☆LUHLULPA☆ - 3 & 4 By Dingdi Pachuau

☆LUHLULPA☆ - 3 By Dingdi Pachuau




Ka nute chu an awm rei thei lo, an awm chhûng erawh chu hlâwk takin ka hmang. Pawimawh zuala ka chhuahna tùrah ka chhuak a, Bawihtei an lo awm thei si a, bazàrahte ka kal kual tâk chiam kha.



An awm chhûng chuan Bawihtei chuan a pa a sawi lang miah lo va, ka làwm viau rualin tlai khat chu a rawn lang tlat, kan phone hauh si lo va. Ka nute nèn kan lo awm sia, a zak ve deuh chuan ka ring.



Mahse, ka nute chuan an lo be bawrh bawrh a, Bawihtei a awm ve vàng nge chu ka hre lo, țha takin pângngai takin an lo bia. Nia, hun a kal tam ve tawh a, keimah ber hi insiam țhat ngai chu ka nih hmel, mi dang hi chuan pângngai takin an be thei vek si a. Amah vàng hian mipa min be ve deuhtute ka ngei phah a, tún thleng hian mipa biak pawh hi ka tui loh phah rêng a ni. Min beisei deuhtu nia ka hriatte phei chu ka be țha ngai lo khawp mai.



Ka nute chuan an haw dâwnah,"Chhuah i ngai țhìn si a, i tân kal kual hrep a buaithlâk," tiin Scooty leina tùr min pe a, mamawh viau mah ila chutia a thlàwna min han pe ngawt mai chu ka tlàwmngai ve a, ka hnial ve nasa.



Mahse, ka pa chuan," I nuin a phal mahte chuan la mai mai rawh, i  hausak hunah i nu chu i la rùl leh mai dâwn nia," nui chung hian a ti a.



Ka nu chuan,"A thlàwn ang zâwnga i dawng duh lo a nih pawhin in hman hunah in nufain in rawn zin phei ve ang a, kâr khat vêl riak tùrin. Dàwr i rawn nghâk ve ang a, chuan, min rùl angah ka lo ngai mai ang," a lo ti ve a.



"Âma nèn kan rawn zin ang maw? Âma, Àpite hnênah chuan kal ve nghâl ila?" Bawihtei chuan a lo ti ve a.



"Um, kan hman hmasak berah kan phei ve ang," a lu tuaisak pah chuan ka ti a.



Scooty chu ka lei ve ta, a va tihzia tak! Rei lo tê chhúngin ka duhna hmun ka thleng zung zung thei ta bawk a, hun âwl pawh ka nei tam ve thei ta.



Ka in luahna piah deuh lawkah chuan pre-school a awm a, Bawihtei pawh lût rual a nih ve tawh avàngin ka luhtîr ve ta bawk. Hnaih viau mah ila motor-in an rawn lamin an rawn dah kher țhìn, a zia takzet.



Online shopping pawh man tlâwm ațangin man to thlengin ka tihbelh a, group lamah nu hausa tak tak an tam avàngin man to lam chu duh an tam ta phian mai, man to lamah phei chuan a tlâwm lam aiin hlêp a țha lehnghâl a, keini nufa ang lo takin sym an nei si, 'ka remchâng lo' tih an nei si lo va, min chah țawk țawk ta mai.



Ka tih hrâm hrâmna chuan hlawhtlinna min pe țan e. Kan nufa in luah man leh ei khawp min tum hneh ta khawp mai a, thla thum a liam meuh chuan bank-ah pawh ka dah lût ka dah lût ve ta mai.



"I sumdàwnna kha i hlâwkpui àwm reuh hle mai."



An pafa chuan chhuatah țhuin Bawihtei chu barbie a khalhpui a ni!



"A zia ve țan tawh e," ti ringawtin ka chhâng.



"A țhat chu. Nakkum lam chu a school fee zawng zawng ka lo tumsak ve tawh ang, kumin pawh a tìrah min hrilh ve la chuan tum vek ka hnial loh tehlul nèn!" a ti leh a.



Ni lo ve, ka fanu hi ka châwm thei alawm. Ka chàwm theihna turin nasa takin ka bei ve réng bawk a.



"A ngai lo, a mamawh chu ka tihsak ve thei e," ka ti ve thung.



Bawihtei chu a zunpui a, bathroom ațanga an lo chhuah chuan Bawihtei hnênah chuan," Bawihte, lo lêng la, chaw i ei pah nghâl ang a ?" tiin a zâwt a.



"Aw, ka duh lutuk!"



