☆SUANGTUAHNA NEITU☆ - 3 & 4 By Dingdi Pachuau

☆SUANGTUAHNA NEITU☆ - 3 By Dingdi Pachuau




"Min hmu hi i inchhîr țan, a ni tiraw?"



"Teuh lo mai! Engtin nge chutiangin i ngaihtuah theih a?" ka ti ve thung.



A chair hnung chu nghèng ar arin," Ka hre thei mai maw le; mahse, i tlai tawh, ka tibuai tho tho dâwn che," a ti sup a, a nui pah vur vur a.



"I hre sual a nih kha."



"Pawi chuang lo, nula fel chuan min block dâwn lo tih ka hria, chubâkah țhian kan ni tawh tho bawk a," a ti leh a.



Kan ina min thlah haw a tum a, ka duh lo nain kan in awmna tal hriat a duh vàngin min thlah haw ta tho.



"Ka lo lèn i hlau a ni maw?" a ti leh tlat a.



"Hlau nâng!" ka lo ti vat.



"Hlau bawk si lo...um, a țha e, sawi tawh lo ang."



Mi in bul kan kal laia an kawta pangpâr mawi tak tak ka hmuh chuan ding deuh hlekin ka thlêk deuh dâk dâk reng a.



"Pangpâr i ngaina a ni maw?"



"A mawi êm alawm, en mah la, a mawizia saw!"



An mawi hlawm êm asin, ka kal lam kha chuan ka thlêk vak hman lo va, tunah erawh chuan ka bulah a kal tawh sia, hmun dang melh tùr zawn a ngai tlat a ni.



"Ka nu pawhin a ngah mai," a ti sup a.



"Tak tak maw? Sawtiang saw maw?" tiin pangpâr pâr sen hlar mai chu ka kâwk a. A hming ka hre tlat lo, a pâr erawh ka hmu fo tawh țhin.



"Pangpâr chi tin a awm kim vek ang chu! Kawt zâwl pawh kan nei tawh lo, pangpâr hmun a ni ringawt tawh!" lungawi loh hmel zet hian a ti a.



"A nawm dâwn chu le!" ka lo ti thung.



"I duh phawt chuan ka lo rûksak ang che! Țangkai lo del dul lutuk!" a ti leh a.



A țawng dàn chuan ka nuih a tiza khawp mai, ka nui sak a.



"Ka hmu ve châk e a."



Rawn inherin," Hawh, rawn hmu ve rawh, i hàwn pah nghâl ang a?" a rawn ti thut.



"A, tunah ni lo, ni dangah ti ila?" an ina kal chu châk viau mah ila a vawi khatna atân chuan a zahthlâk rih ka ti a ni.



"Kan in i hmu ve châk nange? Keiin in in hmuh ka châk nèn, min sâwm duh mang si lo," a ti nang nang a.



Ka hmu châk reng, vawi khat inhmuhna ațanga an ina kal nghâl thawt thawt kha ka zak alawm.



Kan in bul thleng chu min thlah a, inah erawh a rawn lût lo, ka phal rih lo a ni. Ka nu ka sawipui phawt ang a, a phal chauhin a lo lèn ka phal ang.



A sawi ang chiahin a awm. Ka number a nei ta bawk a, a rawn chimawm thiam khawp mai. Thil ho mai mai 'I tho tawh em?, 'Eng nge i tih?, ' Class ka kal dáwn chiah' emaw ' I muhìl tawh em?' tih emaw mai mai sawi tùr ringawt pawhin min rawn call peih nia. Chu chauh chu a ni a sawi țhin ni, a lo chimawm thiam narawh e.



Mahse, kan innèl phah ta lel mai. Ka nu pawh ka hrilh tawh a; mahse, mipa ţhian ang chiahin ka hrilh, a dik chiah bawk, țhian ang chauhin alawm min en.



Bialnu a nei lo a niang, bialnu chu nei se heti khawp hian min rawn tibuai peihin ka ring lo, a hman dàn êm êm hi, lehkha a zir ve ngai lo a nih ka ring hial a ni.



