☆LUHLULPA☆ - 27 & 28 By Dingdi Pachuau

                            Hnâr-teveuh-mawia😍



☆LUHLULPA☆ - 27 By Dingdi Pachuau






"I phalna tel lova ka lo sawi ringawt chu ka inthiam lo deuh viau nain dâwt han sawi ringawt kha chu ka inthiam thei dâwn si lo va; mahse, a pawi lo chin chiah bâk ka sawi chuang lo aw," a rawn țawng chhuah leh chuan a ti duah a.



"Ho lutuk!" ka lo ti a.



"Zawh àwm che a ni em tih ka hre lo nain zawh che ka duh a. Muansanga nèn khân engati nge in ințhen a?" a rawn ti chhuak ta.



"Kan ni lo," tia han țana dâwt han hrilh thar chi pawh a nih loh avàng chuan," A rem lo a ni deuh ber mai," ka ti ringawt, a hmel pawh ka en ngam lo.



"Nang aia a naupan vàng kha a ni thei ang em?" a tih leh chuan chhâng nghâl lovin ka ngawi vang vang phawt a.



"Min hrilh lo mai rawh, engati nge maw ka han zawh luih țâlh che le? Ei rawh, a dài ang e," tiin ei tùr chu ka lamah chuan a rawn nawr hnai a.



"Min hre thiam hrâm rawh, ka sawi chhuak duh lo a ni. Ani ngei pawh khân a chhan tak a hre bîk lo asin, sawi chhuah loh hi a țha," ka ti sap a, ei tùr chu ka chawk let kual a.



"Ani tal chuan hrilhhriat a phû i ti lo em ni? In inhmeh dùn hle si a," a ti leh zauh a.



"Phû ang; mahse, ka hrilh thei lo, ka hrilh thei ngai lo ang," ka ti ve leh a.



A thaw ta hak a.



"A nih tak chu," a ti phawt a, chutah," Chuti a nih chuan, rawn beisei tum tak tak tawh che ila a țhat dâwn chu," nui chung hian a ti a.



"A, ve a che. Zirlai ka nih hi aw," nui chung ve tho chuan ka lo ti a, a rûk tak chuan ka lai lutuk; mahse, chutiang chuan a langah erawh ka awm duh hauh lo.



"Kum hnih bâk a ngai hleinem," a lo ti mai a, a la nui tho.



"Kum hnih chhûng hi hun rei deuh mai a nia, thil tam tak a thleng thei a ni," ka lo ti a.



"Nia, a dik alawm," a lo ti ve leh mai a.



Kan chhuah dâwn chuan,"Ka thil sawi kha i huat zâwng a nih loh hrâm ka beisei. I huat chuan lo lèn a inthlahrunawm dáwn si a," nui deuh chung si, thu tak hmel deuh chung si hian a ti  a.



"Ho mai mai e a!" ka lo ti thung. Ani ber a lo lèn lohte chuan ka zir lai ka hriat thiam loh laite zawh tùr ka hre nâng, kan sir lah ka zâwt duh dèr lo, min biak a phùr dàn teh huam hi ka rilrem zawng a ni thei tlat lo.



Zànah a rawn lang chuang lo. Lehkha ka zir țha leh a ni tih a hre ve tho a, mi fing leh chinchâng hre tak a ni bawk a, a lo lang zut lêm lo.



Favàng ni, kâwla liam tùr chu kan in chung ațang chuan ka thlîr vang vang a, ngaihtuah chhuaha ngaih veng veng chu ka nei chiang alawm. A chanchin ka hre zui tawh lo va, a dam țha nge dam țha lo, a hlim em, min ngaihtuah ve ang em tih vêl thil țûl lo zet zet chu ka ngaihtuah kual a.



Inrinni a ni a, Bawihtei leh a putea chu scooty-in an chhuak a, ka nu leh pate lah dàwr nghâkin an chhuak daih bawk si a, khua a har vawng vawng mai a ni, ngaihtuah loh tùr tùr ka ngaihtuah phah lehnghâl.



Kan kawmchhakte ina țap ri ni àwm tak lo chhuak chuan ka ngaihtuahna ram ata min kai harh chiang kher mai! Engtizia nge ni le? E, pa ber kha a boral ta a ni ngei ang, Serkàwnah khân an indah chho ve ngei mai a, a zia deuh kha an ti sia, an làwm viau nghe nghe kha; mahse, a zia lo ta thut a ni ngei mai. Zanin chu tlaivàr a ngai ngei dâwn a nih hi.



Kawmchhakte in nèn hian inhlat lêm lo mah ila kan inkalpawh lutuk lo, a chhan chu an in kalna a kual lutuk a, kan inlènpawh tawn lutuk lo a ni ber. Bâkah, kei phei chuan ka hre ve vak lo, pasal ka neih hnua rawn awm an ni a, an inah kal pawh ka la kal lo.



Chhûngte chu awm se chuan han chhoh ve pawh a țhat tehlul nèn, an bo diak mai si a, han lan rih loh chu a mawi lo lutuk lo ang chu maw.



Ka nute chu ka phone tho. Teate pawh an rawn haw thuai a, a chho ve nghâl.



Zàn tlaivàr chu a ni ka huphurh ni. Ka pain kal tùrin min ti ngei dâwn, 'Bawihtei a lian tawh a, awmpui a ngai tawh lo' a ti țhin. Bâkah, țhenawm hnai an lo ni bawk sia, lan loh chu a mawi lo khawp ang le.



