☆LUHLULPA☆ - 35 & 36 By Dingdi Pachuau

☆LUHLULPA☆ - 35 By Dingdi Pachuau





Muansanga lo thawhrimzia ka hriat chuan ka khawngaih thar takzet, ni khatah dârkâr 6 vêl bâk hahchawlh nân hun a lo hmang ngai hauh lo niin! Chu chu kan inneih hma zawnga a hun hman dàn a ni; mahse, hlawhtlin a tum êm avàngin chu a thawhrimna chuan rah țha a chhuahsak ta chiah a, in nuam tak a luah theih bâkah dàwr changtlung tak a pual liau liauin a lo nei tawh bawk! Gym ațanga a pawisa hmuh a khâwl leh a inhlawhna zawng zawng belh khâwmin dàwr chu a lei a, loan tel hauh lovin. A tìrah chuan ei tùr țha leina tùr pawisa pawh a nei lo; mahse, a beidawng duh tlat lo va, hlawhtlin ngei a tum. A tàwpah chuan a sual chhuak ta ngei bawk a, a lo hman lo viau țhin leh hun a lo nei  ngai lo pawh kha ka hre thiam kuar kuar tawh.



"Lungngai miah suh aw, kei ka awm ve tawh bawk a, rim taka hna i lo thawhna, hah taka bianga thlan tui luanga i thawhna zawng zawng kha a lothlàwna luan raltîr ka phal hauh lo, khatianga nasa khân i thawh ka phal tawh lo ang a, duat tak leh hmangaih takin ei tùr țha tinrêng nèn ka châwm tawh ang che," ka ti sap sap a.



"Hna chu ka thawk ang chu, nupui fanau chàwm tùr ka nei tawh alawm," a lo ti awlsam êt thung.



Kan țang dùn ang a, engkim kan ti dùn tawh ang. Amah chauha rim taka thawhtîr ka phal tawh hauh lo, a țûl a nih chuan kan pahnihin kan thawk ang, pakhat ai chuan pahnih chuan kan zo hma ang a, pakhatin hah hnêpa a thawh kha pahnih tân chuan a awlsam dâwn hrim hrim.



"I thawk nasa hle si a, engtin nge thahrui hi i la neih theih záwk ni?"ka tih chuan,"Hna ka thawh chhan ka hre chiang che alawm, ka thawhrim chauhin ka nei thei ang che tih hi ka infuihna a ni, chu chuan harsa ka tih châng pawhin min nam kal țhin. Tunah chuan ka hlawhtling chho țan ve a, nang ka nei tawh bawk che a, a hma ai khân ka chak zual sauh a ni," a lo ti a.



Ka khawngaih a, ka hmangaih zual sauh sauh bawkin ka hria. Kei aiin naupang viau mah se rilru a lo neiin a lo dâwn thui zêk si, ka tluk lo takzet a ni.



"Ka hmangaih zual sauh che, ka lalpa," tiin a nghâwngah chuan ka kuah a, lungchim takin a hmuiah chuan ka fawhsak vang vang a.



"Thil chìn reng chi, tàwpsan phal miah loh tùr thil a nih kha," a lo ti sup a.



"Ka tàwpsan miah lo ang; mahse, i tân chauh ni thung rawh se," tiin ka nuih sak a.



Min chawi lawpin,"Kan țan leh tawh mai dâwn em niang? Ka ning thei bawk si lo che a," a ti a, ka lo nui hak a.



"Ka rit a nia! I kâwng a nâ ang," ka lo ti leh chùl a.



"Ka nupui hi chu ka zo ve chiang êm! Gym-ah pawh ka kal țhin kha."



"Exer lâk nân hun i neih ngai tawh loh êm kha aw," ka la ti fan a.



"Chu pawh ni se, ka chak tâwk tho. I tân hi chuan ka chak tâwk reng fo ang," a ti leh nghut a, room kawngkhàr chu a hawng chhunzawm nghâl a.



"Tak tak?" tiin ka mitko ka sàn ãk a.



"Min tiphûr zual sauh a nia."



Hmangaihna chu âm tak leh hlimawm takin kan chèn dùn a, kei pawhin ka pasal a nih vàng leh a nupui ka nih vàngin nupuiin pasal a tihlàwm dàn theih tùr bera ka hriat ang chuan ka che ve zêl a.



"I duhawmzia hi aw...!!!"



"Kum 10 hnua sawi atân khêk rawh," nui sak chung hian ka ti a.



"Kum 10 hma pawhin ka hrilh ang che. Ka nupui hmelțha zet hi a zeiin a duhawm thlâwt a ni, mipa vànnei tàk chu ka ni," a ti sup sup a.



"Kei pawh nuthlawi vànnei ber ka ni ngei ang."



