☆LUHLULPA☆ - 5 By Dingdi Pachuau

☆LUHLULPA☆ - 5 By Dingdi Pachuau




A gym chu faksak turin rilru ka siam lo. Ani pawh faknaah a lang reng reng tawh a, a rualpui tleirâwl deuh leh túnlai mi chhe lo tak tak an tam tawh lutuk, chûngho chu sâwm zâwk rawh se, chuan a gym pawhin a làr phah zâwk ngei ang.



Ka hnial ta phawt. A ngawi reng a, a thin a rim ang em aw ka ti rilru deuh a, tlêm chuan nuam lo ka ti ve deuh; mahse, ka hnial hi a țha.



A thin a rim lêm lo a niang, Bawihtei nèn an inkàwm leh bawrh bawrh mai. Nuam lo ka tihna pawh a reh deuh nghâl, a la naupang êm a, a thinrim ve a nih pawhin pai reng lo chi, hre rei lo chi a nih ka ring.



*Min hnial a nih pawhin fak dàn tùr tal min kawhhmuh ve la?*



Zàna a message ka dawn a ni.



Ka nui a, ka lu ka thing nâ nâ ringawt. Engtin nge kei tehlul hian chutiang ka kawhhmuh thiam ang le? Hmel hriat dang tam tak a nei țeuh ngei ang a, hetiang lam lo hre tawh deuh zâwt mai se, kei chu mi min hrilh anga fak ve mai kha ka nia, idea ka thawh ve miah lo. An duh dàn an sawi ang khân ka sawi ve mai kha a ni si a.



*Mi thiam deuh zâwk râwn la* tiin ka chhâng a.



*Mi thiam tak ràwn kher a ngai lo, mi pakhat idea ai chuan mi pahnih idea chu a țha zâwk ngei ang tih ka hria a ni* a rawn ti leh.



Hmm, a țha alawm.



*Nia, ka lo ngaihtuah ve chhin dâwn nia* ka ti ta ringawt, pakhatah ka hnial tawh a, hei hi chu thil har lutuk pawh a ni lo maithei a, bâkah, ka idea ang kherin a ti duh nâng, ani pawhin a ngaihtuah ve tho ang chu.



Tûkțhuan kan ei lai chuan ruah a rawn tla leh ta phuar phuar mai. Weather forecast-ah khân ruah kha sûr tam tùrin a lang rêng a ni, Bawihtei school kal tùr chu ka ngaihtuah deuh khawp mai a, ruah a sùr bur bur laite hi chuan ka kiangah awm reng se ka ti țhìn, ka ngaihtuah lo thei țhìn si lo va.



"Bawihte, vawiin chu school lo mai la?" ka ti a.



"I hlau ami?" tiin min zâwt ta khauh mai.



Nuih sak hian," Hlau lo ve, ruah a sûr nasa dâwn sia, ka ngaihtuah che alawm," ka ti a.



"Miss-te, sir-te pawh an awm ve tho ang chu," a ti leh reuh a.



"Min ngai lo e, keimah chauhin ka lo awm dâwn asin, min khawngaih lo em ni?" ka ti ve leh a.



"Âma, Au Muana phone ila, a lo kàwm dâwn che alawm, in inkhualtelem ang a."



Za takin ka nui chhuak ta. Ka nui lo thei lo, ka fanu hi chuan min tihlim ve êm asin, a nu leh a u Muana inkhualtelemtîr min tum a nia...



"Âpa pawh phone mai la?"



Tihchi nâng. Hei kher hi chu ngaihtuah chhuah pawh ka duh lo.



"Ni lo ve, i lo bàn hun ka lo nghâk char char mai ang che. Mi dang chu ka kàwm peih vak lo," ka ti ta a.



"Au Muana a lo kal chuan in lo inkhualtelem dâwn nia, kan bàn veleh ka lo haw thuai ang," a tih ve ngei chu!.



