☆2020☆ - 40 & 41 By Dingdi Pachuau

☆2020☆ - 40 By Dingdi Pachuau




"Ka rawn kal ang aw?"



"Aih!" Ka chhâng rang lutuk a, a ngaih a țha lo ngei ang.



Ka rin ang chiah.



A thaw hawk a,"Thil thleng a awm a ni tiraw?" a rawn ti ta chiah.



"Awm deuh tho, chhúngkaw thil a nia," ka ti vat, ka mittui a tlain ka lung a chhia tih hriat loh tùr berin ka aw ka tidanglam hrâm hrâm.



Chhûngkaw thil ka tih avàng chuan min zâwt zui lo," I dam țha tiraw?" a rawn ti daih.



"Aw..." ka ti phawt a, ka ngawih deuh vang vang hnuah," Zanin engtin nge hman i tum ve?" ka ti ta daih a.



"Bike intlànsiak a awm dâwn a."



Kal lo hrâm se ka va ti tak! Hlauhthàwnna ka rilruah a lo awm nghâl bawk, an man leh palh ang e.



"Kal i tum em?"



"Min sâwm a..."



"Chuan?" ka ti leh, kal lo  tùrin ka duh tih hi hre thiam se aw... a chhan chu ka kalpui theih loh bâkah nula tu emaw a hruai ang a, mitmei vèn tùr awm lohna hmunah chuan thil sual tih a awlsam, thlèmna a hnai bîk. Bâkah, a chesual ang tih ka hlauhpui ngawih ngawih, bike khalh thiam tak pawh hi bike-a chesual vêk hian a nia an thih țhin ni.



"Ka tum lêm lo, i tel ve dâwn si lo va."



Ka va lâwm tak! Ka nui sak, ka pa min zilh hnuah khân ka nuih leh theih ka rin tawh loh nèn!



"I ti țha lutuk! Kal lo tùrin ka duh che a, ka sawi ngam lo va," ka tih chuan," Min hlau em ni?" a lo ti zauh a.



"Nuam i tih zâwng tak phal loh kha nuam ka ti lo alawm," ka tih chuan a chek hluk a.



"Ka bulah chuan awm la chuan aw..." a ti vang vang a.



"Min pen fawk ang!" ka lo ti hmanhmawh a.



"I mawng nalhah khân ka bêng thlawp ang."



Fiamthu a thawh ve chuan min tihlim khawp mai, ka rilru pawh a zia tawh lutuk. Ka tân chuan ani hi damdawi țha ber chu a lo ni.



Inkhâwm bàn hnuah inah ka haw, Naua a lo awm lo va, room-a ka lût tùr chu ka pa chuan," Inkhâwm lovin khawiah nge i kal?" min lo ti nghâl a.



Ka inkhâwm lo tih a hria a nih chu. A àwm ve reng, kan kohhran member kan tam êm êm lo va, kan khaw mi hrim hrim pawh kan tam lo, ka inkhâwm lo tih chu a hre thei khawp ang chu, nula lah kan tam lutuk bawk si lo.



"Ka-"



"Hetiang zâwng hian min nêk hauh suh, i pa ka nih hi. Ka thu âwih ta che, ka zilhna che kha pawm mai la, i tâna țha lo tùrin ka zilh lo ang che. Ka thinur e ka titau e te i ti ngam a ni maw? Ka vaw kâwrh mai ang che," a ti leh buan buan a.



Ka rin loh lam daih a sawi avàng chuan ka ngawi reng ringawt, hetiang hian a thin a lo rim ang tih ngaihna pawh ka hre miah lo.



"Kha pa nèn khân in lo inhmu ru êm ni zâwk? Zak lo lutuk! Țhen nghâl vang vang rawh, ka duh lo ka tih tawh kha. I hmu leh a nih chuan i tân a pawi ang aw."



Ka nu chuan," Paa, insûm deuh teh, khatiang pùng pùng kha chu mawi pawh a mawi lo ve," a lo ti a.



"Kan fanu hi a nungchang a mak ta êm a nih hi! A pa thu pawh a hnial ngam tawh a nia, ka faten ka thu an hnial hi ka duh lo, ka duh hauh lo!" a ti leh khur khur.



