☆2020☆ - 42 & 43 By Dingdi Pachuau

☆2020☆ - 42 By Dingdi Pachuau




"Tu nge a?"



Ka piah deuhah chuan a lo ding reng tawh niin, ka phone chu ka beng bul ațanga dah thlain amah chu ka en hau ringawt! Ka pa a ni tih a hria ang tih ka hlau, bâkah, ka pain kan țawng a hria ang tih ka hlau bawk.



"I pa a ni tiraw?"



Ka hlauh ang ngeiin.



"Ka lo be dâwn em ni?" a la ti ta deuh deuh, ni lul lo ve.



"Ka'n bia ang e, min lo hre thiam lawk la aw?" tiin bathroom lamah chuan ka kal ta nghâl a.



Ka pa thil sawi chu țawng ve lovin ka ngaithla tawp.



"Rawn haw phei nghâl ang che, i hna ațangin i bâng nghâl ang a, kan inah ka enkawlna hnuaiah i awm tawh ang, i pa hi min ti zak zozai lutuk!"



"I huaisen rêng rêng ka ti, hetiang khawpa mipa râwpah hian i chhuah ka ring hauh lo asin. Rai suh ang che, a fa i pai a nih pawhin a thi tho tho ang tih hre rawh. Tenawm lutuk!"



Ka țap lo va, ka rilru a na hek lo. Ka ding a, a thil sawi chu ka ngaithla mâwl tawp.



"Zahthlâk taka ka chêt i duh loh chuan Thawhțan zîngah rawn phei ang che, i mangțha hlen nghâl bawk dâwn nia, i dam chhûngin i hmu tawh lo ang! Hei hi ka thu tàwp chu a ni. I chungah zahngaihna ka la lantîr a, lâwm viau ang che."



Sawi theih rêng ka nei ve hauh lo!



Bathroom ațanga ka chhuah chuan a dinna ngaiah a lo la ding reng a, ka chhuak chu min lo en kur.



"Eng emaw hriat sual a nei a, a thin a rim deuh a nih kha," tiin ka nuih sak, ka rilru chhûngril erawh a nui hauh lo.



"Eng thil nge a hriat sual ?"



Ka thaw hawk phawt, thu dik tak chu ka hrilh thei lo ang.



"Nangmah nèna inrù-ah min ngai a," ka ti ta ringawt.



"Chuan?"



"Chuan, a thin a rim. Amah kohhran upa a ni sia, ka tihmingchhe dâwn lutuk asin!" ka tih chuan," A hre sual ve hle mai, min sawi fiahtîr lo a nih chu maw le," a ti ta sup a.



Thu dik tak a hre lo chu ka lâwm hle mai, ka thaw huai.



A bula ka awm chhûng hi chuan hlim taka hun hman ka duh avàngin ka pa thil sawi zawng zawng kha theihnghilh rih ka duh, hun kan nei tam lo si.



Mutnaah chuan a khawsik a la reh țhat loh avàngin kan meng deuh reng a, ngawih reng ka duh loh avàngin thil ka zâwt kual a.



"Min duh chhan tak min han hrilh teh," ka ti a.



A mit sen deuh râm, cool zet chuan min en rulh a.



"I danglam bîk."



"Ka danglamna chu?"



"Mi dang angin ka en thei lo che, a chhan ka hre thiam chiah lo, ka ngai pawimawh tlat zêl che a."



Ka nui sak. A thinlungah hian eng emaw tak chu ka ni ve alawm, anni natna angah hi chuan an thinlungah mi dang hian pawimawhna an nei ngai hleinem.



"A nih leh, nangmaha ka pawimawh dàn ve thung?" ka ti leh, zawh chhuah vek ka duh.



Ngawi vung vungin min en leh vung vung phawt a, chutah," Ka bula i awm chuan mi pângngaiin thil țha lo, thil sual an tih ang chi hi tih hrehna riau ka nei a, chu chuan mi pângngai min antîrin, mi pângngai rilru ang ka pu ve phâk deuhin ka hre țhìn. Ka sawi thiam chiah lo, ka bula i awm loh chuan eng emaw kim lo leh dik lo hûih a inhriatna ka nei bawk," a ti ta sup sup a.



A kut sa ham hamah chuan ka fawhsak zoh a, cool ruiha min en chung chuan a nui suk a.



"A nih, kalsan ta daih che ila?"



"A theih loh!"



Ka thinlung a nghawr dawtin ka hria! Ka en vang vang a, ani pawhin ngun lutuk hian min en, a mitmeng erawh ka hre thiam lo.



"Min kalsan thei lo, tiraw? Mawh, Kat, min kalsan dâwn lo tiraw?" a ti ta sek a.



