☆PHATSANNA RUNTHLÂK☆ - By Dingdi Pachuau

☆PHATSANNA RUNTHLÂK☆ - By Dingdi Pachuau





Ka awm nuam lo nghulh reng mai chu ka ning lutuk ringawt. Khawsik deuh ser ser leh ni deuh nghulhin ka awm reng a, ka duh dàn ang tak chuan awm thei ila chuan nilêngin mut reng mai ka duh ang; mahse, duh dàn dánin ka awm thei si lo.



Taksa kham deuh țhûm, khawsik deuh er er leh pum ni deuh nghual chuan ka tho a, ka pasal erawh kan khum piaha long chair-ah chuan bang lam hawiin tui hmel zetin a la mu. Mipa niha la mut ve reng mai chu ka châk ut ut alawm le!



Peih lo zet chuan thovin, bathroom-ah chuan ka inphih harh phawt a, rei vak lo chhûng chu dârthlalangah chuan ka hmel chu ka en. Ka mit lang bui țêp leh ka hmai sen deuh țal chuan damlo min ti ang ka ti, ka duh lo kher mai.



Tûn hnaia ka awm dàn hian min tilungawi hlawl lo. Ka taksa a rit hnulh maiin ka hria a, ka rihna pung chho erawh chu pasal ka neih hnu ațangin a ni tih ka hria a, a hmaa uluk taka ka taksa ka enkawl ang khân pasal neih chuan enkawl a lo rem tawh lo, hun a awm loh bâkah a inthlahrunawm tawh. In chhûngah hna thawh tùr a tam tawh a, hna hahthlâk tak thawk ni si lo hian ni tin mai hian hna a awm a, mawng pawh ka húng hman lo a ni ber, 'mo thatchhia' tia mi min sawi nih ka lo duh bîk si lo va.



Eirawng bâwl tùr chuan chokaah chuan ka chhuak phei a, ka nu a la rawn tho lo a, a hmà lutuk tawh loh vàng chuan ka che hmanmawh ve deuh. Duata chuan kal hmà a duh leh àwm si a, a rawn thawh chuan chaw ei  kha a rawn rawt leh ringawt mai ang.



Chawhmeh siam thar vak a ngai lo chu ka lâwm, ka theih tâwpin, ka siam chhun chu ka siam uluk ve, a tui ngei bawkin ka ring. Kei erawh chuan a rim chu ka ngai thei lo, ka luak a tichhuak. Ka pum țhat loh hian reh lam aiin zual lam a pan zêl a nih ka ring a ni. Ka tuar ve țàng țáng nain vawiin lam chu ka inentîr mai ka ngaih hmèl, Duata hrilh kher erawh ka tum lo, a rilru ka tihnual nasa tawh si.



Rawng ka bàwl zawh chuan room phiah fai ka tum deuh a; mahse, Duata ka tiharh ang tih ka hlau leh deuh a, sitting room leh veranda chu ka phiat ta zâwk. Ka phiah zawh chuan thawmhnaw sûk tùr kan dah khâwm chu ka la khâwm leh a, chutih lai chuan Duata leh ka nu chu an rawn tho ve ta mai bawk. Ka nu chu thingpui a duh leh duh loh ka lo zâwt a, Duata erawh room lama a luh leh rih avàng chuan ka zâwt hman lo.



Ka nu chu thingpui ka pe a, insu tùr chuan insûkna hmun chu ka pan ta nghâl a, a tam lêm lo va, a zia viau. Washing machine nei mah ila ka hmang khât viau. Kan thawmhnaw hi    a bàl lutuk ngai si lo va, kut hlîrin ka su țhin, washing machine-a sûk chu thawmhnaw ka ui. Mut puan, cushion case leh parda erawh machine-ah ka nuaitîr mai țhìn thung.



