☆LUHLULPA☆ - 23 & 24 By Dingdi Pachuau

☆LUHLULPA☆ - 23 By Dingdi Pachuau





Helai meuh meuh a rawn thleng tawh si a, lo biak chhiat ringawt chi niin ka hre lo, bâkah, kan ințhen tawh tho a, lo biak țhat duh lo tlat ang  leh lo thinrim der tlat ang kha ka thei lo, ani chungah hlauh phei hi chuan. Ka duh rêng vànga țhen pawh ka ni lo va, hrehawm ti ngawih ngawih chunga kalsan ka nih kha.



"Mimawii ka hmu châk tawh lutuk a-" a tih lai chuan Tea a rawn lût a, min rawn en chuang miah lo. Fridge chu hawngin tui bottle a la chhuak a, a in hlek a. Chàwl deuh rihin kan thu sawi ngaithla àwm lo tak chuan a awm leh phawt a, chutah, tlêm a in leh a, a chàwl leh a, ka lo hre thiam reng si a, ka ngei reuh tak tak!



"A lo thleng țêp tawh ang," ka ti ringawt a. Tea lah chu a chhuak duh miah lo, Bathroom bula store room ve deuh kan neihah chuan lût lehin kawngka chu a hawng huau mai. Ama ngaih chuan a inla-spy khawp mai, ka nuih pawh a tiza lo.



"I chhûngte an dam țha em? I ute nèn chuan Krismas chu in hmang nuam maw?" ka ti leh ringawt. Sawi tùr ka hre lo, biak loha ngawih reng lah ni theiin ka hre bawk si lo.



"Aw, dam tlàn hi chuan a nuam zêl mai, rilru helhkam nei lo phei ila," a lo ti thung. Chu thu a sawi lai chuan ka lo îp deuh zawk, Tea'n hre fuh a lo inti dâwn lutuk!



"A nih tak chu."



Sawi tùr a vâng a ni.



Tea lah chhuah tum lo chuan a awmnaah chuan a ri deuh reng mai a, eng êm êm nge a tih ni?



"Khawiah nge i thlen a?"



"Bazâr vêngah sâwn, hotel a awm kha, a hming ka theihnghilh daih."



Gate lamah motor horn a rawn ri a," Bawihtei a niang, ka'n en lawk ang e," tiin ka ding a, pâwnah ka chhuak ta nghâl a. Gate bulah chuan an school motor chu a lo ding reng tawh a, Bawihtei pawh a lo chhuak mêk.



Muansanga chuan min rawn zui a ni chêk ang chu, Bawihtei a rawn âu chùl nghâl mai.



"Au Muana! Au Muana..!!" tiin min rawn tlàn pèl a, Muansanga bân lo phar duai mai chu pan chatin, a nghâwngah a kuah a, an inpawm kãng nawlh mai.



"Au Muan, ka ngai tawh lutuk che a! Lêng reng rawh aw, Aw, Au Muan? I awm loh chuan kawm tùr ka nei lo va, school pawh nuam ka ti vak lo, Âma hnênah 'Phone ang' ka ti a, 'Phone number a bo daih' a ti zêl a," a ti mial mial mai, min puh chhe viau mai ti ila ka tih dàn dik tak a ni bawk sia, țawng ve tùr pawh hre lo chuan ka lo ding zum zût ringawt mai!



"Bawihte, in va bâng hma ve!" Tea'n min rawn kal pèl pah chuan a rawn ti, keimah min rawn en thung, ka hre thiam nasa, min en dàn chuan kawh a nei khawp mai!



A putea biakna ngaihtuah hauh lo chuan Bawihtei chuan," Au Muan, haw rih suh aw. Àpi dàwr pawh i la hmu àwm si lo, ka kalpui ang che," a u Muana kuah tlat pah chuan a ti leh ta a.



"A nuam ngawt ang! Inthlâk fel phawt la aw, chuan, Âmain a phal leh phal loh pawh a ni ang chu," min rawn en reng chung chuan a ti a.



In chhûngah chuan kan lût a, a phûl hlut reng mai. Thawmhnaw ka thlâksak lai chuan min tur sek mai.



"Au Muana'n min lo hawsan palh ang e, Âma, thuai thuai. Au Muan, lo la awm reng rawh aw," tiin sitting room-a Muansanga țhu chu kan room ațang chuan a au vau vau a.



"A awm dâwn alawm, ani pawhin a hmu châk che a, hmu tùr chein a lo kal. Khatin an au vak vak ngai lo," tiin țawngka zaidam leh zàwi deuh takin ka hrilh sar sar a.



