☆LUHLULPA☆ - 25 & 26 By Dingdi Pachuau

☆LUHLULPA☆ - 25 By Dingdi Pachuau




Chhùna dàwr ka nghah lai chuan ka phone a rawn ri a, Muansanga a nih ka ring deuh ringawt; mahse, ka han en chuan a pa zâwk a lo ni, eng atán nge min la rawn call le? E, a fapa vàng hi a ni leh ngei ang chu.



Ka chhàn chuan,"Bawiha a rawn phei tiraw? In inkâr kha a tifel tawh niin ka hre si a," a rawn ti ta ngei a.



"Aw, ka țhen tawh alawm," ka ti ve mai a.



"Chu, i laka beiseina a la neih vànga rawn phei chu a ni lo ang chu maw? Ni lo tùrah ngai ila, ani hi zawng, a la naupang êm a, hma hun tùr thui tak pawh hi a la ngaihtuah thiam pha ve rih si lo va, in inhmu a nih pawhin a tâna țha tùr i lo hrilh fiah hrâm hrâm dâwn nia," a rawn ti a.



Chhàn dàn tùr pawh ka hre lo, ka ngawi reng ringawt.



"Nang chu i felin i rilru a puitling tawh a, hmalam hun engkim pawh hmu leh ngaihtuah thiam rual i ni tawh bawk a, pasal țha tak i hmu leh ngei ang tih ka ring a ni," a rawn ti a.



A rilru putzia hi hriat thiam har ka tih zâwng tak.



Dàwrah chuan mi rawn lêng lût pawh an awm ve nak nak a, kan dàwr hnaih deuha putar pawh a rawn lêng ve deuh reng; mahse, chhùn thingpui in hun àwm vêlah chuan a haw daih; Muansanga a rawn lang ve leh ta thung, inah ka awm lo tih a hria a ni chiang.



"Ei tùr ka rawn ken che a."



Khawi dawrah emaw rice a lo pack-tîr ve ngei a ni, pack hnih a rawn keng a, dawhkànah chuan ka ei tùr ni àwm tak chu a rawn dah a.



"Ei rawh, nakinah chuan a dài mai ang," tiin a rawn hawng sawk sawk a.



Flask-a thingpui chu ka thli chhuak ve thung a, no khat chu ka pe ve nghâl a.



"In inah ka rawn kal a, i awm lo va."



Kha maw, a rawn kal a nih ka ring rêng ah!



"Tu nge lo awm a?"



Min rawn en a, nui deuh suk hian," Ka nu la ni ve mai tùr," a ti sup a!



"Zak deuh teh!" ka lo ti hlak.



"Eng nge, sawi dik loh ka neih em ni? Thu dik alawm ka sawi, ka nu la ni ve mai tùr a lo awm miau si a," a ti leh a.



"Ei mai mai teh," tiin ka thil ei chu ka țhial țâlh țâlh a.



"I nu hi chuan mâkpa atân pawh min duh ve thei mai chuan ka ring, chuan, i pa pawhin; mahse, i nau kha chu...Mahse, pawi chuang lo," a ti duah a.



"Engtikah nge haw phei i tum?" ka lo ti daih a.



A thil ei chàwl meuhin min en tih ka hria; mahse, ka en duh lo tlat.



"I awm țhat duh hunah chauh ka haw phei ang," a ti ta sup a.



"Ka awm țhat viau hi."



"A țhat dàn hi a țha mah mah a."



Melh zauhin," Remchâng hmasa berah haw phei ang che, heta awm reng hi awmzia a awm lo. I sumdàwnna ngaihtuah a ngai a-"



"Nang ngaihtuah i ngai bawk a," a lo tihzawm hmanmawh a.



"Heti mai maia thên kual tùr a ni ngai lo. I chhûngte rilru tùr dâwn ve ta che, awmzia awm lo lutuk!" ka ti leh a.



"Kan inkâr hi tihfel phawt a ngai alawm, i rilru kha siam țha la, ka haw phei chauh ang," a ti ve leh a.



"Tihfel tùr a awm lo, kan tàwp tawh tih hi pawm ve mai ta che."



"Chu tak chu kan buaina. Ka titàwp ve  thei lo, U Bobby-a hi i duh tak tak lo tih ka hria a ni, min hnar nân hmanruaah i hmang mai mai a ni, a dik tiraw?" a rawn ti ta heu mai!



"Teuh lo!!" ka lo ti chiam ringawt.



"Hetia i awm tlat chhan hi ka hre lo a ni," min en kur pah chuan a ti a.



"Engtin mah ka awm lo, nangmah zâwk a nih kha," ka lo ti a.



"Ei zo phawt teh," a ti leh daih.



Eng mah ka sawipui thei lo. Hawtîr vat vat kha ka duh chu a ni mai; lehlamah erawh chuan a hmel ka han hmu thei leh tawh lo tùr chu ka ngaihtuahin ka huphurh viau bawk si.



"Chaw eiah vawi khat tal chu min sàwm ve ka ring a niah."