"Ka pa, i hre sual a nih kha, tu mah-"



"Mu nghâl rawh, zanlai inkhâwmnaah pawh kal suh ang che, ka thin i tirim tlat. I room-ah khân lût la, rawn chhuak tawh suh, ka hmu peih lo che!"



Chutiang teh thlâwt chu, ka rilru a na kher mai! Mittui tling pamin ka room-ah chuan ka lût a, khumah chuan lungchhe zetin ka țhu a, țah chhuah erawh ka tum lo.



Ka rilru a na tak zet! Ka ti dik lo tih ka hria, a duh loh zâwng tak bialpa ka nei si a. Hetiang teh hrepa chhûngkua buai hi ka duh bîk lo; mahse, hmangaihna chu tuin nge dang thei le?



Ka mittui a sûr zung zung, Essa ka ngai a ni. A bulah ka awm châk, tunah tak hian nghet takin min kuah se, duat takin ka hnungah min chûl bawk se, țawng kher lo mah se ka thla a muangin ka rilru nâ pawh a reh mai tùr a nia...



Mahse, min hnèm tùrin a awmna a hla lutuk si a ni.



Ka pa âng thâwm chu ka la hre pha reng, a sawi tak erawh ka hre chiang lo. Hrehawm tihnain ka khat tlat, hetianga kan pafaa kan han awm ta mai hi a hrehawm a ni.



Mite chuan kum thar rilru hlim takin an hmang, an hmêl ațangin a hriat mai. Keini chhûngkua erawh kan hlim hlawl lo tih ka hria, kei phei chu a langa hlim hmel put luih pawh ka thei lo. Ka inkhâwm țâwk, thlâ pawh ka la lo, kan chhûngkua pawhin kan la lo, kan boruak a fuh lo vek a ni.



Fatu lamah ka âwl hlauh a, a zia. Tlaiah ruai țhehnaa kal tùrin ka nu nèn kan chhuak a, ani pawh keimah vàngin a zaikhâwm lo. Ka zah êm êm a ni, ka pa zaikhâwm hlànin ka nu chuan min titipui keuh keuh a, kei pawhin Essa chanchin chu a tlângpui ka hrilh ve, min mamawh a ni tih leh kei pawhin ka hmangaih êm êm a ni tih pawh ka hrilh tel vek.



Ka nu chuan eng vak a sawi lo, a mitmeng zaidam taka min lainatna leh min hmangaihna ka hmuh chuan min hnèm êm êm. Ka nu hi chuan min hre thiam, ka pa hian min hre thiam ve se ka ti tak zet.



Ka pa chu ka chunga a thinrim tlat reng avàngin kan in chu ka chhuahsan ngai lo, nuam ka ti hlawl lo, room-a ka awm loh leh eirawng ka bâwl a, ka inbual leh tawp.



Phone call lo kal chhànah pawh ka fîmkhur tawh lutuk! Essa phone call a lo kalin ka pa a awm hnaih chuan ka chhâng ngai lo, ka ring raltîr tawp. Zànah whatsApp message-ah ka insawi fiah mai zêl, kan la in-text reng țhin tih hria se chuan ka phone min chhuhsak duh ngei ang!



Essa erawh kan boruak chu ka hrilh lo, ka hrilh duh lo. A hria ang tih ka hlau zek zek zâwk, min kalsan chuan ka thi a ni mai, ka uar luain ka ring lo. Hetiang boruak ka tawn hnuah phei hi chuan hmuh ka châk tawh ngawih ngawih, ka ngai lutuk ringawt.



Kan in chu nuam ka ti hlawl lo, rilru hrehawm deuhin ka awm reng si a, chawlh hi zo thuai thuai se ka ti, Lungleia phei daih tawh ka châk.



Ka phei dâwn zànah chuan zanriah kîl laiin ka pa chuan,"Sawi nawn ka duh tawh lo, ka duh loh chu i hriat tawh kha. Ka duh loh dàna i awm chuan i hna ațang hian i bâng ang a, kan bulah i awm ang. Chu chu hre reng ang che," a ti leh ta.



Ka ngawi reng, chaw ei erawh a sak khawp mai.



