☆LUHLULPA☆ - 13 & 14 By Dingdi Pachuau

☆LUHLULPA☆ - 13 By Dingdi Pachuau





Victor-ate nupa pawh ka hmu, min hmu ang tih ka hlau lutuk, Bawihtei chu ka inherpui vat a, kan kal tawhna lamah chuan ka lêtpui leh tawp. Inhmachhawn ka châk rih lo, tunah tak hi chuan.



"Âma, eng nge kan en leh dâwn?" Bawihtei chuan a ti a.



"Ih, dàwr pakhat, kan kalnaah khân thil en leh duh ka nei a," ka ti ta ringawt. En duh chu ka nei hauh lo; mahse, chhuanlam han siam mai tùr kha ka hre lo a ni.



Ka vànduai ve hrim hrim nge ni, Muansanga leh a țhiannu kha kan hmu leh, tûn țum chu Muansanga'n Bawihtei a rawn ko ta thung.



"Âma chuan a vah kualpui nasa àwm hle mai che a!" a ti chu ka zak deuh bawk si, ka ngei deuh thut.



"Zawn nasat kan ngai alawm," ka lo ti deuh hmuk a.



Dàwr kawt a nih vàngin veivâk pawh an tam deuh a, ka hawi kual deuh ruai a.



"In chau tawh viau ang a? Kan inhmuh leh tâkah chuan chàwl ang u hmiang? Angel, i ril a țâm tawh em?" tiin a kalpuinu chu a han râwn zauh a.



"Pawi miah lo," nui deuh sâng hian a lo ti a.



"Kan thil lei tùr kan la lei si lo va, kan zawng leh phawt ang e," ka lo ti vat. Anni bula chawlh ka duh teuh lo, kan lo tibuai mai mai, hnawksak nih ka duh lo.



"Âma, ka ril a țâm tawh-"



"Bawihte, kan chàwl thei țêp tawh alawm. Dàwr ka sawiah khân kal leh phawt ila, i thawmhnaw kan lei hnuah kan chàwl dâwn nia," tiin duat zet hian a biangah chuan ka chùlsak a.



"Chàwl phawt ila, in zawng leh mai dâwn alawm," Muansanga'n a tih chuan en mang hlei lo hian," Kan kal phawt zâwk ang e, chawlh nuam u," ka ti a, Angel-i chu enin ka țhen sak a, Bawihtei kai chuan ka kalsan ta nghâl a.



Kha nu kha a chhe lo takzet.  Hmun leh hmuna hmuh chian phei kha chuan a chhe lo zual, makeup hmang lo pawh ni se a chhe lo viau tho ang, a hmaifang a dik tlat.



Dàwr pakhatah chuan ka luhpui ta ringawt. Ka vànneih asiamin naupang thawmhnaw dàwr a lo ni a, leisak lo takngial dâwna ka inhriat avàngin pakhat tal leisak ngei a ngai.



"Âma, en teh, khi khi a mawi lutuk!"



Bawihtei kawhna lam ka en chuan chu kawr chu a duh zâwng tak a ni tih ka hre thei, a puan pawh a țha, ka duhpui khawp mai, nichîn khân lût miah lo khân kan kal pèl a nih kha, tuna kan lût hi kan tifuh ta viau a nih àwm hi.



Kumin Krismas chu Lunglei lama hman phei ve kan tum rilru deuh a, nu leh pa leh chhûngte bula rilru hlim tak leh lungmuang taka hman ve ka châk alawm le. Chuvàngin, Bawihtei thawmhnaw tùr pawh hi hma deuh taka ensak ka ni nghe nghe. Dik tak chuan a to ka ti hlawm viau mai; mahse, a duh zâwng tak, țha ka tihpui bawk si leisak ka duh ve bawk si.



Bawihtei chuan zanriah kan ei kham hnuah a kawr chu a ha chhin leh vêl, mawi a inti viau mai. A làwmawm tak tak a ni, to ti viau mah ila a duh zâwng tak a nih avàng leh a hlimpui êm avàng chuan lei nân pawisa ka sèn pawh chu ka ui phal lo.



"Àpite i thlalâk hi ka'n thawn ang e, mawi an ti viau ang che," ka ti a.



"Àpi chu ka lo bia."



An inbiak làwng láwng lai chuan Muansanga a rawn lût a," Lo lêng rawh," tiin ka lo chhàwn a, inlêng chhàwntu berin phone-ah a pi a be rih si a, a ai ka lo awh rih mai.



Țhutthlèngah chuan țhuin," In lei mawi bawk em?" a ti a.



"Aw, a duh zâwng tak a nia, a hlimpui khawp mai," ka lo ti a.



"A zia hlauh chu, fate hi chu an duh zâwng tak leisak hi a țha ber," a ti leh a.



Ve tak bawk chuan. Fa nei ve tawh ang ziazângin, fa enkawl hautakzia leh ngaihtuah tùr tamziate hi hre ve
chhin se, khitiang thu khi a sawi hauh lo ang.



"An duh zâwng ringawt leisak hi a fuh ber lo," ka lo ti ve thung a.



"A nih chuan, an duh loh zâwng em ni leisak tùr?"



A va ngeiawm roh mai mai! Ka melh rum vak. Ani lah chu a lo țhen sak chauh ringawt, chutah," Vawiin khân engah nge kan bulah khân in chawlh ve mai loh?" a rawn ti ta daih a.



E, vawiinah pawh khân ka ngei tak! Ka lo theihnghilh țêp alawm le.



