mai. Vawiin lamah khan an cháu ve deuh pawh a ni maithei.

Rsa'n laptop rawn keng lutin vawiin lama kan thlalak hrang hrang chu khuma țhu chung chuan kan en dun a.

"En teh, i chhiat loh dan hi"

"Hmmmm, chhe lutuk em mai a, ka posi lái chhe lutuk kha"

Kan nui dun hawk hawk a. A ni lah tak a, a mak zawk, ka landan chu.

"Hei hi a mawi lutuk tlat"

Bawihtei leh Junior, pangpar bula an ding dun lai thlalak a ni.

"Nia, a fuh khawp mai"

"Kan váia lanna han tilang teh"

Mat chunga kan țhu dal lai a ni a, a colour a fuhin a fiah felfái bawk a, en a nuam khawp mai.

"I camera chu a fuh khawp mai tiraw?"

"Um, duh ang takin ka la hmang thiam lo zawk a"

"I thiam hunah phei chuan  Gigi Hadid ang velah min chhuah theih dawn chu"

"Tunge chu chu?"

"Hre lo der vel"

"I țha zawk, ka mitah chuan"

"Awihawm loh hle mahse ka lawm tho tho e"

"Ngahnge i awi loh?"

"Nangmah pawhin i awih lo"

"Ka ti tak tak"

"Kei pawh ka ti tak tak"

"I sexy zawk, ka duh zawk bawk che, ani chu eng atan mah ka ti lo ve"

"A chhe lo e"

"I chhe lo fe"

Ka hnial hneh thei dawn chuang lo.

"Ka lawm e"

"Lawmthu sawi nan?"

"Nang chu ...bá i țhìng peih e"

"Ba lo la"

A lamah thle pheiin a hmuiah chuan ka fawhsak zawk a.

"A rei lo e"

Ka fawp nawn leh a, ani chuan lo dawh tawp chu a tum bìk lo khawp mai.

Thaw chham lek lekin kan inkeih mawlh mawlh a, he pa hi ka hnè thei lo chu a nih ber hi.

"Zanin chu hlim zán hmang ila?"

"Hlim zán a? Chu chu eng nge ni ngai?"

"Thil thar ania"

"Ka awih lo" awih lo zet hian ka en a.

"I hre mai ang"

"Min hrilh ve mai la"

"Inhrilhhriata fiah chi pawh a ni
 lo, action a ngai"

"A țha lo tawp a nih chu"

"Țha tiu teu tak a ni"

"Eng lo, phìr pái lam kha em ni?"

"A tel tho"

"Hm, sawi țha ve mai la"

"Sawi loh chi, thiltiha lantir chi"

"Nih leh, ti la"

"Pakhat chauh ni lo, pahniha tih ngai chi ania"

"Hm, rindan ka nei ania aw"

"A dik maithei, dik lo maithei"

Ka pasal duhtak chuan hlim zàn awmzia chu min hrilhfiah thiam khawp mai, țawngkaa sawifiah chi a ni lova, action nen ngei a lo ngai a ni.

Ka zawi takzet e, ani pawh chuan min kuah hle hle a, a chángin ka bengah a rawn fáwp leh zauh zauh a. Ka rilru erawh a hlim si a ni, hei ngei hi 'hlim zán' a lo tihchhan chu a lo nih chiah hi.

"Hlim zán chu eng nge ang i tih?"

"I action khan i hrilhfiah thiam khawp, ka manthiam zawng tak"

"Ka thil zirtir che hi chu i man chak thei alawm"

"Min zirtir thiam thei em alawm"

"Lehpekah chuan min zirtir ve thung tawh la"

"Zirtir i ngai lo"

"Ka ngai ve zauh zauh"

"Nang chu expert i ni"

Fawh hlak ka hlawh.

"Ka nupui chu mi vannei tak a ni ang' tih ka hrilh che kha i la hria em?"

"Dawn lawm ni?"



RUATSANGA - 48 By Dingdi Pachuau

X-mas chu tluang takin leh damtláng takin kan hmang thei a,a lawmawm takzet a ni. Ka pu pawh a tlangval hle a, dam tak maia chhungkuaa  Biak In kan thleng vek thei hrim hrim pawh hi a lawmawm ngawih ngawih.

Máma pawh a rawn lèng ngun ve khawp. Ka pu nen an inkáwmngeih a, Rsa nen hi chuan an inbe tam tehchiam lo. Mahse, engah vak ka ngai duh lo, a chhan chu Rsa hian Âmpuii hi a duhpui lo hran lo tih ka hre ve tlat tawh, a hmakhua a ngaih vang leh a ngaihtuah vang a ni tih ka hria a,a rilru na tur leh a tuar tur lak ațanga inthiar fihlìmtir a tum vang mai chauh a ni.

Lily pawhin palai hmel a hmu ta. Ka lawmpui khawp mai, țhianah ka țan duh hmel bawk sia, inuluk ve țan a ngai.

March thla chawhnuah Vra nen chuan an innei ta a, ka lawmpui viau rualin ka ngai ngawt ang, a duh hun hunah a lo lèng thei tawh bìk dawn si lo va, chu chu ani pawhin a peih loh ber a ni.

Lily ka dinpui dawn miau avangin Junior lo enkawl turin Âmpuii'n class a țhulh ringawt. Mahse ani pawh inneihnaa kal chu a phùr viau, Máma a kal ve dawn miau mai a, intihnalh viau erawh Junior a ngaihven a ngaih miau avangin a thei lutuk lo deuh.

Lily'n kawrfual vár a ha a, keiin a sen ka ha thung. Min cheitute'n min chei nalh khawpin ka hria,darthlalanga ka hmel ka hmu thut phei chu ka inhai țèp a ni.

