☆LUHLULPA☆ - 9 & 10 By Dingdi Pachuau

☆LUHLULPA☆ - 9 By Dingdi Pachuau




"Muansang, chutiang-"



Min lo pawt chat vat.



"Ka naupang i ti tiraw?" a rawn ti leh a.



Um, a naupang ka ti. Chubâkah, tlangvâl enin ka en ngai miah lo. Bawihtei nèn kan țhianpa fel tak ang bâkin ka en lo alawm, ka chhang pawh rual pha lo hi tlangvâl enin ka en lo...



"Hmân ațangin ka duh tawh che, tûn thlengin. Sawi loh ka duh viau a; mahse, inchhìr ka duh lo a ni. Ka hrilh lo che a nih chuan inchhìr hun ka la nei ang tih ka hlau a ni," a ti leh a.



Nuthlawi kum 30 tling dâwn tawh hi kum 22 vêl chauhin min duh thu min han hrilh ta mai chu a nia! Sawi tùr min tihaihchham zâwk alawm le!



"I ngaih dàn a ni lo tiraw? Min haw viau a nih pawhin tih ngaihna ka hre tawh lo, hun i neih laia ka hrilh lo che
a nih chuan ka thiam loh a ni dâwn bawk si a, rilru inkhâp renga awm hi ka ning tawh. Min ngei chu ka hlau ve tho; mahse, inchhìr ka duh bawk si lo va," a ti leh sup sup a.



En pawh min en lo, a zak viau a nih ka ring. Chhàn ngaihna pawh ka hre lo, a thil sawi hian min shock êm a, chhâng tùr pawhin sawi tùr ka hre tlat lo a ni.



Ka chhàn loh avàng chuan nuam tih loh hmel tak hian,"Ih, dik tak chuan min chhâng tùr pawhin ka beisei ngam lo che, hrilh ve hrim hrim che kha ka duh chu a ni mai. Tunah chuan i awm ka tinuam lo vek àwm si a, ka haw tawh ang e," tiin a ding ta hluai a.



Bawihtei ka mal chunga a muthilh avàngin ka tho ve thei lo va," A, a la hma alawm le," chu ka ti ve tak nain a țhut duh pawh ka ring tawh chuang lo. Min tihamhaih a, ani a rilru a nuam lo ve tho bawk si ang a, sawi tùr a vâng dâwn si a, haw daih rih mah se pawi pawh ka ti lo.



Mutnaah message min rawn thawn leh zat.



*Nangmah ka duh vàng chein Mimawii kha ka hnaih lui a ni miah lo a nia aw, ka ngaina tak tak a ni. Min hua a nih pawhin Mimawii kha chu ka kawm țhin min phalsak tho rawh aw; mahse, kawm min phalsak duh chu ka ring tho, hmelțha chu an rilru pawh a țha ngê ngê si a*



A tàwpa a thu ziah chuan ka nuih a tiza reuh mang e. Thu zêp chu a nei lo ve khawp chuan ka hria, a lawmawm ka ti. A thil min hrilh khân min barakhaih viau rualin min tihrehawm hran miah lo, huat phei chu khawi lamah! Nuthlawi nih hnua min duhtu la hmuh chu nuam deuh mai asin.



Mahse, ngaihtuah tùr tam tak min chhawp chhuahsak ta thung, ngaihtuah loh theih pawh ni nghâl lo chuan. Nula pângngai chu ni ila ngaihtuah a ngai hauh lo ang.



Mahse, tunah hian kei chu nuthlâwi, fa pawh nei tawh ka ni. Pasalin a duh loh, a chhuahsan ka ni a, ka duh ang apianga awm thei pawh ka ni tawh lo. Ka fanu ka chàwm a ngai a, ngaihzâwng nei leh thei ka ni rih lo, mawi pawh a mawi lo hrim hrim.



Ani ve thung hi, tlangvâl chiah pawh a ni em ni? Tleirâwl mai chauh niin ka hria asin; mahse, chutiang lam chu dah țha rih ang. La tlangvâl țan chauh a ni a, ngaihzâwng pawh a la nei țan chho vêl chauh ang. Ani rilru la thianghlim tak chuan kei hi min duh thu min hrilh ta a ni a, mak deuh mai chu a ni!



Engtin nge kei hian ka chhàn lêt ve theih tehlul ang? Kei nuthlawi hi ani hian min duh thei lo ang chu ka ti hauh lo; mahse, ngaihtuah tùr a titam dâwn lutuk!