Țhian ka neih loh avàngin huphurh lo ang takin awm mah ila ka huphurh ru viau tho. Tea lah hi, amahin hma zetah a chhuak daih, min ngaihtuah ve îk lo. Hmeichhia mahnia han kal ngâwih mai chu nuam lo ve deuh mai asin; mahse, a, a pawi lo ve. Nula pângngai pawh ka nih tawh loh hi, nuthlawi phanchang ka ni tawh alawm, engah nge ka huphurh mai mai ni?



Nula tlangvâl an lo tam ve tawh khawp mai, nula tleirâwl lam deuh rual khat luh rual chuan ka lût ve a, ka țhutna lah chu a langsàr viau mai lehnghâl a, ka țhutpuite an tê deuh a, ka țhu khuau mai. Ka hawi chhuak lêm lo va, zak ru viau mah ila hawi chhuah loh miau chuan a zia deuh, zai tui erawh a har deuh chu a ni.



Min en rengtu awm tlatin ka hria! Mai mai a, awm ve bawk ang chu, nula tlangvâl heti zozai zîngah hi chuan min lo en tâwk an awm ve ang chu maw le! Mâwl lutuk mai.



Dâr 11 a pèl chho a, ka mut a chhuak hran lo nain mawng erawh a kham deuh. Zai a nuam viau, ka țhutna langsàr viau lo se chuan ka zai tui ve viau ang maw le. Chawlh det chhûng chuan a vawi khatna atân ka hawi chhuak ve chhin a.



Ka mi hmuh hmasak ber nèn chuan kan inmelh ta ràn mai!



Eng nge a rawn tih ve!! Lungleiah a awm reng zâwk em ni? Nge tuna thi hi an chhûngte em ni? Chu pawh ni se, a lo thleng hma àwm hle mai. Tunah dâr 11 a pèl âwrh chauh a ni a, a rawn thlâwk a ni hial lo maw?



Ani pawh chuan hmun dang en hauh lovin min rawn melh rùn mai. Engtia rei nge kan inen ka hre lo. Chutah, inngaihtuah harh phutin ka mit chu ka la sawn ta zàl zál, min lo en chîktu an lo awm loh hlauh ka beisei.



En leh duh lo viau mah ila ka va melh phei leh hrâm. A bula țhu chuan a lo bekbàwr lai tak a lo ni, nichin khân ka lo hmu ve miah lo, tu dang ni lovin Angel-i a lo ni! Ka mit ka la sawn rang kher mai.



Zai tui loh nâk laiin, a tui lo zual ta kher mai. Ka tâwt țûn mai a, ka mit chu rang zet zetin ka khap deuh sak sak reng, awm nuam mawlh hek lo le. Ka mawng lah a rawn kham zual sauh maiin ka hria, a nuam lo tak tak a ni.



Anni pahnih ka hmuh theihna khera an țhut vàng vek. An lo induh tak tak a lo nih hi, ni lo se heti chen chen an rawn kal dùn lo ang, mitthi hi atu emaw zâwk zâwk chhûngte an ni ngei ang a, an tân chuan chance țha lutuk a ni thei ngei ang.



Zankhua mai chuan rilrua hrehawm ti rêng rêngin hun ka hmang, ka hmel leh cheziaah erawh a lan chhuah loh hrâm ka beisei, a fing roh si a, a lo hre thei ang tih erawh a hlauhawm.



Hrehawm ti viau tùr ka ni lo asin le, țhen hmasatu kha ka ni a, hetiang hi a nih dàn tùr chu a ni alawm. Kan nih tawh loh miau chuan ani pawhin hlimna a zawng ve ang chu, hei, a zawng hmu ta rêng; mahse, ka va làwmpui si lo ve, engati nge hrehawm ka tih êm êm? Mi hlimlai chu hmuh nuam tih viau àwm tak, kei hi ka rilru hi a dik lo a ni.



Chhùnah ka kal tawh lo, Muansangate pahnih kha hmuh leh ka duh tawh lo a ni. Min awhthîk ni maiin ka hria, kei lahin kalpui ka nei ve si lo, chawh min ti lutuk dâwn asin.



Tlai lamah lu na bûrin ka tho chhuak a, ka rilru puthmang dik lo nèn, ka damlo dâwn dâwn ni tein ka hria. Zomuansanga vàng vek, engah nge a rawn phei kher kher ni? Angel-i nèn kher lehnghâl.



"Zanin chu i kal lo mai dâwn em ni?"  chaw ei laiin ka nu chuan min ngaihtuah hmel deuh hian a ti a.



"Kal ang, kan inhnaih êm hi! Bâkah, vawiinah pawh a lang tawh lo lehnghâl a," ka chhàn hmain Tea chuan a lo ti a.



"Peih chuan han lan chu a țha, țhalai hun a ni si a," ka pa pawhin a lo ti ve a.



Sawi ve tùr pawh ka nei lo. Ball angah ka inchan a, min chhuih lirhnaah ka lìr kual vêl mai mai niah ka ngai.



Bawihtei chuan,"Âma, ka lo kal ve châk e," a lo ti a, ka nu chuan,"Ni lo ve, Bawihte. Naupang an kal ve ngai hleinem, nakïnah i nulât hunah i kal ve thei chauh ang," a lo ti a.



Ka țawng ve a ngai lo rêng rêng. Tunah tak hi chuan țawng pawh hi ka châk lo rêng bawk a ni, ka chhûngte hian min kêp vek.



