☆24/7☆ - 3 By Dingdi Pachuau

☆24/7☆ - 3 By Dingdi Pachuau




Chhûngte a nei lo em ni le? Amah chauha kha inah khân a chèn êm chu ka ring lo deuh si, a tu leh fate khawiah nge an awm ang? A tar ve tawh roh sia, khati chunga khatiang thil rit a han khai kha a khawngaihthlâk ka ti, a chènpuite ka dem ru tlat, tu emaw talin hruai tùr a nia. Ka pu chu ni se chuan khatiang thil rit kha a khai ka phal hauh lo ang.



Ka thaw hak a.



Mihring dinhmun inang lo thei lutuk leh nungchang inthlau lutuk chu ka ngaihtuah kai leh a, sual lam hi chu mihring piang chhuak tawh phawt rilruah hian a awm vek ngei a, chhia leh țha kan lo hriat hnuah pawh a țhen chu sual lam àwn tlat te kan awm leh a. Nu leh pain thu țha min hrilhin min zilh ve țheuh hlawm ngei àwm si a, thil țha lam hi chu kan hre tam tawh vekin ka ring, heti chung pawha sualnain min bâwih theihziate chu ka ngaihtuah pah a.



"Nang hi-" ka intauh dawt mai! Ka thil ngaihtuah avàng chuan ban chu ka lo hmu lo va, ka intauh nâ ang tih a hlauhawm zâwk asin, a ri dawt thei a nia!



"A nâ em?" tiin mak tih hmel tak hian min rawn en a.



Ka chal tuai vat vat pah chuan,"Nâ e," ka lo ti ve mai, chutah, ka nui ta sûng a.



"Eng thil nge i ngaihtuah a? Thil tawn i nei em ni? Khatiang ban lian pawh hmu lo khawpa rilrua ngaihtuah i nei tihna a ni a," chîk zeta min rawn en pah chuan a ti leh a, a kut chu a kuangkuah thãn a.



"Eng vak mah, ka lo ngaihtuah mûk deuh a nih kha, thil pawi eng mah a awm lo ve," tiin ka nuih leh sak a, in chhûngah chuan ka luhsan ta nghâl a.



Zanriah ei lai chuan patea chuan," Zanin chu i nu nèn kan chhuak lawk dâwn a, in lo awm ngam ang chu tiraw?" a ti a.



"Pa țhìn hi, hmeichhe puitling pahnih kan nih tawh hi, eng nge hlau se min tih le?" Rose-i chuan a ti nang nang a.



"Kan rei lo tùrah ngai ila, véngthlang deuha upa Zâma nupui kha Aizawl ațangin an rawn haw a, kan la tlawh ve miah lo va," nutei chuan a lo ti ve a.



"Eng natna nge a?" ka lo ti ve a.



"A thin a cancer a."



Cancer hi chu aw...khawvêl ata hi paih bo daih theih se ka ti. Ka țhiannu ve ber Mazuali pa pawh kha pumpui cancer vànga thi a nia, a nu khân a tuar lutuk a, buaipui ngaia a awm phah avàngin Mazuali khân a zirna a chhunzawm theih loh phah bawk. Chuvàng chuan cancer natna hi ka haw ngawih ngawih a ni tawp mai.



Chaw ei khama pateate an chhuah hnu rei vak loah chuan Rose-i chhass  Bsa 'Lalbuaia' chu a rawn lût ve hlawl mai!



"Eng nge i lo tih dâwn?!!" Rose-i lah chuan a lo ti heu mai!



"A mak thei!"



"Lo lêng rawh, rawn lèn hun i hre hle mai," nui chung hian ka lo ti thung a.



A țhut hnu chuan," I unaunu hi chu a ti mak thei a nia, amah vàngin ka rawn lêng ve êm êm a, eng nge ka tih dâwn tih min han zâwt a nia," tiin a vui nang nang a.



"I rawn kal khât ém alawm, i rawn lêng dâwn a nih pawhin min rawn hrilh hmasak ka ring deuh a," Rose-i chuan a lo ti thung a.



"Rawn țhàwn deuh thut che ka duh ve alawm, bâkah, ka lo lèn loh laia tlangvâl rawn lêng țhìn rawn thlithlai pah ka tum a, ka hriat loh hian min lo kawp reng ve thei tho a," Bsa chuan nui chung hian a ti a.



"I chhe ziap zuap e a!"



An inbiak dàn chuan ka nuih a tiza lutuk. An inngam a, an induh tawn tih a hriat tho si, an țawngkam hman dàn lah chu a huatthlala dèr si lo, an awhawm dùn ka ti.



