☆LUHLULPA☆ - 21 & 22 By Dingdi Pachuau

☆LUHLULPA☆ - 21 By Dingdi Pachuau





Hriat chian vek ka châk a ni. Engtiang fakauvin nge Victor-a chuan a lo tihnat ang ni? A hre ve ang em le?



"I rawn sawi chhuah leh tâkah chuan i ute chanchin chu i hre chiang ve em?" tiin ka zâwt leh țan a.



A lo hre tam tehchiam lo, a hunlai khân a la naupang ve dâwn êm asin, a àwm ve tho. A hriat ang ang, a nu leh pa sawi dàn chu min hrilh ve ta a.



Victor-a leh Muansanga u Ruatsangi chu Mumbai-ah college khata kal dùn țhin an lo ni a, Mizo an tam loh avàngin an inkàwm tam bîk a, chuta țang chuan an lo inzui ta a ni. Duh pawh an induh tawn viau mai a, a hnuah phei chuan an chêng dùn ta nghe nghe; mahse, hêng hi chu an ințhen hnuah chauh Muansanga nu leh pa hian an hre chhuak. Master degree an zir leh a, hetih lai hian Ruatsangi chuan nau a pai a; mahse, Victor-a hian a duh loh avàngin an pahnih remtihnain an titla a, an zir chhuak dáwn tihah chuan a rai leh a, hei erawh Victor-a lakah a thup ta thung. Pai luih țâlh a tum vàng a ni bîk lo, tihtlâk erawh a duh tawh lo thung.



An inkawp chhûng pawh chuan Victor-a chuan a lêrhsan reng a; mahse, Ruatsangi chuan a duh êm avàngin a ngaidam zêl. Rawn haw chhoh an tum laiin Victor-a'n haw chhoh a duh leh loh avàngin an awm leh rih a; mahse, chutih lai chuan a rûkin Victor-a chuan a rawn chhohsan daih. Chuta ţang chuan an inkâr chu a buai chho ta a; mahse, Ruatsangi chuan a țhen thei chuang lo, a âtchilh tlat tawh. Victor-a'n a nambar a thlâk a, Ruatsangi rawn haw chho chuan Victor-a chu an inah a kalchilh tawp; mahse, thlâwk bo tùrin a lo hrilh. A rai chungchâng chu a hrilh leh pawhin 'Min puh suh, ka fa a ni thei ĺo, mi dang fa ka fa angin puh i tum a nih kha' a lo ti.



Mahse, Ruatsangi chu a beidawng duh chuang miah lo. A hmu lui tlat zêl a; mahse, Victor-a nuin a lo kamkhat leh tâkah chuan a zak ta lutuk a, pâwnah pawh chhuak ngai lovin inah a tawm tlat țhìn.



"Chûng lai vêl chuan i u chu i hmu ve țhìn em?" tiin ka lo inrawlh a.



"Hmu vak lo, a room-ah ka lút ve ngai lo va. A, khatih lai khân ka lo mâwl êm a ni, damlo pângngaiah ka lo ngai hmiah ringawt a," a lo ti mai a.



"Nih, engtikah nge hetiang thil hi i hriat chhuah ve?" ka ti leh a.



"Goa-a a awm hnuah chauh. A thuphungin Mamite chanchin chu chaw ei laiin an sawi a; mahse, harsatna nasa tak a tâwk tih an sawi tel hauh lo, bialpa nèna ințhen vànga dam țha lo tih chauh an sawi. A hnuah ka nuin ka nuteite phone-a a hrilh ka hre ru leh ta a, chutah chuan chiang takin ka hre ta chauh a ni. Mami chuan a naupai chu a rilru nâ avàng leh a buai avàngin a ngaihven thei lo va, eng mah a ei thei lo nèn, a chhiat ta daih a ni àwm e. Chutia nau a chhiat chu a rilru a buai chho leh bawk a, an buai nasa a ni; mahse, ka bulah eng mah an sawi ve ngai lo, thil dik lo a awm a niang tih ngaihna pawh ka lo hre ve ngai lo bawk.  Mami chu khawpui lian zâwkah inenkawlna țha hnuaiah a zu awm ta reng a, a pângngai leh hnuah pawh a rawn haw duh ta lo a ni," a ti leh malh malh a.



A lo nih teh hrep chu a.



Chuan, a nu leh pa chu an fanu vàng chuan an rilru a na êm êm a, an fanu rilru na taka hliamtu Victor-a nupui hlui ka nih vàng leh amah kaihhnawih hnaihtu ka nih vàng chuan an rilru chu a dam thei lo va, țhen tùrin min ti ta hial a.



Nia, an tân chuan pawm ka harsa ve ngawt ang chu. Chutah, an fapa neih chhun bialnu atân chuan kei, nuthlawi lehnghâl hi chu ka tling hlawl lo, kumah lah kan la inthlau êm êm zui. An thil tawn hi kan chhûngkaw tawnah ka dah chhin a, a pa thil tih dàn pawh hi thil tihàwm lo tak chu niin ka hre bîk lo, an rilru a la dam loh miau chuan.



Mahse, Muansanga han kalsana a rilru han tihnatsak chu ka va hreh tehlul si êm! A rilru tê hi a thianghlim roh si a, min duh ve viau bawk si, kalsan tùr anga ka ngaihtuah chhin ringawt pawhin ka ka huphurh sa ngawih ngawih.