Inrinni zàn a ni a, ka pa a inkhâwm a, ka nu nèn erawh kan inkhâwm ve lo. A chhan chu tlêmin ka nuam lo leh deuh tawh a, inah ka nu nèn kan lo țawngțai thung.



Țhiante biak tùr an la awm rih si lo va, group-ah keimahin ka nawi hrep a, an chhiar hunah chuan an nui ve nasa khawp ang chu.



Chhùn lama min rawn phone zûrh zûrh tawh avàngin min rawn phone ka ring tawh lo a nia, a rawn call leh tho.



"Ka rawn text dâwn che a nia," tih zawng a rawn sawi, a ti tàwp nghâl.



Chimawm, nghal țha thei a nia.



*OmOm, bialpa i nei em?*



OmOm. Hetiang hlîr hian ka hming hi a rawn ziak ziah, 'Ka hming a ni lo' ka ti ziah a, engah mah a ngai duh chuang lo.



*Tu nge OmOmi ka hre lo* ka ti leh ngat a.



*Ka țhiannu chhe lo deuh, khal ve deuh kha. I hriat si loh chuan ka nu pangpár pêk ka tum tawh pawh ka pe lo mai ang e* a rawn ti.



A va ngeiawm thiam tak!



*Ka hria e, nula zei lo zet kha a ni em?* ka ti, keimah ka insawisa leh ta rih a nih chu.



*A zei leh zei loh chu ka hre lo; mahse, nula kawm deuh a nia, an ina ka lèn pawh a phal lo. A hmel țhat tehlul nèn, a bialpa min thîk a hlau a niang*



Ka nui sak.



*Nia, a mâwl tel tlat a, chuvàng a niang bialpa tùr pawh a hmuh zawh loh ni* tiin ka chhâng, thu dik takin ka chhâng a ni.



*Naktûkah an ina lèn ka duh a, lo hrilh chhin teh, a remti tawh em?*



Lo lèn hi vawi hnih min dîl tawh, ka la phal lo va; mahse, tunah chuan ka nu ka hrilh tawh a, ani pawhin a phal tawh avàngin ka remti tawh.



*A remti tawh a nih chu*



*Yes🕺🕺🕺*



Lâm lai a rawn dah tel kher avàng chuan ka ngei deuh hlek, a phùr over hmel lutuk a, a chhe lo țawh țawh bawk nèn.



*Phûr over suh* ka ti kher.



*Over ang chu, a loh theih loh! Ka châk tawh a nia, naktûk chawhnu ni tawh se* a rawn ti thung.



Chawhnuah rawn lèn a tum a nih hi. Chawhma lam chu kan inkhâwm ngei ang a, kei pawh inkhâwm ka tum ngei ang chu.



*I phal tawh kha aw, i sût leh thei tawh lo a nia* a rawn ti leh.



Ka nui tawp ringawt. Ka phal leh lo angah a ngai a ni chiang.



*Phal e, zanin i inkhâwm lo a ni maw?* ka ti ve thung.



*Zàn lam hi chuan, ka rinna anțam chi hi a la țiak chiah lo a niang😀* a rawn ti leh.



A rawn tih dàn kher kher chu, ka nuih a tiza bawk sia, nuih ka duh chiah bawk si lo.



*Dam chuan inkhâwm hi a țha asin* ka ti ve thung.



*A nih, nang? I dam țha lo em ni?* a rawn ti leh.



Ka chhànna tùr ka ziak chiah tihin min rawn call ta.



"I dam țha tiraw?" a rawn ti nghâl.



"Dam e, tlêm têin ka nuam lo mai a ni; mahse, tunah chuan ka dam leh tawh." Dâwt hrilh ka duh lo, ho tê nia langah pawh hian dâwt inhrilh kher hi chu ka duh lo.



"I eng nge nâ a?"



"Nuam lo deuh mai mai ang hi; mahse, a reh tawh ka tih kha," ka ti leh a.



