☆LUHLULPA☆- 33 & 34 By Dingdi Pachuau

☆LUHLULPA☆ - 33 By Dingdi Pachuau




Dam chuan hun chu a ral ve zung zung mai. Muansanga nèn hmaichhana kan inhmu khât lutuk erawh hrehawm ka ti thei hle, class kal ka ngai a, aniin hna a thawh a ngai bawk a, zànah inbe țhìn mah ila ka ngai êm êm, ka hmu châk telh telh zâwkin ka hria.



Mahse, hêng hi chu tawrh tùr a nia, kan hmalam hun atân hna kan thawh a ngai bawk si a. Tuna nawmna tùr kan ngaihtuah ringawt chuan nakinah kan hrehawmna nikhua a sei mai mai a ni, a bulah phei chuan ka sawi chhuak lo hrim hrim. Amah fuihtu tùr zâwk ka ni si a, a zuau zâwk anga ka awm hlauh chuan a chhe vek a ni mai.



Tea pawh hma a sâwn ve viau. Zànah pawh a lêng ta zauh zauh, bâkah, dàwr an chàwl tùr hi ka hmu ve deuh ziah bawk. A bialnu hmel tak chu ka hmu chiang ve tawh a, a chhe vak lo, hmel hrim hrimah phei chuan Tea'n a phû lo daih zâwk, an kum pawh a inrual khawpin ka ring.



Ka nuten hmuh ve an châk avàngin ina lo lêng tùra sâwm turin kan ti a, sunday tlaiah a rawn hruai ve mai bawk a. Kan chhûngkua kan lo awm țhap a, a rawn lût chu a zak ve tih ka hre mai; mahse, a zak rei bîk lo ve.



Keimah ang chiaha nuthlawi a lo ni. A nu leh pate chu ka pain a lo hria a, an chanchin a zawh luam tâk nghe nghe kha. A țawng a zaidam reuh a, chu chuan a tinù reuh khawp mai. Kan inang lêm lo khawp chuan ka hria, ka zaidam lo nasa mai si.



Chaw ei ve nghâl tur chuan kan sâwm a; mahse, a ei lo. Chaw ei laiin a chanchin kan sawi zui miah lo va, chu chuan Tea ngaih a tițha lo niin.



"Eng nge a chanchin kimchangte min zâwt dâwn lo em ni? Rilru in tinuam  lo a nia," a rawn ti chhuak hlawl mai.



"A, sawi zui tùr a awm em ni? Kha, a țha lutuk alawm," ka nu chuan a lo ti a.



"Ni lo, ngaihtuah in nei alawm, nuthlawi a nia, chuvàng ringawt pawh chuan-" a tih lai chuan ka lo pawt chat vat.



"Nuthlawi a nih vàngin hnualsuat tùr tih a awm hleinem. A fela a rilru a țha a nih phawt chuan, leh a hmangaih che a nih chuan," ka lo ti a.



Ka pa pawh chuan," Ni e, in inhmangaih tawn a hlu ber a ni. Kha, a zaidam hmel reuh hle lehnghâl a," a lo ti ve charh a.



"A nuthlawi dànte min zâwt ula?"



Ka nu chuan,"I va ho roh tak! Mi nunhlui lo sawi chhuah ve chhênte chu țhat pawh a țha hleinem. A duh vànga nuthlawi a ni bîk nâng, bâkah, nuthlawi a ni tih hre saa duh i ni lo em ni?" a lo ti a.



"Hre sa tho e. An fa boral hnu lawkah an ințhen a, a pasal hlui chuan nupui dang neiin fa pawh a nei leh tawh," Tea chuan a lo ti a.



"Pathianin a ruatsak ni lo hi chu inneiin ințhen tum lo pawh ni se buaina eng emaw tak hian a pawt țhen ziah a nia, chuvàng erawh chuan Pathian ruatsak a nih loh hlaua nupui pasal neih hreh tlat erawh tih loh tawp tùr, nupui pasal hi chu neih tùr, inneih tawh erawh chuan ințhen tum lo thung ila," ka pa chuan a lo ti leh charh charh a.



"In sawi thui êm mai a," Tea a lo tih chuan,"Thui ang chu, nupui neih i hun tawh alawm. Ka nu leh pa țhat lai hian fa pawh nei vat vat rawh, kan chawi lenpui thei dâwn che a," ka lo ti vat a.



"Bawihtei a awm reng alawm," a lo tih leh chuan," Ani lo tú dang mawng a ben pawh kan châk tawh alawm," ka nu chuan a lo ti ve a.



Țhutna ațanga thawh pah chuan," In sawi chhuak duh lo vei a, in sawi tui leh hle si," a ti nang nang a.



"Kan lawmpui che alawm."



