☆MIN EN LA☆ - 27 By Dingdi Pachuau "Nu....!!" ka ti vak a, ka nu chuan," Eng i ti vak vak chu ni maw! Ka beng i tichhêt zo dâwn alawm!" a lo ti vat a, hmui petin ka han hawi kual a, ka nauteho chuan mak tih hmèl tak hian min lo en țhap mai. Mercy phei chu a lo meng phâwk zual a,"A ring sia, ka phu nasa lutuk a, ka thil ei lai pawh ka dawlh zawk alawm," a lo ti a, a âwm chu a'n chùm pah dat dat a, ka nu chuan," Hre thiam rawh, i u hi a phúr lutuk a nih àwm hi" tiin Mercy hnungah chuan a han zût thla a, kei erawh chuan," A, hetiang thil hi, âwihawm loh lutuk!" tiin chaw pawh ei chhunzawm tawh lo chuan ka tho ta daih a. Zotei lah chuan," A phûr lutuk helhawlh vàng a nih kha," a lo ti zui a, ka va melh nghek ringawt. A mak êm alawm. Ka nu chuan a fiamthu niin a lang bawk si lo, eng atân nge min neih chu a duh ang? A ei siam reng tùrin maw?! Ka kal duh tâk si lohah chuan a ti a ni ngei ngei ang, chutiang ni lo se chuan eng at...
☆24/7☆ - 11 By Dingdi Pachuau
A țhutna lam chu ka melh nawn tawh lo.
A tûkah erawh chuan mitthi ina kal lovin school-ah ka kal ta zâwk, naupangin test tùr an nei a, ka kal loh chuan an hrilh a lo hai lutuk palh ang.
Nizàna ka tlaivàr avàng chuan tlêm chuan ka lu a rit ve deuh, ka lu a hai deuh bawk; mahse, ka thup hrâm hrâm a ni. 'Mite pawh an tlaivâr ve tho a, engtin mah an awm lo' tiin ka intichhel lui hrâm hrâm a, naupang hmuhah phei chuan ka tilang lo hrim hrim, hei hi ka infak vena a ni țhìn.
Zànah erawh Rose-i nèn kan kal leh a, Bsa'n min rawn sâwm a, kan hma ve khawp mai.
Rinfela chu ka mitin a zawng tawh lo, vawiin lam khân ka inngaihtuah harh tawh a! A chhan chu min duh ngai dâwn lo tih ka hre tawh tlat a ni. Hmeichhia rêng rêng a rin loh thu a sawi kha, ka ngaihtuah lêt a, eng vàng nge tih phei chu ka hre hauh lo; mahse, a sawi mai mai lo tih ka hre tlat thung. Chuvàngin, ngaihzâwng ang zâwng leh duh melhin min melh hauh lo tih ka hre kar reng tùr a ni.
Ka thil ngaihtuah avàng chuan ka zâi mang hauh lo, Rose-i chuan min rawn nghawk leh sak țhìn zâwk a, ka harh chhuak leh chauh țhìn. Zia lo thei khawp mai; tlar hmasa bera kan țhu lo chu ka vànnei viau a ni.
Kan bâng har lo, ka mut a chhuak ve viau mai. Ka mit pawh ka khap sak sak ţhin nain ka lo chhîng leh deuh reng țhin, a thîp deuh hlar bawk a, a thial deuh úrh bawk.
In kan thlena Rose-i titi a'n tum viau pawh chuan ka mut a chhuak tawh lutuk a, ka chhâng liam vêl mai mai.
Ka inphih faia mu thei tùra ka inbuatsaih zawh chuan khumah chuan ka let tawp a, muthilh ka châk ber tawh.
"Eng emaw chu a awm a ni tiraw?" a rawn ti leh a.
"Khawiah maw?" mut chhuak aw zet hian ka ti sap a.
"Rinfela nèn maw le."
Ka rûm nghat a," Eng mah a awm lo, ka mu dâwn, min be tawh suh," tiin bang lam hawi chuan ka inlet ta nghâl a.
A nui hak hak a.
"Zaninah pawh khân a hriat vek alawm, kan ep zâwng tak khân a țhu a...a, sawi leh lo mai ang, i phûr lutuk palh ang," a ti a, a tàwp leh daih a.
