☆SUANGTUAHNA NEITU☆ - 1 By Dingdi Pachuau

☆SUANGTUAHNA NEITU☆ - 1 By Dingdi Pachuau


(Based on True Story)






"Bawihte, kârleh Thawhlehni khian Lungleiah kan phei tawh dâwn a nih chu."



Ka nu chuan hlim hmel tak hian Lunglei nuam a tihzia leh kan awmna tùr Ramzotlang boruak țhatzia chu a sawi chhunzawm nghâl mawlh mawlh a; kei erawh chuan huphurh rilru zet hian ka lo ngaithla thung a, ka țhian neih sate hi ka ngai dâwn lutuk. Țhian siam ka harsat si, Ramzotlanga țhian siam leh tùr pawhin hun rei ka nghah leh a ngai dâwn asin.



"I tân tak pawh a țha dâwn, boruak a nuam a, i hrisèlna kha a pawimawh ber si a."



Ni e, ka hrisêl țha tâwk lo, natna benvawn nei ka ni, hei hi thil buaithlâk tak a ni. Ka nu hlim viau pawh hi a àwm viau, tuna kan awmna Kolasib hi nuam ti viau mah ila khua a lum a, khawlum hnuaiah hian ka buai ru tlat țhin. Ramzotlang boruak chu a nuam viau tih an sawi ka hre ve tawh, a nawm ka ring; mahse, țhian mawlh mai chu...



Ka phone kheuh neuh neuh pah chuan," A nuamin ka ring; mahse, ka țhiante ka ngai ngawt ang!" ka lo ti sap a.



"Bawihte, țhian chu i nei leh vat mai dâwn alawm, mi fel tak i ni si a."


*******


Ka țhiante an rawn lêng nak nak a, min thlahna ni pahin ei tùr siam tùr an rawn keng a, hlim tak si, rilru chhûng rila helhkham nei rùn tho si chuan kan ri laih laih reng a.



"Kan ngai dâwn che sia, lo zin zauh zauh tho la aw?" Rbi chuan a ti a.



"Ka tum ngei ang. Hmm, ka ngaihtuah zâwng ringawt pawhin ka lung a lêng sa," ka lo ti a.



Angaihi thung chuan," Ngaihzawng va nei rawh, i lung a lêng lo mai ang," a lo ti vat thung a.



Hmangaihi chuan," A nei reng tawh alawm, va kawp a ngai lo," a lo ti sap a, chu thu a sawi zawh veleh chuan ring zet hian a nui chhuak nghâl a.



"Ni dâwn tak! A va kawp țeuh palh ang, nei leh lo mai rawh se, tuna mi-ah hian lungawi mai teh se," Angaihi chuan a mittui tla, nuai chat chat pah chuan a ti a.



Kan nui nasa lutuk a, kan mittui a tla phung mai a ni. Ngaihzawng ka nei ngai lo tih an hre ve tho sia, chuvàngin, min nuih a ni.



Kan thil siam chu a thak țha hle. A sa țha bawk nèn, ei pahin kan insût leh tliar tliar a, kan sî pah bawk a, Angaihi chuan min en kual hrek hrek a, a nui chhuak leh ta hawk, Melo-i a lo phu zawk a, a thil ei tùr a thlauh baw zui!



"In tenawm tliar tliar êm mai!"



"Lalangaih!!! Min tiphu...Nui khêk ziah suh!!" a ti hlar a.



"Hre thiam rawh, thla a mang leh tawh a," ka lo ti a.



"A bial leh tawh zâwk asin!"



"Mang pawh ni se, bial pawh ni se min tiphu tho! Sim vat chi, Siamkunga hian i kim lohna hi a la hre chhuak lo tihna a ni maw?" Melo-i chuan a ti leh a.



Rbi chuan," A kim lohna zawng zawng pawh hi a haidersak vek-" a  sawi zawh hma chuan Angaihi chuan," Min hmangaih rum rût alawm, ka 99-na pawh hi a hmangaih tel vek a," la nui vur vur chung hian a lo ti leh a.



"A ngaihna in awm lo dùn àwm teh e!"



"Mûm uk ei ve ve rawh u."



"Aaaa....Mûm uk..."  Kan nui zo leh vek.