"Ka duh lo a ni mai," ka ti salh a; mahse, ka inchhîr leh deuh. Kha nu kha thîk angah min ngai palh thei tlat, ka duh hauh lo.



"Engati ka duh zâwng chi hlîr hian i awm tlat zêl a?"



"LALMUANSANG..!!!"



A thil sawi zet chuh! Ka hmai a sa pup pup mai, kei nuthlawi akâr, ani tleirâwl chhuak zawtin min la tizak thei aniah! Ka zak a, ka thin a ti-ur deuh tlat bawk a nih chu.



"Lalmuansanga ni lovin Zomuansanga zâwk maw le," a lo la ti dam duai zui.



"Au Muan, ka mawi em?" tiin Bawihtei, a pi be zo chu Muansanga hmaah chuan a rawn inthehțhîl kual vêl a, țawngna hun ka nei ta lo hlauh.



"I va mawi tak! I inhmeh hle mai, Âma pawh i tluk lek lek tawh a nih kha," a ti lehpek. A thil sawi chu ka hre ve vek si a, rum zetin ka lo melh, naupang bula sawi chi pawh ni lo chuan.



"Àpite hnênah kan zin dâwn asin," Bawihtei chuan a ti leh. Chu thu a sawi chhuak chu ka duh vak lo, kan thil tih tùr apiang hi ani hian a lo hriat ve zêl chhan tùr a awm lo a ni.



"A ni maw?!! Engtikah? In châm rei dâwn em?" tiin min rawn en daih a.



Chhàn ka tum hran lo. Keiin ka hrilh pawh ni hlei lo, a hrilhtu chu zâwt ang hmiang.



"Ih, àpite hnênah Thrismas kan hmang dâwn a," a ti leh zârh zârh a.



Min rawn en reng avàng chuan ka hawi sawn ta daih. Chutah, thovin thingpui chu ka va chhuang ta daih nghe nghe a.



"Mimawi, engtikah nge àpite hnênah chuan in zin dâwn?" a ti țha leh a.



"Naktûûûûkkkah a niang," tiin a lo chhâng. Ka nui sak, a chhàn ve dàn chuh.



"In ngaihawm àwm mang e, lo haw thuai ula tiraw? In awm loh chuan  lènna tùr ka hre leh dáwn si lo va," ka hriat theih ngei tùra ring hian a rawn ti a.



Ka lo ner sak. Daw peih ve siah. Vawiina a kalpuinu chhe lo lutuk takte inah pawh khân a lêng thei ang chu. Kan in chauh lo pawh hi lènna tùr dang a nei àwm chiang êm mai. Mizote'n nuthlawi kan ngaih dàn ka hre ve kur, kei pawh chutiang zînga mi chu ka ni ve a, chuvàng mai mai a ni.



"Au Muan, in inah khân lo lèn leh ka châk e..."



Thingpui ka siam lai chuan Muansanga'n Bawihtei a be ru sar sar chu ka va hmu a, eng nge a sawi ka hre thei si lo. Thil țha lo han hrilh vaih teh se, a châk lo khawp ang.



"Inhrilhru sawr sawr suh u," ka ti ta ringawt a.



"Áma, ih, Au Angel-i kha a hming min hrilh alawm," Bawihtei a lo tih chuan ka va en zawk a; mahse, ka hawi lêt leh rang khawp mai.



Ka rilrua thil rawn awm hi ka duh lo. Thîkna. Paih bo vat chi.



"Au Angel-i hming hi vawn a har a niang, kan naute pawhin a hre thei lo," Muansanga'n a tih leh chuan ka thinlung chhûngril chu engtin emaw tak a awm.



An naute pawhin Angel-i chu a lo hmu tawhin a lo hre tawh a nih ngei chu! A ni thei lutuk ang chu, a bialnu a nih loh pawhin a ngaihzawng tal a ni ang, a chhûngte thleng pawhin an hria a nia.



Nge, he pa hian ka thîk tùr ni àwm takin a rawn sawi zâwk? Ka rilru en a tum a ni maithei asin, kei lah chuan thîkna deuh reuh ka lo nei chiang mai si, ka bialpa pawh ni hawt lo lakah thîkna deuh reuh rilru ka lo pu a ni si, zahthlâk hian a. A hre hauh tùr a ni lo, a them tê pawhin a hre tùr a ni lo.



Thingpui ka pêka ka țhut hnuah chuan," Lungleiah chuan Krismas chu in hmang dâwn tak tak em?" tiin min zâwt a.



"Umm, hmang ang," ka lo ti a.



"A mak thei e..!!!" a ti sap a.



Eng chu nge maw mak a tih ni, zawh erawh ka tum lêm lo. A enga pawh chu mak lo ti ang hmiang, mak a ti ve a ni mai.



Ka ngawih reng avàng chuan," Engtikah nge in phei dâwn?" a ti leh a.



"Ka hre chiang rih lo," tiin ka chhâng a.



Bawihtei a lo țawng zauh zauh tih lohah chuan keini pahnih chu kan inbe mang lo, dik tak chuan vawiina Angel-i a tih, kha nu nèn an kal dùn ka hmuh ațang khân he pa hi duhna rilru ka lo nei reng tawh tih ka hre chhuak a, thîkna rilru ka nei ta deuh tlat a nih kha. Chuvàngin, ka rilru a tibuai a, a bula awm tam loh, țawng tam loh hi ka duh ta ber.



"I lung ka tiawi lo a ni tiraw?" a rawn tih chuan phâwk zet hian ka lo en a, ka hre thiam lo chhiava a ni.



