☆LUHLULPA☆ - 39 & 40 By Dingdi Pachuau

☆LUHLULPA☆ - 39 By Dingdi Pachuau




"Ka nu makti leh sawi tùr a haihchham hmel kha a khawngaihthlâk ka ti," zanriah ei lai chuan ka ti a.



"Thu dik a hriat ve a hun tawh a ni," a lo ti sup a.



"A dik alawm. Chuan, țha taka ka nu i lo bia kha ka lâwm hle a ni, i lo fel hi ka tia," tiin ka han fak hlak a.



"Naute hriat laiin țawngkam țha lo ka hmang duh hleinem. A pa țawngkam vîn a hriat chuan a lo chhuak duh lo palh ang," thutak zet hian a lo ti leh a.



Ka nui sak. Ka rai tih kan hriat zàn ațangin ka pum chûl hoh hoh pahin a be ziah a nih kha. A la insiam țan dâwn chauh a la ni a, thi hlâwm ang chauh a la ni ngei ang; mahse, ani chuan mihring pângngai biakin a be ziah si.



"Ka be leh châk tawh khawp mai, zanin chu rei deuh hlek ka be ve tawh ang aw. Ka biak reng chuan a lo pian chhuah veleh țawng a thiam hma bîkin ka ring tlat," chu a la ti deuh deuh a.



"E, i duh tâwkin i be dâwn nia; mahse, ninhlei tel lovin aw," ka lo ti ve a.



Naute insiam chhoh lai a nih vàngin nupa nun pawh min hmanpui a tum ngai lo,"Naute a țhat loh phah ang," a tih loh leh,"Hrehawm a ti ang, kei chuan harsa ti dâwn viau mah ila ka insûm thei mai ang," a ti deuh tlat.



Mutnaah chuan ka kawr hâk chu hlîmin ka pum chu a rawn chûl leh ta. Tlêm tê pawhin a la rawn puar phah lo va, chuti chung chuan,"I va lian chak reuh tak! Lian thuai thuai rawh aw. Âpa hian a duat nasa dâwn che a nia, ka hmangaih viau bawk ang che," a ti sar sar a, chutah,"Nangmah vàng liau liauin Âma pawh ka tawk thei rih lo tih hria la, lo chhuak thuai thuai ang che. Ka insûm rei tawh teh a nia," a ti leh. A lo ngaithlatu tân chuan nuih a za lo thei lo, a langa lo nuih erawh ka duh chiah bîk lo.



Kan mut țhat hnuah chuan," Ka nu kha chuan mipa ni ngei tùrah khân a dah ngawt a, a awt deuh zâwk a ni ngei ang," ka ti a.



"Awt ve ang, a chhan chu u Mami'n naute a pai thei tawh dâwn si lo va," a tih chuan makti zet hian ka en a.



"Mak tih viau a ngai hran lo. Kha vàng khân alawm ka u bialpa hlui kha an ngei êm êm ni, amah vàngah khân an puh lo thei si lo va," a ti leh a.



'Ka u bialpa hlui'. Victor-a tih ve mai àwm, a hming a han sawi duh lo ngei a nia!



"A ni thei viau ang, in demawm ka ti hauh lo," ka tih chuan,"Kei chuan theihnghilh vek ka duh. Ka u bialpa hlui a nih vàngin nang nèna kan inkâr pawh a chhiat phah a nia, khatiang kha thlentír ka tum tawh lo
rêng rêng, tu mahin i rilru an tihnat hi ka phal tawh ngai lo ang," tiin min kuah hlù hlú a.



Rilru hlim zet hian," Ka bula i awm chhûng chuan tu mahin min tina thei lo ang," ka lo ti ve sep sep a.



"Ka kalsan ngai lo ang che, ka tiam a che."


*******


Krismas Lunglei lama hman kan tum tehlul nèn, Muansanga'n motor chuan a phal tlat lo, 'Naute tân a pawi thei ang' a ti tlat a, ka hnial ngam bîk lo. Puii naute neih a hun deuhthaw tawh bawk a, ka nu chu a buai ru ve khawpin ka ring; mahse, ka pa buaipui a ngai lo va, chutah, Tea a awm bawk a, buaipui ngai ber tùr Bawihtei a rawn phei tawh bawk si.



"Âma, i pumah naute a awm tawh maw?" tiin min zâwt a.



"Aw, i paw duh ang em?" ka tih chuan,"Duh lutuk! Lo chhuak vat vat se ka ti. Àputeate naute pawh a lo chhuak țêp tawh si a," a ti leh a.



Ka nu(Muansanga nu) pawh a reh ta vang vang. Hrehawm a tih vàng nge ni ang aw ka ti, a hma kha chuan min rawn be ve reng reng kha a nia, khami ni ațang khân a reh vang vang ta chu a nih hi.



Muansanga lêt a tum tawh hauh si lo va, hetia a reh ta vang vang pawh hi kawng lehlamah chuan a zia ka ti viau mai, an chhûngkua hi inrem leh se chu ka ti, lêt kher tawh lo pawhin.



Mahse, Muansanga lam ațang hi chuan thil buaithlâk tak chu a ni ngei ang, a tih loh lamah hi chuan ti lo ve tak, luhlul ve ngêt ngâwt tak a ni si a.



"Thil țûl lo pui pui ngaihtuah țhin teh suh, nautein a tuar mai ang," tiin ka bânah chuan a rawn vuan a. Kei khuma țhu chungin chutiang thil vêl chu ka lo ngaihtuah vung vung lo niin, ka phu dâwrh lo chauh a ni!



"Khawnge Bawihtei?" ka tih chuan,"Ei tùr kha a ei mêk, i reh vang vang sia, ka ngaih a țha lo va," tiin ka bân chu a rawn chûl zai zai a.



"Ka nu reh ta daih hi a mak ka ti deuh a maw le," ka tih chuan a lo chek hlak a.



"Ngaihtuah lovin rilru hahdam takin awm tum teh. A reh chuan a țha a ni mai alawm," a ti ta nghut a, chutah,"Ka chhuak, Mimawii a khua a lo har hman ang," tiin a ding ta nghâl a.



A ni lah tak a, Bawihtei lo phei hnu hian a bul hnaiah awm loh lai a nei lo ti ila dâwt a ni lo ang, a duat êm êm bawk. Kan inngaihzàwn lai ai khân a duat a, a tân pa nih a tling lo ang tih a hlau a niang, khawiah emaw kal lawk dâwn pawh ni se, an inzui chhuak zêl. A duat khawlo zo ang tih pawh ka hlau hlel lo ve.



