24/7☆ - 10 By Dingdi Pachuau

☆24/7☆ - 10 By Dingdi Pachuau




In ka luh hmain pângngai tumin thâwk ka la leh hawk hawk phawt a, ka lût ve chiah. Ka tha khùr erawh chhûngril lamah a la reh thei chuang lo; mahse, pateate chu pângngai takin ka chhâng thei hlauh.



Khalam kawngah kha chuan kalpui nei lo chuan ka kal tawh lo chiang khawp ang, zànah chuan. Chhùnah erawh ka hlau hran lo, khaw êng hi chu thil țha lo tih nân a zahawm ve tlat si a. Khalai hmunah khân street light emaw dah ta se chuan an awm khâwm ngam kher lo maithei a ni.



Zu rui lo awm khâwm zîngah khân Rinfela kha a tãl ve reng țhìn a ni àwm si a, rui àwm angin a lang ve bawk si lo. A țhiante an ruih phawt chuan ani pawhin ruih châng chu a nei ngei ngei ang, zanin erawh kha chuan a in ve lo pawh a ni maithei, min hriat vànga min rawn țanpui nge a nih ang a, a țhiante buainaa an lût thûk tùr a duh loh vànga rawn inrawlh nge a nih ang le? Min hria chu a nih ngei hi, in kawt thleng min thlah a nih kha.



Rose-i rawn haw chu a rawn țawng malh malh a, a thil sawi erawh ka hre tam lo khawp mai. Ka thil tawn kha ka hrilh ve duh ang em? Ni lo ve, ka hrilh chuan a chi-ai ang a, a hlauthâwng lutuk palh ang, a inthiam lo ngei dâwn bawk si.



A muthilh hnu pawh chuan ka thil tawn vàng kha nge, ka la meng kar mai. Ka thil ngaihtuah ngai lêm loh zêldin chhovin thil țha lo lam ka ngaihtuah a, zanin khân Rinfela kha awm lo ta se, engtin nge ka awm ang? Ka chungah thil țha lo a thleng lêm lo a nih pawhin mualphona chhe tê chu ka hmachhawn ngei ang. Mi pawhin an han zêldin chho ve ang a, min mawhchhe tâwk an awm ngei ang a...



Ka chal chu dawm vang vangin ka thaw deuh halh a. He pa hi vawi khat tal chu mumal deuh takin làwmthu ka hrilh chu a ngai a ni, engtin pawhin min lo chhângin min vìn leh pawh ni se, ka thinrim lêt tawh lo ang, ka duh tâwka ka hrilh luih tho tho tawh chuan a pawi nâng.



A mak ve ngawt mai. Țanpui ka ngaih lai taka a lo lang thei lutuk hi mak tih loh rual a ni lo, mi țanpui peih tak a ni ngei ang. A țhian kawmte lâktlâk tehchiam lo mah se a rilru chhûngrilah hian tlàwmngaihna leh mi țanpui duh riauna a nei tlat a nih ka ring.



*******



Vawiin chu class vi zirlai hmeichhe naupang pakhat a damlo tlat mai a, chhùn chawlh dâwnah inah hruai hàwn a ni a, chawhnu bànah ka tân a remchàn êm avàngin ka tlawh kawi zawk a.



A khua a lo sik nasa a, ka tum aia rei ka țhu ta nghe nghe. A pa chuan thingpui min pe tlat a, hnial luih țùng mawia ka hriat loh vàng chuan ka in a, ka haw theih meuh chuan hun a lo kal ve fê tawh a ni.



Hmanhmawh deuh hlekin ka kal a, ka tlai dâwn tih tal ka chhûngte ka hrilh si lo va, inah nutei a lo awm loh hlauh chuan eirawng bàwl a ngai ang a, ka tlai vek ang, insûk leh chhuat nawh ka duh bawk ang a.



Mahse, vànnneihthlâk takin nutei a lo awm a, chêtpui ngai lovin a lo bâwl zo deuh vek tawh. Inthiam lo ru tak chuan ka tlai chhan chu ka sawi ve a; mahse, nutei hi nu sual a ni lo va, a hriat thiam mai ka ring.