*******



September thlaah ka pa a nikhua lo thut mai a, a rang a rangin Aizawlah phurh phei a ni. Kei leh Bawihtei erawh class kal kan ngaih vàngin kan  phei ve thei lo, rilru hrehawm deuhin inah kan lo awm.



Țhenrual leh țhenawm hnaite an lo lêng ve nual a, Bobby-a pawh a rawn kal. An rawn kal hi chuan tlêm chuan ka ngaih a ngam deuh, min thlamuan reng bawk a.



Muansanga pawh a thuphungin ka hrilh ve tho; mahse, ka sawi chiang lo, inentîr tur ang deuhin ka hrilh chauh. A chhan chu buai leh hman lo chung chungin lo kan phêt a tum ang tih ka hlau, tunah a rilru zawng zawngin tihtak zetin hna a thawk a nia, chu chu tihbuai ka duh lo a ni, buai rilru hman nasat laia thil danga buaitîr leh chu ka duh lo a ni.



Mahse, a hman veleh a lo va tlawh ve niin, ka nuin min rawn hrilh, ani chuan min hrilh hauh lo. Ei tùr eng eng emaw a va ken nual bawk a ni àwm e.



Ka pa pawh a zia viau tawh e, a lung lam dik loh vàng a lo nia; mahse, a natna dik tak an va hriat phah a, tlêma tlêmah an va tlai țêp niin, Aizawla phurh phei nghâl a ni chuan a nunna a chhan ta a ni.



Kâr hnih deuhthaw hnuah an rawn haw thei ta a, damdawi tam tak nèn an rawn haw rup mai. Dam chhûnga ei a ngai tawh dâwn a ni; mahse, damna a nih phawt chuan a pawi lo, dam hi alawm hlu ber le.



Muansanga pawhin a rawn ngaihtuah ve khawp mai a, min rawn zâwt ve reng mai. Làwmthu ka'n hrilh leh lâwp lâwp bawk a, amah lah chuan," Mâkpa interview lai ka ni si a," a lo ti duh chauh.



Tea pawhin min fiam zuk zuk mai.



"Interview lai a ni bawk a, a thawk țha khawp mai; mahse, mi fel tak chu a ni ta thoin ka hria. A la naupan tehlul nèn, mâkpa kan nei fel phian dâwn e," a ti zuk zuk a.



"A làwmawm a nih chu,"ka tihsak duh chauh.



"Mahse, a naupang ka ti tho tho," a la ti leh țâlh.



"Naupang mah se nang aiin a rilru a puitling zâwk," ka'n tih khauh kha.




"Khatin min ti vak vak suh aw, ka hrem mai ang che u," a ti bul bul a.



"Han ti vaih teh-"



"Haha, kha maw, i hlauh êm kha. Ani aiin nupui ka nei hma zâwk ang, kumin kum tàwp a nih loh chuan nakkumah ka neihsan dâwn che u," a ti leh a.



"Kuminah nei ang che, en ta che, ka pa in lama enkawltu kan mamawh êm hi," nakkum lama inneih a sawimawi ang tih hlau tak chuan ka ti a.



"Ka nu a awm alawm."



"A nih, dàwr nghahpui tùr che?" ka ti leh a.



"Nangmah. I awm chhûng chuan ka zám hleinem."



Muansanga hian an in a chhuahsan ațang khân social media lam hi a ngaihven ta lo a niang, IG lamah pawh a reh vang vang mai. WhatsApp lamah ni se a online ngai lo, min biak duh chuan phone call ngeiin min rawn bia. Hun a nei thlâwt lo a niang, a pawi pawh ka ti teh chiam chuang lo, Angel-i erawh chuan a la beisei reng tho tih ka hria, a thil post ațangin a hriat vek.



Muansanga nèn kan inbiak pawhin ka thîk der țhìn, ani erawh a nui mai țhìn thung. An inkârah eng mah a awm lo tih a sawi ziah, ka ringhlel chuang lo; mahse, kan inhmu khât lutuk a, rilru dang min putsan ang tih chu ka hlau ve țhìn tho, ani aiin ka upa nasa mai si a.



November thlaa nupui neih tum a nia; mahse, keiin ka exam zawh lam nghâk hrâm tùra ka tih vàngin December thla țantìr lamah Tea chuan nupui a nei ta. A hma daihin Muansanga pawh ka hrilh tawh a, a hman hrâm chuan lo phei a tum ve thu a sawi a; mahse, a buai leh pek a, a lo phei hman ta lo. Inneih thil pêk erawh a rawn thawn hrâm, ka rilru hlim viau mah se a hlim kim lo. Bawihtei erawh a hlim khawp mai, a thawmhnaw tùr a thar vekin kan țhuitír bawk sia, nuam a ti lutuk ringawt.