Victor-a chu Bawihtei hmuh loh lai chuan ka melh deuh vak a, school a kài ve tawh avàngin zàn lamah hi chuan chhuahtîr ka phal lo tih ka sawi a hre reng tawh si a, ka ngei ru deuh a ni.



Bawihtei en lehin," Bawihte, zàn lamah hi chuan lehkha zir a țha asin le," dam dapa ka tih chuan," Âpain min zirtîr mai ang a, tiraw Âpa?" tiin a pa a lo en daih thung.



"Ni e, kan zir dâwn nia."



Rem chu ti chiah lo mah ila Bawihtei tihlunghnùr ka duh lo va, ka phal ve ta mai. Bawihtei hnënah chuan awm dan mawite chu ka hrilh țha leh a, a pi leh pu bula awm dàn tùr leh chaw ei huna awm dàn tùr thleng chuan. Victor-a hnênah erawh," Chaw ei khamah rei awm lo se, i rawn dah thuai dâwn nia," ka ti thung.



An chhuah hnu chuan ka ruak huai maiin ka hria. Bawihtei nèn kan awm dùn tam tawh lutuk a, a tel lo chuan ka kim lo huai tawh tlat a ni.



Exer ka la a, keimah chauh eitu tùr ka nih dâwn avàngin chaw ka chhùm peih lo. Ei tùr erawh ka siam hlek, ei loh ringawt chu ka duh bîk lo.



Ka ei hmain thil order chu ka en leh rih a, order tùr a lo tam leh tawh khawp mai. A châng chuan mak ka ti ve deuh țhìn, engtin nge an hman sèn aw ka ti, kâr tin a thar min chah deuh reng mai bawk si a, an hmang zo hman àwm tawp si lo.



IG lamah ka lût leh a, țhiante thlalâk upload chu ka han en zung zung a, message lam  ka check leh a, Muansanga message pawh a lo awm leh tawh! Kha pa tê kha a la nau viau  nain a hriatna kha a țhat hmel riau mai, vawi khat hmuhna ațangin min hriain ka hming pawhin min ko thei nghâl a nia.



*In dam țha em?* tih tê hi a lo ni a, Muansanga message a ni.



*Aw, dam țha e, kan lâwm e😀* tiin ka chhâng.



*Ads kan shoot dùn thei kha ka lâwm hle a ni*  a rawn ti leh.



*Kei pawh le*  ka ti ve leh.



A reh ta vang vang. Ka nui sak, nuthlawi ka nih hnuah higher school naupang nèn dàwr kan han fak dùn zar zar a nia, nuihzatthlâk lama lâk chuan a nuihzatthlâk; mahse, ka vànnei viau e. Miin min la rawn sâwm ve duh a, làwm viau tùr ka ni.



Tûn hnai hian min sâwmtu ka hmu ve zauh zauh. Min duhsaka pârt-time a hna thawh tùr pawh min sihhmuh nual bawk; mahse, chu kher chu ka hnial lo thei lo. Bawihtei ka kalsan thei lo, ani hi ka hna hmasa ber tùr a ni si a, ani ngaihthah thei hi ka ni lo.



Zàn dâr 7 a ni a, Bawihtei pawh a lo haw țêp tawh ang chu maw, lehkha an inzirtîr kha chu ka ring hauh lo. Nuam a ti leh dâwn si a, a duh duh dànin a awm ang a, lehkha lam kha chu a hrechangin ka ring lo.



Dâr 8 a ri thuak ta, a la rawn haw lo. Ka thin a rim țûn mai, ka phone ang a, min chhàn loh chuan hruai tùrin ka inkhalh chhuak ang.  An ina kal chu hreh viau mah ila thil țûl tawp a ni tlat. Ka hruai haw ang, a pa pawh ni mah se chaw ei tùr pawha a hruai chhuah ka phal tawh lo ang.



Thinrim rilru zet chuan a number chu hmet chhuakin ka call ta, a rawn chhâng har lo ve.



"Bawihtei kha i rawn dah loh chuan ka rawn hruai dâwn a nia," lungawi lo zet hian ka ti chang fak a.



"Kan rawn tlân mêk."



A hmet thi nghâl hmak a nih chu, thinrim zetin ka thaw hawk. A thil tih dàn chuh, min tham lo hle mai.



An rawn thlen chuan Bawihtei chu a lo la meng a, chuti chu ni lo se chuan thinrim takin ka àn khum ngei ang. Bawihtei hriat laia inhauh ka duh loh vàng chauhin ka insúm.



