☆THUCHAH HNUHNUNG☆ - By Dingdi Pachuau

☆THUCHAH HNUHNUNG☆


By Dingdi Pachuau





Duhtak,(chu ka'n ti ve ngawt tak na a, ka inthlahrung leh deuh si; mahse, ka ti laklawh tawh, hmang tawh mai ang)



Thil thleng engkim mai hi ka thiam loh vek a ni tiraw? Mahse, 'I thiam loh a ni' chu min ti kher lo ang, nang chu mi fel leh thil hre thiam tak i ni si a.



Zanin chu kan nunhlui (ti ila hun kal tawh a ni zâwk mah ang chu, nang nèn hian nunhlui tia han sawi hluai tùr kan nei hauh si lo)ka han chhui kîr a, nimin ang maiin suangtuahnaah a rawn thar a, a bul tê ațangin suangtuahna mitthlaah a rawn inlâr dawt zut zut mai.



A hmasa berin, thurûk ka hrilh phawt ang che, ka star hmasa che tih i hre hauh lo tiraw? Ni e, i hre hauh lo. Sunday tlai a ni a, khami nia kamis vâr leh kekawr dum i hâk kha ka la mitthlà lêt thei asin, chuan kan lêng ho ta a. Nimin ang maiin tunah pawh hian ka mitthlaah khami ni kha ka la hmu reng mai, koh kìr leh theih se...



Khua hmuna lêng dùn ta chu, sakhmêl intawn ni a lo her lo thei lo va, kan inkârah eng emaw chu a awm tih hrilh kan ngai lo ve ve. Țawngkam hian sawi kher lo mah ila kan mitmeng leh chêtzia hian a thup ve thei si lo va tiraw?



Mahse, kan inkâr hi a puitling thei ngai dâwn lo tih a tìr tê ațanga hmu lâwk sa ka nih avàngin duh ru viau chung chein ka hnaih duh lo che, ràlkhat ațanga thlìr mai che hi chu ka kham mawlh lo; mahse, puitling lo tùr leh hlawhtlinni awm ngai lo tùr chuan bul țanpui che ka duh lo va, ka tum lo bawk, rilru thinlung nâa siam che ka duh loh vàng a ni. A chhan min zawh pawhin ka hrilh ngai hauh lo che a nih kha. I hre thiam thei tawh em?



Kan inkâr chu tleirâwl pahnih induh tawn chho boruak ang maiin a nuam chho a, puitling thei ngai lo tùr tih hre mah ila kei pawh hian hnar che chu har ka ti, ka duh loh vànga pawm lova hnar che ka ni si lo va, rilru hrehawma i awm tùr chu hrehawm ka ti ve tho asin.



Min hmangaih thu harsa ti takin min hrilh ta a, khami zàn min hrilh laia i khurh nasatzia kha, i awah a hriat vek, zah theih loh tàwp chhuaha sawi chhuak i ni tih ka hria, ka ring che a, ka lâwm bawk a; mahse, ka làwm êm êm rualin hrehawm ka ti tho bawk si. A chhan chu ka sawi tawh khi, kan inkâr kha a puitling thei dâwn ngai lo tih ka hre tlat a ni.



I awm dàn ka tilài tih ka hria, ka duh thu che sawi ve lo mah ila ka thinlungah hi chuan a chiang khawp thung. Tlangvâl fel tak i ni a, kei lo mi dang thlan nahawm tak tak i hmu țeuh ang tih ka hria; mahse, tih tak tak khân min duh ve miau si a, ka pawm ve loh thu ka hrilh chung che pawh khân min kalsan hlei thei bîk lo a nih kha.



A lo va rei ve tawh êm!! Khami ațang khân kum 10 aia tam hret a lo liam ve ta, ni si lovin induh ru reng tho siin phone lamah kan in-text reng tho a nih kha. Min duh tih ka hria, kei pawhin ka duh ve tho bawk si che a, hmalam huna i rilru na tùr chu ngaihtuahpui lo che ila chuan hun rei lo tê atân ka hlimpui ngei ang che; mahse, chutianga 'play' mai mai atân chuan ka phal lo che a ni, mihring thinlung hi infiampui nân mai mai chuan a hlu lutuk si a.



Harsatna i neihnaahte thuràwn ka pe ve țhìn che a, zilh i ngaihnaah pawh ka zilh tho bawk che tih i hria. Tlangvâl zakzum ve tak i ni a, kei lah mi ti zawk zawk lo ka lo ni ve tho si a, inkawp rem lo tùr hi chu kan ni sa ve hrim hrim alawm. Khua hmuna awm e ti lo chuan inkhâwmna a thuhmun loh chuan a inhmuh loh theih khawp mai tiraw? Kum 10 chuang ral tawh mah se, ka hmuh che hian tleirâwl tuaitìr star nei ang mai ka la ni, tûn thleng hian. A mak asin, ka hmuh che hian ka lài chhe êm êm reng a, ka thinphu hi a dik thei ngai lo, hei pawh tûn thlengin a la ni fan.



