☆LUHLULPA☆ - 19 & 20 By Dingdi Pachuau

☆LUHLULPA☆- 19 By Dingdi Pachuau






Hma lâk dàn tùr ka ngaihtuah a ngai, heti mai maia min ti tùr hi a ni lo. A ruih deuh avàng khân a sawi chhuah miah loh tùr a sawi pawh a ni thei; ni lo, ruih lai tak hian rilrua awm zawng zawng an sawi chhuak țhìn a, thu dik tak an sawi țhìn a ni záwk. A nupui chu țhen a tum a ni ngei ang, chumi-ah chuan inrawlh tumna ka nei hauh lo, Bawihtei min lâksak a tum lai tak hi ka buaipui tùr ber chu a ni.



Hm, min lâksak chu han tum poh ang hmiang, kan inhmachhawn zak zak dâwn tihna a ni mai. Buaina hi ka duh hauh lo, fa avàng phei chuan; mahse, a cho chhuah miau chuan le, theihpatàwp leh a bâkin ka lo bei lêt ve a niang chu.



Khami zàn hnu lamah khân vawiin chhiar telin, a rawn léng leh tawh lo. Boruak chu a dai duk mai a, Bawihtei pawh a rawn phone ngai chuang lo. Ani hi a rawn thawk rip hle dâwn a niang, ka lo inrin lâwk ve chu a ngai ka ti.



Ka nute pawh a thuphung chuan ka hrilh a; mahse, min lo ngaihtuah viau lo se ka duh. He thil hi chu ka hmachhawn ve tùr  ni a, ka fanu nu ka nihna angin kei chauh hian ka bei lêt thei a ni.



Muansanga'n Advocate a hriat kha ka zâwt chiang a, eng emaw thil lo thleng thut thei a nih vàngin ka inrin lâwk a ngai a ni. Muansanga pawh ka hrilh ve lo thei lo, a chhan chu zan tin deuhthawa lo lêng a nih vàngin ka awm dànah min man chhuak lo thei si lo va, ka hrilh ve vek tâk kha.



A thin a rim ve nasa; mahse, tih theih a nei chuang lo. He thilah kher hi chuan inrawlh ve tùrin ka duh lo, ani pawhin a hre chiang, Advocate min biakpui kha a tih theih chu a ni mai.



"Ka thin a rim ngawt mai, tih theih neih ka châk a ni," a ti leh ringawt țhìn.



"Min pui nasa tawh alawm, kan lo inbuatsaih lâwk tawh a, chu bâk chu hunin a la rawn hril ang chu!" ka lo ti a.



"Hmân deuha ka lo hnek lo kha chu ka inchhîr ngawt mai," a rawn ti chhuak ta phawng mai a.



Ka lo en vat a, ka nui sak bawk. A hmel thutak lutuk leh tihngaihna dang hre bawk si lo inseh ruh chuan ka nuih a tiza lo thei lo, a inhmeh lo ka ti bawk si.



"A hmui leh a hmai vûng bûr khawpin i lo hnek lo a ni tiraw?" ka lo ti ve a.



Thutak zet hian," Ka tifiam hauh lo, Mimawii pa a lo ni kher kher a, chuti ni lo se chuan i pasal hlui a nih vàng hrim hrim pawh khân hnek chu ka châk hrim hrim," a ti leh ngal ngal a.



"I hnek na ngawtin ka ring!" tiin a lâp zâwng chuan ka lo lâksak a.



"Ka thinrima ka hnek phawt chuan a na ve khawp ang, tu pa mah hian an dàwl bîk lo ang," a tih chuan ka nui chhuak ta hak hak a.



"Zahngai, zahngai! A hmai zawng zawng vûng vekah ngai ang," ka ti a.



A ngawih vung vung hnuah chuan, "Min ngai naupang chhia viau lo teh!" a ti ta nghut a.



Ka lo chek tlak a.



"Naupang chhia lo ve a!" ka tih chuan," Min titipui dàn kha, a naupang chhia lutuk! Kei aiin kum tlêm tê bâkin i upa lo, inla upa viau suh," a ti leh nghut nghut a.