A hmasa berah amah leh a chhûngte. A dawtah keimah, Bawihtei leh ka chhûngte. Mi min ngaih dàn tùr erawh ka chhût lo mai ang, mi min ngaih dàn tùr chhûta ka buai chhûng chuan hlimna tak tak ka hmu ve ngai dâwn si lo. Chuvàngin hei hi chu chhût tel lo ang. Ka tân chuan Bawihtei a pawimawh hmasa ber, ka hlimna ai pawhin. Bawihtei chauh hi ka ngaihtuah tùr chu a ni rih, ka enkawl a ngai alawm.



A, a ni thei lo, a theih loh hi a ni tawp mai. Lo duh lêt ve dâwn pawh lo ni ta tehrêng ila, a chhúngteah ka tla sa. Nuthlawi kan ngaih dànte chu ka hre ve sa kur, chutah ka la upa fê zâwk zui.



He thil hi chu ngaihtuah zui chi pawh a ni lo, theihnghilh daih ang. Ani pawhin rilru nat leh huatah la lo se, ka dinhmun hi min hriat thiampui zâwk se tih hi ka duhthusàm a ni.



Mahse, nuam lo ka ti. A lo lêng leh ngai a nih chuan ka en dàn a dang lo thei tawh si lo ang. A chhan chu a hma ang ngawt kha chuan ka en thei tawh bík tawp nâng, min duh thu kha sawi chhuak kher lo se chuan a hma ang chiahin ka kàwm bawrh bawrh thei ang; mahse, tunah chuan 'eng emaw' a awm tawh dâwn tlat.



Ka muthilh theih loh avàng chuan zîngah ka thawh har phah lehnghâl, a zia lo tak tak. Hmanhmawh zetin ka tho a, kan nufa ei tùr siam a hautak lo hlauh a, school kal hmanin kan intîr chhuak thei ta hlauh mai mai. Chìn tam chi chu a ni lo maw le!



Muansanga chu a thil min hrilh zàn ațang khân a zak ve deuh a niang, a lo lêng ta lo deuh; mahse, zan thum bâk a ni lo.



A zan lìnaah chuan a rawn lèn hmain Mimawii a rawn be phawt a, lehkha a zir leh zir lohte chu a rawn záwt a, a ngaih tawh êm avànga rawn hmuh zawk a tum thu a rawn hrilh chuan Bawihtei chu a khêk rai rai a.



"Au Muan, i lo kal duh tawh lo va, ka ngaihzia che chu! Barbie pawhin a ngai ve tawh lutuk che. Sakawra chuan pawh ka châk leh tawh bawk a," a ti barh barh a.



"Âma hnênah khân ka lo kal a phal leh phal loh han zâwt ve phawt la?"



Loudspeaker ka on vàngin an thil sawi chu ka hre vek a, Bawihtei chuan," Âma, Au Muana lo kal i phal tiraw?" tiin min rawn zâwt a, room-a ka luh zawk hlàn a nia. Phone keng chungin min rawn zui lût a ni.



"Aw, phal e."



"Au Muan, Âmain a phal a nih chu. Lo kal thuai thuai rawh aw, ka lo meng reng ang," a ti leh lar lar a.



Ka sam chu ka'n huih țha ringawt a! Eng ka hria chu ni maw, zanin chu ka inhmu dum riau mai! Ka hmai hi ka enkawl ngun tâwk lo deuh a niang, rawn bawl a tum deuh lehnghâl. Ka va han chhe tak!



Dárthlalangah chuan ka inen vang vang a. Muansanga rawn kal dâwn vànga chhia han intih thar tâk thut mai chuh! A hmain ka care ngai tehchiam si lo, zanin chu ka dang tlat, ka inhre thiam bîk chiah lo.



Khua a vawt lo va, a lum lutuk chuang lo bawk. Muansanga pawh a rawn inthuam lum lêm lo, thawmhnaw dum hi a ngaina ve hrim hrim a nih dâwn hi, zanin pawh a rawn dum leh tawh!



Mahse, ka lo en chîk viau tawh lo. Vawi khat ka en thuak chuan ka hre thei mai a ni, ani pawhin min en vak bîk lo, Bawihtei chu a be deuh char char.



"Au Muan, ka sakawrah țang leh tawh la, i chungah ka lo chuang ang?"



"Aw le-"



Ka lo inrawlh vat.



"Bawihte, khatiang kha chu ti tawh lo la, Au Muana kha a hah lutuk ang. I lian ve tawh si a, i rit dâwn si a, a khûpte pawh a tina palh thei asin," ka lo ti vat a.



Fuh lo ve alawm. Intinalh ve takin a lo kal ang a, sakawr lema țan leh daih te chu, a zia lo hrim hrim.



"Vawiina school-a in zirte kha hrilh zâwk la?" ka ti leh. An pahnih chuan min rawn en reng tih ka hria, kei erawh chuan ka phone chu ka bih lui deuh tlat thung a.



"Au Muan, i khûp chu i tina țhìn em?" tiin Bawihtei chuan a zâwt a.



