☆24/7☆ - 2 By Dingdi Pachuau

☆24/7☆ - 2 By Dingdi Pachuau




A rawn lêt har bîk lo ve. A lo thlen huna zawh tùr chu ka lo ngaihtuah atalângin ka hre rei lo pawh a ni mahna, eng pawh chu ni se, tu nge tih tal chu ka hre chhuak ngei ang.



A lo thlen chuan a hmel ațang pawhin a inthiam lo tih ka hre thei nghâl. A àwm ve tho alawm, min chawlhpui a, ei tùr pawh kan la ei hmain nula pakhatin nêl zetin amah thlah tùrin a rawn tur thei tlat.



"I va rawn thleng hma zâwk ve! A hla lo em ni a?" ka lo ti a.



"Hla lo ve, bâkah, min lo nghâk reng tih ka hria alawm, rei thei ka ni hleinem," a lo ti ve a.



Kan ngawi dun vang vang a.



"Ka hmel hriat hlui a nia, Kolasib lam mi niin ka țhianpa nau a nia, chuvàngin, min nêl ve a nih kha. A lo tlai țhelh tawh zâwk a," a ti leh duah a.



Ka ngawih reng avàng chuan dawhkàn chunga ka kut chu rawn vuanin," Honey, i thin a rim lo tiraw? Ka țhianpa nau ka tih tawh kha, thîk leh thinrimna chhan tùr eng mah a awm lo a nia," Ațana chuan a ti leh malh malh a.



"I bialnu hlui a ni lo maw?" ka ti ve ta a.



"Teuh lo mai! Țhianpa George-a nau a nia, ka țhianpa ve ngawih ngawih nau chu ka ngaizawng duhin i ring thei em ni?" a ti leh a.



"Engah nge a theih loh ang? Tûnlaiah theih loh a awm tawh hleinem," ka lo ti bauh a.



A nui hak a.



"Dâwt ka hrilh che i ring em ni? Min ring rawh, Effie kha ka bialnu a la ni ngai lo, ka tân chuan George-a nau mai a ni, a țha em? Hawh, ei tùr chu order tawh ang," a ti leh a.



Ka ringhlel êm êm pawh a ni bîk lo. Ani hian min kawp ka ring phal lo bawk, a bialnu hlui a nih loh leh a țha a ni mai, a țhianpa nau lo thîk mai mai tùr thu lah a awm lo, thinrimna chhan tùr ka nei lo ve.



"A țha a ni mai alawm, puar peng pawngin ei teh ang, ka ril a țâm tawh a nia," ka ti ve ta a.



Ani pawh chuan hlim hmel a pu ve leh ta. Nui sânga min en chung hian," Min ring ang tih ka hria alawm," a ti sap a, chutah," Tui tâwk tâwk ka'n chah țeuh ang e ," a ti nghâl zat a.



Kan va ei tam tak! Ei loh a phal si lo va, kan ei dùn nghek mai. Ei tùr chu min barh a, kei pawhin hawi deuh zak zak chung chuan ka barh ve a, kan hlim dùn khawp mai.



Ka haw phei hma chu ni tin kan inhmu ziah. A hman hun ka lo nghâk mai țhin, amah hi tlangvâl fel ve tak a ni a, excise dept-a thawk ni mah se zu lam hi chu a in ngai hauh lo, ka hriat theih miah loha a lo in ru țhìn a nih ngawt loh chuan; mahse, chu pawh chu ka ring chuang lo. An vêngah pawh Ex-committee member a ni phâk ve hial a, a fel ve tâwk ang tih hi chu a hriat viau a ni.



Ka haw phei tur chu sumo counter thleng min thlah a, inngai viau mah ila lènna khua hmun a nih loh miau avàngin ințhen a ngai tlat si a ni.



Kan khuaah pawh awm rei lovin ka ute tlawh tùrin Lawngtlaiah Taitea nèn kan phei leh a, thil min leisak tùr vàng pawh ni lovin tlawh ba ve hrim hrima ka inhriat vàng a ni zâwk. An in thar ka la hmuhpui tlat lo va, bâkah, kan àwl ve lai a ni bawk a, a remchâng êm a ni.