Ka pa vêk chuan,"Ka sawi kha ka tih duh loh ring suh ang che, khatiang mi tla hlang kha i neih hlauh chuan miin hnung lamah min nuih nasa lutuk palh ang, i phû tâwk ve deuh hi hre ta che," a ti leh.



Ka nu chuan,"Chutiang chu naupang hriatah sawi lo hrâm teh, tu mah inhmuhsit thei kan awm hleinem, Pathianin chhan neiin min siam vek a, kan awmna hmun leh dinhmun a inang lo mai a ni. Keini pawh hi eng mah kan nih loh hi, Pathian zârah kan dam țha a, hna kan la thawk thei a ni mai a," a lo ti dap dap thung.



"A khaih! Nu leh pa nei tawh lo, lehkha zir sâng bawk si lo kha mâkpa atân ka duh lo hrim hrim! Mi a la induh khumin ka hre nghe nghe asin, mi chapo tak a nih kha," a ti leh ta êrh.



Ka tho ta daih, chaw ei tui loh nâklaiin, ka chaw ei a tàwp.



"A mizia ve a niang chu, a țawng duh loh vàng khân induh i ti mai mai a ni, mi țawng duh lo tak a nih ve kha," ka nu chuan a la ti hrâm hrâm.



Ka nu hi chu a dik ve a nia, chutianga a lo țawng ve hrim hrim pawh chuan min tithlamuang, min hnèm tawp.



"Țan lo teh! Ka duh dâwn chuang lo."


*******


Naua lo phei ve hmain Essa a rawn lang hlawl, eirawng ka bàwl laiin a lo lût a, ka lo hmu miah lo va. Ka hnung lam ațangin min rawn kuah thut mai chuh, ka phu nasa lutuk a, ka au chhuak țhawt maw le! Ka tâl nasa.



Amah a ni tih ka hriat hnuah erawh nghet lutukin ka kuah a, ka rin loh deuh a ni bawk si a, ka hlim lutuk lungchhe pah chu ka mittui a rawn tling nghâl kul kul.



"Ka ngai lutuk che!" țap țuauin ka ti, ka zak teuh lo! Ka ngai êm asin.



"Chuvàng alawm ka rawn phei!"



Che lovin rei zet kan inkuah, hei hi alawm ka thlâkhlelh êm êm kha, ka mumang mai a ni ang tih ka hlau a, maimichhìn pawh ka duh lo.



"I damlo lo tiraw?"



Ka la thlah phal chuang lo.



"Ka dam alawm; mahse, ka ngai êm che a ni," ka ti sap.



Kan awm dun theih chhûng hi chuan ka pa thil sawi kha ngaihtuah chhuah ka duh lo, ka hlimna tichhetu atân chuan ka remti thei lo ang.



Ka hlim lutuk a, ka ngaih a țha lo lek lek zâwk hial a ni. Eirawng kan bâwl dùn a, ei tùr siam thiam tak a ni tih ka hre tawh a, a lo siam pawhin ka hnial lo.



"Min ngai tiraw kha?" Zanriah kîla inhmatawn ràna kan țhut lai chuan a ti a.



"Râpthlâk lutuk maw le!" uar zet hian ka lo ti vat a.



"Chuti, han âng la?" tiin a mitko a san ãk a, a kut dinglama a fian kenah chuan a salad siam tui hmel fe chu a awm ràn bawk a.



Ka âng ve mai bawk a, chu a thil ken lai chu min rawn barhin," I dam țhat theih nân ei tùr i ei țhat a ngai a ni, i damloh ka phal hauh si lo va," a ti a, ngun zet hian min en pah bawk a.



Tui ti takin ka țhial hmarh hmarh, a duat nih hi ka châk rêng a ni. Duh tak hian ka en lêt ve ràn a, a mitmeng cool zet hian min hîp êm êm reng a ni.



"I damlo thei lo tih hria la aw."



"Umm, min enkawl țhat phawt chuan ka damlo miah lo ang," ka ti sap a.



