☆PIALRÀLAH TAL☆ - 19 - 23 By Dingdi Pachuau

Ka nu hian tual a lo that em ni zâwk?!! A ni thei lo, chu zawng, a râpthlâk lutuk!


"Nu, min tihrehawm a nia."


"Sangkima kha i tân ka duh lo a ni. Ka hmangaih che a, ka fanu, rethei taka a awm tùr hi ka hmu thei lo a ni. Chuvàngin, kalsan tùr chein ka ti a."


Ka nu thil sawi vàng chuan ka khawng lo chauh! Ka intichak lui hrâm hrâm, chuti ni lo se chuan ka che thei hauh lo ang. Ka kut leh ke a rawn hit leh țan a; mahse, he thil hi ka hneh tùr a ni ka ti rilru tlat.


Ka țang nasa lutuk a, khua vâwt mah se ka thlan a tla thei nia.


"Nu, eng thil nge-"


"Bawihte, ka tihsual liau liau a ni. Hetiang tak hian i tuar phah ang tih ka hre phâk lo va, ka hriat chhuah meuh chuan ka tlai tawh, engmah ka tițha thei tawh lo. Thil pawi tùr chu a lo pawi zo tawh a ni."


Ka chair vawnna kut chu a vâr pap thei, ka țang lutuk. Ka thil hriat hian min shock lutuk a, ka thâwk a rawn buai pah nèn, ka chêt buai ka hlau a ni.


"Nu...nu...ka...ka..." ka buai leh ta tho chu a nih hi.


Pângngai taka ka awm theih leh meuh chuan zàn dâr 9 a ri tawh. Khumah ka mu zar a, ka nute, Mama leh Neihi ka khum bulah awmin ka harh chian hnuah ka pate chu sitting room lamah Pa Lalate kàwmin an phei. Ka taksa pawh a dik vek tawh a, ka chàu deuh hlek mai chauh a ni.


"Haw tawh rawh u, a tlai tawh si," ka ti sap a.


"Hetiang hian i awm ngai tawh si lo va, min timangang lutuk alawm," Neihi chuan a ti a.


Mama ve thung chu a ngawi reng a, ka kut a hmet neuh neuh reng a, Neihi ve thung chuan ka ke a hmet thung.


"Nia, buai loh ka tum ve lutuk asin," ka ti leh sap a.


"Eng emaw takin a țhâwng che a ni lo maw? Entîr nân, U Sangkima'n rawn be thut ta che se la emaw a boral thu rawn hrilh ta che se la-"


"I sawi râpthlâk!" ka lo ti sap a.


"Chu tak rêng chu, thu thin țhâwng deuh i hria a niang ka ti alawm," a lo ti leh a.


"Ka hriat chuan ka hrilh ang che."


An haw hnuah rei vak loah chuan ka muhìl ve nghâl. Ka taksa a chàu a, ka meng thei lo.


Zînga ka harh chuan ka zia ta viau. Ka rilruah erawh chuan ka nu thil sawi hlîr kha a awm.


Sangkima chuan hrehawm a ti dâwn lutuk! A rethei tih a inhria a, a bulah ka sawi chhuak ngai lo. Ka hmangaih êm avàng leh ani pawhin min hmangaih ém avàngin dinhmun kha hmun pawimawh kan chantîr duh lo. Kan pahniha kan inhmangaihna kha kan dah pawimawh ber a, thil dang kha chu a pahnihnaah.


Mahse, kan heti ta a nih hi.


A bialnu kha chu a lem lo chiang. Ka nu thil sawi vàngin min țhen nân bialnu dang a nei a, fa hial a paitîr kha. Hetah pawh a rawn hruai a, a nupui tih an hre vek, kha kha chu a lem thei lo.


Ka nu chuan min hmangaih vàng leh ka tâna țha nia a hriat angin a fanu tân thil a ti mai a ni, tu nuin nge a fanu hmakhua ngai lo ang? Ka dem ringawt thei lo. A hriat chian loh vàng a ni mai, a inthiam loh avàngin a inpuan leh tho kha.


Sangkima'n a lo dawnsawn dàn tùr chu ka ngaihtuah thiam lo. Hrehawm a ti ang a, a zak ang a, a inkiltawih bawk ang. Ka nuin a tih hma pawhin kan ina lo lèn chu a neih ngai loh kha. Aw, ka va khawngaih tak! Min kalsan tùra rilru a siam lai vêlin hrehawm a va ti ve dâwn em!


Mahse, tunah zawng nupui fanau neiin a awm tawh a, a pi leh pute nèn nuamsa takin an awm tawh bawk a, thil țha lo tak kan tih pawh hian kan tâna țha tùr hi a rawn thlen ve thei tho a nia.  Kan ințhen, ni lo, min țhen pawh kha kawng lehlamah chuan a tân a țha a ni, a pi leh pute a tawn phah a, a nu lah hrisèlna țha zâwk neiin a awm bawk a.


Mumal lo zetin ka țawngțai. Sangkima tân vek ka dîl. Eng nge ka dil ber pawh ka hre chuang lo, a tân thil țha her chhuahsak tùrin a ni deuh ber mai.






*HUN HIAN KAN NUNAH THIL ȚHA CHAUH A RAWN HER CHHUAHPUI LO VA, THIL ȚHA LO PAWH A RAWN HER CHHUAHPUI VE THO*






Min țhen avàngin Sangkima pawh ka dem chuang lo, ka nuin min țhen tùra a tih vàng a ni a, hlimna a chhar hma bîk leh min thlâktu tùr a zawng hmu hma bîk chu a thiam loh a ni chuang lo, hlimna a zawng a ni ve mai. Hlim loh tu nge duh lo awm?


Ka ngaihtuah kual vak lo thei lo. Ka nu ka dem lo va, a bul ber chu keimah ka nia, ngaihzawn miah loh tùr ka ngaihzàwn vàng a ni.


Mahse, ka hmangaih êm asin. Amah vangin hmangaihna awmzia ka hriat phah a, hmangaih neih vànga nun hlim theihzia leh hmangaihna vàng véka thinlung nat theihzia pawh ka hriat phah a, zirlai tam tak ka zir chhuah phah. Sangkima hi ka haw lo, ka nu pawh ka haw lo, keimah leh keimah ka inhua.


Keimah vàng liau liauin ka nuin Sangkima min țhen tùrin a ti a, Sangkima chuan ka nu a zah vàng leh a tih tùr a nih vàngin min țhen, engtiang taka nasain nge min țhen tùra a tih ka hre miah hlei nem. A lo hnial ve maithei asin, 'loh theih loh' vàng a nih ka ring.


Ka nu chu hreh tak chungin ka zâwt chiang leh a, ani chuan," Bawihte, sawi chhuah pawh hi a zahthlâk ka ti. Eng hmanrua pawh hmang mai tùrin ka ti a, in ințhen theihna tùr eng pawh kha țha vek ka ti mai a. Khatih lai khân a rilru kha a lo hrehawm dâwn êm mai," a ti sap sap a, khawngaih tih hriat tak hian min chûl hliau hliau a.


"Ka thil tih pawizia kha ni tin hian ka hre chhuak zêl, a hnênah ngaihdam ka dìl a ngai a ni, i tân chuan eng pawh ka ti mai ang, i hlimna ka duh a, in inkawp leh- "


"Ni lo e, Nu. Thil kal tawh a nia, inkawp leh phei kha chu sawi chi a ni miah lo. Nupui neiin fa a nei tawh a, keimah vàng hian tu mah hian an tawrh ka duh tawh lo. Mihring chu thil tisual thei, ngaihdam ngai kan ni țheuh alawm," ka lo ti vat a.


"Ka lo tidik lo êm a ni."