Nui var varin," Ka inla upa hleinem, nang pawh ka en naupang chhia lo che, chutiang chuan ngai che ila ka ngaizawng tawp lo ang che," ka ti a.



"Min ngai naupang chhia viau mah la ka bialnu i ni tho tho, i tawn ngai loh thil tam tak ka tawntîr ang che. Chuan, ka kalsan ngai dâwn lo bawk che," thutak zet hian a ti leh sup sup a.



"Hmalam hun kan hre si lo va, tûn hun zêl hi sawi zâwk ang. Hlim taka hun hman ka duh, thinrimnate leh huatnate hi dah bova hlim taka hun hman i tum zâwk ang, kan thei ang tiraw?" Nutei thil sawi hre chhuak vang vang chuan ka ti a.



"A țha alawm, kei pawhin ka duh. Chuan, ka kalsan lo ang che ka tih kha chu ka ti tak tak, hun lo la awm tùr mah ni se ka chiang a ni," a ti leh charh charh a.



Nia, hmalam hun dâwn rêng rênga hun hman chu a hahthlâk êm mai. Tuna kan hun hman hi hlim takin ang zêl ila, naktûk chu naktûk hunin lo hril zêl rawh se, mi min ngaih dàn tùr dàwn reng pawh hi ka peih tawh lo, nun hlimna a țha zâwk.



Țhenrual ka kàwm tam lo êm zâwk a, Muansanga nèn kan chanchin pawh hi hria an tam lo tùrah chuan ka ngai. Bungraw lama ka chhuak a nih loh chuan pâwn lamah Muansanga nèn kan inhmu țhin a ni si lo va, ka tam lo khawp mai.



Tlai khat chu *Pâwn lamah hian hruai chhuah ve che ka châk ngawt mai*  tiin message min rawn thawn a.



Engtizia teh thut chu ni maw? A hmain hetiang hi a sawi ngai hauh si lo.



*Engati maw?* tiin ka zâwt lêt a.



Thlalâk pakhat hi min rawn thawn a, nula leh tlangvâl inngaizawng an nih ngei ka ring, kut inkai riala bazâra  an kal dùn lai a lo ni a.



*Hetiang deuh hian kaih che a chhuahpui ve che ka châk, mi hmuha intihtheih ve pawh ka duh alawm* a rawn ti a nih chu!



Ka nuih a va tiza roh tak!



Min rawn call ta a, ka chhàn chuan," Ka ti tak tak a nia! Mi hmuha hruai chhuah chea ka bialnu i ni tih mi zawng zawng hriattîr hi ka duh a ni," a rawn ti leh charh charh a.



"Mi zawng zawng hriattîr kher te chu a," ka  lo ti thung a.



"Engati maw? I duh lo em ni?  Kei chu Aizawl khawlai dungtluana ka bialnu i nih thu au chhuahpui vak vak pawh ka hreh hauh nâng!" a la ti tak deuh deuh a!



A thil sawi chuan min tilâwm viau a ni. Chuti khawp chuan min duh ve chu a ni si a, kei nuthlawi mai mai hi eng hmuhin nge maw min hmuh bîk ni? A thil sawi ka tâna a làwmawmzia hi a hre phâk kher lo ang.



Ka inngaihtuah vang vang hnuah chuan,"A làwmawm lutuk ang; mahse, chutia i au chuan i chau dâwn si a, ka khawngaih ang che. Chu ai chuan kan thlalâk kha IG lamah upload zâwk la, a hahdam deuh ang," nui pah deuh chuan ka ti, ka nui deuh tak nain ka ti tak tho. A hma khân mi min ngaih dàn tùr ka dàwn avàngin ka phal lo kha a ni a, tunah chuan engah mah ka ngai tawh bîk lo ve, mi tih loh dàn lah a ni hek lo.



"I ti...tak tak em!!?" a rawn ti, mak a tih dànah ka thu sawi chu a ring ngam lo a nih ka ring nghâl.



"Tak tak e, i duh phawt chuan," ka lo ti a.