"En teh, Zon, kei chuan i rilru ka tihnatsak ve hauh lo ang che. Mami chunga a bialpain a tih ang kha i chungah ka ti ve hauh lo ang tih ka tiam bawk che. Min ring tiraw?"



Ka kut a vawnna chu enin," Aw, ka ring che," ka ti sap a, ka rilru erawh a vâk kual ruai thung.



"Ka lawm e. Pawisa ka khâwl sauh sauh ang a, nang leh Mimawii tân innghahna tlâk nih ka tum tlat ang. I duh ang hi pêk theih che ka duh, hun ka la duh deuh dâwn avàngin min nghâk hrâm thei ang tiraw?"



Min ring êm êm si a, amah kalsan tumna ka ngaihtuah vuai vuai a ni tihte hi hre ta se...



Bawihtei mut hnuah chuan ka ngaihtuah kual nasa mai a, lo kalsan dâwn ta ila eng chhuanlam nge ka siam tâk ang tih leh ka kalsan dâwn a nih si chuan Aizawl hi ka chhuahsan mai a ngai ang tihte chu ka ngaihtuah kual nuai a. A chhan chu Aizawla ka awm reng chuan min rawn hmuh a tum țhìn ang a, a hmel hmu thei renga ka awm a nih si kei ngei pawh hian ka țhen thei lo ang.



Ka rilru a va hah tak! Victor-a thil tih buaipui ngai bawk, Muansanga țhen ngai bawk, Lungleia phei daih ngai dâwn bawk, chutah, ka sum hmuh vena ber buaipui țhat leh ngai dâwn bawk. Muhìl thei lo chuan ka thaw hawk hawk a, ka inlet sek bawk.



Ka thil ngaihtuah chhuah chu duh lo viau mah ila he ka harsatna hrang hrang tawh lakah hian tlàn chhuahna țha ber a ni thei ang, Victor-a'n min tibuai thei tawh lo ang a, Muansanga pa thu ka âwih thei bawk ang a; mahse, ka hlimna chu ka chân ve thung dâwn a ni.



Bobby-a hi ka hman țangkai mai loh chuan, ani hi Muansanga pawhin a thîk phâk deuh tùr, a lo hriat tawh sa a ni bawk a, a tih chi ber ang. Muansanga ka țhen chuan a chhûngte ka tilâwm thei ang a, nunhlui an hre chhuak an hre chhuak tawh lo ang. Victor-a pawhin Bawihtei min chhuh thei tawh lo bawk ang.



Mahse, Muansanga mawlh hi, ka va khawngaih dâwn tak! Kei hi chu kalsantu tùr ka ni a, fanu enkawl tùr leh buaina tùr tam tak ka nei dâwn bawk a, rilru na tak siin, rilrua amah ngaihtuah ngut ngut hman lovin ni chu ka tlingtla thei mai zêl ang, ani tân pawh kalsantu zâwk ka nih chuan tuar thei leh amah theihnghilha mipa dang ngaihtuaha thlang ta zâwk kha ka nih dâwn miau avàngin tlâwm inti viau mah se a tuar chhuak thei ngei ang.



Ka kalsan hma chuan hlim takin ka siam phawt tùr a ni. Kei ngei pawhin chu chu ka duh, hlim ka duh ve tho, ani nen hian hun hlimawm, ka theihnghilh tawh ngai loh tùr hman dun ka duh, ka țhen hnua ngai taka ka ngaihtuah lêt vang vang theih nân. Ka nunah mipa dang, ani anga duh hi ka tawng tawh lo maithei si a.


*******



Ka țhen hun tùr ngaihtuah duh lo leh Victor-a nèn kan buaina chungchâng ngaihtuah duh lovin Muansanga chu hun hlim takin ka hmanpui zêl a, a ngaih tihțhat loh phah nân a hman lohna tùrin over tak erawh chuan ka tibuai sek lo. A hlim hmel hmuh a nuam ka ti thei hle a, ka lo en leh veng veng țhìn.



"Hetiang hian hlim dùn reng ang aw."



A mit takah chuan en duh lovin ka nuih sak ringawt a, chutah, bu nghatin chawlhbûk thlang lama sava te reuh tê pakhat, thlâwk kual zauh zauh chu ka kâwk a.



"En teh, a mawi reuh asin!" ka ti ta daih a. Ani pawh chu rawn inherin ka hnunglam ațang chuan min rawn kuah a, ka sam chu hnim vang vangin," Ka hmu ve miah lo," a ti sup a.



Ka nui hak," I en lohte chuan i hmu thei nâng maw le," ka lo ti a.



"Ka hmuh theih renga i awm hi chuan hmun dang ensan i har țhìn a," a tih chuan a kutah ka sik vâwt.



"Over viau suh aw," ka ti hlak a.



"Tak tak alawm, sava tê ai chuan i mawi zâwk daih tih ka hre bawk a."



Min kuah nghet sauh. Chutih pah chuan rawn kûn hniam deuhin ka nghâwng chu a rawn fâwp zoh a.



"Rimtui bawk si!"



Ka thin phu dap dap pawh chu a hre chiang ngawt ang chu. A chêt dàn lah hi, ngaih la tâwk tĕ hian chêt hi a thiam a, ngaihtuah zui vang vang theih tùr hian min duat țhìn a.



"Awm dùn reng thei tawh ila ka va ti tak! Thlah tawh ngai lo tùr chea kuah che hi ka duh bawk a ni," a ti leh sar sar a.