Ka thlâk zo chiah chu a tlân chhuak nghâl, hahthlâk țhìn hian a. Ani pawh hian keimah ang tluk zetin a lo ngai ve tho a lo nih hi, Kumthar zawh hnu vêlah khân a u Muana chanchin hi a sawi nasain min zâwt nasa, be tùrin min ti țhin; mahse, a number ka tih bo thu ka hrilh țhin a, chutianga ka chhàn tâk ziah vàng chuan a hnu lamah chuan min zâwt ta lo.



Muansanga chuan a lo pawm leh rân tawh, school chanchinte a lo zâwt a, an lo titi nasa leh hman tawh viau a ni.



"Âma, Au Muana hi àpi dàwrah ka kalpui ang, a la hmu ve si lo va?" a ti lar lar a.



"Bawihte, i rawn haw chauh a ni sia, bâkah, au Muana pawh a hah ve rih ang chu," ka tih chuan," Au Muan, i hah maw? Hna i thawk ami?" tiin a zâwt nghâl vat a.



"Hah lo ve, nangmahni rawn hmu tùr liau liauin ka rawn kal alawm, eng hna mah ka thawk lo," a lo ti a.



"A nih, àpi dàwr chu i hmu châk em?" a ti leh zat.



"Aw, min hruai dâwn chuan; mahse, Âmain rem a tih hunah chauh ti ila?" a lo ti a, min rawn en pah bawk a.



"A nih, eng nge kan tih ang?"



"Han ngaihtuah la, i tih châk ber kha aw?" a lo ti a.



"Motor kha i lo keng em?" a tih chuan," Aw; mahse, ka thlennaah ka dah daih a," a tih chuan Bawihtei chuan pawi tih hmèl deuh hian a chal chu a dawm a.



"Motor-ah min phur kual la ka ti dâwn asin le!" a ti vang vang a.



"Ni dangah ti mai ila?"



"Aw le. Au Muan, a nih chuan, kan sikuti-in min phur kual mai la?"a ti leh a.



An pahnih titi-ah hian ka tel ve miah lo, ka va pawimawh lo tak! An bulah ngawi rengin ka lo țhu ve kur ringawt a nih ber hi.



"Âma dîl la?"



"Âma, i phal tiraw? Phal hrâm la?" tia min ngen chuan hnial theih a ni leh miah lo mai!



An inkhalh chhuak ta poh. An inngai ve si a, a duha a peih phawt chuan pawi ka ti lêm lo. Muansanga lah ka hriat ngai loh mi pawh a ni lo va, a duat êm êm a, ani tân pawh thil hrehawm a ni bîk lo ang chu maw.



An chhuah dáwn chuan ka pa chuan," Bawihte, khawiah nge in kal dâwn a?" tiin a lo bia a, ani chuan," Au Muana'n min phur dâwn," a lo ti mai a.



An kal hnuah Tea'n thingpui hâng a raqn 'demand' avàng chuan no hnih ka va chawi phei a, chutah chuan ka pa chuan," Eng nge a lo tih dâwn a?" tiin min lo zâwt a.



"Ka hre bîk chiah lo-"



"A rawn hêl leh dâwn che a nih kha. Lo biak țhat viau kha a ngai hleinem, bâkah, engtin nge naupang i hruai chhuahtîr ngam theih záwk ni? Tûnlaiah naupang an him lohzia-" Tea'n a tih bawrh bawrh lai chuan ka pa chuan," A khai a, duh tâwk teh, duh tâwk teh. Chutin apâwnga takin, mi hi rin chhiat nghâl ngawt loh tùr a ni ngai e, inlêng lo biak chhiat phei chu tih hauh loh tùr," a lo ti dam duai thung a.



"A naupang lutuk alawm! Khatiang kan chhang chhang chhang pawh rual pha hlei lo-"



"A mak bawrh bawrh teh tak e a. Hmangaihna chuan kum upat leh naupan a thliar hrang hleinem. I la tawn loh vàng mai mai a nih kha, han nei la, Bawihtei hian unau mipa emaw hmeichhia emaw nei ve tawh se ka ti asin, kan tar tak tak hma hian," ka pa chuan a lo ti leh daih a, Tea chu a ngawi chiang kher mai; mahse, a ngawi a ni mai a, a rilru erawh a hmin lo nasa tih ka hria.



"A hmel te kha a lo țhat phian kha, a hleitling bawk si. A nu leh pa chuan an chhuan dâwn khawp kha, Bawihtei lah khân a han ngai êm êm mai chu a ni sia, a, a àwm viau e," a ti leh charh charh a.



