☆LUHLULPA☆ - 7 & 8 By Dingdi Pachuau

☆LUHLULPA☆ - 7 By Dingdi Pachuau




Lungleiah chuan kan phei ta a, ka nute'n scooty-a phei an phalh loh avàngin sumo-ah kan phei a, kawng tluanin Bawihtei chu a titi barh barh reng mai. Ka han khap deuh țhìn nain a kal khât a, a àwm ka ti tho. A thil hmuh apiang, danglam deuh nia a hriat chu min zâwt fiah zêl a, han chhìn deuh sek pawh a nei lo.



Thenzawlah kan chàwl a, khua a lum angreng si a, ka chàu nghulh maiin ka hria. Bawihtei ve chu a pângngai reng mai, ei tùr pawh a ei țeuh. A rui lo hi ka lâwm hle a ni.



Ka nute'n min lo hmuak a, ka nuin Bawihtei pawm a tum chuan ka pain a lo pawm khalh a, an han inhnial fiam leh rih a, taksa chau nghulh mah se rilru erawh a hlim veng veng thung.



In kan thlena ka chhang chiah Tea'n min lo hmuh chuan,"Yes, dàwr nghâk tùr a lo phei e," nui sûngin a lo ti a, Bawihtei chu a chhaih chhunzawm nghâl zat a.



Ka room hluiah ka awm leh ta, an la tidanglam vak lo. Mikhual an neih tam chângin ka room-ah an riahtîr ve țhin a ni àwm e. Ka thlalâk chu lian takin an lo târ kuau a, ka nulât lai, Chapchàr kût Miss ka nih lai thlâ ngei mai kha a ni. Bawihtei chuan a en duh nasa, min zâwt sek mai. Vawi khat ka zin pheipui lai kha chuan a la tê deuh a, thil awmzia a la hre chiang lo bawk a, min zâwt dîlchhût ve viau pawh chu ka hre thiam.



Zanriah ei hma deuhin ka phone a rawn ri a, Muansânga a lo ni.



"Khawiah nge in awm? In inah ka rawn kal a," a rawn ti a.



"A nih tak chu, vawiin khân Lungleiah kan phei daih alawm. Bawihteite chawlh lai a ni ve sia," ka ti a.



"In ve phakar ve! Min hrilh ve tal tùr che a nia," tiin a vui deuh nang nang a.



Ka nui hawk a, chutah,"Kan tum deuh thut a," ka ti ta ringawt. Nia, ka hrilh lêm lo.



"In tluang maw? Mimawii a rui em?" a rawn ti leh a.



"Rui lo ve, kan tluang lutuk bawk. Kawng tluanin a titi char char a," nui chung hian ka ti leh a.



"Engtikah nge in rawn hàwn ang?"



"Inrinniah a niang."



A thaw hak a," In va châm rei dâwn ve!" a ti hul hak a.



"Kan zin phei ngai loh êm hi," ka lo ti thung a.



"Ka khua a har sa ve ringawt alawm," a tih chuan," 'Ngahnge a lo har sa ve ringawt? Lo har tawh miah suh se," nui chung hian ka ti a.



"Ka lènnate ber in awm si lo va."



"Kan rawn haw har dâwn loh chu," ka ti ve ta zâwk a. Nia, a lo kal ve zut a, kan chàm chhûng chuan lènna tùr chu a vàn ve deuh maithei si a, ka chhaih kual duh tawh lo.



"Mimawii a awm hnai em? Ka lo be lawk teh ang?" a tih chuan Bawihtei chu ka ko a, phone chu ka pe nghâl a.



"A pa em ni?" ka nu chuan a lo ti zauh a.



"Ni lo ve, a u Muana a nia," ka ti a.



An inbe zârh zârh a, kei chuan hmarcha ka râwt thung. A pu TV en bulah chuan a țhu ve a, chutih lai chuan," Au Muan, Âma nèn TV-ah in lang a nia!" ring zet hian a ti a.



TV-ah ka lang maw? Ka en chhin châk deuh nain ka en duh lo, ka zak leh deuh si. Aizawlah khân TV kan nei lo va, TV neih loh miau chuan mahni chetlâ inhmuh chu a har khawp mai.



"I nute chu zan tin deuhthaw hian faknaah kan hmu ziah alawm," ka nu chuan a lo ti a.



"TV kan nei ve lo va," ka lo ti a.



"Chuan, Bawihtei biak lai chu faknaa lo lang ve tlangvâl kha maw?" a rawn ti leh a.



"Aw, tlangvâl tih lêmah, tleiráwl a ni zâwk ang chu," ka lo ti a, purùn ràwt tùr chu ka chan malh malh a.



"A pain a lo la tlawh țhìn em?"



"Umm..."



Ka nu chuan min rawn en tih ka hriat avàngin ka en duh lo. Purùn ka chan zawh chuan hmarcha nèn chuan ka chawh pawlh a, a tui hmel tawp, ka ei châk tawh.



Chaw kan kîl țan ațangin Bawihtei chu a țawng leh barh barh tawh, a puin an zirlai a zâwt ve pah bawk si a, a țawng țha leh duh khawp mai.



Tea chuan," Âma bialpa tu nge le?" a lo ti thut a.



