☆LUHLULPA☆ - 15 & 16 By Dingdi Pachuau

☆LUHLULPA☆ - 15 By Dingdi Pachuau




Krismas leh kumthar chu hlim takin kan hmang a, Bawihtei ruai țheh lai mawlh mai chu, video-in ka lâksak lo thei lo, nuam a ti lutuk tlat! Ruai țhehnaah ka la hruai ngai lo va, àwm ka tihpui viau.  Nakina a len deuh hnua a en lêt leh atân ka duh a ni.



Bobby-a nèn pawh kan inbe ta zauh zauh. Kan inbia ti ila kei chuan ka be hmasa ngai lo, kan senior a nih vàng khân zah rûk deuhna neiin, țhian anga kawm bawrh bawrh chu ka la thei tlat lo, ka star hlui a ni zui bawk nèn. Tunah erawh ka star hran tawh lo nain zahna chin ka la nei tho.



Thil danglam awm ta chu zan tin Muansanga duhsakna ka dawng țhìn ta chu a ni. Min rawn 'muttui' ta ziah a, thil dang a rawn sawi țhìn pawh a ni chuang lo, zàn mutnaah phone khawih ka chîng tih a hre chiang ngang a ni ang e; mahse, chhiar hrehawm ka ti miah lo a nih chu. Min rawn duhsakna vàng nge phei chu ka hre lo, ka mu tui chho ta riau mai lehnghál.



Victor-a pawhin Bawihtei chu a rawn phone ve a, thawmhnaw a leisak tihte a rawn hrilh chuan Bawihtei chu a hlim kher mai. Ka duh vak lo va; mahse, a pa a ni ve a, a leisak duh a ni ve mai a, lo sawisèlsak chiam ka tum hran lo; mahse, ka lak ațanga lâk hran kha chu a ngaihtuah tawh loh hrâm ka beisei tawh thung.



Kan phei hun tùr nî kan tihah chuan kan phei ta lo, ka nuin a phal rih tlat lo va. A nawmsam lo deuh vàng a ni pakhat a, bâkah, Bawihtei a la ngai rih a ni. Chuti ni na na na chu kei pawhin ka hnial lo, Bawihtei min duata min hmangaihpuitute bula awmte chu a nuam alawm.



Tlaiah Muansanga'n min rawn call a, kan thleng dâwn hnai tawh em tih min rawn zâwt! Kan phei nî tùr kha ka hrilh miah si lo, tuin nge lo hrilh? Hmm, nimin tlaiah Bawihtei nèn an inbe tak, an lo inhrilh a ni chiang mai.



"Kan rawn phei lo, ka nuin a remti leh lo rih a," ka tih chuan a rûm nghut a," In in kawtah ka lo nghâk reng che u asin le!" a ti heu mai!



"Aw a ni maw?! A va pawi ve aw..." ka ti ve luam a.



"Nia, a pawi a nih hi," a ti sup phawt a, chutah," A nih, engtikah nge in rawn phei dâwn tâk?" a ti leh nghut a.



A aw chuai deuh ruai mai chu ka khawngaih roh mang tak e!



"Ka hre lo le, naktûkah khian a nih loh chuan a tûk lehah a niang," ka ti a.



A thaw hawk a.



"Lo phei thuai rawh u, in in a khua a har tawh!" a ti ta sup a.



Ka nui hak.



"Tak tak alawm," a rawn ti leh.



"Nia, kan rawn phei thuai tawh dâwn e, a lo khawhar rei tawh lo ang," nui chung chuan ka ti ve a.



Ka nu pawh a zia leh thuai mai a; mahse, a tûka phei a phal leh rih lo. A tûk lehah chuan kan phei ta zâwk. Ka nu hi a pension ve țêp tawh a, a pension hunah chuan min rawn tlawh zung zung ve thei tawh ang chu maw.



Kan thlen chuan kan kawtah chuan Muansanga a lo ding vàng mai! Ka beisei fahran lo asin.  Bawihtei a rui deuh si a, a harh peih lo, a u Muana pawh hlim awkâin a chhàwn lo chu a ni sia. A khawngaihthlâk reuh a nia.



Kan thawmhnaw chu min khai luhsak a, keiin Bawihtei ka pawm thung. Tluang taka kan in kan thleng leh thei chu rilru a nuam sawt sawt e.



"Mimawii rui chu aw...A khawngaihthlâk reuh mang tak e," a ti sup a, țhutthlènga Bawihtei ka mut chu min lo en reng a.



"Nia, vawiin chu a chuang fuh tlat lo, kawng lakah pawh eng mah a ei duh lo va," ka lo ti ve a.



"Chuti, i ril a țâm àwm? Thingpui ka lo lum ang che aw?"



Makti rilru zet chuan ka en deuh hâ a, ani lah chuan," Ka ril a țâm ve tawh tho alawm, ka lo nghâk ngat ngat che u a, thil ei tùr pawhin khawiah mah ka kal sawn lo," a ti leh sup sup a, en pawh min en lo chuan hmun dang a en kual daih a.