"Engah chuan?" ka lo ti a.



"Ka thil sawi vàng khân," a ti ta sup a.



"A, i ti àwm ang lo e a," ka ti leh a.



Khabe dawm meuh chuan min en vang vang tih ka hria, ka en lo nain ka mitsîrin ka hmu thei.



Nakin deuhah chuan," Ka haw tawh ang e," a ti deuh thut a, a ding ta nghâl bawk a.



"A la hma alawm," ka ti ve ngial; mahse, a haw ta tho.



Bawihtei muthilh hnu lawkah chuan message a rawn thleng ta, amah ngei a ni.



*Thil nih dàn phung ka sawi ve hian engati nge i tân hian lungawi lohna a lo nih bîk le...?*



A thil sawi vàng khân ka lungawi loah a ngai tak tak a nih dáwn hi. A pawi lo, chutiang chuan ngai rawh se, min hlatsan zual thei ang. Bialnu dang pawh a neih tho kha.



*Mahse, hlatsan che hi ka thei lo. Kum heti chen ka lo vei tawh che a, vei loh che hi thil har tak a ni tawh*  a rawn ti leh.



Ka duh lo a ni bîk lo asin. Ka ngaihtuah chiang a, kan kum inthlau lutuk mawlh mai hi, chu achhapah, nuthlawi ka lo ni bawk nèn, a chhûngte rilru tùr ka ngaihtuahpui a ngai bawk.



He pa hi a mak ve hi ka tia. Lungawi lo niin min hria a, inkiltawiha rawn kal loh phah nân a hmang chuang miah lo. Bawihtei chu a be mawlh mawlh a, keiin lo biain lo chiauau hûrh lêm lo mah ila a lo lèn a țhulh lo.



"Lungleia in phei hmain Mimawii hi lo lêng leh hrâm se, i phal ang tiraw?"



Ka en phei a, Bawihtei chuan a barbie chu a chei mawlh mawlh a, Muansanga pawhin barbie pakhat chu a lo la pawm bawk.



Ka nuih a za deuh thut a, Bawihtei tih ang anga a awm lutuk chu ka nuih a za lo thei lo, tlangvâl ûtin barbie a pawm a nia, nuihzat loh chu har ve tak a ni!



"Amahin a duh phawt chuan," ka lo ti ve a, ka nuihza chu ka insûm hrâm hrâm.



"Aw le, naktûkah ka lo lam ang, lo kal ve la?" a ti leh.



"Ka lâwm e, Lungleia phei a hnai tawh a, insiam lâwk ka duh a," ka lo ti a, ani pawh chu a bu nghat a.



A tûkah chuan a rawn lam ta ngei, kei pawh an kal hnuah chuan kan thawmhnaw ken phei tùr chu airbag-ah ka dah lût a, kâr hnih chuang châm tùr kan nih dâwn vàngin thawmhnaw lum lam ken a ngai bawk nèn, bag a tâwt duh kher mai.



Tlai lamah chuan Muansanga'n min rawn phone a, eng emaw tih tùr pawimawh a neih thut avàngin Bawihtei chu a rawn hruai haw lawk thei dâwn lo tih min rawn hrilh a, a inthiam loh thu a sawi nghâl bawk a.



"Pawi lo, keima'n ka rawn hruai thei alawm. Rokhawlhna chu awm ve thut thei a ni alawm," ka lo ti ve a.



Insiamin an vêng lam pan chuan ka inkhalh chhuak ve ta a, an in awmna ka hriat avàngin ka buai lo. A la tlai lêm lo va, hmanhmawh lo têin ka tlân zêl a.



An in chu ka thleng har bîk lo. Gate a inhawn sa avàngin ka inkhalh lût nghâl a, pâwnah erawh tu mah an lo awm lo.



Kawngka a inhawng hiau bawk a, ka kik a, tu mahin min chhàn loh avàngin ka hawi kual nasa.



"E, i lo thleng tawh maw? Lo lût rawh, room-a ka awm laiin i lo thleng a nih dâwn hi," tiin nu, la valai angreng tak hian min rawn pan ta a.



Inah chuan ka lût ve ta a, min en vang vang pahin," I hleitling hle mai a," a ti leh a, ka zak deuh hlek nain," Ka lâwm e," tiin ka chhâng a, chutah," Khawiah nge Mimawii chu a awm le?" tiin ka zâwt a.



"Sawlamah sawn an infiam a nih kha," tiin a kut chuan an in thlang lam nia ka hriat lam chu a kâwk a.



"Va kal ve rawh, a nuam reuh a nia. Nuam an ti khawp mai," tiin kalna tùr kawngka chu min kawhhmuh pah a.



"Ka thil tih a laklawh tlat, ka lo zui lo mai ang che," tiin a nui deuh sak a. Kei pawh chu bu nghatin min kawhhmuh kawngka lam chu ka pan ta nghâl a.



Ka luhna room chu room nuam tak a ni reuh a, a zau fahran lo nain bang pakhat chu dârthlalang vek a lo ni a,  chuta țang chuan páwnlam chu ka va hmu thei nghâl a, Mimawii leh hmeichhe naupang pakhat leh ui lo infiam chu ka va hmu ta a.



An hlim hmel êm avàng chuan chuta țang chuan ka thlîr ta rih a, an tlân a, an nui khêk rai rai mai a, phùl hmun nuam zetah hian  thing buk hniam tê tê an ding laih mai a, pangpâr pawh hmuh tùr a awm nual. A hmun chu a mawi êm avàng chuan ka thlîr reng lo thei lo.