Buai map lo hian,"Au Muana. Chuan, Âpa pawhn," a ti zawm zat.



Kan nui zo vek. Ani lah chu a han uang khawp mai a," Au Muana chu a lo lêng țhìn a, barbie pawh min pe," a ti leh zat a.



"Âpa nge hmelțha Au Muana?" Tea vêk chuan a lo ti leh a.



"Âpa a hmelțha a, Au Muana pawh a hmelțha. Au Muana chuan Âma hi hmelțha a ti a," a ti leh.



Ka mitko ka lo sàn ãk mai. Engtin nge a lo hriat theih ni? Message-ah hmelțha min tih thu a sawi a, țawngka erawh chuan a la sawi chhuakin ka hre si lo. Engtik laiin nge a lo hriat ve ni?



"A nih leh, Âma chuan tu nge a duh zâwk?"



"A ninawm! Khatiang mai mai kha zâwt chhên lo teh," ka lo ti ta vat a. Ka pa leh Tea chu an nui țhâ mai, ka nu pawh tlêmin a nui deuh.



"Ani hi chu a rilru a thianghlim a, dâwt lah a sawi ngai lo, zêp pawh a nei ve ngai hleinem," Tea chuan a ti leh a.



"Zêp ka nei bîk lo, min sawi chhan viau suh," melh rûn chung chuan ka ti a.



"Beisei loh tùr hi i lo la beisei thei a?"



"Sei lo, ka rilru lo pui min puttîr tum lo mai teh, dàwr ka nghahsak lo mai ang che?" ka ti nang nang a.



"Nia, nia, i fel alawm. A dik ang, ka sawi tawh lo ang," nui țhûin a ti zung zung a, thinrim lo mah ila ka nui ve chuang lo.



Nuteite nupa an rawn lang ta, kan phei tùr thu kha kawnga kan tlàn lai khân ka hrilh a, lo lèn an tum thu kha min hrilh rêng a ni.



"Kan naute duat hmelțha chu khawiah nge?" a rawn ti lût làng láng a.



Ei tùr eng eng emaw an rawn kensak leh ta țeuh mai. Bawihtei lah a lo hlim nasa, amah ngaihsaktu hlîrin kan hual vêl a ni si a, a àwm viau a ni.



A tûk ațangin dàwr chu ka nghâk a, Bawihtei pawh a rawn kal ve nain ka pain a hawpui leh daih. In lamah awm se a țha zâwk, dàwrah chuan naupang tân chuan tih tùr a vâng êm mai.



"E, i lo phei a ni maw? I dam țha em? I lo phei khât hle mai," min rawn hmu chuan an rawn ti deuh zêl mai. A țhen lahin," TV-ah kan lo hmu țhìn che a," an ti bawk. Nia, pasal ka neih hnu khân vawi khat chiah Lungleiah hian ka phei a, tûn hi a țum hnihna chauh a ni.



Hlim hmel pu tak hian ka lo chhàwn ve zêl a, an fel ka ti hlawm lutuk. Min be ve duh hlawm hrim hrim leh an bengvâr hlawm lutuk chuan min tihlim a ni, kei tehlul min han be ve hrâm hrâm hlawm a nia, eng ka nih loh tehlul nèn!



Tea'n thingpui leh a hmeh min rawn pe a, Bawihtei'n a rawn zui bawk. A putea chu a zui haw duh ta lo, ka bulah chuan awmin a barbie chu a khàl mai mai a, ka tîr haw duh ta bîk lo.



Min rawn dàwrtute chu polite zet zetin a lo chhàwn a, an kal tùrte chu țawngkam țha zet hian," Lo kal leh r'u aw," ti deuh thlapin a thlah vek! Chu chu an làwm khawp mai a, hlim nui sângin an in-bye bye tak lâwp lâwp bawk a! Kei a nu ngei pawh hi min dah 'zero' vekin ka hria.



Nutei'n an gym-a kal tùrin min sâwm ve viau nain dàwr nghah lamah țhahnem ka ngai deuh si a, ka kal lo; mahse, Bawihtei nèn chuan kan hman hunah kan lâm dùn mai a, lâm âwt âwt pah chuan a pi leh a pute chu lâm ve tùr chuan a sâwm a, kan chhûngkua chuan kan han lâm leh tak lâwp lâwp a, nun hi a tikhawhar lo teh asin!



Kan chàm chhûng chuan ni tinin dàwr chu kan nghâk a, Bawihtei chuan a peih chângin min nghahpui bawk a, chhùnah laklawh deuhin haw a duh thu min hrilh zauh bawk. A awm hian nuam ka ti a, a haw daih chuan khua a tihar ka ti a, ni tin zan tina inhmu kan nih vàng leh ka fanu liau liau a nih vàng hian ka ngai êm êm a ni.



A pain a rawn phone miah lo. Ani pawhin a sawi chhuak lo, a pi leh pute'n an chhaihin an tihlim peih bawk a, mi dang chu a ngai lo ve khawpin ka hria. A putea'n bazârah vawi khat a hruai a, barbie tê chi a rawn lei haw, a la làwm êm êm zui.



Muansanga erawhin a rawn phone ziah. Bawihtei chu video call ngatin a rawn be țhin, a putea barbie leisak chu chhuang zet hian a hmuh ve a.