Thingpui chu a lum a, kawng lakah ka chàwl bîk lo va, ka ril chu a ţâm ve tho.



A thingpui siam chu a tui hmel kher mai. Kawng laka ei tùra ka tih zochhang kan chu ka phawrh a, tui ti tak chuan kan ei dùn a.



"Eirawng i bâwl a ngai dâwn a, motor i rawn chuang thui si a, i chau ngawt lo maw? Ka puih i duh em?" a ti leh a, min en rùn rún a.



A awm dàn hian chhàn ngaihna min tihre lo, mak min tihtîr reng ringawt mai.



"A, a ngai... lo ang, i buai àwm tehlul nèn-"



"Buai ila chuan ka lo kal nâng. Min tîr dawt dawt rawh, zanin tlai chu i chhiahhlawh rinawmah ka lo țang ang e," a ti leh tlat.



A, a țha alawm, a peih phawt chuan. Dik tak chuan hetia zin hawa chêt ngai leh țhin hi alawm ka peih loh, min puih peih phawt chuan ka hnial tawh lo ang, kei pawh ni danga ka zin chu ka ang lo deuh alawm, Bawihtei ngaihtuah a ngaih vàngin ka inngaihtuah thei si lo va.



E, tih dàn țha deuh ka hria.



"Chuti, hetah ei ve nghãl la?" Min lo hmuak ve bawk si a, chutah eirawng min bàwlpui dâwn zui, sàwm hi a phû ve a ni.



"Chaw eiah...min sâwm maw?!"



A hmêla mak tihna leh hlimna inpawlh chu ka hmu thiam thei mai. A va ho roh tak! Chaw ei ve nghâl tùra ka sàwm avànga han hlim viau ringawt chu, a naupang chhia e.



Phûr taka a che sûrh sûrh chu ka en ru deuh zauh zauh. An inah khân a lo che ve țhin emaw ni le? Tleirâwl hawklak rual mai la niin a che khawr lutuk bawk si lo va, mak ka ti deuh.



"Inah i che ve țhin a ni maw?" tia ka zawh chuan min rawn en a, a inngaihtuah rùn rún phawt a, a ngawi vung vung phawt, chutah," Inah ka nu ka pui ve țhin alawm," a ti ta a.



"I va ti țha ve...!!"



"Naah, min ngai naupang chhia viau lo mai teh. Chêt dàn tùr chu ka nuin min hrilh hneh lutuk!" a lo ti a.



"I nu chu nu fel tak a nih chu," ka tih leh chuan," Ka hrilh che ang a, min hmusit miah suh aw. Chhuat ka nâwt fai thiam vek a, chaw pawh ka chhùm fo. Dârthlalang ka nâwt ziah bawk; mahse, chawhmeh bazàr erawh ka ti ngai lo, tu mah hrilh miah suh aw," a ti sar sar a.



Tu nge maw ka hrilha a rin ni le?



"Chuan, ka hman châng chuan ka thawmhnaw pawh ka su țhìn. Ka nu ka khawngaih ve țhìn si a, hmeichhe hna tùr nia ngaih tam tak hi chu ka ti ve fo a nia," a ti leh a.



"A țha lutuk! Hmeichhe hna leh mipa hna a awm bîk lo, thiam vek hi a țha, inpuih ngaih hun hi a awm ve a nia," ka lo ti a.



"Ka nu sawi dàn chiah chiah!"



Kawng laka chawhmeh ka lei chu kan siam a, Alu, dâl leh artui a awm bawk a, a harsa vak lo ve. Buai laklawh laiin Bawihtei a rawn tho a, a la hlim lo khawp mai, zànah han muhìl leh phawt se, naktûkah chuan a zia vâk tawh mai ang.



Ka phone a rawn ri a, Ka han en chuan Bobby-a a lo ni a. Ka kal sawn deuh a, kan chanchin, kan thlen tluan leh tluan lohte min rawn zâwt a lo ni a, țha tak chuan kan inbia a.



"In haw phei ta daih chu in in pawh a reh ruih mai," a rawn tih chuan ka nuih a tiza angreng khawp mai.



Ka nui hak a," Nia, a bengchheng pahnih kan awm ta lo va, a reh ve bawk ang chu," ka ti a.



Kan inbe rei lutuk lo. Kan inbe zo ka hawi chhuah chuan Muansanga chuan chîk zet hian min lo en a.



"Tu nge a?" a ti sup a.



"Kan inlêng maw le," tiin ka chhâng mai a, ka chawhmeh siam chu ka siam chhunzawm leh nghâl vat a.



"A lo lêng ngun em?"



"Ngun lo ve, college kan kalpui țhìn a nia," ka ti leh a.