Rei chhuahpui lovin a rawn lêtpui thuai. Bawihtei a awm ve zêl avàng leh kei eirawng bâwla ka buai țan avàngin eng thil mah a sawi theih tawh loh. Tea lah a rawn lawr deuh sek, ka ning a nia.



Lal-inti-spy-a.



"Mimawi, ka haw tawh ang e, hun dangah ka lo lêng leh ang a, motor chuan ka phur kual dâwn che nia aw," a tih chuan," A la hma alawm," ka ti deuh ûk a; mahse, ka nè nè ral ta daih.



Bawihtei chuan,"Aw le, au Muan, lo kal leh thuai rawh aw, i motor-ah chuan ka chuang châk tawh a nia," a lo ti vat a.



Zanriah ei laiin Bawihtei chuan vawiin thil kha a sawi chhuak lehpek a, Tea lah a ngawi ngur, a lo lungawi lo ve êm êm ringawt. A lo duh lo lutuk ve ringawt mai hi ka ngei lek lek a ni.



"Au Muana chuan a motor-in min phur kual leh dâwn asin."



"Khawiah nge in kal chuan ang, Bawihte? Bâkah, a lo peih lo viau thei asin. I duh chuan scooty-in ka phur kual thei reng tho che alawm," Tea'n a lo tih chuan," Àpute, nang chu i phurh a nuam lo si, thil pawh min leisak ve duh ngai loh kha," a lo ti tàn tán a.



"Lei lei i ngai hleinem, i pi dàwrah leh inah ei tùrte chu lei lei ngai lovin a awm vek alawm," a lo ti leh a.



"Au Muana'n min duat zâwk daih. Thil pawh min lei țhìn, barbie pawh min lei a, ei tùr tui tâwk tâwk pawh an inah ka ei țhìn," intithei tak leh chhuang tak chuan a ti leh a.



Zanriah ei kham hnuah chuan Bawihtei lehkha  ka enpui hlek a, chumi hnu lamah erawh ka sumdàwnna kha ka buaipui leh rih. Lungleiah chuan Aizawl ai chuan tlêm chuan a buaithlâk deuh, bâkah, phurh man vêlah pawh a buaithlâk ve deuh det.



Muansanga chuan eng tak ti ang maw? A rawn kal chhan ber kha a sawi em kha? Min hmu tùrin em ni a lo kal vang vang? Nge dâwt min hrilh? Ni lo, ani hi chuan dâwt min hrilh lo tawp ang. Phone-in min biain thil awm dàn min zâwt fiah thei àwm reng si a, rawn kal kher ngai lovin. Hun leh thâ leh sum tam tak a rawn paih a ni si a.



Mahse, ka țhen chhan kha chu ka hrilh thei lo khawp ang le. An chhûngkaw tân chhiatna bulpui ber ka ni chu ka ti lo nain ka tel ve tlat a ni. Patling meuhin a fapa țhen tùrin min rawn ngèn a ni a, chutah Tea a ni leh a, a buaithlâk kual vêl vek. Inkawp miah lo tùr kan lo inkawp a ni.



A tûkah a hun ngai ang vêlah Bobby-a a lo kal leh a, nimin lam ai chuan a ke chu a vûng ta deuhin ka hria. A kal bâi leh deuh saih saih, țhenawmnute inah chuan ka va kalpui tawh lo mai, an inhre sa tawh tho a, harsatna a awm lo ang chu.



Ka pate pawhin nimin lama garage an siam chu an zawh tawh vàngin ka pa chu ka nu dàwr lamah a kal ve a, Tea pawh a chhuak, khawiah nge a kal dâwn min hrilh miah lo.



Muansanga a lo lang leh, tunah chuan motor nèn a ni ta thung, gate pâqn lamah chuan a park a.



Mi dang mitmei vèn tùr awm lo chu ani pawh a inthlah dul ve ta deuh. A thil sawi pawh thu ho tê tê a nia; mahse, a rawn thutak thar thut a.



"Engati nge i number i thlâk daih a? Ka biak theih loh nân che i ti tiraw? Ka ngaih tehlul che nèn?"



Chhàn ngaihna pawh ka hre lo, ka ngawi tawp. Min ngai tih a sawi tak khi chu ka áwih tho nain thinrim țûnin a awm ang a, min ngaih vak chu ka ring.



"Thu dik tak min han hrilh teh, min țhen chhan dik tak kha."



"Bobby-a nèn kan inkawp tih ka sawi tawh em kha?" amah pawh en ngam lo chuan ka ti. Ka en chuan dâwt ka sawi a ni tih a hria ang tih ka hlau.