"A tê reuh tiraw? Ka naute a nih hi," tiin a pawm a, àwi  ve ni àwm tak hian a insâwi hliau hliau pah a.



"Ka pawm ve châk e!"



"Kan rawn haw veleh i pawm ve dâwn nia; mahse, a țap țhìn a, a țap nasa thei lutuk. A țah vak chuan ka paw țhin a. Nakîn khân ka bual fai a, a sam pawh ka su fai vek," a ti leh zârh zârh a, a thil sawi chu keiniho chuan kan lo nuih thung a.



An inbiak tàwp dâwn lama," Lo haw thuai r'u aw, ka ngai tawh che u sia," Muansanga'n a tih chuan," Aw le, kan lo haw țêp tawh. Eng nge ka lo hawn ang che?" a ti a nih chu!



Tûnlai naupang mak danglam tawhzia hi chu aw..!! Țawngkam an thiam si, an polite thei bawk si, mak ka ti thei viau a ni.



Kan haw phei zànah Muansanga a rawn kal a, a lu a lo mêt thar niin. A tawi viau, a chhîp lam buk deuh erawh chu pial takin a khuih chho vek a, a inhmeh roh phian, thawmhnaw dum vek a inbel a, a țhi awrh a langsàr khawp, lan upat a tum ve deuh a ni maithei a ni.



"Au Muan, i sam kha a va mawi!!" Bawihtei chuan a lo ti hmanhmawh, a lo chîk ve viau a ni.



A nui suk, a hnâr tuai zohin," Ka lâwm e, barbie naute chu min hmuh tawh la," a ti nghâl zat, thil dang a sawi nghâl daih dànah a zak ve deuh a nih ka ring.



"Thingpui ka'n chhuang ang e, kurtai ka rawn hawn thar a, a tui ngawt ang," ka ti a, ka tho nghâl a.



An inkawmna thu chu ka ngaithla pah a.



"Lungleiah chuan maw, rickshaw a tam lutuk asin, Âma nèn pawh kan chuang a; mahse, a bengchheng lutuk," tiin Muansanga chu a hrilh barh barh a.



Ka nui sak. Ka rickshaw hman ber kher kha a lo thar fahran tawh lo lo niin, chho deuh hleka kan tlân kha a ri a ring thei lutuk  a, Bawihtei phei chuan a hlau țêp a, min kuah nghet viau a ni.



"A ni maw?! Ka va chuang ve châk e, chuan a nuam em?" tiin ani lah chuan a lo zâwt belh zêl a.



"Aw, nuam lutuk! Àputea nèn pawh kan chuang a, ke bial pathum a nei a, a tlu thei miah lo."



Awmhmunah ka lo nui ka lo nui. A hrilh ve nasa sia, rickshaw la hmu ngai lo hrilh takin a hrilh ve sia, Muansanga tân chuan a nuihzatthlâk duh dâwn êm asin.



"Ka hmu ve châk e! Lungleia in kal leh hunah chuan min hruai ve tawh rawh aw? Rickshaw-ah chuan ka chuang ve châk sia," a tih chuan," Aw le, Âma pawhin a phal hrim hrim ang," a lo ti ve mai bawk a.



Thingpui kan in lai chuan Bawihtei hriat phâk loh tùr vêl hian,"Lo zâwt lêt chiam zêl lo teh, nuam a ti thei barh barh bawk si," ka ti hlak a.



"Engah chuan maw? A titi ngaihthlâk a nawm tehlul nèn, thil a chîk reuh bawk si," a lo ti thung a.



Chutah, Bawihtei lam hawi chuan," A nih, Mimawi, Lungleiah khân zànah lo lêng țhìn an awm em?" tiin a han zâwt leh a.



"Ânuteite an lo lêng a, ei tùr tam deuh min lo ken a."



Chhàn dàn chu a thiam thei phian mai. Nuteite nupain an duat a, Nutei hi 'Ânute' a ti mai zêl a, Nutei'n a hming a koh dàn chu 'cute' a tih êm avàngin thlâktîr ka tum pawhin a phal lo.



"Mi dangte?" a lo ti leh a.



"Țhian ka nei lo va, an lo lêng lo," tia a chhàn chuan ka nui lo thei lo. Țhian nei hmanin a khawsa lova, pâwnah a chhuak lo bawk. Dàwr leh kan in inkâr kawng leh bazâra  putea'n a hruai bâk chu a chhuak lo rêng a ni.



"Nih leh, sawta i awm chhûng khân min ngai ve em?" tiin a zâwt leh a.



"Ngai vak lo."



Muansanga lungawi lo der vêl hmel ka hmuh chuan ka lo nui hak hak a.



Ni khat ka chhuak  chu ka hmanhmawh lêm lo va, Bawihteite chu an bàn har deuh dâwn avàngin hun thâwl ka nei tam deuh. Eng function emaw ni an hmang dâwn a, chumia an tih tùr chu an practice dâwn a ni. Restaurant-a ka luh chuan rin loh deuhin Victor-ate nupa ka hmu ve ta tlat mai, a nupui thar hmel hi a takah ka la hmu miah lo va, ka hmu ve chiah a ni. Hmuh loh der theih miay hek lo le, kan inhmachhawn  ta ràn a.



