☆LUHLULPA☆ - 17 & 18 By Dingdi Pachuau

☆LUHLULPA☆ - 17 By Dingdi Pachuau




Bawihtei lo thleng chuan a u Muana a hmuh veleh chuan a pan chat a, keimah aiin a ngai zâwk ni àwm a ni, a be nghâl sat sat.



Chu chu a hmuh chuan Victor-a chu a lungawi hmel fahran loh. A thîk deuh a niang, a en rùn mai a, anni pahnih lah chuan kan awm ve a ni tih pawh hrechang lo lêk chuan an inbe barh barh a, kei ngei pawh hian ka thîk deuh!



"Kha, hei a raincoat  leh a boot tùr," tiin bag dum hi min pe a, kei pawh chuan ka lo la ve mai, rei pawh awm lo chuan a haw nghâl daih.



Bag chu hawngin ka en chhin a, a țha khep khep khawp mai. Mahse, Bawihtei tân chuan raincoat leh boot chu a ngai fahran lo asin, motor-in an rawn lam a, an rawn thlah leh vek tho si a.



"Âma, a mawi tiraw? Âpa min leisak a nia," tiin Bawihtei chuan ka thil ken lai chu min rawn en a.



"Umm..mawi khawp mai. Âpa chu làwmthu i hrilh em?" ka lo ti a.



"Aw, chuan nihliap pawh min leisak dâwn asin. Lisa-i lem awmna nihliap ang kha," a ti leh a.



"Bawihte, nihliap chu i neih reng kha," ka tih chuan," Âpain min leisak dâwn alawm, âpa chuan pawisa pawh a ngah lutuk, ka birthday a lo thlen leh hunah pawh cake lian deuh leh mawi deuh, chhâwng thum nèn min lawmsak dâwn asin," a ti leh zat zat a.



Chutiang chu an lo inhrilh chu a ni ngei ang, a fanu hlimna a siamsak tal a, a țha e. A tihhlawhtlinsak ngei pawh ka ring, Bawihtei'n amah a rinna leh beiseina hi  a tihchhiatsak loh hrâm ka beisei.



A tûk zîng chaw ei khama Nutei'n min rawn phone chuan nizàn lama Muansanga nèna kan awm dàn leh thil sawi chu ka hrilh ve a, ani chu a lo țê râih a.



"A țha lutuk! Kum lamah la naupang deuh angin lang mah se a rilru kha a naupang chhia vak lo, in inhmeh dùn lutuk ringawt! Victor-a elsèn nân pawh a țha hrim hrim. Ani pawhin nupui a nei tawh a, ani tel lo hian i awm ve thei chiang a ni tih hi lantîr a ngai rêng tawh a ni," a ti mawlh mawlh a.



"Nia...mahse, kan induh tawn tih kan inhre rih ringawt a, ngaihzawng ang chuan ka la kawp duh rih lo, ani pawhin min hre thiam rih a. Nakinah Bawihtei hei aia a upat deuh hnu kum 5 vêl hnuah chauh-" ka tih lai chuan min lo pawt chat hmak mai.



"E khai! Ti rêng rêng suh! I tikhawngaihthlâk lutuk! Innghahtîr lam kha chu theihnghilh hmiah rawh, mahni hmasial, mahni chauh inngaihtuah hmuhin a hmu daih thei che asin, mihring hian kan dam chen tùr kan hre lo, chuvàngin, kan tûn hun zêl hi hlim takin hman mai tùr, innghah tih vêl chu a ho lutuk. Tunah khân hlim takin inkawp rawh u, kan hlim hun rei chen tùr hi kan hre hauh si lo, tuna hlim taka hun hman theih lai renga innghahtîr tih te chu," a rawn ti ta hrep a.



Min tizak lek lek mai ka ti.



"Țhiannu, a zahthlâk ve deuh rihin i hre lo maw? Arghh, kan kum mawlh hi maw le, a inthlau lutuk hi ka hua," thaw hap pah chuan ka ti a.



"Pawi lo, in induh tawn kha a hlu ber. Awii, in awm dùn chu ka hmu châk che u,"a rawn ti leh vawr vawr a.



"Ka rilru i tihah! A chhûngte'n min ngaih dàn tùr te, kan chanchin hria apiangin min en dàn tùr-"



"A ho, a nêp thè thè lutuk!!! Mi ngaih dàn tùr tih ngaihtuah reng suh, i ngaihtuah chhûng chuan nun hlim takin i hmang thei ngai lo ang. Ka thu sawi chu hre reng rawh aw, hlim takin, induh tawnin inkawp rawh u," a rawn ti leh a.



Kan inbiak zawh hnuah chuan ka ngaihtuah vang vang a. Ni e, mahni hma ka sial niin a ngaih theih chiang a ni. Kei erawh chuan mahni hma ka sial vàng chu niin ka hre bîk chiah lo, Bawihtei ka ngaihtuah rih vàng a ni zâwk; mahse, nia, Nutei sawi kha a dik ang, innghahtîr hi a fuh ber lo ang, miin lo hre phei phei se, mak min ti viau lo'ng maw?



Ka lu ka thing nak nak. Mi ngaih dàn ka ngaihtuah tùr a ni lo, Nutei pawhin min hrilh mawlh mawlh kha. Tuna hlim taka kan inkawp theih lai reng hian kei hian daidanna bang ka siam tlat a, chu chu a dik thei lo. Hlim chu ka duh ve alawm, ani hian hlimna min thlen a, chu ka hlimna, ban phâk maia awm chu ban duh lovin ka nghâk rih ang maw? Ani pawh hian hlimna chu a duh ve tho zâwk ang.