Dawhkàn hnuai lama a ke chu a ninhlei țan ta, a ke lum ham ham chuan ka ngalrêk, ka kekawrin a khuh lohna lai tak chu a rawn tawk zai zai a. Eng mah sawi lo hian a mitko chu a tiche zeuh zeuh a, mit khap hauh lovin kan inmelh tawn bawk.



Chutah, ka kekawr hâk chu ka kerêk aia sâng deuhah a rawn tlawh hlîm chho leh a, tlêmin a a meng zîm pah deuh bawk. Kei chuan ka hmui chunglam ka pet zoh, a men dan chu a sexy ka ti lutuk a, min aikaih tlat, chaw ei pawh ka ngaihtuah lo.



A nui ta hawk.



"Chaw kha ei rawh."



Min tihnual rawih thei, bâkah, tlêmin ka zak bawk.



Thlêng ka sil laiin ka hnungah ding kûn khuauin ka kâwngah a lo kuah tlat bawk. Nuam ka ti, tlêmin ka chêt a tikhawr deuh nain ka sawisêl hauh lo.



"I rim a tui." Ka nghâwng a thâwk khum lum ham ham mai.



"Nang pawh."



"I hriat ve loh kha," a ti sup a.



"Tihian ka hre ve thei reng alawm," ka ti tlat a.



Ka nghâwng fâwp zohin," Dâwt i sawi thiam ve reuh e," a ti leh sup a, ka kokiah chuan a khabe a rawn nghat, a din dàn chu a nuam lo ngawt ang chu.



"Ka hre thei tak tak alawm," ka la ti fan.



"Dâwt sawi man zanin chu hremna ka pe dâwn che."



Ka sil zawh pawh chuan ka kalna apiangah min zui zél! A che maksak a nia, min ngaih vàng a ni ve thei ang em?



"Mut hma hahchawlh pahin games khèl ila?"



Pawi lêm lo, chaw ei kham hlim hlawta mut nghâl ringawt chu a dik lo, kan thil ei kha an ngaihtuahawm.



"Yes, Boss."



Țhutthlèngseiah chuan a kapkârah min țhuttîr. A phone chu keiin ka keng a, aniin a khèl thung, ka lo pui ve zauh zauh.



"A dang khelh i duh em? Eng nge i khelh ve țhin?" tiin min zâwt a.



"Ka khèl ngai lo."



A biang leh ka biang chu a insîk deuhthaw avàngin a lumna chuan min ur pha deuh a, mipa nge nge chu pangti lum pawh a nei deuh e.



"Vâwi i ti em?"



"Aih..." Ka ke hmâwr erawh a hit leh vek tawh,mawza ka bun reng chung pawhin a hit a nia, hei vang hian thlasik hun hi chu ka ngaina lo țhin.



A kein ka ke chu a rawn khan a, ka kekawr hâk chhanah pawh a lumna chu ka hre thei tho.



"I mawza kha hlîp daih rawh."



A ke lum ham ham chu ka ke hmâwr vawt zet chuan ka dek a.



"Vûr lalnu i ni ringawt alawm le!"



Nuam ka ti lutuk ringawt!



Kan mu har lo, mutnaah pawh chuan ka ke chu a kherh bet tlat a, inkuah chialin kan mu.



"Naktûk dâr eng zâtah nge i haw phei ang?" tiin ka zâwt a.



"Ka thlah phawt che ang a, chumi hnuah chuan a ni ang chu."



"Ka ngai leh dâwn che e!" Ka kuah nghet châih châih a.



"Rawn phei leh thuai ka tum ang," tiin ka chalah chuan a fâwp zoh a.



"I buai hle àwm si a?"



"Buai tho e, workshop kha tihzauh a ngai a, a zîm tawh mah mah a."



Mi hnuaiah tihian nilêng lêngin hna a thawk ve chu a ni si a, a pu leh a pite, a nu leh pa lam a khawi zâwk zâwk pawh bèl se hetianga hna han thawh hi a ngai miah lo tùr a nia, a tui zâwng tak a nih chu thuhran, mi hnuaia a thawk thei hi a làwmawm hrim hrim.



"Engtikah emaw chuan nangmah ngeiin i la enkawl ve ngeiin ka ring, i thawh țàng țáng chuan i hlawhtling ngei ang," ka ti sap sap a.