Ka rin aiin a lo senior daih! A hmel chu a țha fahran lo nain a ngo a, a fai vang reuh bawk. A lian viau lo tih chu ka chhuk melh theih ațang chuan a hriat mai. Tarmit lian ang reng tak hi a vuah a, a fin hmel reuh ka ti, lehkha pawh a thiam ngawt ang. Ni dâwn tak, lecturer a nih tak kha, lehkha chu a thiam chiang e.



"Eng nge i tih ve dâwn?" Victor-a chuan màwl hmel zet hian a lo ti hû a.



"Ka chàwl ve dâwn."



A bula mi hnênah chuan," Mimawii nu a nih hi. Zoni, ka nupui Helen-i," a tih zawm zat a, min hmel hriattîr kher kher chu ngai ka ti lo asin le.



Ka lo nuih ringawt, ani chuan a kut rawn phar chhuakin min chibai a, kei ai chuan a puitlingin a polite fê zâwk a nih hi. Anni chu chhuak tawh mai tùr an nih avàng chuan inbiak rei a theih loh hlauh a, zia ka ti tak tak!



Mahnia țhu ràn chung chuan Victor-a nupui chu ka mitthlà lêt a, kan dinhmun inan loh tùrzia ka ngaihtuah tel lo thei lo. Ani chu Bawihtei pi lakah pawh a tlatlum deuh ang chu, thlakip hlawh nei a ni a, kei eng mah thawh chhuah nei lo ai ngawt chuan a hnemhnànawm zâwk khawp ang, hlim pawh a hlim tawh ang, hlim rawh se, ka duhsakpui e.



Ka ei tùr chah a lo thleng a, ka ei țan chiah tihah chian Muansanga a rawn lût ve hlawl mai! Makti zet hian ka lo en a, ani pawh chuan mak a tih ve hmel tho.



"I bulah ka lo țhu ve aw?"



"Dìl kher ka ngai emaw ni le?" nûr deuh hian ka lo ti a, chutah," Khawiah nge i kal a?" tiin a lo țhu thla chu ka lo zâwt nghâl a.



"Ka pute lo thleng tùr ka lo châng a; mahse, nichin lawk khân an sumo a chhiat thu min rawn hrilh leh rih sia, ka ril a țâm tawh a," a ti a.



"Eng nge i ei ang?"



"Vawiin chu kan inhmu fuh ve hlauh sia, ei tùr ka'n chah țeuh ang e aw," tiin lehkha them an rawn pêkah chuan ei tùr hming chu a ziak thla ta nghâl a.



"Kei chu hei ka chah tawh a, a ngai lo," ka tih chuan," Ni lo ve, kan ei țeuh dâwn nia," a ti a. Waiter lo kal hnênah chuan a thil ziahna lehkha chu a pe ta nghâl a.



"Bungrua i lam leh dâwn a ni maw?"



"Aw, ka tum deuh a; mahse, ka ril a țam hma deuh a," nui chung hian ka ti a.



Kan ngawih deuh vang vang hunah chuan,"Mimawii pate kha ka hmuin ka hria a," chîk zeta min rawn en chung hian a ti a.



"Ummm..."



"In inhmu...a ni maw?"



"Aw, kan inchibai nghe nghe." Ka hmel awm dàn chîk zeta min en reng avàng chuan a mitah ka en ve duh miah lo va.



"Wow...!!!"



"Wow lêm lo, thil nih dàn phung pângngai a ni mai," ka lo ti a.



"I lài viauin ka ring tlat!"



Va naupang chhia tak! Lai viau rual ka ni tawh lo tih hre rual a ni ve tawh asin le!



Thil eia kan ngawih deuh hnuah chuan," Mimawii a bàn a hun tawh lo em ni?" tiin thu dang daih a rawn sawi chhuak ta a.



"An bâng har deuh dáwn a."



"A nih tak chu. I bungraw lo thlenni a ni tiraw?" a tih chuan ka lo bu nghat a.



"A tam leh dâwn em? Kalpui i ngai ang em?" a ti leh a.



"Ngai lo ve, bungruate chu a lo tam tâk leh, vawi hnih vawi thum pawh ka phur mai ang chu. Nang chu mi nghah i neih kha, an lo thlen hunah an hawihai lutuk palh ang. Bawihtei a lo bâng tlai dâwn a, hun ka nei tam alawm," ka lo ti duah a.



"Teh duah a!" a lo ti sap a.



A keah ka va chhuihsak ringawt.





*HUN LUNGCHHIATTHLÂK  BER CHU TU EMAW NÈN IN HUN HMAN HLIMAWM TAK, NUNHLUI HRIAT RENG TÙR CHAUHA CHANG TA KHA A NI*







☆LUHLULPA☆ - 8 By Dingdi Pachuau




Kan thil ei man chu ka pêk khalh hman miah lo, nuam lo ka ti țêp. Ka chawlhpui pawh a ni lo va, min rawn fin zâwk kha a ni si a, engtikah emaw ka la treat ve ngei a ngai ang.



Bungrua chu min lampui leh ta tho, ka inthlahrung a, a pute lo thleng tùr nghâk ni khân a insawi si a, an lo thlen hman hlauh chuan a fuh dâwn lo êm a ni.



