☆LUHLULPA☆ - 31 & 32 By Dingdi Pachuau

☆LUHLULPA☆ - 31 By Dingdi Pachuau




"Nizàn khân ka muthilhsan daih che a," ka beng bulah chuan a rawn ti sup a.



"Ka duh dàn tak a ni, a tam thei ang ber mu hahdam la ka duh alawm," ka lo ti a.



"I khua a har ngawt ang chu!"



"Har lo ve. Vawiinah i nu kan han awmpui ang chu tiraw?" tiin thu dang chu ka sawipui ta daih a.



"Thu dang min sawipui tum kher lo la," a tih chuan," I pate ei tùr kensak an ngai ang em?" ka ti leh a.



"Ngai lo, vawiin chu kan pahnihin, kan pahnih chauhin hun hmang dùn teh ang. Min ngaihtuah vànga lo kal i ni tak tak bawk a, a dik tiraw?" a ti leh a.



"Um, a dik alawm."



"Chuti a nih chuan-"



"I nu kan ngaihthah thei lo ang, i nu a nia, kan ngaihven reng a ngai a nia," ka lo ti vat a.



"Min ngaihtuah vànga lo kal i nih thu i sawi zo chauh emaw ka ti," a tih chuan," Ti e, chumi avàng erawh chuan i nu kan hlamchhiah daih ang ka ti chuang miah lo," ka lo ti leh a.



A ngawi ta daih.



Chu chu remchângah lain thutak zet hian,"Ih maw, ngun taka ngaihtuah tùra ka duh che chu tuna i nu hi i pianna nu, i thisen zawmpui a ni kher lo  a nih pawhin nangmah pawma lo chawi liantu che, zàn khawthim leh hrehawm pawh pawisa lova lo enkawltu che a ni a, ani bâk nu i nei lo. Chutiang bawkin i pa pawh, a fapa neih chhun liau liau i ni. An hmangaihin i tâna țha ber ber an duh tih hria la, an thisen zawm i ni lo tih chu rilru tihhrehawm nân leh mahni inthlahrun nân hmang miah suh," ka ti kalh kalh a.



A la ngawi ngul tho.



"Anni'n an en dàn leh an hmangaih dàn che a pângngai reng ang, i hre chhuak tih pawh an hre kher lo ang. Chuvàngin, nang pawhin a hma ang chiaha i en ang khân en la, rilru buai leh hrehawmin awm miah suh " ka ti leh a.



"Nangin eng angin nge min hmuh? Ka nu leh pa leh u dik tak nia ka lo hriatte chu ka pianpui thisen zawmpui ni lovin a lem mai an lo ni si a," a ti ta sup a.



"A lem ti bîk lo la. Ka hrilh tawh che kha, an hmangaih êm êm che, thisena zawm kher hi kan hmangaih bîk kher chuang lo a nia," ka ti a.



"Chuti a nih chuan, min hmangaih tihna a ni tiraw?" a ti leh a.



"Umm..."



'Ka hmangai lo che, ka ngaihtuah vàng che a nih hi' tih buai ka tum lo, tûn hi hmangaih a hun lai ber a ni rih si a.



Min rawn kuah nghet ta sauh, chutih rual chuan," Ka lâwm e," a ti sup bawk. Chutah, a kut chu chêt sawn deuhin ka dul ațang chuan a sawn chho hret hret a.



"Ninhlei suh aw," tiin a kut chu ka man bet ta chat a.



"Ka ninhlei lo."



"Hlei reng hi." Kan kut chu a insual țan ta. Chu mai duh tâwk lo chuan nghet zeta min kherhin a hmui chuan ka nghâwng vêl chu a rawn nûl pah  a, a thaw ham ham pah bawk.  Ngawi reng chuan chak zâwk nih tum chuan țan kan la a, thlasik khua mah ni se thaw a sa bat bat thei dâwn alawm le!



"Zon...?" A aw chhuak thâm deuh sup phèna ngenna aw lo lang chu hai der a har ngang mai.



"Hetiang hian awm suh," ka ti ta ringawt. Ka pa thil min hrilh kha ka hre chhuak ram ram, ngaihtuah ngaiah min dah lo a nih kha.



"Induh tawn leh inhmangaihte inkâra thil thleng a ni ve mai a," muang ban deuh charha a tih chuan," Ni lo ve, a la hun lo," ka ti a. A thaw deuh hawk, a inthlah dul deuh lai nang fuhin ka tho chhuak ta vat.



"Ka inti fai hmasa ang e," tiin rang zetin bathroom-ah ka tlân lût nghâl daih.



Bathroom ațanga ka chhuah chuan a lo la tho lo, min lo en kur a.



"Tho la, va inphih harh ve rawh," ka ti a.



"Ka peih rih lo," a lo ti deuh tlat, a inkhuh țha sauh sauh.



"A nih chuan, mu leh rih mai rawh, ka zu chhuk ang e," ka tih chuan," Khawiah nge i kal dâwn?" a ti a.



"Khawiah mah, eirawng ka bâwl ang chu, kan nghei dâwn em ni?" nui chung  hian ka ti a.