Ka ngaihsak tehchiam loh avàng chuan ani pawh chuan min rawn melh zauh zauh pah chuan a thil tih chu a tih chhunzawm ve leh a. Kan țawng zawm tawh lo, kan thil tih lai chu kan ti mawp mawp ve ve; mahse, a hnua Bawihtei a lo tel ve tâkah chuan kan ngawi rei thei ta lo, Muansanga phei chuan Bawihtei a be hlim char char.



"Kan chawhmeh siam hi thla ka'n lâksak lawk aw, a tui dâwn si a," tiin a kekawr iptea a phone chu a phawrh a, thla chu a la ta nghâl a.



Chaw ei min siampui a, chaw ei khamah pawh min tihfelpui leh vek bawk. Mak ka ti asin, Victor-a leh Tea ka mitthlà a, anni chuan eng mah min tihpui ngai lo, an hnaah an dah lo hrim hrim a nih kha.



"Au Muan, kan inah i lo awm ve tawh dâwn a mi?"



Chhâng lo chuan min rawn en phawt a, ka lo en ve nain ka hawi sawn ta daih.



"Âma nèn khân in chau sia, rawng ka bàwlpui che u a, nakinah ka haw ang " a ti duah a.



"Motor kan chuan khân ka pum kha a nâ a, ka luak a, ka lu pawh a nâ a," Bawihtei chuan a ti leh a.



"Nia, ka khawngaih reuh che a nia aw...Min zinsan tawh miah suh aw, zin chu pum natna, lu natna leh luak chhuahna a nia," Muansanga chuan a lo ti a.



"Mahse, àpite ka ngai alawm," ani chuan a lo ti khauh thung.



A haw dâwnah chuan," IG lo check ang che," a ti nghut a, Bawihtei hnënah chuan," Mimawi, mangțha aw. Zaninah tui tâwkin i mu ang a, naktûkah chuan i harh vâk tawh mai ang," a ti a.



Chawhmeh thlalâk kha a lo post niin, 'BEST DINNER EVER' tih chu a caption-ah a chuang kuau bawk. Ka nui sak, thlalâkah chuan a lan tui hmel kher lah tak a, comment lamah pawh 'a va tui hmel ve!' tih a tam khawp mai.



*******



Kan inkâr hi ka tihfel vat a ngai. Ka duh tih chu ka inhre chiang tawh a, ani lahin sawi chhuak kher tawh lo mah se min duhzia a tilang fo a, min nawr chûk a duh lo ni maiin ka hria. Ka hnar chhan ber kha chu kan kum inthlau lutuk kha a ni pakhat a, ani lah chuan chu chu a haider tlat a, tunah phei chuan a tlângnêl tawh a, eng emaw hlekah ka hming ngei mai hian min ko sek zêl tawh mai.



Kan awm dàn hi a laklawh ka ti. Min duh tih hre mah ila țawngkain a sawi
chhuak leh tawh si lo, kei lah hian ka rilru ka pe telh telh tawh mai si a, lo indan ka tum ve viau kha a ni a, amah hmu reng chung si chuan rilru khauh tak put chu a har ve êm a ni.



Zan tin a rawn lêng bîk lo. Mut dâwnah erawh min rawn text ziah, eng dang vak a rawn ziak lo,'Muttui' tih tê mai hi; mahse, chu chuan rilru hlim veng vengna min siamsak tho si.



Zan khat chu Bawihtei a mut hma deuh avàng chuan kei pawh ka mu hma ve deuh a, Muansanga a lo lèn loh hi chuan ka mu hma ve mai zêl. Bobby-a'n min rawn text ve khiah a, rei vak lo chu ka'n text ve kha. Ngaihzawng lamin min rawn text lo bawk a, pawi pawh ka ti tehchiam lo.



Mut dâwnah pawh chuan Muansanga chu a reh vung vung mai, tunah dâr 10 a ri tawh a nia. Nipui lai ni mah se, kan nufa tân chuan zàn rei lam chu a ni tawh hrim hrim. Zan dangah chuan min rawn 'Muttui' tawh țhìn asin le.



IG lamah ka va lût dâwk dâwk chhin a, thlalâk post thar pawh a nei lo, min rawn dm hek lo.  Engtizia nge maw ni le?



Ka muthilh theih loh vàng chuan mi thlalâkho chu ka en kual a, a text châng ru pah chuan chhe lo deuh deuh pic chu ka en kual. Angel-i kha ka rilruah a rawn lang thut a, a pic upload-ho ka en kual leh ta. A chhe lo takzet a ni, tu mahin chhia an tih theih ka ring lo.



Hmeichhia hi chu kan mak ve ngawt mai. Mahni hmeichhiatpuite ngei ngei pawh hi 'hmelțha' 'chhe lo' 'duhawm' kan inti mai zêl a, sawi chhuah pawh kan hreh lo. Mipa hi chuan an mipatpui te hi 'hmelțha' tiin an sawi chhuak ve ngai lo, eng vàng nge ni ang aw ka ti țhìn, mahni anpui fak hi an hreh a niang ka ti țhìn.