Rsa pawh a thawmhnaw hak tur ka dahchhuahsak thlap a, chutiangin Bawihtei leh Junior hak tur pawh. Bawihtei phei chu a nu Lily'n a thawmhnaw hák tur dawrah a order sak a, a mawi reuh kher asin. Pheikhawk erawh a pain a leisak thung a, flower girl tur a nih avangin a phùr lutuk tawp.

Lily chu a chhe lo kher mai, a hmai cheitute'n an uluk bawk a, a mawi teh e, an chei over chuang bawk si lova, a inhmeh takzet. Kei pawh mawi ka inti a, mahse mithmul lem min vuahsak erawh men thiam a har ka ti, a tla daih ang tih ka hlau.

Inneih hunserh a zawh hnua pawn lama thla kan lák hnuah chauh Rsate pafa ka hmu. An chhiat lohzia chuh... Ka pasal a ni hi ka lawm ngawih ngawih, chhe lo bawk si, min duh bawk si. Rsa chuan Junior chu thil hrilhin min rawn pan a, Junior chu  min hmuh chuan a țè rai rai a, Bawihtei pawhin "Ânu, i mawi lutuk"min ti ve chùl a.

"Vawiin chu mo niáwm  zawk tak i ni" Lily hriat theih ngei tur hian Rsa chuan min rawn fak hlak a.

"Sual viau suh, in nu hi chhe lo ti ka hre țeuh, i dinhmun a dertháwng ania"

Nui chung hian," Nia tiraw? Tlái aţangin a thar ka nei ve nghal ang"ka lo ti ve a.

Mo chibai an tam avangin kan inbe rei vak hman lo. Âmpuii leh Máma pawh an nalh, an indin hnaih viau.

"I nalh takzet a ni"

Ka nuih sak a.

"Ka lawm e, nangni pafa tak hi, in chhe lo zawk"

Junior chu a hmuiah ka chuk zohva, a nui var var a.

"Kei pawh ti ve nghal la?"

"A, nang chu nakinah le"

"Tunah?"

"Mi an tam lutuk, chi loh"

Camera a de chuai chuai a, kan chhungkua pawhin mo leh moneitu thla kan lákpui. Chuan, kan chhungkaw bilin kan la bawk, kan mawi hlawm si a, kan lang nalh ngawt ang chu.

Nilengin kan buai, zanah pawh ka haw har, mahse an fel a, nau pawm ka nih avangin min hrethiam khawp bawk. In ka thlen chuan ka cháu ve hle tih ka hre chauh.

"Inbual rawh, i cháu a reh sawt mai ang, chuan ka malis dawn che nia"

Junior leh Bawihtei an mu tawh, a tlai ve deuh tawh atin a ni. Ka intleuh sawk sawk a, ka harh deuh huai chuan ka hre nain mut vang vang a chákawm ber mai.

Ka muthilh lai pawh ka hre lo, ka hmuia min fawh zoh chu ka hre ruai a, mumang bo țhakin ka muhil ta a.

Hun a kal chak hle mai. Bawihtei pawh kg 11 a kal ve tawh, a rilru a chak hle a, nitina class-a an zir hi chu zanah kan zawt țhin a, a thiam viau zel a ni. Junior hi eng tak ang ve ang maw? A sikul kal theih hun a nghahhlelhawm takzet.

Âmpuii pawh a training a zo ta, a awm lo tur ka huphurh láwk sa khawp mai. Bawihtei nen an inchulnel si a, a lung a leng dawn lutuk a, ka khawngaih láwk.

Mahse a haw chho mai bìk lo. Mama lah chuan a thusawi kha a lo ti mai mai miah lo, palai a lo han tìr tak tak. Ka lo ngái thutak lèm lo ania, Âmpuii pain ka pu a rawn phone a, ka puin a sawi a, ka hre chiah.

Mahse, Ãmpuii pain a lo hnial rih,a awm ve rih tho. Mahse, a mawi hnai atan 'kan lo inrawn ang e'ti pawhin a thlah lo. Mipa lam tan chuan a zahthlak ngawt ang chu, a hnialna ber chu a la naupang, pasal neih a la hun lo a ti.

Âmpuii chu a zak khawp mai, Máma pawhin a rem a ring nghal lo a ni maithei, a rawn hnèm nasa. 'Ka beidawng nghal dawn hleinem, rem an tih hma chu ka tìr tluk tluk mai ang' a ti, a inhmeh lo ka ti lutuk.

Rsa erawh chuan engmah a sawi lo, a thilsawi kha ka hrechhuak vawng vawng mai.

A pa chuan Ãmpuii chu haw chho  turin a rawn chah ta chiah e, Âmpuii lah chuan a peih lo kher mai, ka khawngaih reuh lutuk. Máma nen an inhmu thei tawh lo tur ringawt pawh chu a huphurh a, a țap deuh pár reng mai.

Ka khawngaih lutuk. Mahse, tihtheih kan nei lo. A pain a chah haw ve tawh a ni mai a, lo phal loh bur chi a ni bawk si lova, a training ber a zo ve tawh bawk sia, inah a nu chauh che tur a awm bawk sia, chu chu a pain a rawn chhuanlam a ni reng a.

A haw chhoh dawn zanah chuan Máma a rawn lèng a, Âmpuii hmèl hlim lo tak ațang chuan haw chhoh a huphurhzia a hre ve thei nghal ang chu. Bawihtei pawh chuan a ni haw chho tur chu a huphurh khawp mai a, mahse naupang na na na chu 'ka lo zin leh vat ang, thil țha táwk ka lo hawn ang che' a ti a, a lung a awi ve mai.