"Kha kha chu dâwt a nih kha," a rawn ti ta!



"A ni lo. In pahnih hian ka kawp che u a, khatiang kha ka duh tawh loh avàngin ka țhen che a ni. Bobby-a hi kei aiin a upa a, a rilru pawh a puitling hle bawk a," ka tih chuan dâwt ka sawi nge sawi lo pawh ka hre thiam lo!



"Ka âwih lo. Khatianga hlim taka kan awm laia eng mah thu bul pawh nei lova min țhen ringawt mai kha mak ka la ti viau a ni. A rei ve deuh tawh nain thu dik tak hrilh chu ka phû i ti ve lo maw?" a ti leh a.



A mitmengah chuan thinrimna a awm lo, ngun takin min en a, ka mitmeng ațangin dâwt ka sawi nge sawi lo min 'test' a tum ni zâwkin a lang.



"Ka sawi tawh kha. Khuanu ruat kan ni lo a ni mai, kan inkâr kha i lo ngai serious lutuk bawk a nih kha," ka ti ve ta ringawt.



"Zon, thu dik hrilh phûin min hre lo em ni? Hetianga naupang chhe bàwla min bâwl kual lo hian min hrilh mai la?" a ti leh a.



Ka ngawih vang vang hnuah chuan,"Thu dikin a den che chuan nâ i ti viau dâwn asin,"ka ti sap a.



"A pawi lo, nâ ka ti daih tawh; mahse, min hrilh țhat leh ka ngai a ni, eng vàngin nge kan inkâr hi a tàwp?" a ti leh a.



Ka kut hûm ruh ngawt ngawt pah chuan,"Kan kum a inthlauh bâkah ka la serious ve lo che a, Bobby-a, hmâna țanga ka star tawh hian min la zar ve reng bawk a, ka kalsan che a ni," ka ti ta a.



A thin a rim a nih pawhin a tilang miah lo; mahse, hei chu rilru lam a nih vangin a rilru chu a nat viau tho ka ring.



"Hmaichhanah ngei min țhen chhan kha záwt tùr chein ka rawn pan vang vang che a, chu chu thu dik chu a ni chiah maw?" a ti leh a.



"Aw..."



"A nih leh, u Bobby-a nèn chuan in ni chiang maw?" a tih chuan a ngaihna hre vak lo chuan ka en reng ringawt. Dâwt sawi hi ka va ning tak êm! Ka nun vaw chautu a ni.



"Ani chu a upa a, hna țha tak neiin hlawh lah țha tak a nei bawk a," a ti sup a, kei chuan," Ni e, innghahna tlâk tak a ni bawk," ka lo ti zauh.



Âwih viau se ka ti a ni.



"A nih chuan, engati nge min duh ve theih zâwk a?"



Kha, sawi tùr ka haihchham leh ta.



"Zon, ka duhzia che i hria, tihlan lah ka zak hek lo. Kei aia i upat avàng maiin ka duh loh phah lo che a, ka duh phah sawt zâwk chein ka hre hial asin. Tihtakzeta ka duh hmasak ber i ni a, nangmah vàng hian hlim pawh ka hlim. Khatia min țhen thut kha mak ka ti a, thil eng emaw a thleng a nih ka ring rêng a, hmaichhanah ngei zawh fiah che ka duhin ka rawn pan che a ni.Tunah min hrilh ta chiah a; mahse, ka thinlung hian a pawm ve thei miah lo, thu dik min hrilh lo a ni tiraw? En pawh min en ngam loh kha," a ti ta sak sak a.



Nia, ka en ngam lo, dâwt ka sawi tuh a hria ang tih ka hlauh vàngin.



"Ka en duh lo che a ni mai alawm, ka inthiam lo ve deuhte pawh a ni mahna," ka lo ti a.



"Chuvàng tak chuan, kei chuan ka țhen ve lo che. Ka țhen thu che ka la sawi ve hauh lo bawk, mi pahnih inkâr hi mi pakhat ringawtin a pawt chat thei lo, an pahniha remtih a ngai, i hre thiam tiraw?" a rawn ti ta charh charh mai.



"Kan ințhen daih tawh, Krismas hmain ka țhen thu che ka hrilh tawh che kha, Bobby-a nèn kan inkawp tawh," ka ti ta ruai a.



"Bobby-a chu i hrilh fiah mai a ngaih hmel. Ka țhen ve si lo che a, ka țhen hma che chuan mipa dang i kawp thei lo," a ti leh sup sup mai!