Ațana ka ngaih a zual phah.



A hnu deuhah chuan room-ah ka luhsan ta daih a, a lo lêng khât ve si a, an pahnih chauha an inhmuh khàtzia ka hre ve kar. Hun pêk an ngai, hun thâwl nei tùrin ka duh.


*******


Chawlhni a lo thleng a, inkhâwm ka phûr deuh khawp mai, a chhan chu Rose-i nèn kawr thar kan țhuitír a, kan ha  thei tawh dâwn a ni. Krismas hnai ve viau tawh mah se, kawr thar neih hi chu a nuam ve hrim hrim, naupanchhiat hi a la reh thei tak tak lo.



Inhmeh ka inti ve khawp mai. A puan a inang a; mahse, a rawng a inan loh bâkah a țhui dàn a inang lo. Ani pawh a inhmeh khawp mai, kawr thar han hâk hi chuan inkhâwm pawh hi a phùrawm ve zar asin.



Tukin thu sawitu chu Upa Zuala niin ani thu sawi hi chu ngaihthlâk a nuam ka ti viau. A sawi pâr hluah lo va; mahse, amah hian a nunpui hi ka lo ti ve țhìn a, a thu sawi ei a awl ka ti bík. Sermon țha lutuk; mahse, an nunpui si loh sawi ang chi hi chu mi pawh hian an lo hre khawp a, sawi ţha viau mah se engah vak an ngai duh bîk dèr lo. 'An' ka han ti tak nain kei pawh ka ni tel tho mai. Upa Zuala erawh hi chuan a nunpui tih hi a hriat ngawih ngawih, a țawngkam, chezia leh nunphung ațangin. A fel viau a, a bula awmte hi a nuam, a hahthlâk miah loh. Mi fel ka hriat tam zâwkte hi an bula awm nuam ka ti vak ngai lo a nia, Pu Zuala hi chu tu pawh mai hian kan ngaina maiin ka hria, a nun a tlâwm êm a ni.



Inkhâwm bàn hnuah thla kan la ve zuai zuai a, kawr thar kan ha ve bawk sia, a thar tirha thla lâkpui ve ngei loh chuan.



Chawhnuah fellowship tùrin Rose-i nèn kan chhuak leh a, kan in leh biak in hi a inhlat deuh avàngin kan chhuak hma deuh.



Kawng chhak lama thlai hnah an zawrh ve țhinnaah chuan tlangvâl rual khat hi an lo țhu khâwm a, Chawlhni a nih vàngin a ruak vek a, chu chu remchângah awm nân an lo hmang ve a ni ngei ang.



Ka en hlawm lo va, min lo chhaih miah lo mah se a rûkin ka lai chhe deuh tho, min lo en dùn reng tih ka hre miau si a.



"Rose, in inkhâwm leh dâwn a ni maw?" an zînga tlangvâl pakhat chuan a lo ti a.



Rose-i chu a din deuh det avàngin makti rilru deuh leh hlauthâwng rilru deuh takin ka en phei a, kei pawh ka ke pên chu a ban deuh hlek.



Hêngho hi mi pângngai tak chu an ni lo tawp ang, tún ang hunah țhalai tân chuan fellowship hun a nih vàngin tlangvàl hawklak rual an nih ka ring ve tawp, en pawh ka en duh lo.



"Aw, țhalai fellowship zâwk a nia, lo kal ve ula?" a ti pah zaih a.



"Keini zawng, hetia tei mai mai hi kan inhmeh zâwk; mahse, nula hmelțhain min sàwm si chuan rilru a buai ta map mai,"a lo ti leh a.



A zak lo roh mai mai mang e.



"Lo kal tak tak r'u aw, kan phuisui sawt dâwn asin," Rose-i chuan a ti leh a.



Kan kalsan hnu chuan," I va sâwm peih! An lo kal àwm chuang si lo va," ka ti a.



"Țawngkam țha ka'n hmang ve a nih kha, an lo kal dâwn chuang lo tih chu ka hre ve tho alawm," a lo ti thung a.



Ațana'n min rawn call leh rih avàng chuan kan ding leh rih a, rei vak lo chu kan inbia. Ani pawh Durtlâng lama a chhûngte inah zanriah chu a va ei dâwn ni àwm a ni, chawhnu inkhâwm tlãn bovin a țhiante inah a lêng rih bawk.



"Keini chu hei fellowship kan nei dâwn a, kan kal mêk asin. Ka ti țha i ti em?" ka han ti a.



"I va fel bîk ve! Chawhnu inkhâwm hi  chu ka peih tehchiam lo va, bâkah, George-a niminah a rawn chho ve a, min rawn hrilh ve bawk nèn," a lo ti a.