"A pu nèn an inkàwm rei phian a."



"Bawihte, lehkha chu in zir em?" tia ka zawh chuan,"Âma, àpu nèn kan insakawr chung chuan a, a nuam lutuk," hlim tih hriat tak hian a lo ti sar sar a.



"A va nuam dâwn ve! A nih, awm dàn tùr ka hrilh che kha i zàwm em?" ka ti leh a.



"Zoni, naupang mai a la nih hi," tiin Victor-a chuan min lo khap vat a.



Victor-a melh râm pah chuan," Ka hria, naupang mai a la nih laia ka zirtîr lohin a puitlin hunah em ni ka hrilh ang?" ka ti ta khauh a.



Bawihtei chuan," Âma, ka sual miah lo, àpi leh àpu thu ka âwih," a lo ti ve a.



"A țhat chu, chuan, ka tel lo chuan mi inah chaw ei tawh loh tùr aw, school i kal tawh a, lehkha zir a țûl tawh si a," Victor-a hriat thiam theih ngei tùr chuan ka ti a.



"Aw le."



Victor-a erawh a hmêlah chuan a lungawi vak lo tih a hriat theih, pawi chai lo. Min duh lovin a chhuak tawh a, tûn ataka a fanu ngaihven thar leh anga a rawn awm hi ka duh lêm lo.



Victor-a haw hnuah chuan lehkha ka zirtîr tawh lo, a tlai tawh si, naktûkah zîng kârah ka enpui thuak thuak mai ang.


*******


"Nuthlawi nih hi i ngeih,"nui kar kar chung hian Nutei chuan a rawn ti a.



"Min hmusit viau lo mai teh, hmuhsit tlâk pawh ka nih loh hi," tiin ka chhâng a



"TV-ah ka hmu țhìn che alawm, i chhe lo tawp. Inhmuh hlàn a nghahhlelhawm ka ti takzet, ngawi tak rawh, kan pa nèn kan rawn zin dâwn alawm. Kan inhmu nasa ang," a rawn ti leh a.



"Lo kal tak teh u, Laltei lah hi a reh thei a nia; mahse, chhangchhenu a nih vàng hian tlêmin ka hre thiam deuh, zin chhuah lam a hman lo ropui mai tawh si a, nang tal hi chuan min lo tlawh vang vang i bâ a ni," ka ti ve a.



"Dâwn lutuk! In nufa ei tùr thil tam tâwk ka rawn ken ang che u," nui hawk hawk chung hian a rawn ti ve leh a, chutah," Țhiannu chhe lo leh lâr ka nei bawk che sia, i duh thil tihsak hi chu i phû mawlh mawlh e," a rawn ti leh duah a.



An rawn phei meuh chuan kan fridge chu chawhmeh leh ei tùr hlîrin a khat a ni mai. Mi awmthei nupa an ni a, fa an la neih theih loh avàngin fa an awt țhin a, Bawihtei pawh an duat phah viau. Bawihtei duh zâwng tùr nia an hriat an rawn leisak țeuh bawk, zahthlâk zâwk hian.



Kan inah erawh an rawn innghat lo, chaw erawh ka sàwm luih țàng țáng avàngin an ei hrâm, sa an ngainat lêm loh avàngin ei tùr eng eng emaw ka siamsak ve dûm kha.



Nutei chuan ka sumdàwnna chungchâng chu min zâwt a, ka hlâwk chho ve țan tih ka hrilh chuan rang zet hian," Dàwr siam ve rawh, i thil tih hi i bànsan chuang lo ang a," a lo ti vat a.



"Bawihtei hi han lian deuh phawt se," ka tih chuan," Ni e, fate hi dah pawimawh hmasak ber tùr a ni, fate aia pawimawh an awm hleinem," a lo ti ve a, chulam chu kan sawi thui ta lo.



"Victor-a hi eng nge a chanchin zêl?" a ti leh a.



"Ka hre lo, ka lo ngaihven teh chiam lo va," ka lo ti mai a.



"Bawihtei hi a rawn tlawh ve fo chuan ka ring a, a school fee lamte, a mamawhte a rawn zâwt ve țhin che em?" a ti leh a.



"A ngai lo, ka châwm thei alawm," ka lo ti leh a.



"Chu pa mai mai chuh! Fa nei tlâk pawh a nih niau loh chu. Fa awt êm êm kan awm laiin fa neia ngaihsak leh miah si lo an awm leh tho si, kan va inang lo tak aw..!!" a ti vang vang a.