Chawhnu lamah an pafain an inphur chhuak leh, chawhmeh lei tùr leh ka ei châk zâwng lei tùrin. Ei châk ka neih leh neih loh min zâwt ziah a, kei pawh hi min tipangchang  zo tawhin ka hria. Duattu tùr zâwk hi min duat lutuk a, ka dik lo vek tawh.



Ka phone a rawn ri a, ka han la a, ka nu(Muansanga nu) a lo ni a.



"Zonun, ka tupa nèn chuan in țha zêl em?" a rawn ti a.



"Aw, țha e, ka nu. Nangni in dam țha maw?" ka ti lêt ve nghâl.



"Aw, dam e," a ti phawt a, chutah,"Zonun, rawn be ngam tawh tùr che pawh ka ni lo tih ka hria; mahse, ka thei ngang lo a ni. Ka fanu i ni tawh a, ka tupa tùr nu i ni bawk. Keiin ka biak loh che u chuan Bawiha hian min rawn be hmasa dâwn lo tih ka hre chiang si a, in chanchin hi hriat reng ka duh bawk si nèn, min dem lo hrâm mai rawh aw, nang chu i rilru a puitlin zâwk kha," a rawn ti dap dap a.



"Ka nu, chutiangin sawi mah ta che. Ka thiam loh tak pawh a ni, rawn be tùr che ka nih zâwk tehlul nèn," ka ti leh a.



"I chunga thil thleng kha pawi ka ti takzet a ni, Bawiha lahin a tuar hrep bawk si a. I pa hi hriat thiam hrâm i tum dâwn nia, ani'n pawh țhen che u tum mah se in inhmangaih tak tak a, hei pawh țhen rual lohin in innei ta a, thil hlui chu theihnghilha hlim taka awm tum hrâm zâwk rawh u, thil kal tawh hriat renga intih lungngaih loh tùr a ni ngai e," a rawn ti leh dap dap a.



"A dik alawm, ka nu. Kei pawhin theihnghilh daih ka duh, hlimna hian hlim lohna hi hliah khuh ka duh zâwk a ni," ka ti ve a.



"I pa bulah pawh in chungchâng ka sawi tawh kha. Bawiha bâk fapa kan nei lo va, kan in hi a in a ni a, a duh hun hunah a lo haw thei reng a ni. A tel lo chuan kan in hi a ruak lutuk a, hrehawm ka ti țhin a nia. Hmânah kha chuan 'in' a ni ve țhin a, tunah erawh chuan a reh ruih tawh mai a ni; mahse, fa in han nei ang a, in lo haw hunah 'in tak tak' a nih leh theih ngei ka beisei tlat,"a rawn ti leh a.



Hei zet chuh, sawi tùr ka hre ta hauh lo mai! An ina lêt leh hi Muansanga hian a tum hauh lo, chu chu ka hre chiang ve bawk si a, a nu beiseina hi ka tihchhiatsak ka hlau, ka ngawi reng ringawt.



Kei pawhin an chhûngkua hi hlim takin awm leh se ka ti, ka rilru takah chuan. A pa nèn kan inkâr kha chu thil hlui a ni tawh a, dam chhûng rei lo teah hian hlim taka hun hman hi țha ka tih tawh avàngin, Muansanga hian a duh phawt chuan inrema hlim taka awm khâwm ka duh.



Mahse, ka thu a ni lo chiang êm mai.



Ka nu thil sawi chu ka ngaihtuah reng mai, ani hi chuan a fapa hi a hre chiangin a hmangaih tak tak a ni tih pawh ka hriat chian phah hle a ni. Ka pa erawh ka hre thiam lo, lêt tùr chuan a duh ve tho ka ring. A fapa neih chhun a ni miau a, khâng hun kal tawhte kha chu, a thinrim lai a nia, a duh miah loh leh a rilru tak tak ni lo pawh a sawi ve thei tho alawm.



Kumthar hlim takin kan hmang a, kan chhûngkua tê chauhin inah awm mah ila kan hlim ve êm êm tho. Victor-a pawh a rawn inrawlh ngam rih lo, hunpui laite a ni ve sia. Bâkah, Muansanga a intithu viau tlat, Victor-a rawn kalin Bawihtei an in lama hruai a rawn tum țumin hunpui chu chhûngkua ngeia hman kan tum thu a lo hrilh khauh mai a. Victor-a pawh a tum loh deuhin a haw ta hnu hnu niin ka hria. A țawng dàn leh a awm dàn chu ka lo chhuang khawp mai a, pà ka lo ti ru lutuk ringawt!



"Âma ei tùr kan siam leh tawh dâwn em niang?" Muansanga chuan Bawihtei en pah chuan a ti a.



"Âpa, ka ei tùr pawh min siam ve tho la?"



"Lutuk! Lo kal rawh le, Âma pum chhûnga naute kha a ril a lo țâm leh tawh ang," tiin min rawn nuih suk a.



An inawm nasa bawk a, tunah chuan inkoh dànah pawh harsatna a awm tawh lo. A pa dik tak aia a pa a nih lohna leh a koh dànah pawh danglamna a awm lo.



Nuam ka va ti si êm! Hetianga nun hlim hi hmânah khân lo tem ve tawh ila aw....



Ei ka siam ve a phal bawk si lo va, ka bula a awm lai hi chuan ka chêt a phal lo a ni tawp. Indìm hle turin min hrilh reng a, ei tùr pawh hi min barh lo chauh a ni. A chêt dàn hi tam tak chuan hria se 'over' an ti ngei ang chu; mahse, ka tân chuan min duatna a tihlanna a ni a, over ka ti phal hauh lo. Ka pasal hmasa lakah leh tu ma lakah hetiang duatna hi ka la tawng ngai hauh si lo va.



Phone call ka dawng leh ta. Hei chu Tea a ni ve ta thung, a hming ka hmuh veleh chuan Puii ka rilruah a rawn lang nghâl vat.



"Tea, eng nge ni ta?" ka ti nghâl a.



"Puii'n nau a vei a, Serkâwnah kan inphur chho a nih hi, ka rawn hrilh ve hrim hrim che, pasal i nei hi nuam i ti lutuk a, chanchin lah min rawn zâwt khât si," a rawn ti nghâl bawrh bawrh a.



"A ni maw? Puii tak chu, țha takin nei mawlh teh se. I mang a ang àwm mang e," tiin ka fiam leh rih a. A mang a an viau chuan a rilru chhâwk zângkhai thei thil a mamawh ve dâwn asin.



