☆PIALRÀLAH TAL☆ - 14 - 18 By Dingdi Pachuau

☆PIALRÀLAH TAL☆ - 14 By Dingdi Pachuau

"In va rei ve! I nu a țha lo deuh em ni?" Mama'n Sangkima hnêna a tih chuan rang zet hian," Aw, tlêmin a thaw a dik lo deuh a, a țha tawh e," ka lo ti a, Mama chu ka melh pah ralh a.

"A nih tak chu, ka ngaih a lo țha lo hman țhelh a."

Remlala hmuh loh tùrin Sangkima hnênah chuan," Sorry," hmui phun hian ka ti sap a.

*******

Remlala motor chuan Mamate huanah kan feh a, thlai vàn hun lai a ni a, thei lawh tùr pawh a vâng; mahse, dîlah sangha kan man a, nuam a ti kher mai.

"Thingtlânga awm hi a nuam daih zâwk dâwn a nih hi, nun dik tak a hriat theih ber bawk ang."

"Ni sa hnuaiah, loh theih loha hna thawh a țûl chuan a nuam fahran lo," Mama chuan a lo ti a.

"Fùr ruah sûr hnuaiah, thosi leh vangvat kârah pawh a nuam vak chuang lo," ka lo ti ve a.

"Chutiang hmunah i la thawh ve loh kha," Mama chuan a lo ti hmanhmawh a.

"Thawk lo ve; a hrehawm lai chu a tam viau ang a, a nuam lai pawh a awm ve tho bawk ang chu. Nun hi a hlim reng thei lo va, a hrehawm reng chuang hlei nem," sawi fuh inti tak hian ka lo ti a.

"Nun hi ka enjoy ve hman lo, buaina ka ngah lutuk a. Mapuii bula ka awm hian min zilh nasa a, tlêm chuan ka zia. Hei, kum thar ka rawn hmang pawh hi ka tân chuan theihnghilh phal rual loh, ka hriat reng tùr leh ka hlim ber hun a ni hial ang chu, hetiang tak hian nun hi a lo nuam thei ang tih pawh ka lo hre miah lo," Remlala chuan a ti vang vang a.

"Hei tak hi khawpui nun ka awh lohna țhin chu a ni, changkàn tumna leh intlànsiakna a nasa lutuk a, hei hian nasa takin nun a tichhia ka ti ve tlat, hlim taka hun hman hun a vâng ka ti," Mama chuan a lo ti a.

"A dik alawm, buai rêng rêngin hun kan hmang a, țhenawmte pawh kan inhre mumal tawh lo."

Ka pa leh Remlala chu inkàwm ngeih tak an ni, ka nu erawh a lo inrawlh tehchiam lo va; mahse, fel a ti lutuk tho.

A haw hma zàn, Nilai zàn chuan ka inkhâwmpui leh rih a. A hming an hre ve tawh bawk a, nulaho pawhin zah tak tho chuan an be ve bawrh bawrh tawh, a fel êm a, tu pawh kawm theihin a awm thiam a, an nêl ve phian hlawm a.

"Lo thawk leh rih la, June thlaah i bâng mai ang a?" haw kawnga kan kal lai chuan a ti a.

"Min thlêm suh."

"I tel lo chuan ka buai leh dâwn êm a ni, nang hian a brake hi i lo rap hman țhìn zâwk a, ka thaw leh hrâm țhìn alawm," a ti sap a.

"Ka țhian i ni a, ka khawngaih che a ni. 'Buai, buai' tih reng mai hi, nun dan tùr pawh a ni lo, i dam chhûngin hna hi i thawk zo dâwn lo. Chu vàngin, induat thiam leh indim thiam a ngai, i neih loh phah dâwn lo, i ei khawp chu i thawk chhuak dâwn tho tho," ka ti bawrh bawrh a.

"Nang hi chu aw!"

"Hetianga i awm reng chuan i bialnu nih tumahin an peih lo ang, a tân hun i nei thei dâwn tlat lo. Hun i insiam, i inpêk thiam ve a ngai," ka ti leh a.

"Bialpa i nei em?" a ti ta thut a.

"Aw, nei e," ka ti ve mai bawk.

"A nihlawh hle a nih chu, i lo hrilh dâwn nia." Kawng lam chauh chu a en ngar a.

"Ka hrilh hrim hrim ang, kei pawh ka nihlawh ve tho."

"Tu nge a nih tih tal min hrilh ve ka ring a nia?"

"I hria," ka ti phawt a, ka nui hak bawk a.

"Hria ila ka zâwt nâng che."

"Sangkima."

A ding dat a, min rawn en ta rûn mai.

"Eng nge?" tiin ka zâwt a, ani chuan a lu bu nghat pah hian," A țha alawm, a fel bawk a," a ti ringawt.

******

Remlala haw ațangin thla khat a lo ral ve ta. Ka phone khât deuh, a buai thei si a, lo biak ve chhén pawh a nuam lo, text erawh ka text zauh zauh.

Sangkima nèn pawh kan la ni tluang zêl, amah vàngin hun hlimawm tak ka hmang a, nuam pawh ka ti.  Kan inhmu zut thei lo erawh a rûkin hrehawm ka ti țhìn, khua hmunah awm reng mah ka ngai tho. A buai ve thei si a, ram lamah hna a thawh loh leh mi hnuaiah in sak leh eng eng emawah a inhlawh chhuak ziah. Ka khawngaih țhìn, ni tin hna thawkin a chhuak a, puih ve theih ka duh viau a, puih dàn tùr ka hre lo. Pawisa pe ila a la duh dâwn si lo, tlàwmah a la dâwn. A nu damdawi hi buaipui ta zâwk ila...

Zanriah kîl laiin ka pain," I țhianpa chu a ngaihawm vung vung roh, fel ka tihzâwng tak a nia," a ti chuar chuar a.

"Remlala maw? Pa, a fel roh asin, mipa fel tak a ni," ka lo ti ve a.

Ka nu chuan," Fel khawp mai, a hmel pawh a chhe lo alawm, nula lamah pawh  a tla na phian ang tiraw?" a lo ti ve a, chaw ei lai mah ni se ka nu thil sawi vàng chuan ka nui lo thei lo.

"A nuihzatthlák, hmeichhe tân hun a nei lo. Ngaihzâwng pawh a nei ngai lo, a buai lutuk a," ka ti a.

"A sawi deuh tak asin, eng ang takin nge a buai a?" ka pa chuan a ti leh a.

"Amah chauh hi a awm tawh a, fapa neihchhun niin a ute'n hmun dangah pasal an nei ve ve tawh sia, engkim a kutah awmin a buaipui vek. A nu leh pa an upa ve tawh bawk nèn, a buai hi a ni tawp mai."

Ka nu chuan," Nei tùr chuan thawha buai a ngai miau alawm le," a lo ti a, ka pa erawh chuan," Hmm, hlimna tak tak a tawng ve ngai dâwn lo a nih chu," a ti thung a.

"Engah ngawt maw? Pawisa thawk chhuakin a buai a, sum a neih chuan a țha a ni mai alawm. Tu pawh mai hi sum neih loh hlauin kan thawk chu a nih hi," ka nu chuan a lo ti leh a.

"A tâwk a awm alawm, nun hlimna hloh țhaka sum thawk chhuaka buai a awm alawm. Sum thawh chhuah loh tùr ka ti lo va, a àwm tâwk, hlim leh nuam ti taka thawh chhuah erawh a theih a ni, nun hlimna hloh miah lovin," a lo ti leh a.

"Nei tùr chuan thawhrim a ngai bawk si a ni."

"A, inhnial s'u. Ani pawh ka hrilh țhìn alawm, a inhmu chhuak ve hret hret tawh a nia," ka lo ti a.

Chaw ei khamah hmun ka tihfel zawh chuan ka pa chu thingpui ka siam a, ka pa bula TV thlîra ka țhut ve zawk hnuah ka room lam ka pan a.

Sangkima ka text a.

*Vawiin chu i hah em? A hahthlâk ngawt ang* tiin ka text a. Mi lo vâtah a inhlawh a, a chak avàngin an duh țhìn a, inhlawhna hi chu a hmu reng bawk.

*Hah lo ve, i text ka hmuh phei chuan hah hi eng nge tih pawh ka hrecgang tawh ngai lo* tiin min rawn reply.

Keimah : 😁😁😁 Tak tak emaw ka ti alawm.

Sangkima : Ka ti tak tak, ka chakna thahrui i nia.

Keimah : Energy booster maw?😃😃😃

Sangkima : Ka fiamthu lo. Ka chakna thahrui i ni. Nangmah vàng hian rilru hlim takin hna ka thawh theih phah țhìn.

Fiamthuah ka lâksak ta bîk lo. Chutiang thu ka hria chu nuam ka ti ve hranpa hrim hrim bawk.

*Ka lâwm e; mahse, fîmkhur viau rawh aw, i inhliam palh hlauh ang e* ka ti a.

Kan inbiak zawh chuan ka bank account ka check a, a lo la awm ve nual. Bâkah, fix-a ka dah kha a hmin țêp tawh a, a birthday lo thlen hunah eng emaw tha tak chu ka lei ve ngei ang, a birthday a la pelh loh hrâm ka beisei.

Mut dâwn tak takah ka text leh. Dik tak chuan chhùn lamah hna a thawk hah si a, zànah hma taka mu tùrin ka duh; mahse, biak ka duh zêl bawk si. A mut daih chuan ka khua a har.

A fel ka tih ém ém chhan chu a mu dâwn a nih pawhin min rawn mangțha thlap ziah, zîngah ni se message-in min rawn 'good morning' ziah bawk bawk. Min ngaihtuahin min ngaihsak a ni tih a lantîr hmasa ziah mai hian amah ka duhna hi a tizual zêl a ni.

*Ka birthday chu July ni 2 a nia, nang aiin kum 3 leh thla 2 leh ni 5-in ka upa zâwk*

Deuh thlap thlap chuan. He pa hi mathematics a thiam ngawt ang a!

*I la mu nange?* tiin ka reply a.

*Tea lehkha ka zirpui lawk a, mu țêp*

Kha maw, Sangkima hi lehkha thiam a ni ngei ngei ang, tûnlaiah phei chuan middle school textbook pawh english vekin a inziak tawh a, Mizo tih loh chu. Chu vàngin, zirtîr tùr chuan thiam ve deuh hlek nih a ngai tawh.

*Eng subject nge a?* Ka dîlchhût mah mah.

*Mathematics a nia* a rawn ti leh vat.

*E, a nih chu. Zirpui leh rawh, ka be buai rei che* ka tih chuan ani lah chuan *A mu tawh dâwn a, ka hman chiah zâwk* a la rawn ti. Kan in-text rei leh phian, dik tak chuan ka ning thei thlâwt lo. Ho mai mai pawh sawi mah ila nuam ka ti tho tho.

*******

April/May a ni chho a, khaw lum dàn chu pui tak a ni. Ina awm mai maiin a lum a, hna thawhin a lum viau bawk. Khawi lai mai pawh chu a lum vêl vek maiin ka hria, fan ka on reng mai.

Ka nute chu chawlh laiin ka pa nèn an zin a, min hruai chu an tum ve nàngin ka peih loh thu ka hrilh. Sèrkàwna ka pite erawh zan khat riakin an rualin  ka tlawh ve a, min lo ngai der thiam khawp mai.

Aizâwl lamah pheiin Champhai lamah an chho leh bawk dâwn, Rihdîl kal an tum a, ka châk ve tho; mahse, Sangkimate nèn kal ka châk zâwk. Bâkah, ka nute awm loh laiin zànah kan inah lo lêng se, tlângnêl se ka duh.

Ka hlau chuang miah lo nain Neihi riakah ka sâwm ve. Zànah chuan Mama nèn an rawn lêng ta ngei a, mi mit hmuhah erawh chuan țhian rual inkàwm mai kan nih ka ring. A hnu deuhah erawh Neihi chuan min ringhlel a, mut hmunah min zâwt. Kan ni tih ka hrilh  chuan mak a ti lutuk a, min sik vak ringawt.

"I nute'n an hriat chuan an duh lo ngawt ang, kei pawhin ka duhpui hran lo che," a ti a.

"Mahse, keima'n ka duh alawm, ka hmangaih a."

"Ih, i hriat kha... an rethei bawk sia, mi pawhin mak an ti dâwn e," a ti leh a.

"I tiho êm mai a, rethei tih ringawt, kei pawhin engmah ka thawh chhuah loh hi, ani chuan a nu leh a nau a châwm thei asin. Ka nu leh pa hlawh neih vàng hian ka hausa bîk rêng rêng lo," ka lo ti tlat thung.

Kan khaw bul hnai tê, Pu Vungate ramah Sangkima chuan thlai hmun a nei ve a, a zau fahran lo; mahse, a kàng țha a, a hmun a lêng rei tawh bawk a, a țha viau ang an ti. Ni tinin a feh ziah țhìn. Thlâm a sà a, a buaipui ve nasa lutuk. Ka feh ve châk thei tawp, amah chauhin a thlo a, Mama nèn vawi khat chu an inlâwm. A zàu vak loh avàngin hlo pawh a thlo zo har lo, hnuhpui a thlawh hnu rei vak loah hnuhhrâm a la lehnghal vat. Hnim awm hlek kha a duh lo va, mi dang loah pawh a feh loh phah rêng. Kum dang zawng aiin ruah a rawn sûr hma angreng a, Bay of Bengal vêla cyclone vàngin ruah a rawn thleng tam. Chu chuan thlai a tițha a, Sangkima thlai pawh a țha reuh viau a ni àwm e.

June a lo inher meuh chuan ruah a rawn thleng nasa tawh. Chhùn lamah hi chuan khua a țha vur a, ni a sa thei khawp; mahse, tlai lamah ruah a rawn thleng deuh ziah

Inrinni a ni a, Sangkima chuan an lova feh ve tùrin min sâwm a, anțam leh fanghma ka zawh tâwk phur tùrin min ti, ka chhûngte ka hrilh chuan ka pa chuan," A, i hah lutuk ang, ruah a sûr duh si a," a lo ti a.

"A, pa, kal ve chhin ka châk asin, Mama pawh a kal ve dâwn tho va, min chhâwk țhen thei ang chu?" ka ti ve tlat, Mama hi a kal ve dâwn pawh ka hre lo, dâwt ka sawi ringawt.

"Chho i kal thei dâwn em ni?"

"Muangchângin ka kal ve mai ang chu."

Ka nu chuan," Kal rawh se, kut hnathawh hahthlâkzia leh thawhrim ngaihziate, thlantui luang zawih zawiha țan a ngaih thu kha a takin dâi ve chhin se a țha ang," a lo ti hlauh. Ka làwmzia mai chuh, lâwm tak ka ni.

Phûr zetin ka insiam a, chaw ei pawh ka siam vat. Ka phûr helhawlh vàng chuan chaw pawh ka ei tam thei lo, ka puar nghâl vek maiin ka hria.

Èm phurh tùr pakhat chu kan nei ve a, ka phur chhuak. Mi lah chuan min lo en duh lutuk, khawiah nge ka kal dâwn a, eng nge ka tih dâwn min zâwt zél.  Hna ka thawk ngai lo miau a, a àwm ve tho mai; mahse, hna thawh hi ka zir chhoh a ngai tih ka hre tawh a, Sangkima thawh ang hi thawhpui theih zêl ka duh.

Mama chu a lo tel ve miah lo. Kan pahnih chauhin kan ni a, an in luah hi khaw hmâwr a nih bawk vàngin tu mahin kan pahniha inzui chu min hmu hran lo bawk ang.

A hla lo, thlâm lah chu a lo nuam reuh lutuk. A thawveng a, kan innghat phawt a, khaw lum lutuk vàng chuan ka thlan a tla zawih zawih bawk.

"I biang kha a tài vek a nia." A nih ka ring deuh rêng a, a sa ham ham tlat a ni.

"Ni sa ka tuar chuan hetiang hian a awm țhìn alawm, Nipui lai chuan," ka ti a.

"A mawi reuh lutuk."

Kan chawlh deuh vang vang hnuah  Fanghma lo tùr chuan kan chhuak a, thlai a țo țhain an lian ve tawh sia, an hmuhnawm ka ti. Dawnfawhte pawh a zâm ve dam dam tawh, a hnah ațang ringawt chuan hriat loh ka nei nual mai, ka zâwt pah zêl a, ani lah chuan dawhthei takin min hrilh zêl bawk a.

Fanghma chu a lo rah țha reuh khawp mai. Kan lo nual a, keiin a lawh sa ka lo phur zél. A rit duh reuh zêk lehnghal a, min phurh tamtîr duh lo, amahin a ipteah a ak țeuh. Chuti chung chuan kal a thei viau tho a, kei ve lah chu ka lum ang tih hlauin, a awih deuh hlek chuan ka kal sawn chak thei lo.

Fanghma kan lawh zawh hnu chuan thlâmah kan dah khawm a, thlan lah chu a far zawih zawih a ni ber. Chêt hlek chuan thlan a tla nghâl zêl si a, hmun âwih ațanga thlâm pan chhoh phei chuan, thlan vangin  thawmhnaw a huh deuh vek lo thei lo.

"I hah em? Ka khawngaih reuh che mang e!"

"A, min khawngaih suh, hetiang ka zir ve loh chuan engtin nge i hnathawh hrehawm tak ka hriat ve theih ang le? Thlan tla zawih zawih chung leh ni sa hnuaia hah taka hna i thawh dàn ka hriat phah alawm, hlo thlawh chu a hahthlâk viau lo pawh a ni maithei a; mahse, ni sa leh khaw lum hi tawrh a hrehawm ber a nih dâwn hi tiraw? Chuan, tlai lam deuhah chuan thosi a tam bawk ang a?" ka ti duah a.

"I va hre thei tak! Nang hi dàwi i thiam a ni lo maw?"

Nghawk salh pah chuan," Thiam e, ka dàwi che a, ka bialpa i nih tâk hi," ka ti a, a nuih a za hle a niang, a nui ta hawk hawk a.

"Dawithiam hmelțha zùnah ka lo uai a nih chiah chu."

"Ka dàwi belh zêl dâwn che, ka lak ațanga tâl chhuak miah lo tùr chein  aw niang?" ka ti chhunzawm zat a.

A hnu deuhah chuan,"I ril a țâm em? Chaw ei ang aw? Rama chaw ei hi a tui duh bîk a nia," a ti a.

"An sawi chu ka hre ve tawh. A châkawm khawp mai," ka lo ti vat a.

"Maian ka'n sik lawk ang e, chaw chu chhum sa ka keng țeuh a," tiin thlâm bul hnaih deuha maian zâm diah chu a sik a.

Keiin mei lo chhèm tumin ka lo bei nasa, maian a sih chhûng chuan mei buaipuiin hun  ka hmang, ka hlawhchham țhak thung.

"Eng nge i tih a?"

"Mei chhèm ka tum a, a alh kai thei lo va." Ka hmai a mang nasa ang, ka bei ve nasa ém asin.

Awlsam têin a chhêm alh mai a, maian hih chhûnga lo so tùrin bêlah tui ka chhuang.

"Hrehawm i ti em?"

"Ti lo ve; mahse, mei ka chhèm alh theih loh vàng khân min duh loh phah sawt ang em?" ka ti sap a.

"Ka duh telh telh che."