Sangkima chuan hrehawm a va ti ve dâwn tak! A zahthlâk dâwn bâkah a dinhmun vàng liau liau a ni si, kei ngei pawh hian hmuh ka hreh ngawih ngawih tawh ang, țawng khumtu chu min hringtu ka nu ngei a ni si, min be lo leh message takngial pawh ka dawng ngai lo kha ka hre thiam uar uar tawh, a tân tihchi a ni tawh lo.


A nih, kei hi dinhmun hniam zâwk lo ni ta ila, Sangkima nu khân a fapa țhen tùr khân min ti ta se, țhen har ka ti viau dâwn; mahse, a nu ka zah vàng leh ka 'chapona' vàngin ka țhen ngei ang, mihring chuan chhûngrilah chapona kan nei țheuh a, mi thil sawiin kan chapona a rawn tawk che zeuh a nih chuan 've taka' tih rilru kan pu vat țhìn. Induh tâwkna rilru a chawk tho țhìn.


Mama ka phone a, ani pawh hian thil a lo hre ru karin ka ring tlat a ni. Ţhian inkawm reng, thurûk engkim inhrilh vek an nih kha.


A lo thlen veleh chuan," I țhianpa chuan a lo la be ngai che em?" ka lo ti chawt a.


"Engtizia nge?"


"Thil awmzia ka hre tawh a ni."


"Eng thil awmzia maw?!"


A hre lo der thiam hle mai. A țhianpa thurûk hi ka hriat a ring pha lo hle a ni ngei ang, a àwm tho.


"Min țhen chhan kha maw le. Eng thil mah ka zâwt dâwn lo che, a thurûk min hrilh tùrin ka ti lo che a; mahse, a hnênah hian ngaihdam dìl ka duh a ni, chu chu min hrilhsak la ka duh a ni. Ngaihdam theih thil ni lo mah se, ngaihdam dìl erawh ka ba tho. Hmaichhana hrilh ka duh viau a; mahse, ka tân hmuh loh hi a țha, ani pawhin min hmu duh kher lo ang."


A ngawi reng a, a ngawih rengna chuan a thurûk chu a hriatpui ngei tih a nem nghet ka ti.


"Engkim vàng khân làwmthu min lo hrilhsak la, hlimna min temtîr zawng zawngah te leh hmangaihna awmzia min hriattîrnaah te làwmthu ka hrilh a, a hma hunah, thil engkimah thil  țha ber ber ka duhsak tih min lo hrilhsak bawk rawh aw."


"Hmaichhanah, a nih loh pawhin phone-ah hrilh la?" a ti ta.


"Ni lo, tunah chuan hmuh leh biak pawh hi châk viau mah ila ka zah êm êm tawh a ni. Nupui fanau nei a ni tawh a, mi pasal mi pâ, a bialnu hluiin va biak pawh hi thil mawi a ni hek lo," ka ti leh a.


"Mahse-"


"Ka hmu thei lo ang, ka zak ngawih ngawih; mahse, ka nu kha ka dem viau thei lo. A ngaih dànin ka tâna țha tùr thil a lo ti ve a ni mai a, dem tùr ber chu keimah hi ka ni. Hetia ka awm chhan hi ka cho chhuah vek a ni, Sangkima kha ka hmangaih êm a, khati lutuka hmangaih tùr kha ka ni lo asin. A tân pawh ninawm lamah ka kal thei a, a hna thawk tùr pawh thawhtîr thei lovin leh zànah pawh chàu tak chunga mentîr hrâm zêltu ka nia, a tân zawng ninawm mai ka nih pawh ka ring ta rum rum. Khatia nupui a nei vat leh fa a han nei vat te kha a tân malsàwmna a ni, min theihnghilh nghâl vat thei ta bîk rêng a..."


Ka biang a rawn lum thla pap pap a, ka mittui a tla tih ka hre leh chiah. Ka mittui hi a tla khât ve tawh asin; mahse, vawiin zet zawng, ka mit hian tui a lo pai tam leh tawh lutuk a, a khuap sêng tawh lo a nih dâwn hi.


"Aizawlah in inhmu tih a sawi a."


Ka mittui hru hul pah chuan," Hmu e, mak ka ti lutuk! A hmel ka han hmuh chiah khân a bawrchhawr ta lutuk kha mak ka ti a, nun hlim takin a hmang bîk lo emaw ni ka ti bawk a; mahse, hna a thawk rim ang a, pa nih tawh chuan tlangvàl lai nèn a inan theih tawh loh tih ka ngaihtuah leh a, rei pawh kan inbe lo. Khatih lai khân min țhen chhante kha lo hria ni ta ila chuan ka hmu ngam teuh lo ang," ka ti a.


Mama bula ka inhrithla chu ka zia deuh hawkin ka hria. Hlim hmel put ka tum hrâm hrâm; mahse, a harsa a ni. Min țhen țantirh ai khân ka rilru a hrehawm daih zâwk. A hma kha chuan a duh thu rêngin min țhen emaw a tih theih a, tunah chuan khatiang kha a lo ni lo tih ka hre tawh bawk si a, rilru a hrehawm ngawih ngawih. Hmuh pawh ka châk tawh lo, ka hreh tawh. A rilru tùr ka ngaihtuah lo thei lo, ani pawhin min hmu duh tawh kher lo ang, ka nu fanu ka ni miau a.


Aizawl lama phei pawh ka tum rih lo, ka rilru a buai a, zànah ka muhìl thei lo va. Room-ah ke na ûrhin ka vei ka vei țhìn, thil țúl lo leh sâwt lo a ni tih ka hria; mahse, ka țhu thei țhìn lo.


Ka taksa a chak lo sâwt viau. A chhan chu thil ka ei thei leh tawh lo va, lung damdawi ka ei reng a ngai bawk si nèn. Ka mu thei lo va, ka ngaihtuahna lah a chàwl thei hek lo. Ka nu leh pa an mangang tih ka hria, tihmangan hi ka duh lo asin; mahse, kei pawh ka duh dànin ka awm thei lo a nih si hi. Hlim taka awm a Sangkima theihnghilh ka duh a, ka thei si lo. A châng phei chuan ka nu khân min lo hrilh lo law law zâwk se ka ti, nun pângngai ve deuhin ka hmang ve thei tawh kha a ni a, tunah chuan a hnung tawlh zâwngin hun ka hmang leh tawh a nih hi.


Damdawi ina inentîr tùrin ka pa chuan min ràwn a; mahse, he thinlung natna leh hrehawm tihna damdawi hi tu doctor mahin an la hmu chhuak lo, chu damdawi tel lo chuan ka dam thei lo ang.


Damdawia inentîr ka duh miau loh vàngin ka nu mangang chuan doctor râwnin Lungleiah a kal țhìn a, Mama pawh min thlêm tùrin a ti țhìn. Mama bula ka awm hian ka zia deuh berin ka hria, ka rilru a hria a, ka dam lohna pawh a hria a ni. Eng thil sawi lo mah se, ka bula a awm hian a nuam ve hranpa ka ti. Hna thawh tùr a la vâng rih a, min rawn tlawh peih viau bawk.


Ni khat a lo lêng chuan," I rilru tihahin tihrehawm tawh lo teh, i ngaihdam dìlnate kha ka hrilh vek tawh a, ani chuan thiam lohna pakhat mah i neih loh thu leh i nu pawh a ngaihdam vek tawh thu min hrilh asin, i rilru kha tihrehawm tawh lo hrâm teh," a ti dap dap a.


"Min ngaidam dâwn tih ka hre sa vek alawm, thinlung țha tak nei a nih vangin; mahse, a thinlungah ser lianpui ka siamsak tawh a, keimah hi ka inngaidam thei ngai lo ang. Ani pawhin a  theihnghilh thei ngai dâwn lo va, chutiang chiah chuan kei pawhin ka theihnghilh thei lo ang," ka lo ti a.