Min ner khum sak a,"Nuthlawi chu an zùn a uai a nâ an ti țhìn asin; mahse, kei chu pasal i neih hma daih ațanga i zùna lo uai sa tawh kha ka ni a," a ti leh a.



Nui chung hian," High school naupang khân college kal lai kha min han star a niah!" ka ti a, ka chek tlak zui a.



"A pawi hleinem, hei ka bawh chhiat loh phah daih che a nia."



A thil sawi awmzia ka man thiam hnuah chuan a hnungah ka sik hlawk a, ani lah a lo nui suk duh chauh.



"Tu mahin bawh chhia min ti dâwn lo tih ka sawi ngam sak!" a la ti leh zui.



Tihngaihna ka hre lo lutuk chuan," I ho mai mai," ka ti ta ringawt.



"I zak leh tawh a ni maw? Senior ve fû tawh, pasal pawh nei ngam tawh hi thil eng emaw mai mai vàng hian i la zak thei a nia. I duhawmna tibelhchhahtu leh bawk. Khawi maw, lawk, awm țha teh," tiin ka hmai ka thukru tùr chu ka biangah a rawn vuan a, kei pawh ka lo awm țha ve mai.



Ka mi bula ka mithmul tla pakhat hi a kutzungpir chuan a la a, che lo chuan a maimichhîng ta rih. A thil tih lai awmzia hre lo zet chuan makti rilru takin, mit khap lo lêk chuan ka lo en a.



A rawn meng a, ka mithmul tla a kutzungpira mi chu zàwi tê hian a chhêm bo ta a.



"Eng nge a awmzia?" ka lo ti vat a.



"I la naupang êm a, i hre ve lo a ni ang," min ti! Ka thâ a va tina tak!



"Min hrilh dâwn lo maw?" tiin cho zet hian ka en chho a.



"I hre lo tak tak maw?!"



"Min hrilh duh loh chuan, a pawi lo ve!" tiin thinrim titau derin amah hnungchhawn zâwng chuan ka inlet ta thak a, min rawn kuah rang kher asin.



"I tihtau tak tak lo tih ka hria a nia," a rawn ti phawt a, chutah,"I mithmul kha wish siam nân ka hmang alawm. Ka u nèn kan têt laiin kan ti țhìn a, a hlimawm ve a," ka beng bulah chuan a rawn ri sup sup a.



Ka la hre ngai lo.



"A nih chuan, eng nge i wish chu?" tiin ka zâwt a.



"Mimawii nau tùr."



Heti tak maia fa han duh mai chuh! Victor-a ka hre chhuak zawk, an inan lohzia êm êm hi, ani chuan fa neih kha a duh thlâwt lo a nih kha, Bawihtei ka pai tâk si-ah kha chuan a fa a nih miau avàngin a duh lo thei ta lo mai a nih kha, chutah, ka rai laite kha ka mitthla lêt leh a, chhia min tih theihzia kha.



A rilru en nân,"Fa neih vat chuan ka duat rei thei dâwn lo che tihna a ni dâwn asin, naute ka ngaihtuah a ngai dâwn si a," ka ti a.



"Keiman ka ngaihtuah dâwn che u alawm, ka duat dâwn lutuk che u. I rai puar lai phei chuan eng mah i tih ka phal lo ang, ka hmuh theih turah sexy deuhin i lo ding puar àl ang a... nang nèna kan inhmangaihna rah ngei mai khân i pum a rawn tâwn puar dâwn a nia! Chuvàng chuan alawm rai thuai thuai la ka tih," a ti leh duah a.



He a thil sawi vàng ringawt pawh hian hmangaih hluah hluah hi a phû ngawih ngawih!



*******



An in ațang khân a bike  kha a la chhuak miah lo va; mahse, tunah hian kawl lai a nei a, secondhand a lei a ni. Dàwra a kal tùr hi ka zui ve ziah a, kal a phal vak lo nain a bula awm ve zêl tùrin min duh tih ka hre ru kar a, ka hneh leh nge nge țhìn. Gym lam kan tlawh ve zauh zauh, mi dang kutah a dah rih nain a tlawh reng reng țhìn a lo ni.



"Nau i pai hunah chuan i kal a rem ve dâwn tawh miah lo a nia, chu chu hre sa rawh aw, indìl âwih loh," a ti a.



"Dîl lo ang," ka lo ti vat.



Ni tin deuhthaw hian ka period em tih min zâwt ziah, thla khat deuh âwrh chauh kan la innei a nia, ka vànneih nân chuan a la hma deuh a ni.



Ka pass ve e, first-ah. Distinction ka pha țêp, a uiawm kher mai. Muansanga chuan ka pass lawm nân cake man to angreng tak min leisak a, zanriah ei tùr pawh amahin a siam vek. Nuam ve reuh tak a ni.



"Zirtîrtu hna i zawng nghâl êm lo ang chu tiraw?"



