☆LUHLULPA☆ - 11 & 12 By Dingdi Pachuau

☆LUHLULPA☆ - 11 By Dingdi Pachuau




A tûk chaw ei khamah chuan Nutei chu chhuak tùrin a insiam a, Muansanga'n Bawihtei a rawn phone bawk a.



"Chaw in ei tawh chuan i hman tawh em? Rawn hruai che ka rawn tum  tawh a," a rawn ti a.



"Au Muan, ka la insiam lo, Âma ka insiamtîr lawk ang aw; mahse, lo kal tawh tho la?" tiin a lo chhâng a, Nutei chuan min rawn melh râwm a.



"Aw le, ka rawn kal nghâl ang. Âma kha thingpui min lo lumsak tùrin hrilh la aw; mahse, ka hrilh che tih chu hrilh miah suh," a rawn ti leh sar sar. Loudspeaker ka on-sak sia, a țawng kan hre thei vek tih hria se chuan chutiang chu a sawi lo tawp ang maw le!



"Chuan, kan thurûk kha, sawi miah loh tùr ka tih kha, i la hria tiraw? Sawi chhuah miah loh tùr aw, nakînah, Kan la hrilh chauh ang, Promise ka tih kha aw?" a rawn ti leh a.



Bawihtei pawh chuan," Aw, ka hria. Promise, sawi chhuah chuan Pathian pawisawina," tiin a lo chhâng ve zat zat a.



Nutei chuan," Eng thil nge ni a?" min rawn hnaih pah chuan a ti sar sar a.



Ngaih dàn ka nei bîk hauh lo mai!



"Ka hriat bîk loh tawp chu! Thurûk ni na nâ nâ, engtin nge ka hriat bîk ang?" ka lo ti a.



"Thil țha lo lamte hi a ni lo ang maw?" a ti leh a.



"Ni lo hrâm rawh se," ka lo ti a.



Muansanga rawn thlen lai chuan Nutei chu a chhuak dâwn chiah a, Bawihtei pawh ka lo siam sa diam tawh, khua a la vawh tehchiam loh avàngin ka thuam lum vak lo.



"Au Muan, ka lo inpeih vek tawh a," tiin hlim zet hian a lo chhàwn a, chutah, min en lehin," Âma, Au Muana thingpui tùr chu lo pe nghâl la?" a ti nghâl zat bawk a.



"Um, ka chhuak dâwn, eng nge ka lo lei haw ang?" tiin Nutei chuan min rawn en a.



"Eng mah a ngai lo, i tih tùrah va hlawhtling la," ka lo ti a.



"Beisei ang. Bawihte, bye u."



"Bye bye."



Thingpui chu Muansanga chu ka va pe a, ngawi renga min lo enin ka en ve tih a hriat chuan a hawi sawn ta nghâl a.



"Eng nge Bawihtei chu i tihpui dâwn a?" tiin ka zâwt a.



"Naupang duh zâwng a niang chu."



"I tân harsatna a thlen lo ang che maw? Ka tel lovin a chhuak khât si a, ka ngaihtuah riau asin," ka ti a.



"Chutia i ngaihtuah chuan, lo kal ve la ni mai alawm, problem solve a ni mai a," a lo thên mai.



Tihchi nâng aw. Min sâwm ve pawh a ni lo va, insàwm leh chawpchilhte chu ka duh teuh lo mai.



"Ni lo ve, tih tùr ka nei alawm," tiin chhuanlam ka siam ve zaih.



"Eng nge i tih dâwn?" a ti leh ta khauh mai.



Ka ngawi deuh vang vang phawt a, chutah, nui deuh chung hian,"A tam mai, nu nih tawh chuan inah hian tih tùr kan ngah êm asin," ti-a ka chhàn chuan a ner neuh sak a, a ngawi ta daih bawk.



Bawihtei nèn an chhuah dâwn chuan Bawihtei chuan," Âma, lo kal ve la?" a ti leh rih a.



Nuih sak pah hian," Inah tih tùr ka ngah alawm. Hlim deuhin i va lêng dâwn nia, chuan, țha deuhin awm tùr aw, mi tihbuai miah loh tùr," tiin a lu-ah chuan ka chûlsak a.



"Aw le, Âma."



"Âma kha bye bye rawh le," tiin Muansanga chu a lo țawng ve sup a.



"Bye bye, Âma."



"Bye u le."



Hlim taka awma hna țûl thawk tùr ka nih vei nèn, Bawihtei ngaihtuah rêng rêngin hun ka hmang nilêng. School tih lohah chuan ka tel lovin a chhuak khât a, tlaia a pain a rawn lam zauh zauh tih lohah chuan a chhuak ngai si lo, ka ngaihtuah lo thei lo.



Chhùn thingpui in hunah ka va call ta nge nge.



