☆24/7☆ - 13 By Dingdi Pachuau

☆24/7☆ - 13 By Dingdi Pachuau





Țhenawmte ina a rawn thawh leh ring chuan tukverh ațangin ka thlîr ru țhin; mahse, a hmel hmuh tùr rêng a awm lo, a la chàwl reng tihna em ni le, nge, hmun dangah a thawk zâwk? A kut kha a la na reng pawh a ni maithei a ni.



Ka hmuh loh vang vang chuan ka ngaihtuah loh theih mai ka ring deuh  a nia; mahse, a ni miah lo. Ka rilrua ngaihtuah loh lai ka nei mang lo zâwk a ni, zíng ka thawh hlimah ka hre chhuak a, school-a ka kal lahin chhùn chawlh hunah ka hre chhuak ziah, a chhan ka hre bík lo. Ka phone chu ka thlêk leh vang vang țhìn; mahse, phone a nei lo va; lo nei ta tehrêng pawh ni se, a eng mah ka ni lo va, min rawn be dâwn miah lo tih chu ka hre ve tho; mahse, chuti chung chung pawh chuan min rawn biak beisei tlatna thlarau chuan min rawn pâwl ziah tho a nih chu. Zàna ka mut dâwn apianga ka ngaihtuah chhuah hmasak ber a ni ziah bawk. Tunah hian eng nge a tih ang, a mu ve tawh ang em, nge, a țhiante nèn khawilai hmun emawah an țhu khâwm leh mai mai em ni ang tih hlîr mai, țangkai miah lo leh awmze nei lo tak hlîr a ni ka ngaihtuah ziah ni, heti khawp hian ka ngaihtuahna a luah thei ang tih tu nge hre phâk ang le?



Hetia ka ngaihtuahnaa a chèn tâk thut avàng hian ka ngaih lam lam a tițha lo lek lek, ani hian zàwlaidi hi min lo tât ru reng a ni lo maw tih thleng mai a nia ka ngaihtuah ni! Mahse, ka ring ngam meuh chuang lo. A ngaihtuahnaa ka awm ve loh hlauh phei chuan ka va khawngaihthlâk dâwn tak!



Inrinni tûk khat chu ka rin loh deuhnaah ka hmu! Nutei nèn kan bazâr a, chawhmeh lei tùr ena nutei a buai lai chuan kan piah maia a ding chu ka hmu ta thut mai! Ka awm dàn rawn danglam nghâl chu inthunun tum takin thâwk ka la hak a, chutah, boruak tam tâwk hîp lûtin muangchângin ka thaw chhuak leh ta a, ka thinphu pawh tlêm chuan a zia ta deuh...in ka hria.



Ani pawhin min rawn hmu e, min rawn en phei ve tlat.



Biak ka tum deuh lai tak chuan nutei chuan," Sawlaiah sâwn kal leh teh ang, nichina mi kha a tlâwm zâwk tlat," tiin kan kal tawhna lamah chuan inher vutin a kal ta nghâl a, zui loh theih pawh a ni lo, Rinfela pawh en nawn ngam tawh lo chuan ka zui ve nghâl bawk a.



A hnuah sa zawrhna bulah ka hmu leh. Chutah erawh vànneihthlák takin ka be thei ta hlauh e, nutei ka lo nghâk miau a.



"I inlei zo tawh em?" tiin.



Min rawn en a, ka lo nuih a. Chutah, chiang leh zuala min rawn en lehin,"Min be lo hlen law law mai la," a rawn ti ta daih a.



Makti rilru deuh chuan ka en a, a thil sawi awmzia chu ka hria; mahse, eng vànga sawi nge a nih ka ngaihtuah. Nichina ka biak loh vàng kha a ni thei ang em? Biak ka tum reng kha, ka be hman ta lo mai pawh a.



"I pa a țha em?" ka ti ve ta daih bawk a.



A meng zîm deuh hlek a, chutah, mit lehlam siai deuh hlek hian," Pehhêl tum suh," a ti leh ngat a.



Hmun dang daih enin," I pa chu a țha a nih ka ring, chuan, i kut kha a dam tawh em? Hna i thawhpui thei tawh ang chu maw?" ka ti a, a lam chu ka hawi leh nghâl  tho nain a mitah erawh ka en duh tawh lo va.



"Ka pa chanchin chu, i ngaizâwng deuh em maw ni le?" a tih sup chuan phâwk zeta en chhovin, ka en ta ràn mai a; ani erawh a hmel a danglam chhin miah lo.



