☆LUHLULPA☆ - 6 By Dingdi Pachuau

☆LUHLULPA☆ - 6 By Dingdi Pachuau




"Hello?"



"Aw, Hmingmawii nu ka nia, ka phone ka lo mute daih a, a pawi ka ti takzet a ni," ka ti a.



"A nih tak chu. Hmingmawii chu a pa nèn an awm tih rawn hrilh che ka tum a; mahse, in inhmuh tawh tho chu ka ring a," a rawn ti a.



A pa nèn maw? Khawiah nge? School-ah a va hruai em ni? A ni thei lo, motor-in an thlah haw vek țhìn, hmanhmawh thil leh pawimawh bîk thilah lo chuan an chhûngte hruai an phal hek lo.



"A nih tak chu, ka lâwm e," ka ti a.



A pa chu kan inah a lo kal tihna em ni le? Chuti ni lo se engtin nge an inhmuh ang? Ka buaina pakhat chu a kiang ta, a pa bulah a awm tih ka hre ta alawm. Nakinah ka hruai mai ang.



Mahse, a pain a lo hruai ve ringawt chuan min tihlim lêm lo, ka awm loh laia an intawng fuh erawh ka làwm rualin ka fanu lo thlen laia ka la thleng hman lo chu ka thin a rim.



"A pa hnênah a awm chuan a him tihna a nih chu."



Muansanga țawng ri chuan min tiharh zawk mai. Scooty chu ding tawh mah se ka lo la chuang reng a, bungrua lah ka la hlângthla hek lo. Ani erawh chuan a bike-a a bungraw phurh chu a lo hlângthla vek tawh thung.



"Nia..."



Inah chuan kan lût a, thingpui ka chhuang nghâl. Bungraw lâknaah min buaipui rei ve si a, a ril a lo țâm palh ang.



"A pa chu ka'n phone lawk ang e," tiin Victor-a chu ka call ta zat a.



"Engtin nge i fanu haw laiin inah i awm loh theih? Tikhân, nu chu i inti ve si a maw?"



Ka ngawi reng, ni e, vawiin chu ka thiam loh liau liau a ni. Bungraw lâknaah khân ni dang ang lo angtin mi kha an tam tlat a, thil tih kha  a sâwt  thei tlat lo a nih kha; mahse, sawi fiah ka tum lêm lo.



"Ni e, ka tihpalh a ni, nakinah ka rawn hruai ang e," ka ti ta ringawt.



"Ni lo ve, zànah ka rawn dah ang, thil sawi fel tùr kan nei bawk," ti nghutin a phone chu a titàwp hmak mai.



Ka inseh ruh țeuh ringawt. Ka tidik lo tih ka hria, ka fanu lo haw laiin inah ka lo awm hman lo kha chu ka tihsual liau liau a ni; mahse, tihngaihna dang ka hre chuang si lo, vawiin chu a dik lo vêl vek.



Ka maimichhîng vang vang a, hmmm, a pawi lo ve, thil thleng tùr a thleng zo tawh, ni dangah chuan a thleng tawh lo ang.



"Ka thiam loh vek a ni."



Ka meng chhuak nghâl, inthiam loh hmel zet hian min lo en reng a, a awka chhuak lah a inthlahrung tih a hriat bawk.



"Eng aiah chuan maw?" ka ti a.



"Gym-ah khân ka chelh rei êm che kha," inthlahrun hmel tak hian a ti leh a.



Nui lui sak hian,"Theihnghilh daih rawh. Bungraw lo thleng a tam vàng a nih kha, ni dang aiin mi kan tam tlat a, eng mah inthiam lohna tùr a awm lo," ka ti a, chutah hre chhuak thutin," Thingpui ka chhuang tak," tiin ka tho nghâl bawk a.



Ka thingpui bêl chhuan chu ka lo on theihnghilh em ni? A lo in-off diam tawh mai, keia hrilhhai pheng hian ka lo kâp alh lehpek lo a ni ngei ngei ang.



Thingpui bêl chhuan țhat ka tum chuan a lo sa nasa, ka phu zawk mai! Ka lo ti-alh reng, a lo so tawh a, Muansanga'n a lo off a nih chiah hi.