"Min ning leh si ang, khua a rawn lum ang a,'min dek suh' i ti reng mai ang," nui deuh chung, fiamthu pah hian ka lo ti a.



"Teuh lo mai! Kei chuan ka ning ngai lo ang che, kalsan hmasatu che pawh ka ni ngai lo ang. Phal la chuan in ina rawn luhkhung hial che pawh ka duh ang chu," a tih chuan a kut chu nghet zet hian ka lo hûm a.



"Kha maw, i phal miah loh kha," a ti nghut a, a țawng zâwng chuan ka nghâwng chu a rawn thâwk khum lum pah ham ham a.



"Nuthlawi -"



"Sawi ziah tawh suh ka tih kha. Ka tân chuan nuthlawi i ni lo, nula hnahkhat ngat, ka duh êm êm leh hlim taka siam ka duh chu i ni, eng mahin a tidanglam thei lo ang," a ti leh a. Chutah, a kut pakhat chuan ka khabeah rawn dawmin amah en thei tùr chuan sîr zâwngin a rawn her a.



"Ka thinlung lalnu, he khawvêla amah chauh duh tura lo piang ka ni, atân chauh ka nung ang," ti supin ka hnâr hmâwr têah chuan a rawn fâwp zoh a.



"I va sweet reuh tak!"



A rûm nghut mai, kei ka nui hak thung. Sweet reuh ka tih kha a ngei tih ka hria; mahse, a haw tak tak lo tih ka hre chiang ve êm!



"Sweet i tih vàngin,"ti nghutin ka nuih lai tak chuan min rawn fâwp vut mai, ka hmui ka chîp tlat. A chimawm thiam leh ta, chutia ka chîp tlat chu ka hmui hnuailam chu a seh pah ta tlat, ka tâl deuh nain ka khabe a dawmna pawh chu a thlah duh hauh lo.



Kan inmelh dùn ràn mai, ka melh rum a, ani lah chu a meng sawr sawr duh chauh, min thlah chuang lo. Ka melh rum poh leh min seh na tial tial.



"A naaaaa....!"



Chu chu a lo châng reng a niang chu, rang zet hian a lei chu ka ka chhûngah a rawn luhtîr ta chiah, hnehtu chan chang mitmeng chu ka hmu chiang ngang mai.



Mahse, ka chhâng lêt duh miah lo thung, ka awm ngai rengin ka awm lui ve tlat; mahse, chu chuan a tibuai lêm lo a ni tih hriat tak hian a kut ka kâwnga a kuahna chu chêtin chunglamah a rawn chêt chhohtîr ta hret hret, ka kut pahnihin ka lo man ve chat, a insual ta fat fat.



Ka khabe a dawmna chu thlahin ka nghâwngah a chûl thla leh ta, ka kut dinglamin ka lo chelh leh vat, kan kut ve ve chu an insual leh ta.



"Zon..." harsa tih hmèl zet hian a rawn ti chhuak ta sup a. A mitmenga duhna tinrêng lang chhuak chu ka hmuh hmaih lo nasa, kei pawh hian ka duh reng, ka tuar lui țàng țáng a ni si.



Kan infawh tâk vawng vawng hnuah chuan ka lungphu a dik lo țan, ani pawh a duhthawhin a thaw deuh huam huam mai.



Motor horn rawn ri tuar tuarah chuan kan inthlah rang kher mai. Motor ațang chuan mi an rawn khêk chiam chiam a, ding chuang lovin an tlân liam leh daih. Ka lung phu su dup dup chu ka va haw tak!



"A va țûl lo tak!" tiin a rûm nghut a.



"Min rawn hria ang em le?" ka lo ti khùr deuh dat thung.



"Tleirâwl rual awm ngaihna hre loho an nih dâwn kha," a ti leh nghut a.



'Tleirawl rual' chu a la ti ve a nia! Ani pawh hi an zînga la tel rual chauh a la ni si a, a insawi tel ve miah si lo, ka nuih a tiza zâwk!



"Kan haw tawh dâwn em niang? A tlai ve tawh viau lo maw?" ka tih chuan," Kan boruak an rawn tichhe vek!" lungawi loh hmel zet chuan a ti ngal nghal a.



"Hun kan la ngah alawm," zah theih loh chhuah chuan ka lo ti a.



"Mi min chîm buai theih lohna hmunah ka hruai tawh ang che maw le!" a ti leh sup a.



"I la urhsùn lutuk a nih kha," tiin a nghâwngah kuah thutin ka fâwp a, a rin loh dàn deuhin ka chê a ni chiang, a ding khawng reng mai!



Thlahin,"Kha maw, min chhàn duh tawh miah loh kha le, min ning tawh a nih kha, haw tawh ang le," tiin nui chung chuan ka kal ta nghâl a, min rawn ban zawk nain min man hman ta chuang lo, motor bulah chuan ka lo nghâk a.



"Khângho kha, an thiltih pawizia hi hre ngat se chuan aw..."



Kan ding khawtlai tawh bîk lo, kawnga kan tlàn lai erawh ka kutah a rawn hmer leh vawng vawng țhin.  He pa hi chu aw, a sîr zâwng pawh hian a țha êm êm mai a, a rawn hawi lahin a țha bawk si, thlìr reng mai ka duh.



"Ka en ve reng thei si lo che a, motor ka lo khalh ta kher kher hi ka thin a rim," a ti sup a.