"Hetianga i awm hi hmuh ka duh lo, hawh, lêng chhuak mai mai ang hmiang. Khawlaiah i chhuah ngai tawh loh êm kha, Neihi kan sâwm ve ang a," tiin naupang chhe thlèm tak hian min thlêm a.


"Khawiah maw?"


"In in ni lo, hmun dangah a ni tawp mai," tiin a nui a.


"Ka țawp si, bâkah, hmun dangah chuan Sangkima ka hre chhuak zêl a, a rilru ka tihnatsak kha ka hre chhuak leh nghâl zêl bawk. Chuvàngin kan in hi a rawn kal ngai lo deuh ber a, ka tawm tlawk tlawk chhan pawh hei vàng hi a ni."


"A ho mai mai! Le, chhuak ang le," a ti a, ka room ațang chuan kan chhuak a.


Ka nu chuan," Thingpui in in duh em?" a lo ti vat a, Mama chuan," Duh rih lo mai, ka'n lèn khawthawnpui ang e, hmun hla tâwkah kan lêng dâwn," a ti a.


Khua a la vawh deuh vàngin ka nu chuan shawl min rawn pe vat a, ka uggs dum chhehchhawl atân ka hman ngei mai chu ka bun leh tawh. Slipper ai pawhin ka bun zing, thlasikah chuan.


Car chahbi chu a la chhuak a, ka pa chuan," Va lêng chhuak ula, rilru thawveng takin in lo haw dâwn nia," a lo ti a.


Za lo zet hian ka nui a," Kan va paih bo vek ang," ka lo ti ve a.


Mama pawh chuan," Hlate khuaah ka lènpui ang a, nui var varin a rawn haw tawh ang," a lo ti ve bawk a.


Neihi kan sâwm bawk a, kan khua ațanga hmàr lam khaw hnai ber Chengpui lamah chuan kan tlân a, eihi chu a hmaah ka țhuttîr a, kei chu a hnungah thâwl zetin ka țhu. Neihi a țawng barh barh a, kei erawh chu ka ngawi reng lehpek. Kawng chu a țha fahran lo kher mai, âwn zetin ka țhu a, motor tlân chuan min àwi ka ti mai, rei pawh kan tlàn hma chuan ka mut a rawn chhuak selh selh, ka meng lui thei thlâwt lo.


"Ka muhìl dâwn a nia."


"Aw le, i muthilh theih phawt chuan a țha lutuk alawm."


Ka harh meuh chuan khua a lo tlai lam tawh a, kan la tlân reng tho nia. Ka han khap sak sak a, khawi laiah nge kan tlàn ka bo ta hû mai.


"Hei khawi lai nge kan tlànna hi?" Ka mit ka nuai chat chat a, kawng nuam zetah kan lo tlân tawh reng si a, ka bo viau pawh chu a àwm e.


"Lungleiah kan tlang daih a."


Chuti a nih chuan helai hi Pûkpui kawng a lo ni maw? Kan va tlân thui ve!


"Eng nge kan tih dâwn?"


"Naktûkah inentîr tùrin ka hruai dâwn che maw le, min hnial lo hrâm rawh aw," Mama chuan a lo ti a, rearview mirror ațang chuan min rawn en a, a inthiam loh hmel deuhin ka hria.


"Hei hi in ruahmanna a ni maw?"


"Ni deuh tho. Remchâng takin nang i lo muhìl bawk si a, kan hrilh loh vàng che erawh chuan ngaihdam ka dîl e," a ti leh a.


Neihi chuan," Kan ngaihtuah vek che a ni, tihngaihna kan hre bawk si lo va, hre thiam hrám rawh," a lo ti ve a.


Ka țawng peih ta lo.


Min ngaihtuah vànga ti an nih miau vàngin ka thinrim thei bîk lo ang. Ka pain inentîr tùra min tih lah khân ka hnial ziah, fanu thuâwih lo tak chu ka lo ni.


Serkàwnah ka pite in kawtah kan ding a, ka kal dâwn tih an lo hrilh sa vek tawh a ni ang, kawtah chuan ka pi leh puin min lo hmuak. A tlai tawh si, khua a vawt bawk nèn, ka va khawngaih dùn tak!


"Pi, engati nge pâwn khaw vâwtah in lo din a? Lût ang u, in dam loh phah ang," ka ti khar khar a.


"Kan lo hmuak che alawm, kan tunu duat i ni si a."


Mama'n car chu garage-ah a dah a, in chhûngah kan luhsan. In chhûng chu a lum nuam hap mai, pâwn boruak vawt zet vàng chuan ka hmai chu a vawt thlar mai.


Mama lo luh hnuah ka pi leh pute chuan Neihi leh Mama chu an chibai leh rih a, ka nutei pawh room ațanga lo chhuakin a rawn phûl hlut.


"E, mikhual kan nei dâwn elo? In va zahawm țhuau țhuau ve! In ril a țâm tawh em? Thingpui in in phawt ang nge chaw ei kan siam nghal dâwn?"


Chaw ei chu ka nutein a siam a, Neihi'n a lo pui bawk. Kei erawh chuan ka ke chu ka lo hmet nauh nauh. A kham țhûm a, a mu deuh reuh bawk sia, a nuam lêm lo.


Zahzèlah leh an ngaihțhat nân ka kîl ve a, ka ei mang lo. Fian khat chu ka ei ve maithei tih chauh a ni, ka châk mawlh lo.


Motor ka chuan chauh deuh vàngin ka room-ah khumah ka mu deuh nghâl mai. Neihi leh Mama pawh an rawn lût a, an țawng luam a, kei erawh ka lute chu a na deuha ka hriat vàngin ka țawng peih lo.


Ka lo muhìl leh sek a niang, țawng deuh bul bul riin min tiharh a. Ka awmna ka hai țêp lehnghal.


"...naktûk lamah ti zâwk la, hei a muhìl a, a chàu deuh a niang, kan tlân thui ém a ni." Hei chu Mama țawng a ni tlat. Tu nge a biak le?


Ka che duh miah lo, ka maimichhîng leh nghâl daih bawk, muhìl ang chiah ka ni leh tawh.


"Ni lo ve, nangmah vàng a ni lo, a inentîr ang a, a dam vat mai ang. Lo ngaihtuah miah suh aw."


Hm, ka nu nèn an inbia a ni maw? Ka nuin a lo ruahmanpui lehpek tawh a nih hi. Min ngaihtuahtute hi ka va tirethei hlawm si ém!


"Um, a nih, i tih tlat chuan le."


An in-phone zawha ka mutna bula a rawn țhut chuan," Tu nge i biak? Ka nu a ni maw? Keima màwl vàng a ni, lo biak daih tawh tùr a nia," țhangharh deuh hlawl ang thei tùr berin ka țawng chu ka tiban deuh a, a thâm deuh bawk. A ang fûin ka hria.


"I lo harh daih tawh elo?!"


"Harh daih lo ve, ka harh chiah. Khaw nge Neihi?"


"I pite nèn an inkâwm. A țawng leh bawrh bawrh tawh mai," a tih chuan ka nui deuh sak. Ani hi chu a ngaihtuahawm loh, a țawng duh a, mi pawhin an nêl zung zung.


"A la hma a ni maw? Dâr eng zât nge?" tiin ka zâwt a.


A phone en zauhin,"Dâr 7:30 chiah," a ti sap a.


"Motor-a ka mut tam nèn ka mut a la chhuak deuh tho nia, ka thau dâwn a niang," ka ti a, ka nui deuh a.


"Țhianpa a lo kal dâwn a."


Ka nui hmel chu a reh riai riai ang chu.


Eng nge a lo tih dâwn? E, Mama țhianpa a nia, a rawn hmu ve dâwn tihna a nih chu. An inhmu khât ve dâwn asin, khua hmuna awmte chuan a rawn pan ve ang chu maw le.


"A nih tak chu."