"Bawihtei chu a buaipuiawm em? A tibuai viau lo che maw?" ka va ti a.



"Buai lo, a hlim lutuk," a rawn ti a, phone-ah pawh chuan a bul hnai deuha Bawihtei hlim thâwm țê rai rai pawh chu ka hre thei hial.



"Eng nge a tih a?"



A rawn chek hluk a," Khatianga ngaihtuah leh tho tùr te chu, rawn kal ve mai tùr che a nia," a ti ta sup a. He pa pui roh hi a naupan ai hian a aw hi a thûm roh a, a hmain ' I aw hi tilpàwr aw an tih ang hi a ni tiraw?' ka ti zauh tawh a, a duh lo  ve râpthlâk maw le.



"Min sàwm ve dàn kha..." ka ti sap a, chutah," Tih tùr ka nei alawm, tunah pawh ka chawlh lawk lai a nia, Bawihtei ka ngaihtuah êm a..." tiin ka riat nawi ta deuh mai mai a.



A rawn nui hawk a, chutah,"Rawn ngaihtuah suh, a bulah ka awm alawm, a hlim lutuk tlat. Nakinah video ka rawn thawn ang che," a ti a, rei pawh kan inbe lo.



A hnu deuhah chuan video min rawn thawn tak tak! Ka han download a, en chung chuan ka nui var var. Ka rin loh deuh a ni! Bawihtei hlim sizia chu, hmeichhe naupang pakhat leh Muansanga nèn chuan room pakhatah hian lem an ziak a, an thawmhnaw inbel chu a la inang vek zui, an kut leh an hmaiah te chuan rawng chu a kai nuai mai; mahse, an lang 'cute' tawp.



Ka thaw huai. Hetiang lam hi Bawihtei nuam tih zâwng a ni ang tih ka lo ngaihtuah pha hauh lo! Ngaihtuah pawh ni ila hetiang tihna tur hmun pawh hi kan nei ve lo hrim hrim, a u Muana'n lêng tùra a sâwm chu a țha e.  Kan pahniha ina kan awm chuan barbie kha a khàl leh emaw kha a ni ang a, a tân a ninawm duh dâwn êm mai.



Victor-a a rawn lang hlawl mai.



"Khawnge Bawihtei?" a rawn ti nghâl a.



"A lêng chhuak ve lawk," ka lo ti mai a.



"Khawiah maw? I tel lovin engtin nge i chhuahtîr theih a?!" a ti țhawt mai!



A ti dik ve reng ka tih vàng chuan ka ngawi rih phawt a; mahse, Bawihtei hlim hmel kha ka mitthlà nawn leh chuan ka nui sak a.



"Thil nuihzatthlâk ka sawi em ni?" a ti leh khù khú mai.



"A lêng chhuak ve zawk a ni, i bulah pawh ka tel ngai hleinem, a chhuak tho țhin alawm," dam tak hian ka ti a.



"Kei chu a pa ka ni, a pa. A pa bulah chuan ngaihtuah a ngai hleinem, i ngaihtuahna kha hmang ve țhìn ta che," a ti leh khur khur mai.



"Ka ngaihtuah-" Kawngkaa hlim hmel zeta Bawihtei leh Muansanga lo lût chuan ka țawng lai chu min titàwp chat.



"Âpa, âpa," tiin Bawihtei chuan rawn panin a rawn kuah nghâl chang chang a.



Muansanga erawh a tàwi deuh hrat a; mahse, a rei lo. Rawn țawng chhuakin," Ka rawn hruai haw har i tih loh hrâm ka beisei, nuam an ti si a, nuam an tih lai tak a rawn hruai haw daih kha ka khawngaih ve si a," a ti a.



"A pawi lo-"



"Tu nge i nih tehchai a?!!" tiin Muansanga chu a melh khui mai, a awki a ring miah lo; mahse, a hmel ațang chuan a lung a awi lo takzet tih a hriat hliah hliah.



Victor-a chu kan en ta țhap mai.



Bawihtei chuan a pa en reng pah chuan," Âpa, Au Muana'n an inah min hruai a, a nuam a nia aw... ni dangah ka kal leh dâwn bawk a," thil  awmzia hre thiam ve vak lo chuan a lo ti a.



A ngawi rùn a, Muansanga chu a melh rùn bawk. Muansanga pawh chu a lungawi hmel vak bîk lo nain insùm theihna a tlachham lo riau a nih dâwn hi, nui hmel a pu deuh.



"Nia, ni dangah chuan Âma nèn in ni tawh ang a, nuam i ti zual ngei ang," Bawihtei en chung hian a ti a.



Victor-a thinrim hmel chuh!



"Âpa, lo kal ve la?"



Nuihza lo hle mah ila Bawihtei thil sawi zet chuan a pa rilrua hna a thawh dàn tùr chu ka ngaihtuah a, ka nui deuh sak.