An in thar chu a nuam reuh khawp mai, zau tak phei chu a ni lo; mahse, a fel fai thlap mai a, bungraw hnawksak chuangbâng hmuh tùr a awm bawk si lo, kan in ai chuan ka duh zâwk daih mai ka ti.



Zànah U Puia țhiante an lo lêng a, nuam ka ti lêm lo nain rin aiin an lo fel a, fiamthu an duh bawk nèn, a hnu deuhah phei chuan ka nui ka nui ve ta mai. An țhianpa pakhat Zika an tih chu an fiam nasa deuh bîk a, ani lah chu amah insawisain nui duh ber berah a țang a, fiam a dâwlin a fel ngawtin ka ring.



Kan châm rei lo, zan thum chu kan riak, zànah an rawn lêng khâwm ziah a, a zan thumnaah meuh chuan kei pawhin ka nêl ve hlawm viau tawh. Kan haw tùr chu min ui der ve hle mai a, ngai lo ka ti chungin pawisa an thawh khâwm a, min thlahna an buatsaih a, zin leh thuai tùrin min chah sap sap hlawm a.



Kan haw phei leh hnu rei vak loah chuan U Puia chuan min rawn be leh a, a țhianpate school-ah English zirtîrtu hna a ruak a, chu chu thawk tùrin min lo sawihmuh niin. Ka pate chu ka han hrilh ve nghâl a, anni chuan ka duhthlannah an dah a, inrawlh an tum lêm lo.



Ațana pawh ka hrilh ve a, ani pawh chuan ka thutlûkna chu eng pawh ni se min pawmpui vek thu chu min rawn hrilh a, nui chung hian kum tam erawh min pêk a tum loh thu chu min hrilh nghâl bawk a.



Inneih a duh tihna. Ka ngaihtuah chuan ka nui sak a, kei pawhin rei tak innghahtîr chu țha ka ti bîk lo, ani'n hna nghet a neih tawh vàngin ka tân hna zawn ve chiam țûl ati lëm lo a ni.



Awm mai mai ai chuan tiin kei pawh chuan rilru ka siam thuai a, U Puia țhianpa school chu Lawngtlaiah ni lovin Lungleiah a lo ni a, Lawngtlai lamah a ni emaw ka ti char char a, Lungleiah a lo ni zâwk tih ka hriat chuan ka thaw huai mai, kâr tàwpah ka duh chuan ka haw thei mai dâwn a, a țha phian mai.


*******


Thla khat ka thawh hnu chuan ka tlângnêl ve ta deuh. Bâkah, zirtîrtu zîngah upa uchuak kan awm lo va, kan țhalai țhè țhàw viau a, a zia khawp mai.



Ka pain in luah hran a phal loh avàngin ka patea(ka pa nau)te ka fin a, pawi ka ti lo khawp mai. An fanu Rose-i, ka cousin zînga ka nèl ber pâwl a lo awm ve bawk nèn, kan inrualin kan duh zâwng pawh a inang hle mai si a, nuam ka ti khawp mai. Ani erawh chu eng college ber nge ka hre ta lo, chumi-ah chuan LDC-in a awm thung, a u hmeichhia erawh Aizawlah P&E dept lamah hna a thawk  ve bawk, lehkha hi an thiam thei a, hna pawh an hmu hma viau a ni.



Ka patea chuan kâr tàwpa haw zut a phal loh tâk hnuah pawh chuan pawi ka ti chuang lo. Rose-i nèn chuan kan tlei dùn viau, ka patea nupui lah a fel tho bawk si a, ka lung pawh a lêng lêm lo.



Ka haw ngai loh hnuah chuan kohhran țhalai lamahte ka inhmang chho ve ta zêl a, Rose-i lah a lo inhmang ve bawk a, ka tlângnêl ve thuai mai. Hla zir, hnatlâng, fellowship tih vêlah lah kan khua ang maiin ka tel ve zêl a, mi dang pawhin min fak ve thei khawp mai.



September thla ni 15, Inrinniah Rose-i nèn kan khaw lam panin kan tlân vang vang a, ka pa a hna ațanga dam taka a pension thleng țhak a thawk thei chu țhenrual țhate nèn làwmthu sawia chaw ei khâwm an tih vàng a nia, pateate nupa pawh zan riak lo tùrin kan hnungah an rawn tlân ve tho, an rawn tel ve tho dâwn tihna a nih chu, chaw ei khamah an haw nghâl ang.