"Pawi miah lo, lo mu leh mai la?" tiin a puan sin chu a kêu sawk sawk a, a nui deuh sûng bawk a.



"Duh tâwk rawh, ka chhuk a nia,"tiin ner khum zauh pah chuan kawngkhàr lam chu ka pan ta nghâl a.



Eirawng ka bâwl a, Bawihtei ka phone pah bawk a, kan inbiak làng láng lai chuan ka hnung lam ațangin min rawn kuah thut a, ka phu zawk; mahse, vànneihthlâk takin ka țê chhuak lo ve.



A face wash rim thiang zet leh colgate rim nam deuh ram ram chuan hnâr a verh var mai, a thawhna a la rei lo tawp a nih hi.



"Bawihte, nakinah kan inbe leh dâwn nia aw," tiin kan inbe tàwp ta rih a, Bawihtei'n ka bulah a u Muana a awm ve tih a hriat ka hlau a ni, biak kha a duh leh ang a, a buaithlâk.



"In tùr i duh em?" ka tih chuan,"Ngawi lawk, che lo teh, tihian awm rih ang," tiin a biang chuan ka lu chu a rawn nghèng reng a.



Boruak nuam leh tuma chîm buai loha awm chu a thlahlel rih a ni ang e, kei pawhin hrehawm ka ti lêm lo.



"Hetiang hian zîng tin awm thei ila..."



Ka chhâng lo.



*******



Ka haw phei zànah rei zet kan inbia a, kan inbia ti ila ka bia a ni mah zâwk, ani chu a țawng mang lo. A túkah zîng dâr 9 vêlah ka phone leh a, a nu chanchin ka zawh chuan a țha tih min hrilh, han sawi zui tùr lah hi a tlachham thei si,"A țha," a tih tawh hnua han zawh belh chiam lah a inthlahrunawm.



Tlai lama eirawng ka bàwl laiin min rawn call ve ta.



"Hello?" Ka pa awm ve reng lo se chuan,"Nge ni pek?" ka ti chiang ngawt ang chu.



"Zon, inhmu lawk ang," a rawn ti ta mai!



Ka âwih lo lutuk chuan,"Uang lo mai teh, i nu i awmpui em?" ka tih chuan a thaw hawk ri chu ka hre thei, chutah," Ka uang lo nasa, hotel ka thlennah khân i lo kal thei ang em?" a rawn ti leh a.



"I lo phei tak tak maw!!!" ka la ti háw tho, a nu nat lai laiin, engtiziaa rawn phei nge maw a nih ni?



"Khawngaihin?"a rawn tih leh tâkah chuan ka ring ve ta deuh.



"Nakin deuhah a pawi ang em? Eirawng ka bâwl laklawh lutuk a," ka tih chuan," Ka lo nghâk reng ang che," a ti sup ringawt a.



Mahse, ka insiam nghâl. Ka pa a awm tho avàngin thil awmzia chu ka hrilh pawr pawr a, ani pawh chuan mak a tih hmel ve viau chuan ka hria; mahse, eng mah min zâwt zui lo.



Tea'n scooty a ken daih avàngin kein ka kal ta dàwr dáwr. Krismas a hnai ve tawh a, khawlai pawh a lùn viau rêng a ni. Tu mah han inngaihsak bîk erawh kan awm lêm lo, mahni buai buaiin kan buai vek ni maiin ka hria.



A hotel thlen hmain ka call leh rih, pâwnah min lo nghâk reng tawh niin, ka hmu nghâl. Beanie buang a khum a, a sweat shirt dum leh a kekawr dum nèn chuan a lang fai ser sawr kher mai.



"Engati nge pâwnah min lo nghah a?" a bul ka thlen chuan ka ti nghâl a.



"Ka lo nghâk reng ang che ka tih kha," tiin ka kut chu a rawn vuan a; mahse, thlah leh thutin inthiam loh hmel deuh hian min en ta zâwk a.



"I bâwl zo tawh em ni?" a ti ta thung.



"Aw, ka pa a awm a."



"Nakin deuha i rawn kal ka ring nain ka lo nghâkhlel tawh lutuk che a," a ti a, chutah, kal hmasain a room lam chu kan pan dùn ta a.



"Nia, a pawimawh hmel êm a," nui chung hian ka ti a, a room kan thlen hma chu kan țawng zawm ta lo.



Dawhkàn bula Plastic chair pakhat chauh awmah chuan ka țhu a, ani chu khumah chuan a țhu a, a hmel vei nei rân mai chuan min tingaihțha lo lek lek a ni.



"Chuan...?" tiin ka en a, ka mitko ka sàn ãk a.



"Ka pa nèn kan inhau a."



Ka rei! Eng thilah nge ni ang le?!! A nu damloh lai chuan thil țha lo tak a ni, a hun lo takzet.



"Eng thilah maw?" ka lo ti vat a.



"Ka sual i ti em?" a ti leh daih.



"A, sual ti tùr pawhin in inhau chhan ka hre tlat lo mai," ka lo ti a, a enga mah hmaa sual tih ringawt chu a fuh ber lo ang.