"Rawn hruai che ka tum a," tiin Bawihtei chu inseh ruh țeuh chuan a bia a.



"Àpu inah a awm em?" tiin ani chuan a lo zâwt vat a.



"Awm lo, a zin lawk a."



"Âpa, Âma ka ngai tawh rih sia, âma bulah ka awm rih mai ang. Tûnah ni loi lo kal leh la?" a ti leh a.



Kan boruak chu a uap churh mai. Nuam lo tak a ni, Muansanga a ngawi ngal tawh a, haw nghâl a tum mai loh hmèl. Victor-a lah a ding ngur mai a, a hmel ațangin a rilru tùr a hriat vek bawk si.



"Naktûk tlaiah ka lo kal leh ang," ti nghutin Bawihtei chu chhuatah chuan a nghat a, min rawn enin," Ka rawn bia ang che," a ti a, a chhuak ta nghâl a, Bawihtei chuan," Âpa, bye bye," a la ti hrâm hrâm.



Ka khawngaih reuh mang e, a pa lahin a rawn chhâng lêt si lo.



"Mimawi, vawiina i thil lem siam kha Âma han hmuh la? Mawi a ti ngawt ang!" tiin kan boruak uap churh mai chu Muansanga chuan a rawn tireh ta a.



A bag chu hawngin lehkha zial hi a rawn phawrh chhuak a, min rawn pein," Âma, a mawi i ti ngawt ang! Ih maw, pangpâr lem a nia," hlim zeta tiin ka bulah chuan a rawn țhu nghâl sat sat a.



Ka en sak a, a kum phû lo chuan a ziak thiam reuhin a chei thiam reuh khawp mai.



"I va ziak thiam tak! Kei aiin i thiam daih zâwk maw le," tiin ka fak a.



"Âma, lo kal ve tawh la?"



Muansanga chu ka en zawk a, min lo en ve lai tak a nih vàng chuan ka mit ka la sawn rang khawp mai.



"Bawihte, ka thiam ve lo ang."



"Ka zirtîr ang che."



Bawihtei room-a a luh hlàn chuan Muansanga chuan," A lo àn khum chiam che em?" a ti sup a.



Ka en zawk a; mahse, hawi sawn leh nghâlin," Aih...eng mah a ni lo, Bawihtei awm loh vàng mai kha a nia," ka ti ringawt a.



"Kan lo thleng tlai deuh bawk sia, ka thiam loh a ni," a ti leh sup a.



"Chutiangin sawi suh, Bawihtei a hlim êm kha," ka lo ti vat a.



"A lo vìn khur khur lo che maw?" a ti țha leh a.



Bawihtei a lo chhuah tawh avàngin ka chhâng tawh lo. Nutei a rawn thleng ve chawpchilh bawk a, chutiang sawina hun a awm ta lo chu ka lâwm ru kher mai.



A rawn țawng lût nghâl hlut.



"Vawiin chu, ka luck lo lutuk ringawt! Naktûkah chauh ka hmu thei dâwn, ka tibuai rei leh deuh dâwn che u a nih chu," a ti nghâl bawrh bawrh a.



"Ngeiawm viau suh," ka lo ti a.



"Bawihte, vawiin chu a nuam em? In rawn thlenna a rei tawh em?"tiin Bawihtei chu a be leh nghâl zat a.



"Ânute, thil lem ka siam a, ka hmuh ang che aw, mawi i ti viau ang," tiin room lamah chuan a tlân lût nghâl a.



"Ka haw ve tawh ang e," tiin Muansanga chu a ding hluai a.



"A la hma e," Nutei chuan a lo ti vat, ka sawi tùr ni àwm tak a ni.



"Ka awmna a rei tawh alawm," a lo ti thung a.



Zànah chuan Victor-a'n min rawn phone a, Bawihtei leh Nutei hriat laia  biak ka duh loh vàng chuan bathroom-ah ka lût vat a.



"Kha pa kha i bialpa a ni chiang a ni, tiraw? Ka fanu nèn chuan an innêl tawh hle mai maw, rilru a hmang ve nasa àwm hle mai," a rawn ti a.



"A ni lo-"



"Zêp suh, ka hre thei alawm, nei rawh, ngaizawng rawh ; mahse, Bawihtei kha chu ka hnênah a awm ang," a ti nghut nghut a.



"Ka ngaihzawng neih leh neih lohah chuan rawn inrawlh suh, ka duh leh ka nei ang. I nupui neihah ka rawn inrawlh lo tih i hriat kha, i duh tawh loha i chhuahsan tawh hi min rawn chuh buai mah ta che. Ka enkawl thei, buaina ka duh lo. Bawihtei'n hetiang buaina a tawh pawh hi ka duh lo, ka phal hek lo," ka ti ve ta a.