Ka thaw hawk. A nghâwngah kuahin ka hmêl a hmuh theih tâk lohah chuan ka maimichhîng vang vang, ka rilru a va tihrehawm tehrêng êm!!



"Ka kalsan dâwn lo che, ka sawi ve mai mai a nih kha."



A tàwnzau hâk chhana a taksa sa vur mai chuan min ur ham ham mai, a khawsik a la reh hlei thei lo.



"Sawi tawh miah suh!"



"Aw le, ka sawi ve mai mai ka tih tawh kha, ka sawi tawh lo ang," ka ti a.



"Nang chauh hi ka innghahna i ni, i bulah chauh mi pângngai angin ka awm ve thei bawk. Ka damdawi mûm lian i ni a, i tel lo chuan ka khawvêl hi a tàwp nghâl ang."



Tunah tak hian tuilâirapin ka awm mêk. Lehlamah ka pa leh ka chhûngte, lehlamah Essa. Rilru put dàn tùr ka hre thiam lo; Essa'n ka pa chungchâng a hre ve lo, chuan, nupui neih a duh lo bawk, a bulah ka awm tlang ringawt thei lo. Lehlamah ka haw a nih chuan Essa ka hmu ngai  tawh dâwn lo, ka tel lo chuan a khawvêl a tàwp nghâl bawk ang.



Ka rilru a insual buai nuai nuai.



"Eng nge i ngaihtuah?"



Ka inngaihtuah harh ta chiah, a ngaih a țha lo ngawt ang, che lovin ka ngaihtuahna ka lo kàwm nasa a ni.



"I khawsik tih reh dàn tùr ķa lo ngaihtuah a," tiin dâwt ka sawi ta ringawt.



"Min kalsan lo la, min duat la, a reh mai ang."



Ni e, ka duat ang, ka duat theih lai hian ka duat hle a ngai, ka duat theih tawh loh hunah chuan...



"Ka va duat tak che êm!" tiin a biang sa var mai chu  duat takin ka chùlsak a.



A nui huk.



"I va naupang chhia tak!" a ti sup.



"Ka duat che a nih kha, naupang chhiate min tih," ka ti hlak hlak a.



Kei ka kut leh kete a vawt a, ani a sa var thung, kan indek tawn a. Ka harh fâl deuh a, ka kut vâwt chuan a zakah ka han dek zauh a.



Ani zak dèk a lo haw nasa niin, a eu zawk mai!



"Kha thil kha, ka ten a nia!"



Ka nuih vak vak. Damlo awmpui e ti lo chuan a thil sawi chu ka nuih vak vak a, ani pawh a nui ve suk suk.



"I weak point ka hre ta!"



"A nih, nang?" tiin na zet hian ka âwmbâwr a rawn țhâm țâwk mai a nih chu! Ka âng zawk.



"A naaaaa...!!!"



"I weak point ka hre ve ta!"



A tûk nilêngin khumah kan awm a ni mai. Nizàn khân a khawsik kha a reh ve thei hrâm a, zan rei deuh hnuah kan mu thei hrâm a, zîngah pawh kan tho peih lawk lo nghe nghe.



"I ril a țâm em?" tiin thatchhe zet hian ka zâwt a, chawhnu dâr hnih a ri tawh tlat.



"Țâm, a țàm dàn erawh chaw țàm a ni lo."



Ka melh rum a, ani ve thung chu nûr deuh hlek hian a meng sawr sawr thung.



"Eng nge?"



"I thil sawi dàn kher kha, ka hre thiam ve tho a nia," ka ti nang nang a.



"A làwmawm nasa a nih chu!" a lo ti thén.



"Hmeichhia ka nih hi, nuam lo ka ti ve thei tho a nia," ka ti leh, sawisèlsak ka châk ve deuh hrim hrim a.



"Kei pawh mipa ka ni, i bula ka insùm theihzia hi thil mak a tling!"



Sawi tùr ka bo vek.



A khawsik a reh tawh bawk a, ka rilru pawh a zâng huai tawh. Naktûk tûn ang hunah chuan Lungleiah ka awm tawh ngei ang a, ka pain engtiang taka nasain nge min zilh leh ang le? Min vaw dawt dawt thei tho bawk, min vuak hlauh chuan...a nuam chu ka ti vak lo ang!



Eirawng bâwl tùrin ka tho nge nge, ani pawh a mu rei peih teuh lo, ka bulah a rawn țhu ve mai mai.



"Artui chhum nge i duh kan?" tiin ka zâwt a.



"Chhum kan."



Ka melh hrâwk a, ani lah chuan," Ka duh dàn ka sawi chu!" a ti duh lek chauh.



"I duh dàn a khirh si," ka ti hlak a.



"Khirh lo, i hre khirh mai mai a nih kha."