Puii chu a fel reuh khawp mai. Ka nu a pension daih tawh avàngin dàwr a nghâk țhìn si a, in lamah ka pa awm pahin in a lo tifel mai a, a chêt fel bâkah a zaidam a, ka pa duh chi tak a ni. Krismas pawh chu chhûngkaw member thar nèn kan hmangho ta a, Bawihtei chuan a pite Puii chu a zui det det reng mai.



Krismas leh kum thar inkârah Muansanga chu a rawn phei zawk. A hun áwl neih chhun a nih vàngin a rawn phei hrâm hrâm, kan ina innghat tùra ka tih chuan a duh tlat lo," A la hun lo," a ti deuh tlat.



"Hna i thawk nasa bawk a, i chêr deuh a nih kha," a hmel en vang vang pah chuan ka ti a.



"Thawh nasat a ngai si alawm, in nufaa nuam taka awmtîr theih che u ka duh si a," a ti a, a khabe chu a tuai hoh hoh a.



"Kan pahnihin kan thawk dùn ang a, nuam deuhin kan awm thei lutuk ang, thawk vak vak tawh suh," ka lo ti a.



"Ka zo țêp tawh, rei lo tê bâk a ngai tawh lo. Țha deuhin nang pawh i training chhuak ang a, chumi hnu lamah chuan..." a ti a, a sawi zawm duh ta lo va.



"I hna thawh dik tak hi min hrilh duh em?" tiin ka zâwt a.



"Ni lo ve, i hre thuai mai ang," a ti deuh tlat. A sawi duh loh chuan a pawi lo, nakinah ka hriat dâwn tho chu maw.



"Ti ta daih ila, i nute i be ngai em? A nih loh pawhin, a rawn be țhìn che em?" tiin ka rilrua awm reng țhìn, a hnêna ka sawi chhuah vak ngai si loh chu ka sawi chhuak ta nge nge a.



A ngawih vang vang hnuah chuan,"Vawi hnih min rawn bia a, vawi khat ka awmnaah a rawn kal bawk," a ti ta sup a.



"A ni maw? Eng nge a rawn tih min hrilh duh em?" ka ti leh a.



"Ka awmna rawn hmuh ve hrim hrim  a duh a."



A țha tho tho e. A nu chuan a fapa chu a ngai ngawt ang chu, an inkârah intih thiam lohna leh inhauhna aawm mang si lo va, a nu tân chuan thil hrehawm tak tùr chu a ni ngei ang.



"A nih, i nu chu i ngai ve țhin em? Hmm?? I ngai ve chiang a ni maw?" tiin ka nui a.



"Kum khati chen ka nu min enkawltu a ni a, min hmangaih êm êm bawk si a, ka ngai lo ti a ka sawi chuan dâwt ka sawi a niang," a ti ve a.



"A nih, a lo kal chuan țha takin i lo bia em?" ka tih leh chuan,"Aw, ka haw hleinem, huatna chhan tùr ka nei lo bawk a," a lo ti a.



"Țha lutuk! I ti țha lutuk, i nu a ni a, a hmangaihin a ngai ngawih ngawih ang che tih ka hria a ni," ka ti a.



Kum thar hnua class kan kal leh chuan class-ah pawh kan awm țha hman tawh lo. School hrang hrangah kan chhuak a, practice teaching kan nei a, lesson plan chi tam tak kan siam a, ka buai thei khawp mai. In lamah pawh ka buai, Bawihtei pawh ka buaipui hman mang lo, Puii kan lo nei hman hi ka tân malsàwmna a ni ringawt, aniin a lo buaipui țhìn.



Bobby-a pawhin bialnu thar a nei ve ta. A thawhpuinu a ni nghe nghe, ka lawmpui khawp mai, a milpui leh a hna lama a thawhpui ngei a han hmu thei chu ka làwmpui zual. Chu nu chuan a lo beisei ve ngar ngar țhìn a ni àwm e, beidawng lova a lo nghah rengna chuan hlawhtlinna a rawn hring chhuak ta a ni.



"Ka lawmpui lutuk che," ka tih chuan," Ka lâwm e. Nang hi chu ka chàn chhuah theih i nih hmel si loh a, ka tân Pathian ruat i nih ka ring thei lo bawk, a chhan chu mi dang hmangaih i nei tlat a, chu i hmangaih tân chuan i rinawm tlat si a, chance ka nei ve tawh lo tlat a ni," a lo ti duah a.



"Nia, a dik alawm," ka ti ve mai. Dik miau hek.



"Pasal atân nei ngei ang che, Muansanga hi mipa vànnei tak a ni, ka lawmpui khawp mai. Insawi rem thuai ula, nupa hlim tak leh awhawm tak in ni ngei ang," a ti leh a.