"Zawng nghâl maithei a ni," nui chung chuan ka ti a.



"Zirtîrtu hna i hmuh chuan kan inhmu khât àwm êm mai, hna  i hmuh hmain bànsan mai chi."



A rilru dik tak a nih ka ring. Nia, a hma kha chuan zirtîrtu hna hmuh theih nân ka ti rêng a ni; mahse, tunah chuan hna zawn ka rilrûk tawh lêm lo, a phal pawh ka ring lo. Training chhuah ve hrim hrim kha a țha a ni ta mai.



Zan khat chu zanriah kan ei khamah chuan ka kephah a kham êm avàng chuan min hmehsak nawk nawk a, ke lâwngin ka kal țhìn pawh a ni si lo va, mak ka ti viau mai.



"Naktúkah damdawiah ka hruai dâwn che nia," a tih chuan,"A ngai lo, a kham ve satliah mai mai alawm," ka lo ti thung a.



"Dàwrah kal lovin inah lo awm tawh la a țha ang," a ti leh a.



"Ni lo, dàwr kal vàng a ni lo. I hmeh hnuah phei kha chuan a zia tawh lutuk, a dam deuhthaw a ni mai," ka lo ti vat.



"Phakar reuh!" a ti hluk a.



"Ka lo hmehsak ve ang che chu?" ka tih chuan," A kham ve hleinem, naktûk chu inah i lo awm rih tawh ang," a ti leh tlat.



Ka chhâng tùr ka àn zuau lai tak chuan a phone a rawn ri a, ka țawng ta lo.



A phone screen-a hming lo lang chu min hmuh a, a nu a lo ni! A hmel ațang chuan chhàn a phûr fahran lo a ni tih a hriat theih.



"Chhâng ta che," a rawn ti.



"I phone a nih kha, a be duh che a, be rawh khai," ka lo ti thung a.



"Chhâng rawh, bathroom-ah ka awm tih hrilh mai rawh," tiin a tho ta nghâl a.



Huphurh ru angreng tak chuan ka chhâng ta nge nge a.



"Hello?" 'Ka nu' han tih tel ka tum zuau a; mahse, ka sawi ri ta êm lo.



"Zonun, i ni tiraw?" a rawn ti dam diai mai.



"Aw, ni e, i dam țha em? Muansanga chu Bathroom-ah a awm a," ka ti ta ringawt, sawi tùr a vâng si.



"Aw, dam e. Bawiha nèn nupa hlim tak in nih ngei ka beisei, in inneihnaah khân rawn kal ve kha ka duh lutuk a; mahse, a lungawi lo ang tih ka hlau bawk si a, nu rilru ațang chuan a hrehawm asin. Zonun, nang pawh nu i ni tawh a, ka rilru put dàn tùr chu i hriat thiam theih ve ruak chu ka ring," a rawn ti dap dap a.



"A dik alawm,"ka ti a.



"Ka ngaiin ka hmu châk hlê a ni, ka fapa a ni a, engtin pawhin sawi mah se ka fapa a nih lohna ka hre ve lo, thisena inzawm ni lo mah ila ka thinlung hian a hria a ni, ka fapa dik tak niin ka hmangaih êm êm a, a thu tlûkna pawh ka zahsak ta réng a ni; mahse, ka ngaihtuah êm êm reng tho si, a chanchin pawh hi ka ngaihven reng zêl a ni," a ti leh a.



"A dam țha lutuk, lo ngaihtuah miah suh. I enkawl țhat ang êm chuan enkawl țha ve thiam dâwn lo mah ila ka theih tâwp ka lo chhuah ang," ka ti. Ka ti tak tak, ani ang êm chuan ka enkawl thiam lo maithei; mahse, ka theih tâwp ka chhuah tal ang.



"Nia, nang a nei tawh che a, ka thla pawh a muan phah rêng a ni. A hmangaih hle che tih hria la, a thiam lohnaah pawh i lo dawh hrâm hrâm dâwn nia," a ti leh a.



"Tehrêng mai."



"In pahnih pawhin hmuh che u ka châk khawp mai, ka fapa duh tak khân nupui a lo nei ve reng tawh si a," a tih chuan a fapa a hmangaihzia leh a ngaih dàn tùr chu ka ngaihtuah.



"Min rawn tlawh chu a duh lo ngeiin ka ring a; mahse, nang chu rilru puitling tawh i ni a, nangmahin i tih tlat chuan a hnial duh kher lo maithei che a," beisei nei tak hian a rawn ti leh a.



"Ka lo sawipui dâwn nia," ka tih chuan,"Ka lâwm e, Zonun. Nang pawh kan fanu i ni tawh a, kan en dàn che a danglam miah lo a nia. Thil kal tawh chu eng pawh ni se, kal liamtîr tawh ila tih hi ka duh ber chu a ni. Ka ring che aw, in rawn lan ngei ka lo beisei reng ang," a rawn ti leh a.