"I lo thlen hma deuh lawk khân Ațana pawh a haw a, naktûkah a haw phei tawh dâwn a ni àwm e," a ti a.



"A nih tak chu," ka lo ti ringawt. Chubâka han chhàn dàn tùr ka hre lo.



"A khawngaihthlâk roh kuang kuang e," a tih chuan makti deuh hlek hian ka en a.



"Ka tih chhan chu, i  lâwm lovin i thinrim hle a ni tih a hriat hnuah pawh ngaihdam dîlin a la rawn pan hrâm hrâm che a nia, lo ngaidamin lo pawm leh nghâl rawh chu ka ti miah lo; mahse, a hmel ka hmuh ngun poh leh inngaihtuah țha leh la tih hi ka ngaihtuah tam a ni ziah a ni," a ti leh a.



"Mahse, chuti maiin a thil tih hi sawi fel theih a ni lo a ni, inngaihtuah nawn leh pawh ni ila ka chhànna chu a ngai tho ang. Ka khawngaih loh vàng pawh a ni lo; mahse, amah ka rinna hi a tikeh sawm chiang êm a ni," ka ti ve ta sap sap a.



"A dik khawp mai, chutiang kawng zâwngah chuan," a ti leh lawi a.



"Chuvàngin, ka tân chuan rin leh hi a harsa rih lutuk. Khati khawp khân a lakah rinna ka nghat a, chu ka rinna chu amah hian a tichhe vek a ni, amah rinna nei lova pawm leh chu amah pawhin a duh lo ang," ka ti leh duah a.



Kan sawi chhuak ta sa sa, sawi țeuh ang.



"Pawm leh pawh ni ila, keiin ka rin theih rih loh miau chuan amah pawhin nuam a ti dâwn lo va, hlimní kan hmu thei chuang lo ang. Inkawp reng chunga inrin tawn theih loh chu damlai hremhmun a ni ringawt dâwn asin," ka tih chhunzawm leh a.



"Pawm i harsat viau chuan i thu thu le, amah hi a felin a nèlawm roh sia, mi pawhin thil chu an lo tisual palh ve châwk a, an lo chesual ve châwk  bawk a. Mi tih loh dàn pawh a ni bîk chuang lo va, in induh tawn a nih chuan inngaihdamna hian thil a siam țhain in inkâr khì chat pawh a chàr țhat leh theih ka beisei vàng a nia," nutei chuan a ti dap dap a.



"Tûn dinhmunah chuan ka thei rih lo  tawp a ni mai," ka ti leh tlat a. Ani pawh chuan min sawipui vak ngaihna a hre tawh lo a niang, a ngawi ve ta a.



Kan in bul pawh Rinfelate țhian dùn chuan an rem zo ta, an thawh chhûngin thingpui pe zauh zauh mah ila, titipui theih tùr leh làwmthu sawi theih tùrin hun a awm ngai lo; bâkah, ka lam hawi pawhin a mit a rawn lèn ngai lo hrim hrim, keimah hian hun remchâng ka melh deuh zâwk a; mahse, min hria ang pawhin aawm ngai lo.



Tunah chuan  fùr pawh kan cho thar ta riauin ka hria. Fùr a rawn ni ang a, an lung rem zâwl pheiah chuan pangpâr pot kan han hûng tlar țhât ang a, hmuh an va nuam dâwn tak! Kan room ațangin chiang takin hmuh theih loh mah se, sitting room ațangin a chiang dâwn thung a, a hmuhnawm khawp ang!



Rose-i chuan pangpâr a làwm ve lêm lo va, sawipui pawhin a nui mai mai. Nutei chu a phûr zâwkah a lo țang a, ani'n pot a lei țeuh ang a, lei țha nen; keiin pangpâr chi ka ngaihtuah ve thung ang.



Ațana chu haw phei mah se, min la rawn text reng tho. Ka chhâng lêt êm êm chuang lo va, chuti chung pawh chuan min rawn text a țhulh phah chuang lo.