"Naktûka ka lo lèn hunah ka țawngțai ang che a, i dam vek mai ang," nui hak hak chung chuan a rawn ti a.



"Teh rêng mai, min țawngțai tak tak rawh aw."



"I dam ngei ngei ang, ka țawngțai tawh chu an dam ziah," a rawn ti leh a.



"A țhat hlauh chu. E, thu dang daih, lehkha i zir ngai em?" ka ti ta daih.



"Zir ve bawk ang chu, hetia ka be chung che pawh hian ka zir reng alawm," ngaihsam hmel tak chuan a ti a.



Ka âwih hlawl lo.



"E, a va țha ve!"



"Min ngaihtuah suh, exam-a zawhna lo chhuak chhànna hi chu ka thiam ve zâwng a ni țhin a nia," nui hawk hawk chungin a ti leh a.



Lehkha thiam ve thei tak chu a nih dâwn hi a.



"A làwmawm nasa a nih chu."



Kan titi luam hnuah chuan,"Nang biak che hi chuan engkim ka lo theihnghilh țhin, i nuamsam lo tih pawh ka lo theihnghilh dâwn alawm le, naktûk chawhnuah chuan ka rawn lêng dâwn a nia," a ti a, rei kan inbe ta lo.



Țhianho group-ah ka lût leh rih. An lo nawi nasa, ka va nawipui ve leh bawk.



Melo- i : Awmawmi induh sâwtzia hi aw...



Hmangaihi : Bialpa kha a nei ta a niang.



Keimah : Ka la hmu zo lo😀



Hmangaihi : I zêp a niang😀



Thu ho mai mai kan sawi. A hnu deuhah erawh thu tak deuh hlekin ka dam țhat leh țhat lohte min zâwt ta hlawm. An fel thei a nia.



Ka mut dâwnah damdawi eiin diary ka ziak leh rih. Diary ziah hi ka ngai pawimawh țhin khawp, a châng phei chuan ka thurûk engkim ka hrilh a, ani lahin tu mah hrilh lovin min lo vawn himsak tlat țhin a ni.



Ka țawngțai. Pathian hnênah taksa damna ka dîl chàmchî țhin, hrisêl țhat hi ka châk ve êm êm a, ka theih tâwpa ka inuluk ve chung pawh hian natna neuh neuh hi ka tuar leh țhìn. Ka inentîr nasa ve tawh a, doctor-te pawh hian a ngaihna tak an hre lo, damdawi min chawh leh ringawt țhin.



Ka țhiante ka kalsan hnu hian Pathian hian Pc-a hi min kàwm hlim tùrin min pe a nih ka ring thlap. A chhan chu țhian ka dîl a, ani hi a lo lang vat a. Mipa mah ni se min tihlim khawpin ka hria, tlêmin a lakah ka rilru a dang deuh e tih lohah chuan a țha vek.



Ka muhìl țêp tawh tihah chuan ka phone chu a rawn nghawr deuh dat a, message a lo thleng tih ka hre nghál mai.



Meng deuh ser serin ka phone chu ka en a, Chimawma a lo ni.



*I muhìl tawh elo?*



Chu pa mai mai chu aw...



A dang a lo thleng leh nghâl zat, hei chu thlalâk a ni. A room ni ngei tùr a ni, dawhkàn chunga lehkhabu inchap darh nuai bula a selfie a ni.



*Lehkha ka zir ve țhìn tho a nia* a rawn ti. Lehkha zir ngai lo anga ka chhuah kha a duh vak lo a ni ngei ang.



*Ka muhìl tawh* tih ka thawn lêt ve thung.



*😀I va duhawm reuh tak!* a rawn ti!



Duhawm lai tak khi, duhawm min ti tak tak em le? Ni lo, ka duhawm a ti lo ang, a sawi ve mai mai a nih khi.



*Țha takin zir rawh khai* tih ka thawn lêt a.



*Ngaihtuah pah reng che chuan rilruah a lût mawh phian* a la rawn ti tak deuh deuh!