"A rawn tlawh fo alawm, a ngaihsak reng," tiin Victor-a thlavãng chu ka lo hauhsak ve thung a.


*******


Muansanga nèn pawh kan inhmu ta zauh zauh, bungraw la tùra ka chhuah țhin hian a ni a. Naupang higher school la zir rual lek emaw ka tih kha college a lo chhuak ve țêp tawh niin! Kan inhmuh lah hian min lo be hmasa ziah lehnghâl, a bengvâr roh tak tak a ni.



"Mimàwii a dam țha em? Hmuh leh a châkawm reuh ngawt mai."



Bawihtei a lo la hre ve reng chu mak ka ti, a làwmawm ka ti bawk.



"Aw dam țha e, school a kai ve tawh asin," nui chung hian ka ti a.



"A ni maw? Hmuh leh ka châk reuh ngawt mai, hmelțha si, fel reuh bawk si, titipui lah a nuam reuh bawk si, ka mitthlaah ka hmu reng țhin," a ti leh . Ka fanu a fakna ri chuan min tihhlimzia a hre kher lo maithei; mahse, nu thinlung hi a hlim takzet.



"Ani pawhin a hmu châk ngawt ang che," nui sâng hian ka ti a.



"Ka rawn hmu thei ang em?"



A rawn kal tak tak! Khami ni kan inbiak ni khân phone number min dîl a, a chhan chu kan in luah a rawn hmuh theih loh thulhah a ti a ni; mahse, min rawn phone ngai miah lovin a rawn hmu thiam mai.



Bawihtei chuan a lo hre chiang vak tawh lo va; mahse, kan thlalâkte an inhmuh  hnuah chuan a hre chhuak leh ta mai, naupang chhaih thiam tak a lo ni roh a, a hnu deuhah phei chuan Bawihtei chuan school-a an thil zirte chu a hrilh sârh sârh a, ani lahin phûr zet zetin zawhna a lo zâwt zêl, a kàwm thiam tak tak a ni!



Thingpui ka siamsak a, ka va pêk lai chuan Bawihtei chuan," Au Muan, sikuti i nei ve em?" a lo ti lar lar a.



An va inchhang khât ve leh!



"Sikuti chu ka nei lo va, bike ka nei thung a. I chuang châk em?" a lo ti a.



"Châk lutuk! Ápain motor-in min phur țhìn a, Âma chuan sikuti-in. Bike chuan min phur ve rawh aw," a lo ti leh a.



 "Âmain a phal phawt chuan aw."



A rawn kal ta zauh zauh mai; mahse, tlai lamah Bawihtei school bàn hnu lamah chauh zêl a ni, a rawn kal ni. Kan inbe vak ngai lo va, Bawihtei nèn erawh chuan an inbe bawrh bawrh thung a, min zah ve deuh nge ni te ka ti mai mai, ka bulah chuan a țawng ve vak lêm lo. Bawihtei nèn chuan an inkàwm ngeih  hle mai a, a chângin ui leh zawhte lemahte changin, a chângin an inkhualtelem bawk a, Bawihtei thu thu chuan zu awm peih a! Kei chuan thil pawimawh dang tia ka ngaihsak vak hman loh châng pawhin an titi chu ka ngaithla ru leh zauh zauh țhin, ka nuih an tiza thei lutuk!



Vawi khat pawh Bawihtei chu zirtîrtu lemah changin Muansanga chu school naupang a ni thung a, hla ka zirtîr e tiin an zai ruai ruai mai, awm hmunah ka lo nui char char, a hnuah phei chuan ka nui chhuak ta nghe nghe, ka insûm zo thlâwt lo.



Victor-a pawhin nupui a nei dâwn niin an sawi, a nupui tùr chu nula senior, lecturer a ni àwm e, pawi pawh ka ti teh chiam lo; mahse, Bawihtei chu ka ngaihtuah ve deuh hlek thung. A pain nupui dang a nei dâwn a nih chuan a lakah a pangchang vak thei tawh dâwn si lo va, fate an neih hunah phei chuan a nupuiin a lo ngaithei vak tawh lo emaw a ni ang a...



Hlim takin innei rawh se. Keimah anga hna thawh nei lo a ni lo ang a, a nu pawhin a làwm thei deuh tawh ang chu. Chhúngkaw hlim lohna thlentu nih râpthlâkzia tem ve lo teh se.



Nutei leh Laltei pawhin min rawn fiam a,' Ràl i ngai a nih kha' tiin, an rawn nui vak vak maw le! Mi mâwl pahnih tak hi chuh!