A thil sawi avàng chuan ka nui sak.



May thla a rawn inher chhuah meuh chuan Puii pawh a ruak ta lo. Zîng lamah a uak a uak ve ta mai a, a ruak lo tih kan hriat chuan kan hlim kher mai. Tea phei chu a han lâwm fâl mai mai khawp a, țûl fêtah lo chuan in a chhuahsan ngai meuh lo. Puii chu a awm heuh heuh reng mai, a chêt pawh a phal lo, tlai lamah phei chuan a eirawng bàwl kan ei kan ei ta mai.



Zan khat chu Muansanga'n min rawn phone chuan,"Ka pain ina haw leh tùrin min ti a," a rawn ti a.



Chhe hiau!!



"Chuan..?" ka ti ringawt.



"No way! Ka thei ngai lo ang," a ti vut mai.



"A inchhîr tal tawh alawm,"ka lo ti a.



"Ka rilru hian ina lêt leh lam a la ngaihtuah ngai lo, ka plan-ah pawh a tel chhin hek lo," a ti leh a.



"Um, nia, i tih dàn dàn le. Eng thu tlûkna pawh siam la, kei chuan ka pawmpui zêl ang che," ka ti a.



"Hei vàng hian alawm ka hmangaih bur che ni. Chuan,thla khat chuang hlek chiah hun i nei tawh a nia, i nulât chhûng hun a nia ka tih ni," a rawn tih chuan calendar chu ka melh vat a.



Ni dâwn tak e. Hun a lo tam tawh hauh lo, thla lehah kan exam ang a, ka training ka zo tawh ang.



"Chuti, âm deuhin nulât hun chhûng hmang tawh teh ang, naktûk ațang chuan parh hârh tawh mai ang aw," ka tih chuan a rawn chek hluk mai.



"Mipa melh hauh suh ang che," thu pe âw zet hian a rawn ti nghâl vut.



"A, ka melh leh melh loh pawh min rawn hmu thei dâwn hauh lo, ka hun pum i chang teuh tawh si a, mi dang hun ka pêk ve rih-"



"Ti hauh suh!" a rawn ti bung nghut mai. Chutah, a thaw hawk ri chu ka hre zui nghâl a, ka nuih a tiza roh tak tak!



"Hey, ka ti fiam mai mai a nih kha," tiin ka nui hak hak a.



"Fiamthu pawhin sawi tawh miah suh," a rawn ti leh.



"Melh tùr pawh an awm lo, bâkah, ka melh peih lo, min melh peih pawh an awm lo," a rilru tihpangngai tum chuan ka ti leh a.



"In uniform i hâka i mawza leh i pawnfèn inkâra i vun lo langte kha tu mah entîr miah suh ang che, an lo en ve pawh ka phal lo a nia, in pawnfèn kha chu aw, a chhîng deuh mah mah chu a ni," a rawn ti leh ta.



A va hahthlâk mai mai e aw!!



"Ka ha lo thei țêp tawh," ka ti ta ringawt.



"Hmm, paih bo daih ka chák tawh a nia," a la rawn ti!



"Exam zawh veleh kan chhuat nawh nân ka lo hmang nghâl ang, a ni loh pawhin miin ui êk an hrûk nân ka pe daih ang," ka tih chuan a nui ve ta hawk mai.



Puii pawh a zia chho ve ta deuh e. A nawmsam loh kha a zia ve tawh a, thil pawh a ei chho thei ta viau, Tea'n a ngaihtuah nasa a, an fa tur a pai mêk bawk a, a àwm viau. Bawihtei pawhin thil a hre thiam ve viau, nau a nei dâwn tih a hre thiam ve tawh, a hlim thei khawp mai. A țhiante hnênah pawh a lo uang thei nasa, an miss-te bulah pawh a lo sawi!



Ka pa pawh a țha zêl, dawrah kal kan phal lo nain kan in bul leh țhenawm hnaiah chuan a kal kual a kal kual ve tawh a, ina awm tlawk tlawk chu a ti thei thlâwt lo. A lêng chhuak chu a tân pawh a țha, exer a nih ve miau avàngin kan khap duh lo, damdawi a ei țha bawk a, a changkâng chho viau pawh hi a àwm viau a ni.



Exam zawh zànah chuan," Lo inring ràn tawh ang che, a hun a hnai tawh si a," a rawn ti.



"Ka làwmthu tak a niang chu," nui chung hian ka ti a.



A inbual zo chauh a niang, kawr pawh a la ha lo, a taksa lang lah chu engah mah a ngai lo a niang, kawr hâk pawh a tum tlat lo.



"Kawr ha rawh," ka tih chuan," Min ît a ni maw?" a rawn ti!!