Ka su zo țêp tihah ka nuin min rawn ko a, Duata'n chaw ei a lo rawt leh tawh a nih chiah chu. Luhai deuh chhawlhin ka tho a, maimichhîngin ka ding vang vang leh phawt a, ka chhuak chauh.



Chaw ei lai chuan Duata chu a țawng hauh lo, vawi khat chu ka bia, 'aw' ti chauhin min chhâng. Ka chungah a lungawi lo deuh sa tawh a, ka hre thiam. Keimah tak hi ka indem, ka awm dàn dik loh vàng vek hi a ni; mahse, ka inthunun thei dêr si lo. Chaw pawh chu ei puar thei lovin ka kham leh tâk ringawt chu.



Ka awm dàn hi a hrehawm.



A hmanhmawh êm avàngin thlah ka tum pawhin min ngaihsak hman lo, heti êm êma hna hmanhmawhthlâk hi an nei ngai meuh lo asin le, ka bula awm a peih lo aniang, kei lah hi tûnlai hian ka thin a lo chhe ve deuh hlak bawk si a, ka bula awm hi hahthlâk deuh mai tùr a ni. A awki a tihrin ve deuh hlek lahin ka mittui a tla nghâl a ni deuh zêl mai si a, ka lak ațanga inthiar fihlìm hma hi a duh a ni ang e.



Chaw eina ka tih fel hnuah chuan ka thawmhnaw sûk bawk chu ka buaipui leh a. In chungah ka han zâr a, ka chhuk hnuah hmunphiah leh a ruhna tùr keng chhovin ka han phiat fai a, step ka phiat nghâl bawk. Ka nu chu khawiah nge a lo kal hman ka hre lo, ka chhukin a lo awm lo hman tawh.



Kan room leh ka nu room chu ka phiat fai leh a, a hnuah chuan chhuat chu ka nâwt fai vek. Heng hi chu ka ni tin hna a nih vàngin tih ngei ngei tùrah ka ngai tawh a, hrehawm pawh ka ti hek lo. Kan inah pawh ka thawk ve țhin tho; mahse, kan inah kha chuan min àwltu an awm ve țhìn a, ka hah lêm lo viau a ni.



Furniture ka hru leh a, tukverh dârthlalang ka hru tel bawk. Kan ina ka hna thawh peih loh ber chu tukverh dârthlalang nawh fai kha a ni țhìn a, tunah hi chuan engkim ka kut vek a nih tawh avàngin peih emaw peih lo emaw ka nawh a ngai a ni mai. Nupui fel, mo fel ka nih a ngai si a.



Ka tih zawh hnuah ka țhu chàwl lawk. Tui ka in a, tlêm chuan ka zia deuh; mahse, kan kawmthlangte chhang siam rim rawn nam chuan min tibuai leh ta, bathroom-ah ka tlân lût, ka luak a chhuak, min rawn hnawh up up. Ka tui in chu ka luak chhuak leh vekin ka hria.



Ka chau lutuk. Bathroom chhuat vawt deuh thlerah chuan ka țhu zawi ngawih ngawih mai, ka va ning tak êm! Eng chena rei nge hetiang hian ka awm ang le?



Kan room-ah muangchângin ka lût a, khumah chuan ka țhu leh ngawih ngawih. In chungah thawmhnaw pho han seng a ngai leh tawh dâwn, step chho kal ka va peih lo tak êm! Mut ka châk, kan in ka ngai ngawih ngawih êm mai!



Ka țhutna ațang chuan thovin ka hma zâwn taka calender chu ka melh a, ka inentîr a ngai a ni. Ka inentïr hnuhnun ber kha thla nga liam taah khãn a ni tawh, ka period mumal loh vàng kha a ni a, ka rai ve ta emaw kan ti hial a nih kha,(kan inneihna hi kum têl zet a ni ve tawh a ni) khami țuma ring lo deuh si, ring ru deuh bawk si a kan awma kan hlim rûk si zia kha; mahse, damdawia kan kal khân ka lo rai tawp si lo.