"Ngaihzawng i neih phawt chuan Bawihtei kha i chang dâwn lo tih ka hrilh tawh chein ka hria," a rawn ti leh a.



"Min vau miah suh."



"I hre mai ang chu, nei zêl la?" a rawn tih chuan,"Ka hlau che emaw i ti a niang e, ka hlau hauh lo che. Duh lova min chhuahsan tawhtu hian thiam i chang hauh lo ang, hetiang mipa hi i ni tih ka lo hre har lutuk hi ka inkhawngaih zâwk," ka ti chang ve ta khal mai a.



"Kha pa kha ka fanu kha hnaihtîr tawh suh ang che, a chunga pawi ka thlentîr hma hian nang pawh inthiar fihlîm ang che," a rawn ti leh a.



A va zak lo tak!



"Duh tâwk teh ang, thildanga buai lovin i nupui leh i chhûngte kha ngaihtuah țha la, a țha a ni mai,"tiin ka phone chu ka hmet tàwp hmak. Ka be zui zêl peih tawh lo.



Nutei chuan ka chhuak chu ngun zet hian min lo en a, mitko sàn ãk hian," Zaninah Au Muana a lo lêng leh dâwn em?" a lo ti a, min zâwt ni pawhin ka hre lo.



"Ka hre lo," Bawihtei chuan a lo ti a.



"A fel i ti em?" tiin a zâwt leh a; mahse, keimah min rawn en reng thung.



"Fel lutuk! Sakawr ka chuan châk chuan min chuantîr a, a bike-a ka chuan duh pawhin min chuanpui țhìn. Ei tùr pawh min leisak țhìn," a lo ti a.



"A nih leh, âpa nge fel Au Muana?"



Thaw hakin rum zet hian ka melh hrãwk a, ani lah chu a lo nui duh chauh.



"An fel ve ve. Âpa chu a rawn kal  tam lo va, Au Muana chu a lo kal tam a, kan inkàwm tam bawk," Bawihtei chuan a lo ti leh zar zar.



"A nih leh-"



"Duh tâwk ang u, kan mu leh tawh dâwn em niang?" ka lo ti vat a.



"A la hma alawm," Nutei'n a tih chuan Bawihtei chuan,"Ânute, thawnthu min hrilh la?" a lo ti ta khauh mai.



"Eng thawnthu nge niang?"



"Liandovate unau kha," a lo ti vat a.



Hma angreng deuha kan mut tâk chu. Thawnthu an inhrilh laiin keiin phone ka lo khawih a, order ka en dan dan a.



*Vawiin kha i thin a rim lo maw?*  Muansanga message a ni.



*Eng aiah chuan maw?* tiin ka chhâng vat a.



*Mimawii ka rawn hruai haw tlai kha* a rawn ti leh a.



*Rim lo ve* tiin ka chhâng.



*A pa kha a lungawi loh hmel nasa si a, nuam lo i ti ngawt lo maw?* a rawn ti leh.



*Eng mah a nih loh kha* ti chauhin ka chhâng.



*Kei chu i bulah hian ka thinrim ve thei miah lo, i hmel ka hmuh hian ka dam vek zêl* a rawn ti ta!



Ka chhâng ta lo, chhàn lêt ngai pawh ka ti lo.



*Min chhàn a ngai lo, i lo chhiar chuan a tâwk. Ka duh che tih i hriat hi ka duh chu a ni mai, hmangaihna chuan kum a thliar si lo, mite pawhin 'kum chu nambar mai mai' an ti ve tho a* a rawn ti leh.



Chutiang mai mai chuan ngai ve thei ila...



*Min kàwm ve duh ringawt pawh hi ka tân chuan a tâwk viau; mahse, hetiang thu ka hrilh hnu che khân ka zah che a, ka inthlahrung sawt bawk, hnaih loh che ka tum ve reng ; mahse, ka thei si lo, ka thinlung hi ka duh danin ka kuaiher thei ringawt si lo. Hei ai hian lo upa ve deuh ila aw...Upa deuh ila chuan chance ka neih ve theih mai chu ka ring* a rawn ti leh.



Ka khawngaih roh. A hmel țha tak leh a hlim hmel nui deuh sak țhinte chu ka mitthlaah a rawn lang nghâl chuai chuai a, kei nuthlawi mai mai hi min duh tak tak theiin ka ring lo, dik taka sawi chuan kei hian ka phû lo asin, tlangvâl țhalai duhawm tak a ni a, ka laka hun khawhral mai mai tùr hian a uiawm lutuk.



*Kei chu min duh mah ta che, nula țhalai an tam lutuk* tiin ka chhâng ta nge nge, ka khawngaih ru ve tho alawm.



*Rose pâr mawi ber ka hmuh theih reng laiin engah nge Vailenhlo pâr chu ka en tlat ang le?*  tiin min rawn chhâng.