Ceiling chu ka en char char a, Sangkima a rawn kal dâwn a, a țhianpa rawn hmu tùrin. Min rawn hmuh ve a tum ang em? Min rawn ngaihtuah ve tho ang em? Tunah hian a rawn tlân mêk ang a, a phûr viau ang em? Min rawn hmu tùra rawn kal ni zâwk ta se...


Ni lo ve, teuh lo mai! Keimah min hmu tùrin a rawn kal dâwn lo. 'Mâwl lutuk! A țhianpa hmu tùrin a rawn kal dâwn. Fing deuh teh, kalsan tùra ngentu fanu hi a rawn ngai pawimawh viauin i ring em ni, Mâwl-lian? Harh chhuak teh' tiin ka inhau mawlh mawlh.


Ka hawi a, Mama pawh a lo awm tawh lo. Tunah chuan ka mal leh ta hle mai, mi dang chuan kawm tùr an nei vek a, kei chu, khawhar tak leh mal takin  ka khumah ka mu kawm ngal chu a ni si a.


Kawngka a rawn ri a, ka lo ngaihsak hran lo. Neihi'n min rawn check dâwn tih hriat reng, chuan Sangkima a lokal thu min hrilh ngei bawk ang.


Khum chu a rawn hniam deuh sat a, zanin chu ka bulah mu mai se, naktûk lamah erawh chuan inentîr zawhah kan haw leh thei tawh ang a, ka bula mut a hreh bîk lo ang chu maw.


"Zanin chu hetah ka bulah mu ve mai rawh aw, a hrehawm vak lo ang," ka ti sap a.


Min chhâng lo. A phone a khawih leh tawh a ni ang, buaithlâk thei. Earphone a benga a vuah phei hi chuan zàwi tê a biak chi pawh a ni lo.


"Mapui?"


Ka khawng nghâl awt.


He hminga min kotu hi ka hre chiang, ka kut chuan zàwi muang hian ka âwm chu ka dawm a, ka thinphu phu nasa lutuk chu a rawn zuang chhuak ang tih a hlauhawm zâwk a ni!


Ka inher ngam lo, ka hmu ngam tawh lo.


"Khawngaihin...hâw rawh."


A hre pha kher lo maithei, a ri chang chang chauh a ni. Hetia ka tih mai hi a ngai, hmuh ka ngam tawh lo. Ka thinphu a pângngai thei bawk si lo.


"Mapui, hetiang hian awm suh."


"Khawnge Mama?"


"Sitting room-ah."


"Amah hmu tùrin i rawn kal a ni lo'm ni? Hei hi chu ka room a nia," ka ti leh a.


"Nangmah hmu tùr chein ka rawn kal. I dam țha lo tih ka lo hria a."


Keimah min hmu tùrin maw?! Ka âwm chu ka dawm nghet sauh a, ka nem deuh ngawt ngawt.


"Ka dam țha alawm. Min ngaihtuah suh, hâw tawh rawh."


Ka chêt loh avàng leh a lam ka hawi loh vàng chuan khum ațangin a tho ta a ni chiang, dunlop chu a kâng leh deuh sawt tawh.


A hâw dâwn ta. A hmel ena tih takzeta ngaihdam dìl ka duh êm êm laiin ka ngam lo. Ka zak, ka zah ngawih ngawih. Mi pâ niin mi pasal a ni tawh a, hetia ka room-a a lo kal pawh hi a mawi lo. Mama pawh ka àn khum hrep ang.


Ka maimichhîng a, chumi rual chiah chuan ka bekah leh ka hnâr kàwnah mittui a luang thla a, ka kut veilam chuan ka hru zoh a.


"Ngaihtuah loh theih i ni lo a ni."


Eng a!! Ka meng zawk, ka hmai bul chêtah tak a lo țhingțhi hniam tawh niin, a hâw tawhah ka ngai asin.


"I la hâw nange?"


"Hetiang chuan ka hàwsan thei lo ang che."


Ni lo, ni lul lo ve, hmangaih leh duh dang neia nupui fanau nei tawh hi a bialnu hlui bulah a awm thei lo, a nupui fanaute a ngaihtuah tùr a ni. Thil mawi a ni lo, kei a nupui ni ta ila, ka duh lo ngawt ang.


"Tițaptu che ka nih vàng hian pawi ka ti takzet a ni, min ngaidam rawh."


Makti zet hian ka en a, ngaihdam min dìlna chhan tùr a awm lo. Ngaihdam dîl tùr dik tak chu keimah hi ka ni, keimah vàngin kumkhua a reh tawh lo tùr zahna a tawng si a.


"Ka nu thil tih vàng khân ngaihdam ka dîl che a, a bul chu keimah ka ni. A mawhphurtu ber ka ni, ka nu kha chuan ka tâna țha nia a hriat vàngin a ti a ni a, ngaihdam theih ngai loh tùr thil ni mah se, ngaihdam díl che hi ka bâ a ni. Kawng engkimah min ngaidam dâwn nia, chuan thlamuang takin ka nun ka hmang ve thei tawh ang," ka ti a, ka thaw deuh hap hap a. Ka hnârah ka thâwk a leng lo țan tawh a, ka ka hmang lo chuan thâwk a harsa.


"Engkimah ka ngaidam vek che, ngaihdam ngaiin i awm lo nain. Chutiang chiah chuan kei pawh min ngaidam rawh, ka chapo vàngin, i nun ka tihchhiatsak si che a."


Ka thaw deuh kâwk a," Thiam lohna i nei lo va, ngaihdam i ngai hek lo. Kan inngaidam tawh bawk a, hâw tawh rawh..." ka thâwk a dik lo leh tawh si a, hetianga ka awm hi hmu lo se ka duh.


"Engtin nge i awm, Mapui? Min tihlauthâwng a nia!" tiin ka kut chu a rawn chelh a, hmangaih taka ka kut a vawn lai te kha ka hre chhuak zawk, a vawn chu a lo la nuam reng, keimahah effect a la nei reng bawk a nih hi.


"Mapui??! Mapui?"


"Mamate... ko...rawh..."


Ka âwm chu a insêp dat dat a, control ka tum lutuk; mahse, ka buai leh tho si. Ka kut leh ka ke hmawr a rawn hit leh a, a rawn khawng leh țan tawh.


"Hman...hmawh rawh!"


A tho vat, a au tuar tuar chu ka hre vuai vuai a, Mama leh Neihi'n min ko mawlh mawlh ka hre leh, ka meng uau a, Sangkima mangang lutuk hmel ka hmu.


"Mapui, harh teh. Mapui, ka hmangaih che, ka hmangaih lutuk che..."


Ka maimichhîng ta riai riai, Sangkima chuan min lo la hmangaih reng a nih chu.