Kan țhianho hi chu kan insawisa nasa thei a nia, hua erawh kan awm ngai lo. Na tak takin kan insawisa a, a tàwpah kan nui leh ziah.



Mut hmunah ka ngaihtuahna a vâk kual a, thil țûl lêm lo ka ngaihtuah vak vak. Ka țhiante pawh hian min ngai ve tho ang, kei chuan ka ngai dâwn lutuk! Awmna sawn hi ka huphurh a ni, peih lo viau mah ila a ngai dâwn tho si, ka thih phah bîk nâng. Ka nu leh pa lah hi an hlim hmel ropui si; mahse, hei pawh hi ka tân vek tho a ni, khaw boruak nuam hi min duhpui, Kolasib hi chu a lum ve  êm a, lo awm rei ve viau tawh lo ila chuan kei pawhin Nipui lai boruak hi chu ka ning țhin ngawt ang! Ka zo lo lek lek fo si a.



Mahse, ka ngai dâwn tho.



Kan kal dâwn zànah chuan an rawn lêng leh vek, min rawn thlah tak tak tawh! An fel hlawm ka ti, inngaihruina tùr thawmhnaw kan inpe den den, țhianho kawr chu nei vek tho mah ila a mimala inpêk kan duh vek tho si a.



Tu pawh mai chuan kan inţhen tùr chu kan huphurh ni maiin ka hria, kan mittui a tla lo chauh hlawm. Țah kan hreh a, kan țap lo mai chauh a niin ka hria.



Ka muhìl thei lo, naktûkah chuan he khawpui hi kan tlàn liamsan vung vung tawh ang a, kan lêt leh tawh lo ang. Tuna ka room pawh hi mi dangin an luah ang a, an in ang chiahin an chei ve tawh ang, ka pain ka rawng duh ber min hnawihsak pawh hi mi dangin an luah hunah chuan, an duh zâwng rawng a nih loh chuan rawng dangin an thlâk ngei ang chu... 'Ka room tê' tia ka lo sawi ve țhin pawh hi ka room tê a ni thei tawh lo ang a, mi che țawp takin an luah phei chuan...



Ka rilru a na ngawt ang!


Zîng dâr 8-ah tûkțhuan kan ei a, Nipui lai a nih vàngin a hma tawh lo viau. Dâr 9-ah chuan chhuah hman ngei kan tum avàngin kan bungrua engkim kan singsa fel vek tawh a, min phurhsaktu tur pawh kan kawtah motor lian a ding vung tawh.



Țhiante an rawn lang leh, hei hi chu ka beisei ngam tawh vak lo asin. Ka lâwm a, ka lung a chhe bawk. Min dah pawimawhzia ka hriat belh a, ka hmangaih sauh hlawm bawkin ka hria.



Ka pa a țawngțai a, kan inchibai ta tliar tliar. A rûkin ka mittui a tling a, ka nui lui tho nain ka thinlung chhûng erawh a nui hauh lo. Anniho pawh chu an lo ni ve tho lo niin, motor-a ka luh dâwnah chuan Angaihi a rawn țap chhuak ta a, mi dangin an lo zawm vat, kei pawh ka bãng bîk lo.



Kawng tluanin ka țawng mang lo, khua a lum bawk si a, ka țah a chhuak ngawih ngawih. Ka nu leh pa chuan min tihhlim chu an tum ve lutuk; mahse, ka thei rih lo, a hnuah phei chuan an beidawng ta a niang, min bànsan ta daih.


*******


Thla khat deuhthaw kan awm ve ta, țhian ka la nei lo. Ka chhuah khàt êm avàng hian rual ka pâwl tam lo va, ka nu pawhin min zilh ve fo; mahse, ina tawm kerh kerh hi nuam ka ti zâwk a niang, ka ţhian ka kalsan tâkte tih loh phei hi chu țhian tia sawi tùr ka nei lo rêng a ni.



Țhenawmte chu an rawn lêng zauh zauh; mahse, ka kawm rual an awm lo. Ka hrisèlna a țhat loh avàngin college pawh ka kal ve thei lo kha a ni a, IGNOU-ah B.A ka zawm ve a; mahse, hei pawh hi exam dâwna theih loh thut ka hrât a, ka bànsan leh ta a ni. Ka la ti țha ve leh ang chu.