Muansanga rawn lêng pawhin," I rilru a na ngawt ang a?" tin min fiam ve sup mai. He pa roh hi, a lo hre ve a ni chiang mai.



Nui chung hian," Zàn pawh ka mu thei hleinem," ka lo ti a, âwih loh hmel zet hian min en reng a.



"Nupui a neihsan thei che a nih chuan nang pawh hmalam pana i kal zêl theih a ngai dâwn a nih chu."



Makti zet hian ka en ve ta thung. A la naupan nèn, chutianga min han hrilh ve mai leh chutiang țawngkam a ka ațanga a rawn chhuak chu mak ka ti a ni.



"Beisei awm tawh lo beisei tlat rual i ni tawh lo bawk a-"



Room ațanga Bawihtei lo chhuak chuan," Au Muan, naktûkah kan intlànsiak dâwn asin. Min lo en ve la?" a rawn tih tâk avàngin a thil sawi chu a sawi zawm thei ta lo va.



"Miss-te, Sir-te'n min lo hau palh ang," tiin a chhâng a, ani chuan," Âma pawh a lo kal dáwn alawm, nang pawh ka țhian i nia, an phal viau ang," a ti leh barh barh a.



Zànah mut hmunah Muansanga thil sawi chu ka ngaihtuah zui rauh rauh a, Victor-a hi beisei rengah min la ngai a nih ka ring. Ka beisei tawh loh tehlul nèn, min duh tawh lova kan nufaa min chhuahsan theitu hi beisei ka tum tawh lo hrim hrim. Bâkah, ngaihzâwng neiha pasal neih pawh ka tum tawh hran lo, ka hmalam hun chu ka sawi thei miah lo nain hei hi ka tum dàn mai a nia. Bawihtei hi ka enkawl puitling ang a, ani hi ka engkim tùr chu a ni mai.






*NIHLIAP HIAN RUAHSÛR TITÀWP THEI LO MAH SE RUAHSÛR LAKAH HUL PHIANGIN MIN DINTÎR ȚHIN. CHUTIANG BAWK CHUAN INRINTÂWKNA HIAN HLAWHTLINNA RAWN THLEN LO MAH SE KAN NUNA CHONA KAN HMACHHAWN KAWNGAH THIL TIHTHEIHNA, CHAKNA MIN PE ȚHIN.




☆LUHLULPA☆ - 4 By Dingdi Pachuau





Victor-a'n Bawihtei a rawn tlawh chuan nupui a nei dâwn tih a sawi chhuak miah lo. Pângngai takin a hmaa a awm ang takin a awm mai, kei lahin zawh ka tum hran hek lo. A sawi chhuak lo a nih chuan sawi lan ka tum kher lo.



Bawihtei pawhin a hma ang chiahin a lo la làwm a, hlim țê rai rai chungin a lo pawm leh chat mai; mahse, vawiin chu a titi a dang ta deuh, ka rin loh deuhin Muansanga chanchin a sawi chhuak ta tlat.



"Âpa, Au Muana nèn kan inkàwm țhin a, àpu ang mai khân ka sakawrah a țang țhìn a," tiin a hrilh seuh seuh a.



"Tu nge Au Muana chu?" a pa chuan a lo ti vat.



"Au Muana chu maw, Au Muana a ni mai. Ka țhianpa a nia, Âma țhianpa a ni bawk. Barbie leh teddy bear kan khàl țhin bawk a, a bike-ah pawh min phur dâwn asin,"phûr tih hriat zet hian a ti leh a.



En lo mah ila Victor-a chuan min rawn en phei ngei tih ka hria; mahse, ka en duh tlat lo, an thu sawi hre lo ang hmakin ka awm.



"Bawihte, hriat chian loh chu bike-ah inphurhtîr miah loh tùr aw." Warning min rawn pe pah tih ka hre reng. Pip e pup e pawh ka la ti chuang lo, ka thil tih lai chu ka ti reng tho.



"Au Muana chu ka țhianpa alawm. Âmate nèn thla pawh kan la, sâwtah dàwrah khân," a ti leh ta zêl a.



Bawihtei chu kalsanin ka bulah chuan a rawn phei a, țawngkam dam deuh tak; mahse, lungawi vak lo tih hriat reng hian,"Hriat chian loh bulah chuan Bawihtei hi i thlahthlam loh hrâm ka beisei," a rawn ti nghut a.



"Ka fanu hi ka thlahthlam ngai hauh lo," ka lo ti thung. Bawihtei hriat lai chuan inhnial ka duh lo, chuvàngin, ka țawng ring lo rêng a ni.



