☆24/7☆ - 4 By Dingdi Pachuau

☆24/7☆ - 4 By Dingdi Pachuau




Zanriah einaah thleng chuan nutei chu a la âng hmarh hmarh a.



"Nu enkawl loh tih mai mai, nu chawi loha lo țhang lian fel tak tak an tam lutuk! Min melh dàn hrim hrim pawh kha ka haw hrim hrim, a pawi ka sawi pawh a ni lo va," tiin.



"Nu, a ngaina lo che a ni ve mai a. Bâkah, Rinfela hi chu a zia a ni ve hrim hrim, țawng ngai mang lo leh nui ngai lo hi a ni ve hrim hrim. YMA hnatlànnaah pawh mi dang an nuih dar dar lai pawhin a nui ve ngai lo, a induh ni pawhin ka hre chuang lo, a ngêng ve viau pawh a lo ni mahna," Rose-i chuan a lo ti ve a.



"A țawng tam loh hmel khawp mai," patea pawh chuan a lo ti a.



"A nu chuan a thihsan em ni?" zawh bík pawh nei lo chuan ka ti a.



"Mi sawi ka hriat dan chuan a têt deuh lai, kum 9/10 bàwr a nih laiin a nuin pasal dang a neihsan a ni àwm e, chiang fak chuan ka hre chuang lo. Chuta țang chuan a pa nèn an khawsa dùn ta naw naw a, kan vênga an rawn awmna hi a rei ve tawh viau a, an rawn awm hma pawhin jail-ah a lût ve zawk zawk tawh ni àwm tak a ni, an sawi dànin," Rose-i chuan a ti chat chat a.



Kan ngawi deuh vang vang hlawm a, a hnu deuhah chuan,"An dinhmun hi a khirh ve viau a ni," patea chuan a lo ti ve sup a.



"Chhûngkaw inenkawlna țha hi a pawimawh viau rêng a ni. Ani pawh a pa, beng țha bawk si lo chuan amah chauh chuan a enkawl thiam tak tak lo ang tih a hriat a, mipa fa a ni lehnghâl a, nu leh pa enkawlna hnuaiah pawh puitling taka fate enkawl a harsa si a, a dinhmun chu a àwm ve viau e," nutei chuan a ti duah a.



"Chu, i hre thiam ta tihna a ni maw?" nui chung hian Rose-i chuan a lo ti vat a.



"Hre thiam ruak nain a ngeiawm ka ti tho tho," a lo la ti țâlh thung a, mi dang chu kan lo nui a.



*******



Thlasik boruak a rawn inher a, rilru pawhin Bethlehem lam a àwn ta ruih mai. School chu kan la kal zêl a, thlaleh ni 13 thleng kan kal ang; mahse, kan zir chin kan bel êm ém a, kan tih tùr a tlèm tawh avàngin rilru a nuamin a zângkhai tawh viau a ni.



Ațana lah chuan Aizawla Krismas châkkhai lam tùrin min rawn tur sek mai a, ka hman thei mai chuan ka ring a, bâkah, ka tum sa deuh bawk; mahse, ka hrilh lâwk hauh lo ang, va țhàwn thut ka duh.



Kâr kalta ațang khân pateate țhenawm lawk building hlui angreng tawh tak chu a neitute'n an rawn ţhiat a, an bengchheng thei phian mai. An thawk ngawrh viau a ni, a chhan chu zîng hma tâwk ațangin an rawn thawk țan a, tlai lamah khaw thim deuhthaw thleng an thawk bawk. An hlawhfate pawh an hlawh a sáng bîk ngawt ang chu.



Ka inbual zo ka thawmhnaw zâr tùra in chunga ka chhoh chuan țhenawmte in țhiah zawh fel tawhah chuan ka hmel hriat tawh ka hmu ve tlat mai! Hmel hriat ti mai ila, ka hmuh tawh hnu a ni ber ang chu.



Rinfela a ni.



A lo inhlawh ve reng a nih dâwn hi. Ka en deuh reng a, min hmu ve miah lo tih hriat tak hian a thawh ngai chu ti țhang tih hriat tak, mãn zet hian a thawk mawlh mawlh a, a hnung lam  hmu chu ni ila chuan tu nge a nih ka hre hauh lo ang chu.



A chhawrtupa chuan a rawn pan a, eng emaw a hrilh avàngin a thil tih lai chu a chàwl ta rih a, a pu a kal sawn hnuah chuan a thawk chhunzawm leh nghâl mawlh mawlh a.



He pa hi rui thle zawi mai mai țhìn emaw ka ti asin, a chanchin ka hriat chhunho lah hi a duhawm lo hlawm si, ni tin tlai tina rui leh rûk tùr zawngah ka lo ngai hman tawh tlat a ni. Nu Senite dàwra pawisa a rûk ațang khân ka ngai dik lo ve țan ta deuh a, tuna a inhlawhna pawh hi a ruihna tùr a ni ngei ang.