*KA HMANGAIH CHU KA HMANGAIH VÀNG RINGAWTIN KA CHELH THEI LO, AMAHIN PAN DUH LAM A NEIH TLAT SI CHUAN...*






Lawmsangkima
~~~~~~~~~~~~


Ka hmangaih hmu tùrin phûr takin ka kal a, a rilru leh taksa a chak tâwk lo tih hre mah ila ka insûm thei lo. Țhianpa Mama'n phal vak lo mah se min khap bet thei lo a ni, tunah hi chuan eng mah hian min dang thei tawh lo ang a, tu mahin min khap bet tawh lo ang. Ka hmangaih lak ațang hian eng mahin min țhen hrang tawh suh se.


Engkim ka hrilh ang, ka hmangaihzia ka hrilh ang a, ka hrilh nawn reng mai ang. Ka kalsan tawh lo ang a, thil awmzia a hre thiam lo a nih pawhin ka hrilh fiah vek ang. Ani bâk hmangaih ka nei lo va, ka nei ngai hek lo ang.


Room-ah amah chauhin a lo awm a, ka kal dâwn vàngin an lo bosan a ni mahna, min hmuh chu a ring vak lo a ni ang.


A rilru ka tihnat êm avàngin min hmuh duh ka ring lo sa a, a dik chiah bawk. Ka lam hawiin a rawn inlet lo va, a àwm ka ti. Na taka ka siam avang khân ka inngaidam thei ngai lo l. Tuin nge a hmangaih tina ngai? Ka nêp ka ti țhìn, a chunga ka thil tih dàn kha hmangaihtu thil tih a ni thei dâwn em ni? Ka kalsan avàng khân ka inhaw ngawih ngawih reng a, hmeichhe thu dàwn takin ' Khatih lai khân a nu kha lo hnial tlat ila, tûn dinhmunah hian ka dah àwm si lo'...


A thâwk a rawn dik loh vàng chuan ka hlauthâwng a, chêt ngaihna ka hre lo, ka buai vek! Heti khawp hian ka la hlauthâwng ngai lo, ka au vak vak ringawt. Ka nu kha thawhahin a buai țhìn a nih kha, ani kha mangang takin ka buaipui ngai lo; mahse, Mapuii  hetianga a awm hi ka vawi khat hriatna a ni bawk si a, ka hlauthâwng, a thih ka hlau.


Ka ko mawlh mawlh a, ka hmangaih thu ka hrilh. A hriat chian theih lai khân engah nge ka hrilh loh? Ka hrilh hman tawh kher lo maithei asin. Ni lo, ni lo, a thi lo ang, a thi tùr a ni lo tawp mai.


Mi dang hmai êng pawh ka zah thei tawh lo, ka hmangaih thu ka hrilh mawlh mawlh a, a bulah țhingțhi rawpin a kut chu ka chelh a, a lo khawngin a vawt vek. Ka hùm a, ka ko leh țhìn, a hre thei lo ang tih ka hlau lutuk.


Ka rilru a fîm thei lo, ka hlauthâwng lutuk chu ka buai nuai mai. Ko mawlh mawlh chung chuan ka en kual a, a kut leh ke chu an lo hmet nawk nawk tih ka hmuh chuan," Engtizia nge? Nâ a ti ang asin," ka ti țhawt a.


"Țhiana, a kut kha hmet rawh, a khawng kha tihzawi a ngai a nia."


Ka hre thiam lo va, ka piah chiaha Neihi'n Mapuii kut a hmeh dàn chu enin chutiang chuan ka ti ve a.


"Damdawi inah hruai mai ang?"


"A ngai lo ang, a rawn harh mai ang."


A rawn harh mai ang maw?!! A va harh thei si lo ve! A nunnain a tuar vaih chuan, ka thin a tâwt up up mai.


A rawn rûm deuh a, a rawn harh dâwn emaw tiin ka lo ko nghâl mawlh mawlh; mahse, a lo harh lo.


Ka dam chhûnga dârkâr rei ber a nih ka ring. Mipa ka ni a, ka buaiin ka chiâi tho, ka hmangaih hi ka chân hlen ang tih ka hlau.


Ka țawngțai khât tawh viau nain tunah tak hian ka rilruin ka țawngțai mawlh mawlh, Pathian hnênah ka hmangaih chu a nunna lâksak lo tùr leh țha taka rawn harh chhuak tùrin ka dîl, dìl tùr dang ka hre lo, ka chham ngai chu ka chham mawlh mawlh reng.


Rei fé kan buaipui hnuah chuan a rawn tâl deuh ta a, a kut leh ke pawh a zawi tawh viau. A rawn meng lep lep a, ka lo ko vat a.


"Tui."


Neihi'n bottle ban vatin a chhìnah tlêm bunin a intîr phawt a, a chàu hle a ni ang, a meng peih leh tawh lo.


Mama chuan," Tluangi, i harh chiang tiraw?" a ti a, ani chuan zàwi tê hian," Aw," a ti sep a.


"Boruak a mamawh ang, room ațang hian chhuak țhen ang u," a tih chuan kei chu chhuah ka tum lo bur. Kalsan ka tum tawh lo, a bulah awm reng ka tum tlat tawh.


"Chhuak ila?"


"Ka lo awmpui ang e."


A bulah ka țhu a, a kut chu ka chelh. A kut chêr riak mai chu ka hûm vang vang a, Aizawla ka hmuh khân hetiang hian a chêr lo asin. Natna eng emaw tak a lo nei reng ang tih chu ka hlauthâwng thar leh. Lung nâ kha chu a nei tih Mama hnên ațangin ka hria a, lung lama Mizoram doctor țha ber an pan tih pawh ka hria. A zia zêl khân ka hre si a, tûn hun rei lo tê chhûnga hetia a awm thei hian min tihlauthâwng a ni. A hmél dâng diau leh a mitkhur tla deuhte chuan khawngaih thla a la ngawih ngawih, ka khawngaih a ni, ka khawngaih rualin ka hmangaihna chu a zual sauh sauhin ka hre bawk.


Neihi a rawn lût a, a tlai tawh a, hâw tawh tùrin min ti; mahse, hàw ka tum loh thu ka lo hrilh.


A ngaihtuahawm tawh lo ang tih a sawi a, ka lu ka bu ringawt. Ka che sawn chuang lo, a beidawng a niang, a chhuak ta daih.


Mama a rawn lût leh a, ani pawh chuan hâw tùrin min ti dawt lo nain zàn a rei tawh tih a rawn sawi a, ka lo chhâng lêm lo.


A ngawi a, a hnu daihah chuan," Naktûkah a lo kal leh theih tho alawm," a ti a.


"Ka kalsan thei tawh lo."


Ka hâw dâwn lo tih a hre chiang tawh bawk a, min tilui tawh lo. Khum luah chuan țhuin bang chu a nghèng a.


"Nih, vêng tlaivâr mai ang aw."


Za lo zeta nui sakin," Mu rawh, i men a ngai hlei nem, ka awm alawm," ka lo ti a.


"A harsa hlei nem, zan khat mai mai chu."


Kan ngawi leh vang vang phawt a, chutah," I kalsan chhan kha ka hria a; mahse, kimchang takin min hrilh lo. Min hrilh tawh la?" a ti a.


Mama chu en vang vangin," A țha alawm," ka ti a, Mapuii muhìl hmel chu ka en leh a.


*******


Flashback
~~~~~~~~


"Ka fanu hi khawngaih takin, țhen rawh."


Zàna Mamate ina ka lût tùr chu min lo hmu a, min biak a duh thu a sawi a, an in bul sikul tlângah kan chho. Mak ka ti a, a ngaihna ka hre lo.


A ding ngar a, ka nu rual zet a nih avàng leh che hauh lova a din reng avàng chuan nuam lo ka ti takzet. Min en kar dâwn tih ka hre sa, nuam lo duh tak a ni.


"Ka thei lo ang."


"I thei tùr a ni. A training hi țha takin ti se ka duh, a rawn hàw chhoh chhèn chhan pawh hi nangmah vàng tih ka hria, a rilru tihnat ka duh loh vàngin ka sawisêl ngai lo. A zirna hian tuar lo angin lang mah se a tih țhat dàn tùr angin tunah hian a ti thei lo, a rilru nangmahah a pêk miau avàngin. Chu chu i titàwp thei a ni, țha taka a zir i duh lo em ni?"


Duh tehrêng mai, ani lo vêkah chuan kei hian țha takin zir se ka duh ber ang chu.


"A tuar phah dâwn asin," ka ti sap. Min duh tih ka hre chiang a, ka țhen a nih chuan a zirna hi a buai ve nak dâwn, a rin a ang lo ang.


"Kha lam kha chu ka kutah dah rawh. Țhen phawt rawh, in inkâr titàwp la, tihtàwp nân chuan eng hmanrua pawh hmang mai rawh, pawisa i duh a nih pawhin ka pe mai ang che."