"Engtin nge...!"ka tàwp chat. He pa hian thil âwihawm loh lutuk a sawi a, chu chuan ka intihthinrimtîr lo ang, min tihthinrim a tum a ni ngei mai, a thil tum ka tihlawhtling lo ang.



"I thil sawi mai mai khân ka thin a tirim phâk lo, nang pawhin i âwih loh tawp kha," ka ti leh ta zâwk a.



A langah nui miah lo mah se a mitmenga nuihzatna chu ka hmu thiam ve reng, he pa hi a nuih a zâ a nih te chuan nuih chhuah ve mai àwm, inla-ngêng leh lutuk mai.



"Khatiang rawng kha i inhmeh," a ti leh daih. Ka kawr hâk chu a lo melh leh daih tawh niin, ka âwm zâwn kher a lo melh bawk si a, nuam lo ka tihzia mai chuh! Ka âwm chu hup mai ka tum zuau a; mahse, ka ti ta êm lo. A thil sawi chuan min tilâwm viau a; mahse, chhûngril lamah min tilum up up thung, min tilai miau si a.



"Khu, i pi a lo kal e," tih leh kal sawn a rual ta nghâl a. Ka nutei, step-a rawn chho mêk chu ka zu en thla vat a. 'I pi' a ti maw kha, ka pi a ni tawp si lo, ka nuih chu a tiza ru angreng khawp mai.



Ka bul a rawn thlen chuan," Nichina i bula ka hmuh kha Pu Sawma fapa kha a ni em? Thil rûk hmang an tih kha?" a rawn ti hlap hlap a, step chho rawn kal a nih vàng chuan a thaw pawh a lian khawp mai.



"Aw, ni e." 'Ni e' tia ka chhàn hi chu a zawhna hmasa zâwk a ni a, a hnuhnung zâwk hi chu ka chhâng tel lo.



"Kha pa kha a hna thawh kha chu a țhat kha le; mahse, ka hlau deuh hlek a, mi sawisep a kai si a, kan ina a lo thawh lai pawh khân ka lo thlîthlai deuh reng a, thil bo chu kan nei ta lo chuan ka hria," a ti leh duah a.



"An sawi ang hi chu a ni vek bík lo ang," ka lo ti a.



"Ni e, mi an hming a chhiat tawh laklawh hi chuan hming țhat hlawh leh hi a har tawh a; mahse, fîmkhur tluk hi a awm chuang lo a nia, hnaih tam loh hi a him," a ti leh hrâm a.



A hnung lam chu ka melh deuh hrâwk. A thil sawi chu a dik lo ka ti miah lo; mahse, ka rilru a tina deuh tlat a nih chu. A zia lo thei, a hming a țha lo deuh zâwnga an sawiin ka lo na ve țan ta tlat mai a nia.



Keimah hi a ni dik lo ta ber chu. Heti zâwnga en tùr hi ka ni lo maw le; mahse, ka rilru hi...ka thinlung hi ka thunun thei ta tlat lo, a nasat tak tak hmain thunun hrâm ka tum tùr a ni, hmalam hun kan nei thei chuang lo ang.



Ka thil ngaihtuah chuan min tingui sawt mai, ka lo ngawi leh vung vung țhìn a ni ngei ang, nutei min biakna pawh chu ka lo hre lo niin, a zia lo tak tak a ni.



Kan inkârah eng mah la awm lo mah se hlatsan tùr anga ka indah chhin pawhin hrehawm ka ti, kan 'ni' pawh a la ni tawp si lo va; mahse, a zùnah hian ka uai tawh dèr chu a nih si hi.



"Dik lo a awm em ni? I va ngawichawi ve a?" nui chung hian Rose-i chuan a, inkhâwm tùr chuan a insiam mawlh mawlh a, kei pawh khumah țhuin ka sam ka zût ka zût a.



"Awm lo ve, ka ngawi mai mai," ka lo ti a.



"Nge, Lalrinawmlova(Ațana hming a sawi dan) i ngaihtuah leh deuh? Nang hi, in lo inbe țha leh deuh tawh a ni em?" min rawn en pah chuan a ti leh a.



"Ni mai mai lo," ka lo ti thung a.



"A nih chuan... Rinfela-" a la sawi zawh hma chuan tho thutin," Sawi tawh lo teh, chutiang eng mah a awm lo," ka lo ti vat a, thu dang a sawi tam leh hmain room ațang chuan ka chhuak ta daih a, a nui zui kar kar chu ka hre reng a.