Vawiin chu a zia ta deuh. Mi kan tam vak lo va, bungrua pawh tam ve tho mah se kan buai nuai tawh lo va, a zia viau mai.



In kan thlen hnu rei lo teah a tlán chhuak leh nghâl, a pute an lo thlen țêp tawh vàng a ni. Làwmthu ka hrilh ve luam a, a nui mai mai thung.



Bawihtei pawh a lo haw har lo ve. A lo thlen tirh ațangin vawiin lama an thil zir chu min hrilh nghâl char char a, làm an lo zir ni àwm tak a ni. An làm dàn chu min hrilh pahin amah chu a lâm ãwt ãwt a, a nuih loh theih loh.



Zànah Victor-a a lo lêng a, Bawihtei lehkha ka lo zirtîr lai tak a nia, tlêm chuan a inthlahrun hmel deuhin ka hria.



"Âpa, min zirtîr ve tawh la," a lo ti lar lar a.



Ni e, a pawi lo. Zirtîr rawh se, a zirtîr hlànin bungrua ka lo buaipui thei ang a, a țha viau ang chu.



An inzirtîr ta. Kei pawh chuan bungrua chu ka lo ching fel a, ka sem darhna tùr hmun hrang hrangah chuan ka țhen darh a.



"I bungraw chah hi vawiin angah zêl hian em ni a lo thlen a?"  tiin min rawn zâwt a.



"Aw," tiin lipstick bâwm khat chu Lunglei lama thawn tùr parcel-ah  chuan ka dah lût a, chutah an pafa lam chu hawiin Bawihtei chu a lo muhìl reng tawh a ni tih ka hre ve chiah!



"A lo muhìl tawh a ni maw? Vawiin lamah làm an zir nasa a, a chau ve deuh a nih dâwn hi," tiin ka tho a, ka kut chu sil faiin Bawihtei muhìl chu ka pawm a, khum lam chu ka panpui ta nghâl a, a muthilhna a la rei loh hrâm ka beisei, ngaihtuah lo min ti dâwn asin.



"I bungraw rawn thlen ni hi chuan Bawihtei chu ka lo awmpui thei alawm, zànah a riak thei nghâl bawk ang a?"



Ka en nghâl vat.



"I buai theih êm kha, en ta che, tunah pawh i la ti țan leih leih chauh a nia," a ti leh a.



"A pawi lo, kan dam chuan kan buai tùr alawm. Ei tùr hmua kan buai a ngai rêng a ni, awm mai maiin ei tùr a lo thleng ringawt thei lo," ka ti deuh duah a.



"I buaina ka lo tih tlèm theih nân ka sawi a nih chu, a pa ka ni tho va-"



"Ni lo, Bawihtei chu ka buaipui thei. Ani avànga ka buai thei hi ka lâwm daih zâwk bawk. A lo len deuh hnu, thil a hriat thiam hunah chuan amah avànga ka thawhrimnate hi a la hria ang a, min la chhuang hliah hliah dâwn a ni," ka ti leh a.



"I chapona kha dah țhain ka bulah awmtîr duh mai la aw... " a lo ti vang vang thung.



"Khâng kum kalta zawng zawngah khân ka buai avànga phunnàwi ka la nei ngai lo. Bawihtei hi a nu ka nihna angin ka enkawl a, mi fate angin thil țha tak hlîr ka pe thei lo a ni mahna; mahse, phatsan ka tum ngai lo. Thil țha eltiang tihsak thei lo mah ila ka hmangaihna avànga ka thil tihsak hi a ropui tho tho," ka ti leh. Ka duh ai hian ka sawi thui lo thei țhin lo, ka ka ațang hian a lo chhuak țeuh ziah.



"I bungraw lo thlen ni leh zàn chiah alawm ka tih, chu chuan a lo chhâwk zãngkhai thei ang che ka tih vàng a nih chu, sawi duah zêl a ngai lo," a ti hmuk a.



"Ka remti chuang lo," ka ti ve hmak tho.



"I fa chang a ni bîk lo," a tih chuan ka ngawi deuh phawt. Chuvàng chuan a rawn intihuai ngam deuh a niang," Kan ina a rawn riah pawh chu engah nge i phal loh viau? Ka fanu a ni ve tho a, ka nu leh pate tân an tunu, an ngaih êm êm a ni," a ti leh nghut nghut a.



Aw ka thian kharh phawt a, chutah," I fa a ni lo ka ti ngai lo, i fanu chu ni lo se chuan in in saw a rawn kal khât khawp ang chu! I duh lova i chhuahsan tawh nufa kan nih hi. Duh lova i kalsan tawh ni na nâ nâ, hmuh ka la phalsak che a nia, lâwm hle tùr i ni zâwk lo maw?" ka ti ve ta kalh kalh mai a.



A ngawi ta ngul mai. Ka duh ai chuan ka sawi na deuh chu ka ti; mahse, thu dik lo a ni lo va, thu dik hian dêng ve dawt dawt rawh se.