"Na lo ve, kei chu mipa ka nia, a na ve mai mai thei hleinem," a lo ti a.



"Âpa angin i chak ve tho tihna mi?" ani chuan a lo ti leh.



A zawhna mai mai chuh! Ka nuih a tihzat rualin chhànna ka hre châk khawp mai.



"Aw, Âpa pawh a chak a, kei pawh ka chak alawm."



"A nih chuan, Âpa nèn chuan in insualin tu nge chak zâwk ang che u?"



Muansanga'n a chhàn hma chuan kawngka a rawn ri koh koh a, ka lo chhâng vat.



Victor-a a rawn lût zân zân a, Bawihtei'n a lo hmuh veleh chuan," Âpa a lo kal!" tiin a tho vat a, a pa pan chuan a tlân nghâl a.



"Eng nge i lo tih a?" tiin a pa chuan Bawihtei bianga fawh zoh pah chuan a ti a.



"Au Muana nèn kan lo inkàwm a. Âpa, Au Muana nge chak ang nangmah?" tiin a zâwt nghâl zat. Kei chu thingpui buaipui tùrin ka kal sawn a, kan in a zau loh avàng erawh chuan anmahni ka hmu theiin an țawng pawh chu ka hre thei vek tho.



"Tu nge chak zâwk a i rin le?" tiin a pa chuan a zâwt lêt thung a, Muansanga țhutna ni lo zâwk țhutthlèngseiah chuan a țhutpui nghâl a.



"Âpa, i chak zâwk ang tiraw?  Au Muana aiin i lu a lian zâwk sia."



Ka lo nui chhuak hawk, ka insûm hman lo. Bawihtei tih loh pawh chu an nui ve tho nain an nui ri ve lo, min rawn melh rawlh dùn ve ve.



Thingpui ka va pêk lai chuan Bawihtei chuan a pa khabe hmul chu a lo chùlsak a, ani pawh chuan sawisêl lo hian  a lo dawh ve mai mai bawk a.



"Ka lâwm e," tiin Muansanga chu a lo phun sap a, min rawn en zawk a; mahse, a mit a la sawn nghâl.



"Bawihte, vawiinah eng nge in zir le? Mamawhte i nei em?"



A inti ngaihtuah thar ta lutuk chu mak ka ti! Hun danga a rawn tlawhin chutiang a zâwt ngai si lo.



"Âpa, àpu rawn hruai ve tawh la?" tiin Bawihtei chuan a lo zâwt lêt thung.



"Engati maw?"



"Ih, sakawr chungah khân ka chuang châk leh tawh a. Au Muana hi sakawr lemah a chang țhìn a, a chungah ka chuang țhin; mahse, Âma hian a phal tawh lo va," vui deuh nung nung hian a ti a.



Victor-a chuan Muansanga chu a en a, chutah, awmze nei fê hian min rawn en leh a.



"Naktûkah ka rawn hruai ang che, àpu pawhin a ngai tawh che alawm. I barbie-te leh i teddy bear lian tâwk pawh khân an ngai tawh lutuk che. Kan inah i rawn awm daih duh em? Àpu kha sakawr lemah changin i duh duh hunah i chuang thei reng dâwn asin," tiin a thlêm a.



A thil tih dàn chu țhing ka tih êm avàngin ka lo inseh ruh a, țawng erawh ka insûm. Muansanga awm laiin chutiang sawi ka duh lo va, ani sawi pawh ka duh lo. Bawihtei thlèm hran a tum lehnghâl a, Bawihtei hriat laia thinrim awka hman ka duh hauh lo bawk.



"Âma nèn kan lo awm thei ang em?"



Ner sakin ka maimichhîng vang vang. Victor-a pawh a buai ve nak ang chu. Engah nge a zawh chhuah kher kher ni?



"Âma saw zâwt la?"ka rin loh deuhin Victor-a chuan a ti ta daih!



"Bawihte, i meng rei tawh mah mah a ni, naktûkah hma tâwkah i tho thei lo palh ang, muthilh tum tawh la?" ka lo ti daih.



"Âma, ka ha kan la nâwt lo," tiin a pa kuahna ațang chuan thovin min rawn pan ta nghâl a.



Tho ve nghâlin," A ha ka'n nawhpui lawk ang e," ka ti a, bathroom-ah ka luhpui ta nghâl a.



Engtin tak lo inkàwm ve ang maw?



Kan chhuah chuan Muansanga a lo awm tawh lo! Engtizia nge le? A haw dâwn pawh a sawi si lo, Victor-a awm ve vàng hi a nih ka ring deuh ringawt.



"Aw Au  Muana chu a lo haw daih a ni maw?" a thuphung chuan ka ti a.