TV kan nei lo va, phone ațanga news ka hriat bâk hi chu hriatna hnâr dang ka nei lêm lo. Ruah a sùr hi chuan tih tùr hi a vâng thei si a, TV han en mai mai tùr awm bawk si lo, mut ringawt lah a dik berin ka hre si lo nèn, lehkhabu chhiar tùr tal awm se aw... Ka chhuah leh hmasak berah chuan ka lei ve ngei ngei tawh ang.



Mak tak maiin Muansanga a rawn lang ta tlat mai. Bawihtei school a kal tih a hre ngei àwm si a, hetia a rawn lang hlawl mai hi a mak ka ti lo thei lo.



"Vawiin chu rawn kal hi a lang tlat a," a ti sap a.



"Thlarau pàwlna i chang a ni lo maw? Nge hriattîrna i dawng zâwk? An țawngkam takin kan ina rawn kal hi a lang tlat mai si a," nui chung hian ka lo ti a.



"Hna a thawh theih chuang si loh a, ina awm lah mut a ni leh ringawt dâwn si a."



"Gym lamahte i kal ka ring deuh ringawt a," ka tih chuan," Ruah sùr chuan a buaithlâk," a ti leh sap a.



"Bawihtei'n 'Au Muana a lo kal chuan lo inkhualtelem r'u' a tia," tiin ka nui hak hak a.



"A pawi hleinem," a lo ti!



"Ui leh zawhte lemah kan chang dâwn em niang?" tiin ka nui leh hak hak a.



"Min lo ngaithla ru țhìn a ni maw?!"



Ka kut lo pharin," Teuh lo! Ka ngaihtuahnaah a lo lût thut a," tiin ka lo pha nghâl vat a.



Kan inkhualtelem ta êm lo. Kan titi zauh zauh a, phone kan khawih dùn ve ve bawk. A hnu deuhah chuan a gym thlalâkte chu min hmuh a, a ruahman chhoh dan, a din chhoh dànte chu ka zâwt kual ta duah, țha takin min chhâng zêl, a la naupan nèn hian rilru a nei roh ka ti.



"Tleirãwl âwm țha duh lo rual lek i la nih tehlul nèn, i rilru a puitling hle mai, i ti țha ka ti takzet a ni," tiin ka fak a.



"Tleirâwl awm țha duh lo..." a ti deuh sup a, a lâwm vak lo a ni maithei a ni.



"Chutiang rual lek chu i la ni miau si alawm. I sual ve hauh lo nain sual rual lek i ni ka tihna mai a nia, hei, hawklak rual ang chi hi," tiin ka lo sawi fiah a.



"Tûn aia upat deuh hi chu ka châk ngawt mai," a lo ti sap thung a.



"Engah teh ngawt maw?"



Min chhâng lo chuan a ngawi ta reng a, chutih lai chuan kawngka a rawn ri karh karh a. Tûn ang hunah tu tak lo lêng dâwn ni maw? Vawiin chu ni dang ang lo takin ka luck tlat!



"Lo lût rawh u."



Victor-a lo lût ka hmuh chuan mak ka ti kher mai, lo biak nachâng pawh ka hre lawk lo, tûn ang hunah a lo kal ngai si lo va, mak deuh mai asin.



Muansanga nèn inhnaih vak lova kan lo țhu a hmuh chuan min en tawn deuh ta chhên a, a țawng miah lo.



"Eng nge i lo tih dâwn?"



Ka țawngkam polite lohzia chu ka hre tho, chu pawh mi dang awm laiin a ni zui.



"Bawihtei rawn tlawh ka tum."



Ka âwih fahran lo chiang. School a kal ang tih chu a ring ngei ang, ni lo, a ring mai ni lovin a hria ang.



"A lo la bâng lo va."



Ka țhutna ațangin ka tho a, thingpui chhuan tuma tho ka ni.



"Ka tihbuai loh hrâm che u ka beisei," Victor-a chuan a ti leh a.