Chaw kan ei kham meuh chuan puar tak ka ni. Ka țhu hle hle, rama chaw ei chu a tui duh an lo tih kha a lo dik ngei a nih hi.

"Ka nuin lo hi a hmu ve châk lutuk a," a ti sup a.

"Kan paw thleng zak mai dâwn em niang? A kal thleng thei àwm si lo va," ka lo ti vat a.

"I hah lutuk palh ang, video-in ka la a, inah ka hmuh ve mai. A țhat deuh lai chuan a kal ve țhìn asin, lunghlui a tilêng a ti a niang e."

Lum viau mah se insi chêtin, thlãm namthlâkah  kan țhu a, thli pawhin rawn thâwt chu a tum chuan ka hria.

"I phone-a zai kha play la, thlifîm a lo thleng mai ang," ka ti a.

Mahse, hre chhuak leh thutin," Zâi zâwk mai sî teh, i zâi ngaihthlâk a châkawm," ka ti leh ta zâwk a, ka nghêng ar ar a.

"Min lo zàwm ve la?"

"Ka thiam chuan le," ka ti a, ka nui a.

Lêngzèm hla hlui lam a sa a, ka thiam ve hauh lo. Mizo hla, love song hlauh phei chu ka ngaihthla tam lo ve ém a ni.

Maimichhîngin ka ngaithla a, thlifîm pawh a rawn thleng țan. Music tel lova zai mah ni se, a thiam ka ti, a aw a mawi si.

Kimkima hla lamah a rawn pakai a, Sarah, i zùnzâm...tih hla a rawn sak chuan kei pawhin ka lo thiam ve nasa, ka lo zàwm ve vat a.

A hla hming ka hre ta chiah lo, a hla thu chu lo ngaithla chiang tùrin min ti a.

...Rosum leh pai ka nei lo...
Silhfèn manto ka nei lo;
Mahse, ka hmangaihna ka hlàn che... tih lam a ni, a tìrah chuan ka nuih a za deuh a; mahse, ngunthlûk leh tih takzeta a sak tâkah chuan ka khawngaih a, mittui tling țeuhin ka lo ngaithla a.

A sak zawhah chuan kan ngawi vang vang a, thlifîm lo thaw heuh heuh chuan  kan inkâr boruak eng emaw riau chu chhèm daih a tum ni hian ka hria a.

"Ka hmangaih che."

"Kei pawhin tih takzetin ka hmangaih che." Khaw lum ni sa êm êm hnuaiah chuan kan inhmangaihna thu chu kan thlung nghet sauh sauh a.

In ka thleng chu ka pate chu an lo lâwm thiam khawp mai a, kei pawh ka lâwm tho. A chhan chu ka hmangaih êm êm nèna kan lawhho kha a ni a, bâkah, a thar chhuah liau liau a ni bawk si.

Zanriah kan kîl lai chuan ka nu chuan," Sangkima nèn hian in inzui deuh a ni lo maw?" a rawn ti ta.

Ka en vat a, engah mah ngai lo ni àwm tak hian," Engah ngawt maw?" ka ti sap a.

"Vawiinah in pahnih chauhin in kal a, bâkah, mi sawi deuh sep ka hria a ni."

Mi hmuh loh tùr leh sawi loh tùr berin kan inthup ve asin, thingtlâng hi zawng, insawi hi kan peih a nia.

"Aw, an inkàwm ve a, nula leh tlangvâl ni ta chu, an lo sawi ve a niang chu," ka pa chuan a lo ti a.

"Chutiang a ni lo, in inkârah eng mah awmtîr suh ang che. Hei, lehkha i la zir leh rih dâwn lehnghâl a, i zirlai tibuai theitu tùr che insiam hauh suh."

Ka țawng ta lo.

☆HMANGAIHNA DIK TAK KAWNG CHU A BUMBOH ȚHÌN, A TLUANG PURH NGAI LO☆

☆PIALRÀLAH TAL☆ - 15 By Dingdi Pachuau

Ka nuin kan chungchâng a hriat thawi tâkah chuan hmu tùra kal chhuah ka ngam ta rih lo. Ka be thei a, ka text thei bawk a, a pawi chuang lo. Boruak hi han reh deuh phawt se, lungmuang takin kan inhmu leh thei ang chu.

Kan induh tih hi hrilh ka duh deuh thut thut nain a la hun lo deuhin ka hria a, bâkah, B.Ed training tùra ka tlin hlauh chuan kan inhmu harsa tawh dâwn a, boruak pawh a reh thuai mai ang. Kei pawh ka nu leh pa ngaihtuah nih ka duh lo va, ngaihzâwng lamah phei chuan an duh loh tak neih ka duh bîk lo. Ka nuin Mala a duh loh thu a sawi pawh khân ka rilru ka siam ve nasa a nih kha, tunah hi chuan Sangkima a duh loh thu pawh a sawi lo va, lehkha ka la zir leh rih dâwn vàngin ngaihzâwng ka neih a duh rih lo niah ka ngai. Ka nu sawi hi a dik lo miah lo, zirlai nih chuan kan zirlai aia rilru pêk theih zâwk tùr neih hi a fuh lo va, ka bialpa hmasate zînga pakhat pawh kha ka țhen khân ka tuar ve ém kha. Ka nu hian min  ngaihtuah vàng chiah chiah a ni, min hmangaihin ka hmakhua min ngaihsak vàng a ni zâwk.

B.Ed admission form chu la chhuakin Lungleiah ka kal a, last date chu ni 21 June a lo ni a. Hun a la tam tho avàngin Sangkima birthday present tùr ka en kual pah a, hmel hriat hmuh tùr an vâng kher mai.

A mamawh ber ka hriat loh vàngin phone ka tum deuh thut thut a; mahse, surprise gift-ah ka duh bawk si. Mipa mamawh tùr  ka ngaihtuah kual ta vak a.

Tàwnzau, kekawrte, mawza, necktie, belt, gel. Bâkah, T-shirt mawi tâwk tak leisak ka duh bawk.

Ka rilru a inkhâp nasa. Lei tùr ber ka hriat loh avàngin a vâiin ka lei ta vek ringawt a, sèn pawh ka insêng ve nual; mahse, ani tân te chuan, neih zawng zawng pawh ka ui thei nâng.

Y.M.A Day pawh kan khuaah ngei ka hmang ve ta. Ni danga phone ațanga lo thlîr ve țhìn khân tunah chuan a takin, infiam hlimnaah pawh ka tel ve ta. Ka zei fahran lo nain nuam ka ti, ka țang viau bawk. Chawhma lam zawng ni a sa țha a, chawhnu lamah Football kan khelh laiin ruah a rawn sûr thung a, a nuam phian.  Ka tlu reng mai a, min lo nuih dur dur; mahse, ka zak vak chuang lo.

Zànah erawh ka lu a na leh. Damdawi ka ei a, ni sa leh ruah sûr do hi ka taksa hian a la zo ve rih lo a ni, ka taksa hi a la in-adjust ve thei rih lo a ni ang.

A birthday zàna pêk tùrin Mama room-ah a thil tùr ka leisak chu ka dah rih a, ani lah chuan a lo en châk nasa.

"Eng thil nge a?"

"I hriat loh thil."

"Ka en dâwn," a tih chuan rang zet hian," A ngai lo," ka lo ti vat a.

"Ka hmu châk alawm le!" a ti nang nang a.

"Sangkima birthday gift tùr a nih kha."

"E! A va tam ve! A țhian ka ni ve tho sia, min pe ve la?"

"I bialnu inpêktîr ve rawh," ka tih chuan rum zet hian min melh a.

*******

A birthday zànah chuan chhuanlam siamin Mamate inah ka lêng a, Mama room hi in hnuai a nih vàngin a ualau vak lo va, Sangkima a rawn kal dâwn a ni. An ina han kalchilh ka duh viau nain mi mitmei ka vêng tawh, ka nute'n an hriat loh ka duh a ni ber mai.

Cake manto vak lo ka order chu vawiinah kan vêng sumo driver ka chah a, tichhe miah lovin a lo hàwn thei a, zanin chu a hlim thei ang bera hmanpui ka duh a ni.

Mama nèn an lo lût a, lo nuih var varin," Happy Birthday," ka lo ti vat a, a nghâwngah ka kuah vang vang a.

"Ka lâwm e."

"Min kuah ve tho la?"

Mama chu ka hmuh kân char char, rei tak ka awm hman dâwn si lo. Ka tih tùr hi tih thuai thuai ka duh.

Birthday hla chu ring lo têin kan sà a, Mama chuan a phone-in thla a lo la zêl. Cake a zai a, min barh a, keiin ka barh bawk a, Mama pawh a barh bawk.

Ka thil leisak ka pêk chuan hlim hmel tak hian," Ka lâwm e," a ti mai a, ' A ngai lo asin, i insêng tam ngawt lo maw?' pawh a ti chuang lo. Lungawi takin a han en kual a, min enin a nui leh var var a, a hlim a, a lungawi a, a tâwk ka ti.

Mama pawhin kekawrbùl a pe ve a, a hnu deuhah chuan min chhuahsan ta daih, he pa hi chu a bengvâr ve tlat.

"Làwmthu ka hrilh nawn leh che, birthday cake vàng te, gift leh min hmangaih vàng hian ka lâwm a ni."

Kan inkuah a, kan infâwp a, thâwm ring erawh kan siam ngam lo. Kan phun ser ser a, kan inhre tawn thei a, a tâwk viau. A romantic daih zâwk ka ti bawk.

'Perfect' hla chu play-in lâm tùrin min sâwm a, makti tak hian ka en chho a, a làm ngai ka ring lo hrim hrim a ni.

"May I have this dance, please?"

He pa hi! Ka tho zawt.

Làm pawh a lo thiam, ka rin loh lam daih a ni.

"Zanin hi ka dam chhûng chuan ka theihnghilh thei tawh ngai lo ang, ka hmangaih che, Mapui. Ka hmangaih lutuk che, Lalremtluang," a ti sup sup a.

"Lawmsangkim, kei pawhin ka hmangaih ngawih ngawih che."

Kan inning lo, kan inthlâkhlelh vàng erawh chuan hunin min nghâk chuang lo, a liam zêl. Dâr 9 a ri hnai tawh, ning lovin a bula awm duh viau mah ila nupa kan nih miau loh avàng leh mi room-a kan awm avàngin kan haw a ngai.

"Haw tawh ila?"

"Kan inah ka hruai haw ve daih dâwn che emaw ni le?"

Min thlâkhlelh vànga sawi a nih vàngin ka lâwm, nuih sak pahin," Ka zui haw daih châk che," ka ti lêt ve a.

Mama ka call a, a rawn luh chuan," E, in inhnê tawh deuh em ni? Nge, naute in siam peih tawh lo zâwk?" a rawn ti a.

Chu thu zet chuan min tizak, ka sen țâwn țâwnin ka ring.

"Țawng duhdah viau lo teh, a haw a ngai tawh a nia," Sangkima chuan a lo ti vat a.

"A ho e, nula tlangvâl induh tawn ve ve, hun fâl nei bawk si chuan chutiang bâk an ngaihtuah ngai em ni?" a la ti ta deuh deuh.

"Chutiang chu i bialnu nèn hun fâl in neihin i  lo ngaihtuah ziah a ni maw?" ka lo ti a.

"Ngaihtuah mai zêl e, mipa ka ni alawm."

Mut hmunah chuan Mama thu sawi chu ka ngaihtuah a, Sangkima khân a rilru chhûngrilah a ngaihtuah ve tho ang em? Mipa a ni ve tho sia, kei hian ka hriat miah si loh hian ka lo thlêm reng em le? Mipa leh hmeichhia chu kan inang si lo va.

B.Ed chu training thei tùrin ka tling ve ta. Seat 50 chauh awmah, mi za chuang interview zîngah ka tling ve thei a nia, ka lâwm khawp mai. Sangkima pawhin min lawmpui khawp, August thla ațangin kan țan dâwn, ka hlim viau rualin ka peih lo kher mai.

Ka pite inah ka awm dâwn, kâr tàwpah ka duh phawt chuan ka haw ziah thei ang tiin ka pain min hrilh. Ka pa hi chuan min duat a nia, scooty leisak min tiam nghâl, kâr tàwpa ka haw chhohna tùr. Ka nu chuan kâr tawpa haw chhoh ziah chu țûl lo a ti dâwn sa, ani hi chu mahni duty-na hmuna nghet churh chi a nia.

Ka kal dâwn zànah chuan ka țhiante leh chhûngte chu min rawn thlah tùrin an rawn kal liam liam a, Neihi te chhûng, Pa Lalate nupa leh ka nuin unau anga a ente chhûng nèn, kan ri laih laih mai.

Mama, Sangkima leh Neihi nèn ei tùr kan siam a, mi dang hmuh leh hriatah chuan Sangkima ka biak dàn leh en dàn chu a pângngai thei ang berin ka tilang hrâm hrâm; mahse, ka ngai dâwn lutuk a ni. Khua hmunah kan awm chung pawhin ka ngai a a nia, hmun dang daihah ka awmsan dâwn si a, ka huphurhin ka ngai lâwk êm êm a ni.

Ka chhûngte lah chuan min fiam a," I han training ang a, i training-puite zînga tu emaw ber nen hian in inkutsuih rup ang tih chu a hlauhawm angreng," an ti a, a țhen lahin," Pawi lo, pasal neih a hun ve tawh tho alawm," an lo ti bawk a, za lo zet zetin ka nui ringawt.

Ka pa chuan," Ani hi zawng, mal khalh a ni tawh bawk a, a nei har deuh ang. A neih thuai ka phal dâwn lo, a ute lahin min rawn tlawh thei tawh mang si lo va, ani hi chu kan zuah rei deuh tawh ang," a lo ti a, an nui dar dar a.

"A chî tùr a nih hi," Mama chuan a lo ti khanglâng a, rum zetin ka melh. Sangkima erawh ka melh vak ngam lo, ka nuin min lo mitmei rengin ka ring a, a rinhlelh loh tùr berin ka awm.

Hun fâl a neih theih tawh si loh a, mut hnuah kan inbe ta char char mai. Zàwi tê têin kan țawng a, chhûngte pawhin an hre pha lo tawp ang.

Kan inbiak rei deuh hnuah chuan,"Ka ngai dâwn lutuk che," ka ti leh a, ka hnuk a ulh deuh bawk a.

"Kei pawhin ka ngai khawp ang che; mahse, kâr tàwpah i rawn haw thei dâwn tho alawm, kan inhmu leh thuai dâwn a," a rawn ti a.

"Kâr tàwp chu a la hla ém mai. Nangmah ngaihtuah rengin hun ka hmang ang a, hmel hriat ka nei dâwn bawk si lo," ka ti leh a.

"Țhian thar i nei thuai mai ang, a thim zâwngin thlîr miah suh. Țha takin tih i tum ang chu, ka chhuang dâwn teh che a nia," a ti dam dap thung.

"Nula dang lo melh miah suh ang che," ka tih chuan a nui hawk a.

"Melh tùr pawh an awm emaw ni?" a ti vêl a, kei lah chuan rang zet hian," Irene-i'n ka awm loh chhûngin kherh lunglèn che a tum hrim hrim ang," ka ti leh ringawt a.

"Tum lo vang, nang ka nei tawh che alawm."

"A zei dâwn si, kei lahin ka rawn vil pha dâwn si lo che a," ka ti leh.

"Ka rin ang che hian min ring ve la?" a rawn ti ta daih.

Dár 2 vêlah kan inbe tàwp hrâm. Aniin min ngaihtuah a, keiin ka ngaihtuah bawk. Zîngah kan tho hma thei lo ang tih kan inhlauhpui a, kan ti tàwp ta tawp a ni. Zîngah sumo-a ka chuang min thlah tùrin ka duh a, ka duh lo bawk a, ka rilru a insual.

Zîngah ka pain sumo thleng min thlah a, a rûkin ka hawi ka hawi. A hnu deuhah Mama leh Sangkima rawn lang chu ka hmu, ka làwm hle rualin ka hmu har tawh dâwn tih ka ngaihtuah chhuak leh nghâl vat. Ka nguai leh rawih mai.

Mama chuan min rawn fiam bawrh bawrh a, min ngaih tùr thu sawi kûr luaiin a mittui a'n hru der vêl a, ka lunglèn tùr pawh a hnawt țiau vek.

Kan tlàn chhuah hma chuan kan inchibai a, Sangkima chu a țawng lo, min en vang vang ringawt. A kut pawh ka hmer rei ngam lo, mi an awm ve nual si a. Sumo-ah chuan ka lût a, kan tlân ta, vawi khat chu ka hawi lêt zawk; mahse, ka mit phe ruai vàngin eng mah chiang takin ka hmu tawh lo.

Kawng tluan chuan ka țawng lo. Ka bula țhu chu mikhual a lo ni hlauh a, biakna chhan tùr ka nei lo hlauh.

Ka pite un, Serkawn thleng min thlah a, ka píte chuan min lo làwm thiam khawp mai. Ka pu nèn min lo hmuak a, ka nutei erawh office a lo kal hman tawh thung.

Chaw ei hmain ka pa ka phone phawt a, kan thlen thu chu ka hrilh a. Sangkima phone ve ka duh viau a, a buai ka rin deuh vàngin ka ti lo. Chaw ei kham lamah ka room tùrah chuan ka indah lût a, ka thawmhnaw chu ka rem fel nghâl. Ka rem fel laklawh laiin Sangkima ka phone leh rih. Tukin khân kan inthlah dàn kha a mumal lo êm a, biak ka duh.

"Loah i kal em ni?"

"Kal lo ve, vawiin chu inah ka awm a," a tih chuan," Engati nge? I nu a zia em?" ka ti vat a.

"Aw, a țha e. Ka feh lo deuh mai mai alawm."

"Ka ngaih i tițha lo hman țhelh alawm le! Hei, ka thawmhnaw ka rem fel a, i buai ka rin deuh hlek avàngin ka rawn call duh lawk lo che a," ka ti a.

"I buai ka ring ve tho asin."

Kan inbe rei khawp, ka piin min koh avàngin ka be tàwp ta rih. Chhùn thingpui in tùrin min lo ko niin, ka la be tui asin le.

Chawhnuah ka nutei a lo bâng hma a, scooty en tùr chuan TVS lam panin kan chhuk deuh nghâl mai. Ani pawhin scooty chu a nei tho va, chinchâng a hre tawh khawp.

Hmeichhe tân chuan a vâr nalh ka tih vàngin a vâr kan la a, thil țûl zawng zawng vawi khata tih fel nghâl a theih loh vàngin naktûk lama kal leh tùrin min ti a, ka khalh chho ve nghâl mai bawk. Țhiante scooty ka khalhsak fo a, zir ka ngai tawh bîk lo.

Zànah rei tâwk Sangkima ka bia a, scooty chungchâng chu ka hrilh ve a, a pic pawh ka thawn ve bawk. Mawi a tih thu min hrilh ve a, ka thlan ber kher Wego phei chu nalh a tih ber thu a sawi, ka làwmna siam hi a thiam ve a nia.

"I khalh duh ang em?" tiin ka zâwt a.

"Duh tehrêng ang, i phal dâwn em ni? " a ti a, a nui hak hak a.

"Ka ta chu i ta a ni mai, kei tih lohah chuan khalh hmasa ber tùr alawm i nih."