"I haw hnu lawk khân a nia," ti supin a ding chhuak hluai a, chutah, min rawn melh chhuk rânin," Engati nge min hrilh loh?" a ti leh ta daih mai!



Hre thiam lo zet hian ka lo en a! A thil sawi inkahpah zet leh ka zawhna a chhàn si loh dàn chuan a awm dàn chu mak min tihtîr viau a ni.



"Eng chu?!!"



"Min țhen chhan kha."



Mit khap lo lêk chuan kan inen ràn. Mak ka ti a, engtin nge a hriat ka hre lo. Chhàn ngaihna pawh ka hre lawk lo.



A hnu deuhah chuan,"Ka hrilh tawh che kha," ka ti ta ringawt.



"Nimin tlai khân inah a sawi vek. Ka u bialpa hlui Victor-a nupui hlui i nih vàngin ka hnimhnaih che a duh loh thu leh țhen hmak tùr chea min duh thu a sawi a, keiin ka theih loh tùr thu ka hrilh thung a. Chutah chuan, a thu ka awih lo a nih chuan ro ka chan loh tùr thu min hrilh leh ta a, kei erawh chuan nang țhen che ka tum loh thu chu ka sawi leh a. A thinrim chuan a fapa ka nih loh thu a sawi chhuak ta a."



A thin a tirim hle a ni ngei ang chu, chutiang thu chu a han sawi chhuah phah a nia.



"A zia lo hle mai!" ka ti sap ringawt.



"Zon, a pawi ka ti lutuk! Amah vàngin thinlung na ngawih ngawihin i awm phah si a," tiin min rawn hnaih a, chutah, tawlh lêt lehin lu thing nak pah chuan,"Ni lo, a zahthlâk ka ti takzet. Hmu ngam tùr che pawh hi ka ni tawh lo va; mahse, nang lo chu han sawi chhuahna tùr ka hre bawk si lo," a ti leh a.



"Engah mah ka ngai lo, thil kal tawh a nih kha, theihnghilh daih ka duh asin," ka lo ti a.



"Kei hian ka theihnghilh thei ngai lo ang, engtin nge i chungah khatiang khân a tih theih ni?" tiin a thaw hawk hawk a, a rilru chu a buaiin a hrehawm takzet tih a hriat theihin ka hria.



"Ni lo ve, i tâna țha a ngaihtuah vàng a ni alawm, bâkah, i u tawrhna tam tak kha ngaihtuah bawk la, pate chuan fate tân thil țha ber an duh țhìn alawm," ka tih chuan,"Ka u bialpa hlui nupui hlui i nih vàngin eng pawi nge i sawi chuan? Nangmah vàngin ka u a țhen phah pawh a ni lo va, ka u rilru lo nat daihna tùr pawh a awm lo," a lo ti bul bul thung a, țhu thei lo chuan a vei tawn sek reng a.



"Țhu teh, ka lu i tihai a nia."



Ding chawta min rawn enin,"Ka rilru nat dàn tùr lam aiin ka u rilru tùr a lo ngaihtuah zâwk avàngin nang nèn min pawt țhen a, ka ngai thiam thei lo a ni," a ti leh bul bul mai.



"Kha chu theihnghilh tawh ang," ka tih chuan,"Ka hre ve chauh a, ka theihnghilh nghâl thei ang maw? Teuh lo mai! Tunah chuan a fapa pawh ka ni tawh lo lehnghâl, saw inah sâwn luh pawh ka duh tawh ngai lo ang," a  la ti ngul ngul a.



A thin a rim ve hle a nih dâwn hi. Engtin nge maw ka tihrehsak ang ni? A tipâwngpawrh zâwnga țawng a hlauhawm tlat, fîmkhur a ngai viau a ni.



"A nih chuan, in ina i luh duh tawh si loh chuan..." ka ti a, ka tàwp leh rih a.



"Min hnawt chhuak tawh alawm," zàwi zet, hriat theih chè ché hian a ti sup a.



A hnawt chhuak maw!! A fapa neih chhun hi in ațangin a hnawt chhuak thei maw?!!



"Engtin nge a nih theih!!" ka ti chhuak ringawt. Amah ka biaa ka zâwt pawh a ni chiah lo.



"Nizànah ka nu bulah ka awm reng a, tukin zîngah ka chanchin dik tak ka zâwt chhuak vek tawh bawk a," a ti leh sup a.



"Chutiang sawipui theih khawpin a țha tawh em ni?" ka lo ti vat.



"Aw, a țha lutuk tawh, naktuk lamah khian a chhuak thei tawh ang," a ti ve mai a.



"A zia hlauh chu."



A nu chuan a thisena hrin ni lo mah se a fapa tiin a la sawi țàng țáng tih a sawi a nih chu. Ani bâk fapa a nei lova, a thinlung zawng zawngin a fapa dik tak niin a pawm a, a hmangaih takzet tih pawh a hrilh. A pa nèna an inkâr chanchin chu a nu bulah chuan eng mah a sawi lo va, in ațangin hnawh chhuah a ni tih pawh a hrilh duh lo.