An ina ei kan siam dùn lai thla kha a rawn upload ta tak tak! Ka hmel erawh a sîr zâwnga lâk anih vàngin min hre chhuak hlawmin ka ring hran lo. A caption-ah chuan * The one and only*  tih rawn hmangin likers an tam nghâl țak țak khawp mai. Comments pawh chhiar dul tham a awm, ka chhiar dun dun lehpek!



*Tu nge?*
*Ka va thîk tak!*
*In inhmeh lutuk*
*Chhe lo dùn hle mai!*
*Ni lo, ka lawmpui thei lo che* tih leh * I bialnu chu a chhiat loh hmel hle mai, hlim dùn rawh u* tih chu an comment dàn tlângpui a ni. Pakhat ve thung chuan Angel-i mention-in * hei nèn hian in inhmeh ka ti zâwk* a rawn ti! Hei chu Angel-i duhtu emaw a lamhnai emaw a nih ngei ka ring.



Angel-i'n a hmuh hunah chuan min hre chhuak chiang khawp ang. Hmm, pawi lo, hemi huama ti hi alawm le ka nih le, engtin pawhin ngai rawh se, a pawi lo.



Chuta țang chuan kan pahniha thlalâk chu kâr tin a up ta ziah. Bâkah, a thil duh tihhlawhtlinsak ka duh bawk, chu chu pâwnlama len chhuah dun kha a ni; mahse, Bawihtei a tel ve lo thei dâwn si lo va, bialnu lèn chhuahpui ve êm êm laia bialnu fa hruai tel ve zêl chu, a fuh a ti vak lo ang.



Chuti a nih chuan Bawihtei school kal hlàn a ngai tihna.



Muansanga hnêna kan pahniha lèn chhuah a duh leh duh loh ka zawh chuan mak a ti nasa! Min chhàn nachâng pawh hre lo chuan min en hau ringawt.



"I duh loh chuan-"



"Duh lutuk! Duh lutuk!" a lo ti vawr vawr a, a phûr lutuk chu a inhmeh lo zâwk hial!



Kan lêng chhuak ta ngei. A tìrah chuan ka zak ve deuh hlek a; mahse, a hnuah erawh nuam ka ti ve ta viau, min duh êm êmtu ka bulah a awm a, kei pawhin ka duh viau a ni. Kut inkaia kal kha a naupang chhia ka ti viau a; mahse, a châk tlat si a, ka hnial ta bîk lo va; mahse, ka shâwl te bah chuan ka hliah țât țât tho.



Ina haw nân a la hma deuh si a, ruah rawn sùr vàng erawh chuan car chhûngah kan awm ta reng a, tuna kan dinna hmun hi Durtlang kawng chho zau lai a nih vàngin a hlauhthawnawm loh bâkah vènthàwn  tùr a awm lêm lo va, a ninhlei roh phian a ni; mahse, a ninawm hran lo.



Kan chanchin hi thup ka tum hauh lo, inkawp ve reng ta na na na chu chhûngte pawhin an lo hre ve lo thei lo, Tea'n ka tân a duh loh thu a rawn sawi ta pang mai!



"Khatiang naupang lutuk te chu a, ka chhang chhang leh pawh a rual phâk dâwn em ni? A țhat lohna dang phei chu ka hre rih hauh lo; mahse, a nau lutuk êm mai, in inkawp rei thei chuang lo ang, nula pângngai pawh ni tawh lo tân chuan a țha thei lo, in kum a inthlau lutuk!" a rawn ti ta tlat.



Kan thlalâk an hmu ve lo thei si lo va, chu achhapah, Bawihtei'n a lo sawi âwl lo ve bawk si a; mahse, Tea ber kher hi chuan a duh loh thu a sawi ka ring miah lo asin.



"U Bobby-a pawhin a duh êm êm che a, nang aiin a upain hna țha tak a nei a, a țha daih zâwk, nang pawhin i huat vak loh kha. Bâkah, naupang chhia i ni tawh lo va, ngaihzawng i nei a nih pawhin ngaihzawng mai mai ni lo i neih a ngai, khatiang naupang lutuk kha chu, bànsan mai teh a," a rawn ti leh.