"Ka lo kuah muhìl dâwn che em niang, Bawihte?" Victor-a chuan a lo ti a.



"Ni lo ve, ka ti thei alawm," ka lo ti vat.



"Kha pa khân eng nge a lo tih teivet a?" A lungawi lo țawngkam chu leh!



"Sawi ka duh lo a nia. Bawihte, thawnthu chhiar i duh em?" tiin ka zâwt. Ka thinlung chhûngrila thinurna chu ka beng dài hrâm hrâm. Bawihtei hriat laiin a țawngkam hman ang kha hman ka duh lo tih hre ve tùr a ni asin.



"Aw, Chhûrbúra thawnthu kha aw."



Mizo thawnthu hlui bu ka leisak a, zàn mut dâwnah kan mut dun chuan ka chhiarsak țhìn. Mut rual loh châng kan nei zauh zauh nain kan chhiar sâwt khawp mai.



Bawihtei muthilh hnuah chuan a zawhna ngai bawk chu min zâwt leh a.



"Tlangvâl a nia, a lo lêng ve a ni mai alawm. Nang pawh hei i lo lêng a, ani pawh kan nufa min kàwm hlim tùrin a lo lêng," thinur deuh țûn chuan ka ti a.



"I bialpa a ni tiraw? A lo lêng ve ziah, Bawihtei kawm atân khatiang tlangvâl tawh kha ka duh hauh lo, remchâng atân ka fanu hi ka phal hleinem," a ti!



Ka ngawi phawt, ka inthunun a ngai.



"Ngaihzawng chu i nei thei; mahse, ka fanu hi i chang lo ang," a ti leh.



"Nupui nei lai tân chuan haw a hun viau tawh a ni, a tlangvâl zâwka pawh a haw tawh a nia," ka ti ta charh a.



Min melh rùn rún mai.



"Kan fanu hian duhthlan theihna a nei a, i hauh hlur thei lo ang. Ka bula a awm duh phawt chuan lâwm takin ka lo pawm ang, țha taka enkawltu tùr nu thar a nei tawh lehnghâl a, hetia ngaihzâwng neihsan mai mai ai chuan ka hnênah awm se, ani pawh nun țha takin a nung thei ang a, i zalèn thei zâwk bawk ang chu!" a ti nghut nghut.



"Nupui i nei tawh a, fa i duh a nih chuan paitîr ve mai la, engah nge min chuh tlat a? Nang angin kawppui dang ka neihsan lo va, ka theih tâwka țhain ka enkawl chho mêk a nih hi," ka ti chang khal a.



"Fa ka awtin i ring maw? I tisual a nih chu. Hei, tihpalh thil thuin ka ti dâwn em ni, i luhlul luatah fanu ka nei tawh reng a, a dang ka duh hauh lo. Kan nu hian pai pawh a pai thei hleinem, chuvàngin alawm ka neih. Nupui rai puar pèr pùr neih ka duh ngai lo."



 A va râpthlâk tehlul êm! Chutiang sawi chhuah duhna thinlung a nei pawh chu mak ka tiin râpthlâk ka ti takzet. Hei hi ka lo duh êm êm țhin, pasal atân hiala ka neih Victor-a ngei kha a ni si, Bawihtei pa a la ni zui!



"I lo hlauhawm hle mai!" ka ti ringawt! A rilru chu a hlauhawm ka ti, a țha lo lam side ka hmu zing ta malh malh bawk alawm.



"Ka duh loh záwnga awmte lakah phei chuan hlauhawm thei tak ka ni," nui sukin a ti. A nui hmel te chuan ka luak a tichhuak, min tidam lo dâwn hialin ka hria.



"Bawitei hriat laiin khatiang thu țha lo kha sawi tawh lo hrâm ang che," tiin ka ngèn ta ringawt.



"Kha naupang, inti tlangvâl ve țan kha i hlatsan chuan Bawihtei chu i enkawl chho zêl thei ang, a lo puitlin deuha a duhna zâwk zâwk a thlan thiam hma chu. A hnu lam erawh chu,,," tiin a sawi zawm duh lo va.



"I sawi zawh tawh chuan haw tawh mai ta che, mut ka duh tawh a." Ka polite reng peih tawh bïk teuh lo, a duh duh a sawi khum tùr lah ka ni hek lo.



"Ka sawi chu hre reng rawh, ka thlithlai reng ang che."



Àn khum hrep ka va châk tak! Bawihtei chu vêngtháwng lo ila chuan ka âng nasa ang. Âng chiam ta ila thil țha ber a ni ang em? Min chhaih thinrim a âng chiam tùrin min lo chhaih kawlh pawh a ni maithei asin. Chu chu a thil tum a nih nfai chuan tihlawhtling lo phawt ang.



