☆LUHLULPA☆ - 29 & 30 By Dingdi Pachuau

                          Hnar-teveuh-mawia




☆LUHLULPA☆ - 29 By Dingdi Pachuau





Ka dang thei lo va, ka hnial thei lo bawk. Min hmangaih a, min ngai a, chutiang chiah chuan kei pawhin ka ngai, ka thlahlel êm êm bawk si.



"Ka hmangaih che, Zon, chu chu theihnghilh miah suh. Ka hmeichhe hmangaih awm chhun i ni."



Tunah tak hi chuan țawng loha cheziaa kan inthlâkhlelhna leh kan inhmangaihna lantîr mai hi ka duh zâwk, țawng lovin min fawhna chu ka lo chháng lêt ve zêl a.



"Zon, kan inkalsan thei lo tih i hriat ve-"



Țawng loh ka duh avàngin a țawng sup lai chuan a hmui chu ka han fâwp ta zâwk a, a țawng chhunzawm ta bík lo, thil dang ngaihtuah lo lêk chuan kan induat ta mawlh mawlh a.



Ka phone rawn ri khùr char char avàng chuan kan ințhen phawk mai. Kan inmelh dùn ràn rán a; mahse, mit la sawn hmasaah ka țang ta zâwk, dawhkàna ka phone chu ka ban ta nghâl a.



"Hello?" Ka aw hrep chu, a khùr vêl a nih chu!



"Âma, àpiin kawrlum sen mawi deuh min lei asin," Bawihtei chuan hlim tih hriat zet hian a rawn ti làng láng a.



"A ni maw?!! A mawi àwm...I inhmeh ngawt ang."



"Ka rawn haw hunah min en dâwn nia, àpu pawhin lukhum a lei a," a rawn ti leh vau vau a.



"In mawi àwm bîk mang e! Àpi leh Àpu thu áwih la. Dàwr thil pawh ei dìl loh tùr aw? I fel êm kha," ka ti leh a.



Ka phone ka dah hnu chuan awm dàn tùr a vâng ka ti ru khawp mai. Han biak mai dàn tùr pawh ka hre lo, ani lah a lo ngawi tlat bawk si.



"Chhunzawm leh ila?" tiin min rawn hnaih sauh a; kei erawh ka tawlh sawn thung.



Ka biang a sa hat hat thei!



"Blanket ka'n pho lawk ang e," ka tih chuan rang zet hian," Ka lo phopui ve ang che," a rawn ti nghâl vut a, min rawn zui nghâl.



In chungah kan zâr, a lo thlithlawr tawh viau avàngin a rit fahran tawh lo va, ni a sa țha bawk a, a ro har vakin ka ring lo.



Sawi tùr a vâng si, a hmangaihnaah ka tlu lût leh takngial ang tih ka hlau, ka lo inphen vena lah hi a derthâwng thei ropui si a. Ka hmangaih êm avàng hian engtin tin emaw min nawr chuan ka lo dang thei lo ang tih ka hlau a ni, invèn rûk reng hi ka ning tawh.



Kawmchhak lam hawi pah chuan," Kawmchhakpa kha in chhûngte em ni?" ka ti ta ringawt a.



"Ni lo ve, Angel-i nutei pasal a nia."



Angel-i leh bawk. Chuvàng a lo nih chiah chu a rawn tel ve, ani lahin a mei ang maiin a rawn zui bawk a; mahse, Muansanga chu a fel alawm, mi mangan laiin puih a hreh lo, kei pawh a car-in Lunglei thleng thlengin min hruai dâwrh dâwrh a nih kha.



"E, a nih chu."



Ka țawng chhuak chu a pângngai viau, thîk awka a lang tel lo bawkin ka hria.



"Ka bialnu a ni lo ka tih tawh kha," a rawn tih chuan,"Sawi fiah kher a ngai lo," ka lo ti vat a.



"Sawi fiahna pawh a ni hran lo, thu dik ka sawi zâwk mai a nia," a lo ti a.



A kawp chu ka ring tho tho. IG lamah pawh an pahnih pic a upload chisn êm kha maw; mahse, ka sawi chhuak chuang lo. Thil sawi vak vak ka tum lo, ka invènna a tiderthâwng mai mai.



In hnuaia kan chhuk hnu chuan," Thil sawi tùr i nei a ni lo'm ni? Sawi rawh," ka ti. Sawi thuai thuai se, lo ngaithla ila, eng mah lo sawi ve chuang lo ila a țha mai. Chuan, țha takin inkalsan bawk ila.



"Thil sawi tam lutuk hian boruak a siam ţha ngai lo. Chuvàngin, sawi vak ka tum tawh lo. Min țhen thut chhan kha sawi la, a tâwk mai ang," a lo ti daih!