Mipa bulah 'Ka hmangaih che' tih țawngkam hi ka la sawi ngai lo va, ka duh thu lah ka sawi ngai hek lo. Nang hi chu ka thinlunga i thawh dàn hi a dang êm a, ka sawi chhuak lo a nih pawhin ka mitmeng ațangin i hriat vek ka ring.



Kan awm dàn hi ka hre thiam alawm, min beisei ngam tak tak chuang lo, min thlah tùrin min duh lutuk ve bawk si, chulai boruak chu, tuilairapin i awm tlat a, chu chu ka thiam loh tak pawh a ni. Ka tihluih tlat chuan Khuanu rorèl ka bawhchhe dâwn tihna a ni a, a lêt a awm ngei ngei dâwn, chu chu kei chuan ka tuar thei mai ang; mahse, i tawrh ve ka phal thei lo, chuvàngin, a hnu leh awm tùr avànga lungngaih ai chuan tuna lungngaih mai hi ka thlang zâwk a ni. Khuanu rorèl bawhchhiatpui tùr êm chuan nang hi ka thlang phal lo che, a lêt a na dâwn êm asin.



Tlêma i beidawn ve tâk hnuah kha chuan,"Pasal i neih hnuah pawh min be ve țhin tho rawh aw," i ti a nih kha, kha thu i rawn sawi chhuahna thinlung kha ka khawngaih lutuk! Ka hre chiang ngang mai si a. "Tehrêng mai, min biak duh phawt chuan," ka ti a nih kha. I number hi ka delete phal lo, online khât viau mah la, i dp thlìr tùr tal ka la nei thei a...



Nupui i nei dâwn tih mi kâ ațangin ka hre ta. Mak ka ti hran lo, nang ngei pawhin min hrilh thuak tawh tlat, a chhan chu i chhûngte'n nupui nei tawh tùrin an ti che, keimahah i beidawng tawh a(A chhan chu vawi khat kha chu 'Innei ang' i ti hlawl tawh tlat!) Ngah chhuah tùr leh beisei tùr awm lo nghah reng ai chuan mi dang i pan mai loh nâkah! Ka thiam lo miah lo che; mahse, mi dang kâ ațanga ka hria kha chu nâ ka ti ve, min hrilh ve mai tùr a nia ka ti; mahse, ka dem chuang lo che, a har ve dâwn êm asin.



Lawmpuina ka rawn hlàn che a nih kha, lawmpuina hlan mai loh che chu tih theih ka nei lo, ka chelh khawtlai thei tawh lo che; mahse, thinlung erawh a pângngai thei lo. Ka hmangaih che tih hi ka hre chiang êm êm tawh mai si a.



Zàn mut a har ta țalh mai. Ka mit ka chhìn apiangin i hmel ka hmu a, ka ngaihtuah ngut ngut zêl che, chuvàng chuan, han mu ve țhìn mah ila,'hìl' hi a thawk thei lo țhìn; mahse, hei hi chu ka chan tùr chu a ni, ka hre lâwk vek.



Hlim takin nupui chu nei la, min theihnghilh tum tlat ang che. A har ve maithei; mahse, mipa i ni alawm, i tum chuan i thei ang tih ka chiang.



Kei erawh chuan theihnghilh che hi ka tum lo, ka tum lo law law ang. A chhan chu ka theihnghilh thei dâwn si lo che a, pasal a chhia a țha ka lo  hmu ve thei ta ngai a nih pawhin ka thu tiama dingin ka rawn hrilh hmasa ber ang che, chuan, min rawn telpui ngei pawh ka phût ngawt ang. Nang erawh chuan i nupui neih tùrah hian min sâwm ve miah lo; mahse, ka hre thiam tho che a nia, thiam loh ka pe lo che.



Hrisêl takin, hlim takin awm ang che aw, chu chu ka duhsak theihna che tàwp ber a ni tawh si a. I dam țhata i hlim chuan kei pawh ka hlim a ni mai. Min theihnghilh i tum hrâm bawk dáwn nia, kei erawh chuan engtikah mah ka theihnghilh ngai lo ang che, theihnghilh che hi ka phal thei ngai lo ang.



A tàwp ber atân, ka hmangaih che. Ka hmangaih che avàng hian hlim tùrin ka duh che, hlim la, min theihnghilh rawh. I thu sawi ka pawm ve loh avàng tal pawh khân min elsèn nân hlim la, min theihnghilh rawh. Hei hi tihlawhtling hrâm ang che aw.



Hlimna zawng zawng nei turin ka duhsak ngawih ngawih che.



Hlimna zawng zawng nei tùra duhtu che,

143





A.N : A mipa hian nupui a nei tawh maithei(?) A hun hi ka hriat chiansak ta lo tlat.
 Chu pawh chu lo ni ta se, aw nang mipa, he thu hi i lo chhiar ve a nih ngai chuan a duh hi tihhlawhtlinsak hrâm tùrin ka ngèn che a, a rilru hrehawm tùr lam ngaihtuah lovin nangmah kha hlim ang che.



(Kei chuan ami ngenna angin ka rawn ziak ve mai a ni e)