Ka phal lo chung min lo pui. Ei siam a thiam si a, ka hnar thei lo. Ei leh pawh a châkawm alawm le.



Zanriah tuihnai tak kan ei dùn leh ta. Ka ei țeuh mai, Ani erawh chu a damlo ka tui loh vàng a niang, a ei tlêm lutuk.



"Ei țeuh i ngai asin, i damloh chhúnga thil i ei loh zawng zawng cover nân a ngai," ka ti a.



"Ka chak tho tho, ka bula i awm chuan..."



Artui chhum hmin tawh, a kâwr kheha kan leh chu suahsak pahin," Ei zo rawh, i tân liau liaua ka siam a nih kha," ka ti a.



"Thank you."



"Welcome," ka ti phawt a, chutah," I dam tawh tho bawk a, naktúkah ka hawsan ang che aw?" ka ti leh a.



"Haw tawh lo mai la?"



Nupui atân min sâwm em ni le?! Nupui neih a duh loh kha, min fiamna mai mai a nih ka ring.



"Nupui neih i duh loh kha," ka ti thung.



"Duh lo ve."



Zêp lo chiang.



"Ka haw ngei a ngai a."



"Ui bet ta che ila?"



 "Bet lo ang," tiin fiamthuah ka lâksak a.



A khawsik a awm tawh loh vàngin kan mu hma hran lo, naktûkah ka phei leh tawh dâwn si a, mut hma vak loh pawh a pawi lo.



"Naktûkah eng nge i tih ang," tia ka zawh chuan," Hna a țûl viau tawh ang," tiin mim chhâng.



"Mahse, indìm la aw, thawk vak suh, i khawsik a chhuak leh palh ang," ka ti a.



"Hna a tam dàn azir a niang chu!"



"Tam viau suh se!"



Țhut mai mai pah chuan TV kan en a,  en tùr a vâng khawp mai. TV hi ka en khât tawh lutuk a, eng nge film lâr leh hmuhnawm tih pawh ka hre tawh lo.



"En tui viau lo teh, kei aiin i ngaihsak tlat."



A fiamthu ti tak hmel chu nûr zet hian ka melh a, ani erawh chuan hmel danglam miah lo hian," Min ngaihsak loh chuan ka insûm tawh miah lo ang," a ti leh a.



"Eng thil pawi mah kan ti thei lo tih i hriat kha," ka tih chuan ani chuan," A pawi dâwn lo, a nuam thung ang," a ti leh.



Ka sen awp awpin ka ring!



"Nula zakzum tak i ni tih ka lo theihnghilh leh țhin, nula dangte chu ni se an phùr phah ngawt ang!" a ti leh a.



Nula dang ka ni ve lo.



Mutnaah lah chuan a kut a hlei khawp mai a, kan inchelhsak reng mai.



"Kut mai mai te chu, thlah ve mai la?"



A sawi dik chu ka ti ve viau bawk; mahse, mipa a nia, a insum zawh loh ka hlau a ni.



"A hmahruaitu a ni si alawm," ka ti a.



"Eng hmahruai maw?" Chimawm zet hian a ti leh a.



"I hre reng!"



"Hre lo a niang ka zâwt che alawm."



A hnuah chuan ka thlah ve ta hrâm. Inthlahrun hmel deuh hian a țan tìrah chuan ka bân a chûl zai zai phawt, a kâwlhrâwng chho zêl, ka kawr chhûng a rawn zen lût ta, a kut chu ka lo man chat.



"Helai thleng chauh hi-"



Min rawn fawh miau avàngin ka țawng chhunzawm thei lo, duhthawh takin min fâwp a, châknaa khatin min fâwp a ni tih ka hria. Kei pawh eng ual chu ka ni bîk chuang lo, duh zetin ka chhâng lêt ve tàwn táwn tho.



"Hlauthâwng suh, eng thil pawi mah a thleng dâwn lo," ka beng bulah chuan a ti sup a, zei zet hian a leiin ka bengkâwm chu a rawn liak ta nghâl zat a.



A za chiai chiai, ka thinphu rawn ti rangin a su nghâl dup dup mai!



"I sexy-zia hi i inhre lo a ni."



Sexy. He a thil sawi hian min tihlim a ni, sexy hmuha min hmu ziah mai hi nuam ka ti veng veng.



"I rim tui dàn pawh hian min tiphûr tâwk chiah a ni."



Kan chesual lo; mahse, kan chêt dan chu mi zînga sawi lan chi erawh a ni hauh lo, kan pahnih chauhin kan hriat hi a tâwk.



Kan muhìl mang lo, kei phei chu dârkâr tlêm tê chauhin min dâl tawh, Lungleiah ka pheisan dâwn. Ka hmu tawh lo maithei asin.