Rose-i nèn chauha zàna inkhâwm tùra kan chhuak a nih chuan kawngpui lama kal ka duh tawh ngai lo va, mi kàwmkâra kal chu ka rawt ta ziah. A hma zawnga duh ngai lo kha ka ni si a, a chhan min zâwt nghâl rêng a; mahse, ka hrilh chuang lo,"A kual hle a ni tih ka hre chhuak tawh a," ka ti mai. Min ringhlel hmel pawh a pu bîk chuang lo.



Pathianni tlai khat chu Rose-i ka chhuahpui ve tlat a, min sâwm ngawrh si a, peih lo chung chungin a ni ka chhuahpui ni. Vengthlang lam deuhah chuan kan tlãn zêl a, ka kal khât a, ka bo deuh hû mai.



Ruah a rawn sûr leh țêp tawh ang chu, nihliap chu kan keng ve ngei alawm; mahse, a sùr nasat hlauh chuan aw, a fuh lo ve ngawt ang chu.



A thawhpuinu inah kalin naktûk lama an thawmhnaw hâk dàn tùr an en fel dùn a, kei chu eng mah sawi lovin ka lo țhu char char a, an titi tui bawk si a, lo inrawlh vena tùr ka nei hauh lo nain ruah a rawn sûr hman ang tih ka lo hlauthãwng khawp mai.



A thawhpuinu Grace-i chu amah chauha in luah a ni a, Lawngtlai lam mi a ni nghe nghe. Rose-i'n a hnial viau chung pawhin thingpui min pe lui tlat a, in loh theih pawh a ni lo. A țawng duh khawp mai a, kei pawh ka vawi khat kalna mah ni se, ka hmingin min ko nghâl nalh mai.



"Engtik niah emaw chaw in lo la ei dâwn nia, Sangbawih, tiraw? A nuam ngawt ang chu," tiin thingpui kan in kârlakah chuan a ti a.



Chhàn ngaihna ka hriat loh avàngin ka nui ringawt a.



"I inah chaw ka ei peih teuh lo mai, sa pawh a ei theih dâwn si loh a," Rose-i chuan a lo ti var a.



"Lungngai mah ta che,mate. Keiin ei lo mah ila nangni chuan in ei dâwn alawm, ka lei ang a, in siam ve thung ang a," a lo ti a.



"I țhiana i sâwm tel leh àwm sia, kan pawimawh àwm lo êm mai," Rose-i vêk chuan a ti leh a.



"Loh theih nâng! Mahse, in awm chhûngte chuan ka dah pawimawh ber lo ang, chance chu kan nei  leh dâwn tho a," nui chung hian Grace-i chuan a lo ti a.



Ruah a rawn tla ri phoh phoh a, in chungah ràngvâ hman a ni a, ceiling vek mah ni se a hriat viau tho.



"Sûr lul suh, kan chhe vek a ni mai!" Rose-i chuan a ti vang vang a.



Vànneihthlâk takin a rei lo, anni pahnih pawh an titi chhunzawm rei ta lo bawk a, haw tumin kan chhuak ta thuai a.



Kan tlàn chhuah hnu minute hnih êm pawh a la ral lo maithei tih-ah chuan a hma aia tamin a rawn tla leh phurh phurh mai, kan tlãn lui deuh nain a rawn sûr tam țan a, huh vek kan hlau lo a nih chauhin kan tlãn lui thei ang.



"Hawh, hetah hian ding rih mai ang," tiin mi veranda hul-hliap chuh chuan kan chhuk ta ringawt, kan ding fel ta maw ruah chu a rawn sûr leh ta  buan buan mai.



"Rinfelate in kha a nia,  a pa pawh a awm ngei ang, kan lût chhin dâwn em niang?" tiin Rose-i chuan mi rawn en pah chuan a ti a.



Ka hmuh tawh hnu ang ka ti rêng a ni. Vawi hnih lai putar kha a thil lei khaisakin tuna kan dinna piah thleng deuhthaw hi ka ke hian a rap ve tawh a ni.



A lût a, kei pawh ka chu ka lût ve chhin a.



In pâwn lam en ang aiin in chhûng lam chu a lo zauin ka rin aiin a fel fai ţha phian mai. Rinfela'n a tifai țhìn a ni ngei ang a, mipa pakhat, chu pawh tlangvâl țha pângngai pawh ni lo enkawl atân chuan a fai mah mah a ni.