"Min àn khum dâwn nange?" a rawn ti ta chiah.



"Thu ho mai mai sawiin ka chil per ka sêng thlàwn peih lo," ka lo ti thung. Ka inthunun thei chu ka lâwm viau mai.



Mut hmunah a thil sawi chu ka ngaihtuah. A nupui chuan fa a lo nei thei miah lo a lo ni maw? A hausak vàng leh fa a neih theih loh vàngin a nei a ni ngei ang a, mihring rilru hi a lo va inang lo thei ngai êm!!






*I NGAIHTUAHNA RILRU KHA THINRIMNA, HUATNA, KHÂKNA LEH THIL ȚHA LOVIN TI KHAT LO LA, CHÛNG CHUAN A TIHCHHIAT PAWH PHAL HEK SUH*



☆LUHLULPA☆ - 10 By Dingdi Pachuau




Hun chu a liam ve zêl a, Pathian zâra dam chuan Krismas rim pawh a rawn nam ve leh țan ta. Bawihtei pawh exam pui pui ni lo deuhin test ang reng ve deuh an nei ve dâwn a, a huphurhawm loh. Lehkha zir a peih a, zanriah ei kham veleh hian kan zir a, rei ka zirpui ngai lo. Test hnaihah chuan Muansanga pawh a lo kal khât ta khawp. Kan inlêng ve ber a ni si a, a lo lan khàt chuan a ngaihawm ve  dâwn dâwn alawm le! Bawihtei lahin lehkha a zir dâwn hian a sawi chhuak ve ziah, a ngai ve bawk a niang.



Khatiang thu kha a sawi chhuak leh tawh miah lo. Kan pahniha kan awm fàl ve deuh pawhin ka bia a nih lêm loh chuan a ngawi reng mai a, a zak țhìn niin ka hria. Bawihtei bulah erawh chuan mi nèlawm ber anga khawsain a țawng bawrh bawrh a, ka bulah erawh chuan ka nei lo ang hmakin a awm țhìn, ka bia a nih chauh loh chuan a țawng ngai lo.



Lêng tùra min sàwmna pawh kha ka tihlawhtling lo ta kha a ni a, ka tihhlawhtlin loh chhan chu a hriat tho ka ring. Ngaihzâwng ang hi chuan min hnaih lo se ka ti; mahse, ka duh dàn ang ringawtin ka awmtîr thei bîk em ni? A chunga thu neitu pawh ka ni lo va, a rilru thlâksak theitu lah ka ni hek lo. 'Min duh suh' ti ringawt ila a rilru ata min duhna a tibo nghâl thei bîk nâng, ka ngaihtuah ka ngaihtuah hi chuan ka rilru a tinuam lo țhìn, khawngaihna chin ka nei ve tho bawk si.



*******



*Ka rawn zin lawk dâwn, chuan, ka rawn thleng dâwn bawk aw*



Nutei message a ni.



A va nuam dâwn tak! Titipui tùr a awm dâwn e, Bawihtei a muhìl hma thei si a, khua a har țhin alawm, lo zin hlauh teh se.



"Ânutei a lo zin dâwn a nih chu," tiin Bawihtei hnênah chuan ka hrilh a, ani pawh chuan," Yess...," phûr zet hian a lo ti a, chutah,"Eng nge min lo hawn leh ang aw?"a ti vang vang a.



Hmm, ka fanu tak hi chu aw. An nupain an duat lutuk a, an rawn tlawh hlek chuan thil eng emaw rawn hawnsak zêl tùrah a ngai tlat tawh, țha lo ka ti; mahse, an rawn tihsak zêl tho si.



"Bawihte, thil a lo hawnsak che lo beisei zêl lo la?" ka ti ta ringawt.



"Âma, Ânuteite chu an fel alawm, 'Min lo hawn rawh u' ka ti ngai miah lo va, min lo hawn zêl tho sia," a lo ti mai thung.



Naktûka an test-naa mi tùr chu ka zâwt a, a thiam viau mai zêl, a ngaihtuahawm loh tùrah ka ngai.



Rei pawh menpui lovin ka mutpui thuai. A muthilh hnuah erawh ka phone ka khawih a, order-te chu ka en kual a, Nutei chu ka text pah bawk  a.



*'Nge i lo tih dâwn a?* tiin.



Min rawn chhàn vat pawh ka ring chuang lo, a la hman lo tawp ang, anni hi chu an mi lian chêt raih zêl a. Chaw an ei har thei si, zàn pawh an meng rei thei bawk.



*Mimawii chu naktûka a test hmachhawn tùrah duhsakna sâng ber ka hlàn e*



Muansanga. Test a neih tùr a lo la theihnghilh lo a nih hi, vei roh tak chuan. A ngaihawm hnûp hnûp roh mang tak e.