"I lo kal a, ka lâwm e."



Ka phu chiang kher mai! Ka inher nghâl vat bawk.



Ka luhna ni lo lamah kawngkhàr dang a lo awm ve reng niin, ka lo chîk loh vàng a ni, Bawihteite leh an awmna hmun nuam deuh ka lo thlìr tui lutuk vàng vek a ni.



"Inah i awm lo emaw ka ti," ka ti ta ringawt a.



"Awm lo thut a, ka rawn awm leh thut bawk."



Inherin Bawihteite lam chu ka en leh a, tunah chuan thlawhtheihna lem an lo buaipui leh tawh.



"An la hlim dun hmel si a, ka va pawh duh rih lo va," ka ti leh a.



Ka koki dinglam chung maiah chuan," Nia, la hlimtîr rih rawh," a rawn ti sup a.



Min rawn hnaih viau tih a aw ațang chuan ka hre thei nghâl, kan taksa a insi lo chauh hialin ka ring! A dik ang, ka taksa chuan ami dîpna chu a hre thei tlat, en lo mah ila min rawn si lo chauh tih ka hre mai!



"Tu pawh hian hlim hi kan phû a ni," a rawn tih leh sup phei chuan min rawn hnaih zual a ni tih ka hria, a thaw lum deuh ham ham chuan ka beng a rawn  tilum thei  tlat.



Ka awm dàn a dik lo, ka thinphu pawh a dik lo țan. Din sawn ka tum chuan hnunglam ațang chuan ka bân pahnihah chuan a rawn chelh ve ve ta.



"Zon..."



Ka che sawn ngam lo, ka awm ngai chuan ka awm ta reng a. Mit pawh ka khap lo, eng thil nge lo thleng dâwn tih chu ka nghâk tawp. Hetiang hian vawi khat mah min la dek ngai lo, chu chuan min tihamhaih a ni.



A sâng ka tih tawh kha. A khabe chu ka kokiah chuan a rawn nghat phawt a, kei chu ka lo thaw țha ngam tawh mang lo.



"Zon, ka veizia che hi hria la chuan min khawngaih ve ngawt ang!" a ti sap sap a.



Chutah, a awm dàn chu siam țhain muangchângin amah hmachhawn zâwng chuan min kuai her a, kei chu thingtlâng nula an sawi ang maiin ka lo țang deuh țùng a, hnuailam ka bih chhar bawk a.



"I hmelțhatzia hi i inhria em? Ka duh hluah hluah che." A țawngkam tin mai chu tleirâwl tê țawngkam ang mai a ni tawh lo, tlangvâl puitling țawngkam dik tak a ni.



Chutah, ka khabe chu rawn vuanin amah en thei tùr chuan min kuai dâk a. Mak tak a ni, a tih ang zêl chuan ka awm! Ka hnial miah lo a nih chu maw le! Ka kut erawh ka hûm ruh viau thung, ka kut phah pawh a thlan dap dap mai.



"Zon, hlim rawh, hlim takin awm ang," a ti leh sup a, chiang zeta min rawn en chhuk reng avàng chuan kei pawhin ka lo en ve reng ringawt, a kut a la la sawn si lo.



"Ka tih lungawi lohna che kha tihreh vek ka duh! Min phalsak la, aw?" a ti leh sup, a țawng a zawi viau nain kan inhnaihchilh êm avàngin ka hre chiang êm êm tho.



Chutah, a rawn kûn hniam ta, a thil tih tùr chu ka hre chiang khawp mai; mahse, lo hniala che sawn tùrin ka che thei hauh lo, a mitmeng nung ser sawr chuan min dâwi ã vek tawh a niang!



Ka hmui a rawn dek ta. Ka thâwk a tàwp vek ni maiin ka hria, ka rilru leh lungphu a chàwl mup vek a, engmah ka ngaihtuah thei lo. Min fâwp, Muansanga'n min fâwp a ni tih chauh chu ka hria.



Ka tukkhuma dawma min fawh tâkah chuan ka awm dàn a danglam ve țan leh ta. Ka thisen zawng zawng hi an intlànsiak nuai nuai ni berin ka hria, ka lungphu chàwl ta nia ka hriat pawh kha a phu țha leh ta khawp mai, a phu nasa lutuk zâwk a ni, a su dup sup mai. Chutah, hahdam tak hian ka taksa chu boruakah a thlâwk dèl dél ni hian ka hria.



"Zon, nang pawhin i phâ thei lo ang, min duh ve tho a ni."



Ni e, ka phâ lo, ka duh ve chiang si a. Tunah phei hi chuan ka engkim hian a duh hluah hluah vek tawh ni maiin ka hria.





*I PÂWNLAM LAN DÀN, I INTHUAMNA THAWMHNAW AIIN I CHHÛNGRIL ZE DIK TAK  'BRANDED' KHA A PAWIMAWH ZÂWK*







☆LUHLULPA☆ - 14 By Dingdi Pachuau





"Nu, vawiin chu dàwr ka lo nghâk ve tawh ang e," tiin tûkțhuan kan kîl lai chuan ka ti a.



"A, inah lo awm mai mai zâwk teh a, i lo phei ve chhunah dàwr i nghâk ziah mai a, inah i duh duh lo ti ve tawh zâwk rawh," ka nu chuan a lo ti a.



"Ka puih khàt êm che u hi, kan awm chhûng chuan ka chhâwk ang che u," ka tih leh chuan Tea chuan," A țha, i lo phei khât si a, i lo phei chhunah hi chuan min pui țawk țawk tùr hi a ni ringawt mai," a lo ti thung a.