Tunah chuan ka thlahthlam thei lo takzet tawh. A nu leh pate an ni lo tih hre chiang tawhin rilru na takin in ațangin a chhuak a, chu pawh a pa vàngin, kei ngei pawhin tel vena chin ka nei tho mai, chuvàng tak chuan ka thlahthlam thei lo zual.



Mahse, hma hun tùr ka ngaihtuah thiam lo, a khirh kual. Ani tân tak hian a ni buai ni, a rilru a lo buai pawh hi a lo àwm hliah hliah a nih hi.



"Zon, tunah chuan eng mah ka ni tawh lo lehzual, neih pawh ka nei lo. I hmaa inlan ngam tùr pawh ka ni tawh lo tih ka hria; mahse, pan mai tùr ka hre tlat lo a ni," a ti leh sup sup a. A hmai a huih pâwk a, a beanie khum pawh chu thaw hawk pahin  a phawk hlawl bawk a.



Ding chhuakin khuma a țhu chu ka pan phei a, a lu-ah chuan va dawmin ka âwm chu ka nghentîr a.



"Inngaihtuah buai lo la, ka lakah inthlahrunna tùr pawh a awm hek lo. I mangan buai laia min hre chhuak hi ka lâwm takzet a ni, i tân ka pawimawh hle a ni tih ka hriat chhuah phah a," ka ti sap a.



"Ka tâna mi pawimawh ber i ni reng a ni."



Tunah hi chuan a inhnemna awm chhun ka ni. Tlangvâl la naupang tak a ni a, a la suangtuah chhin ngai loh tùr a tawng chho mêk a ni si a, ka hnèm thiam lo; mahse, a tân, a kiangah, nghen tùr țanpuitu a nei tih hria se ka duh. Kuah vawng vawnga a rilru natna hi thawi dam thei ni ila ka ti hle mai.



"Haw tawh rawh, a tlai tawh," a ti sup a.



Hun ka lo ngaihtuah miah lo, pâwn lam chu a lo thim ruai tawh niin, room light pawh kan la on lo.



Ka ngaihtuah a ni, thil țha lo lo te hi a lo ngaihtuah rêu rêu ang tih ka hlau.


"Lo lêng la?" ka tih chuan," Min ngaihtuah suh, engtin mah ka lo awm lo ang," a ti ve mai a.



"Bawihtei pawh i hmu châk lo'm ni?" ka tih chuan za lo tih hriat ngawih ngawih hian a nui lui sak a.



"Tuna ka awm dàn ang hi chuan  min hmuh ka duh lo, ani hmuh kha chuan hlim taka hmuh zêl ka duh si a," a ti a.



"A nih chuan, zaninah eng nge i tih ang?" ka ti leh a.



"Ka awm tawp ang, min ngaihtuah suh ka tih kha. Tûn dinhmunah hi chuan tu mah hmachhawn ka châk rih lo, nang erawh chu mi danglam bîk i nia," a ti charh a.



"Inngaihtuah ngut ngut suh aw."



A ngawih reng avàng chuan a kutah dawmin,"Thil țangkai lo tak mai a nia, chuvàng chuan, thil țûl lo ngaihtuahin i ngaihtuahna i sêng lo ang tih min tiam teh," ka ti ta a.



"Ka tiam thei lo ang che," a ti phawt a, chutah," Ngaihtuah vak loh hrâm erawh ka lo tum ang," a ti leh a.



A țha. A pawi lo, nia, a har dâwn lutuk.



Hawsan chu ka huphurh hle mai; mahse, awm ve rengna chi a ni bawk si lo.



Ka haw kawngah chuan ka phone a rawn ri a, min rawn call-tu hming ka hmuh chuan ka thin a phu deuh dutin ka hria.



Muansanga pa.






*HUN HLIMAWM LAIA KAN NUIHPUITE AI CHUAN HUN HARSA KAN TAWH LAIA MIN HNAIH TLATTUTE HI KAN HRE RENGIN KAN INKUNGKAIHNA A ȚHA ZÂWK FO*






☆LUHLULPA☆ - 32 By Dingdi Pachuau




"I thil tih pawizia hi i hria em? Hêng thil zawng zawng hi nangmah vàng a nih hi. Ka fapa ka neih chhun ka chàn phah a, a nuin a hriat hunah phei chuan engtin nge a awm ang? A nunnain lo tawrh phah ta se, engtin nge i tih ang? Ka ngaidam thei dâwn hauh lo che a nia," a rawn ti khur khur mai.



Ka kal lai chu ka ding chawt. Chutiang zâwng chuan ka lo ngaihtuah miah lo, ni e, a nu chuan a fapain in a chhuahsan a ni tih hre ta se, mak a tiin hrehawm a ti ngei ang le, a hrisèlna pawhin a tawrh phah lo ang tih a sawi theih miah loh.



"A tàwp nân ka ngèn ang che, ka fapa chu rawn hawtîr ang che, i hmangaih takzeta kan chhûngkaw hlimna i duhpui nih ngai chuan, leh a nu dinhmun i ngaihtuahpui a nih chuan rawn hawtîr ngei ang che. Chuan, engkim ka theihnghilh vek ang."



"Chutin ka-" A hmet tàwp hmak mai.