Thu tlûkna ka siam tùr hi dik tak ang maw? A dik tùrah ngai ang.
Muansanga'n a hriat hunah engtin nge a ngaih ang le? A hlim ve ang em? A hlim ngei ang, kei pawh hlimin ka nui var var a nia.



Ka text dâwn em maw ni le? Ka phone chu ka khawih nauh nauh a, a number hmet chhuakin ka thil hrilh tùr chu ka type a; mahse, ka thawn hma chuan ka delete leh vek. A lo lèn hunah makti tak leh hlim taka lo siam ka duh zâwk leh si.



Zàn hun ka nghahhlelh ber țum a ni ngei ang.



Bawihtei school bàn hnuah chuan an thil zir chu ka enpui leh a, a thiam viau zêl. Hun thâwl tak hnuaiah chuan music play-in tha tho takin kan han lâm leh a, vawiin tlai phei hi chu ka phûr zual, ka lâm nasa bawk.



Eìrawng ka bàwl lai chuan Bawihtei a lo in-barbie leh a, maian ka hîk a, chutih lai chuan ka phone chu a rawn ri ta țang țang a.



Muansanga a nih ringin phûr zet hian ka ban a; mahse, Nutei a lo ni a.



"Thu ràwn min pe leh dâwn em ni? Zaninah ka hrilh dâwn chauh" nui chung hian ka ti a.



"Zoni, i țhiannu hi biak tùr a awm tawh lo!" tia Nutei nu țap ri ka hriat tâkah chuan ka ding zawt mai!



"Eng...eng maw!!!? Ka nu, eng thil nge..-"



"Zoni, a thi tawh! Min kalsan tawh," țap hawk hawk chung hian a rawn ti leh a, ka thil hriat chuan min țhâwng lutuk a, phone pawh ka hûm nghet ngat ngat khawp mai. Ka tlûk loh nân bang nghèngin ka ding bawk.



Tukin lamah pawh hlim takin kan inbiak kha. Natna a lo nei reng em ni? Min va hrilh lo ve!



Chutah, phone chu mi dangin an rawn lâksak ta a, Nutei pasal lo niin, ani chuan thil awm dàn fiah deuh hlek chuan a rawn sawi ta a.



Nat lâwkna a nei lo. Vawiinah damdawi in lamah kal chu a tum, natna a neih vàng ni lovin a period felhlelh vàngin. A inbual laiin Bathroom-ah a lo tlu niin, an va hmuh chhuah meuh chuan an lo tlai tawh, a nunna chhan tlâk a lo awm tawh lo.


Ka țap chhuak ve hawk mai. Rang takin Bawihtei chuan min rawn pan a, min rawn kuahin ka țah avang chuan a țap ve ringawt bawk.



"Âma, țap tawh suh," chu min ti ve nain ka insûm thei si lo va, ani pawh a țap ve zêl tho.



Ka nute pawhin min rawn phone nghâl. Ka lung a chhiat êm avàng chuan chhàn pawh ka chhâng țha hlei thei lo, zaninah a ruang an tlaivarpui ang a, naktûk chhùn dâr 12-ah an vui ang.



Ka phei ve ngei chu a ngai ang. Ka țhian țha 2 zînga pakhat a ni, Laltei pawhin a hre ve tawh ngei ang, ani pawh a hnathawhna ațangin a kal ve ngei ka ring.



Aw, Nutei tak chu aw...ka rilru a tina mang tak e, tukin lamah hlim takin kan inbia a, heti mai hi a lo ni leh si, mihring hian kan hma hun tùr kan va hre lo tak êm!!!



Ka țap tawh lo, rilru buai nuai nuai kârah thil ka ngaihtuah hrâm hrâm a ngai. Ka țhiannu taksa he leia ka hmuh theih tàwp hun tùr hi thlah ve ngei ka duh, ka hmu ngai tawh dâwn lo asin. Bawihtei nèn scooty hian kan phei dâwn em niang? Zànah kan pahnih tê chauhin, a va khawharthlâk dâwn ve! Khalh pawh ka khalh thei dâwn em ni?



Engtin nge ka tih tâk ang le?



"Zon...?"



Mit khap fak fain ka melh chho a, ka hmaah chuan Muansanga a lo ding reng tawh!



"A tak i ni em?" ka lo ti ringawt, ka hmuh sual pawh a ni maithei a.



"Zon, eng thil nge thleng?" aw dam tak, ngaihțha lo awka zet hian tiin a rawn kûn hniam nghâl a, min ngaihtuah tih hriat zet hian ka bânah chuan a rawn vuan bawk a.



Ka țahna avànga ka mit bui deuh, thîp angreng tak chu ka khap fak fak phawt a, chutah hnuai lam melh chuan," A thi tawh! Ka țhian țha ber chu a thi tawh a nih chu, hrehawm ka ti êm mai," ka ti chhuak sap a, ka țah chhuah mai loh nân ka hè chu ka pet fan fan a.



Rem lo zet chuan min rawn kuah a, ka hnung chu dìm tê hian a rawn chûl ta hliau hliau a, chutia duat taka min kuaha min chùl tâkah chuan ka lung a rawn chhe thar leh ta tlat.