"Ang ve ang chu. A nâ a ti tih ka hre ve kar alawm, a thlanfîm a tla bawrh bawrh thei a nia," a rawn ti ve leh a.



"A dik alawm, a manganthlâk duh rêng a ni. Pathian ànchhia a ni si a, kan tawrh tùr a ni rêng a ni. Fapa țha tak a rawn nei ang a, tuna kan mangannna hi nakina kan hlimna tùr nèn chuan a inhen lo dâwn teh a nia," ka ti a.



"A tuar rei loh hrâm ka beisei. Aw...a natna hi lo tawrh chhâwk ve thei ila ka ti mang e!" a rawn tih tâkah chuan a rilru hrehawmzia leh a manganzia chu a hriat theih nghâl vek.



"Mangang mah ta che, hlimnaa lo thlen dâwn chuan natna tawrh hmasak hi a ngai ve a nia. Țha takin a nei mai ang, a hrisêl țha a, a insawisèl ngai loh kha," tiin ka theih ang tâwk chuan ka hnèm ve a.



Muansangate pafa pawh chu ka hrilh ve a, ani pawh chuan," Țha takin a nei thei tùrah ngai ang; mahse, kan nautein a ngam lo tùr hi chu ka rilru a lo na lâwk a ni," a lo ti a.



Bawihtei thung chuan,"Àpitei chu a rai puar lian sia, naute pahnih a nei ngei ngei ang, pakhat chu ka pawm ve ang maw le," a lo ti thung a.



"Bawihte, keini pawhin kan nei dâwn reng alawm," ka tih chuan Muansanga chuan,"Naute tam tâwk kan nei duah ang a, a țha a ni mai alawm tiraw?" a lo ti ve a.



"Naute chu sikulah ka hruai ve ang maw le," Bawihtei chuan a lo ti leh a.


Tea min rawn call khân chawhnu dâr 1 a ni tawh a, tunah hian zàn dâr 9 a pèl leh tawh. Vawi thum ka phone hman tawh! An chanchin ka hre châk tawh si, a la nei thei si lo, țha tak hian a nei thei dâwn lo em maw ni le?



"A va nei har tawh tak!" ka ti chhuak hap a.



"A har chi a ni pawh a ni maithei a," a lo ti thung a.



"A chau tawh ngawt ang, ka khawngaih êm mai, a manganthlâk si," ka ti leh a.



"E khai! Mangang mah ta che, țha takin a nei mai ang, i mangang tùr a ni lo, naute kha a lo mangang ve mai tùr asin," a lo ti lehpek. Nuih loh a har țhin.



Zànah chuan ka mu țha thei lo, ka rilruah Puii hlîr mai a awm. Țha tak hian a nei thei lo ang tih ka hlau a ni, a êng lam thlîra rilru put ka duh a; mahse, ka thei miah lo. Chanchin thar ka nghâk ru reng a, phone hi a rawn ri ang a, Puii țhat loh thu min rawn hrilh thut ang tih ka hlau ngawih ngawih mai a nih chu.



Ka harh kar reng mai a, che lovin ka mu hlè hlé thei si lo. Muansanga ka tiharh a niang,"I muhìl thei nange? Nâ i nei em ni?" a rawn ti chhuak vut a.



"Puii ka ngaihtuah êm a ni," ka ti chhuak ta nge nge a.



Min rawn kuahin,"Ngaihtuah lutuk duh mah ta che, chutin nau hi a lo chhuak vat bîk lo tih chu i hriat ve tawh tho kha. A har mi phei chuan ni hnih lai te pawh an vei ţhìn tia an sawi ka hria a ni," a rawn ti leh sup a.



"Ka lo hlauthâwng êm a ni, Puii ka khawngaih bawk si a," ka ti leh a.



"Țha takin a nei mai ang, rilru lo hahtîr viau kha a sâwt miah lo a nia. I mut țhat loh chuan nangmahin i tawrh phah ang," a ti leh a.



Mut chu ka duh; mahse, ka thei si lo. Zîng lam dâr 3 vêlah Tea ka va text ta ringawt, va phone hluai kha chu ka hreh ve deuh si a.



*Lo ngaihtuah lutuk duh suh, doctor-in a vil reng a nia*  a rawn ti.



Muhìl lo mah ila ka maimichhîng tal a, ka mit a thîpin mit men a hrehawm lutuk lo ang chu maw.



Dâr rukah chuan ka tho var var tawh. Ka va phone leh, Tea chuan," A pângngaiin a nei thei dâwn lo an ti a, an zai dâwn a ni àwm e," a rawn ti ta.



Chutiang te chu a hma daih khân zai tih tawh tùr a nia aw, nâ a tuar hrep tawh a, a khawngaihthlâk mai mai.



Naute mipa țha tak an zai chhuak a ni àwm e, a țha e. A nu erawh a chau a, biak theih a ni rih lo; mahse, naute țha tak an nei ta tho va, a làwmawm e. Puii pawh a țha chho ang chu maw.



Lawmpuina thu kan va hrilh a, Bawihtei phei chuan a takah ahmu châk khawp mai. Thlalâk an rawn thawna a lan dàn chuan a ngo reuh hle a, a sam pawh a dum nghâl viau mai.



"I awt ve àwm mang e!" tiin Muansanga'n Tea fapa thlalâk a en deuh reng chu ka fiam hlak a.



"Hei aia țha hi kan nei dâwn alawm," a lo ti daih thung.



Ka rin aiin Puii a harh chhuak har. Thisen unit 2 an pe a, Tea ka va phone phei chuan sawi chhuak lo mah se a rilru a mangang tawh tih ka hria, ka khawngaih roh mang e.



Rilruin ka țawngțai mawlh mawlh.



*******


Ka phone rawn ri chuan min tiharh, tu tak chu ni maw? Ka mutui viau asin le aw.



Peih lo zet chuan ka lukham hnuaia ka phone dah chu ka la chhuak a, ka han meng suar suar a, number chauh a lo ni.



"Hello?" Ka aw chuh!



"I lo duhâm hle mai! Ka fapa min chhuhsak hnuah kan in lehzêl pawh rawn luhpui i tum leh a nia! Kan in hi chu i chang chuang lo ang, kan in chan theih nân kan nu hi kawih lunglèn lo tum tawh suh ang che. He in hi chu ka in liau liau a nih hi, i pasal kha nangmah vàng liau liaua chhuak a ni a, nang nèn chuan engtikah mah in lo luh ka remti thei ngai lo ang!" a rawn ti chhur chhur mai a, a titàwp nghâl hmak bawk.