Engtin nge kei hian ka tirh haw theih tehlul ang? Min rawn luhchilh pawh a ni lo va, min rawn pan pawh a ni êm êm chuang lo. Kalna tùr a hriat loh vàngin leh a rilru hrehawmna min hrilh tùrin a rawn kal ve a ni mai.



Bâkah, ani thu thuin ka awm thei tawh lo ang, hei chu an inkâr a ni a, inrawlh theihna dàn ka nei hauh lo. Pafa inkâr a ni, pafa tak tak an la ni lo zui, chutah, ama(Muansanga) duh vàng rênga chhuak pawh ni lovin a hnawt chhuak a nia, duh leh a thil tih rah chu tuar ve rawh se.



Thinrim țûnin in ka thleng. Lehlamah Muansanga'n ka rilru a tibuai a, lehlamah lah a pain min tithinrim bawk, zàn ka mutnaahte chuan ka thaw leh hawk țhin.



Chaw ei khamah an chhuak leh ta diak a, kei erawh Muansanga hmuh tumin ka insiam  deuh a, call lova va țhàwn thut ka tum rilru deuh phawt a; mahse, ka ngaihtuah chiang leh a, call hmasak phawt a țha leh si ang.



Ka phone a rawn ri a, ka han en chuan amah a lo ni. Ka ngaihtuah lai takin a ni lehnghâl, a hahchhiau ve chhawk chhawk maithei a ni.



"I lo lêng dâwn em?"



"Ka rilru i rawn hria a ni lo maw? Nge  min enthla ru?"



Rûm deuh nghat hian,"Ka hre chiang che alawm, hun harsa ka tawh lai chuan min hnema ka bula awm tam i duh a, a dik tiraw?" a rawn ti a.



"Umm...i pass chiang lutuk!" tiin ka nui hak hak a.




Ka nu ka phone a, ka lêng lawk dâwn tih ka hrilh a, ka chhuak nghâl. A ei duh zâwng àwm kawng lakah ka lei nual bawk. Vawiin chu scooty ka hawl chhuak ve ta e.



Tunah hi chuan kalsan tumna rilru kha ka paih bo daih tawh. A kianga hun tam thei ang ber hmana hlim taka siam ka duh. Ka hmangaih em tih min zawh pawhin dik takin ka chhâng, ani pawhin min hmangaih tih ka hria alawm.



"Ka hmangaih che. Min hmangaih vàngin min kalsan a, kha kha chu a thlen nawn ka phal tawh ngai lo ang."



"Thleng nawn tawh lo tùrah ngai ang," ka ti ve a.



Ei tùr ka leisakte chu kan ei dùn a, ka ei loh chuan ei duh miau hek lo, ka duh aiin ka puar ta mah mah.



"Ka puar lutuk!"



A nui suk a, chutah, min en vang vangin ka dul lam chu a en thla leh a.



"I raipuar lai ka hmu châk ngawt mai che!" a ti a nih chu!



Ka hawi sawn vat. Raipuar lai kher hi chuh, ka ngaihtuah thui duh lo.



"Ka chhe lutuk, min hmuh châk duh suh," ka ti ta vat.



"Ka hmu châk tho che. I nu lian si a, i inhmeh dâwn tih ka hria a ni, i lang sexy thei ngawt ang," a ti leh a.



Chu lam chu sawipui ka duh lo. Rai lai sawi hi chuan Bawihtei ka pai lai leh  Victor-a ka hre chhuak zêl, hriat chhuah leh pawh hi ka duh tawh lo.



"Engtin nge i awm zêl ang le? Eng nge i rilrûk dàn?" tiin thu dang ka sawipui ta daih a.



"Ka mitthlà dàn che phei chu...ka sawi chhuak phal lo zâwk! I chhe lo thlâwt si a," a ti leh.



"Sawi tawh lo teh, ka thil zawh che chu min chhâng la?" ka ti leh a.



A ngawih vang vang hnuah chuan thutak zet hian,"Zon, min nei duh ang em?" a rawn ti ta thut mai!



Chu zawhna zet chu ka dawn ka la ring ngai lo, ani hnên ațang hian, tún hunah hlauh phei hi chuan. A rilru hah leh mangang inngaihtuah chiang hman lovin min zâwt a ni ngei ang.



"Inneih i duh maw!!? Tunah hian?"tiin makti rilru tak hian ka zâwt a.



"I duh ve lo em ni? Zon, min hmangaih tih kha i sawi sia?"



"Aw, ka sawi alawm."



"Chuti si?"



Țawng fîmkhur a ngaih bâkah ngun taka sawi tùr ngaihtuah a ngai.



"Muansang, inneihna hi chuti maia thutlûkna siam theih nghâl chi thil a ni hleinem. Ngun taka ngaihtuah a ngai alawm, kei phei chu i hriat tawh kha, vawi khat ka tisual tawh a-"



A kut chu a rawn phar duai avàngin ka țawng tàwp chawt.