"Eng chu?"



"Workshop maw le, nuam i ti si a, i neih ve hun a nghahhlelhawm ka ti a nih chu," ka ti, a rilru nat nân a hman loh hrâm ka beisei.



"Ka tâ alawm ka enkawl."



A khabe hnuaiah chuan ka dâk chho, meng phâwk zet hian," Tuna i thawhna hi i ta maw? Maremi nèn scooty kan rawn siamtîrna che kha?" ka ti háw a.



"Umm.."



Ka lo hre hauh lo!



"Ka lawmpui che!" hlim zeta ti hluaiin a khabeah chuan ka fawhsak a.



"Hmuiah pawh ti law law la?"



Kan infâwp vawng vawng, thil țha lo, hlim lohna leh rilru natna zawng zawng bo rak khawpin kan infâwp, kan inthlah meuh chuan thâwk kan la dùn halh halh.



"Zanin hian i sexy zual ka ti!"



Thaw halh chung chuan ka nui sak, sexy min han ti ve tlat mai hi mak ka ti, ka lâwm viau bawk.



"Chuan, zanin chauh chu...?"



Ka melh chho vat, ani pawhin zîm deuh hleka meng hian min rawn en, kan inen hnai khawp mai.



"Please?"





*NI ÊNG HMU TÙR CHUAN ZÀN THIM PAL TLANG A NGAI A, CHUTIANG CHIAH CHUAN HLAWHTLING TÙR CHUAN HREHAWM TAWRH HMASAK A NGAI*






☆2020☆ - 41 By Dingdi Pachuau




A thil sawi awmzia ka hre chiang khawp, a mitmengah duhna leh ngenna chiang takin ka hmu thei bawk.



"Ess, kan thei lo tih i hriat kha,"ka ti sap, ka 'aw' hlauh chuan thil thleng tùr ka hre chiang ropui, duh tâwk chin kan nei thei lo ang.



"Engtia rei nge min hrem dâwn?"



Ka hrem pawh a ni lo, 'thil' kan lo tih tawh kha thil țha a ni lo, nupa kâr chauha thleng tùr a ni lehnghâl, kan tihsual tawh kha tihsual nawn leh ka tum tawh lo, a dik lo tih ka hre kar tawh si a, kan tih leh hlauh chuan țawngțai ka inthlahrung leh vek dâwn asin! Bâkah, țawngţai pawh chu ngam pawh ka ngam tawh kher lo ang.



A lungàwi loh erawh ka hlau khawp mai, dam taka chhàn dàn tùr ka duh.



"Ka hrem lo che asin, nupa inkâr chauha thleng tùr a nia, a dik lo tih rilru fîmin ka ngaihtuah thei tawh si a, ka tisual lui thei tawh lo a ni," ka ti sap sap a.



Hre thiam thei se ka va ti tehlul êm!



"Eng hunah nge i remtih ang?"



"Kan inneih zànah le," nui chung hian ka ti a.



Inneih lam hi chu, a la hla lutuk! Tunah hi chuan a lungawi nâna sawi chhuak mai chauh ka ni, a hriat thiam hrâm ka beisei.



"Inneih ka duh hleinem."



Inneih a duh lo. Chêtsual nawn leh ka duh loh vànga min tihnat nân sawi a ni ang em? A thil sawiin min tihnatizia chu a hre hauh lo ang! Kei pawhin ka lo la ngaihtuah ngai lêm loh thil ni mah se ani nèna awm dun hi chu ka hnial chuang hauh lo ang. Inneih duh se ka hnial lo bawk ang.



"Nia...kei pawh."



A âwm zâwn ka melh daih, a mitah pawh ka en ngam lo. Dâwt ka hrilh miau si a, dâwt ka sawi tih a hre chhuak ang tih ka hlau.



"Kan induh tawn phawt chuan mut dun hi a pawina ka hre lo, kawppui nei lai kan ni lo ve ve bawk a, a thiang alawm."



A ngaih dàn chu heti daih!



Ka hrilh fiah ve ngial. Min tilui bîk lo, a lungawi loh phah êm êm pawhin ka hre chuang lo.