Engati nge min ngaihtuah le? Ka dam țha lo, nuamsam lo tih ka hrilh vàng kha a ni ngei ang.



*Min ngaihtuah suh, ka zia tawh ka tih kha* tiin ka chhâng.



*Um, muhìl leh tawh rawh, G'nite* a rawn ti daih.



A tûkah chuan ka tho zia leh tawh, ka dam leh vâk tawh mai.  Kan inkhâwm a, thuchah sawitu chuan Pathian hmangaihna tih a sawi a, a sawi thiam ka ti khawp mai. Ngun zetin ka lo ngaithla a, mi dang pawh chuan an ngaithla ngun hlawm khawpin ka hria.



Chawhnu dâr 1 a rîk chiah chuan kan kawtah bike a ding dat mai. A lo kal ta ngei a nih ka ring.



Kawngka a rawn kik ri ta dat dat. Ka lo chhâng vat a, a rawn lût ta zân zân.



Cotton kamis pâwl a ha a, a kekawr dum, țhui dak zaih nèn chuan a inhmeh kher mai. A inkhâwm bâng a inthlâk lo a ni maithei a ni.



"I fel hle mai, lo țhu rawh."



"Ei tùr ka rawn ken che asin, i dam țha lo sia," tiin paper bag lian ang reng tak chu dawhkànah chuan a rawn dah ta nghâl a.



"A, a ngai lo asin le aw, i ti làwmawm lutuk e."



Ka en chhin a, ei tùr chu a tam khawp mai. Cake lian zet, tui hmel tak pawh ka hmu.



"I insêng țeuh dâwn a nih hi."



Min chhàn hmain ka nu chu an room ațangin a rawn chhuak a, min rawn hmuh chuan," Nu, hei hi ka țhian ka sawi Pc-a kha a nih hi, Pc, ka nu," tiin ka inhmel hriattìr a.



Ka nu chuan a be nghâl luam mai. Ka lâwm khawp, a lo be nêl duh chu ka lâwm hrim hrim, a duh loh zâwng tak a ni ang tih ka hlau asin.



"Lo awm r'u aw, țhenawmah hian ka'n kal lawk ang e. Bawihte, ei tùrte kha siam la, i țhianpa kha a ril pawh a țâm ang," a ti a.



Țhenawm pitar hi a lo lêng ve peih a; mahse, túnlai tak hian a damsam bîk lo va, chu chu a tlawh dâwn tih ka hre mai.



"Ka ril a țâm tak tak a ni..." ka nu chhuah hnu chuan a ti sup a," Rawn lèn hma ka duh vàngin ka rawn hmanhmawh lutuk a," a ti leh a.



"A lum sia, thingpui aiin thei tui vawt lam i duh záwk em?" tiin ka zâwt phawt a.



"I tih tih a ni mai."



A țawng vak lo va, min en rùn reng zêl avàng chuan ka lai ru leh khawp mai, thil sawipui tùr a vâng si.



"Kan pahnih chauhin kan awm sia, min hlau em?"



A thil min zawh avàng chuan ka en vat a, a fiamthu a nih ka ring a; mahse, a nui miah lo.



"Ei mai mai teh," tiin cake chu a hnaih theih tùrin a lamah ka nawr phei a.



"Bialpa i nei em ka tih pawh kha min la chhâng miah lo," thu tak zet hian a ti leh.



Ka va sen nasa dâwn tak!






*ȚAWNG CHHUAH HMAIN NGAIHTUAH HMASAK A ȚHA KHAWP MAI, MI PAWI SAWIIN AN RILRU KAN TINA THEI SI A*








☆SUANGTUAHNA NEITU☆ - 4 By Dingdi Pachuau



#STAYSAFE

#STAYATHOME

#BESAFE






"Nei lo, ka hmu zo ve hleinem," nui chung hian ka ti ta tho. Bialpa la nei lo tih ziah hi  chu ka zak ve reng, kum 20 lai ka ni ve tawh a, hrisêl lo viau lo ila chuan ka nei ve tawh mahna!