Mak ka ti lutuk! Ka en ngai ka en tlawk tlawk mai.



Tunah khân Muansanga pain min rawn bia! A thil sawi kha, a mak takzet! Ka lo ngaihtuah ngai miah loh thil a rawn sawi.





*THIL RÊNG RÊNG HI A CHÂNG CHUAN  I THLÌR DÀN ȚHIN NI LOVIN, THLÌR DÀN HRAN DAIHA THLÌR A NGAIH CHÂNG A AWM VE ȚHÌN A NIA*






☆LUHLULPA☆ - 40 By Dingdi Pachuau




Ka ngaihtuah zui zêl a, mak ka ti tawlh tawlh. Ka nu(Muansanga nu) lo lêng kha a hria a ni ngei ang, nupa an nia, an sawi dùn ve ang chu. Ka nu khân lêt tùr khân min duh viau a, kei pawhin Muansanga leh a chhûngte hi inngeih leh tùrin ka duh viau; mahse, an ina lêt leh lam kha chu Muansanga duh dànah ka dah tawp. Inngeih tlàn kha ka duh ber chu a ni mai, a chhan chu chhûngte a nei lo lutuk a, ka khawngaih a ni.



Ka duhàm avànga an in chan ka tum a tih kha chuh, kha kha chu thil theih loh, ka rilru pawha ka la ngaihtuah hauh loh thil a ni! Mak ka ti lo thei lo! Engtin nge ka nu rilru chu ka kuai hera a ngaih theih ni? Ka duh chu an inngeih leh kha a ni mai, chubâk ka ngaihtuah lo.



Ka thinrim deuh phut chuan," Teuh lo lutuk! In ina lo lêt kha ka duh hauh lo, rawn luh pawh ka châk hek lo, a bulah pawh in inrem leh theihna tùrin thil ka sawi tawh ngai lo ang," ka ti tàwn táwn phawt a, raino thinchhiat lai a lo ni bawk nèn, ka phone chu chhuatah ka vawm keh darh chhuai lo chauh a ni!



Rilru chhe lutuk mai. Engtin nge a fapa a hnawh chhuah tawh nupui hian a in leh a ro chu ka chuhpui theih ang? Àwm ang lo lutuk! Amah anga sual leh rilru kawiah min ngai a niang chu.



Ka thinrimna chu tihreh vat ka duh. Chuti a nih loh chuan an rawn haw thuai ang a, ka awm dàn ațangin a hria ang a, min rawn zâwt chhuak leh mai ang. Tihreh dàn ka zawn a ngai, bâkah, naute tân a țha lo.



Phone-a ka hla thûlkhung chu ka play ta vat a, châk lo viau mah ila ka zàwm lui hrâm hrâm. He hla hi mawi ka tih theih tehlul nèn, a va mawi ta lo ve! Duh takin ka zàwm a, ka làmpui hial țhìn a nih kha. Tunah hi chuan bengchheng lamah a kal ta zâwkin ka hria, ka off ta daih nghe nghe.



"Ni lo, ka tilui tùr a ni, ka inbengdaih a ngai," tiin ka zai lui ta vak vak a, ka thinrimna chu paih chhuah ngei tumin ka bei a, tlêm tlêm chuan ka zia chho hret hret e.



"Umm, ka ti thei ngei ang," tiin ka tilui zêl phawt, nichina thil thleng kha chu ka ngaihtuah duh lo lui a, har chu a har viau mai; mahse, naute tân thil țha lo a ni, Muansanga chuan hre phei se chuan min bengdaih tumin tha a thawh leh char char tawh ang chu.



Ka hriattîr thei lo ang. A hre tùr a ni lo.



Ka tih dàn ka thlâk ta. Ngil âtin ka țhu a, muangchângin thâwk ka la a, muangchângin ka thaw chhuak leh. Chutiang chuan minute tam vak lo chu ka ti a, ka zia chak khawp mai.



A hnua ka ngaihtuah lët chuan,"A ni lo asin, a ni lo. Inngeih taka in awm leh theih bâk duh ka nei lo. Ka pa, i ngaihtuah ang hi ka la ngaihtuah chhin hauh lo, mi duhâm tak ka ni bîk lo asin, ka pasalah hian ka lung a âwi tâwk a, ani'n min hmangaih chhúng chuan eng thil dang mah ka mamawh lo, hetiang zâwng hian engtin nge i ngaihtuah theih?" tiin a thla chu ka be mawlh mawlh a.



Muansangate pafa an rawn thlen chuan hlim takin ka lo chhàwn a, Bawihtei hlim hmel biang tài têk chu hmuh a nuam kher bawk a, ka nuih var var a.



Zanriah ei laiin Tea'n min rawn phone a, Puii pawh a lo harh tawh a ni àwm e. Naute pawh a țha a, a țap ngai miah lo tih a rawn sawi chuan ka rilru a nuam huai huai, ka pa min rawn biakna pawh kha ka theihnghilh titih dèr thei nia.



Zàn mutnaah chuan ka dul chûl hoh hoh pah chuan fa kan neih hun tùr chu sawiin room sawisak dàn tùrte chu min hrilh pah a, ka duh dànte pawh chu min zâwt pah a.



"A pa berin țha i tih dàn ang angin le. Chhûngkhur pa ber leh thû ber i ni si a, keinite chu i tih dàn ang anga lo 'yes' zêl tùr alawm kan nih le," nui chung hian ka lo ti a.



"An lo len deuh hma chu hetah hian awm rih mai a pawi lo ang tiraw? Kan thawh chhuah ngeia in kan sak theih veleh in kan sa ang a, an infiamna tùr hmun zau tak kan siam bawk ang a, tual zâwl zau nuam tak nèn," a ti leh a.



A ngaihtuah thui roh mang tak e. An in kha ka mitthla lêt a, naupang infiamna room leh tual an chaina tùr phùl hmun nuam tak neiin gym room nuam zet pawh a awm a nih kha, naupang seilenna atâna hmun duhawm lutuk a nih kha.



Mahse, ka thil mitthla chu ka nuai bo vat.



"I tih dàn dan le. Kei chuan i duh dàn ka pawmpui zêl ang che, kan fate tân thil țha tak vek i duh ang tih ka hria alawm," ka lo ti leh a.