"Ka khalh chiang ngawt ang," a ti phawt a, chutah," I awm lo chu kan khua hi a reh rawkin ka hria," a ti leh a.

"Lunglei tak hi, a reh țhuap mai. A ninawm," ka ti sap a.

"Ka ngai che a..."

A aw chhuak ngaihla zet chuan ka mittui a ko chhuak chiang kher mai. Ka țawng ve ngam ta rih lo, a țawng chu ka ngaithla a.

"...si a, Țhianpa lah chuan min rawn fiam zuk zuk a, heti khawp hian ka ngai ang che tih ka hre miah lo. Chuan, ka ngai che tih sawi pawh hi ka zak chuang lo," a ti leh a.

"Kei pawhin ka ngai che...alawm." Ka aw chhuak chu a pângngai thei tùr berin ka control a, ka hnâr ping up up erawh chuan a tidanglam lo thei lo.

"Mahse, kâr tàwpah i lo haw thei dâwn tho tiraw?"

"Aw, ka lo haw... ngei ngei ang."

"Ruah pawh sûr mah se?"

"Eng mahin... min dâl thei... lo ang," ka ti leh a. Ka ka hnuk a ulh avàngin ka țawng tluan parh thei lo, ani pawhin a hre ngei ang.

A tûkah chuan class chu ka țan ta ngei. Nuam ti lo tak ka ni, ka ngui a, nui luih ka tum ve ngial a, a harsa ka ti. Chawlh lai pawhin ruah a sùr loh avàngin thing buk hnuaiah keimah chauhin ka țhu a, ka phone ka khawih melh melh. Țhian thar siam ka peih lo, ka mamawh pawhin ka hre lo. Ka rilruah chuan kâr tàwpa ka haw hun tùr mawlh ka ngaihtuah.

*HMELȚHA  SÎNG KHAT, THINLUNG SUAL TAK AI CHUAN THINLUNG ȚHA MI PAKHAT A HLU ZÂWK*

☆PIALRÀLAH TAL☆ - 16 By Dingdi Pachuau

Kâr tàwpah chuan ka haw ziah, ruah a sûr a nih pawhin raincoat ka ha a, ka țhulh phah lo. Ka haw chhoh apiangin Sangkima nu ei tùr, a taksa tâna țha tùr leh Sangkima thil tùr eng emaw tak ka hawn ziah bawk. Thil ho tê nia ka ngaihah pawh a lâwm thiam a, hawnsak ka châk leh phah sauh zêl.

Ka nu chuan min ngaihtuah thei khawp mai a. Hmeichhia lehnghal, mahni chauha ka tlân țhìn chu a duh lo hle tih ka hria; mahse, min hau chuang lo. Ka zàwm dâwn chuang lo tih a hre ve tho a ni mahna. Ka pa erawh chuan min fuih sauh sauh, fîmkhur tùr erawh chuan min hrilh ngun thung.

Sangkima nèn chuan Mamate inah kan inhmu țhìn, a nu erawh mi hmuh laiin ka kan ve tho. Ka țhianpa nu a ni  ve tlat. Mama a tel ve ziah tho a, min sawina tùr an hre vak bîk lo ang.

Sunday tlaia kan awm lai chuan Tea chuan a u hnêna," À-u, ka school bag hi a chhe daih a nia," a tih ri chu ka hria a, Tea hi engmah ka la lei ve miah lo va, leisakna remchâng tak niin ka hria.

Sangkima chuan siamsak a tum a, a ahna hruia buckle awm kha a lo keh tawh niin, siam a har deuh hret ang.

"Tea, hriau lian leh pheikhawk ka țhuina țhin hrui kha lo la rawh."

A buckle chhia chu paihin hriau chu a țhui zawm a, lehlam pawh chu chutiang chiah chuan a ti leh a.

"Engtin nge i tih a?"

"A thar ka siamsak che maw le."

Tea lah chuan," A va mak êm êm! Țhuina a lang bawk si lo va," a ti chùl a.

"I u hian thiam loh ka nei hlei nem."

"Chuti, ka pheikhawk ka thâwl deuh a, min siamsak ve la?" ka lo ti a.

"Insole chhah deuh hlek lei la, a nih loh pawhin i pheikhawk chhûng hnunglama bel tùr ban lei rawh."

Mama chuan rang zet hian," A nih, ka pheikhawk tâwt saw min siam lensak teh," a lo ti a.

"A chhîp zai kaw mai rawh."

Ka nui nasa lutuk a, ka mittui a tla pùr mai. Mama lah chuan," I thiam vek lo tawp a nih chu, mahni in chhûngah hi chuan i insawi thei ve ngawt mai," a ti leh nghal zat a, kan nui zo leh vek.

Sangkima nu pawh a nui ve nasa. Ka țhiante pahnih hi chuan min tihlimin min tinui nasa thei, an bula awm hi a khamawm loh thlâwt.

Serkawna ka pite in ațang chuan chhuah lama building lian leh mawi zet hi chiang takin a lang thei a, a design chu a danglam bîk êm avàngin a hmuhnawm ka ti a, ka lunglèn zual chângin ka thlîr țhìn. Bathlàra an pangpâr pot hùn leh pangpâr pâr pawh chu ka hmu pha, a mawi hlawm ngawt ang.

Zanriah kîl hma si hian ka pute nèn bathlàra kan din lai chuan," Ka pu, saw building chu a mawi in ti ve em? A hmuhnawm ka ti thei lutuk a," ka ti a.

Ka pu chuan," Mawi e, architect design a nih saw. A neitupa ber Pu Thanghmingliana țhianpa, Brazil lam miin a design nghe nghe. A fuh reuh alawm, hetia en mai ai hian a chhûngah architect thiam tak design a ni tih a hriat lehzual. Nuam tak a ni; mahse..." a ti a, a ngawi ta vang vang a.

"Engtizia nge? A ei ru nasa em ni?" ka lo ti thuai a.

"Chutiang lam a ni lo."

"Ka hre châk a nia!"

Ka pi chuan," An nupain fa pakhat chauh an nei thei a, hmeichhia a ni lehnghâl a," tiin min lo chhâng a.

"Hmeichhia a nih vàng ngawtin eng nge thil pawi awm?" ka lo ti thung.

"A pasal tùra an duh chu nei lovin thingtlâng tlangvâl, fahrah lehnghâl chu pasal atán a ûm ta tlat a. A nu leh pate chuan an pawmpui thei lo, an fanu lahin chu thingtlâng tlangvâl chu a hmangaih tlat mai si a, a nu leh pa lahin an duh lo bur bawk  si, a nu leh pate kalsan mai chu a thlang ta zâwk a ni."

"Chuan?"

"Hausain in nei nalh viau mah se, an hlim chuang lo tihna a nih chu," ka pu chuan a lo ti a.

"In chu chhe tê pawh lo ni se, chhûngkua kan inhmangaih tlàn chuan a tâwk êm êm a ni. In țha leh mawiah hian hlimna hi a lo awm bîk lo va, a nei țha țha leh a nei ropui apiangte hi tûnlaiah chuan an hlim lo tawh zâwk emaw tih mai tùr a ni," ka pi chuan a lo ti leh a.

"Kan in pawh hi țha lua lo mah se, i pi leh i nutei nèn hian kan hlim tâwk ve a. Kan neih tâwkah hian kan hlima kan lungawi tâwk chuan a țha a ni mai. Nangin min lo belh leh ta a, ka tu zînga kawppui la nei lo awmchhun i ni tawh a, nang pawh hian hausa tak kher pasal atân zawn a ngai lo a nih chu. Pathianah innghat hmak la, Ani chuan țha tak a pe mai ang che. I pi pawh hi ka țawngțai rah chhuah a nih hi," nui hak hak chung chuan ka pu chuan a ti a.

"A ni maw?! Chuti, zanin ațangin ka dîl ve dâwn?"

"Dìl tùr, dìl tlut tlut mai tùr. Kan mamawh hun hi Pathian hian a lo hre khawp mai a, mihring hi chu kan lo hmanhmawh țhìn mai mai alawm. A hun takah A pe ve mai ang che," ka pu chuan a ti leh a. Ka nutei'n min rawn koh tâkah chuan in chhûngah zanriah kîl tùr chuan kan lût ta dial a.

Ruah sùr hunpui a pèl a, favàng hun a lo inher chhuah chuan tlêm chuan ka lunglèn pawh a zia ve ta. Class ka kal chânga kawm tùr țhian pawh ka nei ve ta nual, kawm deuh bîk pakhat ka nei. Ani chu Venglaia mi a nia, an awmthei thawkhat. A chhan chu fùr lai khân car-in a rawn kal țhìn a, chu pawh a tâ a la ni zui. Kei aiin a upa hret ang; mahse, a chêr lo va, a khal khat tlat thung. Kei ka khal fahran lo va, a khal dàn thurûk ka zâwt țhìn.

Assignment, project tih leh eng emaw emaw tih tùr kan nei ve reng mai a, hun âwl neih a har reuh lutuk tawh. Kâr tàwpa haw loh ka duh si lo va, a rûk hian ka buai thei map map a nia.

Project kan neih chuan Remlala hi ka va zâwt a, ka va tibuai ziah. A hman loh țhin ém avàng erawh chuan ka inthlahrung țhìn a, ani erawh chuan a hma ang éma buai a nih tawh loh thuin min lo chhâng țhìn.

A chhan ka zawh chuan school kha mi dang kutah a dah ta rih a, dàwrah pawh rintlâk tak, a awm loh pawha lo buai char char tùr mi pahnih a la thar a, chuvàng chuan a âwl ve thei viau tawh tih a sawi.

"A va làwmawm ve! I thawh ve kher ngai lo khân sum i la lût thei a, mite tân malsàwmna a lo ni pah bawk nèn, tunah chuan bialnu pawh i nei thei tawh," tiin ka fiam a, ka fiam tak nain ka ti tak tak tho.

"Belhchiana hriat chian chawp leh ngai nula zawn pawh a huphurhawm."

"Sum mena meng an awm rualin țha tak tak an awm ve tho a nia aw,  i duh tak kha a pawimawh a ni mai," ka ti a.

"A dik alawm, nang ang hi zawn hmuh tùr awm se."

Ka nui hawk hawk a," E khai! Kei aia țha hlîr i hmu ang, thingtlâng nula ni lo, hmelțha leh pian nalh, fel bawk si i hmu țeuh ang, zawn kha peihin han uluk phawt la," ka ti a.

Ka birthday September ni 25 Inrinni chu a lo thleng ta reng mai. Vawiin phei chu ka haw thei dâwn lo. Assignment ka ngah lutuk, Sangkima pawh nizàn lamah ka haw theih loh tùr thu ka hrilh tawh, ani pawhin min lo hre thiam lutuk.

Ka phone ka'n en a, message thlum tak tak ka dawng nual, ka birthday min wish-na vek a ni. Sangkima pawhin kan pahniha thlalâk a status-ah hmangin duhsakna min hlàn a, ka chhiar pah chuan ka nui sak.

Ka pi nèn eirawng kan bâwl a, ka ngaihtuahnaah chuan vawiina ka birthday làwm thei lova asssignment ka ti tùr chu ka thin a rim tawp. Ka pa leh ka nu chuan min rawn call a, present pawh țha tak min pe tho; mahse, ka haw thei lo tùr leh Sangkima ka hmu thei lo tùr ber chu ka thin a rim.

Ka nutei a bazâr a, a rawn haw hnu rei lo teah chaw kan ei a, thlèng ka sil zo chiah tihah ka phone a rawn ri a.

Sangkima a lo ni a, hlim takin ka nui a; mahse, a reh leh vat. Ka ngui leh nghâl rawih.

"Heyy.."

"I awmna tak ka hre lo, minlo hruai la? Hospital bulah ka awm a."

He pa hi, a lo kal maw!! Eng nge a lo tih dâwn?!!

"I lo kal elo?"

Pâwnah ka tlân chhuak vat a, ka hawi kual nasa lutuk. A rawn kal hi ka ring thei lo! Chutih rual chuan min tihder ka ring phal bawk si lo. Hospital bul a ti maw? Ka tlân phei vat vat a, ring lo deuh si, hmuh inring tho si chuan ka hawi kual a, Hospital sîr kawngpuia a birthday zàna T-shirt ka pêk ngei hà khân a lo ding ràn mai chu ka hmu ta. A kawr hâk inhmehzia chu! Ka thinlung hi hlimna hian a rawn tuam hlawp hlawp a, ka phùrna leh hlimna chu ka thup thei lo, ka tlân phei vak a, ani pawh chuan chutia ka tlân chu min lo hmu, tu nge ka nih a hriat hma chuan mak a ti ve ngawt ang!

Ka kuah chawt a, miin min en em tih lam ka ngaihtuah hauh lo. Ani pawh chuan min kuah tho, vànneih asiamin a bulah motor a rawn din ve deuh nual avàngin min hmu tam lo hlauh ang.

"Ka hlimzia hi!! Khawvêlah ka hlim ber ang!"

Ka pite in lamah kai pheiin," I ril a țâm em? Chaw ei rawh aw, ka ring pha lo lutuk che! A mak a ni tawp!" ka ti mawlh mawlh a.

"I rawn haw theih loh tâkah chuan ka rawn pan tawp mai che, i birthday a ni si a."

En chho pahin ka nui sen sen a," Ka birthday-a ka la hlim ber țum a ni ngei ang, birthday gift țha ber i ni bawk," ka ti sap a.

"Hmuh che ka châk bâkah ka ngai bawk che a."

He pa min tihhlimzia hi, sawi dàn pawh ka thiam lo, chhûngril hi a hlim lutuk a ni ringawt mai. In lamah a buai a, ram lamah a buai bawk a. Buai chung chunga ka tân hun a rawn insiam hi, ka duh bur a ni tawp. Hei aia hlû ka tân a awm lo, thil hlu tak tak pawisaa lei theih dawn ai chuan a hun hlu tak min pe hi ka tân chuan a hlu ber.

Inah chuan ka hruai lût a, ka pi leh pu chuan min lo en hau mai. Țhian ka la hruai lût lo miau a, chutah, mipa a la ni zui a!

Ka pi chuan," Bawihte, kha khawilam țhian nge ni?" a lo ti a.

"Pi, ka țhianpa... Lawmsangkima a nih hi. Kan vênga mi a nia."

Chaw ei ka siam hmain artui kangin chawhmeh ka chhuang lum leh a, chumi chhûng chuan ka pite nèn chuan an lo inkàwm. Chaw a ei chhûng chuan a bulah țhuin ka țawng mawlh mawlh a, ka hlim lutuk hi ka ngawi thei lo a ni.

Ka nutei a lo chhuah hman tawh vàngin ka pi leh pu chu damdawi ka pe a, TV an en a.  Sangkima chu bathlàrah ka țhutpui rih a, nakinah ka room-ah ka hruai ve rêng rêng ang.

"I lo kal tih hi ka hmu reng chung che pawhin âwih a har ka la ti," ka ti leh a.

"Ka tân hian i pawimawh ém a ni."

"Ka lâwm e, i nuin engtin nge a tih? A phal lo deuh em?" tiin ka zâwt leh. A nu khân a fapa tân hian min duh vak lo kha a ni si a.

"Phal e, duhsakna a hlàn ve bawk che asin."

Ka lâwm, ka hlim takzet. A nu min duh theih kha ka duh a, tunah chuan min pawm ve tak tak tawh a ni ang.

"Ka lâwm tak tak a ni. Vawiin nilêngin ka bulah i awm ang tiraw?"

Nui sak chung hian," I tân ka rawn inpe chu a nih hi," a ti a, a biangsum lo lang kawlh chu ka en ràn a.

"I biangsum ang kha ka duh ve ngawt mai."

"Kha, nei rawh," tiin a biang chu a khawih a, a biang a khawih zawh chuan ka biang chu a rawn khawih leh a.

"I tâ a ni tawh e," a tih chuan hlim zet hian ka lo nui a.

"I fel e. Vawiin hi ka va hlim tak! En teh, ka rawn haw chho thei ang tih ka hlau deuh ta zâwk," te chu ka ti mai mai a.

Hlim takin kan titi a, a hnuah chuan ka room hmu ve rêng rêng se ka tih vàngin ka pi leh pute chu ka dîl phawt a, an remtih hnuah ka hruai lût chauh.

"Nula room tih a hriat hle mai."

Min faknaah ka ngai hmiah. Dawhkana ka lehkha chhawp hnawk deuh nuai erawh chu ka chhuang lo kher mai.

Ka hmaah tak rawn dingin," I birthday-ah hian thil manto tak pêk tùr che ka nei lo tih i hria; mahse, keimah leh ka hun hi ka pe che a ni. Ka hmangaih che a, ka hmangaih reng fo bawk ang che, ka thâwk tàwp thleng pawhin ka hmangaih fan ang che tih theihnghilh miah suh," a ti duah a.

Ka kuah vat a, a thil sawi chuan min tihlàwm rualin min tilungchhe pah tho. Kei pawhin ka hmangaih a, thil eng emaw pawisaa lei thil thil manto min pe lo mah se, ka tâna hlu ber 'Amah' leh 'A hun' min pe, hei hi a hlu ber.

"Kei pawhin ka hmangaih reng ang che."

Min fâwp a, kei pawhin rang zetin ka fâwp lét. Kan duhthawh a, kan inhmangaih tawnna tihnghehna leh tihlannaa ni bawk a, kan tàwp hlei thei lo.

A hnu daihah chuan," Le, i assignment chu en chhin ila?" a ti a, makti zet hian ka en hau a.

"Lo la la, ka lo en chhin ve ang e."

Eng mah sawi lo chuan ka note-a ka ziah chu ka hmuh a, a en vang vang a.

"Hei hi word eng zât vêla ziah tùr nge?"

Ka hrilh hnu chuan pen leh paper min dîl leh a, ka pêk hnu chuan," A dang kha lo en la, hei hi ka lo chhâng ve chhin ang e," a ti a, chair-ah chuan țhuin question chu a thlîr nawn leh rih a.

Kei pawh chu khuma țhuin ka assignment dang chu ka en a, ka chhàn thiam lohte chu google-ah ka en chhin a, answer awm sa chu ka chhiar zawr zawr a, ka hre thiam ve ta deuh e.

"Thingpui hâng in phawt rawh aw."

Thingpui chu ka va lâksak leh rih. Ka va luh leh pawh chuan dawhkanah chuan a lo la bûr ngar ngar mai. A thiam a ni ngei ang a... he pa hi mi chut tak a ni lo tawp a nih hi.

Nilêngin ka room-ah chuan assignment chu kan ziak a, kan inrâwn tawn bawk. Ka kut a kham lutuk a, ka chàwl rih. Ka chawlh chhûng chuan ka purse-a pawisa za nga chu ka phawrh zàl zál a, ka hûm khâwr țât a.

"I ziak zo dâwn tawh em?" tiin ka pan hnai a.

"Aw."

A kâwngah chuan hnunglam ațang chuan ka va kuah a, a hnungah chuan ka bei tlân a.

"Hetia awm hi a nuam tawp maw le!"

"Nuam i tih chuan lo  awm char char rawh, ka ziah zawh hma chu."

A  kawr hma ipte ka zensak a, pawisa chu ka dah ta zauh. Buai chung chungin, min hmu tùrin a rawn kal ve țàng țáng si a, a sènso kha rulh ka duh a ni. A tam lo tih chu ka hria, a hun hi pawisain ka thleng thei dâwn chuang lo tih hre mah ila, lawmthu ka sawina a ni mai.