Sawi fiah pawh ka tum chuang lo. Ka nute erawh chuan min ngaihtuah tih ka hria, a chhan chu Victor-a chungchâng, Bawihtei min chhuh a tum thu kha ka hrilh ve tho si a, min hlauhthàwnpui a ni. Lungleia phei mai tùrin min sawihmuh nghe nghe a; mahse, ka nuihsan mai mai, Victor-a vàng mai maiin phei ka tum miah lo.



Muansanga nèn lah chuan kan inkàwm tam telh telh a, hun thâwl kan neih tawh phawt chuan a gym lamah kan awm dùn chawt a, kan pahniha kan inhmuh dun tawh lah chuan tu dang kan ngai lo, hlim takin hun kan hmang a, zànah hi chuan thlalâk thar hi a rawn up ziah. An inah pawh vawi hnih min hruai leh tawh, a nu leh pa pawh ka hmu ve ta. A nu kha chu a hma daih pawhin ka hmu tawh a nih kha, a pa erawh hi chu ka hmuh vawi khatna, an fel dùn khawp mai.



Kan chanchinte chu a thuphungin min zâwt ve a, Muansanga hnên ațangin an hriat vek tawh tho chu ka ring a; mahse, zêp nei lovin ka hrilh leh vek tho, zêp neih chu hrehawm ka ti țhìn.



Zan khat chu Bawihtei puin min rawn phone ve tlat mai, a pawimawh viau a ni ngei ang, Bawihtei lehkha zir lai a ni a, Bathroom-ah ka luhsan rih a.



Victor-a'n nupui a mâk thu leh a thil tum, Bawihtei min chhuhsak a tum thu chu min rawn hrilh nuap nuap a, a ti tak tak dâwn a nih a rin thu leh a hlauhthàwn thu chu a sawi pah bawk a.



Kei pawh chuan ka lo inrin ve tawh thu chu ka hrilh ve mai, Bawihtei avang chuan eng pawh tawn ka inhuam a, tûn dinhmunah chuan ka enkawl ngei a ngaih thu pawh chu ka hrilh nghâl bawk a.



Pawi lo ve, a hun chu a rawn thleng dâwn ta, pumpelh theih ni hek lo le, a tawn tawn kan tawng tawh mai ang chu.



Buaina dang ka tâwk leh ta tlat mai. Hei chu ka rin loh lam daih ațangin a nia, Muansanga pa hnên ațangin a ni.



"Ka fapa duh zâwng hi ka pawmpui lo khât viau a, a duh anga a awm hi ka phalsak țhìn bawk; mahse, in chungchâng hi ka chhui chiang deuh deuh a, ka fapa neih chhun liau liau a nih vàngin ka duh ulukpui khawp mai a, kan fanu rilru tina êm êma kalsantu nupui hlui i lo ni reng a! Hei hi Bawiha leh a uin an hriat chhuah hma hian in inkâr hi titàwp thei la ka duh hle mai," a rawn ti a!





*ZAHAWM TAK LEH DIK TAKA NUNG TÙR HIAN SUM LEH PAI NEIH TAM KHER HI A LO NGAI HAUH LO. CHUTIANG BAWKIN CHAPO TÙR HIAN SUM LEH PAI NEIH TAM KHER A LO NGAI CHUANG BÎK HAUH LO NIA*




(zanin hi a tawi, bonus ang deuha dah ka tum a ni a, chapter thar ni lovin, lu na chung chunga ka type avàngin)




☆LUHLULPA☆ - 20 By Dingdi Pachuau




A va mak êm! Victor-a bialnu hlui chu Muansanga farnu a ni a, na taka siamin a kalsan tihna a ni àwm a, a pa sawi dàn hian.  Muansanga hian a farnu chanchin min hrilh ngai hauh lo, a nei tih pawh ka hriat miah loh chu.