A hmingin ka inkhâwm ve mai chu a ni, ka rilru a kal ding lutuk a, thu sawi pawh ka ngaihtuah lo. A zia lo takzet a ni, keima harsatna insiam chawp vàngin Biak Inah hial pawh ka tih duh ngai miah 'thil dang' ka ngaihtuah ta daih mai a nia!



Haw kawngah Bsa kan hawpui a, Rose-i nèn chuan an titi sap sap a, kei erawhin an bulah ngawi rengin ka lo zui ve hnak hnak a. Tlangvâl lo awm khâwmna țhin bul kan thlen chuan an lo awm leh tawh tih chu ka hmu nghâl a, Rinfela pawh a awm leh ngei ang chu. Tihian, zan tin a pa a chhuahsan țhìn a ni àwm si a, helai hmuna awm kual mai mai lo hian a pachu awmpui ve ta mai mai zâwk se aw...



"In inkhâwm bâng chiah a ni maw?" tiin pakhat hian min lo bia a.



Hmeichhe pahnih chuan chhàn kan tum lêm lo a niang, kan ngawi tlat a.  Chhàn pawh tum mah ila Bsa chu kan khalh hman lo ang.



"Aw, in lo inkhâwm ve lo va, kan kim loh phah vek alawm,"tiin a chhâng a.



"Nia, keini chu kan sual êm mai a, Biak In chhûng dâi tlâk pawh kan ni lo, châk ve viau țhìn mah ila kan sualna hian min ûm pha hneh lutuk a," chu pa bawk chuan a ti leh a, a aw ațang chuan a rui tih ka hre thei mai. Nichin kha chuan a țawng thui lo êm a, rùi aw kha a hriat hman loh a lo ni.



"Mi sual vek alawm kan nih, kan sual avàng tak hian kan pan a ngai zâwk alawm. Naktûkah chuan lo inkhâwm tawh ula?" Bsa chuan a ti a.



"Aw le, kan lo tum dâwn nia,"tiin ani chuan țawngkam țha zet chuan a lo chhâng a, kan kalsan ta a.



An lo inkhâwm chu ka ring chuang lo, inkhâwm loh hi a lo awlsamin a lo nuam bawk si a, inchei a ngai bawk si lo, duh duh dànin a awm theih bawk si.



"Tikhân an rùi thle mai mai si a, a châng hi chuan an duh dàna awm ni mah se, ka khawngaih țhìn, an țawngkam lah hi a țha thei hrep bawk si a," Bsa chuan a ti vang vang a.



"Pathian thu pawh an hria, an sawi țeuh thei," Rose-i chuan a lo ti a.



"Kristian ram kan nih vàng hian nu leh pa ațangin Pathian thu hi chu kan hre nasa a, inkhâwmnaah, sande school-ah, school devotion-ah leh chhûng inkhâwm leh a, a tam thei ang chu, thu țha kan inhrilh nasa bawk a, a mimir hian kan hriat phah alawm," Bsa chuan a ti a.



"Kan hria a, zawm erawh kan harsat si a," ka lo ti zauh a.



"Dik chiah, nunpui hi kan harsat ta a ni, kan mutànna lai ber chu a taka zàwmtu, nunpuitu nih hi a ni," Bsa vêk chuan a ti leh a.



"A harsa ve alawm, sual saa piang vek kan ni bawk si a," Rose-i chuan a lo ti ve a.


*******


Favàng huna Aizawla phei tum kha an nia, ka pateate nupa pawh chu ka awm avàngin in lam ngaihtuah lutuk lovin an phei ve ta. Zin khawthawn pahin chhûngte an tlawh ang a, an hman chuan inentîr an tum cheu bawk, patea'n kâr khat lai chawlh a la miau alawm.



Rose-i chuan,"Nuam singkhaw a ni mai tiraw? Pahnih chauh kan ni bawk a, ei tùr kan intuituah nasa dáwn nia," a ti sauh sauh a.



Amahin ei tùr a rawn lei haw țawk a, pawisa a nei bawk a, a tui chi hlîr a ni. Kâr khat chhûng hian kan thau hnawk hman ang tih a hlauhawm khawp mai.