"Lungngaia i awm chuan i bulah nangmah hnèm tùra awm hi ka duh fo ang," a ti sup a.



"Nutei nèn chuan tukinah pawh kan inbe..." sawi zawm thei lo chuan ka inhnît ta hlawp hlawp mai. Nghet zetin min kuah a, eng mah a sawi ta lo.



Bawihtei pawh a rawn țap leh ta. Ka lo hrechang tawh hauh lo niin, tunah hi chuan ka rilru hi a hrehawm a, a buai nuai nuai tlat a ni.



Ka lungchhe zualpui a reh hnuah chuan kan pathum chuan kan lo inkuah khâm tal a ni tih ka hre ve chiah, ka che sawn deuh a, Bawihtei mittui tla phianga min lo entu chu chiang takin ka hmu a.



"Bawihte, Âma hi ka țahbelh i ti em?" țahna avànga hnâr ping țûp chuan ka ti sap a.



"Âma, i țah chuan ka țah a chhuak ve zêl," a lo ti ve pàr a.



"Aw le, ka țap tawh lo ang," ka ti a. Muansanga kuahna ațanga tàl chhuah erawh ka tum lo, ka lungngaih lai taka nghenchhan ka nei hi ka lâwm, ani hi awm lo ta se...



A hnuah erawh awm dàn ngaiin kan awm ta. Ngaihtuah hmel fê hian min la rawn en a, za lo zeta ka nuih luih sak tákah chuan tlêm chuan a hmel chu a zia ta deuh.



"Engtin nge in awm ang le?" tiin min zâwt a.



"Phei ka duh a, a bula a rei thei ang ber hun hman ka duh; mahse, ruahmanna ka siam thiam lo, ka ngaihtuah thei lo," ka ti sap a.



"Engin? Scooty hian maw?!!!"



"Ka hre lo, a rem remin a niang," ka ti leh tawp ringawt.



A ngawi vang vang a, chutah," Ka lo ngaihtuah ang e, ka haw zawk hlànin in lo awm thei ang tiraw?" a ti a.



"Aw...a zia lo êm mai, hetia buaipui-"



"Ni lo ve, i theih hrâm chuan Lungleia phei thei tùrin lo insiam vek  rawh aw, ka rawn kal leh har lo ang," a ti a, min ngaihtuah tih hriat tak chuan ka bân chu a rawn chûl leh a, tho thutin a chhuak ta nghâl a.



Rilru buai laia a rawn lang hlauh chu a tihzia e, ani chu a rilru a fîm a, buai hauh lovin thil a ngaihtuah thei si a.



A rawn lan leh meuh chuan ka lo insiam zo ve chiah chiah chu a ni. Motor min rawn hmuhsak niah ka ngai mai, zàna scooty-a kan nufa chauha phei zawng ka zuam lo.



"In ril a țâm ang, chaw te bâr ula?" a tih chuan ka lu ka lo thing a," Ka ei thei chuang lo ang," ka lo ti mai a.



"Mimawii hi, eipui la?" a tih chuan ka harh chhuak deuh zawk. Keimah chauh ka lo inngaihtuah a, Bawihtei pawh ka lo hrechang pek lo.



Mahse, ka che hman lo, amah vekin a buaipui leh tho. Ka va nêp tak êm! Ani hi a lo awm lo ang tih ka hlau ta zek zek.



Ka inpeih hnua pâwna kan chhuak chu motor leh driver àwm rêng rêng ka hmu lo, ka hawi kual leh deuh a, car vâr ding chu ka hmu; mahse, hei chu țhenawmte tá a ni si.



Muansanga chu ka en deuh hâ a, ani chu car lam hawi chuan a bu nghat a.



"Lo kal r'u le," tiin bag chu min lâksakin hma a hruai a, eng sawi lo chuan kan zui ve mai bawk a.



"Hei chu țhenawmte car kha a ni lo'm ni?" ka tih chuan a nui deuh suk a.



"Lût r'u le, kan kal hma leh kan thleng hma a ni mai," a lo ti mai a.



"Hei hi, i khalh dâwn elo?!!" ka tih chuan a dàr sàn ãk hian," Driver kan chhawr ngai miah lo, keimah hian ka khalh mai zêl a," a lo ti duh chauh a.



"Țhenawmte car a ni nange?" A va màwl theih tak! An car a rawn khalh chhuak a nih hi.



"Ni lo, ka tibuai lutuk che, a theih loh!" ka ti leh ta tlat a.



"Țhu mai mai teh," a lo ti sup thung a, motor chu a tinung nghâl a.



"Min hruai dâwn ringawt a nia! I buai si, naktûkah-"



"Mimawi, Lungleiah phei ang u aw, ka motor khalhah pawh i la chuan ve loh kha, nuam ti deuhin chuang rawh aw," tiin a tlân chhuak ta nghâl a.



Kawng lakah ka țawng vak lo, Bawihtei leh  Muansanga erawh an dàn ngai têin an titi leh barh barh. Ka rilru a vâk kual nasa a, Nutei mawlh chu ka ngaihtuah lo thei lo.



A chunga thil thleng hi âwih harsa ka ti, a thi a ni tih hi pawm ka duh lo, thi thei a la ni lo, fa nei thei tùrin an la buai ve êm asin.



Car-a tlân kan ni bawk a, kawng lakah chawlhna tùr kan nei lo bawk nèn, Lunglei kan thleng har miah lo. Bawihtei a muhìl bâm a, kan phei tur thu ka nu ka hrilh lâwk avàngin min lo ngaichâng reng a lo ni.