A hmai chúl dan danin," Ka ngai dâwn hle mai che," ka ti sap, a hmel hi chhinchhiah tlat ka duh, ka hmu tawh lo maithei si a.



"Hun remchâng hmasa berah ka rawn phei ang," a ti ve sup a.



Thil awm dàn tùr hi ka hrilh thei lo, a hlimna tihchhiatsak ka duh lo va, a beiseina tihbosak lah ka duh hek lo. Sual pawh min ti maithei; mahse, eng mah hre lo se ka ti záwk.



A muthilh hnuah pawh ka muhìl ve thei lo, ka inngaihtuah. Essa hi kalsan ka duh lo, ka chhûngte pawh ka duh chuang lo. Tih theih ka nei rih lo, ka haw phei phawt ang. Ka theih tâwpin ka pa chu hrilh fiah ka tum ang, ka hmangaih ber tân chuan engkim ka huam alawm. Ani hian nupui neih duhin min sâwm ta se chuan ìhê lovin ka aw chiang khawp ang.



Mahse, nupui neih a duh lo, innei hauh lova chèn dun ka duh bîk lo, ka chhûngte ka timualpho lutuk dâwn asin, ka nu rilru a na lutuk palh ang. Ka nu ka ngaihtuah hian rilru huaisenna ka neih phah a, ka pa chuan eng anga phal lo pawh ni mah se ka nu vàngin ka dil hlawhtlin ka ring tlat. Kum hnih thum hnuah chauh pawh phal mah se a pawi lo, ka bei ang.



Pathianin zah a la ngai ang a, kan tân hun țha min hersak ngei ang chu maw, chu chu ka innghahna a ni, Essa hi engtikah mah kalsan ka tum lo, ka hmangaih a, hmangaih dang nei se chuan ka kaltîr thei mahna! Ka dam chhúnhin ka kalsan lo ang, ka thinlung a nei tawh si a. Kan mihring taksa a ințhen dâwn rih mai chauh a ni. Ka pa remtih hma chu ani kawp theih hi ka dîl char char ang, a remti ngei ang.



Zîng takah kan tho a, ka mit a thial ûrh mai. Kalsan ka huphurhna chu tih lan loh hrâm ka tum a, hmel hlim takin ka be lui zêl.



Min thlah a, ani pawh ka hmehbel deuh nge keimah ang thovin a hlim lui ve thovin ka hria.



"Rawn phei vat ka tum ang."



"Aw le, inenkawl țha la, lo dam reng tawh rawh aw."



Kan ințhen dâwnah mi dang awm vete pawh ngaihtuah lo chuan nghet takin min kuah vawng vawng a.



"Ka ngaihtuah leh reng dâwn che a nih hi!" a ti sup a.



"Kei pawh le, inenkawl țha hle ang che."



Kan tlân chhuak ta, a lan theih chhûng ka thlîr. Ka rilrua thil awmte hi hre thei teh se chuan aw...



A lang thei ta lo. Ka hmangaih chu ka hmu pha ta lo, ka ngai nghâl vawng vawng mai.





*MI CHAK CHUAN MI A THU HNUAI NGAI LO, A DAWM KÂNG ZÂWK ȚHÌN*





☆2020☆ - 43 By Dingdi Pachuau





Kawng tluanin ka ngaihtuahnaah Essa a awm, ka thlen huna ka pa min tih dàn tùr chu ka enghelh peih lo, engtin pawh min ti se ka tuar mai ang. Chu zawng ai chuan Essa mawlh mai chu a ni ka ngaihtuah ni, ka khawngaih lâwk. Ka pain ka phone hi min chhuh ngeiin ka ring a, ka phone ka kawl loh huna min rawn biak a tum chuan...



Thâwk ka la hawk hawk. A thin a rim ngei àwm si a, chu chu hrehawm ka ti a ni. Ka hmangaih êm êm si a, a tân chuan tuar ka huam a, tihnat erawh ka phal lo. He hringnunah hian hrehawm a tuar tam tâwk tawh a, tawrhtîr leh kher hi ka duh tawh lo asin.



Mahse, kan duh ang hian kan va awm thei si lo êm! Hei hi hringnun chu a ni miau si.



Lunglei thlen ka va nghâkhlel lo tak! Ka thil nghahhlelh loh ber a ni àwm e; mahse, pumpelhna zawn erawh ka tum chuang lo. Ka nghahlelh loh avàngin Essa ka tibuai ringawt thei lo, ka hriat thiam a ngaih ém kha.



Kan in luah ka thlen hmain Essa chu ka phone, ka thlen thu ka hrilh. Ka hrilh ngei a ngai, nakinah ka phone ka hman theih tawh loh palh tâk thutah, lo inhmakhua a ngai.