Keini pawh kan mu har deuh. Bawihtei leh Junior erawh an mu hma leh khawp, midang erawh chu mut kan tum rih lo niin a lang. Ka pu chuan," I lo zin leh vat dawn nia, heti lamah hnáte kan zawng ang a"tiin a hnèm ve a, a tunu haw chho huphurh lutuk chu a khawngaih ve a ni.

"Nia, i training zo ve tawh bawk a, i haw chho lo rei ve tawh alawm, ngaihte pawh an ngai ve tawh dawn che a, i han awm ta reng ang tihna pawh a ni hleinem"

"Âpa hian lo chhuk a phal tawh lovang tih ka hlau ber"

"Chutin huphurh nghal ringawt lo la, ka hman veleh ka rawn zin chho ve ang" Máma pawh chuan a lo ti ve a.

"Tak tak aw, i lo zin loh vaih, ka lo nghakhlel dawn lutuk che"

"Ka hman theih velehah, tak takin"

"I rilru i tihpachan a ngai ania" Rsa chuan a lo ti ve bohva.

Lo pui vatin," Ni e, naupang i ni tawh lo va, zirtirtu ni thei tura training chhuak thlap i ni tawh bawk ania, puitling takin i awm ang a, hun țha chu a lo inherchhuak mai ang"ka lo ti ve a.

"Mahse ka lung a lèng dawn em asin"

"Keini pawhin kan ngai dawn lutuk che, i lo zin leh vat dawn alawm"

"Âpain a phal tawh lovang tih ka hlau alawm" a mittui chu a far záih a.

Mâma chuan a rawn kuah vat a, Máma awm nghèng chuan a inhnìt ta faih faih a.

"Lungngaihna tur a awm hleinem, Bawihi. I han haw chho ve zawk dawn a ni mai a, i pa pawh ka lo be dawn alawm, i han awm rei tawp nang"ka pu chuan a lo ti a.

"Nia, ka puin a i pa a lo be vat ang a, i lo chhuk leh vat dawn alawm"

Ka han hnèm ve tak nain a lo chhuktìr phal chu ka ring lo ve ringawt.  Mahse ka ring sual ve thei thova, kan hmalam hun chu tumahin kan hre lova, Pathianin min rèlsak vek ang chu.

Mut hmunah chuan," I pa chuan lo chhuk leh a phalin i ring em?"ka ti a.

"Ka hre lo"

"Ka khawngaih reuh em mai, a huphurh ve sia"

"Tuar hi a ngái reng asin"

"I tuar ve em ni?"

"Kei aia tuar nasa an awm dawn ami? Hlimna nei lét leh tura ka lo nghah reizia che kha, tuna mite hi chu nèp tè a la ni ringawt. Kei chuan kum 6 ka nghák che ania"

"Kei pawh a ni ve tho"

"Min nghak lo, keiman ka nghák che"

"Kan inghák ve ve"

"Nghák lo nih chu i duh lo ve hle mai maw?"

"Duh bìk nang aw"

Min rawn kuah dá dá a.

"Âmpuii  chu ka ngaihtuah reuh em mai, an inngai dawn si a, Máma tak pawh a rilru a hrehwm dawn em mai"

"An inhmangaih chuan an tuar ve a ngai alawm"

"Nia, hei an tuar țan chu a nih hi"

"An tuarchhuak mai ang"

"Mahse i pa kha...?"

"I pa ti ve ziah suh"

"Nih leh, ka pa ka ti mai ang aw?"

"'Ka pa' i tih kha a phu hlawl lo ve"

"Lo phal lo ta se, eng thil nge Âmpuii chungah hian thleng ang le?"

A ngawi ta vang vang a, chutah," A phal kher lovang"a ti sup ringawt a.

"Chu tak chu...Ámpuii hian hrehawm a ti dawn lutuk a, Máma a hmu thei dawn lo va, an inneih theih loh chu thuhran"

"Kawng an zawng ve mai ang chu"

"Inrù se i tihna em ni?"

"Chutiang ka sawi lo"

"Ka hriatthiam theih nghal turin sawi la"

"I hmélțha"

Ka ngawi ta kar mai. He pa hi chuan ka rin loh dan deuh deuh hian min chhâng țhin a, kan thusawi lai thlak nana topic danga min hruai daih dan hi a thiam chiang ania.

"Sawi tur i hre ta nange, ka nupui duhtak?"

"Min tidang dèr alawm, ka pasal sexy lutuk pa"

"Sexy deuh deuha min chhán lèt hian ka láwm tlat che"

"Khawilai chu nge sexy chu?"

"Sexy lai tak kha, kha tluka sexy a awm hleinem"

"Haha"

"Kha pawh kha a sexy"

"Sexy hi lawm viau teh suh"

"Kha pawh"

"Ka thusawi apiang la káwi zel lo la"

"I sexy em alawm"

"Ka pasalin sexy min tih tluka lawmawm dang a awm lo ve"

A beisei hi ka hre ve reng ania. Nupa nun hlimawm tak kan chèn leh a, ka pasalin 'sexy' min tih hian pawnlam lan dan maiah hian a thámral ang tih ka hlau a, chuvang chuan khum laizawlah na na na hi chuan a tán, nupui mai ni lovin hmeichhe sexy ber nih ka tum rán țhin, sexy min tihchhan pawh hi hei vang hi a ni bawkin ka hria.

Âmpuiite chu an tlaivár țèpin ka ring, a chhan chu zinglam dar 2 -a ka thawh leh pawhin Máma car ka la hmu. A áwm ve tho ve, an induhtawn ve hliau hliau em em si a.

Zìngah chuan kan tho hma hlawm riau mai. Ámpuii pawh a mu hlek chauhin ka ring, a mit hnuai lam a val kalh mai a, a mit a sen rám bawk.