Kan inphih harh ve a, muangchâng lovin Muansanga nèn chuan Nuteite in lam chu kan pan ta nghâl a.



Nutei hmel ka hmuh chuan ka insùm theihna a keh chhe leh vek. Ka țap leh hawm hawm a, a hmai vawt thlar chu ka chûl ka chûl. Ka țap lo thei lo, min kalsan hi ka phal thei lo, ka kaltîr thei lo.



Rilru mang muihin hun chu ka hmang chho a, rilru fîm put tum mah ila ka thei lo, Nutei chanchin an sawi chuan min tina thar leh a. Naute nei thei ve tawh tùra an inngaih lai a lo ni a, a diary-ah pawh a lo ziak thlap a nih chu. Naute pai nia a inrinhlelh thu leh chu thu chu tichiang tùra damdawi ina kal a tum thu chu a lo ziak ve niin, chu chuan mittui a titla tam zual leh ta.  A pasal mawlh chu, a tuar chu ka hre thiam phâk ve lo; mahse, ka tawrhpui a ni, nâ ka ti ve êm êm asin.



Laltei nèn pawh kan inhmu, kan inkuah a, kan țap dùn bawrh bawrh. Kan inhmu khât hlê si a, tuna kan inhmuh dàn hian lung a tiawi thei mawlh lo a ni.



"Bawihi, engtikah nge in haw phei dâwn?" ka pain a tih chuan ka maimichhîng vang vang a.



Ka țhiannu ka thlah liam tawh a, amah ber ka thlah liam tawh chuan ka tih tùr ka tizo ta chu a ni mai. Min dâltu a awm tawh lo.



"Bawihtei school chawlh reitîr chi a ni si lo va, Muansanga lah hi, a buai ve viau bawk a-"



"Kei chu min ngaihtuah suh, hun ka nei a nia," a lo ti a.



"Zanin chu hahchàwl ula, naktûk zîngah haw phei mai rawh u, Bawihtei chawlh rei i duh loh si chuan. Tin, Muana pawh chelh rei chi  a nih loh chu," tiin Muansanga lam chu hawiin,"Muana, an nufaa i rawn hruai phei hi a làwmawm tak tak a ni. Khaw kâr a hla tham hle si a, scooty chu ni se an ngaihtuahawm hle dâwn si a," ka pa chuan a ti charh charh a.



"An mangan laia buaipui theia ka lo awm kha ka lâwm asin," ani chuan a lo ti a.



Ka mit kham zet khap fak fak pah chuan," Kan lâwm viau a ni," tiin ka en a,"Ka pa sawi ang khân zanin chu chàwl ila, naktûkah phei mai ila, țha i ti em? I chau hle àwm si a," ka ti a.



"Chau nâng, mipa kan chau ve mai mai ngai hleinem."



Ka chau tawngkhawng bawk a niang, lukham ka luin a deh hnu rei lo têah chuan ka muhìl nghâl ta rêng. Mumang nei map lovin ka muhìl, thil ka ei lo leh ka țah nasat vàngin ka taksa a chau viau a ni.



*******



"Thu tlûkna ka siam a, ka la hrilh hman lo che a."



Rawn hawiiin chiang zetin min rawn en a, ka nui deuh hmel a hmuh chuan," Ka ring chhin ang, kum sàwm kha kum thuma pawh tàwi i tum a ni chiang!" a lo ti a.



"Ni lo!"



"A nih, kum nga?" a lo ti leh a.



"Pawh tawi ka tum lo."



"A nih chuan?" zawhna mitmeng dik tak hian min en ràn a.



"Hlimna ka bula a awm reng lai hian man ka duh a, chuvàngin, innghahtîr che kha ka duh ta lo, mahni hma ka sial tiraw?" ka ti sap a.



Mit khap lo lêk leh che map lo chuan min rawn en reng a, chutah," Engtin maw!?" a rawn ti ta sup a.



Nutei thil sawi kha ka ngaihtuah chhuak leh a, chutah, chiang deuh fak hian," Innghahtîr che ka duh lo, tunah hian min la duh reng a nih chuan-" ka sawi zawh hma chuan min rawn hnaih kuar.



"Zon, ka duh che, ka duh reng che," tiin min rawn kuah nghâl thlawp, kei pawhin ka kuah ve nghâl zat.



A hnu daihah chuan," I tân leh Mimawii tân mipa țha ber nih ka tum ang, pawisa tam tak chu ka nei lo a ni maithei; mahse, ka ngaihsak ang che u, in mangan hrehawm lai leh min mamawh laiin in bulah ka awm zêl ang," a ti dap dap a.



Thla a timuang, rilru a tihlimin min tidam sawng sawng mai!






*I THU SAWI TÙRAH FÎMKHUR RAWH*
* VAWIINA I ȚHIAN NIA I HRIAT KHA NAKTÛKAH CHUAN I HMELMA HLAUHAWM BER A NI THEI*





☆LUHLULPA☆ - 18 By Dingdi Pachuau




*Vawiin chu chhuanlam siam miah suh, ka rawn hruai dâwn che u*



Inrinni a nih vàngin kan free ni a ni ve a, Bawihtei school kal ni hi chuan free ka inti thei bîk lo a ni. Muansanga message chu chhàn ka tum hran lo, hruai chhuah min tum apiangin ka hnial deuh ziah a, tûn țum chu ka hnial tawh lo ang.