Ka va tlâwm ngawih ngawih tak êm! Ka bialnu nu a ni a, ka nu rual zet a ni bawk. Chuti ni lo se chuan ka au khum nghek ang, hetiangun min hmusit thei haih lo bawk ang. A pawisa tenawm ka duh lo, hmangaihna hi pawisain ka hralh ang maw?


Teuh lo, ka dam chhûngin he thil hi chu ka ti ngai lo ang. Ka induh tâwk vena lai tak a ni asin, ka hmangaih ka kalsan dâwn a nih pawhin a tâna țha ka duh vàng chauh a ni ang.


Mahse, tunah tak hi chuan ka induh tâwkna a chhe vek, ka hmangaihna chuan a zirna a tibahlah dâwn a nih chuan...


"Pawisa chu eng zât nge i duh ang?"


"Ka pi, ka zah êm êm che a; mahse, pawisaa lei theih niin min ngai em ni? Pawisa hian thil engkim a ti thei tùrah i ngai a ni maw? I hre sual a nih chu. Ka țhen ang, i fanu chu  ka hmangaih êm avàngin ka țhen ang. Ka retheihna hian i pawi a lo sawi a, a pawi ka ti. I fanu erawh i tina dâwn a nih hi."


Chumi zànah chuan ka muhìl chhin lo. Ka hmangaih êm êm chu ka țhen dâwn si, ka thinlung a sahâl a, a rilru nat dàn tùr chu ka ngaihtuah lo thei lo. Min hua ang a, min ngei ngawih ngawih tawh ang, ka hmel hmuh pawh a duh tawh hek lo ang.


Ka thaw leh hawk țhìn, zàn hrehawm tak chu a va ni chiang êm!


Hun remchâng hmasa berah ka zin chhuak a, hnathawh tùr zawn ka chhuanlam ringawt. Leitêa ka hmel hriat tawh, chhûngte ang maia ka en țhin leh ka inhlawhna țhinte inah kalin an nula ka kawm ngeih deuh chu ka thil tawn chu ka hrilh a, min puih a huam viau. Ani pawh hna a thawk nasa ve a, khawpui nula hna thawk ngai lote angin awm ve se chuan nula chhe lo tak tùr a ni.


Mapuii message ka dawng țhìn. Ka phone ka off tlat țhin vàngin min rawn call thei lo va, Mama erawh Mapuii țhen ka tum chu ka hrilh thung.


Ka rilru insual nasatzia chu, țhenna thu message-a type chhuah ringawt pawh harsa ka ti, a va dêng dawt dâwn si. Kumkhuaa a huat ka han ni mai tùr ka ngaihtuah phei chuan țhen tumna rilru chu ka paih leh țhelh țhìn a; mahse, a nu thu sawi kha ka ngaihtuah chhuak leh a, ka tih ngei a ngai tih ka hre thar leh țhìn, harsa ka va ti tak em!


Thinlung leh tih tak taka ka hmangaih a ni si a, kei ngei pawh hian nâ ka va ti tak êm!


*******

Khawiah nge min hruai dâwn ni? Boruak zângkhai haih mai vàng chuan ka ngaih a țha deuh ringawt a, min hruaitu lah chu ka hmangaih ber a ni bawk si.


A va nuam tak! Chhûm chungah ka han lêng dèl dèl chu a ni sia, ka tla dâwn teuh si lo.


"Khawiah nge kan kal dâwn?"


Min en zawk ringawt. Hlim hmel a pu ve lo va, lungngai tak hmel a pu zâwk, chuan, ka zawhna min chhâng hauh lo.


"I lungngai a ni maw?"


Kan ding ta, kan hmaah chuan step thui zet zawh tùr a lo lang ruak a, a tàwp pawh a hmuh theih loh. Hei hian kan zawh ngei a ngaih hmel.


"Le, kal rawh le."


Amah chu en vatin," I lo kal ve dâwn nange?" ka ti a, a tel lo chuan zawh ka duh bîk lo asin.


"Ka lo kal ve thei rih lo."


"I tel lo chuan ka duh lo."


A bânah chuan ka pawt tlat a, kalsan pawh ka duh lo. A bula awm zêl chu ka duh, engtizia nge keimaha min kaltîr a tum rêng rêng ni?


"Engati nge i lo kal ve theih loh?"


"An phal lo."


"Ka dìlpui ang che?"


"Ni lo, a hun dik takah ka lo kal ve zâwk ang e, min lo theihnghilh suh aw?" a ti lawm lawm a.


"Lo kal ve rawh khawngaihin?"


"An sawi Pialràlah tal chuan ka nupui ni ang che aw, chuan kan inkalsan tawh ngai lo ang, tu mahin min tibuai thei tawh bawk hek lo ang," a ti sap sap a, a mittui chu a lo luang ngiai ngiai a.


Keimah vànga a mittui luang chu hrûksak ka duh, ka han ban dâwn a, ka bân ka lek chhuak thei lo, thil rit tak delh ang maiin ka phar chhuak thei lo.


Ka tum leh a, ka thei chuang lo. Hrehawm ka ti lutuk a, ka rûm kâwk kâwk.


"Mapui?? I harh em? I țha maw?"


Ka bulah a awm reng si. A mittui ka hru thei si lo.


"Pialràlah chuan i tel lovin ka kal duh lo, min chelh tlat rawh aw. Nangmah nèn chuan kal a pawi lo, keimah chuan ka duh lo, kalsan che ka duh lo," tiin ka insût faih faih a.


"Lungngai suh, i bulah ka awm a nia, i kut pawh ka chelh tlat hi."


"Min thlah miah suh, i tel lo chuan khawiah mah ka kal duh lo," ka ti sap a, chutia ka tih chuan a lungngai hmel chu hlim hmelin a rawn thlâk ta a.


"I kut hi ka thlah ngai lo ang, ka tel lo chuan khawiah mah i kal dâwn lo."


Nui sak hian ka chhîng riai riai a, ka mumang mai a ni ang tih ka hlau. Min kaltîr ang a, ka hmu thei tawh lo ang tih mawlh ka hlau.


Țawng thûm deuh bal bal rî hian min tiharh a, ka han meng a, ka mutna room chu a êng lutuk lo. Zîng a ni em? Nge zàn? Ka awmna hi Pialràl nge mitthi khua? Nge vàn ram? Pialràl a nih chuan Sangkima kha a lo kal tel ve em?


Țawng bul bul chu a ring lo nain ka hre chiang tho. Mama aw a ni, ani pawh hi ka kalnaah a kal ve tho tihna a ni em? Chuan, ani pawh a thi ve tho tihna maw?


Sangkima mawlh chu.


"Sangkim? Sangkimmmm...?"


"Mapui, i lo harh tawh a ni maw? Na i nei em?"


A aw rî ka hriatna lamah chuan ka hawi vat a, ka kut a lo vuan reng niin. Ka kut vawn tlat a tum kha, a thutiam chu a hlen chiang, min lo nuih sak a.


"Hei hi Pialràl chu a ni tiraw? Ka bulah i lo awm tak tak a!!! Ka va hlim! Ka mumang ni maiin ka hria, hetiang a nih chuan Pialràl chu nuam ka ti dâwn khawp mai," nui chung hian ka ti a, a kut chu nghet deuhin ka vuan a.


"Kei pawh ka hlim, i lo harh tawh a."


"E he! I lo harh tawh elo? In lo titi țha thei em?"


Mama a ni.


"Eng nge i lo tih ve a?"


"E, ka awm ve maw le. Niminah kan lêng chhuak Serkawnah kan tlang tâk daih kha, vawiinah i inentîr dâwn a nih kha aw, theihnghilh lo  la."


E, ni dáwn tak e. Ka pite inah, Serkawnah kan luh kha, ka inentîr dâwn.


Chuti a nih chuan Pialràlah ka awm lo tihna! Ka thi lo va, ka la nung tihna. Chuti, Sangkima a awm ve sia, eng nge a lo tih? Ka thil sawi zawng zawngte kha, ni lo, a ni thei lo. A va zahthlâk tak!!! Ka zak lutuk, a lam pawh ka hawi ngam tawh lo.