A țawngkam mai a ni. A inthlahrung teuh lo mai, țhut hmun a rem sauh sauh dàn ațang chuan a hriat vek.



"Tibuai lah lo ve. Lo țhu rawh, thingpui ka'n chhuang ang e," ka ti ve ta ngat a. Muansanga chuan kan inkâr chu a hriat thiam loh hrâm ka beisei, Bawihtei pa a ni a, kan inkâr chhe lutuk anga a ngaih ka duh bîk lo.



An inbe miah lo, inhlat vak lovin an țhu. Kan in hi a zau vak lo hrim hrim a, inhlat deuh pawhin țhut tum mah se kan țhutthlèng hùn dànin a zir lo hrim hrim.



Thingpui  ka va pêk thleng pawh chuan an la inbe lo, phone an lo khawih ve ve.



Chhùn thingpui in a hun tawh vàngin a hmeh tùr ka chhawp nghâl.



"In r'u, a dai thuai mai ang," ka ti a.



A jacket chhûng ațangin lehkha uk deuh khek khawk, lian deuh taka tuam hi a rawn phawrh a, ka țhutna bul chiaha rawn dahin," Bawihtei tâ tur," a ti sap a.



"Eng nge ni?" ka lo ti.



"En mai la."



Ka en lo. Duh leh Bawihtei lo haw hunah amah ngeiin en rawh se, a tâ tùr a ni bawk a.



"Tûn ang khaw nuam lo angahte chuan school chawlhtîr ve mai tùr che a nia."



A țawng dàn ațang chuan a lungawi vak lo tih a hriat. Muansanga chu awm lo se chuan ka chhâng khawp ang; mahse, ka insûm rih ang, Bawihtei chungchâng avànga mi awm laia inhnial phei chu ka duh hauh lo. Kal lo mai tùra ka tih leh tih loh pawh hre hawt lova min han dem deuh  nghâl ngawt chu ka lung a awi vak lo bawk.



"Kal a duh tlat a," zaidam thei ang ber hian ka ti a.



"A ngaihtuahawm alawm, ruah a sûr nasa si," a ti leh a.



Ka insûm hrâm hrâm a ni, kei a nu hian ka fanu chu ka ngaihtuah loh a ring rêng rêng em maw ni? A duh loha a chhuahsan tawh kan ni a, a lungawi loh apianga min rawn sawisèl tùr a ni hauh lo.



Thingpui chu ka dût hlak a, a lo la sa țha nasa, ka lei a kàng lo chauh a ni! Hei pawh amah vàng vek, min tilungawi lo lutuk tlat.



Bawihtei lo haw hma daihin Muansanga chu a haw a, Victor-a a awm ve khur reng si a, nuam a ti lo pawh a ni maithei. Gym kal a duh chhuanlamin a haw ta daih, ruah a sûr tam tawh lo va, a tla siar siar chauh a ni tawh.



"Kha pa khân eng nge a lo tih a?"



"A lo lêng a nih kha."



"Bawihtei sawi kha a ni em?"



"Aw."



Ka chhâng hrâm hrâm a ni.



"Khatiang tlangvâl tawh kha Bawihtei i kawmtîr ngam a maw?! Tûnlaiah mipa hriat chian êm êmte pawh hi mipa hlauhawm ber ber an ni thei tih i ngaihtuah ngai nange? Fîmkhur nasa ang che, ka fanu hian  hetiang thil hi a tawh ka duh hauh lo," a ti nghut nghut a.



A thil ngaihtuah zet chuh! Ka lu ka thing nar nar.



"I nun dàn erawh ka sawisêl thei lo, i chungah thu ka rawn nei thei hek lo, i duh duh dànin i awm thei ang; Bawihtei erawh hi chu mipa lakah thiarfihlîm hrâm ang che," a ti leh a.