Buaithlâk thei e. A sawi hi a dik lo pawh ka ti lo, hmel hriat leh innghahna nei hran lovin a rawn kal ve rãwih a ni a, a chungah rilru chhia ka pu lo tih hi a hre chiang khawp a nih ka ring, hetiangte a sawi chhuah ngam ni! A, ni leh lo, a la naupan lutuk vàng hi a ni zâwk ang.



"Bialpa hlui chaw eia sâwm nawlh nawlh ka hre ngai lo ve!" ka ti thung.



"Kei chu 'hlui' pawh a ni hleinem, min ngai 'hlui' mai mai a nih kha. I chhûngte, ni lo, ka chhûngte la ni mai tùrte pawh hi hriat chian ve ka duh a," a tih chuan ka en reng mai!



"Eng nge, khatia min en vak?"



"Naktûkah haw ngei ngei ang che," ka ti ta ringawt.



"Hun ka tih hunah chauh ka phei ang," a lo ti thung.



Zàn lamah chuan a rawn kal lo, rawn kal suh se, chhûngte lakah pawh a inthlahrunawm. Rin loh deuhin Victor-a a rawn lang thung!



Mak ka tihzia mai chuh! Biak nachâng pawh ka hre lo, ka lo en tawp, a hnuah erawh hlauhthàwnna rilru ka nei zui a, Bawihtei hi rawn lâk tumin a rawn kal a niang ka ti leh hnuhnawh.



Tea a lèn chhuah vàngin ka nu leh pa an awm a, Bawihtei pawh a la muhil lo. A pa a hmuh chuan hlim zetin a lo ban vat. Ka biak loh avàngin ka nute'n an lo chhàwn a, kei erawh ka ngawi reng.



Chutah, thil rin loh deuh a thleng leh ta.



Kan zavai hriatah chuan ngaihdam min dîl a nih chu! Chu mai a la ni lo, ka nu leh pa hnênah pawh a mal ve vein. Ngaihdam tlâk loh a nih thu chu a sawi tel tho va; mahse, ngaihdam min dìl loh chuan a rilru a nuam thei lo tih a sawi thung.



Ka ngawi reng, Bawihtei chuan,"Âpa, min hmu lo rei sia, min ngai ve tawh tho tiraw?" a ti a, ka hawi chhuak ve chiah.



"Ngai lutuk e, ka hmu châk tawh bawk che a."



"Kei pawh. Àpu pawh ka ngai tho," a lo ti leh a.



Bawihtei chungchâng pawh chu a sawi chhuak a, a hnêna awmpui a tum tawh loh thu leh min lâksak a tum loh thu chu pehhêl deuh takin a sawi. Bawihtei a bulah, amah nghèng rialin a awm ve reng sia, sawi deuh tawk chu a hreh ve a niang.



Miin ngaihdam min dîl na nâ nâ, ngaihdam loh thu awm hek lo le. Bâkah, ngaihdam nih aiin ngaidam theitu nih hi a ropui alawm, tu mah ngaihdam ngai lo mihring kan awm lo , thil tisual thei vek kan ni si a.



A tûkah thil buaithlâk tak ka tawng ta, Bobby-a a rawn kal a, a hnuah Victor, a dawt lehah Muansanga.He pa pui hi, a la haw lo ka ti. Ka nuna ka lo tawn mipa pathumte nèn inhmachhawna țhut ho chu, a nawm dàn a nuam lo khawp mai.



Kan țawng tam lo tlâng kher asin, ka chhûngte tu emaw tak awm ve se ka ti takzet a ni.



Mahse, Bobby-a a fel hlauh. Titi rawn vawrhtu ber a ni, Victor-a a țawng ve zauh zauh, Muansanga phei chu a lo luh tirha a țawng bâk kha a țawng ve tawh lo.A mit meng chu ngun zet zetin a lèn kual a, kan titi dàn ațangin eng emaw hriat chhuah tum a ang ka ti ber. Victor-a a hmu kha chu mak a ti ve tho tih ka hria, chutiang chiahin Victor-a pawhin Muansanga a hmuh khân.



Vànneihthlâk lutukin ka pa chhuak a lo haw ta hlauh, thingpui ka siam lai takin a ni nghe nghe. Ani chuan ka inlêngte a hmuh chuan a rawn be leh suam suam mai, boruak ipik lutuk pawh a zia deuh hawk chiang.



Bobby-a a haw hmasa ber a, Victor-a leh Muansanga erawh chuan chhuah mai an la tum loh hmel a ni, an la țhu țha sauh sauh.



Mahse, rin loh deuhin Bawihtei lo thlen hma deuh chiahin Muansanga a haw ta daih mai. Mak ka ti ru deuh khawp mai a; mahse, ka chelh chuang lo.



Bawihtei a rawn haw hnu rei vak lovah Victor-a pawh a haw, ka be țha lo hran lo; mahse, mi dang ka biak ang thovin ka bia chuan ka hria. Hei tak hi ka fel theih lohna chu niin ka hre țhin, mi fel leh fing chuan mi, an chunga sual leh rilru pu țha hran lo te pawh hi țha tak takin an bia a, nui sângin. An chezia leh țawngkamah eng mah an lan chhuahtîr ngai lo, inzir nasat hi chu ka la ngai a ni.