"Kolasib ațangin maw?"



"Ni lo, Mumbai ațang zãwkin. Thil min rawn hawn ve a," a tih chuan hlauthâwng rilru deuh hian," Eng thil maw?" ka lo ti vat a. 'Zu' a ti ang tih ka hlau tawp. A in lo tih hre mah ila a in ang tih ka hlau tho, a țhiante lahin an in deuh vek bawk si a.



"Thil țha deuh mai maw le."



"A nih tak chu, kawnga i tlàn lai khân fîmkhur la aw, mi chêtsual zâr hi a zo theih a nia, Chawlhni a ni lehnghâl a, i fîmkhur sauh dâwn nia," tiin ka chah thlap a. Tlai lamah zanriah ei tùrin Durtlâng lamah a chho dâwn si a, ka ngaihtuah deuh a ni, mi léng chhuak an tam thei si a.



"Min ngaihtuah tih ka hriat hi chuan ka dam sawng sawng ziah. Aw le, ka lo fïmkhur ang, nang pawh nuam deuhin i fellowship dáwn nia."



Kan inbiak zawh hnu chuan Rose-i chuan," Deuh thlap thlap chuan. I ngaihtuah leh lutuk a nih kha, tlangvâl zu in ngai lo, fel pângngai tak a ni a, a ngaihtuahawm tawp nâng," a lo ti a, chak vak lo chuan kan kal pah a.



"Mahse, khatia hrilh kha a țha alawm, ani ngaihtuahawm lo mah se mi dang, ngaihtuahawmte chêtsual zâr zovin a vànduai palh thei alawm," ka lo ti thung a.



Vawiin kan fellowship chu nuam ka ti vak lo. A chhan pawh ka hre chiah chuang lo, ka rilru ka pe chiah lo a nih ka ring ringawt, Ațana ka ngaihtuah vàng pawh a ni mahna le.



Haw lamah chuan  Nu Seni, dàwr neitu fanu, nula la naupang ve deuh tak Ruati nèn chuan kan haw dùn a, Rose-i erawh hruaitu țhu hnufual zîngah a tel ta rih a.



Kal lama tlangvâl rual khat kha an awmna ngaiah khán an lo la awm a, eng an ti reng chu ni maw?



"Khûng rualho lah khu, vêng tițawptute an nih khu. Inkhâwm lah hi an ngaihsak dèr mai si lo va, thil rúk tùr an sawiho leh tawh a niang, an ninawm a nia," a ti hlak hlak a.



"E! thil an ru țhìn elo?" ka lo ti a.



"Rù e, kan dàwra pawisa pawh an zînga pakhat khuan a rù alawm, ka nuin police-ah a report duh lo mai mai zâwk a! Zahna lah hi an nei lo bawk sia, ka haw hlawm teh mai a nia," a ti leh barh barh a.



"Kha kha, a lo ru tak tak a ni maw?" ka tih chuan,"Ru lutuk e, a la țang tlat zui lehnghâl a, kei chuan police mantîr hmiah ka duh asin. An rethei si, a sual si, inkhâwmte hi a ngainêp thei a nia, Pathian pawh hi a hlau lo em maw ni?" a ti leh barh barh a.



Kei pawh chuan a rûk chuan ka hlau deuh hlawm ringawt nia. Ka pawi an sawi pawh a ni lo.



An bul kan thlen chuan an zînga pakhat chuan," In bâng tawh a ni maw? A nuam bawk em?" a lo ti leh a, a aw ațang chuan nichîna Rose-i nèn kan kal lama rawn betu bawk kha a ni tih ka hre thei nghâl mai.



Ruati'n a chhàn loh avàng chuan anmahni en pah chuan," Aw, nuam e," tiin ka chhâng a, an hmel chu ka en kual pah a. Mit sen deuh te, hmel bui deuhte leh hmai țawk deuhte an ni hlawmin ka hria. An hmel ațang chuan Biak in chu an tlawh khât ve maithei, pawisak vak an neih loh hmel tlat.



"Kan vêng chhûnga mi i ni lo chiang," pakhat chuan a rawn ti leh ta a, min rawn en ta țhap mai.



"Ni chiah lo deuh," tiin ka tàwi deuh a, miin min biak laia kal paha chhàn chu mawi ka tih chiah loh avànga tàwi deuh hret ka ni.



"Kan sual lutuk bîk lo a nia," min be hmasa bertu chuan a rawn ti leh a, a țhiante chu an lo nui hak a.