Chaw ei kham hnuah a rawn lang nghâl. Khawiah nge kan kal dâwn tih ka zawh chuan a nui suk ringawt a, min chhâng chuang lo. An inah min hruai ta phawt. An in a ni tih ka hriat chuan nuam lo tihna ka nei hmasa ber, a chhûngte lo awm lo hlauh erawh ka làwmzia mai chuh!



"Khawnge an awm vek a?" ka tih chuan," An zin chhuak lawk a nih kha " a lo ti mai a. Bawihtei chu in chung lamah hruai chhovin room pakhat, 'play room' a tih maiah chuan kan lût a, naupang infiamna tùr toys chi hrang hrang a awm kim khawp mai.



Bawihtei chuan nuam a ti lehpek khawp mai, Muansanga chuan ka beng bulah chuan," Keini chu ei tùr siam tùrin chhuk ang hmiang?" a ti sup a.



"Bawihtei hi kan kalsan dâwn em ni?" ka tih chuan," Mimawi, Âma nèn in hnuaiah ei tùr siamin kan chhuk dâwn aw?" tiin Bawihtei chu a nuih sak a.



"Aw," lo ti lauhin a lu a bu nghat a, mi pawh rawn en lo chuan a thil tih lai chauh chu a en ngar a.



"A ngaihtuahawm lo ang," ti zauhin Bawihtei hnênah chuan,"I duh duh kha i khawih thei ang, i nin deuh hunah i lo chhuk ve mai dâwn nia aw," a ti leh a, room ațang chuan chhuakin in hnuaiah chuan kan chhuk ta a.



Choka lam pan min panpui ta mai lo chuan a hmaa Bawihteite thlìra ka awmna room-ah khán min hruai lût leh a.



"He room hi ka ngaina asin, a chhan i hria em?" ti sup pahin ka lam hawiin a rawn inher nghâl a.



"A nuam i tih vàng a niang chu," nui deuh chung hian ka lo ti a.



Min en chhuk rùn pah chuan thutak zet hian," Ka hmeichhe duh ber ka fawh hmasak berna hmun a nih vàng a nia," a ti a, min rawn hnaih pah sauh bawk a.



"Tak tak maw?" ka lo ti a.



"Tak tak. Ka tifiam hauh lo, hmân ațanga ka duh ber kha i ni miau a," a ti leh zêl a.



"Ka lâwm e," ka lo ti sap a.



"Hetia ka bula i han awm ve ta mai hi ka mumang a ang ka ti zâwk hial asin, ka mumang a lo ni ang a, harh rual rual hian i bo daih ang tih ka hlau țhìn," a ti leh sup a, ngun zet hian min en chhuk rùn reng a.



"Bo lo tùrah ngai ang," nuih sak chung chuan ka ti ve a; mahse, min en ngun lutuk vàng chuan ka zak ve deuh hlek nèn," Min en reng chuan ka la zak ve thei tho a nia," ka ti leh sap a, hnuai lam ka en ta daih nghe nghe a.



"En reng pawha en nawn țûl leh en nin theih loh!" a ti sup a, chutah, ka khabeah rawn dawmin amah en thei tùr chuan min kuai dâk a, a bân lehlam chuan ka kâwngah min kuahin, a lamah min pawt hnai dâwrh a, kan taksa a inthlâwp ta zaih mai.



Kan induat mawlh mawlh a, inkham tik ni kan nei chuang lo. Ãm zeta min duat leh vawng vawng hnuah chuan choka lamah min kai phei ta țâwk a, apron pakhat hi min pein aniin pakhat a ha bawk a.



"Vawiin chu ei tùr chi hrang hrang kan siam dùn ang," tiin a phone chu a phawrh a, youtube play-in ei tùr kan siam dàn tùr chu kan en dùn ta nghâl a.



A che chu a zei vei thlarh a, an choka zau nuam taka a han che kual vêl chu hmuhnawm tiin ka lo en ru leh reng țhìn. Ka lo en leh reng țhin tih ka hriat chhuah hnuah erawh chuan en tawh lo tùrin ka insûm a, ka inthunun hial a ngai ta.



"Min en zêl rawh, nuam ka ti alawm," a rawn tih chuan ka en vat. Mi pawh en chuang lo chuan a nui suk ringawt a, ka en țhin tih a lo hre ru vek a nih chiah hi.



"Ka en lo che," ka ti sap ringawt a.



"A pawi rêng rêng lo. Min en hian nuam ka ti daih zâwk alawm," a lo la ti zui, ka zak ru leh deuh chem chem mai.



Min si deuh chêt leh min tawk pha deuh rengin a ding lui tlat zêl a, ka chêt pawh a tikhawr deuh tlat. Victor-a tih loh mipa ka hnaih tam lohzia ka hria, tuna hetia min rawn si deuh renga a ding tlatin ka chêt min tikhawr deuh pawh hi àwm ka ti viau tho mai.



"A mak vung vung e! Ka hnaih lutuk che avàng hian nuam lo i ti em ni? Kei lahin nuam ka ti nasa mai si a, ka tawh theih reng lai chea tawk lo chea ka awm chuan mi â ber ka ni dâwn asin," te chu a la ti tak deuh deuh a.



Chhâng lovin ka nui ringawt. Tleirãwl tê pawhin min la tizak thei tho a nia, kei hi ka inngaih ai hian ka la upa lutuk lo a niang a te ka tih phah ta mai mai.