"Ni lo, Zon, tun tut tutah ka ti lo. DIET-ah i training tih ka hria a, i training chhuah ka nghâk thei che alawm, i training lai tihbuai che ka duh miah lo. Kei pawh ka hna buaipuiah hian ngawrh lehzualin ka lo thawk sauh sauh ang a, sum tam tak ka lo thawh chhuah belh thei ngei ang. Kum khat leh a chanve chhûng chuan pawisa tam tak ka lo khâwl hman bawkin ka ring a, i chhûngte leh Mimawii leh nangma tân ngei zahpuiawm nih ka tum miah lo," a ti ta duah a.



A thil sawi chuan min tihlim veng veng thei. A chhan chu a thil sawi kalhmang ațang hi chuan awm mai mai a tum hauh lo tih a hriat theih mai si a, a hna buaipui chu eng pawh lo ni se a hlawhtlin theih ngei pawh ka ring nghâl thlap. Rin aiin a rilru chu a lo puitling roh ka tia, tuna harsatna a tawh angah phei hi chuan mi tam tak chu ni se chuan thil ţha lo tih phah nân leh rilru nâ chhâwk tùrin zû an in phah ngei ang chu; mahse, ani hi chu a ni hauh lo, a tum a ruh phah sauh zâwk a nih si hi.



Ka kuah a," Ka lâwm e. I rilru a hnualsuat zâwng leh a thim lam zâwnga thlîr lova a êng lam i thlìr avàngin," ka ti phawt a, chutah, sawi zawmin,"A êng zâwngin thlîr tlat zêl rawh aw, kei pawhin kalsan lo chein ka fuih zêl ang che, ka hmangaih che," ka ti sap sap a.



Hlim takin hun kan hmang a, a pa thil rawn sawi erawh kha chu ka sawi chhuak duh lo, kan hlimna tichhetu atân ka phal lo.



"Kum khat leh a chanve hnulam, i training zawh hnuah chuan ka duh dàn angin kan innei thei tawh ang tiraw?" a ti leh a.



"Nupui neih i duh tawh em ni?"



"Ka nupui tùr nangmah i nih phawt chuan," a lo ti awlsam êt a.



"Ka training chhuah hnuah chuan rilru dang i lo pu hman daih tawh si ang?" fiamthu deuha ka tih chuan," Kan hria ang chu," a lo ti charh a, chutah, sawi zawmin," Nasa takin hna ka lo thawk ang, hlawhtling ngei tùrin. I chhûngte hnênah ka châwm zo ngei che u tih lantîr ka duh dâwn bawk si a, inthlahrunna tel lova chhuang taka nupui atân ka dil theihna tùr chein leh an lo phal ngei theih nân nasa takin hna ka thawk ang," a ti leh a.



"A țha lutuk!  Chu hun chu ka nghâkhlel tawh kher mai," ka lo ti var a. A ni asin, hetiang țawngkam hi ka hriat ka ring ngai lo a ni.



A hma hun zawh ka tum lo, min hrilh duh a nih chuan min hrilh mai ang, a thil tum erawh hlawhtlin a ni tih ka hre tawh a, a taka a chêt chhuah ngei pawh ka ring a, ka ngaih a țha êm êm mai a ni.



"Kumin Krismas engtia awm nge i tum?" ka tih chuan,"Aizawlah ka phei ang a, hna ka thawk nghâl char char ang. Kum khat leh a chanve chiah ka nei tawh, alo thlàwna hman ral mai mai ka duh miah lo," a lo ti charh a.



"Engtikah nge phei i tum?" ka ti leh țâlh.



"Zanin chu in ina rawn lan ngei ka duh dâwn si a, naktûkah lamah ni mai rawh se. Duh huna motor rawn khalh chhuah tùr ka neih tawh dâwn loh avàng erawh chuan kan inhmu khât deuh tawh dáwn a ni," a ti a.



"A pawi lo, hrehawm a hmasak zet loh chuan nawmna tak tak a awm thei hleinem, kan inhmu khât deuh a nih pawhin kan inbe reng thei dâwn tho a," tiin ka lo chhâng vat a.



Zànah chuan a rawn kal ta ngei. Bawihtei a lo hlim leh over tawh, Tea erawh a chhuak hlauh thung a, lo che spy viau tùr a awm lo. Ka nu leh pate hnênah erawh thil awmzia a tlângpuia ka hrilh tawh avàngin țha takin an lo dawngsawng a, chu lam thil chu eng mah an zâwt lo.



Aizawla a phei hnuah erawh ka khua a har êm êm ringawt, Bobby-a lah an kohhran țhalai lamah a buai si a, a lo lêng hman tawh si lo. A reh vawng vawng maiin ka hria; mi tin mai chu Van lal lo piang tùr làwm tùrin an hmanhlel a, kei erawh ka rilruin Bethlehem lam a hawi thei meuh lo chu a ni.



Bawihtei thawmhnaw tùr pawh chu a pate'n an rawn thawn phei a, a mawi khawp mai. A ha tâwk chiah lo deuh nain a thâwl lam hret chu a pawi lo, la țhang zêl tùr a ni si a.



Zànah kàwn chei fangin a putea'n a hruai chhuak a, a rawn haw rawn phùl nasatzia chuh, mi dang chu kan lo ngawi țhap mai a ni. A puin a châng zeuhin a phùrna tizual turin zawhna a lo rawlh zauh zauh a, a titi char char a ni mai. A putea phone-a an thlalâk chu min enpui deuh chhên reng bawk a, nuam a ti ve ngang a ni.