Ramzotlang chu a boruak a lo nuam khawp mai, kan in luah phei chu duhthusàm a ni tawp.  April thlaah pawh pâwnah ka chhuak a nih loh chuan, in chhûngah chuan lum tih vànga hrehawm tih ka nei miah lo nia! Kan in luah hi a fuh viau mai ka ti.



Ka țhiante nèn kan inbe reng a, kan lunglèn thu kan sawi kûr nguai țhin. Min ngai ve tih ka hriat chuan nuam ka ti ve deuh ringawt nia! Ka nuam tih a va ho sâwt tak!



Țhian ka neih loh avàng chuan social media ka hmang uar ta viau, țhiante ka biak loh kârah Fb lamah story chhiarin thu ngaihnawm tak tak leh news ka chhiar țhin bawk. Ka phone a rim khawp, ka mit lah chuti bawk; mahse, Pathian zârah ka mit hi chu a țha ve a, sawisèlna ka nei khât khawp mai.



Ka birthday a lo hnai a, țhiante tel miah lova ka hman vawi khatna tùr a nih vàngin ka huphurh tak zet. Anni kha chu awm se chuan hlim takin, nghâkhlel leh phûr zetin ruahmanna kan han siam leh ang a...



Kan țhianzaho group 'Chikki' -ah chuan ka va luangliam a.



*Ka birthday a hnai tawh si, ka va ngai tak che u êm! Nangni chu awm ula engkim a fel vek ni mai tùr, lo zin teh u* tiin.



Angaihi : Bialpa nei rawh.



Leh hmiah mai a!



Melo-i : Țhian zawng ve tawh rawh.



Hmangaihi : A va pawi tak! Exam a hnai lutuk tawh a, rawn zin a châkawm tehlul nèn! Kan awmna hmun ațang hian kan lo hmanpui mai ang che aw.



Rbi : Lo zin ka châkzia hi, sawi lo teh.  Ka hman bawk si lo.



Kei pek chuan *Nangni anga kawm ngeih hi ka nei thei tawh lo ang, in lo zin ngei chu a ngai a ni* ka ti deuh tlat a.



Angaihi : Tih dàn ka hria, lo zin lêt leh zâwk la?



Rbi : Ni dâwn tak! Lo zin rawh, b'day party kan buatsaih dâwn nia.



He mite pahnih hi chu aw...



Hmangaihi : Present kan rawn thawn tho ang che.



Melo-i : Rawn kal theih loh pawhin cake man tùr tal ka lo tum thei ang.



Ka țhiante hi chu an fel thei a nia.



Mut hmunah ka ngaihtuah a, Melo-i thil sawi kha țha dâwn riauin ka hria. WhatsApp leh Fb lamah group hrang hrangahte ka awm ve a, țhian pângngai ka neih hi chu a hun ve tawh. Hmel hmuh loh țhian ka nei nual tawh a, ka group awmna zîngah hian he vêng Ramzotlanga mi ngei pawh hi an awm ngei ang, hriat chhuah ka duh ve ta ut ut mai. Ka birthday a hnaih vàng kher ni lovin țhian ka neih ve a ngai, tuna kan awmna hi nuam ka tih vena tùr leh chhiatni țhatnia ka kawppui tùr. Țhian siam harsat viau e ti lo hian țhian ka duhin ka ngaina viau si a, ka engkim an ni deuh tlat a ni.



Pathian zâra dam ta na nâ nâ chu, ka birthday May ni 5 chu a lo her chhuak leh ta reng mai; mahse, kum dang nèn a va inang lo tak! Kum dangah kha chuan țhiante ka nei a, hlim takin kan hmang ho țhin kha a ni a, tunah erawh chuan, a reh ruih mai.



Țhiante min wish-na chu Fb lamah leh WhatsApp status lamah ka hmu chuai chuai a, min rawn be bawk. Pawisa pawh min rawn thawn a, message pawh ka dawng thlap e. Tilàwmawm viau mah se, ka kiangah an awm tlat lo va, làwm a kim lo.



Ka pa Office kal hawin cake chu min rawn hawn a, thlâte lain ka țhiante ka thawn ve, an pawisaa ka lei a ni si a. Ka pa leh ka nu pawhin kawr leh pheikhawk min lei, a mawi dùn lutuk.