*******



Tunah chuan ka rai a ni tih pawh a hriat ve ta. Ka raino lai ang kha chuan ka indìm lutuk tawh lo; mahse, Muansanga hmuh lai erawh chuan ka indìm tho. Ani hi chuan ka chêt hi a phal lo bur mai a; mahse, ka thiam ang angin ka hrilh fiah ve bâkah kan inentîrna ber doctor hnênah a rûkin thil awm dàn chu ka pasal hnêna hrilh fiah tùrin ka ngèn a, ani pawh chuan a lo hre thiam ve mai. Muansanga a hrilh hnuah chuan tlêm chuan a zia ta deuh, motor-ah pawh tûn hnai ațangin ka chuan a phal ve ta. Ka vahpa pawh a taka hmuh ka châk; mahse, Bawihtei'n school a țan ve leh tawh si a, hun a awm leh tawh lo.



Muansanga nu chu rawn kal leh tawh lo mah se min rawn be reng tho. Min rawn biak laia Muansanga a awm ve hi chuan loudspeaker ka on ziah, a thu rawn sawi hi hre ve vek se ka duh. A nuin a hmangaihzia leh a ensan lohzia hi hria se, țha takin a biak theihin awm ve se ka duh a ni.



Mahse, eng mah a sawi chhuak ngai lo. A chhûngte chanchin hi a ka ațang hian a chhuak ngai lo hrim hrim ti ila a dik ang, ka sawi chhuak zauh a nih pawhin ani chuan kam khat tê mahin min sawipui ve ngai lo.



Bawihtei school a kal tawh avàngin dàwrah ka kal ngai tawh lo. Kal ka tum ve pawhin Muansanga hian a phal ngai lo, ka hna ber chu ina awma Bawihtei school bâng lo chàn a ni mai. Kan kawmthlang maiah an school motor-in a rawn thlah a, chumi lo chàn chu a ni mai.



Eng mah tih phal lo mah se a awm loh hnuah erawh in chhúng chêt chu ka thawk vek. Exer ka lâk pawh a ngai ve alawm, insûk lah khâwlin a nuai vek thei a, chhuat nawh chu a ni deuh mai. Tlai lam eirawng bàwl leh Bawihtei lehkha zirtír nèn, hna pawh a tling lo.



Ka nute ka phone a, naute chanchin ka zâwt hmasa ber lo thei lo. Ka hmu châk a, keini kan zin phei thei tawh si lo.



"Rawn zinpui teh u," ka tih chuan ka nu chu a nui chhuak a.



"In neih ve hunah kan rawn zinpui zâwk ang e, nei ve vat vat ula," a rawn tih chuan,"Nei vat ang. Puii a țha zêl maw? Ani hi a lo che nasa lutuk ang e, Tea khân lo àwl ve deuh se," ka ti a.



"Nia, a duat thiam ve khawp chuan ka hria, fapa hi a inti nei hliah hliah lutuk a, a pawm deuh reng mai. Puii pawh a țha, hnute tui erawh a nei tam vak lo va, a neih tamna tùr ei tùr kan zawng ve reng mai," a ti leh a.



Kan inbiak zawh hnu lawkah ka nu a rawn lang hlawl mai. Mak ka ti ru viau nain ţha takin ka lo chhàwn a.



"Ka tupa ka hmu châk tawh a," a rawn tih chuan ka lo nui mai a.



"Lo țhu rawh, eng nge i in duh ang?" ka ti nghâl a.



"Ka bulah hian lo țhu phawt teh."



A bula ka țhut chuan ka kut chu lain," Zonun, i pa hi i ngaidam thei ang tiraw? Ngaidam hrâm rawh aw. I chunga a rilru put dàn zawng zawng hi ka hre vek a nia, puh chhe viau che mah se nang chuan a chungah rilru chhia i pu lo ang tih ka hria a ni," a ti dap dap a.



Ka ngawi reng ringawt. A chhan chu sawi chhuah mai tùr ka hre rih lo a ni.



"Dik tak chuan Bawiha'n in a chhuahsan ațang khân a nungchang a thlâk nasa a, zu in a chîng ta tlat a ni. Ka chungah chuan a sual zâwng chuan a awm ngai hauh lo; mahse, ruih sual châng a nei lo thei bîk lo va, i chanchin mawlh hi a sawi chhuak țhin. A rawn phone che pawhin ka ring, a duh duh dànin a rawn puh chhia ang che tih pawh ka hria, a chhan chu Bawiha chhuak ta daih khân a rilru nasa takin a tidanglam ve si a. A nupui i lo ni leh kher si nèn, tih theih dang nei hek lo le, zu lamah a țuan ta ringawt niin ka hria," a ti leh a.



"Nia, a dik alawm. Min rawn phone a, duhâm taka in leh lo kan chan theih nâna nangmah hi kuai lunglêngah min rawn puh a ni," ka ti chhuak ve ta a.



"Engtin maw?!!"



A hre tho tih ka hriat avàngin ka sawi nawn duh bîk lo.



"Khatiang rilru kha chu ka la ngaihtuah chhin miah lo, bâkah, in a chhuahsan tawh a, hei in kan nei reng tawh bawk a, kan mamawh tawh bîk lo. Amaherawhchu, a têt tê ațanga lo chawi liantu in ni a, a nu leh pate in ni, hetianga in inkâra eng emaw awm hi ka duh loh avàng leh a chhûngte neih chhun takmeuh in nih avàng erawh chuan inrem takin awm thei ula tih hi chu ka duh dàn ber chu a ni zâwk," ka ti dap dap a.



"Zonun, i rilru a puitling ka ti hle mai, ka fapa hian nupui ţha tak a nei che a ni," a ti a, a thil sawi chuan min tihzah rualin min tihlim tho.



"A pa hi a sual hrim hrim pawh a ni chuang lo a nia. A inla mipa ve tâwk a, hei hian chapona a pe ve tlat si a, chu chuan a tlàwmtîr thei lo a ni. I hria chuan ka ring lo va, i pasal hlui Victor-a nu kha, kha kha a bialnu hlui a nia," a tih chuan makti zet hian ka lo en a.