Rinfela pa chuan mak tih hmel zet hian min lo thlîr dùn a, Rose-i chuan," I lo dam țhin maw, ka pu?" tiin hmui phun chiang tak hian a bia a, ruah a súr bawk nèn, țawng ri inhriat fiah pawh a har khawp mai.



"Aw, dam e, ka ţha e. Bawiha țhiante  em ni in nih?" a lo ti boh boh a.



Rose-i nèn chuan kan inen a, Rose-i'n chhàn a tum lai tak chuan bathroom ațang chuan Rinfela chu  inbual zo tih hriat tak hian towel bâtin kekawrbùl hain a rawn chhuak a.



"Ruah a sûr  si a, kan rawn pêng tawp mai," tiin Rose-i chuan a lo be nghâl a, a pa hnënah erawh chuan," Aw, ni deuh tho mai," nui chung hian a ti a.



Putara chuan min rawn thlêkin," Nang nula hi chu, ka hmuh hnu i ni ngat mai," tiin Rinfela chu a en a.



"Bawiha, ka thil khai haw min chhâwka in thlenga min thlahtu kha he nula ngei hi a ni," a ti ta a.



Ruah rawn baw deuh tlãwrh chu a zia ta deuh hlek, țawng pawh a hriat chian ve theih ta bawk.



Vànneihthlâk takin ka ti dâwn nge vànduaithlâk ka ti dâwn zâwk, ka phone a rawn ri ta hlauh mai a," Ka'n chhâng lawk ang e," tiin pâwn lamah chuan ka chhuahsan ta nghâl a.



Ațana a ni a, ka hre sa reng tho nain in chhûnga awm kha nuam ka ti lêm lo a ni, Rinfela kha awm lo se chuan a dang deuh mahna! Làwmthu chu hrilh ka duh viau mai a; mahse, mi dang hriat laia hrilh ka duh lo, 'eng vang nge' tih zawhna ka dawng ngei dâwn a, chu chu ka duh lo a ni. Kha zàn thil thleng kha sawi chhuah ka duh lo va, hriat chhuah leh țhin pawh hi ka duh lo.



"Khawngaihin, rawn call tawh lo teh, sawi sawi hian a fel dâwn chuang si lo," ka ti ta ringawt a.



"Sangbawih, hrehawm ka ti ve tho a nia; mahse, ka bànsan thei chuang si lo che a, vawi khat chauh hun min pe leh hrâm rawh, vawi khat chauh, vawi khat bâk ka dîl lo che. Hetia kan awm hnu hian i tel lova ka awm theih lohzia ka hre chhuak chiang hle asin," a rawn ti a.



"Hrehawm ti suh, ka haw hleinem che. Kan inkâr erawh sawia fel thei ni se ka ti khawp mai; mahse...a, hetia kan awm hi a țha, mihring hi kan hlim reng bîk lo a nia, inlaichìnnaah hian hlimna chauh hi a awm bîk lo va, harsatnate pawh a rawn thleng ve châwk tho. Chuvàngin, pawm thiam tum hi a țha," ka ti ta a. Ka rin aiin ka țawng tam daih, rilru na taka siama àn khum kher ka tum lo.



"Ka beidawnsan dâwn chuang lo che, kan inkâr a țhat leh theih nân theih tâwp ka chhuah zêl ang, Sangbawih. Ka kalsan thei lo che, kalsan che pawh ka duh lo," a rawn ti leh a.



Chutiang lam hlîr mai chu a rawn sawi a, ka sawi ve tawh lo, ka ngaithla mai mai tawh. Rose-i, kawngkaa a rawn chhuah chuan min biak tàwpna a la rei lo, ruah pawh a lo tla seng seng chauh tawh a.



"In va inbe rei ve!" a rawn ti a.



"Nia...eng emaw mai mai..." tiin ka riat nawi ta mai mai, a chhan chu a hnungah Rinfela a rawn chhuak tel ve tlat a, a hriat laia sawi chu ka duh hauh lo.