Ka lo thlîr reng tih ka inhre chhuak chiah.



"Keiin ka lo en reng thung che a, a țha mai alawm. Engati nge i țawng zâwng khân i hmui kha i tihpawrh deuh kher zêl a?" ka tih chuan min rawn melh chiang ngang mai.



"Kawng en rawh, kan accident ang e," ka tih chuan a hawi sawn ve leh mai bawk.



"Ka tipawrh lui pawh a ni lo, a lo pawrh ve tawp zêl a niang; mahse, a sexy daih zâwk alawm," thutak zeta a tih chuan ka lo nuih hawk hawk a.



"Sexy daih zâwk! Chuan, ka en cheuh cheuh che hian an deuh i nei ka ti," amah en vang vang pah chuan ka ti leh a.



"Naaa...chhe àwm êm mai," hmui tikum phût phût chung chuan a lo ti a.



"Chhe lo lutuk ringawt! After tih film-a a changtupa kha i hria em?" ka tih chuan a chal tichuar deuh nâng nâng hian," A hming chu ka hre thuak mai thei. A thawnthu hrim  hrim kha chu ka chhiar tawh a, a film lam ang zâwng chuan ka la en lo," a lo ti ve mai a.



"Ah, thawnthu i chhiar ve țhin maw?!!" ka lo ti vat.



"Lehkhabu ka chhiar ve nasa alawm. Mãwl deuhah chuan min ngai bîk lo la."



"Ni lo, ka ngai mãwl hauh lo che. I kum phû lo hian i fing ka ti asin, lehkhabu i lo chhiar țhin vàng a nih chiah chu," ka ti phawt a, chutah," A changtupa chu i hre chhuak thei ta em?" ka ti leh a.



A ngawih deuh vung vung hnuah chuan,"Hardin Scott a ni lo'm ni kha?" a rawn ti charh a.



"Aw, ni e. Film-a Hardin-a lem changtupa zâwk kha a nia ka tih chu, Hero-a a nih kha," ka lo ti a.



A nui suk.



"In inang ka ti, chhe lo dùn si," ka tih chuan mitko sàn ãk hian min rawn en phei a.



~I can be your hero, Baby~
 tiin a rawn zai ta kher a nih chuh! Ka lo en hau mai!



Ka khabe chu rawn dawmin," Chîp teh, tho a rawn thlâwk lût ang e," tiin a nui suk a, chutah," Chu pa chu eng ang hmel pu nge ka hre ve châk hle mai, chhe lo i tih si chuan," tiin kawng lam chu a hawi leh vat a.



"Chhe lo lutuk a ni mai! In inrual vêl hial ang chu," ka tih chuan a rûm leh nghut tawh!



"A film kha ka en châk a nia aw..." ka ti vang vang a.



"Ngai lo, kei aiin i mitthlaah a lang tam palh ang," a lo tih chuan rum deuhin ka va melh.



Zàna a rawn kal chuan laptop a rawn keng a, makti zeta ka lo en min hmuh chuan," After film kha i en châk a ni lo'm ni?" a lo ti mai a.



"Châk e."



"Kan en ang chu," a tih chuan ka khêk țhat. Bawihtei awm lai pawh sawi lo chuan ka va kuah thut, Bawihtei rawn hawi ka hmuh chuan ka thlah leh vat a, ani lah chu a lo nui vur vur thung.



"Au Muan, ka lo kuah ve duh che," tiin a rawn kal hnai a, ka kuah dàn ang chuan a rawn kuah ve a, kan pahnih chuan kan inen a, kan nui  tawp ringawt.



Mahse, Bawihtei men chhûng chuan kan en lo. A mut hnuah chuan khumah ka sawn a, keini pahnih erawh film en tùr chuan țhutthlèngah țhuthmun kan la rem țha sauh sauh thung a.



A kapkârah țhuin ka nghèng ar ar a, ani erawh țhu-mu deuhin a awm thung. Ka mal chungah laptop chu ka dah a, chu chu a hmuh chuan," Khatah khân dah suh, laptop mai mai lehnghâlin awmna a chang țja lutyk!" a lo ti sup a.



A malah chuan ka chumsak a.



"Sawta ka dah chuan a hla dâwn lutuk asin," ka tih chuan," Pawi lo, i mal chunga dah kher kha chuan ka pawi a sawi," a ti leh deuh tlat.



A changtupa lo lan veleh chuan," Khi, en la, inang chu i inti ve tho em?" tiin ka melh a.



"Ang pawh ka ti lo, min tluk lo êm mai a," a tih chuan ka lo chek tlak tlak a.



"Țha chu i inti ve hlarh hlarh si a maw!" nui chung hian ka ti a.



"Ti chuang lo ve, min tluk loh thu ka sawi mai a nia."



Dârkâr khat vêl bâk kan en lo, duh aiin zàn a rei dâwn tlat. Film en vàng mai maia rei tak a men hi ka duh lo, țûl lova meng rei viau tùrin ka duh lo.



"Ka riak ve mai ang?" Naupangin a thil duh tak a nu hnêna a ngèn ang maiin alawm le min ngen le!



"Ni lo ve, i nute pawhin an lo ngaihtuah tawh ang che," ka tih chuan," Nute ngaihtuah rual lek ka nih tawh loh hi maw le!" a ti nang nang a, a lungawi lo hmel chu ka nuih ringawt.