"I hmuh ka phalsak che a, in inah pawh i hruai fo. Nu tam tak ni se an phal kher ang em? A pa i ni a, a huat che ka duh lo va, i chungchâng pawh eng mah ka hrilh ngai lo. Thil awmzia hre rual a nih hunah pawh kei hi chuan ka hrilh kher lo ang, rilru nâa a awm tùr ka duh lo a ni," ka ti leh a.



"Ka fanu a ni, chu chu eng mahin a tidanglam thei lo, a pa ka ni a, ka hnêna a lo kal hi a thiang a ni," a ti nghut nghut a.



Kan inhnial ti ila thil awm dàn ka hrilh a ni zâwk ang chu, ka bungraw pack pawh a sâwt thei lo, a la awm hnûr mai.



"Tih tùr ka la ngah si a, khatiang thil sâwt lo kha chu sawi tawh lo teh ang," ka ti ta thlâwt nghe nghe a.



"Kan la sawi zêl ang, ka bànsan ring suh," tiin a tho thut a, kawngkhàr lam pan chuan chak zetin a kal ta nghâl a.



Ka thaw huai. Thinrim mah se thu dik a ni a, a pawi lo. A hausak avàngin engkim ti theiah a inngai a nih chuan a tisual ve khawp ang. Pasal nei lovin ka la enkawl ve ngar ngar a, ani chuan nupui a nei tawh a nia. Bawihtei lo puitlin hunah erawh a duhthlanna ka zahsak ang a, a duhnaah a awm ang, a pa bula awm a duh pawhin ka chelh lui lo ang. A pa a nihna angin a pa huatna rilru a put ka duhpui lo va, huattîr pawh ka tum hek lo. 'Rilru chhe deuh put chu mahni intihhrehawmna, hrisèl pawh a hrisèl theih loh' tiin ka pain a sawi ziah, zawm hrâm hrâm ka tum.



Ka thil tih sâwt lohzia chu a! Victor-a vàng vek. A lo kal kher kher a, lo kal ma lêk se  țha tùr hi a nia, ka zawh har phah vek! Ka zawh meuh chuan dâr a kal tam tawh lutuk. Intifaiin ka mu ve ta sawk sawk a, muthilh lah chu a chhuak lo nasa.



Bawihteite function neih ni tùr a lo thlen chuan hma takah ka tho a, a chhan chu ni dang aiin an țan hma dâwn si a, chubâkah, ka kal ve ngei a ngai dâwn bawk a, inbual lova kal ka duh loh vàng a ni.



Vawiin chu ka inchei uluk ve deuh, mawi ve tâwk tak; mahse, zahawm ru riau siin ka inchei a, holam taka va inlan ka duh lo.



Vawiin chu Bawihtei keiman ka phur ve ta a, nuam a ti khawp mai. Kawng a thui lo viau nain a sawi tam leh hman viau a ni.



Hall lian tak a ni lo va; mahse, an chei mawi reuh khawp mai. An miss-te leh an sir-te an mawng a zâng a, an che vat vat. An la naupan hmel hlawm viau, an nui sâng hlawm a, an hmel hmuh pawh a nuam viau a ni.


A hmasa berin an principal-in hun chu Pathian hnênah hlànin a țawngțai a, chumi hnuah vawiin kan hun hman chhan chu sawi fiahin naupangte, zirtîrtute leh naupang nu leh pate, hlim taka inpawhna țha neihna tùr a nih thu sawiin kan fate school-a an lo enkawl dàn kan hriat theih nán he hun hi buatsaih an nih thu a sawi hnuah chuan a kal sawn ta a. An Miss pakhat lo dingin an school naupangte hming chu a lam diat diat a, pre-school chauh a nih vàngin an tam fahran lo, an nu emaw pa emaw an kal leh kal loh hre duhin min ko diat diat hlawm a, kan kal kim khawp mai.



Chumi hnuah chuan naupang lam items neite an rawn lang țan ta a, kut kan lo bêng dar dar mai. An uniform an inhmeh hlawm reuh si a, an lawmawm hlawm tawp.



An rawn zai àl ál hlawm a, a țhenin an uar viau a, a țhen chu an phun deuh sep sep a, an zak ve tih a hriat mai. An zai zo chu a tê zualte chu an la ding reng hlawm a, a lian deuhhoin an va pawt leh tak nawk nawk a, nuih an tiza hlawm khawp mai.



Recitation kan ngaithla leh a, hei chu  a changkãng deuh ta, bahlah miah lovin asawi chhuak parh mai. A sawi zawhah uar zetin kut kan bêng dar dar a.



A hnuah Bawihteite an rawn lâm ve ta thung.  Bawihtei ngawr ngawr ka lo en bîk avàng chuan a lâm sual em tih pawh ka hre lo, uar zeta a insâwi târh târh chu ka va chhuang tak! A nui sâng mai a, a hmel chu a țha takzet a ni. Ka fanu a ni na vàng vàngin ka chhuang êm êm tho, ani aia hmelțha ka hmu lo! Nu hmangaihna mit ațanga ka en vàng a ni ngei ang. Video chuan ka cover ve nain ka lo țang lutuk a, ka kut a khùr nasa ngawt ang!