"Kan huh thei tawh chuangin ka ring lo, kan haw tawh dâwn em niang?" ka tih chuan Rose-i pawh chuan," Nia, inkhâwm zàn a ni bawk si a, chaw ei tùrin min lo nghâk leh reng tawh ang," a lo ti ve a, chutah, Rinfela lam chu hawiin," Kan haw ang e, chaw ei tui mai u," a ti nghâl bawk a.



A lo bu nghut ringawt a, ka lam phei chu a rawn hawi ve hauh lo. He pa hi hriat thiam chu a harsa ve ngawt mai ka ti, min țanpui a, hmuh pawh kan inhmu zing ve ta; mahse, mi dang hriat lai hian min la be hauh lo, chu mai a ni lo, min  hria ang pawhin a awm ngai hauh lo a nia!



Hmeichhia hi a lo ngaina lo takzet a nih dâwn hi, ngaina lo mai pawh ni lovin a hriat sa tawh pawh hre lo ang maiin a awm hmak thei a nia.



Kan haw kawngah chuan,"Engtik lai khân nge Pu Sawma kha thil i lo khaipui pek a? A sawi hlut a nia aw," Rose-i chuan a ti leh ta ngei e.



Thil lah hi a lo chîk thei si, zawhna lah chîk zet zetin min zâwt bawk a.



"Hmân deuh tawh khân," ti ringawtin ka chhâng.



"Vawi hnih lai a ni maw?"



"Aw." Putara kha a zâwt a ni ngei ang, ani khân a sawi chhuak ngei mai a, he nu Thil-chîki lah hian chîk zetin a zâwt chhuak a ni ngei ang.



"Tu nge rawn call che kha?" a ti leh daih a.



"Tu emaw ka hmel hriat maw le," ka lo ti ve thung a. Ka hrilh khera ngaiin ka hre lo, a țùlna pawh a awm lo.



In kan thlen hnu rei lo têah chaw kan ei a, kan inkhâwm a, thuchah sawitu Upa Lianchhûnga, lu țuak vâr vo tawh chuan uluk zetin thuchah a sawi a, a chip neuh neuh a, a bei rei phian. Kan bàn meuh chuan dâr pawh a lo kal duai tawh!



Haw kawngah chuan kan haw rualpuite chuan upa thu sawi chungchâng chu an khel haw a, a inbuatsaih țha tâwk lo deuhin an hria a ni ngei ang.



Pi Duhi chuan,"A inbuatsaih dàn hi a fuh vak lo țhìn a ni, a rei thei lutuk a, ngaihnawm lam aiin nin lamah a kal hman tawh țhìn a. A thuhrimin,a chhûngte pawh hian an hrilh ve țhin lo em ni le? Upa a nihna a rei ve tawh a, thu sawi khât lutuk pawh a ni chuang si lo va," a ti bawrh bawrh a.



"Ka lo muthlu hman țêp alawm, dârkâr khat chuang deuh hlîr hi a la sawiin ka hria. Mawng lah a kham hlur bawk a, a ti leh lutuk deuh țhìn chu a ni," tiin a piah deuha kal nu pakhat tê lam deuh, țawng sîn zet chuan a lo ti a.



Pi Duhi pasal Pu Faka chuan awka dam zet hian," A inbuatsaih țha ka lo ti khawp zâwk asin, lehkha thiam lo a ni na hian a inchhiar zau tih a hriat a, a sawi pâr hluah lo va; mahse, belh chian hi a dâwl thei viau asin," a lo ti thung a.



Rose-i chuan,"A upa ve tawh reuh sia, a sawi rei deuh hi chuan a chau hman ang tih ka lo hlauhpui țhìn," a lo ti ve a.



Pi Duhi vêk chuan,"Tawi fel taka sawi theih reng laia, sawi rei hi nuam a ti ve hrim hrim alawm. Miin min lo ning hman ang tihte phei hi chu a ngaihtuah pha tawp nâng!" a ti leh bawrh bawrh a.



Hetih lai hian hmân zàna buaina ka tawhna hmun kha kan thleng dâwn tawh a, awm chu an lo awm leh ngei, an meizial, an pak zâwnga ling leh vât vât țhìn leh khuh deuh kharh kharh ri ațang chuan a hriat theih mai.