Zàn mutnaah chuan a nu nèn kan inbiak dàn chu ka hrilh a, sawi sual erawh ka hlau khawp mai. Ka sawi zawh hnuah pawh a la ngawi ngul mai.



"Ka khawngaih reuh, a ngaih hmel che sia," ka ti sap a.



"Ka mamawh ber leh ka hmangaih ber ka bulah i awm tawh a, eng mah dang ka mamawh tawh lo."



Țawng chhuah tùr uluk a ngai. A rilru a khauh ropui si, a nu lahin min ring ve bawk si. Ka dinhmun pawimawhzia hi, ka koah hna hautak zet mai a innghat ta a nih hi.



"Ka lalpa," tiin ka han ko tlawn hmasa phawt a, chutah," I nu chuan hmuh che a châk asin, han ngaihtuah vang vang mah teh, a fapa duh tak, a neih chhun liau liau kha i la ni reng a, hmangaih taka a chawi len kha i ni bawk asin," ka ti leh a.



A țawng lo.



"Hmuh pawh i châk ve lo em ni? I hmuh avàng khân eng mah i chân dâwn lo va, i nu erawh a hlim êm êm thung dâwn a ni," ka ti leh a.



"Kha inah khân luh leh ka duh tawh lo," a ti bur mai.



Bur mai a. Ka thlêm chhuak thei ang em? Inrintâwkna pawh ka nei rih lo.



"A pawi lo, i tih dàn dàn le, i thu tlûkna chu ka pawmpui vek che. I duh loh chuan kan kal lo ang; mahse, i nu chu ka ngaihtuahnaah a awm reng dâwn a nih hi," ka ti a.



A ngaihtuah zui ve tho ka ring.



Bawihtei a rawn phei ve zawk. A piin a rawn hruai a, kâr khat deuhthaw chawlh an neih avàngin a rawn zinpui ve a ni.



A u Muana ni țhìn kha a pa a lo ngai ta si a, a ko thiam mang dêr lo. Kalkawngah a piin a rawn hrilh phei ve nasa a nia, 'Au Muan' tiin a ko leh zauh zauh tho, ani pawhin a lo hre thiam ve mai, an inhrawn rei deuh hnuah a thiam ve mai ang chu.



"Âma, engtikah nge in bulah ka awm tak tak dâwn?" tia min zawh chuan a pa chuan,"In exam zawh veleh," a lo ti vat, ka chhâng ve hman lo.



"Yesss...," a ti hluai a, chutah, nûr deuh hian,"A, Àpitei'n naute a nei țêp tawh asin, ka pawm ve châk dâwn sia," a ti leh nuah nuah a.



"Áma pawhin a nei thuai dâwn alawm."



Ka nu nèn chuan phâwk zet hian min rawn en a, kei chuan Muansanga chu  ka mitmei vat a.



"I rai nghâl maw?!!"



"Naute a nei thuai dâwn maw?!!" An pitu chuan an țawng rual țhawt mai.



"Ni lo, ka la rai lo. Bawihtei chhang tùr neih thuai thuai a duh thu a sawi a, chu chu alawm," ka lo ti vat a.



"Âma, engtikah nge nau ka neih dâwn? Nei thuai thuai ila. Ka duat viau ang, ka pawm țhin ñgei ngei ang."



A pi chuan,"I pitei'n a nei hmasa dâwn a nih chu, i pawm hmasa mai dâwn nia," nui chung hian a ti a.



"Àputea'n ka pawm a phal ve lo ang tih ka hlau, a hma pawhin 'Keimah chauhin ka pawm ang' a tih kha," vui hmel pu zet hian a ti nang nang a.



"I pawm hmasa ber ang," ka lo ti vat.



Muansanga pawh chuan," Âmain i nau tùr a neih ve hunah pawh i pawm  hmasa ber ang a, i puak pawh kan phal vek ang, i duat viau ang em?" tiin a lo zâwt ve a.



"Ka duat viau ang, Àputea naute pawh ka duat tho ang."








*DIK VEK BÎK MIAH SI LO HIAN MI DIK LOHNA KAN HMU THEIIN KAN SAWI PEIH HLE A, HEI HIAN KAN NUN CHHÛNGRIL A HRIL CHIANG HLE. MI ȚHA CHUAN A BULA MITE CHU AMAH ANGA ȚHA NI VEK TÙRAH A NGAI MAI ȚHIN*





☆LUHLULPA☆ - 36 By Dingdi Pachuau



Bawihtei a rawn phei a ni tih a hriat chuan Victor-a'n chaw ei tùrin a rawn sâwm a, Muansanga nèn kan innei tawh tih Bawihtei nèn an inbiak ațangin a hre tawh bawk a, nèlawm takin a rawn be ve mai. Ka nu pawhin țha takin a lo chhàwn a, Muansanga erawh chuan a biakna chu a rùl tâwk bâkin a chhâng hauh lo thung.