Sumo chhuah hma chu ka pite in ațang chuan a chhuak lo. Dâr 2:30 rîk hma hretin scooty chuan sumo counter thleng ka zu thlah, an lo inpeih fel thlap lo deuh a, a zia deuh.

Mahniin ka chhoh leh chuan ka ngui deuh nain vawiin kan hun hman ka ngaihtuah lêt a, ka hlim leh thei deuh.

Tlai ka inbual dâwna ka dawhkana bâwm te reuh té lo awm khiau ka hmuh chuan mak ka ti kher mai. Tu ta nge ni ang? Ka pan hnai a, ka'n en kual a, a chhìn a inperh hawng euh lehnghâl a, ka phu zawk zui.

Gold țhi sîn mawi zet ka hmuh phei chuan mak ka ti lutuk! Ka la chhuak chhin a, a hnuaiah lehkha them a lo awm. Ka la chhuak a, ka tipharh a, ka chhiar a.

Honey,
           I birthday thil pêk, ka hmangaihzia che lantîr nân he țhi hi lo awrh rawh aw. I awrh apiangin ka hmangaihzia che i lo hre chhuak zêl dâwn nia.

Love,
Sangkima

Min tiphu zawk zawk reng mai a nih hi!

******

Sangkima assignment min tihsak kha miss-in țha a ti lutuk a, min fak khawp. Ka inthiam lo lehling zâwk a, Sangkima pawh ka hrilh nghe nghe.

Lehkha thiam tak a ni tih ka hre chhuak tawh. Ka hriat loh thil hi a la tam ngawt ang, zawh chhuah ngei ka tum tlat.

Hun ka neih veleh ka zâwt ta chiah rêng a, a tìrah chuan min hrilh nghâl mai lo. Ka zawh sek hnuah min hrilh ta chauh.

B.Com țha takin a zo. Class -xii  a zir laiin a pa a boral a, țha tak chuan a zo tho. Chhungkaw châwmtu ber a boral tâkah chuan regular-in class a kal thei dâwn si lo va, IGNOU-ah B.Com a zir, țha takin a pass. Class -xii a pass hnuah zirtîrtu hna thawkin a inhlawh ve țan; mahse, a pa boral ațangin a nu hrisèlna a tlachhia a, a nu hrisèlna a ngaipawimawh si a, a nu chuan khawpuia awm chu a nin avàngin a țhiante hnên ațangin Ralvawng chanchin a lo hria a, lo pèm a rawt tawp a ni àwm e.

"I va ngaihsànawm tak!"

"Ka lâwm e."

Ka duh hluah hluah. Thingthlâng tlangvâl ni mah se a mâwl lo, lehkha thiam a ni. A nu a hmangaih vàng chauhin a hna pawh a bànsan a ni a, kut hnathawh pawh hreh lovin a thawk ta hmiah hmiah a, ka ngaisang thlâwt e.

Ka haw leh zut tawh. Dik tak chuan ka awm dànah hian Sangkima ka duh tih hi ka thup tak tak thei lo, ka nu khân a remti rih lo deuh kha chu a ni a; mahse, a sawi leh tawh miah lo.

Ka pa erawh chuan min zilh pahin," Kan zahna tùr hian i awm lo ang tih ka hria a ni. Ka chhuang che a, ngaihzâwng i nei a nih pawhin mi i ang tihna a ni mai a, a țha; mahse, mi mit timìm zâwng hian awm loh tùr, hmingchhiatna tùr lakah invèn thiam bawk tùr. Thianghlim taka inngaihzàwn hi a pawi rêng rêng lo, i inchhîr miah lo ang," a ti a, ka pa thil sawi chu ka thinlungah ka vawng țha khiau.

Krismas kâr loah a lo thleng a, tunah chuan kan inkawp tih mi pawhin an hre fur tawhin ka ring; mahse, kan fîmkhur ve a, mi sawi theih tùr ang chuan kan awm bîk lo chuan ka hria. Ani pawh țhalaiah leh khawtlângah theihtàwpin a inhmang a, mi fak pawh a hlawh rêng, ka lo chhuang thei hle țhìn.

Hlim takin Krismas leh kum thar kan hmang zo a, a nu pawh a zia chho viau tawh e. Vitamin nghei lo tùrin ka ti a, a ei zawh hun tùr ka hriatpui ràn a, ka hawnsak zêl.

Lungleia ka chhuk dâwn zanah hun thâwl kan nei ve thei hrâm. Kan inhmangaih thu inhrilh nawn lehin thu kan intiam nawn leh bawk. Ka tân bialpa rintlâk tak a nih theih nân hna a lo thawk char char ang a, keiin lehkha ka zir char char thung ang.

Mutnaa ka ngaihtuah chu he pa hi ka pasal atân ka nei ngei ang, ka nu leh pate zahna tùr ka siam lo ang, thianghlim takin pasalah ka nei ang. A chhan chu pasal atãn ani tluka duh hi ka nei lo ang. Ka training zawhah hna ka zawng nghâl ang a, hlawh ka neih chuan a thawhrim lutuk a ngai tawh lo deuh ang a, chuan,.kan inneih hnuah chuan fate kan nei ang a... Chutiang hlîr ngaihtuah chuan hlim zetin ka muhìl ta a.

*MI ROPUI NIA INNGAI CHU A ȚAWNGKAIN A INTIROPUI ȚHÌN, A CHAKNA NEIHCHHUN A NIH MIAU AVÀNGIN*

☆PIALRÀLAH TAL☆ - 17 By Dingdi Pachuau

Ka training-pui mipa pakhat leh kan sir pakhat hian min biak teh hi an tum țhìn a; mahse, ka ûksàk ngai lo. Ka thinrim khumin ka be lo ngai chuang lo, țha takin ka bia a, min beisei theih tùr àwm erawh chuan ka awm lo thung. Hmeichhia hian kan hawi deuh a nih loh chuan mipa pángngai hian a pâwng a pui hian min ngam nghâl bîk lo tih ka hre ve kar.

Mahse, min lo beiseitute hi ka dem miah lo. A chhan chu ka hmêl hi ka lêrh hmel tlat a ni. A tìra min kàwm lo, a hnu daiha min kàwm leh sîte pawh hian ka bula an sawi fo chu 'I lêrh hmel ka tia; mahse, a lo ni hauh si lo' tih a ni fo. Ka lêrh hran lo va, mi ni chut chut erawh ka ni lo.

Kan sir chuan min duhsak thei khawp mai a, a fel êm êm; mahse, nuam ka ti lo. Ka țhiannu kawm ve deuh ber Mimi chuan min fiam leh zauh țhìn a, za lo zet zetin ka nui ringawt.

Zirtàwpni a lo thleng a, kan sir J-a chuan class-a ka lût tùr chu min ko ding a," In vêngah kan kal dâwn asin, i haw dâwn em?" a ti a.

"Eng nge in lo tih dâwn a?"

"Țhalaiin kan tlawh dâwn che u a."

"E, ka hre leh si e. In va tițha dâwn ve!" Chutiang bâk chuan chhàn dàn  ka hre lo.

"I haw ve ngei a ngai ang, in inah rawn thlen ka tum nghe nghe a," a ti leh a.

"Thleng ang chu le, in kan nei zau alawm," ka ti a.

Haw chu ka peih lo kher mai; mahse, haw loh ringawt chi a ni lo, Sangkima hmuh ka châk bâkah hetah tih tùr lian tham lah ka nei lo, assignment kan nei lo.

Tlaiah ka haw chho, a chhan chu an lo thlen hun lai vêla awm a țha ka ti. Kan sir a ni si a, lo biak țhat kha ka tih tùr a ni, kan vênga lo kal tùr a ni dâwn si a.

Inrinni chawhnuah dâr 1-ah an lo thleng a, member 30 chuang lai an lo kal, kan buai ve reuh lutuk.

Sir J-a chu kan ina rawn thlen tum a ni hrim hrim a, amah chauh kan thleng.

Lehkha zir sâng a ni bawk a, a fel khawp mai. A țawng bawrh bawrh a, kei pawh kan in a nih vàng leh a inthlahrun ka hlauh vàngin ka țawng ve bawrh bawrh, nuam lo a ti ang tih ka hlau a; mahse, min duh ru ve reng tih ka hriat miau avàng chuan chutiang zâwng leh a beisei tùr ang zâwngin ka awm lo thung.

Sangkima nèn pawh kan inhmu țha hman lo, ani pawh a buai, kei pawh ka buai ve bawk, kan innuih hman țâwk a ni mai. Mikhual nula erawh a țhutpui zing riau ka ti; mahse, kei pawh sir J-a'n min zui tlut tlut tho alawm le.

Sunday zàn inkhâwm bànah an haw a, ka thaw a veng deuh huai. A tlai deuh tawh tho nain Mama room-ah kan inhmu fâl leh a, ka thîkthu chu ka'n tichhe lui ve a.

Ani lah chuan," Țhutpui tih mai mai, ka thinlung kawltu i ni alawm," a lo ti mai a.

"Min melh țhat duh loh ém kha, mikhual nula bulah chuan i khi sâng reng thung a," ka ti leh a.

"Ka nuih reng che kha."

"Min en țha duh lo."

"I thîkthu i pêk chhiat der hian i sexy sawtin ka hria!"

"Hey, pehhêl tum lo teh," ka ti hlar a.

Zawi muang hian ka hmaah tak chuan a rawn ding a," Ka hmangaih che, ka laka thîkthu i tichhia pawh hi min duh vàng tih ka hria a, ka lâwm êm êm a ni. I tân hian ka rinawm a, ka rinawm reng bawk ang, a chhan chu ka thinlung hi i tân chauh hawn a ni si a," a ti dap dap a, ka kut chu la kângin a âwm zâwnah chuan a nghat a.

"Ka thinphû chu i hria em? Nangmah vàng chauha phû a ni. I tâ chauh ka ni a, nang pawh ka tâ i ni. Hmalam hun hi ka ngaihtuah ve vak lo, tûn hun zêl hi a pawimawh ka ti a, ka tûn hun hman zêlah hian a pawimawh ber chu nangmah i ni. Nula dang chu ka hmu, ka melh ve tho; nang ang hi khawvêlah ka tân tu mah an awm lo,"a ti leh a.

Kan inpawm a, kan infâwp vawng vawng. Mak ka tih țhin chu ka bulah hian mipa dang hming hi a sawi ri khât a, thîk ang pawhin a awm ngai lo. Sir J-a pawh kha a thîk ve deuh ka ring a nia, a sawi lang chhin eih lo. Min ring tâwk lutuk nge pawh ka hre thiam lo, ka chunga lungawi loh der pawh hi a tum chhin ngai lo.

In ka haw chuan ka nu leh pa chu an lo la meng a, ka pa chuan," Zanin chu bei tlai ve!" tiin min lo fiam zauh a.

"Mama maw le, an ina peng tùrin min ti tlat a." Ka chhuanlam siam chu leh!

"Mi sawi kai hi a awl a nia, fîmkhur tùr aw."

Ka nu chuan engmah a lo sawi ve lo. An pahnihin an lo sawi dùn hrep tawh zâwk pawh a ni maithei.

"Pa, in mualphona leh in hming tichhe tùr zâwngin ka awm ngai miah lo ang."

A nui a, a lu bu nghatin," Ka ring che alawm, Bawihte. Mu tawh rawh, naktûkah chhuk i ngaih kha, i men rei chuan i chau lutuk palh ang," a ti a.

Mut hmunah chuan Sangkima ka text; mahse, ka text rei lo. Kan inkâr a fel a, mut tui nâna inmangțha deuh zawng kha a ni mai.

Hun kal chakzia hi. Kâr tawp pawh kâr loah a lo thleng ve leh thuai; mahse, Sangkima a zin a, haw ka peih lo. Eng nge a zin chhan ka zawh lah chuan inhlawhna a zawng niin a sawi, a sawi țha duh vak lo.

Ka haw châk chhan ber a awm loh avàng chuan ka haw peih ta lo, ka pa chuan mak a ti khawp mai a, kei chuan assignment ka ngah thu ka chhuanlam ringawt.

Ka text min reply har khawp mai a, phone call lah a chhâng thei dêr lo. A mak ka ti deuh hlek a, a awmnaah signal a chhe hle a ni ngei ang, a nih loh pawhin a buai hle a ni ang. A, ka nghâkhlel lutuk a ni, harsatna eng emaw tak a nei tih a hriat reng alawm.

Ka ngaih a țha lo hma ve deuh bawk a, Mama ka tibuai sek. Ani chuan a zinnaah signal a chhia tih a sawi a, chu chuan min tingaihțha ta deuh; mahse, chu pawh ni se, Mama'n signal a chhia tih a hre bîk a, keiin ka hre ve lo va!

Class lâk laiin a rawn call ta, dawhkàn chunga ka dah lai tak a ni a, silent-a ka dah avàngin ri chhuak lo mah se, a lo êng chu ka hmu fuh ta hlauh, ka vànnei tawp; mahse, chhàn ngei ka duh si a, signal țhatna hmun ațangin min rawn call hrâm hrâm tihna a ni ngei dâwn si a, ka chhàn ngei a ngai.

Miss chu phone call chhàn ka dîl a, a lo phal ve mai bawk. Ka tlân chhuak ta vat a, kan room piah chiaha carrom board dahna room-ah chuan lûtin ka chhâng ta.

"I phone call ka nghah reizia hi, i dam țha em?" ka ti nghâl vat a.

"Aw, țha e. A pawi ka ti hle mai. Signal țhatna zawn a ngai a."

Thaw huai pahin," A pawi lo, min rawn bia a, tunah chuan ka rilru pawh a pângngai leh thei tawh ang. Hna thawh tùr chu i hmu tawh em?" ka ti a.

"Um...hmu e."

"Pawisa i ngah tawh àwm mang e! Min theihnghilh phah nân i hmang ang e aw, i inrem lo ngawt ang!"

A nui hak a, a nuih a za fahran lo tih ka hre thei tho.

"Nia, thawh tùr chu ka hmu nual a, ka thawk nual bawk. Ka buai  nèn, rilru pawh ka la siam fel chiah lo. Chuan, class i kal nange? I dam țha sî tiraw?"

Ka nui sak.

"Aw, dam țha. Class ațangin ka chhuak a, min rawn phone hma kha chuan ka rilru a dam țha lo va, tunah chuan a zia tawh e," ka ti a.

Rei tak biak châk mah ila, a hun a hlu lutuk. Ka paih ralsak țeuh thei lo, hna a thawh a ngai si a. Mahni hma sial takin ka be reng thei lo, a chhûngte châwmtu a ni si.

A zia ka ti tawh tho tho. Tunah chuan ngaihţhat lohna ka nei tawh lo, signal a chhia tih ka hria a, chuan, a buai bawk. Pawisa lo hàwn țeuh teh se.

Hna thawka khaw danga a zin vàngin kei pawh ka zirnaah chuan ka insâwrbing nasa a, țha taka ka tih chuan ani pawh lâwm ber tùr a ni tlat a ni. Kei ka lâwm rualin ka chhûngte an lâwm bawk ang.

Serkawn chu khaw lum a zia deuh. Kan training-na hmun Melte pawh a zia lutuk. Thing buk hnuaia țhut loh leh room chhûngah kan țhu a, thli a thaw nuam viau, khaw lum kan hre lutuk lo.

Kâr tàwp a zâwnin vawi thum ka hâw ta lo. Sangkima a awm lo va, ka hâw peih lo, ka pite làwmah a tlà a, anni hi chuan hâw lo tùrin min duh tih ka hria. Sangkima chu awm se ka hãw dâwn chiang si a.

March thla tàwp a ni a, Sangkima pawh a zin chhuak rei ve ta. Kei pawh ka hàw loh rei tawh avàng chuan hàw ve tawh ka duh, Sangkima awm rih lo mah se a pawi lo.

A reh ruaiin ka hria. Heti khawp hian ka awm loh khân reh niin a lo hre ve ngei àwm si a, a lo lunglèn dan tùr kha ka hre thiam ta ruak. Ka khawngaih hnuhnawh ta riau mai.

Inkhâwm bànah Neihi'n min ko vat a, kan in lam pana kan inzui lai chuan," Ih, thil an sawi i hre ve tawh em?" a ti a.

"Eng chu maw?"

"Ih, U Sangkima hi a zin rei tawh sia, a a hna thawhna khuaa mi nupui neih a tum an tia?"

Ka nuih sak a.

"Eng nge, i nuih ringawt? An sawi alawm," a ti leh a.

"Tuin nge sawi?"

"Miin maw le."

"An sawi mai mai a nih chu."

"Nia, kei pawh ka ring vak lo va. U Irene-i sawi a ni nghe nghe an ti, engtin nge a hriat ni? Thil a hre thei e ka ti," a ti leh bawrh bawrh a.

"Thil hre thei deuhte thil sawi hi zaah sawmnga pawh awih suh," ka ti a.

In chhûngah lûtin ka inthlâk a, ani pawh chuan rumpum chhumna tùr tui a lo chhuang ve nghâl a.

"U Irene-i chuan in ni tih a hre ve reng a, in inkâr tihchhiat a duh vàng niin ka ngai. Inringhlel tawn ula, ințhen ula, in nih loh veleh amahin nihpui a tum tih hriat reng, a fing phakar e tiraw?" a ti leh bawrh bawrh a.

"A, Sangkima hi a duh ve êm a, dem viau tùr pawh a ni chuang lo," ka lo ti thung a.

"A chhiat loh nèn, a lêrh deuh mah mah țhìn a. Mikhual tlangvâl a hre thei si. Kan khaw tlangvâlho pawh hian an hre chiang tawh a, ngaizâwng duhtu pawh a hmuh theih miah loh hi."

Ka nui ringawt.

Rumpum chu kan hâwp a, a thak tui bawk sia, thlan a tla hluam mai. Neihi pawh a ni ve tho, ani phei chuan kei aiin a la ti thak zui, a sî hluam hluam reng mai.

Thawhțanah ka chhuk thla leh a, Sangkima hmu lova hàw chu a ho tak zet. Nuam pawh ka ti lo, Irene-i fiamthu nuihzatthlâk zet ka han hria a, Mama pawh ka zawh ve chhin nghe nghe kha. Ani pawh chuan 'Dâwt mai mai a nih chu' a lo ti ve tho.

Remlala pawhin min rawn call ve zauh zauh. Kei lah hian assignment leh project kan neiha ka va zâwt tih lohah hi chuan ka va call khât sia, ka inthiam lo deuh hlek, ka chungah a fel tehlul nèn.

Mala erawh a reh ta vang vang mai. Ani hi chuan min lo duh tak tak lo a nih kha, min han biak țhat lai khân eng emaw awm deuh tùrah ka lo ngai ve ringawt a, ka lo beisei sâng deuh chu a ni.

Sangkima chu a reh rei ta riau mai. A buai hle a ni ang, bâkah, signal awmna kha min rawn biak dâwn chuan a pan zêl a ngai àwm si a, a lo hlat viau phei chuan...

Ni khat chu a message ka dawng ve nawlh mai, break lai kha chuan ka la dawng miah lo tih ka hria. Min rawn thawn hun chu zîng dâr 11: 30 a ni.

Phûr zetin ka chhiar zai zai a.