A pa chu a khawngaihthlâk mang tak e!



Chutiang ka ngaihtuah atalâng chuan ka lo en reng a ni chêk ang chu, ka inngaihtuah harh meuh chuan ani pawhin min rawn hmu tawh niin, min rawn en chho ve a, a thil tih lai pawh a chàwl tawh!



Ka harh chhuak thut a, ka hawi sawn rang lutuk!



Ka chêt dàn naupangchhia zet chuh! Engah nge ka lo en reng ni? Hmelțha ka ti emaw a ti ngei ngei ang, a nih loh tal pawhin, ka star-ah a ngai ngei ang chu.



A teuh lo bawk si.



En nawn tawh hauh lo chuan in hnuaiah chuan ka chhukthla ta thuai a, school kal tùr chuan ka insiam zui ta nghâl a.



Rose-i nèn hian kan kalna lam chu inang țhin se chuan scooty-in min phur ve thei mai tùr a nia; mahse, a inang lo tehlam lutuk a, kei chhak lamah, ani thlang lamah, a ngaihna a awm lo a ni.



Ke bawk chuan ka kal leh ta țauh țauh a.



Chawlhni tih loh chuan ni tin ka hmu ta ziah. Kan in bul mai a nih vàngin hmuh loh theih pawh a ni lo; mahse, ka en lo lui țhìn, tukverh dârthlalang chhana ka en ve zawk lai pawhin ani erawh chu vawi khat tê pawh a rawn hawi chhin tawh lo.



Ka en lai a hmu kha nawh reha paih bo daih theih ka va duh tak!



Hun a liam a, school pawh kan kal tàwp ni a lo thleng ve leh ta dêr mai. Aizawla phei chu ka chhûngte ka dîl vek tawh a, phalsak ka ni.  Rose-i  pawh kalpuiah chuan ka sâwm tawh bawk a; mahse, ani chu a la hman ve dâwn lo. Keimaha ka kal a ngai, ticket pawh ka tifel vek tawh.



Muangchângin ka haw a, vawiin chu ka ke ka tina deuh a, chak tak pawhin ka kal thei lo, ka pheikhawk bunin ka ke a nâwt tlat si a.



Step kal pawh ka peih loh avàngin kawngpuiah chuan ka kal a, kawng kual zau laiah chuan LPK a lo chhia ni ngei tùr a ni, an lo siam a, oil pawh a baw nuai mai, kawngpui vâng tan zâwng pawhin a luang nguai bawk.



Tlûk ka hlauh avàngin fîmkhur leh indìm zetin ka pên chhat chhat a, a nâl reuh khawp mai lehnghâl a, pên thum ka pênna tùr chiahah chuan ka hlauh ang ngeiin ka tawlh dâwn ta.



Ka au țhat.



Mahse, ka tlu miah lo asin, tu emaw hian min rawn pawm nawlh mai a, ka tlûk ka rin lutuk avàng chuan ka lo maimichhîng tlat a, tu nge tih ka hre thei lawk lo.



Oil buak lohna, kawng him chin ni ngeia min nghah tâkah chuan ka meng ve ta chiah, min pawmtu chu ka en reng ringawt!



Kan mit a intawng sak mai a, engtia rei nge kan inen chu ka hre lo; mahse, a rei lutuk lo a ni maithei, a mit chu la sawnin min dintîr a. Eng mah pawh sawi lo leh hmel pângngai reng pu chung chuan motor lamah chuan a kal leh ta daih.



Kei lah chu phûng hmu ang mai, ka awm dàn ngai rengin ka la awm! Làwmthu pawh ka hrilh lo!



Pângngai loh hmel zet chuan ka inthing harh a, hawi lêt miah lovin ka kal chhat chhat a, nichin lawka thil thleng kha, thil mak tak a ni!



A hmelhmai hnai taka ka hmuh vawi khatna. A chhe miah lo nia. A mit meng mawlh kha, a mitmeng ringawt khân engkim min tihtîr theiin min thunun vek thei hial ang tih tùr khawpa hìpna mak tak nei niin ka hria! Min tibuai, min ti chi-ai dik lo kual vêl vek, hrehawm lah chu ka ti hran hauh si lo.



Engati nge kha hmunah khân a lo awm ve le? In saknaah khân a awm ziah țhìn si a, motor chhia pawh a lo siam thiam zêl tihna em ni?



In ka thlen chuan nutei'n min lo chiau-au vat a, ani hi ina awm ve reng reng a nih vàngin kan haw hi chu min lo chiau-au vat țhin a ni.