Ka melh ralh a," Ka thâ ãm viau lo hian dàwr nghâk tùr emaw nghahpui tùr che emaw lâk luh hi tum ve tawh la," ka ti a.



"Ho mai mai!" a lo ti duh chauh.



"A dik alawm, tlangvâl senior nih nghah kher hi a ngai lo a nia," ka pa chuan a lo ti ve a, chutah, sawi zawmin," Kan la țhat ve lai hian nupui nei thuai la, i fate pawh kan awm tleipui thei zâwk ang che," a ti leh a.



"Tlangvàl ka la duh zâwk," a lo ti leh tlat.



"Hetiang hi a ni tak si a aw...!!" ka nu chuan a lo ti vang vang a.



Dàwrah chuan ka kal leh ta. Krismas bazâr tùr hmun dang ațanga rawn kal mi an tam ve bawk a, hun dang ai ngawt chuan dàwr nghah pawh a nuam e.



Min rawn dàwr tùr tlangvâl sâng zet dàwra a rawn luh chuan Muansanga ka hre chhuak zawk mai. An inchen ngawt ang chu, an hmel erawh a inang lo nasa.



An ina kan infawh ațang khân hmuh ka hreh hluah hluah tawh a, ka rilru hria ang maiin ani pawh khami zàn khân a rawn lêng bîk lo, a zak ve pawh a ni maithei a ni, phone-ah pawh mumalin kan inbe lo, text erawh min rawn text zauh zauh. Kan infawh ațanga ni hnihnaah chuan Lunglei kan phei ta daih bawk a, kan inhmu ta lo chu ka lâwm viau a ni. Ka ngaihtuah lêt hian nawmna lam aiin zahna ka nei thar ziah. Awlsam taka ka infawhtîr thei kha a mak êm a ni.



Ka phone chu ka phawrh a, IG lam check ka tum lai tak chuan min rawn dàwr tùr a rawn lût a, ka buaipui leh rih. A kal hnuah chuan Muansanga account chu ka check ru ta dâwk dâwk a.



Pic upload thar a lo nei nual. A active fahran lo emaw ka ti a nia, rin ai chuan a lo peih roh a nih hi, ka en dan dan. A la naupang ve a, a làwm rual chauh a la ni tak ang chu maw le.



A pic erawh hmuh tùr a tam lo. A gym fakna a ni ringawt! Mi hrang hrang thlalâk a awm; mahse, chu pawh a gym chhûng vek.



Ka thlalâk ka hmu!!!



A upload kum ka en vat a, a rei tawh nasa, Bawihtei pian hma chiah kuma mi a ni! Banga frame mawi zeta ka thlalâk intâr chu thla a la a, chumi a upload chu a lo ni a, caption-ah chuan eng dang a ziak lo.



♥️💯%



Khiti zawng khi.



 Ka nui hak, a va naupan chhiatthlâk êm! Mahse, a rük têin min tihlim veng veng thei nia! Followers ka en a, kei ai pawhin a ngah daih, a lâr phian a nih àwm hi a. Tûnlaiah chuan chhe lo an tam a, tleirâwl chhuak thar an chhe lo telh telh bawk si a, a àwm ve tho.



Kan dàwr thlang lama dàwr nei ve tho, kan college-a kan senior țhìn Bobby-a chu kan dàwrah chuan a rawn lût ve nawlh mai. College kan kal lai chu a rawn sawi chhuak a, 1st semester kan zir lai khân ani chu a chhuak țêp tawh, kei aiin kum 3 vêl zetin a upa bawk. Tunah chuan GHSS, Lungleiah a thawk tawh; mahse, a la tlangvâl thung. Hmeichhia a ngaihsak lo va, college-ah pawh khán hmeichhe tam tak khân han bàwr ve viau țhìnin pâk ve viau țhin mah se a lo um-e ngai hlawm lo. Sawi chhuah miah lohah chuan kan ţhianzaho khân kan star țhin, a rûk têin. Hmelțha tak chu a ni miah lo; mahse, a aw a mawi kan ti țhin.



"A lunglènthlâk ta mai mai tiraw?" ka ti a.



"Nia, kan hunlai leh tûnlai miho hi ka khaikhin ve țhin a, la rei tehchiam lo mah se hma kan insâwn hleih leh tawh hi ka tia, tûnlaiah chuan hmanraw changkâng tak tak an lo hmang leh tawh a, class kal pawh a phùrawm duh viau ang," a ti ve bawrh bawrh a.



Kan ngawih deuh hnuah chuan," Kumthar zawh hnu lamah em ni in phei ang?" a ti leh a.



"Aw, tih tùr hi a tam ve tawh a, awm rei theih pawh a ni tawh lo," nui chung hian ka ti a.



A țhu ve ta reng. Titi tùr a hria a, a bula awm a nuam khawp mai. An dàwr chungchâng ațangin Lunglei khawpui chanchin, Mizoram leh India ram thlengin kan sawi thleng chho zêl, thil a hria a, beng pawh a vâr sawt sawtin ka hria.



Bawihtei leh a putea a rawn thleng ve leh, thingpui in tùr an rawn kente chu kan in a, Bawihtei leh Bobby-a chu an titi dùn leh barh barh thei nghâl! Ka fanu tak hi chu aw, nèl loh pawh hi a nei lo, barh barh tak chuanin aw....



Zanriah kîl laiin Tea chuan Bobby-a chu min dem țan ta ringawt a.