Ka en hau ringawt! A bulah hian sawi tùr tam tak nei țhìn mah ila sawi ka tum lo, ka țhen tawh miau a!



Chhàn mai dàn tùr ka hre mai lo, min nghâk reng bawk si,"Ka țhen che a ni mai," tihngaihna ka hriat loh lutuk avàng chuan ka ti ta ringawt!



A lo nui suk duh chauh, chutah,"Mi pahnih an ințhen hian chhan a awm țhin alawm, a chhan chu ania ka zawh che," a ti leh dût a.



"Rem lohna a awm a ni mai," ka ti leh ringawt. A pa vàng a ni tih ka ka ațang hian a hre ngai lo ang, hre ta se, an pafa inkâr a buai vek thei, a luhlul ve ropui si, an pafa inkâr tihchhiat ka duh teuh lo.



A ngawi vung vung a, chutah," Kan pahnih inkârah hi chuan inhauhna leh intih-thinrimna kan nei lo tih ka hre chiang a, chuti a nih chuan thil dang emaw mi dang emaw an awm tihna a ni thei ngei ang," tiin a ngawi leh ta vung vung a.



Ka ngawih ve reng avàng chuan," I chhûngte, tu ber hian nge min duh lo? I nu, i pa  leh i nau; mahse, ka ring chiah si lo," a ti leh ngul ngul a.



"A rem lo a ni mai, chu chu pawm ve mai rawh. Kei chuan ka pawm thiam thlap tawh," ka lo ti a.



"Chu thil chu hriat ka duh alawm, a rem loh tlat chhan chu. Min hrilh la, rem tùrin ka bei mai ang," a ti leh ta a.



Ka hrilh dâwn teuh lo mai!



Eng mah kan sawi fel chuang lo. Tea a rawn haw lehnghâl bawk a, kan inkâr sawi chhuah lehna hun pawh a awm tawh lo, inla-spy zetin kan bul hnaiah a awm leh tlat tawh!



A haw hnuah Tea chuan," A luhlul reuh ngawt mai, ngel ngul a," a ti lehpek a, kei chuan," Ve ngawt a che! Nang aiin a lian fê zâwk aw, 'reuh' ti rêng rêng suh," ka lo ti hlak thung a.



"I țan mai a nih chu a!"



"Țan thil pawh a nih loh chu," ka tih chuan," A, i țan tho tho! A lo lèn leh hunah chuan ka lo chhoh ben tawh ang," a ti leh a, ka nui chhuak hawk.



Tea hi tlangvâl tê ni hran lo mah se a sâng lutuk lo. Kan inchen deuhthaw ang ti ila tlêm chuan a lawr hlekin ka ring. Muansanga chu a chhoh en tho tho dâwn tihna a nih chu.



"I nghâwngah rêkin a khai kâng vâ vâ dáwn che a nih chu," tiin ka nui leh phawt a, chutih lai chuan ani chuan," Min han khai nâ teh se, mâkpa interview ațangin ka knock-out nghâl ang," a lo ti vat a.



Ka ngaihtuah zui ta rauh rauh. Tea hian a duh lo viau tawh lo emaw ni aw ka ti, a hma kha chuan duh loh tak tê khân a duh lo kha a ni a, nichína a thil sawi duh dàn ațang kha chuan khatiang rilru kha chu a paih ve ta viau a nih hmel.



Bawihtei lo haw bengchhenzia mai chuh, a putea pawhin hau ngaihna rêng a hre lo. A piin kawr a leisak mawizia leh a làwmzia chu a sawi reng a, min hrilh nawn reng a ni mai. A ha chhin a, a lâm a, pâwnah va chhuakin a rawn lût leh a, a hlim lutuk chu a ngawi hlei thei lo a ni ber.



"I nu têt lai hi chu i chhùn fuh ve ngawt ang!"



"Ka têt lai i hre pha ngawt lo aw," ka tih chuan," Hria ka ti rêng em ni? 'ngawt ang' ka ti a nih kha," a lo ti vat. Ka nu leh pa an lo nui var var.



He pa țawng theihzia hi chu aw...!



"Âpain kawr mawi min leisak dâwn bawk si, kawr mawi ka va ngah dâwn tak!" Bawihtei chuan a lo ti leh lar lar a.



"Min sem țhen ve la, a țha ang, Krismas kawr mawi ka nei ve àwm si lo va," Tea'n a tih chuan ani chuan," Àpi, Aputea kawr leisak ve la?" a lo ti zaih, a fing ve a nia!



"I kawr ang kha ka duh ve!"



"Mawi i ti a ni maw?"



"Aw."



A hlim chu a khêk leh rai rai mai. Hmmm, ani a hlim hi chuan kan chhûng hlim a ni mai e.