Tea'n Muansanga min duh lohpui hi chu ka pawm dam thei mai ang a; mahse, Muansanga pa thil sawi hi ka namnùl thei dâwn em ni? Engah mah ngai lovin a fapa hi ka kawp zêl thei dâwn êm ni le? Ka rilru a buai ve ta map mai, lo hre hma ni ila, rilru ka pêk ve tak tak hma te khân a pa hian min lo hrilh daih tawh ni se...



Zàna Muansanga rawn lêng chu pângngai takin ka lo bia a, rilrua vei nei rùn angin ka awm duh lo. Min en loh kâr, Bawihtei nèn an inchhaih laite chuan ngun takin ka lo en kar a, kan la inkawp rei fahran lo; mahse, ka rilru ka lo pe nasa ve roh tawh êm a ni. A hlim hmel duhawm leh a chânga nui leh suk țhin te, a mitmeng nung ser sawr leh a mit hmul dum buk zette chu ka thlîr reng, ka kalsan thei dâwn em ni?



"Min en zo tawh em?" a rawn ti sar sar.



Ka phu deuh zawk, mit la lo lêkin rilrua thil dang ngaihtuah chungin ka lo en reng niin, nui lui sakin ka hawi sawn ta nghâl a.



"A pawi lo, nuam ka ti alawm," a tih leh sar sar tâkah chuan ka tho vat a, thingpui lum tùrin choka lam ka pan phei a.



"Ka pain i nambar min dïl a, a rawn phone che tiraw? Eng nge a sawi a?" a rawn ti duah, min rawn zui niin.



"'Ka fapa duatlai hi nang nuthlawi mai mai hian lo hnaih hauh suh' a rawn ti a," ka tih chuan a nui hawk a.



"Fiamthu i lo thiam reuh hle mai!"



"A ti tak tak alawm! Ka kalsan thei dâwn si lo che a, ka chhâng lo tawp," ka ti leh a.



"Ka nu leh pate chuan ka duh apiang chu min duhpui a ni mai, an hmu tawh bawk che a, an duh lohna che an sawi hauh lo. Chuan, nuthlawi tih kha sawi chhuak tawh suh, i indah hniam țhìn hi ka duh lo, indah hniam tawh suh," tiin ka kut chu a rawn tawk a.



"Ka nihna a ni alawm," ka lo ti thung a.



"I nihna pawh ni mah se, indah hniamna rilru i neih kha chu paih bo daih rawh. Paih bo thei tùrin puih che ka duh bawk, i lamah ka țang tih hre reng la, i hmaah eng thil pawh thleng se i kiangah ka awm reng ang tih hria la ka duh a ni," a ti leh sup sup a.



"Aw le, ka hria ang, ka lâwm e," ka ti a.



"Mi-ah buai lo la, mi dang en lovin keimah chauh hi min en la ka duh a ni," a tih leh chuan nui chung hian," Nichínah pawh nangmah chauh a nih kha ka en che," ka tih chuan," Um, khatiang khân min en reng rawh, nuam ka ti ka tih tawh kha. Min en  khân chakna thar min pe zêl a ni tih hre reng bawk rawh aw," a ti leh duah a.



Ani pawh hi heti hi a ni si a, a pa thil sawi kha ka tihlawhtling theiin ka ring lo a ni, kan induh tawn tawh hle si a, nunhlui vàng mai mai hian ka kalsan thei ngût lovang a? Hrehawm ve tak chu a ni.



Bawihtei ka kuah muhìl a, haw a la tum loh avàng chuan Bawihtei chu ka mut a, țhutthlèngah innnghèng rial chuan kan țhu a, ka kut chu a khàl nauh nauh reng a.



An chhûngkaw chanchin zawh chian ka duh avàng chuan," Vawiinah ka țhiannu Champhai lam mi nèn kan inhmu a, a unaute a rawn kan kual ni àwm tak a ni. An unau chu 8 lai niin, an puitling vek tawh sia, a nawm hmèl ka ti tak tak a ni, unau tam deuh neih ve ka châk, nang i châk ve em?" ka ti phawt a.



"Châk tho, châk lo tho."



"Nangmah chauh i ni sia, i khua a har duh àwm e, kei chu nau Tea ka la nei tal a," ka ti leh a.