"Nia, sawi lo mai rawh," ka lo ti ve a, zanin atân chuan eng mah sawi lo se ka duh zâwk, muthilh ka duh ber si a.
A țawng zawm ta bîk lo.
YMA lènpui tàwp zànah erawh ka zâi nasa ve khawp mai. Bâkah, ka harh țha tawh a, mi dang pawh chu zan dang zawng aiin an zâi uar bawkin ka hria.
"Nizànte khân khatiang khân zài tùr alawm," zài chawlh deuh dat lai chuan Bsa chuan a rawn ti sap a.
"Ka zai tho alawm," tiin ka nui a.
"Nizàn kha chuan i zài loh kha, i muthlu reng emaw ka rawn ti zâwk che a," a rawn ti leh a.
Chhàn ka tum lai chuan hla an rawn la leh țan tawh a, chhâng lo chuan ka nuih ringawt a, ka zàisan ta nghâl a.
Rinfela ka hmu ta thut mai! Hmuh loh der tum theih a ni tawh lo, engtin nge ka lo hmuh miah loh zâwk aw ka ti hial a ni! Kan țhutna a inep chiang lutuk si a, min lo hmu reng tawh a ni ngei ang. Ka va en lai pawh chuan mit khap hauh lo hian min lo en kar, ka lài chiang lutuk!
Ka zahzèlah ka hmai ka han tuai ringawt a, chutih pah chuan ka mit ka lèn sawn nghâl, a lum up up mai ka ti! He pa hian ka awm dàn chu a rawn hre chiang ngawt ang chu, ka va duh lo tak!
Ka zâi țha ngam tawh miah lo. Kan inhmu chiang thei lutuk si a, nuam ka ti lo. He pa hi ngaihtuah ka duh lo, tûn dinhmunah phei hi chuan mipa ngaihtuah thei pawh ka la ni lo hrim hrim, ani hlauh phei hi chu...
Ka awm dàn a dik thei ta lo. Ka hawi chhuak ngam tawh lo va, ka zâi tui thei tawh hek lo, ka kut chu ka khàl neuh neuh reng ta mai.
Kan bâng har ta deuh. Bsa car-in kan kal kha a nia, kan haw lamah pawh chuan kal lama chuang ngai bawk kha kan haw leh a, Rinfelate in lam kawngah kan kual phei a, ani pawh a țhiante ni ngei tùr pathum nèn veranda-ah chuan an lo la ding khâwm a. Ka hawi phei lai tak chuan a rawn hawi ve leh a, ka hawi sawn leh chiang khawp mai, min rawn hmu thei dáwn lo tih chu ka hre reng; mahse, ka hlauthâwng tho a nih chu.
Mutnaah chuan a nui deuh kar kar reng a.
"Zanin zet kha chuh!" a rawn ti chhuak a.
"Eng thil nge ni a?" ka lo ti ve a, a lam hawiin ka inher a.
"A rawn en char char che kha, zêp lo mai teh, eng emaw chu a awm ka tih tawh kha," a rawn ti leh a, chîk zet hian min rawn en phei bawk a.
"Min en avàng ringawtin thil awm aawm tihnaa ni lo, nang pawhin amah chu i en ve tho a, thil awm a awm chuang em ni? A thuhrimin, ngaihzâwng atân min duhpui em? I duh lo tawp ang, bâkah, ani pawh khân hmeichhia a ring lo tih ka hria a, eng ang mahin min en lo ang tih pawh ka hria a ni," ka ti ta duah a.
"Mahse...a en dàn che hi chu a dang alawm-" a tih lai mêk chuan," I hre dang mai mai a nih chu, nangmah hian 'dang' ngei tùra ngaiin i hmehbel tlat a," ka lo ti vat a.
A thaw huai a,"Nih pawh a ni mahna le, a hmel hi chu a chhe hran lo tiraw? Awm țha pângngai phei se chuan, a luck phianin ka ring asin," a ti leh daih a.
"Chu kher chu, ka hre bík lo le," ka lo ti a.