A hmuiah fawhsakin,"Nakinah zâwk le, chutih hunah chuan riah chhuah i tum reng tawh zâwk mai ang," nui chunga ka tih chuan,"Mi tihlungawi dàn i thiam si, ka hnial phal miah loh tùr hian min ti ziah," a ti leh a.


*******



Victor-a a reh leh ta vang vang a, buai tùra ka rilru ka lo siam ve tawh tehrêng nèn, chutia a reh leh ta daih chuan ka ngaih a tițha lo lek lek zâwk. Bawihtei pawh a rawn hmu ngai chuang lo, mak ka ti tawp. Bawihtei'n kum tàwpa test a neih zawh veleh Lungleia phei daih chu ka tum dàn a ni a, chumi hma zawng chu Muansanga hi ka la țhen lo ang. Krismas hmang tùrin a u kha a rawn haw dâwn chauh a ni bawk a, ka hmanhmawh chûk rih lo.



Hlim takin hun hmanpui țhìn mah ila, zàn mutnaah erawh ka mittui a tla ru fo. A bulah erawh hlim thei ang berin ka awm zêl, ka hlim lo hmel a hmuh chuan a ngaih a țha lo ang tih ka hlau, ka kalsan hma chu hlim se ka duh, chuan, ka kalsan hnuah leh zêl pawh.





*THINLUNG ȚHA CHU A HLIM RENG ȚHIN NIIN AN SAWI ȚHIN; MAHSE, THINLUNG ȚHA HI HUN TAM ZÂWKAH HIAN TIHNATIN A AWM ȚHIN ZÂWK, A CHHAN CHU MI DANG HNÊN AȚANGA THIL ȚHA CHAUH A BEISEI ȚHIN VÀNG A NI*




☆LUHLULPA☆ - 22 By Dingdi Pachuau





Inah awmin thawmhnaw bàl ka zawng khawm a, ka pa lehpek chu, a thawmhnaw bàl a lo dah thukru leh niin, a ti mak thei tak tak a ni! Dah chhuak tùrin ka hrilh țhìn kha a nia, a inthlahrung ka ti dâwn nge, a awm laia ka sûk dâwn phei hi chuan 'A la bàl lo asin, vawi hnih/ thum chauh ka la ha' a tih loh leh 'A bàl lo, sahbawn i tihek mai mai alawm le' a ti ziah.



Ka nuin dàwr a nghâk a, Bawihtei a school a. Ka pa leh Tea erawhin kan garage zîm deuh chu an siam ţha a, nakinah thingpui pêk an ngai nghe nghe ang.



Bathroom-ah chuan ka insu a, a balh hlawm lêm loh avàngin ka su zo har lêm lo, in chungah chuan ka han zâr a, ka chhuk leh chuan țawng deuh làwng láwng ri ka hria a, ka han ngaithla chiang a, Bobby-a aw a ni.



Lungleia kan awmna pawh thla thum deuhthaw a ni ve ta. Kan in luaha ka bungrua zawng zawng pawh kan la phei vek tawh a, Aizawl pawh Lunglei ka phei achin ka kal leh tawh lo.



"I awm a ni maw? Dàwra i awm ka ring deuh zâwk a?" a rawn tih chuan lo nuih deuhin,"Inah tih tùr a tam zâwk sia, ka kal ta lo mai a nih kha. Engtizia nge i school loh a?" ka lo ti a. Min chhàn hma chuan a kal bai saih saih chu ka hmu leh thut a.



"Engtizia nge ni i ke chu?" ka ti ta chûl a.



"Hei vàng hian a nia, school ka kal loh. Ka bilh palh a, in țhenawma zût thiam awm kha ka rawn pan dâwn a, ka rawn pêng phawt a nih hi," nui chung hian a lo ti ve a.



"A nih tak chu, a va zia lo ve aw! A na ngawt ang a?" ka lo ti ve a.



"Na lutuk rih lo; mahse, nakinah eng nge maw a an dâwn ni, min zùtsak hunah a hriat ang chu," a lo ti ve a.



Thingpui ka pe a, a in lai chuan," I hman lo viau em?" a ti phawt a.



"Hman lo viau lo ve, eng nge ni ta?" ka lo ti a.



"I buai viau loh chuan in țhenawmah chuan min kalpui zawk hman ang em le?" a ti leh a.



"Hman e, ka kalpui dâwn che nia, i hmanhmawh viau em?" ka tih chuan," Hmanhmawh lo ve, min kalpui har leh ka lêng rei thei deuh tihna a ni mai a," nui chung hian a lo ti a.



Ka va kalpui ta. Engtin nge a zút thiam tih a lo hriat ni?  Kei erawh chuan kan țhenawmnu a nih vàngin ka hria a, ani kan vênga mi pawh ni lovin a lo hre daih chu mak ka ti a ni.



A nat hmel khawp mai, Bobby-a pawh a țhen tlawk tlawk lo nain a thlan a tla dap dap mai, a na viau a ni chiang mai.



"Naktûkah i lo kal leh ang a, ka lo zût leh dâwn nia. Chumi hnuah chuan vawi khat vêl bâk zùt a ngai tawh lo ang," Nu Pâri chuan a ti a, ani pawh a thlan a tla ve dap tho.



"I tuam lum dâwn nia, chêt lohtîr tluk a awm lo ang aw, a dam hma i duh chuan," nui chung hian a ti leh a.



