☆BINGO☆ - By Dingdi Pachuau

☆BINGO!☆ - By Dingdi Pachuau




Thlàna dah tùr pangpâr mawi taka ka nu nèn kan siam chu lain fîmkhur takin motor-ah chuan ka dah lût a, ka țhu lût nghâl bawk, kawngkaa ka nu lo chhuak mêk chu ka lo nghâk a ni.



Kawnga kan tlàn lai chuan ka nu hnênah chuan,"Nu, engtikah maw Goa-ah chuan kan kal theih dâwn?" tiin ka zâwt a.



"Naktûkah i pa a lo haw ang a, chuti a nih chuan kârleh Zirtàwpni khi chuan kan chhuak thei mai tawh ang chu a," a lo ti duah a.



"Ka phûr tawh over. Nu, nang i châk ve tawh em?" tiin ka zâwt leh zat. Motor chu chak lo têin ka khalh par par a, ka nu hian chak deuh taka khalha chuan chu a hlau țhìn si a, ka khalha a chuan hi chuan ka khalh chak ngai lo.



"Châk a; châk lo tho bawk," a lo ti sap a.



"50-50 a ni maw?" tiin ka nui a, ka va thlêk zawk a; mahse, a lo nui ve miah lo.


Țawng tawh lovin thlàn chu kan thleng a, motor ațanga chhuakin kein kan kal ta a, thlàn lung phun eng emaw zât kan pelh hnuah chuan thlàn lung pakhat dum tliang hlurh mai bulah chuan kan ding ta a.



He thlàn lung hi ka hmuh țum khatna mai a ni tawh lo, țum nga zet ka hmuhna a ni tawh, vawiin chhiar tel hian. Pangpâr kan dah lah hi Dingdi leh Di pâr hlîr a la ni; mahse, a mawi thei hle thung. Kan kal ziah vàng a ni ang, thlàn lunga thu inziak pawh hi ka hre hneh tawh viau.



KAN  ENCHIMLOH

LALRINDIKA
KUM - 25


Natna awm tawh lohnaah,
Intawh leh kan beisei.


Nghilh ni i awm thei lo ang.



Chu zawng chu.



Thu ziak a tam loh vàng hian en lo pawhin ka sawi zat zat thei hial!  Kan hming a inan vàng pawh hi ni fa hmiang, thlàn lung dang ai chuan ka ngaina deuh chuan ka hria! Ka kal hnuhnun ber țum, kum thum lai liam ta khân ka nu a dam loh vàngin ka pa nèn kan kal a, țum danga kan kal lai kha chuan ka la tê deuh a, ring zet zetin thlàn lunga thu inziak kha ka chhiar țhìn a nih kha.



Ka nu chuan pangpâr chu thlàn lung nghèng chuan dìm tê hian a tung a, ngawi rengin thlàn lung chu a en leh vang vang a, chutah a maimichhîng ta daih. A awm dàn chu makti rilru tak hian ngawi rengin ka lo thlîr tlawk tlawk ringawt!



A maimichhìn rei êm avàngin hmun dang ka ensan ta rih a, thlân lung intiat tak tak leh rawng inang țhap chu ka en kual a, kum naupang ve tak taka thî an awm laiin a țhen chu upa tak tak a thi an ni ve tho.



Ka nu ka va en chuan thlàn lung chu a lo vuan tawh a, ka va pan phei a.



"Nu..?"



Rawn hawi lovin a kut chuan a mit a nuai zauh a, a țap a nih ka ring.



"Nu, i țap elo?!" Min chhâng lo.



Lalrindika hi tu nge a niha, kan chhûng zînga mi a ni em tih ka hre hauh lo; mahse, a thlàn tlawha pangpârte daha kan kal ve nual tawh avàng hian kan chhûng hnai a nih chu ka ring ve deuh ngawt a; mahse, kan chhûngkuaah a chanchin an sawi ngai ka hre si lo. Ka putea emaw ka patea emaw a ni ang ti dâwn ila putea leh patea ka nei tho bawk sia, tu tak ni ang maw tih chu ka ngaihtuah a ni ta.



Haw kawngah chuan ka nu nèn chuan kan ngawi reng a, kan rilru kan kàwm ve ve a ni maithei; mahse, kei chu kan mi tlawhpa hriat châkna chuan min tur et et mai ni hian ka hria, ka nu mittui titlatu chu hriat ka châk a, kan tlawh ve ziah chhan ka hre châk bawk.



"Nu, kha pa Lalrindika kha tu nge? Ka patea emaw ka putea emaw a ni bawk si lo," ka ti ta nge nge a.



"Zaninah ka hrilh vek dâwn che nia," ti sapin nghenchhan nghèng chuan a maimichhîng vang vang a.



Tunah hriat châk hlê mah ila ka nawr lui duh lo, min la hrilh dâwn tho chu maw.



Ka nu leh pa hi nupa hlim leh inhmangaih tak an ni tih ka hria. Kan chhûngkua hi tlêm viau mah ila kan inhmangaih a, kan hlim viau țhìn bawk. Inhnial leh intihthinur kan nei ngai lo va, ka nu leh pate phei chu nupa awhawm ber ni hialin ka hre țhin. An tih dun theih thilah chuan an inpui tawn zêl a, khawiah emaw pawh kal dâwn se an inzui chawt bawk. Tûn țuma ka pa zin chhuak erawh palaia kal a nih vàngin zui chi a ni lo va, a zui lo mai niin ka hria.



Chuta kârah, he pa ka hming ang pû thlàna ka nu mittui a tla ta hial mai hi a mak ve êm a ni, hriat châk loh chi a ni lo.