Bobby-a a rawn lêng a, chu pawh chu a kawr thar chu a lo hmuh leh nghâl vat. Ani lah chuan," I inhmeh ngawt ang, han ha chhin teh," a lo ti a. Ani lah, a lo phùr zâwng tak mai a ni si a, a hâk leh tâk kha.



Ka phone a rawn ri a, ka han en chuan Muansanga a lo ni a, chhâng duh lo chuan ka hmet tàwp a; mahse, a rawn ri leh nghâl zat.



Ka chhâng duh leh chuang lo.



Mahse, a beidawng miah lo a nih chu! A vawi linaah chuan mi dang bul ațang chuan kal sawnin ka chhâng ta nge nge a.



"Eng nge?" ka ti hlak.



"Zon, ka nu nikhaw hre lovin a tlu thut a." A aw chhuak ațang chuan a hlauthâwngin a chi-ai ve chiang a ni, a thil min hrilh tum chu a lo serious hle si a, ka han chhâng duh lo vêl kha a nia, ka inchhír nghâl rum rum mai.



"Engtin a?! Engati nge?!!""



"Ka hre bík lo, ka pain min rawn hrilh zo chiah a. Damdawi inah an phur nghál a ni àwm e. Zon, ka ngaihtuah bawk si che a, ka nu ka ngaihtuah bawk si, awm dàn-" a la țawng lai chuan ka lo pawt chat hmak.



"Muansang, phei vat rawh. I pa mangan dàn tùr ngaihtuah la, amah chauhin a nghâk dâwn asin. Nang lah hetah i awm daih si, phei thuai a țha. A pawi ka ti takzet a ni," ka ti sawk sawk.



A rilru a buai ngawt ang chu. A nu duh tak nikhaw hre lova a han awm ringawt mai chu, ràl ațanga hria a ni bawk si, a awmna lah minute rei lo tea thlen thuai rual a ni si lo.



"Zon, ka hlauthâwng hlê a ni," a ti leh sup ringawt. A chi-ai viau a nih ka ring.



"Um, eng êm a ti lo tùrah ngai ang, hlauhthâwng lutuk lo phawt la aw," tiin ka theihtâwp chuan ka hnèm ve; mahse, kei ngei pawh min dêng ve khawp mai, a nu kha a hrisêl hmel viau si a.



"Tunah khân insiam la, phei nghâl la a țha ang. Kawngah chak takin motor khalh lo la, rilru fîm put i tum hrâm hrâm dâwn nia," ka ti leh.



"Aw le; mahse, tunah hian thil a țha lamin ka ngaihtuah thei miah lo, ka rilruah hlauhthàwnna hlîr a awm," a rawn tih leh sup sup tâkah chuan kei pawh ka hlauthâwng thar leh a; mahse, a hriatah erawh tilang lo tùrin ka insûm thuai thung.



"Ni lo ve, a țha leh ngei ngei ang. A taksa a chauh thut vàng a ni ngei ang, sawlam doctor chu an thiam a, a lo harh thuai mai ang, ngaihtuah lutuk duh suh," ka han ti ve ngial. Ka hnema ka thlamuan loh chuan a rilru a buai nuai ang a, kawngah a chêtsual phah palh ang tih ka hlau.



A ngawi vang vang a, chutah, a thaw leh hawk a.



"Ka bulah awm la ka ti hle mai."



A rilru a buai takzet a nih hi, ka hnem mawlh mawlh a ngai. A upa zâwk ka ni bawk a, ka nu zâwk a ni lo bawk nèn, hnem ngai ni lovin hnèmtuah ka țang thei alawm.



"Insiam rawh, hei ka be char char che ang a, i bula awm tlukah min ngai dâwn nia."



Ka be ta reng, Bobby-a pawh ka ngaihven hman ta rih lo. A rilru buai laia han tàwpsan daih chu ka duh bîk lo, ka khawngaih êm êm si a.



Kan inbe rei khawp mai. Tunah tak hi chuan kan ințhen a ni tih kha a âwihawm loh rum rum mai, kan inbiak dàn chu, sawi lo zâwk mai ang. Heti khawp hian ka lo ngaihtuah thei ngai a ni maw ka tih phah hial.



Kan inbiak zawha ka va chhuah chuan inthiam lo rilru tak hian,"Ka rei ta phian. Ka țhianpa nu nikhaw hre lovin a tlu thut a, a rilru mangang chi-ai ka han hnèm a ni," ka ti ringawt.



Bobby-a chuan," A nih chu, a va zia lo ve aw..! Engvàng nge ni ang le?" a lo ti ve a.



"Ka hre bîk lo, ani pawhin a hre bîk lo va."



Ka pain," Stroke a ni mai lo em ni?" a lo tih chuan min tihlauthâwng thut mai. Ka lo ngaihtuah chhuak hauh lo a nih chu. Stroke a lo nih ngat chuan a buaithlâk ve khawp ang le, chu chu Muansanga pawh khân a ring a ni mai lo ang maw, khati êm êma a hlauhthàwn kha?