"A dik alawm, mak i ti ang. Victor-a nu nèn khân an induh țhin a; mahse, a hmeichhe lam chhûngte khân an duh hlei thei tlat lo va, kha khân a rilru a tinain a chapona rilru a chawk tho a, nupui atân min rawn be ta daih a ni. Kei chuan a hma ațangin ka lo duh sa tawh a, bialnu a neih avànga ngaizawng ngam lo mai ka ni a, chutia min rawn hawi tâkah chuan ka lo duh a ni sa nèn, nei mai tùr pawhin harsatna ka nei hauh lo. Kan inneih hnu lawkah ani pawh chuan pasal a nei ve ta mai bawk a, khatia an fapa leh kan fanu an han induha an fapain na taka kan fanu a han siam ta mai kha Voctor-a nu thil tihaha a puh tlat a, anmahni kaihhnawih lamhnaiho chu a haw vek ni ta berin ka hria. Tichuan, nang pawhin thil awmzia chu i hre thiam ve deuh tawh ang chu," a ti leh duah a.



Chutiang teh duah chu maw lo ni a! Kei lah chu, a fanu duatlai tinaa tițaptu mipa nupui hlui ka lo ni a, a bialnu hlui fapa nupui hlui ka lo ni leh chiah bawk a, chu ka nihna chuan amahah ser lian tak a lo siamtîr reng a lo nih chu.



"A lo nih teh duah chu a, ama lam ațang chuan min lo pawm thei lo pawh chu a àwm ve thei viau tho a lo nih chu," ka ti a.



"A chapona rilru hi a lian a, a chhûngte duh loh a nihna khân a tina êm a ni," ka nu chuan a ti leh a.



"Chuti chu, ka chungah hian sual viau bîk lo se, chhûngte duh loh natzia a hre vek tho sia, kei pawh a dinhmun angah ka ding ve reng a," ka rilru chuan ka ti vang vang a.



Ka țawng loh avàng chuan," Chuvàng chuan, hre thiam hrâm hrâm la, ngaidam hrâm rawh aw. A rilru a na a, chu chu a chapona avàngin a sawi chhuak thei si lo, eng ang pawhin puh chhia che mah se i nihna a ni chuang lo va, engah mah lo ngai lo tùrin ka duh che a, ka ngèn bawk che a ni," a ti chhunzawm leh a.



Ka nu chu a zahawm ka ti thlâwt. A thil thlìr dàn chu a mak ka ti a, a pasal chu a hre chiang viau ka ti bawk. Chuti chung chuan a hmangaihin a dawh tlat a, Victor-a nu nèn an inan lohzia chu ka ngaihtuah kai zêl a.



"Mihring chu kan tlin lohna kan inen dâwn chuan tu mah hi tling thei rêng kan awm lo va, chuvàngin, kan tlin lohna lam aiin kan tlinna lam hi inensak hrâm hrâm ila, chuti chuan kan lo hlim thei mai țhìn dâwn a ni. Bawiha pawh hi a la naupang a, hmangaih dàn leh duat che pawh a lan chhuahtîr thiam lo maithei, hmangaih takin lo dawh zêl la, Pathian leh Kohhran hmaah thu in tiam tawh a, chu chu nghet taka i kenkawh zêl ka duh a ni. Tlin lohna tam tak a nei ngei ang, tunah phei chuan han rinchhan tùr nu leh pa bulah a awm tawh lo lehnghâl a..." a tàwp ta rih a, a rilru a nâ tih ka hria, a lung pawh a chhe tel chiang.



"Ka nu, ngaihtuah mah ta che. Min hmangaih a, kei pawhin ka hmangaih a, kum lamah kei aiin naupang mah se tluk lohna tam tak ka nei asin. In lo enkawl puitling viau  a ni, ani pawh hian sawi chhuak duh lêm lo mah se a rilru chhûngrilah hian hmun in chang reng tih ka hria a ni, a chhan chu nangni bâk nu leh pa a nei si lo va," ka lo ti ve a.



Zàwi dam dap hian," A u Mami kha harsa zetin ka nei a, doctor-in nau ka nei thei tawh dâwn lo tih min hrilh khân Pathian hnênah thil mak ka dîl tawp mai a ni. Rai theih leh kha ka dîl a, bâng lovin ka dîl țhin; mahse, ka rai thei chuang lo. Beidawng duh lovin ka dîl reng a; mahse, a rei hnu kha chuan ka bei a dawng ve țan ta. Mami zirna zawm tùra Shillong lama kan zu kal laiin kan room kawngkhàr bulah hian parcel chhûngah mipa naupang, ni hnih thum vêl bâka upa a la ni lo ang tih tùr hi kan zîng tho khân kan hmu nawlh mai a, a nu emaw a pain emaw kan thawh veleha kan hmuh theih tùrin a lo dah a ni ngei ang chu. Ani lah chu a lo mu tui nasa mai a, a duhawm reuh bawk si a, ka hmuh țantirh ațangin ka hmangaih nghâl. Chu chu Bawiha kan fapa a nih țan dàn chu a ni, hrin loh ni mah se Pathianin ka țawngțaina a chhàn dàn a ni tih chiang takin ka hria a ni," a ti leh dap dap a, kei chuan mit pawh khap phal lo leh chil pawh lem phal lo khawpa tuiin ka lo ngaihthla doh doh a.



A awm ve ta reng. Bawihtei school bàn hnuah pawh a la awm ve reng a, Bawihtei nèn pawh an inkàwm leh bawrh bawrh mai. Chaw ei ve nghâl tùrin ka sâwm a, ani erawh chuan a lo hnial thung. Inah an pahnih chauha awm tawh tih laia ani a ei chhuah leh daih chuan a fuh lo ang.



Chaw ei laiin vawiin lama ka nu lo lèn thu chu ka sawi a, Bawihtei pawh chuan min lo pui ve vat.



"Âpa, àpi chuan lêng tùrin min sâwm asin. School ka chawlh veleh lêng ila?" a lo ti vat a.



Muansanga ka en vat, ani pawh chuan min lo en ve vat niin.



"Bawihte, an in a hlâ asin, bâkah, bike chauh kan nei sia, Âma nèn kan pathum chuan kan inphur thei lo ang, Âma pum chhûngah naute a awm tawh lehnghâl a, hrehawm a ti lutuk ang," a ti a.



"Âma tel lovin kan pahnih chauh pawhin lêng ila? Àpi kha a khawngaihthlâk alawm, kawm tùr a neih loh thu a sawi asin," Bawihtei chuan a lo ti thung a.



Naupang rilru thianghlim leh eng mah la hre thiam ve lo tak hi chu aw...



"Um, kan dam phawt chuan kan la lêng dâwn nia, chaw kha han ei țeuh phawt la aw? Chaw ei lai chuan naupang chu țawng țawng ve loh tùr a nia," tiin ka lo inrawlh ve ta a.