Zanriah ei khamah chuan ka online a, chanchin thar group lam chu ka chhiar zawk zawk, like tam tâwk tâwk ka han pe țhuai țhuai a, țhianho group-ah ka lût leh, a lo lùn nasa, ka han bengngawng nuih lûh ve ringawt bawk a. A hnuah phei chuan a nâwi ber berah ka țan tâk kha.



Ka phone ata mit la sawna ka hawi chhuah chuan ka bulah ka nu a lo awm tawh hauh lo, room lamah a kal a nih ka ring. E taka, thil min hrilh dâwn kha maw, phûr takin ka nute room lam pan chuan ka kal ta nghâl.



Khumah țhuin a en ngai a lo en vang vang a, ka aw thian kharhin,"Nu, thil kha min hrilh tawh la?" tiin a bulah chuan ka țhu thla ve nghâl a.



Rawmawl vâr ni àwm tak hi a lo hûm reng a, dìm zet hian a chûl a chûl phawt a, chutah, muangchâng hian min rawn en a.



"A thui dâwn si a, i ngaithla peih meuh ang maw?" a rawn ti ta a.



"Peih lutuk! Chuan, a thui viau chuan i bulah ka riak nghâl mai ang a," nui pah hian ka ti a.



Țhuthmun kan siam rem deuh hnuah chuan aw a han thian leh kharh kharh phawt a, nghâkhlel zet hian ka lo en reng a.



"I hming hi kha pa hming chawia phuah kha ka ni asin," a ti țan phawt a, kei chuan makti zet hian ka lo en ringawt a.



Sawi zawm lehin,"A hming erawh kha chuan ka ko ngai lo, 'Bingo' ti hlîrin ka ko țhìn," tiin a han nui deuh sak a, chutah," A tìrah chuan a duh lo khawp mai a,'Mizo ni na nâ nâ, ka hmingin min ko rawh,' a tih loh leh ' Ui hming a nih kha, ui ka ni lo ' a ti bul bul țhin; mahse, ka koh zêl avàngin a hnuah chuan a haw ta lo, a hming pakhatah a ngai ve hmiah tawh mai," a ti leh a.



"Kan têt lai ațanga inkàwm tawh niin kan in a inhnaih bawk a, mipa mah ni se ka țhian kawm ber a ni. Vànduaithlâk takin, a pain a thihsan hma a; mahse, an retheih loh miau avàngin leh a nu chu a la țhalài êm avàngin pasal a hmu thuai rêng a, pa nei lovin a awm rei lo tihna a nih chu. A nu leh a pa thar chuan an duat thiam khawp mai a, kei a țhiannu thleng hian min duat êm êm mai a nih chu.



Kan sikul luhna a inang chho zêl a, kan inkawm ngeih êm avàngin sikul inangah lo chuan kan lût ngai lo. Hmeichhe țhian dang neiin kàwm țhin mah ila ani chuan țhian dang a kàwm ve ngai lo va, neih pawh a nei lo. Kan ina a rawn lèn loh leh an inah ka lêng a, kan ina a rawn lèn loh chuan a room-ah a awm reng mai zêl, țhian dang kàwmin pâwn lamah a chhuak ve ngai lo.



A chhiat loh avàng leh an hausak avàng chuan ka țhian hmeichheho hian an star țhìn a, ka bulah an sawi sap sap țhin. Ka ţhianpa ber a nih vàngin ka țhiante'n an star thu chu ka hrilh țhin a, eng mah sawi lo hian a nui liam mai mai țhìn. Kei pawh hian ka țhianpa a ni na vàng vàng hian chhe lo ka ti tho, hetiang țhian min ngainatu leh kawm ngeih ka nei hi vànnei ka inti țhin. Amah hi mi țawng tam lo ngang a nih vàng hian ka ngaina zual, kei chu hmeichhia niin ka țawng duh hle a, ka chanchin engkim ka hrilh vek zêl ti ila ka tisual tam lo àwm e, dawhthei takin ani chuan ka thu sawi a lo ngaithla țhìn. Ka inbun ruahna ti ila a dik ber ang, ka rilru hahna leh ka hlimna zawng zawng, a... ka thil duh engkim hi a hre vek ni maiin ka hria, ei tùr ka duh zâwng leh rawng ka duh zâwngte nèn lam maw le!



Pâwl sàwmpahnih kan zir laiin kan section-a mi ni lo bialpa ka nei ve ta, chu pa chu kan sikulah kher lo pawh a lâr ve phian, a chhan chu a hmel țhat bâkah infiam lam a ti thei lutuk a ni. Aizawl khaw chhúnga sikul hrang hrang intihsiaknaah pawh a hming a langsàr pha hial. A sâng a, chêr lam deuh niin a infit êm êm bawk, chutiangin min han duh ve mai chu mak ka ti zâwk a ni.



Thla ruk chhûng zet duh takin kan inkawp ve a, ka duh êm avàngin Rindika pawh chuan sawisèl nei lovin amah hmu turin min hruai țhìn. Ka țhian țha ber a nih vàngin, a tìrah ka bialpa chuan Rindika chu a thîk deuh a; a chhan chu Rindika hian a bike-a min phurh ziah vàng a nia; mahse, ka best friend a ni tih ka hrilh hnuah chuan a thîk lo ta deuh. Hlim taka kan inkawp lai chuan hmeichhe dang nèn min lo kawp ru reng a ni tih ka hre chhuak ta, an pahniha an lo awm dùn ka man fuh a ni. Chumi dârkâr la la chuan rilru na zetin, thinrim țap deuh pùrin ka țhen thu ka hrilh. Rindika bula ka sawi lai phei chuan ka rilru a na lutuk a, ka țap zawih zawih nghe nghe.