Room ka luha ka ke ka en chuan a lo pilh nasa khawp mai, a lo pilh sen var mai a, sî hlap chung chuan bûr chhûnga band-aid chu banin ka ke pilhah chuan ka bel ta nghâl a.



Pheikhawk pum chu ka bun thei rih dâwn lo a nih àwm hi.



Khuma țhu vang vangin nichîna thil thleng kha ka ngaihtuah lêt leh a, ka lu ka thing nak nak mai. Ka tlu tùr min rawn țanpui a ni a, kei lahin làwmthu pakhat tê mahin ka hrilh hauh si lo, mak chu min ti ngawt ang chu.



Ni e, ka mak a nih hi. Mi â ang mai ka ni, khatiang khân ka awm ngai lo asin le, ka chi-ai dik lo kual vêl vek a ni si a. Mi hawihhâwm lo takah min ngai ngei ang, ka awm dàn kha chutiang chiah chu a ni bawk.



Maimichhîng vang vangin thâwk ka la hluai a, hmuh leh hmasak berah làwmthu ka hrilh ngei ang. Naktûkah pawh hetah țhenawmte inah a rawn thawk leh ngei ngei ang a, a sârhu lai ngei hian ka hrilh ang.



Mahse, a tûkah chuan a lo thawk lo a niang, ka hmu hauh lo. Aizawlah ka phei daih dâwn si, pawi lo, ka haw hunah a ni leh mai.



Aizawlah chuan hlim takin hun ka va hmang a, Bsa'n min hmu thut chu mak a lo ti viau rêng a ni, hlim takin min rawn kuah a. Hei hi ka nghahhlelh tak chu a ni rêng bawk a, a hlim hmel chuan kei pawh min tihlim viau mai. Zan ka mutnaah erawh Rinfela chu ka hre chhuak deuh reng, lawmthu ka hrilh hman loh vàng vek.



Thil ka lei nual, ka tâ tùr vek erawh a ni bîk lo. Ka chhûngte thil tùr pawh ka leisak ve vek a, kan chhûngkaw insem tùr mawza lum țha zet pair 4 ka lei bawk, ka pa chu a lâwm leh teh ang chu, thil leisak hi a nuam thei teh a nia. Rose-ite chhûngkaw bun tùr mawza dang ţha deuh tak ka lei bawk, anni ka leisak ve loh chuan a dik lo ang.



Ațana chuan kawrlum mawi zet min leisak a, ka duh lo chungin a nia min leisak ni. Ka bialpa a nih avàng ringawta thil min leisak hi ka duh bîk lo a ni. Kei pawhin necktie mawi zet leh lukhum ka leisak a, a lâm thiam ve hle a ni.



Ka haw dâwn ni chuan ka motor chuanna tùr thlengin min thlah a, ka chhûngte thil ka hawnsak ve nual avàngin ka bâwr deuh a, car-in min thlah thlap a ni.



Ka rui haw tlat, Lunglei ka thlen meuh chuan ka chau nghulh mai a, khua lah chu a tlai tawhin a vâwt vur mai bawk a, Rickshaw hman mai tùr lah ka la hmu lo zui, mi hman lai a lo ni zêl.Bâwr deuh chuan ka inak ta luah a, in ka thlen chuan patea chauh a lo awm a, nuteite chu an nufain an chhuak lawk a lo ni a.



"I chau em? I ril a țâm ngawt lo maw? Thingpui i duh ang em?" a lo ti sawk sawk a.



Ațana'n min rawn phone a, chanchin min zâwt a ni. Rose-ite pawh an rawn haw har lo, ka thil leisakte chu ka han phawrh a, ho tê ni mah se an lâwm thiam khawp mai a, ka lo leisak ta lo ang tih ka hlau zâwk hial a ni.



Chaw ei khamah chuan ka chhûngte ka phone a, naktûkah Taitea, car-in a rawn kal dâwn a nih chu. A tihchi hlauh. Sumo chu an khat thei si a, Krismas bazàr lai a lo ni bawk nèn, ka u lo kal tùr thu chuan min tithawveng huai e.



Zîngah thawh ka hai lehnghâl. Ka thawh chuan an lo tho vek tawh a, min lo kai tho duh lo a lo ni. Ka chêtpui ve nghâl vat a, chêtpuina tùr pawh a lo awm tawh mang lo zâwk.



Țhenawmte inah pawh an ri leh ruai ruai tawh. Rinfela pawh a tel ngei ang chu, kan khuaa ka haw hma ngeiin làwmthu ka hrilh ang, vawiinah ngei hian.



Chaw kan ei laiin Taitea pawh a rawn thleng a, a rawn kîl ve nghâl. A bazâr ve ang a, keiin inah ka lo nghâk mai ang chu, ka tei kual peih ve si lo va.