Drawer chu ka va hawng a, pregnancy test kit chu ka la chhuak ringawt. He thil hi ka va hmang țangkai lo tak! Hman țangkai hun hi ka la nei ve hlawl lo a ni. Ka țhiannu Linda-i min pêk a nia, kan inneih ațanga thla khat hnuah a ni nghe nghe.



Hmang ve mai mai chhin ang, hetia dah reng mai ringawt chu awmzia a awm lo êm mai.



Ka luak chhuak nghual mai te, zîng lama ka khawsik deuh ser ser țhin te leh ka rilru na hma lutuk ka inthunun theih lohziate chu ka ngaihtuah chho a, ka period pawh a mumal lo leh tawh a nih hi, kâr hnih deuhthawin ka period hun a lo pèl tawh.



Test kit chu ka en reng ringawt! Ka hmuh sual a ni miah lo, rìn pahnih a lang chiang ngang mai. Ka maimichhîng vang vang a, ka hlim dâwn nge, ka hlauthâwng viau dâwn? Ka rai ve tak tak tihna em ni?  He kit hi a dik meuh ang maw?



Test kit pakhat ka va la leh a, ka test leh. Chu pawh chu, a hma ang chiah tho. Kut khùr dar darin ka en nawn leh ngat; mahse, a ngai reng. Rìn pahnih tho a lang. Fa kan awh êm êm chu ka pai ve țan ta tihna. Ka rilru chu hlimnain a rawn khat a, ka mittui a rawn hnai. Duata'n hre ve ta se a lâwm ngawt ang chu! Ka phone dâwn em ni ang? Kei ang tluk zetin a lâwmin a hlim ve dâwn asin.



Ni lo, a lo haw veleh ka lo 'surprise' ang. Chuan, naktûk lamah a dik ngei a ni tih hre chiang turin damdawi inah kal taila...



Ka nawmsam lohna chu ka theihnghilh deuh vekin ka hria. Phûr zetin in chungah thawmhnaw pho ka han seng a, ka nâwt leh thlap. Engkim mai chu a thar deuh sur vek maiin ka hria, nuam veng veng tak a ni.



Ni dang zawng aiin hun chu a kal muangin ka hria, phone hmang lo tùr chuan ka inthunun char char. Hrilh chu ka châk tawh lutuk; mahse, ka thil plan a kal sual vek palh ang.



Dâr 2 vêlah Duata chu a rawn haw thut mai! Ka lo la inring lo asin le!



"Honey, room-ah lo lût nghâl teh, thil sawi tùr ka nei a nia," a ti a.



"Duat, kei pawhin thil hrilh tùr che ka nei ania," ka lo ti ve, hlim over-a lan ka lan loh nân ka inthunun hrâm hrâm, ka hmel ațangin a lo ring thiam palh ang, mak ti viau se ka duh rih si a.



Room-a ka luh chuan khumah a lo țhu a, ka lût chu min lo en miah lo. Min en duh lovin lungawi lo angin lang rih mah se, thil thar kha a hriat hunah chuan...



"Ințhen ang."



Eng maw? Ințhen a!!A tifiam emaw ka ti a, a bulah chuan ka va țhu. Ka va țhut veleh chuan ani chu a lo tho daih thung, min tihrilhhai letling hial.



"Ințhen ang ka tih chu!" Hei chu a hma ang ngawta dam a ni tawh lo, a vîn deuh țhat mai.



"Duat, ințhen maw? Engati nge-"



"Thil sawi awlsam tak leh nuam tak a ni lêm lo. I awm dàn hi ka ning, ka ning takzet tawh. Ka tuar thei tawh lo, i pasal ka nihna ka hre tawh lo bawk!"



Țawng ngaihna rêng ka hre lo, mak ti êm êmin ka pasal chu ka en tlawk tlawk ringawt!