Rindika chuan a tûk chhùn chawlh laiin ka tân phuba a lo la niin, eng sawi set set lo hian a lo hnek chawrh a, an insual zui ta nghâl, kan zirtîrtute'n an man chhuak a, keimah vàngin kâr hnih zet sikul ațangin an hnawt chhuaka nih chu. Kan section leh anni section chuan kan hre vek lo thei lo va, class kal pawh ka phûr lo kher asin; mahse, board exam hma chhawn tùr kan nih avàngin ka kal hrâm hrâm. Bàn veleh Rindikate inah pheiin kan zirho zawng zawng chu ka va hrilh leh vek țhin.



Țawng tam lo mah se mi rintlâk a ni tih ka hria a, an ina ka kal azâtin ei tùr ka duh ber mai min lo chhawpsak zat zat țhìn. Kei lahin inthlahrun nachâng hre lo lêkin ka ei țeuh mai țhìn a, tûn hnua ka ngaihtuah lêt hian ka lo tihbuai theih țhinzia kha aw ka ti vawng vawng țhin.



Sikul a rawn kal theih leh hmasak berah chuan an lo en hrek hrek nain ani chu eng mah thleng lo leh hre lo ang hmiahin a awm thei, nuam lo ka lo ti zâwk a; mahse, ani erawh chu mi lo en dàn chuan a thêngthâwngah a thawk lo nasa a ni.



Pawl sawmpahnih kan pass ve ve a, ka pa remtihnain Bangalore-ah college ka zawm a, ani pawh chuti tho. College thlenga kan la kal dùn thei chu ka hlim tawp, unau ka neih loh vàngin ka unaupa min chhanhimtu leh min vêngtu, ka țhian ni tel tho bawk si-ah ka ngai a, engkimah ka râwn ti ila a dik ber ang.



An hausa ka tih tawh kha, a duh apiang nei thei a ni a; mahse, over takin a khawsa ngai lo. College meuh a rah ve tâkah chuan mipa țhian a nei ve ta ti ila an rawn kàwm a ni zâwk ang chu, tlêmin kan inkàwm tam ta lo deuh.



Bangalore-a ka awm lai chuan i pa hi Sunday vawi khat chu kan inkhâwmnaah a rawn inkhâwm ve niin, kei chuan ka lo hre ve lo va. I pa chuan inkhàwm bàn veleh min rawn be tùrin min rawn pan ta ngat a, min rawn chibaiin țha min tih thu min rawn hrilh nghâl a," tiin a nui deuh sak a.



Ka lo nui țhat.



"Pa han zei rohzia chu a," ka lo ti hlak a, ani chuan," A frank hi ka ti khawp mai a, ka zak chu ka sen țâwn țâwn maw le," a lo ti ve a.



Kan ngawih leh deuh hnuah chuan," Chutih lai chuan ngaihzâwng ka nei lo va, star erawh chu ka nei ve tho. I pa chuan hawihhâwm takin ka number min dîl a, ka pe ve mai bawk. Chumi zàn ațang chuan min rawn text țan ta nghâl a, a hawihhâwmin a fel ka ti a, bâkah, a frank lutuk kha ka làwm tlat mai a, a lo chhe lo viau bawk si nèn, thla khat hnuah chuan kan ni chho ta mai rêng a.



Kan nih chian hnuah chuan Rindika chu ka hrilh ve ta a, a hma kha chuan ka zêp ve ngar ngar. A chhan chu hmeichhia hi chuan sèsè hi kan ngah a, khatiang kha ka hrilh vek duh tawh bîk lo a ni, min lo nin ka hlau ve tawh bawk a.



Rindika chuan min en vang vang ringawt. Ka hrilh har avànga lungawi lo a nih ringin ka hrilh lawk loh chhante chu ka sawi luam a, tlêm tê chuan ka inthiam lo ve deuh.



Mahse, ani chuan chutiang lam sawi lo chuan ka hlim a ka duh a nih phawt chuan chu chu țha a tih thu a sawi ta daih, ka tihsual nawn tawh loh a beisei thu a sawi bawk.



Kuah châk châk pah chuan làwmthu ka hrilh a, ani pawh chuan lawm nân dine-out a rawt a, țha ka lo ti khawp mai. Ka bialpa leh ka best friend chu inhmu se, ka tâna mi pawimawh ve ve an nih vàngin inkàwm ngeih se ka duh bawk.



I pa hi Rindika aia a upat deuh tawh avàngin a rilru a puitling a, bâkah, a lo zir sâng tawh bawk a, a rilru pawh a zau khawp mai; mahse, Rindika chu a thîk ve leh deuh tlat tho, Rindika bulah tilang chiah lo mah se ka hre thiam ve tho asin.



Kan inkâr erawh a chhiat phah lo. I pa chuan Rindika chu a hma anga hnaih reng lutuk lo tùrin min duh a, a chhan chu mipa leh hmeichhia chu opposite sex kan nih miau avàngin țhian lo bâk thil awm theiin a ring tlat mai a ni. Kei chuan ka lo nuih mai mai thung a, a chhan chu Rindika nèn hian kan inkârah ințhian țhatna bâk a awm lo tih ka hre ve tlat si a, a tân ngaih țhat lohna tùr awmin ka hre lo a ni.