"A nih, ka kuah che chu i phal tiraw?"



A muthilh hnuah chuan a thil sawi kha ka ngaihtuah. Nupui neih a duh lo. Min duh a, nupui neih erawh a duh lo, nupui atân min nei duh hlawl lo tihna a ni êm lo ang chu maw? Nge sex hmanpui atân min thlahlel chauh zâwk?



Mahse, min thlahlelin min duh lo se helai thleng thleng a rawn kal lo tawp ang. Min duh ve tho, min thlahlel tho, nupui neih a inpeih rih lo mai chauh a niang.


*******


Naua awm laiin phone-ah pawh ka be char char tho, ani hi chuan ka pa bulah a sawi lo ang tih ka hria, eng mah a sawi ve ngai lo.



Ka hun hman dàn a ngai, ka hna pawh nuam ka ti ve tawh a, bâkah, ka pa min zilhna leh min hauhna ka hre phâk tawh lo va, a zia ka ti khawp mai.



Ka pa hian a tisual vek ka ti hauh lo, a duh loh zâwng hre sa ràna ngaihzâwng nei ka ni tlat. Ka thiam loh a ni ve tho asin, ka pa chuan ka tãna țha ber nia a hriatin min zilhin min hau a ni ve mai. Mihring a nia, kohhran upa ni mah se tlin lohna tam tak neiin fel lohna tam tak a nei ve tho bawk.



Mahse, kohhran upa a nihna biak in chhûng chauha a lantîr hi chu a dik ka ti bîk lo, mihring piang chhuak rêng rêng tu mah inhmusit thei kan awm si lo, min siamtu chu Pathian a ni a, dinhmun inang lo tak takin min siam mah se inhmu hniam tùr hi kan ni lo asin. Inhmusit thei kan awm hauh si lo, nunna pakhat nei țheuh kan ni. Tu mah kan va châwm lo va, an dinhmun leh an nun chhuah dàn, an thil lo paltlang tawh zawng zawngte hre hawt lovin kan hmusitin kan en tlêu tùr pawh a ni lo.



Hei tal hi chu ka pa hian hria se ka ti.



Essa hi kei chuan ka hmangaih a, min mamawhna hi ka hmu thiam bawk. Chuvàngin, ka theih chhûng chu ka kalsan lo ang, min mamawh êm êmtu rilru na taka ka kalsan chuan mi sual ber kan tih nèn eng nge danglamna kan neih ang? A natna vei mêk hi ka lâk kiansak thei ka ti hauh lo; mahse, tlêma amaha danglamna ka neih hi hman țangkai ka duh mai a ni.



*Ka rawn lêng dâwn*



Sangzuala. Kan inhmu lo rei ve leh ta e. A pawi lo, ani hi chu ka țhian a ni tho alawm, Lungleiah țhian ka neih loh êm hi.



A rawn lêng ta ngei, kan inhmu lo rei deuh tawh bawk a, tlêm chuan ka hmu thau deuhin ka hria, a lu a meh thar vàng zâwk em ni?



"Sam thar a ni maw?" tiin ka lo nuih a.



"Aw, vawiinah ka mehtîr a, a mawi em?"



Ka kutzungpui hmuhin," Mawi, i inhmeh!" ka lo ti a.



Naua, room ațanga lo chhuak nèn chuan an inbe ve luam a, an inhmuh ngun vak loh nèn, an innêl phian. A chhan chu an titi duh zâwng, an sawi duh zâwng a inman tlat a ni.



Naua kal sawn hnuah chuan a țan nân,"Krismas leh kum thar kha i hmang nuam em?" tiin ka zâwt a.



"Aw, nuam ve reng mai. Bialnu ka nei thar a," nui deuh chung hian a ti a.



Makti zet hian ka melh rùn ringawt! Dâwt, a fiamthu tal a niang; mahse, a dik leh si ang. Ka rin loh thil daih a rawn sawi chhuak a,țawng nachâng pawh ka hre lo!



"Eng nge-"



"Tak tak a ni maw?!!!"



"Aw, nang pawhin i neih chuan engah nge ka neih loh bîk ang?"nui chung bawk hian a ti leh a.