"A fuh dâwn e, mâkpa sawrkâr zêm zen pha ngat chin hi chu duhthusàm a ni alawm, Lungleiah i rawn phei leh thei dâwn tihna a ni mai a," a ti a.



"Bobby-ate chu college kan kal ve laia kan senior a nia, hmel hriat hlui a nih vàngin a rawn lêng lût ve mai mai a nih kha. Kei nuthlawi fa keng tawh lehnghâl hi ani ang, tlangvâl hnahkhat leh fel hian engtin nge maw min duh se i tih rêng rêng ni? Zahthlâk lutuk!" ka lo ti vat thung.



"Nuthlawi upa pawh i ni hleinem, i duh vànga thlawi pawh i ni lo va," a lo ti teh daih a!



"Duh vànga thlawi an awm ngai em ni? Duh lo mah ila nuthlawi ka ni tho tho, awmzia a awm tam chuang lo. Tu mahin nuthlawite nuthlawi chhan an chhui sîsê ngai lo," ka lo ti leh a.



"Dik tho mai. Sâp rama kan lo piang lo hi chu a pawi a nih hi, anniin nuthlawi an thliar loh tehrêng nèn," a ti vang vang a.



Zanriah ei khamah chuan TV enin ka pa leh Bawihtei an țhu a, ka nu nèn chuan newspaper tlai lam chhuak chu kan thlîr ve thung a.



"Au Muana!!!" tiin Bawihtei chu a âu țhat a.



Ka hawi vat. Muansanga a rawn kal emaw ka ti! Mahse, a lo ni lo, TV-ah faknaah a lo lang niin, ka âwm chu ka dawm vang vang a.



A chhiat loh sizia chu! Tarmit dàwr an lo fak a, Angel-i pawh kha a tel ve, mipa pakhat leh hmeichhe dang pakhat pawh. An chhe lo hlawm kher mai!



Angel-i kha a eng emaw tak a nih ka ring chiang ta kher mai. Inhmeh pawh an inhmeh, àwm pawh an inawm, an kum pawh a inrual khat viau ang chu. An la tleirâwl dùn zek zawk bawk a, hma hun êng tak an nei dùn bawk e.



Nutei'n min rawn phone a, naktûkah dàwrah min hmu tùrin a rawn kal dâwn a, Bawihtei pawh hmuh tel a duh thu a rawn sawi tel bawk a.



"Umm, kan lo awm ang," ka ti a.



Mutnaah chuan IG chu ka khawih leh a, pic ka upload ngai lo lutuk tawh a, kumin krismas chu thla ve ve nual ila, upload ve țeuh ang.



Muansanga pawhin pic a lo dah thar leh tawh! Nuam a ti riau a nih àwm hi
maw.



Room pakhat thlalâk a ni. Chair-a țhuin a ke lang theiin dârthlalang chhana pâwnlama thing ding pawh chu a hmuh theih, tlai ni tla tùr chuan a chhun êng ruai bawk. A va ho mai mai tak, a gym lam kaihhnawih a ni lehpek ang chu.



Caption-a *He room hi ka tân chuan a special ngawih ngawih, ka ngaina thar thut a ni ber*  tih ka chhiar chuan thlalâk chu ka ennawn leh ngat.



Ka hre chhuak ta. Lunglei phei hma lawk khân he room-ah hian kan infâwp a nih kha, ni leh lo, min fâwp a ni zâwk ang chu; mahse, ka chhàn lêt ve tho kha.



Kan infawhna room a nih vàng kha em ni ang special ngawih ngawih a tih le? Ni àwm lo e, ka inngaihlu mah mah! Lo indah special riauna rilru chu ka paih bo vat.  Kei kher lo pawh mi dang pawh a lo fâwp fo tawh ang chu, nula kawmna room atân a hmang țhìn pawh a ni mahna.



Comments chu ka chhiar thla zêl, comment-tu an tam si a, chhiar pawh huphurhawm tham a ni. A upload-na a la rei loh tehrêng nèn!



*Eng nge a cial viauna chhan?*
*Ka va kal ve châk*
*A nuam ngawt ang chu*
*Min hruai ve...*
*A va mawi ve..!!*
*I ke khi ka star*



Ka chhiar dan dan zêl a, comment-tu pakhat thu ziah chuan ka mit a la leh ta zar mai.



*Kha room kha kei pawhin nuam ka ti, tlai ni tla tùr thlîr paha ***** kha a nuam e😀* a rawn ti! A comment-tu hming chu ka zu dek zeuh a, a account ka check leh nghâl zat, ka va che spy tak!



Ka rin ang chiah. Angel-i a lo ni.



Min fawh avàng mai khân a tân special ta riauah ka inngai ngawt tùr a ni lo rêng a ni. Hmelțha min ti a, min duh ve a ni mai a, special bîkna ka nei hauh lo. Hmeichhe dang pawh a fâwp nual tawh ang chu, Angel-i comment dàn ațang phei khi chuan an inah pawh kal ve nual tawhin kha room-ah khân eng thil emaw tak an ti tawh tih hriat reng reng.



Ka ngaihtuah tawh lo teh ang.



Min rawn text lo va, kei pawhin ka text lo. Bawihtei erawh a rawn be tawh. Kha maw, kei chu min ngaihtuah teuh lo, a hmuh theih laia ka awm kha chuan min ngaihtuah ve deuh hlek a nih pawhin tunah chuan min hmu pha tawh lo bawk a, ani ang tleirâwlte duh rawn chuan hlimna a hmu khawp ang.



Huiha! Ka va ngaihtuah nasa tak!