"Zomuansang..!! ka ti ta nghek a. Bawihtei room-ah a rawn tlân lût nghâl, ka lo au ring lutuk a ni chiang, ka inthiam lo nghâl zat.



"I zak leh si a nih kha, kha, i sen țâwn țâwn alawm, i tâ vek tùr a nih hi," a la rawn ti deuh deuh! Ka hmuh chian theih tùrin a rawn awm hnai lehnghâl.



"Au Muan...??"



"Mimawi, i lo awm ve reng a ni maw?" tiin a pil zauh a, a rawn lan chuan T-shirt dum a lo ha tawh!



"Au Muan, Zomuansanga tih kha i hming a ni maw? Au Muana tih kha i hming a maw ka ti char char," a tih chuan a rawn nui hawk hawk, kei pawh chuti tho.








*THIL ȚANGKAI LO LEH ÂTTHLÂK TAKAH I BULA MI NÈN IN INHNIAL FO CHUAN MI MÂWL PAHNIH IN AWM DÙN TIHNA, INHNIALNA ȚANGKAI LO BÀNSAN RAWH*






☆LUHLULPA☆ - 34 By Dingdi Pachuau




Kan inneih ni chuan ka rin ai daihin min lawmpuitu an tam mai ka ti. Aizawl lamah inneih buatsaih àwm kan nih tehlul nèn, Muansanga'n a duh tlat lo. A rilrua thil awm zawng zawng hre vek lo mah ila ka hriat chinah pawh hian Aizawl lama inneihna buatsaih a duh loh chhan chu ka hre ve ruak tho. Keini tân chuan Lunglei lamah chhûngte kan ngah a, kan duh daih zâwk nghe nghe. Mite pawhin mak an ti maithei, an sawi zui sep sep maithei bawk. Nia, lo sawi pawh ni se a àwm tho, thil awmzia a zawng zawngin an hre tlat si lo va.



Lalteite chhûng, Nutei pasal leh Bobby-ate țhian dùn chu ka ngaih pawimawhte an ni a, an rawn kim țhap. Nutei ka hre chhuak vawng vawng, awm ve se chuan nuam a ti dâwn si a, a phusa nasa leh ngawt ang.



Muansanga pawh a țhenrual țhate'n  an rawn țawiawm ve viau. Ka hriat ngai an ni lêm lo hlawm a, min hrilh nual nain ka chhinchhiah hlei thei hlawm lo.



Ropui takin ti thei lo mah ila, kan hlim a, a tâwk viau. Ka chhûngte pawhin Muansanga dinhmun chu hriat thiampui takin a duh dàn ang chu zah takin an lo pawmpui mai. Zaninah hetah kan riak ang a, naktûk lamah chuan Aizawl lamah kan phei ve a niang chu, Bawihtei pawh hruai tel nghâl tum kan ni a; mahse, class kal a ngaih bâkah a piin a phal rih lo deuh bawk a, a lo phei tel ve rih lo phawt ang.



Min lawmpuitute leh chhúngkhat hnaite an awm rei deuh vàngin leh naktûk maia Aizawl phei nghâl kan tum avàngin kan mu tlai khawp mai. Mimawii a pite bulah a mu a, Bawihtei tel lovin ka mu khât si a, a ni lo hûihin ka hre mai.



"I lung a lêng ang em?" tia min zawh chuan," Engati?"ka ti hâw a.



"Mimawii a tel ve thei dâwn ta si lo va."



"Ka ngai ve tho ang chu; mahse, nang i awm tawh thung dâwn a," ka tih chuan lâwm tih hriat tak hian a nui suk a.



"Nia, lunglèn hre hman lo lêka duat che ka tum ang," a lo ti sup a.



"Kan phei hnuah i buai viau ang em? I buai viau-" ka hmui a rawn tawk avàng chuan ka sawi zawm thei lo va.



"Buai dâwn náng, ka buaina tùr ber nang lah ka bulah i awm tawh dâwn a," a ti sar sar a.



Ka nui sak a, a sam chùlsak pah chuan,"A nih leh, eng thil nge i thawh chiah hi min hrilh tawh la?" ka ti ve ta a.



"Kan phei hunah i hre mai ang," a lo ti thung.



Kan ngawih deuh vang vang hnuah chuan," Vawiin khân i chhûngte ka ngaihtuahnaah an awm reng a," ka ti sap a, a bengkâwm chu ka tuai nak nak reng a.



"Ngaihtuah tawh suh," a lo ti bùl hmuk thung. Ka sawi chhunzawm ta lo chiang, a thinlungah chuan hmun an luah ve reng tho chu ka ring. A chhan chu kum kha leh chen a lo chènpuite leh a chhûngte an ni a, hun làwmawm ber, a nupui neih ni chuan a ngaihtuah lo thei bík lo tawp ang. A pa chu thuhran lo ni se, a nu mawlh mai ka khawngaih, ani chuan a fapa chu en hranna a nei hauh lo tih a chiang hle si, a thinlung zawng zawngin a fapa atân a pawm thlap a nih kha.