I pa nèn kan inkâr erawh a tluang purh bîk lo,  on-off ang deuh hian kan kal ve a, amahah pawh hian thîk tùr ka hre ve nual mai. Ka lungnih loh leh ka thinrim apiangin Rindika bulah kalin ka thinrimna chu ka inhri thla ziah a, ani lahin dawhthei taka min lo ngaithlain min hnèm thiam vak hek lo, min hnem ve nân min kuahin ka hnungah duat takin a chûl a chûl mai țhìn; mahse, chu chuan min hnèm ve viau tho. A hnu lamah phei chuan ka ei tùr duh zâwngin min thlêm ta țhin a, lungawi lo leh thinrim țúna kal kha lungawi tak leh puar takin ka haw ta ziah.



I pa chu Bangalore-ah a awm rei ta si lo va, kâr hlâa awm hnuah phei chuan tihtauhna tùr ka hre tam zual, min thlêm nasa thei a nia.



Rindika chu bialnu nei ve tawh tùrin ka ti a, keiin bialpa ka nei leh tawh a, ani a mal viau chu ka duh lo a ni. Ani erawh a lo nui mai thung.



"Bialnu chu ka nei sa reng alawm," a tih chuan phâwk zeta en pahin," Tu?" ka ti hâ a, a nui deuh suk ka hmuh chuan,"Hamlet leh! Ka va âwih teuh che ve!" ka ti vak a.



"Ka nei ka tih chu."



A hnunga chum awk pahin," Dâwt min hrilh leh chuan ka kàwm tawh lo ang che," nui duh hauh lo hian ka ti a.



"Ka bialnu chu hei," tiin dârthlalang hmaa min dinpui pah chuan a ti a.



"Țha ka tih zâwng pawh va ni suh, a dang zawng rawh. Hei phei hi chu mi duhlai a niin ka hria," nui hui chung hian ka ti a, fiamthu a thawh ve avàng chuan ka nuih a za viau.



Fiamthu thawh e ti lo chuan nui hauh lo hian,"Ani saw ka chan si loh chuan mi dang neih ka peih lo," a ti sup a.



Dârthlalangah chuan ka ner khum sak sak a, thu tak deuh hian,"Tak takin, taima ve deuh la, bialnu chu nei ang che. Kei pawhin bialpa min tihlim tùr ka nei tawh a, nang pawhin kàwm hlim tùr che i mamawh ve alawm, i heti kumkhua thei lo a nia," tiin ka zilh a.



"Ka peih chuang  lo," a tih nghut chuan,"A...a...a... Ka zawnpui tho dâwn che, duhtu che an tam tih ka hria, i nei dâwn tho tho," ka lo ti thung a.



Chumi ațanga ni tam pawh a ral hma  chuan Russian nula chhe lo zet hi ka bulah rawn hruaiin a bialnu a ni tih min rawn hrilh ta. Makti zetin ka lo en hau ringawt! Mizo ni lovin hnam dang ber kher chuh, hnamah chiang a intih ve tehlul nèn!



Mahse, a țha vek mai e. A duh a nih phawta aniin hlimna a pêk theih phawt chuan le, ka sawi buai lo ang. Bialnu a nei ta tho alawm, a ti țha tawh tho ve.



"Ka lawmpui che," hlim hmel takin ka ti ta zâwk a.



Bialnu a neih ațang chuan kan inhmu khât ta deuh. Hun a lo kal zêl hnuah phei chuan, eng emaw chânga kan inhmu zawk tih loh chu kan inhmu ta mang lo. Ka ngenna angin bialnu a nei ta chêng a, kan inhmu khât ta lutuk chuan ka lung a tilêng rum rum mai. Khati khawpa inhmu leh inkàwm nasa kha vawilehkhatah kan tàwp ta thut a ni si a.



I pa lah Mizoram lamah daih a awm tawh si a, ka țhian kawm berin mi dang a neih tâkah chuan kawm tùr neih lo hlutzia ka hre chhuak a, ka tân Rindika lo pawimawhzia chu ka hre chhuak ta uar uar mai. I pa lah a buai ve thei si a, min be reng hman bîk lo. Chu chu tihtauh phah nân leh lungawi loh nân ka hmang a, ka lungawi lohna lah hrilhna tùr ka nei tawh si lo, ka mal ngawih ngawih a nih tâk ber chu.



Ka rilru a la naupang chhia nèn, i pain min rawn call lawk loha a hman huna min rawn call hian ka lungawi lo chuan țhenah ka vau fo țhin, min lo dawhthei hi ka tia. Zaidam taka min lo chhângin ka lungawi lohna chu  min tihrehsak a tum țhin. Thinrimin ka àn khum nasa thei ania aw, khatih hunlaia hrehawm a lo tih țhin dan tùr kha ka ngaihtuah thiam lo záwk.



Ka birthday a rawn thleng a, zîng ațangin a reh hmak mai. Ka birthday a ni tih a hria tih ka hria, a chhan chu zàna kan inbiakin kan sawi dùn reng si a, theihnghilhna hman a la awm lo a ni. Chawhma lam chu ka ngawi, chawhnu lamah thinrim țúnin ka han phone a, a ring ral țhak. Thinrim nâklaiin, min la chhâng lo zui a nia, thinrim tak ka ni.



Ka thinrim chu ka insawh ka insawh mai. Tihngaihna ka hre bawk si lo, a hnu deuhah ka han text leh ringawt a, ka han âng chiam. Chutah, min rawn text lêt ta.



*Bialnu dang ka nei tawh* tih ringawt hi min rawn thawn a nih chu!



Ka thidang lo chauh! A thu min rawn thawn chuan min țhâwng takzet, ka taksa pum hi a khùr vek a, ka kut chu a khurh nasat lutuk avàngin ka phone pawh ka thlauh hial nghe nghe a ni.