Thingpui kan in hnu rei vak lovah chuan a haw ve nghâl mai. Eirawng bâwl pahin exer ka la leh a, Bawihtei ka ngaihtuahna rilru leh ka inthiam lohna rilru chu paih bo ka duh.



Zàna a rawn dah chuan Bawihtei chu a muhìl bâm tawh a, khumah ka mut nghâl. Thil sawi tùr a neih avàngin ani erawh a haw nghâl mai lo va, țhutthlêngah inhnaih vak lovin kan țhu dùn ràn mai.



"Bawihtei school bàn hun chu i hriat chian hle ka ring a," a ti țan ta phawt a, muangchâng hian min rawn en bawk a.



"Hria e."



"I chhuak a nih pawhin a bàn hunah tal chuan ina lo awm ngei tùra beisei i ni, chu chu nu mawhphurhna a ni bawk ang," a ti leh nghut nghut a.



"Bungraw lo thleng a tam-"



Min lo pawt chat chiang hle mai.



"Chhuanlam siam suh. Bungrua nge pawimawh i fanu? Kei kha lo awm lo ila engtin nge a awma i rin? Kha kja nutling awm dàn tùr a ni em ni?" a ti leh nghut nghut a.



"A thleng tawh ngai lo ang," ka lo tih chuan,"A sawi theih loh, kan hmalam hun hi a sawi theih loh. I buai thei hle si a, ka fanu a nihna angin ka lo enkawl ve tawh ang e," a ti ta daih mai!



Ka en hau ringawt! Tunah hian ka fani hi min lâksak a tum ta chiah tihna em ni? Ni lo, a theih loh, engti kawng mahin a theih.loh a ni tawp.



"Ni lo ve, ka enkawl thei alawm. A mamawh chu ka thawk chhuak ve thei bawk ang, ka theihtâwp ka chhuah bawk ang," ka ti a.



"Vawiin thil thleng kha ngaihtuah ta che, i fanu lo haw pawh ngaihtuah hman lo lêkin i buai a nih kha," a ti leh a.



"Thil țûl lovah ka buai lo-"



A kut a lo phar avàngin ka țawng tàwp chat.



"A tâwk! Insawi fiahna lam kha chu duh tâwk teh, i buai ka tih tawh kha. TV lamah faknaah i lang zuai zuai a, sum i la lût nual pawh a ni mahna, a mamawh engkim hi i pe thei lo thuai dâwn. Ka fanu hian a nu chhùna hetiang lama a nun a hman chhoh ve hi ka phal dâwn miah lo a ni. Zirna țha nei tùrin ka duh, a tân thil țha ber ber ka duh bawk, chutiang pea tihsak theitu pa min nei a, a mamawh tihsak hi ka duh bawk," a ti leh duah a.



"Ka theihtâwpa nasain a mamawh phuhru turin ka thawk-"



A ding hluai a, ka țawng tàwp chawt bawk.



"Ka fanu hi ka hnêna a awm chuan i phurrit pawh a zâng huai-" a tih lai chuan ka thinrim chu ka ding ve ta vat.



"Ka fanu hi phurritah ka la ngai lo. Ka la ngai bawk lo ang, vawiin tlai vàng khân làwmthu hrilh che ka tum chuang lo, ka lo awm remchàn loh lai tak a nih avàngin, a pa i nihna angin i bulah i lo hruai a ni ve mai; mahse, a thleng nawn tawh lo ang," ka ti chhuak ve ta. Ka thin a rim ve tawh avàngin ka țawng ring ang tih erawh ka hlau khawp mai, Bawihtei'n kan inhnial thâwm a hria ang tih ka hlau, inhnial thâwm hre tur hian ka duh lo.



Min chhâng lo chuan min en reng a, kei pawhin ka zah bîk lo, ka en kar ve  tho.



"A hmalam hun kal zêl tùrah a tâna țha i duha i ngaihtuah a nih chuan ka hnêna awmtîr a fuhzia i hre thei ang, chu chu amah hmangaih tak taktu inti tân chuan tih ngei ngei tùr, tihmâkmawh a ni," a ti nghut a.



"Ka ngaihtuahsak thei dâwn lo niin i ngai em ni?" ka ti ve thung a.