"U hmeichhia ka nei ve tho alawm; mahse, kan inhmuh lohna a rei tawh a, hetah a awm ngai bawk si lo nèn, u ka nei a ni tih pawh hi ka theihnghilh lek lek țhìn," a ti sup a.



"A ni maw? Khawiah nge a awm a? Pasal a nei tawh em ni?" tiin ka lo zâwt vat a.



"Nei lo ve, Goa-ah a awm, a lo haw ngai lo," a lo ti leh mai a.



"A nih tak chu a. In inang ve em? Kei chu ka nau Tea nèn kha chuan min hmuh dun tawh kha, kan inang ve riau a, unau nge nge chu," ka ti leh a.



"Kan inang pawh ka ti lo. Kan chhang a khât bawk si, high school ka kal țan tirh vêl lai pawhin ani chu a nula tawh! Tunah hian kum 33 vêl a ni tawh ang chu," a ti leh a.



"A nih tak chu, in inthlau ve hle mai! A nih leh, 'tinge a lo haw ngai loh a?" ka tih chuan,"Lo haw chhoh hi a duh lo tawp a ni mai. Ka pate pawhin lo haw chho tùr chuan an ti ve țhin; mahse, a duh lo miau si a, kan inhmu khât ta a nih hi. Biak erawh kan inbe tawn reng tho a," a ti leh a.



"I ngai ve țhìn em? Hmu tùrin in kal țhìn tak ang chu maw le! Ka hmu ve châk reuh mang e," Victor-a mitthla pah chuan ka ti a.



"Um, kal zauh zauh. Kei chu ka kal ve vak ngai lo, ka u chu a bialpa nèn an ințhen rilru nat lutuk vàngin a â lo chauh a ni ber, an ințhen ti ila, a bialpa chuan mualpho takin a țhen a ni zâwk ang chu; mahse, a rei tawh hle si a, a theihnghilh ve daih tawh tho chuan ka ring," a ti leh a.



Ani hi chuan  a u bialpa hlui chu Victor-a a ni tih a hre lo a nih hmèl, hre ta se, engtin nge a ngaih ang? A u rilru na taka siamtu nupui hlui ka ni tih hre ta se, tuna ka chunga rilru a put ang hi a la pu tho ang em? A u dinhmun ka luah daih si a.



Bungrua ka lam a, vawiin chu vawi thum lai ka thiar lehpek. Ka vawi thumna ka haw chu kan in kawta nu pakhat lo ding ka hmuh chuan min tiphu zawk mai!



Scooty ațanga bungrua ka hlângthla chu ngun zet hian min lo en a, kei erawh chuan ka en duh lo lui deuh tlat a, min lo nghâk a nih chu ring mah ila ka ngaihven lo lui tlat a.



"Zonun, biak lawk che ka duh," a rawn ti ta chiah.



Victor-a nu, Bawihtei pi a ni.



Inah chuan kan inzui lût a, hawihhàwm chhuahin țhutna ka kawhhmuh a, a țhut hma chuan a hawi kual nasa kher mai.



"Lo țhu rawh, thingpui ka'n lum ang e," ka tih chuan," Ka in duh lo, biak che ka duh vànga lo kal ka ni," a lo ti
deuh tlat. A inkuangkuah thân a, a mit fing zet chuan min en kuau bawk a.



A țha alawm, lumsak ka châk êm êm bîk lo ve, a thil sawi chu ngaithla poh ang hmiang.



"Eng thil nge ni ta?" tiin țhutthlèngah chuan ka țhu lui ve ngat a, ani erawh a ding tlat thung.



"Engvàngin nge mi nupa chungchângah i lo inrawlh a?" a tih chuan makti zet hian ka en a.



"Hriat loh der tum miah suh, duh lovin a chhuahsan tawh che a, nupui țha tak a nei leh tawh a. Chu chuan i pawi a sawi vàng em ni an inkârah i fanu hi i lo rawlh ve chhên ni? I fanu hi i châwm thei lo a nih chuan kan bulah rawn sawi mai ta che," a ri ta bawrh bawrh a.