*Aw le, kan lâwm e* tiin ka chhâng lêt ve, ka lâwm tak tak alawm. A pa zâwk pawhin duhsakna thu a rawn hrilh lo a nia, a rawn ngaihsak miah loh hi.



*Zo thuai thuai teh se, ka ngai tawh lutuk!*  a rawn ti leh.



Ka nui sak, dáwt a sawi chu ka ring bîk lo. Keini pawhin kan ngai ve tawh alawm, lo lêng ve ber a ni si a, a reh ruih ruih lutuk tawh.



Mahse, ka han chhiar nawn leh a, kei chu min ngai ve miah lo a nih hmèl. Bawihtei a ngaih thu chauh a nih hi a rawn ziah, chu chuan tlêmin min tilunghnûr deuh.



*Ani pawhin a sawi a sawi țhìn che*  tiin ka chhâng leh a. Chutih lai chuan Nutei message pawh a rawn thleng ve ta chiah.



*Nuthlawi men a hun ve chiah a ni maw?😀* a rawn ti ham ham mai.



*Ka zawhna kha chhâng mai teh* ka ti thung.



*Ka rawn thlen hunah ka hrilh chauh ang che*  a la rawn ti zui, chimawm ve pângngai ang chi kha.



*Tûna min hrilh loh chuan ka ngaithla peih lo ang*  ka ti ve tlat.



*I hre châk tih ka hria, lo nghâk hrâm hrâm rawh*  a la rawn ti deuh deuh!



*Thil țha pawh va ni suh, sual lam bâk a ni lo ang*  tih ka thawn leh, keimahin ka nui sak sak thung.



*Nia, damdawi, chêng 10,00,000 man ka rawn phur dâwn*



Fiamthu mah ni se ka bulah chuan awm se, ka sik vak ang. Ani erawh chu a nui leh țiah țiah tawh ang chu! Thil ni lo pui hi han sawi ila, a aia uar sauh hian a rawn phuah belh ta țhìn a, a nui zui vak vak zêl zui, tunah pawh hian a nui nasa dâwn lutuk.



Chhâng lovin Muansanga message chu ka chhiar ta rih. Message pahnih a lo awm reng tawh a nih hi.



Message pakhat zâwkah chuan *Naktûk zànah ka lo lêng nghâl dâwn aw, i phal ang tiraw?*  a rawn ti a, pakhat lehah chuan *I online hmuh hi nuam ka ti miah lo* a rawn ti thung.



A va inpèrsan angreng ve!



Online lo ila a message pawh ka chhâng thei dâwn si lo va, engah nge ka online chu hmuh nuam lo a lo tih ve ngawt ni?  Mipa dang ka biak a ring em ni? A thîk ang maw?



Ka lu ka thing. Ni lo, a teuh lo lutuk! Chutiang chu ngaihtuah pawh ka ngaihtuah tùr a ni lo.



Nutei a lo thlen chuan Bawihtei pawh inah a lo awm vang tawh a, car a rawn ken avàngin lo hmuah chiam a ngai lo va, a zia takzet. Thil erawh a rawn keng leh țeuh mai, chawhmeh, thei leh Bawihtei làwm zâwng, kan fridge pawh a khat leh ta hmuk e.



"Inbual la?"



"Teuh lo! A vâwt si, ka rawn kal dâwnah ka inbual a, ka la bàl hman lo," a lo ti tlat.



"Aw,,,tuilum a awm alawm," ka tih pawh chuan," Ka peih lo, ka bàl lo ka tih chu. 'Ka pasal bulah ka mu dâwn sia' tih ni mang hlei lo, naktûk lamah le," a ti leh daih.



"I pasal bula mu tùr ang chuan inngai la ni mai alawm," ka lo ti ve sak.



"Ka peih chuang looo..."



Zanriah hma takah tuiti takin kan ei a, a chawhmeh rawn lei chu a hmin awlsam chi ka siam a, ka siam sate nèn kan hûng ve dul mai.



"Victor-a a lo lêng ngai em?" tiin hmun phiat pah chuan min zâwt a.



"Ngai hran nâng."



"Âpa maw? A lo kal duh tawh lo a niang, min rawn kan khât lutuk," Bawihtei chuan a lo ti ve nasa. Nutei nèn chuan kan inen a, kan nui dùn ringawt.



"A nih tak chu! Ka hmuh hunah 'Bawihtei va tlawh vat rawh' tiin ka lo hrilh dâwn nia," Nutei chuan Bawihtei hnênah chuan a ti a.



Thlèng ka sil zo deuh chiah tihah chuan kawngka a rawn ri a, Bawihtei'n a chhàn veleh Muansanga a rawn lût ta nghâl.