*Kan inhmu lo rei ta hle mai tiraw? I ngaihawm, ka ngai khawp mai che, i țawng barh barh kha ka ngaithla leh châk tawh- *

"Kei deuh hian asin ngai che ni. I hmel hmu thei lo mah ila ka thinlungah i awm reng, nangmah ngaihtuah lo hian ni khat pawh ka awm ngai lo," ka ti rilru mawlh mawlh a, ka chhiar leh a.

*He khawvéla rethei tùra ka lo piang chhuak hi hrehawm ka ti ngai miah lo, nang ka tawn hma che hi chuan. Ka tawng che a, retheihna hi ka hua, ka haw tak zet. He khawvêl ata hi paih bo vawng vawng ka duh-*

Rethei mah se, ka hmangaih asin. Ka hmangaih lutuk, sum hi hmangaihna aiin a ropui zâwk em ni? Hausakna hi ka tân chuan hmangaihna tel lo a nih phei chuan thil țha lo tak niah ka ngai asin.

Ka chhiar chhunzawm leh a.

*Nang ka duh vàng che hian Pathian hian ka chungah thil țha lo a thlentîr thei bîk lo ang; mahse, engtizia nge ka phû loh nia ka ngaih tâk tlat che? Nia, ka phû lo che. I tân hian ka tling tâwk lo. Kan dinhmun hi a inmil thlâwt lo a ni tiraw? Mahse, chûng chu engah mah ngai lovin nang pawhin min duh ve a nih kha, chu vang chuan ka lâwm hle țhìn a ni*

Kan dinhmun hi inphû lo niin ka ngai ngai lo. Kan induh a kan inhmangaih chuan awmzia a nei lo, kan riltu thinlung a inzawm chuan chu chu ka duh ber bawk; mahse, amah a inhmu hniam lutuk hi hrehawm ka ti, kei pawh engmah ka ni si lo. Pathianin duh taka a siam ve ve kan ni a, mihringpuite laka inchhuanga chapo thei leh induh thei kan awmin ka hre lo. Ka ngaih dàn chuan 'Hmangaihna hian phû loh a nei lo' ka ti bawk.

*Engkimah làwmthu ka hrilh che, mi fel tak i ni a, ni zêl bawk rawh, sawisèlna tùr che ka hre lo.  Keimah hi a ni fel lo ta chu, ka tih miah lo tùr thil ka tih vàng hian pawi ka ti, nang hi lo duh miah lo tùr che ka ni asin*

Eng thil nge a tih hi?!! Min duh hi a tih loh tùr maw ni a? Ni lo, kan induh tawnnna hi kan thup ringawt thei lo va, inthiam loh ringawt theih pawh a ni lo. A inhmu hniam lutuk hi, tihbosak vat a ngai a nih hi. Lo haw teh se, a sawi chhuak tawh miah lo ang. Ka thil ngaihtuah vàng chuan ka nui sak a.

*Ka zinnah hian nula pakhat, ka phû tâwk tak nèn kan induh a, tunah hian ka fa a pâi mêk a ni. Mama pawh ka hrilh tawh, Irene-i pawhin a hre thawi tawh tak. Ka nunrâwng i ti em? Min ngaidam ngai suh aw. Nupui atân ka nei dâwn, ka fa a pai si a, ka neih loh chuan nang ngei pawhin min dem ngei ang, kan unau anga fahrah tùr maia kalsan hi ka duh lo*

A ni thei lo! A ni lo, dâwt a sawi chiang lutuk!! Kan vênga ka hawa Neihi'n Irene-i thil sawi an tih min hrilh kha ka hre chhuak zawk. Ni lo, thil ni thei a ni lo! Ka thin chu ka dawm vawng vawng a, thu dik a ni lo ang; mahse, a number ațang ngeiin a ni bawk si. Bâkah, ka hming leh Mama hming pawh a tilang alawm, Irene-i pawh maw le!

*I tân hian ka tling tâwk lo ka tih tawh kha, kan nun leh hun hman tawh zawng zawngah khân lawmthu ka hrilh che a, hlimna min siamsak tawh zawng zawng vàng khân ka lâwm bawk. Tûn hi ka message i hmuh tàwpna tùr a nih dâwn avàngin ka ziak duah a nih hi; mahse, kei mi sual, nang phatsantu  che leh rinawm loh santu che hi min dem dâwn tih ka hria, chuvàngin, hriat reng tlâk ka ni lo va, min theihnghilh ang che. Kumtluang atân, mang țha le.*

Ka mittui far zawih zawih vàng chuan ka hmu phê ruai a, ka chhiar zo vek thei chu mak tak a ni! Ka thinlung hi chemtêa vih sawk sawk ang tluk zetin a nâ ka ti a, Sangkima chemte hriam zet chuan a va tâi thlêr hneh kher êm! A tikeh sawm vek.

Ka awm dàn chu chiang takin ka hre lo, ka țap lo, ka mittui erawh a hul thei lo. Engkim hi a vài ruai a, ka hming ni àwm taka min koh rî ang deuh te chu hmun hla takah ka hria.

Ka kut leh ka hmâwr chu a rawn hit chum chum a, ka taksa chu ka a rawn khawng țan, ka che thei lo. Chêt ka tum viau a; mahse, ka kut leh ke hmâwr hit chuan ka taksa chu a rawn zawh kual zêl a, ka inthunun thei lo. Ka taksa pum chu a rawn hit chhuak vek, ka țhutna ațang chuan ka let thla riai riai a, au ruai ruai ni àwm tak ka hre bawk.

*HMANGAIHNA HI MIN TIHLIMTU A NI A, MIN TINATU A NI THEI BAWK*

☆PIALRÀLAH TAL☆ - 18 By Dingdi Pachuau

Car chhûnga min hlâng lût leh hmanhmawh taka  țawng rîte chu ka hre deuh ruai ruai, chiang takin ka hre hauh lo. Ka thin hi a na êm êm tih chu chiang takin ka hria, thâwk a hrehawm ka ti a, ka thaw deuh hrâwk hrâwkin ka hre deuh nghe nghe. A hnu kam erawh ka hre tawh lo, a thim mup a ni mai.

Ka rilru taksa a harh chhuah leh chuan ka chàu lutuk a, men pawh ka meng peih mang lo, țawng phei chu ka peih lo a ni tawp. Ka thin a na deuh veng vengin ka hre bawk.

Ka kut hi tu emawin a chûl a chûlin ka hria, a ri deuh sep sep bawk. Tu nge le? Khawiah nge ka awm ? Ka khumah a niang chu. A tlâi tawh viau em? Ka mut a la chhuak asin le! Min chûltu chuan min chûl tawh lo se, muthilh leh ka châk!

"Bawihte, lo harh tawh la, i mu rei tawh êm mai."

Hm, ka nu a nih hi, ka rin ang chiah. Min kaihthawh lah hi a peih thei si. Ka maimichhîng lui tlat a, ka muhìl leh tak tak.

Țawng ri deuh niai niai vàngin ka harh leh ta. Ka harh chiang ta deuh, ka mit ka meng a, ka khap deuh sek sek.

"...țêp tawh ang chu..."

"A dik alawm. Haw rih ula, ka lo awmpui ve tawh ang e."

Mama țawng rî a ni, ka pa nèn an inbia. Kan inah maw? Ka mit chu ka lèn kual a, hei chu ka room a ni lo, khawi lai nge ni ang? Ka lû ka tiche kual deuh a, ka awmna hi damdawi in ni àwm tak a ni!

"Ka tui a hâl."

Hâl tak a ni, a hâl huam huam mai.

"A, i lo harh tawh maw?! I mu rei hle mai," Mama chuan min rawn hnaih pah chuan a rawn ti chûl a.

"Bawihtei i lo harh. Lalpa, ka lâwm e!"

"Tui chu?"

"E, ka lo pe nghâl ang che."

Ka pa chuan ka kut a dawm thung. Mama'n tui chu tlêm tê têin min tulh a, ka mut miau avàngin min tulh tam thei lo.

"I harh țha tiraw?"

"Aw."

"Nâ i nei em?"

"Ka thin lai vêl hi a nâin ka hria, thâwk a nuam lo bawk."

Ka pa chu doctor hmu tùrin a chhuak rih a, damdawi in ka awm chhan chu ka ngaihtuah chhuak a, Mama chu ka melh ta ràn a.

"Thil thleng kha i hria tiraw?" tiin ka zâwt nghâl sap a.

Ani pawh chuan ka thil sawi chu a lo man thiam khawp mai, min khawngaih hmel zeta min enin," Aw," a ti sap a, nuam lo a tih hmel khawpin ka hria.

"I hre daih tawh ang tiraw?" ka ti leh a.

"Hre daih bîk chuang lo."

"Thu dik a nih ka ring thei lo, min test a tumna mai niin ka ring," ka ti leh a.

"Min hrilh a, dâwt min hrilh chu ka ring lo," a lo ti tlat a.

"Min hrilh pawh i tum  miah lo tihna maw?"

"Thih hreh tlukin ka hreh."

Ka pa leh doctor an rawn luh leh tawh vàngin ka sawi chhunzawm ta lo va, sawi tùr tam tak ka la nei. Sangkima hian min rinawm lohsan hi ka ring thei lo, ka ring phal lo a ni mah. Min duh ve êm kha, bâkah, min hmangaih thu min hrilh bawk kha.

Doctor chuan nèlawm takin, nui sâng hian min bia a, nuih lêt erawh harsa ka ti lutuk. Zawhna min zawh chu țha tak chuan ka chhâng ve, nâ ka neih leh neih loh min zawh chuan ka âwm chu ka dawm a.

"A thin bàwr vêl hi nâ a ti a, thâwk a nuam lo a ti bawk a," Mama chuan a lo ti vat a.

Ka nu pawh a lo kal ve. Mimi, sir J-a leh ka training-puite pawhin min rawn kan, an fel ka ti khawp, ka hmaizah hlawm viau bawk.

Ka harh ațanga zàn lo thleng hmasa berah chuan ka buai a, ka thâwk a hrehawm a. Ka âwm hi mi chak zet hian rawn nem vak tlat se, thâwk luih tum ta ila, chutiang khawp chuan thâwk a hrehawm, ka hah lutuk. Ka muhìl ngam lo, kawr ka hâk chuan min tihrehawm ka ti a, ka ha duh lo va, ka kawrhnuai pawh phelh vek ka duh. Thâwk  hrehawm ka ti lutuk chu ka thaw leh kâwk țhìn.

Ka pa mangang chuan doctor a ko vat a, oxygen min pe. Ka thâwk a nuam deuh suai suai mai, Pathianin ni tina boruak thianghlim oxygen min pêk hlutzia ka hre fiah ta uar uar mai.

Damdawi in ațangin ka chhuak mai dâwn emaw ka tih lai chuan Aizawl lama kal tùrin min ti ta tlat, chu pawh a rang thei ang berin. Mama nèn pawh kan titi mumal hman ta lo.

Aizawlah chuan lung lam doctor Pu Loncy kan pan a, ka rilru dam lo sa nèn, ka taksa pawhin ka rilru chu a zui chak khawp mai. ECG, Echo leh Test chi hrang hrang kan buaipui a, ka nuin min buaipui vek. Ka pa aiin ka nuin min buaipui se ka duh a, hmeichhia ve ve chu kan inhriat thiam tawn deuh ka rin vàng a nia, ka ring dik chiah bawk.

Ka nu chuan min duat khawp mai a, ka ei châk leh duh apiang engkim min lei a ni mai. Ka u hmeichhia zâwk Remmawii  kha Aizawla an awm lai a lo ni bawk a, ani pawhin min buaipui a, Remlala pawhin ka chanchin a lo hria a, min rawn kan nghâl. An ina insawn tùrin min ti nasa; mahse, ka lo hnial a.

Kâr khat kan awm, damdawi inah ka awm lo va, hotel-ah kan awm. Remlala chuan min rawn kan reng a, min ngaihven lutuk, a chungah ka lâwm tak zet.  Zànah ka mu țha thei țhìn lo va, ka nu ka tihah khawp mai. Engtin nge Sangkima chanchin kha a lo hriat ka hre lo, min fuih a, min hnèm a, ka țah pawhin min kuah mai a, 'țap suh, a timak ém mai, ani aia țha, mi dang țha tak i la tawng ngei ang' pawh a ti chuang lo, ngawi rengin duat takin min chûl hliau hliau mai zêl. Min tihhlim erawh a tum hle tih ka hria, ka nu hi a țawng tam lo va, a langin min duat hûrh lo mah se min hmangaih hle tih ka hria a ni.

Ka lung chu a lo țha lo viau a, zai nghâl rum rum kan tih deuh laiin Pu Loncy-a chuan a phal tlat lo va, damdawi chu ei phawt tùrin min ràwn. A chhan chu ka taksa a lo chak lo bawk nèn, tunah chuan ka taksain a tlin lo ang tih a hlau a ni. Zêp pawh a tum chuang lo, min hrilh tlang vek. Kum hnih/khat a ral hnuah chauh zai tùr chuan min ti.

Ka ei theih zâwng tùr leh lungin a huat loh tùr chu ka nu chuan a zâwt dap. Kei erawh chu ka rilru a vâk kual nasa, Sangkima khân khatiang thu kha min hrilh lo ta se, tûn dinhmunah hian ka ding ang em? Ka lung kha a lo țha lo sa tawh rêng em ni? A lo țha lo tawh a nih chuan Sangkima khân khatiang thu kha min hrilh lo pawh ni se, eng tikah emaw chuan a lo la lang chhuak dâwn tho tho tihna a ni a, tuna kan han hre chhuak pawh hi a lo fuh zâwk maithei asin, a rei deuh hnuah chuan a lo nasa viau thei a...

U Remmawiite chuan an nupa car-in min thlah haw a, ka thâwk pawh a zia tawh viau bawk. Muangchângin kan tlân a, ka dam loh azârah U Remmawiite nèn kan inhmuh phah a, unau nge nge chu, min lo ngaihven khawp mai.

Ka pa lahin min ngaihven lutuk a, min rawn phone zut. U Remmawiite'n min thlah phei tih a hriat chuan," E, an va tițha ve! Lo zin ve hlauh teh se, inhmuh a khât si a, Mamate pawh phone ila a țha tak ang, " a ti a.

Mahse, U Mama chu a hman ka ring lo. Kârkawng a hlat bâkah kawng a chhe si a, bâkah fa an nei tawh a, sikul chawlh lai tak chu ni mah se, amah tak zâwk a hman lo ang.

Kan tlàn muan avàngin kan thleng tlai. Kan khuaa awm chu ka châk hlawl lo va, hetia ka awm thut chhan hi rin dàn nei dâwn lo mah se Sangkima nèn kan chènna khua hmuh hi ka zuam lo a ni.

Ka thlen zàn chuan an rawn lêng țak țak hlawm a, mi felzia ka hre chhuak thar zêl. Min rawn hmuh kher an tum chuang lo va, ka chanchin hre chianga kan in an rawn kal kha tâwk an ti viau hlawm. Thil țha tak a ni pawhin ka hria.

Ka room-ah ka thlen zànah ka pain min riahpui a, ka nu pawhin min mutsan chuang lo. U Remmawite nupa chu U Remmawii room hluiah an awm a, an awm rei thei dâwn lo. Naktipah an haw ang, U Mama pawh ka rin dàn chiahin a lo zin thei dâwn lo.

Damdawi ei thei tak ka lo ni hlauh hi ka vànnei ka ti. Damdawi mûm nga vêl zîng tin ei a ngai a, ka puar thei khawp mai. Ka taksa a chak loh avàngin ei tùr țha tak tak min leisak a, ei châk lo chung chung pawhin ka ei a ngai.

Mama pawh a rawn lêng zut mai. Ka chhûngte awm lai erawh chuan a lo kal lo thung, ka rilru hrehawmzia a hre chiang berin ka ring a, min hnem vak ngaihna a hre bîk chuang lo. A chângin ngawi rengin kan țhu dùn tlawk tlawk a, a țawng tam zâwk țhìn kha ka ngawi ta deuh tlat si a, a fiamthu thawh lahin min tinui zo tawh hek lo.

Thu thințhâwng ka hriat ațangin thla a ral ve mai dâwn, hun kal chakzia hi. Ka training ve lah chu, ka chhunzawm thei ta si lo. Ka pain heti chung chuan ka chhunzawm a phal lo bur, a hmasa berah damna leh hrisèlna ngaihpawimawh ber tùr a ti bur.

Mahni chauha ka awm chuan Sangkima number hi ka hmet chhuak ziah. Call ka châk a, a tlang theih ka ring chuang lo. Vawi khat tal biak ka châk, mi dang duh a neih avàngin ka dem thei dâwn lo, a hmeichhiain a lo zar viau pawh a ni thei asin. Nupa duhawm tak, inngeih tak ni se; mahse, biak ka châk tho.

Zan khat chu hma takah ka mu a,ka  muhìl thei chuang hlei lo va, ka phone-a kan thlalâk hluite ka hmet chhuak a, ka lung a lêng kher mai. Mama ka text ta ringawt.

*I țhianpa hian a rawn be leh tawh che em?* tiin.

*Aw.*

A ni maw?! Ka chanchin hi a zâwt ve ngei ang a, amah vànga hetia awm hi ka ni tih a hria ang em le?

*Ka chanchin a zâwt che em?*

*Zâwt lo.*

Ka thinlung a tâwt up up. A thinlung ațangin min paih chhuak rang kher mai, kei lah chuan theihnghilh chu khawilam, ka ngaihtuah kar reng mai a nih hi.

*Min lo ning hle a nih dâwn hi, amah ka duh lutuk kha min ning a ni ngei ang tiraw? Min ning ngawih ngawih tih hre lo lêk khân ka zar buai tak si a*

Mama min reply-na chu ka nghâk deuh vang vang.

*Ning lo ang* tih tê hian min chhâng.

*Hmuh ka duh ngawt mai, a thil min hrilh kha thu dik tak a ni em tih ka zâwt châk a ni. Min țhen a duh vàng chauha tilui nge a nih min lo hmangaih tak tak lo tih a inhre chhuak zâwk ni ang tih ka zâwt châk. Kei aia hmangaih a neih chuan dem thei leh ui thei ka ni lo hrim hrim a; mahse, ka hmangaih êm a ni. Thil min hrilh kha thu dik tak a ni lo tlata hriatna ka nei tlat a ni*

A hnu daihah min rawn reply.

*A sawi dan chuan ni 12 hian rawn haw a tum, a nupui a rawn hruai hâw dâwn bawk a ni àwm e. Kohhrana a nihnate a bansan daih tawh tih ka hrilh tawh che em kha?*

Ani chuan hrilh lo. Ni e, a bànsan lo thei nâng. Neihi'n min hrilh a, ani chuan Sangkima a dem viau lehpek a nih kha. Ka sawipui duh vak lo va, min thinrimpui viau tak kha.

*Ka hre tawh a. Mama, hlim taka awm tùrin ka duh a; mahse, mi dang nèna hmuh dun chu ka ngam lo tawp mai, ka thinlung a na sâ tawh nèn, ka tuar zo lo ang tih ka hlau*

Chumi zàn chuan ka muhìl lo. Ka bulah thâwm dìm takin ka nu a rawn mu a, ka muthilh der tlat avàngin ka muhìl lo tih a hre miah lo.