"A nih, nula ina lènpui a theih tho  ang em?" tia Bobby-a'n a zawh chuan a lo nui var var a.



"Nula ina lènpui pawh a țha lo," a lo ti fiamthu ve a.



Kan inah chuan kan phei leh rih a, school a kal thei lo ta rau rau, a lêng ve reng ta. Chhùna Tea leh ka pa thingpui ka siamsak dâwn chuan," Kei pawh ka lêng rei ta, ka'n haw ve tawh ang e," tiin a ding a.



"Awihawm loh e, thingpui kan in phawt ang chu. I ti àwm ang lo êm mai, țhu rih rawh," ka lo ti vat a.



"Ka țhu reng a, hna pawh ka thawhtîr thei lo che," a ti leh a.



"Thawh tùr ka nei lo, haw i tum lui țâlh a nih pawhin thingpui in zawhah i haw dâwn nia," ka ti a, thingpui chu ka siam ta nghâl a.



Ani pawh a kal lui ta bîk lo. Ka pate pawh ka ko lût a, thingpui inin an titi luam a, a ke chanchin pawh chu an sawi nual a.



Thingpui in zawha hna thawk tùra an chhuah rual chuan Bobby-a pawh a chhuak ve nghâl a, kei pawh chuan kan veranda bula a scooty dahna thleng chuan ka zui ve a.



"Zon..!??"



Chu aw lo chhuahna lam chu kan hawi țhap mai, en lo pawh ni ila chu aw rawn chhuahna mihring chu ka hre chiang ngang tho; mahse, en loh ai chuan en hian amah a ni tih a chiang leh zual.



"A..Muansanga kha i ni tiraw? Engtizia nge Lungleiah ka hmuh nawlh mai che ni?" Bobby-a chuan a lo ti vat, mi dang chu kan ngawi țhap. Tea ka en duh lo, min lo melh rum viauin ka ring a ni.



"U Bobby-a kha i ni maw? Engtizia nge i ke chu?" a rawn ti ve. Min en tawh lovin Bobby-a ke chu a en tawh a.



"Ka tina palh a, hei Zonite țhenawmnu hi ka zùttîr a."



A hmel ka hmu thut hian sawi tùr min tihre lo. Ka ngawi reng ringawt, tún hi Lunglei ka pheisan hnua ka hmuh lehna hmasa ber a ni, tlêmin a sam a lo sei ta deuh, chuan a chêr deuh hlek bawkin ka hria.



Ka pa chu inherin hna chu a thawk țan leh mai a, Tea erawh a din ngaiin a la ding reng, Muansanga hi a hre ve chiang mai si a, min 'enthlâk' deuh a tum a niang, kan ințhen tawh avànga Lungleia phei ta ka ni tih a hre ve tho sia, min rawn 'thlîthlai' kher lo se.



Bobby-a tlân chhuak tùr chu," School i kal thei rih chuang si lo va, helamah nî rawn tumtàwi țhìn la?" ka ti zauh a, ka thil sawi chu Muansanga chuan engtin nge a ngaih ang tih hre tùr pawhin ka en ngam lo, khatia ka țawng chhan kha chu min rinhlelh loh nâna ti ka ni si a.



"Loh theih nâng!" nui chung hian a lo ti a.



A tlân chhuak chu kan thlîr zui vang vang a, a pil hnu chuan zahzèl tùr a vâng ta khawp mai. Tea lah a lo inla 'spy' ropui, kan lam rawn hawiin a ding reng mai.



"I dam țha maw?" a rawn ti chhuak ta sup a.



"Um,..eng nge i rawn tih dâwn a?" ka ti lêt zat.



"Thil pawimawh deuh mai tih tùr ka nei a," a ti ve leh mai a.



"Engtikin nge i lo phei? Chuan, engtikah nge i haw phei leh dâwn?" ka ti leh a.



"Ka thil tiha hma ka sâwn dàn azir a niang chu!" a ti sup a.



Tea inla 'spy' viau chu hmu angin a awm ve hauh lo. Ni dâwn tak, Tea hian amah(Muansanga) hi min duhpui lo tih kha a hre hauh lo. Eng vangin nge a hriat ve ngawt ang? Ka hrilh hauh si lo, hrilh chi pawh ni nghâl lo chuan maw le.



"Mimawii a school em?"



"Aw."



Pâwna dinpui reng thu a awm si lo, hreh rilru tak chuan in chhûngah chuan ka luhpui ta nge nge a. Țhutthlèngah pawh țhu lo chuan a ding deuh vang vang a, kei erawh dining chair-ah ka țhu thung.



"I hmel ka hmu leh thei hi ka lâwm hle mai," a ti chhuak sup a, hmun dang en lovin min en ngur bawk a.



"Thingpui kan lo in zo chiah a, i duh em?" tiin ka tho a, ani lah chuan," Duh chiang, i thingpui siam ka in lohna pawh a rei tawh êm asin," a lo ti leh a.



Thingpui ka va pêk chuan min lo nuih suk pah chuan làwmthu a lo sawi pah sup bawk a. A awm dàn hian min tibuai, thinrim hmel a pu si lo. Bobby-a lah kha țha takin a be bawk si, ka thil ruahman, hlawhtling viau nia ka hriat kha a derthâwng ang tih ka hlau.



"In in luah hluiah khân ka kal zauh zauh asin," a la rawn ti ta deuh deuh!