An làm zawh chuan uar zetin kut ka lo bêng a, a pa tel lova ka enkawl chhoh a nih vàng hian rual a pâwl phâk lo ang tih ka hlau a, tuna a lan dànah hi chuan mi dang zawng aiin a thiam zâwk ka ti, a zahpuiawm miah loh, min rawn hmu ve a ni chiang, flying kiss min rawn pe ngei a nih chu!



Ka fanu duhtak hi chu aw... A va zei haih haih tak! A nu hian hetiang  kawng zâwngah hi chuan ka el pha lo chu a nih ber hi. Min dah 'nil' thei khawp mai.



Nu leh pa lam ațangin thu sawi duh nei tân hun an hawng a, pa pahnihin thu an sawi. Zirtîrtute fakna an sawi deuh ber, kan fate school naupangho chu fak lehin item hrang hràng an tihlawhtling thei chu an fak leh a, nu leh pa kal khâwmte pawh min fak tel bawk e, an sawi thiam dùn khawp mai.



Refreshment laiin Bawihtei nèn chuan kan inhmu a, min rawn kuah chat a.



"Âma, ka lâm thiam i tiem? Ka thiam tiraw?" a ti sar sar a.



"Thiam lutuk! Bawihte, i thiam ka lo ti a nia aw, ka lo chhuang lutuk che a," tiin ka kut dinglam kutzungpui chu ka tipir vâ a.



"Âma, thla min lo lâk em?"



"Aw, video-in a nia. In lamah kan en dâwn nia aw. Hawh, kan pahnihin thla la dùn ang," tiin ka phone chu bag ațang chuan ka phawrh nghâl a. Ani pawh chu phûr zetin ka bulah chuan a insiam țha nghâl sat sat a.



Chawhnu lamah programme a awm tawh lo va, kan haw dâwn hnaihah chuan kan zavaiin thla kan la, mi chuan min en duh riau hlawm. Ka sàn deuh vàng chu a ni ngei ang, ka inchei ve deuh bawk sia, mi hausa fanu/nu emaw min ti a ni ngei ang!



Kan inphur haw leh ta a, haw kawngah pawh a țawng leh barh barh tho, khua hi a tihar lo thei a nia ka fanu duatlai hi chuan.



Tlaia exer kan lâk laiin school-a an làm dàn chu min zirtîr a, làm hi ka zei fahran lo va, ka tidik lo nasa; mahse, min dawhthei reuh a nia aw. Ka thiam hma chu min zirtîr ngat ngat mai!



Zànah Muansanga a lo lêng a, zanin chu a rawn nalh zaih mai. A inuluk  viau a niang, a sam pawh a pial nalh viau e, tleirâwl chhe lo tak chu a ni. A sàn roh nèn, kekawr dum a mal  phuar țêp a hâk chuan a tilang sei zual a, kamis dum lian deuh hlek a hâk chu a nghâwng lamah pakhatah chauh a kilh a, a hnuaia T-shirt vâr sar mai a hâk chuan a tilang 'fresh' viau, inchei dàn hi a thiam roh tawp, mawi ka tih dàn tak a ni. A kut dinglamah sana, a chain rangkachak rawng a bun chu a lang lawk lek lek em aw ka ti; mahse, a mawi ka ti tho.



"Min en zo tawh em?"



Ka zak lutuk ringawt! Ka lo en reng niin, ka mit ka lo la sawn miah lo a ni chiang.



"Ka en mai mai che!" Ka lai lutuk chuan ka ti ta ringawt! Tleirâwl tê, a star bula awm ang mai niin ka inhria! Mipa vàngin ka lài khât tawh asin le, a lam pawh ka hawi ngam lo!



"Au Muan, vawiinah kan lâm a," Bawihtei chuan a rawn ti ta hlauh mai.



"A ni maw?!! I lâm lai chu ka va hmu ve châk tak! Min sàwm ve tùr a nia," ani chuan a lo ti vang vang a.



"Nu leh pa chauh an lo kal a. Nang chu âpa i ni lo a, Au Muana i ni tlat alawm."



Muansanga chu ka va en zawk a, a mitko sàn ãwkin min lo en ve, Bawihtei chhànna chuan a tidang ve deuh a ni maithei, a chhâng lawk lo.



"Âmain phone-ah a la alawm, en ang u," tiin min rawn pan a, ka phone chu lain video chu ka hmet chhuak a, a u Muana lamah chuan a keng phei ta nghâl a.



An inhrilh fiah nasa mai. Kei chu  ka tho a, thingpui ka lum daih.



"I va lâm thiam tak aw!!"



"Nakînah khân Âma pawh kan làm dàn kha ka zirtîr ve a, a thiam ve tawh asin," Bawihtei chuan a ti lar lar a.



"A ni maw?!  In lâm dùn chu ka hmu châk e, lâm leh ula?" ani chuan alo ti leh a.



"Âma...? Au Muana'n kan lâm lai kha a hmu châk a, lâm leh ila?" a rawn ti ta.



"Bawihte, ka la thiam loh êm kha," ka lo ti thung a, min làm luihtîr tlat ang tih pawh ka hlau hlel lo ve.



"Au Muan, zir ve la?"



"Keimah hian maw? Làm ka zir ve ang maw? Ka thiamin i ring em?" nui chung hian a lo ti a.