Ka chunga thil thleng chu mangchhia dik tak a ni ringawt! Heti êm hian ka pa hian min lo huain Essa hi a lo duh lo a ni maw ka tih phah, râpthlâk tak a ni. A hmuh theih, a khawih phâk chin apiangin min vua a ni mai, țhelh dai tùrin Naua a lo la bâng si lo va, ka sepui ruah tuar tlawk tlawk mai.



Mahse, vawi khat tê mah nâ ka tih vangin ka awka ka chhuah lo, ka insehruh char char. Ka mittui erawh ka dang thei lo, heti êma ka pa ka chunga a thinrima kut min han thlâk nasa mai hi ka rilru a na êm a ni.



"Mi tenawm i ni, i tenawm takzet! I hna ațangin i bâng nghâl ang a, vawiinah hian kan haw nghâl bawk ang.  I mittuite kha ti tla suh, hetiang mai mai tùr hian ka enkawl lo che, tu nge i chhuna i luhlul viau mai ni? Ka lakah hi chuan i luhlulna khân awmzia a nei lo ang, i zawr hnâp thleng ka vaw mai dâwn che a ni," a ti buan buan a.



Țawngkam khat tê mahin ka chhâng lo.



Ka phone a rawn ri a, chhàn pawh ka tum lo; mahse, rang zet hian ka kekawr pocket-a mi chu rawn phih chhuak lawpin chhuat chârah chuan na zet hian a vawm keh ta chhuai.



Ka phu nasa lutuk!



"I be tawh lo ang! I dam chhûng hian a hmel hmuh pawh inring tawh bawk suh, i awm dàn hi ka duh lo. Ka thu sawi engah mah i ngai lo hi ka duh lo hrim hrim, ka fanu i ni pawh hian ka ring lo hial zâwk a ni! Hetiang fanu neih hi duh pawh ka duh lo," a ti leh tùn tún a.



Ka awm dàn engkim hian a tithinrim vek tawh ni maiin ka hria, ka dinin," Ding suh," a ti a, ka kùn deuh leh," Kûn suh," a ti bawk si a, awm ngaihna ka hre lo, vuak remchànna lam apiangah min vua a ni mai.



Naua a rawn haw hma ta hlauh, a rawn chelh ta. Kei chu ka dinna ngaiah ka la ding char char, in ka luh tirh ațanga ka dinna ngaiah ka la ding alawm, ka bag erawh chhuatah a let bal thung.



"I farnu hi vuak hlum mai ka duh!"



Tunah tak hisn min vaw hlum daih mah se hlauhna rêng ka nei chuang lo, kei hian Essa zia hi ka kai ve deuh tawh a ni àwm e ka ti!



"A zahthlâk, a mualphothlâk êm mai!" Naua chuan a ti sap. Ka pain chuti taka kut min thlâk chu zahthlâk a ti nge, Aizawla Essa ka va pan chu zahthlâk a ti zâwk pawh ka hre thiam lo.



"Tlaiah hian ka haw pheipui nghâl ang, a hna ațangin bâng nghâl rawh se. I thawmhnaw siam rawh, ka hmuh phâk lohah i awm tawh dâwn lo," tiin min rawn melh khui a.



'Chu e kha e' ka ti lo, țawng lovin ka room lam chu ka pan, ka pên țan chiah chu ka ner deuh sak, ka tisa mai ni lo ka ruhte thlengin a na vek tih ka hre chiah.



Ka thawmhnaw ka ban tùr chu ka dinglam bân ruh a nâ tih ka hre leh bawk, ka veilamin ka ban ta tho. Hei hi ka chan tâwk a ni alawm, țapa vui tùr ka ni lo, a thu ka âwih lo miau a.



Ka thawmhnaw a vaiin ka khung lo,  tlêm tê chauh ka khung. Nakinah Naua'n min rawn thawn leh thei tho ka ti a, bâkah, ka bân ruh chu a na lutuk a, ka khung tam thei lo bawk.



Naua'n khawngaih hmel taka min en chu ka hawisan. Hetiang hi tunah chuan ka mamawh rih lo, khawngaih ka duh lo, mahni inkhawngaihna ka nei ang a, ka buai vek a ni mai. Tumruhna, huaisenna leh luhlulna ka neih a ngai, chuvàngin, khawngaihna lam chu dah bo hmak ang, rilru paukhauh tak ka neih a ngai. Essa ka kalsan theih loh kha,ka thil tum kha a pawimawh ber.



Kawng tluanin ka țawng lo, ka pa pawhin min melh hek lo. Ka bân na chu a hria ang tih ka hlau, chawh min ti dâwn êm asin, min vuakna ka taksa na vek avànga țhut harsa ka tih viau pawh chu a hmuhah chuan tihlan ka duh lo, ka tuar ngar ngar.