Ka insiam mawp mawp a, phûr lo zet chuan ka han kal ve leh ta, ka mit thial ûrh mai chu men a nuam lo takzet. Muansangate hmuh leh ka hlauh êm vànga kal peih lo ka ni a, hmuh loh hrám inbeisei ang.



Mahse, chutih rual chuan hmuh ka inbeisei ru tho a nih hi, ka han thlen chhoh pawhin ka mitin a zawng ru deuh nghâl ringawt. Tûn țum chu hma deuh takah ka țhu ta bîk lo ve, ka duh chuan ka hawi chhuak ve ngam tawh e.



Mahse, ka hmu miah lo. A la hma deuh pawh a ni maithei, Angel-i nèn khân hotel-ah an thleng dùn pawh a ni maithei a, zanin chu an lo kal peih lo pawh a ni thei tho.



Hla kan sak nual tawh hnuah chuan an rawn inzui lût leh ta chiah e. Angel-i a rawn lût hmasa a, mitthi chhûngte țhutna lamah an kal phei nghâl, Angel-i chhûngte lam a nih ka ring ta deuh.



A thawmhnaw a dum vek, a pheikhawk thlengin. Chuvàngin, a rangkachak țhi awrh chu a lang chiang khawp mai. A lu a mêt thar a ni ngei ang, a hmel a langsàr vah mai a, a hmelțhatna a lang chiang, hai theih a ni lo. Chuan, sana thar a nei a nih hmel, ka la hmu ngai miah lo!



Phun deuh sep sep ka hriat chuan ka bula mite chu ka en a, anni pawh chuan Muansangate pahnih lam chu an lo en ve nasa niin, chhe lo an ti ve a ni chiang. Hmm, hmelțha hi chu an lo chhe lo chiang a nih hi, mimirin țha kan tih hi chu hmelchhia an ni thei lo hrim hrim.



Ka hmaa țhute lu inkâr ațang chuan ka en zauh zauh, min hmu thei lo tih ka hre chiang. Bâkah, ka va en lai chuan a rawn hawi ve ngai lo hrim hrim bawk, min zawng ru ve lo tawp tihna.



Ka ngui deuh rawih ringawt. Nia, anite chu a duh tak bulah a awm tawh a, engah nge maw min zawn reng ang ni? Duh lova hnâwl tawhtu hi min ngaihtuah chang tawh nâng.



Ni e, kei pawh hian ngaihtuah tawh miah lo tùr ka ni asin le. Ka intihah mai mai a ni, ani chu ka tân a rem lo, beiseina rilru pawh nei tawh lo tùr ka ni. Engah nge ka beisei tawh miah loh tùr hi ka la beisei deuh tlat ni?



Nizàn kan tlaivàr vàngin kan zai rei lutuk lo ve. Ka mut chu a chhuak lêm lo nain mut leh erawh ka châk tho, ka mawng a na êm mai.



Pâwnah erawh ka hmu ta tho. Min hmu ve kher lo maithei, ka hmuh lai takin min rawn en ve tlat si lo va.



*******



December thla a lo inher chhuah meuh chuan Victor-a pawh an nu hlui kha an kohsak leh a nih àwm chu. Bawihtei puin min rawn phone a, min rawn hrilh ve suap suap mai. A țha ka lo tihpui reng mai, chutianga an induh leh thei a nih ngai chuan nupa an lo ni tawh a, a nupuiin a lo duh ve mai a nih chuan thil țha ber a ni alawm.



Kan exam ve ta a, a har lêm lo nain zir loh theih a ni bîk lo. Bawihtei pawhin min zirpui țhin, ani chu a pass leh dâwn chiang sa si a, kei hian ka tluk ngût lovin ka ring.



Krismas rim a nam a, lehkha zir pawh rilruah a lang mawh khawp mai, lung erawh a lêng thar leh ta a ni. Ka lung a lêng thar ngawih ngawih, Bobby-a a lo lang ve zauh zauh, ka lehkha zir erawh min tibuai duh miah lo. Ka sawi chhuak lo nain a lakah hian ka rilru ka pe thei dêr si lo. Ani pawh hian sawi chhuakin min hrilh lo mah se min beiseina rilru a nei tih ka hre ve tho bawk si, nuam lo ka ti țhìn.



Kan exam zawh zànah Bobby-a chu a lo lêng a, Bawihtei nèn, ka nu leh pate nèn TV enin kan țhu a, chutih lai chuan fakna hunah Muansanga a rawn lang leh ta chiah.



"Au Muana....Âma, Au Muana phone  leh tawh ang, ka ngai tawh e," a rawn ti chhuak ta hliai a.



Ka nute chu ka en zawk a, Bobby-a phei chu ka en duh lo. Bawihtei hnênah chuan," Bawihte, Au Muana chu a buai thei lutuk a, a buai rih ang, a buai loh hunah kan phone zâwk dâwn nia aw," ka ti a.



"Kan inbe ngai tawh lo e, min ngai ve tawh ngawt ang. Âma, engtikah nge a hman ang?" a ti leh a.



"Naktûkah chuan a hman tawh ang ka ring. Tunah chuan mi inah a lêng ang a, thil pawimawh an sawi laite a ni thei a," ka ti duah a.



Mutnaa ka phone ka khawih lai chuan phone call a lo kal, ka phu zawk lehnghâl! Ringtone volume a ring lo hlauh a, a zia zâwk.