Ka khua a har rûk êm avàng chuan Fb lama țhian inzawnna group pakhatah chuan ka birthday puala țhian țha ka duh thu leh ka zawn thu chu ka post ve ta hmiah. A hnuah erawh zia lo ka ti leh hnuhnawh, zahthlâk ka ti deuh tlat a nih chu, ţhian hmuh zawh loh thlâk ka tia, miin min lo ngaih dàn tùr pawh chu ka ngaihtuah nghâl zung zung.



Mahse, ka delete ta êm lo.



Zànah chuan friend request ka dawn nual avàngin ka check dan dan a, fake account ni loa ka hriat pahnih chiah ka confirm. Hmeichhia leh mipa an nia, a hmeichhia zâwk nèn phei chuan mutual friend pawh 27 lai kan nei, mipa zâwk erawh chu ka confirm mai mai chauh a ni.



A hnu rei lo têah chuan message a lo thleng ta vat, ka'n en chhin a, nichîna friend request ka confirm tâk mipa zâwk kha a lo ni!



Ka rin aiin a lêrh hmel daih mai! Ka lo confirm ka kher kher chu aw...



Message chu ka chhiar a.



*I thil post kha ka lo hmu a, țhian chu kan ni thei ang* tih hi a lo ni a.



A pp ka en nawn leh ngat, a lêrh hmel leh hmel loh chu ka'n thlêk vang vang a, hriat a har deuh chu a ni! Tlangvâl, la upat loh hmel tak, kan inrual kher loh pawhin kei ai chuan a upatna a tam kher bîk lo ang tih tùr hi a ni a, a hmel en tawp chuan a sual hmel loh, a lêrh lo maithei bawk.



A chhe lo riau mai bawk! Chhe lo ka tih chi tak!



Mahse, pâwn lam lan dàn chauh mai a nia, pâwn lam lan dàna inteh ringawt hi chu a fuh ber lo. 'Lehkhabu chu a kâwm ațangin teh suh' tih a awm ve bawk kha, chhûng lamah a lo dang daih thei tlat.



Ka confirm tawh a, han chhàn lët loh chu a hawihhàwm loh thlâk riaua ka hriat vàngin ka chhâng ta hrâm.



*A làwmawm e, khawiah nge i awm?* tiin ka zâwt leh nghâl zat.



*Serkawn, Lungleiah ka awm, nang?*



Iau! A țha dâwn e, kan vêng pawh a inhlat lo tawp mai!



*Ramzotlangah ka awm thung. Kolasib ațangin ka pa hna avàngin kan rawn insawn a, Lungleiah țhian ka la neih loh vàng a nia* tiin ka chhâng duah.



*Min nei ta chiah e😀👍* tiin min rawn chhâng.



A lêrh hmel reuh e...ka chhâng lêt duh tawh rih lo. Mipain min rawn inbox hian ka chhâng lêt ngai lo a nia, engtizia nge ni zanin kher kher chu, ka biak ve tâk hrep ni!



Ka chhàn tâk lohah chuan ani pawh a reh ve ta mai; mahse, engtizia nge ni ka hre thiam lo, a pp chu ka han check leh ngat a nih chu! Chhe lo chu ka ti chiang alawm! Mahse, a lan țhatna a lo hmang ve pawh a ni thei tho. Chutah, a thlalâk dang dang ka check leh ta ngat a, a lo ni vek! A hmel a chhe fahran lo hrim hrim a nih hi.



Ka inhre chhuak thut! Hmm... keimah zâwk hi a nih chiah hi 'lêrh' reuh chu ni.



A zia lo hle mai, mipa thlalâk ka en ta vang vang a nia, min rawn inbox vàng vek! Min rawn bia a nih pawhin ka chháng tawh miah lo ang, ka rilru a tihehêu dâwn tlat!



Mut dâwn tak takah ka diary ka ziak a, ka mitthlaah chu pa hmel chu ka hmu zui ta zêl, ka vei em ni? Min rawn inbox vàng khân maw? A nih chuan ka lo va lêrh ve! Min rawn inbox avàng mai maia rilru mitthlaa a rawn lan tâk tlat mai chuh, a zia lo ngei mai.



Ka ngaihtuah zui lo ang.