"Kan ei tùr siam pawh a tui khawp ang, duhna leh hmangaihna nèna kan siam a ni si a," a ti leh a, ka hnar chu a rawn piai pah zauh a.



"Eng nge min tah a?" tiin ka mit chu siai tawnin ka hnár chu ka en a.



"I chhe lo tawp a ni mai."



Thlâ pawh kan la nasa. A duh dàn a ni miau a, ka hnial lêm lo. Ei tùr kan siam zawha apron kan dah fel hnuah chuan in chungah kan chho leh a, Bawihtei a lo la tlei êm avang chuan in hnuaiah min hruai thla lehin kan infawhna room bul chiaha gym-ah chuan min luhpui ta a.



"Wow..!!"



A nuam tawp. Dârthlalang lianpui awmin pâwn lam lang thei tùrin bang chanve awh hmawk chu tukverh a ni bawk a, tukverh dârthlalang fai zetah chuan pâwn lam phùl leh thing hring dup chu a hmuh theih vek bawk a.



"A nuam kher mai a!!" ka ti leh a.



"Nuam i tih chuan a țha e, kan han ti lawk dâwn em niang? Kha lai drawer -ah khân inthlâkna tùr chu a awm ang," a ti a.



"A, vawiin chu ka inring lo sia, ni dangah ka ti zâwk mai ang chu," tiin ka lo hnial. Thlan a tla ang a, underwear zawng zawng nèn, a spare chu keng tho mah ila vawiin chu hnial phawt ang.



"Kan pahniha tih dun ka duh alawm."



Ka hnial thei leh ta lo, a lo inbuatsaih vek tawh avàngin ka hák tùr nèn lam drawer-ah chuan a lo dah lâwk vek bawk si a, kan inthlâk a, chhùn thil ei hma zawng chu exer kan la dùn ta a.



Thlansa phûlkaia exer ka han la leh thei ta chu ka lung pawh a tichhe rum rum mai. Nuteite gym-a kan kal nasat theihzia kha, khâng lai phei kha chuan exer lâk duh vàng ni tho mah se ninhlei vàng khân kan kal kha a ni mah zâwk a.



"IG lamah i thlalâk hi ka upload dáwn aw, i remti em?" a tih chuan ka ngaihtuahna ram ațang chuan ka harh chhuak ta hlawl a.



"Eng thlalâk maw?" ka ti hâ a.



"Hei hi," tiin min rawn hmuh a, hrui vaia ka zuang lai a lo ni a, ka hmel a lan chian êm avàng chuan nuam ka ti chiah lo deuh.



"A dang ti zâwk la?" ka lo ti thung.



"I hmel lang i duh lo a ni maw? Um, ka hre thiam e," a ti a. A lungawi lo ang tih chu ka hlau ru viau. IG lama a post vaih chuan mi titi kan ni nghâl dâwn si a, ka la inring tâwk rih lo a ni; mahse, a lungawi lo hran lo a niang, thil dang pawh a sawi tawh chuang lo.



Kan pahniha hman tùr mat hlai vak lo pahnih chu rawn la chhuakin pakhat chu min pe a, chumi-ah chuan plank, push-up, mountain climber, flutter kick leh eng eng emaw kan ti a, kan nui dùn chiam lehnghâl. Ka rin aiin push-up chu a lo ti thei a! A pian a sek țùng lo nain rin aiin a infit roh zëk!



Bawihtei a rawn lang ve ta, a rawn țê lüt nasa mai. Kan bulah chuan rawn awm vein push-up chu a rawn ti ve a, chutah," Âma, lâm leh ila?" a la rawn ti zui.



"Bawihte, helaia làm te chu-" ka tih lai chuan Muansanga chuan," Yes, lâm ang u, min zirtîr ve ula?" phûr zet hian a rawn ti a.



Kan lâm leh ta nge nge; mahse, a boruak a nuam a, free style-in kan lâm chhunzawm chiam mai a, a nuamin a hlimawm dangdâi khawp mai.



Kan chawlh hnu rei vak loah chuan Muansanga chuan,"Âma nèn kan lâm ang a, min lo en rawh aw," tiin Bawihtei chu a nuih sak a, chutah, ka hnial hmain min rawn pawt tho a, ka kâwngah a rawn kuah nghâl chat.



"Hetiang làm ka thiam lo," ka tih chuan," Ka zirtîr dâwn che alawm," a ti sup. Kan thlan a tla nasa tawh si a, ban chual chunga inkuah chu a nuam fahran lo, ka inthlahrung.



Min zirtîr a, a har lêm lo. Music țang et awt play-in min han làmpui tak tak mai chuh, min virpui thùl, tlûk hlauin ka kuah nghet khawp mai.



Nilêng chuan hun nuam leh hlimawm tak kan hmang a, zanriah lam pawh ei tùrin min sâwm nain ka lo hnial tawh thung. A chhúngten min rawn hmu hman ang tih ka hlau, a theih chhúng chu pumpelh hrâm hrâm ka la duh.



Zanriah kîl laiin Bobby-a'n min rawn call tlat mai! Ka han chhàn chuan, ani Aizawl a rawn phei niin, rawn lèn a tum a, kan in awmna tak chu a rawn hai niin!



Nui var var chung chuan kan in awmna chu ka hrilh chiang a, a lo thlen hmaa ei zawh hman tumin chaw chu kan ei sawk sawk a.