Number ringawt a ni a; mahse, tu number nge tih ka hre chiang thlâwt a ni. A number hi delete mah ila ka thinlung hian a hre chiang lutuk ringawt.



Ka chhâng lo ta phawt. Engtizia nge maw ni, chhàn ka tum lo ringawt.



A ring ral țhak.



A rawn ri leh tho, number ngai bawk.



Ka chhâng chuang lo. A ring zawh chuan a beidawn ve mai ka ring a nia, a la rawn ti leh tho a nih chu!



A tàwpsan thei dâwn chuang lova ka hriat hnuah chuan ka chhâng ta nge nge a.



"Hello?" pawh ka ti lo, ka ngaithla tawp.



"Engati nge min hrilh loh?" a rawn ti nghâl tâwng ringawt a!



Eng a hria chu ni maw!



"Eng?" ka ti thung a.



"Mimawii pain nupui a nei leh tih kha," a tih chuan ka thaw huai a.



Angel-i mitthla rauh rauh pah chuan,"Engah nge ka hrilh ngawt ang che?" ka ti chang ta khalh a.



"Mimawii pa a nih vàng chauhin ka kiansan che a, in innei țha leh dâwn emaw ka tih vàngin. Chu pawh, Mimawii  hmakhua ka ngaih vàng chauhin," a rawn ti ta duah a.



Za lo zet hian ka nui a.



"A lo nih chu," tia ka chhàn chuan a chek hluk a.



"Ka kiansan chhan che a kiang tawh tih nichîn khân ka hre chiah a, tunah chuan-"



Ka lo pawt chat vat thung.



"Hun rawn khawhral duh suh, hlim takin hun hmang rawh. Thil țûl lo leh beisei tùr awm lovah inham buai tawh suh," tia chhângin ka hmet tàwp hmak mai, chu mai duh tâwk lo chuan ka switch-off leh bawk. A beisei theihin ka awm lo ang.



Ka lo țang hle a nih dâwn hi, phone ka chelhna ka kut pawh a țang nasa viau a ni, kan inbiak tàwp meuh chuan ka kut chu a na viau, ka tuai nak nak mai.



Ani nèn hian hma hun kan nei thei lo. Keimah avànga a chhûngte nèn an buai ka duh hauh lo, buai tawh suh se, min rawn beisei tawh lo bawk se, kei pawhin ngaihtuah loh ka duh.



Mahse, ngaihtuah loh hi a har si chu a nih hi. Ni tin ngaihtuah chhuah loh hun hi ka nei meuh lo a ni, chhùnah ka ngaihtuah lo a nih pawhin zàn mutnaah hi chuan ngei ngeiin ka ngaihtuah chhuak ziah. Mipa ka melh ve pawh hian Muansanga ka ngaihtuah chhuak zêl a, ani nèn khân ka khaikhin nghâl zêl a, ka lung hi an dum mawlh lo a ni ber.



Mahse, chu chu ka tih reh a ngai si. A har a ni, ka theihnghilh thei lo ang, ngaihtuah loh tum pawhin a har rih chu a ni.



Exam kan zo ta bawk a, Krismas lo hnai bawk nèn, Tea chu àwl ve rih ka duh, dàwr chu ka nghah chhâwk leh țan ta. Ani lahin nuam a lo ti bawk si nèn, min han fak leh hluak hluak a.



"Min fak hluak lo khân nupui tùr ngaihtuah tawh mai rawh," ka ti zêk a.



"A ngai hleinem, i awm a, engkim i buaipui thei vek alawm," a lo ti awlsam êt thung a.



"Pasal ka neih leh hun-"



"E he!!! U Bobby-a nèn in sawi dun tak tak tawh elo?!!! Yahoo!!! Nuam dâwn lutuk! In inneih hnu deuh lawkah dàwr min nghahpui tùr chu ka la lût ve nghâl ang, i neih hma leh ka la lût hma dâwn tihna a nih ber chu," a ti zuah zuah a.



"Țawng theih siah!" ka tih hrep kha.



Mi tin mai chu Krismas lo thleng tùr boruak chuan min chiah hneh a, kei ngei pawh engtin emaw tak ka rilru chu a awm ve tho. Huphurh viau mah ila chhûngkuain dam takin kan thlen theiha kan hmanho theih chuan a țha a ni mai.



Dàwr nghâk pahin ka phone chu ka play pah a, JT Production lam zai ka ngaithla kual, a zaitupa ber zawi hmel zet leh peih loh hmel taka a han zai hi mawi ka ti tlat pek a! Bâkah, a hlathu hi ka làwm tlat bawk, a thlûk hi a mawi ka ti hlawm bawk a.



Chhùnah Bawihtei leh a puin min rawn tlawh pahin thingpui min rawn ken a, an haw leh nghâl mai. Min dàwrtu an awm ve neuh neuh reng a, ka duh angin zai pawh ka ngaithla mumal lo.



"Ka pi, hei hi eng zât man nge?" tia min be ri ka hriat chuan ka hawi chhuak vat a.



A aw chu ka hriat tawh hnu ang deuhin ka hria a, a hmel ka en chuan sunglass leh mask a vuah tlat avàngin ka hre thei mai lo.



"30 man a nih kha, i duh em?" tiin ka ding chhuak a, ka hla play pawh titàwp chuang lo chuan ka en a.



"A zuartunu hi ka duh mah zâwk!"



A aw chuh! Nichin khân a aw a lo tidanglam chiang a nih kha, ka hriat tawh hnu ang pawh ka tih nghe nghe kha!