"Mahse..." tiin a ngawi leh rih a, chutah," A mak ka la ti tho alawm, a țawng tam lovin hmeichhia hi a be ngai meuh si lo va, nang erawh chu i tlu tùr a pui che a, bâkah, a... a mak hi ka ti ve tawp a ni," a ti nawk nawk a.
"Thil ni lo pui, ni tlat tùrin i zêldin a nih kha," ka lo tihsak a, nuih sak chungin lehlam ka hawi ta nghâl a.
*******
Pangpâr pawh an mawi tawh khawp mai, nutei ina awm ber a ni bawk a, a sawisa peih khawp mai. Kei pawhin tui pêk hi chu ka peih ve a, hmuhnawm ka ti bawk. Rose-i erawh hi chuan a thlêk ngai pawhin ka hre lo, hmeichhia ve si, heti êm êma a han ngaina lo mai hi mak ka ti ru hial țhin.
Lawmsangi'n min rawn bia a, ngaihdam min rawn dîl nasa mai a. A rai thu min hrilh ve daih kha a lo inthiam lo a lo nia, Ațana lahin a be duh si lo. Ațana nèn kan inkâr tihchhiat tum vànga min rawn hrilh kher a ni lo tih chu a sawi mawlh mawlh a, Ațana erawh chuan chutiang chuan a puh tlat hi a lo ni àwm e.
A nih, chutiang a nih si chuan, engvànga min rawn hrilh ve kher nge a nih tâk? Fahrah nihtîr a duh loh vàng khân maw?
Ni lo, helamah hi chuan buai tawh lo teh ang. Hriat kher pawh ka duh lo, thil nih dàn tùr a ni zo vek tawh, awmzia a awm tawh lo va, a siam țhat theih tawh loh. A rai tih kha hre kher lo ta ila chuan, kan inneihna tùr kha a sukuk kher lo maithei; mahse, a hnuah ka hre leh lo thei si lo ang a, rilru hrehawm rêng rêngin tih theih nei tawh si lovin, kan nupa inkârah khì a awm tlat tawh ang a...
Thil țûl lo a ni ka ngaihtuah hi. Hmeichhe thudàwn dik tak a ni.
Lawmsangi hnênah chuan,"I rilru tihhrehawm nân hmang suh, ngaihdam min dìl pawh a ngai lo. Thil kal tawh chu kal liamtír la, i fa tân nu țha tak nih i tum dâwn nia," tiin ka thlah ve tawp. Chu chu atih theih tùr țha berah ka ngai hmiah mai, Ațana'n neih a duh loh tlat si chuan tih theih ka nei lo, ka lo inrawlhna tùr lah a ni hek lo.
Ani lah hi, min la rawn text reng a. Țawngka êm hi chu a inthlahrung ve a ni mahna, min rawn be hran lo. Ka chhiar vek lo nain a rawn sawi tùr hi chu ka ring thiam vek tawh, chhiar kher pawh a ngai lo, a inchhìr thu leh chance vawi khat tal pêk kha a ni a thupui ber chu.
Țhenawmte in pawh an sa zo teuh tawh khawp mai, an bei ngawrh bawk a, a àwm viau a ni. Rinfela thawh thiam ang chin a tàwp tawh a niang, a rawn lang ngai tawh lo. A hlawh tam ve roh khawpin ka ring, a rawn thawk regular ve êm mai.
Ka haw khàt êm avàngin ka pa min tlawh tùrin a rawn kal a, min tlawh tùr ngata a rawn kal chu ka lâwm khawp mai. Sunday thleng châma a tûka haw tùrin ka ti a ni, a chhan chu Inrinniah kan school -a thawkte thil pawimawh eng emawah kan inhmu khâwm dâwn si a, a lo kal ve chhuna awm dun tam loh lutuk chu ka ti ve deuh a ni, bâkah, pateate pawh chuan an chelh ve tho bawk a, ani pawhin in lamah tih tùr a nei lêm lo bawk nèn, kan insâwm thlu thei ta a.
Zirtàwpnia rawn kal a ni a, car chu khalh thiam tho mah se ka nu nèn hian a khalh kan phal ngai lo va, tunah pawh hian sumo-in a rawn kal ve vang vang a ni.