Muansanga chu ka ngaihtuah takzet a ni. Zàn a ni a, motor tawh tùr a tam dâwn loh avàngin a khalh chak viau chu ka ring, a hmanhmawh lutuk ang a, fîmkhurna a hloh ang tih ka hlau ber.



Bobby-a haw hnu, keini pawh mu tùra kan room kan pan vek hnuah chuan Muansanga chu ka va call leh hrâm, ka va tibuai ang tih chu hlau ru viau mah ila ka ngaihtuah hle tho si a.



Min lo chhâng rang kher mai.



"Zon?"



"Khalh chak lutuk lo la aw?"



"Ka khalh chak viau asin; mahse, ka fîmkhur tho a nia," a rawn ti a.



"I mut te kha a chhuak hlauh ang e, i mut a chhuah chuan ding tawp rih mai rawh aw, chêtsual a hlauhawm a nia," ka ti leh a.



"Min ngaihtuah tih hriat hi nuam ka ti."



A va ho tak aw!!! A nu chungah thil țha lo thleng lo se chuan ka vìn hlak ang maw le.



"I thleng thui tawh em?"



"Aw."



"I pain a rawn be leh tawh che em? Chanchin thar lam te?" ka tih chuan a thaw hawk a.



"Nichin khân ka va bia a, a la ngai reng, a la harh thei rih lo va," a ti sup a.



"Lungngai lutuk mah ta che, a rawn harh thuai dâwn alawm. Damdawi inah chuan in aiin a ngaihtuahawm loh daih zâwk dâwn asin, enkawltu leh viltu a nei reng dâwn a," ka ti leh a.



"Nia, a dik alawm," chu a ti ve. A rilru a buai hi ka hriat thiampui lutuk. A u hetah Mizoramah a awm dâwn si lo va, a pa chauhin a lo awmpui dâwn a nia, ani lah hi, Lungleia a rawn phei lai a ni bawk si, a inthiam lo viau bawk ang chu.



Ka muhìl thei bîk rêng rêng lo. A thlen veleh min rawn be tùrin ka hrilh nain keimah zâwkin ka be leh țhin, kawng laka a mut a chhuah ka hlau ve bawk si a, tihharh nân ka be lui hrâm hrâm a ni.



Ina pêng lovin damdawi in lamah a kal nghâl. A thleng tluang tih ka hriat chuan ka thaw a veng deuh huai, a nu chu hlauhthàwnpui viau mah ila tih theih dang a awm rih chuang si lo va, nghah tawp mai lo chu.



Zîng lamah ka chhîng ve sek. Mit thial úrhin ka tho a, ka tho tlai viau hran lo ve.



Chanchin min rawn hrilh hun ka ngaichâng deuh reng a; mahse, thu thar a la awm rih lo a niang, chaw ei hma deuh hreta min rawn biak bâk min rawn be rih lo. Ka va be sek duh tawh bîk lo, nizànah a chau dâwn si a, hahdam pawh a duh ve ang.



Tlai lam eirawng bàwl hunah min rawn bia a, a nu chu thisen unit 2 pêk a ngaih thu min rawn hrilh. Nikhaw hre lova a tlûk chhan kha thisen a lo neih loh vàng a lo ni pakhat a nih àwm chu, a zia hlauh e.



"Kei pawhin ka pe theiin ka ring, a harh vat mai ang," a rawn ti ta zâwk. A aw zângkhai ta deuh chuan min tilâwm khawp mai.



Zanriah ei hma hreta min rawn biakna țawngkam chuan sawi tùr rêng min tihre lo!



"Zon, tu fa nge ka nih?!!"



A ngaihna ka hre lo lutuk a, chhàn ngaihna pawh ka hre lo, makti zetin ka meng phâwk hrû ringawt!



A thaw ri hawk hawk ka hriat hnu chuan," Eng..eng maw i sawi?!!" ka ti țâwk! Eng thil nge a hriat ni?



"Ka nu leh pa fa hi ka ni miah lo!"



Ka melh ngai ka melh tlawk tlawk ringawt! A awka chhuak chuan a rilru natzia a hril chiang si a, hnem dàn ka hre lo, ka bulah awm se kuah vawng vawng ka va duh tak!








* MI TU PAWHIN THIL KAN TISUAL PALH THEI VEK, A CHÂNG CHUAN MI ȚHA BER PAWHIN A TISUAL VE THEI THO. A SUAL TA E TIHNA NI LOVIN MIHRING A NIH VÀNG ZÂWK A NI*





☆LUHLULPA☆ - 30 By Dingdi Pachuau




Ka va khawngaih tak êm!! A nu thisen pêk kha a tum ve ngei a; mahse, a lo mil lo va, a pa blood group a hre ve reng bawk si, mi â nilêng lo ta chuan a chhui chhuak thiam ve a lo nih chu.