Tlai eirawng ka bâwl zo ka inbual dâwn tihah Muansanga'n min rawn phone.



"Vawiin zet kha chuh!" a rawn ti ringawt phawt.



A sawi tum hre thiam mah ila ka hre thiam lo der tlat thung.



"Eng chu maw?" hriat thiam loh hmel taka ka'n tih hrâm pek chu.



A ngawih deuh dat hnuah,"Mimawii pa nèn khân in inbe leh tawh tihna mi?" a rawn ti  a.



"Be hran lo ve."



"Zêp kher suh, mak ka ti tih pawh ka zêp lo ang e, mak ka ti tak tak a ni," a rawn ti leh sup sup a.



"Thil mak vak a ni hleinem."



"A, nia, thil thleng ve thei tho a ni; mahse, a mak ka ti tho," a ti leh a.



Ka ngawih deuh reng avàng chuan," U Bobby-a hi chu min țhen i duh vàngin chhuanlamah i hmang tih ka hria; mahse, ka rin loh lam daih, Mimawii pa kher hi chuh," tiin a thaw hak phawt a, chutah," Nia, fate tihfahrah hi a țha miah lo, Mimawii tân thil țha tak a ni; mahse, ani nèn in inbiak leh tâk avànga min bum duh kher hi chu, a nâ ka ti a ni," a ti zàwi ruih a.



Victor-a a hmuh avàng khân ka țhen chhan kha Victor-a nèn kan inbe țha chho leh taah a ngai a nih hi, chutah ka bum niin a la ngai zui.



"Ka bum che niin i ngai maw?"



"Ngai kher lovin a chiang reng alawm, a ni lo'm ni?" a lo ti thung a.



"I suangtuahna kha a tak emaw ti suh, thil rêng rêng hi hriat chian loh chuan rin nghâl ngawt loh tùr," ka lo ti a. A chhan chu a thil hmuh a ring lutuk hi ka duh lo, ani hi bum ka duh lo, țha taka țhen mai kha a ni ka tih tùr chu.



A thaw hak a,"Nia, a dik chiah, ka rilru ka lo kal thuipui lutuk a ni," a ti leh a.



Victor-a hi ka pasal hlui a ni a, thil tam tak ka chungah a tidik lo ngei mai; mahse, ngaihdam min rawn dïl a, ka lo ngaidam a ni mai a, chutah, 'Rawn lêng suh' tih thu lah a awm hek lo, a fanu hmu duhin a rawn kal a ni ve mai, ka chhûngte lahin lo biak chhiat viau an phal hek lo. A chhan chu Mimawii pa a la ni tlat a, an tunu pa chunga rilru chhe deuh put an duh hek lo.



"A tàwp thlenga min la bum țàng țáng duh hi a mak ka ti a ni, Zon. Ka rinzia che hi i hre thiam pha lo ang, ka rin ber maiin hetianga min han bum let tawp mai hi mak ka ti lo thei lo, nâ ka ti êm êm bawk. U Bobby-a i chhuanlam tlat a...Nia, a țha a ni ang e, ka inrawlh ve miah lohna tùrah ka lo inrawlh a ni tiraw? I rilru ka lo tihrehawm àwm țhin mang e," tiin za lo tih hriat zet hian a nui lui hak a, chutah,"Tlang takin min hrilh ve mai ni la a țha tùr, rilru hrehawm rêng réngin ka siam lo tùr che a nia, kei lah rilru nâin ka awm lo tùr," a ti leh a.



A thil ngaihtuah dàn leh ka lo ngaihtuah dàn chu a va inpèrsan sî êm!



Thil awm dàn chu sawi fiah tumin ka kâ ka âng zuai a; mahse, ka țhulh leh ta zâwk. Ka rilruah a pa thil sawi kha ka ngaihtuah chhuak zawk, tûn hi hun țha tak tùr a ni, ka bawhpelh lo ang. A rilru chu ka tina leh khawp ang le, chuan, keima rilru ngei pawh; mahse, ka tih ngei a țûl, ani pawh hian hei hi chu a ring khawpin ka ring bawk.



Ka inhûm ruh a, thâwk la hakin, muangchângin,"A dik alawm. Ka țhen chhan che pawh a ni rêng, țûl lovah hun i khawhral mai a ni, i chhûngte ngaihtuah la, i la naupang a, hma-" ka tih lai chuan,"Hetiang êma nunrâwng tùr hian ka lo ring ngai lo che asin, kha thu kha sawi chhuak ngai lo tùra ka duhzia che pawh i hria. Naupang tih hi ka hua, ka haw takzet!" a ti nghut nghut a. Chutah,"Kum hi chu eng tihna mah a ni lo, nambar mai mai a nih bâkah 'word' pakhat ve mai a ni," a ti leh nghut a.



Ka tihpalh a ni. A hriata 'naupang' tih amah sawi nân hman a duh lohzia ka hre chiang tawh hle si a, hei zet chu ka tihpalh chiang; mahse, ka sawi zo vek tawh, awmzia a awm tawh lo.



"Ka tihpalh."