"I buai lutuk ka tih tawh kha, ka lo enkawl ve tawh ang a, i duh tâwkin i buai thei tawh zâwk dâwn nia," a ti leh a.



"Kan nufa inchàwm nân ka buai hi a theih loh tihna em ni? Hna ka thawha ka buai lohin tuin nge kan nufa hian min châwm ang? Ka chhûngte maw? Teuh lo, hna ka thawh theih chhûng chuan min châwm hauh lo ang," ka ti leh a.



"Ka enkawl ang ka tih rêng chu!"



"Ni lo ve, ka enkawl thei. Nuhrawn hrawntîr ka tum hauh lo bawk."



A thaw hawk a," Zanin chuan kan sawi fel thei dâwn lo, hun dangah kan la sawi leh dâwn nia," a tih chuan," Sawi leh tùr a awm tawh lo," ka lo ti hmak thung.



Mutnaah chuan Bawihtei chu ka en vang vang a, tunah chuan kum tlêm tê chauh a la ni. Nakinah a rawn țhanglian ve zêl ang a, a mamawh ang chu thawh chhuah theih ka tum hi a ni tawp. Ka chhûngte chàwm ni duh ila chuan Lungleiah ka pheipui daih tawh ang, ka fa a ni a, ka châwm thei tùr hi a ni ringawt, ka dam țha a nih phawt chuan.



Nuhrawn hrawntîr ka phal hauh lo, a nu tak tak ka la dam chhûng chuan. A lo len hunah thil awm dàn a hriat thiam hunah a duh leh a pa hnênah chuan a awm thei ang, chu pawh a duh a nih chauhin. A duh thlanna ka zahsak ang, duh thlang thei khawpa rilru a puitlin hunah.



Boruak dang tawng leh tawh lo chuan hun kan hmang chho leh nâw nâw a, a pa pawhin a rawn tlawh leh tawh tho nain eng mah a sawi chhuak lo.



Inrinni a ni a, Bawihtei school kai loh ni a nih vàngin bazârah kalpui ka tum deuh a, thawmhnaw ensak ka duh a ni.



Tûkțhuan kan ei laichuan," Vawiin chu bazâr ila, kawr mawi kan lei dâwn em niang?" ka ti a.



"Yesss...Âma, mawi deuh aw," hlim zet hian a lo ti thuai a.



"Tehrêng mai."



"Chuan, âpate inah kal nghâl bawk ila?" a tih chuan chhâng lawk lovin ka en leh rih, fîmkhur taka ka chhàn a ngai.



"Bawihte, kan hman kher lo maithei a ni, bazârah chuan thawmhnaw en kual chhûng a rei thei sia?" ka ti a.



"Âpain min ngai ve tawh ang, àpu pawh ka ngai tawh, sakawrah pawh ka chuang châk leh tawh a," a ti sep sep reuh a.



"Kan hman chuan aw; mahse, hma deuhah kan haw a ngai sng, eirawng bàwl kan ngai dâwn sia," ka tih chuan ani chuan," Âpate inah chuan  chaw chu ei nghâl daih ila? An phal hrim hrim ang," a lo ti!




A buaithlâk thei a nia!



Chaw kan ei kham chuan phone a lo ri a, ka en chuan Muansanga a lo ni.



"Zon, vawiin chu Mimawii school chawlh ni a ni sia, bungraw lo thleng thar en pahin lo kal ula?" a rawn ti a.



"A châkawm khawp mai, bazârah kalpui ka tum a, kawr mawi kan lei dâwn a," ka tih lai chuan Bawihtei chu a lo nui sen sen a.



"Âma, âpa a ni em?" a lo ti a.



"Au Muana," hmui phun hian ka ti a, ani lah chuan," Au Muana chu ka be ve duh, Au Muan..?" tiin a rawn au chhuak nghâl vat a.



"Mimawi, Âma nèn lo kal ula, ei tùr tui tâwk kan ei ang a, chuan barbie ka lo pe bawk ang che aw, i duh em?" a ti a.



"Duh lutuk! Aw, kan lo kal ang aw, min lo dah țhatsak reng rawh aw," a ti lar lar a.



An inbiak zawh chuan Bawihtei chuan," Au Muana hnênah chuan kal ang aw, kawr mawi kan lei zawhah," a ti a.