A țawng dàn chuh, tleirawl tê kha a ang tawh miah lo! Mi luhlul leh tihmawh zet țawngin a nia a țawng ni.



"A theih loh! Kan pahnih tân kawng a awm lo," ka ti leh ringawt a.



"Kawng awm lo tih ringawt, ka zawng zêl dâwn alawm," a lo ti leh a.



"Ni lo, zawng buai duh suh. Kawng awm sa pawh zawh a har a nia, zawn chawpah zawng, hahna mai mai-" ka tih lai chuan min lo pawt chat.



"Lo hah ve miah suh, keimah alawm hah dâwn. Bobby-a erawh i hrilh fiah a ngai dâwn a ni," a ti leh mai.



Hnial dàn tur dang ka va duh tak!



Maimichhîng vang vang phawtin ka han meng chhuak a,"Kan inkâr ka tihtawp khân ka thinlung ațangin ka paih chhuak tawh che, ka thinlungah hmun i chang tawh lo,"ka ti ta khawl mai!



Chu chu âwih hrâm teh se! Lalpa, min pui teh.



"A va pawi ve! Keiin ka paih chhuak ve si lo che a, țan i lâk thar leh a ngai a nih chu. Hun a la tam alawm, nangmah tê chauh hian thutlûkna lo siam tawh miah suh, buaina a tam loh nân," tiin min rawn hnaih thut a, rang zeta ka kâwnga rawn kuah vatin ka room-ah chuan min nawr lût a.



Ka lo țang ve vat; mahse, min thlah teuh lo.



"Min thlah rawh-"



"Bengchheng lo teh, lo kal an awm a nia," ka beng bulah chuan a rawn ti sar sar a.



Ka ding khawng ta lah mai! Tu nge lo kal? Tea a lo haw em ni? Nge ka pate? Min hmuh chuan a va zahthlâk dâwn tak!



"Min thlah teh, min hmu hlauh ang e."



"Shhh..."  Pên ri ka hriat chuan Ka thaw dèp dép ta mai. Kawngka bulah a rawn ri a.



"Zoni..??"



Bobby-a a ni!




*MI DANG SAWI CHE I HLAUH VANG MAIIN I TIH TÙR KHA TIH ȚHULH SUH, ENG PAWH CHU TI LA, MI DANG CHUAN AN SAWISÊL DÂWN THO THO CHE*









☆LUHLULPA☆ - 24 By Dingdi Pachuau




Ka thin a phu dup dup mai, ka hamhaih lutuk a, Muansanga chu ka en chho hau ringawt!



Ani lah chuan,"I chhuak  hreh deuh a nih chuan ka chhuahpui thei tho-" a hmuiah chuan ka hupsak vat, țawng ring miah lo mah se Bobby-a chuan a hria ang tih ka hlau lutuk, ka thâ pawh a khùr dar dar hial.



Țawng lo tùra ka duhzia chu ka awm dàn ațang chuan a hre thiam ngeiin ka ring, a hre thiam lo lui a nih ngat chuan aw, ka ngei ngawt ang!



Kan inen hnai dùn bawk a, a mitmeng de sar mai leh uk deuh khak chu a meng zîm ta deuh san a, a nui deuh tih ka hria, chutah ka hmui a rawn melh thlâk tâkah chuan ka hawi sawn ta nghâl a.



"Lo chhuak miah suh, lo awm reng rih ang che," a beng bulah chuan ka ti sap a, a kuahna ațangin ka tâl chhuak ta nghâl a. Ka hming chhiat theihna tùr leh ka zahna tùr chuan a chêt duh ka ring bîk lo.



Ka thaw hawk hawk phawt a, sitting room lamah chuan ka chhuak phei ta a. Bobby-a chu ka hmuh chuan," I aw ni àwm tak kha ka hriain ka hre rêng a! I ke chu engtin nge a lo tih? Kal leh ngai a ti em?" ka ti nghâl sawk sawk a.



"Umm...naktûk lamah hian a tâwk thei tawh maiin a ring a," a lo ti ve mai a.



A awm rei ang tih ka hlau tawp. Ka room-ah Muansanga a awm ràn mai si a, chubâkah, hlauhthàwn dang ka la nei cheu, ka chhûngte tu emaw ber hi rawn haw ta se, ka va che chhe dâwn tak! Muansanga vàng vek!



Mang a an rûk tak tak hi chuan Khuanu pawh hian min lo hre thiam ve a ni chêk ang chu, Bobby-a chuan a awm rei hman loh thu chu a sawi nuap nuap a, a rawn pêng leh zawk tih a sawi chuan ka lo thaw huai mai. Haw vat vat se ka duh miau si a, chelh luih pawh ka tum bîk lo.