Chutah le, pic leh video thar a rawn up ta. Muansanga pawh a rawn tel ta chiah e.


#aboutnow #happybirthdaytome tih leh eng eng emaw a rawn ziak nual mai, zanin chu Angel-i birthday an làwm a ni maw? Nuam an tih hmel kher mai, Muansanga pawh a nui sâng mai.



Muansanga pawhin a rawn comment ve e, comment hmasatu 7-naah a awm!



*Nuam viau mai, birthday girl-in a tlin bawk a...* tiin.



Ka thin a tirim deuh tlat mai a nih chu. Keiin a text ka lo châng a, mi thlalâk a comment hman a nih chuan kei pawh min text hman tùrah ka ngai asin.



Nuam a ti lutuk a, min hrechang tawh lo a nih dâwn hi. Nia, hetiang vêl nuamti rual lek hi a la ni a, kei hian thutak hlataka lo la tùr ka ni lo. A la naupang ang chiah hian a rilru pawh a la naupang a, thlenna chin nuamti thei zêl chi a la ni.



Kan rilru a inmil thei lo ang, kan inupat hleih ka tih tawh kha, hei hi kan harsatna tùr chu a ni rêng a ni; mahse, ani chu ka dem thei hauh lo ang, kei zâwk hi lo invêng tùr ka ni a, ani chu mipa a nih angin a tih tùr a ti ve a ni mai. Kan kal thui hmain sawi fel vat a ngai, ka duh aiin ka rilru lah ka lo pe thûk tawh lehnghâl a, natna leh rilru hrehawmna mai mai tùr a ni. Hma hun kan nei dùn thei lo, a dik thei ngai lo ang.



A tûk zàna a lo lèn chuan Bawihtei chuan hlim takin a lo chhàwn a, kei erawh chu ka thil sawi dàn tùr ka ngaihtuah a, ka rilru a kap tlat avàng chuan ka ngawi deuh reng thung a.



"Eng nge i ngaihtuah?"



Ka hawi chhuak hlawl, ani chuan mit khap miah lo, ngun zet hian min lo en reng tawh a, ka lo inngaihtuah mûk lutuk a lo ni.



"Umm... eng maw?!!"



"Ka bia che a. I țha em?"



"Aw..."tiin ka țhen deuh sak a, chutah, hawi sawnin," Thingpui ka'n chhuang ang e," tiin ka tho ta nghâl a.



Ani pawh a rawn tho ve nghâl a, ka hnungah min rawn zuiin filter-a tui chu a inthlit a, chutah, min rawn hnaih deuhin," Engati nge ka text i chhàn loh?" a rawn ti ta sup a.



"Data ka off."



Nizàn ka mut dâwna ka off kha ka on leh tawh lo hrim hrim. On pawh ka tum chuang lo, thil hmuh loh tùr túr hmuh ka duh lo, ngaihtuah a titam mai mai.



"Engati nge a?" a ti leh.



Nizàn lam ngaihtuah chhuak ràn chuan," Engati vak mah," ka ti ringawt a. Ka chhànna naupan chhiatzia chu, inchhìrin awmzia a awm tawh lo, ka sawi vek tawh. Amah ang rual lek chhànna phuh chhuah ni àwm tak a ni.



"Vawiinah eng thil nge thleng?" a ti leh sup a.



"Eng thil mah," ka ti leh ringawt bawk. A va hahthlâk tak! Ka thîkthu vang vek! Vawiin nilêngin ka awm a nawm loh phah tawh bawk, engah nge ka duh lêt ve miah loh tùr ka duh ve dâwk dâwk ni? Invêng ve thei tâwk tùra ka inngaih vàng chiah. Ka nêp takzet a ni.



"Au Muan, ka ziak zo tawh."



"Aw, ka lo kal," tiin min en leh  vang vang phawt a, chutah, Bawihtei awmna lamah chuan a phei ta a, a kal hnuah chuan ka thâwk ka la hawk hawk mai.



Engati nge hetianga ka awm? A chunga lungawi lo tùr hi ka ni chiah em? Mi birthday lawmnaa a kal vàng maw?  Nge min text loh vàng kha?





*MI TU EMAW I CHUNGA ȚHA ÊM ÊM KHA, ENGTIK LAI PAWHA I CHUNGA ȚHA ÊM ÊM RENG TÙRIN BEISEI SUH. CHOCOLATE THLUM TUI BER BER PAWH HIAN TÀWP CHIN AN NEI VE TIH HRE RENG RAWH*






☆LUHLULPA☆ - 16 By Dingdi Pachuau




A haw hnuah chuan ka awm dàn chuan ka nuih pawh a tiza lo, ka inngei zâwk. Zahpuiawm tak ka ni, ani aiin ka lo naupang chhia daih zâwk a lo nih kha.