In kan thlena ka luh chuan ka nuin makti takin min lo en hâ mai, ka pa hian ka chanchin hi a hrilh lo a nih ka ring nghâl. Hria ni se mak lo ti tùr a ni lo.



"Kha, i fanu tenawm zet kha room-ah kalh hnan ang che, khawiah mah a kal tùr a ni lo," tiin ka nu chu a be hluk a.



"Eng thil nge thleng a?" ka nu chuan dam diai hian a lo ti a, kei erawh chu ka room lam panin ka kal daih.



"Mi hur, mi lepchiah ang maiin zu khawsa a! Min tizak, min tithinur hle bawk," tia ka pain a chhàn chu ka hre pha.



Mi hur, lepchiah leh tenawm ka lo ni rêng em ni? Nia, ka pa ngaihah chuan ka ni a ni mahna, mi hurah tak chuan ka indah phal bîk lo.



Ka bag chu harsa ti zet hian ka dawhkànah chuan ka dah a, ka kut veilam chauh ka chêt ngam avàngin ka kut veilam hi a rim hle dâwn a ni. Ka pain min vuakna avànga ka taksa leh ruh nâte hi ka nuin a hriat ka duh lo, min khawngaih dâwn si a, chu chu ka duh lo.



Khumah țhuin ka kawr hâk chu ka hlîm a, ka taksa chu a vual sen nasa khawp mai, nakin deuhah chuan a duk thluahin ka ring.



Mahse, duk mai mai chu a reh leh hma tho, a pawi lo.



Chaw pawh ka ei lo, ka hmai erawh ka phih a, ka ha pawh ka nâwt nghâl, mu nghâl mai thei tùrin ka inpeih nghâl at.



Ka taksa a na a, a chau ngawih ngawih. Nizànah ka mu mang lo va, vawiin lamah sumo-ah ka chuang thui leh bawk nèn, ka chau. Ka rilru pawh a chau viau a; mahse, Essa ka ngaihtuah lui tlat, a hming ringawt ka ngaihtuahna chhuah pawh chuan chakna, chhelna leh tumruhna min pe thei, he pa hi ka tân damdawi țha ber a ni.



Ka mu tùr thawmhnaw ka inthlâk laiin ka nu a rawn lût, ka lo hre hauh lo.



"Engtizia nge i taksa kha?!! Ka rei leh!!"



Harsa ti zet hian ka kut hman theih lam chuan hmanhmawh tak hian ka kawr chu ka pawtthla thuai thuai, ka nuin ka taksa a hmu chu pawi ka ti kher mai, min hmu lo se ka duh asin.



"A na lo," ka ti sap ringawt.



"I ril a țâm lo em ni? Chaw i ei lo ringawt a?" tiin ka kiangah chuan a rawn țhu a.



"Aw, țâm lo."



Ka nu chu ka en duh lo tlat, a mitmeng ka hmu duh lo. Nu hmangaihna leh khawngaihna mitmeng ka hmuh chuan ka thinlung a nêp vek ang, chu chu khawvêla ka thil duh loh ber a ni



"A pawi ka ti êm mai!" ka nuin a tih chuan ka ngawi reng. Nia, an fanu hian thu ka âwih lo êm mai a, engkim ka tibuai vek a nih hi.



Ka mu țha thei hauh lo, ka taksa ka delhna lai apiang chu a na zêl a, chàu viau mah ila ka tho leh hlawl zêl. A hnuah chuan nachhâwkna ka ei ta tawp, mut ka mamawh a ni. Taksa a chauh tlat chuan rilru pawh a chàu ve mai zêl si, chàu hman ka ni lo, ka chak țhat a ngai nasa a ni.



Chèn ho miau chuan inthup a lo har a ni ang e, ka nu chuan min hre chhuak thuai. Ka bân chu min zùtsak a, min tuam lumsak bawk. Hna ka thawh a phal lo, keimah avàngin ka pa chuan a khak fo va, nuam lo ka ti hle mai; mahse, ka nu erawh chuan a thin tirim zâwngin a chhâng lêt ngai lo, țawngkam dam diaiin a chhâng mai zêl.



Ka nu ang hi khawvêlah tam tak awm se ka ti, nun an tinuam. Bâkah, an bulah chuan tu mah hi mi sual tak an awm theiin ka ring lo.



Mahse, ka pa hi?



Ni lo, a thu ka âwih loh vàng alawm. Ka pa a ni a, tumruhna nèn ka hneh a ngai. Chuti lo chu, Essa nèn hma hun kan nei thei nâng, chhûngte nèn intuithlàr phah nân pasal leh ngaihzáwng neih ka duh lo. Hlim takin, inhre thiam tawn leh inhmangaih tawn taka awm ka duh.