"Ka lawmpui lutuk che!" ka ti phawt a, chutah,"Ka hmu ve châk e a," ka ti leh a.



"Hmu châk duh lêm suh, a tluk lo che."



Rum deuh hian ka melh, a thil sawi dàn kher kher chu ka ngei alawm.



"Lungleia mi hi a ni em?"



"Ni chiah lo, ni thei deuh tho bawk."



Chutiang lam chu kan sawi vêl mai mai. Hetiang min han hrilh ve duh ta mai hi mak ka ti, țhian tak takin min en ve tawh a nih ka ring.



"Engtikah nge ka hmuh ve theih ang?" ka tih chuan a hnâr tuai zoh pah chuan," Hun remchâng a awm vat tùrah ngai ang," a lo ti a.



Ka hmu châk reuh mai mai.



Ni khat chu ka hna thawk ka haw lamah chuan Lawmi ka hmu thut mai! Inhmatawn takin inhnaih deuh bawk sia kan inhmuh avàngin inhaider theih a ni lo, kan ding dùn dat a, kan inmelh dùn rân bawk, be hmasatu zâwk nih kan hreh pawh a ni mahna!



Ka țhian a lo nih tawhna hre chhuak zawkin,"I dam ţhìn maw?" ka ti ta zâwk a.



"Dam alawm."



Kan inbe thui lo, be hmasatu zâwka ka țang kha ka lâwm hliah hliah. Tunah chuan huata ngei viau kha a țûl tawh lo,hun kal tawh, theihnghilh daih tlâk a ni. Amah tak kha chuan nuam a tih miah loh kha, thil țha lo titute chuan a hnuah hrehawm an ti ţhìn rêng asin.



Eirawng ka bàwl ngai lovin  Naua'n a lo bâwl vek, ka insil thuak thuak a, ka hman hnuah ka phone a rawn rì a, Essa a lo ni.



"Hey, va hman hma ve! I bâng tawh em ni?"



"Tunah chuan khumah ka awm tawh."



E hiau! Thil dik lo a awm a ni lo maw? A bàn hun pawh a la ni si lo. A damlo chu a nih loh hrâm ka beisei.



"Engati nge ni?"



"Ka ngaihtuahnaah i awm reng a."



A va sweet thei tak! A ngaihtuahnaa awm chu ka duh zâwng tak! Awm renga chàm hlen ka duh.



"I va cute tak!"



A nui hawk.



"Inla duhawm viau suh, damlo chung chunga ngaihtuah che chu ka duh hauh lo a nia," a rawn ti ta.



Ka hre sual em aw ka ti, hre sual ila ka ti khawp mai.



"I damlo em ni? I dam tiraw?" Min tihlauthâwng ru tlat.



"Khawsikin ka mu chu a nih si hi."



A damlo tak tak a nih chu. Engtin nge ka tih ang?



"Engati nge i khua a sik a? I inenkawl țha lo em ni?" min tih dàn chiahin ka ti lêt ve, ka ngaihtuah êm a ni, enkawltu a nei ve dâwn si lo.



"Ka ngaihtuahna che hian min tibuai zo tawh a niang."



A fiamthu ve te hi, ka tân chuan a hlu ngawih ngawih mai, fiamthu angah pawh ka ngai phal lo.



"Damlo tak tak suh!" Ka ti leh ringawt.



"Damdawi ka ei a, a reh vat mai ang. Ka bulah awm la chu ka ti hle mai," a ti sup.



Ka rilru a tibuai hle mai. A damloh chhûng chu a bula awm ka duh ve asin le. Tunah chuan kan inkâr a hla lutuk a, chawlh lah a awm der si lo. Naktûk lah Ningà chauh a la ni zui.



"Tûn Inrinni hi chawlh a nia, ka rawn phei dâwn em niang?"



"Engtiklai pawhin ka lo welcome reng ang che."



Hun kal muang ka tihzia mai chuh! Ka ngaihtuah ve si a, ka va phone sek lo thei lo, hnaah a kal lo, a khawsik chuan ka rin aiin a daih rei tlat.



"Inentîr mai teh," ka tih chuan," Damdawi ka nei alawm," a ti tlat.



"A reh thei chuang si lo va."