"Engati maw?"



"Ka hmuh zawh loh miau chuan-"



"Ka bialnu ni rawh."



A fiamthu emaw tiin nui chung hian ka en vat a, a lo nui ve miah lo. Hmel thutak zet leh chiang zet hian min lo en reng niin, ka mit ka la sawn ta zàl zál mai.



Sawi tùr ka hre lo, min tilai kual vêl vek, en tùr/ melh ber tùr pawh min tihre lo hial mai!



Ka duh ru tih hi a hria a nih ngei ka ring tlat, ka awm dàn leh chêtziaah ka thup thiam tawp si lo, ani bialnu nei nual tawh chuan min hre thiam khawp ang le.



"Ka duh che a."



Min duh. Min duh a nih chu. Ka taksa khawilai maiah pawh hian ka marphu an awm vek ni hialin ka hria, an phu dut dut vek tlat! Chu achhapah ka thin lah a lo phu dup dup bawk, a hre pha hialin ka ring.



Ka mit sîrin a chê sawn tih ka hria, min rawn hnaih sauh tlat a ni. Chêt sawn tùr em ni? Min rawn hnaih zual zêl chuan ka awm dàn hi a hre chhuak dâwn chiang.



"OmOm-"



Kan mit a intâwk ta sar mai. Lâk sawn ka tum leh vat a nia; mahse, chuti maiin ka thei ta hauh lo. A tarmit vuah kâra a mit meng chuan min hîp bet ni maiin ka hria, melh sawn thei tawh miau hek lo i.



"Ka-"



"Ka duh che, nang pawhin ka duh che ang tho hian min duh ve tih ka hria," a rawn ti ta sap. Min rawn hnaih tawh lutuk a, kan hnâr pawh a insi lo chauh tawh!



Tawlh sawn ka tum a, ka che thei hauh lo. Min rawn hnaih lutuk tawh a, chêt sawn theih ngaihna pawh a awm tawh lo. A thil sawi chu a dik bawk si a, hnial ngaihna lah ka hre dèr lo bawk.



"Ka fâwp dâwn che."



Mipain min la fâwp ngai lo. Engtin nge ka lo awm ang? Lo maimichhîng ringawt mai ang, lo hnial tùrin a hun tawh lo, min fâwp tawh dâwn tho si.



Ka lo maimichhîng ta.



Muangchângin min rawn fâwp dè dé. Lo tih ve dàn tùr ka hre lo, ka lo dawh tawp a, ka che sawn hauh lo, ka maimichhîng tlat bawk.



A zei a niang, ka thinphu leh marphu zawng zawng an chàwl vek tlat! A hnu deuhah erawh ka thi dang mai dâwnin ka hria, thaw lovin ka awm rei lutuk a, boruak ka tlachham țan.



A tàwp ta. Ka la meng ngam chuang lo.



Ka bek tawn tawna a kut pahniha vuan chung chuan," OmOm, han meng teh," a ti ta sap a.



Ka meng ser ser a, nui hmel deuh hian min lo en tawh niin, chutianga a hmel ka hmuh veleh chuan a tam thei ang ber boruak chu ka hnâr chuan ka hîp nghâl kâwk a.



"I thaw a chham dâwn elo?!"



A va zahthlâk tak! Mipa ka la fâwp ngai lo tih a hre chhuak tawh chiang, a nuih a za ngawt ang chu!



"Mipa i fawh hmasak ber ka ni tiraw? Ni leh lo, mipa, fâwp hmasa bertu che ka ni tiraw?" a ti ta.



Thaw ham ham pah chuan," Um..." ka ti sap a, zah avàngin ka meng khup nghâl lap a.



"Mipa vànnei ber ka nih chiah hi!"



A hnulam kan boruak chu a zia ta deuh. Ka zahna chu a reh tak tak chuang lo nain min fiam lo va, a sawi chhuak lo bawk. Engtik hun pawha ka nu leh pa lo haw thei an nih vàngin ka bul hnaihah a țhu lo, ka ep chiah chair-ah a țhu thung.