A nuihzatthlâk roh asin. Rose pâr min rawn tehkhin a nia!



*Rose chuan hlîng a nei asin* ka ti a.



*Hlîng chu a lo invèn vena a nia, a mawina a hliah pha chuang lo, mawi titu tân chuan hnualsuat phahna aiin humhim duhna a lian zâwk ngei ang* a rawn ti leh.



Țawngkam a lo thiam zêk mai!






*HLAWHCHHAMNA I TAWH AVÀNGA LUNGNGAIA INDAWM KUN MAI LOVIN HUN REMCHÂNG DANG ZAWNG LEH ZÂWK RAWH, BEIDAWNG LOVIN*





☆LUHLULPA☆ - 12 By Dingdi Pachuau





"Tu nge i text a?"



Ka phu zawk mai! Thawnthu an lo inhrilh tàwp tawh lo niin.



Ka chhàn hma chuan,"Au Muana a ni maw?" a rawn ti zawm leh zat.



"Umm..." ka ti, dâwt sawi a țùlna ka hre kher lo.



"I duh ru ve tho tiraw?" a rawn tih chuan," Ka hre lo le," ka ti ringawt. Chhe lo roh chu ka ti. Tin, kan nufa chungah pawh a fel viau a; mahse, ngaihzawng ang tùr hian ka la en lo a nih ka ring, laih erawh kha chu ka lài ngei tawh mai a!



"A la naupang ve êm bawk alawm le; mahse, induh tawn chuan kum hi chu indàltîr tùr pawh ka ti chuang lo," ani chuan a lo ti leh a.



Ka ngawih tâk reng avàng chuan a țawng ta bîk lo, rilru lamah erawh ngaihtuah zui tùr a tam zut zut khawp mai.



Chhunah Nutei rualin Bawihtei nèn kan chhuak ve bawk a, kan hman ve tho sia, min vah kualpui a duh a ni. A pawi ka ti tehchiam lo, kan chhuakho khât  êm asin.



Ani hi chu a hausa a, ui pawh a nei lo. Doctor a hmuh hma zawng chu khawi khawiah emaw kan kal kual a, doctor a hmuh chhûngin keini nufa pawh kein kan lo kal kual a, Bawihtei'n nuam a ti lehpek. Kein kan kal khât ve bawk a, nuam a ti chu a nui var var reng mai.



Doctor a hmuh zawh hnuah ve thung chuan bungraw lo thleng min lâkpui leh a, a tihchi ka ti khawp mai. Scooty chuan vawi hnih vawi thum ka thiar leh àwm si a, motor chuan vawi khatah kan phur zo vek thei si a.



"I sumdàwnna hi i tluang reuh e ka ti. Dàwr chu ti ngei ngei rawh aw, Bawihtei len deuh hunah. A school kal hlànin dàwr i nghâk ang a, a bàn hun vêlah i haw thung ang a, mi chhawr pakhat i neih chuan a tâwk viau ang," a ti barh barh a.



Nia, ka la ngaihtuah țha ve ang chu.



Tlaiah Victor-a'n Bawihtei a rawn bia a, loudspeaker ka on avàng chuan a thil rawn sawi chu kan hre ve vek thei a. Thil pawi deuh tùr lam a rawn sawi lo; mahse, a rawn duat hliau hliau khawp mai.



"Bawihtei pa a lo ni kher kher hi chu aw..!" Nutei chuan ka beng bulah chuan a rawn ti sar sar a.



Alu kan chu ka chawk a, chhàn pawh ka tum hran lo. A ngei ve si a, a sawi tui leh lutuk palh ang.



"Bawihtei pa mah ni se ka ngei tho tho, ka awm laite hian rawn kal se ka ti a nia, rum lutuka lo melh ka châk," a ti leh mauh mai, a nuih loh theih loh.



"Niminah a rawn kal tawh," ka lo ti a.



"Ka lo awm lo chu a vànnei takzet a nih chu. Amah vàngin nuthlawi i nih phah ta ringawt a, Bawihtei lah fahrah a nih phah bawk a," a ti leh hmarh hmarh a.



"Ka tawn tùra Pathian ruat a niang chu," ka lo ti a.



"Ni lo, a suahsual tukkhum pàwn vàng mai mai alawm. Awm ngaihna a hre lo lutuk a nih hi, Bawihtei a rawn inti ngaihtuah leh viau pawh hi ka ngei a nia, duh lova kalsan tawhtu a nih hi. I nêm lutuk a, a rawn ngam che niin ka hria. Kei ni ve ngat ila chuan e, a rawn hmuh dêk dêk pawh ka phal lo ang," a ti leh báih bâih a.



An inbiak zawh hnuah chuan phone chu min rawn pe a, Nutei chuan," Eng nge i pa chuan a rawn sawi a?" tiin Bawihtei chu a zâwt a.