In kawtah sumo kan chánpui a, Máma pawh a rawn chho leh. Âmpuii hmel hmuh chu nizan lam ái chuan a zia deuh, Máma'n a thlamuan nasa a nih ka ring.

Sumo lo thlen hma chu Bawihtei nen chuan an inpawm reng a, Bawihtei chuan," Áni, lo zin leh thuai rawh aw, chuan, Junior nen kan sikulah in lo kal ve tawh ang a. Chuan, Champhaiah pawh kan lo kal ve ang"a ti siam siam a.

"Aw le, a hma thei ang berin lo chhuk ka tum ang aw, lo dam țha la, ânu, ápa leh ápute thu i lo awih ang a, thil țha tawk tawk ka lo hawnthlak ang che"

"Áni, naktukah lo chhuk leh la"

Nui sakin," Ka thleng chiah ang a, ka lo chhuk lehnghal dawn tihna ami?"a ti a, midang chu kan lo nui a.

"Aw, ka ngai dawn che sia"

"Kei pawh, ka ngai dawn che u asin"

Sumo chu a rawn thleng ta. Thawmhnaw hawn tur a nei tam hran lova, Airbag lian deuh hlekah a indah a, chu tè mai chu. Hawntìr vak pawh ka phal chiah lova, a rawn kal tawh lovang tih ka hlau ve a.

Kan inchibai dan dan a, sumo chunga Bag an hlán hnuah chuan a seat-ah chuan a lut ta a.

"Ãni, bye bye"

A rawn hawi leh țawk țawk a, a mittui tla chu ka hmu reng. Máma tán pawh a hrehawm duh viau ang, keini a chhungte bulah phei chuan insùm a ngai ve dawn sia, a ngai lutuk dawn tih  hre tho mah ila.

Rsa chuan driver chu a be hrang lawk a, eng nge a sawi ang tih phei chu hre lo mah ila, a nau chungchang bák a nih ka ring miah lo. Ngaihtuah lo ang deuhin lang mah se a rùk tak chuan a ngaihtuah em em si a.

Kan in-bye bye liam hnu chuan Máma pawh a haw ve leh nghal mai a, Bawihtei chuan," Ánu, âni chuan min ngai ve tho ang tiraw?"a ti a.

"Tehreng mai,nakínah kan phone dawn nia aw"




RUATSANGA - 49 By Dingdi Pachuau

(Khawchhia, thli tleh hian net signal a lén bo a ni ang, thupha ka chawi e, edit loh aw)

Bawihtei chu a khua a har thei takzet mai, chuvang chuan kei pawhin a hma aia nasain ka ngaihsak a. Kawm tur a neih tawh loh miau avangin Junior nen pawh chuan kan infiampui nasa a, a pa pawhin a ngaihsak lehzual, a hunáwl neih chhun pawh a fanu bulah chuan a hmang nasa reng a ni.

Âmpuii nen chuan kan inbe reng a, tluang taka thleng chhoin a lung lèn thu a rawn sawi kùr dup a, a ngaihawm hnùp hnùp viau a ni. Bawihtei nen pawh an inphone áwl lo va, Bawihtei lah chuan 'lo haw thuai thuai rawh, ka ngai tawh che' a ti ve ziah bawk.

Ni khat chu Bawihteite sikul an cháwl a, inah kan nufa leh ka pu nen kan awm a, ka bualfai ve ve tawh a, Junior chu tihmut ka duh viau nain a intitlangval ve tawh a, puak a duh tawh bìk lo.

Chhunah ei tur keimahin ka siam a, Bawihtei hian min chhùn a, pasta a duh em em a, chuvangin pasta 'cial' deuhin ka siam a.

Kan ei țan deuh chauh tihah chuan kawngkaah Rsa chu parcel lian deuh pawm chungin a rawn lut hlawl mai a, Junior chuan a lo hmu hmasa ber a,'Âaapa' a țawng thiam ve chhun chuan a rák nawk nawk a, Bawihtei chuan lo ko vatin," Âpa, i lo haw tawh ami? Kan inbualfai tawh a, lunch kan ei mek, lo ei ve rawh" a lo ti vat a.

"Ka ei ve tur a awm ami?"

"Aw, a tam mai. Engtizia nge ni ta? Tun ang hunah i lo haw ngai si lo?"ka lo ti a, plate la turin ka tho chhuak nghal a.

"Nia, thil ka lo háwn a, Bawihtei tán"

Plate ka la a dawhkan an kìlna ka va thlen chuan Bawihtei chuan parcel chu a lo hawng dawn mèk a. Eng tak chu ni ang maw ti rilru chungin Rsa pasta ei tur chu ka suahsak a.

Bawihtei hlim lutuk țe ri-ah chuan ka en vat a, parcel ațang chuan ui tè, vár thianghlim zet mai hi a pawmchhuak a, ui tè lah chuan a mei chu a vai vat vat a.

"Ânu, âpa thil lo hawn hi, ui tè vár, ka duh lutuk, âpa, ka lawm e" țawng pawh a țawng țha hlei thei lo, a hlim lutuk chu a zuang tawr tawr pah bawk a.

"Aw, a va duhawm tak em!!! A hmingah eng nge i phuah ang?"

"Moana a nih hi"

"Bawihte, a pá a nih kha"

"A pawi lo, Moana mipa a ni ve mai"

Rsa chuan a tifuh ka ti khawp mai. Bawihtei chuan a duh takzet si a, in chhungah an inzui kual reng a, ui tè lah chuan a nél bawk si, zánah mutpui a tum ziah a, a țantìrah chuan ka phal lo, mahse a room pangngai, Saron room kha, khatah khan amaha riah min dìl ta daih mai. Kan bula a mut chuan Moana a mutpui thei dawn lo va, Rsa chuan a duh anga awmtìr turin min ti a, room hrana a mut pawh a hun ve tawh tih min hrilh bawk a. Rem ka ti lutuk lo nain han riak hran ve reng reng se ka ti a, Saron room-ah chuan Moana nen chuan an insawn lùt ta a.