Zîngah ka harh hmain a lo harh tawh a, tho bîk lo chuan hnai zetah min lo en kar mai.



A âwma ka hmai nawr châk châk pah chuan," Morning, i harh daih tawh a ni maw?" ka ti a, ka kuah pah bawk a.



"I muhìl hmel kha thlìr nuam ka ti a, bâkah, ka nupui hmel hi ka en kham thei lo a ni," a lo ti thûm chhar mai.



"Chu thu chu kum 10 ral hnua sawi atân khêk rawh," nui chung hian ka ti a.



"Ka la sawi leh ang, kum 10 hnuah," a ti charh a, chutah,"Mimawii lo phei tel lo tùr chu aw...!!" a ti leh vang vang a.



"A school kal hi alawm, a laklawh êm a."



Kan thawh hnuah kan insiam leh nghâl mai. Chaw ei kham veleh chhuah kan duh dâwn si a, nakina buai chûk ai chuan insiam peih diam hi a țha zâwk.



Kan in leh ka chhûngte, a bîk takin ka fanu ka kalsan tùr chu ka lung a chhe deuh tlat a nih chu. Ani chu tel ve dâwn se chuan ka lung a chhiain ka ring lo. Ka  kalsan ngai lo ve êm a, bâkah, tunah chuan pasal nei ka ni leh tawh si a, zin lawka duh duh huna haw ang kha ka ni tawh dâwn lo a ni. Victor-a nèn kan inneih kha chuan hetiang hi ka ngaihtuah pha miah lo a nih kha, ka lung lah a lêng hran hek lo.



Bawihtei chuan a kut chu a vai lap lap a, a pite Puii, dul puar lang ve deuh àl tawh chuan a kuah a, keini motor-ah kan lût mêk bawk. Bawihtei ka ngai lâwk sa, ka mittui a rawn hnai a, en pawh ka en ngam tawh lo.



"I țap dâwnin ka hria."



Ka mittui chu ka khap per ta chhak mai. Ka pasal a nia, ka zak duh bík lo.



Min rawn kuahin," Engah nge i lungngaih mai mai? In inhmu leh thuai dâwn alawm," tiin min hnèm ve a.



Aizawl kan thlen chuan a la hma riau. A gym lam kan pan ka ring a nia, a chhan chu khatah khân a chêng a nih kha; mahse, a ni miah lo.



Zarkawt kan thleng a, chanmari kan thleng leh a, chuta țangin Chaltlang lam kan pan leh. Makti ru viau mah ila eng mah ka zâwt rih lo, ani lah a ngawi tlat bawk si.



Kan ding ta. Ka hawi kual a, hei chu Chanmari huam chin a la ni, hetah hian in a lo luah daih a nih hi.



"Engtik ațangin nge helai hi i luah a?" ka ti hâ a.



"Nupui neih tawh chuan in thar a ngai alawm. Gym kha chu parawl chènna chauh a nih kha," a lo ti a.



Kan bungrua chu motor ațang chuan inah chuan kan thiar lût ta vek a, lo țhu mai mai tùrin min ti naa, ka duh bîk lo. A in luahah lah chuan bungrua a lo awm vek tawh lehnghâl a, Bawihtei nèn kan in luaha kan bungruate kha ka ken phei àm ve tehlul nèn, a lo țangkai fahran lo tawp mai.



"A va țangkai tampui lo ve leh!" ka tih chuan," Ken a ngai lo ka tih khân i tum tlat sia, ka hnial duh lo che a nih kha," a lo ti a.



"Gym-ah khân i la chêng reng emaw ka tih vàng a nia," ka ti nang nang a.



"Nupui meuh ka neih ngam tawhte chuan..." a lo ti vat a, chutah,"Kha kha chu ka tidanglam leh tawh, bâkah, nang leh Mimawii nèn kan pathum tân chuan a tê lutuk alawm, keimah chauh pawhin ka chêp a nia," a lo ti leh a.



A in luah chu a zau phian. A nuam bawk, a chhan chu tukverh a tam avàngin a êng a, ni êng leh boruak a lût țha ang tih a hriat theih bawk.



"A zau nuam khawp mai."



Ka kutah rawn chelhin kan nupa room tùrah chuan min hruai a, khum zau fahran mai chuan ka mit a la nghâl, mut a nuam dâwn lutuk!



"Nizàn lamah țha takin ka muttîr tawh che a, zanin chu ka muttîr tawh dâwn miah lo che a nia," ka beng bulah chuan a ti sar sar a.