Zàn mutnaah chuan," Âma, i lo kal ve lo va, a mawi asin," a ti țha leh a.



"I putea nèn in kal a, a tâwk reng alawm. Ka kal ang tlukah ka ngai, a sawi dàn ațangin ka mitthlain ka hmu thiam thei alawm," ka lo ti a.



"Mahse, thla i la ve si lo alawm," a ti leh a.



"Umm, kan dam chuan naktûk zàn lamah kan kal leh dâwn nia," ka tih chuan phûr zet hian min rawn kuah a.



"Yesssss...nuam leh dâwn lutuk! I phone-in thla kan la țeuh dâwn nia," a ti sauh sauh a.



Krismas-ah kan inkhâwm dial a, Bawihtei chuan kawr thar a ha bawk a, nuam a ti khawp mai. Thla ka lâksak țeuh mai, a pain a krismas kawr haa a thlalâk chu a hmuh duh avàngin Whatsapp-ah ka thawn a, a u Muana hmuh tùr erawh chuan kan nufain thla kan la thung.



Muansanga pa kha a reh ta vang vang, reh hlen se ka ti. An pafa inkâr, ni lo, an chhûngkaw inkâr țhat lohna ka ngaihtuah chuan hrehawm chu ka ti țhìn alawm, Muansanga ka khawngaih, a nu nèn. A nu chuan a hmangaih êm êm dâwn si a, a fapa neih chhun a han chân ta thut mai chu hrehawm a ti dâwn lutuk.



Muansanga nèn kan in-phone reng reng a, a nu chanchin chu ka zâwt hreh deuh țhìn a. Ani lahin a sawi chhuak ngai hauh si lo, a thawi feih pawhin a sawi ngai lo.



Gym kha a awm chilh a ni àwm e, room a siam a, zîm têin, a khawsak theih chuan a țha mai. Ka ngaihtuah ve si a, ka zâwt lo thei lo.



Jan 9-ah class kan țan leh. Uniform nèn ni tin mai kan institution kan pan leh ta. Kan result pawh achhuak har lutuk lo, ka pass ve chiang e. Kei hi țha taka ka tih a ngai, ka training chhûng min nghâk ve hrâm hrâm dâwn a ni si a, ningnêl deuha ka tih chuan a fuh lo khawp ang. Hna hmu ngei ngei tùr khawpa țhaa pass ka ngai.



Chhùn lamah hi chuan Muansanga hi ka phone khât. A chhan chu a buai thei lutuk, a hna thawh hi a sawi loh avangin ka zâwt duh bîk lo va, a thawkrim tawp a ni mai, zàn lamah ni se zàn dâr 7 hma chuan biak theih pawh a ni lo.



Mahse, hau pawh ni chiah lovin ka zilh. Nasa lutuka a thawh chuan a taksain a tlin lo ang a, a hrisèlnain a tuar ang tih ka hlau. Tihdam aiin invèn a țha si a.



"Min ngaihtuah miah suh, ka taksa chu hah deuh mah se ka rilru a hlim thung alawm," a ti tlat thung; mahse, ka awihsak lutuk lo. Hah deuhin a thawk a, a taksa a hah chuan a rilru pawh a hah tel dâwn tho tih ka hre tlat a ni. Mahni inah, chhûngte bulah a chêng tawh bawk si lo. Hna a thawh nasat hmel si a,ei leh in lam a ngaihthah leh si ang tih ka hlau.



"Ei tùr thlahthlam miah suh aw, a hun takah i ei thei lo a nih pawhin nghei chîng suh, taksa tân a țha lo a ni," tiin ka chah lawm lawm.



"Min ngaihtuah lutuk a nih kha; mahse, nuam ka ti viau bawk si, min ngaihtuah a ni tih hriat hi a nuam ka ti hliah hliah."



"Ei tùr mawlh chu aw," ka tih chuan,"Ka nghei ngai hleinem, ka ei ziah," a rawn ti leh a, chu thu chuan tlëm chuan ka ngaih a tițha deuh.



Sir thar kan nei a, la upat loh hmel zet mai hi a ni a, a chhiat loh reuh êm avàng chuan hmeichhe lam chuan an sawi sep sep țan. Kei pawhin chhia ka ti miah lo; mahse, pâwn lam lan dàn mai a nia, chhûngril lamah erawh hmangaih ka neih khiau tawh avàngin 'A chhe lo reuh' tihah chuan ka rilru a tàwp mai.



Bobby-a pawh zàn lamah a rawn lang khât ta deuh. A buai ve thei êm a ni, bâkah, ngaihzáwng lam ang hian ka hawi lêm lo a ni tih hi a hre chiang tawh a niang, a beidawng ve pawh a ni mahna. Ka phù loh tehlul nèn hian, bialnu țha tak hmu mawlh teh se, ka duhsak hlê a ni.