Room-ah inkhungin ka țap vawng vawng. Mipa rinawm lo pahnih ka tawng ta si a,keiin ka duh êm êm laiin heti mai hi ka chan a ni leh si, nâ ka ti takzet. I pa nèn phei chuan hetiang boruak kan tawn hi ka ring hauh lo, a chhan chu mi rinawm tak hmuh khân ka hmu tlat a ni. Rindika bula awma thil awm dan chu hrilh leh keuh keuha țah leh hliam hliam ka châk; mahse, kei aia pawimawh tùr bialnu a nei ve tawh a, hun an hmang dùn ngei ang, bâkah, kan inhmu khât tawh si a, min hrechang tawh lo ang, ka birthday pawh a theihnghilh zo tawh chu a nih hi.



Ka țah lai chuan message tone a rawn ri keuh a, i pa a nih beiseiin ka phone chu ka en rang khawp mai; mahse, Rindika a lo ni zâwk, min lo la theihnghilh bîk lo ve.



*Happy Birthday* tiin.



Ka lung a tichhe zual, vawiin hi ka birthday a ni tih tal a la theihnghilh lo va, ka bulah awm lo mah se min hretu țhian pakhat ka la nei chuan min tilâwm deuh..



Mahse, ka chhâng lêt lo.



Rei lo te hnuah ka phone chu a rawn ri ta. Mittui far zãwih chungin ka han en a, amah bawk a lo ni.



Ka 'hello' hma chuan,"Happy Birthday, Puii, ka tlai lo tih ka hria a nia aw," a rawn ti sup a.



Ka chhàn loh avàng chuan," Puii, ka țawng i hria em? Puii, i țha em?" a rawn ti leh.



Min ngaihtuahna aw ri ka hriat chuan ka thinlung a tino thar leh a, ka lung a tichhe belh sauh bawk. Țap țuau chung hian,"Aih..." ka ti chuai raih a, ka insût hraih bawk.



"Lo awm reng rawh, ka rawn kal nghâl."



A rawn thleng har lo. Ka țahna ka mit bui lâk leh sen ûrh mai min hmuh chuan ngawi reng hian min rawn kuah a, kei pawhin nghet zeta lo kuahin ka țap leh nghâl. Duat tih hriat zeta ka hnung min chùl leh hnuah phei chuan ka țap uar sauh.



Ka țah ka bàn hnu chuan a tahtawl tê têin ka chunga thil thleng chu ka hrilh sap sap a, ani pawhin ngawi rengin dawhthei takin ka thil sawi chu a lo ngaithla a.



"Ka han call ve chhin dâwn em ni ang?" a tih chuan beiseina tlêm ka nei leh deuh a; mahse," A lo chhâng duh chein ka ring lo," beidawn hmel zet hian ka lo ti a.



A han call tho; mahse, a ring ral țhak a, a hnuah phei chuan a ring thei tawh lo, a dah 'busy' ta daih.



Ka birthday min lawmsak a, ka hlim lo chung chung chu min tihhlim tumin  a theihtâwp a chhuah tih ka hria. Kâr tàwpah phei chuan Goa-ah min kalpui ta daih a, i pa chungchâng lam rêng rêng chu eng mah a sawi chhuak ngai lo. Ka hlim theihna tùr ngaihtuahin a buai char char a nih ber chu.



Keimah hlîr min buaipui tâk avàng chuan ka inthiam lo va, a bulah pawh ka sawi chhuak nghe nghe. A bialnu kha ka ngaihtuahpui lo thei lo a ni, a ngaihsak a ngai ve a ni, keimahah ka inchan a, hrehawm a lo ti viau thei si a, bâkah, inlaichìnna țha nei tùr chuan inngaihsak tawn a țûl miau bawk si a ni.



An chanchin ka zawha an ințhen tih a sawi chuan ka inthiam lo kher asin; ani lah chuan engah vak a ngaih loh hmel kher mai bawk si.



"Engah vak ka ngai lo, a awm dàna a hlim loh chuan a kal thei alawm," a ti duh chauh, a buaithlâk asin. Ka theih tâwp chuan han suih zawm leh chu ka tum ve a; mahse, a ngaihtuah duh dêr lo, ka sawipui thei lo.



I pa chu ka theihnghilh lo nain tlêm tlêm chuan Rindika puihna zârah ka lo hlim chho ve leh thei ta deuh a, ani lah chuan mi dang kàwm ta hauh lo chuan min ngaihsakin ka kiangah a awm chawt a ni ber. Ka tân a hlûin ka harsat lai bera min kalsan lotu a ni a, ka theihnghilh thei ngai lo ang.



Hun a kal ve zêl a, college chhuahsan hun pawh a lo hnai ve tain final sem exam dâwn hnaihah chuan mak deuh maiin i pain min rawn be leh ta tlat mai a nih chu!" tiin a thaw deuh hak a, a chàwl ta deuh bawk a.



Kei chuan rang zet hian,"I lo be țha vakin ka ring lo, i thin a rim ngei ngei ang," ka lo ti hmanhmawh a.



A nui sak a," A dik alawm; mahse, i pa kha ka lo hmangaih êm a, bâkah, a harsatna tawh ka lo hre lo va. Ka birthday ni hma zànah mitthi inah an tlaivâr a, zàn thim hnuaia a chêt vêlnaah a phone chu tibovin a tibo tih a lo hre lawk lo va, a hriat chhuah meuh chuan a lo tlai tawh lutuk a ni àwm e," a ti a.