"Nupa awmin kan awm lohna pawh thlà hial a tling tawh ang chu! I chunga ka rilru put dàn a dang vek tawh, ei tùr duhsak êm ëmin ka rawn leisak țhìn che; mahse, i ei duh ngai lo. Eng emaw sawi ila i inla no êm êm zêl bawk si, awm dàn tùr ka hre zozai tawh lo, min chhuahsan mai rawh," a ti ta khawl khawl mai a.



A thil sawi chu ka rin loh lutuk hlîr a nih avàngin ka ngawi reng, râpthlâk ka ti zâwk dâwn em ni, rilru hrehawm takin ka lo ngaithla tlawk tlawk mai a ni.



"Fa min neihsak thei bawk si lo, i rihna lah a tam belh tia sawi pawhin hloh i tum ngai bawk si lo. Han inen teh, i nulât lai ang khân i mawi tawh miah lo, i inthlahdah lutuk a nih kha. Nupa kan nih anga ka duh ang min tihpui thei lo nupui hi ka mamawh lo va, ka duh hek lo."



Ka mittui a lo hnai viau a; mahse, ka insûm hrâm hrâm. Hêng a thil sawi zawng zawng hian silaimuin taksa a dêng dawt dawt ang maia nâin ka thinlung chu a dêng na ngawt ngawt mai a ni.



"I țhiannu Linda-i nèn khân kan induh tawn tawh. Ani chuan min pêk theih loh, ka awh êm êm fa min pe thei ngei ang, chumi tùr chuan hma ka la mêk bawk. Kan ințhen dàn tùr chu i duh duh dàn a ni mai, sum chhuah i duh ber ka ring a, ka duh dàn tak chuan tunah hian insiam nghâl la a țha mai ang," a ti leh.



Chutianga thui chu maw an lo kal tawh? Ka țhiannu ve ber Linda-i nèn lehnghâl. Thil hi a va mak ngai êm! Kan tâna mi rinawm bera kan ngaihte pawh hi mi hlauhawm ber ber an lo ni thei reng a lo nih dâwn hi.



Ka rilru siam felin ka mittui chu ka hru hul nghâl a.



"A țha alawm, i duh dàn ang takin ni rawh se, kan ințhen nghâl e; mahse, thil ka sawi ve lawk ang aw. Ka nulât lai angin ka duh angin ka taksa ka ngaihtuah thei tawh lo, ka taksa enkawl nân hun ka nei tawh tlat lo a ni. Insûk, in chhûng chêt leh  mo hna zawng zawng ka tih a ngai vek tawh si a, ka taksa tihnalh nân hun ka nei thei tawh lo a ni."



"Chuan, ei tùr min leisak zawng zawngah khân lawmthu ka sawi. Ka ei ngai loh chhan chu ka luak a tichhuak țhìn a, ka awm dàn hi tûn hnai deuh mai ațangin a danglam tih i hriat kha, a hma anga ria nalh ka nih tawh loh vàngin hrehawm ka ti  țhìn, chu vàng chuan i lakah ka insit a, ka hnial mai țhìn bawk che."



Ka tho thut a, test kit ka dah țhat chu ka va la a, a bul dawhkàna dahin," Tunah hian i fa ka pai mêk asin, kha vàng khân ka awm dàn a danglam a ni; mahse, awmzia a awm tawh lo. Thu tlûkna kan siam tawh, kan tidanglam tawh lo ang, ka chhuak nghâl ang e, bungrua erawh ka chhûngte'n an rawn la ang, i hmalam hunah hlimna ka duhsak che," tiin ka phone leh ka bag, wardrobe bula ka khai chu lain amah pawh en tawh lo chuan kan nupa room ni țhìn; mahse, tûn second hnih khat ațanga ni tawh ngai lo tùr chu ka chhuahsan ta nghâl a.







*HUN HARSA HIAN  TU EMAW NIHNA DIK TAK A LO PHO LANG ȚHÌN*