Junior pawhin ui tè chu a duh khawp mai. In chhunga chéng tur a nih avangin nitin deuhthaw kan bualfai a, a rim a thâng ang tih ka hlau țhin. Vaccine lák sa a ni a, ka faten an ngainat em avangin ka ulukpui a ngai a ni.

Bawihtei tán chuan a țha takzet mai. A ní a ngaih pawh a sawi lang ngai ta mang lo, sikul a kal hma zawng Moana chu chhaihin 'thil ka zirtir' a ti a, a sikul bán veleh, ina a lo luh veleh ''Moanaaa...?"a ti chùl a,a ko nghal vat țhin.

Tlaiah tualah exer a lákpui țhin a,mahse ruah a sùr erawh chuan a pa Gym room-ah an awm ţhin, mihring biakin a be vek a, a be bawrh bawrh a, engkim a zirtir vek bawk.

Zantin a muthilh hnuah a pa hian a room chu a va check ziah a, a nì awm loh hnu hian Bawihtei hi a  felin a puitling sawtin ka hria. A thiam ang angin a puansin a thlep vek a, a thawmhnaw pawh a dah nuaih ngai lo, naupang fel tak chu a ni chiang e.

Zan khat chu Rsa chuan min rawn hùi a, Junior a mut tawh avang chuan tháwm dìm deuh chuan khum ațangin ka tho chhuak a, Bawihtei room lam chu ka pan phei țham țham a, khuma Moana nen an lo mut dan ka hmuh chuan ka nuih a za kher mai.

Bawihtei chuan a ban chu Moana kham theih tur chuan a pharchhuak ve ngei a, Moana mangchhiatzia chuh....A mu dawrh nasa lutuk a,a nuihzatthlak takzet. Bawihtei chuan puan a sin thlap a, Moana erawh chu Bawihtei nghénga mu siin a bawp pali chu a kák thei ang berin a dah a, an la mutui dun em em zui.

Rsa chuan camera a la a, thla chu a láksak char char a, an duhawm dun lutuk chu an lawmawm tawp.

Room-a kan lét hnu chuan," Ui i rawn hawnsak hi chu a țha ngawt mai, a puitlin phah sawtin ka hria"ka ti a.

"A lunglèn hnem nan ka ti ber a, hetiang khawp hian a duh ang tih hi ka hre lo zawk"

"A duat em asin, Moana lah hi a lo fel bawk a"

"Hun remchang neih apianga training tir a țha, nang pawhin i ti thei ve tho ania"

"Junior enkawl pah chuan a har"

"Har chuang nang, engtin vaka train nge i tum reng reng a?"

"Ka hre chuang nang"

"Bawihtei hian a zirtir ve nasa tho a, mahse keimahin ka la pui ve ang e. Țawng hi chu a hre viau tho chuan ka hria"

"Hria e, Bawihtei țawng hi a hre lehzualin ka hria"

          *****************

Ni khat chu Ãmpuii'n min rawn phone a, a rawn țap țuau mai.

"Âpain Delhi-ah ânuteite bula min awmtir a tum a, ka duh lo va"

"Engtikah maw?"

"Kárleh lamah. U D, ka mang a ang e, engtin nge ka tih ang? Ka tlánbo daih mai dawn"

"Karleh lam a la nih tho chu. Ka pu ka lo hrilh dawn em ni ang? Țanpui dan che a hre mial maithei a?"

"Ka hre lo le, âpa chu a thinrim lutuk, U Mâma khan palai a lo tìr leh a. A hma pawh khan min chah chhoh chhan chu hmundanga min awmtir a tum vang tho ania. U Máma'n palai a lo tìr nawn leh bawk sia, chu chuan a tum tawh sa chu a tum nghehtir leh a"

"A nih tak chu. Tihtheih ka va nei lo tehlul em!"

"Tuna ka phone rawn hman pawh hi anu tá,a rùka ka rawn hman a nih hi, ka phone min laksak daih a"

Ka va khawngaih reuh tak. A rilru a hrehawm dawn tehlul nen, a phone an laksak zui ania.

Rsa bulah  chuan ka sawi a,ani lah chuan engmah a sawi lo, a rindan sa pawh a ni maithei a ni.

"Ka khawngaih e, tihtheih nei ila ka ti ngawt mai"

"Tihtheih i nei miah lo"

"Nei ila ka ti reng alawm le, ka pu hian a pa hi kaltir lo turin han ngèn ta se?"

"Honey, ni lo ve. Han hrilh ta chiah se, a zualkái ang a, Âmpuii chungah a țuan mai ang"

"I hrechiang hle mai tiraw?"

"Aw"

Hriatchian zel ka chák. A thuruk zèp reng, tam tak min la hrilh loh hi zawhchhuah ka duh.

"In inkár thilthleng hi hriatchian ka chák ngawt mai"

"Hriatreng tlák a awm lo"

"Mahse, i theihnghilh thei si lo a ni tiraw? "

A ngawi vang vang a, chutah," Theihnghilh theih nan hian tuna ka sum neih zawng zawng pawh hi ngai se, ka thleng duh hial ang"a ti sup a.