"Chuan, in inbiak loh hun chhûng chu engtia rei nge?" ka lo ti leh a.



"Thla ruk zet maw le. Ka phone number a hre thei mai si lo va, hriat theih tumin a lo buai nasa a ni àwm e. A insawi fiah nasa mai a, a țan tìrah chuan ka ngaihven vak lo, ka âwihsak duh lo lui tlat a; mahse, a beidawng duh lo. Ngaihdam min dîl reng a, ngaihsak loh theih loh tùrin a awm thiam tawp maw le. A tàwpah chuan ka lo âwihsak ve ta, ka âwih lo tak tak pawh a ni chuang lo, ka tider kual rih zâwk a ni," tiin a nui leh sak a.



"Rindika bulah chuan i pain min rawn be leh tih chu ka hrilh miah lo, a chhan chu surprise ka tum vàng a ni. Ka lo sual ve hi ka tia, i pa hnênah chuan ngaihdam a duh tak tak a nih chuan Bangalore-a rawn chhuka min rawn hmu tùrin ka ti a nih chu! A rawn chhuk lo a nih chuan a thil sawi chu ka âwihsak dâwn lo tih ka hrilh nghâl bawk. Ka lo tihretheihzia kha aw..." a ti vang vang a.



"Chuan, a lo chhuk em? A lo chhuk ngei ka ring," ka lo ti ve leh a.



"Aw, chhuk chiang e. Min hmu tùr tak takin a rawn chhuk, min duh ve takzet tih ka hriat phah alawm. Nilêngin kan awm dùn a, Rindika pawh kan hmu dùn a, kan pathumin kan dine-out ták nghê nghê kha.



Exam zawh hlàn ka nghâkhlel ania aw. Exam zawh veleha haw thei turin flight ticket kha a hma daih tawhin kan tifel vek tawh a, exam zawh dâwn hnaihahte chuan haw chhoh ka châk tawh lutuk hi lehkha pawh ka zir țha hlei thei tawh lo, ka phûr over hi a ni tawp mai.



Rindika a chho ve thei dâwn ta lo tlat. A chhan a sawi țha duh vak lo, chhûngkaw lam thil vàng ti chauhin a sawi a. Ka zâwt lui duh lo, a sawi duh lo a ni ve mai; mahse, Airport thleng min thlah tho. Khatih lai khân kan inhmuh hun tàwpna ber tùr a ni tih chu lo hria ila chuan aw..." a ti vang vang a.



Ka nu hmêl chu ka en a, a hmêl hlim lo zetah chuan khami hun lai kha a ngaihtuah lêt tih ka hre thei mai.



"Ka haw chho ta a, i pain min lo hmuak bawk a, Rindika pawh ka hrechang ta lo. Ka hlim lutuk chuan khawvêl hi a pâr vul chûk ni maiin ka hria!



I pa chuan rei nghah loha inneih mai a duh thu a sawi fo. Hna a nei tawh a, nupui neih hun a ni ve tawh tho bawk. Kei erawh chuan ka lo hnial ve țhin, college ka chhuak âwrh chauh a ni si a. Eng mah thawh nei lova mi ina va làwi kha ka hreh ve tumhrang a ni, bâkah, ka la naupang ve deuh bawk si a, pasal neih ka la zuam chiah lo.



Mahse, i pa chuan min tur nasa thei khawp mai. I pa luhlulzia chu i hriat kha, kan awm dun leh kan inbiak azât hian inneih chungchâng chu a sawi lang ziah, min chan loh a hlauh thu nèn, ka nuih a tiza țhìn a nia.



Zan khat a rawn lêng tùr chu bike-in a chesual ta hlauh mai, a na hle a ni. Helama doctor-te pawhin tih vak ngaihna an hre lo, a rang thei ang bera phai lama phurhthlâk a ngai an ti, ka rilru hrehawmzia mai chuh! Kal ve duh viau mah ila lo inrawlh vena chi a ni hauh lo, a chhûngte tak tak lo tân chuan.



Chutia rilru hrehawma ka han awm leh ta chu Rindika ka hre chhuak, ka phone khâtzia ka hre chhuak bawk. Ka thlen zànah ka phone a, chumi lo chu vawi hnih thum bâk kan inbe miah lo nia! Ani kha awm se chuan a bulah ka țap leh ang a, aniin duat takin min kuah ang a...



Ani bâk biak tùr nei lo ta chu, țap pur chungin ka zu be leh a, thil thleng chu ka hrilh nghál vek. Mi hnem a thiam lo ka tih tawh kha, ka thu sawi chu a lo ngaithla tawp a, ka thu sawi kârlaka ' A țha thuai mai ang' ti bâkin min hnèm thiam lo, ka bulah awm se zawng min kuah leh dâwn asin, ka lungchhia a reh hma chu min kuah vang vang ngei ang.



A tawi zâwngin, i pa chu a insawh nat deuh avàngin a taksaa eng eng emaw lai chu thlâk a ngai nual mai a, a taksa chhûnga a sawh chhiat khân a țha awm pawh a tichhe nual a ni àwm e. Hetia a lo țha chhuak thei pawh hi Rindika vàng a nia, ani khân a taksa pêng kha i pa tân hian hlànin hetiang hi a lo tawh phah ta a ni," tiin a ngawi ta vang vang a.



Sawi tùr rêng ka hre lo, ka țawng peih tehlul nèn, ka thu hriat chuan  min tingawi hmiah! Makti takin ka nu chu ka en reng ringawt!