Kan inbual hmain ka chhûngte a phone phawt a, tluang taka kan thlen thute hrilhin Bawihtei rei lo tê a be leh. Kan inbual a, chumi hnuah rawng kan bâwl dùn leh a, kawng laka chawhmeh kan leite chu a tharlâm bawk a, a tui ngawt ang. Kan siam nual, ril a lo țâm ve deuh tawh  bawk nèn, kan siam zawh veleh kan ei nghâl a ni mai.



"Ei țeuh rawh, chakna i mamawh nasa dâwn a nia," a ti sup a.



"Kei ai fêin i mamawh zâwk!"



"Ka ei tam rêng alawm."



Kan ei khamah min tihfelpui leh a, kan thil ei pai tawih awlsam nân theirah kan ei leh sak bawk. TV en tùr awm tho mah se kan en peih lo. Room lamah lûtin kan thawmhnaw țhenkhat suitcase ațangin ka la chhuak a, ka khai țha hlawm a.



"Dah teh!"



"A chuar chhe zo mai ang," ka lo ti thung a.



Ka bulah rawn kal hnaiin,"Naktûk lama tihah khêk mai la?" a rawn ti leh a.



"Ka rei lo ang, lo mu zâl rih la?"



"I tel lo chuan ni lo ve. Dah mai teh," tiin thawmhnaw khai tùr ka la leh tùr chu min rawn pawm kâng nawlh mai.



"Ka rit a nia, min thlah teh!" ka ti chùl a.



"Ka zawh khawp che hi maw!" tiin khum lam chu min panpui a, khum dûp nuam zau zetah chuan kan tlu dùn ta rual a.



"A chhia ang e!"



A nui huk. "Chhe mai mai theiin ka siamtîr i ring em ni? Lawițhat zàn kan hmanna tùr khum chu a nghet țha hle ang tih ring mai ta che," ti supin min rawn bawhthuah nghâl zat a.



"Lawițhat zàn pawh a nih tawh loh hi," ka tih chuan," Mitmei vèn tùr leh hlauhthàwn tùr a awm tawh lo bawk a," a ti leh a.



Ka nui ta hak. Nizàn khán mitmei a lo vêng a nih chiah chu, a chau ve pângngai emaw ka ti a...



"Khawngaihthlâk roh che chuan!"



"Tunah chuan nupa kan ni tawh bawk a, eng mahin min dâl thei tawh lo, ka hun a ințan ta chiah," tiin rawn kûn hniam zatin ka hmuiah chuan a rawn fâwp ta nghâl a.



Ni e, Pathian leh kohhran hmaah  nupa kan nihna kan nemnghet tawh a, tunah chuan nupa awm dàn leh khawsakin kan khawsa thei tawh, eng mahin min dâl tawh lo.



A hnu daih, mut tak tak dâwnah chuan," Bathroom-ah kal lawk ka duh," min kuah reng avàng chuan ka ti sap a.



"Kei pawh," chu a ti ve nain chêt sawn pawh a tum chuang lo.



"Ha nawha hmai phih leh pawh ka duh a."



"Kei pawh." A chechàng chuang lo.



"Hawh, tho ila? Min kuah bet tlat sia, min thlah phawt loh chuan ka tho thei si lo," ka ti a.



"Thlah che ka phal hleinem."



A bânah chuan ka fawhsak zauh a, chutah,"Tho rawh le," tiin min kuahna bân chu ka dah kiang a. Peih loh hmel zet chuan a tho a, thawmhnaw pawh inbel tum chuang lo chuan a ding a.



Kei erawh chuan puan nia ka hriat ka hmuh hmasak ber ka ban vat a, puan pângngai ni lovin shawl tê deuh hi a lo ni a; mahse, min khuh kim ve thei tho mai.



"I zak a ni maw?"



Ka chhâng lo, ka nui ringawt.



Zînglama ka zun chhuakin min tihharh chuan ruah a lo súr cherh cherh niin, ka awm dàn chu ka hre thiam lo dâwn dâwn a; mahse, ka taksa nghèng chiala mu leh min kuahtu bân ka tawk fuh chuan ka pasal Muansanga nèn kan in tharah kan mu a ni tih ka hre chhuak nghâl. Ani chu a la thaw sâk sâk mai, a mutui hle a nih dâwn hi. Thâwm dìm takin tihharh hlau takin ka tho țhem țhem a, khum bula ka phone dah chu ka en vat, dâr 3:47 chiah a ni. Ka zung a, ka va mut leh chuan ani pawh a lo harh ve a; mahse, rei kan meng lo, ruah sùr chuan min àwi muhìl leh ta thuai.



A tûk nilêng deuhthawin ruah a tla sep sep reng mai, kan inneih ni kha a lo fuh chiah a nih hi, nilêng khân ruah a sûr lo va, kan vànnei tak tak a ni.