"Theihnghilh theihtìr che ka va duh tehlul em!!! Thil țha lo hi chu hriatreng tlák a ni si lo va, thinlunga kan pái reng chuan tùr hlauhawm tak nen danglamna a awm hauh si lo"

A rapthlak ka ti. Ka pa kha ka haw ţhin hle a, mahse tun hnuah hi chuan huatna ka nei tawh lo, huatnain ka thinlungah hmun a chang tawh lo. A chhan chu ka  hmangaih em emte, ka pasal leh fate ka nei tawh a,huatna neih hi ka tán a țul tawh lo, ka thinlung ei chhiattir ka duh tawh lo a ni.

"Min hringtu nu leh pate duh loh leh thiltih sual rah ka ni"

Makti zetin ka en  a, ka hresual emaw ka ti hial.

"Engtin nge ? Ni lo, i ni lo. I ni thei lo..."

"Ka ni miau si a.  An sawi ka hria alawm"

Engtin nge chutiang thil chu a hriat laiin an sawi theih? Mihring pangngaiin engtin nge an fate bulah an sawi ngam zawk le? An inháu thinrim laiin an sawi a hre tal a ni ngei ang.

"Chutiang chu i ni ngai lovang"

"Min hringtute tan chuan ka ni tlat si a ni, an duh loh, an thiltih sual váng liau liaua  lo awm ve, hlutna reng reng nei lo mihring ka ni"

Nghet takin ka kuah a, hetiang rilru hi a lo pu reng țhin a nih chuan a va rápthlak tehlul em! Ka pasal hian a nu leh pa thil tihsual rah nia a inhriat tlat chuan chu aia rapthlak chu a awm thei dawn em ni ang?

"Ka tán chuan i ni lo, khawvela pasal țha ber leh kan fate tána pa țha ber i ni"

"Chuan, ka pu tán pawh tupa țha ber, innghahna tlák i ni.  Ka tán phei chuan i hlu em em asin, ka engkim i ni a, ka innghahna i ni bawk"

Nghet takin min kuah lèt ve a, a rilru lo nat țhin turzia leh hrehawm a tihdan tur ka ngaihtuah a, hlutna reng reng nei lo mihring anga a inngái tlat maite chu tihbosak vek ka duh, a rilru hliam nasa lutuk, amah hringtu nu leh pate'n a rilrua dik lo an tuh tlat hi sáwițhiahsak vek ka duh bawk.

"I tána hlutna tlèm nei ve nia ka inhriatna aváng leh min hmangaih nia Lily min hrilh avang chauha la nunga kalchho ve bek bek zel ka ni asin"

A aw chu ka hre thei chang chang.

"Honey, engkim min hrilh hrám ta che, i sawichhuah chuan i rilru pawh a tháwlin engkim ka tuarpui thei ang che a, i ritphurh a záng sawtin ka ring" min koh dan chiahin ka ko ve, ka tìm deuh hlek nain ka duatzia hre ve se ka duh.

A ngáwi vang vang a, kei pawhin rilru dang ka lo pu leh hman. Ka nawr mah mah a ni ang, țùl a tih hunah chuan min hrilh ve mai ang a, ka hriat kher țùl a ti lo pawh a ni thei a.

Rei deuh hnuah chuan," Unau pianpui leh țhian ka neih loh avángin ka khua a har hlè țhin a, chuvang chuan min hringtu nu leh pate hi ka ngái a, an bula awm ka thlahlel ngawih ngawih țhin. Mahse anni lakah chuan engmah ka ni lo. Hmangaihna ațanga piangchhuak ka ni lova, duh loh ațanga chhuak ka ni. Hlutna pakhatmah ka nei hek lo"a ti dap dap a.

Rilru hrehawm zetin ka lo ngaithla a, a țawngka chhuak, kha zet ațang chuan a nu leh pa a huatzia chu a hriat theih chiang hle.

"Naupang té ka nih avangin engmah ka la hrethiam lo. An bulah ka mu ngai lo hrim hrim a, ka hriat theih tirh ațangin ka pi leh pu bulah ka mu țhin. Room hran chu ka nei ve tho nain, ka piin keimaha ka riah a phal ngai lo. Tun hnua ka ngaihtuah hian room hrana riah a phal lo kha ka nu leh pate inháu thawm ka hriat a duh loh vang a nih ka ring ta, an room leh ka room chu a inhnaih hle si a"

"Zan khat chu ka room-ah chuan lehkhabu chhiarin ka mu mai mai a, ka muhìl țèp tihah chuan ka nu leh pa inháu thawm ka hre ta a. A tìrah chuan mak ka ti lutuk, an inhau ka la hre ngai miah si lova, khùr zawih zawihin ka khum bula dawhkan hnuaiah chuan ka biru a"

"Ka nu chuan in a nin tawh thu leh ințhen a duh thu a sawi a, ka pa chuan engtiklai pawha a chhuah theih thu a hrilh a, a chhuak a nih erawh chuan kei min hruai tel ngei turin a ti a, ka nu ve thung chuan 'ka hmangaih miah loh fa,ka tána hlutna reng reng nei lo leh ka duhthu renga ka neih pawh ni lo hi ka hruai lovang' a ti tlat a"

"Ka pa chuan' titla rawh ka tih mawlh mawlh pawhin min hrèn nan i pawm lui a nih kha, hetiang fa lubáwk ka mamawh lo, in pahnihin thlâwk bo rawh u' a ti a nih chu"

A taksa inkengkhawng tlat chu nghet zetin ka kuah ran a,a kut nghet zeta a hùm tlat chu ka hrereng, ka kuahna chu zawimuanga thlahin a kut chu ka laksak a,nghet takin ka chelhsak ta thung, naupang tè a nih laia a thu hriat chu a rapthlak em a ni. Engmah la hrethiam kìlh kélh lo mahse engemaw chen chu a hrethiam ngei dawn, a puitling telh telh ang a, a hrethiam telh telh ang tih chu a hriatsa vek bawk.

