☆SUANGTUAHNA NEITU☆ - 2 By Dingdi Pachuau

☆SUANGTUAHNA NEITU☆ - 2 By Dingdi Pachuau




Mipain min biak ve pawhin ka chhâng lêt ngai lo tluk kha a ni sia, tunah chuan keimah zâwk zâwk hian chhàn loh theih lohin ka chhâng lêt ta zârh zârh chu a ni sia!



Ka zak ve leh ta deuh, ka hmel hriat țhin ka țhian pawh a ni si lo. Min ngai 'easy' ngawt ang chu.



Mahse, ka inthiam chawp leh deuh, ka va biak hmasak pawh a ni lo va, amah zâwkin min rawn be hmasa ve ve a nih kha. Ka ngaizawng pawh a ni chuang lo va, ani pawhin min ngaihzawn vàng a ni tawp nâng.  E, ka rilru a rawn dêk chhin a ni mai lo'ng maw? A ni ngei ngei ang, Kei lah chuan ka lo chhâng țha nasa si🤦‍♀️



Ni lo, hetiang hian ka be tawh lo ang, min rawn be leh a nih pawhin rilru inhawng takin ka lo be tawh lo ang a, a rùl tâwk chiahin ka chhâng tawh ang. Min beisei ngam thei lo ang, hriat pawh kan inhre lo va, eng ang mi nge a nih pawh ka hre hek lo.



Ngaichâng lo ang deuh siin ka phone chu ka en leh zauh zauh, duh lo inti viau si hian min rawn biak hun ka nghâk chu a nih hi. Ka awm dàn hi mak ka ti, hetiang hian ka awm tih hre ta se, lêrh min ti àwm mang e!



Ka rilru a hria emaw ni ka ti hial, mut hnu thleng pawhin min rawn be ta miah lo! Ka rilru a down viau mai, min rawn biak ka rin tehrêng nèn.



Chikki-ah țhiante an rawn nawi viau a, rilrua enghelh nei țûnin ka nawi ve zauh zauh, rilruah erawh a lût lo khawp mai.



Kha pa, Pc-a vàng vek kha a ni!



Zíng ka thawh chuan a hma vak tawh lo, ni a êng uarh tawh. Lu na deuh bûrin ka tho a, ka mood a 'off' deuh tih ka hria.



Phone ka han en a, dâr 6:30 a ni tawh! Messenger lite noti lo lang kalh chu chiang takin ka hmu nghâl bawk.



Amah bâk a ni thei lo.



Phûr rilru tak hian ka han en a, amah a lo ni tak tak!



*Good morning*



Chu thu tê ringawt pawh chuan min va tiphûr tehlul êm! Ka mood 'off' zawng zawng pawh a rawn 'on' nghâl vek.



Mahse, ka chhâng lêt lo. Chhàn châk viau mah ila ka inthunun rih a ngai.



Nuam ti takin nilêng hun chu ka hmang ve mai a, ka rilruah erawh phone mawlh chu a awm. Ngaihtuah loh chu ka tum ve lutuk, thil dang dang ka khawih kual nain rilru erawhin kawh deuh ràn chu a nei chiang.



Engati nge he pa lakah hian ka invèn rán le? Țhian țha duhin ka zawng a, aniin ka țhian nih duh avàngin țhian atân min rawn zawng a, engati nge hetia ka tih leh si? Keimah zâwk hi ka dik lo a ni, rilru danglam ka pu tlat.



Țha taka be tùr ka ni alawm.



Mahse, amah pawh ka la hre chiang lo va, eng ang mi nge a nih pawh ka hre lo, țha taka lo biak ringawt mai chu a dik thei lo.  A hming dik tak pawh ka hre lo va, a thlalâk dah lah ama thla ngei a ni tih pawh ka hre lo; kei lah ka hming dik tak leh ka thlalâk dik tak veng ka hmang thung a, min en chhin a tum pawh a ni thei ka tih tawh kha.



Min rawn biak leh chuan țha tak thoa biain ka invêng ràn tawh ang, bâkah, a 'bàwl' theihin ka awm lo ang.



Zanriah ei khamah chuan youtube lama ka en țhin colour paper hmang chuan pangpâr ka siam ve leh ta a, Kolasib kan awm lai pawh khân tlêm chu ka siam ve ngei; mahse, ka puitlin tam lo khawp.



Ka siam laklawh lai chuan ka phone a rawn ri a, țhiante nèn chuan kan inbe leh rih, ka thil siam lai chu an en ve duh avàngin kan in-video call a, Melo-i pawhin naktûk lam chu siam ve a tum a ni àwm e.



Messenger noti a lo awm leh ràn tawh!