Mazuali pawh a lo buai vat vat khawp mai, in kan thlen ațang chuan kan che ve nghâl vat vat a, vawk lian ve tak an lo talh a, khawtlâng ei tùr a nih loh vàngin vawksa tam zâwk chu an lo rëp dul mai.



Ka nute lamah chhûng kan ngah deuh a, kan inah chuan kan phu luai luai mai. Naupang an lo tam ve bawk a, kan chiar nuai nuai maiin ka hria, khua a țha chu a tihchi viau mai.



Hunserh chu ka nupuii (ka nu chhangtu chiah) pasal kohhran upa pa Sangtea'n a hmang a, Pathian hnênah làwmthu sawiin a țawngțai a, chumi hnuah chuan chaw chu kan ei nghâl mai.



Khaw thim hmain pateate chu an haw a, keini erawh Thawhțanni zîngah kan chhuak thung ang, Rose-i'n kan khuaah Chawlhni hman ve a châk tlat a, kei lahin ka lo thlahlel ve tho bawk si a.



Ațana pawh Lungleiah a rawn phei dâwn a ni àwm e. Hna lam vàng chu a ni lêm lo, achhûngte a rawn kan ve dâwn ni àwm tak a ni, ka phûr kher asin. Kan inhmu thei thuai tawh dâwn e.



Hlim rilru takin a rawn phei dâwn kâr chu ka hmang a, ka phûr lutuk chu ka inthup thei lo lek lek a ni. Zirtàwpni chawhnuah Bike-in a rawn phei a, a rawn tlân chak ngei ang a, a lo thleng har vak lo ang chu maw.



Mahse, zaninah chuan kan inhmu thei lo phawt ang, a chhûngte damdawi ina awm a tlawh nghâl dâwn tlat.



Inrinni leh Sunday ka la hman nawm ber țum a ni hial ang chu. Inah a rawn lêng a, ka pateate chhûng pawhin an lo hre thiam ve mai a ni chêk ang chu, țha takin an lo bia a, ka lâwm ru veng veng thei nia, a haw hnuah thil awmzia chu ka hrilh a, fel hmel an tih thu an sawi ve sap sap a, ka rilru pawh a nuam huai huai, min duhpui lo ang tih ka lo hlau ru deuh a.



Tlai khat chu kan in piah dàwra ka lût tur chu an lo buai deuh niin, tlangvâl pakhat, a hmel ena sual hmel vak pawha lang lo hian pawisa a lo rù a niang, ani lah chuan eng dang sawi lo chuan,"Ka ru lo," a lo ti ve tlat a.



Mahse, pawisa bo zât chiah chu a kekawr ipteah an hmu tlat si. A rûk a ni lo ang ti dâwn se, dàwr nghâktunu Nu Seni lah chuan pawisa bo a sawi dàn, chêng 200 phêk 1, chêng 100 phêk thum leh chêng 20 phêk 1 chiah chiah a lo la ni zêl mai si, a insawi fihlîm hlei thei lo a nih hmèl.



Hrehawm ka lo ti khawp mai, dàwr nghâktunu lah chu a râwl a ringin a âng vak vak tawh mai a, chuti lutuk chu ka lo beisei hauh lo. A chhan chu kohhranah a inhmang viau mai si a, thinrimthlâk viau mah se tlêm chuan a insùm ve deuh ka ring a nia.



Mi an rawn tam tâk  avàng chuan ka haw leh ta daih, ka lei tùr pawh ka lei ta lo a nih chu. Rose-i'n min lo hmuh chuan," Khawi, ei ila?" tiin a kut chu a lo dawh a.



"Ka lei ta lo," ka ti ta ringawt a.



"Engati maw? An nei leh tawh lo elo?" a tih chuan," A, an buai deuh a, ka lút ngam ta lo va," ka ti sap a.



"Eng buaina?!" tiin min rawn en ta há a.



"A, pawisa rûk chungchângah a ni àwm e."



"Maw? Han sawi chiang deuh teh, tuin nge pawisa chu ru a? Kan vêngah thil rûk hmang an lo awm a ni maw?" a ti leh a.



"Ka hre bîk lo, amah kha ka la hmu ve ngai lo a niang, bâkah, kha pa kha mi țawngmawh tak a ni ngei ang," ka lo ti a.