"Au Muan..!" lo ti hliaiin a lo pan vat a, an han inkuah a.



"I lo kal lo va, kawm tùr pawh ka nei lo alawm. Âpa a lo kal khât bawk si," tiin a vui nang nang a.



Nutei chuan min rawn en a, dàr ka lo chhìn ãk ringawt a.



"Vawiin test-naah chuan i ti țha viau em?" tiin Muansanga chuan a zâwt a, țhutnaah chuan a țhutpui ta nghâl a.



"Ka thiam vek!"



"Wow..!! Ropui lutuk! Kan ina lo lèn i bâ chiah a nih chu!" Muansanga chuan nuih sak chung chuan a ti a.



"Âma nèn aw?"



"Aw le, a duh phawt chuan. A duh lo emaw a hman lo emaw a nih pawhin nang chu lo lêng tho rawh aw, uitê te reuh tê ka nei a, in inkàwm ngeih ngawt ang," a ti duah a.



"Uitê maw? Ka va hmu châk tawh! Ka lo lêng ngei ngei ang aw. Au Muan, uitê chu engtin nge i koh?" tiin phûr zet hian a zâwt nghâl char char.



Thingpui ka chhuang a, Nutei chuan min rawn zui pahin keimah chauhin ka hriat theih tùra zàwi hian," Tu nge a?" a rawn ti sap a.



"Saw, Bawihtei țhianpa saw."



Rinhlelh hmel zet hian min en phawt a, chutah,"A nih tak chu," tiin a kal sawn ta nghâl a, an bulah chuan a va phei ve a.



"Ânute, Au Muana hian uitê a nei asin, min hmuh ve dâwn, naktûkah an inah ka lêng dâwn a," tiin a lo hrilh siam siam a.



Hm, naktûka lèn a lo tithlu leh tawh a ni maw. Ka lènpui loh chuan, amah chauh chuan ka kaltîr thei lo ang. Ngaihtuah loh chan ka chang dâwn asin, Muansanga hi ka ring lo a ni lo, ka ring reng; mahse, Bawihtei zâwk hian a va tibuai lutuk ang tih ka hlau. Mi inah a kal ngai si lo, awm dàn chintâwk a va hre lo ang tih a hlauhawm alawm.



Thingpui ka va pêk chuan Bawihtei chu a lo la titi nasa, an bul hnaih deuh taka țhut pah chuan,"E, ngawi teh u, kurtai ka theihnghilh ," tiin ka tho leh nghâl zat.



"Senior tawh!" Nutei chuan a lo ti vat a.



"Hriat rengna aiin hriat reng lohna hi a chak zâwk tawh a," nui chung hian ka ti a.



"Senior hrî a nih kha, kum 40 i nih hunah phei chuan..." a lo ti leh vang vang a.



"Senior hleinem, kum 30 pawh i la tling lo," ka rin loh deuhin Muansanga chuan a lo ti ve boh.



"Niar ve tawh e, nakinah a la hmu zo te a nih ngai chuan pasal, ani aia senior daih hi a la nei ang a, senior fê hnuah fa a la pawm leh ang a, awii, ka peih lohpui che, i haihawt dâwn tawh si," nui awr awr chung hian Nutei chuan a ti leh a.



"Mahni ka intîr zing dâwn tihna a ni mai a, a nat hluah hluah loh chuan a pawi vak hleinem," ka lo ti ve thung a.



Kurtai ka chhawp hnuah pawh chuan kan titi chhunzawm zêl a, Gym chungchâng sawi chhuakin anni pahnih chu an thu a inhmu țan ta riau. Tui zetin an sawi dùn a, kei chu ka lo țawng ve mang lo.



Bawihtei hàm deuh bài bái ka hmuh chuan ka ko vat a, ka mal chungah a rawn bawk nghâl tharh.



"Au Muan, naktûkah chuan ka lo lêng ngei ngei dâwn a nia," a ti leh hrâm.



"Aw le, ka rawn hruai ang che, i mumangah uitê chu hmu la aw?" nui sak chung hian a ti leh a.



Bawihtei muthilh hnuah Muansanga chu rei a lêng lo. A haw ta thuai a, a kal  hnuah chuan Nutei chuan," A la naupan hmel viau a, thil chu a hriat roh kha le," a ti vang vang a.



"Kan khum a tê sia, chhuatah mutna phah mai ang hmiang," ka lo ti daih thung.



"A ngai hleinem, țhutthlèngah hian ka mu mai dâwn alawm," a tih chuan," Ni lo ve, i dâwih ve sia, zanlaiah i hlau palh ang," nui chung hian ka ti a.



Kan phah zawh hnua kan mut chuan," Thil eng emaw chu a awm tiraw?" tiin min rawn zâwt thut a.