Pâwnah chuan ka zui chhuak a, kawng ka khâr bawk. Muansanga rêu rêu hi a rawn chhuak ang a, ani hian a hmu leh roh si ang a, thil a buai vek palh ang. A tlàn chhuah thlengin ka en zui, chutah chiah chuan ka thlâ a muang ve thei chiah.



Ka luh chuan kawngka bulah a lo ding reng tawh tak tak! He pa hi chu aw, ka âwm chu ka dawm vat a.



"Engati nge kawngkha kha i khàr kher a?" a la ti sup zui.



"Eng emaw pawh kan ti duh ve ang chu!" amah kal pèl nghâl vat pah chuan ka ti a.



"In tih si loh kha."



"Min lo bihthla a ni maw? I chêt dàn chuh-" ka tih lai chuan rang zet hian," Ka bihthla lo che u, in tih loh kha ka beisei ve ngawt a ni, a chhan chu mi dangin ka tâ min țâwmpui ve hi ka remti ngai hauh dâwn si lo va," a lo ti vut a.



Ka melh hrâ ringawt. A tâah min la chhâl reng tihna a ni a, va buaithlâk tak, engati nge hetiang hian a awm tlat ni?  Ka țhen a ni tih hi pawm ve mai se. Hmalam hun kan nei dùn dâwn chuang lo, a chhûngte nèn an ințhêțhù tùr ka duh lo, inngaihzàwn lai ațanga chhûngte nèn boruak țha lo neihte chu a râpthlâk!



"Haw rawh, eng mah lo tih tùr i nei lo. Luhlul chhuah tlat lovin kan inkãr thu hi a tàwp tawh a ni tih pawm ve mai teh," ka ti a.



"Pawm ve thei lo tlat si ila?"



"I pawm a ngai a ni mai. I pawm loh pawhin i la pawm tho a ngai dâwn, thil a harsa zâwngin kalpui suh," ka ti leh a.



"Harsa zâwngin kalpui phêt i tum zâwk a nih kha. Hlim taka kan awm ang khân awm leh mai ila?" a lo ti thung a.



"A theih loh!"



"Engati?"



"A theih loh a ni tawp mai. Thil tam tak ngaihtuah a ngai a," tiin ka lu ka thing deuh nak a, ka thaw leh deuh hak.



"Ngaihtuah tam lutuk chu buaina zakhua mai mai! Kan tûn hun chauh zêl hi ngaihtuah tùr," a lo ti leh thung a.



Nia, ani rilruah chuan a ni ngei ang chu; mahse, ani ang rilru ka pu ve thei si lo a ni. Kei chu tlangvâl pawh ka ni lo va, nula pângngai pawh ka ni tawh hek lo, fanu enkawl tùr ka la nei zui, ngaihtuah tùr a tam lutuk!



"Kan inang lo êm mai a!" ka ti ta ringawt. Chhàn vak dàn ka hre lo alawm, ngawih ringawt lah ka duh bîk si lo.



"Lal Isua khawvêla a lèn lai kha ni phei se chuan a hau chiang viau ang che. 'Ka fanu, thil sâwt lo i ngaihtuah nasa lutuk a nih hi' a ti ngei ngei ang," a ti a, a nui deuh hak zui a.



Ka nuih pawh a tiza lo ve.



"Chhia leh țha hre chin tân leh naupang chhia mai ni tawh lo tân chuan ngaihtuah tùr a tam alawm," tlàwm tum lo tak chuan ka lo ti leh a.



"Ok, ok, ka tlâwm e. Hnehna i chang; mahse, ka țhen chuang lo che," a lo ti leh a.



Ka melh rùn rún a, chutah, "Luhlulpa!" ka ti ta țhat a.



"Yes?" a lo la ti duh chauh zui!



Thaw hawk pahin," Haw mai teh. I gym pawh i ngaihtuah a ngai alawm, i chhûngte pawh. Heta awm ringawt hi awmzia a awm hauh lo," ka ti leh ringawt a.



"Min țhen chhan dik tak sawi phawt la, a dik nia ka ngaih chuan haw lam chu ka ngaihtuah chauh ang," țhutthlèng hnung nghèng dar dar pah chuan a lo ti sup sup a.



"Haw mai teh!"



Ka hrilh chuang lo va, Bawihtei lo haw thlengin a lêng. Bawihtei lah chuan a rawn hmuh phat ațangin," Au Muan, car chuan min phur kual tawh dâwn a mi?" a rawn ti nghâl.



