☆24/7☆ - 1 By Dingdi Pachuau

☆24/7☆ - 1 By Dingdi Pachuau






"Naktûk chu, thawk ve la?"



Melh ralh pah chuan,"Mipa thawk chhuak tùr kan awm sia?" ka lo ti a.



"A ho e, khatiang khân an ti ve ziah alawm. Thawk chhuak ve tawp rawh, engtin mah an ti lo ang che," a lo ti thung a.



Țhian inkàwm ve reng si hi, kan inang lo teh asin. Kei chu ka dâwihzep a; ani erawh a kâwlhrâwng viau thung. Kei chu ka dikna nia ka hriatah pawh miin hnehsawh taka min tih chuan ka ngawi ral mai zêl; ani hi chu a ni hauh lo. A theihtàwp tak meuhin a țang țhìn a, a aia upate pawh a hlau ngai lo. A kawlh a, a kâwlhrâwng a, thu zêp leh i pawh a nei khât khawp mai, a duh lohnaah chuan a puak chhuak pawp pawp a ni ber. Kan nungchang hi chhim leh hmàr ang hiala inang lo ni mah se, kan inkàwm ngeih ve êm êm tho si, mak tak chu a ni.



Zànah kan inkhâwm a, inkhâwm hi chu kan pelh ngai lo a ni, kan dam phawt chuan. Aizawl ațanga ka haw phei tawh hi chuan inkhâwm loh ka nei ngai lo, ka dam thei bawk a, biak inah hi chuan ka tam ve viau a ni. Kan țhianho hi chu kohhran upate pawh hian min fak ve țhìn rêng a ni, inkhâwm leh zàikhâwm hi kan peih ve êm asin, kohhran lama inhmuh khâwmna lah kan pelh ngai si lo.



Khum ațanga ka la thawh chhuah hma chuan ka nuin," I kal thut a ngai a nih chu, insiam thuai thuai la, kal thuai mai rawh," tia ka u a hrilh làwng láwng chu ka hre thei a. "Eng tak chu ni maw? Khawiah nge kal a ngaih thut ni?" ka ti ru nap nap a.



Ka tho ve nghâl zat bawk.



"Nu, khawiah maw?" ka va ti chhuak a.



"I nutei maw le, damdawi ina hruai a ngai thut a nih àwm chu," a lo ti a.



Ka u Taitea pawh chu a lo insiam vat vat a, motor la chhuakin ka nuteite in lam panin a tlân ta nghâl a.



"Nau a nei dâwn tawh tak tiraw?" tiin ka nu chu ka zâwt a.



"Aw, i nutei rêng rêng pawh, neih dâwn hnaih lutuk tawhah chuan damdawi ina awm daih tawh tùr hi a nia, buaipui chûk hi a ngai ziah," a ti ve nang nang a.



Thil ka ngaihtuah chhuak thut.



"Nu, vawiin NREGS hnathawhnaah chuan tu nge thawk ta ang?" ka ti ta chat a.



"I thawh mai a ngai dâwn ta a nih hmel. VC lam pawhin min hre thiam ang chu a?" a lo ti ban deuh chat a.



"Secretary kha U Kima a ni lo'm ni? Phone-in hrilh hmasa ila, an hre thiam tho ang chu?" ka lo ti ve a.



Chaw ei khamah hna thawk tùr chuan innghah khâwmna hmun lam pan chuan ka chhuak ve ta a, ka thlen chuan an lo awm nak nak tawh a, Mazuali pawh chu ka hmu nghâl.



"Lulian, i lo thawh theih reng kha!" tiin min lo chhàl zat a.



"Taitea a hman lo alawm, tukinah damdawi in lamah a kal a ngai thut a," ka ti a.



"A nuam dâwn lutuk! Vawiin chu ka'n hrual tak tak ang che," tiin a nui var var a.



"I hrual ka ngai bîk lo aw, hnate zawng ka thawk ve fo bawk e," ka lo ti thung a.



"Kan hria ang chu!" a lo ti duh chauh a.