Mahse, nui ve miah lo a awm. Chupa chu țawng pawh a țawng ve lo, min rawn en ve zawk a, hmun dang a en lehnghâl daih. Ruati sawi, an dàwra pawisa rutu ngei kha a niin ka hria.



"Mi sual vek alawm kan nih," pakhat chuan a lo ti leh vat a, chhàn ngai ka tih tawh loh avàng leh Ruati'n min kalsan deuh tawh avàng chuan ka kal ve leh ta a.



Chutia ka kal ta chu pakhatin,"Inkhâwm țhìn zawng zawng pawh mi sual vek an ni, mi sual kan nih vek avàngin alawm Pathian meuh pawh mihringah a rawn chan ni, min tlan a ngai miau si a," a tih lai chuan mi dangin," Inkhâwm țhinho pawh hi a lang a mawiin an țha mai mai a nih hi, an chhûngril erawh kha tak, sual tak an ni, induhsak leh inhmangaih ang takin an lang a, a rûk chuan an iner țhâm mai asin, keini hi kan inhmangaih ber zâwk,"ti a a nui huah huah chu ka hre zui a.



Aw..anniho pawh hian țha chu an inti ve tak hlawm si a. Inkhâwm țhinte lah hi engah mah hian min hmu bîk si lo va, a buaithlâk teh zawng a nih hi.
Pathian thu lah hi an hre zul a, sawipui phei ila chuan keini ai ai hian
an lo hre thei lehnghâl a...



School lama ka thawhpuite zîngah pawh hian inkhâwm ngai miah lo pakhat hi a awm ve a, kohhranah chuan a hming chu a ziak ve reng; mahse, a inkhâwm ngai lo. A chhan ka zawh chuan hetiang hian min chhâng a.



"Kan kohhran upate zîngah hian tu mah rin ka nei lo, kohhran nuho lah hi, zîng țawngțai kal peih viau si, an nunah hmuh tùr rêng rêng a awm lo. An chhûngkuaah lah an inkhâwmna leh an ţawngțaina khân rah țha a chhuah lo nge, kohhrana an nihna chiah kha kâwrah an hmang zâwk ni, YMA leh khawtlâng thilah uikawm viau leh phun peih ber ber an ni a, kohhran huang chhûngah chuan a pe tam ber ber nih an duh leh a, an awm dàn hi Pathian ringtu nun dàn a ni thei hlawl lo ka ti a ni,  tuna Meeting chairman phei hi chu e, mipat hmeichhiatna lamah pawh ka ring ther tê lo, thawhlawm a thawh tamin kohhran tân thilpêk a pêk tam theih êm avànga hetiang dinhmuna ding mai mai hi a ni, a nun hian a qualify thlâwt lo, hetiang thu sawi hi ka ngaithla peih lo va, kohhran a hruaina hnuaiah ka awm peih lo bawk," tiin.



A nihna tam tak a awm thei ang. A ngaih dàn pawh chu a dik ve reng, dik lohna pawh a awm tho ka ti, a bulah erawh ka sawi chhuak chuang lo.



*******



Tûk khat ka school kal tùr chu ka hmaa kal chuan ka mit a la tlat mai. A tìrah chuan tu nge tih ka hre mai lo va; mahse, a sîr záwnga ka hmuh tâkah chuan Ruatite pawisa rutu kha a ni tih ka hre ta mai, Rinfela nih nghe nghe kha.



Ka mitsìr pah reng a, a kal chak dàn ang chuan ka kal ve zêl a, chutah, damdawi dàwra a luh tâkah chuan ka en zui thei ta lo.



Engtin nge tlangvâl țhalaiin pawisa kha a rûk ringawt le? E, an rethei tak, Ruati'n a sawi kha. Rethei viau mah se damdawi a ti pah reng tihna a ni àwm si a, Jail-ah pawh damdawi vàngin a ni lo'm ni a tàn hial kha? An duh avànga ti mah ni se ruihtheih thil tiho hi an khawngaihthlâk chu ka ti, ruih theihna tùr zawng rêng rêngin hun an hmang àwm si a. Chutah, khawtlâng leh kohhran, mipui leh anmahni chhûngkua lam thlengin anmahni kan hmuh dàn a dik lo viau bawk si nèn, an nun hi a chêp ve ngawt ang.



Chhùn chawlh lai chuan Office-ah chuan kan țhu țhap a, Miss Dintei chuan," Sir Rin, nupui fanau i neih hunah engtia enkawl nge i tum ang? Kohhran Dan thianghlimte hian i nei duh ang em?" tiin kan thawhpuite zînga inkhâwm ngai lo Sir Rina chu a zâwt a.