"A theih loh!"



A sunglass leh mask vuah a hlih mawlh mawlh lai chuan ka țhutnaah ka țhu leh tawh. Eng nge hêng hêngah a rawn tih dâwn?



"Ti tlat zêl lo la."



"Eng nge i rawn tih dâwn? Haw rawh."  A haw leh ngawt ang chu.



"Eng hla nge i ngaihthlâk a? Han tiring deuh teh," tiin ka bulah chuan chair pakhat chu a rawn hnûk hnai a, a rawn țhu nghâl bawk a.



"Eng mah!" tiin ka hla play chu ka off nghâl zat a.



A ngawih vung vung hnuah chuan,"I inhmeh lo a nia. Dàwr nghâktu chu a nèlawmin a zaidam tùr asin," a ti leh sup a.



"Zaidamna hi ka pianpui a ni ve lo," ka ti leh hmak. Min kalsan se, min beisei miah lo se ka duh, kan rilru a na tawn mai mai si a.



"Deuh hmak hmak a! Hawh, zai kha ngaithla leh ang," a rawn ti leh a.



"Haw rawh," ka ti leh a.



"Phone-ah ka hrilh che kha."






*NGAWIH THEIH HI HNEHNA HMANRAW ȚHA BER A NI TIH HRIAIN I DIKNA LANTÎR TUMIN THU TUITAM VAK VAK NGAI SUH*








☆LUHLULPA☆ - 28 By Dingdi Pachuau




Ka ngawi ta rih. Țawng tùr hre țeuh mah ila sawi hmasak tùr ber ka hre rih lo, uluk taka ngaihtuah ràn chunga țawng chhuah ka duh bawk.



"Play leh teh?"



"Eng?"



"Nichina i play kha."



"Eng hla nge ka hre tawh lo," ka ti deuh tlat.



A thaw hawk a.



"Engati nge a? Țha takin inbe teh ang-"



Min rawn dàwr tùr a rawn luh avàng chuan a țawng tàwp ta rih. Chu pa rawn lût lah chuan min en tawn deuh zak zak phawt a, kan hmel ațang chuan eng emaw a hre thiam ve a ni êm lo ang chu maw.



"He mi rawng lo hi rawng dang a awm em le?" a rawn tih chuan thovin ka va phawrh chhuahsak a.



"I va hleitling ve a..!"



Ka nui ringawt. A ni lah tak a, mipaah pawh a hniam lam a ni ngei mai, min chen lo ve nasa êm atin ni.



"Sunday-a i inchei hmuh a châkawm," a la ti deuh deuh!



Zu a rui nia ka hriat loh avàng chuan ka nuih leh ringawt. Hmaichhana hetianga min titu hi an awm leh nawlh nawlh avàngin huat enah ka en lo va, nuam lo erawh ka ti ve fo.



A chhuah hnuah chuan,"Nia, hmuh i châkawm," a tih chhunzawm ve sup a.



Ka chhâng lo.



"Ka ril a va țâm tak!" a tih leh tâkah chuan a lam hawiin," Engati nge hetiang hian i awm duh a? Thil țha a ni lo, thingpui in la, haw ang che," ka ti a, flask-a thingpui chu ka thlitsak ta nghâl a.



"Fel hi chu i fel a ni tiraw?"



"Ngawi mai teh!"



"I thingpui siam ka han in leh thei ta a nia, a nuam teh e," te chu a la ti deuh deuh a.



"Naupang chhia deuh hian awm suh, rilru puitling pu tawh rawh," ka ti leh hlak hlak a.



"Um, min zilh zêl rawh; mahse, i bulah hi chuan ka puitling thei lo chu a ni, min duat thei si a."



Ka va khâwng châk tak! Bialnu dang nei reng chungin, hm, ka ngaihtuah peih lo, duat pawh ka duat tawh hek lo ang. Khati chen kha kan lo tuar dùn tawh a, kan tuar chhuak țêp tawh. A harsa lai tak kan paltlang vek tawh a, a lo thlàwna khatiang hun khirh leh harsa kha liamtîr mai mai ka tum teuh lo, ka inkhawngaih ve asin.



"Play leh teh."



A va mak teh țâlh e aw...



'Uirenu' tih ka lo ngaihthlâk lai kha a ni a, sawi thui peih lo chuan ka han play leh a.



"Khatiang hlate kha i lo ngaithla ve țhìn tawh a ni maw?" a rawn ti leh a.



"Ka ngaithla mai mai," ka tih chuan a nui huk.



"I lung a lêng ve ngai em ni a?" a rawn tih leh chuan ka melh rawlh a.



"Hla ngaithla tùr hian lunglèn kher a ngai tih ka lo hre hauh lo," ka ti khauh mai a.



Min chhâng tawh bîk lo. A thingpui hmeh tùr chu ka siam ve liau liau cake ka ur ka ei bâng la awm chu ka pe a.



"A ngai lo asin le," a tih ve ka ring a nia, lâwm zeta lo banin," I siam a nih ngei ka ring, ka hnar phal lo," a lo ti thung a.



Thingpui a in chhûng chuan ka țawng lo, ani pawh a țawng chuang lo. Phone-a ka hla play chu ka ngaithla vang vang nain ka rilruah erawh a lût lutuk lo.



"Krismas thawmhnaw bazâr tùrin Mimawii i rawn kalpui dâwn em?" tiin a țawng chhuak hmasa leh a.