Kan khuaah hian high school thleng chauh a awm avàngin zir zawm tùrin hmun danga awm a ngai a, Lunglei ai chuan Aizawl chu ka la duh ve deuh zâwk bawk nèn, Aizawlah kum 7 zet ka va awm ve ta. Lehkha thiam tak chu ni lo mah ila, ka fail ngai bík lo. Tunah hian M.A(English) result ka nghâk mêk a, ka pass ve ngei pawh ka inring bawk.



Kan khuaa ka haw châng hian hna thawh chhuah a ngaih chuan ka thawk chhuak ve ziah a, nêp tak chu ka ni bîk lo chuan ka hria. YMA leh kohhran țhalai hnatlànnaah pawh ka chhuak ve ziah, ka theih táwp chu ka chhuah ve țhin. Chuvàngin, hetia Mazuali'n,"Ka'n hrual tak tak ang che," a tih pawh hi a rûk tak chuan ka la na ve khawp. Aizawlahte chuan hostel-ah ka awm a, hna thawh tùr awm hek lo, ka thawk lo a ni mai a, kan khuaa ka haw zawngin ka thawk ve țhìn chiang êm!



Kan khua hi thingtlâng khaw lian ve tak a ni a, mi chêng pawh kan tam ve reng. Vawiin kan hna thawk chhuak tùr innghâk khâwm pawh kan tlim ve hmur mai ka ti, țhalai kan tam riau mai.



"Engah nge i lo thawh ve dâwn ngawt a? I khai uai ve tawh elo?" Lalrova, kan khaw tlangvâlah pawh thawveng ber pâwl chuan a rawn ti a, a rawn nui huah huah zui a.



"Taitea a hman lo-" ka sawi zawh hma chuan Mazuali'n min rawn țawng hnan hmak mai.



"Kei pawh ka khai uai bîk lo, ka thawk tho," a lo ti nghat a. A nui miah lo lehnghâl a, nuam lo ka lo ti deuh ringawt nia.



"Nang chu te tak tê i nei ve tawh alawm," Lalrova chuan a rawn ti leh a.



"I ha bàl a nih chu!"



A hnehsawh leh lutuk chu hrehawm ka lo ti. Fiamthu mah ni se Lalrova chuan a lo ngai hua ang tih ka hlau ru khawp mai a, hrehawm ka lo ti ţûng mai.



"Duh tâwk teh u! Hming an lam țêp tawh ang," tiin ka lo inrawlh ta vat a.



Lalrova lah chuan,"Lallianzuali tel venaah hi chuan a tàwpah kan zak chem chem ziah,"nui chung hian a lo ti a.



"Ngawi mai mai teh, kan bulah pawh rawn awm hnai vak lo la a țha ang, in nuin min rawn hmuh zawng-" a tih mêk lai chuan," Robawih, kuhva chu?" tiin a bialnu, nuthlawi chuan a rawn ko ta nghâl chiah a.



A bialnu a ni tih pawh hi Mazuali min hrilh tho a nia. Lalrova ai hian kum 6 zetin a upa a, khaw danga pasal nei rawn haw leh a ni. Pasal a nei hma ve deuh a, a fanu pawh a nula uaih tawh nghe nghe.



"Hlau leh teh ang chu!" zàwi tê hian Mazuali chuan a lo ti sap a, Lalrova hriat theih tùr tâwk chuan a ring a, a hre pha chiah rêng bawk a.



"Lallianzuali tak hi chu aw!!" a ti nung nung phawt a, chutah, lo kal thar hnênah chuan," Kha, min dîl lova min lo pai kêp zâwk tùr hi i ni asin le," a ti leh nuah nuah a.



"Ka hmanhmawh deuh a, ka rawn pai theihnghilh daih alawm," a rawn ti ham ham a.



Secretary chuan hming a han lam lauh lauh a, a lam zawhah hna thawh dàn tùr sawiin kan hna thawhna tùr hmun lamah chuan kan liam ta nghâl a. Hmun hnihah kan ințhen a, Mazuali nèn chuan huan terrace lai tùr zîngah kan tel hlauh a, kan inzui thei ta zêl a ni.



Bâwngtuthlawh kan ken ve ve avàng chuan kan lài ve nasa a, hmeichhia nih avàngin àwl deuh leh zelthel deuh kan tum bîk lo. Ni a sa si a, ka thlan ka biangah a luang zawih zawih thei hial a ni.