Kan inbiak zawh hnuah chuan phûr rilru zet hian message chu ka en ta vat, amah ngei a lo ni.



*I dam țha tiraw?*



*Ka message i chhâng si lo va, i buai a ni maw?*



Ka chhâng ta vat. A online leh tawh rih loh avàng chuan min rawn chhàn vat chu ka ring lêm lo.



*Dam țha e*  tiin ka chhâng.



Ka chhàn hnu lawkah chuan mi rawn text leh ta.



*A làwmawm e! Min haw ta chu a ni êm lo tiraw?* a rawn ti leh.



Haw nâng, ka haw lo hrim hrim.



*Teuh lo mai, engah nge ka huat ngawt ang che?*



Kha, ka tlak leh duah mai, 'Teuh lo mai' tihah khian duh tâwk ve mai àwm hi a nia...



*Ka message i reply har sia, min haw ta a niang ka ti a* a rawn ti leh.



Hmm..



Ka pangpâr siam tum chu ka melh vang vang, dah țha mai teh ang, ka siam chhunzawm peihin ka ring chuang lo, min biak peih chhûng ka be leh peih àwm si a.



*Eng nge i tih? Ka tibuai che em?*



*Buai lo ve* 



Dâwt tlêm ka sawi. Ka pangpâr siamna hmanrua chu ka dah fel pah zung zung, min rawn text lo se chuan ka siam ngei àwm si a; mahse, min tibuai chu ka ti phal hauh lo.



Min tibuai tlat lo alawm, min tiphûr zâwk!



*Vawiin chu ka țhianteho an lo lêng a, in vêng lamah khân kan rawn lêng țêp asin*



A ti tak tak em le?



*A ni maw?*



*Min chhâng tâwi hle mai, rawn kal chu i hlau a ni maw?*



Hlau nâng.



*Engah ngawt maw?*



*A takah hmuh che ka châk a*



Ka thin a tiphu ta dat dat mai! A takah, hmaichhanah ngei mai han inhmuh chu a châkawm ngawt ang le; mahse, a huphurhawm viau bawk.



*Ka pp-a i hmuh ang kha ka ni mai*



*Engtikah emaw inhmu ang?*


Kha maw, duh aiin a kâwlhrâwng dâwn, ka thiam loh a ni. Ka chhàn dàn hian a zir êm a, mipa rilru ațang chuan 'hope' kha an nei thei tlat a ni.



Ka chhàn har êm avàng a ni ngei ang, amah zâwk chuan min rawn text leh.



*Sorry, i duh loh zâwng a ni ang tih ka lo ngaihtuah miah lo va, ka duh duh hi ka lo sawi leh phawng phawng țhin...*



*Mipa țhian ka nei ngai lo va* ka ti ta ringawt.



Ka nghah deuh vang vang hnuah chuan



*Ka âwihin i ring em?* a rawn ti.



*Ka ti fiam lo, ka ti tak tak*



Ka va duhthawh tak!



*Okay, ka ring che. I mipa țhian hmasa ber ka nih avàngin ka lâwm e*



A hnu lamah chuan eng eng emaw kan sawi a, a hming dik tak pawh ka zâwt ta nghe nghe.



Chuaudingliana a nia; mahse, 'Pc' tiin an ko daih. ET erawh an țhianzaho hming inphuah a ni awm e, a lam pum erawh ka zâwt lo. Lucas tih chu a hming a ni a; mahse, miin an hre tam lêm lo, a birth certificate-ah pawh a chuang chuang lo.



Țhian tak tak angin min en a ni ngei ang, ka text loh pawh hian min rawn text ziah a, zîngah min rawn 'Good morning' a, zànah lah min rawn be ziah bawk. Kei lahin min lo biak hun ka lo châng khar reng a, kan inbe rei thei khawp mai, ka țhianteho zâwk zâwk pawh ka be rei khât, ka awm dàn hi hria se mak an ti ngawt ang chu!



Kan inbe ngun ta bawk a, chanchin eng eng emaw kan inhrilh tawn ta țeuh mai. Kan pian kum a inang chiah a, kei aiin thla thumin a upa zâwk thung. A nu hi nurse a ni a, a pa erawh Serkawn Middle Sikulah Craft teacher angin a thawk. College a kal mêk a, a chhuak țêp tawh bîk.



*I chhuak teuh tawh bîk mang e!* tiin ka text a.



*Umm, chhuak ve teuh tawh. Nang pawh July thla chuan admission chu ti ve tawh la?*



*Nia, ti ve leh ang, hrisèl ver vawr nih hi chu ka châk tak tak a ni* ka ti a.