"Ka rilru tihnat nân i sawi chhuak lui a nih kha. Naupang, upa, inupat hleih, hêng țawngkam hi ka hua, ka haw kumkhua ang," a ti ta tàwn táwn a.



Hrehawm ti zetin a thil sawi chu ka ngaithla reng a, a rilru hrehawm tùr chu ka ngaihtuah a, kei ngei pawh ka na thar leh takzet. A chhan chu tûn țuma ka thil sawi hi chuan a hma ai khân a tina ang tih ka hria, a mit ngeiin Victor-a, kan ina a lêng lai a rawn hmu ve si a.



"Zon, i inhmeh lo takzet a ni," a rawn ti leh ringawt a, a rilru nat vàng a ni tih ka hria. A châng leh,"I lo thei hle mai!" a ti leh thùl.



"Haw la, i rilru tihnatsaktu che hi min rawn theihnghilh hmak ang che," ka tih lah chuan," Chu chu ka thu thu," a rawn ti leh lawi a, țawngkam hman tùr pawh ka hre thiam lo.



"Engtin nge khatih hun chhûng khân min bum tih ka lo hriat miah loh le! Ka mit a lo va del tak!" a ti leh vang vang ringawt a.



"Tunah chuan i mit tihvàrin a awm  tawh alawm," ka tih chuan,"Vâr lovin del rengin awm zâwk se ka ti," a ti leh daih a, a ngawi leh vung vung a, chutah,"Mimawii min lo biak dâwn nia, a hmalam hunah thil țha tinrêng ka duhsak mai ang, mangțha le," tiin ka inrin hman hma chuan kan inbiakna chu a titàwp ta daih a.



Tunah zet chuan kan inkâr chu a tàwp fel ta. A hma khân keimah zâwk khân ka titàwp kha a ni a, tunah hi chuan amah zâwkin min mangțha ta chu a nia. Khumah chuan ngawi rengin ka țhu a, ka melh ngai chu ka melh tlawk tlawk.



Thil dang zawng aiin a rilru na mawlh mai chuan min tihrehawm. Ka dâwt hrilh chuan a tina takzet a ni, hei hi ka tum chu ni reng mah se a taka han tawn thar leh chuan a hrehawm leh viau a ni. Bum hmang, dâwtsawi hmang leh mi rinawm lo hmuhin min hmu tawh ngei dâwn si.



Ka inbual chhûng pawh chuan a awm dàn tùr chu ka ngaihtuah char char, a haw phei nghâl ang em? Hmeichhe bum nia inngaiin tlâwm a inti ngawt ang chu, ka khawngaih êm êm rualin ka tih mâkmawh a ni si.



"Min ngaidam hrâm rawh aw, i pa ka hnial thei lo, in chhûngkaw tâna thil țha ber a ni si a, chhûngkaw keh darh ai chuan hetia kan awm hi a țha fê zâwk a ni," ka ti rilru mawlh mawlh a.



Zànah hma takah ka mu. Ka rilru a nuam lo va, Muansanga rilru tùr chu ka țâwmpui ve tlat a ni, a haw phei a nih chuan amah tê chauhin a tlân àwm si a, a khua a har ngawt ang. A rilru na takin ka siamsak si a, a la naupang a, hlimna chu a hmu leh thuai mai ang. Min theihnghilh thuai ang a, hmalam hun êng tak neia amah hmangaih êm êmtu a tawn thuai ka duhsak. Kei nèn hi chuan Khuanu ruat kan ni mawlh lo a ni tih hi pawm thiam tum mai a țha, mite pawhin an hmangaih ber ber an nei vek chuang hleinem.



A haw phei chu a ni ngei ang, a reh ta hmak mai. Tlêm chuan a hmel hmuh beiseina ka nei țhìn a, a rûkin ka mit pawh ka lèn fo; mahse, beiseina thâm ral mai a ni ta. Hei hi a ni lo'm ni ka duh kha? Ni lo, ka duh chu ni nâng, a pa duh ka tihhlawhtlinsak zâwk alawm. Kei chuan nuthlawi ka nihna leh a naupanna dah bova hlim taka inkawp chhoh zêl ka duh; mahse, duhna awmze nei lo 'kawrawng' mai a ni.



Kâr a liam a, min rawn text lo va, min rawn call hek lo. Mimawii pawh a rawn be chuang lo, a reh vang vang mai, ka khua a har, ka ngai. A hma kha chuan Krismas boruak vêl chho kha a ni a, ka buai avàngin amah ngaihtuah nân ka rilru a kal ding thei lo a nih kha, tunah erawh ka hman viau si a, ka ngaihtuahna ka kàwm tluk tluk mai a ni.



A chanchin hriat tùr awm lo ta chu, a IG lam ka check leh ta dûk dûk. Ka nêp hi chu ka ti ve chiang a ni, țhentu zâwk hian a chanchin hriat ka tum leh dûk dûk chu a ni si a.



Post thar êm êm a nei lo; mahse, a pic post hnuhnung ber chuan ka mit chu a la leh deuh zak chu a ni, ka thinlung a khawih, a chhan lah ka hre chiang, he pic-ah erawh hi chuan a hmel a tilang ve tawh thung.