"Miin an luah tawh em?"



A lu a lo thing a.



"I duh ang ka tihhhlawhtlinsak loh che avàngin pawi ka ti khawp mai; mahse, ka hrilh tawh che kha, ka thil tih theih loh tawp tùr a nih tlat vàng a nia," a ti leh sup sup a.



A thil sawi chuan hun kal tawh min hriat chhuahtîr vang vang, ka țhen țan tirh kha.



*******


Bawihteite test zawh nî a ni a, bungraw lam nî a ni lo bawk a, ka lèn chhuahpui a ni. Tún bâk hi Aizawkah hian a lêng chhuak tawh kher lo maithei si a, chuvàngin a duhna hmuna hruai zêl tùr chuan ka inpe tawp mai a ni.



"Au Muana hnênah khân kal leh ila?"



Pawi lo ang, naktûkah kan pheisan thut tawh dâwn si a, a gym pawh ka hmu ngai tawh dâwn si lo.



"Ka'n phone lawk ang e aw."



Ani pawh gym-ah a lo awm ve a, min lo hmuak leh ngei. A hmelah chuan a hlim tih a hriat, a rin loh deuhin kan va tlawh ve miau bawk si a.



Dârkâr hnih vêl zet kan awm ang, Bawihtei nèn chuan an phusa khawp mai; kei erawh chuan an pahnih chezia chu ka lo thlîr reng thung, ka thâ a za ve tlat lo. Nizànah a pain min rawn be leh kha a ni a, ka țhen hun tùr min rawn zâwt leh a ni. Vawi thum min rawn phone tawh a, khawngaih dîlin a fapa chu țhen tùrin min rawn ngèn leh a ni.



Kei chuan ka rilru ka siam fel tawh thu leh naktûka Lunglei kan phei tùr thu chu ka hrilh a, làwmthu min rawn hrilh a nih chu! Ka rilru hrehawmzia hria se chuan min hrilh hauh lo ang maw le.



"Zaninah ka rawn lêng hman dâwn lo tlat mai si a, i lo tuar hrâm hrâm mai a niang chu?" nui deuh hian a ti sup a.



"Eng nge i tih dâwn a?" ka tih chuan,"Durtlângah ka pi kan tlawh lawk dâwn a, vawiin khân damdawi in ațangin a chhuak ve chiah a," a ti leh a.



"A nih tak chu, a dam chiangkuang tawh a niang chu maw?"tiin ka zâwt lehnghâl a.



"Um, a, a tar ve tawh a, upat tawh hi chuan nâ chhe tê pawh hi an kùrpui nasa tawh țhìn a, chutiang vêl chu a ni tawh," a lo ti duah a.



Zanin chu inthlah nân zanriah kîl tlàn ka sawipui ang chu ka ti a nia; mahse, a thil rawn sawi chhuah vang chuan sawi chhuah chi  a ni ta hauh lo, ka lo la sawi chhuak hman lo chu ka lâwm khawp mai.



Chuti a nih chuan tûn hun chauh hi ka hmuh theih hun a ni tawh dâwn a nih chu. Thlîr char char mai ang, ka hmu khât tawh dâwn, ka hmu leh tawh kher lo thei bawk.



"Mahse, ka rawn bia ang che, ka pî tê khian min ngai thei reuh lutuk a, kal loh ngam chi pawh a ni lo. Ka han hnial deuh dâwn a, motor khalh tùr an awm dâwn si lo va, min tibuai vek alawm," a ti leh a.



"A pawimawh êm chu, han kal ngei rawh. Min rawn biak dâwn tho chu," ka lo ti a.



Zànah chuan an han lêng chho ta ngei, an haw hnuah min rawn bia a, dâr 10 a pèl tawh, ka la meng kar mai.



"Min lo ngai hman em? Kei chuan ka ngai hman che asin," a rawn ti a.



"Ngai hman nâng aw, 'ngah nge min lo ngaih hman a? Min ngai tawh miah suh," ka lo ti a.



"Ka ngaih loh che te'n, tu nge ka ngaih ang?" a rawn ti.



"Min ngai miah tawh suh, hrisèlna atán a țha lo. Kei pawh ka ngaih duh miah loh che hi, ka hrisël sar reng mai asin," ka tih chuan a nui huk huk a.



"Chu zet chuh! Ka tihlawhtling ve thei ngai dâwn lo a nih chu, ka ngai lo thei dâwn si lo che a, ka lo bawrhsâwm ta deuh a nih leh nang ka ngaih vàng che a ni dâwn a, pawi ka ti lo mai ang," a ti leh charh charh a.



"A nih, țawngthu chhe lovah,i hmuh phâk lohah ka kalsan che țûl thut ta se?" ka ti leh a.



"Nang pawhin min ngai ve tho ang chu, kan inngai tawn ang a, kan inkalsan rei thei teuh lo ang, i rawn haw leh vat ang," a lo ti leh a.



"Rawn haw vat lo ila?" ka ti leh, ka kut ka hûm ruh nasa.



"Ka rawn kal ve ang, ka rawn zawng ang che a, ka hmuh hma che chuan ka zawng ngat ngat mai ang che," a rawn ti leh a.



Rei tak kan inbia a, ka tàwptîr duh bîk lo. Nakinah chuan min be khât tawh dâwn asin, min be duh tawh lo emaw pawh a ni zâwk ang a, amah phatsantu mi tenawm hmuhin min hmu tawh ang, min biak pawh a châk lo mai ni lovin a duh tawh lo hulhual zâwk ang, ka hmel hmuh leh ka hming hriat chhuah ringawt pawh a duh tawh lo ang.