Ka nu lo haw hnu rei vak lovah a haw  ve nghâl, a tlai ve deuh tawh bawk a, ka chelh lui lo.



A haw hnu chuan ka nu chuan," A fel hmel khawp kha maw, i țhian a ni meuh maw? A en dàn che kha chu țhian aia thûk deuh chu a ni," a ti a, a nui pah deuh a.



"Nu, engtin nge i hriat theih a?!"



Mak ka ti êm alawm. Kei pawhin min duh a ni tih nichin deuh lawk ațang chauh khân ka hre si a.



"I nu ka ni alawm."



Ka zak thar leh ta deuh.



"Nu, min duh tih a sawi a, kei pawhin ka duh ve tho bawk; mahse maw, nu, ka hrisêl lo sia, ka rilru a tinuam lo e," ka ti sap sap a.



Nia, ka hrisêl lo si a, bialpa han neih ve ringawt pawh chu ngam thei niin ka inhre lo, a tân phurrit mai ka ni dâwn asin.



"Bawihte, lunngai mah ta che, i dam chho zêl dâwn alawm. Theihtàwp kan chhuah zêl ang a, Pathian zârah i țha chho zêl ang, ngaihzawng neih hi khawvêl dàn a nia, a dik lohna a awm rêng rêng lo, i rilrua nuam lo i tihna kha paih bo vek rawh, hlim taka awm hi i phû a ni," a ti sap sap a.



Ka nu nèn hetiang kan han sawi dùn ta mai hi mak ka ti. Ngaihzawng lam phei chu ka la sawipui ngai lo hrim hrim, ka la nei ngai tlat lo va.



"Ngaihzâwng neih hi sual pawh a ni lo; amaherawhchu, awm sual erawh a  țha lo tawp, Pathian duh loh zâwng a ni. Nupui pasal neih hma chuan Pathian hriatpuia inngaihzàwn tùr a ni," a ti leh dap dap a.



Ka țhiante pawh ka la hrilh duh rih lo, mak min ti dâwn lutuk. Min rawn fiam ang a, hmuh phêt an rawn tum palh ang. Ka inpeih hunah chauh ka hrilh ang.



Zànah kan inkhâwm a, ka rilruah erawh thu sawitu thu sawi chu a lût lo khawp mai, Pc-a hlîr mai ka rilruah a awm nia, ka inthiam lo kher asin. Biak ina inkhâwm lai laia ani ngaihtuah daih chu...



Kan inkhâwmnaah phone ka keng lo va, ka haw room-a ka luh veleha ka han en chuan Pc-a missed call 4 lai a lo awm.



A inkhâwm lo a ni ngei ang.



Ka call back ta vat.



"Kan inkhâwm a, inah ka dah daih alawm," ka tih chuan," A nih ka ring deuh a, ka ring lo tho bawk a," a rawn ti.



"Eng chu maw i rin loh?"



"I inchhîr ang a, min hnar i tum leh ta a niang ka ti a."



Ka nui hak a.



"I ngaihtuahna mai mai a nih chu," ka tih chuan," Ni rêng e, ka ngaih a țha lo rêng alawm," a lo ti thung a.



"Inkhâwmnaah ka ken ngai loh vàng a nia, chutiang rilru ka pu lo," ka ti sap, ka pate'n ka țawng an hriat theih loh nân ka room kawngkhàr ka va khâr pah a.



"Rawn lèn ka duh a; mahse, a tlai tawh angreng sia, in inkhâwm rei vàng vek!"



A thil sawi dàn chuan ka nuih a tiza roh tak tak!



"Thu sawitu a hmanhmawh vak lo va," nui hak hak chung hian ka ti a.



"Inkhâwm ve ila chuan pàwr zetin 'Hmanhmawh rawh' ka lo ti ngei ngei ang, thu a sawi leh hunah ka inkhâwm ngai tawh lo bawk ang," a ti charh charh, a nui ve miah lo.