*NAKTÛKAH ENG THIL NGE THLENG DÂWN I HRE LO, CHUVÀNGIN, I HUN NEIH HI THINRIM NÂN, MI DANG HUAT NÂN LEH SAWISÈL NÂN HMANG LOVIN HMANGAIHNA HUNAH HMANG ZÂWK RAWH. NGAINA LOVA HAWTU CHE AVÀNGIN BUAI DUH SUH, HEI CHU KHAWVÊL KALPHUNG VE PÂNGNGAI A NI E*









☆LUHLULPA☆ - 26 By Dingdi Pachuau





A room duh tak ngei kha a ni, pâwn lam hawia a ding lai a ni a, a hmel chu a sîr zâwngin a lang na a, a chhe lo viau tho. Caption erawh a awm lo.



Ni e, a hmel tê hi a chhe lo alawm, a pian pawh a nalh; mahse, chûng chu a páwnlam lan dàn mai a la ni, nula leh tleirâwl tam tak duh rawn a ni a, an duha an star viau pawh hi àwm ka ti. Amah a chhiat loh bâkah a lâr a, mi rethei tak an ni lo bawk. A nun chhûngril lah belhchian a dâwlin a fel a, ruihtheih thilah a la fihlîm zui. Duh loh theih pawh a ni lo.



Mahse, ka tân chuan a rem ve thei ngang lo a ni, Victor-a nupui hlui hian ka phû mawlh lo a ni e.



Victor-a pawh a rawn fel tawh khawp mai, Bawihtei a rawn tlawh hman loh pawhin a rawn be zauh zauh a, kei erawh min beisei àwmin a awm hauh lo. Ngam pawh a ngam tawh lo ang, kei pawhin ka duh tawh hauh lo bawk, ka duh loh phâk loh ni mah se.



Bobby-a erawh a la rawn lêng reng reng tho, min duh thu lam erawh a sawi ngai lo. Țhian dik tak angin min en niin ka hria, a hma kha chuan min duh ve deuh ang khân a awm țhìnin ka hre sia, tunah hi chuan khatiang  khân a awm ngai tawh lo. Ka awm dàn ațangin Muansanga kha ka duh takzet a ni tih a hria a niang.



Ni tina ngai leh ngai hlîr maia hun han hman tawp mai chuh, ka ngaihtuahna a vâk nasa thei si a, ka duh lo tak tak a ni. Dàwr ka nghah lahin ka ngaihtuahna a kal ding a, ina ka awm pawhin chuti tho. Eng emaw tak tih tùr ngaihtuah ka duh, ka rilrua Muansanga emaw thil dang dang ka ngaihtuahna lak ata min hruai pêng thei tùr ka duh.



Ka sumdàwnna ve lah chu, Aizawla ka awm lai ai khân ka hlâwk lo ta zâwk a, tihtàwp erawh ka la ui ve si avàngin ka la kalpui ve țàng țáng. Bawihtei mamawh tùr a la tum ve thei zêl si a, ka la titàwp ui rih a ni. Bungrua a lo thlenin ka buaipui ngai lo, Tea hlîrin a lam țhìn, thawn chhuah lam erawh ka buaipui thung a.



Ka chhûngte hnêna eng emaw tak tih tùr ka duh thu ka sawi chuan ka nu chuan,"A ngai chu ka ti hauh lo nain i duh miau chuan hnial che ka tum lo, School-ah inhlawh i duh ang em?" a lo ti vat a.



Ka pa ve thung chuan,"Dàwr hi tilian ila, nghâk la?" a lo ti ve thung a.



"Rilru hman tak takna tùr ka duh alawm," ka lo ti a.



"Lehkha zir chhunzawm leh la?" Tea'n a lo ti vat a.



"Nia, D.El.Ed pawh i training thei tak ang chu," ka nu pawh chuan a lo ti leh a.



Private school-a zirtîrtu nia inhlawh zawr zawr ai chuan training ila, ngaihtuah loh chhûngin hun chu a lo ral ve duak thei ang chu. Kum tam pawh a ngai lo va, vànneih thilthuah ka training zawhah hna pawh ka hmu ve mial thei asin, hmalam hun a hriat hauh si loh. Um, a țha ang. Admission hawn veleh ka'n try ve ang e.



Lehkha han zir thar leh erawh a huphurhawm khawp ang le. Ka zir lo rei tawh si a, a țantirhah chuan ka bil khawp ang.



Zan lamah erawh mut hmuna Muansanga IG check ka bànsan thei lo, post thar nei vak lo mah se a hluiho chu ka en kual ziah. Kan pahniha kan lâk dun erawh ka hmu ngai tawh lo, a thinrimin a delete ta vek a ni ngei ang, ka thiam lo chuang lo. A thinlung ka tina ve êm a ni, min haw viau tawh ang chu. Min theihnghilh thuai se a tân a țha ber ang.