Muansanga chu ka en țhin, ka en zin poh leh ka hmangaihna leh ka khawngaihna chu a zual sauh zêl niin ka hria. A nu leh pain an kalsan, mi enkawl atân an tih chu a ni si a, a nu leh pa thil tawn chu hriatpui ve lo mah ila eng emaw harsatna tak chu an chungah a thleng tihna a ni ngei ang a, mahni rila rah ngei pawh enkawl thei lovin an awm chu a ni si a. Tunah hian an la dam ve ang em? An la dam a nih chuan an rawn ngaihtuah ve ngai ang em?



"Nge min en reng a? Mahse, nuam ka la ti tho a nia."



Inngaihtuah harhin ka nuih sak a,"I hmelțha lutuk a, ka mit ka la sawn thei lo alawm. Chuan, ka hmangaih êm êm leh min hmangaih êm êmtu ka pasal duh tak i ni bawk a, ka en ning thei lo che a ni," ka ti ta sap a.



"Eng maw? Ka beng hi a rawn chhêt deuh thut a nih hmel, han sawi leh teh," tiin a beng chu ka lamah arawn dawh hnai a.



"I hriat reng kha," ka lo ti thung a.



"Ka hre leh duh alawm," a tih chuan a lu tuaisak pah chuan,"Kan mu ve tawh dâwn em niang?" ka ti a.



"Um, i rawt har tawh ka ti rêng a. Vawiinah rai țantirh lai tih loha thil eng emaw tih naute tân a pawi lo tih thu ka hre thar lehnghâl a," tiin a nui sûng a.



"Eng thil țha lo nge i lo hriat pek a?" ka tih chuan," Thil țha zâwk maw le, insûm ka tum tawh lo a nia," awmze nei zet hian a lo ti a.



Hmui tipawrh târh pah hian," Zahngai! Zahngai!" a run tâwk tùr chuan ka lo ti a.



A run tâwk chu a tling chiang alawm, min rawn hnaih chilh ruakin ka pum chu a rawn tawk nghâl sawt sawt a.



"Hei, baby, min hrem rei tawh lutuk, zanin chu tina miah lo chea chêt ka tum ang, lo tuar hrâm hrâm ang che aw," a ti sup a, chutah, min pawm thovin khum lam chu min panpui ta nghâl a.



*******



Ka naupai a hrâm tawh hle a, phìr ka nei dâwn a ni tih kan hre tawh bawk a, mak kan tiin kan phûr hle a ni. Ka hrisêl țha a, damdawi lah ka ei țha bawk. A hun dik takah doctor kan hmu zat zat a, naute pawh an hrisêl țha viau e. Muansanga hian zan tin mai hian dârthlalang bulah chuan min dinpuiin ka dul chu a chûl deuh ziah a, a nih loh chuan mut dâwna ka inphihfai, bathroom ațanga ka chhuak hi khum ațanga min lo enin,"Sexy Lalnu i ni ringawt!" a tih loh leh,"I chak ngawt mai, naute pahnih i pumah an awm reng a nia, i chhiat lohpui êm êm bawk si," a lo ti ziah. A thil sawi ho tê tê nia a ngaihin min tihhlim țhinzia hi a hre lo zâwk a ni, rilru hlim takin min siam a, hei hian chakna min pe țhìn a ni tih a hre hauh lo zâwk ang.



Inrinni a ni a, Bawihtei nèn inah kan awm a, Muansanga erawh dàwrah kal zawkin chawhmeh a rawn lei kual pah a, a rawn hàwn țeuh mai.



Chhùn thingpui kan in laiin Muansanga phone a rawn ri a, a hming lo lang ațang chuan a nu a ni tih ka lo hre thei a.



"Engtin maw?! Damdawi inah maw? Min hmu duh a? Aw, ka rawn tum dâwn nia."



An inbiak zawh chuan,"Zon, ka nu a nia, damdawi ina kal tùrin min duh a ni, ka pa a tlu sual a nih àwm chu,"
a ti sup a.



E khai!! Engtizia nge ni? A ruih vàng a ni thei ang em? A nu chu a rilru a va hah dâwn êm!



"A nih tak chu, a zia lo hle mai a. Han kal thuai rawh, a rilru a mangangin hrehawm a ti ngawt ang chu, amah chauh a nih phei chuan..." ka lo ti a.



"Chanchin ka lo hrilh ang che aw," tiin a tho nghâl . Sawi chhuak lo mah se ani pawh hian a pa chu a ngaihtuah ru viau a ni tih a chezia leh awm dàn ațang chuan ka hre thei a ni.



A àwm reng a ni. A nu leh pa, a hmuh theih pathian, amah lo enkawltute an ni miau a.



Ka thil ei pawh a tui tawh bîk lo. Chanchin ngaichângin inah ka awm ve reng a, eng mah ka ti thei bîk lo.



A hnuah chuan min rawn phone ta. A pa chu a lo tlu na hle a lo ni, doctor-te pawhin tihngaihna an hre bîk lo, ka hming a lam chhên a ni awm e.



"Ka rawn hruai ang che u aw, lo insiam ula, duh lo viau mah ila hmuh che a duh tlat si a."



Rilru mumal ka pu hlei thei lo. Min hmuh chu a duh si a maw? Engvàngin nge ni ang? Min hau leh dâwn em ni ang?



Damdawi inah chuan an chhûngte an lo awm nual tawh niin. A na viau ni khân a sawi tak alawm, chuvàng chu a lo nih dâwn hi an lo awm khâwm țeuh tawh ni. A dam chhuah an ring lo em ni le?



Vai ruaiin ka pên chhat chhat mai. Mitthi tùr chatthla lai ka hmuh vawi khatna a nih vàngin ka mitthlaah ka hmu reng a, a thu sawi zawng zawng nèn chiang lutukin ka hre vek si a, ka ipik lutuk, ka ke chuan min zo lo mai dâwnin ka hria.



"Zon, zon, i țha em?!!!"



Muansanga chu nghet zetin ka chelh, ani pawhin min rawn kuah nghâl, min rawn kuahin rinchhan lo ila chuan ka tlu ngei ang.



Min țhutpui a, ka pângngai deuh hnuah chuan a pa thil sawi chu ka hrilh ve ta a.