"Tihchi nâng," ka ti ve ringawt.



"A sawi rei êm a nih kha. Ka programme duanlâwk a titlawlh daih  zui!" a ti leh a.



"A lo lèn theih tho alawm," tiin fiamthu deuh pahin ka thlêm a.



"Min thlêm miah suh, ka lo lêng tak tak palh ang e!"



A thutak bawk sia, sawi tùr ka vàn.



"Hlauthâwng deuh chung siin ka ngaih a țha deuh tho bawk si, ka awm dàn hi, ka nuih a za zâwk! Hetiang hian ka la awm ngai hauh lo," a ti leh a.



"Eng nge i hlauhthàwn a?"



A thaw hawk a,"Ka hlauhthàwnna kha a reh ta deuh, ka be thei tawh che a," a ti leh lawi a, chutah," I inchhîr thei lo ang, i inchhîr lo tiraw?" a rawn ti leh daih a.



A sawi tum chu ka hre thiam deuhin ka hria. Amah ka duh lêt ve hi ka inchhìr leh inchhìr loh min zâwt niin ka hria.



"Ka inchhîr lo..."



"Inchhîr suh, inchhîr lo tùrin ka siam ang che."



A țawng dàn hi ruih nei a ang ka ti. A sehchilh lek lek țhìn tlat; mahse, a hlauhthawn chuan hetiang hian a țawng țhin a ni mahna le!



"Zanriah kîl laiin ka chhûngte bulah i chanchin ka sawi a."



E khai, a va zahthlâk dâwn ve!  A làwmawm viau a, a zahthlâk ka ti tho bawk.



"Engtin nge an tih?"



"An hmu châk che a, fb-a i pp kha ka hmuh tawp mai."



Ka chal ka dawm vang vang. A, a țha vek mai, ka thlalâk tho alawm an hmuh le.



"Kan inhmuh leh veleh thla kan lâk dun ngei chu a ngai a ni."



Ka nui hak hak a.



"Tehrêng mai."



"Rawn lèn nân a tlai tawh a, hmuh che ka duh țâlh bawk si, ka rawn video calĺ dâwn che aw," a la rawn ti!



Ka sam huih țha pah chuan," A țha alawm," ka ti ve mai a, tihlunghnùr ka duh bîk lo a ni.



A room-ah a awm ni ngei tùr a ni, a khum te, bathroom te leh bathlàr te chu min hmuhtîr dan dan a, a hmel a tihlan châng pawhin ruih nei hmel a pu miah lo.



Zîng ka thawha phone ka en chuan a message a lo awm leh vàng tawh. A tho tlai hran miah lo, heti a nih chuan a thatchhe miah lo ang. Zîng thawh hma hi țha ka ti viau nain ka tho hma  vak ngai lo thung.



Nilêng deuhthawin pangpâr ka buaipui a, chhùn chawlh laiin thu ho mai mai 'Hei, ka chàwl ve chiah' tih thu ringawt sawiin min rawn phone leh pek. A khawsazia hi a lawmawm ka ti reuh tlat, chimawmin nghal viau mah se tunah chuan ka bialpa a ni tlat tawh, chimawm dàn țhaah ka ngai mai.



Tlaiah țhianho kan group-ah kan nawi leh vak a, bialpa ka nei tih ka sawi chuan an reh hmak hlawm nia. A hnuah group video call-in kan inbe ta thung, ka hmel an hmu duh a lo ni.



An khêk chiam chiam hlawm lehnghâl a, min lawmpui ve dànah ka ngai mai. Min sawisa leh phawt a, a hnuah erawh nui sûng chungin min lawmpui thu an rawn sawi leh a, hmuh an châk thu an rawn sawi uar viau bawk.



Zànah a rawn lêng zauh zauh a, rei tak erawh a lêng ngai lo. Ka pate a zah ve vàng a nih ka ring deuh, anni pawhin țha takin an lo be ţhin. Ruih nei hmel a pu ngai lo va, a hmaa ka lo ringhlel ve deuh ringawt pawh kha ka tidik lo tih ka hria, ruih theih thil a ti hauh lo ang.