"Engati nge i va ngawichawi ta ve?" tiin zanriah kîl hma chuan ka zâwt sap  a.



"Chuti mi?"



"Aw, Bawihtei pa lo kal ațang khân. I thin a rim chu a ni êm lo tiraw?" ka ti leh a.



"Rim deuh."



Ka nui deuh sak a, ani lo kal avànga lo thinrim deuh ringawt chu, a naupang chhia ka ti deuh thut.



"Engati nge a lo rim deuh mai mai a? Thil kal tawh chu theihnghilh tawh ila, kan hriat reng chuan huatna leh thinrimna kan thinlungah kan pai tlat ang a, nun nuam takin hun kan hmang hman lo palh ang," tiin a hnung lam ațang chuan ka va kuah a.



"I chunga a thil tih dàn ka ngaihtuah lêt hian ka thin a la rim tlat alawm, vawi khat tal ka lo hnek lo kha chu ka la inchhîr a ni. Bâkah, Mimawii pawh ka fanu a ni tawh a, a duh duh hunah a rawn hruai thei ringawt tawh lo ang," a ti ngul ngul a.



"Zahngai! Zahngai!" ka lo ti  vat a, chutah, thutak zâwk hian," Nia, a thil tih kha chu a chhuanawm lo khawp mai; mahse, min chhuahsan lo ta se, nang hi ka tawng dâwn lo che a, ka pasal pawh i ni lo maithei asin, amah leh a thiltih kha chu theihnghilh daih ang," ka lo ti thung a.



"Mahse, theihnghilh a har ka ti alawm," a ti leh nghut a.



"Ani khân kan nupa hlimna hi a tihchhiat ka phal miah lo a nia. I phal bîk em ni? Phal lo ang, Bawihtei erawh a fanu a la ni ve tho bawk sia, khawngaihin, hriat thiam tum hrâm rawh aw, pa pahnih duat êm êmtu a nei che u a, Victor-a a lo hmu khât ve tawh bawk nèn, kaltír loh kha ka duh bîk lo a ni, ani'n a lo ngai ve tho sia," tiin ka hrilh fiah ve a.



Zanriah ei kham hnu daih, dâr 8:30 vêlah Victor-a chuan a rawn thlah a, a awm rei lo, a haw dâwn chuan," I phei leh hmain lo lêng leh la, thil eng eng emaw kan lei dâwn nia; mahse, Àpi te, Âma te i hrilh phawt ang a?" a ti a.



"Aw le, âpa, nang pawh lo lêng leh la?"



A fing ve viau tawh a, a lian ve tawh bawk a, Victor-a tân pawh ngaihawm deuh tùr a ni, a chhùn bawk si.



Zàn mutnaah pawh a ngawi deuh ngul reng mai. Tih vak ngaihna pawh ka hre lo, Bawihteite phei hnuah a zia ve leh mai ang chu maw ka ti ringawt.



"Țawng ve la?" ka tih chuan min rawn en zawk a.



"Mimawii pa tak tak nih hi ka duh a ni," a ti sup a, a hawi sawn leh nghâl daih a.



"I ni alawm, hei bâk bâk," ka lo ti vat a.



"Kan bulah awm se ka duh, kan awm dun tam loh chuan a pa ang tak takin min ngai dâwn loin ka hria a ni, min koh pawh a harsat rih a nia," a ti leh sup a.



"A zirna hi a laklawh rih sia ka ti maw le. A țha alawm, ani pawhin kan bula awm chu a duh daih zâwk bawk ang a," a rilru hre thiam tak chuan ka lo ti a.



"Ka thisen zawm ang chiahin ka hmangaih tawh a, nang ka hmangaih ang bawkin ani pawh fanu hmangaihin ka hmangaih a ni. Kan awm dun tam loh chuan ka thinlungin a pawm ang hian paah min pawm ve lo ang tih ka hlau a ni," a ti leh duah a.



"Ka lâwm e, i hmangaihin i ngai țhin tih ka hria asin. Lungngai miah suh, thisena a zawm a pa tak ang chiahin ani pawhin a hmangaih ngei ang che tih ka hre chiang a ni," tiin ka lo hnèm ve a.



Tuna a rilru put ang hi a nu leh a pate'n fa atân an lâk khân an put ve ka ring. A tìrah chuan an hmangaih nghâl lo pawh a ni maithei a; mahse, kum 20 chuang an lo enkawla an lo chawilen hi an hmangaih êm êm ang tih ka ring tlat, a nu phei kha chuan a hmangaih lutuk ang tih ka chiang. Kei pawh nu ka ni a, a rilru tùr ka hre thiam pha ve tlat.