Sawi lang dawt si lo, lungawi lo ru ve ngawt, titipui țhat theih loh leh nèlawm lo takin ka hmachhawn a ni a, a tân chuan hriat thiam ka har ngawt ang chu. Engtizia nge khatiang khân ka awm ngawt? Tleirâwl tê bialpa nei thar, a bialpa laka thîkthu chhe zet leh lungawi loh peih zet ka nih duh hmel ka ti.  Ka kum ka han ngaihtuah a, ka thaw hawk. Hetianga awm tùr hi chu ka ni lo, ka upa tawh lutuk!



Data ka on a, message a rawn thleng țawk țawk mai. Ka maimichhîng vang vang a, ka chêt dàn naupang chhia lutuk chu ka inzahpui, a hun tawh lo.



Muansanga message pawh a lo awm nual.



*Muttui(Zanin chu ka tlai deuh hlek, i lo la meng em? Men ka ring tawh chiah lo; mahse, muttui sûk sûk tho)*



Hei chu nizàn lam thil kha a nih hi. Dâr 11:26-a a rawn thawn a ni, a haw tlai viau a nih hi. Ti ila, anni ang țhalai tân chuan a tlai tehchiam lo, keini ang nu tawh tân chuan tlai tawh tak chu a ni.



*Morning*



*Ka message i en miah lo, tinge a?*



*I phone a țha lo em ni le?*



Chu pawh ni se, call pângngaiin min rawn call mai tùr a nia, nilêng zankhuain ka whatsapp bîk hleinem, a ngaih a țha lo a nih chuan min rawn call mai tùr lah ni, min ngaihtuah tâwk lo a nih hi.



Ka lung a awi lo thar leh deuh ringawt.



*Lungawi lohna emaw rilru hah riauna emaw i neih chuan min hrilh thei ang, țangkaina ka lo nei ve mial thei a nia*



Hei chu nichin lawka a rawn thawn a nih hi. Zanin ka awm dàn kha chu fuh mawlh hek lo le, ani mi â lo lailêng tân chuan a hre thiam ve kur ang chu.



Mi mâwl ka nih hi, mi mâwl. Eng nge mi birthday lawmnaa a kal chu ka lo lungawi loh ve ngawt? Bialnu bialpa angin kan awm dùn tawh rêng em? Vawi khat min fawh vàng khân ka bialpa ta riau leh ka tâ bîk ta riau tùr tihna em ni? Engati nge chutiang rilru chu ka put tlat a?



'Puitling teh, puitling rilru pu tawh teh,' tiin ka inzilh mawlh mawlh a.



Mahse, a message erawh ka chhâng lo. A lak ațang hian ka inthiar fihlîm ang, ani nèn hi chuan kan inrem thei hlawl lo ang, a rualpui deuh kàwm se la, kei, nuthlawi leh eng mah hna thawh pawh nei lo, mahni nihna leh tum tâwk hrechang lo lêk  pawhhian ka fanu hmakhua chauh ka ngaihsak tùr a ni.



A dàn ngai têin zànah a lo lêng leh a, kei chu ka inthiam loh zawh tawh avàng chuan a lakah ka inthlahrung deuh ringawt a; ani erawh chuan chu chu a hre lo nge ni, a awm dànah a hriat miah loh. Bawihtei chu a be bawrh bawrh a, chutah, a thil zawh chuan ka beng a verh ta zar mai!



"'Mimawi, Lungleia àpite inah khân tu nge lo lêng țhìn le?"



"Ânutei te  leh âpa Bobby-a te," a lo ti vat a.



"Ânutei chu heta lo zin ve tawh, Âma țhiannu kha tiraw?" tia a zawh leh chuan ani chu a lo bu nghat a.



"A nih leh, âpa Bobby-a chu?" a ti leh a.



A va dîlchhût tak mai mai aw...!



"Âpa Bobby-a chu Âma țhianpa a nia, dàwrah pawh a lo kal țhìn," a ti leh zârh zârh mai.



Min rawn en chu ka hmu ru reng; mahse, ka en lo lui ve tlat. Tunah hi chuan ka lung a awi lo pawh a ni tawh lo, ka zak tawh zâwk, ka awm dàn naupang chhia lutuk kha, nawh reh daih theih se.



"Âpa Bobby-a chu a lo lêng zing em?" a tih chuan ka lo en ve ta vat. Ani pawh chuan min lo la en reng, a zâwt chîk lutuk chu a thîk vàng a nih ring hran lo mah ila, nuam ka ti vak lo.



"Kan college-a kan senior ka tih tawh kha," ka lo ti ve a.



Min en reng chung chuan achal chu a'n chuar deuh nâng a, chutah," In rawn phei tlaia rawn phone-tu che kha a ni maw?" a ti ta sup a.



"Umm..."



A ngawih leh vung vung hnuah chuan,"Chu, elpui tharlâm ka nei tihna a ni maw?" a ti ta a.



A thil sawi chuan min tihawihài țêp! Ka en ràn a, chutah, ka zak thar leh thut, hawi sawnin,"Țawng fîmkhur deuh teh," ka ti ta ringawt a.