"Ka va ngaichâng ve chhin teh ang," tih leh chhuah a rual ta nghâl a.



Zanriah ei lai chuan Rose-i chuan," Thil rutu chu ka va hre ta alawm, vêng dang ațanga rawn awm an nia; mahse, a rei ve tawh viau mai. Pa, i hre lo em ni? Pu Sawma fapa Rinfela kha a lo nia, engtin nge an intih tâk chu ka rawn hre zui ta lo," a ti barh barh a.



"A pa beng țha lo kha maw?" a nu chuan a lo ti vat a.



"Aw, harsa ve deuh kha. An dinhmun ngaihtuah chuan àwm tihna chen ka nei tho a; mahse, tlangvâl țhalai tân chuan pawisa han rûk êm chu a fuh ka ti chiah lo, inhlawhin ni tin a chhuak thei àwm tho si a," Rose-i vêk chuan a ti leh a.



Kei erawhin sawi tùr ka hre ve hauh lo, an țawng chu ka lo ngaithla tawp mai a ni, an sawiate chanchin chu ka hre ve tlat si lo va.



Patea chuan," Rinfela i tih chu tlêm lai deuha jail tâng kha a ni em?" a rawn tih chuan Rose-i chuan," Ni chiang e, kha pawh damdawi vàng a nih kha. A sual ve deuh chu a ni, a pa sawtiang saw a ni tawh a, mite khawngaih a hlawh dâwn tehlul nèn, a awm țha duh lo tlat mai a," a ti leh barh barh a.



"An khawngaihthlâk riau asin," Patea chuan a lo ti leh sup a.



"Rinfela chu kohhran țhalaite pawhin an inah vawi khat kan tlawh tawh alawm, a pa damlo kan pahin kan tia, pawisa pawh kan pe ve hlek. Inkhâwm tùrin an sâwm ve a; mahse, beidawnthlâk an ti a niang, kan tlawh leh ta miah lo. Biak in hi vawi khat té pawh a la rawn dâk lo tih ka hre chiang hle bawk, țûl tihna pawh a nei lo a ni àwm asin," a ti leh a.



"A inkiltawih ve pawh a niang chu, tûnlaiah incheina a sâng tawh si a," patea bawk chuan a lo ti leh a.



"Ni lo, a ngaihven lo hrim hrim. A țhiante lah zu in mi leh damdawi lam ti mi hlîr mai, inkhâwm pawh ngaihsak lo an ni hlawm a, han khawngaih viau dáwn mah ila khawngaih tha hi a tho lo tlat țhìn alawm, amah hian a zir lo lutuk a, a pa khawngaih viau țhìn mah ila," Rose-i chuan a ti leh a.



"Biak in ngaina lo lutuk hi chu mi țha tluantling an awm lo a nia. Biak in ngaina chauh hi piangthar țha ber an ni chu ka ti hauh lo; mahse, Pathian faka inkhâwm hi ringtu țha chuan a tih tùr a ni a, Pathian a hmangaih a nih chuan  a biak Pathian in chu a ngaina tùr a ni. Chutiang tlangvâl chu ngaihzawn miah loh tùr aw, mâkpa atân chuan ka awt viau lo a ni," tiin nutei chuan Rose-i nèn chuan min rawn melh tawn a.



"Teuh lo e! Chutiang kan nei dâwn teuh lo, kan hûng țha tawh lutuk," tiin Rose-i chu a nui a, kei pawh chu lai ru deuhin ka lo nui ve a.



Rose-i pawh hian bialpa țha tak a nei, tuna an kohhran țhalaiah hian Secretary a ni mêk. Bâkah, an chhûngkua an rualin zah kai pha chin an ni lehnghâl a, ani pawh hi a vànnei dâwn khawp e.



Mutnaah chuan Rose-i chuan," Ațana nèn hian in nihna a rei tawh em kha?" tiin min zâwt a.



Room khatah kan awm a, kan room erawh a zau țha a, khum pawh a inhnaih lutuk lo.



"Kum hnih a tling ve tawh a nih chu, kum thum a ni țêp," nui chung hian ka ti a.