"Dàn thianghlim kher a ngai lo, a sènso a hautak mai mai. Kan inneih dàn a thianghlim phawt chuan a tâwk mai, ka pain zîng kârah min invawntîr theih chuan chu pawh chu țha ka ti zâwk, kan thianghlim dùn nasa mai si a," nui huah huah chung chuan a ti a.



"Aw, a ropui ve alawm le. Pathian leh kohhrante hriatpuina ngeia  Pastor-in kut min han suihtîr tùrte chu, ropui deuh mai asin," Miss Dintei chuan a lo ti thung a.



"Inneihna ropui lam ai chuan thinlung thianghlim hi a țha zâwk, Kohhran dàn thianghlim tlin miah lo, rai loh vàng mai maia mualpho lote hian kohhran dàn thianghlim hi an tibawrhbâng a, Pathian leh kohhran an tihmêlhem a ni. Dàn khatna tlin si lo; mahse, dàn khatnaa innei tho si pawh ka hre nual, chuvàngin, ka duh ve lo. Kohhran siamchawp dàn khatna ai chuan Dàn khatna awm ve lova thianghlim taka nupui neih mai ka duh zâwk," a ti leh bawrh bawrh a.



An thil sawi chu mi dang chuan kan lo ngaithla țhap mai. Sir Rina pawh hian a sawi ve pawp pawp nain a thil sawi tam tak hi a dik ka ti a, a ngaih dàn hi dik vek bík lo mah se ngaihtuah zui tùr tam tak min hnutchhiah a ni.



Zanriah ei laiin patea chuan,"Pu Sawma damdawi inah a lût tlat mai a, naktûk lamah țanpuina hlàna kan han lan ve pawh a ngai a ni," a ti a.



"Pu Sawma, Rinfela pa maw?" Rose-i chuan a lo ti vat a.



"Aw, a ni deuh thut a ni àwm e, an pafa chauh an ni si a, ani lah beng țha lo a lo ni bawk nèn, a khawngaihthlâk khawp mai," patea chuan a ti leh a.



"Eng nâ nge a?" ka lo ti ve a.



"A pum a nâ a ni àwm e, a serious viau lo tùrah ngai ang. Naktûkah i patea nèn kan han kan ve ang a, kan hre chiang thei mai ang. Kan kohhran huang chhûnga mi a ni ve si a, han lan loh chu a mawi lo ang," nutei chuan a lo ti a.



Zànah chuan naupangho test-na tùr question ka set a, Ațana'n min rawn biak leh rih avàng chuan ka chawl rih. Kan inbe rei ta zêk a, Class vii question chiah ka zo thei, chu pawh ka men rei phah zêk; mahse, pawi pawh ka ti chuang lo, hmaichhanah kan inhmu thei lo va, inbiak tal hi chu rei deuh se, ka kham thei chuang si lo.



Nuteite lo haw chuan Rose-i inbual lai a nih vàngin ka lo chiau-au a, sofa-a a bag thehthlâk țhak pah chuan a rawn âng chhuak ta nghâl a.



"An retheih tehlul nèn, làwmthu sawi nachâng pawh a hre lo, rethei chapo an tih ang kha niin ka hria, kan kohhran mi an nih vàng chauhin kan han tlawh ve hrâm hrâm a, ka kan tawh hauh lo ang, làwm nachâng hre lo lutuk!" a ti barh barh a.



Mak ka lo ti khawp mai!



"Kan kohhran ni lo se chuan kan kan dâwn loh tehlul nèn, pawisa kan pe pawh kha ka inchhîr hial mai," a tih lai chuan patea a rawn lût ve a.



"A khai a! Insûm teh, Nu tel lova a pain a enkawl chhoh a nia, a pa lah bengngawng mai a ni bawk nèn, nungchang mawi tak chu a hre kher lo ang tih hria la, kan chhuah dâwnah ka hnênah làwmthu a sawi ve sup kha," a rawn ti ve nghâl a.



"A chapo reuh ka ti tlat tho, khawngaihthlâ la lo lutuk!" nutei chuan a lo ti leh hmak a.



Nutei âng thinrim ka la hmuh ngai loh avàngin mak ka ti a, țawng ngaihna pawh ka hre lo, ka ngawi kar ringawt.






*ZU BÛR HI A PÂWNLAM ENG TIANGA NALH PAWHIN CHEI MAH SE A CHHÛNGAH ZÛ THO A AWM. I NUNZIA KHA THUP TUMIN ENG ANG PAWHIN PÂWNLAMAH CHEI NALH MAH LA, I CHHÚNGRIL MIZE DIK TAK KHA LAN CHHUAH HUN A AWM THO THO ȚHIN A NI*