Zîng tâwkah a tho a, kan la mut thlurh thlurh lai chuan pâwnah exer a la a, kan thawh ve meuh chuan a lo lêng chhuak daih tawh niin!
A rawn haw chuan chaw ei nân a la hma deuh a, țhenawm in sak tharah chuan a va lút ve leh rih a, a va awm rei phian a, a hnuah phei chuan ka va ko hial, in neitupa nèn an lo la titi tui lutuk lehnghâl a.
"Pa, chaw ei ve tawh ila, chaw ei khamah chhuah kan ngai sia?" ka va ti dêk dêk a.
In neitupa nupui chu a hriat hnu a lo ni a, chuvànga lo titi hrep chu an lo ni.
Chaw ei khamah chuan muangchâng lutuk lovin ka insiam a, Rose-i chuan scooty chu keng mai tùrin min ti nain ka duh lo va, a remchâng lutuk lo ang, thawhpuite'n lìrthei an nei alawm le. Kan inhmuh khâwmna tùr hmun chu kein ka pan phawt ang, kein ka kal tam ve tawh bawk a, fit pawh ka in-fit ve tawh viau bawk.
Inhmu khâwm tih lêmah kan school naupang pakhat damdawi inah a awm a, zai a ngaih dâwn avàngin kan pahin kan pawisa thawh khâwm kan hlàn dâwn a ni.
Kan rei lutuk lo ve. Serkawnah kan han tlân vang vang a, car leh bike-in kan kal a nih chu. Rei pawh kan awm thei chuang lo, kan haw thla leh chu bazâr lamah ka kual phei leh rih a, eng eng emaw mamawh ka tlachham țan tawh a, lei zawk ka duh a ni.
Ka inlei fel hnu chuan bazâr chhak deuha restaurant lãr ve deuh lam chu ka pan a, chawlh paha inhnawh puar ka tum a ni. Ka tei kual ve deuh bawk nèn, ka ke a kham ngut ngut alawm le, țhut chawlh vang vang ka châk tawh takzet.
Chàwl an lo țhahnem phian mai a, dawhkàn ruak pawh a awm mang lo, ka hawi vat vat a, pakhat chu ka hmu e, zah pawh sawi lo chuan ka pan nghâl ruak ruak, ka ke a kham tawh lutuk si a.
A lo ruak chuang miah lo, pakhatin a lo kîl tho niin; mahse, kîlpui a nei lo hlauh; mahse, Rinfela lo niin! Lêt leh ka tum deuh ut ut a; mahse, ka ke a kham bâkah, eng nge ani a nih avànga ka lêt kher ang? Engah nge ka zah viau lêm ang tiin ka infuih a.
"I hmaa țhutna ruak hi luah an awm lo tiraw?" tiin ka va be ta a.
Min rawn en chho vat a, kei pawh chuan ka en lêt ve ràn, ka zah lo ang. Ni lo, ka lài lo ang.
Min chhâng lo chuan a lu a bu nghat a, rang zetin ka țhu thla nghâl a, ka pheikhawk chu ka tlawh phelh pah zat bawk a.
A nuam huai huai e.
Kan inbe lo, ka bag ken chu chhuatah chuan ka nghat thla a, ei tùr chu ka order nghâl bawk a.
"I va lei tam àwm ve a?"
Min tiphu zawk lo chauh a ni.
"Um, tam a ni mai. I bazâr ve em ni a?" tiin ka zâwt lêt a.
"Aw, thil dang pawh."
A thil lei pawh chu ka hmu chuang hlei law; mahse, ka zâwt nawn chuang lo.
"I pa a țha em?" ka tih chuan min rawn en nawn leh kher, a mit lah chu a khap duh miah lo va. Min en zah a tum a niang ka ti.
"I hriat duh chuan rawn kal la?"
A thil rawn sawi avàng chuan kei pawhin mak ti takin ka en țha leh, a mit meng mawi zet chuan min lo la en reng, ka rilrua awm hi rawn hriat vek a tum a ni àwm mang e tih tùr khawpa chiang hian a nia min en ni.
Chutah, ka ei tùr chah a rawn thlen tâk avàng chuan ka en lêt tawh lo. A thil sawi erawh kha chu mak ka la ti reng, a sawi a nih duh loh hmel ka ti.