*Ngawi tak rawh, exer tam tâwk la turin ka rawn sâwm ang che, tûn ațanga kum hnihah chuan i hrisêl tawh ngawt ang* a rawn ti.



Ka nuih a tiza khawp mai a, keimahin ka nui var var.



Kan inbe zing bawk a, ka lunglènna pawh a tibo zo vekin ka hria, ka țhiante pawh ka ngai nêp tawh viau, min be țhin hi ka tân chuan thil țha tak a lo nih hi.



Țawngțaina ka thlahthlam ngai lo, ka hrisèl loh viau vàng pawh hi a ni mahna. Ka tân chuan Pathian hnaih hi a ngai bîk ka ti țhìn, hetia derdêp deuha ka awm pawh hi amah ka hnaih theih phahna a ni a, mi hrisêl tak ni ta ila tûn ang hian ka hnaih viau lo maithei a ni.



Ka tân ka dîl tho nain ka nu leh pa tân pawh ka dîl tho. Ka țhiante pawh ka țawngțaipui fo a, chubâkah chuan ka hmalam hun tùr ka thlen fo bawk. Hmeichhia nih ve bawk si chuan tûnlaiah chuan mi țha lo tam tak an awm tawh a, țhian kawm tùr mi țha leh kawppui tùr pawh hi Pathian hnênah ka hlàn țhìn. Ani chuan engkim a hre si a, ka tân mi țha tak min dah ka ring tlat a ni.



*******



*Vawiin chu dîlah kal ila?*



Ka va châk ve tak! Inrinni a nia, a hman niah chuan a chhuak ve țhin a nih dâwn hi. Kei lah chu ka khua a sik deuh ser ser avàngin khum ațang pawhin ka tho chhuak peih lo a nia.



*A nuam ngawt ang?*



*Lo kal ve tak tak la, ka rawn hruai ang che* a rawn ti leh.



Ka thei lo tih hria se aw...



*Tih tùr dang ka lo nei tawh a* tiin chhuanlam ka siam ta ringawt.



*A va pawi ve! Kal ve la ka tih tehlul nèn, sangha ka lo man kêp mai ang che aw, lo dam țha la*



Nilêngin ka ngaihtuah phah. Min duhsaknate chuan min tihlim a, kawng lehlamah chuan ka lung a tichhe deuh bawk. Ka hrisèl lohzia hi hre chiang se min khawngaih ve tho ka ring. A takah hmuh pawh ka châk, a fel êm mai, a chhe vak bawk si lo.



Kan inbe reng nain phone number kan la indîl hauh lo. Dîl hmasatu nih ka duh lo va, hetia kan inbiak reng tâk hnuah pawh hian ka number hi min la dîl chhin miah lo, hetia messenger ațanga inbiak hi nuam a ti zâwk pawh a ni mahna.



Zan khat chu hma deuh takah min rawn bia. Min rawn be hma ka ti khawp mai a, mak pawh ka ti. Ka dam ve leh tawh a, ka thinlung pawh a zángkhai deuh tawh, pâwnah erawh ka chhuak khât khawp, inah ka tawm reng mai.



*Kan inhriatna pawh a lo rei ve ta a, inhmu tawh ang?* a rawn ti ta.



Ka châk asin, ka hmu châk lutuk. Min biak dàn ațang hian mi fel tak a nih ka ring tawh a, mi lêrh tak a nih pawh ka ring tawh lo.



*Teh thut chuan* ka ti ringawt.



*Teh thut tawh hleinem. Ni 5 khân kan inhria a, tunah ni 20 a ni tawh, ni 15 lai kan inhre tawh a nia* a rawn tih chuan chutia ni zât a lo chhiar teh thlap chu mak ka ti a, ka lâwm phian bawk.



*A țha alawm*



*Naktûkah aw, chûk chûk i tih loh hrám ka beisei*



A pawi lo, a hman hun hun a ni mai. Kei lah ka hman nasa mai si. Ka țhian, ka biak reng țhin leh min be reng peihtu niin a chanchin engkim min hrilh hreh lo a ni bawk a, inhmuh chu ka châk daih tawh zâwk alawm.



*😀A țha alawm*



Kan inhmuhna tùr hmun chu a sawi a, ka hriat ve chhun tak a lo ni kher a, a zia khawp mai.



Ka muhìl țha thei lo, ka helhhawlh tlat a nih chu. Ka hmuh hun tùr chu ka ngaihtuah a, ka awm dàn tùr leh ka biak dàn tùr chenin. Ka țawng dàn tur, eng thil nge ka sawi ang? Engtin nge ka inchei ang? Inchei viau chu ka tih dàn a ni hauh lo nain tlêma mawi hnai deuh hleka inthuam chu a ngai ang.