"Chu pa chu tu nge?"



"Tu chu?" Ka hre lo der hmiah. A zak lo ka ti ve hrim hrim bawk, ka fanu hi ka thlahthlam lo va, ka theih tâwpa țhain ka enkawl ve bawk. Bâkah, ka țhian kawm leh ka inlêngte a lo hriat ve vek kher a țùlna ka hre lo.



"Bawihtei sawipa chu," a tih chuan," Tu nge a lo sawi a?" ka ti leh.



Dawhtheih loh hmel zet hian,"Au Muana chu maw le," sehchilh deuh nak hian a ti leh sup.



"I hre ve chuang lo ang."



"Sawi la ka hre mai dâwn alawm." A țawng ring lo nain a thin a nel vak tawh lo ang tih a hriat kher mai.



"Au Muana ti na nâ nâ, Au Muana a ni mai alawm, a țhian kawmah lo inrawlh tum lo mai teh," ka ti ve ta khawl mai a.



A ngawi deuh hmak mai. Pawi chai lo, kan chanchin, mi kan kawm thlenga a hriat kîlh kèlh a ngai lo. Kei pawh an chanchinah ka buai loh êm hi.



"Âpa, lo kal teh, ka barbie hi helai savawm hian a seh tlat a nia," Bawihtei chuan a rawn ti ta hlauh mai. Min rawn en rûn rûn hnuah chuan Bawihtei bulah chuan a phei ta nghâl a.



Zàn mutnaah chuan Bawihtei chuan," Âma, Âpa hi kan bulah awm ve se ka ti e!" a ti ta reuh a.



Chhàn nachâng ka hre lawk lo. Kan chanchin hi hrilh vek ila a la hre thiam dâwn hauh lo, a pa hêk zâwnga thil sawi lah ka duh hauh si lo, a pa chu a haw mai dâwn asin.



"Bawihte, ka duat êm tho che hi, kan pahnih hian kan hlim i ti ve lo em ni?" ka ti ta ringawt.



"Âpa bulah ka mu ve chhin châk a."



"Bawihte, ka kuah ang tho hian a kuah ang che," tiin ka kuah a, a zakah chuan ka dêk pah a.



Zak dèk hi a haw ve a, a nui ta ar ar mai. Zâ a tih tùr tâwk lek chuan ka dêk zêl a, kan rizai sin pawh kan leng hlîm nasa.



Kan mut dáwn tak takah chuan kan țawngțai dùn a, light off-in kan țawng ta lo ve ve. Ka kuah chial a, ani pawhin a bân te reuh tê chuan min kuah ve țai mai.



 Fùr a rawn inher chhuah ták chinah chuan tlêm chuan a buaithlâk ta deuh. Scooty-a chuan chuan kan hul thei si lo, chhuah dâwn apianga raincoat nèn ințam ap ziah ngai chu ka ning, bungrua ka lam nî apiang hian ruah a sûr tam ni hian ka hre ziah lehnghâl. Thawmhnaw a inzàr hul theih si loh, ruah hi a sûr ni tin mai si a, a buaithlâk ka ti. Kumin phei chu kum dang zawng aiin ruahtui tla a tamin ka hria.



Victor-ate inneih ni pawh a lo her chhuak ta, Bawihtei pawh a pa nupui neih nîah chuan a puin a rawn lam a, kal loh phal lo dâwn ringawt ila a dikin ka hre ber si lo, ani lah chuan eng mah hre lo hian," Âma, kan pahnihin kal ila," a ti deuh tlat a, chhuanlam ka'n siam ve ngial kha. Khua a țhat avàngin ka ngaihtuah lutuk lo deuh a; mahse, ka pa hnênah chuan a hma thei ang bera rawn hruai haw tùrin ka chah ve ngial thung a.



Mi dang nupui nei ai ngawt chuan tlêm chuan a dàn a dang deuh chu ka ti. Hmangaih tak leh duh taka ka neih kha a ni ve a, a àwm ve tho, kan hun hman dun kha a ropui fahran lo êm zâwk a, chu achhapah, ka duh loh vàng ni lovin amah zâwkin min chhuahsan zâwk a ni a, kha khân karilru a tikîrêm a, chuti ni lo phei se chuan rilru hrehawm tham tùr chu a ni ve alawm.



Muansanga a rawn kal a, hlim takin ka lo chhàwn vat a. Bawihtei a zawng vat a, a hmuh loh avàng chuan," A va vâng ve!" a ti ta a.