"Âma pawhin a thiam tawh alawm, lâm ang u," tiin țhutna ațang chuan a tho a, phone chu min rawn pein," Âma, kan làmna hla kha han hmet chhuak leh teh," a rawn ti a.



Thingpui pawh ngaihsak thei rih lo chuan  lâm tùr chuan Muansanga nèn chuan min dintîr ta ràn mai, Bawihtei chuan bluetooth player chu a'n connect nghâl zat a. Muansanga chu ka han en a, a lo nui sûng mai. Ani pawh hi a zei fahran lo tawp ang, a lãm vak ngai bîk àwm tawp si lo.



Music a rawn ri ta, Bawihtei sûk ang chuan kan han su ve a, nui sûngin a nia kan sûk ni. Bawihtei lah chuan a uar târh târh  bawk si a, a làm ang zêla lâm tùr chuan min hrilh zêl a.



A hnu deuhah chuan kan duh tâwk ta, Bawihtei chuan," Zànah i lo lêng ang a, ka zirtîr zêl dâwn che u nia," te chu a la ti tak deuh deuh a.



Muansanga chu a nui hawk a.



"Chu chiah! Ka thiam ve hrim hrim ang, min zirtîrtunu hi a lâm thiam si a, ka làmpuinu lah hi a lâm uar thiam si, nuam ka ti khawp mai," tiin min rawn en kher. Ka lâm kha ka uar lo teh thlâwt lutuk a, min rawn kâp a ni.



Thingpui chu ka siam leh ta a, ka va pêk hnu rei vak lovah chuan Bawihtei'n min lo pan a, ka bulah chuan țhuin min nghèng chial a.



"Âma, ka mut a chhuak tawh," a ti ta sap a, a hàm bài bái nghâl bawk a.



"Hawh, ka kuah muhìl ang che."



"Vawiin lamah a lâm chau deuh a niang, a țawng duh bawk sia, thâ hi a hmang tam bîk êm a ni," nui sak chung hian ka ti a.



"Naupang hi an chhel reuh ém asin, phûr leh thatho tak hian an awm reng thei a, puitling hian tluk lohna kan nei țeuh a nia," ani chuan a lo ti thung a.



Kan ngawi leh vang vang a, Bawihtei pawh a muhìl deuh nghâl mai.



"Ka pute'n a takah an hmu châk che a," a rawn ti chhuak ringawt!



"A va làwmawm ve!" ka lo ti ve mai. A lawmawm ve alawm, eng ka nih loh tehlul nèn, nuthlawi mai mai tawh lehnghâl!



"Ka ti tak tak! Ka sawi zing ve êm che asin. Thlalâkah chuan an hmu zing tawh khawp mai che, kan inah rawn lêng ve la?"



Ani pawh hi, țawngkam hi chu a tlachham ve a ni.



"Ka buaizia chu i hriat kha," ka ti ta ringawt. Ka buai alawm, lêng tùrin hun chu insiam ila chuan a awm ve thei mai ang; mahse...



"Sunday-ah i buai reng tho em?"



Buai lêm lo; mahse, ka bialpa pawh a ni lo va, kan nufa țhianpa mai a ni a, kei nuthlawi lehnghâl hi lêng tùra min sàwm tak tak hi ka ring lo, a mawiah, a thuphungin a sawi ve mai a ni.



"Buai lutuk chuang lo ve..."



"Chuti, tûn Sunday hian ka rawn sâwm ang che u aw, i duh lo chung chu ka tilui chuang miah lo che a nia. Ka chhûngte'n an hmu ve châk si che a," a ti leh a.



"A zahthlâk ngawt ang chu!"



"Eng aiah chuan maw?" a lo tih chuan," Ka thlalâkahte chuan a tak aiin ka lang țha zêl alawm, lan mawi loh hlauvin mi thiamin min chei țhìn a," ka lo ti a.



"A takah i țha daih zâwk! Makeup an hnawih che khân i țhatna original kha an hliah tlat țhìn zâwk a," a rawn ti ta.



Kan infak hnai set set a nia. Ka zak ve thei tho.



"Chapchàr Kût Miss-a an thlan ațang tawh che khân țha ka ti daih tawh che, tûn thlengin," a la ti deuh deuh!


Ka sen ve awp awpin ka ring! Tleirâwl têin min han tihzah mai mai chu a, a zia lo êm mai.



"Chûng hun lai chuan i la naupang àwm teh e!" ka ti a nih chu.



"High school ka kal lai a nia," a lo ti țha ve mai bawk a.



"High school..!" ka lo ti sap a.



"Engati? Țha ka ti thei lo che em ni?  Ka naupan vàngin maw?" hriat thiam loh hmel tak hian a lo ti a.



"Ni lo ve, ka sawi chhuak mai mai," ka lo ti sap thung. Ka nuih pawh a za ngam lo zâwk!



"I chanchin hi ka chhui char char țhìn. Pa Liana dàwr kan fak dun ațang khân ka hre chiang ta deuh che a, pasal țhen tawh i lo ni bawk a..."



E khai!!!






*NI TIN, 'TU EMAW' KHA NUIHTÎR THEIHNGHILH MIAH SUH, CHUAN, NANG PAWH KHA 'TU EMAW' I NI VE THO TIH HRE RENG BAWK LA...*