A hnu deuhah chuan a kuta a ken rawmawl vár nia ka hriat chu dìm têa pharh pah hian," Hei hi chhiar la, i hre thiam mai ang," a ti sap a, ka lamah chuan a rawn lek phei ta nghâl a.



Paper chul ve lam tawh hi a lo ni a, pentui pâwl ngei maiin eng emaw hi a lo inziak dul mai, phêk thum vêl zet a ni nghe nghe!



Ka han chhiar a.



Puii,
He lehkha hi i chhiar meuh chuan kei chu piallei thuahriat kârah ka zâl tawh ngei ang. I lungngaihna leh lungchhiatna hnèm tùra kuah tùr che pawhin i bulah ka awm tawh dâwn lo tihna a nih chu, ka va inhaw tehlul êm!



I lakah ka natna ka inzêp ngar ngar a ni bîk lo a nia aw, ka inrinhlelhna hi chu a rei tawh a; mahse, confirm tak erawh ka nei lo mai chauh a ni, dik tak chuan ka hrilh duh lo che a, inentîr kha ka duh lo bawk a ni, mahni hma ka sial i ti em? I bula hlim taka hun hman kha ka thlahlel êm asin.



Kan têt tê ațanga inkàwm chho kan ni hi a châng chuan ka haw țhìn. A chhan chu kan inkârah ințhian țhatna bâk a awm ve thei tlat si lo va, ka duh rûkna che pawh țhian țha kârah chuan sawi lan a rem ve si lo.



Ka duh che tih ka hrilh ngai lo che tiraw? Ni e, ka sawi i hre ngai lo ang, kan inkâr ințhian țhatna tih chhiata a awm tùr kha ka ngai ngam lo va, ka sawi chhuak a nih hlauh chuan kan inkâr khân a tuar ngei dâwn si. Ka bula i lungngaihna, lungchhiatna leh harsatna i sawia lo hnem nân chea lo kuah vawng vawng bâk che kha kei chuan tih theih ka nei ve hauh lo; mahse, chutiang ti theia ka lo awm ve ringawt pawh kha ka tân chuan a tâwk viau a ni.



Ka'n sawi tawh ang e. Ka duh che a, ka hmangaih bawk che. I tân hian thil țha ber ber ka duh a, i hlimna hi ka dah pawimawh ber țhin bawk. Ka țhian țha ber ka duha ka hmangaih tlat mai kha ka tih dik loh a ni ang em tiin ka ngaihtuah fo țhìn.



Bialpa i nei a, ka lawmpui che rualin ka khua a har țan tih ka hria. Ka hlimna ber khân mi dangah hlimna a hmuh miau chuan ka tân chuan tih theih rêng a awm lo, ka duh tak hlimna lo thlìrpui mai loh chu; mahse, i țahna thlentu an nih hian i rilru a nat tluk zetin kei pawh a lo na ve tho asin.



Ka duh tak ka nei ve thei ngai dâwn lo tih ka hriat vàngin i rilru tihnawm nân, min ngen ang khân Martina kha ka kawp ve chhin ta a; mahse, duh miau loh chuan a tân khân min țhen mai loh chu duhthlan tùr a awm lo, ka duh thei tak tak lo miau si a. A chunga khatiang ka thlentîr erawh kha chu hrehawm ka ti, ka pawi a sawi hauh si lo.



He ka natna khum ațang hian i aw ri chauh tal hriat pawh ka va chák thei tak êm! Hlim taka i nui rî te kha hre leh thei ila chuan ka harh sawng sawng thei ngeiin ka ring; mahse, chu chu beisei phâk a ni lo. He ka taksa chau chhe zet hi ka rilru paukhauhna hian a dinpui zo si lo, ka rilru anga harh țha hi ni thei se aw...



Ka thih hunah chuan ka taksa pêng țha laite hi a mamawh hnênah hlan a ni ang a, kei chuan mual liam mah ila anni erawh hi chuan damlai taksaah hmun an chang ngei ang, mite tân malsàwmna an thlen thei tùr hi ka lâwm, ka hmu châk bawk.



Mahse, i pasal neih huna i hlim hmel ka hmu hman lo tùr leh lawmpui tur chea i kianga ka awm ve lo tùr chu pawi ka ti. Inneih thuama i inthuam tùrte chu ka hmu châk lutuk che, i hmelțha dâwn lutuk tih ka hre reng si a, ka mitthlâah ka hmu thiam nâ chein ka mitthlà aia nalh hi i ni ngei dáwn tih ka hria. Hmuh che ka châk dâwn si a, Pathian hnênah hmuh che ka lo dîl ang.



I pasal chu khawvêla mi vànnei ber a ni, hmangaih takin lo enkawl la, mi fel famkim kan awm loh avàngin zâwldawh takin i lo enkawl dâwn nia aw. kei pawh mi vànnei ber dawttu chu ka ni ka ti ve tho, i țhian ka ni thei miau si a; mahse, tunah hi chuan i țhian nih hi ka va tlin ta lo êm! Harsatna i tawhah pawh ka hnèm thei tawh si lo che a, kuah phâkah i awm lo mai ni lovin kuah tùr che pawhin tha tam ka mamawh tawh ngei ang!



Vawiin chu Goa kan zin lai vêl kha ka ngaihtuah a, i hlim lo hmêl kâra min zah avànga i nui lui hmêl kha ka hmu rauh rauh reng mai. I kal leh ngai a nih chuan kan kalna hmunte kha rawn fang leh la, a hma ang ni lovin hlim takin hun hman i tum tawh dâwn nia, kal leh theih ka châk ve khawp mai; mahse, suangtuahna mitthla mai chauh hi ka chan tâwk chu a lo nih tâk hi...