Angel-i IG lam pawh ka check tho. Ani erawh hi chuan Post thar a nei fo, nimin lamah pawh an picnic-na ni àwm tak thlalâk a rawn dah a, Muansanga erawh a kal ve lo a ni ngei ang, a hmel hmuh tùr a awm ve lo; mahse, a tag tho.  Hetia kan nih tawh loh hnuah hi chuan an inzui leh chat ka ring a nia; mahse, an inzui leh zui loh ka hre hauh lo, a lang lo lamah an inzui pawh a ni thei tho. Pic pawh a tag alawm le.



Lehkha han zir leh chu, ka nuih te lam lam a zâ. Bawihtei zirtîr ngai bawk, kei zir ngai bawk. Rilru erawhin thil dang a ngaihtuah țha hman lo va, chulamah kher chuan a țha ka ti khawp mai.



Project, assignment tih neuh neuh tùr a tam tâk hnuah phei chuan ka duh aiin ka buai ta, nu nih tawh nèn phei chuan buai tak ka ni. Ka chhûngte an fel êm zâwk a, Bawihtei nèn kan lo hrisêl bawk nèn, chuti ni lo phei se chuan ka beidawng hma ngawt ang!



Ka vànneihna leh zêl chu, Bobby-a ràwn tùr ka la nei zël hi a ni. Ka tân a țangkaizia chu, kawng engkimah min pui a ni mai. A lo awm lo ang tih ka hlau ngawih ngawih.



*******



Nutei thlàn ka tlawh a, ka tlawh khàt deuh tawh avàngin hrilh tùr ka ngah kher mai. Ka rilru zawng zawng ka sawi chhuah vek hnuah chuan ka thâwl deuh hawkin ka hria. La dam ni se min hnèm leh nasa khawp ang chu, tunah erawh a reh vawng vawng tawh si. A țawng duh bawrh bawrh theih tehlul nèn, biak țawng tùr a awm tawh si lo, ka ngaih a zual thar vawng vawng.



Ina ka haw chuan ka nuin min lo ko vat a.



"Bawihtei pain accident a tâwk hlauh a nih àwm chu! Bawihtei hmuh a châk a, 'A lam a lam mai' tiin a pain min rawn phone a," tiin min hrilh a.



Ka phu ve deuh zawk mai! A na viau ang em? Na viau lo hrâm teh se, a chungah thil țha lo tak thleng tùrin ka duh bîk hauh lo.



Engtin nge maw a accident rêng rêng ni aw? A rui nge ni ang a, a tlân chak lutuk ni ang? Engati nge ka phone-ah pawh min rawn hrilh ve mai loh? Ka pa pawhin ka nambar kha a nei reng sia.



"Engtin nge a accident a?" ka ti sap a.



"Ka hre chiang bîk lo, ani pawhin chiangkuang takin a sawi bík lo a," ka nu chuan a lo ti a.



"A nih, engtin nge i lo chhàn?" ka tih leh chuan," Engtin vak ka chhâng lo, 'Ka lo hrilh ang e' ka ti mai," a lo ti mai a.



 "A na viau em ni le?"



"Aw..zâwt chiang la? A pa nambar ka neih kha. Kha," tiin a phone chu min rawn pe a.



Zanriah kîl laiin kan sawi chhuak a, Bawihtei hriatah erawh a nat dàn kan sawi chiang lo.



"Chuti na nâ nâ chu in phei anga ni mai alawm. School chawlh tih lamah kha chuan zirtîrtute pawh kan hmu dàwr dàwr mai a niang chu," ka pa chuan a ti chuar chuar a.



"Âpa a damlo maw?" Bawihtei chuan a lo ti ve a.



"Aw, a hmu châk che a. Aizawlah i pa chu kan tùrin i kal duh ang em?" ka tih chuan," Aw, duh lutuk! Âpa chu min ngaih vàngin a damlo a ni chiang mai," a lo ti ve a.



"I va kal chuan a dam phah chiang ngawt ang!" Tea chuan a lo ti a.



"Aizawl chu ka kal leh châk tawh alawm. Âpa leh àpu leh Au Muana ka hmu châk a," a ti leh làr lár a.



Tea'n min rawn en tih hre mah ila ka en ve lo. Naktûk khi Sunday a ni a, kan phei thei lo phawt. Thawhțanni lamah kan phei mai loh chuan, kei lah ka buai loh lai tak a nia, a zia deuh.



"Khawiah nge in va thlen ang?" Tea'n a tih chuan ka lo ngaihtuah loh lam tak a nih avàngin chhàn ngaihna ka hre dèr lo.



"A pa khân hmun danga in thlen a remti hauhin ka ring lo," ka nuin a tih chuan,"Ni dâwn tak, thlenna ka lo ngaihtuah miah lo," ka pa pawh chuan a lo ti ve a.



"An inah bâk in thleng lo ang, in thlen sawn an phal lo ang," Tea pawh chuan a lo ti ve a.



Bawihtei puin min rawn phone leh chuan an ina kan thlen tùr thu chu a sawi chhuak ta rêng. Tih dàn tùr tak pawh ka hre lo, thlenna tùr hmun dang ka hre hauh si lo.