Kâr khat a liam ta. Essa chu a dam țha ang chu maw? A lo damlo leh palh ang tih ka hlau ngawih ngawih, ka kan thei tawh si lo, a chanchin tal hre thei ila aw... Ka phone lah kha, a keh darh hneh ropui si, sim card tal kha lo chhar ila a țha tur.



Ka rilruin ka țawngțai reng, ka pa rilru hnehsak tùrin ka dîl ngai lo thung. Chakna, huaisenna, damna leh tumruhna ka neih theih nân leh Essa tân damna ka dìl, chu chauh chu ka dîl ngam tawh, Pathian lakah pawh hian ka inthlahrung ve tawh êm êm, fanu thu âwih lo ka ni si a.



Ka kut chu a dam har reuh phian mai, a ruh a auh a nih loh pawhin a khi tal a ni ang, ka chêtpui țha thei si lo va, a inthlahrunawm duh khawp mai.



Ka pa pawh a la thinur reng a niang, min be ngai lo. Ka nu hi a lo fel êm a, zaidam tak takin a țawng reng a, kan in chhûng boruak uap churh lutuk tùr pawh a tiziaawm khawp.



Ka nu chuan thil awmzia min zâwt a, zêp nei hauh lovin ka hrilh. Ka hrilh zawha ka pa sawi ve dàn min hrilh hnu chuan," I pa lungawi lohna hi hriat thiam hrâm tum rawh aw, hetiang a nihna chhan chu i tãna țha ber a duh vàng a ni tih i hria ang tiraw?" a ti dap dap a.



"Ka hria alawm, a thu ka âwih loh vàng a nia," ka lo ti sap a.



"Engkim Pathian kutah kawltîr vek mai ila, a țha ber. Aniin a lo rêl fel vek mai ang, mihringin tihfel ve kan lo tum hian a buai zo vek zâwk țhìn a," a ti leh a.



Ka nu hi ka zah thar ngawih ngawih.



Tlai khat chu ka pa phone-ah Maremi'n min rawn be duh ta tlat mai! Ka pa phone-ah ber kher, eng tak chu rawn sawi dâwn ni maw?



"Hello?" Ka bulah ka pa a ding rùn a, nuam tak chu a ni lo ve chiang khawp mai, ka țawng a hre thei vek ang, Maremi țawng pawh a hre pha hial ang chu.



"Phone ka tum nasatzia che hi! I phone a chhia tih ka lo hre lo va, i dam țha em?" a rawn ti a.



"Aw, țha e, in dam țha zâwk maw?" ka ti lêt a.



"Aw, dam țha e. En teh, naute ka pai ve tawh a, min lawmpui dâwn tih ka hriat avàngin ka rawn hrilh châk tawh lutuk che a," a rawn ti leh.



Ka mittui a rawn tling ta kal kal. A awka chhuak hlim leh zângkhai bawk si chu ka awt lutuk! Bâkah, pasal țha tak neiin tunah naute a pai tawh lehnghâl, kan va inang lo tak!



"Ka lawmpui lutuk che u!" ka ti ve a.



"Kan lâwm e, rawn zin phei te i tum em? Member thar piang ve tùr lo lawmna pawh kan buatsaih ang chu?" a rawn tih leh chuan ka thinlung hi a rûm tlawk tlawk ni berin ka hria.



Ka kal châk, ka hmu châk; mahse, tún atân chuan thil theih loh a ni.



"Kan la làwm ang chu!"



Essa chungchâng a sawi chhuak hauh lo chu ka va lâwm tak! A sawi hlauh chuan ka pain a hre ngei dâwn si a, a thinrim a belhchhah ngei ang.



Ka pa min vuakna avàng chuan ni tin kawr bântluan ka ha ziah a, ka taksa lang lo thei tùr ber thawmhnaw ka inbel țhin. A duk hi a reh chian phawt loh chuan ka inhâk deuh thûn reng a ngai, inlêng rawn kal zauh zauhte hian zawhna min zawh palh hlauh chuan chhàn a harsa duh àwm êm mai.



Kan khuaa ka awm ta ringawt chu zawhna ka dawng tam ta réng, Chawlhniin ka inkhâwm lo thei bîk si lo va, chutah chuan zawhna ka dawng țhìn, a rûk tak chuan hrehawm ka ti, ka zak ve tho bawk.



Zanriah kîl laiin ka pa chuan,"Ka thu zawm loh hrehawmzia chu i hre chiang tawhin ka ring, kha pa kha theihnghilh hmiah la, hmuh leh chhin pawh tum tawh miah suh ang che," a ti a.



"Ka pa, ka hmangaih a ni, min mamawh êm êm bawk," ka ti, ka inring hman lo, ka kâ ațangin a lo chhuak tawp.