A lo luh țantirh chuan Bawihtei chuan a lo nêl lo leh deuh tawh a; mahse, hun a duh rei lo khawp mai. Minute  10 ral pawh a ngai lo, a titipui leh bawrh bawrh mai.



A pa pension thil buaipuiin a rawn kal a lo ni a! A pa chu a nuamsam lo va, office-a lehkha theh luh tùr vêl zawng zawng rawn kentîrin Thawhțan lamah a buaipui ang chu.



Muansanga pawh a rawn lang leh. Chutia inlêng dang nèn min rawn hmuh chuan nuam lo ka ti lek lek mai a; mahse, a hmelah eng mah a lantîr loh avàng chuan tlêmin zia ka ti leh hlek.



Bobby-a, Lungleia mi a ni tih leh a rawn tih tùrte chu a thuphungin ka sawi luam a, hetia ka sawi chhan pawh hi Bobby-a hming kha a hre tawh si a, thil dik lovin a ngaihruat ang tih ka hlauh vàng a ni zâwk mah.



Mahse, ka rin ang ni miah lovin Bobby-a chu a titipui bawrh bawrh a, Bawihtei pawh chu a chhaih zauh zauh. Kei erawh chu min ngaihsak angin a awm miah lo, a thin a rim lo nia ka hriat avàng chuan ka ngaih a țha deuh ringawt.



Nutei chungchângte chu kan sawi chhuak a, ani pawh kha a lo kal ve reng nain ka hmu lo, khami ni kha chu hrehawm ka tih êm avàng leh awm dàn phung pângngaia ka awm theih loh avàng khân hrehawm ka ti ngawih ngawih. Nutei ruang kha ka kalsan lo tluk a ni a, țap ri chuah chuah bula awm ka ni bawk nèn, ka lung kha a zîng lutuk ringawt. Tunah hi chuan a tâna ka tih theih tâwk, a thu ràwn chu zàwmin hlimna ka ûm ve ta a, hlim pawh ka hlim ve ta viau rêng. Ka la inchhîr hauh lo.



Bawihtei chu a muhìl hma deuh, vawiin lamah khân a chau ve deuh a ni ngei ang, a àwm ve viau tho e.



Titi chi hrang hrang an vawrh a, kei pawhin ka lo zàwm ve zêl. Thil an hre dùn khawp mai, Muansanga chu ka rin a lo ang miah lo. Bobby-a thil sawi apiang chu a lo zawm ve thei zêl mai a, mak ka ti roh tawp maw le! La naupang viau leh tleirâwl pângngai ve maia ka ngaih kha a nia; mahse, a han titi ve tak tak chu, ka ngaih dàn ka thlâk dâwrh mai.



Ruah a rawn sùr dâwn avàng chuan Muansanga chu a haw hmasa a, a haw hnu rei lo teah Bobby-a pawh a haw ve mai. Kei pawh mu tùr chuan ka insiam nghâl a, ruah sûr laia mut hi nuam ka ti a, kan in luah laiah phei hi chuan leimin leh tawlh a hlauhawm hran si lo va, lungmuang takin a mut theih tlat a ni.



Mu pah chuan Muansanga IG ka va check ru leh dâwk dâwk a, pic thar pawh a lo dah leh tawh. Vawiin lama ka thlalâk kha a lo ni nghe nghe, ka hmel erawh a lan chian loh avàng chuan pawi ka ti tehchiam lo, tu mahin min chhui chhuak thei lo ang. A caption-ah chuan 'Hlíng zînga Rose pâr' a ti ngei! Ka nuih a za, thu a inti thiam lutuk a! Comments lam ka en chhin a, 'Tu nge a?' tih leh 'I bialnu a ni maw?' tih zawhna a tam khawp mai.



Ka comment ve châk tlat a nih chu. A pawi lo tùrah ka ngai, miin min hre chhuak a nih pawhin a bialnu ka ni tih an hre kher nâng.



*Ka hriat hnu a va ang ve!* tiin. A hmuh hunah chuan a nuih a za ngawt ang chu.



WhatsApp lamah min rawn mangțha a, chutih rualin ka comment-na chu a en rih lo a ni maithei, min rawn chhâng lo tlat. Comments a tam ve thei si a, a en ngai lêm lo pawh a ni thei tho.



Mahse, a hnu deuhah min rawn reply ta.



*♥️♥️😘* tiin. Comments dang dang pawh chu a lo chhâng ve nual tho. WhatsApp lamah zanin chungchâng a rawn sawi lang lêm lo va, Bobby-a nèn min ringhlel lêm lo a nih ka ring, nia, rinhlelhna chhan tùr a awm lo ve bawk a ni.



Mahse, a lo ni bîk miah lo. A hnuah a sawi chhuak. A ngaihtuahna a lo sêng kual ve nasa niin, zàna a rawn lènin," Bobby-a kha a fel ngawt mai, hmeichhiain pasal atâna an duh ang chi a nih ka ring, nangmahah pawh a ni tho ang tiraw?" a ti a.



"I ring em?" nui chung chuan ka ti a.



"Hmeichhia i ni ve tho alawm; mahse, i duh thei lo a nia," a ti leh lawi a.



"Hmeichhia ka ni ve lo a niang?" nui chung vêk hian ka lo ti a.



"I tân mipa ţha tak nih ka tum a ni. Mi dang melh thei hauh lo tùra siam che ka duh a, chutia ka duh avàng che chuan zalèn lova awmtîr che erawh ka tum chuang lo, hlim taka hun hman dun zêl ka duh a ni," a ti duah a.