"I lo theihnghilh hman elo? Nizànah i thâwk a buai leh deuh vàngin țhianpa pawh a háw lo va, kan tlaivâr țhak a nia."


Ka harh chiangkuang tawh a, thil thleng chu ka chhui lêt thei vek tawh.


"Mapui, ka hmangaih che ka tih kha, a la ngai reng a nia."


A sawi leh ta. Ka buai lai khân min hmangaih thu kha a sawi mawlh mawlh tawh bawk, tunah pawh a sawi leh. Kei pawhin ka hmangaih, nasa takin ka hmangaih tûn dârkâr thleng pawh hian.


Mahse, thil theih a ni tawh lo. Ani zawng, pawmlai nei a ni tawh a, mi pâ a ni tawh.


"Sawi tawh suh-"


"Ka sawi ang, ka sawi reng tawh ang. I birthday-a i hnêna ka sawi kha a la ngai reng. Ka thâwk tàwp thleng pawhin ka hmangaih fan ang che," a ti leh a. Ka kut a vawn chu tàl chhuah ka tum pawh chuan a thlah duh lo rêng rêng, a hma aia nghetin a chelh sauh.


"Hei, ka awm ve reng hi, min tizak dâwn alawm le! Ka chhuak daih dâwn, in duh tâwk khân infah r'u, inhnial buai lo ula," a ti a, nui vur vur chuan Mama chu room ațang chuan a chhuak ta a.


"Mapui, kan inkâr țhat leh theihna tùr chuan eng pawh tih ka huam; mahse, kal tùr chuan min ti tawh suh aw, kalsan che ka tum tawh lo. Eng pawh ka ti mai ang," a ti mawlh mawlh a.


"Eng pawh i ti ang maw? Chuti, i nupui fanaute hnênah kal rawh," ka ti ve ta thung. Mi pâ nèna room khata awm dun pawh hi ka duh hlei nem, ka bialpa hlui a ni lehnghal. A nupui ni ta ila ka lung a awi chiah ka ring lo.


"Nupui ka nei lo va, fa pawh ka nei hek lo."


"In ințhen tawh maw?!!"


"Nupui ka la nei lo hrim hrim."


"Dâwt sawi suh!"


A thaw hawk a, kei ka thin a lo phu nasa lutuk ve thung.


"Min țhen theihna tùr hmanrua a nih kha. Khatianga ka tih loh chuan i âwih mai dâwn lo tih ka hre ve tho."


Nupui a nei lo. Fa pawh a nei lo. Nupui nei anga a awm chhan kha keimah vàng maw! Ka âwiha ka țhen theih nân! Lalpa leh!


"Ka nuin min țhen tùr-"


"Sawi chhuak tawh lo teh ang. Hun kal tawh a nih kha, theihnghilh vek zâwk ang."


Ka la âwih thei lo, engtin nge a tih theih?!! Mi dang rêng rêng pawhin an âwih vek kha, min lo bum chiang hle mai. Mama hian a lo hre ru kar ve tho em le? A lo hria a nih hlauh chuan a châk lo ang.


"I nei lo tak tak em?" Rin ka duh lutuk a; mahse, beiseina dik lo a ni ang tih ka hlau!


"Nupui ka la nei ngai lo; mahse, ka bula mi hian rem a tih phawt chuan engtik lai mahin ka hnial ngai lo ang," a ti ta.


Tunah chuan ka en ta kar mai.


"Mapui, ka hmangaih che a, ka nupui ni tùr pawhin ka duh che."


A ti tak zet tih a hmel ațang chuan chiang takin a hriat theih, kei pawhin ka pasal ni tùrin ka duh, ani aia duh ka nei hauh lo.


"Mi dang i nei bîk lo tih ka hria a nia," a tih chuan a 'confi' lutuk chu mak ka ti zâwk!


"Ka nei maithei asin," ka lo ti a.


"Aih, i nei lo. I chanchin hi chu i rin aiin ka hre maithei a ni."


Tu hnên ațangin nge? Mama maw? Aizawla ka awm laite khan Mama'n ka chanchin a hre vak teuh lo.


"Tu hnên ațangin maw?"


"Ka sawi duh lo."


"Engkim min hrilh fiah vek phawt rawh."


Tunah hian rilru buai takin min awmtîr mêk a ni, thil mak tak tak ka hre phut phut a, âwih tùr leh tùr loh pawh ka hre thiam lo, rilru put dàn tùr pawh ka hre lo, min tibuai vek.


Kawngka a rawn ri a, Neihi a lo lût ve thung.


"I damdawite i ei tawh em? E khai, i la ei nange? Nangni pahnih hi, eng êm êm nge in tih a?" a rawn ti nghâl bawrh bawrh a.


"Ka lo pe ang e."


Neihi chuan ka damdawi ei tùrho chu a pe ve mai a, a chhuah pah chuan min rawn siai sak a, hmui phun chunga Sangkima kawh pah chuan eng emaw hi a sawi pah bawk a, a thil sawi erawh ka hre lo thung.


"Kha le."


Damdawi chu ka ei dàn tùr dik thlapin a lo chhawp thlap mai a, makti deuh hian ka en a.


"Ei mai mai teh, i damdawi ei dàn tùr pawh hi ka hre vek alawm," a lo ti leh mai a.


"Nia, i hre tak tak!"


Ka țhu chhuak a, damdawi chu pakhat tê têin min pe a, bottle-a tui noa a thlit chhuah sa chu min pe bawk a.


Ka ei lai chuan," Ei a hrehawm em?" a lo ti a, 'aih' tih nân ka lu ka lo thing a.


"A țhat hlauh chu. Vawiinah i inentîr ang tiraw? I dam vat vat a ngai a nia, palai ka rawn tîr nghâl dâwn a ni."


Ka tui in chu ka hâk a, ka hnungah a rawn chùm dat dat.


"An remtih loh chuan ka ru bo che a ni mai!"


"Thil maksak deuh deuh sawi reng lo teh, ka thinphu pawhin awm ngaihna a hre dâwn hlei nem. Ka lung a chak loh êm hi," ka ti ta ringawt.


A ngawi ta deuh reng a, ka inthiam lo rilru leh deuh.


"Ka thiam loh vek a ni."


"Kha thu kha sawi ve ziah suh. Kan inang chiah."


"Ih...min ngaihdam duh loh phah...lo ang tiraw?"  A confi leh tawh lo.


"Hmangaihna chuan ngaihdam theih loh a nei hlei nem."


"Dik chiah, i thinlung ka tihnat tawhna zawng zawng kha a mal te têin ka tidam leh vek ang a, i thinlung keh sawm vek tawh kha ka hmangaihnain ka chàr khâwm leh vek bawk dâwn a ni," a ti charh charh a.


Hriat a va nuam sî êm!! Tunah hi chuan ka rilru a zâng lutuk tawh a, taksa chàu pawh ka neiin ka hre tawh lo. Hmangaihna damdawi chuan min tuam dam tan leh tawh chu a nih hi.


" Le, thil awm dàn zawng zawng min hrilh tawh rawh le," ka ti ta a.


Chaw ei hma zawng chu thil awm dàn chipchiar takin a sawi a, min hrilh par par. Mama leh Neihi pawh an rawn inluh chhâwk chhên, kan thil sawi chu an rawn hre ve zawk zawk hial ang.


Chaw a ei ve nghâl. Țawng thu chhe loah, kan tam reuh sia, a nuam dual dual lutuk. Ka hmel a hlim sâng tawh a, chaw pawh ka ei ve țeuh tâk kha.


Ka pi leh pute lah chu an lâwm khawp mai a, ka pi phei chuan," Damdawi țha ber chu i lo nih hi," Sangkima hnênah chuan a ti hial a, Mama'n engkim a lo hrilh tawh hlawm bawk a, min fiam dùn reng mai.