"Kalpui lo ang."



"Engati?"



Ka melh phei a, chutah, hawi sawn lehin," Engati mah," ka ti a.



"Kha, i naupangchhia fê zâwk aw! Min chhàn dàn kha, puitlingin khatiang khân tu mah an chhâng ngai lo," a lo ti vat a.



Min chhâng dang titih tlat. A bulah khân hun ka lo hmang tam tawh lutuk a, a naupanchhiatna ka lo kai ve zo tawh a niang.



"Eng nge i rawn tih dâwn rêng rêng a?" ka ti ta daih a.



"Thil țûl maw le. Naupang hriat ve chi loh," a tih chuan ngei zet hian ka melh nghek a, ani lah chu a lo nui suk duh chauh.



"Tu nèn nge in lo phei? In nu nèn em ni?"



A nui ta hawk hawk mai. Ka sawi zo vek tawh si, a hnuhnung zâwka ka sawi kha sawi chhuak miah lo tùr ka ni asin le! Thîk angah min ngaih phah ngei ang chu.



"Vanduaithlâk takin, ni lo hlauh mai."



Kha maw, 'Kan nu a ni lo' ti pawhin min hnial miah loh kha, Angel-i ka sawina a ni tih a hre chiang ngei bawk ang a, kam khat tê pawhin a bialnu a ni lo tih a sawi hauh lo.



Ka sawi chhuak ta sa sa, sawi chhuak vek ila a ni mai.



"In inhmeh, ka lawmpui khawp mai che," ka ti ta a.



"Ka lâwm e," a ti phawt a, chutah," Kha lam kha chu duh tâwk phawt ila, i chanchin lam hi sawipui che ka duh zâwk a," a ti leh ta a.



"Sawi tùr a awm lo," ka lo ti vat thung.



Ka awm dàn naupanchhiatzia chu ka hre reng; mahse, tihngaihna dang ka hre ngang lo. Hetianga awm hi ka duh dàn a ni bîk lo, a bulah phei hi chuan puitling tak hlîrin a nih kha ka awm ve țhin ni.



"Inah Mimawii a awm ang tiraw?" a ti leh daih.



"Eng atân?" Kha, ka duh loh dànin ka chhâng leh tawh. A ngai ve bawk ang chu maw le, an inngaih theih êm kha.



"Ka hmu châk. Hmuha biak chu min phalsakin ka ring deuh ringawt a," a tih chuan nuam lo ka ti deuh.



A thil sawi kalh deuh hlîr leh bung zet zeta ka chhàn țhin vàng chuan nuam lo a ti ve a niang, Mimawii hmu tùr chuan a chhuak ta daih a. Bâkah, min dàwr tùr an rawn kal ve reng bawk si a, thupui hlapui vai vakna hmun pawh a ni lo bawk.



A kal hnuah erawh ka rilruah a awm leh reng si, ka awm dàn zahpuiawm tak chu ka ngaihtuah lêt a; mahse, ka inthiam lui tlat. Ani nèn hian engtikah mah kan inkawp rem thei lo ang, keimah vànga a chhûngten an hauh phah ka duh hauh si lo.



Tlai lamah chuan Bobby-a a rawn lût ve hlawl mai a, bag a rawn ak puar khawp mai lehnghâl a.



"I nghah ka ring rêng a," a rawn ti lût a.



"Nia," nui chungin ka lo ti ve a, chutah," Khawiah nge i chhuah a?" ka ti zawm zat a.



"Ka pa thawmhnaw lum tùr ka leisak a, thlasik hi  a tuar na thei si a," tiin a bag chu a hawng a, a rawn phawrh chhuak nghâl a.



"En chhin teh, a țhat hmel i ti em?" a ti a.



Polar puan deh nuam zet mai, a rawng pawh duhthusàma senduk mawi hi a lo ni a, kawr mai ni lovin kekawr pawh a lo tel. Upa tân chuan hâk a nuam ngawt ang, a puan a zângkhai si a, sûka fai awlsam deuh leh ro hma deuh ang chi kha a lo ni a.



"I va lei thiam ve! A to ngawt reuh lo maw?" ka ti a.



"Thiam tak tak maw?" nui chung hian a ti phawt a, ka lu lo bu nghat a hmuh chuan,"A lawmawm e, a to vak lo. Hmu fuh ka inti ve viau asin," a ti leh a.



"A țha lutuk ringawt, hâk a nuam dâwn si, ka pa tân ka awt ve khawp mai," ka lo ti ve a.



In ka thlen veleh chuan Mimawii chuan hlim zet hian," Âma, Au Muana a lo kal asin, en teh, hei hi min lei a," tiin kutkawr dum, a kut pahniha a bun chu a rawn lek chhuak vat a, a hlim êm avàng chuan a hmel chu hmuh a nuam kher mai.



"A ni maw?!! A va țha awm khep khep ve a, a mawi si," tiin ka han khawihsak chhin a, leather puan niin a to reuh ngawt ang chu.



"A lum nuam lutuk! Âma, han bun ve chhin teh," tiin pakhat chu a hlîp  a, ka kutah chuan a rawn rawlh a.



"A va lum nuam tak ve aw...Bawihte, hei bâk hi ka bun lût thei lo, ka tân chuan a tê alawm. Au Muana chu làwmthu i hrilh em?" tiin ka hlîp leh nghâl a.



Ka pa chuan," Tu emaw chuan a lo ngai tawh lutuk a, a haw te a phal tawh lo vêl a," a lo ti a.