Ka thin a rim lutuk a, țawng pawh ka țawng chhuak duh lo. Ka fanu ka enkawl dànah hian sawisèl tùr a nei hauh lo, sawisêl thei pawh a ni hek lo. Ka theih tâwpa țhain ka enkawl a, ani ang tlûk hian, ni leh lo, ani aia nasa fê hian țha takin lo țhang lian se ka ti daih zâwk ang chu!



Ka nunah maw? Ni e, lo inrawlh theihna tùr a nei lo, dikna a nei tawh lo.



"A dik, ka nunah eng mah lo sawi tùr i nei lo," ka ti ve ta ngat a.



Min en ràn nain ka zah duh bîk lo, thil dik tak alawm ka sawi le!



"Bawihtei hi a hnawk i ti a nih hlauh chuan ka bulah-"



"A tâwk!" ka ti țhat. Bawihtei hi ka fanu a ni a, ka tá a ni. Ka engkim a ni a, ka rîla rah ka fanu neih chhun a ni bawk. Ani hian min chhuh thei hauh lo ang, engti kawng mahin min chhuh lo ang.



"Nakinah pasal pawh i la nei duh ang a, chutih hun-"



"Ka fanu hi engtikah mah ka kalsan ve ngai lo ang!" ka lo ti hmak. Ka rilru nâ a rawn chawk tho leh deuh tlat, Bawihtei pian hnu rei lo têah min kalsan a nih kha, a fanu leh a nupui hi min kalsan thei a ni.



"Kha thu kha rawn sawi chhuah leh kher a ngai lo ang!"



Ka ngawih loh chuan ka duh aia nain ka țawng dâwn tlat. Ngawih rih hi a țha, thil țha lo lam sawi chiam hi tu tân mah a țha lêm lo ve.



Bawihtei a rawn haw hnuah chuan boruak pângngai takin kan awm leh tawh. Bawihtei bulah hi chuan țawngkam țha lo leh hmel hlim lo, thinur hmel lantîr loh hrâm hrâm ka duh, ka tum nasa hle țhin bawk.



"Âpa, kan inah chaw ei ve tawh la?"



Min rawn en zawk, kei pawhin ka lo en ve tho. A rilruah eng tak awm ang maw?



"Bawihte, ni dangah zâwk aw, thil tih tùr dang ka la nei a, i hman veleh chaw ei tùrin ka la rawn hruai zâwk ang che aw?" a ti a.



"Aw le, àpu pawhin min ngai ve tawh viau ang, sakawrah khân chuan leh ka châk a," hmel hlim sar hian a ti barh barh a.



"I lo kal hunah i chuang leh dâwn nia."



Zanriah kan kîl lai chuan," Bawihte, Âpa khân nupui a neih tawh kha i hria tiraw?" tiin ka zâwt a.



"Aw..."



"Chuti a nih chuan, kan inah chaw a lo ei thei tawh hleinem. In an nei ve tho a, chutah chuan chaw chu an ei țhin alawm, kei pawh an inah chaw ka ei ngai miah loh hi," ka ti a.



"Engati nge i ei ngai loh a?"



"Kan ințhen tawh a, nupui pawh a thar a neih tawh kha." A hre thiam ngût lo ang tih ka hria; mahse, a pawi lo, hriat thiam hun a la nei ve dâwn tho, kan sawi chhuak ta sa sa, hrilh hi a țha.



"Âma, keimah chu âpate inah chaw ka ei țhin sia?"



Ka lo bu nghat a," Nia, nang chu âpa fanu i nia," ka tih chuan,"Âpate inah chuan chaw ka la ei thei tihna riraw?" a lo ti a.



"Aw, ei thei e; mahse, i kal daih hian ka khua a lo har țhin a. Keimah chauhin chaw ka lo ei țhìn sia, min khawngaih lo em ni?" ka ti a.



"Âma, kan pahnihin ei ila, âpate inah chuan?"



A ngaihna hi a la awm thlâwt lo ve.



*******



Idea ka neih ve angte chu Muansanga chu ka hrilh a, ani pawhin țha takin a lo ngaithla a, țha a tih phei chu ka ring lo nasa.