Ni 12 lo thlen hmaa kan khua hi chhuahsan ka duh. A nupui nèna hmuh dun ka ngam lo, ka thîk  dâwn lutuk si a.

Ka pa hnênah chuan Serkawna ka pite hnêna zinthlâk ka duh thu ka hrilh a, kan vêng chu a lum lutuk a, hrehawm ka ti tih ka sawi ringawt. Sikul chawlh lai a nih vàngin kan pathuma zinthlâk chu ka pa chuan a rawt a, ka nu pawhin a lo amen thlap. Ran vulh kan nei chuang lo va, buaina tùr a awm lo.

Ni 10-ah kan chhuk, ka pain car muangchângin a khalh a. Ka damdawi ei tùr nèn kan inkeng țeuh mai.

Dam taka chhûngkua kan inhmu khâwm chu ka pi leh pu chu an hlim kher mai. Min ngaihtuah ve si a, motor chuan an thei si lo, min rawn kan pawh kha duh ve hle mah se an thei lo a ni.

Damdawi chu a hun dik takah ka nuin min pe chat chat a, a theihnghilh theih loh. Bathlàr ațang chuan kawngpuia mi kal leh che vêl chu ka thlîr țhìn a, ka training-puite pawh ka hmu leh zauh bawk. Ka lung an tilêng, training kha ka peih lo viau kha a ni a; mahse, tunah hi chuan buaina neih ka duh. Ka rilru kal ding lutuk hi tihtàwpna ka duh. Ka hman thei si a, engmah ka tih an phal bawk si lo. Sangkima ngaihtuah nân hun ka ngah lutuk a ni, buai deuh neuh neuh leh rilrua thil dang ngaihtuah tùr ka duh.

Youtube lamah pangpâr siam dàn leh ei tùr siam dàn chu ka en ta țhìn a, pangpâr siam ve chu ka châk ta. Ka pa chuan colour paper, glue, ribbon leh thil țûl tùr chu min leisak țeuh a, ka en ang chiah chuan siam ka zir ta nghâl.  Ka rilrua Sangkima ka ngaihtuah reng mai chu tlêm chuan a zia ta.

Remlala pawh a rawn lang ve leh  hlawl mai. Engtin nge Serkawnah ka awm ta daih tihte a rawn hriat ni? Ka nu leh pate lah chuan an lo làwm thiam khawp mai. Kei pawhin ka hmu thut mai chu mak ka ti, hun a neih loh țhinzia kha ka hre chhuak lo thei lo si a, min ngai pawimawh thiam  hi ka lâwm  tak zet.

Thla thumnaah checkup nei tùrin Aizawlah kan phei leh a, tûn țum chu Remlala'n min lo hmuak a, an inah min hruai hâw daih.

Ka in-checkup-naah pawh min hruai zêl, ka pa lah chuan fel a ti khawp mai a, a fak reng mai.

Damdawi ka ei chu a tidanglam hret a, thla ruk hnuah checkup nei leh tùrin min ti leh. Damdawi hi chu ka dam chhûnga ka ei a ngaih hmel ta, lung lam chu damdawi ei tawh chuan thlah lova ei char char a ngai si a.

Thnah chuan ka taksa pawh a chak țha tawh a, kan in mai ni lo dàwrah te pawh ka kal ve nasa tawh. Hah erawh phalsak ka ni lo bur, hna ka thawh phal ka ni lo va, inah pawh ka țhu mai mai, ka mut lah chu a'n chhuak thei êm êm khawp lehnghâl a.

Thla li ka awm lo ta. Ka awm loh chhûnga kan vênga thil thleng chu Mama ka zâwt țhìn, a nih loh chuan Neihi. Neihi hi chuan thil thlen dàn hi kimchang takin min hrilh ziah, Sangkima nupui chanchin pawh min hrilh vek.

A sawi dan chuan Sangkima nupui chu a lian lo va, a ngo lutuk lo bawk. Hna a thawk ve nasa a niang, a vun pawh a mâm bîk lo. A naupai a la lang lo va, țawng duh tak a ni lo bawk. Kâr khat pawh a châm lo, a ha leh rih. Sangkima pawhin zui thuai a tum a ni àwm e. A nute a ngaihtuah lo emaw ni le? A tel lo chuan engtin nge an khawsak tâk ang?

A sawi dàn hmang chuan a nupui nèn chuan kan inang lo ropui si a, Sangkima chuan a duh viau bawk si a, thingtlâng hna a thawhpui theih a nih vàng a ni ngei ang. Kei ve hi, tunah phei chuan hna thawhte chu khawilam, ka mu hle hle lo chauh a nih tawh hi. Nupui atân a nei fuh khawp alawm le, kei ve chu engah mah ka lâktlâk ta si lo va.

Mama'n Sangkimate chu  pèm chhuah leh daih an tum tih min hrilh chuan ka nghilh dupin ka hria. He pa ka hmangaih dàn hi chu aw, a hming ringawt leh a thil tih tum ringawt pawh hian nasa takin ka taksaah nghawng a nei thei a ni si a, hrehawm ka va ti tak êm!

Kan véngah ka awm chuang si lo va, pêm kher a ngai lo asin. A nu hrisèlna a duh vàngin an rawn pêm kha a ni a, tunah lah chhuahpui a tum leh daih bawk si, ka rilru a va tibuai tak!

*Keimah vàng a ni lo ang tiraw? Pèm kher chu, a nu dinhmun a ngaihtuahpui lo emaw ni le? Hlim takin awm se, a nu pawh dam țha takin awm chho zêl se ka duh asin. Tunah zawng, a lakah mi hrang ka ni tawh si a, ka duh dàn hian awmzia a nei pha tawh dèr si lo. Ka rilru a va tina ngawih ngawih tak!

Vawi khat tal phone-ah tal biak leh ka va duh tak! A aw hriat leh pawh ka châk; mahse, a rem tawh mawlh si lo. Nupui nei a ni tawh si, Pathian leh kohhran hmaah invuan lo mah se nupui nei a ni tawh tho si. Mi pâ ka tân biak a va thiang tawh lo va, a mawi tawh hek lo, ani pawhin eng tiangin nge min lo ngaih ang? Duh lova a kalsan tawh ni na na na, va biak chu a tihchi miah loh.

*Mama, khawngaih takin, a nu kha ka hmingin a damdawi leina tùr chêng  sâng khat min lo pêk teh aw. A tân tih theih ka nei tawh dâwn si lo va, Sangkima pawh biak châk viau mah ila, ka be ngam lo. Engkimah duhsakna ka hlàn mawlh mawlh tih tal min lo hrilhsak hrâm rawh aw*

Ka mittui luang ngiai ngiai chu ka hru phal lo, Sangkima tân hian a la luang zêl dâwn. Ka tân a hlûin ka hmangaih ber a ni si a, a tân chuan ka mittui hi ka ui lo ang. Ka mittui hian nakinah chuan chhuah theih loh hun pawh a la nei maithei asin, tûna a luan theih lai hian luang hmiah hmiah rawh se. Ka thinlung chhûngril chu a rûm tlawk tlawk thung.

*MI DANGTE HI NANGMAH AIA HLIM LEH LÂWM VEK TÙRA NUN HMANG TÙRIN RING BÎK LO LA, I DINHMUN ANGA DING TE, NANGMAH AIA HLIM ZÂWK TE LEH NANG AIA HLIM LO ZÂWKTE PAWH AN TAM TIH HRIA ANG CHE*