"Ummm, i driver rinawm tak ka ni țan chiah e," nuih sângin a lo ti.



An chhuah hnu deuhah Tea a lo haw a, ka mitsîrin min en rulh rulh tih ka hria, ka melh duh hauh lo, ka thil tih lai chu ka ti miah miah.



"A lo lêng nange a?" a rawn ti ta nge nge.



"Tu maw?" ka lo ti thung.



"Naupang-țhangduang-tea kha maw le."



Ka melh ralh a, ani a lo nui deuh țhu. Chutia tih kher pawh a ngai lo, ani ai hian a puitling fê zâwk, naupang daih zâwk mah se, a phâk loh vâl a nih hi.



"I va ngei àwm ve! A nihna dik tak a nih chu ka sawi, inla puitling ve viau si, min biak nachâng pawh hre lo. Kan laka mark țhat a duh chuan i chhûngte hi min be nêlin min be țha tùr a ni lo em ni? A mâwl êm mai," a ti leh huah huah a.



"Nang a biak țhat kher che a țùlna pawh ka hre lo ve a," ka lo ti hlak a.



"Ngai tehrêng mai. I unaupa neih chhun ka ni ve a, ka pawimawh asin, min ui chuang pelh vâwk vâwk mai a, zilh deuh hlek a ngai a ni," a tih chuan," Ui chuang i ang êm bawk tak a nih kha a," ka lo ti sak.



"I țan ve hle mai, khatiang naupang hmel chang tițha vawr ringawt-" ka nui tâk chiamah chuan a tàwp thut a, min rawn en chiang khawp mai.



"Eng nge nuihzatthlâk?" ram hmak hian a ti a.



"I hmel kha maw le, i hmu ve lo mai mai a nih kha," ka lo tihsak, ka nuih zui leh chiam.



"Eng mah a awm lo ve a!" tiin a hmai  chu tuaiin a kal sawn ta daih.



Ani pawh hian hmelțha chu a lo ti ve chiang a nih hi. Nia, a hmel hi a chhe lo êm asin. Vun hàng lam aiin vun ngo lam a pàwl mah a, ràlkhat ațang phei chuan a langsàr vôh mai a ni.



Bawihteite rawn haw laiin Tea chu a awm ve reng tawh a, Bawihtei chu a rawn titi leh nasa mai. Muansanga erawh a țawng vak lo, Tea awm ve vàng pawh chu a ni maithei, mi â nilêng lo tân chuan a mitmeng ațangin thil awmzia a man thei ngei ang a, lawm hlawh tehchiam lovin a inhre ngei bawk ang chu.



Zanriah ei laiin Bawihtei a titi a, vawiin lama a u Muana nèn an lèn chhuah dàn chu a ni, a titi pui ber ni.



"Au Muana aiin apa Bobby-a a țha ka ti zâwk!" Tea chuan a lo ti a, min rawn melh kher bawk a.



"Au Muana chu ka țhian a nia, apa Bobby-a chu a ni ve lo alawm," ani chuan a lo ti thung a.



Ka nu leh pate erawh chuan eng mah an sawi ve lo. Sawi ngai an ti lêm lo pawh a ni mahna, kei pawh chuan engah vak ngai duh lovin ka lo ngawi ve mai mai.



"Au Muana chu a fel e, ice cream pawh min lei țhin, Barbie pawh min lei leh dâwn; mahse, țha taka kan test-naa ka pass chauhin a nia," a ti leh lar lar a.



"Chuti, i pass ngei a ngai tihna a nih dâwn chu tiraw?" ka pa chuan a lo ti a.



"Àpu, kan pâwlah chuan ka thiam ber asin, Baby-i chuan vawiinah pawh A-P-P-L-E 'Apple' tih pawh a thiam lo," a ti leh zârh zârh.



"I thiam bîk elo?!!" ka nu chuan a lo ti vat a.



"Aw, Miss-in 'very good' a tia, ka ti dik tih ka hre thei alawm," a tih chuan kan nui dar dar a.



"Ok, very good, well done, great, absolutely correct emaw excellent emaw a tih chuan i tidik lutuk a tihna vek aw," Tea chuan a lo ti a, a la nui vur vur mai.



"Au Muana'n 'very good' a ti ziah a, min zirtîr dàn a nia, chuta țang chuan ka hria alawm," a ti leh.



Zàn mutnaah chuan Bobby-a'n min rawn text a, Muansanga chungchâng chu pehhêl deuh chung siin min rawn zâwt fiah a.