"A ni maw?! In inzui rei tawh reuh hle mai, keini chu kum 1 a chuang hlek chauh asin, a buai thei si a, vêng khat mah ni ila kan inhmu khât asin. Zànah pawh a lo lèn ngai loh êm hi, a hmingah pawh 'Lalbuaia' ka ti tawp," tiin a nui kar kar a.



"Mahse, in inbe reng thei tho a," ka lo tih chuan," Ni tho mai. Buai chung chung chuan inhmuh tih ve chhên pawh hi ka duh bîk lo va; mahse, zànah hi chuan lo lêng ve zauh zauh se chu ka ti țhìn," a ti sap sap a.



"Kei pawh a lo lèn theih chuan loh hi maw...Inhmuh loh deuh vang vangte hian inthlâkhlelhna a zual ve alawm, a țha lamah ngai ang," ka lo ti a.



"Rinawm tawn chuan a țha alawm. A nih, Ațana hian a kawp chein i ring ve țhìn em?" a ti leh a.



"Ring lêm lo. Min duh ve viau a, kei pawhin ka duh viau bawk, ka rinawm vàng hi nge ni, ka tân a rinawm hi ka ring ve tawp a," ka lo ti a.



"A țha alawm, inrin tawn hi a hlu êm asin. Kârah inrinna a awm tawh loh chuan ințhen a ni mai, ka bialpa hmasa nèn kan ințhen chhan pawh min kawp a, ka ngaidam a, a hnuah min kawp leh a, ka ring thei tawh lo, kan ințhen hmak mai, rin lohna a awm tawh chuan eng mah tihtheih a awm tawh lo," a ti leh sap sap a.



Kei chu tihtak taka ngaihzawng ka neih ve chhun chu Ațana chauh hi a ni, tleiràwl ngaihzawng pakhat chu ka nei ve ngei mai, star pawh ka nei nual tho nain engah vak ka ngai hlawm lo.



*******



Ka school bâng chu hmanhmawh lutuk lovin step-ah chuan ka chhuk boh boh a, ka hma hla vak loah chuan putar ni awm tak hian polythene hian eng emaw ni hi a khai bâwr ve nasa mai a, a bul ka thlen hunah ka khaipui ang chu tiin ka chhuk zêl a.



A kal chak lêm lo bawk a, a bul ka zu thleng thuai a. A thil khai lai chu bansakin," Ka pu, ka lo khai chhâwk ang che," ka ti a.



Mahse, a thlah hauh lo, a hûm nghet sauhin ka hria. Ka lam hawia a rawn inher chuan nui chung hian," A rih hmel si a, ka lo khai chhâwk ang che," ka ti leh a.



"Eng maw?"



A rawn țawng chhuah dàn ațang chuan a beng a țha lo tih ka hre ta nghâl a, ka hmui a rawn melh tlat a ni.



"Ka.. lo ..khai..chhâwk..ang..che," tiin hmui phun ațanga chiang thei tùr ang ber chuan muangchângin ka țawng a, a man thiam ve ta a ni chêk ang chu,"A ngai lo asin le, ka lâwm lutuk e," a ti bul bul a, a thil khai ka lâksak hnu chuan muangchângin a pên rual chuan ka pên ve ta a.



A rit reuh zêk mai, ka kut a kham lutuk.



An in thleng thlah ka duh avàngin ka zui zêl a, kawngpui kan pawh hnu chuan," Ka lo khai tawh ang e," a ti ta a.



Mahse, ka pe duh lo.



"In.. in ..thleng.. ka.. lo... khaisak.. ang.. che."



An in ni àwm tak kawtah chuan a ding ta, kei pawh chu dingin," In.. in.. em.. ni?" tiin in chu ka kâwk a. Ani pawh chu a lo bu nghat a.



Thil khai chu ka pe a, in chu a inkalh avàngin in chhûngah tu mah an awm lo a ni chiang, tún ang hunah chuan eirawng bâwl an awm a hun tawh viau asin le.



Làwmthu a sawi nuah nuah a, kei chu ka nui ringawt. Ka en deuh vang vang hnuah chuan ka kalsan ta a, ka haw kawngah chuan chu putar chu ka ngaihtuah zui vang vang mai.








*THIL, HRIAT RENG ATÂNA KAN DUH MIAH LOH HI THEIHNGHILH A HAR DUH PHIAN*