"Âma, kawr mawi pawh min lei dâwn asin," a ti leh barh barh a.



Ka duh vak lo. Kan ințhen tawh a, Bawihtei a hmu duha a be duh a nih chuan ka phalsak tho; mahse, a pa ang ziazânga a rawn ngaihsak erawh ka duh hauh lo.



Zanriah ei khamah Bawihtei puin min rawn bia a, Bawihtei Krismas thawmhnaw an leisak thu leh hmuh an châkzia chu a rawn sawi barh barh a, Bawihtei nèn pawh an inbe nghe nghe.



Muansanga a rawn lan ka rin rilrûk tehlul nèn, a lo lang miah lo. A țha e, rawn lang malêk rawh se, haw phei vat nghe nghe se a țha zual ang. A chhûngten an lo ngaihtuah palh ang, thil ni lo pui pui an lo suangtuah hlauh phei chuan a fuh lo ang.



A tûkah dàwr ka nghahnaah a rawn lang leh a; mahse, a duh ang takin a awm thei bík nâng, Bobby-a a awm ve tlat. Bobby-a erawh hi chu mi fing dik tak chu a ni ve chiang alawm, a be zauh zauh reng, kan boruak chu a hre thiam ve a ni ngei ang.



Bobby-a a chhuak hmasa. A chhuah hnu lawkah chuan,"I lakah hian ka beidawng thiang tawh lo," a ti chhuak sup a.



"Muansang, hetiang hian awm suh," ka ti ve thung a.



Thaw hawk hian,"Ka rilru awm dàn tùr min ngaihtuahpui ve ta che," a ti leh sup a.



"I rilru chu ka ngaihtuahpui thiam lo che. Thil awmze awm lovah hian buai phêt tum suh," ka ti a.



"Awmze nei lo niin ka hre ve lo. Bobby-a nèn in inkârah hian thil awm awmin ka hmu lo bawk, a dik tiraw?" a tih chuan chhàn dàn tùr ka haihchham deuh tlat.



Ka chhàn dâwn lai takin min dàwr tùr a rawn lût leh hlauh, a thil duhte kan inpêk fel hnuah chuan," Helai hi chu a remchâng thei thlâwt lo. Hun remchâng min siamsak thei lo a nih pawhin naktûk chu inah awm ve hrâm teh, dàwrah hi chuan eng mah a sawi fel hman loh," a ti nang nang a.



"Sawi tùr a awm hleinem," ka lo ti a.



"Awm e, kei pawhin sawi tùr ka nei țeuh. Hun thâwl chu, chu chauh chu ka ngèn ang che, naktûkah chuan inah awm ve hrâm tawh rawh aw, naktûk chauh," ngènngawl aw zet hian a ti a.



"Chutin duh duhin-"



"Naktûk chauh. A nih loh tal pawhin i hun remchâng neih hun tal aw, chu chauh chu," a rawn tih leh tâkah chuan han hnial leh țùng pawh chu nuam ka ti leh ta miah lo.



"Hun thâwl, vawi khat chauh. Nakin zànah ka rawn zâwt leh ang che," tiin a tho vut a, a chhuak zui nghâl ta daih a.



Min tihamhaih alawm le!



Vànneihthlâk ka ti dâwn nge, vànduaithlâk ka ti dâwn ni, zanriah ei laiin ka nuin in lama awm a peih tawh loh thu a sawi ta tlat. Blanket sûk ngai chu ka kutah a dah nghâl bawk.



"Ka thâin a tlin ve tawh si lo va, inah i lo awm ve thung rih mai dâwn em niang? Bâkah, vawiina ka chhuat lo nâwt ve kha ka kâwng a tikham tlat," a tih chuan," I lo nâwt mai mai alawm le, zànah ka nâwt thei tho a. Nâwt tawh miah suh, dàwr lam lah Tea'n a nghâk thei tho va, inah awm hahdam mai mai rawh," ka lo ti vat a.



"A, naktûk chu ka nghâk hman miah lo aw, khawngaihin, naktûk chu tih tùr ka lo plan tawh tlat," Tea chuan a rawn ti chhuak vat a.



"I pa nèn kan nghâk thei tho alawm. Bawihte, nangin min nghahpui peih ve ang em?" ka nuin a tih chuan," Aw, chuan, ka barbie pawh ka keng ve ang aw?" a lo ti phûr sârh a.



Ka tum loh deuhin keimah chauhin ka awm ta. Ka nute blanket chu nizànah ka chiah lâwk a,  nuai vak a ngai lo ang. Chhuat ka nâwt a, thawmhnaw sûk ngai ka su bawk. Ka thu chu ni se chuan Muansanga chance pe tùr hian inah ka awm hauh lo ang; mahse, ka nu ka hnial thei si lo.



Blanket ka sûk lai chuan Muansanga chu a rawn kal ta ngei, motor ri ka hre lo êm mai, kein a lo kal a ni ngei ang.



"I va buai àwm ve! Tihpui i ngai em?" a rawn ti.



"Ngai lo, ka zo țêp."



Machine-a nuaitîr chi pawh a ni lo, a rit lêk lûk lutuk a, a lian bawk si. Ka tleuh fai a, laundry basket-ah ka dah thlithlawr ta rih a.



"Mimawii a awm ka ring a nia?" tiin snacks a lei chu dawhkànah chuan a lo dah a.