Rinfela pawh a awm leh ngeiin ka ring. A thim deuh ruih a, kan bula mite tih loh chu hmuh theih rual lah a ni hek lo, anni phei chu kan hmu thei teuh lo.



Pu Faka chuan," Helaiah hian light dah hi chu a ngai a ni," a rawn ti boh a.



Nu țawngsîni chuan," Ni ngawt mai, an ngaihtuah lo thei ngawt mai. Thla a èn loh zàn a nih chuan a thim ruap mai a, mi sual tân pawh thil sual tih a awl bîk alawm," a lo ti ve a.



"Tlangvâl zu rui leh thil sual tiru țhinho awm khâwmna hmun a nih hi, a remchâng bawk sia, a țha lo tak tak a ni," Pi Duhi chuan a lo ti chhunzawm ve zat bawk a.



Kan kal pèl a, ka thlêk ru deuh nain chiang takin eng mah a hmuh theih loh a, anni pawh chuan min rawn hmu chiang bîk lo tawp ang.



"Upa Lianchhûnga chu sawi leh ta ila, thu a sawi dâwnah te hi chuan inuluk ve deuh se, amah kan en lo thei si lo va, hmuh hrehawm ka ti țhin. A samte hi a khuih ngai lo a niang, a kawr lah hi a chuar thei a nia aw..." a ti leh barh barh a.



"A fate'n an nawhsak ngai lo a ni ang; amah tê hian a insiam a, a nupui lah hian a inkhâwmpui peih bawk si lo va, kawng  lehlama ngaihtuah chuan khawngaihthla a la reuh asin," Pi Țawngsîni chuan a lo ti leh a.



Zanin kan inkhâwm zet chu, sawi zui tùr a tam a ni ang e.



*******



"Ka va peih lo tak! Ka la period zui a,"a ti nang nang a, khumah chuan a bawk zân bawk a.



"I haw hma daih ang a," ka lo tih chuan," Nia, a hla ve reuh sia, hawpui tùr ka hmu mai thei ang chu maw," a rawn ti ve a.



Vengthlang lamah mitthi lumen tùr a awm a, ka peih lutuk bîk lo. Hmun danga ka awm hnu hian zan nga vêl chu mitthi lumennaah ka kal ve tawh a, vengthlang lamah erawh ka la tlaivâr lo.



Kan thlen thlâk ve meuh chuan țhalai an lo awm țeuh tawh mai. Tlar hmasa ber dawt chiahah kan țhu a, zai pawh ka zai vak lo va, a nuam fahran lo. Rose-i pawhin nuam a ti lêm lo tih a hmel ațang chuan ka hre thei mai; mahse, zan rei deuh hnuah chuan kan țhut dàn chu an siam țha a, tunah chuan ka zai țha ve thei ta, nichin kha chuan ka sîr lama țhu, nu pakhat kha a zai ring lutuk a, ka aw pawh a rawn hliah vek thei a nia, ka zai tui thei lo a ni.



Ka mut a chhuak lëm lo, bákah, kan hmaah hla hril a țhu a, a hril thiam bawk si a, kan hnunga țhute lah an zai thiamin an zai peih si a, zaipui an nuam ka ti lutuk, ka zai ve nasa viau a ni.



Zai chawlh kan nei a, Âr sawhchiar an rawn sem a, a țhen an chhuak bawk a, ka zun chu chhuak ve tawh viau mah se, ka chhuak ve lo. Ka thil ei zo han hawi chhuak chuan Rinfela pawh ka hmu ve ta chiah. Tuna mitthi in hi an in nèn khân a inhnaih viau ni khân Rose-i khân a sawi a, helai vêlah hian hmel hriat an vâng si a, inthiarna hmun han hman lawk tùr ka duh viau a ni.



Rose-i chuan," Kan ei zawh hian haw tawh mai ka duh," a ti sar sar a.



"Kei pawh ka zun a chhuak ve viau tawh a ni," ka ti ve a. Chutah, Rose-i thawhpui Grace-i kha ka va hmu fuh  leh ta a, ani pawhin min rawn hmu ve bawk a, a rawn nui sak a.



"Grace-i ka hmu, a in kha a hlâ em kha?" tiin ka zâwt a.