Thawhțanniah, sumo zîng dâr 10 chhuakah kan nufa chuan kan phei ta. Bawihtei chu a phûr ngang mai a, kan rilru chu a inpèrsan viau a ni. Kei chuan ka huphurh, zêp lohah chuan. Bawihtei pi hmel ka mitthlaah a lo lang a, min ei lo leh dâwn si. A nungchang kha a la ngai rengin ka ring tlat a ni, a bula awm leh kha ka châk hlawl lo.



Tluang tak chuan kan thleng a, Bawihtei pawh a rui lo ve. Khawlum a zia deuh tawh vàng a ni ngei ang, favàng boruak piah lamah thlasik a lo inher chhuak leh țêp tawh a, a àwm ve tho mai.



Hmun dang thlenna awm ta ngang lo chu, Bawihtei pate inah chuan kan innghat a. Bawihtei puin min hmuh  chuan a hlim kher asin, Bawihtei pi erawh a lo awm lo. Mikhual room-ah kan indah lût, kan awm rei dâwn loh vàngin thawmhnaw pawh ka keng tam lo rêng a, kan hautak lo ve.



Victor-a chu ka rin aiin a lo na daih mai! A lu an tuam lûk a, a bân veilam pawh chuti tho. A ke pahnih phei chu an lo cher khawng tlat, a nuam lo khawp ang le!



Kan han thlen chhoh lai chuan a lo muhìl a; mahse, a lo harh vat. Bawihtei a hmuh chuan a lo ngai tawh viau a ni ngei ang, a mittui a lo tla hial mai! Kei pawh mittui pawnlâng chi tih takah, ka mittui a tling ve tho, a far êm lo.



Ward pangngaiah awm lovin Cabin-ah a awm a, a awmna chu a nuam khawp mai. Ka pain a awmpui deuh reng a, Victor-a cousin-te'n an awmpui deuh reng bawk. Ka nu erawh dàwr nghah a ngaih vàngin a awmpui ve lo, a fapa neih chhun a nih avàng erawh chuan a ngaihtuah ve viau tho a ni àwm e. Zan khat na nâ nâ chu han riah ve pawh ka hreh loh tehlul nèn, Bawihtei puin a phal tlat lo. Bawihtei a ngaihtuah a, ka tel lovin an bulah a mu duh dâwn hauh si lo va, bâkah, mutna a nuam fahran dâwn si lo nèn, a phal tlat lo.



Ni hnih kan châm a, Victor-a pawh a zia viau. A ke a chêt thei lo chu hrehawm a ti ber a, a lu lam erawh a harh țha viau mai. Bawihtei pawh a titipui peih reng a, keimahin ka lo khap zâwk. A țawng vak chuan a taksain a tuar mai ang, chakna a la mamawh nasa si a.



A tûk maia kan haw phei tawh dâwn avàngin Victor-a chu a lungngai khawp mai a; mahse, puitling a ni tawh a, han phal lo chiam dâwn mah se tih theih a nei vak tlat lo miau a ni. Bawihtei chu a bulah chuan a țhu nilêng deuhthaw a ni, an inngai ve viau pawh hi a àwm tho, a pa hian a duat ve êm a.



Kan haw lamah chuan Bawihtei thil tùr leiin dàwrah kan lût leh rih a, Aizawl kal mana thil thar pakhat tal leisak loh chu ka ti deuh, kan kal har leh tawh àwm si a.



"Au Muan....!?"



Ka thin phu a rawn rang  nghâl zawt mai! Ka lo hmu ve leh pek lo va, Bawihtei chuan a va pan vat a. A lo pawm kâng lawp a, ka en reng lai chuan ani pawhin min rawn hmu ve ta chiah. E, tu emaw kalpui a nei a nih hmel, Angel-i a nih ngei dâwn saw.



"Eng nge in tih a?" tiin a zâwt a.



"Âma nèn thil kan lei a. Âpa kha min ngaih avàngin a damlo nasa lutuk a, a lu te, a bân te, a ke pawh an tuam vek," a ti bawrh bawrh a.



"A ni maw?!"



"Aw, naktûkah kan haw tawh dâwn a," a tih chuan Muansanga chuan min rawn enin,"Aizawlah in rawn pheina a rei tawh em?" a ti sup a.



Ka chhàn hma chuan,"Hei, hetiang hi kan awm tawh," tiin Bawihtei chuan a kutzungțang pahnih chu a pharh a, chu chu ka hmuh chuan mak ka ti kher mai. Engtin nge chutiangte chu a lo hriat ve ni?!



"A, Mimawii ni rengin! Kan va inhmu khât ve!" tiin Angel-i chu a rawn kal  hnai ve a.



Tuna kan boruak ang hi alawm boruak chhia dik tak chu. Angel-i hi ka thîk lo ka tih chuan ka daw duai, an lo chhuak dùn leh tawh si a, an lo inzui leh tawh chiang a nih chiah hi.



"Kan hmanhmawh deuh sia, insiam ngai bawk nèn, Bawihte, kan kal tawh mai dâwn em niang?" ka ti a.



"Au Muan, lo zin leh la?"



Bawihtei tak hi chu aw.



Engtin tak nge kan ințhen dàn pawh ka hre lo, Angel-i thîknain ka thinlung a tichawmawlh tlat a, thil ka ngaihtuah chiang thei lo.