Ka rilru chu ka siam sauh sauh a, eng pawh sawi se, ka tawlhthlu tùr a ni lo tawp mai, ka hun kal tawh ka hre reng tùr a ni.



"A pite zui a duh ta a nih kha," ka ti ve mai. Kan ngawi dùn leh vang vang.



"Bobby-a nèn ni lo pui ni anga i inlantîr tlat chhan hi ka hre duh a ni. Chuan, Mimawii pa pawh kha," a rawn ti chhuak ta a.



"Thil kal tawh sawi chhuah hian awmzia a nei tam lo," ka lo ti a.



"Kan pahnih inkârah hi chuan a nei si a ni," a rawn ti thung a.



"Kan ințhen tawh. Chuan, nang pawhin mi dang i neih tawh kha, i phâ thei lo. Engtin nge hetiang hian i awm theih zâwk? Amah chauh chu ngaihven ta che," ka ti ta hlauh a.



Min en kul mai.



"Engati nge ani chu i rawn sawi chhuah a? I thîk a ni maw?" a tih chuan rang zet hian," Teuh lo mai!" ka lo ti vat.



Mahse, ka chhâng rang lutuk chuan ka thîkna ka tilang chiang ni maiin ka hre ta zâwk. Țhen tawh mah ila hmeichhe dang nèna hmuh dun kha nuam ka ti hauh lo, ka duh loh vànga țhen lah ka ni si lo, ka theihnghilh thei lo rêng.



"Thîk lo a nih chuan a țha a nih chu; mahse, kei chuan mipa nangmah hnaih deuhtu hlek hi chu ka thîk lo thei lo, tu tân mah ka phal si lo che a," a ti sup sup.



"Chutiang sawi tawh suh-" ka tih lai chuan min lo pawt chat vat.



"Engah nge ka sawi loh ang? Ka hmangaih hi tu tân mah ka phal hleinem, ka la hmangaih reng che a ni. A hma pawh khân Mimawii ka ngaihtuah avàng chauha kal ka nia; mahse, in innei leh chuang miah si lo. In inrem leh ta emaw ka tih vàngin, rilru hrehawm takin 'Mimawii a fahrah lohna tùr a nih chuan' tiin ka kalsan chauh che a ni."



Ngun takin ka lo ngaithla. Victor-a nèn induh leh ta a min ngai thei chu mak ka ti viau nain eng mah ka sawi chhuak lo.



"Angel-i hi ka kawp hauh lo. Țhian ang bâkin a lakah rilru ka pu lo bawk, engtin nge nangmah hmangaih reng chungin mi dang ka kawp theih ang? Hmangaihna hi infiamna mai mai a nih loh hi," a ti ta zêk a.



Rilru aw, khauh khauh. A thil sawi avàng chuan ka rilru ka tinêm thei lo ang. A pa kha ka hre chhuak reng tùr a ni.



"Kei chuan renew leh ka duh tawh lo," ka lo ti ve ta a.



"Zon, i inhmeh ve lo a nia."



Min rawn hnaih sauh. A awka chhuak dam thlup leh zawi deuh sup si chuan ka thinlung a dek viau. He pa hi ka ring lo hauh lo, min duhin min hmangaih tih pawh hi ka ring, kei pawhin ka hmangaih; mahse, a theih loh a ni.



"Zon, i harsatna chu sawi teh, min hrilh loh chuan ka hre lo a ni. In nufa hian ka hmangaih êm ém che u a, in tân chuan engkim ka huam, ka theih tâwkin Gym lamah pawh kan hmakhua ngaiin ka thawk ve, ka beiseina tihbeidawn ka duh ngai lo, i harsatna chu eng ang fakauva buaithlâk nge a nih min hrilh thei ang em? Kum kha chu problem a tling lo tih kan hre dùn tawh si a," a ti duah a.



"A pawi ka ti, inkawp miah lo tùr hi kan ni a, ka lo pawm che avàng khân ka inhua, ka thiam loh vek a ni," ka ti ta ringawt. Kan inkâra harsatna kha chu sawi chhuah chi a ni lul si lo.



"Khati khân ti suh," tiin ka kutah a rawn chelh a, ka lo ding hluai. Ani pawh ding ve nghâl zatin," Zon, ka hmangaih che tih i hriat kha. Min pawm ve avànga ka làwmziate kha i hre reng lo em ni? Tunah pawh hian ka la hmangaih reng che, i hria tiraw?" tiin hnai zetah min rawn melh chhuk a.



Aw, ka hria. Min hmangaih tih ka hria, kei pawhin ka hmangaih lutuk.



A mitmeng mawi zet maiin duh leh hmangaih tih hriat ngawih ngawiha min han en hnaih set sawt chuan, ka thinlung chu a nêm sâwt kher mai. A mitmeng hmangaihnaa khatah chuan kei pawh ka luang liam lo chauh chu a ni.



"Zon, i hming hi ka lam fo țhìn, ka ning ngai lo, ka hmangaih ber hming a nih miau avàngin," a ti sup a, chutah rawn kûn hniam deuhin," Ka lam fo ang, Zon, ka hmangaih che, ka thinlung neitu i ni. Zon, khawngaihin?"ti lehin ka hawi sawn hmain ka hmuiah chuan a rawn fâwp ta nghâl a.







*TU EMAW THINLUNG HNEH I DUH VÀNG KHÂN DANGLAM TUM KHER SUH, I NIH ANG KHÂN NI TAWP LA, I NIH ANG ANGA DUHTU CHE I TAWNG THO ANG*