A nu a zâwt ngam rih lo, thichhâwng ang maiin damdawi in khumah a la mu reng si, a pa lah biak ngam lohin a ngawi ngul mai bawk si, a rilru a hrehawm dâwn lutuk! A bula awma hnèm thiam miah lo pawha kuah vang vang ka duh hle a ni.



"A mak ka ti takzet a ni, thu hre chiang tùrin ka hmangaih êm êm ka nu lah zawh chi rual a la ni si lo, ka nu leh pa tak ni miah si lovin heti tak  hian min hmangaihin an thisen zawmpui ni miah lo min hmangaih thei chu a ni si a," a ti leh vawng vawng ringawt ţhin.



"Nia, an duatin an hmangaih êm êm che a ni, thisenah in inzawm lo pawh a ni maithei a; mahse, thinlungah hmangaihnain in inzawm tho chuan chu tluka pawimawh dang a awm chuang hleinem. An fapa neih chhun, an hmangaih ngawih ngawih i ni reng a ni," tiin ka lo hnèm ve a.



"A mak ka ti êm a ni," a ti leh sup ringawt. A thil hriat thar hian a shock ve êm a ni, a àwm viau tho mai. Chutah," A nih leh, Zon, nangin eng angin nge min hmuh? An fa lâk chu ka lo ni ngei ang a, min hmu hniam sawt em? min hua em? Fahrah, nu leh pa tak pawh hre lo, mi fa lâk mai mai ka ni si a," a ti leh.



A rilru a buai zo vek a nih chiah hi.



"Chutin sawi mah ta che, ka huain ka hmusit ngai lo che, mihring inhmusit thei kan awm rêng rêng lo, Pathianin duh taka a siam vek alawm kan nih. Bâkah, fahrah i ni rêng rêng lo, i nu leh pate fapa i ni," ka ti. Ka rilru erawh chuan,"Engtin nge ka huat theih ang che? Hmuhsit leh huat chu sawi loh, ka hmangaih êm êm zâwk che a ni," ka ti ru țhuai țhuai mai.



Za lo tih hriat ngawih ngawih hian a nui hawk a, rilru buai mangang tihngaihna hre lova nui a ang ka ti zâwk mah.



"Nang hi chu, i fel ve chiang ngawt mai, ka lo tawng lo ang che tih ka hlau," a ti, a tûn dinhmun hi hre chiang hle lo ila chuan ka nui vak vak ang; mahse, ka nuih duh hauh lo.



"I nu chu hma a sâwn deuh tawh em?" tiin thil dang ka sawipui a.



"Harh chu a harh tawh; mahse, ka la hmu lo," a ti ban deuh charh a. A nu tak a ni lo tih a hriat chhuah ațangin a hmu hreh tawh a nih ka ring nghâl.



"A zia hlauh chu!"



"Ka bulah awm la ka ti hlê a ni," a ti vang vang.



Kei tak hian asin a bula awm duh ni. Kuah vang vanga a rilru buai a reh hma chu kuah ngawih ngawih ka duh hial ang.



Phei ve ka duh, tuna min mamawh lai taka a tân ka awm lohin engtik hunah nge ka awm tawh ang le?



Sumo ticket a vàn tawh avàngin leh naktûk maia phei ka duh avàngin Scooty-in ka phei mai ang. Bawihtei hruai chu duh viau mah ila tûn dinhmunah chuan ka hruai lo mai ang.



Zanriah kîl laiin ka chhûngte bulah Aizawl phei lawk ka tum thu chu ka hrilh a, phâwk zeta min en chuan Muansanga nu chanchin chu ka hrilh ve ta a.



Min hnial zâwngin an țawng miah lo nain Tea chuan min melh rulh rulh mai. A remti zân lo a nih ka ring; mahse, pawi pawh ka ti lo, phei ka duh a ni mai.



"Khawiah nge i va thlen ang?" ka nu chuan a lo ti a.



"Damdawi inah ka riahpui ve mai ang chu," ka ti ringawt. Dâwt ka hrilh lo, damdawi inah a țûl a nih chuan ka riak ve mai ang, Muansanga hnèm pahin.



"A țha alawm. Puitling i ni tawh a, kan ngaihtuah lo ang che," ka pa chuan a lo ti charh.



A sawi awmzia ni bera ka hriat chu 'Ngaihtuahawmin va awm lo ang che' tiin. Nia, min ngaihtuah ang, khatiang nunhlui kha Muansanga nèn kan nei tawh a, ka țhen chhan lah an hre vek, min ngaihtuah ru tho tih ka hria.