Mahse, ka nuin 'Kumin chauh chu kan hnên lamah awm rih se, thla hnih khat bâk a ni tawh chuang lo va, a exam zawh veleh a lo phei dâwn nia' a tih leh deuh si avàngin țha chu kan ti ve tho bawk si a, an pitu chuan an inzui phei leh rih.



"A ngaihawm reuh hle mai," a tih chuan ngaihtuah vak lo hian," Tu chu maw?" ka lo ti a, dârthlalang hmaa țhuin ka hmai chu night cream ka hnawih pah a.



"I ngaihtuah duh lo lui tlat a nih kha. Ka tân chuan lo hnial a nuam lo va, i tân chuan nangmah hringtu i nu a nia, phal loh tlat tùr alawm, " a ti bung ta nghut mai.



Khuma țhu mu titih deuha a awm ngur mai chu ka en phei a, ka hmai pawh ka hnawih chhunzawm rih lo.



"Fa kan neih thuai hi chu a ngai a ni tiraw?" hmela eng mah tilang duh lo hian ka ti a.



"Ka sawi tawh reng kha; mahse, fanu chu kan nei tawh sa reng a, kan bulah a awm lo mai a ni," a ti leh a.



Ka țhutna ațanga thoin a awmna chu ka pan phei a, a bul sêtah chuan va țhuin,"Hre thiam rih la, aw? A exam zawh veleh a lo phei nghâl dâwn alawm. Chumi hma chu min duat rih mai zâwk la, maw Âpa?" nui duh miah lo hian ka ti a.



Min en rùn rún a, chutah, nui deuh suk hian,"Ka duat sa reng che alawm," a lo ti a.



"Naa... i tùm hmuk reng kha. Duatte bulah an tûm hmuk reng ngai miah lo a nia aw, nge zanin chu keima'n ka duat zâwk dâwn che em niang?" ka ti a.



A hnu deuhah chuan boruak pawh a pângngai ve leh ta mai. A ngawih deuh reng hi chuan han duat deuh hlak hi a mamawh ve a, bâkah, nupa kan ni tawh a, induat tawn tùr alawm kan nih le.



*******



"Ka lalpa, i phone a rì a nia?" tiin bathroom-a a awm chu ka ko a, kei chuan chawhmeh ka siam laklawh viau si a ni.



"Tu nge ni?"



Dawhkàna a phone chu enin," Ka nu a nih hi," ka ti a, ka kut a berh bawk sia, ka chhâng thei dâwn lo hrim hrim.



"Chhàn a ngai lo," a rawn ti.



A nu hi engati nge a huat tel tlat ni aw? Ani lahin a ngaiin a la rawn ngaihven êm êm si a, ka duh dàn hi chu a ni lo thlâwt.



A phone neitu berin chhàn ngai lo a tih miau si chuan ka tân chuan sawi tùr a vâng; mahse, titipui erawh ka la duh, hetiang ringawt hi chu a fuh lo ang, biak ringawt chu sualna a awm hleinem le.



Tûkțhuan kan ei lai chuan,"Eng nge ka chawhmeh siam chu a an àwm? A tui i tih zâwng a ni em?" tiin ka zâwt a, kut berh veka ka siam ve kha a ni a, tui a ti lo ang tih ka hlau.



"A tui reuh khawp hi. Eng nge a hming?"a ti a.



"Ka phuahchawp a nia, tu mahin an la siam ve ngai lo ang, kei pawhin ka siam vawi khatna! Alu kha a tel ve sia, potatoballs a ni ber ang chu," nui chung hian ka ti a.



"A tui lutuk. A mawm vak bawk si lo, Mimawii pawhin a duh khawp ang, a cute bawk si, tiffin-a pai atân a remchâng dâwn bawk a," a lo ti a.



"Ani tiffin pai tùr chu a pa i awm a, i siamsak ang chu maw le," ka lo ti thung a.



"Cute deuh khân ka siam thiam ve nâng! Min zirtîr la?"



"A har hleinem, ka zirtîr mawlh ang che; mahse, i ngaihthlâk țhata i practice țhat a ngai bawk ang," ka tih chuan," Min zirtîrtunu star phal a ni ang em?" a lo ti vat a.



"Phal loh bur!"



"A va fair lo dâwn ve!"



"Fair lutuk! Zir chhûng chuan star phal loh, zir loh hnuah erawh chuan..." ka ti a, ka ngawi ta daih a.



Kan ei kham hmun kan tih fel laiin a phone bawk chu a rawn ri leh. Ka en deuh reng a, a phone chu en vung vungin a hmet tàwp ta daih.



A rawn ri leh.



"Tu nge a?" ngaihven ru zet si, ngaihven loh hmel deuh si hian ka ti a.