Kum 2 hnuah chuan
~~~~~~~~~~~~~~~

Ka khûp ruh dik hlei thei lo vàng chuan step-ah chuan muangchângin ka bâi thla saih saih a, ka chawhmeh lei, tam vak lo chu bazàr iptea akin ka hawi kual pah ruai a, hmel hriat ka hmu zauh zauh atin ni.

'Hun leh tui lianin tu mah a nghâk lo' an tih ang deuh chuan kei, engmah ti thei lo pawh hi hun chuan min nghâk bîk miah lo.

Kan vênga awm nuam ka tih loh vàngin Aizâwlah ka awm. Eng vak ti thei lo mah ila, ka bazâr thei a, ka accident-na avàngin tlêmin ka kal bâi deuh tih a ni mai a, hah lovin in chhûng chét chu ka ti thei ve alawm.

Khatia Sangkimate pèm hnu khân Serkawn ațang khân kan vêngah ka haw chho ve leh a, ka awm rèn ráwn a; mahse, nuam ka ti thei tawh lo. Thil ka ei thei lo va, chaw phei chu a rim ringawt pawh ka hnê. Nula țawng duh thei tak ka nih tehlul nèn ka țawng ngai vak tawh lo. Miin min biak chuan ka chhâng a, min biak loh leh ka be lo ve mai. Mama chuan thil awmzia eng emaw tak a hriat ka ring țhìn a, ka zâwt ziah. Nupui neiin hmun dangah pêm leh tawh mah se, thu dik a nih ka ring thei lo thut țhìn. A châng leh Mama chu ka țah khum chiam a, a hnuah ka be duh lo leh a, tihsual nei miah lo kha ka mawhchhiat țhìn. A mang a ang thei ngawtin ka ring.

A hnuah kan vêngah awm peih lovin Serkawnah ka chhuk leh a, ka nu leh pa hian tihngaihna tak min hre lo. Ka hlimna an duh ve tho a, ka duhna lamah chuan min kaltîr mai. Ka awm char char a, inah ka tawm tlawk tlawk țhìn. Thil ka ei theih loh êm avàng chuan ka taksa rihna pawh a tla hniam sâwt viau, chèr pawh ka chêr. In ațangin chhuak ngai lo mah ila, bathlàr ațangin pâwn lam ka thlîr ve fo. Bathlàra ka chhuah ve pawhin  in design nalh deuh kha ka thlîr ziah a, in neitute fanu kha ka dem hauh lo. Vànnei ka ti zâwk asin, a hmangaih thingtlâng tlangvâl kha a nei thei bîk a, kei hi mi khawngaihthlâk tak chu ka ni zâwk.

Ka pi leh ka pu nèn ni tin inah kan awm a, min tihhlim an tum nasa țhìn. Ka pi chu ka chanchin zawng zawng, Sangkima min țhen dàn leh nâ ka tihziate chu ka hrilh vek a, min khawngaih ve khawp; mahse, tih theih a nei dêr si lo.

Nunphung pângngai lo zetin hun ka hmang chho zêl a, Krismas leh Kum thar lo thlengte chuan keimahah awmzia an nei lo khawp mai. Room-ah inkhungin Sangkima nèna kan thlalâk  chu ka thlîr fo țhìn. A birthday kan lawmsak zàn video kha Mama ka dîl a, chu phei chu vawi eng zât nge ka en chhuah tawh ang ka hre lo zâwk. A chângin ka țap a, a chângin ka mittui rêng rêng a tla thei lo.

Aizawlah in-checkup tùrin keimahin ka phei a, ka nu leh pa chuan an phal lo viau mai a, a tu emaw zâwk zâwkin min hruai an tum a; mahse, ka tilui tlat, mahnia kal hi a fel mai zâwk, ka tibuai si, an hna thlengin a khawih buai țhìn si a.

Ka lung dinhmun chu a țha zêl a; mahse, ka taksa hrisèlna a tla hniam thung. A chhan chu thil ka ei thei tlat lo va, ei châkna ka nei hek lo. Chu chu doctor dangah inentîr tùrin min hrilh a, a thu chu ka zàwm ve mai bawk a, ka pum a lo țha lo țan reng tawh niin. A nasa lutuk lo va, damdawi bawk min chawh leh ta.

Remlala engmah ka hrilh miah lo a nia, a lo hre tho. Ka thlenna hotel-ah rawn kalin min rawn lam nalh a, an inah min hruai leh. Amah leh a chhûngte pawh ka zah zozai, min ngaihsakin min duat si a, ka tân an insêng nasa tawh si.

Heta ka awm lai hian alawm  accident chu ka tawh ni. Remlala scooty chu hawhsak ka dîl a(Scooty a nei tlat, an awmpuinu khalh atân a leisak) ka haw pheina tùr ticket lâk ka tum a ni. Min hruai a tum a; mahse, ka lo hnial. Aizawla scooty khalh leh pawh a châkawm alawm le, ka khalh khàt bâkah U Remmawiite pawh tlawh ka duh pah a.

Ka haw lamah Remlalate in ka thleng țêp tawh tihin Bike chak zeta tlàn, side la lo zet hian min rawn tâi hrâwk mai. Ka tlu chiang lutuk, a ri chhawk a, kawng sîrah chuan duh loh paih thlawrh ang maiin ka thal dèr.

Ka ke na lutuk vàngin ka che sawn thei lawk lo. Kan thâwm a ring țha bawk a, mi pawh an rawn pung chak nangiang, min rawn bawihsâwm nghâl, ka ke chu ka khai zawi reng mai. Ka intiharh lui hrâm hrâm, nikhaw hre lovin ka awm teuh asin. A chhan chu thisen chhuak nasa tak ka hmu si a, ka chàu rawih rawih nia.

Vanduaina hian min ûm reng ni maiin ka hria. Ka keruh tliak vàngin damdawi inah ka awm leh reng a, ka bân veilam ruh a pelh bawk nèn, ka vanduai ngawih ngawihin ka hria. La nu leh ka pain a chhâwkin min awmpui a, ka tihbuai dàn hi, fanu țha lo tak chu ka ni.

Ka ke chu a dam țha thei lawk lo, bâkah, dam pawh ni se ka kal bâi tawh dâwn. Ka hriat țantirh chuan ka țap vak a, 'Thih ka duh zâwk' tiin ka au tuar tuar a, khatih lai khân thih ka duh tak tak! Nula ke bâi nih kha ka duh lo, ka nu leh pa rilru tùr dâwn hauh lovin doctor hnênah khân min thihtîr mai tùrin ka ngèn chiam a nih kha.

Remlala pawh ka va tibuai tak! Dr. Hrekima min panpui a, inchhûng hnai tak an lo ni lehnghâl. Ka chanchin zawng zawng chu a lo hrilh sa vek a, kei lah thih duh ka nih vàngin an thu sawite chu engah mah ka ngai duh lo.

Mahse, an beidawng duh hauh lo. A hnuah phei chuan ke na chung chung chuan Remlala chuan Pu Hrekimate inah chuan chaw min eipui zui, ka hmaizah avàng leh an zahawm ka tih êm avàngin an thil sawi chu ka ngaihthla ta reng a, chu chuan keimahah nasa takin rilru lamah dam hlutna, dam châkna leh chakna thar min pe țan, zawhna eng eng emaw ka zâwt ta zauh zauh bawk.

Ka dam hnua ka ke bâi hlek ringawt chu engah mah ka ngai ta lo. Pathianin min siam chhan leh kan nunna kan tâ a nih lohziate ka hre chiang chho zêl a, dam châk ngawih ngawih an tam tehrêng nèn, kei ve chu scooty ațanga ka per nawlh chung pawhin ka la dam a nia. Pathianin ka thih a la phal lo, min la duh êm vàngin ka nunna a zuah a ni. Mite tân malsàwmna ka nih theih nân, nunna hlutzia mi dang zirtîr thei tùrin ka nunna hi min zuahsak a ni.

Ka piangthar ta khawp mai. Ka chanchin chu story ang deuhin ka ziak a, harsatna leh buaina ka tawh chhohte leh accident ka tawh dànte chu ziak langin nun beidawng tawhte pawhin rilru thar an put theih dan tùrte chu ka ziak a, blog ka siam a, ka rin aiin hna a thawk țha tlat. Ka phone number ka dah bawk avangin min rawn call tâwk an rawn awm ve ta, ka nuna thil thleng tam tak chuan awmzia a rawn nei țan e.

Aizawlah chuan ka chhûngte remtihna thlapin in ka luah a, țanpui ngai, mi beidawng leh harsatna neite'n min rawn pan ve ta țhìn. Lo țanpuia lo titipui chu nuam ka ti, hei hi Pathianin ka nunna a zuah chhan a lo ni tih ka hre tawh a, rilru beidawng tak takte, rilru thar nèn lâwm taka an haw ka hmuh phei chuan ka thinlung hi a hlim a, ka mittuite hial a tla țhìn.

In ka thleng a, step hi a thui lêm lo. In chhûng tak hi a fianrial rualin a hmun hi a ualauin panna a nuam a, in chhûng hi a zau lêm loh vàngin luah man a to lutuk lo.

Eirawng ka bâwl a, tunah hi chuan chaw pawh ka ei thei tawh lutuk, ka ei tam lo a ni mai a, ngei tlatna ang kha ka nei tawh lo. Ka lung damdawi kha ka la ei reng a, tûn ațanga rei vak loah chuan ka lung hi a zai theih tawh ang. Chutiang ti thei tùr chuan ka taksa hi hrisêl taka ka dah a ngai.

Zànah Remlala a rawn kal a, ei tùr min rawn lei țeuh a, fridge-a dah luh pahin," Zanin chu ka mamawh tlat che. Ka hun tawn hrehawm tak vàng hian ka beidawng viau a nia," nui chung hian a ti a, a fiamthu tih ka hriat chuan ka ngei lutuk a, ka chhiatkhum vak a.

"A ni alawm, nupui ka hmu zo lo hi ka beidawng tawh alawm. Thih mai ka duh."

"Fiamthùna chi pawh a nih loh chu," ka lo ti hlak a.

"Ka fiamthu lo, ka beidawng tawh tak tak!"

Melh rumin," Hun insiam la, hmu tak tak thei tùrin zawng rawh," ka ti a, kan pahniha in tùr coffee ka siam nghâl a.

Coffee hi ka duh thar ta lutuk a, a hma chuan ka in ngai lo. A rim hi ka ngai thei lo va; mahse, ka accident ka dam leh hnu ațang khân ka duh thar a, ka in ta char char a nih hi.

"Ka duh chu ka hmu sa reng tawh, amahin min duh ve si lo a nih hi."

"A va â ve!"

A nui hawk a," Nia, a â êm a ni. A ât zêl loh nân ka țawngțaipui.ziah a nia," a ti leh a.

"I va fel ve!" ka ti sap a, nuam lo ka ti ve deuh reng. Min duh tih hi ka hria a; mahse, kei chuan țhian ang chiahin ka en thung. Kei ke bâi mai mai, lung țha lo bawk si hi a bialnu ka ni thei lo hulhual, a theih loh a ni tawp.

"Sangkima chanchin i hre țhìn em?"

Sangkima. A hming hi ka thinlungah awm reng mah se a rì hian ka va hre khât êm! Zan tin ka mut hmunah ka ngaihtuah a, zîng ka thawhin ka ngaihtuah bawk a, a hming erawh a rìin ka lam ngai lo. Ka țawngțai pawhin a hming lam lovin ka dìlsak țhìn!

"Hre ngai lo."

Ka hre ngai lo miau a ni. Ani chu nun hlim tak nei tùrin ka duh a, a hlim ngei pawh ka ring. Nupui neiin fa pawh a nei tawh ngei ang chu, pahnih lai an nei tawh ang, a lo rei ve deuh tawh bawk si a.

"A eng lai kha nge i duh ber?"

Tunah chuan țha takin a chungchâng zawhna pawh ka chhâng thei tawh, ka rilru  ka siam nasa tawh. Thil thleng tawh/hun kal tawh vàngin ka rilru tihnat thar leh ka tum tawh lo va, hma lam pan tùr ka ni alawm. Mihring chu hma lam pana țhang lian zêl tùr kan ni, kan awmna ngaia kan awm reng a kan țhan len bawk si loh chuan piangsual kan ni mai dâwn asin.

"Ka hmangaih alawm. A eng lai ber kha nge sawi tùr ka hre lo, a vaiin a niang."

A nui a, kei pawh ka nui. Coffee chu dût hlakin," Ka hmangaih avàng khân ka inchhîr ngai lo, amah avàngin hmangaihna awmzia ka hriat phah a, hmangaihte kalsan nih natzia ka hre bawk.  Ka hriat chhuah hian thil tam tak min zirtîr a, mite harsatna țanpui kawngahte hian a lo hlâwk phoan mai a, awmze nei lo a lo ni miah lo," ka ti duah a.

"A dik ang. Harsatna i tawh ațang hian nang chuan rilru thar i pu thei a, i tawh ang tâwk rilru beidawn avànga mahni nunna la ta hi an awm nual ka ring asin," a ti ve boh boh a.

Lu bu nghat pah chuan," Awm tehrêng mai. India ramah hian rilru beidawng, harsatna tâwk, khawvêl hmachhawn ngam lova mahni nunna la hi an tam asin, kum tin hian an pung zêl lehnghal. Rilru hrisêl neih hi kan mamawh viau a ni, hetoang lama awareness neih pawh hi a pawimawh lutuk," ka ti leh a.

Kan ngawi vang vang a, a hnu daihah chuan," A nih, Sangkima kha lo lêt leh ta se, eng rilru nge i put ang?" tiin min zâwt leh a.

"I ti ho êm mai a!"

"Ho lo asin."

"A nih, ka hre lo le."

Ka mut hnuah chuan Remlala min zawhna kha ka ngaihtuah leh a. Ka hre chiang lutuk. Ka chhànna tùr chu ka hre chiang ngang mai, a bulah kha chuan dâwt 'vâr' ka sawi. A birthday vawi hnih kha keimahin ka hmang a, amah ngaihtuah nân hun ka hmang, a tàwpah ka țawngțai ta ringawt.

Mite țhatna zârah, ka blog ațang chuan thla tin pawisa ka la lût ve ta ziah. Tam hè hù lo mah se, ka intung nung ve thei a, nuam ka ti bawk a, an zawhna rawn siam tam tak ka theih ang angin ka chhâng ve țhìn bawk. Chu chuan mi harsatna a lo su kiang a, a hnu lamah ka hre leh țhìn. Chutiang feedback ka dawn chuan ka rilru a hlim a, a nui var var țhìn. Ka tih theih tâwkah Pathianin mal min sàwm ka ti lo thei lo, rin loh lam daih ațangte hian pawisa hi ka dawng leh nawlh țhìn.

Ka birthday a lo thleng leh a, ka chhûngte leh Mama, Neihi leh Remlala hnên ațangin duhsakna ka dawng. Sangkima nèn khân la awm dùn reng chu ni ila chuan a hnên ațangin duhsakna pawh ka dawng ngei ang.

A țhi min pêk kha ka la awrh reng a, ka hlîp phal lo. Ka bula la awm rengah min ngaihtîr țhinin ka hria a, mi pâ ni tawh mah se hlih ka tum chuang lo.

Ka țhi ka tuai nauh nauh lai chuan ka kawngkhàr a rawn ri dat dat a, min mamawh tu emaw a lo kal a nih dâwn hi.

"Lo lût rawh."

Mama hmel ka hmuh chuan ka ding zawt mai. Kan inhmuh lohna rei tawhzia ka hre chhuak zat bawk.

"Nang pa hi, eng nge i lo tih dâwn!!"

Kan inchibai lâwp lâwp a, ani pawh chuan min ngai ve a ni ang, ka kut chu thlah a tum bîk lo.

"Ka rawn hmu châk che a, i dam țha tiraw? Ka hmu țha viau mai che ka ti, Aizawl hi i ngeih a nih hi."

Nui var var hian," A va làwmawm ve! Ka birthday nî takah lehnghal, engtikin nge i lo phei?" ka ti a.

"Nichîn deuh khân kan lo thleng, i lo awm lo ang tih ka hlau deuh khawp mai a, rawn surprise che ka duh pah bawk sia, ka rawn hrilh che chuan a flop vek ang tih ka hlau a."

Kan ințawng chhâwk zut mai. Kan inhmu lo rei ve tawh bawk a, a àwm viau e.

Ka birthday gift min pe a, ka nu leh pate pawhin gift an rawn thawn a, ka hlim lutuk a, ka lung a chhe hial. Sangkima kha awm ve se...

Ka inah chuan a innghat a, eirawng min bàwlpui vek. Min rawn tlawh pahin Office dàwr a tum, a awm rei vak thei dâwn lo.

Zanriah kan ei lai chuan kan vêng lam chanchin chu ka zâwt ve a, ani pawh chuan min hrilh a. Irene-i'n pasal a ûm a, Sawmi'n kan khaw țhenawm lawk Zobawkah pasal a nei tawh bawk. Mipa lam ve thung chu nupui nei thar an awm lo.

"Nangin engtikah nge i neih dâwn?"

Ani chuan," Pasal i neih ațanga thla thum ral hmain ka nei ang," a ti deuh tlat a.

"Ka nei lo thut thei asin."

"Ka nei lo ve mai ang."

Nuihin," Nula ke bâi hi tu tlangvâlin nge duh se min tih a? Engmah ti thei pawh ka nih loh hi," ka ti a.

"Nula tam tak aiin thil i tithei zâwk tih ka hria a ni."

A ti tak si a, làwmthu ka'n hrilh leh rih bawk a, chaw pawh kan ei rei khawp mai.

"I țhianpa chanchin i hre zêl em?"

Min rawn en zawk a, hmun dang melh leh nghâlin," Aw, ka hriat hnuhnung berah kha chuan a pu leh pite nén an inhmu chhuak a," a ti a.

Makti zet, hre thiam bawk si lo chuan ka en hâ a.

"A nu pa leh nu ka tihna a nih chu."

"Chiang deuhin min han hrilh teh!"

"Chaw ei khamah le."

"Tunah min hrilh mai la?"

Min en vang vang a, chutah," A pi leh pute chu awmthei tak an lo nia, an chêngho daih tawh alawm," a ti ta a.

"Aizawlah nge Lawngtlaiah?"

"Lungleiah maw le! I sawi dik lo ve ve."

Lawngtlai ațang lo pêm kha an ni sia, chuvangin Lawngtlai lam a nih ka ring deuh ringawt a nia.

"A lawmpuiawm hle mai, a nu pawh a dam țhat zel ka beisei," ka ti sap a.

"A nu chuan i chanchin min rawn zâwt țhìn asin!"

A nuin maw?! Min lo la hre ve reng a nih chu.

"A fapa chêt dàn vàngin ngaihdam dìl che a duh a."

Che miah lo chuan Mama chu ka melh reng a!

*HMANGAIHTU DIK TAK CHUAN I NIHNA ANG ANGIN A PAWM ANG CHE, I NUNHLUIAH A BUAI LO ANG*

☆PIALRÀLAH TAL☆ - 20 By Dingdi Pachuau

"A fapa hi i duh tak tak tih a hria alawm."

Chu pawh ni se, nula leh tlangvâl chu an inngaizâwng a, an ințhen ve fo alawm. Thil nihphung pângngai a nia, ngaihdam indìlna chhan tùr a awm hran lo.

"I chunga thil thlengte kha a hre ve vek bawk a, hrehawm a ti lutuk a."

A nih chu. Chutia ani pawhin a lo hriat chuan Sangkima pawhin a hre ngei ang; mahse, vawi khat pawh a hmel ka hmu lo, call takngial pawh ka dawng lo va, ka bulah hian a chanchin sawi pawh an awm hek lo.

"A lo nih tak chu. Ani kha, a dam țha zêl ang chu maw?"

"Aw, phai lamahte an kal a, tunah chuan a țha chho viau tawh a ni àwm e."

A va làwmawm tak êm! A lo la dam a, a zia tawh hle tih hriat chu nuam tak a ni, ka bialpa hlui nu mah ni se.

Chaw kan ei kham hnuah chuan," Zanin hi rawn lêng tùr an awm dáwn em, birthday rawn làwm tùr emaw tlangvâl rawn lêng tùr pawh?" a ti a.

"Ka hre lo le. Ka birthday a ni tih chu nang leh Remlala, ka chhûngte'n an hre leh tawp ang. Làwm tùr phei chuan nang leh kei bâk kan ni lo ang," ka ti a.

Mahse, ka sawi dik lo. Min hmuh duh tleirâwl tê tê an rawn kal a, Mama an hmuh erawh chuan nuam an tih loh hmel lutuk. Thil awmzia ka lo sawi zung zung a, Mama pawh room lamah a lût ta daih.

Zàn dâr 9 vêlah erawh birthday coffee erawh kan in hlawm. Tui takin ka siam a, in lai chuan fiamthute kan sawi a, kan nui dar dar. Tunah hi chuan nuih vak vakna tùr khawpa hlimna kha ka hmu thei tawh lo va, ka nu thu ka zawm tâk viau vàng ni lovin ka nui vak vak ngai tawh lo.

An haw hnuah chuan Neihi'n min rawn video-call a, Mama a hmuh tel ve tâkah chuan," E he! U Mama chu eng nge a lo tih a? Engtikin nge a lo phei?" a ti hé hâw a.

"Tukin zîngah," Mama chuan a lo ti vat a.

"I birthday a rawn lawmpui che maw? Awi, min sàwm ve tùr a nia, ka lo phei ve châk asin le!"  a ti bài bái a.

"I hman veleh, e Krismas bazâr tùrin rawn phei la, kan haw phei rual ang a?" ka tih chuan," A țha dâwn lutuk! Ka lo intuak țàng țáng ang aw," a ti a, a phùr hmel khawp mai.

"E, U Mama chu a lo phei dâwn tih hria ila chuan birthday vaimîmte pawh lo thawn che ka duh asin le. A inzêp thei e, thil thawn a hlau a niang," nui chung hian a rawn ti leh a.

Kan inbe rei reuh phian. A țawng duh ve si a, rei lo tê a inbiak theih loh.

Mama chu khum ka kian nain a duh hauh lo. Long chair-ah chuan blanket chhah lo tê lain a mu tlat a.

"Nang, nula akâra ke bâi lehnghâl mutna kenah ka mu duh teuh lo. Kei chu tlangvâl țhalai ka nih hi," a ti tlat a.

"Chuti'n a bâi vak lo aw."

"Bâi e."

A mut hnuah chuan kei pawh ka mu ve deuh nghâl mai. Ka muhìl thei lo nain biak buai erawh ka hreh deuh a, vawiin lam a motor chuang a chàu àwm si a.

Mama room-a birthday kan lawmsak video kha ka en leh a, ka en ning thei lo. Keimah chu amahah ka inchan a, suangtuahna nèn, min lawmsak a ni ve mai. Ka țhi awrh lai chu ka khàl nauh nauh pah a.

Kum hnih lai vei tawh mah se ka theihnghilh thei si lo. Ni tin hriat chhuah loh ni ka nei ngai lo. Ka lung a lènin ka hre chhuak a, ka hlim deuh leh ka hre chhuak bawk a. Mal taka ka awm phei chuan ka ngaihtuahnain ka kàwm fo, min kalsan chhan kha chiang taka min hrilh tùrin ka zâwt ziah.

Ka muthilh theih loh vàngin zung tùrin ka tho leh a, Mama chu a lo inkhuh hlûn tawh. A chàu ang ka tih rêng kha, thâwm dìm tak chuan toilet-ah chuan ka lût a.

Mama awm chhûng chuan nuam ka ti ve lutuk. Zànah titipui tùr ka nei a, ani phei hi chu ka chanchin englim hre vektu a ni bawk a, a bula titi a nuam danglam bîk ka ti.

Mama haw tùr chu Neihi thil tùr ka thawn haw ve a, ani hi nau tak tak anga ka en a ni a, nau duat tùr dang ka nei bawk si lo va, ka pianpui ang chiahin ka en. U Mama leh U Remmawiite chuan kawppui an nei tawh a, bâkah kei aiin an upa deuh hlek bawk nèn, ka kàwm ngeih phâk lo.

Lehkhabu chhiar ka peih a, thu țha ka tih lai, ka duh tak takte chu Mizo țawnga letin blog-ah chhiar theih tùrin ka dah țhìn, comments a tam ve țhìn a, ka lâwm thei hle, ka check leh thlap țhìn.

Khua a vâwt a, ka ke ruh a nat deuh ngar ngar țhìn vangin kekawr lum țha tak ka ha ziah tawh. Mi pângngai chuan kawrlum leh thawmhnaw lum lam chu an la inbel meuh lo, ka in luah chu a vâwt țhìn bawk si a, heater lei ka duh a ni.

Heater lei tùrin ka chhuak a, ka blog a chhiar ațanga inhmu chhuak  ka ti ve mai, Dinga chuan dàwra ka lût chu min lo hmu a, min ko chùl a. Min hre nêl viau tawh, ka in luahah min kawm tùrin vawi thum lai a lo kal tawh tlat.