"Pa, min ngaihtuah suh ang che u," ka ti ve sap.



Zànah ka phone a, phei ka tum thu erawh ka hrilh rih lo, va hmuh thut ka duh zâwk. Chipchiar takin an awmna cabin ka zâwt vek, ani pawhin min hrilh ve mai bawk a.



Tûkțhuan ei kham hma deuh hlekah ka chhuak. Motor tlân an tam vàngin ka fîmkhur hle, Krismas dâwn aruaia chëtsual ka duh teuh lo.



Ka tlân chak fahran lo bawk a, ka thleng hma lêm lo khawp mai. Zarkawt ka thlenin ka phone ve chauh a, dandawi in lamah a lo awm ve ngei, a pa a awm ve em tih ka zawh chuan in lamah a awm tih a sawi. Ka thaw huai.



A pa hmuh chu ka duh lêm si lo va.



Min hmu thutin mak a tihzia chuh! Kei erawhin ka nuih thung a. Min en reng ringawt phawt a, a hnuah erawh min rawn pan vatin min rawn kuah ta vawng vawng. Min kuah nghet lam deuh chu a ni.



Rei tâwk tak min kuah hnuah chuan," Engati nge i lo kal?" te chu a ti lawi a, min la kuah bet reng tho.



"Ka ngaihtuah che alawm," ka ti sap.



Ka samah a hmai rawn phûmin," Ka lâwm e," a ti sup. Che miah lovin min kuah leh ta, ka tih theih tâwk chu a hnung chùlsak hliau hliau a ni mai.



A rawn dâk chhuak a, chutah tak chuan a mittui a tla a ni tih ka hre ve chiah!



"Ka lâwm e aw," a ti thâm sup a. A mittui a tla tih hre chiang bertu a ni ngei àwm si a, a zahpui miah lo leh a thinlung chhûngril bera a làwmna a tilang chhuak chuan ka thinlung a dek takzet a ni.



A nu awmnaah chuan kan lût a, a rûk chuan a hreh maithei; mahse, luhpui ka duh si a, min hnial bîk lo.



Nurse pakhat hian a lo awmpui a, an chhawr a ni tih ka hria. Min hmuh chuan zaidam tak hian min lo chhàwn a, a zia viau tih leh tunah chuan a muhìl rih a ni tih chu a sawi sar sar a.



Rei lutuk lo chu kan awm a, tih theih kan nei vak chuang si lo va. Bâkah, Muansanga chu ka ngaihtuah a, a rilru a nuam fahran lo ang tih ka ring a, chuvàngin pâwn lama țhut khawthawnpui ka duh deuh zâwk.



Thingzai ațanga țhutna an siamah chuan kan țhu a, khaw hawi pawh a rem phian e. Ni a lan tawh loh avàngin khua a vâwt reuh khawp, chutah, thli a la rawn thaw heuh heuh zui.



"Ka bulah i awm a ni tih hi rin harsa ka la ti."



Ka kutah a chelh a, a mit la sawn lovin min en ràn bawk. A nu awmna kan luh hnua a țawng lehna hmasa ber a ni.



Kei pawhin ka en ve vang vang. A mit hnuai chu mutmu hmu lo tih hriat takin a val ruih a, a hmêl hmuh nuam zet țhin erawh a hma ang ni tawh rih lo mah se hmuh nuam lo ka la ti phal lo.



"Hei, min chelh reng hi. Ka lo sik chhin dáwn che em niang?" tiin ka nuih sak a.



"Ka ring pha lo lutuk a!"



"Ka hrilh duh lo che a nih kha, rawn surprise che kha ka châk a," ka tih chuan a mitko a sàn ãk a.



"I rawn phei vang vang a nia, a hahthlâk dâwn si, i chau ngawt ang," a ti sup a, duat zet hian ka kut chu a chûl hoh hoh tawh thung a.



"Chau lo ve, ka hah miah lo."



"Zanin chu kan inah riak rawh aw. Ka pain a riahpui dâwn a, kei ka haw thung dâwn a," a tih chuan," A...kan riahpui dâwn ang chu ka lo ti asin. Engtikah nge i pa chu a rawn kal dâwn?" ka ti a.



"A lo kal țêp ang. Riahpui lo ve, i chau lutuk ang, bâkah, nurse a awm tho alawm. A ngaihtuahawm lutuk tawh lo bawk a," a ti leh a.



"Ka hre lo le," ka tih chuan a meng nûr deuh a,"I lo riah lohin, khawiah nge riah i tum? Mimawii pate inah maw? Teuh lo mai! A theih loh!" a ti ta bul bul mai a.



"Ni lo, engah nge an inah riah ka tum ringawt ang?"



"Chuti, ka pa lo kal veleh kan haw nghâl dâwn nia."