"A pa nupui neihnaah a kal ve ta a nih kha," ka lo ti, ka zêp peih hran lo.



"'Tinge i kalpui ve loh a?"



Nui hakin," Engah nge ka kalpui ngawt ang le?" ka lo ti a.



"A sâwm ve na che nge?"



"Sâwm lêm lo. A, min sâwm pawh ni se ka kalin ka ring lo. Pasal hluite nupui neih nía inlan zak zakte chu a," nui chung vêk hian ka ti leh a.



Thingpui ka siamsak a, ka va pêk chuan,"Hmalam pana i pên ve a hun tawh a nia," a lo ti sap a.



"Ka pên alawm, ka hnung tawlh khât asin," fiamthu hian ka lo ti a.



A rawn ding thut, kan insu țhelh a ni, kan inhnaih lutuk avàng chuan ka tawlh hnung ta deuh a.



"Kha, i hnung tawlh a nia!"



Ka en hau a, ani thung chuan ka ke a lo en daih. Chutah, min rawn enin," I hnung tawlh chiang a nia aw," a ti leh a.



A thil sawi awmzia ka hriat thiam hnuah chuan," I va phakar reuh tak! Min rawn tauh țêp atin a nih kha, i rawn ding thut a," ka lo ti a.



Țawng tawh lo chuan a țhu leh ta a, a nui deuh var var.  Kei pawh chu țhutthlèng pakhatah chuan ka țhu ve a, ka tray ken chu dawhkànah chuan ka dah a.



"In result a chhuak tawh em?" tiin titi chu ka vawrh țan a.



"Umm..."



"I pass em?"



"Um..."



"Chuan?"



"Chuan..." min rawn en a, kei pawhin ka lo en reng. Min chhàn dàn  chu ka ngei roh khawp mai.



"Ka tih awmzia chu, i zir zawm dâwn lo em ni ka tihna a ni ber ang chu," ka ti leh a.



"Ka tui teh chiam lo va."



"Eng chu?"



Hmun dang en daihin," Zir zawm chu maw le, lehkha zir hi ka tui lo va," a lo ti a.



"Mahse, i va ti uiawm dâwn ve! Zir zawm leh la chu a țha asin le," ka ti  a.



"Tui lo chung chunga lehkha zir chu a ninawm ve êm asin."



A tidik chiah tho mai. Tûnlaiah phei chuan college zawh tawh chuan mahni tui lamah eizawnna a tam tawh a, taima taka thawh chuan eng hna pawh tui zawng lam a nih chuan ei a tling thei vek tawh mai.



"I zir zawm si loh chuan eng nge tih i tum ang?" tiin ka zâwt leh a.



Thingpui dût hlak pah chuan,"Gym buaipui ka duh a, ka pa pawhin a remti tawh a," a ti sap a.



"A țha alawm. Mahni tuina zâwng kan tih hi a hlu ber, kan rilru a hlim phah bawk a," ka ti a.



"I rilru a puitling ngawt mai!" min ti ta tehrêng a nih chu!



Ka nuih a za deuh bawk si, chutiang a sawi chhuak chu a ti der nge a ti tak tak pawh ka hre si lo, min fak ve nge nia min hmusit țha duh lo tih pawh ka hre thiam lo ve!



"Ka lâwm e," ka hmui hup deuh chung chuan ka ti, nuih loh hrâm ka tum bawk.



"I fanu pawh a pa tel lovin i enkawl a nia, i thawhrimna leh i chhelna avàng hian i ngaihsànawm e!" te chu a la ti ta deuh deuh!



"Aw, duh táwk ang," ka ti phawt a, chutah," Gym chu engtik hun vêlah nge i hawn theih ang?" ka ti ta zâwk a.



Chutiang hlîr chu ka sawipui ta. A tuina tak a nih ka ring, a sawi ve țeuh mai. Hawng lul teh se, a tuina a nih phawt chuan, ka duhsakpui hle e.



Tlai dâr 5 vêlah a haw. Bawihtei a lo haw thei si lo va, ruah a rawn sûr țan dâwn bawk si nèn, hmanhmawh takin a haw tâk kha.



Kei pawhin a rûk tak chuan Bawihtei ka ngaihtuah kher mai. A pain a ngaihtuah hman dâwn lo va, a pu talin a ngaihtuah êm ang chu maw. Ruah a sùr tam phei chuan tuin nge rawn thlah haw ta ang?