"Ka pu leh ka pi hi ka tan chuan ka nu leh pa dik tak an ni. Hmangaih takin min enkawl chho a, ka tleirawl tirh phei chuan enkawl ka harsa hle tih ka hria. Mahse mihring ni ve si, hlutna leh nu leh pa hringtute duh loh nih chu rapthlak tak a ni. Mi zinga awm kan inkiltawih a,nu leh pa berin min duh loh chuan tuin nge min duhin min hmangaih tehlul ang? Țhian ka nei lo va, kawm pawh ka káwm khát, maltlat nuam ka ti a, mi zinga inkiltawih tlatna kha mahnia awm chuan a awm lo a, a zia țhin"

"Nitin ka nu leh pa inháu ri chu la bengah a chám reng a, kan in hi nuam ka ti thei ngai lo, ka thlakhlelh em emte chuan ka thinlung chu an tina ngawih ngawih a, khami zan ațang khan ka thinlung ațang hian ka paihchhuak ve ve a, tun thleng hian ka thinlunga hmun an neih ve chhun chu huatna a ni"

"Ka nu chhuah hnuah ka pa chuan zu a in tam lehzual a, a thinrimin min sawisa țhin. A duh loh ka ni sa bawk nen, ka pi leh pu hriat loh hian min tihrehawm thei ania, naupang tè, a rila rah ngei khati khawpa min tina duh a nih ngai chuan Âmpuii chungah pawh hian tharum a thawh duh ngeiin ka ring"

"Engtin nge khatiang em ema a ráwnga a fapa chunga a chèt theih le? A duh lohzawnga ka awm a nih chuan nilèngin min phuarbet a, dawhkan hnuaiah min țhuttìr țhin. Ka pi hian min chhan țhin a, ka pu bulah erawh kan sawi ngam ngai lo. A chhan chu keima tuar leh tur tho a nih avangin, ka pi bulah chuan zèp turin ka ti țhin. Ka pu inah a awm tlém bawk si a, ka pa lah chuan ka lu hnung chu a zui peih der lo, inah zu a in a, ka pu sumdawnna lama a zin hlanin inah hian nulate nen an party țhin a, chutah chuan nuihza siam nan min hmang țhin. Ka rilru ka siam sauh sauh a, ka len hunah chuan 'ka tirethei ve khawp ang che'tiin chhia ka chham țhin. Chutiang rilru min puttir theitu chu min hringtu pa ngei hi a ni si, a nih loh hi ka ring țhin asin. Khatianga nun hrehawm lutuk ang kha chu ka fate hian hmang ve lo se ka duh takzet a ni, chuan ka nu leh pate nun hman ang kha paltlang ve lo ang aw"

Ka khawngaih lutuk chu ka mittui a parawl kuang mai a, a va hrehawm dawn tak em! Ka tet lai khan hrehawm ka ti ve viau țhin a, kei aiin a tuar hi a lo hrehawm daih si, a tuar chanve pawh ka tuar ve dawn em ni? Ani phei chu a rilru zawng zawng an tihkhawlohsak vek lehnghal a.

"Honey, ka tiam a che, kei chuan chutiang nun chu ka tempui ve hauh lovang che. Pasal țha ber i ni ka tih tawh kha, chuan, kan fate tan pawh pa țha theihtawp i ni"

Ka kuah leh a, a hnung chu ka chùl hliau hliau a, a mangchhia hi reh se, tâwpsan tawh se ka ti. A thinlunga huatna inbun nghet lutuk tawh hi engtin nge a zung chawpin ka  phawichhuahsak theih ang le?

"D, min hmangaih tih ka hriat tirha ka lawmzia kha. He khawvela hlu ve miah lo nia ka inngaihna kha hmangaihtu ka nei tih ka inhriat chiah khan a lo dik bìk lo tih ka hre ta a, ka thinlunga ka lo vawn ngheh em em 'hlutna nei lo, hmangaihna tel lo, sual thiltih rahchhuah' ka nihna chu nang hian min țhiahsak ta hlek hlek a, nang hi ka lo tawng lo ang che tih ka hlau takzet a ni"

A thusawi chuan min tihláwm em avang chuan a biang tawn tawnah ka kut pahniha dawmin a hmuiah chuan dìm tè hian ka fâwp a, ka pasal hian duat a phu a, a thil lo paltlang zawng zawngte ngaihtuah lèt phei chuan  pasal țha lutuk leh fate tana pa țha lutuk a han ni theite hi a mak zawk.

"Ka hmangaih che, kan tán chuan i hlu ber a, nang aia pasal țha leh pa țha an awm lo, he khawvelah hian ka tân leh ka fate tan chuan i hlu ber, i lo piangchhuak hi kan tân hlimna leh malsawmna i ni"

"Ka lawm e"

"Ka tán leh kan fate tán, pasal țha ber leh pa țha ber i ni hi ka lawm a, ni chhunzawm zel bawk rawh aw"

"Min puihna chauhin ka ti thei a ni"

"Ka pui zel ang che, ka damchhungin"

     *******************

Kum 3 hnuah chuan,

"Ânu, hmanhmawh teh, kan tlai dawn ania" Bawihtei chuan in hnuai ațangin min rawn au vau vau a.

"Aw le, aw le, ka hman a ni mai"

Ka make-up hman chu darthlalangah inenin ka check leh a, ka hmui chu ka hnawih țha leh sawk sawk a, ka pum puar ve leh tawh tak chu ka kawr hák mar zetah chuan a lang chiang hle mai. Ka ha duh lo ngial dawn a, Lily leh Âmpuii'n ha tura min tihluih tlat avangin ka hnial ngam lo, inhmeh erawh ka inhmeh phian.