"An ina ka lèn leh huna thil min tihpui tùr a sawi a, a nuam dâwn lutuk asin," a ti hliai a.



"A nih, i pate ina i lènin âpate chuan an lo duat țhìn che em? Tuin nge duat ber che?" tiin a zâwt lehpek.



Ka zâwt ngai miah lo. An tunu fel tak a nia, naupang â mai a la ni bawk a, an lo duat viau hlawmin ka ring ani, Bawihtei pawhin nuam a tih theih viau zél kha maw.



"Àpuin min duat ber, chaw einaah pawh a bulah ka țhu țhìn," tiin a chhâng a.



"A nih, àpiin?"



Ka lo melh viau nain engah mah min ngai lo, a zâwt lui zêl tho.



"Àpi chu ka kàwm ve ngai lo, àpu leh âpain min duat a, àpu chu sakawrah țangin achungah ka chuang țhìn," a ti leh malh malh a.



"Nih, âpa nupui khân a duat ve che em?"



Nutei tak hi chu aw...



"A ho êm mai, naupang mai a la nih hi, chutiang zâwt sîsê lo teh," ka lo ti a.



"Âpa nupui chuan chaw min siamsak țhìn, a siam tui thei lutuk!" a lo ti awlsam leh mai.



Nutei rawn zin chu ka chhawr țangkai tawp, zîngah bungraw thawn chhuah tùr min phurhsak leh a, kan tlân kual leh chhên mai. Ani erawh chaw ei khama muangchânga haw a tum thung, Lungleia phei nân a remchâng asin aw...



*******



Muansanga a rawn lêng khât ta deuh, message lam erawh a rawn thawn peih viau. A buai thar ve deuh a ni àwm e, a țha ka tihpui khawp mai. Min hmuh tam loh chuan min theihnghilh ve tial tial ang a, a tân a țha ber bawk ang.



Victor-a erawh a rawn kal zing ta deuh, Bawihtei'n a ngaih êm avàng chauh hian  a hruai ka phalsak chauh.



Zan khat a rawn dah erawh chuan," Ka bulah awm rawh se, chu chu a țha ber," a ti chhuak leh a.



"Engati nge hetia i awm tlat a? Fa kha i duh lo a ni lo'm ni? Tunah pawh fa nei thei lo i nei ngat a nia. Fa duh lo hian engah nge min rawn vau ziah a?" ka ti ve ta a.



"Ka fanu a nih vàng a nih hi," a ti a.



"Ka fanu a ni ve tho. Nang chuan i duh lo va, kan nufain min kalsan tawh a nih kha. Fa duh ni la, nupui fa nei thei i nei ang chu. Sual khirh viau mah ta che, i vaua i diriam tlâk pawh kan nih tawh loh hi," ka ti leh a.



"Ngaihzawng bialpa nei lova i enkawl dâwn chauhin ka phalsak ang che," a tih chuan ka thin a rim thar ve thut mai.



"Ka nunah chuan thu rawn neih tum hauh suh, ngaihzawng  chu ka duh leh ka nei ang a, ka duh zât zât pawh ka kawp ang. Chumi avàngin Bawihtei hi ka thlahthlam ang tihna pawh a ni lo, i chhûngte enkawl la, kei pawhin ka fanu ka lo enkawl ang," ka ti ta kalh kalh a.



"Court-a inchuh i duh em ni?"



"Duh hauh lo; mahse, i tih luih chuan ka inpeih reng thung. Duh lova kalsan tawhtu hian thiam i chan ring hauh suh ang che," ka ti leh charh a.



A nui hak a.



"Thiam ka chan loh i ring a maw?! Hmel hriat kan nei țha a nia aw, lo hre ve mai mai teh," a ti leh kher.



"In nei țha ang; mahse, kei chuan a nu ka nihna angin ka hmachhawn ang che. Thiam ka changa ka enkawl dâwn a nih chuan vawi khat pawh rawn hmuh tum tawh suh ang che, a pa mah ni la hetiang mi sual bula rei lo tê a awm pawh hi ka phalsak tawh hauh lo ang," ka ti leh hmak hmak a.



"Kan hria ang chu!"



A haw hnuah chuan Bawihtei chu ka en vang vang. Ka khawngaih a ni, ks hmangaih êm êm si a, hetiang pa ka neihtîr hi hrehawm ka ti, a rilru lo makzia ka hre chiang chho telh telh zêl mai si a.



Ka pate hrilh ve chi em niang le? Ka hrilh chuan min ngaihtuah hle ang chu, Aizawla awm pawh an phal tawh hauh lo ang le, thil pawi a thlen hmaa hrilh mai hi a țha ang em? Va phone ta ila, a tlai tawh viau si a.