A pa number bâk ka nei si lo. Ani lah a buai dâwn bawk si, bâkah, a nupui  neih nia va phone kher kher phei chu ka duh hauh lo. A pu number tal kha lo nei ila a țha tùr.



An rawn hruai haw ve êm ang chu maw.



Ruah a sûr ta tlâwrh tlâwrh mai. Ka thil ei pawh a tui lo, Bawihtei mawlh ka ngaihtuah, a rawn haw thei lo ang tih ka hlau a ni.



Dâr 7 a ri a, ruahin bàn zai a rêl lo. A la baw hawk hawk reng mai, dâr zât ka en sek a, Bawihtei a rawn haw har tawh ka ti.



Dâr 8. Kawngka lamah thâwm ka la hre lo. Ka rilru a buai tawh lutuk, ani hi riahtîr an tum ringawt a ni ang e, va hruai dâwn lahin kan huh vek ve ve ang a, a dam loh phah ang tih ka hlai bawk.



Ka vei sek mai. Ka phone ka hûm rauh rauh mai, va phone ta mai ila, thil mawi lo a ni dâwn si.



Kawngka kik thâwm ruala Bawihtei aw ngeiin," Âma?" a rawn tih chuan kawngka bul chu ka thleng phei nghâl ruak mai! Ka hawng nghâl vat bawk.



Bawihtei leh a pa. Kan inhmachhawn ràn mai.



"Âma, min lo ngai em?"



Ka pawm lawp, a ke lam chu ruah sûr vàngin a hnawm deuh chuan ka hria.



"Kei chu ka lo lût lo mai ang e."



A nupui neih zànah a fanu a rawn thlah haw a nia, a ti țha khawp mai!



"Aw le. Bawihte, Âpa mangțha la?" tiin Bawihtei biang chu ka fâwp zoh a.



"Âpa, mangțha aw, bye bye."



A pa kal hnuah chuan a thawmhnaw chu ka thlâksak thuai thuai a, chutih chhûng chuan vawiin lama an hun hman dàn chu a sawi barh barh reng a.



"Âma, Âpain nupui a nei sia, engtikah nge keimahni hi min neih ve dâwn?" ati chhuak leh ta khauh mai.



"Min nei tawh reng alawm, Bawihte. Âpa nupui chu a hmelțha em?" tiin ka zâwt ta daih a.



"Aw, hmelțha lutuk!"



"A nih chuan, tu nge hmelțha zâwk ang- Keimah nge Âpa nupui?"



Ka nghâwngah kuahin," Âma, i hmelțha ber!" a ti a, chutah," Âpain min pawm a, thla kan la nasa lutuk asin. Âma, awm ve la nuam i ti ve viau ang," a ti sârh sârh mai.



"Nia, tiraw? Kan hlim dùn ngawt ang chu! Le, mu tawh dâwn ang hmiang, țawngțai leh phawt ila?" ka ti ta a.



Tlai khat Muansanga lo lêng chuan thu tak deuh hian," Ka Gym thar hi min faksak ve la?" a ti ta heu mai!



"I hawng tawh a ni maw? Khawi laiah nge kha?"



A sawi hnu chuan," Min faksak rawh aw," a ti leh a.



Ka nuih hi a tiza thei roh tak tak.



"Mi dang an tam ang chu, kei chu eng mah ka ni hleinem," ka tih chuan ani chuan," Nang aia țha an awm lo, min faksak phawt chuan a lãr nghâl dâwn tih ka hria a ni," a ti leh a.



"Model chhe lo tak tak an tam tawh a, kei phei chu nuthlawi niin fa hial nei tawh ka nih hi," tiin ka hnial ve leh a.



"Ka hrilh tawh che kha. Mizo hmeichhe zîngah chuan i hmelțha ber."



Ka en ta hâ. Ani pawhin min lo en ve a; mahse, min en rei lo, hmun dang a hawi leh ta daih.



Thil ka hriat chhuah vàng a ni. IG lama message ka tum loh deuha ka chhiarsak kha. Tuna a thil sawi nèn khân a inang chiah.



"Mizo hmeichhe zîngah chuan i hmelțha ka ti ber."



Muansanga hi a lo ni maw?!!!





*ENGTIANGA NASA PAWHIN BEI MAH LA, SIK LEH SA LEH TUIFINRIAT FÂWN  I TIDANGLAM THEI LO. CHUVÀNGIN, ENG ANGA DINHMUN HARSAAH PAWH THIAM TAKA LAWNG KHALH KAL THEIH ZIR THIAM KHA A ȚHAIN A PAWIMAWH BER*