Tlai khat scooty-a ka inkhalh haw chu bazâr pheia Tea leh hmeichhe pakhat inzui ka hmu fuh ta hlauh mai. Muang deuh hlekin ka tlân a, anmahni tâwk zâwngin tlân mah ila kan inkâr a hlat deuh vàng leh mask ka vuah avàngin min hre kher lo ang, bâkah, Tea chuan min hmu lo hrim hrim.



Ka scooty chu a rem laiah ka húng a, enthlâk ka tum a ni. Bialnu a lo nei ru ve reng tawh a nih hlauh chuan a làwmawm dâwn êm asin, hla deuh tak ațang chuan ka zui ru deuh a, dàwra an luh tâkah chuan hmanhmawh angreng deuhin chu dàwr chu ka va pan a, restaurant a lo ni reng a!



Chuti a nih chuan an chàwl dùn tihna. Yes, a țha dâwn e. Hmeichhe hmel kha hmu chiang lutuk lo mah ila hmeichhia a chawlhpui tih hriat chu a làwmawm hrim hrim, ropui deuh mai a ni!


 In ka thlen veleh chuan ka pa bulah ka hrilh vat. Ani pawh chuan a lo bengkhawn khawp mai a, a hmel lan dàn min han zâwt chîk khawp mai ah! Mahse, ka hmuh chian lutuk loh avàng leh sîr lam deuh leh hnung lam ațang chauha hmu ka nih avàng chuan ka sawi fak ngam lo.



Zanriah ei laiin ka sawi chhuak ta.



"Tu nge restaurant-a i chawlhpui kha?" inti spy zet hian ka ti ve ta a.



Min rawn en duh miah lo.



"Țhiante ka nei ve alawm,"a lo ti duh chauh.



"Țhian hmeichhia maw?" ka lo ti leh vat.



"E, hmeichhia a kalpui ve elo!!? A va làwmawm tehlul êm!" ka nu chuan a lo ti chùl a.



"Ka țhian ka tih chu."



"Nia, hmeichhe țhian i nei țhìn tih ka lo hre miah lo," ka lo ti salh a.



"I țawng thei, nang pawhin țhian mipa naupang ni àwm lek rual i neih ve tho kha," a rawn ti lêt ve nghâl.



"Ka zêp ve lo," tiin lei ka chhuah khum a.



"Kei pawhin ka zêp loh chu."



Mahse, țhian mai chu an ni lo deuh a ni ngei mai, an inzui ngun ve ta riau mai, ka hmu dùn ta zauh zauh.



"Tu nge a hming?" hmun ka phiah lai chuan ka zâwt a.



"Madiki a nih kha," tiin țha deuhin min chhâng ve ta mai.



"Ka hmu ngun ta riau che uin ka hria," ka ti leh a.



"Min sâwm ngun si a, hnial ka hreh ve a. Bâkah, a bula awm a nuam reuh a," a ti ve leh mai.



"A țhat hlauh chu, chhuah miah suh," ka ti thla rawk a.



"Min duh tak tak teuh lo, min kàwm mai mai alawm, a fel êm a," a ti leh. Zanin chu kan titi dùn thei riau mai, kan inhnial miah lo.



"I bawh zui thiam a ngai dâwn anih chu."



Ner deuh sak hian," Lêngah min sâwm ziah a, ka hnial ziah thung; mahse, zanin chu ka va lêng ve dâwn em maw ni ka ti a," a ti sap a.



"E, țha lutuk! Lêng ngei ngei rawh," ka lo ti var.



Muansanga nèn kan inbiak chuan ka hrilh ve a, ani lah chuan," A țhat hlauh chu, nei thuai teh se, kan tih hun tùrte hi min tibuai rêu rêu palh ang. Bâkah, nang pawhin mo in neih chuan lungmuang takin in i chhuahsan thei ang a," a lo ti ve a.



"Bialnu a nei ngai lo hi kan buai țhìn alawm, a ngaihsak ngai lo va; mahse, tuna mi hi chu a ngaihsak deuh chuan ka hria, zanin pawh a lêng tlat," ka ti leh a.



"Nei tùrin lo tur țàng țáng rawh. Kumina an inneih hman loh phei chuan nakkum lamah chuan keiniin tih kan tum si a," thutak zeta a tih chuan ka nui sak tho.



Nakkum. Nakkum kum chanve hnu lamah inneih kan tum ve a nih kha, ka training zo tawh ang. Nakkum a lo ni leh ringawt tawh, kan sawi dun lai kha chuan a la rei hmel viau a nih kha.



"Neihtîr i tum hma leh si e!" ka tih chuan,"Nakkum lamah chuan nang i chhuak dâwn si a, i hmun ruak luah tùr a ngaihtuah thuai loh chuan i nu leh pate an buai lutuk dâwn asin, kumina nei ngei tùrin lo thlêm hrâm hrâm rawh," a ti leh a.



"Aw le, ka lo tum ang. E, i nute chanchin i hria em? A dam țha em?" tiin a nu chanchin chu ka zâwt ta râwih a.



"Țha  ang."



"I nu chu i haw ve êm lo ang chu tiraw?"



A ngawi ta vang vang.





*ENGA MAH HMAIN MI RINGHLEL NGHÂL RINGAWT SUH, MI RINAWM LO ZIA A NI NGAI E*