"Shooting kan neih nî chuan lo kal ve tho la, i hman theih hrâm chuan?"



"Nia, ka hman phawt chuan aw."



Ka hman phei chu ka ring lo, bungraw lo thlen ni tùr a ni lehnghâl a; mahse, a rilru tihnual tùrin ka sawi lang kher duh lo.



Bungraw lam tùra ka chhuak tùr Scooty ka lâk chhuah laiin min rawn phone a.



"Vawiin chu lo kal rawh aw?"



Hmm, ka chhuak dâwn tawh asin le, a la rawn thleng lo nain chhuah tho a ngaih avànga chhuah hma ve tum ka ni.



"Chhuah ka tum a."



"A va remchâng ve! Lo pêng ve zawk la, ka lo nghâk ang che, min la hmuhpui miah loh kha," a rawn ti leh a.



Nia, ka la kal miah lo. Kal ila, rei awm pawh a ngai chuang nâng, bungraw lo thlen hma chu hun ka nei tho alawm le.



"Aw ka lo kal dâwn nia."



"Yess..!"



Ka nui sak, naupang chhia roh lutuk!Kan nufaa kan țhianpa ve ber a nia, a gym hmuhpui ve pawh chu a dik ang.



Ka hnial thei ta dêr lo, ka idea ropui lo tak ka sawi chhuah kha țha a lo ti niin, keimah ber chu model-ah ka țang ta daih!



"A țantìr ațang khân mi dang sàwm kha chu ka tum chhin lo hrim hrim," te chu a la ti deuh deuh! Min rawn phone chhan pawh kha hetiang thil a lo ruahman vàng vek!



"I fing phakar!"



A nui hawk hawk mai. A nui hawk hawk lai hi ka la hmu miah lo, ka la hre lo bawk.



"Phakar châng hi chu awm ve tùr chu a ni, thil țha lamah hi chuan," a lo ti thung.



Ka duh lo chung chu bungraw lam tur chuan min chhuahpui ta, a thil tihah khân a inthiam lo ve a niang.



"Inthiam loh kher a ngai chuang lo," nui chunga ka tih chuan," Ka inthiam lo miah lo," a lo ti, chutah," I lo kal duh phawt chuan gym kha i tân chuan engtiklai pawhin a inhawng reng ang," a ti leh a.



"Khai a, i hloh duai mai ang asin."



A nui suk a," I lo kal ve duh chuan ka lâwm khawp ang," a ti leh.



Bungrua chu tam vak lovin ka phurh theih phah ta, a zia ka ti hle mai. Ni dangah chuan vawi hnih phurahte ka hmang țhin a, vawiin chu vawi khat phurhah a zo thei ta e; mahse, vawiin zawng țum dang ang lo takin mi kan tam deuh a, bungraw la kim vek tùr chuan hun a duh rei khawp mai a, kan tlai phah vek, bàwr lah kan báwr dùn bawk.



Bawihtei ka ngaihtuah lutuk tawh! Chuvàngin, ka tlân chak ve viau a ni.



In kawt kan thlena țhenawmte in banga sana ka en leh chuan Bawihtei in lo thlen hun a pèl daih tawh tih ka hria, counter ațanga kan tlàn chhuah khân ka hmanhmawh phah rêng kha a ni a; mahse, a lo awm hauh si lo.



Thil dang tih hmain an Miss Lucy phone ka ngai. Ka phone ka phawrh chuan ka chek tlak, ka lo mute reng niin, missed call pawh a lo awm reng a, Bawihteite school driver a lo ni. Ka phone ta vat, ka rilru a nuam hauh lo. Khawiah nge a awm ang le? A phur lêt leh tihna em ni?





*I CHANCHIN DIK TAK AN SAWI, I LÀWM LO A NIHA I THIN A RIM A NIH CHUAN MI CHAPO TAK I NI TIH TIFIAHTU A NI ANG*