"I rawn kan ang chu, tiraw?"
"A damlo tihna em ni?"tiin ka zâwt lêt ve thung a.
"A sawi țhin che."
Engtin maw?!! Min sawi maw? A pain min sawi țhìn maw?! Engtin?
"Min hria em ni?" ka ti lêt háw a.
"A thil khai lai vawi hnih i lo chhâwk tawh kha," a tih chuan nui sak chung hian," Min lo hmu elo?" ka ti a, ka ei tùr chu ka chawk let a.
"Ka be buai tawh lo ang che, ei rawh," a ti leh daih a.
He pa hian min vìn tawh miah lo, a țawngkam pawh a nèlawm lutuk lo nain a zaidam ve ta riau. A inhre chhuak ve tawh pawh a ni mahna.
"I puar tawh bîk a ni maw? Ei leh la," ka ti leh a. Ka biak loh chuan ani lah țawng a tum tawh dâwn si lo va, ka lài lutuk palh ang, ka invèn ve a ngai.
"Ka puar."
"Ka va awih chiah lo ve! Ei nawn leh la?" ka ti leh a. Ei ve leh se, ka thil ei lai min en reng lovin țawng ve bawk se ka ti.
Laih dàltu atân a țha si a. Kei pawh ni dang ang lo takin ka țawng țeuh tawh, ani nèn hian inhma tawn meuhin kan țhu a ni si a.
"Ka puar ka tih chu."
Ka thil ei lai chu min lo en reng tho. Ka zak ve asin, ka laihzia tilang lo tùr chuan ka nuih a.
"In sak kha in zo tawh sia, khawish nge i thawh leh mêk?" tiin a țawng ve theihna tùr chuan ka zâwt leh a.
"Ka chàwl rih," a lo ti mai a.
"I thawk regular sia, i hlawh țeuh ang chu tiraw?" Ka zawh àwm a ni pawhin ka hre hran lo; mahse, ngawih reng ai chuan pawi ka ti lo, a lo haw deuh a nih leh thinrim mai se, kal daih se...
"Țeuh lo."
Min chhâng tawi thei si, zawh tùr dang ka hre tawh lo asin.
"I haw nghâl dâwn em?" ka tih chuan," Kan haw tlâng ang chu," tiin min lo chhâng a, ka thil ei ka hâk țêp a ni, min chhànna chuan min tihrilhhai lek lek si a.
Kan chhuah hnu chuan," Kein em ni?" ka ti chu a lo man thiam ve mai a niang,"A hrisêl ber," a lo ti a.
Ani ber kher ka han kalpui ta chu a nia, inhnaih lo tak chuan kan kal a, kan titi hek lo. Amah chu ka en ngam tawh rih lo va, ka mitsîr erawh chuan ka hmu thei reng tho thung a.
"Làwmthu kha mumal takin ka hrilh lo che a...
" rei fê ngawi renga kan kal hnuah chuan ka ti a.
" rei fê ngawi renga kan kal hnuah chuan ka ti a.
"Ka pa kan tùra i lo kal chuan kan inrùl chiah ang," a lo ti sap a.
A harsat loh tawp chu.
"Sangbawih..?"
Ka ding chawt. Min kotu chu tu nge tih ka hre chiang hle bawk. Eng nge a lo tih leh dâwn ni?
Ka bul maiah chuan a rawn ding nghâl a, min rawn en a, chutah, Rinfela chu a en leh a, min en tawn a nih ber chu.
"He pa hi tu nge?" tiin Rinfela chu a melh zauh a, a mit meng leh awka chhuaka thîkna inphûm chu a hai theih loh. A țawng chhuah dàn hawihâwm lo lutuk chuan min tithinrim tet tet mai.
"Eng nge i lo tih a?" Ka thinrimna chu thup ka tum hrâm hrâm.
"Ka ngai che a..."
A ri chawk mai!
*MI RILRU HNEH I TUM A NIH NGAI CHUAN, I NGEI ZÂWNG TAK PAWH NI SE HRIAT THIAMNA THÛK TAK NÈN A RILRU HNEH TUM ȚHÌN ANG CHE*
Join chur chur theih e..i duh lo thlang ve teh.
Comments
Post a Comment