In hnuaiah chuan an pafa za chuan min lo nghâk țhap tawh a, Junior chuan min lo hmuh veleh," Ânu, i mawi lutuk"a lo ti chul a.

"Ka lawm e, sweetie, nang pawh i mawi lutuk tlat"

Rsa thawmhnaw hak chu ka enfel leh a, a bowtie chu ka siamsak a, a hmuiah chuan ka chuk zoh a, ani pawh chuan," I mawi leh ber dawn a nih hi"tiin min fiam leh zoh bawk a.

Vawiin hian Âmpuii leh Máma an innei dawn a, khati chen hrehawm tam tak tuara hlawhtlinna hmel an hmu dun hi a lawmawm em em a, ka lawmpui ngawih ngawih a ni.

Scorpio chuan kan kal a, Bawihtei chuan Moana chu țha taka lo awm turin a ti a, a lo lèt thuai ang tih a hrilh bawk a.

Âmpuii chu an cheimawi kher asin. Biak Inah chuan Rsa'n a kai lut a, an unau hmelțhatzia chu. Mittla lek lekin ka lo thlir a.

An thuchham lai chuan Ámpuii chu a mittui a tla a, kei pawh ka lo men pùr mai. Rsa chuan ka beng bulah chuan," Honey, insùm ve deuh la, naupangin mak an ti che ania"a ti sup a, ka han hawichhuak chu Bawihtei leh Junior chuan min lo en reng a, ka mittui chu ka rawmawla hru pah chuan ka nuihsak ve ve a.

Thlalaknaah chuan Bawihtei chuan nuam a ti khawp mai, Junior erawh a zak deuh a, ka bulah a awm deuh reng thung. Ãmpuii nen chuan kan inkuah vang vang a, ka lawmpuizia hi a hrethiam ve chiang alawm.

Hlim takin hun chu kan hmang a, zana kan haw meuh chuan a tlai ve ruih mai, Bawihtei chu a la meng a, Junior erawh a muhil tawh  thung.

Bawihtei bulah Junior a mu tawh a, thla hnih vel zet a mu tawh. Moana an mutpui theih avangin kan bula mut an duh tawh lo ve ve.

Mut dawnah kan inbual thuak thuak a, vawiin lamah mipui an tam avangin rin aiin chauh a awl.

Rsa'n min malis a, ka dar chu a hmet nauh nauh a, chutah ka cháwn lamah a hmet thla leh a, vawiin lamah pheikhawk sang ve deuh ka bun a, chu chuan ka ke a tikham lutuk a ni.

"Duhtawk tawh rawh, mu ang. Nang pawh i cháu viau ang chu"

"Cháu lèm nang, ka nupui bulah ka cháu thei hleinem"

"Haha, a va lawmawm ve"

"Vawiina i lan sexy zia kha"

Rsa hi chuan ka raipuar hian sexy min ti tlat zel.

"Ka chhe pèr pùr ngawt zawk lo maw?"

"Engtiklai mahin i chhe ngai lo hrim hrim, chuan, zanin hian thil tihchák ka nei a"

Ka dul puar ve lah tawh chu duat zetin a rawn chùl hliau hliau a, um, a tihchák chu ka hria. Hnial pawh ka tum lo, ka lo inphal em em zawk.

Nupa nun hlimawm zet kan chen hnu chuan min rawn kuah a, ka nghawnga fawp zohin,"Ka hmangaih che" a ti sup a.

Ka hresual em ni?!!! Min hmangaih maw?!!! Kum kha leh chen chhung khan he thu hi a la sawi ngai lo hrim hrim.

"Eng maw?!!!!!"

"I hriat reng kha"

"Nih leh, ka hre leh duh ti ta ila?"

"KA HMANGAIH CHE"

A lam hawi chuan harsa zetin ka inlet a, ka mittui chu a luang ngiai ngiai mai. Ka mittui tla hma lutuk hi ka zak țhin a, tuna ka mittui tla erawh hi chu ka zak lo, a lawmawm em a ni, khawvela ka thil hriat châk ber a ni si a.

"Ka lawm e, kei pawhin ka thinlung zawng zawngin ka hmangaih che"

"Ka hria e"

"Kha thu kha i sawi hun ka nghah reizia hi"

"Sawi kher lo pawhin i hre tho lo mi?"

"Hre nang, min hmangaih hi ka ring ngam lova, min duh tih chu ka hria. Min hmangaih thu sawi kher lo mah la keimahin ka hmangaih em che avang hian ka inhném țhin a"

"Ka chetziaah ka tihlan ţhin avang hian sawi kher ngaiah ka lo ruat hleinem. Sawichhuah kher i duh chuan ka hrilh nawn reng mai ang che, ka hmangaih che, ka hmangaih em em che, mi ang pangngai, hlutna nei leh hmangaih ka nih min hriattirtu i nih avang leh ka fate nu i nih avangin ka hmangaih che, engtiklai pawhin ka hmangaih reng ang che, chatuan thleng pawhin".


    ******** F I N ***********

(Phuailuai deuhin  RUATSANGA chu a lo tawp ta. Chhiartu zawng zawngte chungah lawmthu ka sawi takmeuh meuh e. Chuan, PITARTEI, MAMI CHHAKCHHUAK leh  BOSS NGAIA chungah ka lawm em em, ka tihbuai ber berte an ni a, an tel lovin he story tláwm tak hi  a kal thei lo tih ka hria, ka lawmzia hi sawi ngaihna pawh ka hre lo. Lawmthu ka sawi mawlh mawlh e.
        Chuan, Story thar ' true story based' nen ka rawn lét vat ang, min lo chhiarsak leh țheuh dawn nia.)