Khua a lo vâr a, ni dang ang thovin ka nuin eirawng a bâwl a, keiin pangpâr ka buaipui thung. Ka nun an tihlim ve tlat, mawi tak maia an pâr han hmuh hian rilru a hlim a, ka thlîr reng peih țhin.



Chhùnah pawh in ka tihfel hnuah pangpâr chu ka buaipui leh a, a hnuah ka nuin min rawn pui. Thingpui in hnuah erawh kan chhunzawm tawh lo va, kan intihfai hnuah dàwrah ka peih lo chung min kalpui. Motor tlân leh bike chak zet zeta an rawn tlân chu ka hmu hnê khawp mai, rei lo tê chauh mah ni se kan in chu ka ngai nghâl dèr. Pâwn boruak chu ka duh aiin a lum tlat, in chhúnga awm leh tawh ka châk.



Tlaia eirawng ka bàwl pah chuan ka phone ka khawih mai mai a, inti hman zet hian ka țhiante ka text zûrh zûrh a. Ka han en chiang a, messenger lite noti a lo awm reng tawh niin, hei chu WhatsApp Message a ni hauh lo!



Tu nge? Rin chu ka nei nghâl nain ka ring ngam(?) chiah lo deuh. Ka thin a tiphu dat dat, chhûng rilah phùrna ka nei nghâl vat bawk. Ka en châk, ka en ngam chiah lo deuh bawk.



Ka en ta nge nge, ka rin ang chiah, a proname pawh hi mawi ka ti thar ta riau. Pc-a ET Lucas. Ka hre chiang nghâl râp.



ET hi Evangelist Teacher tihna a niin ka ring lo va, Pc-a tih hi chu a hnam hming lam tawi a ni ngei thung ang a, Lucas tih erawh hi chu a sâp hming, a nih loh pawhin Roman Catholic a nih hlauh chuan a Christian name, a hming inphuahchawp pawh a ni thei tho bawk.



Ka va ngaihtuah nasa tak!!!



*Vawiin chu nangmah ang deuh ka hmu asin😀*



Ka va han âwih lo!! Min la hmu tawp si lo va, ni lo, keimah ang a hmu lo ang, min hre țhin pawh a ni bawk si lo.



*Fiamthu i thiam hle mai* tih ka thawn ve ringawt.



A hnu deuha ka phone ka en chuan message a lo awm leh hman tawh!



*Ka fiamthu lo, i pp-a mi hi nangmah i nih ngai chuan in inang tak zet* a rawn ti leh.



Ka nui deuh sak.



*Ka lo ni mial ang a😀*



Ka zak lo reuh hi ka tia, mipa hetiang hian ka han text ve ta zârh zârh a nia.



*I nih chu ka ring chiah lo, ani chu nutling tawh a nia😀*



Chhàn zêl châknain min tur et et avàngin ka chhâng leh ta.



*Nutling ka ni tawh maithei asin*



Ka chaw chhuan chu a ût chiang mai! Tihchi loh hle a ni, mipa ka text a, ka chaw chhuan lai pawh ka theihnghilh phah țhak a nia, fuh lo tak a ni!



*I ni lo alawm, ni lo'm ni?*



Ni nâng, nula kum 20 mi chauh ka la ni.



*Ni lo ve*  ti chauhin ka chhâng ta.



*Ka tibuai viau che em?* a rawn ti leh.



Min tibuai tehchiam lo, eirawng ka bâwl a, ka chaw chhuan a ût phah tih mai loh chu...



*Engah ngawt maw?*



Hmm, chhàn loh ve tawh mai àwm hi a nia, ka phal mang tlat lo a nih chu, zahpuiawm lutuk!



*Ninawm nih ka duh lo va*



Teh daih chuan! A ninawm loh nasat hi, a rúkin min tihlim hle zâwk asin; mahse, hriattír erawh ka tum lo.



*Țhian kan nih kha, engah nge ninawm i nih ngawt ang?*



Țawngkamte hi ka va thiam ta ve! Ka zak lo ka ti.



*A țhat hlauh chu, min ning ru riau ang tih a hlauhawm a*



Ning lo nasa. Rilru hlim ru takin, chhûngrila phùrna nèn ka text a nia, nin chu khawilam a ni ringawt!






*DÂWT HRILHA MI TIHHHLIM AIIN THU DIK SAWIA MI RILRU TIHNAT A ȚHA DAIH ZÂWK*