"Ka ti ve mai mai a nih kha. A za tam an awm ang chu maw le! Mahse, kiang hmasa ber nih chu ka tum chuang hauh lo, ka duhna lamah hi chuan ka luhlul ve phian a nia," a ti leh a.



"Au Muan, i luhlul maw? Chu chu eng nge ni?" Bawihtei chuan a lo ti a.



Ka nuih a za. Bawihtei ka lo theihnghilh țêp, kan țawng chu a awmzia hre thiam vek kher lo mah se a bula hetiang sawi hi ka duh lo.



"Luhlul chu maw, a țha lama ti țàng țáng, beidawng duh lo hi a nia, a tàwpah hnehnaan chang țhin. Film-ah pawh a changtupa hi an luhlulin an beidawng duh lo va, a tàwpah hnehna an chan țhin hi, i hria tiraw?" tiin a hrilh fiah duah a.



"Aw, chutiang chu kei pawh ka duh ve," a lo ti leh a.



"Umm; mahse, thil țha lamah chauh aw. Kan pahnih chuan luhlul dùn tlat ang aw," tiin a nuih suk a.



An va ho dùn tak! Ho viau mah se he pa hi chuan tuna a thil sawi dàn ațang kha chuan min bànsan mai a tum loh hmel riau mai. Min tithinrim bawk si lo, kei hian ka thinlung rilrem loh zâwng tak rilru hi put ka lo tum reng mai a ni lo maw?



Message tone ri țât chu ka hriaa, ka en vat. Țhiante tu emaw ber a nih ka ring a; mahse, ka piah maia țhu Muansanga a ni!



*Ka thil sawiah khân ka chiang viau a nia*  a rawn ti.



Ka chhiar zo chiah chu ka va en nghâl, meng deuh sawr sawrin min lo en reng.



*Kan kum inthlauhna...* tih ka thawn ve, ka ziak sei peih lo, a hre thiam dâwn tho.



"Age gap-ah buaina ka nei lo*  tiin min rawn chhâng leh.



Chhànna ka ziak ve leh.



*Keiin ka nei thung* tiin.



A thaw chhuak hawk a, min rawn chhâng tawh rih lo. A ngawih vung vung hnuah chuan,"Kum hi chu nambar mai mai," a rawn ti chhuak ta nghut a.



Hlauthawng zetin ka lo en, Bawihtei pawh chuan chutia a rawn țawng chhuak thut chu maktih hmel deuhin a lo en ve a; mahse, Muansanga'n a nuih sak tâkah chuan a thil tih chu a tih chhunzawm leh ta a.



Phone chu a khawih leh mual mual a, message min rawn thawn chu ka hmu; mahse, ka en duh lo lui ve tlat.



Min rawn en a; mahse, ka phone chu ka en duh lo lui tlat. Chutah, ka phone chu a rawn ri ta, ka en ta vat, amah tho a lo ni.



"Chhâng ta che," a la rawn ti zui. Bawihtei'n kan țawng a hre vek dâwn, ka duh hauh lo.



"Company a nih hi,"ka tiha a hmel chu, a nuihzatthlâk tawp.



Chutah,"Khawi maw i phone chu? Company call chu ka lo tihtàwpsak ang che," tiin a kut a rawn dawh a.



"Ka titàwp ve thiam-"



"Min pe mai teh," a tih tlat chuan inhnial thui ai chuan tiin ka pe ta nge nge.



A haw hnua ka phone ka en chuan *Ka thinlung duh chu ka hria, chumi nei tùr chuan ka vuan tlat dâwn bawk a ni. Ka beidawnsan thiang lo va, harsatna awm thei pawh hneh zêl ka tum, ka inchhìr lo ang*  tih hi a lo ziak a.



*******



Tlaiah Victor-a'n Bawihtei a lo hruai a, Bawihtei'n a châk êm avàng chuan a rilru tihhrehawm ka duh loh avàngin ka kaltîr leh ta. Fate duhna hi hnial a lo har a nih hi.



Victor-a pawh a pain a zilh nasa a niang, a hma ang khân min țawng khum tawh bîk lo. Bawihtei erawh țha tak hlim takin a bia a, kei erawh min be țâwk chauh a ni. Pawi pawh ka ti chuang lo, kei pawhin Bawihtei pa a nih vàng chauh hian a nia ka biak ni.



Zan dang aia hmain Muansangaa lo lêng. Khami zàn, phone hmanga kan inbiak hnu ațang khân a lo lêng leh ta miah lo va, zàn mut dâwnah erawh min rawn 'muttui' țhulh chuang lo va. Zanina a rawn lang leh ta pawh hi mak ka ti chuang lo.



"A pate hnênah a kal a ni maw?" a tih chuan ka lo bu nghat a.



"Hun thâwl kan nei tihna a ni maw? A țha e, a lo haw hmain thil engkim sawi fel ang," a ti ta a.



Hmm, sawi fel ila ni mai alawm.