A, naktûk lamah inngaihtuah țha leh zâwk teh ang. Zanin rum rumah chuan ti lo ang. Va hrilh sun sun ta ila engtin vak nge an lo tih chuan ang? Krismas a hnai chho ve tawh bawk si, hetiang boruak tawn hi ka duh lo asin, hlim hun a nih tawh hi.



Mahni chauha ka awm lai phei chuan ka inngaihtuah nasa thei lutuk, țha ka ti lo takzet a ni. Rilru la pêng thei tùr ka duh ngawt mai, Muansanga lo lang khât ta chu ka ngei rum rum mai dâwn alawm le, ngaihtuahna kal ding lai titàwptu atân tal pawh lo lêng leg se ka ti.



A, ka ning hluah hluah, kan hma hun tùr chu tawng chho hmiah hmiah zâwk  mai ang, lo er viau a țha lêm lo ve, awmzia lah a awm hek lo.



"Âma, Au Muana phone ang?" Bawihtei'n a tih chuan en vang vang pah hian," I ngai tawh a ni maw?" ka lo ti a.



"Aw, ngai e, nang i ngai ve lo mi?" a ti reuh a.



"A, ngai ve tho e; mahse, a buai ngawtin ka ring, a buai vàng a nia a lo kal theih loh ni," ka tih chuan," Ka ngai tih ka hrilh chuan a lo kal hrim hrim ang," a lo ti deuh tlat a.



"A nih, han ti chhin chiah ila," tiin phone chu ka la a, a number chu ka hmet chhuak ta nghál a.



A buai loh lai a ni ngei ang, a rawn chhâng hma viau.



"Au Muan, lo lêng tawh la?" a ti nghâl deuh tâwng a.



"Min ngai tawh a mi?" a rawn tih chuan," Aw, kan ngai tawh lutuk che!" uar deuh tak chuan a ti a.



"Tu nèn maw min ngaih tawh lutuk a?"



"Âma nèn, i lo kal ang tiraw?" a ti nghâl zat.



"Min ngaih viau tawh si chuan ka lo kal lo ngam nâng, ka inbual lawk ang a, ka rawn kal ang aw," a rawn tih chuan ka lo hlim ve viau ringawt.



A buai bawk a nih ka ring, amah pawh a chêr ve deuhin ka hria. Bawihtei hlimzia chuh, a nui ar ar reng mai.



"I buai viau a ni maw?"tiin ka zâwt ve a.



"Um, in sak nèn, gym lam buaipui nèn, buai ve tak ka ni," a lo ti a.



"Chu, i buai lai laiin Bawihtei'n a lo be buai che a ni maw? A zia lo hle mai," ka tih chuan," Ani tânte chuan..." tiin a sawi zawm duh lo kher a.



A ngeiawm roh tak tak!



"Advocate hmel hriat i nei mial lo maw?" tiin ka záwt ta daih.



Min rawn en chiang ngang mai, ka mit ka la sawn hmasa ta thung.



"Nei maithei, țhianpa Riñmawia pa kha Advocate chu a ni ngei mai a," a ti a.



"A țhat hlauh chu."



"Eng atân maw i tih a?" a tih chuan," A, advocate hriat neih te hi a țha ve a," ka ti ringawt, a âwih kher lo ang ka ring.



" A nih tak chu."



Inrinni tlai khat chu Bawihtei pu a rawn lang hlawl mai! Mak ka ti lutuk ringawt! Kan in a rawn kal vawi hnihna a ni ta.



"Âpuuuuu...."



An putu chu an inpawm vawng vawng a, an inngai ve viau tawh a nih hmel,  a pu chuan ei tùr eng eng emaw a rawn kensak nual a.



"Ka pa, thingpui in rawh aw?" ka tih chuan," A ngai lo ang, ka la puar êm mai," a ti a, chutah, Bawihtei hnênah chuan," Bawihte, Âma hi biak lawk ka duh a," a ti a, chu chuan mak ka tihna a tizual.



Room-ah chuan ka awmtîr a, kei chu a puin min biak duh avàngin ka chhuahsan leh rih a.



A bul hnaih deuha ka țhut chuan," Ih, Bawihtei chungchâng a nia," a ti a, mak tihna chu hlauhthàwnnain a rawn thlâk ta thung.



"Ka pa, Bawihtei hi min chhuh luih i tum lo ang tiraw?" hlauthâwng rilru zet chuan ka ti a.



"Tum lo ve. A nu i awm a, heti chen nangmah chauha i lo enkawl tawh hi ka zak zâwk! Kan mawhphurhna liau liau a ni si a, kan fapa lah hi..." a ti a, a ngawi leh  vang vang phawt a.



"Ka enkawl thei alawm, ka fanu a nia, a mamawh chu ka thawk chhuak ve thei a ni," ka ti leh a.



"Bawihtei pa thiltih tum dàn țha ka ti thei ngang lo va, Bawihtei chang thei tùra Court-a hruai che a tum a ni; mahse, a sawi chhuah ațangin ka la hnial char char a, Court-a thu thlen lo tùrin ka thlêm char char a ni," a ti a.