Rinfela ngaihtuah loh hrâm ka tum tawh avàng chuan tih tùr ka dap nasa zual a, naupang zirlai ka bih loh kârin lehkhabu chhiar tùr ka zawng a, tlêm chuan a zia deuh, ka chhiar lai chuan; mahse, zàn a lo ni a, mut a lo hun a, he hun tak hi alawm buaithlâk ber chu.



Phone en ila, Ațana message hmuh tùr a lo awm ve chhên zêl bawk si, ka ning hluah hluah.



Zan khat chu Bsa lo lêng chuan," Zanin chu chance min pe la," a ti khut mai a, a nui duh miah lo lehnghâl a.



Nui chung hian,"Ninawm e, lènna tùr ka hre hleinem," ka lo ti a, Rose-i chuan rang zet hian,"Nu Senite dàwrah thil lo va lei la," mit siai sak chung hian a lo ti a.



"In va ninawm dùn tak e aw! A nih, ka chhuah hlànin lo che nasa lutuk lo ula aw, dârkâr khat vêl chiah a niang, ka awm rei lutuk chuan min ringhlel palh ang," nui var var chung chuan ka ti a, room-ah lûtin pawisa ka va la a, in ațang chuan ka chhuak ta nghâl a.



Nu Senite dàwrah chuan ka va kal ta ngei a; mahse, ka awm rei peih lo. Mi dang an lo awm ve nual bawk si a,tlangvâl kâra nula va țhut ve reng ringawt chu mawi ka ti lêm lo a ni. Han lènna tùr dang ka hre hlawl bawk si lo, zàn chu ni kher lo se chuan ka hre ve mahna!



Țhenawmte in sak tharah chuan ka lût ta mai mai, in chhûng chu a luh theih chuang loh a, veranda zau nuam zetah chuan ka tei kual a ni zâwk mah. Țhutna awmah chuan țhuin ka phone ka en a, tunah hian in ka chhuah ațangin minute 15 bâk a la ral lo, minute 45 zet ka awm bo a la ngai.



Ka pateate in bul vêlah hian mi dang an awm hnai lutuk lo va, tuna in rawn sa tharte nèn hian an inhnaih viau ta zâwk a, in inkârah kawngpuiin a tan tlang a, pateate hi an compound a zau deuh vàng pawh a ni maithei, an țhenawmteho nèn pawh kan inlènpawh pha meuh lo.



Phone ka khalh nauh nauh lai chuan,"Tu emaw nghah nei i ang," ti ri ka hre thut mai chuh, ka ding zawt lo chauh! Ka phone pawh ka thlauh țêp a ni.



Ka ngaihtuah duh loh, ka ngaihtuah loh theih si loh leh hmuh ka tum loh; mahse, hmuh ka hmuh châk êm êm țhin si chu ka hmaah chuan bang nghèng hian thatchhiat hmèl zet si hian a lo ding reng tawh niin!



"Eng nge i lo tih a?" tiin ka țawng chhuak thei ta hrâm.



"Ka hmu che a," a lo ti sup ringawt a.



"Nia..." ka ti ban chat. Sawi mai tùr ka hre tlat lo, hmuh ka inrin loh lutuk ka hmu tlat si a, ka kha a chih tlat, tihmàwlin ka awm.



"Ka rawn tibuai che em?" a rawn tih leh sup chuan," Aih," rang zet hian ka lo ti vat a.



Kan ngawih leh vang vang hnuah chuan,"Min lo nghâk tihna a ni thei em?" a rawn tih leh chuan a hmel lang chiang lutuk lo en chhoh pah chuan,"Aih...ka la mu peih rih lo va," tiin ka hawi sawn ta daih ringawt.



"I va la thutak ve a?" a tih leh chuan hrethiam lo zet hian ka en chho leh a, nichin khân a lo fiamthu reng tihna em ni?



"Eng chu? Ka la mu peih rih lo tak tak alawm," ka ti țha leh a.



"A țha," ti supin min rawn hnaih sawt a, kei lahin ka lo en reng ringawt a, ka bul hnaihchilh deuh taka a rawn din thleng chuan chët sawn pawh ka lo tum chuang lo.



"Heta hmuh che hi ka inring miah lo va, i inkhâwm zàn tih loh, i vawi khat chhuahna a ni hial lo maw?" a rawn tih chuan," Ni lo, mitthi awm pawhin ka chhuah kha, in in bula thi an awm pawhin kan rawn kal kha," ka lo ti a.



"Hmeichhe duhawm tak hi chu zànah mahni chauha chhuah a him lo asin," a rawn ti leh sup a.