A thil sawi dàn leh a thu lâk dan, a ngaih dàn chu mak ka tih êm avàngin ka en tlawk tlawk ringawt, sawi tùr pawh min tihre lo. A fapate nupa inkâra inrawlha buaina siamah min ngai tihna a ni si a, chu pawh Bawihtei hmang lehnghâlin! A mak êm asin.



"I enkawl zo lo a nih chuan kan inah chuan rawn dah mai rawh, a pain a châwm thei alawm, an nupa inkâr tichhe kher lovin rawn dah mai tùr a nia, i thil tih pawizia hi i hria em? " a ti leh mawlh mawlh a.



"Eng thil maw ka tih a?" ka ti chhuak țâwk mai.



"I fanu an inkârah i rawn rawlh lui tlat a, fanu nge nge chu a thlang zâwk a nih kha. Nupui dang a nei tawh tih hre rengin phubâ i fanu hmangin rawn lâk i tum tlat a, i tum chu i tihlawhtling ta phawt chu a nia tiraw? I rilru hi a lo chhe takzet a ni," a ti leh ta phiar phiar a.



Ka inseh ruh nasa. A fapa nèn kan ințhen tawh hnuah pawh min la tham lovin min la hmusit hle mai!



"Engtikawng mahin phuba lâk ka tum ngai lo, i hre sual a nih chu. Min chhuahsan tawhtu hnên lam hi hawi ka tum ngai lo bawk, ka fanu pawh a pain a rawn lam chauhin ka rawn kaltîr țhìn. Ka fanu hi ka châwm thei a, ka chàwm theih nân ka theihtâwp ka chhuah bawk. Amah vànga an nupa an lo ințhen phah a nih chuan pawi ka ti; mahse, chu chu a chhan a nih ka ring chuang hauh lo," ka lo ti ve thung a.



"Nang hian i fanu hi i rawn tawktarh tlat miau alawm. A duh lova a kalsan tawh che u chuan rawn kaltîr tawh mah ta che. A pa țanpuina tel lova i châwm thei a nih bawk chuan ka hmuh theihah i fanu hi rawn lantîr tawh suh, a pa i han zar lunglèntîr leh tê tê a, i beisei phâk tùr chin hi hre teh. Hman deuh tawha Miss i nih vena kha i la chhuang em ni?" ati leh ta phiar phiar mai.



Ka rilru a tihnat êm avàng chuan țawng chhuak thei lovin ka ngawi reng. He ramhuai pitar hmaah hian țah ka duh lo, ka mittui tla hi a hmu tùr a ni lo, awmzia awm lo mah se Bawihtei pi a lo ni hi pawi ka ti hle tawh a ni.



"Bialpa naupang tê i nei an ti che a," tiin nui lui tih hriat zet hian, za lo tak hian a nui hak hak a.



"Mak pawh ka ti lo. Hei, chance neih nân pawh a remchàn khawp-" a tih lai chuan," Khawngaih takin, i sawi duh i sawi zawh tawh chuan i chhuak thei tawh ang em?" ka ti ta charh, vïn lo tùrin ka insûm, ka inpet ruh nasa a ni.



"Thu dik a lo nih chiah chu! Hahah, ka awm rei duh hauh lo. I fanu kha lo enkawl țha viau mai teh, chu chu ka rawn hrilh che a nih hi," tiin a hawi kual leh a, chutah," Ka sawi chu, i fanu kha a pa hnêna rawn awmtîr i duh lo a nih chuan vêng țha tawh ang che," a ti hmak a, a chhuak ta nghâl a, a pên khoh khoh ri a zuih ral hnu thleng pawhin ka țhut dàn ngai rengin ka țhu.



Buaina hi a mal malin a lo thleng lo va, a huhovin a lo thleng zut zut a nih àwm hi.



Ramhuai pitar kha Bawihtei pi a ni si, a fapain a lo chhùn nasa a nih kha. Nufa nge nge, a chhe lamah chuan an lo inchhùn takzet a ni. A thil sawi chu ngaihtuah chhunzawm loh tuma ka lu ka thin nar nar lai chuan pâwn lam ațang chuan," Âma? Âma..?" tiin Bawihtei chuan min rawn ko vau vau a.