A duh ka tihpuitlinsak mai loh chuan. A pa bula awm ka duh hauh si lo, bâkah, hmuh pawh ka duh lo bawk.



Khaw thim tak tak hmain a pa chu a rawn kal a; mahse, ka hmu ve lo. Bike a ken loh avàngin ka scooty chuan ka phur a, a duh lo hran chuang lo, min rawn hnaih êm êm lehnghâl. Ka kâwngah a kuah tlat bawk.



Ka hriat thiam mai rih zêl a ngai. Ka sawisèl hlauh chuan a rilru buai lai a ni ve rih si a, hriat thiamna thûk tak nei mai teh ang.



Inah chuan nula pakhat hi a lo awm a; mahse, Muansanga chuan a hawtîr thuai. A pawi lo, keimahin ka buaipui thei ém ang chu.



"Tu nge a?"



"Kan in enkawltu leh eirawng bâwltu. Zàn lam erawh a riak ngai lo. I ril a țâm tawh em?" a ti leh daih a.



Hawi kual pah chuan," Țâm vak lo ve, nang, a țâm tawh em?" ka ti a.



"Nangma țàm leh țam loh a ni mai."



Ka nui ringawt. Chutah," I inbual dâwn em?" ka tih chuan min rawn hnaih dâwrh a.



"Tunah tak hi chuan hei hi ka châk ber," tiin ka bek tawn tawnah a kut pahnih chuan a rawn dawm a, hnai zeta min rawn en chhukin,"Ka mumang a ni lo tih chian ka duh a ni,"tiin a rawn kûn hniam nghâl a.



A intleuh zawk a, chumi chhûng chauh pawh chuan kal sawn phal lovin a room-ah min awmtîr tlat. A rei lo kher mai, a rawn chhuak vat a, a thawmhnaw lum hâk tùr ka lo pe vat.



"Ka rei lo i ti em?"



"Second hnih khat bâk a ni lo ang," nui sâng chung hian ka lo ti a.



"Ka bula i awm theih lai chuan awm reng ka duh alawm, ka hlatsan duh lo che," a ti sup a.



"Hmm...Inha la, chaw ei kan siam dâwn nia," ka ti a.



Țawng lo chuan min en reng phawt a, chutah,"Min ngai ve em?" a rawn ti daih a.



"Ngai lo che ila ka rawn kal nâng, bâkah, harsatna i tawh laiin i bula awm ka duh bawk a," ka ti a.



Dâwt sawi kual ka peih lo.



Tui ti takin chaw chu kan ei. Ka ei tam lutuk, ka puar mah mah a ni.



"I ei ve mang pawhin ka hre lo," ka tih chuan," Ka hlim lutuk a," a ti ringawt.



"Naaa...I va ho roh tak! Chak i mamawh alawm, i nu tân. Nakinah ei tùr dang ei tal ang che," ka ti a.



"Ka bula i awm chuan a tâwk. Ka chakna hnâr i ni alawm," a ti thung.



Chaw ei khamah chuan fridge-a an thei dah chu a ei tùrin ka siamsak a, ka awm chhûng tal hi chuan ka duat a ngai a ni. Ani lah chuan min ngai tih takah, ka kalna apiangah min zui zêl bawk a.



"Ei rawh le."



"Ei ve tho la?"



"Umm..."



Kan ngawih vang vang hnuah chuan țawng chhuak hmasaah țangin,"I uin i nu chanchin hi a hre ve ngei ang tiraw?" ka ti a.



"Aw...Mahse, ka pain lo chhoh a ngai lo a ti a."



"Nia, a țha chho zél mai ang. A taksa a chak chho ang a," ka tih chuan," Engtikah nge haw phei  i tum ang?" a lo ti daih a.



"Naktûkah chuan a ni lo maithei," tiin ka nuih phawt a, chutah,"I țhat hunah a ni mai," ka ti leh a.



"Chuti, țha lo reng ta ila?"



"A, ka bula i awm chuan i țha thuai dâwn alawm, thil țûl lo ngaihtuah vak vak kha ka phalsak dâwn hauh lo che a," ka ti a.



"A țha ngawt ang!" a lo ti duh chauh.



"I pa hi i chanchin chu zâwt chiang chhin la?" ka tih chuan,"Ka nu dam chian hunah le," a lo ti thung a.



A pa chu a zâwt hreh a ni chiang.



Thil ho mai mai ka sawipui leh rih a, a hnu deuhah erawh,"I rilrua i vawn reng tùra ka duh chu, i chhûngte hi thisena i chhûngte tak tak an lo ni lo a nih pawhin thinlung lama in inzawm chuan rilru dang pu miah suh aw. Bâkah, an fapa neih chhun i nia, an hmangaih êm êm che tih ka hria a ni," ka ti a.



Min chhâng lo chuan a melh ngai a melh reng a.