"Company!"  Chutia min chhàn dàn ațang chuan a nu a nih ka ring deuh ringawt, a nu a nih loh chuan a pa. Company call a dawng ngai lo tih ka hre ve tho.



"Ka nu a nih chuan be ve mai la? Thil pawimawh sawi tùr a nei a ni maithei asin," ka tih chuan ," Company alawm," a lo ti leh ţálh.



Kan nupa tê chauhin awm rih mah ila kan hlim dùn a, ka theih tâwpin ka duat ve a, ani pawhin min duat. Kan han titi dùn a, thil eng eng emaw kan sawi dun hian a rilru lo puitlin rohzia ka hre fiah țhin. Tluk lohna tam tak ka nei chiang, a chângin min fuih a, a chângin keiin ka fuih ve bawk a. Fuih kan ngaihnaah chuan kan infuih tawn a ni ber ang chu; mahse, a naupan chhiat châng a rawn chhuah ve thung chuan naupang chhia tak a ni ringawt! Mahse, duat hunah ka hmang hlauh thung a, duat nihte hi a nuam ve a, tu pawh mai hian duat nih chu nuam kan tih vek hi maw.



A nuin a rawn call zauh zauh; mahse, a chhâng ngai meuh lo chu a ni. A nu call a hmet tàwp lai hi ka hmu fuh thei lutuk, phone melh vang vang hian che lovin a țhu ve ziah bawk. A chhûngrilah chuan nuam a ti lo ang tih ka ring tlat țhin, mi sual a ni si lo va. A luhlulna hian a hneh rih êm a, chuvànga chhâng duh lo țhìn mai a la niin ka hria.



"Ka nuin a lo call che hian chhâng ve mai țhìn la? Rilru nuam lo takin i awm tho țhin sia," ka tih chuan," Chutiangin ka awm lo," a lo ti vut a.



"Mi sual i nih loh hi maw. Ka hre chiang ve tawh che alawm, i nu i hmangaih êm êm hi chuti teh thutin i haw bur lo ang tih ka hria a ni, a hmangaih che a, nangin i hmangaih bawk a," ka ti leh a.



"Ka nei tawh che a, nangin min hmangaih a, mi dang hmangaih ka mamawh tawh lo," a ti leh tlat.



Sawi leh tùr hi a vâng țhin.



Tlai khat chu ka nuin min rawn call ve ta thung.



"Zonun, ka fanu, tûnlai chu a mak tak tak! Ka hmu châk êm êm reng  mai che u, Bawiha kha lo sâwm la, min rawn tlawh hrâm ula ka ti ngawt mai," a rawn ti a.



"A nih tak chu. Ka lo sawipui dâwn nia, i dam țha rêng rêng em, ka nu?" tiin ka zâwt a.



"Aw, țha e, ka țha. I pa pawh a țha, nangni pawh in țha tùrah ka ngai a, eng nge chanchin làwmawm lam hriat tùr kan nei tawh em?" nui hak hak chung hian a rawn ti a.



Naute chungchâng a sawi tih ka man thiam ve mai.



"Awm rih lo a nih hi," tiin ka nui ve a. Thil dang sawi lehin kan inbe rei ve phian. Kan titi ațanga ka hriat chhuah chu ka nu hian Muansanga chhuah chhan dik tak kha a hre miah lo tih hi. An fapa dik tak a ni lo tih a hriat chhuah tâk avànga chhuak ta daihah a ngai char char!



An nupa pawhin an sawi dùn ve ngei àwm si a, Muansanga pa chuan a sawi chhuak duh miah lo tihna a ni ngei ang, a fapain in a chhuahsan chhan dik tak kha hre ta se, eng rilru nge ka nu hian a put ang le?



Muansanga bula ka sawi chuan,"Kha inah khân ka lût tawh dâwn lo," a ti bur mai! Chutiang bâk chuan eng dang mahin min chhâng lo, bei a dawng rum rum duh teh a nia.



Mahse, a nu kha ka khawngaih tlat si a ni. Keimahah beiseina a nei sâng ve si, ka khawngaih avàngin ka bànsan duh bîk lo, a fapa hmuh châk, biak châk lah chuan an ina lèn luh a duh lo bur mai si. A hnua ka sawi chhuah leh pawhin," Ka kal dâwn lo, a duh chuan rawn kal zâwk ang hmiang," a ti tlat. A châng leh,"Min hmu châk a nih chuan min pan mai rawh se" a tih loh leh,"Min ngai a nih chuan kan in awmna a hre reng alawm," a ti ziah.



"A tân chuan lo kal a buaithlâk dâwn asin, in nghâktu awm a ngai a, bâkah, kan inhlat lutuk," ka lo ti ve thung a.



"Ka nu chu i țan hle mai!" a ti leh daih.