*******


"In rawn phei hi a phal em ni a?" a rawn ti sar sar a.



A ngaihna hre lo zet hian Nutei chu ka en a, ani chu a lo nui sâng thung. Bawihteite putu an haw tawh a, a duh zâwng zâwng a sawi leh țan tawh dâwn a nih àwm hi maw.



"Tuin maw?!" ka ti hû a.



"Au Muana lo mi dang an awm elo?" a lo ti heu mai!



Hawi sawn nghâlin,"Sawi mai mai lo teh, ani phal leh phal lohin awmzia a nei em ni?" ka ti lêt vat a.



"Nei ang chu, a ni lo'm ni?"



Ka chhâng tawh lo. Ngaihtuah chhuah loh ka duh, thil țul lo ka ngaihtuah țan tlat. Bawihtei ka dah pawimawh hmasa ber tùr a ni tih kha ka theihnghilh thei lo ang, ka nawmna lo ngaihtuah hman ka ni lo. Bâkah, ka bialpa a ni lo.



"Ih, thil hi ngaihtuah chiam chiam suh, dam chhüng hun a rei loh êm hi. Victor-a vàngin hrehawm takin i awm tawh a, mipa zawng zawng hi ani ang an ni vek dâwn lo, kan țhatlai hun a rei lo, chen thiam tùr. Hmalam hun ngaihtuah reng nân chuan a uiawm lutuk, i duh kha ban ve chat tawh rawh. Mi min ngaih dàn tùr ngaihtuah chiam chiam hi a țha lo, hlimna an dâl," a ti barh barh a.



Ka chhàn ve hmain Bobby-a a rawn lût leh ta.



"Nangni pahnih chu, inhmuh a va khât ve, Nute? I dam țha em?" a rawn ti lût luam a.



"E, Bobby-a..!! Aw, dam țha e. I dam zâwk maw? A inhmuh loh theih țhìn hle mai. Dam hi chuan kan han inhmu leh hlawl țhìn zâwk a," a ti leh luam a.



"Ni e, dam hi a pawimawh ber mai. Kan khawvêl hi a zîm a, kan inhmu leh nawlh mai zél," tia Bobby-a'n a chhàn chuan Nutei chuan min rawn sik ru hlak a.



Ka hre thiam nasa, kan star rûk lai khân amah kan hmuh tawh hi chuan a hriat thiam kan hlauh vàngin kan insik ru vâwt vâwt ringawt țhìn.



"Nupui nei tawh la?" Nutei'n a tih chuan Nutei chu ka en vat. Ani lah chuan min lo en țha ve duh hauh lo.



Nui chung hian," Kan zawng ve mêk zêl chu a nia, hmuh erawh kan hmu zo lo ang tih a hlauhawm khawp mai," Bobby-a chuan a lo ti a, kan nui deuh țhâ hlawm a.



"Țha i tih ber nei rawh. I hmu zo lutuk a, thlan tùr ber i hre lo a nih ka ring zâwk mah," Nutei chuan a ti leh a.



"Tlangvâl senior hmuhin min hmu zo tawh a, nulaho hian min hlau vek tawh ni maiin ka hria," nui chung vêk hian a lo ti leh a.



"Ni lah lo ve. E, tih dan țha deuh ka hria. Hei, Zoni nèn hian single ve ve chu insawi rem mai teh u," nui hak hak chung hian a rawn ti chhuak a.



Keini pahnih pawh kan nui chhuak.



"A tih chi dâwn riau mai a," Bobby-a chuan nui chung vêk hian a lo ti ve a.



"Nuthlawi mai mai chu melh pawh min melh peih teuh lo!" ka lo ti ve a.



"Nuthlawi hi nula tam tak aiin an țha daih zâwk, thil engkim lo pal tlang tawh an ni a, harsatna tam tak tâwka nuthlawi te an nia, hnialsuat miah loh tùr," Nutei chuan a ti leh barh barh a.



"Nang pawh nuthlawi i tum deuh niin ka hria," ka lo tih zauh chuan," Kan pa hian min țhen phawt chuan nuthlawi ve mai ka duh ang," nui hak hak chung hian a ti leh a.



Tlaiah chuan hma ve deuhah ka haw a, tuilumin ka inbual sar sar a, ka lu pawh chu ka su nghâl. Thlasik laia tuiluma inbual hi chu a nuam sar sar
teh tak e.



Lunglei kan phei chu TV kan en ve lo thei țhìn lo va, Muansanga hmel kan hmu deuh reng mai. Bawihtei lah chuan a u Muana tih dàn chu a lo zir ve sek mai, kan nuihpui nasa. Aizawl phei leh hunah chuan ka fiam hrim hrim ang, 'celeb țhianpa' ti ngatin a nia ka koh dâwn ni.



"Âma, Au Muana ka ngai e, phone ila?" Bawihtei chuan a ti a.



"A buai lo ang maw?" ka tih chuan," Ka ngai alawm. TV-ah chauh ka hmu țhìn a, biak ka duh alawm," a ti leh a.



Ka call-sak ta nge nge.



"Ka mumang a ni êm lo maw?!! Min rawn call ve a nia," a rawn ti thûm deuh bul bul a.



"Ka tibuai che em? I dam maw?"chu  ka tikhawmawi hmasa ve a.



"Taksa chu dam; rilru erawh..." a ti a, a sawi chhunzawm duh lo va.



"Lo dam tawh rawh se," nui chung hian ka ti a, chutah," Bawihtei'n a be duh che a," ka ti nghâl zat a.