"Hla ve deuh e, kea kal arâlah chuan. E, Grace-i chu, inthlahtîr ila a țha tak ang, scooty a nei ve tho alawm," tiin a bag ațang chuan phone a la chhuak ta nghâl a.



Pâwnah chuan Grace-ite nèn chuan kan ding a, min hawsan chu huphurh viau mah ila a awm dàn tùr chu ka hriat thiampui êm avàngin haw tùrin ka ti a; mahse, a haw hmain kei pawh inzun thàwl ve ka duh.



"Grace-ite in chu a hla deuh sia, tu nge hnai deuh? E, Rinfelate in a hnai alawm, kan dïl dâwn nia," a ti a. A phone chu a hmet neuh neuh reng a, chutah," Bsa ka inthlahtîr mai ang, nang chu hmeichhia i ni sia, a mawi lo ang," tiin Grace-i chu a en a.



Rei lo te hnuah Bsa chu a lo chhuak a, thil awm dàn pawh sawi fel rei a ngai lo, ka inpaih thàwlna tùr hmun chu min panpui phawt a.



Rinfelate in leh tuna mitthi in hi in pakhat chauhin a lo dang niin, chu in lah chu a luahtute an awm loh lai a niang, a inkalh țhap mai.



Vànneihthlâk takin Rinfela, ina a haw lai a lo ni leh hlauh, awm lo se chuan pâwn thim deuh lai chuhin ka kal tawp ang ka ti rilru a.  Rose-i chuan inthiarna hman chu a dîl a, a lo bu leh nghut mai. Ka chhuak lam chu ka thâwl hawk, ka harh sawt bawkin ka hria.



Rose-ite kal hnu chuan ka mal viau mai, Grace-i ka piahah a țhu ve ta hlauh zâwk a; mahse, inbiak lûmlàm hun a ni lêm lo va, a zia viau.



Min en rengtu awm tlatin ka hria a, hawi kual ruai lah a tihchi si loh. Tui vak lo chuan ka zai a, kan hla sak lai a tàwp hnu chuan ka melh kual deuh a, kan țhutna ep dinglam sîr tàwpa Rinfela țhu chu ka va hmu ta thut, ani erawh chuan min lo en hauh lo.



Ani hi min en rengtu nia ka hriat tlat kha a ni thei lo ang, min en ngai lo tlat.



Hla dang kan sak leh hnuah chuan eng ka hria chu ni maw, ka va hawi leh kher a, min lo en ve lai tak lo niin, ka mit ka la sawn rang kher mai.



Ka thin a rawn phu rang deuh dat datin ka hria!  Engati nge?!! He pa hi ka duh deuh em ni? Engah nge ka awm dàn hi a dan deuh hûih a?!



A ni thei hauh lo!



Rose-i vàng vek! Ani khân thu dik hauh lo min hrilh a, kha vàng kha ka ngaihbel a ni chiang lutuk! A va țha lo tak, kha vàng chiah kha a ni. A mitmeng chu a nalh ka ti sa reng, mi pawhin an ti vek tho ang; mahse, tuna ka awm dàn hi, hetiang hian ka awm ngai lo. Ațana bulah pawh hetiang hian ka la awm ngai lo, kan inen fo a, hnai zet zetah pawh kan inmelh kar fo; mahse...



Tuna mi hi chu a dang. Ka sawi fiah thiam lo, ka dik lo. Dik lo viau bawk siin engtin emaw nuamti deuh reuh bawk si hian ka awm. Ka helhhawlh ru, ka phûr ru deuh tlat bawk si, a hrehawm. Ni lo, a hrehawm pawh a ni lo, a nuam ka ti pah tho.



Ka hawi ngam tawh hauh lo, min lo en leh lai a ni ang tih ka hlau. Nichina ka awm dàn kha miin min lo hmuh loh hrâm ka beisei. Ani pawh khân ka awm dan kha hre thiam lo hrâm rawh se.






*I NGAIHTUAH VE NGAI EM? NGAIHHLUT LEH NGAIHSAK KAN NIHNA HMUN HI HMUN NUAM KAN TIH BER A NI ȚHÌN*