Kan insiam a, kawr inang kan ha a, kan kekawr rawng pawh a inang.



"Âma, i mawi lutuk!"



Nuih sak pah hian," Nangmah pawh kha i mawi lutuk! Kei aiin i mawi daih zâwk," ka ti ve a, tui bottle chu ka bag ah tùrah chuan ka dah lût nghâl a. Kan tei kual leh dâwn si a, tui a hâl leh duh dâwn lutuk a ni.



"Kan mawi dùn e!" tiin min rawn en a, amah chu a inen leh a.



Naupang rilru thianghlim tak hi chuh!



Bazârah chuan kan kal ta phawt. Ka hruai ngai vak lo va, nuam a ti khawp mai. Mite pawh chuan min en duh riauin ka hria. Nufa kan ni tih hriat takin thawmhnaw inang kan ha a, chu chu mak an ti pawh a ni maithei, hmuhnawm min lo ti zâwk pawh a ni thei tho bawk.



Ama duh ngei kawr chu ka leisak a, a inhmeh reuh lutuk. Mawi a ti ngang mai a, hâk a châk thu a sawi reng mai.



"Au Muana hnênah chuan kal tawh ila?"



A lo la hre reng mai ka ti.



Gym kawtah min lo nghâk a, min lo hmuh veleh chuan a lo nui var var.



"In lo thleng har ka ti tawh lutuk a, ka lo thlîr reng che u alawm," tiin Mimawii kutah chuan a kai a," I mawi hle mai," a ti zui zat a.



"Âma pawh a mawi," a lo tih chuan ka nui hak. Muansanga pawh chu rawn hawiin," Nia, Âma pawh a mawi, in mawi ve ve," a ti leh a.



Bungraw lo thleng thar chu a țha hlawm khawp mai, a to hlawm khawp bawk ang.



"I insêng nasa àwm teh e," ka tih chuan," Nasa ve tho mai," a lo ti mai a.



"Au Muan, barbie chu?"



A bianga piaisak pah hian,"Tehrêng mai, lo nghâk lawk rawh aw," tiin a kal sawn ta rih a.



Gym-ah chuan mi pawh an awm ve nual mai. Rin aiin miin an lo bàwr a nih hmel, ka lawmpui khawp mai. Ka sawi hnawmsak duh lo mai kha a ni a; mahse, a la țantirh tehlul nèn, ka rin ai takin tlawhtu a nei tam tlat. Pawisa kha min pêk a tum a, ka hnial ve nasa a; mahse, lâk loh theih lohin min nawr a, ka lâksak vek duh chuang lo. A rilru tihnawm nân chauh ka la.



Kan awm rei phian mai. Ei tùr pawh min treat vek a, Bawihtei barbie thar a pe bawk, kan puar a, kan hlim bawk a nih hmel.



"Au Muan, ka kawr thar i en ve duh em?"



"En duh chiang e, min entîr i phal lo a niang ka tia, ka dîl ngam lo che a," Muansanga chuan a lo ti a.



Bag ațang chuan ka phawrh chhuak a, Bawihtei chu pein aniin Muansanga chu a pe ve leh a.



"A va mawi ve! I inhmeh ngawt ang, i ha chhin tawh em?" a ti var a.



"Aw, ha tawh e. Inkhâwmnaah ka ha leh ang," Bawihtei chuan a ti a.



"I hâk hunah thla i la ang a, chuan min rawn thawn ve ang a tiraw?"



"Aw le, Âma thla ka lo lâktîr ang aw?"



Muansanga chuan,"Aw le. Chuan, tunah pawh khân i mawi bawk sia, thla ka lo lâksak ang che aw," tiin a phone chu a kekawr ipte ațang chuan a rawn phawrh chhuak nghâl a.



"Âma pawh a mawi tho alawm."



"Aw le, in mawi ve ve, in pahnih khân ka lâksak ang che u," a ti a, a nui a.



"Kan vaiin la zâwk mai ang u."



Kan awm rei phian mai, kan haw meuh chuan a tlai duai tawh. Bawihtei'n nuam a ti êm a, kan haw thei lawk lo a ni.



"Âma, kal leh ang aw."