"Chutiang chu a nih ka lo ring ru rêng a, nang hi chuan min biak duh vàngin min rawn call hmasak hi ka ring ngai lo," a tih sup chuan nuam lo tihna ka nei ve.



Bawihtei nèn an inbiak hnuah erawh chuan an inchhaih leh nasa mai. An inbiak chhûng chuan a thil sawi kha ka ngaihtuah nauh nauh a, a sawi dik khawp mai. Thil țûlah lo chuan ka call hmasa khât khawp, mipa va call hmasak hi ka tih dàn a ni ve lo a, ani hlauh phei hi chu, min duh a ni tih ka hriat hnu ațang phei kha chuan ka laka beisei bo a beisei loh nân beisei theih tùrin ka awm duh ngai lo a nih kha.



Bobby-a chu dàwrah a rawn kal ta ziah. A fel dàn ngai rengin a fel a, min beisei vànga lo kal a nih pawh ka ring lo. Kei mai mai hi chu min beisei lo tawp ang, nula țhalai pawh ni lo nuthlawi lehnghâl. Mi zîngah hi chuan mahni insit zâwnga țawng hi ka duh vak lo va; mahse, chhûngrilah erawh ka insit ru takzet si, ka rilru ang hi nuthlawi tam tak hian an pu ve ngeiin ka ring.



Zànah Tea leh Bawihtei nèn vêng hrang hrangte kàwn chei enin kan tlân kual a, thlâ pawh kan lâk ve chuai chuai kha. Bawihtei'n nuam a ti khawp mai a, a tlân kawi zar zar reng mai.



Kan haw hnuah chuan kan thlalâk zînga mawi ka tih ber chu IG lamah chuan ka upload ve a, Muansanga a lo online reng a ni chêk ang chu, a rawn comment hmasa ber!



*Nufa hmelțha ber😍*  tiin.



A làwmawm thei tak tak! Hmelțha min ti hi ka lâwm. Chutih rualin, hmelțha min tih vàng hian min duh ta emaw a inti niin ka hre bawk, kan tleiràwl lai pawhin kan nih ve tho țhin kha. Hmelțha kan tih kha chu kan duh ve bur țhin ve tho a nih kha.



Keini pahnih hi kan in-stalk dùn zak zak a nih hmel riau, thuziak a rawn upload chu ka hmu ve nghâl.



*MISS YOU LIKE CRAZY
...HURTS LIKE HELL*  tiin.



Tu tak a ngai chu ni maw? Kei chu ka ni lo phawt ang, Angel-i kha a awm lo ve a ni ngei ang a, a nih loh pawhin an inhmu khât ve a niang. A buai ve thei si a, inhmuhna hun țha an nei thei lo a ni maithei a ni.



Khawngaihthlâk roh chuan.



WhatsApp lamah message ka dawng zui ta zat mai.



IG-a thlalâk ka up ngei mai kha min rawn thawn a, chutah chuan *In hlim hmel khawp mai, ka ngai hle mai che u* a rawn ti a.



Chhàn ka tum lêm loh lai chuan * I tân ninawm mai ni dâwn mah ila ka ngai tho che* a rawn ti leh.



Ka nui sak. A thil tih duh dàn hi naupang chhia viau țhin mah se a lawmawm ka ti leh tlat. Inthlahrung deuh si hian a kâwlhrâwng ru tlat zêl bawk sia, ka rilru chhûngrila amah ka duhna hi a hriat tawh vàng a ni mahna le.



*Nang pawh i ngaihawm lutuk. Bawihtei phei chuan a sawi ziah che*  ka ti ve a.



*Mimawii chauhin min ngaih ka ring* a rawn ti ve leh.



*I rin dàn dàn le* tia ka chhàn chuan a ngaingam leh si lo a niang,



*Min tikhawngaihthlâk e* a rawn ti.



Ka nui chhuak hak. A khawilai tak chu nge ka tihkhawngaihthlâkna lai tak chu ni ang?



*Engah chuan maw?* ka ti a.



*IG lamahte khân ka comment kha min reply ve la, a nih loh chuan ka thil post-ah sawn ka rawn mention dâwn che a nia* a rawn ti ta!



E khai! A tihchi loh lutuk ang. Followers a ngah si, min hre chhuak hneh dâwn lutuk!



Mi nawr chêp dàn a hre roh mang e! Mahse, ka hre lo der tlat ang.



*Engah maw min mention ang?* ka ti a.



*IG-ah, ka pic upload-te kha en ve țhin tal la?*



Ka check ru țhìn tih a hre lo a nih chiah chu. Ka thaw huai mai.



*Kan lâwm e. Hetah hian i comment-na chu ka lo reply mai ang che aw*  ka ti ta ringawt a.



*Pawm loh theih pawh ni nghâl lo chuan. Ka pic up tal kha chu min lo like-sak ve țhin la, keiin i pic up apiang ka lo like duhthawh theih nèn* a rawn ti duah.



*Aw le*  tiin ka chhâng.



*Um, i mut a chhuak tawh ang, kàwn chei in fan nasat hmel sia, i chau palh ang, muttui aw, hmelțhanu* a rawn ti leh kher.



Nui sak chunga ka maimichhìn ve tâk risi riai kha.





*I HMAA HARSATNA CHAUH NGAIHTUAH RÙNA HUN I HMAN CHUAN HARSATNA TAM ZÂWK I NEI NGEI ANG; MAHSE, A THEIHNA LAM I NGAIHTUAHA I TIN ZÂWN RÀN THUNG CHUAN A THEIHNA I HMU ZÊL ANG*