Ka phone chu ka hmet êng a, ka bih chuan minute 20 hun ka la nei, dârkâr 1 ka lo sawi ta kher kher kha ka inngei ta rum rum mai.



"Ka thil sawi chu..?" a rawn tih chuan min rawn si lo chauh tawh tih ka hre thei, kei lah tawlh sawn tùrin bang ka nghèng ràn tawh mai si.



"A dik alawm; mahse, chhuakah pawh ka lo inngai hran hleinem, thil ka lei lawk a, pâwn boruak hìp ka la duh rih a," ka ti leh ringawt a.



Țawng tawh lo chuan hnai zetah chuan min rawn en chhuk ràn mai a, chhûngril lam pump-na vàng chuan ka khùr ru deuh dar dar, hetianga hnaia min en chuan chiang takin min hmu thei lo ang pawh ti mah ila ka awm dàn chu a hria ang tih ka hlau tho. Thâwk pawh ka thaw țha ngam tawh lo, ka lung phu ri pawh chu a ring tawh mah mah a ni, amah vàng hian a phu rang hle a ni tih a hriat ka va hlau si êm!



Ka chil chu ka lem ringawt a, chumi rual chiah chuan ka hawi sawn a; mahse, a kut pahnih chuan rang lutuk hian ka biang tawnah rawn dawmin amah en tùr chuan min kuai her nghâl a.



Thil thleng tùr chu ka hre chiang ngang mai. Ka hre chiang lutuk a, ka hlauthâwng rilru zâwk a ni!



"Min en rawh."



A aw, thupe aw leh ngenna aw ni tel pah tho si vàng chuan ka en lo thei lo, hmai insi lo chauhin kan inen ta ràn mai.



Rei tâwkfang kan inen hnuah chuan a mit chu ka hmui lamah a rawn lèn thla a, chutia ka hmui a en vàng chu a ni ngei ang chu, ka hmui chu a khùr deuh ta dar dar mai.



A dinglam kutzungpui chuan ka hmui khùr deuh dar dar chu dìm zet hian a rawn tuai zauh a, chutia a tih lai mêk chuan ka mitah tak a rawn en leh a, chutah, rawn kûn hniam deuhin ka rin loh deuhin ka chalah a rawn fâwp ta tlat mai!



Ka hmuia min rawn fawh ka rin tehlul nen, ka kut chu nghet zetin ka hûm ngawt ngawt a, ka lung a awi lo deuh ringawt a nih chu, zahthlâk hian!



"Beiseina."



A thil sawi chu zàwi viau mah se ka hre thei tho. Eng a sawi tumna nge ni ang aw tih ka ngaihtuah buai lai chuan a hmui lum thar thar, ka chal a fawhna ngei chuan ka hmui chu a rawn fâwp ta chiah.



A bo vek! Ka thil ngaihtuah kha a thlâwk bo vek! Ka thinphu pawh a chàwl...in ka hre hial mai! Tunah tak hian hun hi a ding țhup a ni, he khawvêla thil awm zawng zawng che lai hi a ding țhup a, kan hmui pahnih chauh tih loh chu chê rêng awm lovin a chàwl țhup ni maiin ka hria!



Ka awm dàn chu ka sawi fiah thiam lo, damdawi ngaite'n an damdawi ngaih an han ti a, an taksa hnaa han thawka an thlâwk kâng delh delh țhìn an sawi hi ka intehkhin ber, ka thlâek delh delh ni berin ka hria.



Engtia rei nge kan awm pawh ka hre lo hial a ni, ka phone chhuata a tlâk rîk tâkah chuan ka harh chhuak ta hlawl mai!



"Ka lût tawh dâwn!" tiin chhuata ka phone tla chu ka chhar a, ka ding chhuak chu ka pai deuh nak nghe nghe asin. Min rawn ban zui lo va, 'kal rih suh' pawh a ti hek lo. Ka kal sawn chiah chu zahna hian min rawn man a, ka tukkhum lam chu a hit mer mer mai, min rawn en zui a ni ngei ngei ang.






*HARSATNA, LUNGNGAIHNA, HLIMNA LEH LÀWMNA HI CHU KAN TAWHA KAN NEIH TÙR VE RÊNG A NIA, MIHRING KAN NIHZIA LAN CHIANTÎRTU A NI, KHAWVÊLAH KAN LA CHÊNG MIAU MAI SI A*