"Aw le, i fel phawt chuan Au Muana pawhin kal leh a phal hrim hrim ang," ka ti a.



"Ka fel viau ang."



Bawihteite hi kâr khat an chàwl ve dâwn a, Lunglei lamah a pite ka tlawhpui ve dâwn emaw ni ka ti deuh. Bungraw rawn thleng tùrah buaina a awm loh hrâm ka beisei, ka va awmpui rei dâwn pawh a ni chuang lo va.



Zànah chuan ka nute chu ka va bia a, Bawihtei an jmuh châk leh tawh avàngin video call ngatin kan ti țha leh.



"Lo zin phei tawh la, Bawihte?" a pu chuan a rawn ti a.



"Âmain a phal chuan."



Ka nui hak a.



"School an chàwl rih dâwn a, kan rawn phei dâwn emaw ni ka ti deuh," ka tih chuan ka pa chuan," Lo phei hlauh rawh u, hun âwl in neih khàt êm kha," a rawn ti leh a.



Ka nu chuan," Lo phei ngei ngei r'u, Bawihtei kha ka ngai tawh, kan hmu châk tawh bawk," a lo ti ve a.



"Àpi, âpa pawh ka rawn sâwm ve ang aw?"



A va buaithlâk thei țhin aw, a chhangchhiatthlâk mang e!



"Bawihte, a hman lo ang, kan awm rei dáwn chuang si lo va," ka ti sap a.



"Âpa chu a buai lutuk ang, dàwr nghah ziah a ngai alawm," ka nu chuan a lo ti ve a.



Rei tak kan inbia a, Bawihtei chuan vawiina kan lei, a kawr mawi chu ka nute chu a hmuh ve a, an rawn fak nasa bawk sia, kan inbe tàwp hlei thei lo.



*Naktûk tlaiah Bawihtei kha heta chaw ei tùrin ka rawn hruai ang, zàn pawh riak ve nghe nghe se a țha ang, a lo inzir lâwk hi a țha*



Victor-a message a ni. Ka chhâng lêt lo, țûl pawh ka ti chiah lo. Chaw va ei hi chu ka phal, a pa a ni a, a pi leh pute an ni bawk. Ka dâl hauh lo; mahse, min lâksak erawh a tum thei lo ang, a duh lova a kalsan tawh hnu a nih hi. Kan nufa hian a hnungchhawn tawh mi kan ni, min lâksak a tum a nih chuan ka tha tàwpin ka țang ve mai ang.



Message dang a lo thleng leh; mahse, hei chu Muansanga hnên ațangin a ni thung.



Vawiina kan thlalâk kha a ni. Kan lang fiah hlawm khawp mai a, mawi pawh a mawi.



*Kan va hmelțha hlawm ve!😀😀😀*  tiin ka va chhâng a.



*Chu chiah chu, ka sawi tawh kha. Mizo hmeichhiaah chuan i hmelțha ber* a rawn ti leh.



Ka zak ve țêp a ni. Bawihtei 'Au Muana' a lo ni kher a, ka zak lo mai mai.



*I zak deuh a ni maw?* a la rawn ti zui.



Nui sûng chung hian ka type a.



*Zak mai mai lo, tleirâwl chhaih zah rual pawh ka nih tawh loh hi😄* ka va ti a.



*Tleirâwl mai mai ka ni tawh lo, kum 20 ka pêl ve nual tawh*  tiin min rawn chhâng, ka nuih a va tiza roh tak. Kum 22/23 vêl bâk a la ni nâng, sâng viau mah se a la upa lo a ni tih a hmel ațangin a hriat ngawih ngawih si a.



*Nang pawh i la upa vak bîk lo êm mai, in pa khân engtin nge a țhen phal zâwk che le tih hi ka ngaihtuah fo țhìn*  te chu a la rawn ti ta deuh deuh!



Chhei leh!





*MIIN I CHANCHIN DÂWTA AN SAWI A NIH CHUAN HAW DUH MIAH SUH, KAN HRIAT CHIAN LOH CHANCHIN HI A DIK LO DEUH PAWHIN KAN SAWI FO.  HRIAT CHIAN TLÂK ERAWH CHUAN NUN TUM THUNG ANG CHE*