"Țan nâng, ka țan daih zâwk che; mahse, ka khawngaih reuh êm a ni. Han ngaihtuah chhin la, nang pawhin Mimawii i hmu châkin kan bula awmah i duh a, chutiang rilru tho chu ani pawhin a pu ve dâwn asin. A fapa tak tak ni lo mah la, a thinlungah chuan a fapa tak tak i ni miau a," ka ti a.



A ngawi ta vung vung mai. A ngawihna chuan rah țha chhuah se, a nu nèn an inkâr tal hi chu țhat phah se ka ti.



Mahse, rah rêng a chhuah lo zâwk  ni àwm a ni. Ka sawipui chhin leh chuan eng mah a sawi ve ngai ta lo, a ngawi  hmiah tawh. A ngawih phei hi chuan tihngaihna a vâng, min tibuai dêr.



"Eng emaw tal sawi teh, Luhlulpa."



"Engtin maw?!!"



Nuih tlawn deuh hian," Thil eng emaw sawi ve la ka ti a nia," ka ti a.



"Min koh dàn kha?"



"Ka lalpa," ka tih chuan," Ni lo, nichina min koh dàn kha maw le," a lo ti leh vat a.



"Engtin mah ka ko lo-"



"Sawi mai la?"



Ka sawi mai a ngai si a nih hi, a haw êm lo ang chu maw. A pawi lo, a huat pawhin a nihna dik tak a ni tho alawm le.



"Luhlulpa ka ti," ka ti ta nge nge a.



Min en rùn mai. A ngawi kur zui.



"A ni chiah alawm, i luhlul lutuk. Ka thil sawi i ngaihtuah duh bawk si lo, eng emaw tal sawi ve la chuan ka hre thiam ang, i sawi duh bawk si lo. I luhlul ve chiang alawm," ka ti ta êrh a.



A huat ka ring a nia, ngawi renga min enin a nui suk duh chauh.



"I nuih dàn te kha, i luhlulzia lanna a nih kha," ka tih leh chuan," Luhlul hi a țha asin," a rawn ti ta daih!



"Țhat loh hi, i nu sàwmna pawh i hnar zêl a nia. A țha pawh ka ti lo, i luhlul dàn hi chu," ka ti leh a.



"Luhlul lo ila ka chân daih tawh ang che."



Ni ve tho bawk si. A tidik leh tlat.



"Ka tlâwm, ka tlâwm."



Kan nui dùn hawk hawk.



Ka laka beisei a neih sàn tehlul nèn, ka la tihlawhtling thei rih lo a ni si a, ka inthiam lo ru viau tawh a ni. 'A lo kal duh lo va' han tih ringawt chi lah a ni si lo, dàwr lama buai chhuanlam ka siam leh ringawt zêl mai.



Tlai khat chu min rawn phone leh chuan a thu rawn sawi a dang ta deuh!



"Ka tibuai che em?" a rawn ti phawt a. Chutah," Ka nuamsam lo reuh lutuk a; mahse, ngaihtuahawm chu ka ni lo a nia, min rawn ngaihtuah miah suh u. I pa lah inah a awm reng hman bîk si lo va, vawiin pawh thil țûla a chhuak a lo la haw lo. In dàwr lam in buai ve thei si a, rawn biak chhên che pawh hi ka inthlahrung ru deuh riau; mahse, biak tùr ka neih chhun in ni tawh mai si a, Mami lah chhùn lamah biak theihin a awm si lo nèn," a rawn ti sap sap a.



A khua a har ngawt ang chu!



"Inthlahrung lovin min rawn be ziah rawh. Engah nge i lo nawmsam loh mai mai aw? Damdawite i ei em?" ka ti ve vat a.



"Ei lo, damdawi ei ringawt hi ka hlauthâwng țhin a. Ka nawmsam loh ve deuh chângte hian Bawiha damdawi min pêk ang bâk kha chu ka ei ngam ngai lo, ani kha chuan inentîr tùrin min hruai vat mai țhin a," a ti leh keuh keuh a.



"A nih chu, ka lo hrilh ang a, rawn kal thuai kan tum dâwn nia," ka tih chuan," A, rawn kal buai a ngai lo, in buai țhin tih ka hria alawm, tlâng hrilêng satliah mai mai a niang," a ti deuh tlat a.



"Inentîr a țha hrim hrim alawm, inentîr ran a țha," tia ka chhàn lai tak chuan Muansanga a lo lût a, ka țawng a rawn hre pha chiah chiah.



Hmui phun hian," Tu nge?" a rawn ti nghâl a.






*MI HUAT CHÎNGIN THUDIK LO A SAWI A, MI ÂIN  A SAWI DARH A, MI MÂWLIN A LO ÂWIH ȚHIN. MI HUAT CHÎNG, MI Â LEH MI MÂWL NI VE MIAH SUH*