"I lo phei veleh ka dam ang."



Leh mauh mai hian aw.



Naua chuan ka phei tur chu a sawisêl lo nain a duh zâwng tak chu a ni lo tih ka hre mai; mahse, ka thiam ang tâwkin ka hrilh fiah, Essa chu amah chauha awm a nih thu leh a damloh thu thlengin, enkawltu a neih lohzia leh min mamawhzia chu ka hrilh bawk a.



A remtih loh thu pawh a sawi chuang lo; mahse, fîmkhur turin min chah ve tlat a nih chu.



Ka phei ta ngei, ka phei miau avàngin min lo hmuak. Damlo hmel ang a pu miah lo; mahse, a kuta min hmer chuan a kut sa vur mai chuan a khua a sik nasa a ni tih min hrilhhre thung.



"Ka hmu che a, ka dam huai huai."



A motor-ah chuan kan chuang dùn a, a kut veilam chuan ka kut chu a chelh tlat reng a.



"I khua a la sik nasa hle a ni," ka ti sap, ka khawngaih a ni, a damlohna a rei tawh êm mai.



"A reh mai ang, i lo thleng tawh a."



A in kan thlen chuan car ațang chuan chhuah mai a phal lo phawt.



"Mi zînga tih i duh loh ka rin vangin hetah chauh kan ti thei ta chauh a," tih pahin a rawn thle phei a, rawn kûn hniam nghâlin min rawn fâwp chat.



Rem lo deuhah pawh hian a insiam rem thiam vek tho chu a nih hi. Kei pawh ka lo insiam rem ve nghâl tho.



A khawsik avànga a hmai, a biang sa ham ham chuan min tilum ve vek mai.



"Motor-ah hian awm mai ka duh!"



A thil sawi chu a inhmeh lo ka ti lutuk! Ka bula awm thlahlela min ngaih vàngah ka ngaihsak hmiah tho. Chu chu pawm a nuam êm êm si a.



Engkim ka buaipui vek, eirawng ka bâwl a, a damloh miau avàngin ei tùr țha țha ei se dam thuai se ka duh. Ka che kual vêl chu ani chuan țhutthlèngseia mu chungin min lo thlîr, lo chêt ve a tum a, ka phal lo a ni.



Ka theih ang tâwka duatin ka enkawl, ka tih theih chhun a ni si a.



Tluang takin ka thleng tih Naua pawh ka hrilh miah lo, min ngaihtuah ve àwm tho si a, ka va mâwl thei tak!



Ka phone ka la chhuak a, ka han hmet a, a êng thei ta hauh lo!



"Engtizia nge ni?" tiin ka hmet nawn leh a.



"I battery a low vàngin a in-off tawh a niang."



Charger ka ken chu la chhuakin plug-ah ka vit nghâl, rei lo te hnuah rawn êngin battery charge zat zat lai a rawn lang ta.



"A nih pek hi, nizànah ka charge tlat lo va, battery lah hi a țha vak tawh bawk si lo va."



Zanriah ei khama ka phone ka en chuan battery pawh a lo tam tawh, Naua ka call ta vat.



"Nau, hei ka thleng tluang aw, min lo ngaihtuah-"



"Kan mihurnu chu, i va ngam zâwk ve! Țhen rawh ka tih mawlh mawlh pawha i la pan dâw dâw vàng khân i inchhîr khawp ang!" ka pa aw ngei mai chuan a rawn ti țhawt a.



Ka phu nasa ngei mai! Loudspeaker ka off vat.



"Ka thu i âwih loh vàngin i tuar dâwn tih hria ang che, ka hrilh lâwk vek che kha. Thu i âwih lo va, i thiam lo a ni. I pa hi kohhran upa ka nih ji, kohhran upa fanu awm dàn tùrin awm ta che," a rawn ti leh hrep.



Ka țawng ve ngam tawh lo.






*MI DANGTE I DUH ANGA I AWMTÎR THEIH LOH VÀNGIN I THIN A RIM NGAI EM? THINRIM DUH MAH TA CHE, NANGMAH NGEI PAWH KHA I DUH THU ANGIN I AWM THEI HLEINÊM LE*