Inentîrnaah pawh min kalpui ta vek, min kalsan chu a tum tawh loh hmel kher mai. Min duat a, min duatzia lantîr a hreh bawk hek lo. Mi zîngah pawh ni se a zak chuang lo.


Mama'n car a khalh a, Neihi a hmaah chuangin Sangkima nèn a hnungah innghèng rialin kan țhu a, kan naupang chhe zawk zawk tawh lo bawk a, kan zak tawh lêm lo.


An inah min hruai. Ka pite in ațanga ka thlìr ziah, in design nalh deuh kha a pute in a lo ni!


A nu a lo awm bawk a, min hmuh chuan min lo kuah chawt!


"Mapui, Bawiha hi ngaidam mawlh mawlh rawh aw, a thil tih kha pawi ka ti lutuk a, ka han hmu leh thei che hi ka lâwm hle a ni," a lo ti nghâl vat a.


"Dam țha taka ka hmu thei che hi kei pawh ka lâwm, i chanchin Mama'n min hrilh a," ka ti ve a.


"Nu, a taksa kha a la chàu a nia, i kuah chàu zual ang e," Sangkima chuan a lo ti a.


Min thlah ta a, nui chung hian," Min lo thîk leh hman a nih kha," a ti sap a, ka zak chu ka sen tâwn tâwn ang chu.


A pi leh pu pawh an lo awm, min chibai diat diat hlawm. A puin," I hming hi chu kan in chhûngah hian a lâr teh a nia," a lo ti zuk a, chu thu chuan min tihlim viau nain ka zak leh tho.


Ei tùr Sangkima chuan a siam a, makti takin ka en zauh zauh. A thiam chu ka ring tho a; mahse, awmpui nula an neih tho ka ring asin le!


A ei siam lah chu a tui ka tih zawng tak! Coffee min siam tel bawk a, chu pawh ka duh chi tak! Ka duhzawng nèn lam a hre vek si a, min tiphu zawk zawk chu a nih hi.


Thil ei pah chuan lung tâna țha tùr nia a hriatte chu min hrilh pah bawk a. Min țhut hnaih set sawt bawk a, a thil sawi chauh ka lo ngaihtuah avàng chuan Mama'n a phone kan lam hawia a lek reng chu ka lo hmu hauh lo.


"Family group-ah ka'n post chuai chuai teh ang," a tih chuan thla min lo hmehsak a ni tih ka hre chauh.


"A va ho tak aw!!"


"'Dar ri mawi engtikah nge?' tih a caption-ah ka'n dah bawk ang a, an lo comment nasa ang chu," nui chung chuan a ti a.


Neihi chuan," Kawr rawngah khân a pink ka duh dâwn miah lo a nia," a lo ti hmanhmawh a, a nui sûng bawk a.


Mama chuan a phone khawih mawlh mawlh pah chuan," A dum i ha ang," a lo ti a, a tûm ta hmak mai. Chu chu kan nuih ve thung a.



*******


Thla 2 hnuah chuan
~~~~~~~~~~~~~~~


"Ka fanu hi chhe lo ka ti takzet a ni."


Sangkima nèn kan innei dâwn a, min cheitute'n min chei zo tawh a, ka nuin hlim nui sângin ka kutah chelhin min fak mawlh mawlh. Ka nu hlim hmel hmuh hu nuam ka ti, a duh tak pasalah ka nei dâwn bawk si.


Ka inentîr hmaa Lungleia a kal țhin khân Sangkima hi a lo hmu țhìn a, ngaihdam a lo zu dîl a ni àwm e. A fanu tân hi chuan eng thil pawh hi a ti duh vek, ka hlim lohna kha amah a ni tih inhriain ka hlim leh theihna tùrin theihtâwp a chhuah leh ta a ni.


Ropui taka lawm kher kan duh lo va, bâkah Sangkima'n kan khuaa invawn a duh tlat a nih chu. Khaw mipui zawng zawng sâwm vekin ka pain ruai țheh a ti tlat bawk, ka hnial nasa a; mahse, a ti lui tho.


"Nangmah chauh hi i ni tawh a, a tàwpna i nih vàngin hei hi chu i phû. Khaw mipuite puar tak leh hlim taka kan hlimnîa an lo awm ve hi ka duh," a ti tlat.


A pi leh pute pawh an rawn chho. Ruai chaw ei zawhah Lungleiah kan chhuk ang, Neihi ka țhianah a țang a, Mama pawh Sangkima bulah a ding. Remlala pawh a rawn kal vang vang, dam tak leh hlim taka min hmu chu mak a ti ve kher asin.


Neihi awm dàn a dik lo leh tawh. He mite pahnih hi ka suih zawm an ngai a ni, Remlala pawhin nupui a la hmuh bîk loh hi, zawnpui a ngai, a țhian ka nih hi.


He khawvêlah hian nupa hlim ber kan nih loh pawhin a dawttu chu kan ni bîk kherin ka ring lo. Ka pasal fel dàn ka hre chiang chho zêl, ka hmangaih telh telh bawk. Hmangaih loh theih a ni lo, min hmangauhin min duat a, min dawhthei bawk si.


Kan inneih ațanga thla 3 hnuah  Pu Loncy-a panin ka in-check-tîr leh a, ka lung zai tùr chuan ka infit tâwk tawh a ti a, Sangkima'n zai dam theih chuan zai țha a ti bawk si a, zai tùr chuan ka inbuatsaih a ni.


Mutnaah chuan," Zai chu i hlau ang em?" tiin min zâwt a.


A âwma bei tlân pah chuan," Hlau deuh tho. Ka bulah awm thei la chuan ka hlau vak lo maithei," ka ti sap a.


"Hlau miah suh aw, hlawhtling takin an zai dâwn che alawm."


"Mahse, thil țha lo pawh a thleng thei tho a?"


"Min kuah pah chuan," Honey, thil țha lo thlen chu ka phal miah lo ang," a ti sup a, ka samag chuan a fâwp zoh a.


Zai ka nih dâwn vàngin nau pawh ka la pai duh lo. Kawng engkimah min duat a, hna ka thawh a phal lo. Ka hah deuh hlek pawh a phal hek lo, ka tih deuh ber chu a kalnaa zui leh amah buaipui chu a ni deuh, chu pawh buaipui a harsa lo, a che fel tlat sia.


Lung zai tùr chuan Kolkatta-ah kan thlâwk thla ta a, ka nu leh pa pawh an kal ve, ka huphurh lutuk; mahse, ka sawi chhuak lo. Lo harh chhuak thei lo ta ila tih mawlh ka ngaihtuah, thil dang ka ngaihtuah thei lo.


Ka hlauthâwng a, ka inring zo lo bawk. Zai pindana min nawr luh hma zawng chu Sangkima kut chu ka vuan a, ka pasal kut hi ka vuan thei tawh lo ang tih ka hlau ber, ka hlauhthàwn dàn hi ka duh lo, ka ngaih a țha lo.


Min nawr lût a, ka rilru a fîm kar si a, hrehawm ka ti ru lutuk. Sangkima hlîr mai ka rilruah a awm a, ka mumang lama ka hmuh kha ka hre chhuak leh uar uar a.


"An sawi Pialràlah tal chuan ka nupui ni ang che aw."


Ka boruak hìp luh avàng chuan ka mit chu ka chhîng ta riai riai a.









A   TÀWP   TA.





(Ka kut a nat vàngin ka type thei lo va, ka kutzungpir ruh a na a, kutzungpuiin ka type thiam mawlh si lo. Ka pawt chhe lo thei ta lo a ni e, chhiartute, in zahawm, ka zah ngawih ngawih che u. Inhmuh leh thuai chu tum phawt ila..)



*YOU ARE WHAT YOU ARE*