Kan inbiak tàwpnaa min mangțhana chuan ka mittui a titla a, kei pawhin harsa ti zetin ka mangțha ve tho. Ani chuan zàna ka muttui theih nân min mangțha a, kei chuan kumtluang atân ka mangțha. Dam țha se, lo hrisêlin hlim takin hun hmang se, an chhûngkua hlim takin inhmu khâwm rawh se, ka hming leh ka hmel hi an in chhûngah hian nawh reh hmakin awm rawh se.



Kawnga kan tlàn laiin vawi thum lai chu ka phone chu a rawn rì; mahse, ka chhâng lo. Mi zînga inchhàn chu ka duh lo, a hnuah phei chuan ka switch-off ta daih nghe nghe. A mangang hawihai tùr chu ka mitthlà a, ka khawngaih lâwk chiang a ni; mahse, hei hi a tâna țha a ni, an chhûngkaw tân, a u Mami tân.



Ka nute ka hrilhlâwk lêm lo va, min hmuh chuan mak an lo ti nasa. Hlim hmel chu ka pu lui ve hrâm hrâm, ka hlim mawlh si lo. Tlaia Tea rawn haw chuan a tum loh deuhin min hmu tih ka hria.



"Engtizia nge in rawn phei a?" room-a ka awm lai chuan rawn lûtin min rawn zâwt a ni.



"Kan awm ve tawh dâwn," ka tih chuan," In ințhen tihna em ni? Kha maw, a naupang lutuk ka tih rêng kha, a țha daih zâwk! Hetah lah, u Bobby-a a awm a, ani ai chuan a thlan nahawm daih zâwk lehnghâl a, i thutlûkna hi a fuh ang," a ti nghâl bawrh bawrh a.



"Ka nute chu hrilh a ngai chuang lo ang aw," ka ti a.



"Hrilh lo mah ila an hre tho ang; mahse, lungngai suh, ka ká ațang chuan an hre lo ang," a ti leh a.



Ka ngaihtuah chiang a, hetia ngawi renga țhena kal bosan hi chu a fuh ber lo ang, ka kalsan chhan a hre tùr a ni, hre tùrin dikna a nei. A chhan dik tak erawh ka hrilh hre ngai lo ang. Chhuanlama Bobby-a hman hi a fuh ber.



Phone ka on hnuah min rawn be ta chiah.



"Khawiah nge in kal a? In in a inkalh țhap mai si a, ka hawihai lek lek a ni," a rawn ti a.



Ka ngawi deuh hlek a, chutah,"Muansang, nizàn ațang khân ka țhen tawh che alawm," ka ti chhuak ta hlawl a.



A rawn nui hawk a.



"Fiamthuah pawh chin tâwk nei teh, khawiah nge in awm? min hrilh chiang teh," a rawn ti leh a.



"Ka sawi chu, ka kalsan tawh che. Nizanah pawh ka mangțha tawh che kha," ka ti leh a.



"Zon, khawiah nge i awm?"



"I hmuh phâk lohah ka awm tawh. I hriat miah lohin mi dang nèn ka kawp che u, ka duh tak tak che kha i ring lo ang tiraw? Kei aia kum sarih zeta naupang chu ka duh tak tak thei ngai dâwn em ni? Chutah, hna thawh pawh nei lo lehnghâl." Hei tak hi sawi hrehawm ka va ti kher êm! Ka kut ka hûm ruh ngar ngar, a rilru na theihtàwpa siam kher hi chu ka duh bîk lo asin; mahse, an chhûngkaw tân tih a ngai miau si.



"Zon..!!!" Nâ a ti tih ka hre nghâl rêng.



"Min ngaidam ngai suh, ngaihdam pawh ka phû hek lo. Kei, nang aia mipa dang thlangtu hi min hua la, min ten rawh," ka ti leh a.



Ka thinlung erawh a rûm tlawk tlawk thung.



"A va mak ngai dâwn ve!!I thil sawi hi a dik meuh maw!! Zon, hetiang hi i kam chhuak a ni thei lo ang!" harsa tih hmel fê hian a rawn ti leh sup sup a.



"A ni miau sia. Bobby-a kha i hriat kha, ani kha hlawh nei, tlangvâl fel tak leh kan kum pawh inphû tâwk a ni a, ani nèn khân rei tak ațang khân kan inkawp tawh a ni," ka ti leh a, ka dâwt sawi avàng chuan keimah chu ka inhaw ngawih ngawih.



Phone chu a hmet tàwp ta chiah e.



Ka mittui a rawn tla zung zung, țah chhuah erawh ka tum lo. Ka mittui pawh tihtlâk loh ka duh asin; majse, ka thinlung na lutuk leh amah ka khawngaih lutuk avàng chuan a tla lo thei si lo a ni.



Engtin nge a awm tâk zêl ang le?




*NGAWIH THEIH HI FINNA PUITU CHAK TAK A NI. I KE A LO PHET A NIH CHUAN I BALANCE I SIAM DIK LEH THEI MAI; MAHSE, I HMUI A PHET TAWH A NIH CHUAN I NIHNA NGAI NEI LÊT LEH TÙRA BALANCE SIAM KHA CHU A THEIH TAWH LOH*