"Zonun, ngaihdam theih rual loh thil
ka ti a, a pawi ka ti. Ngaihdam dil che hi ka tum ngai lo; mahse, ka hun tàwp a ni tih ka hre si a, keimah avànga hlim lo taka in awm ka duh lo, hlim taka awm in phû a ni. Ka fapa kha țha takin lo enkawl rawh aw, a chunga ka thil tih zawng zawng kha pawi ka ti, siam țha thei lo mah ila nang chuan i siam țha vek thei a ni. Khawngaihin, mitthi tùr thu hnuhnung chu lo tihlawhtling hrám rawh aw, hlim takin lo siam ang che. Ka fapa a ni a, ka fapa dik tak a ni, ka tu lo piang tùr pawh chu ka hmu ve châk mang e! Zonun, ka thil sawi chu lo tihlawhtling ngei rawh aw."



 A chau a, a țawng hrâm hrâm a ni. A kawchhûng lam a sawh chhe nasa a, rei a dam dâwn lo tih a inhre ve rân bawk si. Khawngaih loh pawh tum mah ila a khawngaih loh theih loh, a awm dàn chu a hrehawm a ni tih ka hmu ve reng si a.



"Engkim, ka in leh lo zawng zawng hi ka fapa tâ vek a ni, in tâ vek. I nu kha lo enkawl țha r'u aw..." A țawng a buai chho țan a, a thâwk dàn a rawn dik lo ta bawk. Ka kut a chelh ve reng bawk si a, thisen a kai nuai bawk si nèn, thil hmuh hrehawm tak chu a va ni êm!



*******


Kum 2 hnuah chuan




Zirtàwpni a ni a, Bawihtei school a kal a, ka nu nèn inah kan awm. Ka fate kan awm a ni, naktûkah an nî a rawn haw chho ve dâwn a, hmuh a châkawm rualin eng angin nge min hmuh ang aw tih chuan ka rilrua luah ve deuh.



Pâwna motor ri ka hriat chuan dârthlalang ațang chuan ka han bih a, car ațanga Muansanga lo chhuak ka hmuh chuan mak ka ti lêm lo, a fate hi a ngai ve thei êm!! Dàwr lamah a awm rei thei tawh lo.



"Duata, Bawihpui, tu nge lo haw le?"



Kawngkhàra an pa lo lût an hmuh veleh chuan an lo pan ve vat a, ani pawh chuan a fanu leh fapa chu lo kuah dùn vatin," Ka duat êm êmte u, min lo ngai tawh em? Kei pawhin ka ngai tawh che u alawm. In va han hmelțha tak êm!!!" tiin a bân lehlam lehlamah chuan a pawm kâng ve ve a.



Anni pahnih pawh chu an hlim ve bawk a niang, an râk ve nawk nawk mai.



Choka ațangin ka nu a rawn phei a, Muansangate pafa lo inpawm țûn a hmuh chuan," Âpa a lo haw tawh a ni maw? Zonun, thil chu va ei ve tawh la," a rawn ti a.



"Aw le, tunah chuan nau min awm chhâwk tùr a rawn haw tawh bawk a," tiin ka nui phawt a, chutah," Eng nge i ei ve duh dâwn le?" tiin Muansanga chu ka melh pah a.



"I ei ang apiang kha a ni mai."



"Mi hi chu i ngaisang teh tak e aw!!" ka tih chuan ka nu chu a lo nui ve a, ani lah chuan," Ka nupui leh ka fate nu ni miau hek che," a lo ti duh lek a.



Ka pa thih hnu ațanga rei vak loah khân loh theih lohin an inah kan insawn lût ta. A hreh ve ngàn ngàn asin; mahse, ka nu amah chauha a awm tùr kha a ngaihtuah ve êm a ni, bâkah, ka nu kha a ngaihtuahawm lutuk ve bawk si a, ka pa thi thut mai kha a tuar êm êm mai si a. Fa ka neih hnuah erawh tu hmel a hmuh khân a chhâwk ta êm zâwk a, bâkah, inngaihtuah lunglèn nei hman lêk lova a buai a ngai ve ta si a, Muansanga'n nau awm tùr awmpui lâk a rawt pawhin 'aw' ka pawh duh hauh lo, ka nu tân damdawi țha tak a ni tih ka hre ve tlat.



"Vawiin chu thil țha tak ka tawng asin," tiin dining chair-ah chuan a rawn țhu hnai a.



"A va làwmawm ve!! Eng thil nge ni?" ka lo ti vat a.



"Zànah mut hnuah ka hrilh ang che."



Ka melh sawr sawr a," Tunah min hrilh ve mai la?" ka tih chuan ani chuan thil dang daih a lo en tawh niin!



Ka âwmbâwr lo lang chu ka khuh țha vat a, ani chu a lo nui suk a.



"A ho e, nautein an hnêk lai pawhin i tilang tho a."



"A țùl hun a awm ve alawm, țûl loah tihlan chi a ni hleinem," ka lo ti a.



"Ka tâ a ni tho, nangmah pawh kha i pumpui khân ka tâ i nih kha," a ti leh a.



"Ei mai mai teh," tiin chhang chu a lamah chuan ka nawr phei a.



"Hei ai chuan, thil dang ei châk ka nei maithei a ni," rawn kûn hniamin a ti leh sup a.



"Zahngai! Zahngai!"



Nui suk hian,"I tih tak tak hauh loh kha aw," a ti a, kei chuan," Ei mai mai teh, Luhlulpa," ka lo ti thung a.



"Maw?!!"



"Eng mah."



"Han sawi țha leh teh," a tih chuan,"Ka hmangaih che, Luhlulpa," nui chung hian ka lo ti a.



"Hriat nuam lo tak a nih lêm loh chu, 'Zahngai' han tih leh ngawt ai chuan," a lo ti a.



Nui hak hak chung hian,"Hriat nuam i tih lai tak chu 'Luhlulpa' tih lai tak kha a niin ka hria," ka lo ti a.



"Luhlul viau lo ila chuan ka nei thei dâwn si lo che a."



A dik chu ka ti, LUHLULPA hian a luhlulna avàng chauha min nei thei a ni si a, fa țha tak min pein hlimna tam tak min siamsak a, min la siamsak zêl bawk ang, luhlulna țha tak chu a ni e.






*LUHLULNA HI A ȚHA LAMA HMAN THIAM CHUAN HLAWHTLINNA HLU TAK MIN SIAM THEITU A NI*





(A lo tàwp leh ta. Dawhthei taka min lo nghâktute leh chhiar țhinte, ka lâwm vek e. LOVE YOU ALL😘.

Story thar nèn lo lêt vat ka tum ang, lo dam țhain lo inenkawl țha ula, inhmuh leh thuai kan tum dâwn nia)