Ka zêp hran lo, bâkah, ani mi fing chin chuan engkim kan awm dàn leh kan mitmeng ațangin a hre thiam vek tawh tho tho dâwn a, ka zêp duh hran lo.



Mahse, kan ințhen tawh tih ka hrilh thung.



*A nih tak chu maw le, in inhmeh dùn reuh ka lo ti asin*  a rawn ti.



*Haha*  tiin ka chhâng phawt a, a hnuah chuan *Bobby, min pui hrâm la ka ti ngawt mai* ka ti ta nge nge a. Hetia ka tih mai hi a ngai a ni, Muansanga hian kan pahniha min rinhlelh ngei hi a ngai si a.



*Eng kawngah chuan?* a rawn ti.



*Ka bialpa ni-ah a ngai che a*  Tlêm chuan dâwt ka sawi, kei hian ka bialpa ni angin ka sawi zâwk a nih kha.



Muansanga message a lo thlenh ve leh.



*I lo online reng sia, ka va hmu fuh tak che em!* a rawn ti ham ham mai!



*👍* ti bâkin ka chhâng lo.



Bobby-a ve thung chuan * Min ngaih dàn chu han dik teh hlauh se aw...* a rawn ti, nui lai a rawn ti tel bawk si lo va, min tihamhaih titih dêr mai.



A hnuah erawh *Engtin nge ka puih ang che*  țha tak chuan a rawn ti leh mai.



*Min chhàn țhat duh loh chuan...* Muansanga chuan a rawn ti ve leh thung a.



*A bulah ka bialpa angin awm rawh aw, chu chu ka ngèn duh che a* tiin Bobby-a chu ka chhâng.



*Engmah tih theih i nei chuang lo ang* tiin Muansanga ka chhãng ve thung.



Chutah, Muansanga message a lo thleng.



*Tu bulah maw?*  A dang a lo thleng lehnghal zat.



*I bialpa ka ni sa reng alawm, lemchan a ngai lo*  a rawn ti leh.



Ka rei leh!! Bobby-a ka thawn tùr kha Muansanga tho hi ka lo thawn tihna!! Lalpa leh, a va zia lo tak! Pawi lutuk!



*Ni lo, nangmah i ni lo* tiin ka va chhâng lët, min tibuai ta nuai mai!



*Keimah ngei, Zomuansang kha ka ni, tu nge kei ni lo mi dang i text a?*  a rawn ti leh.



Bobby-a chu ka lo la chhâng miah lo tih ka hriat avàng chuan Muansanga ka thawn ang chiah chu ka va thawn leh, zia lo thei e!



*Bialpa dang ka nei tawh ka tih ka tih kha* tiin Muansanga chu ka va chhâng leh.



*Wow..!! A va mak dâwn ve! Mahse, ka tih theih tùr tak niin ka hria, ka huphurh loh lam tak a ni e*  a rawn tih chuan ka nui deuh var var.



Mahse, hetiang ringawt hi a ni thei lo ang. Va ngen tâk ringawt chuh, a zahthlâk ve e, ka star țhinzia ka ngaihtuah chhuah phei chuan lei ka chhuah zuk zuk mai.



*Ka lâwm ngawt ang, ka țhen tawh a ni tih hi ringin hria se ka duh si a*  tiin Booby-a chu ka chhâng leh.



*I la online reng si, min rawn chhâng ve ta che* a rawn ti. Hei chu Muansanga a ni thung. A thinrim țan deuh tawh a niang, min ringhlel nasa tawh ang chu aw.



*Mi dang dang pawh ka text ve ang chu, zawnglai alawm ka nih le," ka ti ve sak mai.



* A țha, khatiang tùr kha*
*Mahse, i bialpa chu pakhat chauh, chu pawh keimah chauh* a rawn ti leh.



Huiha! He pa hi chu aw...!!! Ka thil sawi kha pawm ve mai se țha ni mai tùr.



*Kan ințhen tawh!* tiin ka chhâng leh.



*Nangmah a nih kha ka hriat loha min țhentu chu. Mi pahnih inkâr chu mi pahnih remtihna ngeia țhian tùr a ni, kei erawh chuan ka țhen thu che ka la sawi ve hauh lo a nia*  a rawn ti leh.



Țawngkam lah hi, mi hnialna tùr a hre thei si. Lawyer-ah țan daih zâwk tùr hi a nia, hetia min chhaih kual vêl mai mai lo hian.



Ka chhâng duh tawh lo.





*I MIT KHA MI DANGTE SUALNA HMUH NÂN CHAUH HMANG LO HRÂM ANG CHE, AN ȚHATNA LAI HMUH CHIAN TUM ZÂWK TEH*