Ni 21 a lo her chhuak ta. Vawiinah hian kan inhmu dâwn a ni, ka phûr, ka phùr viau rualin ka zâm deuh bawk, ka huphurh tel bawk.



Ka nuin ka chhuak dâwn tih a hriat chuan mak min tih hmel khawpin ka hria.



"Nia, chhuak harh ve rawh, rei lo tê tal pawh chhuah hi chu i mamawh ve alawm tiraw? Hlim takin hun i va hmang dâwn nia," tiin ka chhuak tùr chu min thlah.



Ka chhuak tawh tih chu hrilhin ka text a, ani pawhin min rawn chhâng lêt vat.



*Ka lo nghâk tawh che*



Ka huphurh, ka châk pah bawk, ka awm dàn a dik thei lo. Ka thaw hawk hawk, ka thin a la phu dup dup zui.



Kan inhmuhna tùr hmun restaurant ka thlen chuan chàwl an lo awm ve nual a. Ka hawi kual vak lo nain amah ni àwm tak chu ka hmu nghâl ta vat. A chhan chu a pp-a mi nèn khân an hmel a dang tlat lo, a pp kha ka hmu ngun tawh a, ka chhinchhiah ve tawh êm a ni.



Min rawn hmu ve nghâl, a bân pharin a lo nui sâng a, nui sak chungin a lam chu ka pan phei ve nghâl.



"Min lo nghâk rei tawh sia, i lo ning tawh àwm mang e!" ka ti sap a.



"Nghah man i awm khawp alawm," a lo ti daih thung.



Ka țhut fel hnu chuan a lam chu ka en a, min lo en reng tih ka hmuh chuan ka sen țâwn țâwn tih ka hria, ka biang a sa hat hat mai.



"A takah i țha daih zâwk! I hmel țha hle mai!" a ti a nih chu!



Ka nui ringawt phawt, a lum ka ti up up mai, hetiang fakna hi hmaichhanah mipa lak ațangin ka la dawng lo. Min chhaih țhin nain hetiang teh thlâwt hi chu dawn ka inring ngai lo bawk. Ka zak a, ka lâwm viau bawk si.



"Ka lâwm e, nang pawh..." ka ti ve ta ringawt.



A tarmit fîm zet kâr ațanga min en chuan a nui suk a,"A hnuhnung zâwk kha chu ka ring chiah lo," a ti phawt a, chutah," E taka, chiangkuang takin inhmelhriat teh ang, Pc-a ka nia," tiin a kut dinglam chu a rawn phar chhuak a.



A tih dànin ka kut dinglam phar chhuakin," Awmawmi ka ni e," ka ti ve a, kan inchibai a.



Ka huphurh aiin ka zâm lo. Sawi tùr a hria a, ka țawng ve vak pawh a ngai lo; mahse, min en vang vang țhin chu ka zak deuh thung, nuam ti ru deuh siin ka lài leh tlat țhin.



"Kan inhmu tawh bawk a, i number min pêk phal ka ring tlat tawh a nia," nui chung hian a ti a.



"Engah nge ka phal loh ngawt ang?" ka lo ti thung a.



"Messenger kha chu a buaithlák ka ti, inhmuh huna i number dìl che hi ka nghâkhlel tawh lutuk a," a ti a.



An vêng lam hnaih a ni bawk a, hmel hriat pawh a ngah hmel, an rawn be  nawlh nawlh. Țha tak tak chuan a chhâng nain a mit chu a la sawn mang lo, ka va en laiin min lo en ziah, kan mit a intawng ngun khawp, la sawn hmasatuah ka țang ziah.



"I number ka nei tawh bawk sia, ka rawn call buai reng tawh mai dâwn che a ni," nui chung hian a ti a.



"I hman lo, class kal i ngaih kha," ka ti thung a.



A fiamthu a ni tih hre reng mah ila  kei chuan thu takin ka chhâng.



"Ka țhian ngainatte lakah chuan ka che chimawm thiam thei teh mai a nia aw, nang pawh lo inring ang che."



Țhian ngainat. Țhian ang  chiahin maw min lo en? Ka rilru a down deuh ruihin ka hria.



Kei hian țhian angin ka en lo tihna em ni? Ni e, ka en tak tak lo, min rawn text-a ka lo phùr theih dàn kha ka ngaihtuah lêt a, țhian ang mai chuan ka en lo a ni, țhian bâkin ka en tlat.



"Eng nge i ngaihtuah?"



Hnai zetah min lo en kar tawh niin.





*MAHNI DINHMUN INEN HMASA LOVA MI SAWISÈLA MI RÈL NGAWT A ȚHA NGAI LO*