"I thawk nasa lutuk! Indìm deuh teh," tiin Taitea țhianpa, U Ngura chuan min rawn fiam a, ani pawh a thlan a far zawih zawih mai.



Ka lo nuih a, tlêm chuan ka tha chu ka thlah ve ta deuh a.



"I rawl ngawt ang, i thawk nasa êm mai," a rawn ti leh a, ka lei chehna bul chu a rawn chêk ve mawlh mawlh a.



Nia, ka rawl ang, ka bân hi a rawl ngawt ang chu; mahse, chawlh deuh zut ka duh bîk si lo, bákah, Mazuali min tih dàn kha ka hre reng a, nêp deuha thawh ka duh lo.



Hmalai chawlh kan neih lai chuan," I biang sen nasatzia kha, kava khawngaih reuh tak che! Hmm, ni hi a sa ve êm bawk a ni, zànah i biang a sa ve vat vat reng dâwn a nih kha," Mazuali chuan a ti a.



"Nia; mahse, zan khat bâk a ni bîk lo ang chu maw," tih pah chuan ka biang sa ham ham chu ka dawm a.



Terrace chu kan lai zo har phian mai, thing zung a tam ve êm bawk a ni. Dîl lài chu an zo hma zâwk, ràl lehlamah an kûk rûih rûih hlawm a, keini lah chu kan la lai zo thei si lo.



"Hetianga laih zawh a har dâwn te chuan inzât deuh chiah lo deuha min țhen tùr a nia," tiin Sanglùra chu a phun nang nang a.



A bula kan kohhran upa Pu Châma chuan,"Hetiang hian laih a har ang tih an hre bîk nâng," a lo ti chuar chuar thung a.



"An țhen thiam lo hrim hrim. A harsa leh thawh hrehawm lamah hian min dah ziah zui," a ti leh nung nung a.



A bul chiaha mi chuan," Kan inang a nih chu, kei pawh a haw har lamah hian min la dah zat zat," a lo ti ve bul bul a, a hmêl ka en loh avàngin tu nge a nih ka hre thei mai lo.



An phun deuh bal bal hlawm a.



Kan piah deuha awm Pu Pianga, kohhran leh khawtlâng lama thawhhlâwk vak bîk lo leh zu pawh duh ve deuh chuan,"A khai! Nulate pawh an awm ve hi. A tlangvâl zâwkte in phun in phun chuan a țha nâng, kan zo țêp tawh alawm, hah khat kan thawh leh chuan kan zo vek mai ang," a lo ti chuar chuar thung a.



"Inthlan leh hunah chuan an tling tawh lo chiang ngawt ang chu,"an ti zui leh bal bal hlawm a, nuam lo tihna rilru ka lo nei. Ka hriata mi an rèl hian rilru chhûngrilah hrehawm ka lo ti țhin.



Kan zawh hnuah chuan kawng chhoah chuan muangchángin kan kal chho a, ka hah ngei mai. Mi dang chuan kal an lo thei nasa, Mazuali hnungah chuan thaw hluam hluamin ka kal ve țauh țauh a, chawlh chhên erawh ka tum bík lo.



In ka thlen chuan Taitea pawh a lo haw tawh a, ka nuin thingpui min lo siamsak vat a, ka nutei chanchin chu min hrilh pah mawlh mawlh bawk a.



A hnu deuhah chuan,"I chau viau lo maw? Tui sa deuh ver vawrin i inbual dâwn nia," a ti a.



"Ka chau viau lo, kawng chhoah erawh ka hah a ni," nui deuh chung chuan ka ti a.



Zanriah ei khamah chuan ka room-a ka awm laiin ka phone a rawn ri a, nui deuh sak hian ka han en a, a rûk tak chuan min rawn call har ka ti tawh lutuk ringawt!



"Min rawn call har e!" ka ti nghâl táwng a.



"Lungawi lo nghãl ringawt lo la?  Ka buai theihzia chu i hriat vek kha," a rawn tih chuan ka lung chu a awi deuh nghâl mai, a aw ka hriat hi chuan ka lungawi lo rei thei lo, bâkah, ka pangchang han lungawi lo der mai mai ka ni tih lah a hai hek lo bawk.