Chu pa mai mai chu, min chhuhsak a lo tum chiang tak tak a nih chu!



"Ka remti thei ngai lo ang, a nu i ni a, pasal dang i nei leh ta daih pawh ani lo va, țha takin i enkawl chho mêk a ni a, ka fapa mâwl lutuk hi lo hre thiam hrâm tùrin ka duh che a ni," a ti chuar chuar a.



Ka țawng lo.



"Bawihtei chu kan tunu a ni a, a ni reng bawk ang. Eng mahin a tidanglam thei lo, harsa takin i enkawl chho a, puih i ngaih lai berin pui tùr ber che i pasalin a chhuahsan che u a, hrehawm ka lo ti êm êm țhìn. Duh lova a chhuahsan tawh hetia hnehchhuh che a tum hi ka remti thei hauh lo ang. Bawihtei chu ngai viau mah ila, nangma bula a awm chuan a hlim ber ang a, nuam a ti ber bawk ang tih ka ring bawk," ati leh a.



"Nia, a dik alawm. A pa a nih miau avàng hian hmuh a duh pawhin ka hnial ngai lo va, a tân harsatna ka siamsak ngai lo; mahse, enkawl a tum tlata thuneitu lama a țuan chuan tlàwm ka tum dâwn hauh lo," ka ti ve a.



"Zoni, chutiang ti lo tùr chuan ka lo thlêm ngar ngar ang, kei chuan ințhen tawh mah ula inngeih taka awm hi ka duh a ni. Hmelma ang maia inen chu Bawihtei tân pawh thil țha a ni hauh lo ang, kan tunu neih chhun liau liau a ni a, a mamawh zawng zawng chu a pa hian-"



Ka lo pawt chat.



"Ka pa, a mamawh chu ka thawk chhuak alawm, ka fanu mamawh ka thawh chhuah loh te chuan fa nei tlâk lo, enkawl tlâk lo ka ni mai dâwn asin," ka lo ti a.



Lu bûk nghat nghat pah chuan," Nang hi chu i puitling teh tak e. Bawihtei pa hi zawng, a puitling hlei thei lo a nih àwm hi, rilru puitling tak put a hun tawh asin le," a ti vang vang.



Bawihtei pu hi chu an ina ka awm lai pawh khân a fel thei hle a nih kha; a zaidam a, min ngaihsak a, a rilru pawh a țha. Kei pawhin ka ngaina; mahse, pawisa thawk chhuaktu zâwk kha a ni lo tlat mai a, kha khân amahah pawh inthlahrunna chin pawh a nei ve țhìnin ka hria a ni.



*******



"Au Muan???"



Ka en vat a, ka lo hmu lo pek niin, Muansanga leh  hmeichhe pakhat hi an lo ni a, a kalpuinu chu ka en chiang leh deuh hret, a chhe lo takzet tih chu ka hmu ta nghâl, a inchei dàn chu a inhmeh takzet bawk.



"Mimawi, eng nge in tih ve a?" a rawn ti vat a, a kalpuinu chu eng emaw hi a hrilh zauh bawk a.



"Âma nèn kan bazâr mai mai a."



Muansanga chuan min rawn en a," In lei mawi em?" a ti nghâl a.



"Ka enpui mai mai alawm, kan la lei lo," ka ti a, ka mit chuan hmun dang ka en kual daih, Bawihtei kut erawh nghet zetin ka dawm a.



"Keini pawh thil kan lam lawk a, ka hmuh che u ka ring miah lo asin," nui deuh hian a ti leh a.



A kalpuinu chuan nui deuh sâng hian," Min lo hre thiam lawk, hmân deuha Chapchàr Kût Miss-a an thlan kha a ni tiraw?" a rawn ti chhuak ta phawng mai!



Min tihamhaih deuh, ka chhàn hma chuan Muansanga chuan," Ni chiang e, chhe lo deuh kha," a lo ti vat a.



Min chibai leh rih. Kan inchen thuak mai, kei aiin tlêm têin a hniam hret maithei. A incheinain a zir bawk a, a chhe lo takzet mai, a hmai hnawih pawh a inhmeh khawp.



An kal ta chu ka thlîr miah lo. Nuam tih lohna eng emaw ka nei tlat, ka hre thiam chiah lo. A kalpuinuin a kut a kai chialte leh nêl tak leh hlim taka en paha a nuih sen sente kha ka hmu ve vek si a, engthil emaw hriat thiam theih si loh hian chhûngril lamah min țhâm tlat.



Bialnu thar a nei ta a nih hmel.





*I HUN HARSA, KHIRH LAI BERAH KHÂN, I THEIHNA SÂNG BER LANTÎR ANG CHE*