"Exam result engtikah nge a chhuah ang?" tiin ka zâwt a.



"A chhuak ve țêp tawh ang. E taka, naktûkah eng nge i tih dáwn?" tiin min zâwt a.



"Eng ka tih dâwn ka hre lo."



"Chuti chu lo lêng la? Lo lèn i bâ."



Teh thut chuan.



Nia, ka lèn ve a ngai ang, a nu pangpâr pawh min pêk a tum kha. Ka lèn hma leh ka nei hma a ni mai, tih tùr ka nei bawk si lo.



A tûkah chuan  amahin min rawn hruai a, ka va lêng ve ta. A nu leh pa an lo awm lo va, a nau mipa pakhat leh a pi an lo awm.



A pi chu pitar tawh tih takah, thil min lo zâwt chîk khawp mai a, kei pawhin ning hauh lovin ka chhâng zêl. Ka pite( ka nu leh pa lama mite) ka hrawn ve loh avàngin pitar putar hrawn hi ka châk ve viau țhin a ni.



An in kawt zâwl zau tak ka han hmu chu ka meng kâwk kâwk mai, a lo sawi uar lo zâwk a ni! Pangpâr chi hrang hrang pot hian a lo awh khat dul tak tak a! A țhen an pâr a, a țhen an rah bawk a, hmuh an nuam khawp mai, a mawi hlawm si.



"Eng ber hi nge i duh?"



"A vaiin."



Kan nui dùn hawk hawk mai.



"Ding rawh, thla ka lo lâk ang che."



Pangpâr chu a mawi hlawm si a, thla ka lâksak țeuh bawk. Engtikah nge hetianga  pangpâr mawi leh tam hi kan neih ve ang le? Tuna ka pangpâr buaipui ve kha chu Pc-a nu pangpâr lakah chuan eng mah lo mai a ni.



An in chhûng chu pâwn lam en aiin a nuam daih. Building ropui tak chu a ni hauh lo nain an chei nuam, a lang changkâng ru riau bawk. A faina chuan a tinuam ka ti a, ni êng leh boruak a lût țha bawk si, duhthusàm a ni ringawt.



A room-ah min hruai a, hei pawh a phone-a ka hmuh aiin a nuam zâwk. A zau nuam a, ka rin aiin a hnawk lo bawk!



"I lo kal dâwn avàngin ka tifai ve a," ka ngaihtuahna hria ni àwm tak hian a ti sap a.



"I che fel ve hrim hrim a nih dâwn hi ka lo ti mai asin," nui chung hian ka ti a.



A nui ve sak.



"Lal fanu lo lèn dâwn chuan tihfai ngei ngei a ngai alawm, lehkhabu rem fel țhat a ngai țhin a, lehkha ka zir ve phei chuan ka inchap darh nuai ziah," a ti a.



"Lehkhazir lai chuan a pawi lo," ka lo ti vat a.



Ka hma takah rawn dingin," Mahse, che țawp deuh ka ni miah lo a nia, ka têt lai ațang tawhin ka lehkhabu dahna hi thla tin vawi khat ka rem fel ziah," a ti leh a.



"I va ti țha ve!"



"Ka ti țha i tih tak tak chuan min han kuah teh," a ti zaih.



"I ti țha ka ti lutuk ringawt!" tiin ka kuah ve mai bawk a, thlah ka tum chuan nghet zetin min kuah.



"Kuah che ka duh rih!"



A thu chu ka âwih ve mai.



"Ka nu pangpâr rimtui ber ai pawhin i rimtui zâwk!"






*MI HUAISEN NI TÙR PAWH HIAN HNUNGTAWLH NGAIH CHÂNG A AWM ȚHIN, MI HUAISEN CHUAN Â TAKIN A HMAA HLAUHAWM A BAWH MAI NGAI LO*