Pangchang tak hian,"Buai pawhin min biak zeuh tho chu ka phût tlat tho a," ka ti sap a, chutah,"Min ngai vak lo a nih ka ring  deuh tlat," ka ti leh a.



"Ngai.. lutuk!!! Kan inkâr hi pawh hnài theih se ka ti asin, ka bulah hian ka hmuh theih tùr hian awm reng thei la..."



Ka lung hi a awi nghâl ngawih ngawihin ka hria. Ka ngaih ang tho leh ka thlâkhlelh ang tho hian min ngaiin min thlahlel ve tho a lo nih dâwn hi. Nia, kan induh tawn ve êm asin, ani khawpui tlangvâl chhe lo leh sawrkâr zêm zenin min han duh ve tlat mai hi mak ka ti țhìn, mi dang a hmuh zawh tehlul nèn!



"Vawiinah NREGS inhlawhnaah ka kal ve a, ka hmai a sa vek maw le," tiin thil dang chu ka hrilh ta daih a, ka biang sa var mai chu ka dawm pah a.



"A ni maw? I chau em? I hah ngawt lo maw?" a rawn ti a.



"Hah hran lo, nî erawh a sa viau a ni," nui chung hian ka ti a.



"Ka va khawngaih tak che! Kan inneih hunah chuan ni sa hnuaia hna hahthlâk i thawh ka phal hauh lo ang," a rawn tih chuan ka nui var var a.



Inneih tih thu mal hi vawi thum a sawina a ni ta. Min duh ve tak tak lo se chuan a sawi chhuah duh ka ring bîk lo, nupui atân min duh tak tak a nih chuan mi vànnei ber berte zînga mi chu ka ni ngei ang.



Ka bân leh ka mal rawlzia chu, a nuam fahran lo khawp mai. A sek țùng maiin ka hria, zînga khum ațanga ka tho chhuak pawh ka ai-ah tuar tuar lo chauh a ni!



Nilêngin inah ka awm phah ta ringawt. Ka nutei chuan chawhnu dâr 2:36-ah naute a nei ta, mipa a ni, a làwmawm khawp mai. A u-ah hmeichhia a nei tawh a, tunah mipa, a nei thiam khawp mai.



Whatsapp status lamah a thlalâkte chu ka han hmang ve chuai chuai a, a ngo reuh bawk a, a pian pawh a țha. Ka status chu Ațana pawhin a lo hmu, a rawn comment zat.



*Hei aia țha hi kan la nei ve dâwn nia*  tiin.



Ka nui pût pût ringawt.



*******



Ka result a chhuak ve ta. Ka pass țha ve reng. Ka chhûngte an lãwm khawp mai a, lawm nân chhûngkhat laina hnaite nèn kan inah chaw kan ei khâwm a, Mazuali pawh a tel lo thei lo, ka țhian kawm ber a ni si a.



Ațana pawhin lawmpuina min rawn hlàn a, Aizawl ka phei veleh ka duh ber thil min leisak dâwn a ni àwm e.



"Ațana hi chu a fel hmel ngawt mai!" a rawn tih chuan," Fel e, ka phû lo zâwk takzet a, a châng chuan ka insit deuh țhìn," ka lo ti vat a.



"Ho lutuk! Induh leh inhmangaihte inkârah insitna awm suh se, hmangaihnaah chuan phû loh a awm hleinem," tiin min lo hnèm vat a.



Kan upa ber Lawngtlaia pasal neiin," I rawn zin phawt chuan i pass manah i duh apiang i u Puia'n a leisak dâwn che a nih chu, i va vànnei tak!" a rawn ti a.



"Rawn zin kher ngai lovin min leisak mai se," ka tih chuan U Puia chuan," A theih loh! Min la rawn tlawh lo rêng rêng, kan in thar min hmuhpui pahin rawn zin rawh," a rawn ti dût dût a.



"Zin ka harsat êm hi," tiin chhuanlam chu ka han siam ve a. Dik tak chuan zin hi ka peih lo, motor ka rui peih bawk si, a theih hrâm chuan motor chuan loh hi ka duh zêl.