Kan nupa chuan kan awm ve rak rak a, pâwn chhuah a peihawm loh avàngin thil țûl tih tùr ka dap a, ani lahin mei ang maiin min zui zêl a, a hman châng apiangin min fawh a rawn tum thlazen bawk.



"Eng nge, i ui deuh a ni maw? Ka tâ i nih vek tawh kha."



"Thil tih buai lai takin lo tum zen lo la?" ka tih chuan," I buai lai tak khân fawh che ka duh si alawm," a lo ti thung a.



"Ka thil tih pawh a sâwt theih loh hi."



"A pawi lo, hun a la tam alawm."



A ngaihna a awm rih lo ve. Nia, hun a la tam ti tawh mai ang, min la nei thar ve rih a, a tâ ka ni tawh tlat.



Tukverh dârthlalang chhan ațang chuan pâwn lama ruah súr chu ka thlîr a, ka hnung lam ațangin min rawn kuah a.



"I thin a rim em ni?"



"Rim lo, engati nge min zawh a?" ka tih chuan,"Ka zâwt mai mai che. A nih chuan, i lung a lêng a ni maw?" a ti leh sup a.



"Lêng lo, ka thlîr mai mai a nih hi," ka ti a.



"I taksa dek lova awm hi a har viau dâwn a nih hi, i taksa deh nawmzia ka hre tawh si a," tiin ka nghâwng chu a rawn fâwp a.



"Ruih theih damdawi ang min ti a ni chiang," tiin ka lo nui hak a.



"Um, chutiang deuh chu. Ruih theih țha ber chi maw le; mahse, mi dang tân ka phal ve hauh si loh."



A phone a rawn ri a, chhàn a ngaih avàngin a kal sawn ta rih a, kei erawh ka dinnaah chuan ka la ding reng a, ngaihtuah bîk pawh nei lo chuan pâwn lam chu ka thlîr leh a.



"Kei ai chuan Bible i chhiar tamin i hre tam zâwkin ka ring a. Abrahama kha Sari khân engtin nge a koh kha?"



Ka bulah a lo awm leh tawh niin, phone call a chhàn zawh lai pawh ka lo hre hauh lo!



"Ka chhiar tam lo khawp mai."



"Chu pawh ni se, ka zawhna che kha chu i hre tho ang chu?"



"Hria e," ka tih chuan," Engtin nge a koh kha?" a ti leh a.



"'Ka lalpa' a ti lo'm ni?" inring tâwk vak lo chuan ka lo ti leh a.



"A mawi ka ti! A pasal kha 'Ka lalpa' tiin a ko zân mai a nia, a dah lal ngawt mai!" a ti duah a.



"Chutia koh ve chu i duh tihna a ni maw?"nui chung hian ka ti a.



"A mawi êm a ni, a pasal hnênah khân a intulût tih kha a hriat chian theih viau bawk a," a lo ti daih thung.



 "A nih tak chu. Ka lalpa, ei tùr i duh em?" ka han ti zui zat a.



Min rawn melh sawr sawr pah chuan," Ka lâwm ngawt ang chu, ka lalnu," a rawn ti ve nghâl zat a.



Kâr khat chhûng chu honeymoon kan hmang a ni ber. Țûl fêah lo chuan in ațang chuan kan chhuak lo, ani pawhin phone call a chhâng țâwk a ni mai, Bawihtei pawh ka ngaih viau ka ring a nia, ka rin aiin ka ngai lo!



"Naute nei thuai thuai ang aw."



Ka en hau a!



"Mimawii pawhin naute thar neih vat chu a duh daih zâwk ang, a awm châk ang a, a paw châk bawk ang a, bâkah, nau neih hma chu a țha daih zâwk," a ti leh ringawt a.



"Chutin duh hun hunah nau a pai theih ringawt loh aw. Kâr khat ang chauh kan la awm dùn lehnghâl a," ka tih chuan," Vawi khatah chauh pawh fa an pai thei alawm le, keini phei chu kan uar a, kan uluk bawk a," a tih chuan," I va ho tak! Pathian thu thu a niang chu, nau pai leh pai lohah thu kan nei phâk si lo va," ka lo ti leh a.



"A phal ang, chi thlah pung tùrin min ti alawm le!"





*MITE CHUAN I CHANCHIN AN HRIAT CHIAN VIAU LOH PAWHIN AN HRIAT DÀN ANG ANG CHEIN AN RÊLIN AN SAWISÊL ANG CHE, HREHAWM TI DUH LÊM SUH, UI PAWH HIAN A HRIAT NGAI LÊM LOH LEH A HRIAT TAWHTE THLENG PAWHIN A BAUH ȚHIN THO A NIA*