Inthing harhin ka ding chhuak vat, thaw hawk hawkin nui hmel ka pu nghâl bawk, Bawihtei hmuh laia thinrim hmel leh lungawi lo hmel put ka duh lo.



"Âma, àpi ka hmu a, kan inah hian a lo kal ve em?" min rawn en chho hâ pah chuan a ti a.



"Aw, a rawn kal zawk a nih kha. I ril a țâm em? Inthlâk phawt la aw?" tiin room lamah chuan ka kai lút ta nghâl a.



Ka buaina chu ngaihtuah loh ka tum a, zàna bungrua ka thliar hran laite chuan ka rilru pêk hrâm hrâm ka tum; mahse, a har lutuk. Ka rilru ka pêk theih loh êm avàng chuan ka tisual nawk nawk rêng a, ka thil tih chu a sâwt lo takzet a ni.



"Hetianga i buaite chuan min rawn call ve mai țhìn la?"



A lo luh lai pawh ka hre lo, he thluak hian zanin chu hna a thawk țha thei mawlh lo.



"I lo luh lai ka lo hre miah lo," ka ti ta ringawt a.



"Zanin tûn ang hunah hi chuan Lalbuaii dik tak i ni, i buai ţhin tih chu hre tho mah ila rawn hmuh hrâm hrâm che ka duh țhin si a," a rawn ti leh sup sup a.



"Lo țhu rawh, thingpui-"



"A ngai lo, ka duh chuan ka inlum mai thei alawm, i thil tih lai kha ti rawh," a lo ti thung a, ka ding chhuak tùr chu min rawn nem țhu leh a.



"Ti rawh, Mimawii kàwm pahin thingpui chu ka lo inlum mai ang," tiin min nuih suk a, Bawihtei'n min rawn en loh lai chuan min rawn fâwp zawk a.



"Chimawm!" ka lo ti hlak a.



"Chutin min ti hauh suh, ka fel êm hi. Thingpui pawh ka inlum dâwn a nia," tiin a nui deuh suk a.



"Fel lutuk...over," ka ti leh sap kher.



"Ver... kher lo," a lo ti leh. Ka chhâng duh tawh lo, kan inchhâng tàwp thei lo palh ang.



"Taka, thil sawi chhuah kha a țha a niang, kumin Krismas chu ka u kha a rawn haw ve dâwn teh tlat a nih chu! I hnên khera thil sawi chhuah hi a țha a nih ka ring ta viau mai," a ti leh a.



A ni maw!?? Chuti a nih chuan a pa thil min hrilh kha engtin nge ni ta ang le?



"Chutianga i rin chuan min hrilh zêl rawh," ka lo ti a.



A țawng leh tawh rih lo va, kei pawhin ka thil tih lai chu ka tihzawm leh char char a.



Bawihtei nèn chuan an inchhaih nui ar ar a, ka va en deuh reng a, chutah, lu thing deuh nar nar chuan
hawi sawnin, ka thil tih lai chu ka ti leh char char a.



"Nula hausa i nia, nau awmah min chhawr mai la, i buai theih theih nèn," a rawn ti a.



Ka lo nui hak phawt a, chutah,"Ka chhawr che chuan kan nufain ei tur kan nei nâng, i hlawhah kan insêngso zo vek dâwn asin," ka ti a.



"Ka hlawh chuan ka châwm lêt dâwn che u alawm," a tih chuan kan nui ve ve.



"Ti ta daih ila, ka u bialpa hming an sawi leh Mimawii pa hming hi a inang chiah maw le!"






*KA THIL TIH SUAL CHU MI DANG HNÊNAH NI LOVIN KEIMAH MIN HRILH RAWH, A CHHAN CHU KA TIHDIK LOH SIAM ȚHA THEITU CHU KEIMAH KA NI, MI DANG NI LOVIN*




(Dah loh ai tak tak, ka chhiat a chhuak a, phone pawh ka khawih thei mang lo😔)