"Keimah lamah hi chuan sawi tùr ka nei lo, a chiang viau. I harsatna kha han sawi teh," a ti ta daih a.



Sawi mai tùr ka lo hre lo va, ka ngawi rih; mahse, a hnuah chuan," Kan kum a inthlau a, nula ni lovin nuthlawi, fa enkawl lai nei ka ni bawk," ka ti ta a.



"Sawi zêl rawh," a lo ti sup a.



"Nula angin min en tlat suh, thil dang ngaihtuah thei lo, fa enkawl tùr nei ka nih hi. Bâkah, kum 7 vêl deuhthawin kan kum a inthlau, a tam lutuk! I kum rualpui zawng la, hlimna, tui zawng leh nuam tih zawng pawh a inang duh ngai e," ka ti leh duah a.



"Sawi zêl rawh," a lo la ti zêl.



Ka ngawih deuh vang vang hnuah chuan,"Tunah chuan ngaihzawng ngaihtuah thei ka ni rih lo a ni, keimah chauh inbuaipui thei ka ni tawh lo va, ngaihtuah tùr tam tak ka nei tawh a ni," ka ti leh a.



Ka ngawih tâk vang vang hnuah chuan," I sawi zo tawh em ni?" a lo ti boh a.



"Umm..."



"A nih chuan, engtik hunah nge i ngaihtuah theih ang? Tunah ngaihtuah thei i intih si loh chuan?" a ti ta a.



"Bawihtei len hunah a ni mai ang chu," ka lo ti a.



"Kum eng zât nge ka nghah che a ngaih dâwn? Kum nga, kum ruk nge kum sàwm?" a tih chuan mit khap lo lêk hian ka lo en a.



"Chutiang sawi suh, chutianga min nghâk tùrin ka duh lo che," ka lo ti a.



"Mimawii len huna i inpeih theih si chuan ka nghâk thei che alawm," a lo ti leh a.



"Min nghâk tùrin ka duh lo che. I la naupang a, i kum phû tâwk nei tùrin ka duh che. Kei chu-"



"Ka nghâk thei che ka tih tawh kha, kum 10  pawh ngai se, kum 20 pawh ngai se ka nghâk thei che," a rawn ti leh tlat.



"Muansang, ka rilru tihhrehawm i tum em ni?" ka tih chuan," Tum nâng aw...Tihhrehawm duh che ila chuan ka nawr lui viau ang che. Nawr che ka duh lo, dam chuan kum chu a ral thuai mai alawm," a lo ti leh a.



"Hetiang hian awm suh," ka ti sap a, nuam lo ka ti takzet.



"Engati nge i rem theih hun i sawi lo nghah che chu i duh loh a?  Min khawngaih deuh em ni? Kan dam chuan kum chu a ral thuai thuai ka tih tawh kha, ka huphurh hleinem, kum 30 ka chuang âwrh dáwn chauh tihna a ni mai a," a la ti deuh deuh!



Tihngaihna tak pawh ka hre tawh lo," Min duh suh," ka ti teh ngawt a.



"Ka thinlung duh hi ka hnial thei lo," a lo ti charh thung.



"I chhûngte ngaihtuah rawh," ka tih leh chuan,"Anni chuan an duh an nei vek tawh, keimah chauh ngaihtuah ngai ka ni tawh," a lo ti leh a.



"Nuthlawi, nang aia kum 7 deuhthaw a upa i duh-"



"An hre vek tawh! An lo buaina tùr a awm lo bawk. Min hmangaih a, ka duh chu min duhpui mai," a lo ti leh mai a.


Chhàn ngaihna, han hnial leh dàn tùr pawh ka hre tawh lo, min hnial thla zel si.



"Angel-i hi a chhe lo hle a, amah pawh hian a duh che tih ka hria, in inrual khat khawp bawk ang, ani hi ngaizawng ta che," ka ti ta ngawt a.



Min en vang vang a, a nui ta suk.



Chutah,"Thingpui ka in har tawh e!" a ti ta daih.



Ka tho a, ka va chhuang. No la tùra ka inher chiah chu ka hnungah min lo zui reng niin, kan insu lo chauh!



"Angel-i chu min duhpui maw?" min rawn en chhuk rân pah chuan a ti sup a.



Duhpui chiah lo. Ka sawi ve mai mai, hmân zànah khân ka thîk êm a, a lo nèl sa a lo ni bawk nen, ka sawi chhuak ta mai a ni.



"A țha alawm, in inhmeh bawk a," hmun dang ka melh daih. Ka mitmenga ka rilru put dàn lo lang tùr chu hmu lo se ka duh a ni.



"Engtin nge ni ang aw? Ka lo nghah chhûng chein ka lo kawp rih mai dâwn em niang?" a tih chuan ka han melh chho hrâwk a, a lo la nui suk zui. Ka va ngei tak!



"Kawp rawh, min nghâk suh," tiin no chu ka ban a, inherin ka thingpui chhuan chu ka thli chhuak nghâl a.