Makti zeta en pah hian," Engah maw?" ka lo ti hû a.



"Lo lêngpa nèn khân maw le. A melh dàn che kha ka hmu ve reng alawm, ka mit a del bîk lo," a lo ti a.



"Âwihawm loh e a!" ka ti hlak.



"Nangmah lam chu ka hre lo; mahse, ani kha chuan a en dànah che khân 'awm' chu a awm alawm," tiin min rawn hnaih sauh a," Bawihtei hi chhuanlamah a rawn hmang a ni lo maw?" a tih chhunzawm zat a.



"Naupang mai a nih kha."



A nui ta hak a.



"Naupang mai chu a nih tawh loh kha. A la upat hmel vak lo nain a rilru kha a puitling roh tlat, a titi dàn ațang khân. Victor-a hian kha pa chungchâng kha a hre ve em?" tiin eng eng emaw a rawn sawi chhuak duah mai.



"Naupang mai ka tih chu. Victor-a erawh sawi chhuah a ngai lo, engtin pawhin ka awm thei, lo inrawlh theihna a nei lo. Bawihtei hi ka fanu a ni a, thil dang ngaihtuah thei ka ni lo," ka ti ve ta duah a.



"A nih leh, Au Muana chuan a ngaizâwng che tiraw?" a rawn ti leh.



Ka thaw deuh hak.



"Vawi khat chu min duh thu a sawi ve tawh alawm, khap theih ni bîk suh, a rilru, thinlung leh hmui ka thunun thei tlat si lo va," ka ti ta nge nge a.



"Ka rin dàn chiah! Wow..! thil awm dàn hi chu ka man ve țhin alawm. I lo hnial ngei bawk a, tiraw? Ka khawngaih roh e a, a hmêl tê lah kha a chhe lo roh bawk si," a ti sap sap a.



"Sawi tawh lo teh."



A nui hak a.



"Victor-a'n nupui a neihsan tawh che a, hmalam i pan ve tawh a ngai.  Bawihtei chu i enkawl pah tho ang, chuti chung chuan nun hi hlim takin i chèn ve tùr a ni. Nun chèn thiam apiang an hlim a ni mai," a ti dap dap a.



"Bawihtei bâk hi ngaihtuah ka nei lo," ka lo ti thung a.



"Chutiang ringawt a ni thei nâng! I la upa bîk lo va, fa enkawla tar ringawt tùr lah i ni hek lo, nang phei chu i hleitlingin i nalh a, tlangvâl chhe lo tak takin an rawn hêl zut chein ka ring-" a tih lai chuan rang zet hian," Chutiang an awm lo," ka lo ti vat a.



"An va mâwl ve! Au Muana chu a fing ber a nih chu, in kum inthlau deuh viau mah se 'Kum te chu number mai mai alawm' an tih kha," a ti leh a.



"Eng chu maw i lo tih dâwn a?" tiin thil dang ka sawi ta daih.



"Pk ve siah!" a ti phawt a, chutah," Khuta doctor kan pan kha, Durtlângah a rawn kal a, ka hmu leh lawk dâwn a," a ti ve ta a.



Fa neih chungchângah phaiah an zu kal țhin tak. An zu kal zing viau, hlawhtling ve se ka ti țhin hle bawk. An kal hnuhnun ber țum khân an beisei kha a sâng viau tawh a nih kha.



"A nih tak chu, a țha lam a nih zêl ka beisei," ka ti a.



"Nia, chutiangah chuan ngai ang," a lo ti ve sap a.



Phone ka en a, Muansanga message a lo awm reng tawh.



*I senior miah lo, ka mitah phei chuan nula tam zâwk ai hian 'nula' dik tak i ni. Haihawt hi chu thil awm ve thei pângngai a nia, an rilru pawh a sual ngai hleinem*  a rawn ti!



Ka nui sak. Ve roh tak chuan.



"Kum eng zât nge a nih rêng rêng a?" Nutei chuan a rawn ti chhuak leh. A rilruah a khat liam a nih àwm hi.



"22 a nih loh chu 23 a niang."



A tlak karh a," A la naupang hle tak mai a!" te chu a ti lawi a. Chutah," Mahse, in induh tawn chuan a țha tho," a ti leh boh a.



"Chutiang eng mah ka sawi lo," ka lo ti a.



"Victor-a hawisan nân leh engah mah i ngaih lohzia tihlan nân ngaizawng hmiah leh," a ti leh ringawt.



Va buaithlâk thei tak!





*TU MAHIN I MITTUI, I LUNGNGAIHNA LEH I NATNA KHA AN RAWN HMUHSAK LO CHEIN AN RAWN HRIATSAK LO CHE A; MAHSE, I THIL TIHSUAL  PALH ERAWH KHA CHU AN HRE RENG THUNG*