Kan haw dâwn meuh chuan Bawihtei pi pawh a fel ve ta khawp mai. Min be vak lo mah se, Bawihtei tal a be peih a, ka lâwm tho. Bawihtei hi a duat lo ang tih ka hlau ber, kei hi chu engah mah min ngai lo mah se, Bawihtei hi chu a tunu a nih ang takin duatin hmangaih se ka duh.



A puin Bawihtei tân eng eng emaw  hawn phei tùr min pack-sak lawih mai. Ngai lo tiin țang ve viau mah ila a tàwpah chuan ka tlâwm ta nge nge. A tunu hi a hmu khât ve tawh si a, a theih tâwka a duat venaah ngai mai ang.



Zànah chuan Bobby-a leh ka chhûngte'n min rawn bia a, sumo-a kan chhuah hun tùrte leh thil dang min rawn zâwt nual.



WhatsApp message lo awm vàng tawh chu ka han en a.



*Mimawii pa chu eng nge a an tawh a?* tiin. Muansanga tak hi chu aw.



*A zia zêl e* tiin ka chhâng ve.



*Khawi damdawi inah nge a awm a?* a rawn ti leh.



Eng atân nge maw a tih ni? Mahse, zâwt buai lovin ka hrilh ve mai, min zâwt na nâ nâ, ka hrilh ve mai ang chu.



*Ka tawrhpui khawp mai che, hrehawm i ti àwm si a*  a rawn ti leh.



*Ka lâwm e*  ti chauhin ka chhâng.



Min rawn text chhunzawm tawh lo chiang khawp mai!



Bawihtei puin min thlah a, kan tlân tùr chu kut kan invai nasa, Bawihtei chuan a uar khawp mai lehnghâl a, an invai tàwp hlei thei lo.



Kawng tluanin Muansanga ka ngaihtuah a, ka duh lo viau nain ka rilru ațangin ka paih chhuak thei dêr lo. Bialnu pawh a nei ve leh tawh a nia, lawmpui viau tùr chu ka ni asin le; mahse, lawmpuina rilru ka pu thei hauh lo.



Nizànah IG-ah min rawn text hnu lawkah khân an pahniha thlalâk a rawn up a, vawiin lama mi kha a ni chiang, an thawmhnaw ațang khân ka hre thei a ni.


*******


Kâr hnih a ral hnuah chuan Victor-a pawh damdawi in ațangin chhuah an dîl a, vawiinah hian an chhuak dâwn a ni àwm e. A tihzia khawp mai, rin aiin a chhuak hma thei a.



*Vawiin chu chhùn chawlhah kan inhmu lawk thei ang em?*



Bobby-a a lo ni.



*I hman em ni?  A pawimawh viau te chuan kan hnial ngam nâng* tiin ka chhâng a.



Kan sem-ah hian ka upat tawh vàng leh ka sàn avàng hian ka êkchhe làr a, ka kum rualpui chu awm ve tho mah se min fiam peih bîk viau. Kan miss leh sir-te pawhin ka hming hi an lam deuh reng maiin ka hria, nu ka ni tawh tih an hre vek bawk a, min ngamtlâk deuh phei chuan," Nu i ni tawh hi chu aw..!!" tia min fiam an chîng, ka ngei thei a nia.



Chhùnah chuan Sèrkawnah a țhiante restaurant-ah kan chàwl a, ka t-shirt hâk chu ka puanbah ken chuan ka khuh bo vek, training lai ka ni tih miin hre lo se ka duh, min en duh hlawm si.



"Nuam lo i tih hmel sia, hmun dangah kan chàwl dâwn em niang?" a tih chuan," Ho mai mai, chu ai chuan min hmuh i duh chhan sawi zâwk rawh," ka lo ti thung a.



Ei tùr kan order hnu chuan a chair hnung nghen ar ar pah chuan,"Nizàn hmasa khân Muansanga'n min rawn phone a," a ti ta sap a.



Ani rawn phone chu eng atân chuan min hrilh chu ni maw?



Ka ngawih reng vàng chuan sawi zawmin,"I chanchin kan sawi a, pawi i tih loh hrâm ka beisei," a ti leh a.



"Engah ngawt maw? Engtin nge min sawi a? Min rêl nasa àwm mang e!" tiin ka nui lui sak a.



"Kan pahnih inkâr min zâwt a, chuan, thil dang pawh," a ti leh a.



Engtin nge an inchhàn ang le? Sawi vak tùr chu a awm lo maw le, kan inngaizawng lo miau si a.



"Eng atân nge a zawh che a?"



"Hlauthâwng duh suh, thu dik tak bâk ka sawi lo a nia," a lo ti leh a. Ei tùr a lo thlen tâk avàngin kan țawng chhunzawm ta rih lo.






*NGAIHDAM THEIHNA HI MI PUITLING ZIA A NI A, MI FING CHUAN MIIN AN SAWI CHHIATNA LEH RÈLNATE MÊNAH A THLÂK ȚHÌN, BUAI LOHNA TÙRAH A INHAM BUAI VE NGAI LO*