"Mipate hi chuan kan neih phâk loh deuh chiah nia kan ngaihte hi kan duh țhìn," a ti ta sup a, chutah, ka hnung lam ațang chuan ka kâwngah min rawn kuah ta chaih mai!



Ka tàwp chat. A rawn chêt dàn chuan min barakhaih lutuk a ni.



"Zon, nang ka duh lai chein mi dang nei tùr chuan min ti lo hrâm la," a ti sup a, ka kokiah chuan a khabe a rawn nghat pah bawk a.



Țawng tùr ka hre lo, ka hamhaih tlat.



"Kum sàwm emaw kum sawmhnih, ka dam chhûng pawhin nghah ngai che mah se ka nghâk thei che," a ti leh sup a, chutah, a hmui lum thar thar chuan ka nghâwng chu dìm tê hian a rawn fâwp ta zauh a.



A thiltih vàng chuan ka thingpui thlit laklawh lutuk chu ka theihnghilh, ka thlauh bawl a, thingpui so hlim bua chuan ka kut chu a rawn leih fuh palh ta, ka țê țhawt. A sa lutuk tlat.



Ani pawh a rawn che nghâl vat. Tap chu on-in tui luangah chuan ka kut chu a khawhtîr a, colgate pawh a ban nghâl bawk.



"Ka tihpalh lutuk," ti supin ka kut chu a la sawn a, a chhém hoh hoh phawt a, chutah colgate chu hmet chhuakin ka kut thinpui soin a per fuhna chu a hnawih ta luai a.



"Lo țhu rawh, ka lo tifai ang e."



Min țhuttîr a, amah chuan thingpui bua chu hru hulin chhust pawh a tifai vek, ka lo en reng ringawt!



"A na viau em?"



"Aw...aih."



"Ka lo chhèmsak ang che," tiin ka bulah chuan a rawn țhu a, ka kut chu lain a chhêm ta hoh hoh a, ngawi rengin ka lo en tawp.



A chhèm kârlakah chuan,"Dam vek rawh se, a nâ zawng zawng hi dam vek rawh se," a ti sup sup a.



Chutah, a thil tih lai chu tàwpin min rawn en a, kei pawhin ka lo en ve reng. Kan inen dùn reng, a mitmenga min ngaihtuahna leh min ngaihsakna chuan khaw dang min hawitîr thei lo. Ka kut sa huam huam pawh chu a tidam vekin ka hria!



"Zon, ka nghah chhûng che pawhin ka ngaihtuah che chu phal rawh aw," a rawn ti leh sup. Thil sawi tùr pawhin ka țawng thei lo, min aikaih  tlat tawh.



Ka hmui a rawn en a, ka mitah a rawn en leh, kei chuan hmun dang ka en lo, a mit char char chu ka en tawp. Min fâwp se ka ti, min fawh khân ka danglam vek a, khatiang khân ka awm leh châk.



A hmai cchuan min rawn hnaih tial tial, kan hnar a insi lo chauh tawh. Chutah, a sîr dinglama thle deuh hlekin,"Zon, ka nghah chhûng che pawhin ka fawh che chu min phalsak rawh aw," a ti leh sup a, a hmui chuan ka hmui chu a rawn dek ta.



Ka maimichhìn nghâl daih avangin a mitmeng leh a hmel ka hmu tawh lo, dam taka min fawh chuan nuam ka ti veng veng, ka lêng leh delh delh tawhin ka hria. Kei pawhin ka lo chhâng lêt ve chiang. Kan infawh duhthawh tâk hnuah erawh dam têin kan thei tawh lo va, kei phei chu ka inthunun thei lo hrim hrim.



Ka phone a rawn rïk tâkah chuan kan tàwp chawt. Kan ințhen phawk a, kan thaw dùn huam huam mai.



Ka sen nasa viauin ka ring, amah pawh en ngam lo chuan phone chu khùr dar darin ka la a, Victor-a a lo ni a. An rawn haw dâwn chiah lo niin, Bawihtei a la muhìl lo va, min rawn be lar lar mai.



"Aw, ka lo nghâk reng che aw," tiin kan inbe tàwp a.



Kan ngawih deuh reng hnuah chuan a mipa zâwk chuan,"Ka lehkhabu chhiarah infawh țhatzia hi a rawn sawi a, ka âwih zâwng tak mai a nia," a rawn ti chhuak ta a.



Kan thil tih zawh chiah kha a ni si a, ka ngaihtuah lêt a, ka zak chu ka lum up up maiin ka hria.



Chutah," Chhunzawm leh pawh ka hnial miah lo," a rawn tih leh phei chuan ka sen nasa ngawt ang chu!



"I zak i hmai a sen țân țân khân i lang duhawm reuh lutuk!" a la rawn ti!






*THUDIK HI MIHRINGIN A THLÂK/ TIDANGLAM THEI LO, MIHRING HI THUDIK HIAN A THLÂK /TIDANGLAM ZÂWK ȚHIN*