Mahse, a țha vek e. Hlim takin hringnun i hmang chho ngei ang tih ka hria alawm, pasal țha tak i nei ang a, fa duhawm tak tak nèn, vàn ațangin ka lo thlîr țhìn ang che. Harsatna tâwk lo tùr chein ka duhsak che, ka phal lo, hnèm tùr chein i bulah ka awm thei tawh dáwn si lo.



A tàwp berah chuan maw Puii, ka sawi nawn leh ang, ka hmangaih che, nang chuan țhian ang chiahin min hmangaih tih ka hria, chubâk chu, ka phût ngam hek lo, ka hmangaihna che pâr vul ve ta lo hi chu an sawi Pialràlah, nunna hi a la awm zêl a nih ngai chuan vultîr ngei ka lo tum ve tawh ang.



Puii, ka hmangaih reng ang che, ka thinlung zawng zawngin...


Rindika aka Bingo.



Ka mittui chu a rawn far ta zâih. Rindika chan chu ka ngaihtuah a, ka khawngaih lutuk a ni. Ka nu hmangaih reng chung siin, hrilh thei bawk si lo leh natna tuar reng chunga ka nu a hmu thei tawh bawk si lo chuan ka mittui a titla lo thei lo.



Rei fê chu kan ngawi reng a, țawng lo mah ila kan rilru ngaihtuahna erawh a inhnaih viau maithei a ni.



"A khawngaihthlâk hle mai!"a tàwp a tàwpah chuan ka ti chhuak ta sap a.



Ka nu erawh a ngawi reng, a en ngai a en reng a, a kut chu a hûm ruh ngawt ngawt ringawt a.



Ka mittui chu hru hulin Paper chu dìm têin ka thlep a, ka pe lêt ta nghâl a.



"Ka pain a hre vek tawh em?" ka ti leh a.



"Aw, a rawn dam chhuah hnuah khân a hria. Kei chuan Rindika a thih khân he lehkha hi ka hmu a, i pa hnên ațangin Rindika taksa pêng țhenkhat kha a dawng tih ka hre ve chauh," a ti sap a.



Kan mut meuh chuan zàn dâr 1 a pèl tawh! Ka nu chu ka kuah chial a, ani pawhin min kuah lêt ve tho.



"Ka pa hi tawng lo ta la, Rindika nèn chuan in induh ang em le?" ka ti leh. Țawng duh ta na nâ nâ chuan thil eng eng emaw ka zâwt châk leh tlat zêl.



"Ka hre lo le, khatiang zâwng khân min lo en țhìn a ni tih ka hre hauh lo. Amah avàng chauha i pa pawh hi mi ang leh thei a nih vàng leh a thil tih ropui tak vàngte, leh a tâna ka tih theih tâwk a hming ang phuah che leh a piancham a lo thlen apianga a thlàn tlawh mai loh hi chu tih theih dang ka nei si lo," a ti leh sap sap a.



"Nu, i thil min hrilh avàng khân ka lâwm e. I țhianpa chu kan chhûngkaw tân mi ropui ber a ni tiraw? Kei pawhin ka pa ang chiahin ka hmangaihin ka ngaina nghâl. Amah ang mipa chu tawn ve ka châk e," ka tih chuan ka nu chu a nui deuh hak a.



"Bawihte, Pathian zârah kan dam ang a, pasal țha tak, i pa ang maia min hmangaihtu, i pa Rindika anga mi fel leh hmangaihna ngah i la tawng ngei ngei ang. Fa i neih ve hunah kan chanchinte hi kan la hrilh chhâwng ve zêl ang a, a ngaihnawm piah lamah hmangaihna ropuizia hi an la hre chho zêl ve ngei ang," a ti leh a.


*******


Thlànlung chu ka en reng a, he pa hi ka ngaina mai ni lovin ka ngaisâng a, ka hmangaih ta hle bawk. A jmel hmuin ka țawng hre thei lo mah se biak ka duh tho tho.



"I hmangaihna avàngin kan chhûngkua hian kan hmangaih che a, i dam laiin i hmangaihna kha pâr vul lo mah se i thih hnu hian i hmangaihna ropuizia hi kan hre chhuak thar zêl asin. Kan chhûngkaw aiawhin làwmthu ka sawi thar leh a, i tân kan tih theih tâwk hi tlêm hle mah se engtiklai mahin kan theihnghilh ngai tawh lo ang che tih tal hi chu lo hre ve rawh aw. An sawi Palràlah chuan ka nu nèn hmangaihna pâr in vul duntîr ve theih ngei tawh ka beisei, ka pa pawhin a phal êm êm ang, nangmah avàng chauha nunga hlim taka hun hmang thei a ni si a," tiin ka phun sap sap a.



A pangpâr duh ber ţhin Dingdi leh Di pâr khàwi pawlh ka ken chu a thlànlung nghènga dim taka dahin," Nangmah ang chiaha hmangaihna nasaa min hmangaihtu tùr mipa hi tawn ve ka duh a ni, ka hmaah min rawn chhawpsak ve rawh aw," ka ti leh a, thlànlung chu en vang vangin," Tûn atân chuan ka kalsan rih ang che, ka rawn kal leh thuai ang. A nih leh mai aw, kan chhûngkaw țhianpa BINGO," ka ti leh sap a, muangchângin chu thlàn hnungchhawn zâwng chuan ka kal ta nghâl a.






*KAN BULA AWM RENGTE HI A CHÂNG CHUAN KAN NUNA MI PAWIMAWH BER BER, KAN HRIAT RENGTE HI AN NI VEK KHER LO*