"Ngaihtuah ngut ngut lo la?"



Chutah, min rawn enin,"Mahse, ka duh loh zâwnga ka kawng dàl an tum chuan ka duh hauh lo ang," a ti ta nghut a.



"An fapa i ni alawm, engah nge i kawng dàl an tum ngawt ang?" ka lo ti a.



"Nia..." chu a ti leh lawi a.



Thil dang ka sawipui ta daih. Bawihtei chanchin leh ka chanchin eng eng emaw chu ka sawi a, a mit khap deuh fak fak ka hmuh tâkah chuan zàn a mut țhat loh tùrzia leh mut a mamawh tùrziachu ka hre chhuak a.



Chutah,"Mut i duh tawh em? Mu tawh la? I chauh hmel ropui si a," ka ti a.



"Ka bulah i mu ve ang tiraw?"



"Tihchi nâng!" ka lo ti vat a.



"Tihchi e. Ka bula i mut loh te'n, ka muhìl țha thei nâng. Bâkah, hlauthâwng suh, ka kuah ringawt ang che," a ti a.



"Kan pahnih chauhin kan awm hi," ka ti leh a.



"Ka khawih lo ang che, chu chu i hlauthâwng a nih chuan. Ka chauh êm hi, min duat ta che," a tih nang nang chuan ka khawngaih leh deuh si.



A țha alawm. Ka inthunun ang, nia, a sawi ang hian a chau êm a, țha takin muhìl bawrh bawrh se ka ti bawk.



A room-a kan inzui luh chuan,"Mut hmain intihfai zawk ka duh a," ka ti a.



Ka bânah kaiin bathroom chu min luhpui a, toothbrush thar hlak min pêk pah chuan," Hmang rawh, face towel pawh a awm," tiin dârthlalang lian pui chu a nem tawlh a, chhuar hi a lo ni a, face towel vâr thianghlim zet hi la chhuakin min pe a.



Ha kan nâwt a, hmai kan phih hnu chuan chhuak rih tùrin ka ti a, min en vang vangin a nui ta suk a, eng mah sawi lo chuan a chhuak zui ve ta mai bawk a.



Ka insil zuai zuai.



Thawmhnaw mutpui tùr ka ken loh avàngin ka kawrlum hâk lai chu ka hlîp tawp a, chu chu min hmuh chuan," Ka thawmhnaw ha rih mai rawh," tiin khum ațang chuan a tho a, a thawmhnaw bâwm chu a va hawng nghâl a.



"Ngai pawh ka ti ém êm chuang lo, ka hâk lai hi ka mutpui thei mai," ka tih chuan ka bul a lo thleng leh tawh.



A thawmhnaw lum leh kekawr lum chu ka ha ta, ka thâwl ve reng. A kekawr phei chu, a sei lutuk.



"Kei aiin i mawipui zâwk a nih kha," a lo la ti zui.



Kan mu chiah tihah chuan min rawn kuah nghâl. A bân chu ka lukham theih nân a rawn phar a; mahse, ka khawngaih avàngin ka duh lo va.



"Engati nge?!"



"A, i bân a nâ ang," ka ti a.



Kan mu ta ràn mai.



"Muhìl rawh," ka tih chuan," Nang pawh, vawiinah i rawn inkhalh thleng țhak a nia, i chau dâwn êm asin," a ti ve a.



"Chuti, muhìl ve ve ang."



A chau tawngkhawng tak tak a ni, a muhìl thuai ta rêng. Kei erawh ka la muhìl thei rih lo, thil ka ngaihtuah kual a, a muthilh ațanga dârkâr khat hnu vêlah chuan ka muhìl  ve ta mai.



Kan mu tui bawk a niang, kan harh meuh chuan khua a lo êng nasa tawh khawp mai. Thawh ka tum a, thawh phal lovin min kuah mu leh a.



"A la hma!"



"Hma tawh lo, eirawng bàwl kan ngaih kha."



Nizàn khân an nula chhawr kha zînga lo kal a ngaih loh tùr thu kha a hrilh si a, keimah ngei ka chêt a ngai dâwn a ni.



"Rei lo tê mu leh lawk ang."



Ka hnial lui ta bîk lo.






*MI DANGTE THIL A PÊK HRIAT RENG TUM NGAI LOVA, MI DANG THILPÊK A DAWN THEIHNGHILH NGAI LO MI CHU MALSÀWMNA NUN NEITU A NI*




(Ka birthday min wish-tute zawng zawng leh min wish duh rilru pu leh min la wish hman lote😀 pawh...ka lâwm vek e😘 He group member tawh phawt chu, ka hmangaih vek che u😘 Chuan, vawiin anga piang in awm ve thoin ka ring, Happy Birthday u, tlai hlek tawh mah se😀 BETTER LATE THAN NEVER an tih kha)