"A, rawn zin mai rawh, hna i zawng nghâl ang a," a rawn ti leh a.



"Zawn kher ngai lovin kan in chhûngah hian hna a tam lutuk," nui chung hian ka ti a.



Aizawl lamah marksheet lamin ka phei leh a, Ațana nèn pawh kan inhmu leh thei ta. A țhat dàn ngai rengin a lo la țha, ni leh lo, ka ngaih vàng nge, a lo țha sawtin ka hre leh ta zâwk. Vànnei hi ka va inti tak!



Restaurant-a kan chawlh lai chuan,"Eng chu nge i pass lawm nân chuan kan lei ang?" a ti ta a.



"Lei ka ngai lo, min leisak duhna thinlung vàng khân ka lâwm tawh lutuk, a ngai lo," ka lo ti a.



"Ngai e, kan lei ang. Chuan, i awm ve deuh rih ang a, i inhlawhna tùrte kan zawng pah nghâl ang a?" a tih chuan,"Ka awm rei thei lo, awm rei tum pawhin ka lo kal lo, Lawngtlai lama zin ka ngai a," ka lo ti a.



"Eng nge i tih dâwn?"



"Ka ute in thar ka la hmuhpui ve lo va, ka inthiam lo ve deuh hlek tawh bawk a," ka lo ti a.



"A nih tak chu, nia, a țha alawm, va hmuhpui-" a tih lai mêk chuan," Ațan!! I ni tak tak! Ka hmu hlauh che chu ka va lãwm tak! Min thlah lawk teh, a hmanhmawhthlâk sia," nula pakhat hian kan awmna lam rawn pan pah a rawn ti chûl a.



"Effie!! Eng nge i tih a? Engtikin nge i lo kal?" Ațana chuan mak tih hmel deuh chuan a lo ti a.



"Nimin khân, hawh, min thlah lawk teh," tiin a bul chair-ah chuan a rawn țhu nghâl a.



"Hei, nula chawlhpui pawh ka nei ve a-" a tih chuan chu nula, Effie chuan min rawn en ta vat a.



"Oh, tihpalh lutuk!! Min hre thiam teh! Ațana hi ka lo pawt pêng lawk mai, ka hmanhmawh tawh sia, rei lo tê chauh a ni ang," tiin nui deuh chung hian Ațana chu a en leh nghâl a.



"Hawh, ka hmanhmawh a nia, tu mah hriat dang ka nei si lo, dik tak chuan hmel hriat ngai pawh ni lo two-wheeler taxi-a chuan lah hi ka hreh ve tumhrang bawk si a," a ti leh sawk sawk a.



"A mak thei! A nih, honey, ka han thlah lawk mai ang aw?" tiin min han râwn ve a.



"E, min ngaihtuah suh, han thlah rawh, ka lo nghâk reng ang che," ka lo ti a.



"A zia lo viau ka ti nain ka hmanhmawh tawh sia, i lo hre thiam a, ka lâwm hle mai," tiin Effie chuan mawi zet hian min nuih a, chutah, Ațana bânah chuan chelhin," Hawh, kal thuai ang, ka tlai hlauh ang e," a ti leh a, hmanhmawh zet chuan an chhuak ta dàwr dáwr a.



Effie kha a bialnu hlui a nih loh hrâm ka beisei. A hmel hriat hlui emaw a chhûngte, a țhian hlui emaw ni hrâm zâwk se. A lo thlen hunah chauh chu chhànna chu ka hre thei dâwn a ni.






*A MIZE CHHE LAI I HMUH AVÀNG RINGAWT KHÂN MI SUAL BERAH NGAI RINGAWT SUH, KHA A MIZE CHHE LAI KHÂN MIZE LEHLAM A LO LA NEI THEI A NIA*




(Vc inthlannah chuan in thlante an tling em? in țan zawngte an tling em? A tlingte an lawmpuiawm êm êm a, tling zo ve ta rih lote pawh an khawngaihthlâk rualin a tlin vek theih loh tih hria ila, tlâk huama in-contest an ni ve bawk a, an tân a la hun rih lo mai a ni. Khawtlang leh ram hmangaihna rilru pu tùrin fuih sauh sauh zâwk ang u aw.)