"Ka sawi chu i hre lo em ni?!! Chutiang thu chu i la sawi ngam cheu maw?" tih leh min rawn ben chu a rual nghâl zat a. Ka lo indanna lamah ka bân dinglam bawk chu a rawn vai fuh leh ta, a na vawng vawng mai.



"Bawihi pa, inbengdai teh!" tiin ka nu chu ka bulah a rawn ding vat a, ka bân chu a rawn chawi kàn deuh chuan ka lo rûm chhuak hawk, ka insûm hman lo, a na lutuk ringawt!



 "A zak lo êm mai, min zah bawk si lo!" ka pa chuan a ti leh a.



"Ka pa, ka hmangaih êm a ni. I rin ang khân ka awm lo asin, thil i hre sual a ni,"ka ti, heti taka ka huaisen ta mai hi mak ka ti! Ka pa thinrim hi ka hmu khât khawp mai a, thinrim taka min han melh rùn phei chu, nuam lo tak hi a ni ringawt.



Mahse, ka paltlang a ngai si.



"Țawng tawh suh!"



Thla khat zet a liam ve ta. Essa lah thehhmeh ang mai, a reh vung vung. Mak a ti ngawt ang chu! Ka phone ngai si lo va, aniin min rawn phone țhin pawh ni se ka phone a chhe daih tawh si, a beidawng tawh viau ang. A thin pawh a rim ngei ang le, tih theih ka va nei si lo êm!



Ka kut chu a dam țha thei tlat lo, ka hmang lui tho, ka khawr êm êm a, a dam lo chung ka hman luih vàng nge a kawih phahi deuhin ka hre nghe nghe.



Hmangaihna avàng chuan lo kawi mai mai teh se!



Ka pain Essa chungchâng a sawi chhuah apiangin ka thil sawi ngai kha ka lo sawi ve ziah a, a thin ka tiur thar ziah. Kut erawh min thlâk ta êm lo, ka nu vàng ka ti lo thei lo.



Ka kut dam thei ngang lo chu Lungleiah entîr tùrin ka kal, chutia min thlah fâl ta mai chu mak ka ti khawp mai. Hmasáwnna rahbi pakhat chu a ni ka ti lo thei lo, min chhuahtîr phal tlat.



Naua'n min kalpui, min khawngaih tih ka hre reng; mahse, eng mah a sawi chhuak lo.



Essa ka ngaihtuahnaah a lian khawp mai. Hmuh ka châk, biak ka châk bawk. A number kha ka vawng thei tlat lo va, biak ngaihna ka hre lo. Bia pawh ni ila thil sawi tùr a tam dâwn si a, biak pawh loh mai hi a țha zâwk hialin ka ring, tunah chuan a lakah thu dik ka zêp thei dâwn tawh si lo.



Ka kut chu engtin vak an lo ti lo, ka entîr tùr ber a lo zin daih a, a fuh vak lo. Damdawi min chawh deuh tawp ringawt.



"U, Essa kha a rawn phei asin."



Naua chu mak ti takin, ngun zetin ka en reng ringawt!



"Rawn kal a tum a, thil engkim ka hrilh fiah ta ringawt alawm. 'I kal a nih chuan ka u tawrh belhtîr i duh tihna a ni ang' ka ti a, chu chu a ngai ngam bîk lo a niang e, Aizawl lamah a phei ta a."



Thu dik a hre tawh maw? Eng angin nge a ngaih ang le?



"A dam țhat hmel em?"



"Dam țha a ti alawm, a hmel erawh a phelh deuh, a țawng tam lo khawp, ka khawngaih roh riau a," Naua chuan a ti leh a.



A hre thiam ang em? A hriat thiam hrâm ka beisei. A bulah awmin hrilh fiah vek thei zâwk ila...



"Phone keh chhiaa sim card kha ka la a, i duh em?" tiin min zâwt a.



"Duh hran lo ve, awmzia a awm chuang lo," ka ti sap a.



"Ka pa chu a zia deuh tawh em?"



"Ka hre chiah lo; mahse, hei Lunglei keimah chauha ka rawn kal a phal tawh chu a nih hi," ka ti sap a.



"Tuar fan fan rawh, i tuar chhuak mai ang."



Ka nau ngei pawhin min han fuih ve ta chu a nia! Ka ti thei ngei ang, ka thei tùr a ni.



Ka pa rilru hi ka hneh ngei ang.






*HRIAT CHIANNA NEI LOVA MI CHUNGCHÂNGA THU TLÛKNA I SIAM KHÂN AN NIHNA A TIFIAH LO VA, NANGMA NIHNA DIK TAK KHA A HAI LANG ZÂWK A NI*