A la naupan ai hian a rilru hi a puitling roh hi ka tia, kei nuthlawi mai mai heti khawp hian min han duh ve thei a nia, làwmawm deuh mai asin; mahse, ka inthlahrung ve deuh țhin, nula pângngai nih ka châk a, a chhûngte leh țhenrualte bulah pawh a hmai a uang thei zâwk ang a...



"Mimawii pa a lo la kal țhìn em?" tia min zawh chuan ka ngaihtuahna ațangin ka harh chhuak zawk.



"Kal vak lo, Bawihtei hmuh a châk deuh châng hian a rawn lam a, a ni deuh mai," ka tih chuan," Eng emaw han țawng khum deuh che leh, hei,  rilru nawm lohna tùr deuha țawngkam ang chi hi, i chungah chutiang chu a nei em?" a ti ve ngei.



"Nei lo ve, a zia lutuk tawh," ngaihtuah thui lêm lo zet chuan ka ti mai a.



"A lo nei țhìn a ni maw?" a tih tâk khutah chuan ka chhàn dàn chu ka hre chhuak leh chiah.



"A, nei hran chuang lo ve," chu ka ti tak nain a âwih pawhin ka ring tawh chuang lo, ka sawi zo vek tawh si a.



Ka bâna min chelhin amah en thei tùr chuan ka khabeah min kuai dâk a.



"Zon, i rin tlâka awm hi ka duh a. Mipa, hlauthãwnga siamtu che ni lovin i innghahna tlâk khawpa rinawm nih ka duh a ni. Kum lam kha chu ngaihtuah tawh lo la, in nufaa in innghahna tlâk mipa nih hi ka tum tlat a ni. Tunah hi chuan min la ring kher lo pawh a ni maithei; mahse, ka bei ang, ka tum zêl ang," a ti charh charh a.



"Ka ring che alawm." Mak tak maiin a thu sawi chu ka ring tlat alawm le!



"Ka phatsan miah lo ang che."



Zan tin mut hmunah a IG chu ka check ru ziah. Nuam ka ti ve tlat tawh. Ka thlalâk a nih loh leh a gym thlalâk a lo dah ziah a, ama thlalâk tak chu a vâng. Thu ziak mawi leh țha tak tak nèn, IG lam hi chu a active ve riau mai.



Zan khat Victor-a'n Bawihtei a rawn dah chu a rui deuh hlek a, a lo kal khàt ve deuh tawh avàngin leh Bawihtei awmpui chungchâng kha a sawi ngai tawh loh avàngin țha takin ka lo bia a.



"Khawnge i bialpa tleirâwl tê kha? A lo lêng ngam tawh nange?" a rawn ti deuh kher a nih chu!



"Țawng tam lo teh, normal lo chung phei chuan Bawihtei rawn hruai tawh miah suh," dam deuh, zawi deuh tak hian ka lo ti a. Bawihtei a awm ve reng avàngin thinrim awka ring ka chhuah duh lo.



"Khatiang naupang ngaihzàwn kha i zak lo em ni?"



Ka thaw hawk. Ka maimichhîng vang vang, a sawi chu a dik vena lai chu a awm ve deuh tho; mahse, ka ngaihzawng neih chungchângah hian a lo inrawlh ka duh lo, a lo sawi ve pawh hi ka duh lo bawk.



"Ka chungchângah lo inrawlh suh," ka ti ta hmak a.



"Bawihtei a kàngkai lo thei si lo alawm le," a ti leh a, a mit sen deuh râm chu a khap suk suk a.



Engtin nge he pa hi ka lo hmangaih theih aw? Mak ka inti a ni. A khawi lai hi nge ka lo hmangaiha pasal atân hial ka lo neih le? Khatih lai khân engin nge min mawlh a neih duhna rilru ka lo put theih ni?



Dawi âtin ka awm a ni ngei ang.



"Bialpa i nei tawh bawk a, kei pawhin ka nupui hi țhenin Bawihtei hi ka hnêna awm tùrin ka bei thei tawh ang, hnehna ka chsng ngei bawk ang," a ti chhuak leh ta.



"Victor!!" ka lo ti țhat. Chutiang chu ka fanu hriatah hian a sawi ka duh lo. Thumuhnu a rawn tharthawh leh hi ka duh lo bawk.



"Haw rawh, khawngaihin?" Bawihtei chuan makti zetin min en tawn a ni tih ka hria, ka hrilh fiah thei mai ang chu maw.



"Bialpa chu nei lo ve mai la, i fanu tân hian?"



"Khawngaihin, thil pawi a thlen hma hian?" ti bùl hmakin kawngka lam chu ka kâwk vah.



"I danglam tawhzia hi," tiin a tho țuih țuih a, chutah," Lo inngaihtuah ang che, ka nupui chu ka țhen dàwn chiang a nia," a ti leh a, Bawihtei chu nuihin," Bawihte, mangțha aw, a hma thei ang berin ka lo hruai leh ang che," tiin a bye bye a, Bawihtei pawh chuan," Âpa, bye bye," a lo ti ve mai bawk a.



Kei erawh lungawi lo zetin ka ding ngar thung.





*MI DANG CHUNGA BEISEINA SÁNG TAK KAN NEIHA KAN BEISEI ANG AN LO NIH SI LOH HIAN KEIMAHNI KAN NA ȚHÌN A LO NI*