Chaw ei khama hmun kan tihfel hnuah chuan Taitea pawh a chhuak deuh nghâl mai. Patea nèn inah kan awm dâwn a nih hmel, Rose-ite chhuah an tum ve bawk si a.



Patea pawh damlo kan tùrin nuteite chhuah hnu rei vak loah chuan a chhuak zui ve leh a, a rei lo ang tih min hrilh hrâm.



Țhenawmte in sa chu ka va thlîr phei a, anni pawh chaw an ei kham tawh a ni chiang, an la thawk lo deuh a niang, an la ri tlat lo.



Vawiina ka hrilh loh chuan hun a rei zêl ang a, ka hrilh lo takngial ang.



Intihuaisenin a hnu deuhah chuan ka va dâk leh a, ka vànneih asiamin Rinfela tak mai chu  veranda-ah a lo chhuak hlauh mai, a lo țhu reng tawh niin.



Ka pan phei ta vat. A lam panin ka kal tih a hre ve rengin ka ring, ka pên zâwngin ka slipper hnuai a ri phei thlak thlak si a.



Mahse, hre àwmin a awm lo va, a rawn hawi hek lo.



A bul ka thlen thleng pawhin a rawn hawi miah lo, a che sawn eih lo.



Ka intiluhlul lui ve tlat.



"Min lo hre thiam lawk, Rinfela i ni tiraw? Oil bua avànga kawnga ka tlu tùr min țanpui avàng khân ka lâwm e aw, ka lâwm lutuk a nia," ka va ti a.



A rawn hawi ve ta chauh. Țawng miah lo chuan ngun zet hian min rawn en a, eng nge a ngaihtuah hriat tumin kei pawh chuan ka lo en lêt ve kal a.



A hawi sawn leh daih.



"Theihnghilh rawh!" a rawn ti chhuak sup ringawt a!



A thil rawn sawi ber kher chuan min tidang titih dèr mai, ka hriat sual chu a ni si lo maw? Ka hre dik ngeiin ka hre si a ni.



"Eng...maw?" ka ti hlawl a.



"Khatiang kha ka hre duh lo!"



Mak tih avàngin ka ding khawng reng ringawt! A awka chhuak nèlawm lo zet leh a thil sawi chuan min dêng zawt lo thei lo a ni.



"A pawi ka ti, i pawi ka sawi palh a nih chuan-" ka la sawi zawh hma hma chuan,"Duh tâwk rawh! Sawi tawh suh!" vín lek lek hian a rawn ti leh ta.



Ka sawi zawm tawh lo chiang kher mai. Ka inher thut a, kan inah chuan chak zetin ka tlân lût ta nghâl a.



Engati nge khatiang khân min chhàn le? A rilru a buai deuh em ni le? Ni lo, a rilru a buai loh kha, mi țanpui nachâng pawh a hria alawm.



Engati nge lawmthu hrilh kha a duh loh le? Mi tam zâwk hian kan thil tih țhat leh mi kan țanpui kawngah chuan làwmthu min hrilh chu kan duh ngei ang; mahse, ani ve hi, a danglam tlat.



Ka ngaihtuah ka ngaihtuah pawhin a ngaihna ka hre dèr lo. A chhan ka hre chhuak thei lo, rin thu pawhin ka hre chuang lo.



Pawi lo, làwmthu ka hrilh tawh tho, ka tih tùr ka ti zo tawh, ka hrilh nawn tawh hauh lo ang.



Haw thei mai turin ka insiam ta zâwk a, Taitea bazâr rawn haw hunah chhuak thuai ila a țha ang, helai Rinfela hna thawhna bula awm ve reng pawh hi nuam ka ti mai mai lo ve.



Chawhnu dâr 2 vêlah chuan Taitea pawh a rawn haw ve ta, Patea pawh a rawn haw daih tawh a, thingpuite kan in leh hnuah chuan Taitea chuan kan thawmhnaw hawn tùr chu motor hnungah chuan a rem lût a, rei pawh awm tawh lo chuan kan chhuak ve ta a.



Kan tlân chhuak tùr chu motor side-glass ațang chuan Rinfela'n kan lam a rawn hawi chu ka hmu a, min rawn hmu ve thei emaw tih hial tùrin ka lo lai ringawt a nih chu! Ka hawi sawn nghâl daih bawk.



Țha taka làwmthu ka sawi laia khatianga min chhâng kha ka zak a ni, hrehawm ka ti a, mak kati viau bawk. Engvàngin nge khatiang khân min chhàn le?



Mai mai a, hre lo tawp ang.





*A ÊNG ZÂWNGA THIL THLÎR TLAT MI  CHUAN HUN HARSA BER LO THLEN LAI  PAWHIN HLIMNA A HMU ȚHÌN*