Ka blog-a ka hming ang chiahin," Remtluangi Ralte, eng nge i lo tih dâwn a?" a lo ti vat a.

Nui sâng hian," Heater lei tùr en ka'n tum ve deuh a, hei hi in dàwr em ni?" tiin ka zâwt nghâl a.

"Aw, ni e. Eng ang chi nge i duh? Tlâwm tâwkin ka lo pe ang che."

"A va làwmawm dâwn ve aw! Duhzâwng thlan tùr pawh ka hre chuang lo, a țha i hre zâwkin ka ring. Min thlan la?" ka ti thung a.

En kualin a sawi fiah a, a test pah zel bawk a. Țha bawk si, to vak lo chu ka lei ta a.

"I khai haw thei dâwn em ni? Ngawi teh, ka nau ka'n ko ang e, ka ngaihtuah deuh tlat che."

Ka hnial hma chuan a nau chu a ko ta nghâl a, mipa tleirâwl chhuak hlawt, amah ang lo taka chêr leh sâng hi a lo ni a, heater ka lei chu min khaisak ta nghâl a.

"Khawiah nge kan kal dâwn le?" a ti a.

"A ngai lo asin le aw, i buai em?" ka ti a.

"Buai lo ve."

Kan inzui ta chhak chhak a, ka in luah  thlen hmaa restaurant lo awmah chuan ka chawlhpui leh rih a.

"A làwmawm êm mai, làwmthu sawi nân treat che ka duh ve hrim hrim a ni," ka ti a, ani pawh chuan min hnial hran lo.

Țhuthmun kan rem hnu chuan," Eng nge i ei ang?" ka ti a, ani chuan," I ei ang apiang a ni mai," awlsam zet hian a lo ti a, mi khirh tak chu a ni lo tih ka hre ta phawt.

Vâwt ka tih vàngin coffee sa ver vawr in ka châk a, ei tùr nèn ka chah ta nghâl a.

"Remtluangi Ralte i ni tiraw?"

Nui sak chung hian," Aw, ni e, min hria elo?" ka ti a.

"Aw, i blog ka tlawh ziah alawm," a tih chuan mak ka ti a, ka lâwm bawk si a, ka nui var var lo thei lo.

"A taka hmuh che hi ka châk țhìn a."

A takah chuan eng ual ka lo ni dâwn si lo va, ke bâi lehnghál, min hmuh tum loh deuhin min hmu ang chu!

"A va làwmawm ve! Heti zawng hi ka ni mai," nui sak chung hian ka ti a.

"I hmel țhat ka ring sa a; mahse, ka rin aiin i lo țha daih zâwk a."

A thil sawi dan chuan ka nuih a tiza a, ka làwm hle bawk. Ka zak hran lo, ka upa ve tâwk tawh. Tleirâwl tihzah lek rual kha ka ni tawh bîk lo ve. Amah zâwk chu a zak a niang, a beng a sen tât tât mai.

"Ka lâwm e. Mi fel tak tak ka tawng țhin che u a, ka blog tlâwm tak in lo tlawhin ka thu ziakte in lo chhiar țhìn a, ka lâwm țhìn khawp mai," ka ti a.

"I thil tawn tak tak a ni hlawm em?"

"Aw, ni deuh vek e."

"Hmeichhia i ni na vàng vàngin i ngaihsànawm hle mai," a tih chuan ka zak ve țêp.

"Ka lâwm leh vawng vawng e."

Ei tùr chu a tui kher mai, ka rin aiin ka ei tam. Țhiana pawh chuan a ei zo ve vek.

Pawisa ka pe zo ka hawi kual deuh chuan restaurant kil khata Sangkima ang deuh chu ka hmu ta thut. A sîr zâwngin ka hmu zuai a, hnunglam min chhawn leh nghâl zat. Ka thin a rawn phu rang nghâl dawt dawt!

Ka en ngun leh deuh a, a sam a seiin a buk deuh a, a lang bawrchhawr deuh bawk. Sangkima kha chu a lu  a buk ngai lo a nih kha, sawtiang bawrchhawr lek lek sâwn a awm ngai lo, ka hmu sual lehpek a nih hi. Tlêm lai deuh phei kha chuan ka suangtuahna vàng a niang, ka hmuh sual ziah kha.

In thleng chuan min thlah tak tak! Ka in luh dâwn step-a kan kal lai chuan," Kawng hi i tân chuan a țha lo tawp a nih hi," a ti zauh a.

"Nia tiraw? Zàwi muangin ka pên thla chhet chhet mai," ka lo ti a.

In kan luh chuan a thil ken lai chu hùnna tùr min zâwt a, dahna tùr ka hrilhah chuan a dah a, a hawi kual pah ruai a.

"A nuam reuh phian, nangmah chauhin  ni i chèn a?" a ti a.

"A ni deuh mai."

A ngawih deuh vang vang lai chuan," Thil min khaisak vàngin ka lâwm lutuk e aw," ka ti a.

"Kei pawh le," a ti phawt a, min en vang vangin," I țanpuina mamawh țhiante nei ta ila, ka rawn kalpui thei ang em?" a ti ta a.

"Thei tehrêng mai, tih theih ka neih phawt chuan le."

Zànah chuan heater ai pah chuan vawiina a hnunglam chauh ka hmuhpa kha ka ngaihtuah lêt a, Sangkima nèn chuan a sîr zâwng kha chuan an inang tak zet a ni, a tukkhumah erawh chuan a ang lo ka ti deuh tho, Aizawla a awm chu ka ring meuh si lo.

A lo zin phei ve thei tho bawk a, mamawh a rawn lam pawh a ni ve thei tho. Bâkah, a pi leh pu pawh mi awmthei tak an nih kha, dàwr lianpui nei pawh an lo ni thei a...

Krismas pawh a lo hnai ve ta viau mai. Remlala nèn pawh kan inhmu zing thei tawh rih lo, dàwr lamah a insâwrbing leh ta deuh a, a buai ve leh ta. Neihi lo phei hun tùr pawh a lo hnai ve ta kuar bawk, min rawn phone zing tawh lutuk, a phûr lutuk chuan  ka nuih a tiza țhìn.

Dinga nau Tetea pawh kha a țhiante nèn an rawn kal ta zauh zauh. Tetea tak chuan buaina a nei hran lo, a țhiante a rawn kalpui a, tleirawl chhuak hlawt ngang an ni bawk a, an titi țha thei khawp mai.

A tìrah chuan 'U Tluang' tiin min ko ve hlawm a, a hnuah erawh Tetea chuan min u duh ta miah lo. 'Nula leh tlângvâl in-u  chu' a ti ta deuh tlat a, kei pawh chuan engah vak ka ngaihsak duh lo va.

Mahse, min lo duh ru reng niin. A awm dàn leh chezia ațang chuan ka ringhlel phawt a, a inthup thiam ngang lo a ni. Ka nuih a tiza thei lutuk, a la naupang si a, duh neih tawha tih tlur hun lai kha a ni a, ka hre thiam ve ruak tho.

A sawi miah lo; mahse, ka man tho. Kei atân chuan biak chhiat ringawt chi pawh a ni lo, a rilru na taka ka hliam a hlauhawm ve tho a nia.

Sangkima'n ka rilru min hliam tawh avàngin a natzia ka hria a, tumah hian tuar ve lo se ka duh.

Neihi a rawn phei ta, ka lo hmuak a, min hmuh chuan a rawn țê chùl, a zak chuang miah lo.

Zànah ka khumah kan mu dùn a, a titi ka ngaithla char char. Sawi tùr hi a va hre thei tak!

Tûkțhuan ei khamah bazâr tùrin kan chhuak nghâl. Mi an tâwt ve tawh khawp mai, kal chak pawh a har.

A bazàr nân pawisa eng zât nge a lo ken ka hre miah lo, thil leisak chu ka tum ve tho a, a lei tùr ka hriat tawh miau avàngin an zawrhna hmun ka panpui nghâl vat bawk.

Jeans kekawr leh sunday-a bun tùr pheikhawk mawi hnai tak ka leisak a, a lâwm thiam khawp mai. A pawisa chuan chumi bâka lei tùr a neih chu lei tùrin ka ti a, kei chu thil thar la mamawh hran lo va, ka neihsa hi a tâwk viau.

Ni lênga bazàr chu a hahthlâk khawp mai. Ka ke a na ngut ngut mai, țhut chawlhna tùr a vâng si a; mahse, Neihi ka bazàrpui miau avàng chuan ka sawi chhuak duh lo.

Kan haw lamah chuan muangchângin kan kal a, Neihi chu a inkhai bâwr ve khawp mai. Kei erawh chu min awl a, ka chhuh lui bîk lo.

In kan thleng țêp tihah chuan ka mi hmuh vàng chuan ka ding chawt mai! Ka suangtuahna a ni miah lo! Ka insik vak a, a nâ ka hria a, ka hmaa ka hmuhpa lah chu a bo miah lo!

Keimahni tâwk zâwng takin Sangkima a rawn kal phei a, ani pawhin min rawn hmu ve nghâl. Makti hmel a pu hran lo.

Kei erawh chu ramhuai hmu ang mai ka ni! Mak ka ti a ni. Ka hmu thut bawk si a.

Neihi pawhin a lo hmu ve nghâl a niang, min rawn hnaih sawt a.

A lu chu a buk deuh tawh a, a lang bawrchhawr deuh nain hmâna ka hmangaih hmel kha a la pu reng. A mit khurte chu a tla deuh a, a mit hnuaiah val a awm kuau bawk. Chuti chung pawh chuan amah ka hmangaihna chu a la reh lo chiang tih ka hre thei nghâl.

"In bazâr a ni maw?"

'I dam maw?' emaw 'E, nang ni reng chein', ' inhmuh a va khât tehlul ém!...chutiang chu a sawi ka ring asin.

"Aw, a nih hi. Nang, in bazâr ve tho em ni? Inhmuh a va khât ve!" Neihi chuan a lo ti vat a, kei erawh ka lei chu a che thei lo, phuar beh ang hlauh  a ni.

"Aw, chhûngte tlawh pahin kan lo kal a."

A kut ka en a, zungbun ka hmu miah lo; mahse, nupui a neih tawh tho kha. Tuna ka hmuh mêk hi mi pâ a ni tawh, ka thinphu hi ka tihrantîr thiang tawh lo, nupui nei lai a ni, min kalsanin mi dang a neih tawh kha.

"I nu a țha zêl em?"

Ka țawng chhuak ve ta hrâm, chu pawh a ri chhuak țâwk țâwk a ni.

"Aw, țha e, a nula tawh e."

Sawi tùr, zawh tùr ka ngah, a kuh țul; mahse, a hun lo. A hmanhmawh hmèl si, bâkah, ka thil zawh tùr lah chu kan pahnih inkâr lam vek a la ni zui.

"I pite nèn in inhmu tawh tih ka lo hria a, ka lawmpui lutuk che u."

Min en ràn chung chuan," Ka lâwm e, nang pawh i dam țha tih ka hmu a, a làwmawm e," a ti sup a, chutah, a aw tiring deuhin," Ka hmanhmawh deuh a, ka kalsan mai ang che u, kan la inhmu leh dâwn u nia, tiraw Neihi?" a ti a, a nui pah suk a, a biangsum kha a la ngai reng.

In kan luh hnuah pawh chuan ka awm dàn a dik thei lo, ka mumang a nih ka ring rum rum, Sangkima ka hmua kan inbia tih kha ka la ring țha hlei thei lo.

"A chêr ve ta deuh alawm, hna a thawk nasa a niang," Neihi chuan a ti a.

Pa a ni ve tawh a, tlangvàl lai nèn chuan a inang thei lo alawm. A nupui fanaute tân a thâ leh zung a sêng nasa ve tawh dâwn asin.

*I HMANGAIH CHU A DUH PHAWT CHUAN THLAH ZALÈN RAWH, I HMANGAIH POH LEH A ZALÈNNA I NGAIH PAWIMAWHSAK ANG*

☆PIALRÀLAH TAL☆ - 21 By Dingdi Pachuau

Ka țhu rèn ráwn. Ka ke a kham ngut ngut a, bâkah, Sangkima ka han hmu leh kher khán min tibuai zo vek bawk. Ka hmuha ka buai deuh nak ang khân a buai ve miah lo erawh a mak ka ti a, ka rilru a na deuh ngawt nia.

Neihi chuan eirawng bâwlin min àwl char char, kei chuan heater ka on a, maimichhîng vang vangin Sangkima mawlh chu ka ngaihtuah veng veng a.

"Ngaihtuah duh suh, duh lo chea kalsantu che a nih kha, kei zawngin ka la haw so bawrh bawrh a nia," Neihi chuan a ti bawrh bawrh a.

Engtin mah ka chhâng lo, ka meng chuang bawk lo. A mit khur tla dâk leh a mit hnuai dum val kulh khân nun nuam tak a hmantîr bîk lo nia rinna min neihtîr a, eng vànga chutianga ring nge ka nih pawh ka hre thiam lo.

"A pi leh pute an hausa an ti bawk a, tunah chuan Aizawlahte an bazâr ve ta zak zak alawm. An nunhlui kha chu a ngai vak bîkin ka ring lo."

Kei chuan a ngaihtuah chhuah ve fo ka ring asin. Hlim taka hun kan hman dun lai te, mi hriat hlau tak chunga kan induhna kan lantîr ve hrâm hrâm hun lai te, an in ka lêng min thlah haw laite kha a hriat chhuah ve țhin ka ring tho.

Rilru na takin min kalsan mah se, a chungah hian ka duh chhe lo. Duh zâwk a nei a ni ve mai a, hei hi chu khawvêl nihphung a nia. Duh zâwk a nei a nih chuan a kal rêng ang chu, chelh thei ka ni lo. Hlimna țha zâwk a hmu a ni mai a, ka duhsak zâwk ang chu. Ka hmangaih êm a, a tâna țha tùra a hriatna lamah chuan a kal a, thlah zalèn tùr ka ni. Ka hmangaih miau si a, thlah zalèn mai kha ka tih theih awmchhun a ni bawk.

Zànah chuan Remlala a rawn leng leh tlat. Min rawn hrilh hmasa bawk si lo va, makti zetin ka lo en háw a.

"Khatiang khân min en bîk lo la, rawn surprise che ka duh alawm."

Neihi lah chu a lo lài êm êm bawk si a, ka nuih a tiza ru lutuk.

"Min rawn phone lãwk lo va, message takngial pawhin min rawn hrilh si lo va, tlangvâl nèn pawh kan lo awm dùn duh maithei a, ka bialpa nèn pawh," ka lo ti a.

"Bialpa i nei lo."

"Ka nei leh tawh alawm."

"Chuan, min hrilh ve miah lo maw?"

Ka nuih a zat tâk avàngin ka nui chhuak ta. Neihi lahin makti zet hian min lo en háw bawk a, an hmuhnawm dùn lutuk.

"Tih der in va nuam tak!"

Remlala chuan," Ka âwih deuh tak tak a, tlangvâl hian an rawn pan nasa thei che sia," a ti a.

Neihi chuan," A ni maw?" a lo ti hú a, a hriat thiam loh hmel lutuk.

"Ni e, nula, tlangvâl, patling țhankin tawh nèn lam maw le, a luck alawm," Remlala chuan a ti sap a.

Thingpui lum tùra thovin," Eng nge i lo tih dâwn a? I buai viau lo em ni?" ka ti a.

Ani chuan," Buai ila ka rawn kal dáwn em ni? Ka rawn tlawh khât tawh che alawm," a lo ti a.

A lêng ve ta reng a. Neihi pawh a țawng ve ngam leh tawh a, a titi leh bawrh bawrh tawh, a mitmeng ațang erawh chuan thil awmzia ka lo man!

"I haw phei dâwn maw!!"

"Aw, Krismas ka va hmang ve ang e," ka tih chuan," A țha alawm; mahse, a reh hle dáwn a nih chu," a lo ti a.

"Party-ah lo kal hrât viau suh aw," ka tih chuan," Kal nasa ang, chicks an chhe lo duh alawm," nui chung hian a lo ti a, ka ner sak a.

"Chicks sawi a hun tawh lo, ngaihzâwng nghet nei la, nupui nei tawh rawh," ka ti a.

"An vâng-"

"I zawn loh vàng a nih kha."

Kan inhnial țan leh ta; mahse, a țha lamah ka ngai. Hetia hrilh hi a ngai ve alawm, senior hnua nupui a neih chuan a nu leh pa an khawngaihthlâk.

Mut hmunah Neihi nèn chuan kan titi leh a, chhe lo a tih thu a sawi sep sep a.

"A țha dâwn riauin ka hria, ka sawi rem mai dâwn che u."

Min rawn sik vâwt.

"A tihchi loh. Anite chu lehkha thiam, khawpui mi leh hausa a nia, kei ve chu...ni lo, a chí loh a ni tawp," tiin a lu a thing nar nar a.

"Bialnu zawnpui a ngai alawm."

"A...min duh lo sa, a zahthlâk lutuk dâwn asin. Min duh hlauh se chuan a nuam ngawt ang chu; mahse, a kawng a thim mup," a ti chuai raih a.

Ka lo nui lo thei lo, a sawi dàn chu a ngai serious lutuk a.

Thil lei tùr engkim kan lei hnuah chuan haw phei tùrin kan inpeih tawh. Hma deuh hlekah ticket ka hauh sa tawh a, ticket chungchângah chuan buaina kan nei lo ve.

Haw kawng tluanin ka ke ruh chu a na nget nget. Nuam tak chu a ni lo, a vâwt bawk si a, țawng pawh ka țawng ve mang lo.

Haulawngah ka pain min lo hmuak a, Mama a rawn tirh mai ka ring a nia, tûn țum chu amah ngei a ni ta.

Neihi chu a phûl hlut a, ka pa chu a lo inrawlh ve zauh zauh. Kei erawh chu ka ngawi deuh reng a, ka ngaihtuahna ka kàwm a ni.

Kan khuaa Krismas hman chu ka châk hran lo, Sangkima ka hre chhuak lo thei dâwn lo va, kan hun hman zawng zawngte mitthlaah nimin ang maiin a rawn lang fiah leh uar uar dâwn, chu chu hrehawm ka ti lâwk a ni.

"Bawihte, i awm a nuam vak nange?" Ka pain arawn tih chuan ka lo nui sak a," Nuam lo lo ve, ka țawng peih lo mai mai maw le. In titi ka lo ngaithla alawm," ka lo ti ve zaih a.

Ka nu leh pa hian min hmangaihin min ngaihsak hle lo se chuan nun hi nuam ka ti lo ngawt ang. Chhungkuaa Krismas dam taka hmanho hlutzia hre lo phei ila chuan ka haw lo ang, a chhan chu kan hma hun kan hre lo va, a kum leh Krismas chhûng kimin kan hmang kher tawh lo maithei a, chuvangin, tûn hun hi a pawimawh.

Hun chu a pângngaiin a kal reng. Ka hlim hran lo va, hlim lo over ka ni chuang lo. Mite pawh lo fuih harha hma hun a êng zâwnga thlìrtîrtu hi ka thil sawiah khân ka fail ta zâwk em ni ka ti ru vawng vawng; mahse, hlim luih hi a va har tak!

Rualban zân lo ka nih tawh vàng hian mi zînga awm pawh hi ka inthlahrung deuh tawh a, ka pa chuan min fuih nasa. Ka nu pawh chuan engmah lo sawi ve lo mah se ka pa thil sawi chu a lo pawmpui tih ka hria, ka nu leh pate hian min hmangaihin min ngaihsak ropui mai si a, an fanu hian ka va tibuai țhìn tak em! An fanu nih hi ka tling lo tak tak a ni.

Krismas leh Kum thar inkârah Lungleiah ka chhuk leh rih a, ka pite ka tlawh a ni. Scooty kha ka khalh ngam tawh rih lo va, sumo-ah ka kal. Ka pi ka ngai ve tawh a, bâkah, kan vêngah hi chuan ka ipik leh tlat țhìn.

Bathlàrah chuan chuang chhuak pahin in nalh lam kha ka thlîr leh a, ka pi pawh chu ka bulah a țhu ve reng bawk a.

"Bawihte, Kum thar chu hetah hmang ve mai ta che?"

Ka pi melh zauhin," A châkawm khawp mai; mahse, ka nu leh pate an khua a har lutuk ang," ka ti sap a, in nalh lam chu ka thlîr leh a.

An lo sak len belh leh tawh a, a lo ding leh uaih tawh, pawisa chu an lo nei nasa a nih saw. Bathlàrah chuan ni lum ai an lo awm ve tho, a remchâng viau asin.

"Duh deuhte i nei tawh em?"

Ka pi zawhna vàng chuan makti deuh hian ka en a, ani chuan," Bialpa a nia ka tih, ka tunu hmel țha tak hian tlangvâl chhe lo tak tak rilru chu a tihbuai ve țeuh tawh ka ring a ni," a ti leh a.

Ka thaw huai phawt a," Ka pi, hmangaih ka nei tawh a, min kalsan hnuah hian tu tlangvâl mah hi tlangvâl an nihna angin ka en thei tawh lo a ni," ka ti sap a.

Khawngaih tih hriat tak hian min en a, a kut zûr tawh tak chuan ka bânah a rawn vuan a.

"Khawvêl nih dàn ve rêng a nia, nalinah țha tak i tawng leh mai ang. Hmangaih hmasate an liam a, hmangaih tharte an lo lang leh țhìn a nia, lunngai miah suh. Pathianin pasal țha tak, nangmah hmangaihtu tak a pe mai ang che," a ti a.

"Mahse, ka pi, kei chu heti mai hi ka ni tawh a, thinlung keh chhia ka nih tawh vàng hian mipa rin leh chu a har ka ti tawh ngawt ang," ka ti a.

Ani chuan," Lunngai suh, Pathianin a pe dâwn lutuk che, engkim a fel vek mai ang. I nihna ang anga pawm theitu che tawngin i thinlung keh chhe vek tawh kha hmangaihnain a rawn thawm țha leh vek mai ang," a ti leh barh barh a.

Ka pi thil sawi hi thleng dik lul teh se!

Kum thar zîngah kan chhûngkuain kan inkhâwm a, thu țha tak kan ngaithla leh. Thu țha hi chu ka hre tam, nunpui hi a har ka tia, kei ngei pawhin thu țha tak tak mi hnênah ka sawiin ka hrilh țhìn, chu ka thu hrilh țhin ngei pawh chu hei tunah pawh hian ka zàwm si lo a nih hi. Rilru ipik takin hun ka hmang reng a nih hi.

Chawhnu dâr 3 vêlah ruai kan țheh a, ka puar leh puar loh pawh ka hre lo. Mi dang hlim taka nui var var theite chu ka awt, kei chu ka mal. Mama leh Neihi fatu zîngah an tel bawk si a, ka mal lutuk.

Zàn zaikhawm hma si chuan ka nu chu ka room-ah a rawn lût a, kei chu chair-ah țhûin ka lo maimichhîng vang vang a, nunhlui ka ngaihtuah lêt a ni.

"Bawihte, thil sawi dùn lawk ang aw?"

Muangchângin ka meng a, ka nu chu enin," Aw, sawi la?" ka ti sap a.

"Min ngaidam rawh aw."

"Nu, eng thil nge ni ta?" A lam hawi chuan ka chair chu ka tivir ta nghâl a. Ani chu khumah țhuin nuam tih loh hmel tak hian min en a.

"I tâna țha ka duh loh chuan nu țha ka ni lo ang tiraw?"

A thil sawi chu ka hre thiam tho nain eng thil nge sawi a tum ni ang? Ka hlim loh vàng hian amah a inmawhpuh deuh em niang?

"Nu, nu țha ber i ni alawm, keimah vànga i buai nasatzia hi ka theihnghilh ngai miah lo ang," ka lo ti a.

"I nu hian ka hmangaih vàng che leh i hmakhua ka ngaih avàngin thil țha lo tak ka ti a ni."

Eng thil nge a tih? Ka pasal tùr a lo zawng em ni? Nge ka chungchâng dik lo taka sawi an lo awm ang a, chûngte chu sualin a lo bei? Ka nu a nia, ka tân a țha lo tùr  a ti miah lo ang.

"Nu-"

"Ngaihdam theih tawh loh ka nih pawhin ka hre thiam ang. I tân thil țha ka duh váng chauh a ni."

Ka nu hian tual a lo that em ni zâwk?!! A ni thei lo, chu zawng, a râpthlâk lutuk!

"Nu, min tihrehawm a nia."

"Sangkima kha i tân ka duh lo a ni. Ka hmangaih che a, ka fanu, rethei taka a awm tùr hi ka hmu thei lo a ni. Chuvàngin, kalsan tùr chein ka ti a."

Ka nu thil sawi vàng chuan ka khawng lo chauh! Ka intichak lui hrâm hrâm, chuti ni lo se chuan ka che thei hauh lo ang. Ka kut leh ke a rawn hit leh țan a; mahse, he thil hi ka hneh tùr a ni ka ti rilru tlat.

Ka țang nasa lutuk a, khua vâwt mah se ka thlan a tla thei nia.

"Nu, eng thil nge-"

"Bawihte, ka tihsual liau liau a ni. Hetiang tak hian i tuar phah ang tih ka hre phâk lo va, ka hriat chhuah meuh chuan ka tlai tawh, engmah ka tițha thei tawh lo. Thil pawi tùr chu a lo pawi zo tawh a ni."

Ka chair vawnna kut chu a vâr pap thei, ka țang lutuk. Ka thil hriatin min shock lutuk a, ka thâwk a rawn buai pah nèn, ka chêt